Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 4-й де́нь.
Преподо́бнаго отца́ на́шего Иси́дора Пилусіо́тскаго.

[Зри́:] Аще нѣ́сть поста́, быва́етъ слу́жба пра́здника и свята́го Иси́дора. Аще ли е́сть по́стъ, то́чію свята́го.

[ВЕЧЕРЪ,]
На Го́споди воззва́хъ: стихи́ры пра́здника 3 и свята́го 3.
Стихи́ры пра́здника, гла́съ 4. Подо́бенъ: Да́лъ еси́ зна́меніе.

Свѣ́тъ во открове́ніе язы́ковъ* яви́лся еси́, Го́споди,* на о́блацѣ сѣдя́ ле́гцѣ,* Со́лнце пра́вды,* зако́на сѣно́вное исполня́я* и нача́ло изъявля́я но́выя благода́ти.* Тѣ́мъ, Тя́ ви́дѣвъ, Симео́нъ взыва́ше:* изъ истлѣ́нія мя́ разрѣши́,* я́ко ви́дѣхъ Тя́ дне́сь.

Нѣ́дръ Роди́теля не отлу́чся Божество́мъ,* вопло́щся, я́коже изво́лилъ еси́,* объя́тіями держи́мь Приснодѣ́вы,* на ру́ки пода́лся еси́ богопріи́мца Симео́на,* руко́ю Твое́ю держа́й вся́ческая;* тѣ́мже — ны́нѣ отпуща́еши мя́, —* ра́достно взыва́ше, —* въ ми́рѣ раба́ Твоего́,* я́ко ви́дѣхъ Тя́, Влады́ко.

Ины стихи́ры свята́го, гла́съ то́йже. Подо́бенъ: Яко до́бля.

Видѣ́ніи и дѣя́ньми* къ Бо́гу возвыша́яся,* житіе́, всему́дре, соверши́лъ еси́,* видѣ́нія восхожде́ніе дѣя́ніе водрузи́въ,* и му́дре жела́емыхъ* возлюби́лъ еси́ послѣ́днее,* его́же бы́въ жела́нія вну́трь,* удосто́ился еси́ блаже́ннаго ны́нѣ конца́* и трисо́лнечнаго сія́нія.

Наводне́ніемъ благода́ти* и одожде́ньми слове́съ твои́хъ* напоя́еши вся́ богому́дрыя,* къ го́рнѣйшей му́дрости ча́ши уста́ твоя́ поло́жь,* я́ко отъ исто́чника бога́тно ты́ поче́рплъ еси́* и разда́лъ еси́ всю́ду лучи́ уче́ній,* посыла́я, и уча́,* и наказу́я, досточу́дне.

Воздержа́ніемъ мудрова́ніе плотско́е умертви́лъ еси́,* въ живоно́сную ме́ртвость одѣ́явся,* и, душе́вное устрое́ніе* разшири́въ, преподо́бне, я́вѣ,* вмести́тельное дарова́ній Ду́ха соверши́лъ еси́,* и прія́телище бы́лъ еси́* Богодохнове́нныхъ уче́ній* и прему́дрости су́щія* па́че ума́ пребыва́ніе.

Сла́ва, и ны́нѣ, пра́здника, гла́съ 2. Ге́рманово:

Дне́сь Симео́нъ на ру́ки Го́спода сла́вы подъе́млетъ, Его́же подъ мра́комъ пе́рвѣе Моисе́й ви́дѣ, на горѣ́ Сина́йстѣй скрижа́ли даю́ща ему́. Се́й е́сть, Иже во проро́цѣхъ глаго́ляй и зако́на Творе́цъ. Се́й е́сть, Его́же Дави́дъ возвѣща́етъ, Иже всѣ́мъ стра́шный, имѣ́яй ве́лію и бога́тую ми́лость.

