Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 18 декабря 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

[Мѣ́сяца Деке́мврія въ 30-й де́нь.]
Слу́жба на па́мять преподо́бнаго отца́ на́шего Даніи́ла, игу́мена Переясла́вскаго, чудотво́рца.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 6:

Воспои́мъ Го́сподеви,* удиви́вшему вся́ хотѣ́нія Своя́ во святы́хъ,* въ ни́хже и су́ща на земли́ Его́ просла́вилъ чудодѣ́йствіи* уго́дника Своего́ Даніи́ла. [Два́жды.]

Всѣ́мъ благочестному́дрствующимъ* зѣло́ че́стенъ бы́лъ еси́,* я́ко дру́гъ Бо́жій, блаже́нне Даніи́ле,* тѣ́мъ оби́тель угото́вася тебѣ́ въ дому́ Отца́ Небе́снаго,* въ не́йже Единоро́дный Сы́нъ Его́* съ труди́вшимися упоко́и тя́ вѣ́чно.

Отче Даніи́ле,* уго́дниче, дру́же и слуго́ Госпо́день,* сы́й и торжеству́яй та́мо,* идѣ́же и Госпо́дь тво́й,* помяни́ и на́съ, обремене́нныхъ грѣха́ми,* да и мы́, взе́мше и́го Христо́во на себе́,* научи́мся незло́бію и серде́чному смире́нію* отъ Спа́са ду́шъ на́шихъ.

Сла́ва, гла́съ 8:

Дне́сь свѣ́тится гра́дъ Переясла́вль, пріи́де бо его́ свѣ́тъ и сла́ва Госпо́дня на не́мъ возсія́, дне́сь похваля́ему пра́веднику веселя́тся лю́діе, я́ко просла́ви Бо́гъ просла́вившаго Его́ въ тѣлеси́ свое́мъ и въ души́ свое́й. Тѣ́мже и тѣ́ло его́ соблюде́ нетлѣ́нно на́мъ, моля́щимся и прося́щимъ его́ ра́ди отъ Христа́ Бо́га грѣхо́въ оставле́нія.

И ны́нѣ, богоро́диченъ:

Ду́хъ Святы́й, наше́дъ на Тя́, и си́ла Вы́шняго, осѣни́въ Тя́, содѣ́ла прія́телище невмѣсти́маго Бо́га. Покажи́ и на́съ хра́мъ свя́тъ Утѣ́шителя, Пресвята́го Ду́ха, Безневѣ́стная Дѣ́во.

На стихо́внѣ стихи́ры, гла́съ 2:

Бо́дрствовалъ, стоя́лъ въ вѣ́рѣ,* мужа́лся, утвержда́лся еси́* и, по́двигъ тво́й надъ всѣ́ми запечатлѣ́въ тве́рдою на Бо́га наде́ждою,* сконча́лъ еси́ тече́ніе, блаже́нне.

Сти́хъ: Честна́ предъ Го́сподемъ* сме́рть преподо́бныхъ Его́.

Аще и заше́лъ еси́ отъ на́съ во гро́бъ,* усну́въ сно́мъ сме́рти, блаже́нне,* оба́че въ воскреше́ніе пра́ведныхъ просвѣти́шися, я́ко со́лнце,* въ Ца́рствіи Отца́ Небе́снаго.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Въ сію́ за́повѣдію* е́же люби́ти Бо́га и бли́жняго,* ве́сь зако́нъ и проро́цы ви́сятъ,* Христо́съ рече́, Истина;* ты́, рабо́тавъ Го́сподеви со стра́хомъ,* вся́ сія́ сохрани́лъ еси́ отъ ю́ности твоея́, блаже́нне.

Сла́ва, гла́съ 3:

Ма́рѳа печа́шеся и мо́лвяше о мно́зѣ, Марíи небре́гшей о ея́ слу́жбѣ, я́ко сѣдя́ше при ногу́ Іису́сову, прилѣжа́ слы́шанію сло́ва Бо́жія; сопричти́ и на́съ избра́вшей благу́ю ча́сть, разгоня́я мра́къ суеты́ жите́йскія твои́ми моли́твами, преподо́бне.

И ны́нѣ, богоро́диченъ:

Да не хва́лится си́льный си́лою свое́ю, да не хва́лится бога́тый бога́тствомъ свои́мъ, велича́яся благи́ми мíра сего́, я́ко ничто́же су́щими, но хваля́йся да хва́лится о Тебѣ́, я́ко неотъе́млемой отъ на́съ, христіа́нъ, ча́сти, Блага́я Предста́тельница на́ша, Влады́чице.

Та́же: Ны́нѣ отпуща́еши... Трисвято́е и по Отче на́шъ...

Тропа́рь, гла́съ 3:

Отъ ю́ности, блаже́нне, всего́ себе́ Го́сподеви возложи́въ, вы́ну повину́яся Бо́гу, проти́вяся же діа́волу, надъ страстьми́ грѣхо́вными воцари́лся еси́, тѣ́мъ са́мъ хра́мъ Бо́жій бы́въ, и оби́тель кра́сну во сла́ву Пресвяты́я Тро́ицы воздви́гнувъ и со́бранное тобо́ю въ не́й ста́до Христо́во богоуго́дно упа́сши, преста́вился еси́ къ вѣ́чнымъ оби́телемъ, о́тче Даніи́ле, моли́ Тріѵпоста́снаго во еди́номъ Существѣ́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ.



