Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 24 января 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 30-й де́нь.
Святы́я му́ченицы Ани́сіи, и преподо́бныя ма́тере на́шея Мела́ніи.

[ВЕЧЕРЪ,]
На Го́споди воззва́хъ: стихи́ры святы́я Ани́сіи 3, гла́съ 4. Подо́бенъ: Яко до́бля.

Дѣ́вства свѣ́тлостію* уясни́вшися, всехва́льная,* муче́нія облиста́ла еси́ по́двиги:* поклони́тися бо со́лнцу не повину́вшися,* непра́ведное претерпѣ́ла еси́ заколе́ніе* и, обагри́вшися кровьми́,* предста́ла еси́ Со́лнцу сла́вы, вѣнцено́сице,* и отту́ду испуща́емыми* озаря́ема свѣтлостьми́.

Серде́чное раче́ніе явля́ющи,* слеза́ми умиле́нія, сла́вная,* зе́млю омочи́ла еси́* и власы́ отира́ла еси́ Христо́во подно́жіе,* помышля́ющи, и Того́ я́ко прису́ща предзря́щи,* Его́же вожделѣ́ла еси́,* и, стопа́мъ прикаса́ющися мы́слію,* видѣ́ніи боже́ственнѣйшими* твою́ ду́шу просвѣти́ла еси́.

И бога́тство расточи́вши,* и ни́щія удовли́вши,* уневѣ́стилася еси́ Нетлѣ́нному Жениху́ твоему́* и, я́коже вѣ́но, принесла́ еси́ Тому́, всесла́вная,* крове́й то́ки и страсте́й подража́ніе,* я́же претерпѣ́ла еси́, Ани́сіе.* Еди́нъ въ черто́гъ всели́въ тя́ Вы́шній,* я́ко страстоте́рпицу и му́ченицу.

Ины стихи́ры преподо́бныя Мела́ніи, гла́съ то́йже. Подо́бенъ: Зва́нный свы́ше.

Ангельскимъ лико́мъ сочта́вшаяся,* егда́ тя Боже́ственное раче́ніе распали́* и прелетѣ́ти повине́ ви́димыхъ* безстра́стія ра́ди и чистоты́,* тогда́ твоего́ супру́га* словесы́ улови́ла еси́ богопоко́рными,* нестоя́нную отлага́ющи* житія́ молву́ теку́щую.* Тѣ́мже съ ни́мъ, вѣ́чную обрѣ́тши* жи́знь и наслажде́ніе,* мо́лиши Влады́ку* спасти́ ду́ши на́ша.

Ангельское вожделѣ́вши житіе́,* егда́ сла́дкую пи́щу поплева́ла еси́,* воздержа́ніемъ упражня́ющися и бдѣ́ніемъ,* ни́зу лежа́ніемъ и чистото́ю,* тогда́ чистѣ́йшій сосу́дъ* была́ еси́ Ду́ха Боже́ственнаго,* дарова́ніи пресвѣ́тлыми укра́шена* Тому́, всечестна́я;* тѣ́мже къ ре́вности Его́ Боже́ственнѣй привлекла́ еси́ лю́ди* и привела́ еси́ Влады́цѣ, Мела́ніе,* и Спа́су ду́шъ на́шихъ.

Добро́тами добродѣ́телей украше́на,* егда́ спаси́тельное сло́во испо́лнила еси́,* расточи́вши, подала́ еси́* тмы́ твоего́ зла́та ни́щимъ и убо́гимъ,* тогда́ небе́сное бога́тство воспрія́ла еси́,* пра́вдою обогати́вшися во вѣ́къ,* и нетлѣ́ніемъ, и избавле́ніемъ.* Тѣ́мже чти́мъ твое́ успе́ніе* и прилѣ́жно мо́лимъ тя́:* моли́ Зижди́теля просвѣти́ти ду́ши на́ша.

Сла́ва, и ны́нѣ, пра́здника, гла́съ 1:

Сла́ва въ вы́шнихъ Бо́гу, въ Виѳлее́мѣ слы́шу отъ безпло́тныхъ дне́сь, на земли́ ми́ръ благоволи́вшему бы́ти. Ны́нѣ Дѣ́ва небе́съ ши́рши: возсія́ бо свѣ́тъ омраче́ннымъ и смире́нныя возвы́си, а́нгельски пою́щія: сла́ва въ вы́шнихъ Бо́гу.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Звѣзда́ отъ Іа́кова,* Христо́съ возсія́въ,* просвѣти́ язы́ки* свѣ́томъ богозна́нія,* Того́ славосло́вимъ.

Сти́хъ: Изъ чре́ва пре́жде денни́цы роди́хъ Тя́,* кля́тся Госпо́дь и не раска́ется.

Гра́де Дави́довъ,* Виѳлее́мѣ, весели́ся:* изъ тебе́ бо, Иже безма́терній,* безо́тчій воплоти́ся,* отъ Дѣ́вы Чи́стыя, Богоотрокови́цы.

Сти́хъ: Рече́ Госпо́дь Го́сподеви моему́:* сѣди́ одесну́ю Мене́.

Сло́во Отчее,* пло́ть пріе́мь, роди́ся,* пелена́ми пови́тся,* во я́слѣхъ возлеже́,* безслове́сія разрѣша́я мя́.