Аще е́сть по́стъ: Сла́ва, и ны́нѣ, богоро́диченъ. Аще ли среда́ или́ пято́къ, крестобогоро́диченъ. [Пи́санъ сего́ мѣ́сяца во 12-й де́нь:]
[Сла́ва, и ны́нѣ, богоро́диченъ, гла́съ 4:

Яко моли́тву неусыпа́ющу* и мольбу́ пребыва́ющу* иму́щи, Пречи́стая, ко Го́споду,* напа́сти успи́,* во́лны укроти́ окая́нныя моея́ души́* и въ ско́рби су́щее се́рдце мое́ утѣ́ши,* Отрокови́це, молю́ Тя́,* и облагодати́ у́мъ мо́й,* я́ко да досто́йно Тя́ просла́влю.

Крестобогоро́диченъ, гла́съ и подо́бенъ то́йже:

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Тебѣ́ вѣща́ше:* Сы́не возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Воспріими́, о Симео́не,* Го́спода сла́вы,* я́коже извѣсти́лся еси́* отъ Ду́ха Свята́го:* се́ бо пріи́де.

Сти́хъ: Ны́нѣ отпуща́еши раба́ Твоего́, Влады́ко,* по глаго́лу Твоему́, съ ми́ромъ.

Нося́щи Чи́стая* и Пречи́cтая Дѣ́ва* Содѣ́теля и Влады́ку,* я́ко Младе́нца на рука́хъ,* въ Це́рковь вхо́дитъ.

Сти́хъ: Свѣ́тъ во открове́ніе язы́ковъ,* и сла́ву люде́й Твои́хъ Изра́иля.

Ве́ліе и стра́шное та́инство,* и стра́нное смотре́нія:* Иже вся́ объе́мляй,* и младе́нцы созида́яй,* я́ко Младе́нецъ на рука́хъ но́сится.

Сла́ва, и ны́нѣ, гла́съ то́йже. Самогла́сенъ:

Свяще́ннаго Свяще́нная Дѣ́ва принесе́ во святи́лище святи́телю, просте́ръ же ру́цѣ, Симео́нъ прія́тъ Сего́, ра́дуяся, и возопи́: ны́нѣ отпуща́еши раба́ Твоего́, Влады́ко, по глаго́лу Твоему́, съ ми́ромъ, Го́споди.

Тропа́рь, гла́съ 8:

Въ тебѣ́, о́тче, извѣ́стно спасе́ся, е́же по о́бразу: пріи́мъ бо кре́стъ, послѣ́довалъ еси́ Христу́, и дѣ́я, учи́лъ еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй; тѣ́мже и со а́нгелы сра́дуется, преподо́бне Иси́доре, ду́хъ тво́й.

Сла́ва, и ны́нѣ, пра́здника, гла́съ 1:

Ра́дуйся, Благода́тная Богоро́дице Дѣ́во, изъ Тебе́ бо возсія́ Со́лнце пра́вды — Христо́съ, Бо́гъ на́шъ, просвѣща́яй су́щія во тмѣ́. Весели́ся и ты́, ста́рче пра́ведный, пріе́мый во объя́тія Свободи́теля ду́шъ на́шихъ, да́рующаго на́мъ воскресе́ніе.


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, свята́го. И ны́нѣ, пра́здника.

По 1-й стихоло́гіи сѣда́ленъ, гла́съ 1. Подо́бенъ: Ли́къ а́нгельскій.

Сы́й со Отце́мъ на престо́лѣ святѣ́мъ, прише́дъ на зе́млю, отъ Дѣ́вы роди́ся и Младе́нецъ бы́сть, лѣ́ты Сы́й неопи́санъ, Его́же прíимъ Симео́нъ на ру́ки, ра́дуяся глаго́лаше: ны́нѣ отпуща́еши, Ще́дре, возвесели́въ раба́ Твоего́.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Пло́тію младе́нствовавша отъ неискусому́жныя Ма́тере рука́ми ста́рыми твои́ми объя́лъ еси́, Симео́не, Христа́ Бо́га на́шего, прія́лъ еси́ исхо́да отвѣ́тъ сла́вно, улучи́лъ еси́ чуде́съ непреста́нную благода́ть, тѣ́мъ тя́ достодо́лжно вси́ сла́вимъ.

