Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 4-й де́нь.
Слу́жба свята́го благовѣ́рнаго вели́каго кня́зя Гео́ргія Все́володовича, Влади́мірскаго чудотво́рца.

НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 1. Подо́бенъ: Небе́сныхъ чино́въ.

Христіа́номъ забра́ло крѣ́пкое,* столпа́, непоколеби́маго* мучи́тельскими преще́ніи,* купца́ всеизря́днаго,* тлѣ́нная на нетлѣ́нная измѣни́вшаго* и на́съ свы́ше назира́юща,* вѣ́рно ублажи́мъ.

Изря́днаго страда́теля вси́ Гео́ргія* свѣ́тлаго храбо́рника,* ны́нѣ на́мъ возсія́вшаго* и́стиннаго страда́нія луча́ми,* воспое́мъ, веселя́щеся,* и того́ моще́мъ покланя́емся.

Сла́ва, гла́съ 6:

Дне́сь Россíйская страна́ страстоте́рпческими просвѣща́ется заря́ми, и Христо́ва Це́рковь, цвѣ́ты украша́ема, Гео́ргіе, вопіе́тъ ти́: уго́дниче Христо́въ и предста́телю те́плый, не преста́й моля́ся о рабѣ́хъ твои́хъ.

И ны́нѣ, богоро́диченъ:

[Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Имамы тя́ мно́гихъ* да́теля дарова́ній,* уго́дниче Госпо́день,* исполня́еши бо проше́нія,* я́же и́мамы всегда́.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Пѣ́нія сла́дкая,* страсте́й похвале́нія,* благода́темъ воздая́нія,* предложе́ніе, блаже́нне,* пріими́, Гео́ргіе.

Сти́хъ: Насажде́ни въ дому́ Госпо́дни,* во дво́рѣхъ Бо́га на́шего процвѣту́тъ.

Добро́та страда́льцемъ,* благолѣ́піе му́ченикомъ,* царе́мъ храни́телю,* пріими́ ны́нѣ похвалу́* вѣ́рою сла́вящихъ.

Сла́ва, и ны́нѣ, богоро́диченъ, гла́съ и подо́бенъ то́йже:

Дѣ́ло благолѣ́пно,* Дѣ́ва по Рождествѣ́,* рожде́ніе Бо́гъ Сло́во,* человѣ́че естество́ имѣ́яй* и явля́я Боже́ственная.


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры, гла́съ 1. Подо́бенъ: Всехва́льніи.

Исма́ильтескими кума́ны* твое́ му́жество не прело́жься,* благовѣ́рный вели́кій кня́же Гео́ргіе прехва́льне,* и Боже́ственною благода́тію* побѣдоно́сецъ яви́ся* и ли́къ приве́лъ еси́ му́ченикъ,* Христу́ во́инствуеши,* отъ вся́каго, сла́вне, во́зраста совокупля́емь* и отъ ро́да вся́каго составля́емь.

Гео́ргіе прехва́льне,* кра́сный ли́къ соста́вивъ* спострада́вшихъ съ тобо́ю,* съ ни́миже подвиза́лся еси́ до́брымъ по́двигомъ,* тече́ніе соверши́въ твоего́ му́жества страда́ніе.* Тѣ́мъ моли́ся* дарова́ти душа́мъ на́шимъ* ми́ръ и ве́лію ми́лость.

Во́ини богому́дріи,* Христо́вымъ раче́ніемъ распаля́еми,* не́мощи есте́ственныя забы́ша* и, си́лою Боже́ственною* я́вѣ укрѣпля́еми,* го́рдость безбо́жныхъ попра́ша,* не устраши́вшеся муче́нія болѣ́зней* и ме́чнаго стремле́нія не убоя́вшеся.

Сла́ва, гла́съ 4. Самогла́сенъ:

Пѣ́сненно пастыренача́льника дне́сь, вѣ́рніи, единомы́сленно почти́мъ, Гео́ргія сла́внаго со дружи́ною его́, и́же кро́вь пролія́ша за правосла́вную вѣ́ру. Тѣ́мъ и язы́ческій я́ростный о́блакъ попаля́ше на лицы́ земли́, облича́я на́шу триплете́нную зло́бу. Тѣ́мъ, Христе́ Бо́же, и́же Своего́ страстоте́рпца укрѣпи́въ, и на́съ соблюди́, я́ко всѣ́хъ Влады́ка, отъ искуше́ній и скорбе́й моли́твами святы́хъ Твои́хъ.

