Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія во 2-й де́нь.
Срѣ́теніе Го́спода Бо́га и Спа́са на́шего Іису́са Христа́.

НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 1. Подо́бенъ: Небе́сныхъ чино́въ.

Младе́нца ви́дѣвъ Тя́, вопія́ше чу́дный Симео́нъ:* Превѣ́чнаго Сло́ва, отъ Отца́ рожде́нна,* страшу́ся и бою́ся* рука́ми мои́ми объя́ти, Влады́ко,* но съ ми́ромъ раба́ Твоего́ ища́й,* ны́нѣ отпусти́, я́ко Милосе́рдъ.

Ны́нѣ да отве́рзется две́рь небе́сная,* Иже отъ Отца́ безъ сѣ́мене ро́ждься Бо́гъ Сло́во,* роди́ся отъ Дѣ́вы,* пло́ть пріе́мъ человѣ́чу во́лею,* обнови́ти естество́, я́ко Благъ,* и посади́ти одесну́ю Отца́.

Сла́ва, и ны́нѣ, гла́съ 4. Самогла́сенъ. Андре́я Кри́тскаго:

Дне́сь свяще́нная Ма́ти и святи́лища вы́шши во святи́лище пріи́де, я́вльшая мíру Законода́вца и зако́на Творца́. Его́же на ру́ки пріе́мъ ста́рецъ Симео́нъ, ра́дуяся взыва́ше: ны́нѣ отпуща́еши раба́ Твоего́, я́ко ви́дѣхъ Тя́, Спа́са ду́шъ на́шихъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Дне́сь Спаси́тель,* я́ко Младе́нецъ принесе́нъ бы́сть* въ це́рковь Госпо́дню,* и рука́ми престарѣ́лыми* ста́рецъ Того́ подъе́млетъ.

Сти́хъ: Ны́нѣ отпуща́еши раба́ Твоего́, Влады́ко,* по глаго́лу Твоему́, съ ми́ромъ.

Угль, проявле́йся,* боже́ственному Иса́іи, — Христо́съ,* я́ко клеща́ми,* рука́ми Богоро́дицы* ны́нѣ ста́рцу дае́тся.

Сти́хъ: Свѣ́тъ во открове́ніе язы́ковъ* и сла́ву люде́й Твои́хъ Изра́иля.

Стра́хомъ же и ра́достію* на рука́хъ Влады́ку* Симео́нъ держа́,* живота́ проша́ше разрѣше́нія,* поя́ Богома́терь.

Сла́ва, и ны́нѣ, гла́съ и подо́бенъ то́йже:

Пріими́, о Симео́не, —* Всечи́стая вопія́ше, —* во объя́тія я́ко Младе́нца* Го́спода сла́вы* и мíра спасе́ніе.

Тропа́рь, гла́съ 1:

Ра́дуйся, Благода́тная Богоро́дице Дѣ́во, изъ Тебе́ бо возсія́ Со́лнце пра́вды — Христо́съ, Бо́гъ на́шъ, просвѣща́яй су́щія во тмѣ́. Весели́ся и ты́, ста́рче пра́ведный, пріе́мый во объя́тія Свободи́теля ду́шъ на́шихъ, да́рующаго на́мъ воскресе́ніе.

Та́же, ектенія́ ма́лая. И отпу́стъ.



НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ.., пое́мъ стихи́ры на 8, гла́съ 1-й. Самогла́сны. Ге́рмана патріа́рха.

Глаго́ли, Симео́не, Кого́ нося́ на руку́ въ це́ркви ра́дуешися? Кому́ зове́ши и вопіе́ши: ны́нѣ свободи́хся, ви́дѣхъ бо Спа́са моего́? Се́й е́сть отъ Дѣ́вы рожде́йся, Се́й е́сть отъ Бо́га Бо́гъ Сло́во, воплоти́выйся на́съ ра́ди и спасы́й человѣ́ка, Тому́ поклони́мся. [Три́жды.]

Пріими́, Симео́не, Его́же подъ мра́комъ Моисе́й законополага́юща прови́дѣ въ Сина́и, Младе́нца бы́вша, зако́ну повину́ющася. Се́й е́сть зако́номъ глаго́лавый, Се́й е́сть во проро́цѣхъ рече́нный, воплоти́выйся насъ ра́ди и спасы́й человѣ́ка, Тому́ поклони́мся. [Три́жды.]

Пріи́демъ и мы́, пѣ́сньми боже́ственными Христа́ усря́щемъ и пріи́мемъ Его́, Его́же спасе́ніе Симео́нъ ви́дѣ. Се́й е́сть, Его́же Дави́дъ провозвѣсти́, Се́й е́сть во проро́цѣхъ глаго́лавый, воплоти́выйся на́съ ра́ди и зако́номъ вѣща́вый, Тому́ поклони́мся. [Два́жды.]

Сла́ва, и ны́нѣ, гла́съ 6. Іоа́нна мона́ха:

Да отве́рзется две́рь небе́сная дне́сь: Безнача́льное бо Сло́во Отчее, нача́ло пріи́мъ подъ лѣ́ты, не отсту́пль Своего́ Божества́, отъ Дѣ́вы я́ко Младе́нецъ четыредесятодне́венъ Ма́терію во́льнѣ прино́сится въ це́рковь зако́нную, и Сего́ на ру́ки пріе́млетъ ста́рецъ, — отпусти́, — зовы́й, — раба́, Влады́ко, и́бо о́чи мои́ ви́дѣста спасе́ніе Твое́. Прише́дый въ мíръ спасти́ ро́дъ человѣ́чь, Го́споди, сла́ва Тебѣ́.

Вхо́дъ. Проки́менъ дне́ и чте́нія три́.

Исхо́да чте́ніе. [Главы́ 12 и 13.]