Сла́ва, и ны́нѣ, то́йже.

Кано́нъ пра́здника, со ирмосо́мъ, на 8 и свята́го на 4.

Кано́нъ пра́здника, гла́съ 3.
Пѣ́снь 1.

Ирмо́съ: Су́шу глубороди́тельную зе́млю со́лнце наше́ствова иногда́: я́ко стѣна́ бо, огустѣ́ обапо́лы вода́ лю́демъ пѣшомореходя́щимъ и богоуго́дно пою́щимъ: пои́мъ Го́сподеви, сла́вно бо просла́вися.

Да ка́плютъ во́ду о́блацы, Со́лнце бо, на о́блацѣ ле́гцѣ носи́мо, наста́ло е́сть, на нетлѣ́нную руку́, Христо́съ въ це́ркви я́ко Младе́нецъ. Тѣ́мже, вѣ́рніи, возопіи́мъ: пои́мъ Го́сподеви, сла́вно бо просла́вися.

Крѣпи́теся, ру́цѣ Симео́ни, ста́ростію осла́бленніи, лы́ста же претружде́нна ста́рча правобыстро́ движи́тася Христу́ на срѣ́теніе, ли́къ со безпло́тными соста́вльше, пои́мъ Го́сподеви, сла́вно бо просла́вися.

Ра́зумомъ просте́ртая небеса́, весе́литеся, и ра́дуйся, земле́, изъ Пребоже́ственныхъ бо нѣ́дръ Хитре́цъ проше́дъ Христо́съ, Ма́терію Дѣ́вою Бо́гу Отцу́ прино́сится Младе́нецъ, Иже пре́жде всѣ́хъ, сла́вно бо просла́вися.

Кано́нъ свята́го, его́же краегране́сіе: Тя́, мона́шествующихъ сла́ву, пою́, о́тче. Гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Сокруше́ннаго се́рдца стена́ніе услы́шавъ, Влады́ко, души́ моея́ лю́тое сокруше́ніе исцѣли́ моли́твами преподо́бнаго Твоего́, Христе́, я́ко Всеси́ленъ.

Вше́дъ, ты́, богоно́се, въ дѣ́тельную добродѣ́тель, Иси́доре, видѣ́ніемъ чи́стымъ и кра́снымъ явле́ніемъ Бо́гу бесѣ́дуя всегда́, я́вѣ обогати́лся еси́.

Прему́дрости ча́ши прине́съ твоя́ уста́, прему́дре, и́же отону́ду дарова́ній исто́чникъ поче́рплъ еси́, Бо́гу побѣ́дную пѣ́снь воспѣва́я.

Богоро́диченъ: Яко на ле́гцѣмъ о́блацѣ, Содѣ́тель на Тебѣ́ пріи́де низложи́ти, я́ко Си́ленъ, еги́петская, Влады́чице Чи́стая, рукотворе́нная, Христо́съ, я́ко Всеси́льный.

Пѣ́снь 3.

Ирмо́съ: Утвержде́ніе на Тя́ надѣ́ющихся, утверди́, Го́споди, Це́рковь, Юже стяжа́лъ еси́ честно́ю Твое́ю кро́вію.

Перворожде́нъ изъ Отца́ пре́жде вѣ́къ, перворожде́нъ Младе́нецъ изъ Дѣ́вы нетлѣ́нныя, Ада́му ру́ку простира́я, яви́ся.

Младоу́мна бы́вша пре́лестію первозда́ннаго па́ки исправля́яй Бо́гъ Сло́во, младе́нствовавъ, яви́ся.

Земли́ исча́діе, па́ки поте́кшее въ ню́, Божества́ сообра́зное естество́ Зижди́тель я́ко непрело́жнѣ, младе́нствовавъ, яви́.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Ума́ острото́ю, му́дре, су́щихъ собра́въ, пресла́вне, естество́, и́мже нача́льную вину́, я́ко чи́стъ богосло́въ, неле́стно пости́глъ еси́.

