Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 29-й де́нь.
Святы́хъ младе́нецъ четырена́десяти ты́сящь, Христа́ ра́ди избіе́нныхъ отъ Ирода въ Виѳлее́мѣ Іуде́йстѣмъ.
И преподо́бнаго отца́ на́шего Марке́лла, игу́мена оби́тели Неусыпа́емыхъ.

[ВЕЧЕРЪ,]
На Го́споди воззва́хъ: стихи́ры святы́хъ, гла́съ 4. Подо́бенъ: Яко до́бля.

Сокро́вища сокрове́ннаго* искíй, пребеззако́нный* незло́бивыя закла́ о́троки дне́сь,* и Рахи́ль неутѣ́шна бя́ше,* непра́ведно зря́щи заколе́ніе* и безвре́менную сме́рть* и́хже, пла́каше, боля́щи утро́бою,* но сія́ весели́тся,* въ нѣ́дрѣхъ Авраа́мовыхъ ны́нѣ ви́дящи.

Царя́ Безлѣ́тнаго,* подъ лѣ́томъ бы́вша,* ца́рь пребеззако́нный взыска́* и, не обрѣ́тъ уби́ти Его́,* младе́нцевъ пожа́тъ неискусозло́бное мно́жество,* я́же содѣ́ла му́ченики,* я́ко не мня́ше,* и гра́жданы вы́шняго Ца́рствія,* того́ во вѣ́ки пребезу́міе облича́ющія.

Отъ Дѣ́вы ро́ждшуся Тебѣ́,* Превѣ́чный Го́споди,* и за бла́гость младе́нствовавшу,* ли́къ младе́нцевъ приведе́ся* му́ченическою кро́вію,* нему́тну ду́шу просвѣти́въ пра́веднѣйше,* я́же всели́лъ еси́ во оби́тели присноживо́тныя,* Иродову облича́ющи зло́бу* и суро́вѣйшее пребезу́міе.

Преподо́бнаго стихи́ры, гла́съ и подо́бенъ то́йже:

Воздержа́нія о́бразъ* показа́лся еси́ мона́шествующимъ,* богоно́се Марке́лле,* воздержа́ніемъ сто́лпъ о́гненный,* взима́яся Ду́хомъ, прему́дре, отъ земли́ на небеса́,* и чистоты́ собесѣ́дникъ,* безмо́лвія же и́стинный и́стинно храни́тель* и му́жества сто́лпъ одушевле́нъ,* пра́вило же къ добродѣ́тели извѣ́стнѣйшее.

Страсте́й взыгра́нія* увяди́лъ еси́, преподо́бне,* бдѣ́ніемъ крѣ́пкимъ, и поуче́ніемъ Писа́ній,* и моли́твою прилѣ́жною,* и сле́зъ точе́ніемъ.* Тѣ́мже вои́стинну яви́лся еси́* Влады́цѣ досто́йное жили́ще* и исцѣле́нія вѣ́рою приходя́щимъ ты́ подае́ши,* безсме́ртнаго сподобля́яся наслажде́нія.

Наслажда́яся яснѣ́йше* добро́ты Влады́ки Твоего́,* зерца́ломъ разрѣ́шшимся,* всеблаже́нне, плотски́мъ* и явле́ніемъ, су́щимъ здѣ́,* моли́ о чи́стѣ хва́лящихъ* па́мять твою́ всесвяще́нную* и псалмы́ же и пѣ́сньми почита́ющихъ,* я́ко да улучи́мъ ми́лость въ де́нь Су́дный.

Сла́ва, младе́нцевъ, гла́съ 8. Андре́я Кри́тскаго:

Иродъ пребеззако́нный, ви́дя звѣзду́, па́че всея́ тва́ри свѣтлѣ́йшую, смуща́шеся и млекопита́емыя младе́нцы изъ объя́тій ма́тернихъ восхища́ше. Елисаве́тъ же, взе́мши Іоа́нна, ка́мень моля́ше, глаго́лющи: пріими́ ма́терь съ ча́домъ. Гора́ прія́тъ Предте́чу. Ясли же храня́ху сокро́вище, Его́же звѣзда́ возвѣсти́, и волсви́ поклони́шася: Го́споди, сла́ва Тебѣ́.

И ны́нѣ, гла́съ то́йже:

Пресла́вное та́инство устроя́ется дне́сь, обновля́ется естество́, и Бо́гъ Человѣ́къ быва́етъ, е́же бѣ́, пребы́сть, и е́же не бѣ́, прія́тъ, ни смѣше́нія претерпѣ́въ, ниже́ раздѣле́нія.