НА ВЕЛИЦѢЙ ВЕЧЕРНИ,
[На Го́споди воззва́хъ:] стихи́ры [на 8], гла́съ 6:

Беззако́нноваша іуде́е, изше́дшіи изъ Еги́пта,* сли́тіемъ тельца́ въ Хори́вѣ,* предъ ни́мже ядо́ша и пи́ша,* сего́ ра́ди и гнѣ́въ Бо́жій взы́де на Изра́иля;* да не подо́бное что́ постра́ждемъ и мы́,* служа́ще мамо́нѣ, а не Бо́гу рабо́тающе,* ты́, свя́те, предста́ни на́мъ,* да Госпо́дь исто́ргнетъ ка́менное се́рдце отъ пло́ти на́шея* и да́стъ на́мъ се́рдце пло́тяно,* покая́ніемъ удобопреклоня́ющееся* къ творе́нію святы́хъ Его́ за́повѣдей. [Два́жды.]

Согрѣши́ша изра́ильтестіи лю́діе,* испроси́вше себѣ́ царя́,* и бы́сть о ни́хъ предста́тель вѣ́ренъ Самуи́лъ Го́споду во проро́цѣхъ;* согрѣши́хомъ и мы́, вожделѣ́вше по́хоть плотску́ю,* и по́хоть оче́съ, и го́рдость жите́йскую,* но, о блаже́нне,* я́коже Самуи́лъ о тѣ́хъ лю́дехъ,* си́це о на́съ помоли́ся,* да не у́мремъ во грѣсѣ́хъ на́шихъ. [Два́жды.]

Яви́ся дре́вле отъ враго́въ бѣ́дствовавшимъ лю́демъ* моля́йся о о́нѣхъ и о святѣ́мъ гра́дѣ* Іеремíя, Бо́жій проро́къ,* и пріи́де отъ Бо́га іуде́омъ спасе́ніе.* Воста́ша и на ны́ врази́ на́ши,* мíръ, пло́ть и діа́волъ,* и оскверни́ша святы́ню хра́ма душе́внаго и тѣле́снаго,* но ты́, преподо́бне, сы́й братолю́бецъ,* пріиди́ къ на́мъ и сокруши́,* я́ко мече́мъ, твои́ми моли́твами* о́ныхъ кова́рства. [Два́жды.]

Гла́съ 2:

Пока́йтеся — се́й гла́съ Предте́чи, вопію́щаго въ пусты́ни;* бу́дите гото́ви, — се́й Христа́ Го́спода, вѣща́ющаго на́мъ;* на́ше же се́рдце одебелѣ́, и уши́ма тя́жко слы́шимъ.* Избра́нниче Бо́жій Даніи́ле,* твои́мъ предста́тельствомъ наста́ви,* во е́же возмощи́ на́мъ убѣжа́ти отъ суда́ огня́ гее́нскаго,* и да, сотво́рше плоды́ досто́йны покая́нія,* благоугожда́имъ вы́ну предъ Го́сподемъ,* Иже хо́щетъ всѣ́мъ спасти́ся, я́ко Милосе́рдъ. [Два́жды.]

Сла́ва, гла́съ 8:

Пріиди́те, лю́діе, восхва́лимъ му́жа сла́вна и отца́ на́шего Даніи́ла: се́й бо смиренному́дрствоваше вы́ну, ниже́ хожда́ше въ вели́кихъ, ниже́ въ ди́вныхъ па́че себе́, но терпѣ́ніемъ теча́ше на предлежа́вшій ему́ по́двигъ, усе́рдно облобыза́въ кро́тость и незло́біе, нищету́ же и ско́рбь. Сего́ ра́ди Бо́гъ си́це искуше́нна обрѣ́те его́, досто́йна Себѣ́, дарова́въ ему́ вѣне́цъ пра́вды отъ руки́ Своея́. Се́й да соблюде́тся и на́мъ, и всѣ́мъ, возлю́бльшимъ явле́ніе его́, не премолчи́, преподо́бне, вопія́ о всѣ́хъ ко Го́споду.

И ны́нѣ, богоро́диченъ гла́са.
Вхо́дъ. Проки́менъ дню́. По се́мъ пареміи́ преподо́бному три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2:

Ублажи́ша лю́ди, и́мже бы́ша храни́лища испо́лнена, о́вцы многопло́дны, воло́ве то́лсти и и́но попече́ніе вся́ческое, но ты́, преподо́бне, ничесо́же отъ подо́бныхъ си́мъ пожела́лъ еси́, вся́ приобрѣ́тенія мíра сего́ вмѣни́въ уме́ты бы́ти. Тѣ́мже блаже́нъ вои́стинну, я́ко бы́сть тебѣ́ Госпо́дь Бо́гъ тво́й, Ему́же предстоя́ ны́нѣ, моли́ся, да Бо́гъ ми́ра бу́детъ съ на́ми.

Горды́ня и бога́тство съ велича́ніемъ что́ по́льзуютъ? си́мъ рабо́тающіи беззако́нныхъ исполня́ются сте́зь и поги́бели, пути́ бо Госпо́дня не разумѣ́ютъ. Ты́ же, блаже́нне, вы́ну Го́рняя му́дрствовавый, а не земна́я, на пути́ грѣ́шныхъ не ста́лъ еси́, тѣ́мъ и во святы́хъ жре́бій тво́й е́сть. Моли́ Бо́га и на́мъ наслѣ́дити ча́сть благослове́нныхъ.