Поуче́ніе положи́въ я́сно сме́рти житію́, богоно́се треблаже́нне, страсте́й ве́щныя вины́ умертви́лъ еси́, безстра́стія объя́тъ бы́въ жела́ніемъ.

Въ слѣ́дъ, ра́дуяся, Христа́, кре́стъ тво́й носи́въ, послѣ́довалъ еси́, о́тче, въ постѣ́ тве́рдѣмъ и Сему́, я́ко мо́щно, уподо́бился еси́ житія́ чистото́ю.

Богоро́диченъ: Зако́нныхъ естества́ кромѣ́ Влады́ку ро́ждши, Богоро́дице Дѣ́во, дре́внюю преслуша́нія кля́тву разори́ла еси́, благослове́нія исто́чникъ источа́ющи.

Конда́къ, гла́съ 4. Подо́бенъ: Яви́лся еси́.

Денни́цу другу́ю тя́ Це́рковь обрѣ́тши, пресла́вне, твои́хъ слове́съ мо́лніями освѣща́ема, взыва́етъ ти́: ра́дуйся, всеблаже́нне богому́дре Иси́доре.

Сѣда́ленъ, гла́съ 3. Подо́бенъ: Боже́ственныя вѣ́ры.

Кни́га ра́зума уче́нія, бога́тствомъ вѣ́ры сочинена́, Пресвято́му яви́лся еси́ Ду́ху, открыва́я Боже́ственная тре́бующимъ и жи́знь сокро́вищствуя хотя́щимъ. Отче преподо́бне, Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, сѣда́ленъ пра́здника, гла́съ 8. Подо́бенъ: Воскре́съ.

Роди́лся еси́ на земли́ Собезнача́льный Отцу́, прине́слся еси́ въ це́рковь Непостижи́мый. Ра́дуяся же, ста́рецъ на ру́ки Тя́ воспріе́мъ, зовы́й: ны́нѣ отпуща́еши, его́же посѣти́лъ еси́, по глаго́лу Твоему́, благоизво́ливый спасти́ я́ко Бо́гъ ро́дъ человѣ́ческій.

Аще е́сть по́стъ: Сла́ва, и ны́нѣ, богоро́диченъ. Аще среда́ или́ пято́къ, крестобогоро́диченъ. [Пи́саны сего́ мѣ́сяца въ 10-й де́нь:]
[Сла́ва, и ны́нѣ, богоро́диченъ, гла́съ 3:

Боже́ственная была́ еси́ ски́нія Сло́ва, Еди́на Всечи́стая Дѣ́во Ма́ти, чистото́ю а́нгелы превозше́дшая, па́че всѣ́хъ мене́ пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́во Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, Матеролѣ́пно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?]

Пѣ́снь 4.

Ирмо́съ: Покры́ла е́сть небеса́ добродѣ́тель Твоя́, Христе́, изъ Киво́та бо проше́дъ святы́ни, Твоея́ Нетлѣ́нныя Ма́тере, въ хра́мѣ Сла́вы Твоея́ яви́лся еси́, я́ко Младе́нецъ руконоси́мь, и испо́лнишася вся́ Твоего́ хвале́нія.

Ра́дуйся, Симео́не, неизрече́нныхъ таи́нниче, — Богоро́дица вопія́ше, — о Не́мже отъ Свята́го дре́вле извѣсти́ся тебѣ́ Ду́ха, младе́нствовавшаго Сло́ва Христа́ на ру́ки пріими́, зовы́й Ему́: испо́лнишася вся́ Твоего́ хвале́нія.

На Него́же упова́лъ еси́, Симео́не, во́зрастъ дѣ́тищный, ра́дуяся, подыми́ Христа́, Изра́иля боже́ственнаго утѣше́ніе, зако́на Творца́ и Влады́ку, исполня́ющаго зако́на чи́нъ, зовы́й Ему́: испо́лнишася вся́ Твоего́ хвале́нія.