Сла́ва, и ны́нѣ, гла́съ 1:

По о́бразу и по подо́бію, истлѣ́вша преступле́ніемъ, ви́дѣвъ Іису́съ, приклони́въ небеса́, сни́де и всели́ся во утро́бу дѣ́вственную неизмѣ́нно, да въ не́й истлѣ́вшаго Ада́ма обнови́тъ, зову́ща: сла́ва явле́нію Твоему́, Изба́вителю мо́й и Бо́же.

Тропа́рь, гла́съ 4:

Рождество́ Твое́, Христе́ Бо́же нашъ, возсія́ мíрови свѣ́тъ ра́зума, въ не́мъ бо звѣзда́мъ служа́щіи звѣздо́ю уча́хуся Тебѣ́ кла́нятися, Со́лнцу Пра́вды, и Тебе́ вѣ́дѣти съ высоты́ Восто́ка. Го́споди, сла́ва Тебѣ́.


НА УТРЕНИ,
Тропа́рь пра́здника, три́жды.

По 1-й стихоло́гіи сѣда́ленъ, гла́съ 1. Подо́бенъ: Ка́мени запеча́тану.

Прему́дрость и ра́зумъ пре́жде вѣко́въ Сы́й, Сы́нъ, Единосу́щный Отцу́ и Ду́ху, восхотѣ́ въ послѣ́дняя времена́ роди́тися отъ Дѣ́вы на́съ ра́ди, да спасе́тъ мíръ отъ мучи́тельства вра́жія и чужда́го; сла́ва Рожде́нному пло́тію, сла́ва Благоизво́лившему, сла́ва Изба́вльшему на́съ Рождество́мъ Свои́мъ.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 8. Подо́бенъ: Повелѣ́нное.

Да ра́дуется не́бо, земля́ да весели́тся, я́ко роди́ся на земли́ Агнецъ Бо́жій, подая́й мíру избавле́ніе: Сло́во, Иже въ нѣ́дрѣхъ Сы́й Отца́, про́йде изъ Дѣ́вы безъ сѣ́мене. Его́же волсви́ дивля́хуся, зря́ще Бо́га во пло́ти, па́стыріе же взыва́ху: сла́ва вои́стинну еди́ному Бо́гу.

Сла́ва, и ны́нѣ, гла́съ то́йже. Подо́бенъ: Прему́дрости.

Нетлѣ́нная сла́ва и Боже́ственная, изъ ложе́снъ проше́лъ еси́ дѣ́вственныхъ и цѣ́лу соблю́лъ еси́ и Дѣ́ву ро́ждшую, и я́ко престо́лъ я́сли, въ ни́хже роди́вся, почи́лъ еси́ и красну́ пала́ту верте́пъ показа́лъ еси́; поя́ху Тя́ па́стыріе я́ко Царя́ всѣ́хъ, звѣзда́ же спутеше́ствова Боже́ственный Свѣ́тъ показа́ти волхво́мъ. Тѣ́мже вси́ вопіе́мъ Ти́: Влады́ко Христе́ Бо́же, прегрѣше́ній оставле́ніе низпосли́ пра́зднующимъ вѣ́рою Твое́ Боже́ственное Рождество́.

Кано́нъ пра́здника, со ирмосо́мъ на 6. Творе́ніе ки́ръ Іоа́нна. Гла́съ 1.
Пѣ́снь 1.

Ирмо́съ: Спасе́ лю́ди чудодѣ́йствуяй Влады́ка, мо́крую мо́ря волну́ оземлени́въ дре́вле; во́лею же ро́ждся отъ Дѣ́вы, стезю́ прохо́дну небесе́ полага́етъ на́мъ. Его́же, по Существу́ ра́вна же Отцу́ и человѣ́комъ, сла́вимъ.

Изнесе́ чре́во свяще́нное Сло́во, я́вѣ неопа́льно живопи́санное купино́ю, смѣше́на зра́комъ человѣ́чимъ Бо́га, Евы окая́нную утро́бу кля́твы дре́внія разрѣша́ющее го́рькія, Его́же, земни́и славимъ.

Показа́ звѣзда́ пре́жде со́лнца Сло́во, прише́дшее уста́вити грѣхи́, волхво́мъ я́вѣ во убо́зѣмъ верте́пѣ, ми́лостиваго Тебе́, пелена́ми пови́та, Его́же, ра́дующеся, ви́дяху Самого́ — и Человѣ́ка, и Го́спода.

И святы́хъ два́: Кано́нъ святы́я Ани́сіи. Творе́ніе Ѳеофа́ново. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Пою́щу свѣтоно́сную па́мять твою́, Свѣ́тъ мнѣ́ низпосли́, я́ко Отцу́ свѣ́товъ предстоя́щи въ ра́дости, всехва́льная, страсте́й мои́хъ бу́рю твои́ми моли́твами отгоня́щи.

Воздержа́ніемъ душе́вную обнови́ла еси́, богому́драя, ни́ву, муче́нія кла́съ плоди́вши Дѣ́лателю, соблю́дшему и крѣ́пость тебѣ́ вдохну́вшему, дѣ́во му́ченице досточу́дная.

Руцѣ́ твое́й, богатѣ́йше подаю́щей бога́тство тлѣ́нное, богатотво́рную пріобрѣла́ еси́ жи́знь, ника́може мимотеку́щую, и сокро́вище неистощи́мое, му́ченице, и сла́ву небе́сную.

