Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 30-й де́нь.
Слу́жба святи́телю Мака́рію, митрополи́ту Моско́вскому и всея́ Руси́, чудотво́рцу.

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 8:] пра́здника [3] и свята́го [5].
[Стихи́ры пра́здника, гласъ 6. Подо́бенъ: Ангельскія.

О, па́че ума́* и неизглаго́ланныхъ та́инствъ!* Ражда́ется Бо́гъ на земли́ за благоутро́біе,* ра́бій о́бразъ Себѣ́ Самому́ обложи́въ,* я́ко да отъ рабо́ты исхи́титъ чужда́го* вѣ́рою Тому́ зову́щія:* благослове́нъ рожде́йся,* Бо́же на́шъ, сла́ва Тебѣ́.

Ста́немъ благоговѣ́йно въ дому́ Госпо́дни,* съ восклица́ніи воспои́мъ согла́сно* Сего́ благоутро́біе* и мно́гое низхожде́ніе,* ка́ко въ Виѳлее́мѣ Іуде́йстѣмъ* Младе́нецъ изво́ли яви́тися?* И возопіи́мъ:* благослове́нъ рожде́йся, Бо́же на́шъ, сла́ва Тебѣ́.]

[Стихи́ры свята́го Мака́рія], гла́съ 1. Подо́бенъ: Небе́сныхъ чино́въ.

Блаже́нства вои́стинну святы́хъ,* и́хже просла́вилъ еси́,* о́тче святи́телю Мака́ріе,* дости́глъ еси́ во Ца́рствіи небе́снѣмъ,* идѣ́же ны́нѣ ра́дуяся,* моли́ся о спасе́ніи ду́шъ на́шихъ. [Два́жды.]

Блаже́нства и ча́сти пра́ведныхъ,* съ ни́миже сочета́лся еси́,* о́тче святи́телю Мака́ріе,* вкуси́лъ еси́ во Ца́рствіи небе́снѣмъ,* идѣ́же ны́нѣ насыща́яся,* моли́ся о спасе́ніи ду́шъ на́шихъ.

Блаже́нства ева́нгельская,* и́хже на земли́ проповѣ́далъ еси́,* о́тче святи́телю Мака́ріе,* обрѣ́лъ еси́ вои́стинну на небеси́,* идѣ́же ны́нѣ мздо́ю веселя́ся,* моли́ся о спасе́ніи ду́шъ на́шихъ.

Блаже́нство тезоимени́тое,* его́же въ житіи́ возжелѣ́лъ еси́,* о́тче святи́телю Мака́ріе,* стяжа́лъ еси́ въ жи́зни вѣ́чнѣй,* идѣ́же ны́нѣ поко́яся,* моли́ся о спасе́ніи ду́шъ на́шихъ.

Сла́ва, гла́съ 8:

Блаже́нный миротво́рецъ въ странѣ́ Россíйстѣй бы́лъ еси́, о́тче святи́телю Мака́ріе, сего́ ра́ди сы́нъ Бо́жій досто́инъ еси́ нарещи́ся на небеси́, идѣ́же ны́нѣ во сла́вѣ пребыва́еши, моли́ся при́сно о спасе́ніи ду́шъ на́шихъ.

И ны́нѣ, пра́здника, [гласъ 1:

Сла́ва въ вы́шнихъ Бо́гу, въ Виѳлее́мѣ слы́шу отъ безпло́тныхъ дне́сь, на земли́ ми́ръ благоволи́вшему бы́ти. Ны́нѣ Дѣ́ва небе́съ ши́рши: возсія́ бо свѣ́тъ омраче́ннымъ и смире́нныя возвы́си, а́нгельски пою́щія: сла́ва въ вы́шнихъ Бо́гу.]

Вхо́дъ. Проки́менъ дне́. Чте́нія три́ святи́тельская.

[При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.]

На стихо́внѣ стихиры, гла́съ 2. Подо́бенъ: До́ме Евфра́ѳовъ.

До́ме Ду́ха Свята́го* и Ца́рствія наслѣ́дниче,* блаже́нства дости́глъ еси́,* свя́те Мака́ріе,* моли́ся о при́сно сла́вящихъ тя́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Блаже́нне и чу́дне,* му́жу жела́ній Госпо́днихъ* и за́повѣдей Его́ ревни́телю,* свя́те Мака́ріе,* моли́ся о при́сно воспѣва́ющихъ тя́.

Сти́хъ: Препоясу́яся ору́жіемъ твои́мъ, и наляцы́, и успѣва́й, и ца́рствуй* и́стины ра́ди, кро́тости и пра́вды.

Же́зле милосе́рдія,* па́лице благода́ти,* уго́дниче Христо́въ,* па́стырю и́стиненъ,* моли́ся о при́сно блажа́щихъ тя́.

Сла́ва, гла́съ и подо́бенъ то́йже:

Собо́ръ святы́хъ ру́сскихъ,* и́же тща́ніемъ твои́мъ, святи́телю, ди́вно просла́вленъ бы́сть,* съ весе́ліемъ вопіе́тъ ти́:* ра́дуйся, Мака́ріе,* блаже́нству тезоимени́тый.

