Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 31-й де́нь.
[Отда́ніе пра́здника Рождества́ Христо́ва.] И преподо́бныя ма́тере на́шея Мела́ніи Ри́мляныни.

[Зри́:] Предписа́ся же слу́жба ея́ въ 30-й де́нь, зане́же пра́здникъ отдае́тся въ 31-й де́нь, и пое́тся вся́ слу́жба пра́здника еди́наго.

Ве́черъ, обы́чная каѳи́cма. На Го́споди, воззва́хъ: стихи́ры на 6, пое́мыя на са́мый пра́здникъ. Сла́ва, и ны́нѣ, самогла́сна: Августу единонача́льствующу... Проки́менъ дне́. Вхо́да нѣ́сть. Паремíй не чте́мъ. Та́же: Сподо́би, Го́споди... и ектенія́: Испо́лнимъ вече́рнюю моли́тву... На стихо́внѣ стихи́ры пра́здника со стихи́ и́хъ. Сла́ва, и ны́нѣ, пра́здника. По Ны́нѣ отпуща́еши... и по трисвято́мъ тропа́рь пра́здника. Та́же ектенія́: Поми́луй на́съ, Бо́же.., и отпу́стъ. Свята́го же, и́же на ряду́, помина́емъ на отпу́стѣ.

Полу́нощницу пое́мъ по обы́чаю съ каѳи́смою, и тропари́ глаго́лемъ рядовы́я, и моли́тву глаго́лемъ: Помяни́, Го́споди, въ наде́жди воскресе́нія... и отпу́стъ.

На у́трени, на Бо́гъ Госпо́дь: Тропа́рь пра́здника три́жды. По каѳи́смахъ сѣда́льны пра́здника и чте́ніе пра́здника. Кано́нъ пе́рвый со ирмосо́мъ на 8. Другíй кано́нъ со ирмосо́мъ на 6. Ирмосы́ обою́ кано́новъ по два́жды. Катава́сія: ирмо́съ пе́рваго кано́на, на схо́дѣ. По 3-й пѣ́сни: ипакои́, гла́съ 8: Нача́токъ язы́ковъ... По 6-й пѣ́сни: конда́къ пра́здника и и́косъ. На 9-й пѣ́сни Честнѣ́йшую... не пое́мъ, но пое́мъ припѣ́вы пра́здника, я́коже и на са́мый пра́здникъ. Свѣти́ленъ пра́здника, еди́ножды. Сла́ва, и ны́нѣ, то́йже. На хвали́техъ стихи́ры пра́здника на 4. Сла́ва, гла́съ 6: Егда́ вре́мя... И ны́нѣ, гла́съ 2: Дне́сь... И славосло́віе вели́кое. По трисвято́мъ тропа́рь пра́здника. Ектеніи́, и отпу́стъ, и обы́чное исхожде́ніе въ притво́ръ. И ча́съ 1-й. Тропа́рь и конда́къ пра́здника.

На литургíи: Блаже́нна обои́хъ кано́новъ пѣ́снь 9-я на 8. Антифо́новъ же пра́здника не глаго́лемъ. По вхо́дѣ: Тропа́рь пра́здника. Сла́ва, и ны́нѣ, конда́къ пра́здника. Та́же, трисвято́е. Проки́менъ, аллилу́ія и прича́стенъ пра́здника. Апо́столъ и Ева́нгеліе дне́.


[ВЕЧЕРЪ,
Обы́чная каѳи́сма. На Го́споди, воззва́хъ: стихи́ры пра́здника на 6. Гла́съ 2, самогла́сны.

Ге́рманово: Пріиди́те, возра́дуемся Го́сподеви,* настоя́щую та́йну сказу́юще:* средостѣ́ніе граде́жа разруши́ся,* пла́менное ору́жіе плещи́ дае́тъ,* и херуви́мъ отступа́етъ отъ дре́ва жи́зни,* и а́зъ ра́йскія пи́щи причаща́юся,* отъ него́же произгна́нъ бы́хъ преслуша́нія ра́ди;* неизмѣ́нный бо Образъ Оте́чь,* Образъ присносу́щія Его́,* зра́къ раба́ пріе́млетъ,* отъ Неискусобра́чныя Ма́тере проше́дъ,* не преложе́ніе претерпѣ́въ,* е́же бо бѣ́ пребы́сть, Бо́гъ Сы́й и́стиненъ,* и е́же не бѣ́ прія́тъ, Человѣ́къ бы́въ человѣколю́бія ра́ди.* Тому́ возопіи́мъ:* рожде́йся отъ Дѣ́вы Бо́же, поми́луй на́съ. [Два́жды.]

Анато́ліево: Го́споду Іису́су ро́ждшуся отъ Святы́я Дѣ́вы,* просвѣти́шася вся́ческая:* па́стыремъ бо свиря́ющимъ и волхво́мъ покланя́ющимся,* а́нгеломъ воспѣва́ющимъ, Иродъ мятя́шеся,* я́ко Богъ во пло́ти яви́ся,* Спа́съ ду́шъ на́шихъ. [Два́жды.]

Ца́рство Твое́, Христе́ Бо́же,* Ца́рство всѣ́хъ вѣко́въ,* и Влады́чество Твое́ во вся́комъ ро́дѣ и ро́дѣ,* воплоти́выйся отъ Ду́ха Свята́го* и отъ Приснодѣ́вы Марíи вочеловѣ́чивыйся,* свѣ́тъ на́мъ возсія́, Христе́ Бо́же,* Твое́ прише́ствіе:* Свѣ́тъ отъ Свѣ́та, Отчее сія́ніе,* всю́ тва́рь просвѣти́лъ еси́,* вся́кое дыха́ніе хва́литъ Тя́.* Образъ сла́вы Отчія,* Сы́й, и пре́жде Сы́й,* и возсія́вый отъ Дѣ́вы, Бо́же, поми́луй на́съ.