Глаго́ла Госпо́дь къ Моисе́ю въ де́нь о́нъ, въ о́ньже изведе́ сы́ны Изра́илевы отъ земли́ Еги́петскія, глаго́ляй: Освяти́ Мнѣ́ вся́каго пе́рвенца перворожде́ннаго, разверза́ющаго ложесна́ въ сынѣ́хъ Изра́илевыхъ. И и́де Моисе́й, и собра́ вся́ лю́ди, и рече́: по́мните де́нь се́й, въ о́ньже изыдо́сте отъ земли́ Еги́петскія, изъ до́му рабо́ты, руко́ю бо крѣ́пкою Госпо́дь изведе́ на́съ отту́ду, и сохрани́те зако́нъ Его́. И бу́детъ, я́ко а́ще введе́тъ ва́съ Госпо́дь Бо́гъ въ зе́млю Ханане́йску, и́мже о́бразомъ кля́тся отце́мъ твои́мъ. И отлучи́ши вся́каго перворо́днаго, разверза́ющаго ложесна́, му́жескъ по́лъ Го́споду: и бу́детъ, я́ко а́ще вопро́ситъ тя́ по си́хъ сы́нъ тво́й, глаго́ля: что́ сіе́? И рече́ши ему́: я́ко руко́ю крѣ́пкою изведе́ на́съ Госпо́дь отъ земли́ Еги́петскія, изъ до́му рабо́ты. Егда́ бо ожесточи́ фара́она не отпусти́ти на́съ, поби́ Госпо́дь вся́ перворо́дныя въ земли́ Еги́петстѣй, отъ перворо́дныхъ человѣ́ческихъ, да́же до перворо́дныхъ ско́тскихъ. Сего́ ра́ди а́зъ же́ртву Го́споду приношу́: вся́каго, отверза́ющаго ложесна́, му́жеска по́лу и вся́каго перворо́днаго сыно́въ мои́хъ изба́влю. И бу́детъ въ зна́меніе непоколеби́мо предъ очи́ма твои́ма. Яко та́ко рече́ Госпо́дь Бо́гъ Вседержи́тель: я́ко перворожде́нная сыно́въ твои́хъ да́си Мнѣ́. И бу́детъ: вся́къ, и́же а́ще роди́тъ отроча́ му́жескъ по́лъ, въ де́нь осмы́й обрѣ́жете ему́ пло́ть кра́йнюю его́. И три́десять и три́ дни́ не вни́детъ во святи́лище Бо́жіе ко свяще́ннику, до́ндеже испо́лнятся днíе очище́нія. И по си́хъ принесе́ши Го́споду а́гня единолѣ́тно, непоро́чно во всесожже́ніе и птенца́ голуби́на или́ го́рличищна при две́рехъ ски́ніи свидѣ́нія, ко святи́телю. Или́ вмѣ́сто си́хъ принесе́ши предъ Го́сподемъ два́ птенца́ голуби́на или́ два́ го́рличища, и помо́лится о не́мъ свяще́нникъ. Яко воздая́ніе воздаю́щіи сíи Мнѣ́ су́ть отъ всѣ́хъ сыно́въ Изра́илевыхъ, и прія́тъ и́хъ. И освяти́тъ я́ Мнѣ́ вмѣ́сто перворо́дныхъ еги́петскихъ: въ о́ньже де́нь порази́хъ вся́каго пе́рвенца въ земли́ Еги́петстѣй, отъ человѣ́ка до скота́, — рече́ Бо́гъ Вы́шній Святы́й Изра́илевъ.

Проро́чества Иса́іина чте́ніе. [Глава́ 6.]

Бы́сть въ лѣ́то, въ не́же у́мре Озíя ца́рь, ви́дѣхъ Го́спода, сѣдя́ща на престо́лѣ высо́цѣ и превознесе́ннѣ, и испо́лнь до́мъ сла́вы Его́. И серафи́ми стоя́ху о́крестъ Его́, ше́сть кри́лъ еди́ному, и ше́сть кри́лъ друго́му, и двѣма́ у́бо покрыва́ху ли́ца своя́, двѣма́ же покрыва́ху но́ги своя́ и двѣма́ лета́ху. И взыва́ху дру́гъ ко дру́гу, и глаго́лаху: Свя́тъ, Свя́тъ, Свя́тъ Госпо́дь Савао́ѳъ, испо́лнь вся́ земля́ сла́вы Его́. И взя́тся наддве́ріе отъ гла́са, и́мже вопія́ху, и до́мъ испо́лнися ды́ма. И ре́хъ: о, окая́нный а́зъ! яко умили́хся, я́ко человѣ́къ сы́й, и, нечи́сты устнѣ́ имѣ́я, посредѣ́ люде́й, нечи́стая устна́ иму́щихъ, а́зъ живу́, и Царя́ Го́спода Савао́ѳа ви́дѣхъ очи́ма мои́ма. И по́сланъ бы́сть ко мнѣ́ еди́нъ отъ серафи́мовъ, и въ руцѣ́ свое́й имя́ше у́гль о́гненный, его́же клеща́ми взя́тъ отъ же́ртвенника. И прикосну́ся усто́мъ мои́мъ, и рече́: се́ прикосну́ся сіе́ устна́мъ твои́мъ, и оты́метъ беззако́нія твоя́ и грѣхи́ твоя́ очи́ститъ. И слы́шахъ гла́съ Го́спода, глаго́лющаго: кого́ послю́? И кто́ по́йдетъ къ лю́демъ си́мъ? И реко́хъ: се́ а́зъ е́смь, посли́ мя. И рече́: иди́ и рцы́ лю́демъ си́мъ: слу́хомъ услы́шите, и не уразумѣ́ете, и, ви́дяще, у́зрите и не уви́дите. Одебелѣ́ бо се́рдце люде́й си́хъ, и уши́ма свои́ма тя́жко слы́шаша, и о́чи свои́ смѣжи́ша, да не ка́ко уви́дятъ очи́ма, и уши́ма услы́шатъ, и се́рдцемъ уразумѣ́ютъ, и обратя́тся, и исцѣлю́ я́. И реко́хъ: доко́лѣ, Го́споди? И рече́: до́ндеже а́ще запустѣ́ютъ гра́ди, отъ е́же не пожи́ти, и до́ми, отъ е́же не бы́ти человѣ́комъ, и земля́ оста́влена бу́детъ пуста́. И по си́хъ продолжи́тъ Бо́гъ человѣ́ки, и умно́жатся оста́вльшіися на земли́.

