Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 24 iюня 2017 г. Сейчасъ на порталѣ посѣтителей - 34.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 30-й де́нь.
Преподо́бнаго Зо́тика [Сиропита́теля].

[Зри́:] Слу́жба свята́го Зо́тика пое́тся на повече́ріи.

Кано́нъ, гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Свы́ше просвѣти́тися омраче́ннѣй мое́й мы́сли, пѣ́ти тя́ досто́йно, Зо́тике, Христа́ умоли́.

Житіе́мъ твои́мъ а́нгеломъ на земли́, богому́дре, ревну́я, показа́лся еси́ досто́йно, жите́йскихъ красо́тъ гнуша́яся.

Богоро́диченъ: Ро́дъ человѣ́ческій Тебе́ ра́ди, Дѣ́во, назида́ется, Бо́гъ бо, вы́шнихъ не оста́вивъ, на зе́млю пріи́де.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Пріиди́те, стра́нніи, дне́сь, ра́достно гла́съ вознесе́мъ во свѣ́тлѣмъ се́мъ торжествѣ́, Зо́тика ублажа́юще.

Поста́вилъ еси́ до́мъ тво́й, я́коже Авраа́мъ ски́нію дне́сь, вся́ ни́щія пріе́млющій и бога́тно пита́ющій.

Богоро́диченъ: Бу́рю вся́ку уста́вила еси́ въ Рождествѣ́ Твое́мъ, Всечи́стая, тѣ́мже враги́ вѣ́рніи ца́ріе побѣжда́ютъ, въ ми́рѣ лику́юще.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Свѣтоно́сное торжество́ сіе́ преподо́бнаго ны́нѣ просія́ Зо́тика, къ Рождеству́ Христо́ву призыва́ющи вся́ на чрежде́ніе.

Чудесы́ прелѣ́потствова́въ, чудеса́ пресла́вная оста́вилъ еси́ на́мъ, честна́я твоя́ исправле́нія на земли́, преблаже́нне, о́бразъ боже́ственъ.

Богоро́диченъ: Очисти́лище обрѣто́хомъ Тя́, Богороди́тельнице, и прибѣ́жище во бранѣ́хъ непобѣди́мо, ца́ріе же держа́ву, Чи́стая, но́сятъ.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Украше́ніе добродѣ́тели показа́ся, чу́дне, честна́я твоя́ исправле́нія, Боже́ственный до́мъ, наги́хъ одѣя́ніе.

Прокаже́ніе, свяще́нне, исцѣля́я, о́тче, воздви́глъ еси́ враче́бницу тво́й до́мъ честны́й, въ не́мже досто́йно вся́къ неду́гъ врачу́ется.

Богоро́диченъ: Ве́ліе и честно́е е́же въ Тебѣ́ я́вльшееся та́инство, Богоро́дице Приснодѣ́во: се́ бо вои́стинну, земнíи, къ Бо́гу примири́хомся.

Пѣ́снь 6.

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́ отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю! и спаси́.

Хра́мъ тя́, вси́ вѣ́рніи, Ду́ха вѣ́мы, хра́мъ бо всеблаголѣ́пенъ тво́й сотвори́лъ еси́ до́мъ, пресла́вне, въ не́мже вся́къ неду́гъ моли́твами твои́ми отгоня́ется.

Страннопрія́тіе на земли́, Авраа́му подо́бяся, поста́вилъ еси́, всеблагоче́стно безкро́вныя пріе́мля, нагíя, и мимоходя́щія, и хромы́я, и стра́нныя, и ни́щія вводя́.

Богоро́диченъ: Не́бо на земли́, Дѣ́во, показа́вый верте́пъ, небе́сный Тя́ хра́мъ, а́нгельскими окруже́нъ ли́ки, показа́, сла́ва въ вы́шнихъ вопію́щихъ Твоему́ Рождеству́ вѣ́рно.

Сѣда́ленъ, гла́съ 5. Подо́бенъ: Собезнача́льное Сло́во.

Страсте́й пе́щи, преподо́бне, угаси́лъ еси́ воздержа́нія росо́ю, дарова́ніемъ обогати́вся, врачева́нія отъ Бо́га, Зо́тике, прія́лъ еси́ врачева́ти вѣ́рныхъ болѣ́зни лю́тыя и де́моновъ отгони́ти полки́; сего́ ра́ди съ весе́ліемъ почита́емъ тя́.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Всѣ́мъ преподо́бнымъ сочи́слился еси́ и лико́мъ боже́ственнымъ безтѣле́снымъ, Зо́тике преблаже́нне, съ ни́миже и взыва́еши: благослове́нъ еси́, Го́споди Бо́же, во вѣ́ки.