Что́ Тебѣ́ принесе́мъ, Христе́,* я́ко яви́лся еси́ на земли́* я́ко Человѣ́къ на́съ ра́ди?* Ка́яждо бо отъ Тебе́ бы́вшихъ тва́рей благодаре́ніе Тебѣ́ прино́ситъ:* а́нгели — пѣ́ніе; небеса́ — звѣзду́;* волсви́ — да́ры; па́стыріе — чу́до;* земля́ — верте́пъ; пусты́ня — я́сли;* мы́ же — Ма́терь Дѣ́ву.* Иже пре́жде вѣ́къ, Бо́же, поми́луй на́съ.

Сла́ва, и ны́нѣ, гла́съ то́йже. Кассíино:

Августу единонача́льствующу на земли́,* многонача́ліе человѣ́ковъ преста́;* и Тебѣ́ вочеловѣ́чшуся отъ Чи́стыя,* многобо́жіе и́доловъ упраздни́ся,* подъ еди́нѣмъ ца́рствомъ мірски́мъ гра́ди бы́ша,* и во еди́но Влады́чество Божества́ язы́цы вѣ́роваша.* Написа́шася лю́діе повелѣ́ніемъ ке́саревымъ,* написа́хомся, вѣ́рніи, и́менемъ Божества́,* Тебе́, вочеловѣ́чшагося Бо́га на́шего.* Ве́лія Твоя́ ми́лость, Го́споди, сла́ва Тебѣ́.

Вхо́да нѣ́сть. Проки́менъ дне́.

На стихо́внѣ стихи́ры самогла́сны, гла́съ 2. Ге́рманово:

Ве́ліе и пресла́вное чу́до соверши́ся дне́сь: Дѣ́ва ражда́етъ, и утро́ба не истлѣва́етъ, Сло́во воплоща́ется и Отца́ не отлуча́ется, а́нгели съ па́стырьми сла́вятъ, и мы́ съ ни́ми вопіе́мъ: сла́ва въ вы́шнихъ Бо́гу, и на земли́ ми́ръ.

Гла́съ 3.

Сти́хъ: Изъ чре́ва пре́жде денни́цы роди́хъ Тя́: кля́тся Госпо́дь и не раска́ется.

Дне́сь ражда́етъ Дѣ́ва Творца́ всѣ́хъ, Еде́мъ прино́ситъ верте́пъ, и звѣзда́ показу́етъ Христа́, Со́лнца су́щимъ во тмѣ́; съ да́ры волсви́ поклони́шася, вѣ́рою просвѣща́еми, и па́стыріе ви́дѣша чу́до, а́нгеломъ воспѣва́ющимъ и глаго́лющимъ: сла́ва въ вы́шнихъ Бо́гу.

Гла́съ то́йже.

Сти́хъ: Рече́ Госпо́дь Го́сподеви моему́: сѣди́ одесну́ю Мене́.

Анато́ліево: Го́споду Іису́су ро́ждшуся въ Виѳлее́мѣ Іуде́йстѣмъ, отъ восто́къ прише́дше, волсви́ поклони́шася Бо́гу вочеловѣ́чшуся и, сокро́вища своя́ усе́рдно отве́рзше, да́ры честны́я приноша́ху: искуше́но зла́то, я́ко Царю́ вѣко́въ; и лива́нъ, я́ко Бо́гу всѣ́хъ; я́ко тридне́вному же мертвецу́, сми́рну Безсме́ртному. Вси́ язы́цы, пріиди́те, поклони́мся ро́ждшемуся спасти́ ду́ши на́ша.

Сла́ва, гла́съ 4. Іоа́нна мона́ха:

Весели́ся, Іерусали́ме, торжеству́йте, вси́, лю́бящіи Сіо́на: дне́сь вре́менный разрѣши́ся соу́зъ осужде́нія Ада́мова. Ра́й на́мъ отве́рзеся. Змíй упраздни́ся, ю́же бо прельсти́ пе́рвѣе, ны́нѣ узрѣ́ Содѣ́телеву бы́вшу Ма́терь. О, глубина́ бога́тства, и прему́дрости, и ра́зума Бо́жія! Яже исхода́таивши сме́рть все́й пло́ти, грѣхо́вный сосу́дъ спасе́нія нача́ло бы́сть мíру всему́ Богоро́дицы ра́ди. Младе́нецъ бо ражда́ется изъ Нея́, Всесоверше́нный Бо́гъ, и Рождество́мъ дѣ́вство печа́тствуетъ, плени́цы грѣхо́вныя разрѣша́яй пелена́ми, и младе́нства ра́ди Евины врачу́етъ я́же въ печа́лехъ болѣ́зни; да ликовству́етъ у́бо вся́ тва́рь и да игра́етъ, обнови́ти бо ю́ пріи́де Христо́съ и спасти́ ду́ши на́ша.

И ны́нѣ, гла́съ то́йже:

Въ верте́пъ всели́лся еси́, Христе́ Бо́же, я́сли Тя́ воспрія́ша, па́стыріе же и волсви́ поклони́шася. Тогда́ у́бо проро́ческая испо́лнися про́повѣдь, и а́нгельскія си́лы дивля́хуся, вопію́ще и глаго́люще: сла́ва схожде́нію Твоему́, Еди́не Человѣколю́бче.

Та́же, Ны́нѣ отпуща́еши... Трисвято́е, и по Отче на́шъ...