И ны́нѣ, пра́здника или́ богоро́диченъ:

[Иже Тебе́ ра́ди богооте́цъ проро́къ Дави́дъ пѣ́сненно о Тебѣ́ провозгласи́, вели́чія тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́ждшее горохи́щное обрѣ́тъ овча́, на ра́мо воспріи́мъ, къ Отцу́ принесе́тъ, и Своему́ хотѣ́нію, съ небе́сными соедини́тъ си́лами, и спасе́тъ, Богоро́дице, мíръ, Христо́съ имѣ́яй ве́лію и бога́тую ми́лость.]

Вхо́дъ. Проки́менъ дне́. Чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 4:

Яко звѣзда́ пресвѣ́тлая, мíръ просвѣща́еши чуде́сными блиста́ніи, страстоте́рпче, вели́кій кня́же Гео́ргіе, мра́къ грѣхо́вный отгоня́я. Тѣ́мъ восхваля́емъ, ра́достно торжеству́юще, твою́ па́мять.

Ка́плями кро́ве твоея́ очервлени́въ ри́зы твоя́, страстоте́рпче Гео́ргіе, тѣ́мъ, весе́лымъ се́рдцемъ па́мять твою́ пра́зднующе, мо́лимся непреста́нно, да мо́лишися ко Го́споду за ду́ши на́ша.

Свѣтоза́рная и свята́я наста́ па́мять вели́каго кня́зя и страстоте́рпца Гео́ргія, я́же Россíйскую зе́млю просвѣща́ющи и мра́къ грѣхо́вный отгоня́ющи, исцѣле́ній благода́ть всѣ́мъ источа́етъ.

Сла́ва, гла́съ 2:

Разу́мнаго свѣти́льника вѣ́ры, Гео́ргія восхва́лимъ, до́брѣ пострада́вшаго и кро́вію муче́нія своего́ це́рковь обагри́вша. Тѣ́мъ и прія́тъ исцѣле́нія да́ръ оби́льный, исцѣля́ти неду́ги вѣ́рно приходя́щимъ къ ра́цѣ моще́й его́.

И ны́нѣ, богоро́диченъ:

[О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Въ Россíйстѣй земли́,* я́коже со́лнце, возсія́* заря́ми страда́нія,* всѣ́хъ привлача́ сердца́ и помышле́нія* къ твои́мъ чудесе́мъ, пресла́вне.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Россíйская племена́ вся́,* ели́ка благочести́вая,* духо́внѣ ликовству́йте пѣ́сньми* вели́каго кня́зя* Гео́ргія, пострада́вшаго.

Сти́хъ: Насажде́ни въ дому́ Госпо́дни,* во дво́рѣхъ Бо́га на́шего процвѣту́тъ.

Послѣ́днимъ си́мъ времене́мъ* ты́ красота́ показа́лся еси́,* му́чениковъ обновля́я страда́нія* и до конца́ низлага́я* пре́лесть, блаже́нне, душегу́бную.

Сла́ва, гла́съ 8:

Лука́вое и невѣ́рное злосовѣ́тіе Баты́ево проразумѣ́въ, благовѣ́рный вели́кій кня́же Гео́ргіе, де́рзостію духо́вною по Христѣ́ подвиза́лся еси́ съ дружи́ною и, ку́пно до́блественнѣ му́жески терпѣ́ніемъ пострада́вше, глава́мъ усѣка́емымъ, стра́шенъ въ му́ченицехъ показа́лся еси́. Дерзнове́ніе имѣ́я къ Бо́гу, моли́ отъ прегрѣше́ній лю́тыхъ изба́витися душа́мъ на́шимъ.

И ны́нѣ, пра́здника или́ богоро́диченъ:

[Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.]