На стихо́внѣ стихи́ры пра́здника, гла́съ 6. Подо́бенъ: Тридне́венъ.

Та́инство ужа́сное зрю́: Бо́гъ бо, Иже го́рстію содержа́й всю́ тва́рь, объе́млется пло́тію въ я́слѣхъ безслове́сныхъ и ру́бищи повива́ется, повива́яй мгло́ю мо́ре.

Сти́хъ: Изъ чре́ва пре́жде денни́цы роди́хъ Тя́, кля́тся Госпо́дь и не раска́ется.

Безпло́тный воплоща́ется Бо́гъ, и начина́ется Безнача́льный, и По́лный ны́нѣ истощева́ется въ ма́ломъ верте́пѣ отъ Дѣ́вы, и Младе́нецъ млеко́мъ пита́ется, препитова́я вся́кое дыха́ніе.

Сти́хъ: Рече́ Госпо́дь Го́сподеви моему́: сѣди́ одесну́ю Мене́.

Игра́ютъ въ Рождествѣ́ Христо́вѣ па́стыріе и сла́вятъ со а́нгелы, и звѣзда́ дароно́ситъ, и волсви́ покланя́ются, и человѣ́цы, спасе́ни бы́вше, Богоро́дицу велича́ютъ.

Сла́ва, младе́нцевъ, гла́съ 8. Андре́я Кри́тскаго:

Іису́су ро́ждшуся въ Виѳлее́мѣ Іуде́йстѣмъ, Іуде́йская держа́ва упраздни́ся. Да игра́ютъ младе́нцы, за Христа́ закала́еміи, Іуде́я да рыда́етъ: гла́съ бо слы́шанъ бы́сть въ Ра́мѣ, Рахи́ль, пла́чущи, рыда́етъ, я́коже пи́шетъ, по ча́дѣхъ свои́хъ; младе́нцы бо изби́въ, Иродъ пребеззако́нный исполня́ше Писа́ніе, Іуде́ю насыща́я непови́нныя кро́ве; и земля́ у́бо червленя́шеся кровьми́ младе́нцевъ, отъ язы́къ же Це́рковь та́инственнѣ очища́ется и въ красоту́ одѣя́ется. Пріи́де Истина, Бо́гъ яви́ся въ сѣ́ни сѣдя́щимъ, отъ Дѣ́вы роди́выйся, во е́же спасти́ на́съ.

И ны́нѣ, гла́съ то́йже. Іоа́нна мона́ха:

Го́споди, въ Виѳлее́мъ прише́дъ, въ верте́пъ всели́лся еси́, не́бо престо́лъ имѣ́я, во я́слѣхъ восклони́лся еси́, Его́же во́инства окружа́ютъ а́нгелъ, па́стыремъ снизше́лъ еси́, да спасе́ши, я́ко благоутро́бенъ, ро́дъ на́шъ, сла́ва Тебѣ́.

Тропа́рь святы́мъ, гла́съ 1:

Болѣ́зньми святы́хъ, и́миже о Тебѣ́ пострада́ша, умоле́нъ бу́ди, Го́споди, и вся́ на́ша болѣ́зни исцѣли́, Человѣколю́бче, мо́лимся.

Сла́ва, преподо́бному, гла́съ 8:

Въ тебѣ́, о́тче, извѣ́стно спасе́ся е́же по о́бразу: пріи́мъ бо кре́стъ, послѣ́довалъ еси́ Христу́ и, дѣ́я, учи́лъ еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй. Тѣ́мже и со а́нгелы сра́дуется, преподо́бне Марке́лле, ду́хъ тво́й.

И ны́нѣ, пра́здника, гла́съ 4:

Рождество́ Твое́, Христе́ Бо́же нашъ, возсія́ мíрови свѣ́тъ ра́зума, въ не́мъ бо звѣзда́мъ служа́щіи звѣздо́ю уча́хуся Тебѣ́ кла́нятися, Со́лнцу Пра́вды, и Тебе́ вѣ́дѣти съ высоты́ Восто́ка. Го́споди, сла́ва Тебѣ́.


НА УТРЕНИ,
На Бо́гъ Госпо́дь: Тропа́рь пра́здника, еди́ножды. И младе́нцевъ, еди́ножды. Сла́ва, преподо́бнаго. И ны́нѣ, пра́здника.