И ны́нѣ, пра́здника, [гла́съ 1:

По о́бразу и по подо́бію, истлѣ́вша преступле́ніемъ, ви́дѣвъ Іису́съ, приклони́въ небеса́, сни́де и всели́ся во утро́бу дѣ́вственную неизмѣ́нно, да въ не́й истлѣ́вшаго Ада́ма обнови́тъ, зову́ща: сла́ва явле́нію Твоему́, Изба́вителю мо́й и Бо́же.]

Тропа́рь, гла́съ 4:

Яко вели́кимъ па́стыремъ единонра́вна и учи́телемъ вселе́нныя единомы́сленна, Бо́жія Прему́дрости служи́теля изря́дна, и́же блаже́нству тезоимени́ту, дне́сь, вѣ́рніи, вси́ воспои́мъ: Христа́ Бо́га моли́, святи́телю Мака́ріе, умири́ти мíръ и спасти́ ду́ши на́ша.

[Сла́ва, и ны́нѣ, пра́здника, гла́съ то́йже:

Рождество́ Твое́, Христе́ Бо́же нашъ, возсія́ мíрови свѣ́тъ ра́зума, въ не́мъ бо звѣзда́мъ служа́щіи звѣздо́ю уча́хуся Тебѣ́ кла́нятися, Со́лнцу Пра́вды, и Тебе́ вѣ́дѣти съ высоты́ Восто́ка. Го́споди, сла́ва Тебѣ́.]


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, свята́го. И ны́нѣ, пра́здника.

По 1-мъ стихосло́віи сѣда́ленъ [свята́го], гла́съ 4. Подо́бенъ: Вознесы́йся.

Дне́сь святи́теля Христо́ва Мака́рія пречестна́я па́мять свѣ́тло возсія́ на́мъ. Сія́ніемъ кни́жныхъ списа́ній просвѣти́лъ е́сть вѣ́рныхъ собо́ры, и ны́нѣ мо́литъ Христа́ Бо́га дарова́ти на́мъ и́стинное вѣ́дѣніе Его́ Боже́ственныхъ за́повѣдей. [Два́жды.]

Сла́ва, и ны́нѣ, пра́здника, [гла́съ 1. Подо́бенъ: Ка́мени запеча́тану.

Прему́дрость и ра́зумъ пре́жде вѣко́въ Сы́й, Сы́нъ, Единосу́щный Отцу́ и Ду́ху, восхотѣ́ въ послѣ́дняя времена́ роди́тися отъ Дѣ́вы на́съ ра́ди, да спасе́тъ мíръ отъ мучи́тельства вра́жія и чужда́го; сла́ва Рожде́нному пло́тію, сла́ва Благоизво́лившему, сла́ва Изба́вльшему на́съ Рождество́мъ Свои́мъ.

По 2-й стихоло́гіи сѣда́ленъ пра́здника, гла́съ 8. Подо́бенъ: Повелѣ́нное.

Да ра́дуется не́бо, земля́ да весели́тся, я́ко роди́ся на земли́ Агнецъ Бо́жій, подая́й мíру избавле́ніе: Сло́во, Иже въ нѣ́дрѣхъ Сы́й Отца́, про́йде изъ Дѣ́вы безъ сѣ́мене. Его́же волсви́ дивля́хуся, зря́ще Бо́га во пло́ти, па́стыріе же взыва́ху: сла́ва вои́стинну еди́ному Бо́гу.

Сла́ва, и ны́нѣ, гла́съ то́йже. Подо́бенъ: Прему́дрости.

Нетлѣ́нная сла́ва и Боже́ственная, изъ ложе́снъ проше́лъ еси́ дѣ́вственныхъ и цѣ́лу соблю́лъ еси́ и Дѣ́ву ро́ждшую, и я́ко престо́лъ я́сли, въ ни́хже роди́вся, почи́лъ еси́ и красну́ пала́ту верте́пъ показа́лъ еси́; поя́ху Тя́ па́стыріе я́ко Царя́ всѣ́хъ, звѣзда́ же спутеше́ствова Боже́ственный Свѣ́тъ показа́ти волхво́мъ. Тѣ́мже вси́ вопіе́мъ Ти́: Влады́ко Христе́ Бо́же, прегрѣше́ній оставле́ніе низпосли́ пра́зднующимъ вѣ́рою Твое́ Боже́ственное Рождество́.]

По поліеле́и сѣда́ленъ [свята́го], гла́съ 8. Подо́бенъ: Повелѣ́нное та́йно.

Яко со́лнце пресвѣ́тлое, возсія́лъ еси́ Ру́сстѣй земли́ добродѣ́тельми твои́ми и непоро́чнымъ житіе́мъ, отгоня́я страсте́й омраче́нія, о́тче святи́телю Христо́въ. Сего́ ра́ди вопіе́мъ ти́: ра́дуйся, блаже́нне Мака́ріе, похвало́ Це́ркве Христо́вы и вели́кій чудотво́рче. [Два́жды.]