Богоро́диченъ: Изъ Тебе́, Неискусобра́чная, дне́сь вся́ческихъ Творе́цъ пло́тски ражда́ется по на́мъ и пелена́ми повива́ется, повива́яй мо́ре мгло́ю, Ма́ти Приснодѣ́во.

Кано́нъ преподо́бныя Мела́ніи. Творе́ніе Ѳеофа́ново. Гла́съ то́йже.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Страсте́й омраче́ніемъ очернѣ́вша мя́ всю́ду, просвѣти́въ, очи́сти свѣтоно́сными моли́твами преподо́бныя Твоея́, Человѣколю́бче, Мела́ніи и, сію́ чту́щу, сло́во ми́ вдохни́.

Те́плѣ послѣ́довала еси́ тебе́ ра́ди во́льное распя́тіе Претерпѣ́вшему, на ра́мѣхъ нося́щи, всеблаже́нная, усе́рдно кре́стъ тво́й, и Сего́ сохрани́ла еси́ оправда́нія.

Роди́телей пристра́стія и пло́ти любосла́стія до конца́ уклони́лася еси́, еди́наго вожделѣ́вши рачи́теля — Христа́, богому́драя, добро́ты; Его́же вся́ жела́ютъ, Сло́ва причаща́ющіися.

Богоро́диченъ: Обнищава́етъ Бога́тый, мене́ обогаща́я Божество́мъ, злѣ́ обнища́вшаго невоздержа́ніемъ пе́рвѣе, и Безнача́льный се́ нача́ло пріе́млетъ, отъ Дѣ́вы ражда́емь Богоотрокови́цы.

Пѣ́снь 3.

Ирмо́съ: При́зри на пѣ́нія рабо́въ, Благодѣ́телю, врага́ смиря́я вознесе́нную горды́ню, нося́й же, Всеви́дче, грѣха́ превы́шше, непоколе́блемо утвержде́нныя, Бла́же, пѣвцы́ основа́ніемъ вѣ́ры.

Невѣ́сты Пречи́стыя пребога́тое Рождество́ ви́дѣти па́че ума́ сподо́бився, ликъ свиря́ющихъ преклоня́шеся стра́ннымъ о́бразомъ, чи́нъ же пою́щихъ безпло́тныхъ, Царя́ Христа́, безсѣ́менно вопло́щшагося.

Высото́ю ца́рствуяй небе́съ милосе́рдіемъ соверша́етъ о на́съ изъ безневѣ́стныя Отрокови́цы: невеще́ственъ Сы́й пре́жде, но по́слѣжде Сло́во, одебелѣ́вшо пло́тію, да па́дшаго къ Себѣ́ привлече́тъ первозда́ннаго.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Добро́ты твоея́ душе́вныя Творе́цъ тво́й вожделѣ́въ, невѣ́сту тя́, вои́стинну добру́ и непоро́чну, му́ченице, Себѣ́ обручи́лъ е́сть.

Стра́сти Безстра́стнаго, умертви́вшагося на́съ ра́ди, умерщвле́ніе, му́ченице честна́я, лю́бящи, му́ченическою умира́еши сме́ртію.

Яко заколе́ніе духо́вно, я́ко же́ртва чиста́ соверше́на Тебѣ́, Бо́гу, принесе́ся, я́же Тво́й Кре́стъ возлюби́вшая.

Богоро́диченъ: Село́ вмѣ́стно Невмѣсти́маго Содѣ́теля была́ еси́, Сего́ пло́тію вмѣсти́вши, Обра́дованная Пречи́стая.

Инъ.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Яже ни́жнихъ отсту́пльше жела́ній, все́ жела́ніе дала́ еси́ благоче́стно произволе́ніемъ, сла́вная, къ бу́дущимъ то́кмо и вѣ́чнующимъ.

Прилѣ́жными моли́твами чу́вствія украси́ла еси́ и Ду́ха заря́ми свѣтови́дна была́ еси́ вся́, въ тѣлеси́ невеще́ственное житіе́ подража́вши.

И вѣща́ющи, и молча́щи, яви́лася еси́ наказа́ніе, неутвержде́ныхъ утвержде́ніе, мона́шествующихъ о́бразъ, Мела́ніе богому́драя; тѣ́мже пое́мъ тя́.

Богоро́диченъ: Облага́яй небеса́ о́блаки хотѣ́ніемъ повива́ется во́лею, рука́ми Дѣ́вы держи́мь, руки́ мя исхища́я борца́.

Сѣда́ленъ Ани́сіи, гла́съ 4. Подо́бенъ: Вознесы́йся на Кре́стъ.

Надъ страстьми́ плотски́ми ца́рствующи, страстьми́ животво́рными воцари́лася еси́, отъ твоея́ кро́ве обагри́вши, честна́я, червлени́цу нетлѣ́нну благоче́стно, Ани́сіе; тѣ́мже Всецаря́ невѣ́ста непоро́чна яви́лася еси́. Но отъ бѣ́дъ изба́ви на́съ, соверша́ющихъ сла́вную па́мять твою́.

Сла́ва, Мела́ніи, гла́съ то́йже. Подо́бенъ: Ско́ро предвари́.