Тропа́рь, гла́съ 8:

На высотѣ́ вели́каго княже́нія сѣдя́, яви́лся еси́, благоче́стіемъ и вѣ́рою сія́я оте́честву своему́, я́ко со́лнце; по Святѣ́й Тро́ицѣ ре́вностію разже́гся и за вѣ́ру крѣ́пко пострада́въ, кро́вь твою́ пролія́лъ еси́. Тѣ́мъ и отсѣ́ченная твоя́ за Христа́ глава́ свидѣ́тельствуетъ я́вѣ о тебѣ́, прилѣ́пшая по сме́рти къ тѣлеси́ твоему́, съ не́юже и до дне́сь нетлѣ́нны пребыва́ютъ мо́щи твоя́, отъ ни́хже источа́еши исцѣле́нія душа́мъ и тѣлесе́мъ на́шимъ. Но я́ко дерзнове́ніе имѣ́я ко Христу́, страстоте́рпче Гео́ргіе, непреста́нно моли́, держа́ву твою́ и сро́дникъ твои́хъ, безвре́дну сохрани́ти моли́твами твои́ми.

Сла́ва, и ны́нѣ, пра́здника, или́ богоро́диченъ:

[Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.]


НА УТРЕНИ,
По 1-й стихоло́гіи сѣда́ленъ, гла́съ 4. Подо́бенъ: Яви́лся еси́ дне́сь.

Гео́ргія дне́сь страстоте́рпца пра́здникъ сотворя́емъ богому́дренно, я́ко Христу́ непреста́нно моля́щася всѣ́мъ да́ти ми́ръ и ми́лость. [Два́жды.]

Сла́ва, и ны́нѣ, богоро́диченъ:

Те́плое заступле́ніе су́щимъ въ бѣда́хъ, на́шу помо́щницу и къ Бо́гу премѣне́ніе, Ея́же ра́ди тли́ изба́вихомся, Богоро́дицу, вѣ́рніи, ублажа́емъ.

По 2-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Па́мять твоя́, сла́вне му́чениче Гео́ргіе, уясни́ дне́сь Це́рковь Христо́ву и вся́ собра́ пѣ́сньми по достоя́нію восхвали́ти тя́, богому́дре, я́ко вои́стинну во́ина и враго́въ потреби́теля. Тѣ́мже мольба́ми твои́ми изба́ви на́съ отъ искуше́ній. [Два́жды.]

Сла́ва, и ны́нѣ, богоро́диченъ:

Пое́мъ Тя́, Богоневѣ́сто, Ма́ти Христа́ Бо́га, сла́вяще Рождество́ Твое́ непостижи́мое, и́мже изба́вихомся отъ ле́сти діа́воли и вся́ческихъ бѣ́дъ, Влады́чице Богоро́дице, и вѣ́рно взыва́емъ: поми́луй ста́до Твое́, Еди́на Всепѣ́тая.

По поліеле́и сѣда́ленъ, гла́съ 8. Подо́бенъ: Прему́дрости.

Сія́ніи чуде́съ, я́ко лучи́, облиста́еши, и вся́ просвѣща́еши мíра концы́, я́ко звѣзда́ пресвѣ́тлая, и красно́ благоуха́еши, я́коже другíй ра́й, и ду́ши весели́ши, и уставля́еши неду́ги. Тѣ́мже тя́, всеблаже́нне, по до́лгу пое́мъ и любо́вію почита́емъ честну́ю па́мять твою́, страстоте́рпче вели́кій, кня́же Гео́ргіе: моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Возвесели́тся пра́ведникъ о Го́сподѣ* [и упова́етъ на Него́]. Сти́хъ: Услы́ши, Бо́же, гла́съ мо́й, [внегда́ моли́ти ми ся къ Тебѣ́]. Вся́кое дыха́ніе... Ева́нгеліе отъ Матфе́я, зача́ло 36.

По 50-мъ псалмѣ́ стихи́ра, гла́съ 6:

Дне́сь Це́рковь торжеству́етъ, страстоте́рпца крася́щися по́двиги, я́ко многоцѣ́нною оде́ждею, и вопіе́тъ, хва́лящися: сицева́ моя́ рожде́нія, таковы́ мои́ сы́нове, и́хже пе́рвѣе породи́хъ креще́ніемъ, воспита́хъ же стра́хомъ Госпо́днимъ, и ны́нѣ му́ченики ви́жу, и́стинѣ вѣне́чники избра́нны, да мо́лятся о вселе́ннѣй ко Го́споду.