Тропа́рь, гла́съ 4:

Рождество́ Твое́, Христе́ Бо́же нашъ, возсія́ мíрови свѣ́тъ ра́зума, въ не́мъ бо звѣзда́мъ служа́щіи звѣздо́ю уча́хуся Тебѣ́ кла́нятися, Со́лнцу Пра́вды, и Тебе́ вѣ́дѣти съ высоты́ Восто́ка. Го́споди, сла́ва Тебѣ́. [Еди́ножды.]

Та́же ектенія́: Поми́луй на́съ, Бо́же.., и отпу́стъ.



НА УТРЕНИ,
На Бо́гъ Госпо́дь: Тропа́рь пра́здника, три́жды.

По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й, Спа́се.

Во я́слехъ на́съ ра́ди безслове́сныхъ положи́лся еси́, долготерпѣли́ве Спа́се, младе́нствовавъ во́лею; па́стыріе же Тя́ воспѣ́ша со а́нгелы, зову́ще: сла́ва и хвала́ на земли́ рожде́нному и обожи́вшему земноро́дныхъ существо́ Христу́ Бо́гу на́шему.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.

Превѣ́чнаго и Непостижи́маго, Соприсносу́щнаго Неви́димому Отцу́, во утро́бѣ пло́тски носи́ла еси́, Богоро́дице, еди́но и неслія́нное Тро́ицы Божество́. Просія́ благода́ть Твоя́ въ мíрѣ, Всепѣ́тая. Тѣ́мже непреста́нно вопіе́мъ: ра́дуйся, Чи́стая Дѣ́во Ма́ти.

Сла́ва, и ны́нѣ, то́йже.

Кано́на два́. Кано́нъ пе́рвый со ирмосо́мъ на 8. Другíй кано́нъ со ирмосо́мъ на 6. Ирмосы́ обою́ кано́новъ по два́жды.

Кано́нъ пе́рвый, творе́ніе ки́ръ Космы́, его́же краегране́сіе: Христо́съ вочеловѣ́чився, е́же бѣ́, Бо́гъ пребыва́етъ. Гла́съ 1.
Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Истлѣ́вша преступле́ніемъ, по Бо́жію о́бразу бы́вшаго, всего́ тлѣ́нія су́ща, лу́чшія отпа́дша боже́ственныя жи́зни, па́ки обновля́етъ му́дрый Содѣ́тель, я́ко просла́вися.

Ви́дѣвъ Зижди́тель ги́блема человѣ́ка, рука́ми его́же созда́, приклони́въ небеса́, схо́дитъ; Сего́ же отъ Дѣ́вы боже́ственныя Чи́стыя всего́ осуществу́етъ, вои́стинну вопло́щся, я́ко просла́вися.

Му́дрость, Сло́во и Си́ла, Сы́нъ Сы́й Отчій и Сія́ніе, Христо́съ Бо́гъ, си́лъ утаи́вся, ели́ко премíрныхъ и ели́ко на земли́, и, вочеловѣ́чся, обнови́лъ есть насъ, я́ко просла́вися.

Другíй кано́нъ. Творе́ніе ки́ръ Іоа́нна. Гла́съ то́йже.
Пѣ́снь 1.

Ирмо́съ: Спасе́ лю́ди чудодѣ́йствуяй Влады́ка, мо́крую мо́ря волну́ оземлени́въ дре́вле; во́лею же ро́ждся отъ Дѣ́вы, стезю́ прохо́дну небесе́ полага́етъ на́мъ. Его́же, по Существу́ ра́вна же Отцу́ и человѣ́комъ, сла́вимъ.

Изнесе́ чре́во свяще́нное Сло́во, я́вѣ неопа́льно живопи́санное купино́ю, смѣше́на зра́комъ человѣ́чимъ Бо́га, Евы окая́нную утро́бу кля́твы дре́внія разрѣша́ющее го́рькія, Его́же, земни́и славимъ.

Показа́ звѣзда́ пре́жде со́лнца Сло́во, прише́дшее уста́вити грѣхи́, волхво́мъ я́вѣ во убо́зѣмъ верте́пѣ, ми́лостиваго Тебе́, пелена́ми пови́та, Его́же, ра́дующеся, ви́дяху Самого́ — и Человѣ́ка, и Го́спода.

Катава́сія: ирмо́съ пе́рваго кано́на, на схо́дѣ.

Пѣ́снь 3.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Иже дохнове́нія прича́щся лу́чшаго Ада́мъ пе́рстный и къ тлѣ́нію попо́лзся же́нскою ле́стію, Христа́ отъ Жены́ ви́дя, вопіе́тъ: Иже мене́ ра́ди по мнѣ́ бы́въ, Свя́тъ еси́, Го́споди.

Сообра́зенъ бре́нному умале́нію растворе́ніемъ, Христе́, бы́въ и прича́стіемъ пло́ти го́ршія, пода́въ Боже́ственнаго естества́, зе́мленъ бы́въ, и пребы́въ Богъ, и возвы́сивый ро́гъ на́шъ, Свя́тъ еси́, Го́споди.

Виѳлее́ме, весели́ся, князе́й Іу́довыхъ Сы́й Ца́рь: Изра́иля бо пасы́й на ра́мѣхъ херуви́мскихъ, изъ тебе́ про́йде Христо́съ я́вѣ и вознесы́й ро́гъ на́шъ надъ всѣ́ми воцари́ся.

Инъ:

Ирмо́съ: При́зри на пѣ́нія рабо́въ, Благодѣ́телю, врага́ смиря́я вознесе́нную горды́ню, нося́й же, Всеви́дче, грѣха́ превы́шше, непоколе́блемо утвержде́нныя, Бла́же, пѣвцы́ основа́ніемъ вѣ́ры.