Боже́ственная повелѣ́нія соверша́ющи со тща́ніемъ, расточи́вши, раздала́ еси́ тмы́ зла́та твоего́ ни́щимъ: взе́мши же кре́стъ тво́й на ра́мена, Мела́ніе, вку́пѣ съ твои́мъ женихо́мъ послѣ́довала еси́ вѣ́рою Христу́, распе́ншемуся пло́тію, еди́ному Бо́гу на́шему.

И ны́нѣ, пра́здника, гла́съ то́йже:

Боже́ственнѣ весели́тся тва́рь вся́ ны́нѣ: Христо́съ бо Госпо́дь, Бо́жій Сы́нъ, отъ Дѣ́вы ражда́ется Чи́стыя, ве́сь человѣ́ческій ро́дъ обезсме́ртствуя, рѣша́ же кля́тву прама́тере Евы. Тѣ́мже я́ко Благодѣ́телю на́шему пѣ́ніе принесе́мъ.

Пѣ́снь 4.

Ирмо́съ: Ро́да человѣ́ча обновле́ніе дре́вле, поя́, проро́къ Авваку́мъ предвозвѣща́етъ, ви́дѣти неизрече́нно сподо́бився о́бразъ: млады́й Младе́нецъ бо изъ горы́ — Дѣ́вы изы́де люде́й во обновле́ніе, Сло́во.

Ра́венъ произы́де человѣ́комъ Вы́шній, во́лею пло́ть пріи́мъ отъ Дѣ́вы, я́дъ очи́стити змíевы главы́, приводя́ вся́ къ Свѣ́ту живоно́сному, Бо́гъ Сы́й, отъ вра́тъ безсо́лнечныхъ.

Язы́цы, и́же дре́вле тле́ю погруже́ни, па́губы зѣло́ вра́жія убѣжа́вше, возно́сятъ ру́ки съ похва́льными пѣ́сньми, еди́наго чту́ще Христа́, я́ко Благодѣ́теля, къ намъ ми́лостивно прише́дшаго.

Отъ ко́рене изра́стши Іессе́ева, Дѣ́во, уста́вы прешла́ еси́ человѣ́ческаго существа́, Отчее ро́ждши Превѣ́чное Сло́во, я́ко благоволи́ Са́мъ запеча́танную утро́бу проити́ истоща́ніемъ стра́ннымъ.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Живоно́снымъ твои́мъ стопа́мъ послѣ́дующи, копіе́мъ въ ре́бра уязвля́ется и обраща́емое неле́стно прохо́дитъ ору́жіе раба́ Твоя́, Влады́ко Христе́, воспѣва́ющи Тя́.

Муче́нія сія́ющи свѣтлостьми́ и нетлѣ́нія вѣнце́мъ увя́зшися, ра́дующися, предстои́ши Христу́, Жениху́ твоему́, му́ченице Ани́сіе всехва́льная.

Запе́ншаго ле́стію пе́рвую Еву, му́ченическими противле́ньми побѣ́ждши, низложи́ла еси́, показа́вши некрѣ́пка, Христу́ воспѣва́ющи: сла́ва си́лѣ Твое́й, Го́споди.

Богоро́диченъ: Иже невеще́ственная существа́ Созда́вый, тѣле́сно, я́ко Человѣ́къ, изъ Тебе́, Богома́ти, дне́сь ражда́ется, Тому́ воспои́мъ: сла́ва си́лѣ Твое́й, Го́споди.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Воздержа́ніемъ по́хоти плотскíя умертви́вши, жи́знь живу́щихъ имѣ́ла еси́, все́льшуюся въ тя́, всечестна́я; къ не́йже, отъ земли́ преста́вльшися, всели́лася еси́, Ца́рствія небе́снаго наслажда́ющися.

Мно́гія твоя́ тмы́ зла́та разда́вши а́лчущимъ, вои́стинну сія́ скрыва́еши въ сокро́вищахъ, никогда́же ветша́ющихъ, во вѣ́ки же соблюда́ющимъ тебѣ́ дово́льное пребыва́ніе.

Ми́лованія твоего́ бога́тство я́коже рѣка́ бы́сть, напая́ющи вся́кое ни́щихъ се́рдце, сла́вная, скве́рну отмыва́ющи нищеты́, бога́тство некра́домо исхода́тайствующи тебѣ́ на небесѣ́хъ неистощи́мое.

Богоро́диченъ: Похоте́мъ повину́вся страсте́й, я́коже безслове́сенъ, слове́сенъ сы́й, приложи́хся ското́мъ; но, Сло́во поро́ждшая Присносу́щное, не пре́зри мене́, всегда́ погиба́ющаго.

Пѣ́снь 5.

Ирмо́съ: Изъ но́щи дѣ́лъ омраче́нныя пре́лести очище́ніе на́мъ, Христе́, бо́дренно ны́нѣ соверша́ющимъ пѣ́снь, я́ко Благодѣ́телю, пріиди́, подава́яй удо́бну стезю́, по не́йже востека́юще, обря́щемъ сла́ву.

Лю́тую вражду́, ю́же къ намъ Влады́ка отсѣка́я па́ки плотски́мъ прише́ствіемъ, да держа́щаго разруши́тъ душетлѣ́ющаго, мíръ сочета́я съ невеще́ственными существы́, положи́въ присту́пна, Ро́ждшаго, тва́ри.