Кано́нъ Богоро́дицы на 6, гла́съ 2: Нетре́ну, необы́чну... Кано́нъ свята́го на 8, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Новоявле́нъ му́ченикъ, блаже́нне Гео́ргіе, вселе́ннѣй напослѣ́докъ яви́ся, тѣ́мже ми́ пода́ждь сло́во твое́ Бо́жіею благода́тію, твоя́ по́двиги воспѣ́ти по достоя́нію.

Во́инствомъ досточу́днымъ твоего́ сопротивле́нія побѣ́дная прія́хомъ на мучи́теля естеству́: соверше́ннѣ бо посра́мленъ бы́въ, не ктому́ мучи́тельская дерза́ти начина́етъ.

Одѣ́явся во броня́ исповѣ́даніемъ вѣ́ры и шле́мъ возложи́въ благода́ти свѣтлѣ́йшій, и язы́комъ же, Гео́ргіе, благовѣща́ннымъ, я́коже мече́мъ, ссѣче́ окая́ннаго Баты́я.

Богоро́диченъ: Гора́ превысо́кая, ю́же ви́дѣ Даніи́лъ, ка́мень горы́ отсѣче́ся, кромѣ́ ру́къ му́жескихъ, Тебе́ прообразова́, Богоро́дице: безъ му́жа бо на́мъ пло́тію родила́ еси́ Емману́ила.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Му́ками, я́ко зла́то честно́е, искуси́лся еси́, страда́льче сла́вне, и Царе́ви си́лъ прине́слся еси́, всепло́діе словеси́ и́стинно вмѣ́сто огня́ олта́рнаго мече́мъ истнѣ́емо.

Съ ва́рваромъ бра́вся, сего́ побѣди́лъ еси́ и, отъ Христа́ дерзнове́ніе пріи́мъ, мно́гу печа́ль бѣсо́мъ сотвори́лъ еси́, святы́мъ же а́нгеломъ весе́ліе и ра́дость, съ ни́ми же водворя́ешися.

Ма́слина плодови́тая въ Це́ркви Жива́го Бо́га, твои́хъ моще́й ра́ка ны́нѣ яви́ся, отъ нея́же пріе́млемъ разли́чная неду́говъ исцѣле́нія, и́же тобо́ю обога́щшіися и чудесы́ твои́ми крася́щіися.

Богоро́диченъ: Рече́ боже́ственный Іезекíиль: и бу́детъ две́рь затворе́на. И сіе́ на Тебѣ́ испо́лнися, Влады́чице: вни́де бо несказа́нно въ Тя́ Отчее Сло́во, и мíру яви́ся Плотоно́сецъ изъ Тебе́, Дѣ́во, сохрани́въ Тя́ во обои́хъ.

Сѣда́ленъ, гла́съ 8. Подо́бенъ: Прему́дрости.

Прему́дрости рачи́тель бы́въ, сокро́вище добродѣ́телей, отону́дуже и почерпе́ Боже́ственная разумѣ́нія, тѣ́мже и вре́мени прише́дшу, къ подвиго́мъ усе́рдно подви́гся, пріе́мля му́ченическія ра́ны: главѣ́ усѣче́ніе, и кро́ви истече́ніе. И ны́нѣ живе́ши въ неизрече́ннѣ свѣ́тѣ съ му́ченики. Тѣ́мже вопіе́мъ ти́: моли́ Христа́ Бо́га грѣхо́въ оставле́ніе дарова́ти покланя́ющимся вѣ́рою святы́мъ моще́мъ твои́мъ. [Два́жды.]