Сла́ва, гла́съ 1:

Умерщвле́ніемъ, и порабоще́ніемъ, и суро́вымъ мучи́тельствомъ томя́ тѣ́ло твое́, самоизво́льный му́ченикъ бы́лъ еси́, преподо́бне о́тче: вся́ возмо́глъ еси́ о укрѣпля́вшемъ тя́ Іису́сѣ Христѣ́. И та́ко текíй, не я́ко безвѣ́стно, но наде́ждою бу́дущихъ бла́гъ веселя́ся, ре́клъ Го́сподеви: Засту́пникъ мо́й еси́, и Прибѣ́жище, Бо́гъ мо́й и упова́ю на Него́.

И ны́нѣ, богоро́диченъ гла́са.

На стихо́внѣ стихи́ры, гла́съ 5:

Утренюя къ Бо́гу, не утруди́лся еси́, блаже́нне,* я́ко бре́мя понесы́й ле́гкое;* таково́му тече́нію послѣ́довати и на́съ вразуми́,* да пости́гнемъ прія́ти по́честь* отъ великодарови́таго Подвигополо́жника* и Спа́са ду́шъ на́шихъ.

Сти́хъ: Честна́ предъ Го́сподемъ* сме́рть преподо́бныхъ Его́.

Не уподо́бился еси́ рабу́,* коснѣ́ніе господи́на своего́ наблюда́ющему,* но твое́ бдѣ́ніе бы́сть гото́вое* срѣ́сти Го́спода своего́,* тѣ́мъ и Госпо́дь введе́ тя* въ ра́дость неконча́емую.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Го́ре пи́шущимъ лука́вство!* го́ре привлача́ющимъ грѣхи́,* я́ко у́жемъ до́лгимъ! — вопіе́тъ Иса́ія, —* сего́ ра́ди и пови́нни су́ть гнѣ́ву Пра́веднаго Судіи́,* сія́ зла́я возблага́я, мы́, неблагода́рни, воздае́мъ Го́сподеви.* Сего́ преще́нія изба́ви на́съ, преподо́бне,* да мы́, покая́ніемъ премѣ́ньшеся отъ злы́хъ,* поживе́мъ въ пра́вдѣ* и преподо́біи и́стины.

Сла́ва, гла́съ 6:

Дне́сь свѣ́тлый на́мъ возсія́ де́нь, соста́вите пра́здникъ и, веселя́щеся, пріиди́те, ублажи́мъ хва́лящася преподо́бнаго во сла́вѣ и ра́дующася на ло́жи свое́мъ: се́й бо, вше́дъ въ мы́сленный вертогра́дъ, испра́ви вся́кую добродѣ́тель, безпомо́щныя заступи́, заблу́ждшія на пу́ть спасе́нія наста́ви, ни́щія напита́, си́рымъ помоществова́, и си́це благоуго́денъ Бо́гови. И, возлю́бленъ бы́въ, преста́вися, идѣ́же свѣ́тится Свѣ́тъ невече́рній.

И ны́нѣ, богоро́диченъ гла́са.



[НА УТРЕНИ,]
По 1-й стихоло́гіи сѣда́ленъ, гла́съ 1:

Умножа́шеся на тя́ непра́вда го́рдаго веліа́ра, сѣ́ть положи́ти умы́слившаго дѣ́явшу ти́ свое́ спасе́ніе; ты́ же, отъ вся́каго пути́ лука́ва возбрани́въ нога́мъ твои́мъ, всѣ́мъ се́рдцемъ твои́мъ испыту́яй за́повѣди Госпо́дни, тѣ́ми растерза́лъ еси́ сѣ́ти зло́бнаго искуси́теля. Да́ждь и на́мъ безбѣ́дно мину́ти его́ лови́тельства моли́твами твои́ми, преподо́бне. [Два́жды.]

Сла́ва, и ны́нѣ, богоро́диченъ:

Приско́рбна е́сть душа́ моя́ и смуща́етъ мя́, я́ко не упова́етъ на Бо́га, язы́къ же льсти́въ, рѣ́я во отча́яніе, глаго́летъ ми́: гдѣ́ е́сть Бо́гъ тво́й? и, си́ми стужа́емаго, и́щетъ діа́волъ поглоти́ти мя́. Влады́чице моя́, рцы́ души́ мое́й: спасе́ніе твое́ е́смь Азъ, да, не сѣ́туя, хожду́ и просла́влю заступле́ніе Твое́.

По 2-й стихоло́гіи сѣда́ленъ, гла́съ 2:

Не всу́е рыда́ше проро́къ Тво́й, Го́споди, я́ко прише́льствіе его́ продолжи́ся: е́сть бо искуше́ніе житіе́ человѣ́ку на земли́, но о́нъ свя́тъ бѣ́, на́ши же путіе́ оскверня́ются на вся́ко вре́мя. Го́споди, моли́твами Твоего́ уго́дника не отве́ржи на́съ отъ лица́ Твоего́, да не ка́ко обря́щемся, зѣло́ неключи́ми предъ Тобо́ю, не сокраща́юще грѣхи́, но умножа́юще я́, дѣ́лъ же благи́хъ не творя́ще. [Два́жды.]