По 1-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

Звѣзды́ сія́ніемъ озари́вшеся, отъ Перси́ды волсви́ пріидо́ша въ верте́пъ Виѳлее́мскій, да́ры изря́дны рожде́нному Царю́ отъ Дѣ́вы и Ма́тере прине́сше благода́рно, отъ язы́ковъ наставля́еми въ поклоне́ніе Тому́.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 8. Подо́бенъ: Воскре́се изъ ме́ртвыхъ.

Свирѣ́лей па́стырскихъ уставля́я пѣ́снь, во́инство а́нгельское возглаша́етъ, глаго́ля: хвалу́ воспо́йте боже́ственную, овца́ми владу́щіи, возопíйте, пою́ще: я́ко роди́ся Христо́съ Госпо́дь, благоволи́вый спасти́ я́ко Бо́гъ ро́дъ человѣ́ческій.

Сла́ва, и ны́нѣ, подо́бенъ то́йже:

Пресла́вно, вѣ́рніи, та́инство сіе́, Бо́гъ отъ Дѣ́вы роди́ся, я́коже вѣ́сть. Чи́ни а́нгельстіи, уди́вльшеся снизхожде́нію Его́, зову́тъ, воспѣва́юще: я́ко роди́ся Христо́съ Госпо́дь, благоволи́вый спасти́ я́ко Бо́гъ ро́дъ человѣ́ческій.

Кано́нъ пра́здника на 6 и святы́мъ два́ кано́на на 8.

Кано́нъ ки́ръ Космы́, гла́съ 1.
Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Истлѣ́вша преступле́ніемъ, по Бо́жію о́бразу бы́вшаго, всего́ тлѣ́нія су́ща, лу́чшія отпа́дша боже́ственныя жи́зни, па́ки обновля́етъ му́дрый Содѣ́тель, я́ко просла́вися.

Ви́дѣвъ Зижди́тель ги́блема человѣ́ка, рука́ми его́же созда́, приклони́въ небеса́, схо́дитъ; Сего́ же отъ Дѣ́вы боже́ственныя Чи́стыя всего́ осуществу́етъ, вои́стинну вопло́щся, я́ко просла́вися.

Му́дрость, Сло́во и Си́ла, Сы́нъ Сы́й Отчій и Сія́ніе, Христо́съ Бо́гъ, си́лъ утаи́вся, ели́ко премíрныхъ и ели́ко на земли́, и, вочеловѣ́чся, обнови́лъ есть насъ, я́ко просла́вися.

Кано́нъ святы́хъ младе́нцевъ на 4, гла́съ 4.
Пѣ́снь 1.

Ирмо́съ: Предѣли́въ пучи́ну чермну́ю Бо́гъ, фарао́на погрузи́вый въ не́й, прове́дъ Моисе́я немо́кренно въ пусты́ню и одожди́въ ма́нну въ снѣ́дь лю́демъ Изра́илевымъ, я́ко си́ленъ.

Звѣзда́ возсія́ въ Виѳлее́мѣ и Еде́ма отъ мра́чныя разрѣши́ кля́твы, и спасе́нія де́нь да́руется родонача́льникомъ, изъ дѣ́вственна о́блака просія́вый Іису́съ, су́щихъ во тмѣ́ просвѣще́ніе.

Три́знище дне́сь младе́нцевъ отве́рзеся вѣ́рнымъ за Христа́ и Бо́га, враго́въ облича́я нача́ла и вла́сти и Иродовъ облича́я му́жески младоу́мный гнѣ́въ смы́сленно.

Богоро́диченъ: Боже́ственное утвержде́ніе и стѣна́ неруши́ма, Чи́стая, и мы́сленный мо́стъ при́сно, и необори́мь сто́лпъ, и основа́ніе, и покро́въ, его́же ра́ди спаса́емся вси́ отъ бѣ́дъ — Ты́ еси́ вои́стинну.

Кано́нъ преподо́бнаго, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Обновля́ется тва́рь, и земны́хъ естество́ новотвори́тся пло́тію Творца́ всѣ́хъ, па́че ума́ Христа́ ражда́ема изъ Чи́стыя и Пресвяты́я Ма́тере.

Ра́зумъ пріе́мъ, о́тче, отъ Бо́га и́стины, и непреста́нно взыска́въ Его́ житіе́мъ, Марке́лле, чи́стымъ, и боже́ственными добродѣ́тельми угоди́лъ еси́.

Богоро́диченъ: Земля́ оте́ческія кля́твы, я́же во Еде́мѣ, избавле́ніе прія́тъ: на не́й Изба́вителю ро́ждшуся, Чи́стая, изъ Тебе́, и обно́вльшую, и освяти́вшу.