Сла́ва, и ны́нѣ, богоро́диченъ:

Помышля́ю су́дъ и испыта́нія стра́шная, трепе́щу и ужаса́юся му́къ, и огня́ болѣ́зни, и тму́ же, и та́ртаръ. Увы́, что́ сотворю́? Сту́дъ ка́ко претерплю́, егда́ кни́ги разгну́тся, и дѣя́нія облича́тся? Сего́ ра́ди припа́даю Ти́, Богоро́дице Пречи́стая, тогда́ предста́ни ми́, ну́жды о́ныя изыма́ющи: Тебе́ бо и́мамъ прибѣ́жище, Влады́чице.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Наступи́въ на ва́рварское стремле́ніе и попра́въ сего́, му́чениче, росо́ю съ небе́съ Боже́ственно обогати́ся, взыва́я Христу́: сла́ва си́лѣ Твое́й, Го́споди.

Па́че смы́сла страстоте́рпца Твоего́ любы́ превосхо́дитъ вся́ помышле́нія, Сло́ве, боре́нія, и му́жественныя по́двиги, и натрижне́нія, я́же по́далъ еси́ зако́нно ему́ пострада́ти.

Яко до́бръ во́инъ, я́ко непобѣди́мь му́ченикъ, я́ко Христо́въ храбо́рникъ и я́ко благоче́стія побо́рникъ, небе́сная селе́нія наслѣ́довалъ еси́, лико́мъ а́нгельскимъ всегда́ свеселя́ся.

Богоро́диченъ: Изобразова́ше въ Чермнѣ́мъ проше́ствіе дре́вле Изра́илево безму́жное Твое́ Рождество́, Всецари́це: я́коже бо о́нъ тогда́ пре́йде немо́кренно, та́ко и Христо́съ безсѣ́менно отъ Твои́хъ пречи́стыхъ крове́й произы́де, Дѣ́во.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Ра́намъ тѣ́ло твое́, вели́кій кня́же Гео́ргіе, примѣси́ся, и у́зами многообра́зныхъ му́къ, мѵ́ро благово́нно тѣ́мъ источа́етъ на́мъ, благоуха́ющи ду́ши вѣ́рою несумнѣ́нною тя́ почита́ющимъ всегда́.

Кропле́ніемъ кро́ве твоея́ погаси́лъ еси́ у́гліе суровства́ Баты́ева, страстоте́рпче, Боже́ственныхъ чуде́съ огне́мъ, прему́дре, ти́ну страстну́ю лю́тыхъ пожига́я, вели́кою благода́тію Спа́совою, Гео́ргіе.

Ко́ль стра́шно же и сла́вно о Христѣ́ сопротивле́ніе твое́, Ему́же почуди́шася племена́, обрѣ́тшаяся на по́двизѣ, и похвали́ша терпѣ́ніе; ва́рвари же посрами́шася, студо́мъ обле́кшеся.

Богоро́диченъ: Горѣ́ бя́ше, Соприсносу́щенъ Отцу́ и Бо́гу Бо́гъ Сло́во и съ на́ми Бо́гъ и Человѣ́къ, Богоро́дице, Тобо́ю сше́дъ къ на́шему смире́нію, свобожда́я отъ кля́твы пра́дѣднія. Тебе́ бо ви́дѣ патріа́рхъ Іа́ковъ Лѣ́ствицу небе́сную.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Ника́коже поколеба́ столпа́ благоче́стія свирѣ́пство ва́рварское, ниже́ преще́ніе Баты́ево, ниже́ ме́чное усѣче́ніе, ни ра́ны, ни сме́рть ну́жнѣйшая.

Взыгра́шася свѣ́тло му́ченичестіи тогда́ ли́кове, ви́дѣвше твое́ дерзнове́ніе, и, прини́кше совоку́пленно со а́нгелы, неви́димо укрѣпля́ху тя́ въ по́двизѣ.

Тѣле́съ стра́сти неисцѣ́льныя Бо́жіею благода́тію исцѣли́лъ еси́, вели́кій кня́же Гео́ргіе, мѵ́ро благоуха́ющее источа́я у́бо твои́мъ честны́мъ моще́мъ прикаса́ющимся.

Богоро́диченъ: Обра́знѣ руно́ Гедео́нъ прія́тъ ороше́но, Твое́ предвозвѣща́я чу́до: сни́де бо, я́ко до́ждь на руно́, Богоро́дице, Еди́ный отъ Тро́ицы во утро́бу Твою́, воплоща́емь.