Невѣ́сты Пречи́стыя пребога́тое Рождество́ ви́дѣти па́че ума́ сподо́бився, ликъ свиря́ющихъ преклоня́шеся стра́ннымъ о́бразомъ, чи́нъ же пою́щихъ безпло́тныхъ, Царя́ Христа́, безсѣ́менно вопло́щшагося.

Высото́ю ца́рствуяй небе́съ милосе́рдіемъ соверша́етъ о на́съ изъ безневѣ́стныя Отрокови́цы: невеще́ственъ Сы́й пре́жде, но по́слѣжде Сло́во, одебелѣ́вшо пло́тію, да па́дшаго къ Себѣ́ привлече́тъ первозда́ннаго.

Ипакои́, гла́съ 8:

Нача́токъ язы́ковъ не́бо Тебѣ́ принесе́, лежа́щему Младе́нцу во я́слѣхъ, звѣздо́ю волхвы́ призва́вый, я́же и ужаса́ше не ски́птры и престо́ли, но послѣ́дняя нищета́: что́ бо ху́ждше верте́па? что́ же смире́ншее пеле́нъ? Въ ни́хже просія́ Божества́ Твоего́ бога́тство, Го́споди, сла́ва Тебѣ́.

Пѣ́снь 4.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Его́же дре́вле прорече́ Іа́ковъ, язы́ковъ ожида́ніе, Христе́, отъ колѣ́на Іу́дова возсія́лъ еси́ и си́лу Дама́скову, Самарíйскую же коры́сть прише́лъ еси́ испроврещи́, лесть премѣня́я въ вѣ́ру боголѣ́пну: сла́ва си́лѣ Твое́й, Го́споди.

Волхва́ дре́вле Валаа́ма словесы́ ученики́, му́дрыя звѣздоблюсти́тели, ра́дости испо́лнилъ еси́, звѣзда́ отъ Іа́кова, возсія́въ, Влады́ко, язы́ковъ нача́токъ вводи́мый прія́лъ же еси́ я́вѣ: сла́ва си́лѣ Твое́й, Го́споди.

Яко на руно́, во чре́во Дѣ́вы сше́лъ еси́ до́ждь, Христе́, и я́ко ка́пли, на зе́млю ка́плющія. Еѳіо́пія, и Ѳарси́съ, и Арави́тстіи о́строви же, Сава́, Ми́довъ всю́ зе́млю держа́щіи, припадо́ша Тебѣ́, Спа́се: сла́ва си́лѣ Твое́й, Го́споди.

Инъ:

Ирмо́съ: Ро́да человѣ́ча обновле́ніе дре́вле, поя́, проро́къ Авваку́мъ предвозвѣща́етъ, ви́дѣти неизрече́нно сподо́бився о́бразъ: млады́й Младе́нецъ бо изъ горы́ — Дѣ́вы изы́де люде́й во обновле́ніе, Сло́во.

Ра́венъ произы́де человѣ́комъ Вы́шній, во́лею пло́ть пріи́мъ отъ Дѣ́вы, я́дъ очи́стити змíевы главы́, приводя́ вся́ къ Свѣ́ту живоно́сному, Бо́гъ Сы́й, отъ вра́тъ безсо́лнечныхъ.

Язы́цы, и́же дре́вле тле́ю погруже́ни, па́губы зѣло́ вра́жія убѣжа́вше, возно́сятъ ру́ки съ похва́льными пѣ́сньми, еди́наго чту́ще Христа́, я́ко Благодѣ́теля, къ намъ ми́лостивно прише́дшаго.

Изъ ко́рене изра́стши Іессе́ева, Дѣ́во, уста́вы прешла́ еси́ человѣ́ческаго существа́, Отчее ро́ждши Превѣ́чное Сло́во, я́ко благоволи́ Са́мъ запеча́танную утро́бу проити́ истоща́ніемъ стра́ннымъ.

Пѣ́снь 5.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Въ рабѣ́хъ ке́саревымъ повелѣ́ніемъ написа́тися поко́рься, и на́съ, рабы́ су́щія, врага́ и грѣха́ свободи́лъ еси́, Христе́, ве́сь же по на́мъ обнища́въ, и пе́рстнаго отъ самаго́ едине́нія и обще́нія богосодѣ́лалъ еси́.

Се Дѣ́ва, я́коже дре́вле рече́, во чре́вѣ пріе́мши, родила́ е́сть Бо́га вочеловѣ́чшася и пребыва́етъ Дѣ́ва. Ея́же ра́ди примири́вшеся Бо́гу, грѣ́шніи, Богоро́дицу су́щую вои́стинну, вѣ́рніи, воспои́мъ.

Инъ:

Ирмо́съ: Изъ но́щи дѣ́лъ омраче́нныя пре́лести очище́ніе на́мъ, Христе́, бо́дренно ны́нѣ соверша́ющимъ пѣ́снь, я́ко Благодѣ́телю, пріиди́, подава́яй удо́бну стезю́, по не́йже востека́юще, обря́щемъ сла́ву.

Лю́тую вражду́, ю́же къ намъ Влады́ка отсѣка́я па́ки плотски́мъ прише́ствіемъ, да держа́щаго разруши́тъ душетлѣ́ющаго, мíръ сочета́я съ невеще́ственными существы́, положи́въ присту́пна, Ро́ждшаго, тва́ри.