Проро́чества Иса́іина чте́ніе. [Глава́ 9.]

Се́ Госпо́дь сѣди́тъ на о́блацѣ ле́гцѣ и пріи́детъ въ Еги́петъ, и сотрясу́тся рукотворе́нная еги́петская отъ лица́ Его́, и се́рдце и́хъ ума́лится въ ни́хъ. И смяте́тся ду́хъ и́хъ въ ни́хъ, и совѣ́тъ и́хъ разори́тъ. И преда́стъ Еги́пта въ ру́ки господе́й, зане́ сія́ глаго́летъ Госпо́дь, Влады́ка Святы́й Савао́ѳъ. Пію́тъ еги́птяне во́ду я́же при мо́ри. Рѣка́ же оскудѣ́етъ и и́зсхнетъ. Сія́ глаго́летъ Госпо́дь: гдѣ́ су́ть ны́нѣ прему́дріи твои́? Да возвѣстя́тъ ти́ и да реку́тъ тебѣ́ что́ совѣща́ Госпо́дь Савао́ѳъ на Еги́пта. Въ де́нь о́нъ бу́дутъ еги́птяне въ стра́сѣ и тре́петѣ отъ лица́ руки́ Го́спода Савао́ѳа, ю́же Онъ возложи́тъ на ни́хъ, и бу́детъ олта́рь Госпо́день въ странѣ́ еги́петстѣй и сто́лпъ въ предѣ́лехъ его́ Го́сподеви. И бу́детъ въ зна́меніе въ вѣ́ки Го́споду Савао́ѳу въ странѣ́ еги́петстѣй. Яко воззову́тъ ко Го́споду, и по́слетъ и́мъ Госпо́дь человѣ́ка, и́же спасе́тъ и́хъ. И вѣ́домъ бу́детъ Госпо́дь еги́птяномъ, и позна́ютъ еги́птяне Го́спода въ де́нь о́нъ, и сотворя́тъ же́ртву и да́ръ, и помо́лятся, и воздадя́тъ обѣ́ты своя́ Го́сподеви.

На литíи стихи́ры самогла́сны, гла́съ 1. Анато́лія:

Ве́тхій де́ньми, Иже зако́нъ дре́вле въ Сина́и да́въ Моисе́ю, дне́сь Младе́нецъ ви́дится и по зако́ну, я́ко зако́на Творе́цъ, зако́нъ исполня́я, во хра́мъ прино́сится, и ста́рцу дае́тся. Пріе́мъ же Сего́ Симео́нъ пра́ведный и, обѣща́ній сбытіе́ ви́дѣвъ соверша́емое, ра́достно вопія́ше: ви́дѣша о́чи мои́ е́же отъ вѣ́ка та́инство сокрове́нное, напослѣ́докъ днíй си́хъ я́вльшееся, Свѣ́тъ, разоря́я невѣ́рныхъ язы́ковъ омраче́ніе и сла́ву дая́ новоизбра́нному Изра́илю; тѣ́мже отпусти́ раба́ Твоего́ отъ соу́зъ сея́ пло́ти къ нестарѣ́емому и чу́дному некончае́мому животу́, подая́ мíрови ве́лію ми́лость.

Іоа́нна мона́ха:

Дне́сь дре́вле Моисе́ю въ Сина́и зако́нъ пода́вый зако́ннымъ повину́ется велѣ́ніемъ, на́съ ра́ди, я́ко Милосе́рдъ, по на́мъ бы́въ. Ны́нѣ Чи́стый Бо́гъ я́ко Отроча́ Свя́то, ложесна́ разве́рзъ Чи́стыя, Себѣ́ Самому́ я́ко Бо́гъ прино́сится, зако́нныя кля́твы свобожда́я и просвѣща́я ду́ши на́ша.

Гла́съ 2. Андре́я Пи́рра:

Ему́же вы́шніи служи́теліе съ тре́петомъ мо́лятся, до́лу ны́нѣ Симео́нъ ве́щными рука́ми пріе́мь, Бо́га человѣ́комъ соедини́тися проповѣ́да, и Человѣ́ка небе́сна Бо́га ви́дяй, отлуча́яся су́щихъ на земли́, ра́достно взыва́ше: Иже во тмѣ́ су́щимъ невече́рній Свѣ́тъ открыва́яй, Го́споди, сла́ва Тебѣ́.

Ге́рманово:

Дне́сь Симео́нъ на ру́ки Го́спода сла́вы подъе́млетъ, Его́же подъ мра́комъ пе́рвѣе Моисе́й ви́дѣ, на горѣ́ Сина́йстѣй скрижа́ли даю́ща ему́. Се́й е́сть, Иже во проро́цѣхъ глаго́ляй и зако́на Творе́цъ. Се́й е́сть, Его́же Дави́дъ возвѣща́етъ, Иже всѣ́мъ стра́шный, имѣ́яй ве́лію и бога́тую ми́лость.

Свяще́ннаго свяще́нная Дѣ́ва принесе́ во святи́лище святи́телю, просте́ръ же ру́цѣ, Симео́нъ прія́тъ Сего́, ра́дуяся, и возопи́: ны́нѣ отпуща́еши раба́ Твоего́, Влады́ко, по глаго́лу Твоему́ съ ми́ромъ, Го́споди.