Сла́ва, и ны́нѣ, богоро́диченъ:

Ты́ еси́ Бо́же́ственная сѣ́нь Сло́ва, еди́на Пречи́стая Богома́ти, чистото́ю а́нгелы превозше́дшая, очи́сти на́съ отъ грѣхо́въ и вся́кія скве́рны, Богоневѣ́стная.

Та́же степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе отъ Іоа́нна, зача́ло [35 отъ полу́].

По 50-мъ псалмѣ́ стихи́ра, гла́съ 6:

Егда́ въ нощи́ моля́шеся пречу́дный Мака́рій, тогда́ со тре́петомъ зря́ше видѣ́ніе стра́шное, и у́жасомъ одержи́мь, сле́зы источа́я, вопія́ше: о Го́споди, ка́ко мнѣ́ ви́дѣти сіе́? гряде́тъ нече́стіе, кро́ве проли́тіе и раздѣле́ніе земли́ Ру́сскія; но, о Іису́се, молю́ся прилѣ́жно, пощади́ и, а́ще не поми́луеши, не да́ждь мнѣ́ ви́дѣти сіе́.

Кано́нъ [пра́здника, со ирмосо́мъ на 6, творе́ніе ки́ръ Іоа́нна гла́съ 1.
Пѣ́снь 1.

Ирмо́съ: Спасе́ лю́ди чудодѣ́йствуяй Влады́ка, мо́крую мо́ря волну́ оземлени́въ дре́вле; во́лею же ро́ждся отъ Дѣ́вы, стезю́ прохо́дну небесе́ полага́етъ на́мъ. Его́же, по Существу́ ра́вна же Отцу́ и человѣ́комъ, сла́вимъ.

Изнесе́ чре́во свяще́нное Сло́во, я́вѣ неопа́льно живопи́санное купино́ю, смѣше́на зра́комъ человѣ́чимъ Бо́га, Евы окая́нную утро́бу кля́твы дре́внія разрѣша́ющее го́рькія, Его́же, земни́и славимъ.

Показа́ звѣзда́ пре́жде со́лнца Сло́во, прише́дшее уста́вити грѣхи́, волхво́мъ я́вѣ во убо́зѣмъ верте́пѣ, ми́лостиваго Тебе́, пелена́ми пови́та, Его́же, ра́дующеся, ви́дяху Самого́ — и Человѣ́ка, и Го́спода.

И кано́нъ] святи́теля [на 8], гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Вели́кій Царю́, Содѣ́телю всѣ́хъ, очи́сти благоутро́біемъ ду́шу мою́ и отжени́ страсте́й омраче́нія, да возвели́чу, Спа́се, уго́дника Твоего́, святи́теля Мака́рія.

Пра́вды Бо́жія взыску́я, измла́да Христу́ послѣ́дуя, оби́тели преподо́бнаго Пафну́тія дости́глъ еси́, свя́те Мака́ріе, идѣ́же мно́гая лѣ́та во уста́вѣ пребы́въ, житіе́ жесто́кое и благо́е вкуси́лъ еси́.

Лѣ́ствицею добродѣ́телей на небеса́ возше́лъ еси́, тѣ́мъ и Христо́съ тя́, святи́телю, еще́ на земли́ су́ща, въ мѣ́ру во́зраста приведе́ и оби́тели Можа́йскія наста́вника поста́ви.

Богоро́диченъ: Ни́во духо́вная, я́коже изъ бразды́ кла́съ, изнесла́ еси́ всю́ тва́рь Пита́ющаго вся́чески, Приснодѣ́во.

Катава́сія: Христо́съ ражда́ется...

Пѣ́снь 3.

[Ирмо́съ: При́зри на пѣ́нія рабо́въ, Благодѣ́телю, врага́ смиря́я вознесе́нную горды́ню, нося́й же, Всеви́дче, грѣха́ превы́шше, непоколе́блемо утвержде́нныя, Бла́же, пѣвцы́ основа́ніемъ вѣ́ры.

Невѣ́сты Пречи́стыя пребога́тое Рождество́ ви́дѣти па́че ума́ сподо́бився, ликъ свиря́ющихъ преклоня́шеся стра́ннымъ о́бразомъ, чи́нъ же пою́щихъ безпло́тныхъ, Царя́ Христа́, безсѣ́менно вопло́щшагося.

Высото́ю ца́рствуяй небе́съ милосе́рдіемъ соверша́етъ о на́съ изъ безневѣ́стныя Отрокови́цы: невеще́ственъ Сы́й пре́жде, но по́слѣжде Сло́во, одебелѣ́вшо пло́тію, да па́дшаго къ Себѣ́ привлече́тъ первозда́ннаго.

Инъ:]

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Еди́нымъ по́мысломъ къ Бо́гу устреми́вся, во оби́телехъ преподо́бныхъ Пафну́тія и Ѳерапо́нта пребы́лъ еси́ во вся́цѣмъ воздержа́ніи, отону́дуже ко святи́тельству Бо́гомъ призва́нъ бы́въ, Мака́ріе досточу́дне.