Лю́діе ви́дѣша, дре́вле омраче́нніи, по дне́хъ свѣ́тъ вы́шнія свѣ́тлости, язы́ки же Бо́гу наслѣ́діе Сы́нъ прино́ситъ, подая́ та́мо неизрече́нную благода́ть, идѣ́же мно́жайшій процвѣте́ грѣ́хъ.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Тя́, Го́споди, исто́чникъ спасе́нія вѣ́дящи, ча́шу спасе́нія несумнѣ́ннымъ се́рдцемъ му́ченица Твоя́ испи́.

Юница Христо́ва, богопрія́тное заколе́ніе, богопринесе́нная же́ртва, страстоно́сице Госпо́дня, моли́ спасти́ся на́мъ.

Свѣ́тъ была́ еси́, Свѣ́ту вели́кому яснѣ́е прибли́жившися, и просвѣща́еши свѣтоно́сную па́мять твою́ пра́зднующія.

Богоро́диченъ: Тя́ ору́жіе непобѣди́мое на враги́ предлага́емъ, Тя́ утвержде́ніе и наде́жду на́шего спасе́нія, Богоневѣ́сто, стяжа́хомъ.

Инъ.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Безобра́зныя ви́ды страсте́й до конца́ отъ души́ острога́вши, честна́я, ша́ромъ воздержа́нія живонаписа́ла еси́ въ не́й безстра́стіе и любо́вь нелицемѣ́рну.

Свѣ́тло, я́ко зерца́ло, бы́вши я́вѣ, свѣ́тлѣ дарова́нія Ду́ха Боже́ственнаго, сла́вная, воспрія́ла еси́ и вѣ́рныя просвѣти́ла еси́ свѣ́тлостію житія́ твоего́.

Воздержа́ніемъ погаси́вши страсте́й распале́ніе, о́гнь возжгла́ еси́ душе́вный, во все́мъ житіи́ твое́мъ блиста́ющися и омраче́нія де́монская отража́ющи.

Богоро́диченъ: Дѣ́ва роди́ Бо́га Емману́ила во гра́дѣ Виѳлее́мѣ, Еде́мъ отверза́ющаго, дре́вле ми́ заключе́нный невоздержа́ніемъ снѣ́ди и ле́стію змíя.

Пѣ́снь 6.

Ирмо́съ: Обита́я Іо́на въ преиспо́днихъ морски́хъ, пріити́ моля́шеся и бу́рю утоли́ти; унзе́нъ же а́зъ муча́щаго стрѣло́ю, Христу́ воспѣва́ю, зо́лъ губи́телю, ско́ро пріити́ Тебѣ́ къ мое́й лѣ́ности.

Иже бѣ́ испе́рва къ Бо́гу, Бо́гъ Сло́во ны́нѣ утвержда́етъ немощно́е дре́вле ви́дѣвъ сохрани́ти, е́же по на́мъ существо́, и́мже Себе́ вторы́мъ обще́ніемъ а́біе проявля́я страсте́й свобо́дное.

Гряде́тъ на́съ ра́ди изъ Авраа́млихъ чре́слъ темнопа́дшія во мра́цѣ прегрѣше́ній сы́ны воздви́гнути, до́лу пони́кшихъ, и́же во свѣ́тѣ обита́яй и я́слѣхъ чрезъ достоя́ніе, ны́нѣ благоволи́въ въ человѣ́ческое спасе́ніе.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Му́жескій въ же́нстѣмъ тѣлеси́ у́мъ воспріи́мши, къ боре́нію враго́въ безпло́тныхъ, му́ченице, изшла́ еси́ и ору́жіемъ терпѣ́нія ты́я умертви́ла еси́.

Кро́вными наводне́ніи мо́ре изсуши́ла еси́ зловѣ́рія, Христо́ву же честну́ю напои́ла еси́ Це́рковь, Ани́сіе страстоте́рпице, дѣ́въ похвало́.

Немо́кренно подвиго́въ прешла́ еси́ бу́рю непотопле́нно, тѣ́мже въ приста́нище невла́емо устреми́лася еси́ и и́стинныя наслажда́ешися тишины́, пресла́вная.

Богоро́диченъ: Созда́вый по о́бразу Своему́ человѣ́ка за мно́гое благоутро́біе назида́етъ того́, изъ Тебе́, Дѣ́во Богома́ти, ве́сь въ него́ обле́кся.

Инъ. Ирмо́съ то́йже.

Немо́кренно жите́йское прешла́ еси́ обурева́ніе, направля́ема манове́ніемъ вся́ сло́вомъ Сотво́ршаго, и въ приста́нище спасе́нія, Мела́ніе, дости́гла еси́.

Искрами те́плаго твоего́ е́же къ Го́споду раче́нія разжже́нныя стрѣ́лы грѣхо́вныя вся́ попали́шася, и де́монское злодѣ́йство до конца́ погубле́но бы́сть.

Умъ тво́й, къ лу́чшему едине́ніемъ обожа́емь, су́щія къ пло́ти любве́ отлучи́ся манове́ніемъ всеси́льнымъ; сего́ ра́ди поще́нія труды́ понесла́ еси́.

Богоро́диченъ: Обожа́етъ мя́ отъ Дѣ́вы рожде́йся Госпо́дь, и пелена́ми повива́ется, разрѣше́ніе творя́ мои́хъ прегрѣше́ній, и вмѣща́ется въ верте́пъ, Иже всѣ́ми невмѣсти́мый.