Зижди́тель небесе́ и земли́ на рука́хъ ноша́шеся святы́мъ Симео́номъ ста́рцемъ дне́сь, то́й бо Ду́хомъ Святы́мъ глаго́лаше: ны́нѣ свободи́хся, ви́дѣхъ бо Спа́са моего́.

Анато́лія:

Дне́сь Симео́нъ ста́рецъ во хра́мъ вхо́дитъ, ра́дуяся ду́хомъ, Законода́вца Моисее́ва и Исполни́теля зако́на на ру́ки воспрія́ти. Онъ у́бо мра́комъ и гла́сомъ неявле́ннымъ богови́децъ сподо́бися бы́ти, покрове́ннымъ лице́мъ евре́евъ невѣ́рная сердца́ изобличи́, се́й же первовѣ́чное Сло́во Отчее воплоще́нное понесе́ и язы́комъ откры́ Свѣ́тъ, Кре́стъ и Воскресе́ніе. И Анна проро́чица показа́ся, Спа́са Изба́вителя Изра́илю проповѣ́дающи. Тому́ возопіи́мъ, Христу́ Бо́гу на́шему: Богоро́дицы ра́ди поми́луй на́съ.

Сла́ва, гла́съ 5. Андре́я Кри́тскаго:

Испыта́йте писа́нія, я́коже рече́ во Ева́нгеліихъ Христо́съ Бо́гъ на́шъ, въ ни́хъ бо обрѣта́емъ Того́, ражда́ема и пелена́ми повива́ема, въ я́слехъ полага́ема и млеко́мъ пита́ема, обрѣ́заніе пріе́млюща и Симео́номъ носи́ма, не мнѣ́ніемъ, ни привидѣ́ніемъ, но и́стиною мíрови я́вльшася, къ Нему́же возопіи́мъ: превѣ́чный Бо́же, сла́ва Тебѣ́.

И ны́нѣ, гла́съ то́йже. Ге́рманово:

Ве́тхій де́ньми, младе́нствовавъ пло́тію, Ма́терію Дѣ́вою въ це́рковь прино́сится, Своего́ зако́на исполня́я обѣща́ніе, Его́же Симео́нъ пріи́мъ, глаго́лаше: ны́нѣ отпуща́еши съ ми́ромъ, по глаго́лу Твоему́, раба́ Твоего́, ви́дѣша бо о́чи мои́ спасе́ніе Твое́, Святы́й.

На стихо́внѣ стихи́ры, гла́съ 7. Космы́ мона́ха:

Украси́ тво́й черто́гъ, Сіо́не, и подыми́ Царя́ Христа́, цѣлу́й Марíю, небе́сную Две́рь: Та́ бо престо́лъ херуви́мскій яви́ся, Та́ но́ситъ Царя́ сла́вы. Облакъ свѣ́та е́сть Дѣ́ва, нося́щи на рука́хъ Сы́на пре́жде денни́цы, Его́же пріе́мь Симео́нъ на ру́ки своя́, проповѣ́дуя лю́демъ Влады́ку Сего́ бы́ти живота́ и сме́рти, и Спа́са мíру.

Сти́хъ: Ны́нѣ отпуща́еши раба́ Твоего́, Влады́ко, по глаго́лу Твоему́, съ ми́ромъ.

Возсія́вшаго пре́жде вѣ́къ отъ Отца́, напослѣ́докъ же отъ ложе́снъ дѣви́ческихъ нося́щи въ це́рковь неискусобра́чная Ма́ти, въ Сина́йстѣй горѣ́ Законоположи́вшаго, повелѣ́нію зако́нному повину́ющася принесе́ святи́телю ста́рцу и пра́веднику, Христа́ Го́спода ви́дѣти обѣща́нна. Его́же пріе́мь Симео́нъ на ру́ки своя́, возра́довася, вопія́: Бо́гъ е́сть Се́й, Отцу́ Соприсносу́щный, и Изба́витель ду́шъ на́шихъ.

Сти́хъ: Свѣ́тъ во открове́ніе язы́ковъ и сла́ву люде́й Твои́хъ Изра́иля.

Носи́маго на колесни́цѣ херуви́мстѣй и пѣва́емаго въ пѣ́снехъ серафи́мскихъ нося́щи на руку́ Богоро́дица Марíя, неискусобра́чно изъ Нея́ вопло́щшагося, Законода́вца, зако́на исполня́юща чи́нъ, подая́ше рука́мъ ста́рца іере́я. Живо́тъ же нося́й, живота́ проша́ше разрѣше́нія, глаго́ля: Влады́ко, ны́нѣ отпусти́ мя возвѣсти́ти Ада́му, я́ко ви́дѣхъ непрело́жна Отроча́, Бо́га превѣ́чнаго и Спа́са мíра.

Сла́ва, и ны́нѣ, гла́съ 8. Андре́я Кри́тскаго:

Иже на херуви́мѣхъ носи́мый и пѣва́емый отъ серафи́мъ, дне́сь въ Боже́ственное святи́лище по зако́ну приноси́мь, на ста́рческихъ, я́ко на престо́лѣ, сѣди́тъ рука́хъ и отъ Іо́сифа пріе́млетъ да́ры боголѣ́пно, я́ко супру́гъ го́рличищъ, нескве́рную Це́рковь и отъ язы́къ новоизбра́нныя лю́ди, голуби́на же два птенца́, я́ко Нача́льникъ Ве́тхаго же и Но́ваго. Еже къ Нему́ обѣща́нія Симео́нъ коне́цъ пріе́мъ, благословя́ Дѣ́ву Марíю Богоро́дицу, страсте́й о́бразы, Иже изъ Нея́, провозгласи́ и отъ Него́ проша́ше отпуще́нія, вопія́: ны́нѣ отпусти́ мя, Влады́ко, я́коже пре́жде возвѣсти́ ми, я́ко ви́дѣхъ Тя́, первовѣ́чнаго Свѣ́та и Спа́са Го́спода христоимени́тымъ лю́демъ.