Ви́дя Симео́нъ Сло́во безнача́льное, съ пло́тію, я́ко на престо́лѣ херуви́мстѣмъ, Дѣ́вою носи́мо, вино́внаго е́же бы́ти вся́ческихъ, я́ко Младе́нцу дивя́ся, вопія́ше Ему́: испо́лнишася вся́ Твоего́ хвале́нія.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Незави́стно, преподо́бне, Христу́ повину́яся, да́нное тебѣ́ бога́тство, я́ко благопокори́въ ра́бъ, разда́лъ еси́, и несказа́нныя тя́ ра́дости Влады́ка сподо́би.

Прему́дрости пучи́ну преплы́въ, до́брый би́серъ, я́ко до́бръ купе́цъ, пріобрѣ́лъ еси́ и се́й то́кмо сокро́вище неоску́дно стяжа́лъ еси́.

Боже́ственнымъ Ду́хомъ осія́емь, лучи́ слове́съ со́лнечно всѣ́мъ испусти́лъ еси́, спасе́нія вѣ́рнымъ, богоявле́нне, жела́я.

Богоро́диченъ: Яко вои́стинну неизглаго́ланна и непости́жна Твоего́, Богоро́дице, боголѣ́пнаго су́ть Рождества́ су́щимъ на земли́ и на небеси́, Приснодѣ́во, та́инства.

Пѣ́снь 5.

Ирмо́съ: Яко ви́дѣ Иса́ія обра́зно на престо́лѣ превознесе́на Бо́га, отъ а́нгелъ сла́вы дориноси́ма, — о, окая́нный, — вопія́ше, — а́зъ! Прови́дѣхъ бо воплоща́ема Бо́га, Свѣ́та невече́рня, и ми́ромъ влады́чествующа.

Разумѣ́въ боже́ственный ста́рецъ проявле́нную дре́вле проро́ку сла́ву, рука́ми Сло́во зря́ Ма́терними держи́мо, — о, ра́дуйся, — вопія́ше, — Чи́стая! Яко престо́лъ, бо держи́ши Бо́га, Свѣ́та невече́рняго и ми́ромъ влады́чествующа.

Покло́нься ста́рецъ, и стопа́мъ боже́ственнѣ прикосну́вся неискусобра́чныя и Богома́тере, — Огнь, — рече́, — но́сиши, Чи́стая: Младе́нца бою́ся объя́ти Бо́га, Свѣ́та невече́рняго и ми́ромъ влады́чествующа.

Очища́ется Иса́ія, отъ серафи́ма у́гль пріе́мъ, — ста́рецъ вопія́ше Богома́тери, — Ты́, я́коже клеща́ми, рука́ми просвѣща́еши мя́, пода́вши, Его́же но́сиши, Свѣ́та невече́рняго и ми́ромъ влады́чествующа.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Умерщвле́ніемъ, всему́дре, страсте́й внѣ́ бы́въ и пло́ти, любо́вію Бо́гу прибли́жился еси́, Пресвято́му и Пресвѣ́тлому Свѣ́ту, и Еди́ному, истязу́ющему чистоту́.

Боже́ственнымъ сія́ніемъ твои́мъ, бла́же, у́мъ, богоно́сецъ, озари́въ, сто́лпъ всесвѣ́телъ бы́сть, всѣ́мъ посыла́я Боже́ственнаго Свѣ́та Боже́ственныя зари́ и мра́къ невѣ́дѣнія отгоня́.

Хотя́й всѣ́мъ я́ко бла́гъ, всему́дре, спасти́ся, наста́вника заблу́ждшимъ тя́ показа́, мно́гія обраща́ти ко спасе́нія пути́, Иси́доре треблаже́нне, о́тче пребога́те.

Богоро́диченъ: Вои́стинну усты́ и душе́ю, Влады́чице мíра Блага́я, исповѣ́даю Тя́, Всенепоро́чная, воплоще́нна Бо́га ро́ждшую, Чи́стая, и житія́ Тя́ предста́тельницу вѣ́рою предлага́ю.

Пѣ́снь 6.