Си́лою и благода́тію, богому́дре, бы́лъ еси́ вдо́въ и немощны́хъ, сиро́тъ же оте́цъ показа́лся еси́, зовы́й: благослове́нъ еси́, Го́споди Бо́же, во вѣ́ки.

Богоро́диченъ: Крѣ́пость ва́рваровъ, Богоро́дице, истреби́ и спаси́ лю́ди Твоя́. Цари́ же вѣ́рныя утверди́, вопію́щія: благослове́нъ, Всечи́стая, Пло́дъ Твоего́ чре́ва.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Сія́, му́дре, побѣди́тельная, сія́ исправле́нія, и я́же убо́гихъ и же́нъ сле́зы, тво́й хра́мъ показа́ша небесе́ вы́шшій, и ца́рствія тебѣ́ вхо́ды отверзо́ша. Вѣ́рою бо вопія́лъ еси́: о́троцы, благослови́те, свяще́нницы, воспо́йте Го́спода, лю́діе, превозноси́те во вся́ вѣ́ки.

Сна́ твои́мъ не да́лъ еси́ очесе́мъ, досточу́дне, ниже́ вѣ́ждамъ дрема́нія, богопрія́тне, до́ндеже дѣ́ло боже́ственное, слове́сный ра́й Христо́въ, до конца́ соверши́лъ еси́, поя́: о́троцы, благослови́те, свяще́нницы, воспо́йте Го́спода и превозноси́те во вся́ вѣ́ки.

Богоро́диченъ: Человѣколю́біемъ ми́лости Твоея́ къ на́мъ прише́лъ еси́, Иже спасе́нія ра́ди бы́въ я́ко Человѣ́къ, и въ верте́пъ всели́лся еси́, пелена́ми повива́емь, и земноро́дныя отъ страсте́й воздви́глъ еси́, согла́сно пою́щія: свяще́нницы, воспо́йте Го́спода, лю́діе, превозноси́те во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Благода́ть тебѣ́, о́тче, отъ Бо́га даде́ся лѣчи́ти неду́ги, ни́щія, и сухíя, и хромы́я; я́же я́ко люби́мичи Христо́вы вѣ́рно пріе́мля, съ си́ми ра́дуешися при́сно, въ нѣ́дрѣхъ Авраа́мовыхъ водворя́яся.

Напита́лъ еси́, о́тче, оби́льно вся́каго стра́нна, и на́га, и мимоходя́ща; съ патріа́рхи при́сно и съ пра́ведными ны́нѣ ра́дуешися свѣ́тло идѣ́же бога́тство и сла́дость, идѣ́же присносу́щное спаса́емыхъ упова́ніе, идѣ́же всѣ́мъ бога́тство е́сть Христо́съ.

Богоро́диченъ: Яко су́щи Ма́ти Бо́жія, я́ко Предста́тельница и приста́нище чту́щихъ Тя́, я́ко прибѣ́жище всѣ́хъ, Дѣ́во, притека́ющихъ къ Тебѣ́, я́ко царе́й же ра́дость, и сла́ва, и утвержде́ніе, и вѣне́цъ досто́инъ, лю́ди Твоя́, Богоро́дице, спаса́й.

Стихи́ры, гла́съ 6. Подо́бенъ: Тридне́венъ.

Яко Авраа́мъ нра́вы, му́дре, показа́лся еси́ по обоему́: тво́й до́мъ дово́льное оби́льство отве́рзлъ еси́ всѣ́мъ, подая́ тре́бующимъ и да́руя ни́щимъ ми́лость.

Вдо́въ и ни́щихъ Тя́ Христо́съ показа́ пріе́мника, вре́дныхъ засту́пника те́пла, предста́теля въ бѣда́хъ, побо́рника и изба́вителя восхваля́ющихъ, о́тче на́шъ.

Сла́ва, гла́съ то́йже:

Си́лою укрѣпля́емь и благода́тію украша́емь Ро́ждшагося въ верте́пѣ, Зо́тике, поще́ніемъ и воздержа́ніемъ стра́сти побѣди́лъ еси́ и прія́лъ еси́ побѣди́тельная.

И ны́нѣ, гла́съ то́йже:

Яко Младе́нца въ я́слѣхъ восклони́, Христе́ Бо́же, безсѣ́менно ро́ждшая Тя́ Дѣ́ва, ли́цы же безпло́тныхъ съ высоты́ вопія́ху: сла́ва Зижди́телю и Бо́гу всѣ́хъ.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 300 – 302.

/ Къ оглавленію раздѣла /


Наверхъ / Къ титульной страницѣ

0