Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 3-й де́нь.
Слу́жба [бдѣ́нная] свято́му и пра́ведному Симео́ну Богопріи́мцу.

НА МАЛѢЙ ВЕЧЕРНИ,
[На Го́споди воззва́хъ:] стихи́ры свято́му на 4, гла́съ 4. Подо́бенъ: Да́лъ еси́ зна́меніе.

Юношствуя ду́хомъ,* престарѣ́въ же тѣ́ломъ, Симео́не,* обѣща́ніе прія́лъ еси́ не ви́дѣти сме́рти,* до́ндеже уви́диши Младе́нца ю́на,* пре́жде вѣ́къ су́щаго Творца́ и Бо́га вся́ческихъ,* пло́тію обнища́вша,* ви́дѣвъ же, взыгра́лъ еси́* и пло́ти разрѣше́ніе проси́лъ еси́,* къ Боже́ственнымъ селе́ніемъ преше́дъ, ра́дуяся.

Анна богодохнове́нная* и Симео́нъ пребога́тый,* проро́чествіемъ сія́ющіи,* въ зако́нѣ же непоро́чни я́вльшіися,* зако́на Да́теля,* Младе́нца, я́вльшася по на́мъ ви́дѣвше,* Тому́ ны́нѣ поклони́шася.* Тѣ́хъ па́мять дне́сь ра́достно пра́зднуимъ,* по до́лгу сла́вяще Іису́са Человѣколю́бца.

Сла́ва, гла́съ 6:

Проро́че и проповѣ́дателю Христо́въ,* престо́ла вели́чествія никогда́же отлуча́ешися* и кому́ждо немощно́му всегда́ предстои́ши, въ вы́шнихъ служа́,* вселе́нную исполня́еши, всю́ду прославля́емый,* испроси́ просвѣще́ніе душа́мъ на́шимъ.

И ны́нѣ, пра́здника, гла́съ 4:

Дне́сь свяще́нная Ма́ти* и святи́лища вы́шши* во святи́лище пріи́де,* я́вльшая мíру Законода́вца и зако́на Творца́.* Его́же на ру́ки пріе́мь ста́рецъ Симео́нъ,* ра́дуяся взыва́ше:* ны́нѣ отпуща́еши раба́ Твоего́,* я́ко ви́дѣхъ Тя́, Спа́са ду́шъ на́шихъ.

На стихо́внѣ стихи́ры пра́здника, гла́съ 7. Космы́ мона́ха:

Украси́ тво́й черто́гъ, Сіо́не,* и подыми́ Царя́ Христа́,* цѣлу́й Марíю, небе́сную Две́рь:* Та́ бо престо́лъ херуви́мскій яви́ся,* Та́ но́ситъ Царя́ сла́вы.* Облакъ свѣ́та е́сть Дѣ́ва,* нося́щи на рука́хъ Сы́на пре́жде денни́цы,* Его́же пріе́мь Симео́нъ на ру́ки своя́,* проповѣ́дуя лю́демъ Влады́ку Сего́ бы́ти живота́ и сме́рти,* и Спа́са мíру.

Сти́хъ: Ны́нѣ отпуща́еши раба́ Твоего́, Влады́ко, по глаго́лу Твоему́, съ ми́ромъ.

Возсія́вшаго пре́жде вѣ́къ отъ Отца́, напослѣ́докъ же отъ ложе́снъ дѣви́ческихъ нося́щи въ це́рковь неискусобра́чная Ма́ти, въ Сина́йстѣй горѣ́ Законоположи́вшаго, повелѣ́нію зако́нному повину́ющася принесе́ святи́телю ста́рцу и пра́веднику, Христа́ Го́спода ви́дѣти обѣща́нна. Его́же пріе́мь Симео́нъ на ру́ки своя́, возра́довася, вопія́: Бо́гъ е́сть Се́й, Отцу́ Соприсносу́щный, и Изба́витель ду́шъ на́шихъ.

Сти́хъ: Свѣ́тъ во открове́ніе язы́ковъ и сла́ву люде́й Твои́хъ Изра́иля.

Единоро́днаго Сы́на, Собезнача́льна Отцу́, разве́рзша ложесна́ безсѣ́менно Ма́тере, повину́ющися зако́на повелѣ́ніемъ, Богоро́дице Марíя напослѣ́докъ изъ Нея́ вопло́щшагося и съ человѣ́ки пожи́вшаго приноша́етъ Бо́гови всѣ́хъ Первосвяти́теля, исполня́ющаго зако́нъ дре́вняго Законода́вца, Его́же пріе́мъ Симео́нъ на руку́ свое́ю, проповѣ́даше лю́демъ: Бо́гъ е́сть Се́й, Отцу́ Собезнача́ленъ, Изба́витель душа́мъ на́шимъ.

Сла́ва, гла́съ 1:

Се́ Симео́нъ вопія́ше:* пререка́емое зна́меніе Се́й бу́детъ:* Бо́гъ Сы́й и Отроча́.* Сему́, вѣ́рніи, возопіе́мъ:* благослови́те, вся́ дѣла́ Госпо́дня, Го́спода.

И ны́нѣ, пра́здника, гла́съ 4:

Зако́нъ, и́же въ писа́ніи,* исполня́я, Человѣколю́бецъ* въ це́рковь ны́нѣ прино́сится,* и Сего́ пріе́млетъ ста́рыми рука́ми Симео́нъ, —* ны́нѣ отпуща́еши мя, — вопія́, —* ко о́ному блаже́нству:* ви́дѣхъ бо Тя́ дне́сь, пло́тію ме́ртвенною обложе́ннаго,* живото́мъ госпо́дствующа* и сме́ртію влады́чествующа.

Тропа́рь Симео́ну, гла́съ 4:

Симео́нъ ста́рецъ дне́сь весели́тся,* воспрія́тіемъ на руку́ свою́ Младе́нца Превѣ́чнаго Бо́га,* отъ у́зъ пло́ти разрѣши́тися прося́ и вопія́:* ви́дѣстѣ о́чи мои́* спасе́ніе Твое́ мíрови.

Сла́ва, и ны́нѣ, пра́здника, гла́съ 1:

Ра́дуйся, Благода́тная Богоро́дице Дѣ́во, изъ Тебе́ бо возсія́ Со́лнце пра́вды — Христо́съ, Бо́гъ на́шъ, просвѣща́яй су́щія во тмѣ́. Весели́ся и ты́, ста́рче пра́ведный, пріе́мый во объя́тія Свободи́теля ду́шъ на́шихъ, да́рующаго на́мъ воскресе́ніе.

Та́же, ектенія́ ма́лая: Поми́луй на́съ Бо́же... И отпу́стъ.



НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ.., пое́мъ стихи́ры пра́зднику 3 и свята́го 5, гла́съ 1. Самогла́сны.

Глаго́ли, Симео́не,* Кого́ нося́ на руку́ въ це́ркви ра́дуешися?* Кому́ зове́ши и вопіе́ши:* ны́нѣ свободи́хся, ви́дѣхъ бо Спа́са моего́?* Се́й е́сть отъ Дѣ́вы рожде́йся,* Се́й е́сть отъ Бо́га Бо́гъ Сло́во,* воплоти́выйся на́съ ра́ди и спасы́й человѣ́ка,* Тому́ поклони́мся.