Сла́ва, и ны́нѣ, богоро́диченъ:

Вои́стинну безу́менъ е́сть му́жъ то́й, и́же рече́тъ: нѣ́сть Бо́гъ. Ты́, Марíе, заче́нши, родила́ еси́ Его́, въ Него́же вѣ́рующе и упова́юще На́нь, мы́, христоимени́тіи, оставле́ніе грѣхо́въ получи́ти надѣ́емся Тобо́ю, Благослове́нная въ жена́хъ, Дѣ́во Чи́стая.

По поліеле́и сѣда́ленъ, гла́съ 1:

Поноше́ніе враго́въ, велерѣ́чіе ненави́дящихъ, озлобле́ніе же и кля́тва и́хъ и си́мъ подо́бная зла́я напа́даху на тя́, но отъ всѣ́хъ си́хъ изба́ви тя́ Госпо́дь, я́ко непоро́ченъ бы́въ въ пути́, ходи́лъ еси́ въ зако́нѣ Его́, тѣ́мъ, ублажи́въ тя́, Пра́ведный Судія́ о на́съ моли́твенника содѣ́ла, преподо́бне. [Два́жды.]

Сла́ва, и ны́нѣ, богоро́диченъ:

Вся́кая тва́рь къ хвале́нію Сы́на Твоего́ созыва́ется, я́ко рабо́таетъ Ему́, а грѣ́шникъ не прибли́жится, я́ко прогнѣвля́етъ Его́; а́зъ е́смь возненави́дѣвый наказа́ніе и отве́ргій словеса́ Его́ вспя́ть, сего́ ра́ди а́ще и повѣ́даю оправда́нія Госпо́дня, но вску́ю? Не оста́ви мене́, Влады́чице моя́, вонми́ въ по́мощь мою́, да бу́детъ и мнѣ́ Сы́нъ Тво́й во спасе́ніе.

По 50-мъ псалмѣ́ стихи́ра, гла́съ 6:

Приклони́лъ еси́ у́хо твое́ во глаго́лы у́стъ Христа́ Спаси́теля, ре́кшаго: возьми́те и́го Мое́ на себе́. И бы́въ творе́цъ сло́ва, а не то́чію слы́шатель, входи́лъ еси́ у́зкими враты́, простра́нная же и широ́кій пу́ть мину́въ, изво́лилъ еси́ страда́ти съ людьми́ Бо́жіими и си́це, де́нь отъ дне́, простира́яся на лу́чшее и на соверше́нство восходя́, обрѣ́лъ еси́ поко́й душѣ́ твое́й. Напра́ви стопы́ и на́ша на пу́ть, вводя́щій въ живо́тъ, твои́мъ предста́тельствомъ, блаже́нне.

Кано́нъ преподо́бному, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Благослове́нный Бо́же, въ мíръ прише́дый, Его́же, кромѣ́ ино́го, не ча́емъ, не посрами́ на́съ отъ ча́янія на́шего, внегда́ призва́ти на́мъ о и́мени Твое́мъ и́мя свята́го Твоего́, призыва́вшаго Тя́ во и́стинѣ, Даніи́ла.

Возбрани́въ се́рдцу твоему́ отъ вся́каго весе́лія, ничто́же восхотѣ́лъ еси́ на земли́, я́ко ра́дованіе се́рдца твоего́ бя́ху свидѣ́нія Госпо́дня; я́же да наслѣ́димъ и мы́, моли́твы твоя́ съ на́шими моли́твами соедини́, блаже́нне.

Возжада́ Го́спода душа́ твоя́, преподо́бне, и не лиши́лся еси́ отъ жела́нія твоего́: ны́нѣ бо насыща́ешися отъ пото́ка сла́дости Госпо́дни, во Свѣ́тѣ Его́ узрѣ́въ свѣ́тъ. Го́споди, проба́ви ми́лость Твою́ и на́мъ, вѣ́дущимъ Тя́, моли́твами отца́ на́шего.

Богоро́диченъ: Ищущіи зла́я мнѣ́ глаго́лютъ су́етная, врази́ же мои́ укрѣпля́ются па́че мене́, и умножа́ются ненави́дящіи мя́ безъ пра́вды, сего́ ра́ди се́рдце мое́ смяте́ся толи́ко, я́ко оста́ви мя́ и си́ла моя́. Но, о всеблагомо́щная Цари́це! помози́ ми, да, спасе́нъ бы́въ Тобо́ю отъ ни́хъ, поучу́ся во оправда́ніихъ Сы́на Твоего́ вы́ну.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Тве́рдымъ позна́ніемъ Ева́нгельскія и́стины имѣ́яй препоя́санны чре́сла твоя́, свидѣ́тельствовался еси́ бы́ти вѣ́ренъ о мно́зѣхъ, служи́тель Христо́въ, утверди́ и на́съ въ до́бромъ по́двизѣ, придержа́щихся спасе́нія, твои́ми моли́твами, преподо́бне.

Оболкíйся въ броня́ пра́вды, я́же о Христѣ́, имѣ́лъ еси́ добру́ со́вѣсть, и, пріе́мъ дерзнове́ніе къ Бо́гу, да приступа́ютъ и вси́ вѣ́рніи со дерзнове́ніемъ ко престо́лу благода́ти, тайново́дствовалъ еси́ и уче́ніи, и моли́твами твои́ми, блаже́нне.