Святы́я Це́ркве Нова́града па́стырь и учи́тель бы́лъ еси́, хра́мы украша́я и духо́вною добро́тою лю́ди исполня́я, предѣ́лы Нова́града свѣ́томъ Христо́вы вѣ́ры просвѣща́я, блаже́нне о́тче Мака́ріе.

Писанія оте́ческая возлюби́лъ еси́, блаже́нне святи́телю, и це́рковь Прему́дрости Бо́жія свяще́нными лѣ́потами преукраси́лъ еси́, возвели́чивъ ю́ уче́ніемъ богогла́снымъ.

Богоро́диченъ: Ме́ртвости и тли́ изба́вися ро́дъ человѣ́чь, естество́мъ бо Жизнода́вца безсѣ́менно родила́ еси́, Дѣ́во Всенепоро́чная, во спасе́ніе восхваля́ющихъ Тя́ вѣ́рно.

Катава́сія: Пре́жде вѣ́къ...

[Конда́къ пра́здника, гла́съ 3. Подо́бенъ:

Дѣ́ва дне́сь Пресу́щественнаго ражда́етъ, и земля́ верте́пъ Непристу́пному прино́ситъ. Ангели съ па́стырьми славосло́вятъ, волсви́ же со звѣздо́ю путеше́ствуютъ: на́съ бо ра́ди роди́ся Oтроча́ Мла́до, Превѣ́чный Богъ.

Икосъ:

Еде́мъ Виѳлее́мъ отве́рзе, пріиди́те, ви́димъ, пи́щу въ та́йнѣ обрѣто́хомъ; пріиди́те, пріи́мемъ су́щая ра́йская вну́трь верте́па: та́мо яви́ся ко́рень ненапое́нъ, прозяба́я отпуще́ніе, та́мо обрѣ́теся кла́дязь неиско́панъ, изъ него́же Дави́дъ пи́ти дре́вле возжада́ся. Та́мо Дѣ́ва ро́ждши Младе́нца, жа́жду уста́ви а́біе Ада́мову и Дави́дову. Сего́ ра́ди къ Нему́ и́демъ, гдѣ́ роди́ся Отроча́ Мла́до, Превѣ́чный Богъ.]

Сѣда́ленъ, гла́съ 1:

Наста́вника и́ночествующихъ, Пафну́тія преподо́бнаго, блажи́тъ гра́дъ Бо́ровскъ, сла́витъ Можа́йскъ Ѳерапо́нта блаже́ннаго, Но́вградъ восхваля́етъ Алекса́ндра Сви́рскаго со Іо́ною святи́телемъ, славосло́витъ сла́внѣйшій гра́дъ Москва́ первопресто́льника Іо́ну со ины́ми чудотво́рцы, ты́ же отъ всѣ́хъ си́хъ вку́пѣ славосло́віе пріе́млеши, Мака́ріе чу́дне. [Два́жды.]

Сла́ва, и ны́нѣ:

Патріа́рхъ Іа́ковъ, я́сно прови́дѣвъ, Спа́се, вели́чія строе́нія Твоего́, вопія́ше ду́хомъ ко Іу́дѣ, глаго́ля та́йно: отъ лѣ́торасли возше́лъ еси́, сы́не мо́й, возвѣща́я Тя́ отъ Дѣ́вы Бо́га.

Пѣ́снь 4.

[Ирмо́съ: Ро́да человѣ́ча обновле́ніе дре́вле, поя́, проро́къ Авваку́мъ предвозвѣща́етъ, ви́дѣти неизрече́нно сподо́бився о́бразъ: млады́й Младе́нецъ бо изъ горы́ — Дѣ́вы изы́де люде́й во обновле́ніе, Сло́во.

Ра́венъ произы́де человѣ́комъ Вы́шній, во́лею пло́ть пріи́мъ отъ Дѣ́вы, я́дъ очи́стити змíевы главы́, приводя́ вся́ къ Свѣ́ту живоно́сному, Бо́гъ Сы́й, отъ вра́тъ безсо́лнечныхъ.

Язы́цы, и́же дре́вле тле́ю погруже́ни, па́губы зѣло́ вра́жія убѣжа́вше, возно́сятъ ру́ки съ похва́льными пѣ́сньми, еди́наго чту́ще Христа́, я́ко Благодѣ́теля, къ намъ ми́лостивно прише́дшаго.

Изъ ко́рене изра́стши Іессе́ева, Дѣ́во, уста́вы прешла́ еси́ человѣ́ческаго существа́, Отчее ро́ждши Превѣ́чное Сло́во, я́ко благоволи́ Са́мъ запеча́танную утро́бу проити́ истоща́ніемъ стра́ннымъ.

Инъ:]

Ирмо́съ: Любве́ ра́ди, Ще́дре, Твоего́ о́браза на Крестѣ́ Твое́мъ ста́лъ еси́, и раста́яшася язы́цы, Ты́ бо еси́, Человѣколю́бче, крѣ́пость моя́ и хвале́ніе.

Тро́ицу — Отца́, Сы́на и Свята́го Ду́ха, апостольски проповѣ́дати повелѣ́лъ еси́, непросвѣще́нную ло́пь и ины́я сѣ́верныя язы́ки ко Христу́ приве́лъ еси́, низверга́я бѣсо́вская тре́бища, и на́съ просвѣти́, святи́телю, свѣ́томъ и́стиннаго позна́нія.