Кондакъ, гласъ 8:

Христо́вѣ сме́рти подо́бяся и Того́ испи́ти ча́шу возжелѣ́въ, я́ко Живота́, за Него́же му́жески подвиза́вся, презрѣ́въ земно́е ца́рство, отъ безбо́жныхъ ва́рваръ пострада́въ до сме́рти, Гео́ргіе богому́дре. Тѣ́мъ моли́, спасти́ся Христолюби́вому Импера́тору моли́твами твои́ми.

Икосъ:

Кто́ изглаго́летъ си́лы Госпо́дня? Или́ кто́ исповѣ́сть страда́нія твоя́ и добродѣ́тели, му́чениче? Или́ кíй язы́къ воспѣ́ти возмо́жетъ по досто́инству? Тѣ́мже и а́зъ, недосто́йный, покуша́юся хвали́ти же и сла́вити Влады́ку Жизнода́вца, да́вшаго тебѣ́ на ва́рвары де́рзость, злочести́ваго Баты́я не убоя́тися, исповѣ́дающу тебѣ́ и́стиннаго Бо́га. Сего́ ра́ди тя́ чти́мъ вѣ́рою и любо́вію, страстоте́рпче Гео́ргіе, тѣ́мъ моли́ спасти́ся Христолюби́вому Импера́тору моли́твами твои́ми.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

На ка́мени Боже́ственнаго ра́зума утверди́въ се́рдца своего́ стопы́, сла́вне, враго́въ же ухищре́нія не преврати́ша тя́, воспѣва́юща: оте́цъ на́шихъ Бо́же, благослове́нъ еси́.

Свѣ́тъ невече́рній страда́вшу кро́вію возсія́ тебѣ́, и весе́ліе я́вѣ тебе́ прія́тъ, великому́чениче, воспѣва́юща: оте́цъ на́шихъ Бо́же, благослове́нъ еси́.

Истиненъ му́ченикъ, и́стиннаго Христа́ Бо́га на́шего страда́лецъ взыва́ше: муче́нія бо цвѣ́ты благово́нія вмѣня́ю и кро́вныя струи́ ба́нею креще́нія.

Богоро́диченъ: Ри́торствующій язы́къ, безгла́сенъ же и недви́жимь о Тебѣ́ зри́мъ, Богора́дованная: не и́мать бо пости́гнути непостижи́маго зача́тія неизрече́нное Рожде́ніе.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Ублажи́ша тя́ ца́ріе, благослови́ша святи́теліе, слы́шаще твое́ му́жественное терпѣ́ніе и ко Христу́ хода́тая стяжа́вше тя́, и ны́нѣ, приходя́ще честны́мъ твои́мъ моще́мъ, покланя́ются.

Боже́ственный Гео́ргій источа́етъ мѵ́ро благода́ти, повелѣва́я вѣ́рнымъ почерпа́ти на просвѣще́ніе и чистоту́, взыва́я: Го́спода по́йте дѣла́ и превозноси́те Его́ во вѣ́ки.

Хваля́ся я́звами Христо́выми, къ вѣ́чнымъ оби́телемъ восте́клъ еси́, отъ кро́ве твоея́ обагри́въ пло́ть, и свѣ́тло Царе́ви си́лъ предстои́ши, съ му́ченики лику́я.

Богоро́диченъ: Иса́іи у́гль дре́вле по́сланъ бы́сть, клеща́ми носи́мь отъ серафи́ма и, каса́яся тому́, грѣхи́ оставля́етъ. Клеща́ же — Ты́ еси́, Дѣ́во, Боже́ственный у́гль носи́вшая во оставле́ніе грѣхо́въ человѣ́честву.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Во́инъ и́стинный Христо́ва проповѣ́данія бы́лъ еси́, Гео́ргіе, и ле́сти потреби́тель безбо́жія. Тѣ́мже и ны́нѣ моли́твами твои́ми потреби́ ва́рварское воста́ніе, Импера́тору на́шему подъ но́зѣ, сла́вне, тѣ́хъ низложи́.