Пріими́, Симео́не,* Его́же подъ мра́комъ Моисе́й законополага́юща прови́дѣ въ Сина́и,* Младе́нца бы́вша, зако́ну повину́ющася.* Се́й е́сть зако́номъ глаго́лавый,* Се́й е́сть во проро́цѣхъ рече́нный,* воплоти́выйся насъ ра́ди и спасы́й человѣ́ка,* Тому́ поклони́мся.

Пріи́демъ и мы́,* пѣ́сньми боже́ственными Христа́ усря́щемъ* и пріи́мемъ Его́,* Его́же спасе́ніе Симео́нъ ви́дѣ.* Се́й е́сть, Его́же Дави́дъ провозвѣсти́,* Се́й е́сть во проро́цѣхъ глаго́лавый,* воплоти́выйся на́съ ра́ди и зако́номъ вѣща́вый,* Тому́ поклони́мся.

Стихи́ры Симео́ну Богопріи́мцу, гла́съ 4. Подо́бенъ: Да́лъ еси́ зна́меніе.

Пра́веденъ и соверше́нъ* и по всему́ сла́венъ сы́й, богодохнове́нне,* Бо́га Еди́наго соверше́нна,* во е́же оправда́ти мíръ прише́дшаго,* подъя́лъ еси́ рука́ми воплоще́нна,* и отрѣши́тися имы́й тѣлесе́, вопія́лъ еси́ Ему́:* ны́нѣ отпуща́еши раба́ Твоего́* съ ми́ромъ, Человѣколю́бче,* я́ко ви́дѣхъ Тя́ дне́сь. [Два́жды.]

Юношствуя ду́хомъ,* престарѣ́въ же тѣ́ломъ, Симео́не,* обѣща́ніе прія́лъ еси́ не ви́дѣти сме́рти,* до́ндеже уви́диши Младе́нца ю́на,* пре́жде вѣ́къ су́щаго Творца́ и Бо́га вся́ческихъ,* пло́тію обнища́вша,* ви́дѣвъ же, взыгра́лъ еси́* и пло́ти разрѣше́ніе проси́лъ еси́,* къ Боже́ственнымъ селе́ніемъ преше́дъ, ра́дуяся. [Два́жды.]

Анна богодохнове́нная* и Симео́нъ пребога́тый,* проро́чествіемъ сія́ющіи,* въ зако́нѣ же непоро́чни я́вльшіися,* зако́на Да́теля,* Младе́нца, я́вльшася по на́мъ ви́дѣвше,* Тому́ ны́нѣ поклони́шася.* Тѣ́хъ па́мять дне́сь ра́достно пра́зднуимъ,* по до́лгу сла́вяще Іису́са Человѣколю́бца.

Сла́ва, гла́съ 6:

Возсія́ де́нь ра́достный* па́мяти богови́дца и богопріи́мца Симео́на:* се́й бо престо́лу вели́чествія моле́бнѣ дне́сь предстои́тъ,* Его́же въ жи́зни на руку́ понесе́,* о Не́мъ же проро́чески вѣща́:* се́, — рече́, — лежи́тъ Се́й на паде́ніе* и на воста́ніе мно́гимъ во Изра́или.* И къ Ро́ждшей Того́ возгласи́:* и Тебѣ́, Пречи́стая, Само́й се́рдце про́йдетъ ору́жіе.* Его́же, вѣ́рніи, свято́е торжество́* и лѣ́тную [1] па́мять почита́юще усе́рдно,* къ нему́ воззове́мъ:* о богому́дре и богоно́сче,* ева́нгельскихъ та́инъ благовѣ́стникомъ свидѣ́тельствованный пра́ведниче* и Ду́ха Свята́го испо́лненный, Симео́не,* не преста́й моля́ за ны́,* Его́же я́ко Младе́нца на руку́ свое́ю поне́слъ еси́,* да изба́витъ ны́ въ де́нь Су́дный шу́іяго стоя́нія,* и свободи́тъ вѣ́чнаго муче́нія,* и спасе́тъ ду́ши на́ша,* я́ко Милосе́рдъ и Человѣколю́бецъ.

И ны́нѣ, пра́здника, гла́съ 6:

Да отве́рзется две́рь небе́сная дне́сь:* Безнача́льное бо Сло́во Отчее,* нача́ло пріи́мъ подъ лѣ́ты,* не отсту́пль Своего́ Божества́,* отъ Дѣ́вы я́ко Младе́нецъ четыредесятодне́венъ* Ма́терію во́льнѣ прино́сится въ це́рковь зако́нную,* и Сего́ на ру́ки пріе́млетъ ста́рецъ, —* отпусти́, — зовы́й, — раба́, Влады́ко,* и́бо о́чи мои́ ви́дѣста спасе́ніе Твое́.* Прише́дый въ мíръ спасти́ ро́дъ человѣ́чь,* Го́споди, сла́ва Тебѣ́.

Вхо́дъ. Проки́менъ дне́ и чте́нія три́.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры пра́здника самогла́сны, гла́съ 1.

Ве́тхій де́ньми,* Иже зако́нъ дре́вле въ Сина́и да́въ Моисе́ю,* дне́сь Младе́нецъ ви́дится* и по зако́ну, я́ко зако́на Творе́цъ,* зако́нъ исполня́я, во хра́мъ прино́сится, и ста́рцу дае́тся.* Пріе́мъ же Сего́ Симео́нъ пра́ведный* и, обѣща́ній сбытіе́ ви́дѣвъ соверша́емое,* ра́достно вопія́ше:* ви́дѣша о́чи мои́* е́же отъ вѣ́ка та́инство сокрове́нное,* напослѣ́докъ днíй си́хъ я́вльшееся,* Свѣ́тъ, разоря́я невѣ́рныхъ язы́ковъ омраче́ніе* и сла́ву дая́ новоизбра́нному Изра́илю;* тѣ́мже отпусти́ раба́ Твоего́ отъ соу́зъ сея́ пло́ти* къ нестарѣ́емому и чу́дному некончае́мому животу́,* подая́ мíрови ве́лію ми́лость.

Дне́сь дре́вле Моисе́ю въ Сина́и зако́нъ пода́вый* зако́ннымъ повину́ется велѣ́ніемъ,* на́съ ра́ди, я́ко Милосе́рдъ, по на́мъ бы́въ.* Ны́нѣ Чи́стый Бо́гъ я́ко Отроча́ Свя́то,* ложесна́ разве́рзъ Чи́стыя,* Себѣ́ Самому́ я́ко Бо́гъ прино́сится,* зако́нныя кля́твы свобожда́я* и просвѣща́я ду́ши на́ша.

Гла́съ 2:

Ему́же вы́шніи служи́теліе съ тре́петомъ мо́лятся,* до́лу ны́нѣ Симео́нъ ве́щными рука́ми пріе́мь,* Бо́га человѣ́комъ соедини́тися проповѣ́да,* и Человѣ́ка небе́сна Бо́га ви́дяй,* отлуча́яся су́щихъ на земли́, ра́достно взыва́ше:* Иже во тмѣ́ су́щимъ невече́рній Свѣ́тъ открыва́яй,* Го́споди, сла́ва Тебѣ́.