Конда́къ пра́здника, гла́съ 3. Подо́бенъ:

Дѣ́ва дне́сь Пресу́щественнаго ражда́етъ, и земля́ верте́пъ Непристу́пному прино́ситъ. Ангели съ па́стырьми славосло́вятъ, волсви́ же со звѣздо́ю путеше́ствуютъ: на́съ бо ра́ди роди́ся Oтроча́ Мла́до, Превѣ́чный Бо́гъ.

Икосъ:

Еде́мъ Виѳлее́мъ отве́рзе, пріиди́те, ви́димъ, пи́щу въ та́йнѣ обрѣто́хомъ; пріиди́те, пріи́мемъ су́щая ра́йская вну́трь верте́па: та́мо яви́ся ко́рень ненапое́нъ, прозяба́я отпуще́ніе, та́мо обрѣ́теся кла́дязь неиско́панъ, изъ него́же Дави́дъ пи́ти дре́вле возжада́ся. Та́мо Дѣ́ва ро́ждши Младе́нца, жа́жду уста́ви а́біе Ада́мову и Дави́дову. Сего́ ра́ди къ Нему́ и́демъ, гдѣ́ роди́ся Отроча́ Мла́до, Превѣ́чный Бо́гъ.

Пѣ́снь 7.

Ирмо́съ: Всецаря́ любо́вію уловле́нніи, о́троцы укори́ша безчи́сленно яря́щася мучи́теля злобо́жное языковре́діе, и́мже повину́ся о́гнь мно́гій, Влады́цѣ глаго́лющимъ: во вѣ́ки благослове́нъ еси́.

Слуги́ у́бо неи́стовно попаля́етъ, спаса́етъ же всепаля́щая со стра́хомъ ю́ныя, седмочи́сленнымъ разжже́ніемъ возвы́шена; и́хже вѣнча́ пла́мень, незави́стно Го́споду подаю́щу благоче́стія ра́ди ро́су.

Помо́щниче, Христе́, человѣ́комъ, проти́вное гада́ніе, воплоще́ніе неизглаго́ланное имѣ́яй, посрами́лъ еси́; бога́тство обоже́нія нося́й, вообра́жся ны́нѣ, Его́же ра́ди упова́ніемъ свы́ше въ преиспо́дній пріидо́хомъ мракъ.

Злѣ́ неудержа́нно возвыша́емый, нече́стно бѣся́щійся отъ развраще́нія мíра, низложи́лъ еси́ всемо́щнѣ грѣ́хъ, я́же привлече́ пре́жде, дне́сь же отъ сѣ́тей спаса́еши, вопло́щся во́лею, Благодѣ́телю.

Инъ.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Твою́ хра́мину душе́вную, му́ченице, мы́сленно водруже́нную исповѣ́даніемъ Христо́вымъ, мучи́тельныя поте́кше пото́ки ника́коже поколеба́ша, — Бо́же, — вопію́щую, — благослове́нъ еси́.

Пра́вды Со́лнца, Христа́, вѣ́дящи, му́ченице, не восхотѣ́ла еси́ злочести́внѣ пожре́ти со́лнцу, повелѣва́ющу мучи́телю, но пѣ́ла еси́: Бо́же, оте́цъ на́шихъ, благослове́нъ еси́.

Отъ твои́хъ крове́й свяще́нныхъ омочи́вши себѣ́ багряни́цу, побѣди́тельнымъ главу́, му́ченице, вѣнце́мъ вѣнча́ла еси́, и Бо́гу ны́нѣ предстои́ши, Царю́ Безсме́ртному, веселя́щися.

Богоро́диченъ: Пови́вый не́бо о́блаки, зе́млю же мгло́ю, отъ Твоего́ чре́ва ро́ждся, пелена́ми повива́ется и во я́слѣхъ полага́ется, Богома́ти Всенепоро́чная, спаса́я вѣ́дущія Тя́, Богоро́дицу.

Инъ. Ирмо́съ то́йже.

Съ супру́жникомъ Христо́во и́го нося́щи, богоно́сная, обнови́сте моли́твъ ра́ломъ ду́ши и, ни́ву до́брыхъ воздѣ́лавше, наслажда́етеся во вѣ́ки вы́шнія сла́вы.

Яко ма́слина, псало́мски въ дому́ Бо́жіи насажде́на, умаща́еши та́инственно сердца́, преподо́бная, и ли́ца еле́емъ болѣ́зней твои́хъ вѣ́рно восхваля́ющихъ твоя́ по́двиги.

Воздержа́нія ороше́ніемъ угаси́вши страсте́й пе́щи, одожде́ніемъ моли́твъ врачева́ній пучи́ны источи́ла еси́, и страсте́й приверже́нія потопля́ющи, Мела́ніе, чту́щихъ тя́.

Богоро́диченъ: Руно́ Тя, рече́ Дави́дъ, я́ко до́ждь пріе́мшу небе́сный, Чи́стая, беззако́нія пото́ки изсуша́ющь и вѣ́рныхъ напоя́ющь смы́слы, грѣхо́мъ пресо́хшія.

Пѣ́снь 8.

Ирмо́съ: Утро́бу неопа́льну образу́ютъ Отрокови́цы и́же въ ве́тсѣмъ опаля́еміи ю́ноши, преесте́ственно ражда́ющую запечатлѣ́нну. Обоя́ же, содѣва́ющи чудодѣ́йство еди́но, лю́ди къ пѣ́нію возставля́етъ благода́ть.