Та́же, Ны́нѣ отпуща́еши... Трисвято́е, и по Отче на́шъ...
На благослове́ніи хлѣ́бовъ: Тропа́рь пра́здника, три́жды. [Пи́санъ на ма́лѣй вече́рни.] И чте́ніе.
[Зри́:] Аще же нѣ́сть бдѣ́нія, по Ны́нѣ отпуща́еши... тропа́рь пра́здника, и отпу́стъ. На повече́ріи по Досто́йно.., конда́къ пра́здника. Полу́нощницу пое́мъ, по обы́чаю, съ каѳи́смою. По 1-й трисвято́мъ, вмѣ́сто Се́ Жени́хъ.., глаго́лемъ тропа́рь пра́здника. По 2-мъ трисвято́мъ, вмѣ́сто Помяни́, Го́споди, я́ко Бла́гъ.., глаго́лемъ конда́къ пра́здника. Та́же, Го́споди, поми́луй 12, и отпу́стъ. Моли́твы же: Помяни́ Го́споди, въ наде́жди.., не глаго́лемъ.


НА УТРЕНИ,
На Бо́гъ Госпо́дь: Тропа́рь, три́жды.

По 1-мъ стихосло́віи сѣда́ленъ, гла́съ 1. Самоподо́бенъ:

Ли́къ а́нгельскій да удиви́тся чудеси́, земнíи же гла́сы, возопіе́мъ пѣ́ніе, зря́ще неизрече́нное Бо́жіе снизхожде́ніе, Его́же бо трепе́щутъ небе́сныя си́лы, ны́нѣ ста́рчи объе́млютъ ру́цѣ Еди́наго Человѣколю́бца.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 1. Подо́бенъ: Ли́къ а́нгельскій.

Сы́й со Отце́мъ на престо́лѣ святѣ́мъ, прише́дъ на зе́млю, отъ Дѣ́вы роди́ся и Младе́нецъ бы́сть, лѣ́ты Сы́й неопи́санъ, Его́же прíимъ Симео́нъ на ру́ки, ра́дуяся глаго́лаше: ны́нѣ отпуща́еши, Ще́дре, возвесели́въ раба́ Твоего́.

Сла́ва, и ны́нѣ, то́йже.

[Велича́ніе:

Велича́емъ Тя́, Живода́вче Христе́, и чте́мъ Пречи́стую Ма́терь Твою́, Еюже по зако́ну ны́нѣ прине́слся еси́ въ хра́мъ Госпо́день.

Псало́мъ избра́нный: Отры́гну се́рдце мое́ сло́во бла́го...]

По поліеле́и сѣда́ленъ, гла́съ 4. Подо́бенъ: Удиви́ся Іо́сифъ.

Младе́нствуеши мене́ ра́ди, Ве́тхій де́ньми, чище́ніемъ пріобща́ешися, чистѣ́йшій Бо́же, да пло́ть увѣ́риши мнѣ́, ю́же отъ Дѣ́вы. И си́мъ Симео́нъ, поуча́яся, позна́ Тя, Бо́га, я́вльшагося пло́тію, и, я́ко Жи́знь, лобза́ше и, ра́дуяся, ста́рчески взыва́ше: отпусти́ мене́, Тебе́ бо ви́дѣхъ, Живота́ вся́ческихъ.

Сла́ва, и ны́нѣ, то́йже.

Степéнна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Отры́гну се́рдце мое́ сло́во бла́го, [глаго́лю а́зъ дѣла́ моя́ Царе́ви]. Вся́кое дыха́ніе... Ева́нгеліе Луки́, зача́ло 8.

По 50-мъ псалмѣ́ стихи́ра, гла́съ 6:

Да отве́рзется две́рь небе́сная дне́сь: безнача́льное бо Сло́во Отчее, нача́ло пріи́мъ подъ лѣ́ты, не отсту́пль Своего́ Божества́, отъ Дѣ́вы я́ко Младе́нецъ четыредесятодне́венъ Ма́терію во́льнѣ прино́сится въ це́рковь зако́нную, и Сего́ на ру́ки пріе́млетъ ста́рецъ, — отпусти́, — зовы́й, — раба́, Влады́ко, и́бо о́чи мои́ ви́дѣста спасе́ніе Твое́. Прише́дый въ мíръ спасти́ ро́дъ человѣ́чь, Го́споди, сла́ва Тебѣ́.

Кано́нъ, его́же краегране́сіе: Христа́ ра́достнѣ ста́рецъ объе́млетъ. Творе́ніе господи́на Космы́, гла́съ 3. Ирмо́съ по два́жды, тропари́ на 12.

Пѣ́снь 1.

Ирмо́съ: Су́шу глубороди́тельную зе́млю со́лнце наше́ствова иногда́: я́ко стѣна́ бо, огустѣ́ обапо́лы вода́ лю́демъ пѣшомореходя́щимъ и богоуго́дно пою́щимъ: пои́мъ Го́сподеви, сла́вно бо просла́вися.

Да ка́плютъ во́ду о́блацы, Со́лнце бо, на о́блацѣ ле́гцѣ носи́мо, наста́ло е́сть, на нетлѣ́нную руку́, Христо́съ въ це́ркви я́ко Младе́нецъ. Тѣ́мже, вѣ́рніи, возопіи́мъ: пои́мъ Го́сподеви, сла́вно бо просла́вися.

Крѣпи́теся, ру́цѣ Симео́ни, ста́ростію осла́бленніи, лы́ста же претружде́нна ста́рча правобыстро́ движи́тася Христу́ на срѣ́теніе, ли́къ со безпло́тными соста́вльше, пои́мъ Го́сподеви, сла́вно бо просла́вися.