Ирмо́съ: Возопи́ къ Тебѣ́, ви́дѣвъ ста́рецъ очи́ма спасе́ніе, е́же лю́демъ пріи́де отъ Бо́га: Христе́, Ты́ Бо́гъ мо́й.

Сіо́ну Ты́ ка́мень возложи́лся еси́, непокори́вымъ претыка́ніе и собла́зна ка́мень, неруши́мое вѣ́рныхъ спасе́ніе.

Извѣ́стнѣ нося́ начерта́ніе Иже пре́жде вѣ́къ Тя́ израсти́вшаго, земны́хъ за милосе́рдіе ны́нѣ не́мощію обложи́ся.

Сы́ну Вы́шняго, Сы́ну Дѣ́вы, Бо́гу, Отроча́ти бы́вшему, покло́ньшася Тебѣ́ ны́нѣ отпусти́ съ ми́ромъ.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Словесы́ су́дными укра́шься я́ко іере́й, слове́сно разсуди́лъ еси́, богоно́се, и тѣ́ломъ и душе́ю, и го́ршее лу́чшему повину́въ смы́сленно, досточу́дне.

Благомо́щно Еги́пта страсте́й и пи́щи ты́, мона́шествующихъ похвало́, воздержа́тельными, сла́вне, я́звами, истязу́я уязви́лъ еси́, вѣ́рнымъ услажда́я прехожде́ніе.

Богоро́диченъ: Нося́й вся́ческая си́лою Боже́ственною и содержа́й, я́ко Благоутро́бенъ, Твои́ми объя́тіи, Пречи́стая, вопло́щься, я́ко Младе́нецъ но́сится, Иже Отцу́ по Существу́ Соприсносу́щный.

Конда́къ пра́здника, гла́съ 1:

Утро́бу Дѣви́чу освяти́вый Рождество́мъ Твои́мъ и ру́цѣ Симео́нѣ благослови́вый, я́коже подоба́ше, предвари́въ, и ны́нѣ спа́слъ еси́ на́съ, Христе́ Бо́же, но умири́ во бранѣ́хъ жи́тельство и укрѣпи́ Импера́тора, Его́же возлюби́лъ еси́, Еди́не Человѣколю́бче.

Икосъ:

Къ Богоро́дицѣ притеце́мъ, хотя́щіи Сы́на Ея́ ви́дѣти, къ Симео́ну носи́ма, Его́же съ небесе́ безпло́тніи ви́дяще, дивля́хуся, глаго́люще: чу́дная зри́мъ ны́нѣ и пресла́вная, непостижи́мая, несказа́нная! Иже бо Ада́ма созда́вый но́сится я́ко Младе́нецъ, Невмѣсти́мый вмѣща́ется на рука́хъ ста́рчихъ, Иже въ нѣ́дрѣхъ неопи́санныхъ Сы́й Отца́ Своего́ во́лею опису́ется пло́тію, а не Божество́мъ, Еди́нъ Человѣколю́бецъ.

Пѣ́снь 7.

Ирмо́съ: Тебе́ во огни́ ороси́вшаго о́троки богосло́вившія, и въ Дѣ́ву нетлѣ́нну все́льшагося Бо́га Сло́ва пои́мъ, благоче́стно пою́ще: благослове́нъ Бо́гъ оте́цъ на́шихъ.

Ада́му извѣсти́ти хотя́й иду́, во а́дѣ живу́щу, и Евѣ принести́ благовѣ́стіе, — Симео́нъ вопія́ше, со проро́ки лику́я: благослове́нъ Бо́гъ оте́цъ на́шихъ.

Ро́да зе́мна избавля́яй Бо́гъ да́же до а́да пріи́детъ, плѣ́ннымъ же пода́стъ всѣ́мъ оставле́ніе и прозрѣ́ніе слѣпы́мъ, я́ко и нѣмы́мъ вопи́ти: благослове́нъ Бо́гъ оте́цъ на́шихъ.