Пѣ́снь 3.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Иже дохнове́нія прича́щся лу́чшаго Ада́мъ пе́рстный и къ тлѣ́нію попо́лзся же́нскою ле́стію, Христа́ отъ Жены́ ви́дя, вопіе́тъ: Иже мене́ ра́ди по мнѣ́ бы́въ, Свя́тъ еси́, Го́споди.

Сообра́зенъ бре́нному умале́нію растворе́ніемъ, Христе́, бы́въ и прича́стіемъ пло́ти го́ршія, пода́въ Боже́ственнаго естества́, зе́мленъ бы́въ, и пребы́въ Богъ, и возвы́сивый ро́гъ на́шъ, Свя́тъ еси́, Го́споди.

Виѳлее́ме, весели́ся, князе́й Іу́довыхъ Сы́й Ца́рь: Изра́иля бо пасы́й на ра́мѣхъ херуви́мскихъ, изъ тебе́ про́йде Христо́съ я́вѣ и вознесы́й ро́гъ на́шъ надъ всѣ́ми воцари́ся.

Инъ:

Ирмо́съ: Утвержда́яй гро́мъ и созида́яй ду́хъ, утверди́ мене́, Го́споди, да Тя́ пою́ и́стинно и творю́ во́лю Твою́, я́ко нѣ́сть свя́тъ, я́ко Ты́, Бо́же на́шъ.

Дѣ́вственною две́рію проше́дъ, Содѣ́тель и Бо́гъ на́шъ пло́тскій до́мъ Себѣ́ созда́ неизглаго́ланно, и Младе́нецъ бы́сть, и во я́слѣхъ восклони́ся.

Све́рстницы, дѣ́ти — страда́льцы Христо́ва воплоще́нія, Иродово неразу́мное ослѣпи́ша неи́стовство и о́чи всесвѣ́тліи Це́ркве яви́шася.

Богоро́диченъ: Изъ Тебе́ безо́тчій яви́ся, безма́теренъ пре́жде вѣко́въ Госпо́дь, и зи́ждется преесте́ственно, и назда́ніе да́руетъ су́щимъ изъ Ада́ма обоже́нія, Дѣ́во Неискусобра́чная.

Инъ:

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Облацы, ка́плите на зе́млю сла́дость весе́лія: изъ о́блака бо свѣ́тла возсія́ Христо́съ, въ верте́пѣ пло́тски па́че вся́кія мы́сли ражда́емь.

Тве́рдостію души́ на враги́ мы́сленныя вооружи́вся, богоно́се, посѣ́клъ еси́ тѣ́хъ ополче́нія держа́вно и побѣ́ды увя́злся еси́ вѣнце́мъ.

Богоро́диченъ: Отъ пречи́стыхъ Твои́хъ, Чи́стая, и честны́хъ крове́й вопло́щся неизрече́нно, Сло́во Бо́жіе показа́, я́ко Бо́гъ тва́рей, Тя́ всѣ́хъ Влады́чицу.

Конда́къ пра́здника, гла́съ 3:

Дѣ́ва дне́сь Пресу́щественнаго ражда́етъ, и земля́ верте́пъ Непристу́пному прино́ситъ. Ангели съ па́стырьми славосло́вятъ, волсви́ же со звѣздо́ю путеше́ствуютъ: на́съ бо ра́ди роди́ся Oтроча́ Мла́до, Превѣ́чный Богъ.

Икосъ:

Еде́мъ Виѳлее́мъ отве́рзе, пріиди́те, ви́димъ, пи́щу въ та́йнѣ обрѣто́хомъ; пріиди́те, пріи́мемъ су́щая ра́йская вну́трь верте́па: та́мо яви́ся ко́рень ненапое́нъ, прозяба́я отпуще́ніе, та́мо обрѣ́теся кла́дязь неиско́панъ, изъ него́же Дави́дъ пи́ти дре́вле возжада́ся. Та́мо Дѣ́ва ро́ждши Младе́нца, жа́жду уста́ви а́біе Ада́мову и Дави́дову. Сего́ ра́ди къ Нему́ и́демъ, гдѣ́ роди́ся Отроча́ Мла́до, Превѣ́чный Богъ.

И сѣда́ленъ младе́нцевъ, гла́съ 4. Подо́бенъ: Яви́лся еси́.

Ро́ждшемуся дне́сь отъ Дѣ́вы младе́нцевъ во́инство я́ко Творцу́ и Царю́ прія́тная прино́сятся заколе́нія, предложе́нная Христу́ вѣ́ры ра́ди.