Дне́сь Симео́нъ на ру́ки Го́спода сла́вы подъе́млетъ,* Его́же подъ мра́комъ пе́рвѣе Моисе́й ви́дѣ,* на горѣ́ Сина́йстѣй скрижа́ли даю́ща ему́.* Се́й е́сть, Иже во проро́цѣхъ глаго́ляй и зако́на Творе́цъ.* Се́й е́сть, Его́же Дави́дъ возвѣща́етъ,* Иже всѣ́мъ стра́шный, имѣ́яй ве́лію и бога́тую ми́лость.

Свяще́ннаго свяще́нная Дѣ́ва принесе́ во святи́лище святи́телю,* просте́ръ же ру́цѣ, Симео́нъ прія́тъ Сего́, ра́дуяся, и возопи́:* ны́нѣ отпуща́еши раба́ Твоего́, Влады́ко,* по глаго́лу Твоему́ съ ми́ромъ, Го́споди.

Зижди́тель небесе́ и земли́ на рука́хъ ноша́шеся* святы́мъ Симео́номъ ста́рцемъ дне́сь,* то́й бо Ду́хомъ Святы́мъ глаго́лаше:* ны́нѣ свободи́хся,* ви́дѣхъ бо Спа́са моего́.

Дне́сь Симео́нъ ста́рецъ* во хра́мъ вхо́дитъ, ра́дуяся ду́хомъ,* Законода́вца Моисее́ва и Исполни́теля зако́на на ру́ки воспрія́ти.* Онъ у́бо мра́комъ и гла́сомъ неявле́ннымъ богови́децъ сподо́бися бы́ти,* покрове́ннымъ лице́мъ евре́евъ невѣ́рная сердца́ изобличи́,* се́й же первовѣ́чное Сло́во Отчее воплоще́нное понесе́* и язы́комъ откры́ Свѣ́тъ, Кре́стъ и Воскресе́ніе.* И Анна проро́чица показа́ся,* Спа́са Изба́вителя Изра́илю проповѣ́дающи.* Тому́ возопіи́мъ, Христу́ Бо́гу на́шему:* Богоро́дицы ра́ди поми́луй на́съ.

Сла́ва, свято́му, гла́съ 4:

Иже боговидѣ́ніемъ осія́емь досто́йно,* и проро́ческимъ проповѣ́даніемъ,* и благода́тію почте́нъ бы́въ, богодухнове́нне Симео́не,* и Боже́ственнаго сподо́бленъ бы́въ блаже́нства,* е́же къ Преблаго́му ны́нѣ дерзнове́ніе и ми́лость стяжа́въ,* моли́ся непреста́нно* о и́же вѣ́рою тя́ хва́лящихъ и чту́щихъ,* я́ко бла́га вѣща́теля, че́стна и богопости́жна,* отъ бѣ́дъ изба́вити* и спасти́ ду́ши на́ша.

И ны́нѣ, пра́здника, гла́съ 5:

Ве́тхій де́ньми, младе́нствовавъ пло́тію,* Ма́терію Дѣ́вою въ це́рковь прино́сится,* Своего́ зако́на исполня́я обѣща́ніе,* Его́же Симео́нъ пріи́мъ, глаго́лаше:* ны́нѣ отпуща́еши съ ми́ромъ,* по глаго́лу Твоему́, раба́ Твоего́,* ви́дѣша бо о́чи мои́ спасе́ніе Твое́, Святы́й.

На стихо́внѣ стихи́ры свято́му, гла́съ 2. Подо́бенъ: Егда́ отъ дре́ва.

Обрѣ́те духо́вная заря́ твоего́ ума́, проро́че Симео́не,* чистоту́ сія́ющу:* я́коже зерца́ло, я́вственно мíръ озари́лъ еси́* богоразу́мія сія́ніемъ блиста́я* и провозвѣща́я Гряду́щаго,* Иже подае́тъ благода́ть всѣ́мъ человѣ́комъ* моли́твами твои́ми, пречу́дне.

Сти́хъ: Ты́ еси́ іере́й во вѣ́къ* по чи́ну Мелхиседе́кову.

Уста́ бы́въ Бо́жія,* нече́стія дѣ́латели я́вѣ обличи́лъ еси́,* судо́мъ неизбѣ́жнымъ тѣ́хъ осуди́въ,* Симео́не ди́вне,* пра́вды уче́нію послѣ́дуя и Боже́ственнымъ судьба́мъ.* Тѣ́мже прему́дрымъ ти́ глаго́ломъ ви́дяще возведе́ніе, блаже́нне,* пѣ́сньми досто́йно восхваля́емъ тя́.

Сти́хъ: Моисе́й и Ааро́нъ во іере́ехъ Его́* и Самуи́лъ въ [призыва́ющихъ и́мя Его́].

Престо́лу Влады́чню предстоя́* и неизрече́нныя сла́вы насыща́емь,* добро́ты же зря́ премíрныя* и свѣ́та исполня́емь,* проро́че Симео́не богогла́се,* вся́, чту́щія тя́, вѣ́рою помина́й,* си́мъ душе́вное спасе́ніе* и разрѣше́ніе согрѣше́ніемъ всѣ́мъ прося́, богопости́жне.

Сла́ва, свято́му, гла́съ 1:

Се́ Симео́нъ вопія́ше: пререка́емое зна́меніе Се́й бу́детъ, Бо́гъ Сы́й и Отроча́. Сему́, вѣ́рніи, возопіи́мъ: благослови́те, вся́ дѣла́ Госпо́дня, Го́спода.

И ны́нѣ, гла́съ 8:

Иже на херуви́мѣхъ носи́мый* и пѣва́емый отъ серафи́мъ,* дне́сь въ Боже́ственное святи́лище по зако́ну приноси́мь,* на ста́рческихъ, я́ко на престо́лѣ, сѣди́тъ рука́хъ* и отъ Іо́сифа пріе́млетъ да́ры боголѣ́пно,* я́ко супру́гъ го́рличищъ,* нескве́рную Це́рковь и отъ язы́къ новоизбра́нныя лю́ди,* голуби́на же два птенца́,* я́ко Нача́льникъ Ве́тхаго же и Но́ваго.* Еже къ Нему́ обѣща́нія Симео́нъ коне́цъ пріе́мъ,* благословя́ Дѣ́ву Марíю Богоро́дицу,* страсте́й о́бразы, Иже изъ Нея́, провозгласи́* и отъ Него́ проша́ше отпуще́нія, вопія́:* ны́нѣ отпусти́ мя, Влады́ко,* я́коже пре́жде возвѣсти́ ми,* я́ко ви́дѣхъ Тя́, первовѣ́чнаго Свѣ́та* и Спа́са Го́спода христоимени́тымъ лю́демъ.

На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и пра́зднику: Ра́дуйся, Благода́тная Богоро́дице Дѣ́во.., еди́ножды.
И чте́ніе свято́му отъ сло́въ: Пра́зднику, ему́же нача́ло...



НА УТРЕНИ,
На Бо́гъ Госпо́дь: Тропа́рь пра́зднику, два́жды. Сла́ва, Симео́ну. И ны́нѣ, пра́зднику.

По 1-й стихоло́гіи сѣда́ленъ свято́му, гла́съ 5. Подо́бенъ: Собезнача́льное Сло́во.

Не смѣ́сенъ начерта́ніемъ до́льнимъ, сла́вне, ты́, у́мъ стяжа́въ, Боже́ственнаго Ду́ха чистѣ́е, Симео́не богопріи́мче, бы́лъ еси́, сія́нія Его́ пріе́мля свѣ́тло и всѣ́мъ облиста́я. Тѣ́мже мо́лимъ тя́: о ми́рѣ всего́ мíра помоли́ся.