Ра́зумомъ просте́ртая небеса́, весе́литеся, и ра́дуйся, земле́, изъ Пребоже́ственныхъ бо нѣ́дръ Хитре́цъ проше́дъ Христо́съ, Ма́терію Дѣ́вою Бо́гу Отцу́ прино́сится Младе́нецъ, Иже пре́жде всѣ́хъ, сла́вно бо просла́вися.

Катава́сія: ирмо́съ то́йже.

Пѣ́снь 3.

Ирмо́съ: Утвержде́ніе на Тя́ надѣ́ющихся, утверди́, Го́споди, Це́рковь, Юже стяжа́лъ еси́ честно́ю Твое́ю кро́вію.

Перворожде́нъ изъ Отца́ пре́жде вѣ́къ, перворожде́нъ Младе́нецъ изъ Дѣ́вы нетлѣ́нныя, Ада́му ру́ку простира́я, яви́ся.

Младоу́мна бы́вша пре́лестію первозда́ннаго па́ки исправля́яй Бо́гъ Сло́во, младе́нствовавъ, яви́ся.

Земли́ исча́діе, па́ки поте́кшее въ ню́, Божества́ сообра́зное естество́ Зижди́тель я́ко непрело́жнѣ, младе́нствовавъ, яви́.

Сѣда́ленъ, гла́съ 4. Подо́бенъ: Удиви́ся Іо́сифъ.

На горѣ́ Сина́йстѣй дре́влѣ ви́дѣ Моисе́й за́дняя Бо́жія, и то́нкій Боже́ственный гла́съ сподо́бися во мра́цѣ же и ви́хрѣ слы́шати. Ны́нѣ же Симео́нъ воплоще́ннаго Бо́га непрело́жнѣ на́съ ра́ди на ру́ки прія́тъ и ра́достно тща́шеся ити́ отъ су́щихъ здѣ́ къ животу́ вѣ́чному. Тѣ́мже вопія́ше: ны́нѣ отпуща́еши раба́ Твоего́, Влады́ко.

Сла́ва, и ны́нѣ, то́йже.

Пѣ́снь 4.

Ирмо́съ: Покры́ла е́сть небеса́ добродѣ́тель Твоя́, Христе́, изъ Киво́та бо проше́дъ святы́ни, Твоея́ Нетлѣ́нныя Ма́тере, въ хра́мѣ Сла́вы Твоея́ яви́лся еси́, я́ко Младе́нецъ руконоси́мь, и испо́лнишася вся́ Твоего́ хвале́нія.

Ра́дуйся, Симео́не, неизрече́нныхъ таи́нниче, — Богоро́дица вопія́ше, — о Не́мже отъ Свята́го дре́вле извѣсти́ся тебѣ́ Ду́ха, младе́нствовавшаго Сло́ва Христа́ на ру́ки пріими́, зовы́й Ему́: испо́лнишася вся́ Твоего́ хвале́нія.

На Него́же упова́лъ еси́, Симео́не, во́зрастъ дѣ́тищный, ра́дуяся, подыми́ Христа́, Изра́иля боже́ственнаго утѣше́ніе, зако́на Творца́ и Влады́ку, исполня́ющаго зако́на чи́нъ, зовы́й Ему́: испо́лнишася вся́ Твоего́ хвале́нія.

Ви́дя Симео́нъ Сло́во безнача́льное, съ пло́тію, я́ко на престо́лѣ херуви́мстѣмъ, Дѣ́вою носи́мо, вино́внаго е́же бы́ти вся́ческихъ, я́ко Младе́нцу дивя́ся, вопія́ше Ему́: испо́лнишася вся́ Твоего́ хвале́нія.

Пѣ́снь 5.

Ирмо́съ: Яко ви́дѣ Иса́ія обра́зно на престо́лѣ превознесе́на Бо́га, отъ а́нгелъ сла́вы дориноси́ма, — о, окая́нный, — вопія́ше, — а́зъ! Прови́дѣхъ бо воплоща́ема Бо́га, Свѣ́та невече́рня, и ми́ромъ влады́чествующа.

Разумѣ́въ боже́ственный ста́рецъ проявле́нную дре́вле проро́ку сла́ву, рука́ми Сло́во зря́ Ма́терними держи́мо, — о, ра́дуйся, — вопія́ше, — Чи́стая! Яко престо́лъ, бо держи́ши Бо́га, Свѣ́та невече́рняго и ми́ромъ влады́чествующа.

Покло́нься ста́рецъ, и стопа́мъ боже́ственнѣ прикосну́вся неискусобра́чныя и Богома́тере, — Огнь, — рече́, — но́сиши, Чи́стая: Младе́нца бою́ся объя́ти Бо́га, Свѣ́та невече́рняго и ми́ромъ влады́чествующа.

Очища́ется Иса́ія, отъ серафи́ма у́гль пріе́мъ, — ста́рецъ вопія́ше Богома́тери, — Ты́, я́коже клеща́ми, рука́ми просвѣща́еши мя́, пода́вши, Его́же но́сиши, Свѣ́та невече́рняго и ми́ромъ влады́чествующа.

Пѣ́снь 6.

Ирмо́съ: Возопи́ къ Тебѣ́, ви́дѣвъ ста́рецъ очи́ма спасе́ніе, е́же лю́демъ пріи́де отъ Бо́га: Христе́, Ты́ Бо́гъ мо́й.

Сіо́ну Ты́ ка́мень возложи́лся еси́, непокори́вымъ претыка́ніе и собла́зна ка́мень, неруши́мое вѣ́рныхъ спасе́ніе.