Сла́ва, преподо́бному, гла́съ 4. Подо́бенъ: Ско́ро предвари́.

Чистоты́ у́гльми предочи́стивъ ду́шу, тѣ́ло обузда́лъ еси́ къ нетлѣ́ннѣй крѣ́пости, всехва́льне Марке́лле, тѣ́мъ и показа́лся еси́ оби́телище боже́ственное, неду́ги отгоня́я и просвѣща́я вѣ́рою при́сно приходя́щія къ тебѣ́ и восхваля́ющія тя́.

И ны́нѣ, гла́съ то́йже. Подо́бенъ: Удиви́ся Іо́сифъ.

Удиви́ся, увѣ́дѣвъ, Иродъ, ца́рь лю́тый, ища́ я́ростію, проти́ву боря́ ро́ждшемуся на земли́ Царю́, ю́ному Христу́, и, боя́знію и стра́хомъ мно́гимъ содержи́мь, посыла́етъ во́инство уби́ти съ я́ростію дѣ́ти, въ Виѳлее́мѣ младе́нствующія, ку́пно съ ни́ми уби́ти покуша́яся Созда́теля, за благоутро́біе обнища́вшаго: изъ дѣ́вственныя бо утро́бы произы́де, спасти́ хотя́ ро́дъ на́шъ.

Пѣ́снь 4.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Его́же дре́вле прорече́ Іа́ковъ, язы́ковъ ожида́ніе, Христе́, отъ колѣ́на Іу́дова возсія́лъ еси́ и си́лу Дама́скову, Самарíйскую же коры́сть прише́лъ еси́ испроврещи́, лесть премѣня́я въ вѣ́ру боголѣ́пну: сла́ва си́лѣ Твое́й, Го́споди.

Волхва́ дре́вле Валаа́ма словесы́ ученики́, му́дрыя звѣздоблюсти́тели, ра́дости испо́лнилъ еси́, звѣзда́ отъ Іа́кова, возсія́въ, Влады́ко, язы́ковъ нача́токъ вводи́мый прія́лъ же еси́ я́вѣ: сла́ва си́лѣ Твое́й, Го́споди.

Яко на руно́, во чре́во Дѣ́вы сше́лъ еси́ до́ждь, Христе́, и я́ко ка́пли, на зе́млю ка́плющія. Еѳіо́пія, и Ѳарси́съ, и Арави́тстіи о́строви же, Сава́, Ми́довъ всю́ зе́млю держа́щіи, припадо́ша Тебѣ́, Спа́се: сла́ва си́лѣ Твое́й, Го́споди.

Инъ:

Ирмо́съ: Услы́шахъ слу́хъ Тво́й и убоя́хся, проро́къ глаго́лаше, разумѣ́хъ дѣла́ Твоя́, и диви́хся, и возопи́хъ: сла́ва си́лѣ Твое́й, Го́споди .

Дѣ́ва и не́бо, небе́сныя и земны́я, Рождество́мъ хода́тайствовавши, па́че ума́ примири́ и вражды́ средостѣ́ніе разори́.

Младе́нецъ мно́жество му́ченически, по Бо́зѣ всѣ́хъ пострада́вше, по́чести страда́нія отъ Него́ пріе́млетъ: и́хже ра́ди Иродъ весьма́ устыдѣ́ся.

Богоро́диченъ: Боже́ственное Сло́во во утро́бѣ заче́нши, стра́шнымъ Сло́вомъ па́че сло́ва породила́ еси́ пло́тію, Всенепоро́чная, тѣ́мже Тя́, Богоро́дицу, сла́вимъ.

Инъ:

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Ви́дѣвше, Го́споди, е́же въ верте́пѣ Твое́ сни́тіе, чи́нове мы́сленніи стра́хомъ ужасо́шася и воспѣ́ша, Христе́, недомы́сленную Твою́ ми́лость.

Болѣ́зни, преподо́бне, и по́ты твоя́ съ кро́вными струя́ми младе́нцевъ смѣ́шени, Марке́лле, Ро́ждшемуся пло́тію да́ры че́стны принесо́шася.

Богоро́диченъ: Красну́ Тя добро́тою, преоблиста́ющую Сы́на Твоего́ заре́ю, язы́честіи дароно́сцы, Чи́стая, ви́дѣвше, видѣ́ніе но́во и пресла́вно воспѣ́ша.