Надъ всѣ́ми благи́ми дѣ́лы воспрія́вшу тебѣ́ щи́тъ вѣ́ры, ничто́же возмого́ша стрѣ́лы лука́ваго разжже́нныя, и, шле́мъ спасе́нія воспрія́въ, наде́ждно утверди́лся еси́ на ка́мени исповѣ́данія Христо́ва; помяни́ и на́съ, смире́нныхъ и коле́блемыхъ, блаже́нне, да обря́щемъ утѣше́ніе.

Богоро́диченъ: Что́ стужа́еши ми́, душе́ моя́, я́ко оте́цъ мо́й и ма́ти моя́ оста́виста мя́? И по сему́ зна́менію, а́ки отринове́нъ, преврати́хся па́сти, вои́стинну нѣ́си си́ра и отринове́на, и́бо отца́ и́маши Бо́га, ма́терь же — Ро́ждшую Его́. Благоутро́біемъ Ея́ гряди́ ко Христу́, и Госпо́дь воспріи́метъ тя́.

Сѣда́ленъ, гла́съ 2:

Потща́вся себе́ иску́сна поста́вити предъ Го́сподемъ дѣ́лателя непосты́дна, послѣ́довалъ еси́ блаже́ннаго Па́вла уче́нію, житію́, привѣ́ту, вѣ́рѣ, долготерпѣ́нію, любви́, терпѣ́нію. И си́це на вся́кое дѣ́ло благо́е угото́ванъ, я́ко свѣти́льникъ, поста́вился еси́ на свѣ́щницѣ, да, тобо́ю освѣща́еми, мно́зи на пу́ть спасе́нія наста́вятся. Помоли́ся и о на́съ, о́тче преподо́бне, да да́стъ и на́мъ Бо́гъ пріити́ въ покая́ніе и въ ра́зумъ и́стины. [Два́жды.]

[Сла́ва, и ны́нѣ,] богоро́диченъ:

Въ со́бственный вертогра́дъ вше́дъ, въ Тя́, Пресвята́я Дѣ́во, воспрія́тъ Себѣ́ пло́ть отъ Тебе́, со благоуха́ніемъ Божества́ соедине́нную, Сы́нъ Тво́й, Сло́во, и бы́сть Богочеловѣ́къ. Моли́ Его́ бла́гость, да всели́тся и въ на́съ, творя́ сердца́ на́ша благоуха́ніе Бо́гови въ спаса́емыхъ, да бу́демъ и мы́ воня́ живо́тная въ живо́тъ.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Услажда́я ду́шу твою́ слова́ми зако́на Госпо́дня, не удержа́лъ стремле́нія твоего́ къ благоче́стію, но, и́мже о́бразомъ жела́етъ еле́нь на исто́чники водны́я, бы́стро те́клъ еси́, вопія́: си́це жела́етъ душа́ моя́ къ Тебѣ́, Бо́же. Ча́сти съ тобо́ю имѣ́ти и на́мъ, твои́мъ ча́домъ, моли́ся, о́тче на́шъ Даніи́ле.

Чистото́ю и любо́вію бы́лъ еси́, я́ко хлѣ́бъ, сла́докъ Го́сподеви, ходя́ бо досто́йнѣ Бо́гу во вся́комъ угожде́ніи, досто́йно жи́тельствовалъ еси́ благовѣствова́нію Христо́ву, да и мы́ во вся́комъ дѣ́лѣ бла́зѣ преуспѣ́емъ, предста́тельствуй твои́ми моли́твами, о́тче на́шъ преподо́бне.

Ви́ждь, уго́дниче Христо́въ, смире́ніе на́ше, я́ко возвели́чися вра́гъ, ища́й поги́бели на́шея, сего́ ра́ди и ро́въ изры́, и ископа́ и́; ты́ помоли́ся, да Госпо́дь разори́тъ совѣ́тъ его́, и впаде́тъ въ я́му, ю́же содѣ́ла.

Богоро́диченъ: Нѣ́сть ми́ ослабле́нія, зане́ не сотвори́хъ во́ли Сы́на Твоего́ и не сохрани́хъ повелѣ́ній Его́, и ны́нѣ приклони́ ми у́хо Твое́ въ покая́ніи, тре́бующему бла́гости, Ма́ти Бо́жія, да не осу́дитъ мя́ Судія́ Пра́ведный въ преиспо́днихъ земли́: на Тя́ бо упова́ю, о Предста́тельнице моя́!

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Весели́лся еси́ о ре́кшихъ ти́: въ до́мъ Госпо́день по́йдемъ, идѣ́же, благочи́нно предстоя́, воздава́лъ еси́ Вы́шнему моли́твы твоя́ за вся́ человѣ́ки, я́же и мно́го можа́ху, я́ко пра́веднаго. Поспѣшеству́й о́ными и на́мъ, огражда́я на́съ отъ губи́теля, ловя́щаго ду́ши на́ша, блаже́нне.

Жи́въ вѣ́рою Іису́съ Христо́вою, не свои́хъ си́ иска́въ, но я́же Христа́ Іису́са, пости́гнулъ еси́ въ житіе́ на небесѣ́хъ, идѣ́же водворя́яся со Христо́мъ, помина́й на́съ, да и мы́, теку́ще, пости́гнемъ, о́тче на́шъ Даніи́ле.