Имя твое́, вели́кія добродѣ́тели ра́ди, всю́ду проповѣ́дано бы́сть, я́ко изъ са́мыя Святы́я Земли́, идѣ́же Госпо́дь на́шъ пло́тію ра́спятъ бы́сть, свя́ще́нныя да́ры прія́ти сподо́бился еси́, на́мъ же моли́, о́тче Мака́ріе, Небе́снаго Іерусали́ма дости́гнути.

Архипа́стырски труди́вся, Бо́жіимъ про́мысломъ прее́мникъ и наслѣ́дникъ Моско́вскихъ святи́телей бы́ти сподо́бился еси́, идѣ́же чу́дными добродѣ́тельми украси́лся еси́.

Богоро́диченъ: Ада́мъ свободи́ся, и Ева лику́етъ, и вопію́тъ ду́хомъ къ Тебѣ́, Богоро́дице: Тобо́ю изба́вихомся перворо́дныя кля́твы, я́вльшуся Христу́.

Катава́сія: Же́злъ изъ ко́рене Іессе́ова...

Пѣ́снь 5.

[Ирмо́съ: Изъ но́щи дѣ́лъ омраче́нныя пре́лести очище́ніе на́мъ, Христе́, бо́дренно ны́нѣ соверша́ющимъ пѣ́снь, я́ко Благодѣ́телю, пріиди́, подава́яй удо́бну стезю́, по не́йже востека́юще, обря́щемъ сла́ву.

Лю́тую вражду́, ю́же къ намъ Влады́ка отсѣка́я па́ки плотски́мъ прише́ствіемъ, да держа́щаго разруши́тъ душетлѣ́ющаго, мíръ сочета́я съ невеще́ственными существы́, положи́въ присту́пна, Ро́ждшаго, тва́ри.

Лю́діе ви́дѣша, дре́вле омраче́нніи, по дне́хъ свѣ́тъ вы́шнія свѣ́тлости, язы́ки же Бо́гу наслѣ́діе Сы́нъ прино́ситъ, подая́ та́мо неизрече́нную благода́ть, идѣ́же мно́жайшій процвѣте́ грѣ́хъ.

Инъ:]

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Моско́вскаго престо́ла украше́ніе ди́вное бы́лъ еси́, святи́телю, тѣ́мже и лю́діе вси́ чу́дна нареко́ша тя́, съ ни́миже и мы́ ны́нѣ пра́зднующе па́мять твою́, согла́сно тя́ велича́емъ.

Иже добро́тѣ церко́внѣй поревнова́въ, вели́кія и ди́вныя собо́ры созва́лъ еси́, и́миже но́вымъ чудотво́рцемъ земли́ Россíйскія пра́зднованіе утверди́ся, и та́ко Це́рковь Ру́сская просія́ по́двиги ча́дъ свои́хъ, я́коже пе́рлы драгоцѣ́нными.

Всея́ земли́ Ру́сскія благоче́стіе пости́глъ еси́, о́тче Мака́ріе, мучениколю́бче преизря́дне, я́ко пчела́, отовсю́ду духо́вное сокро́вище собра́въ, и я́ко же́ртву благопрія́тную на свѣ́щницѣ церко́внѣй возже́глъ еси́.

Богоро́диченъ: Руно́ ороше́нное, Дѣ́во, пла́мень грѣхо́въ мои́хъ угаси́, Купино́ неопали́мая, страсте́й мои́хъ те́рніе попали́, подаю́щи ми́ на водѣ́ упокое́нія жи́ти, и гее́нскаго мя́ огня́ свободи́.

Катава́сія: Бо́гъ сы́й ми́ра...

Пѣ́снь 6.

[Ирмо́съ: Обита́я Іо́на въ преиспо́днихъ морски́хъ, пріити́ моля́шеся и бу́рю утоли́ти; унзе́нъ же а́зъ муча́щаго стрѣло́ю, Христу́ воспѣва́ю, зо́лъ губи́телю, ско́ро пріити́ Тебѣ́ къ мое́й лѣ́ности.

Иже бѣ́ испе́рва къ Бо́гу, Бо́гъ Сло́во ны́нѣ утвержда́етъ немощно́е дре́вле ви́дѣвъ сохрани́ти, е́же по на́мъ существо́, и́мже Себе́ вторы́мъ обще́ніемъ а́біе проявля́я страсте́й свобо́дное.

Гряде́тъ на́съ ра́ди изъ Авраа́млихъ чре́слъ темнопа́дшія во мра́цѣ прегрѣше́ній сы́ны воздви́гнути, до́лу пони́кшихъ, и́же во свѣ́тѣ обита́яй и я́слѣхъ чрезъ достоя́ніе, ны́нѣ благоволи́въ въ человѣ́ческое спасе́ніе.