Пѣ́снь 5.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Въ рабѣ́хъ ке́саревымъ повелѣ́ніемъ написа́тися поко́рься, и на́съ, рабы́ су́щія, врага́ и грѣха́ свободи́лъ еси́, Христе́, ве́сь же по на́мъ обнища́въ, и пе́рстнаго отъ самаго́ едине́нія и обще́нія богосодѣ́лалъ еси́.

Се Дѣ́ва, я́коже дре́вле рече́, во чре́вѣ пріе́мши, родила́ е́сть Бо́га вочеловѣ́чшася и пребыва́етъ Дѣ́ва. Ея́же ра́ди примири́вшеся Бо́гу, грѣ́шніи, Богоро́дицу су́щую вои́стинну, вѣ́рніи, воспои́мъ.

Инъ:

Ирмо́съ: Возсія́й ми́, Го́споди, свѣ́тъ повелѣ́ній Твои́хъ, я́ко къ Тебѣ́ ду́хъ мо́й у́тренюетъ и пое́тъ Тя́: Ты́ бо еси́ Бо́гъ на́шъ, и къ Тебѣ́ прибѣга́ю, Царю́ ми́ра.

Чу́вственное у́бо со́лнце о́блаки покрыва́ется, Умное же и Всеневеще́ственное, безмѣ́рнымъ благоутро́біемъ въ пло́ть одѣ́явся, въ верте́пѣ дне́сь пелена́ми повива́ется на́съ ра́ди.

Скверноубíйства кровьми́ Иродъ оскверня́ется: Влады́ку бо всѣ́хъ, Бо́га и Царя́, уби́ти покуша́яся, на о́троки неи́стовствуетъ и свирѣ́пствуетъ лю́тѣ.

Богоро́диченъ: Заре́ю моли́твы Твоея́, Богороди́тельнице Чи́стая, слѣпоту́ се́рдца моего́ озари́, я́ко еди́на свѣти́льника Го́спода и сла́вы со́лнце возсія́вши Христа́.

Инъ:

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Прелива́ется ча́ша благоутро́бія Твоего́, Христе́, во творе́нія вся́, и оби́льно сія́ ми́лости испо́лни, пло́тію я́вльшуся и ро́ждшуся Тебѣ́.

Ве́щнаго, преподо́бне, души́ помраче́нія и вся́кія земны́я и тлѣ́нныя красоты́ болѣ́зньми очи́стивъ твоего́ по́стничества, равноа́нгеленъ показа́лся еси́ въ мíрѣ, Марке́лле.

Богоро́диченъ: Струи́ источи́ мы́сленныя безсме́ртія изъ Тебе́ пло́тію рожде́йся въ верте́пѣ, Чи́стая, и человѣ́ческое естество́ напои́ нетлѣ́ніемъ, обогати́въ сіе́, я́ко Благоутро́бенъ.

Пѣ́снь 6.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Пріи́де, вопло́щся, Христо́съ Бо́гъ на́шъ изъ чре́ва, Его́же Оте́цъ пре́жде денни́цы ражда́етъ; правле́нія же держа́ пречи́стыхъ си́лъ, въ я́слѣхъ ско́тіихъ возлежи́тъ и пелена́ми повива́ется, разрѣша́етъ же многоплете́нныя плени́цы прегрѣше́ній.

Юно изъ Ада́ма отроча́ смѣше́нія, роди́ся Сы́нъ и вѣ́рнымъ даде́ся, бу́дущаго вѣ́ка Се́й е́сть Оте́цъ и Нача́льникъ и нарица́ется Вели́каго Совѣ́та Ангелъ. Се́й крѣ́покъ Бо́гъ е́сть и держа́й о́бластію всю́ тва́рь.

Инъ:

Ирмо́съ: Бу́ря мя́ мно́гихъ согрѣше́ній мои́хъ потопля́етъ, и изнемога́етъ ду́хъ мо́й; но Ты́, Го́споди, я́ко ми́лостивъ, сше́дъ, возведи́ живо́тъ мо́й.

Боже́ственное воплоще́нія Сло́ва соверша́ется дне́сь та́инство, Богоро́дице: Тобо́ю бо яви́ся пло́тію Бо́гъ Превѣ́чный, да обожи́тъ прія́тіе.

Рахи́ль, у́бо ча́дъ пла́чущи, дре́вле провозвѣсти́ за Христа́ младе́нцевъ, пріе́мшихъ безго́дное заколе́ніе; тѣ́мъ и отрица́шеся, утѣ́шитися не хотя́щи.