И Твое́ се́рдце, Нетлѣ́нная, ору́жіе про́йдетъ, — Симео́нъ Богоро́дицѣ провозгласи́, — на Крестѣ́ зря́щи Твоего́ Сы́на, Ему́же вопіе́мъ: благослове́нъ Бо́гъ оте́цъ на́шихъ.

Инъ.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

На тве́рди вѣ́ры поста́ви, о́тче, я́коже со́лнце, Влады́ка тя́, просвѣща́ти сія́ніемъ мы́сленнымъ ду́ши вопію́щихъ прилѣ́жно: благослове́нъ еси́, Бо́же оте́цъ на́шихъ.

Скве́рны плотскíя и духо́вныя отмы́лъ еси́, блаже́нне, сле́зъ излія́ньми и, бы́въ, богоно́сне, свѣ́тъ су́щимъ на земли́, вся́ научи́лъ еси́ вопи́ти: благослове́нъ еси́, Бо́же оте́цъ на́шихъ.

Богоро́диченъ: На недви́жимѣмъ вѣ́ры стоя́ще основа́ніи, Тя́, Богома́терь Чи́стая, исповѣ́дуемъ Богоро́дицу: Слов́о бо Бо́жіе безъ сѣ́мене родила́ еси́ на́мъ. Благослове́нъ, Пречи́стая, Пло́дъ чре́ва Твоего́.

Пѣ́снь 8.

Ирмо́съ: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Лю́діе Изра́илевы, Твою́ сла́ву Емману́ила зря́ще Отроча́ изъ Дѣ́вы, предъ лице́мъ Боже́ственнаго ковче́га ны́нѣ лику́йте: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Се́, Симео́нъ вопія́ше, — прерѣка́емое зна́меніе Се́й бу́детъ, Бо́гъ Сы́й и Отроча́, — Сему́, вѣ́рніи, возопіи́мъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Живо́тъ Сы́й, Се́й бу́детъ паде́ніе непокори́вымъ, младе́нствовавъ Бо́гъ Сло́во, я́ко воста́ніе всѣ́мъ вѣ́рою пою́щимъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Инъ.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Яко слове́сну же́ртву, о́тче, все́ житіе́ твое́ въ воню́ благово́нія прине́слъ еси́ на Крестѣ́ тебе́ ра́ди повѣ́шеному Христу́, Его́же превозно́симъ во вся́ вѣ́ки.

Мно́жиши бога́тство и по сме́рти, одушевле́на словеса твоя́, я́коже многоцѣ́нно всѣ́мъ вѣ́рнымъ наслѣ́діе оста́вль, превознося́щимъ Христа́ во вся́ вѣ́ки.

Украси́лся еси́, преблаже́нне, добро́тою слове́съ твои́хъ, Свята́го бо Ду́ха яви́лся еси́ тро́сть, пиша́ благоче́стно ра́зумъ Боже́ственъ превознося́щимъ Го́спода во вся́ вѣ́ки.

Богоро́диченъ: Къ Твоему́ кро́ву прибѣга́ю, Всенепоро́чная, и Предста́тельницу жи́зни моея́ Тя́ ны́нѣ предлага́ю, Тя́, па́че ума́ Бо́га Сло́ва ро́ждшую. Его́же превозно́симъ во вся́ вѣ́ки.

Пѣ́снь 9.

Ирмо́съ: Въ зако́нѣ сѣ́ни и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ.

Иже дре́внимъ новорожде́нныхъ го́рличищъ супру́гъ дво́ица же бя́ше птенце́въ, въ ни́хже мѣ́сто боже́ственный ста́рецъ и цѣлому́дренная Анна проро́чица отъ Дѣ́вы рожде́нному и Сы́ну Единоро́дному Отчу, въ це́рковь приноси́му, слу́жатъ, велича́юще.

Возда́лъ еси́ мнѣ́, — вопія́ше Симео́нъ, — спасе́нія Твоего́, Христе́, ра́дованіе, воспріими́ Твоего́ служи́теля, сѣ́нію претружде́ннаго, но́выя благода́ти священнопроповѣ́дника та́йнаго, во хвале́ніи велича́юща.