Инъ:]

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Си́мъ же о́бразомъ, я́ко святíи ди́вно просла́влени бы́ша, си́це ре́вностно потща́лся еси́, святи́телю, собесѣ́дникъ благочести́выхъ муже́й бы́ти, о́выхъ у́бо оби́тели стро́ити благослови́вый, о́вымъ потре́бная подава́я, ины́хъ же Христа́ проповѣ́дати посыла́я, блаже́ннаго же Васи́лія Моско́вскаго свои́ма рука́ма погребсти́ сподо́бивыйся, съ ни́миже моли́ спа́сти́ся душа́мъ на́шимъ.

Всѣмъ о́бразъ вѣ́ры и воздержа́нія яви́лся еси́, о ста́дѣ Христо́вѣ попече́ніе нелѣ́ностное имѣ́я, Моско́вскаго первопресто́льнаго гра́да и всея́ Россíйскія земли́ утвержде́ніе, Мака́ріе боголюби́ве, моли́ спа́сти́ся душа́мъ на́шимъ.

Тро́ицкія оби́тели настоя́теля высо́кимъ са́номъ почти́лъ еси́, поста́вивъ ю́ превы́шѣ всѣ́хъ, тѣ́мже любо́вь къ Се́ргію преподо́бному показу́я и гряду́щая святы́я оби́тели предначертава́я. Мы́ же, святи́телю, дивя́щеся твое́й прему́дрости, взыва́емъ: моли́ спа́сти́ся душа́мъ на́шимъ.

Богоро́диченъ: Лѣ́ствице небе́сная и Голуби́це неземна́я, вси́ ро́ди вѣ́рныхъ согла́сно Тя́ ублажа́ютъ, я́ко Богоневѣ́стную Ма́терь Христа́ Бо́га на́шего.

Катава́сія: Изъ утро́бы Іо́ну...

Конда́къ, гла́съ 3:

Богому́дрымъ уче́ніемъ и кни́жнымъ списа́ніемъ потща́лся еси́, святи́телю Мака́ріе, лю́ди россíйскія просвѣти́ти и святы́хъ земли́ на́шея просла́вити. Сего́ ра́ди чу́денъ пронарече́ся, прее́мниче первопресто́льниковъ россíйскихъ, моли́ сохрани́тися на́мъ въ вѣ́рѣ и благоче́стіи невреди́мо.

Икосъ:

Па́влову словеси́ поревнова́въ, святи́телю Мака́ріе, пѣ́сньми почти́лъ еси́ россíйскихъ па́стырей, учи́телей и наста́вниковъ, приснобдя́щихъ предъ престо́ломъ Небе́снаго Ца́ря́ о на́шемъ оте́чествѣ, съ ни́миже ра́дуяся ны́нѣ, моли́ Христа́ Бо́га сохрани́тися на́мъ въ вѣ́рѣ и благоче́стіи невреди́мо.

Пѣ́снь 7.

[Ирмо́съ: Всецаря́ любо́вію уловле́нніи, о́троцы укори́ша безчи́сленно яря́щася мучи́теля злобо́жное языковре́діе, и́мже повину́ся о́гнь мно́гій, Влады́цѣ глаго́лющимъ: во вѣ́ки благослове́нъ еси́.

Слуги́ у́бо неи́стовно попаля́етъ, спаса́етъ же всепаля́щая со стра́хомъ ю́ныя, седмочи́сленнымъ разжже́ніемъ возвы́шена; и́хже вѣнча́ пла́мень, незави́стно Го́споду подаю́щу благоче́стія ра́ди ро́су.

Помо́щниче, Христе́, человѣ́комъ, проти́вное гада́ніе, воплоще́ніе неизглаго́ланное имѣ́яй, посрами́лъ еси́; бога́тство обоже́нія нося́й, вообра́жся ны́нѣ, Его́же ра́ди упова́ніемъ свы́ше въ преиспо́дній пріидо́хомъ мракъ.

Злѣ́ неудержа́нно возвыша́емый, нече́стно бѣся́щійся отъ развраще́нія мíра, низложи́лъ еси́ всемо́щнѣ грѣ́хъ, я́же привлече́ пре́жде, дне́сь же отъ сѣ́тей спаса́еши, вопло́щся во́лею, Благодѣ́телю.

Инъ:]

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Вре́дная и пагубная ерети́ческихъ шата́ній собо́рнѣ осуди́лъ еси́, святи́телю Христо́въ, всѣ́хъ же правосла́вныхъ въ вѣ́рѣ въ Тро́ицу Единосу́щную укрѣпи́лъ еси́, предъ святы́ми ико́нами воспѣва́ющихъ: бла́гослове́нъ еси́ въ хра́мѣ сла́вы Твоея́, Го́споди.

Изнесе́ тя, святи́телю, земля́ Ру́сская побо́рника вѣ́ры и благоче́стія, ревни́теля оте́ческихъ преда́ній и утвержде́ній, да научи́ши на́съ взыва́ти: бла́гослове́нъ еси́ въ хра́мѣ сла́вы Твоея́, Го́споди.