Сла́ва, и ны́нѣ, пра́зднику, гла́съ 1:

Ли́къ а́нгельскій да удиви́тся чудеси́,* земнíи же гла́сы, возопіе́мъ пѣ́ніе,* зря́ще неизрече́нное Бо́жіе снизхожде́ніе,* Его́же бо трепе́щутъ небе́сныя си́лы,* ны́нѣ ста́рчи объе́млютъ ру́цѣ Еди́наго Человѣколю́бца.

По 2-й стихоло́гіи сѣда́ленъ свято́му, гла́съ 4. Подо́бенъ: Вознесы́йся.

На Боже́ственнѣй стра́жи ста́лъ еси́, блаже́нне, и разумѣ́лъ еси́ Бо́жіе прія́тіе проро́ческими очи́ма, богодохнове́нне. Тѣ́мже и возопи́лъ еси́, Симео́не Богопріи́мче, со стра́хомъ: Го́споди, услы́шахъ сла́вное воспрія́тіе Твое́ и воспѣва́ю Тя́, въ пло́ть бре́нную отъ Дѣ́вы во́лею обле́кшася.

Сла́ва, и ны́нѣ, пра́зднику, гла́съ 1. Подо́бенъ: Ка́мени запеча́тану.

Въ це́рковь прине́слся еси́, Жи́знь вся́ческихъ,* мене́ ра́ди младе́нствовавъ,* подъ зако́номъ бы́лъ еси́,* дре́вле начерта́въ на скрижа́лѣхъ зако́нъ на горѣ́ Сина́йстѣй,* да вся́ измѣни́ши отъ зако́нныя дре́внія рабо́ты.* Сла́ва Благоутро́бію Твоему́, Спа́се,* сла́ва Ца́рствію Твоему́,* сла́ва смотре́нію Твоему́, Еди́не Человѣколю́бче.

Велича́ніе:

Велича́емъ тя́, святы́й пра́ведный Симео́не Богопріи́мче, и чте́мъ святу́ю па́мять твою́, ты́ бо мо́лиши о на́съ Христа́, Бо́га на́шего. [Псало́мъ избра́нный: Блаже́нъ му́жъ боя́йся Го́спода, въ за́повѣдехъ Его́ восхо́щетъ зѣло́...]

По поліеле́и сѣда́ленъ Симео́ну, гла́съ 5:

Очи́стивъ отъ скве́рны у́мъ, прему́дре,* зерца́ло боже́ственное содѣ́лался еси́* и ны́нѣ къ воспрія́тію Сы́на Бо́жія,* ра́дуяся, прише́лъ еси́, проро́че Симео́не.

Сла́ва, и ны́нѣ, пра́здника, гла́съ 5. Подо́бенъ: Собезнача́льное Сло́во.

Во хра́мъ прине́слся еси́,* обы́чная исполня́я,* Творе́цъ, и Влады́ка, и зако́на Да́тель, Спа́се,* и на рука́хъ Симео́на благоволе́ніемъ Твои́мъ носи́тися пло́тію,* Иже всѣ́мъ стра́шный и всю́ тва́рь содержа́й,* восхотѣ́лъ еси́, Еди́не Ще́дре,* свѣ́тъ Тво́й всѣ́мъ откры́ти на́мъ.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Вся́кое дыха́ніе... Ева́нгеліе отъ Луки́, зача́ло 8.

По 50-мъ псалмѣ́ стихи́ра самогла́сна, гла́съ 6:

Проро́че и проповѣ́дателю Христо́въ Симео́не Богопріи́мче, престо́ла вели́чествія никогда́же отлуча́ешися и кому́ждо немощно́му всегда́ предстои́ши, въ вы́шнихъ служа́, вселе́нную исполня́еши, всю́ду прославля́емый, испроси́ просвѣще́ніе душа́мъ на́шимъ.

Кано́нъ пра́здника со ирмосо́мъ на 6 и свята́го Симео́на на [8].

Кано́нъ пра́здника, творе́ніе Козмы́ мона́ха, гла́съ 3.
Пѣ́снь 1.

Ирмо́съ: Су́шу глубороди́тельную зе́млю со́лнце наше́ствова иногда́: я́ко стѣна́ бо, огустѣ́ обапо́лы вода́ лю́демъ пѣшомореходя́щимъ и богоуго́дно пою́щимъ: пои́мъ Го́сподеви, сла́вно бо просла́вися.

Да ка́плютъ во́ду о́блацы, Со́лнце бо, на о́блацѣ ле́гцѣ носи́мо, наста́ло е́сть, на нетлѣ́нную руку́, Христо́съ въ це́ркви я́ко Младе́нецъ. Тѣ́мже, вѣ́рніи, возопіи́мъ: пои́мъ Го́сподеви, сла́вно бо просла́вися.

Крѣпи́теся, ру́цѣ Симео́ни, ста́ростію осла́бленніи, лы́ста же претружде́нна ста́рча правобыстро́ движи́тася Христу́ на срѣ́теніе, ли́къ со безпло́тными соста́вльше, пои́мъ Го́сподеви, сла́вно бо просла́вися.

Ра́зумомъ просте́ртая небеса́, весе́литеся, и ра́дуйся, земле́, изъ Пребоже́ственныхъ бо нѣ́дръ Хитре́цъ проше́дъ Христо́съ, Ма́терію Дѣ́вою Бо́гу Отцу́ прино́сится Младе́нецъ, Иже пре́жде всѣ́хъ, сла́вно бо просла́вися.

Другій кано́нъ Симео́ну, гла́съ 4, ему́же краегране́сіе: Пріими́ пѣ́ніе, Симео́не Богопріи́мче.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Въ пра́ведныхъ селе́ніихъ ра́достно водворя́яся Пра́веднаго Го́спода, Симео́не пра́ведный, и́же боже́ственное твое́ соверша́ющія преставле́ніе, оправда́ти моли́, преблаже́нне.

Въ зако́нѣ бы́въ священнодѣ́тель, свяще́ннѣйше, Его́же зако́нъ проповѣ́да, Младе́нца ви́дѣлъ еси́ и естества́ зако́номъ, Богопріи́мче, у́меръ, къ безсме́ртнѣй, ра́дуяся, преше́лъ еси́ жи́зни.

Рука́ми держа́щаго вселе́нныя концы́, Дѣви́ческими носи́ма рука́ми, ви́дѣлъ еси́ и, честны́ми твои́ми пріе́мъ объя́тіи, Моисе́я вы́шшій яви́лся еси́, пребога́те.

Богоро́диченъ: По́лный истощава́ется, Превѣ́чный начина́ется, Сло́во одебелева́етъ, Содѣ́тель зи́ждется, Невмѣсти́мый вмѣща́ется, во чре́вѣ Твое́мъ воплоща́емь, Богоблагода́тная.

Катава́сія: Су́шу глубороди́тельную...

Пѣ́снь 3.

Ирмо́съ: Утвержде́ніе на Тя́ надѣ́ющихся, утверди́, Го́споди, Це́рковь, Юже стяжа́лъ еси́ честно́ю Твое́ю кро́вію.