Жела́ніе имѣ́яй соедини́тися съ Го́сподемъ, рабо́талъ еси́ Ему́ во и́стинѣ и всѣ́мъ се́рдцемъ твои́мъ и, си́це прилѣпля́яся Го́сподеви, еди́нъ ду́хъ бы́лъ еси́ съ Го́сподемъ, дне́сь же лице́мъ къ лицу́ зря́ Его́, покажи́ на́съ прича́стники Боже́ственнаго лицезрѣ́нія, приснопа́мятне.

Богоро́диченъ: Бо́же Спаси́телю мо́й! коли́ко е́сть дне́й раба́ Твоего́? когда́ утѣ́шиши мя́? и сотвори́ши ми́ отъ гоня́щихъ мя́ су́дъ? Се́ бо, обыше́дше, обыдо́ша мя́ и́же искони́ человѣкоубíйцы врази́, на мя́ вся́ помышле́нія и́хъ на зло́. Удержи́ и́хъ стремле́ніе, сокруши́ че́люсти, да, пріи́мъ отъ ни́хъ свобо́ду, сохраню́ за́повѣди Твоя́, Тя́ съ Ро́ждшею при́сно велича́я.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Серде́чную возлюби́въ пра́вость, ми́ръ имѣ́лъ еси́ и святы́ню со всѣ́ми, тѣ́мъ ублажи́вся, узрѣ́лъ еси́ Бо́га, Его́же Свѣ́тъ присносу́щный да возсія́етъ и на́мъ, помоли́ся, преподо́бне.

Вѣ́рою во Христа́ дѣла́, я́же Онъ сотвори́, и ты́ сотвори́лъ еси́, умно́живъ иногда́ хлѣ́бы, блаже́нне, зане́ ми́лостивъ и сострада́теленъ бы́въ, а́лчущія пита́лъ еси́, и ны́нѣ милосе́рдуй о наро́дѣхъ, предстоя́щихъ и и́щущихъ Го́спода, да не лиша́тся вся́каго бла́га.

Кро́ткихъ зе́млю и смире́нныхъ благода́ть наслѣ́довалъ еси́, го́рдости и тщесла́вія вся́чески удаля́яся, и бы́вшу ти́ воспріе́мникомъ ча́дъ вели́каго кня́зя, я́ко и́стинный учени́къ Іису́са Христа́ къ бога́тству не прилага́лъ еси́ се́рдца, но во́льною нището́ю благоугожда́лъ еси́ предъ Ни́мъ во вся́ дни́ живота́ твоего́, о́тче на́шъ Даніи́ле.

Богоро́диченъ: Сы́нъ Тво́й, Влады́чице, прише́дъ, не́мощи на́ша понесе́ и печа́ли преложи́ на ра́дость: Жениху́ бо прису́щу всѣ́мъ ра́доватися досто́итъ, и никому́же пла́кати, сея́ ра́дости плоды́ вкуша́ютъ вѣ́рующія въ Него́. Оная чрезъ печа́ль вѣ́ка сего́ да не во́змется отъ на́съ, исто́ргни небреже́ніе отъ серде́цъ на́шихъ, Ма́ти Бо́га Вы́шняго.

Конда́къ, гла́съ 1:

Отъ позна́нія себе́ прише́дъ въ позна́ніе Бо́га и благоче́стіемъ къ Нему́ воспріи́мъ нача́ло чу́вства вну́тренняго, ра́зумъ сво́й плѣни́лъ въ послуша́ніе вѣ́ры; тѣ́мъ и, по́двигомъ до́брымъ подвиза́вся, дости́гнулъ еси́ въ мѣ́ру во́зраста соверше́нна исполне́нія Христо́ва, я́ко Бо́жіе тяжа́ніе, Бо́жіе зда́ніе, дѣ́лалъ еси́ бра́шно, не ги́блющее, но бра́шно, пребыва́ющее въ живо́тъ вѣ́чный. Да бу́дутъ единоду́шно вси́ насажде́ніе Госпо́дне въ сла́ву, моли́, блаже́нне, Еди́наго Человѣколю́бца Бо́га.

Икосъ:

Сла́венъ еси́ вои́стинну, и тебѣ́ похвала́ не отъ человѣ́къ, но отъ Бо́га, человѣ́къ бо бы́въ, по человѣ́ку не ходи́лъ еси́, но, я́ко слуга́ Христо́въ, не ду́ха мíра сего́ пріе́мъ, но Ду́ха, Иже отъ Бо́га; не соизво́лилъ еси́ о я́стіи, или́ питіи́, или́ оде́ждѣ язы́ковъ попече́нію, благоволи́въ же па́че иска́ти Ца́рствія Бо́жія и пра́вды Его́, вше́лъ еси́ въ живо́тъ вѣ́чный, и на́мъ во е́же наслѣ́дити о́ный, моли́, блаже́нне, Еди́наго Человѣколю́бца Бо́га.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Всегда́ имы́й па́мять Христо́выхъ пресвяты́хъ страсте́й, въ ту́южде мы́сль вооружа́лся еси́ изволе́ніемъ, во е́же послѣ́довати стопа́мъ Его́. И на́мъ па́мять сію́ въ се́рдцѣ и во умѣ́ на́шемъ водруже́нну имѣ́ти, моли́ пострада́вшаго за ны́ Христа́, о́тче Даніи́ле.