Смире́нъ, кро́токъ и ми́лостивъ бы́лъ еси́, святи́телю, отроча́ нра́вомъ обрѣта́яся и соверше́нъ бы́въ ра́зумомъ. Мы́ же, дивя́щеся твои́мъ добродѣ́телемъ и по́двигомъ, взыва́емъ: бла́гослове́нъ еси́ въ хра́мѣ сла́вы Твоея́, Го́споди.

Богоро́диченъ: Яко еди́ну преесте́ственно па́че человѣ́ка благода́ть во Твою́ утро́бу пріе́мшую, безъ истлѣ́нія нетлѣ́нно ро́ждшую Христа́ Бо́га на́шего, при́сно Тя́ сла́вимъ.

Катава́сія: Отроцы, благоче́стію совоспита́ни...

Пѣ́снь 8.

[Ирмо́съ: Утро́бу неопа́льну образу́ютъ Отрокови́цы и́же въ ве́тсѣмъ опаля́еміи ю́ноши, преесте́ственно ражда́ющую запечатлѣ́нну. Обоя́ же, содѣва́ющи чудодѣ́йство еди́но, лю́ди къ пѣ́нію возставля́етъ благода́ть.

Па́губы убѣжа́вши, е́же обожи́тися пре́лестію, непреста́нно пое́тъ излія́вшагося Сло́ва ю́ношески вся́ съ тре́петомъ тва́рь, несла́вну хвалу́, боя́щися, прино́ситъ, тлѣ́нна су́щи, а́ще и му́дрѣ терпя́ше.

Гряде́ши, заблу́ждшее на па́жить обраща́я цвѣтотво́рную изъ пусты́нныхъ холмо́въ язы́ковъ воста́ніе, человѣ́ческое естество́, си́лу ну́жную человѣкоубíйцы угаси́ти, мужъ же яви́вся и Бо́гъ промышле́ніемъ.

Инъ:]

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Пѣ́ніе сіе́ на́ше ску́дное и похвале́ніе недосто́йное пріими́, чу́дне Мака́ріе, да не вотще́ взыва́емъ къ престо́лу Всевы́шняго: бла́гослови́те, вся дѣла́ Госпо́дня, Го́спода.

Вели́кая дѣя́нія твоя́ о прославле́ніи святы́хъ и просвѣще́ніи наро́да ру́сскаго подвиза́ютъ, досточу́дне Мака́ріе, на́съ немо́лчно пѣ́ти Бо́гу: бла́гослови́те, вся дѣла́ Госпо́дня, Го́спода.

Похвалу́ вели́кую Бо́гу возда́лъ еси́, всеблаже́нне, о просвѣще́ніи невѣ́рнаго гра́да Каза́ни, ему́же святи́теля Гу́рія поста́вилъ еси́, тѣ́мже ру́сстіи лю́діе о таковѣ́й Бо́жіей ми́лости ра́достію возопи́ша: бла́гослови́те, вся дѣла́ Госпо́дня, Го́спода.

Богоро́диченъ: Чу́дному благовѣ́щенію удиви́ся Пречи́стая Дѣ́ва, неискусому́жному рождеству́ Ея́ возра́довахуся па́стыріе, собо́ри вѣ́рныхъ дивя́тся успе́нію Ея́ сла́вному, вопію́ще: бла́гослови́те, вся дѣла́ Госпо́дня, Го́спода.

Катава́сія: Чу́да преесте́ственнаго...

Пѣ́снь 9.

[Ирмо́съ: Люби́ти у́бо на́мъ, я́ко безбѣ́дное стра́хомъ удо́бѣе молча́ніе, любо́вію же, Дѣ́во, пѣ́сни тка́ти, спротяже́нно сложе́нныя, неудо́бно е́сть; но и, Ма́ти, си́лу, ели́ко е́сть произволе́ніе, да́ждь.

Образы несвѣ́тлы и сѣ́ни приведе́ны, о Ма́ти Чи́стая, ви́дѣвше Сло́ва, но́ва я́вльшагося отъ вра́тъ заключе́нныхъ, мня́щіи же и́стинную свѣ́тлость, досто́йно Твою́ благослови́мъ утро́бу.

Жела́ніе получи́вше и Бо́жія прише́ствія христокра́сніи лю́діе сподо́бльшеся, ны́нѣ утѣша́ются па́ки бытіе́мъ: я́ко живоно́сну благода́ть дае́ши, Дѣ́во Чи́стая, поклони́тися сла́вѣ.

Инъ:]

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Мака́рія Вели́каго и́мя носи́лъ еси́, его́ житію́ послѣ́дуя въ постѣ́ и по́двизѣхъ, воздержа́ніи и кро́тости, тѣ́мъ тя́, святи́телю, велича́емъ.

Ри́зами погреба́льными одѣ́яну и на сме́ртнемъ одрѣ́ ти лежа́щу, собо́ръ наро́да мно́жества, ви́дѣвше тя́ не я́ко ме́ртва, но спя́ща, ли́къ же тво́й, я́ко свѣ́томъ, сія́ющь, удиви́шася и сла́ву возда́ша Всеси́льному Бо́гу, прославля́ющему уго́дники Своя.