Перворожде́нъ изъ Отца́ пре́жде вѣ́къ, перворожде́нъ Младе́нецъ изъ Дѣ́вы нетлѣ́нныя, Ада́му ру́ку простира́я, яви́ся.

Младоу́мна бы́вша пре́лестію первозда́ннаго па́ки исправля́яй Бо́гъ Сло́во, младе́нствовавъ, яви́ся.

Земли́ исча́діе, па́ки поте́кшее въ ню́, Божества́ сообра́зное естество́ Зижди́тель я́ко непрело́жнѣ, младе́нствовавъ, яви́.

Инъ.

Ирмо́съ: Яко непло́ды роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Возвы́сився дѣя́ньми свяще́нными, богоглаго́ливе, я́ко свѣтови́дѣнъ сто́лпъ высо́къ, Всесвято́му Ду́ху бы́лъ еси́, утвержда́яся я́вѣ, тѣ́мже восхваля́емъ тя́.

Зако́ну Го́спода, разве́рзшаго ложесна́ Дѣви́ча, и Младе́нца, плотоно́сна, Симео́не, бы́вша, ви́дѣлъ еси́, да́рующаго всѣ́мъ избавле́ніе.

Рука́ми человѣ́ка созда́вый, вопло́щься, рука́ми твои́ми держи́мь е́сть, освяща́я тя́ я́вѣ, и къ жи́зни бу́дущей проси́вшася, блаже́нне, отпуща́етъ тя́.

Богоро́диченъ: Мы́сленную Тя́ клещу́, у́гль нося́щу Боже́ственный, отъ Твои́хъ крове́й воплоще́нна па́че ума́ Симео́нъ я́ко ви́дѣ, Всенепоро́чная, ра́дуяся, ублажа́ше.

По 3-й пѣ́сни, конда́къ пра́здника, гла́съ 1:

Утро́бу Дѣви́чу освяти́вый Рождество́мъ Твои́мъ и ру́цѣ Симео́нѣ благослови́вый, я́коже подоба́ше, предвари́въ, и ны́нѣ спа́слъ еси́ на́съ, Христе́ Бо́же, но умири́ во бранѣ́хъ жи́тельство и укрѣпи́ Импера́тора, Его́же возлюби́лъ еси́, Еди́не Человѣколю́бче.

Икосъ:

Къ Богоро́дицѣ притеце́мъ, хотя́щіи Сы́на Ея́ ви́дѣти, къ Симео́ну носи́ма, Его́же съ небесе́ безпло́тніи ви́дяще, дивля́хуся, глаго́люще: чу́дная зри́мъ ны́нѣ и пресла́вная, непостижи́мая, несказа́нная! Иже бо Ада́ма созда́вый но́сится я́ко Младе́нецъ, Невмѣсти́мый вмѣща́ется на рука́хъ ста́рчихъ, Иже въ нѣ́дрѣхъ неопи́санныхъ Сы́й Отца́ Своего́ во́лею опису́ется пло́тію, а не Божество́мъ, Еди́нъ Человѣколю́бецъ.

Сѣда́ленъ, гла́съ 4. Подо́бенъ: Удиви́ся Іо́сифъ.

На горѣ́ Сина́йстѣй дре́влѣ ви́дѣ Моисе́й за́дняя Бо́жія, и то́нкій Боже́ственный гла́съ сподо́бися во мра́цѣ же и ви́хрѣ слы́шати. Ны́нѣ же Симео́нъ воплоще́ннаго Бо́га непрело́жнѣ на́съ ра́ди на ру́ки прія́тъ и ра́достно тща́шеся ити́ отъ су́щихъ здѣ́ къ животу́ вѣ́чному. Тѣ́мже вопія́ше: ны́нѣ отпуща́еши раба́ Твоего́, Влады́ко.

Сла́ва, и ны́нѣ, то́йже.

Пѣ́снь 4.

Ирмо́съ: Покры́ла е́сть небеса́ добродѣ́тель Твоя́, Христе́, изъ Киво́та бо проше́дъ святы́ни, Твоея́ Нетлѣ́нныя Ма́тере, въ хра́мѣ Сла́вы Твоея́ яви́лся еси́, я́ко Младе́нецъ руконоси́мь, и испо́лнишася вся́ Твоего́ хвале́нія.

Ра́дуйся, Симео́не, неизрече́нныхъ таи́нниче, — Богоро́дица вопія́ше, — о Не́мже отъ Свята́го дре́вле извѣсти́ся тебѣ́ Ду́ха, младе́нствовавшаго Сло́ва Христа́ на ру́ки пріими́, зовы́й Ему́: испо́лнишася вся́ Твоего́ хвале́нія.

На Него́же упова́лъ еси́, Симео́не, во́зрастъ дѣ́тищный, ра́дуяся, подыми́ Христа́, Изра́иля боже́ственнаго утѣше́ніе, зако́на Творца́ и Влады́ку, исполня́ющаго зако́на чи́нъ, зовы́й Ему́: испо́лнишася вся́ Твоего́ хвале́нія.

Ви́дя Симео́нъ Сло́во безнача́льное, съ пло́тію, я́ко на престо́лѣ херуви́мстѣмъ, Дѣ́вою носи́мо, вино́внаго е́же бы́ти вся́ческихъ, я́ко Младе́нцу дивя́ся, вопія́ше Ему́: испо́лнишася вся́ Твоего́ хвале́нія.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Престарѣ́лся еси́ въ ста́рости, вѣ́рою же обнови́лся еси́, но́ва Младе́нца хотя́ ви́дѣти, Симео́не, всесоверше́ннаго, обновля́юща мíръ обетша́вшій прило́гомъ ве́тхаго борца́.

Ублажи́мъ согла́сно Симео́на блаже́ннаго, я́ко сподо́бльшася ви́дѣти Бо́га блаже́ннаго, въ пло́ть обо́лкшася, я́ко да сотвори́тъ блаже́нны, окая́нны пре́жде бы́вшія.

Законода́вца Тя́ вѣ́мъ и зако́нныхъ естества́ вопло́щшагося кромѣ́, зако́нъ же но́въ вве́дшаго, — Симео́нъ взыва́ше, — Еди́не Го́споди, ны́нѣ отпусти́ мя къ жи́зни нетлѣ́ннѣй.

Богоро́диченъ: Иже руко́ю вся́ нося́й, на рука́хъ носи́мый Приснодѣ́вы, Сію́ херуви́мъ содѣ́ла и серафи́мъ вы́шшу, я́ко роди́тельницу, Юже воспои́мъ и благоче́стно ублажи́мъ.

Пѣ́снь 5.

Ирмо́съ: Яко ви́дѣ Иса́ія обра́зно на престо́лѣ превознесе́на Бо́га, отъ а́нгелъ сла́вы дориноси́ма, — о, окая́нный, — вопія́ше, — а́зъ! Прови́дѣхъ бо воплоща́ема Бо́га, Свѣ́та невече́рня, и ми́ромъ влады́чествующа.

Разумѣ́въ боже́ственный ста́рецъ проявле́нную дре́вле проро́ку сла́ву, рука́ми Сло́во зря́ Ма́терними держи́мо, — о, ра́дуйся, — вопія́ше, — Чи́стая! Яко престо́лъ, бо держи́ши Бо́га, Свѣ́та невече́рняго и ми́ромъ влады́чествующа.