Христо́съ пре́данъ, я́звенъ и му́ченъ бы́сть за беззако́ніе на́ше. Ты́, приобща́яся Христо́вымъ страсте́мъ, всегда́ ме́ртвость Го́спода Іису́са въ тѣ́лѣ свое́мъ носи́лъ еси́, и ны́нѣ, просла́вився съ Ни́мъ, умертви́ на́ши стра́сти, свя́те, твои́ми моли́твами.

Христо́съ воста́ за оправда́ніе на́ше, да вѣ́ра на́ша и упова́ніе бу́детъ на Бо́га, сія́ обоя́, а́ки ко́тву, имѣ́въ души́, тве́рду же и извѣ́стну, пресели́лся еси́, идѣ́же и Предте́ча о на́съ вни́де Іису́съ, да та́мо и мы́ предста́немъ Ему́ въ ра́дости, помяни́ на́съ, блаже́нне Даніи́ле.

Богоро́диченъ: Свята́я Марíе, Ма́ти Бо́га Вы́шняго, мы́ еще́ въ се́мъ мíрѣ, во злѣ́ лежа́щемъ, есмы́ и сего́ ра́ди внѣ́ стои́мъ, хотя́ще вни́ти вну́трь черто́га небе́снаго. По отше́ствіи на́шемъ отъ тѣ́ла благоволи́ на́мъ ви́дѣти неизрече́нную красоту́ Сы́на Твоего́.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Присво́ився Христу́ чрезъ вѣ́ру, преподо́бне, не повину́лся еси́ пло́ти, но, распя́въ ю́ со страстьми́ и похотьми́ и къ до́брымъ дѣла́мъ устреми́вся, собо́ю и ины́хъ учи́лъ еси́ Христу́ вопи́ти: Тя́ превозно́симъ во вся́ вѣ́ки.

Ходи́въ ду́хомъ, плоды́ духо́вныя вкуша́я, блаже́нне, и си́хъ наслажда́яся, неукло́нно взира́лъ еси́ на Нача́льника вѣ́ры и Соверши́теля Іису́са, тѣ́мъ и благода́рственно къ Нему́ взыва́лъ еси́: Тя́ превозно́симъ во вся́ вѣ́ки.

Упова́ніемъ объе́мь благода́ть Бо́жію, за основа́ніе о́наго положи́въ заслу́ги Христо́вы и богоуго́дно управля́я жи́знь твою́ творе́ніемъ добра́, Христу́ ра́достно воспѣва́лъ еси́: Тя́ превозно́симъ во вся́ вѣ́ки.

Богоро́диченъ: Тобо́ю, Пресвята́я Дѣ́во, Иже во о́бразѣ Бо́жіи Сы́й къ на́мъ пріи́де, и, дѣ́лавъ дѣла́ посла́вшаго Его́, у́мре грѣ́хъ на́шихъ ра́ди, и воста́ въ тре́тій де́нь, по Писа́ніемъ, Тя́ показа́въ Предста́тельницу о на́съ, превознося́щихъ Его́ во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Единоро́дному Сы́ну, су́щему въ ло́нѣ Отчи, послужи́лъ еси́, сего́ ра́ди почте́ тя Оте́цъ Небе́сный, оби́тель у тебе́ сотвори́въ съ Ни́мъ и Пресвяты́мъ Ду́хомъ, и ны́нѣ у́бо предстоя́ Единосу́щнѣй Тро́ицѣ, свѣ́томъ твои́хъ моли́твъ разжени́ мра́къ страсте́й отъ серде́цъ на́шихъ, преподо́бне.

Мзда́ твоя́ мно́га на небесѣ́хъ, я́ко возлюби́лъ еси́ мно́го, мно́гими скорбьми́ восходя́ къ Бо́гу, къ Нему́же и прибли́жився, призира́й на лю́ди, тре́бующія отъ Бо́га ми́лости, блаже́нне.

Отче блаже́нне Даніи́ле! Се́ твое́ оте́чество, въ не́мже воспита́лся еси́. Се́ оби́тель твоя́, въ не́йже преподо́бно пожи́въ, многотру́днымъ твои́мъ тѣ́ломъ свя́то почива́еши. А мы́, твои́ ча́да, къ тебѣ́ приве́ржены есмы́: не отступа́й отъ гра́да, и отъ на́съ, я́ко твое́й ча́сти, и отъ призыва́ющихъ и́мя твое́, поле́зная всѣ́мъ хода́тайствуя у Всеми́лостиваго Спа́са Христа́.

Богоро́диченъ: Аще мно́го мо́жетъ моли́тва пра́веднаго поспѣшеству́ема, Ты́, святѣ́йша су́щи всея́ тва́ри, я́ко Ма́терь Бо́гу, несравне́нно мо́жеши. При́зри на ны́ съ преподо́бнымъ Даніи́ломъ и испроси́ Благочести́вѣйшему Самоде́ржцу на́шему и всему́ наслѣ́дію Его́ вся́ блага́я отъ Бо́га: се́ бо мы́ къ Тебѣ́ по Бо́зѣ, я́ко еди́ной наде́ждѣ, прибѣга́я, во всѣ́хъ напа́стехъ ра́дости и утѣше́нія отъ Тебе́ упова́емъ.