Священнолѣ́пно исповѣ́дашеся Анна, прорица́ющи, цѣлому́дренная, и преподо́бная, и ста́рица, Влады́цѣ въ це́ркви я́вственно, Богоро́дицу же, проповѣ́дающи всѣ́мъ су́щимъ, велича́ше.

Инъ.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Якоже заря́ свѣ́та, облиста́ въ твою́ ду́шу благода́ти сло́во, преподо́бне, тобо́ю же вся́ земля́ испо́лнися того́ сія́нія. Ему́же причаща́ющіися, твоея́ му́дрости сокро́вищу, о́тче, удивля́емся.

Тре́мъ Ли́цамъ во Еди́нствѣ Естества́, оте́ческимъ послѣ́дуя уче́ніемъ, богому́дренно покланя́тися научи́лъ еси́, чти́ти богосло́вящія Несозда́нную Безнача́льную Тро́ицу, всѣ́мъ вѣ́рнымъ просвѣще́ніе источа́ющую.

Обрѣ́тъ трудо́въ твои́хъ воздая́нія на небесѣ́хъ, жи́знь безконе́чную пріе́мъ, пою́щимъ, прему́дре, па́мять твою́ испроси́ спасе́ніе, блаже́нне Иси́доре, престо́лу Бо́жію со а́нгелы ны́нѣ предстоя́.

Богоро́диченъ: Тлѣ́ненъ, Сло́во Бо́жіе нетлѣ́нное, о́бразъ пріе́мъ, человѣ́ки въ нетлѣ́ніе облече́, благоволе́ніемъ Отчимъ все́лься въ Тя́, Обра́дованная. Тѣ́мже, Пречи́стая, съ небе́сными во́и Тя́ велича́емъ.

Свѣти́ленъ пра́здника:

Ду́хомъ во святи́лищи предста́въ, ста́рецъ на ру́ки воспрія́тъ зако́на Влады́ку, вопія́: ны́нѣ соу́зъ мя́ плотски́хъ разрѣши́, я́коже ре́клъ еси́, съ ми́ромъ: ви́дѣхъ бо очи́ма открове́ніе язы́ковъ и Изра́илю спасе́ніе.

Сла́ва, и ны́нѣ, то́йже.

На стихо́внѣ стихи́ры пра́здника, гла́съ 2. Подо́бенъ: До́ме Евфра́ѳовъ.

Скве́рны кромѣ́* Христо́съ ражда́ется отъ Дѣ́вы,* я́ко отъ Отца́ нетлѣ́нно* Сы́нъ пре́жде денни́цы,* Иже Ада́ма избавля́яй.

Сти́хъ: Ны́нѣ отпуща́еши раба́ Твоего́, Влады́ко,* по глаго́лу Твоему́, съ ми́ромъ.

Две́ри небе́сныя, отве́рзитеся:* Христо́съ бо въ це́рковь* я́ко Младе́нецъ* Ма́терію Дѣ́вою* Бо́гу и Отцу́ прино́сится.

Сти́хъ: Свѣ́тъ во открове́ніе язы́ковъ* и сла́ву люде́й Твои́хъ Изра́иля.

Угль, проявле́йся* боже́ственному Иса́іи — Христо́съ,* я́ко клеща́ми,* рука́ми Богоро́дицы* ны́нѣ ста́рцу дае́тся.

Сла́ва, и ны́нѣ, гла́съ 7:

Свѣ́тъ во открове́ніе язы́ковъ, прише́лъ еси́ на зе́млю съ небесе́, Спа́се на́шъ и, произше́дъ изъ Дѣ́вы, почи́лъ еси́ на объя́тіихъ пра́веднаго Симео́на: подоба́ше бо Ти́, Жизнода́вче всѣ́хъ, отъ ста́рца позна́тися, я́ко пріи́де отпусти́ти его́, по глаго́лу Твоему́, имѣ́яй ве́лію ми́лость.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 32 об. – 38 об.

/ Къ оглавленію раздѣла /


Наверхъ / Къ титульной страницѣ

0