Покло́нься ста́рецъ, и стопа́мъ боже́ственнѣ прикосну́вся неискусобра́чныя и Богома́тере, — Огнь, — рече́, — но́сиши, Чи́стая: Младе́нца бою́ся объя́ти Бо́га, Свѣ́та невече́рняго и ми́ромъ влады́чествующа.

Очища́ется Иса́ія, отъ серафи́ма у́гль пріе́мъ, — ста́рецъ вопія́ше Богома́тери, — Ты́, я́коже клеща́ми, рука́ми просвѣща́еши мя́, пода́вши, Его́же но́сиши, Свѣ́та невече́рняго и ми́ромъ влады́чествующа.

Инъ.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Ума́ чистото́ю Бо́гу Вседержи́телю, я́ко а́нгелъ послужи́въ, блаже́нне, кро́вными же́ртвами очи́стилъ еси́ дре́вле лю́ди Изра́илевы, кро́вь спаси́тельную предзна́менавъ я́сно.

Самого́ себе́ сотвори́лъ еси́ хра́мъ Бо́гу всесвя́тъ дѣ́лы боже́ственными, богоглаго́ливе. Тѣ́мже я́ко Младе́нца во святѣ́мъ хра́мѣ ви́дѣлъ еси́ Бо́га съ пло́тію, тя́ преставля́юща къ Боже́ственнымъ селе́ніемъ.

Воспои́мъ дне́сь, духо́вно лику́юще, вси́ Симео́на Богопріи́мца и съ ни́мъ Анну цѣлому́друю, проро́ки су́ща Бо́жія, и Сего́ ви́дѣвшія, на́съ ра́ди младе́нствовавшаго.

Богоро́диченъ: Не опали́въ ложе́снъ Твои́хъ естество́мъ Неизмѣ́нный, Еди́на херуви́мъ святѣ́йши, Человѣ́къ яви́ся, изъ Тебе́ ражда́емь, и отринове́нныя тлѣ́ніемъ вся́ совокупи́, Богома́ти, Рождество́мъ Твои́мъ.

Пѣ́снь 6.

Ирмо́съ: Возопи́ къ Тебѣ́, ви́дѣвъ ста́рецъ очи́ма спасе́ніе, е́же лю́демъ пріи́де отъ Бо́га: Христе́, Ты́ Бо́гъ мо́й.

Сіо́ну Ты́ ка́мень возложи́лся еси́, непокори́вымъ претыка́ніе и собла́зна ка́мень, неруши́мое вѣ́рныхъ спасе́ніе.

Извѣ́стнѣ нося́ начерта́ніе Иже пре́жде вѣ́къ Тя́ израсти́вшаго, земны́хъ за милосе́рдіе ны́нѣ не́мощію обложи́ся.

Сы́ну Вы́шняго, Сы́ну Дѣ́вы, Бо́гу, Отроча́ти бы́вшему, покло́ньшася Тебѣ́ ны́нѣ отпусти́ съ ми́ромъ.

Инъ.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Возопи́лъ еси́, внегда́ ви́дѣлъ еси́ Го́спода, Симео́не, я́ко обѣща́лся еси́: ны́нѣ раба́ Твоего́, Спа́се, отпусти́, во а́дѣ су́щимъ всѣ́мъ Твое́ Боже́ственное возвѣща́юща воплоще́ніе.

Украси́лся еси́ и Моисе́я свѣтлѣ́йшій бы́лъ еси́, на ру́ки добро́тою Кра́снаго пріи́мъ, Симео́не ста́рче, на́съ ра́ди по на́мъ Младе́нца бы́вша.

Во́дъ тя́ испо́лнена Боже́ственныхъ су́ща и во а́дова до́льная мѣ́ста сше́дша, ви́дѣвше та́мо су́щіи у́зницы, Симео́не, Боже́ственныя росы́ испо́лнишася.

Богоро́диченъ: Улови́ти мя́ всегда́ и́щетъ вселука́вый, но того́ мя сѣ́тей исхи́ти, Влады́чице, и боже́ственнымъ кро́вомъ кри́лъ Твои́хъ цѣ́ла соблюди́.

Конда́къ Симео́ну, гла́съ 4. Подо́бенъ: Яви́лся еси́ дне́сь.

Ста́рецъ дне́сь отрѣши́тися отъ ю́зъ моля́шеся сего́ житія́ тлѣ́ннаго, Христа́ воспрія́тъ на ру́ки, Зижди́теля и Го́спода.

Икосъ:

Госпо́дня свидѣ́тельства пріе́мъ, Симео́не Богопріи́мче, па́че всѣ́хъ человѣ́къ вы́сши бы́лъ еси́; тѣ́мже похвалы́ принести́ тебѣ́ ужасо́хся, но, любо́вію пону́дився, пѣ́снь нача́ти дерзну́хъ, тѣ́мже не отри́ни, помо́щникъ на́мъ бу́ди, прехва́льне, да возмогу́ пѣ́ти че́стны ру́цѣ твои́, вои́стину прикосну́вшіися богопрія́тнѣ Боже́ственному Младе́нцу, и́бо се́ Христа́ воспрія́лъ еси́ на руку́, Зижди́теля и Го́спода.

Пѣ́снь 7.

Ирмо́съ: Тебе́ во огни́ ороси́вшаго о́троки богосло́вившія, и въ Дѣ́ву нетлѣ́нну все́льшагося Бо́га Сло́ва пои́мъ, благоче́стно пою́ще: благослове́нъ Бо́гъ оте́цъ на́шихъ.

Ада́му извѣсти́ти хотя́й иду́, во а́дѣ живу́щу, и Евѣ принести́ благовѣ́стіе, — Симео́нъ вопія́ше, со проро́ки лику́я: благослове́нъ Бо́гъ оте́цъ на́шихъ.

Ро́да зе́мна избавля́яй Бо́гъ да́же до а́да пріи́детъ, плѣ́ннымъ же пода́стъ всѣ́мъ оставле́ніе и прозрѣ́ніе слѣпы́мъ, я́ко и нѣмы́мъ вопи́ти: благослове́нъ Бо́гъ оте́цъ на́шихъ.

И Твое́ се́рдце, Нетлѣ́нная, ору́жіе про́йдетъ, — Симео́нъ Богоро́дицѣ провозгласи́, — на Крестѣ́ зря́щи Твоего́ Сы́на, Ему́же вопіе́мъ: благослове́нъ Бо́гъ оте́цъ на́шихъ.

Инъ.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Зако́нно Го́споду Вседержи́телю ты́ послужи́лъ еси́, пра́веденъ я́ко и́стинно и въ зако́нѣ непоро́ченъ, блаже́нне, бы́въ, тѣ́мже пое́ши: препѣ́тый отце́въ Госпо́дь и Бо́гъ, благослове́нъ еси́.

Ра́дость скорбя́щихъ пріи́де, избавле́ніе Изра́илю вои́стинну яви́ся, я́ко Младе́нецъ въ хра́мѣ свое́мъ, отпусти́ мя къ жи́зни бу́дущей, — Симео́нъ вопія́ше, ра́дуяся.

За милосе́рдіе щедро́тъ Твои́хъ претружде́на мя́ зако́на пи́сменемъ, сля́чена мя́ ста́ростію отпусти́, Спа́се, раба́ Твоего́, я́ко ви́дѣхъ Тя́, — Симео́нъ взыва́ше, — на земли́ нося́ща пло́ть.