Па́губы убѣжа́вши, е́же обожи́тися пре́лестію, непреста́нно пое́тъ излія́вшагося Сло́ва ю́ношески вся́ съ тре́петомъ тва́рь, несла́вну хвалу́, боя́щися, прино́ситъ, тлѣ́нна су́щи, а́ще и му́дрѣ терпя́ше.

Гряде́ши, заблу́ждшее на па́жить обраща́я цвѣтотво́рную изъ пусты́нныхъ холмо́въ язы́ковъ воста́ніе, человѣ́ческое естество́, си́лу ну́жную человѣкоубíйцы угаси́ти, мужъ же яви́вся и Бо́гъ промышле́ніемъ.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Вдова́мъ, сирота́мъ же, и ни́щимъ, и всѣ́мъ тре́бующимъ бога́тство расточи́ла еси́, Вседержи́теля лю́бящи несомнѣ́нно повелѣ́нія, и муче́нія же честны́я и́щеши ча́ши, ю́же испи́вши, уста́вила еси́, дѣ́во честна́я, жела́нія.

Яко вѣ́но, принесла́ еси́ Христу́ по́стъ и сле́зы, страсте́й умерщвле́ніе и кро́ве проли́тіе, ре́бръ прободе́ніе: не обветша́ющій Са́мъ тѣ́мъ тебѣ́ вѣне́цъ и черто́гъ нетлѣ́ненъ подае́тъ и сла́ву небе́сную.

Живе́ши со а́нгелы во свѣ́тѣ, дѣ́въ съ чи́нми, и собо́ры му́ченикъ спра́зднующи, лице́ Жениха́ твоего́ къ лицу́ зря́щи, и свѣ́тлыя сла́вы причаща́ющися, и вопію́щи: благослови́те, вся́ дѣла́ Госпо́дня, Го́спода.

Богоро́диченъ: Се́ ны́нѣ оскудѣ́ я́вѣ отъ Іу́дова пле́мене кня́зь и во́ждь: Ты́ бо, Всенепоро́чная, родила́ еси́, я́же тому́ пре́жде отлежа́щая, жда́ніе язы́ковъ, Христа́. Ему́же пое́мъ: благослови́те, вся́ дѣла́ Госпо́дня, Го́спода.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Хра́мъ се́рдце и тѣ́ло Тро́ицѣ Пребоже́ственнѣй соверши́вши, Боже́ственныя возсоздала́ еси́ хра́мы, достосла́вная, въ ни́хже дѣ́въ чи́ны и мона́шествующихъ ли́ки совокупи́ла еси́, пою́щія согла́сно и превознося́щія Христа́ во вся́ вѣ́ки.

Ми́лостынею ми́лость стяжа́ла еси́, расточи́вши, дала́ еси́ убо́гимъ, пра́вда твоя́ пребыва́етъ, вѣ́чнующи, и е́же отъ сея́ пріобрѣ́теніе тебѣ́ неветша́емое, Мела́ніе, богоно́сице преподо́бная. Тѣ́мже тя́ чти́мъ, я́ко вои́стинну побѣдоно́сицу.

Смы́сломъ, му́жествомъ, цѣлому́дріемъ и боже́ственною пра́вдою блиста́ющи, имѣ́ла еси́ вознося́щее тя́ на высоту́ небе́сную высокотво́рное смире́ніе, и́мже низложи́ла еси́, преподо́бная, велича́ваго змíя: тѣ́мъ тя́ почита́емъ, я́ко и́стинную побѣдоно́сицу.

Богоро́диченъ: Страсте́й мя́ смуща́ютъ треволне́нія, глубина́ отча́янія потопля́етъ мя́, спаси́ мя, Всенепоро́чная Ма́ти, и спасу́ся: Спа́са бо Го́спода родила́ еси́, во я́слѣхъ я́ко Младе́нца положе́на, Его́же превозно́симъ во вся́ вѣ́ки.

Пѣ́снь 9.

Ирмо́съ: Люби́ти у́бо на́мъ, я́ко безбѣ́дное стра́хомъ удо́бѣе молча́ніе, любо́вію же, Дѣ́во, пѣ́сни тка́ти, спротяже́нно сложе́нныя, неудо́бно е́сть; но и, Ма́ти, си́лу, ели́ко е́сть произволе́ніе, да́ждь.

Образы несвѣ́тлы и сѣ́ни приведе́ны, о Ма́ти Чи́стая, ви́дѣвше Сло́ва, но́ва я́вльшагося отъ вра́тъ заключе́нныхъ, мня́щіи же и́стинную свѣ́тлость, досто́йно Твою́ благослови́мъ утро́бу.

Жела́ніе получи́вше и Бо́жія прише́ствія христокра́сніи лю́діе сподо́бльшеся, ны́нѣ утѣша́ются па́ки бытіе́мъ: я́ко живоно́сну благода́ть дае́ши, Дѣ́во Чи́стая, поклони́тися сла́вѣ.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ка́менію принося́щіи че́сти па́че Зижди́теля, зрѣ́ти тя́, сла́вная, не терпя́ще, Бо́гу возложену́, мече́мъ ссѣка́ютъ, сме́ртію боже́ственное безсме́ртіе тебѣ́ обруча́юще.