Лю́діе ви́дѣша, дре́вле омраче́нніи, по дне́хъ свѣ́тъ вы́шнія свѣ́тлости, язы́ки же Бо́гу наслѣ́діе Сы́нъ прино́ситъ, подая́ та́мо неизрече́нную благода́ть, идѣ́же мно́жайшій процвѣте́ грѣ́хъ.

Пѣ́снь 6.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Пріи́де, вопло́щся, Христо́съ Бо́гъ на́шъ изъ чре́ва, Его́же Оте́цъ пре́жде денни́цы ражда́етъ; правле́нія же держа́ пречи́стыхъ си́лъ, въ я́слѣхъ ско́тіихъ возлежи́тъ и пелена́ми повива́ется, разрѣша́етъ же многоплете́нныя плени́цы прегрѣше́ній.

Юно изъ Ада́ма отроча́ смѣше́нія, роди́ся Сы́нъ и вѣ́рнымъ даде́ся, бу́дущаго вѣ́ка Се́й е́сть Оте́цъ и Нача́льникъ и нарица́ется Вели́каго Совѣ́та Ангелъ. Се́й крѣ́покъ Бо́гъ е́сть и держа́й о́бластію всю́ тва́рь.

Инъ:

Ирмо́съ: Обита́я Іо́на въ преиспо́днихъ морски́хъ, пріити́ моля́шеся и бу́рю утоли́ти; унзе́нъ же а́зъ муча́щаго стрѣло́ю, Христу́ воспѣва́ю, зо́лъ губи́телю, ско́ро пріити́ Тебѣ́ къ мое́й лѣ́ности.

Иже бѣ́ испе́рва къ Бо́гу, Бо́гъ Сло́во ны́нѣ утвержда́етъ немощно́е дре́вле ви́дѣвъ сохрани́ти, е́же по на́мъ существо́, и́мже Себе́ вторы́мъ обще́ніемъ а́біе проявля́я страсте́й свобо́дное.

Гряде́тъ на́съ ра́ди изъ Авраа́млихъ чре́слъ темнопа́дшія во мра́цѣ прегрѣше́ній сы́ны воздви́гнути, до́лу пони́кшихъ, и́же во свѣ́тѣ обита́яй и я́слѣхъ чрезъ достоя́ніе, ны́нѣ благоволи́въ въ человѣ́ческое спасе́ніе.

Конда́къ, гла́съ 3. Подо́бенъ:

Дѣ́ва дне́сь Пресу́щественнаго ражда́етъ, и земля́ верте́пъ Непристу́пному прино́ситъ. Ангели съ па́стырьми славосло́вятъ, волсви́ же со звѣздо́ю путеше́ствуютъ: на́съ бо ра́ди роди́ся Oтроча́ Мла́до, Превѣ́чный Бо́гъ.

Икосъ:

Еде́мъ Виѳлее́мъ отве́рзе, пріиди́те, ви́димъ, пи́щу въ та́йнѣ обрѣто́хомъ; пріиди́те, пріи́мемъ су́щая ра́йская вну́трь верте́па: та́мо яви́ся ко́рень ненапое́нъ, прозяба́я отпуще́ніе, та́мо обрѣ́теся кла́дязь неиско́панъ, изъ него́же Дави́дъ пи́ти дре́вле возжада́ся. Та́мо Дѣ́ва ро́ждши Младе́нца, жа́жду уста́ви а́біе Ада́мову и Дави́дову. Сего́ ра́ди къ Нему́ и́демъ, гдѣ́ роди́ся Отроча́ Мла́до, Превѣ́чный Бо́гъ.

Пѣ́снь 7.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Па́стыріе, свиря́юще, ужа́сно свѣтоявле́ніе получи́ша: сла́ва бо Госпо́дня облиста́ и́хъ, и а́нгелъ, — воспо́йте, — вопія́, — я́ко роди́ся Христо́съ, отце́въ Бо́гъ благослове́нный.

Внеза́пу съ сло́вомъ а́нгеловымъ небе́сная во́инства, — сла́ва, — вопія́ху, — Бо́гу въ вы́шнихъ, на земли́ ми́ръ, въ человѣ́цѣхъ благоволе́ніе: Христо́съ возсія́, отце́въ Бо́гъ благослове́нный.

Глаго́лъ что́ се́й? — реко́ша па́стыріе, — прише́дше, уви́димъ бы́вшее, Боже́ственнаго Христа́. Виѳлее́ма же доше́дше, съ Ро́ждшею покланя́хуся, воспѣва́юще: отце́въ Бо́же, благослове́нъ еси́.

Инъ:

Ирмо́съ: Всецаря́ любо́вію уловле́нніи, о́троцы укори́ша безчи́сленно яря́щася мучи́теля злобо́жное языковре́діе, и́мже повину́ся о́гнь мно́гій, Влады́цѣ глаго́лющимъ: во вѣ́ки благослове́нъ еси́.

Слуги́ у́бо неи́стовно попаля́етъ, спаса́етъ же всепаля́щая со стра́хомъ ю́ныя, седмочи́сленнымъ разжже́ніемъ возвы́шена; и́хже вѣнча́ пла́мень, незави́стно Го́споду подаю́щу благоче́стія ра́ди ро́су.

Помо́щниче, Христе́, человѣ́комъ, проти́вное гада́ніе, воплоще́ніе неизглаго́ланное имѣ́яй, посрами́лъ еси́; бога́тство обоже́нія нося́й, вообра́жся ны́нѣ, Его́же ра́ди упова́ніемъ свы́ше въ преиспо́дній пріидо́хомъ мракъ.

Злѣ́ неудержа́нно возвыша́емый, нече́стно бѣся́щійся отъ развраще́нія мíра, низложи́лъ еси́ всемо́щнѣ грѣ́хъ, я́же привлече́ пре́жде, дне́сь же отъ сѣ́тей спаса́еши, вопло́щся во́лею, Благодѣ́телю.