Богоро́диченъ: Не истощи́въ По́лный пречи́стыхъ нѣ́дръ ро́ждшаго Отца́, въ Твои́хъ нѣ́дрѣхъ, Чи́стая, я́ко Младе́нецъ сѣди́тъ, угото́вая, и́мже восхотѣ́ уподо́битися, Пречи́стая, свяще́нное я́вѣ сѣда́лище.

Пѣ́снь 8.

Ирмо́съ: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Лю́діе Изра́илевы, Твою́ сла́ву Емману́ила зря́ще Отроча́ изъ Дѣ́вы, предъ лице́мъ Боже́ственнаго ковче́га ны́нѣ лику́йте: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Се́, Симео́нъ вопія́ше, — прерѣка́емое зна́меніе Се́й бу́детъ, Бо́гъ Сы́й и Отроча́, — Сему́, вѣ́рніи, возопіи́мъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Живо́тъ Сы́й, Се́й бу́детъ паде́ніе непокори́вымъ, младе́нствовавъ Бо́гъ Сло́во, я́ко воста́ніе всѣ́мъ вѣ́рою пою́щимъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Овдовѣ́вшій мíръ Боже́ственныя сла́вы прише́дшаго невѣстоукраси́ти Пребоже́ственнаго, вдова́ су́щи, Анна всехва́льная, и проро́чества благода́тію облиста́емая, просла́ви Его́, и бу́дущее всѣ́мъ предстоя́щимъ показа́ше Боже́ственное избавле́ніе.

Зако́нныя же́ртвы приноси́лъ еси́, Агнца за милосе́рдіе несказа́нное, кро́вь спаси́тельную провозвѣща́я издале́ча, блаже́нне свяще́нниче, Его́же воплоще́нна пріе́мъ, Симео́не, просла́вился еси́ па́че Моисе́я и всѣ́хъ проро́ковъ.

Ви́дѣвъ Жела́емаго, разрѣше́ніе прія́лъ еси́ тѣле́сное, богодохнове́нне и, я́коже зрѣ́лая пшени́ца, преше́лъ еси́ ко отце́мъ, сла́вне, воспита́нъ въ ста́рости до́брѣй. Тѣ́мже твою́ всепра́зднственную па́мять ра́достію душе́вною соверша́емъ.

Богоро́диченъ: Яко кри́нъ, я́ко благово́ненъ ши́покъ, я́ко боже́ственное обоня́ніе, обрѣ́тъ Тя́ Сло́во Пребоже́ственное, Пречи́стая Богоневѣ́сто, и въ Твою́ утро́бу всели́ся, благоуха́я на́ше естество́, злосмра́дія испо́лньшееся, е́же отъ грѣха́, Марíе Богоро́дице.

На 9-й пѣ́сни припѣ́вы. Вся́кій припѣ́въ по еди́ножды.

Богоро́дице Дѣ́во, упова́ніе христіа́номъ, покры́й, соблюди́ и спаси́ на Тя́ уповаю́щихъ.

Богоро́дице Дѣ́во, мíру блага́я помо́щнице, покры́й и соблюди́ отъ вся́кія ну́жды и печа́ли.

Богоно́се Симео́не, пріиди́, подыми́ Христа́, Его́же роди́ Дѣ́ва чи́стая Марíя.

Объе́млетъ рука́ми ста́рецъ Симео́нъ Содѣ́теля зако́на и Влады́ку вся́ческихъ.

Не ста́рецъ Мене́ держи́тъ, но Азъ держу́ его́: то́й бо отъ Мене́ отпуще́нія про́ситъ.

Клеще́ та́инственная, ка́ко у́гль но́сиши? Ка́ко пита́еши Пита́ющаго вся́?

О, дщи́ Фану́илева! Пріи́ди, ста́ни съ на́ми и благодари́ Христа́ Спа́са, Сы́на Бо́жія.

Анна цѣлому́дренная провѣща́етъ стра́шная, исповѣ́дающи Христа́, Творца́ не́бу и земли́.

Непостижи́мо е́сть содѣ́янное о Тебѣ́ а́нгеломъ и человѣ́комъ, Ма́ти Дѣ́во чи́стая.

Чи́стая Голуби́ца, нескве́рная Агница, Агнца и Па́стыря прино́ситъ въ це́рковь.

О, Христе́, всѣ́хъ Царю́! Побѣ́ды на враги́ Вѣ́рному Твоему́ рабу́, Импера́тору на́шему да́руй.

О, Христе́, всѣ́хъ Царю́! Пода́ждь ми́ сле́зы теплы́, да пла́чу мою́ ду́шу, ю́же злѣ́ погуби́хъ.

Вмѣ́сто, Сла́вы: Трисія́тельное и Тріѵпоста́сное Божество́ благоче́стно да похва́лимъ.

Вмѣ́сто, И ны́нѣ: О, Дѣви́це Марíе! Просвѣти́ мою́ ду́шу, помраче́нную лю́тѣ жите́йскими сластьми́.

Пѣ́снь 9.

Ирмо́съ: Въ зако́нѣ сѣ́ни и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ.

Иже дре́внимъ новорожде́нныхъ го́рличищъ супру́гъ дво́ица же бя́ше птенце́въ, въ ни́хже мѣ́сто боже́ственный ста́рецъ и цѣлому́дренная Анна проро́чица отъ Дѣ́вы рожде́нному и Сы́ну Единоро́дному Отчу, въ це́рковь приноси́му, слу́жатъ, велича́юще.

Возда́лъ еси́ мнѣ́, — вопія́ше Симео́нъ, — спасе́нія Твоего́, Христе́, ра́дованіе, воспріими́ Твоего́ служи́теля, сѣ́нію претружде́ннаго, но́выя благода́ти священнопроповѣ́дника та́йнаго, во хвале́ніи велича́юща.

Священнолѣ́пно исповѣ́дашеся Анна, прорица́ющи, цѣлому́дренная, и преподо́бная, и ста́рица, Влады́цѣ въ це́ркви я́вственно, Богоро́дицу же, проповѣ́дающи всѣ́мъ су́щимъ, велича́ше.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Че́стны ру́цѣ твои́, вои́стинну прикосну́вшіяся, Богопріи́мче, Боже́ственнымъ удесе́мъ, — прикаса́ющагося гора́мъ, — я́коже пое́тъ Дави́дъ, — и дымя́тся, — блаже́нъ вои́стинну ты́ бы́лъ еси́. Тѣ́мже досто́йно восхваля́емъ тя́.

Моли́тва къ тебѣ́ источа́етъ вѣ́рнымъ исцѣле́нія, па́мять о тебѣ́ блаже́нная, сія́етъ па́че со́лнца, и всѣ́хъ ду́ши просвѣща́ющи, и мра́ка мы́сленнаго исхища́етъ, священнотаи́нниче всече́стне.

Просвѣща́ютъ сія́ніемъ мы́сленнымъ, я́ко со́лнце и луна́ подсо́лнечную, Анна цѣлому́дренная и проро́чица, ста́рецъ же Симео́нъ сла́вный. Ихже ра́ди на́съ, Человѣколю́бче Го́споди, грѣхо́вныя тмы́ изба́ви.