Богоро́диченъ: Юже иногда́ Іа́ковъ ви́дѣ, чу́дную лѣ́ствицу, отъ земли́ просте́рту къ небе́снѣй высотѣ́, исповѣ́даемъ Тя́, Пречи́стая Богоро́дице: Тобо́ю бо земна́я и небе́сная о́бщницы яви́шася.

Катава́сія: Та́инство стра́нное...

Свѣти́ленъ:

Свѣ́томъ благода́ти просвѣще́нъ бы́лъ еси́, святи́телю Мака́ріе, россíйскихъ уго́дниковъ и моли́твенниковъ на́шихъ пѣ́сньми свѣ́тло просла́вилъ еси́, съ ни́миже во свѣ́тлостехъ святы́хъ веселя́ся ны́нѣ, моли́ Христа́ Бо́га спасти́ся душа́мъ на́шимъ. [Два́жды.]

Сла́ва, и ны́нѣ, пра́здника:

[Посѣти́лъ ны́ е́сть свы́ше Спа́съ на́шъ, Восто́къ восто́ковъ, и су́щіи во тмѣ́ и сѣ́ни обрѣто́хомъ и́стину, и́бо отъ Дѣ́вы роди́ся Госпо́дь.]

На хвали́техъ стихиры [на 4], гла́съ 6. Подо́бенъ: Тридне́венъ.

Блаже́нъ и ми́лостивъ* архіере́й яви́лся еси́,* о́тче святи́телю Мака́ріе,* предста́лъ еси́ поми́лованъ престо́лу Бо́жію,* идѣ́же со всѣ́ми святы́ми* Бо́га въ Тро́ицѣ восхваля́еши.

Блаже́нъ и кро́токъ* па́стырь ове́цъ духо́вныхъ бы́лъ еси́,* о́тче святи́телю Мака́ріе,* наслѣ́довалъ еси́ па́жити вѣчныя,* идѣ́же со святы́ми земли́ на́шея* Го́спода си́лъ прославля́еши.

Блаже́нъ и чи́стъ се́рдцемъ,* и́мже Бо́га узрѣ́лъ еси́,* о́тче святи́телю Мака́ріе,* сподо́бился еси́ красоты́ ра́йскія,* идѣ́же съ ли́ки а́нгельскими* Отца́ свѣ́товъ сла́виши.

Блаже́нства зрѣ́лый кла́съ,* его́же нището́ю ду́ха возрасти́лъ еси́,* о́тче святи́телю Мака́ріе,* пожа́лъ еси́ во Ца́рствіи небе́снѣмъ,* къ сему́ же бога́тству нетлѣ́нному* и на́съ, земноро́дныхъ, призыва́еши.

Сла́ва, гла́съ 2:

Па́стырю до́брый, святи́телю Христо́въ Мака́ріе чу́дный, бла́гоче́стія сто́лпъ бы́лъ еси́, мно́гими добродѣ́тельми украси́вся: собесѣ́дниче святы́хъ муже́й, кни́жниче прему́дрый, иконопи́сче наро́читый, просвѣти́телю изря́дный, ересе́й искорени́телю, моли́твенниче нелѣ́ностный, моли́ спа́сти́ся душа́мъ на́шимъ.

И ны́нѣ, пра́здника, [гласъ 6. Подо́бенъ: Ангельскія.]

Со́лнце, Сы́не, ка́ко Тя́ скры́ю пелена́ми? Ка́ко Тя́ млеко́мъ воздою́, всего́ естества́ Пита́теля? Ка́ко Тя́ рука́ми держу́, держа́щаго вся́ческая? Ка́ко на Тебе́ безъ стра́ха воззрю́, на Него́же не смѣ́ютъ зрѣ́ти многоочи́тіи? — Неискусобра́чная, Христа́ держа́щи, вѣща́ше.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Слу́жба пра́здника и святи́теля: [Блаже́нна пра́здника пѣ́снь 8-я, на 4, и святи́теля пѣ́снь 6-я, на 4. Проки́менъ, пра́здника, гла́съ 8: Вся́ земля́ да покло́нится Тебѣ́, и пое́тъ Тебѣ́, да пое́тъ же и́мени Твоему́, Вы́шній. Сти́хъ: Воскли́кните Го́сподеви вся́ земля́, по́йте же и́мени Его́, дади́те сла́ву хвалѣ́ Его́. И святи́теля, гла́съ 1: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ. Апо́столъ, святи́теля, ко Евре́омъ, зача́ло 318. Аллилу́ія, пра́здника, гла́съ 1: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Сти́хъ: Де́нь дни́ отрыга́етъ глаго́лъ, и но́щь но́щи возвѣща́етъ ра́зумъ. И святи́теля, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Ева́нгеліе Іоа́нна, зача́ло 36. Прича́стенъ пра́здника: Избавле́ніе посла́ Госпо́дь лю́демъ Свои́мъ. И святи́теля: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Святитель Макарій, митрополитъ Московскій. Служба, акаѳистъ и житіе. — М.: Издательство Московскаго подворья Свято-Троицкой Сергіевой Лавры, 2000. — С. 3-13.

/ Къ оглавленію раздѣла /


Наверхъ / Къ титульной страницѣ

0