Извѣ́стнѣ нося́ начерта́ніе Иже пре́жде вѣ́къ Тя́ израсти́вшаго, земны́хъ за милосе́рдіе ны́нѣ не́мощію обложи́ся.

Сы́ну Вы́шняго, Сы́ну Дѣ́вы, Бо́гу, Отроча́ти бы́вшему, покло́ньшася Тебѣ́ ны́нѣ отпусти́ съ ми́ромъ.

Конда́къ, гла́съ 1:

Утро́бу Дѣви́чу освяти́вый Рождество́мъ Твои́мъ и ру́цѣ Симео́нѣ благослови́вый, я́коже подоба́ше, предвари́въ, и ны́нѣ спа́слъ еси́ на́съ, Христе́ Бо́же, но умири́ во бранѣ́хъ жи́тельство и укрѣпи́ Импера́тора, Его́же возлюби́лъ еси́, Еди́не Человѣколю́бче.

Икосъ:

Къ Богоро́дицѣ притеце́мъ, хотя́щіи Сы́на Ея́ ви́дѣти, къ Симео́ну носи́ма, Его́же съ небесе́ безпло́тніи ви́дяще, дивля́хуся, глаго́люще: чу́дная зри́мъ ны́нѣ и пресла́вная, непостижи́мая, несказа́нная! Иже бо Ада́ма созда́вый но́сится я́ко Младе́нецъ, Невмѣсти́мый вмѣща́ется на рука́хъ ста́рчихъ, Иже въ нѣ́дрѣхъ неопи́санныхъ Сы́й Отца́ Своего́ во́лею опису́ется пло́тію, а не Божество́мъ, Еди́нъ Человѣколю́бецъ.

Пѣ́снь 7.

Ирмо́съ: Тебе́ во огни́ ороси́вшаго о́троки богосло́вившія, и въ Дѣ́ву нетлѣ́нну все́льшагося Бо́га Сло́ва пои́мъ, благоче́стно пою́ще: благослове́нъ Бо́гъ оте́цъ на́шихъ.

Ада́му извѣсти́ти хотя́й иду́, во а́дѣ живу́щу, и Евѣ принести́ благовѣ́стіе, — Симео́нъ вопія́ше, со проро́ки лику́я: благослове́нъ Бо́гъ оте́цъ на́шихъ.

Ро́да зе́мна избавля́яй Бо́гъ да́же до а́да пріи́детъ, плѣ́ннымъ же пода́стъ всѣ́мъ оставле́ніе и прозрѣ́ніе слѣпы́мъ, я́ко и нѣмы́мъ вопи́ти: благослове́нъ Бо́гъ оте́цъ на́шихъ.

И Твое́ се́рдце, Нетлѣ́нная, ору́жіе про́йдетъ, — Симео́нъ Богоро́дицѣ провозгласи́, — на Крестѣ́ зря́щи Твоего́ Сы́на, Ему́же вопіе́мъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Лю́діе Изра́илевы, Твою́ сла́ву Емману́ила зря́ще Отроча́ изъ Дѣ́вы, предъ лице́мъ Боже́ственнаго ковче́га ны́нѣ лику́йте: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Се́, Симео́нъ вопія́ше, — прерѣка́емое зна́меніе Се́й бу́детъ, Бо́гъ Сы́й и Отроча́, — Сему́, вѣ́рніи, возопіи́мъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Живо́тъ Сы́й, Се́й бу́детъ паде́ніе непокори́вымъ, младе́нствовавъ Бо́гъ Сло́во, я́ко воста́ніе всѣ́мъ вѣ́рою пою́щимъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Припѣ́вы на 9-й пѣ́сни:

Богоро́дице Дѣ́во, упова́ніе христіа́номъ, покры́й, соблюди́ и спаси́ на Тя́ уповаю́щихъ.

Богоро́дице Дѣ́во, мíру блага́я помо́щнице, покры́й и соблюди́ отъ вся́кія ну́жды и печа́ли.

Богоно́се Симео́не, пріиди́, подыми́ Христа́, Его́же роди́ Дѣ́ва чи́стая Марíя.

Объе́млетъ рука́ми ста́рецъ Симео́нъ Содѣ́теля зако́на и Влады́ку вся́ческихъ.

Не ста́рецъ Мене́ держи́тъ, но Азъ держу́ его́: то́й бо отъ Мене́ отпуще́нія про́ситъ.

Клеще́ та́инственная, ка́ко у́гль но́сиши? Ка́ко пита́еши Пита́ющаго вся́?

О, дщи́ Фану́илева! Пріи́ди, ста́ни съ на́ми и благодари́ Христа́ Спа́са, Сы́на Бо́жія.

Анна цѣлому́дренная провѣща́етъ стра́шная, исповѣ́дающи Христа́, Творца́ не́бу и земли́.

Непостижи́мо е́сть содѣ́янное о Тебѣ́ а́нгеломъ и человѣ́комъ, Ма́ти Дѣ́во чи́стая.

Чи́стая Голуби́ца, нескве́рная Агница, Агнца и Па́стыря прино́ситъ въ це́рковь.

О, Христе́, всѣ́хъ Царю́! Побѣ́ды на враги́ Вѣ́рному Твоему́ рабу́, Импера́тору на́шему да́руй.

О, Христе́, всѣ́хъ Царю́! Пода́ждь ми́ сле́зы теплы́, да пла́чу мою́ ду́шу, ю́же злѣ́ погуби́хъ.

Вмѣ́сто, Сла́вы: Трисія́тельное и Тріѵпоста́сное Божество́ благоче́стно да похва́лимъ.

Вмѣ́сто, И ны́нѣ: О, Дѣви́це Марíе! Просвѣти́ мою́ ду́шу, помраче́нную лю́тѣ жите́йскими сластьми́.