Богоро́диченъ: Явльшуюся Тя́, Ма́терь Бо́жію, я́ко ви́дѣвъ, Богоро́дице, ста́рецъ рече́, я́коже проро́къ: се́ Тво́й Сы́нъ, на воста́ніе и паде́ніе мно́гихъ лежи́тъ, Влады́чице, и въ зна́меніе неудобосказу́емое.

Свѣти́ленъ свято́му:

На земли́ равноа́нгельно житіе́ имѣ́лъ еси́, вои́стину престарѣ́вся тѣ́ломъ, и ны́нѣ на небесѣ́хъ со а́нгельскими ли́ки всели́лся еси́ бли́зъ Свѣ́та Трисія́ннаго. Его́же насыща́яся, Симео́не Богопріи́мче, назира́й на́съ, пою́щихъ тя́.

Сла́ва, и ны́нѣ, пра́здника:

Ду́хомъ во святи́лищи предста́въ, ста́рецъ на ру́ки воспрія́тъ зако́на Влады́ку, вопія́: ны́нѣ соу́зъ мя́ плотски́хъ разрѣши́, я́коже ре́клъ еси́, съ ми́ромъ: ви́дѣхъ бо очи́ма открове́ніе язы́ковъ и Изра́илю спасе́ніе.

На хвали́техъ стихи́ры, гла́съ 4. Подо́бенъ: Да́лъ еси́ зна́меніе.

Зако́нъ, и́же въ писа́ніи,* исполня́я, Человѣколю́бецъ* въ це́рковь ны́нѣ прино́сится,* и Сего́ пріе́млетъ ста́рыми рука́ми Симео́нъ ста́рецъ, —* ны́нѣ отпуща́еши мя, — вопія́, —* ко о́ному блаже́нству:* ви́дѣхъ бо Тя́ дне́сь, пло́тію ме́ртвенною обложе́ннаго,* живото́мъ госпо́дствующа* и сме́ртію влады́чествующа.

Свѣ́тъ во открове́ніе язы́ковъ* яви́лся еси́, Го́споди,* на о́блацѣ сѣдя́ ле́гцѣ,* Со́лнце пра́вды,* зако́на сѣно́вное исполня́я* и нача́ло изъявля́я но́выя благода́ти.* Тѣ́мъ, Тя́ ви́дѣвъ, Симео́нъ взыва́ше:* изъ истлѣ́нія мя́ разрѣши́,* я́ко ви́дѣхъ Тя́ дне́сь.

Нѣ́дръ Роди́теля не отлу́чся Божество́мъ,* вопло́щся, я́коже изво́лилъ еси́,* объя́тіями держи́мь Приснодѣ́вы,* на ру́ки пода́лся еси́ богопріи́мца Симео́на,* руко́ю Твое́ю держа́й вся́ческая;* тѣ́мже — ны́нѣ отпуща́еши мя́, —* ра́достно взыва́ше, —* въ ми́рѣ раба́ Твоего́,* я́ко ви́дѣхъ Тя́, Влады́ко.

Стихи́ры Симео́ну, гла́съ 4. Подо́бенъ то́йже.

Пра́веденъ и соверше́нъ* и по всему́ сла́венъ сы́й, богодохнове́нне,* Бо́га Еди́наго соверше́нна,* во е́же оправда́ти мíръ прише́дшаго,* подъя́лъ еси́ рука́ми воплоще́нна,* и отрѣши́тися имы́й тѣлесе́, вопія́лъ еси́ Ему́:* ны́нѣ отпуща́еши раба́ Твоего́* съ ми́ромъ, Человѣколю́бче,* я́ко ви́дѣхъ Тя́ дне́сь.

Юношствуя ду́хомъ,* престарѣ́въ же тѣ́ломъ, Симео́не,* обѣща́ніе прія́лъ еси́ не ви́дѣти сме́рти,* до́ндеже уви́диши Младе́нца ю́на,* пре́жде вѣ́къ су́щаго Творца́ и Бо́га вся́ческихъ,* пло́тію обнища́вша,* ви́дѣвъ же, взыгра́лъ еси́* и пло́ти разрѣше́ніе проси́лъ еси́,* къ Боже́ственнымъ селе́ніемъ преше́дъ, ра́дуяся.

Анна богодохнове́нная* и Симео́нъ пребога́тый,* проро́чествіемъ сія́ющіи,* въ зако́нѣ же непоро́чни я́вльшіися,* зако́на Да́теля,* Младе́нца, я́вльшася по на́мъ ви́дѣвше,* Тому́ ны́нѣ поклони́шася.* Тѣ́хъ па́мять дне́сь ра́достно пра́зднуимъ,* по до́лгу сла́вяще Іису́са Человѣколю́бца.

Сла́ва, свято́му, гла́съ 4:

О Го́сподѣ ра́дуяся и Бо́зѣ, Спа́сѣ свое́мъ, богоглаго́ливе и сла́вне проро́че, и та́мо су́щаго сія́нія зарю́ пріе́мъ, и Свѣ́томъ Боже́ственнымъ мы́сленно просвѣща́емь, и́же па́мять твою́ всепра́зднственную вѣ́рою творя́щія, напа́стей и бѣ́дъ твои́ми моли́твами изба́ви.

И ны́нѣ пра́здника, гла́съ 6:

На рука́хъ ста́рческихъ во дне́шній де́нь,* я́ко на колесни́цѣ херуви́мстѣй,* восклони́тися благоизво́ливый, Христе́ Бо́же,* и на́съ, пою́щихъ Тя́,* страсте́й мучи́тельства призыва́емъ, изба́ви* и спаси́, я́ко Человѣколю́бецъ.

Та́же, славосло́віе вели́кое, и отпу́стъ и ча́съ 1-й.



НА ЛИТУРГІИ,

Блаже́нна отъ кано́на пра́здника пѣ́снь 1-я, и свято́му пѣ́снь 6-я. Проки́менъ [пра́здника, пѣ́снь Богоро́дицы, гла́съ 3: Вели́читъ душа́ Моя́ Го́спода, и возра́довася ду́хъ Мо́й о Бо́зѣ Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо, отъ ны́нѣ ублажа́тъ Мя́ вси́ ро́ди. И свята́го,] гла́съ 7: Возвесели́тся пра́ведникъ о Го́сподѣ и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ ко Евре́емъ, зача́ло 321 отъ полу́. Аллилу́ія [пра́здника, гла́съ 8: Ны́нѣ отпуща́еши раба́ Твоего́, Влады́ко, по глаго́лу Твоему́, съ ми́ромъ. Сти́хъ: Свѣ́тъ во открове́ніе язы́ковъ и сла́ву люде́й Твои́хъ Изра́иля. И свята́го,] гла́съ 6: Свѣ́тъ возсія́ пра́веднику, и пра́вымъ се́рдцемъ весе́ліе. Ева́нгеліе Луки́, зача́ло 8. Прича́стенъ [пра́здника: Ча́шу спасе́нія пріиму́ и и́мя Госпо́дне призову́. И свята́го:] Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Примѣчаніе:
[1] То есть годичную (прим. — издателя).

Источникъ: Слу́жба свято́му и пра́ведному Симео́ну Богопріи́мцу. — Тисне́ніе пе́рвое. — СПб: Въ Сѵнода́льной Тѵпогра́фіи, 1888. — С. 3-61.

/ Къ оглавленію раздѣла /


Наверхъ / Къ титульной страницѣ

0