Богоро́диченъ: Боже́ственное Рождество́ Твое́, Всесвята́я, прозя́бшую пресѣче́ въ раи́ кля́тву и, стезю́ дре́ва жи́зни человѣ́комъ отве́рзши, благослове́ніе источи́.

Инъ:

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Мѵ́ра благово́ннѣйшая издаде́ земля́ въ себѣ́ па́че смы́сла, неистоще́ннаго мѵ́ра, отъ Чи́стыя пло́тію источи́вшаго и человѣ́ки благово́нія боже́ственнаго испо́лнившаго.

Житія́ привре́менное и нестоя́нное му́дрѣ усмотри́въ, Марке́лле, къ присностоя́щимъ душе́вное возвы́силъ еси́ жела́ніе, е́же получи́лъ еси́ болѣ́зньми по́стничества.

Богоро́диченъ: Ражда́ется безлѣ́тный Бо́гъ Сло́во во пло́ти изъ Тебе́, Дѣ́во Пречи́стая, да жи́знь безлѣ́тную человѣ́комъ, и наслѣ́діе вѣ́чное, и сла́ву пода́стъ нетлѣ́нную.

Конда́къ, гла́съ 4. Подо́бенъ: Яви́лся еси́.

Звѣзда́ волхвы́ посла́ къ Ро́ждшемуся, и Иродъ непра́ведное во́инство посла́ лю́то, уби́ти мня́ во я́слѣхъ я́ко Младе́нца лежа́ща.

Икосъ:

Го́рнимъ и до́льнымъ, ны́нѣ вку́пѣ веселя́щимся во явле́ніи всѣ́хъ Царя́, Иродъ са́мъ то́кмо съ пророкоубíйцы іуде́и соболѣ́знуетъ: лѣ́по бо самы́мъ и́мъ то́кмо рыда́ти, не бо́ отъ ны́нѣ ца́рствовати и́мутъ; но ца́рство Госпо́дне и еще́ держа́вствовати и́мать, де́рзости враго́въ отража́ющее и мно́жества вѣ́рныхъ созыва́ющее съ честны́ми младе́нцы взира́ти, Иже во я́слѣхъ я́ко Младе́нца лежа́ща.

Пѣ́снь 7.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Па́стыріе, свиря́юще, ужа́сно свѣтоявле́ніе получи́ша: сла́ва бо Госпо́дня облиста́ и́хъ, и а́нгелъ, — воспо́йте, — вопія́, — я́ко роди́ся Христо́съ, отце́въ Бо́гъ благослове́нный.

Внеза́пу съ сло́вомъ а́нгеловымъ небе́сная во́инства, — сла́ва, — вопія́ху, — Бо́гу въ вы́шнихъ, на земли́ ми́ръ, въ человѣ́цѣхъ благоволе́ніе: Христо́съ возсія́, отце́въ Бо́гъ благослове́нный.

Глаго́лъ что́ се́й? — реко́ша па́стыріе, — прише́дше, уви́димъ бы́вшее, Боже́ственнаго Христа́. Виѳлее́ма же доше́дше, съ Ро́ждшею покланя́хуся, воспѣва́юще: отце́въ Бо́же, благослове́нъ еси́.

Инъ:

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Весели́тся дне́сь Виѳлее́мъ съ на́ми, Тя́ бо, Невмѣсти́маго, въ верте́пѣ пріе́млетъ, — благослове́нъ еси́, — вопія́, — еди́нъ Бо́гъ оте́цъ на́шихъ.

Незло́бива же́ртва и нескве́рная за Тя́ предзакала́ется, Бо́жій Сло́ве, вопію́ще: благослове́нъ еси́, Го́споди, Бо́же оте́цъ на́шихъ.

Богоро́диченъ: Ра́дуйся, небу́рное покая́нія приста́нище, въ не́же прибѣга́юще, Богоро́дице, зове́мъ: благослове́на еси́ Еди́на, ро́ждшая Бо́га оте́цъ на́шихъ.

Инъ:

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Поколеба́вшуюся безбо́жіемъ всю́ тва́рь Иже въ верте́пѣ Рожде́йся утверди́ позна́ніемъ Свои́мъ па́ки, непреста́нно зову́щую Ему́: благослове́нъ еси́, Бо́же оте́цъ на́шихъ.

Огне́мъ у́бо по́стничества попали́лъ еси́, Марке́лле, плотскíя сла́сти, безстра́стія же росо́ю напои́лъ еси́ ду́шу, вопія́ Христу́ свѣ́тло: благослове́нъ еси́, Бо́же оте́цъ на́шихъ.