Вѣ́домо да бу́детъ, я́ко два́ су́щія припѣ́вы въ нача́лѣ припѣва́емъ ко ирмосу́. Та́же къ коему́ждо тропарю́ припѣва́емъ по 4 припѣ́вы. И по соверше́ніи 14 припѣ́вовъ съ тропари́, къ катава́сіи пое́мъ о́ба ли́ка вку́пѣ припѣ́въ 1-й: Богоро́дице Дѣ́во, упова́ніе христіа́номъ...

Пѣ́снь 9.

Ирмо́съ: Въ зако́нѣ сѣ́ни и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ.

Иже дре́внимъ новорожде́нныхъ го́рличищъ супру́гъ дво́ица же бя́ше птенце́въ, въ ни́хже мѣ́сто боже́ственный ста́рецъ и цѣлому́дренная Анна проро́чица отъ Дѣ́вы рожде́нному и Сы́ну Единоро́дному Отчу, въ це́рковь приноси́му, слу́жатъ, велича́юще.

Возда́лъ еси́ мнѣ́, — вопія́ше Симео́нъ, — спасе́нія Твоего́, Христе́, ра́дованіе, воспріими́ Твоего́ служи́теля, сѣ́нію претружде́ннаго, но́выя благода́ти священнопроповѣ́дника та́йнаго, во хвале́ніи велича́юща.

Священнолѣ́пно исповѣ́дашеся Анна, прорица́ющи, цѣлому́дренная, и преподо́бная, и ста́рица, Влады́цѣ въ це́ркви я́вственно, Богоро́дицу же, проповѣ́дающи всѣ́мъ су́щимъ, велича́ше.

Свѣти́ленъ. Самоподо́бенъ:

Ду́хомъ во святи́лищи предста́въ, ста́рецъ на ру́ки воспрія́тъ зако́на Влады́ку, вопія́: ны́нѣ соу́зъ мя́ плотски́хъ разрѣши́, я́коже ре́клъ еси́, съ ми́ромъ: ви́дѣхъ бо очи́ма открове́ніе язы́ковъ и Изра́илю спасе́ніе. [Три́жды.]

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Зако́нъ, и́же въ писа́ніи,* исполня́я, Человѣколю́бецъ* въ це́рковь ны́нѣ прино́сится,* и Сего́ пріе́млетъ ста́рыми рука́ми Симео́нъ ста́рецъ, —* ны́нѣ отпуща́еши мя, — вопія́, —* ко о́ному блаже́нству:* ви́дѣхъ бо Тя́ дне́сь, пло́тію ме́ртвенною обложе́ннаго,* живото́мъ госпо́дствующа* и сме́ртію влады́чествующа. [Два́жды.]

Свѣ́тъ во открове́ніе язы́ковъ* яви́лся еси́, Го́споди,* на о́блацѣ сѣдя́ ле́гцѣ,* Со́лнце пра́вды,* зако́на сѣно́вное исполня́я* и нача́ло изъявля́я но́выя благода́ти.* Тѣ́мъ, Тя́ ви́дѣвъ, Симео́нъ взыва́ше:* изъ истлѣ́нія мя́ разрѣши́,* я́ко ви́дѣхъ Тя́ дне́сь.

Нѣ́дръ Роди́теля не отлу́чся Божество́мъ,* вопло́щся, я́коже изво́лилъ еси́,* объя́тіями держи́мь Приснодѣ́вы,* на ру́ки пода́лся еси́ богопріи́мца Симео́на,* руко́ю Твое́ю держа́й вся́ческая;* тѣ́мже — ны́нѣ отпуща́еши мя́, —* ра́достно взыва́ше, —* въ ми́рѣ раба́ Твоего́,* я́ко ви́дѣхъ Тя́, Влады́ко.

Сла́ва, и ны́нѣ, гла́съ 6. Ге́рманово:

На рука́хъ ста́рческихъ во дне́шній де́нь, я́ко на колесни́цѣ херуви́мстѣй, восклони́тися благоизво́ливый, Христе́ Бо́же, и на́съ, пою́щихъ Тя́, страсте́й мучи́тельства призыва́емый изба́ви и спаси́, я́ко Человѣколю́бецъ.

Славосло́віе вели́кое. По трисвято́мъ: Тропа́рь пра́здника. Ектеніи́ и отпу́стъ.

И ча́съ 1-й. На 1-мъ часѣ́ тропа́рь пра́здника. По Отче на́шъ.., конда́къ пра́здника, и про́чее, и соверше́нный отпу́стъ.

О часѣ́ же второ́мъ дне́ исхо́димъ съ литíею внѣ́ оби́тели, пою́ще стихи́ры пра́здника и кано́нъ, по обы́чаю. И, возвра́щшеся, пое́мъ часы́ и литургíю.


НА ЛИТУРГІИ,

Блажéнна отъ кано́на пра́здника пѣ́снь 3-я и 6-я. Вхо́дъ: Сказа́ Госпо́дь спасе́ніе Свое́, предъ язы́ки откры́ пра́вду Свою́. Та́же тропа́рь пра́здника. Сла́ва, и ны́нѣ, конда́къ. Проки́менъ, пѣ́снь Богоро́дицы, гла́съ 3: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо, отъ ны́нѣ ублажа́тъ Мя́ вси́ ро́ди. Апо́столъ ко Eвре́eмъ, зача́ло 316. Аллилу́ія, гла́съ 8: Ны́нѣ отпуща́еши раба́ Твоего́, Влады́ко, по глаго́лу Твоему́, съ ми́ромъ. Сти́хъ: Свѣ́тъ во открове́ніе язы́ковъ и сла́ву люде́й Твои́хъ Изра́иля. Ева́нгеліе Луки́, зача́ло 7. Прича́стенъ: Ча́шу спасе́нія пріиму́ и и́мя Госпо́дне призову́.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 10 об. – 19.

/ Къ оглавленію раздѣла /


Наверхъ / Къ титульной страницѣ

0