Ѳессалони́тскій гра́дъ твои́ми пелена́ми и страда́ньми, му́ченице, хва́лится, дѣ́во; Це́рковь же перворо́дныхъ съ пра́ведными и́мать тво́й ду́хъ боже́ственный, веселя́щійся.

Лива́нъ, зла́то же и сми́рну въ Виѳлее́мѣ Рожде́нному волсви́ принесо́ша вѣ́рою, страстоте́рпица же кро́вь муче́нія излія́ніе, о на́съ Того́ моля́щи.

Богоро́диченъ: Же́злъ прозябла́ еси́ изъ ко́рене Іессе́ева, Богороди́тельнице, цвѣ́тъ Божества́, Христа́, на́мъ ро́ждши, Всечи́стая, дне́сь, Его́же, я́ко Бо́га Невмѣсти́маго и ны́нѣ я́ко Младе́нца, пелена́ми повива́ема, велича́емъ.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

На высоту́ я́вѣ кра́йняго соверше́нства востекла́ еси́, блаже́нная, и пости́гла еси́ чи́ны безтѣле́сныхъ, ко и́стинному жела́нію прибли́жившися, исто́чникъ благи́хъ ны́нѣ прія́ла еси́; тѣ́мъ тя́ вси́ ублажа́емъ.

Съ ли́ки весели́шися по́стниковъ, воздержа́вшися и стра́сти умертви́вши, зри́ши открове́ннымъ лице́мъ Бо́жію красоту́, ю́же пре́жде явле́нія стяжа́ла еси́ цѣлому́дріемъ, Мела́ніе всеблаже́нная.

Ходи́вши стезе́ю тѣ́сною, простра́ннаго рая́ широты́ дости́гла еси́, идѣ́же ра́дость пра́зднующихъ, идѣ́же дре́во жи́зни е́сть, на́съ непреста́нно помина́ющи, чту́щихъ твое́ успе́ніе.

Богоро́диченъ: Иже на плеща́хъ херуви́мовъ стра́шно носи́мый, на руку́ ны́нѣ сѣди́тъ Отрокови́цы Чи́стыя, и пелена́ми повива́ется, разрѣша́я плени́цы зо́лъ на́шихъ, и млеко́мъ я́ко Младе́нецъ пита́ется, пита́яй вся́кое дыха́ніе.

Свѣти́ленъ пра́здника:

Посѣти́лъ ны́ е́сть свы́ше Спа́съ на́шъ, Восто́къ восто́ковъ, и су́щіи во тмѣ́ и сѣ́ни обрѣто́хомъ и́стину, и́бо отъ Дѣ́вы роди́ся Госпо́дь.

Сла́ва, и ны́нѣ, то́йже.

На стихо́внѣ стихи́ры, гласъ 6. Подо́бенъ: Ангельскія.

Се́ Агнецъ Бо́жій,* мíра взе́мляй грѣ́хъ я́ко Бо́гъ,* во я́слехъ возлежи́тъ я́ко Младе́нецъ,* слове́сныя хотя́ изба́вити* вся́кихъ страсте́й безслове́сія* и вѣ́чнаго томле́нія.* Къ Нему́же зове́мъ:* благослове́нъ рожде́йся,* Бо́же на́шъ, сла́ва Тебѣ́.

Сти́хъ: Изъ чре́ва пре́жде денни́цы роди́хъ Тя́,* кля́тся Госпо́дь и не раска́ется.

О, па́че ума́* и неизглаго́ланныхъ та́инствъ!* Ражда́ется Бо́гъ на земли́ за благоутро́біе,* ра́бій о́бразъ Себѣ́ Самому́ обложи́въ,* я́ко да отъ рабо́ты исхи́титъ чужда́го* вѣ́рою Тому́ зову́щія:* благослове́нъ рожде́йся,* Бо́же на́шъ, сла́ва Тебѣ́.

Сти́хъ: Рече́ Госпо́дь Го́сподеви моему́:* сѣди́ одесну́ю Мене́.

Ста́немъ благоговѣ́йно въ дому́ Госпо́дни,* съ восклица́ніи воспои́мъ согла́сно* Сего́ благоутро́біе* и мно́гое низхожде́ніе,* ка́ко въ Виѳлее́мѣ Іуде́йстѣмъ* Младе́нецъ изво́ли яви́тися?* И возопіи́мъ:* благослове́нъ рожде́йся, Бо́же на́шъ, сла́ва Тебѣ́.

Сла́ва, и ны́нѣ, подо́бенъ то́йже:

Со́лнце, Сы́не,* ка́ко Тя́ скры́ю пелена́ми?* Ка́ко Тя́ млеко́мъ воздою́,* всего́ естества́ Пита́теля?* Ка́ко Тя́ рука́ми держу́,* держа́щаго вся́ческая?* Ка́ко на Тебе́ безъ стра́ха воззрю́,* на Него́же не смѣ́ютъ зрѣ́ти многоочи́тіи? —* Неискусобра́чная, Христа́ держа́щи, вѣща́ше.


НА ЛИТУРГІИ,
Блаже́нна пра́здника, пѣ́снь 8-я на 6.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 298 об. – 300, 302 – 309 об.

/ Къ оглавленію раздѣла /


Наверхъ / Къ титульной страницѣ

0