Аще и отсѣ́чена бы́сть глава́ твоя́ и кро́вь излія́ся, но прильпе́ вѣ́рно, и побѣди́тельная тобо́ю соверши́шася. Тѣ́мже и на на́съ востаю́щихъ си́лою твое́ю посрами́ и Импера́тора на́шего яви́ побѣди́теля.

Лу́къ сокруши́ нечести́выхъ, страстоте́рпче непобѣди́ме, непра́ведно дви́жимый на твое́ достоя́ніе, е́же себѣ́ избра́лъ еси́, возлюби́въ, и Импера́тору на́шему ски́петръ утверди́, да и мы́ ти́хо препрово́димъ жи́тельство.

Богоро́диченъ: Его́же проро́цы провозвѣсти́ша вси́ многообра́знѣ и вопло́щшася на́съ ра́ди отъ Тебе́ ви́дѣхомъ, Богоро́дице, Бо́га и Человѣ́ка соверше́нна, избавля́юща человѣ́ки отъ кля́твы пра́дѣднія Твои́ми моли́твами и вѣ́чныя му́ки свобожда́юща.

Свѣти́ленъ. Подо́бенъ: Пло́тію усну́въ.

Свѣ́ту Невече́рнему предстоя́, страстоте́рпче, съ му́ченическими ли́ки, воспѣва́ющія тя́ въ па́мяти твое́й отъ искуше́нія спаса́й моли́твами твои́ми. [Два́жды.]

Сла́ва, и ны́нѣ, богоро́диченъ:

Незаходи́маго Свѣ́та носи́ло, Приснодѣ́во, просвѣ́щшаго сѣдя́щихъ во тмѣ́ невѣ́дѣнія пре́лести, озари́ и на́мъ, грѣ́шнымъ, свѣ́тъ Сы́на Твоего́.

На хвали́техъ стихи́ры, на 4, гла́съ 1. Подо́бенъ: Небе́сныхъ чино́въ.

На небеси́ препочи́лъ еси́, веселя́ся,* моли́ за ны́ Пресвяту́ю Тро́ицу* ми́лость пода́ти на́мъ* и житіе́ ми́рно и безгрѣ́шно,* я́ко въ Ту́ вѣ́рующихъ при́сно скорбе́й угонза́ти* и ра́дованіе улучи́ти. [Два́жды.]

Милосе́рдія ра́ди твоего́* исто́чникъ на́мъ да́руй благода́ти,* вско́рѣ ра́дости испо́лнь,* источа́ющь утѣше́ніе су́щимъ въ печа́лѣхъ,* моля́ Христа́, всесла́вне,* спасти́ся душа́мъ на́шимъ.

Ты́, въ весе́ліе вше́дъ нетлѣ́емо,* весе́ліе на́мъ да́ти моли́* и спасти́ рабы́ твоя́:* мо́жеши бо, Гео́ргіе,* призыва́ющимъ тя́ бѣды́ разгна́ти, моля́ Христа́,* и исцѣли́ти боля́щія.

Сла́ва, гла́съ 8:

Отъ благочести́ва ко́рене прозя́бъ, израсте́, усыне́нія вода́ми напое́нъ я́сно, Гео́ргіе страстоте́рпче: и́бо Христо́вѣ Це́ркви, я́ко фи́никсъ высокове́рхій, процвѣ́лъ еси́ на́мъ, преуцвѣтлѣва́я вѣ́рныя. Тѣ́мъ, ны́нѣ съ му́ченики предстоя́ Христу́, моли́ся о душа́хъ на́шихъ.

И ны́нѣ, богоро́диченъ:

Влады́чице, пріими́ моли́тву ра́бъ Твои́хъ [и изба́ви на́съ отъ вся́кія ну́жды и печа́ли].

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна свято́му, пѣ́снь 3-я и 6-я. Проки́менъ, гла́съ 4: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Апо́столъ къ Ефесе́емъ, зача́ло 233. Аллилу́ія, [гла́съ 4]: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь. Ева́нгеліе Луки́, зача́ло 106. Прича́стенъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 38 об. – 45 об.

/ Къ оглавленію раздѣла /


Наверхъ / Къ титульной страницѣ

0