Пѣ́снь 8.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Влече́тъ Вавило́ня дщи́ о́троки плѣне́нныя Дави́довы отъ Сіо́на къ себѣ́; дароно́сцы же сле́тъ волхвы́ дѣ́ти, Дави́довѣ богопрія́тнѣй дще́ри моля́щіяся. Тѣмъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Орга́ны уклони́ша плаче́вныя пѣ́сни, не поя́ху бо въ земли́ чужде́й о́троцы Сіо́новы, вавило́нскую же разрѣша́етъ ле́сть всю́ и мусикíйскія соста́вы, въ Виѳлее́мѣ возсія́въ, Христо́съ. Тѣ́мъ, воспѣва́юще, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Коры́сти Вавило́нъ ца́рства Сіо́ня и плѣне́нное бога́тство прія́тъ, сокро́вища же Христо́съ въ Сіо́нъ сего́, и цари́ звѣздо́ю наставля́я, звѣздоблюсти́тели влече́тъ. Тѣ́мъ, воспѣва́юще, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Инъ:

Ирмо́съ: Утро́бу неопа́льну образу́ютъ Отрокови́цы и́же въ ве́тсѣмъ опаля́еміи ю́ноши, преесте́ственно ражда́ющую запечатлѣ́нну. Обоя́ же, содѣва́ющи чудодѣ́йство еди́но, лю́ди къ пѣ́нію возставля́етъ благода́ть.

Па́губы убѣжа́вши, е́же обожи́тися пре́лестію, непреста́нно пое́тъ излія́вшагося Сло́ва ю́ношески вся́ съ тре́петомъ тва́рь, несла́вну хвалу́, боя́щися, прино́ситъ, тлѣ́нна су́щи, а́ще и му́дрѣ терпя́ше.

Гряде́ши, заблу́ждшее на па́жить обраща́я цвѣтотво́рную изъ пусты́нныхъ холмо́въ язы́ковъ воста́ніе, человѣ́ческое естество́, си́лу ну́жную человѣкоубíйцы угаси́ти, мужъ же яви́вся и Бо́гъ промышле́ніемъ.

На 9-й пѣ́сни Честнѣ́йшую.., не пое́мъ, но пое́мъ припѣ́вы пра́здника.

Велича́й, душе́ моя́, Честнѣ́йшую и Сла́внѣйшую го́рнихъ во́инствъ, Дѣ́ву Пречи́стую, Богоро́дицу.

Пѣ́снь 9.

Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Та́же вторы́й ли́къ пое́тъ то́йже припѣ́въ и ирмо́съ. И про́чихъ ше́сть припѣ́вовъ припѣва́емъ на кíйждо тропа́рь по еди́ножды:

Велича́й, душе́ моя́, отъ Дѣ́вы Бо́га, пло́тію ро́ждшагося.

Велича́й, душе́ моя́, въ верте́пѣ ро́ждшагося Царя́.

Изря́дное тече́ніе зря́ще волсви́ необы́чныя но́выя звѣзды́ новосія́ющія, небеса́ просвѣща́ющія, Христа́ Царя́ зна́менующія на земли́, ро́ждшагося въ Виѳлее́мѣ на спасе́ніе на́ше.

Велича́й, душе́ моя́, отъ волхво́въ Бо́га покланя́емаго.

Велича́й, душе́ моя́, отъ звѣзды́ волхво́мъ Возвѣще́ннаго.

Новорожде́нное, — волхво́мъ, глаго́лющимъ, — Отроча́ Ца́рь, Его́же звѣзда́ яви́, гдѣ́ е́сть? Тому́ бо поклони́тися пріидо́хомъ. — Яря́ся, Иродъ смуща́шеся, Христа́ уби́ти богобо́рецъ шата́яся.

Велича́й, душе́ моя́, Чи́стую Дѣ́ву и еди́ну Богоро́дицу, ро́ждшую Христа́ Царя́.

Волсви́ и па́стыріе пріидо́ша поклони́тися Христу́, ро́ждшемуся въ Виѳлее́мѣ гра́дѣ.

Испыта́ Иродъ вре́мя звѣзды́, ея́же вожде́ніемъ волсви́ въ Виѳлее́мѣ покланя́хуся Христу́ съ да́ры; е́юже, ко оте́честву наставля́еми, лю́таго дѣтоубíйцу оста́виша пору́гана.

Та́же пе́рвый ли́къ пое́тъ втора́го кано́на припѣ́въ:

Дне́сь Дѣ́ва ражда́етъ Влады́ку внутрь верте́па.

И ирмо́съ: Люби́ти у́бо на́мъ, я́ко безбѣ́дное стра́хомъ удо́бѣе молча́ніе, любо́вію же, Дѣ́во, пѣ́сни тка́ти, спротяже́нно сложе́нныя, неудо́бно е́сть; но и, Ма́ти, си́лу, ели́ко е́сть произволе́ніе, да́ждь.

Вторы́й же ли́къ пое́тъ припѣ́въ:

Дне́сь Влады́ка ражда́ется, я́ко Младе́нецъ, отъ Ма́тере Дѣ́вы.

И ирмо́съ то́йже: Люби́ти у́бо на́мъ... Про́чіи же припѣва́емъ къ тропаре́мъ:

Дне́сь па́стыріе ви́дятъ Спа́са, пелена́ми обви́та и лежа́ща во я́слѣхъ.

Дне́сь Влады́ка ру́бищемъ пелена́ется, неося́заный, я́ко Младе́нецъ.