Свѣти́ленъ:

Человѣколю́біемъ подража́я Тови́ту, погребе́нію стра́нныхъ прилѣжа́лъ еси́, о́тче Даніи́ле. Попецы́ся и о на́шихъ душа́хъ, мо́лимъ тя́, преподо́бне, да не бу́дутъ въ попра́ніе веліа́ру, и́щущему поглоти́ти и низвести́ въ бе́здну поги́бели, идѣ́же никто́же исповѣ́стся Бо́гу на́шему. [Два́жды.]

[Слава, и нынѣ,] богородиченъ:

Благоразу́менъ е́сть му́жъ и му́дръ, и́же слы́шитъ словеса́ Бо́жія и твори́тъ я́, и́бо зи́ждетъ хра́мину душе́вную на ка́мени повелѣ́ній Госпо́днихъ, а и́же слы́шитъ и не твори́тъ я́, сицевы́й несмы́сленъ и уро́дъ, я́ко пренебрегíй о основа́ніи, утвержда́емомъ на исполне́ніи слове́съ Бо́жіихъ. Ты́, Влады́чице на́ша, на́съ свѣ́томъ му́дрости просвѣти́, Твои́ми моли́твами тьму́ неразу́мія отгна́въ отъ на́съ, да, соблюда́юще въ сердца́хъ на́шихъ словеса́ Бо́жія, творе́ніемъ о́ныхъ досто́йныя принесе́мъ плоды́.

На хвали́техъ стихи́ры, гла́съ 8:

Обле́кся во вся́ ору́жія Бо́жія,* возмо́глъ еси́ стоя́ти проти́ву ко́знемъ діа́вольскимъ,* огражде́нъ душе́вною наде́ждою* и духо́вною горя́чностію въ моли́твѣ,* и, бы́въ но́ва тва́рь,* Ду́ха Свята́го всели́лъ еси́ въ се́рдце твое́,* свидѣ́тельствовавшаго тя́ ча́до Бо́жіе бы́ти;* покажи́ и на́съ хра́мъ благоуго́денъ Ему́,* твои́ми моли́твами, блаже́нне. [Два́жды.]

Всего́ возлюби́въ Христа́,* я́ко Бо́га и Человѣ́ка,* угожда́лъ еси́ Ему́ благотворе́ніемъ,* вспомоществова́ніи, потре́бными бра́тіи Его́ ме́ньшей,* надъ си́мъ же просія́вшу ти́ бла́гостію,* смиренному́дріемъ, кро́тостію и долготерпѣ́ніемъ,* бы́лъ еси́ я́коже избра́нный Бо́жій,* святы́й и возлю́бленный,* тѣ́мъ и наслѣ́довалъ еси́* угото́ванное тебѣ́ Ца́рствіе отъ сложе́нія мíра.* И на́съ, свя́те, обле́кши во утро́бы щедро́тъ,* пону́ди вни́ти во о́ное* благопрія́тными твои́ми моли́твами.

Ходи́въ про́чее благообра́зно,* держа́лся еси́ о́нѣхъ, ели́ка су́ть и́стинна,* и, испра́вивъ, ели́ка че́стна,* утвержда́лся еси́ въ пра́ведныхъ,* дости́гнувшу же ти́ и объе́мшу, ели́ка пречи́ста,* съ жела́ніемъ упражня́лся еси́ въ прелюбе́зныхъ* и, преспѣ́въ стяжа́ніемъ доброхва́льныхъ,* вся́кую добродѣ́тель и вся́кую похвалу́ соверши́лъ еси́;* сія́ да помышля́емъ и мы́,* лука́вое и проти́вное помышле́ніе* истребля́я отъ серде́цъ на́шихъ,* моли́ Христа́ Бо́га, блаже́нне Даніи́ле.

Сла́ва, гла́съ 4:

Ко́ль просла́вился еси́ въ сожи́тельствѣ люде́й, въ житіи́ съ бра́тіею вку́пѣ! Сія́лъ бо еси́, я́ко со́лнце, твои́ми уче́ніи, блюды́й и́хъ отъ паде́нія, и, я́ко дуга́, на о́блацѣхъ свѣти́лъ еси́ твои́ми исправле́ніи, во все́мъ са́мъ себе́ подава́я о́бразъ до́брыхъ дѣ́лъ, и отсю́ду бы́лъ еси́ свѣти́льникъ, горя́ и свѣтя́. Преше́дъ же отъ здѣ́шнихъ, глаго́ли, о́тче на́шъ, въ моли́твѣ къ Бо́гу и о на́съ: се́ а́зъ и дѣ́ти, я́же ми́ да́лъ еси́, Го́споди, спаси́ ду́ши и́хъ, Человѣколю́бче.

И ны́нѣ, богоро́диченъ:

Мо́лимъ Тя́, Влады́чице, сотвори́ моли́твы и моле́нія за ны́, рабы́ Твоя́, къ Сы́ну Твоему́, да, го́рдость вся́кую отло́жше и удо́бь обстоя́тельный грѣ́хъ, ти́хое и безмо́лвное житіе́ поживе́мъ во вся́комъ благоче́стіи и чистотѣ́.


НА ЛИТУРГІИ,

Слу́жба вся́ преподо́бническая: [Блаже́нна отъ кано́на, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Слу́жба на па́мять преподо́бнаго отца́ на́шего Даніи́ла, игу́мена Переясла́вскаго, чудотво́рца. — Москва́: Въ Сѵнодальной Тѵпогра́фіи, 1782. — 16 л.

/ Къ оглавленію раздѣла /


Наверхъ / Къ титульной страницѣ

0