Дне́сь вся́ка тва́рь весели́тся и ра́дуется, я́ко Христо́съ роди́ся отъ Дѣ́вы Отрокови́цы.

Образы несвѣ́тлы и сѣ́ни приведе́ны, о Ма́ти Чи́стая, ви́дѣвше Сло́ва, но́ва я́вльшагося отъ вра́тъ заключе́нныхъ, мня́щіи же и́стинную свѣ́тлость, досто́йно Твою́ благослови́мъ утро́бу.

Небе́сныя си́лы ро́ждшагося Спа́са Го́спода и Влады́ку возвѣща́ютъ мíру.

Вмѣ́сто Сла́вы:

Велича́й, душе́ моя́, Тріѵпоста́снаго и Нераздѣ́льнаго Божества́ держа́ву.

Вмѣ́сто же И ны́нѣ:

Велича́й, душе́ моя́, Изба́вльшую на́съ отъ кля́твы.

Жела́ніе получи́вше и Бо́жія прише́ствія христокра́сніи лю́діе сподо́бльшеся, ны́нѣ утѣша́ются па́ки бытіе́мъ: я́ко живоно́сну благода́ть дае́ши, Дѣ́во Чи́стая, поклони́тися сла́вѣ.

Та́же о́ба ли́ка, соше́дшеся вку́пѣ, пою́тъ пе́рвый припѣ́въ пра́здника и ирмо́съ: Та́инство стра́нное ви́жу... Посе́мъ втора́го кано́на припѣ́въ и ирмо́съ: Люби́ти у́бо на́мъ... И покло́нъ.

Свѣти́ленъ:

Посѣти́лъ ны́ е́сть свы́ше Спа́съ на́шъ, Восто́къ восто́ковъ, и су́щіи во тмѣ́ и сѣ́ни обрѣто́хомъ и́стину, и́бо отъ Дѣ́вы роди́ся Госпо́дь.

Сла́ва, и ны́нѣ, то́йже.

На хвали́техъ пое́мъ стихи́ры самогла́сны 4. Андре́я Іерусали́мскаго, гла́съ 4:

Весели́теся, пра́ведніи, небеса́, ра́дуйтеся, взыгра́йте, го́ры, Христу́ ро́ждшуся; Дѣ́ва сѣди́тъ, херуви́мовъ подо́бящися, нося́щи въ нѣ́дрѣхъ Бо́га Сло́ва воплоще́нна; па́стыріе рожде́нному дивя́тся; волсви́ Влады́цѣ да́ры прино́сятъ, а́нгели, воспѣва́юще, глаго́лютъ: непостижи́ме Го́споди, сла́ва Тебѣ́.

Богоро́дице Дѣ́во, ро́ждшая Спа́са, упраздни́ла еси́ пе́рвую кля́тву Евину, я́ко Ма́ти была́ еси́ благоволе́нія Отча, нося́щи въ нѣ́дрѣхъ Бо́жіе Сло́во воплоще́нное. Не терпи́тъ та́йна испыта́нія. Вѣ́рою еди́ною Сію́ вси́ сла́вимъ, зову́ще съ Тобо́ю и глаго́люще: Неизрече́нне Го́споди, сла́ва Тебѣ́.

Пріиди́те, воспои́мъ Ма́терь Спа́сову, по Рождествѣ́ па́ки я́вльшуюся Дѣ́ву: ра́дуйся, гра́де одушевле́нный Царя́ и Бо́га, въ не́мже Христо́съ пожи́въ, спасе́ніе содѣ́ла. Съ Гавріи́ломъ воспое́мъ, съ па́стырьми просла́вимъ, зову́ще: Богоро́дице, моли́ изъ Тебе́ Воплоще́ннаго спасти́ся на́мъ.

Оте́цъ благоизво́ли, Сло́во пло́ть бы́сть, и Дѣ́ва роди́ Бо́га вочеловѣ́чшася; звѣзда́ возвѣща́етъ, волсви́ покланя́ются, па́стыріе чудя́тся, и тва́рь ра́дуется.

Сла́ва, гла́съ 6. Ге́рманово:

Егда́ вре́мя е́же на зе́млю прише́ствія Твоего́ пе́рвое написа́ніе вселе́ннѣй бы́сть, тогда́ восхотѣ́лъ еси́ человѣ́ковъ написа́ти имена́, вѣ́рующихъ Рождеству́ Твоему́. Сего́ ра́ди таково́е повелѣ́ніе отъ ке́саря возгласи́ся, вѣ́чнаго бо Твоего́ Ца́рствія безнача́льное Рождество́мъ Твои́мъ обнови́ся. Тѣ́мъ Тебѣ́ прино́симъ и мы́ па́че имѣ́ннаго данносло́вія правосла́внаго бога́тства богосло́вія, я́ко Бо́гу и Спа́су ду́шъ на́шихъ.

И ны́нѣ, гла́съ 2. Іоа́нна мона́ха:

Дне́сь Христо́съ въ Виѳлее́мѣ ражда́ется отъ Дѣ́вы; дне́сь Безнача́льный начина́ется, и Сло́во воплоща́ется; си́лы небе́сныя ра́дуются, и земля́ съ человѣ́ки весели́тся; волсви́ Влады́цѣ да́ры прино́сятъ, па́стыріе Рожде́нному дивя́тся. Мы же непреста́нно вопіе́мъ: сла́ва въ вы́шнихъ Бо́гу, и на земли́ ми́ръ, въ человѣ́цѣхъ благоволе́ніе.

Славосло́віе вели́кое. По трисвято́мъ тропа́рь пра́здника, ектеніи́ и отпу́стъ.



НА ЛИТУРГІИ,

Блаже́нна обои́хъ кано́новъ пѣ́снь 9-я на 8. Антифо́новъ же пра́здника не глаго́лемъ. По вхо́дѣ: Тропа́рь пра́здника. Сла́ва, и ны́нѣ, конда́къ пра́здника. Та́же, трисвято́е. Проки́менъ, аллилу́ія и прича́стенъ пра́здника. Апо́столъ и Ева́нгеліе дне́.]


[Мрк.] Аще ли случи́тся отда́ніе Рождества́ Христо́ва въ недѣ́лю.

На ма́лѣй вече́рни: стихи́ры воскре́сны и Богоро́дицы, по обы́чаю.

На вели́цѣй вече́рни: каѳи́сма 1-я: Блаже́нъ му́жъ... На Го́споди воззва́хъ: стихи́ры воскре́сны 3 и пра́здника 4, гла́съ 2: Пріиди́те, возра́дуемся Го́сподеви... и святы́хъ 3. Сла́ва, святы́хъ, гла́съ 6: Па́мять соверша́емъ... И ны́нѣ, пра́здника, гла́съ 2: Августу единонача́льствующу на земли́... Вхо́дъ, проки́менъ дне́. На литíи стихи́ры пра́здника. Сла́ва, гла́съ 5: Волсви́ перси́дстіи... И ны́нѣ, гла́съ 6: Лику́ютъ а́нгели... На стихо́внѣ стихи́ры воскре́сны. Сла́ва, святы́хъ, гла́съ 6: Свяще́нныхъ па́мять... И ны́нѣ, пра́здника. На благослове́ніи хлѣ́бовъ тропа́рь: Богоро́дице Дѣ́во.., два́жды, и святы́хъ, еди́ножды, Благовѣствуй Іо́сифе... Та́же чте́ніе въ посла́ніихъ апо́стольскихъ.

На у́трени, на Бо́гъ Госпо́дь: Тропа́рь воскре́сенъ, два́жды. Сла́ва, святы́хъ. И ны́нѣ, пра́здника. По каѳи́смахъ: сѣда́льны воскре́сны и богоро́дичны и́хъ, и чте́ніе во Ева́нгеліи толково́мъ, недѣ́ля по Рождествѣ́ Христо́вѣ. Та́же непоро́чны, съ тропари́ и́хъ, ипакои́ гла́са и чте́ніе пра́здника. Степе́нна, и проки́менъ гла́са, и Вся́кое дыха́ніе... Ева́нгеліе воскре́сно и Воскресе́ніе Христо́во... По 50-мъ псалмѣ́ стихи́ра воскре́сна. Кано́нъ воскре́сенъ со ирмосо́мъ на 4, и святы́хъ на 4, и пра́здника, о́ба кано́на на 6. Катава́сія пра́здника, ирмо́съ пе́рваго кано́на. По 3-й пѣ́сни: конда́къ святы́хъ, и и́косъ, и сѣда́ленъ и́хъ. Сла́ва, и ны́нѣ, пра́здника. И чте́ніе. По 6-й пѣ́сни: конда́къ пра́здника и и́косъ. На 9-й пѣ́сни пое́мъ Честнѣ́йшую... Свѣти́ленъ воскре́сенъ. Сла́ва, святы́хъ. И ны́нѣ, пра́здника. На хвали́техъ стихи́ры воскре́сны 4 и пра́здника самогла́сны 4, гла́съ 4: Весели́теся, пра́ведніи.., съ припѣ́вы. Сла́ва, святы́хъ, гла́съ 8: Кро́вь и о́гнь... И ны́нѣ: Преблагослове́нна еси́... Славосло́віе вели́кое. По трисвято́мъ: тропа́рь воскре́сенъ, ектеніи́ и отпу́стъ. И оглаше́ніе Студи́тово. И обы́чное исхожде́ніе. И пое́мъ: Сла́ва, и ны́нѣ, стихи́ру ева́нгельскую и ча́съ пе́рвый въ притво́рѣ.

На 1-мъ часѣ́: тропа́рь воскре́сенъ. Сла́ва, пра́здника. И ны́нѣ, богоро́диченъ часо́въ. По Отче на́шъ: конда́къ пра́здника. На 3-мъ часѣ́: тропа́рь воскре́сенъ. Сла́ва, святы́хъ. И ны́нѣ, богоро́диченъ часо́въ. Конда́къ пра́здника и святы́хъ, премѣня́юще глаго́лемъ.

На литургíи: Блаже́нна гла́са на 4 и пра́здника 1-го кано́на, пѣ́снь 9-я на 4, и святы́хъ, пѣ́снь 6-я на 4. По вхо́дѣ тропа́рь воскре́сенъ, и пра́здника, и святы́хъ. Сла́ва, конда́къ святы́хъ. И ны́нѣ, пра́здника. Проки́менъ пра́здника и святы́хъ: Ди́венъ Бо́гъ во святы́хъ Свои́хъ... Апо́столъ къ Гала́томъ, зача́ло 200. Аллилу́ія, пра́здника. Ева́нгеліе отъ Матѳе́я, зача́ло 4. Прича́стенъ: Хвали́те Го́спода... Другíй, пра́здника.

[Зри:] Аще ли случи́тся попра́зднство или отда́ніе Рождества́ Христо́ва въ суббо́ту.

Въ пято́къ ве́чера, на Го́споди, воззва́хъ: Сла́ва, и ны́нѣ, пра́здника, а богоро́диченъ 1-й настоя́щаго гла́са не пое́мъ.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 309 об. – 310 об.

/ Къ оглавленію раздѣла /


Наверхъ / Къ титульной страницѣ

0