Богоро́диченъ: Ви́дѣ вся́ тва́рь, Богоневѣ́сто, боже́ственная вели́чія Твоя́, пло́тію изъ Тебе́ Влады́цѣ всѣ́хъ и Бо́гу ро́ждшуся во гра́дѣ Виѳлее́мѣ, и съ па́стырьми и волхвы́ Тя́ воспѣ́.

Пѣ́снь 8.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Влече́тъ Вавило́ня дщи́ о́троки плѣне́нныя Дави́довы отъ Сіо́на къ себѣ́; дароно́сцы же сле́тъ волхвы́ дѣ́ти, Дави́довѣ богопрія́тнѣй дще́ри моля́щіяся. Тѣмъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Орга́ны уклони́ша плаче́вныя пѣ́сни, не поя́ху бо въ земли́ чужде́й о́троцы Сіо́новы, вавило́нскую же разрѣша́етъ ле́сть всю́ и мусикíйскія соста́вы, въ Виѳлее́мѣ возсія́въ, Христо́съ. Тѣ́мъ, воспѣва́юще, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Коры́сти Вавило́нъ ца́рства Сіо́ня и плѣне́нное бога́тство прія́тъ, сокро́вища же Христо́съ въ Сіо́нъ сего́, и цари́ звѣздо́ю наставля́я, звѣздоблюсти́тели влече́тъ. Тѣ́мъ, воспѣва́юще, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Инъ:

Ирмо́съ: Вся́ческая, Влады́ко, прему́дростію Твое́ю соста́вилъ еси́, земли́ же па́ки утверди́лъ еси́, я́коже вѣ́си, дно́, основа́ніемъ водрузи́вый на вода́хъ безмѣ́рныхъ. Тѣ́мъ вси́ вопіе́мъ, воспѣва́юще: благослови́те, дѣла́ Госпо́дня, непреста́нно Го́спода.

Ангели сла́вятъ вла́сть Ро́ждшагося, па́стыріе чудя́тся, и волсви́ покланя́ются, небеса́ возвѣща́ютъ звѣздо́ю Зижди́теля; съ ни́миже вси́, воспѣва́юще, вопіе́мъ: благослови́те, дѣла́ Госпо́дня, Го́спода.

Мно́жество неискусозло́бное во́инствуетъ Влады́цѣ дне́сь кро́вію и на Ирода тве́рдо вооружа́ется, Тебѣ́, Христе́, ро́ждшуся. Тѣ́мъ вси́ вопіе́мъ, воспѣва́юще: благослови́те, дѣла́ Госпо́дня, Го́спода.

Богоро́диченъ: Дѣ́ву Тя́, Чи́стая, хра́мъ, и две́рь, и о́блакъ, купину́ неопали́му, и ста́мну ма́нны, и же́злъ прозя́бшій, киво́тъ, и свѣ́щникъ, и скрижа́ли завѣ́та, го́ру святу́ю, изъ нея́же ка́мень отсѣче́ся, проро́цы Бо́жіи проповѣ́даша.

Инъ:

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Свѣтоно́сною тва́рь оде́ждею одѣва́ется, и пе́рвое сѣ́тованіе все́ отложи́, Обнови́телю и Влады́цѣ ро́ждшуся на земли́: Его́же превозно́симъ во вѣ́ки.

Вооружи́вся добродѣ́тельми, преподо́бне Марке́лле, ополче́нія де́моновъ побори́лъ еси́, и я́ко побѣди́тель на ты́я взя́лъ еси́ одолѣ́нія, и чуде́съ благода́ть отъ Бо́га прія́лъ еси́.

Богоро́диченъ: Иже изъ Тебе́ въ верте́пѣ роди́выйся, Всенепоро́чная, вѣ́чныя человѣ́комъ оби́тели угото́ва и́скренно, Богоро́дице, пою́щимъ Тя́ и превознося́щимъ несказа́нное Твое́ Рождество́.

Пѣ́снь 9.

Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Изря́дное тече́ніе зря́ще волсви́ необы́чныя но́выя звѣзды́ новосія́ющія, небеса́ просвѣща́ющія, Христа́ Царя́ зна́менующія на земли́, ро́ждшагося въ Виѳлее́мѣ на спасе́ніе на́ше.

Новорожде́нное, — волхво́мъ, глаго́лющимъ, — Отроча́ Ца́рь, Его́же звѣзда́ яви́, гдѣ́ е́сть? Тому́ бо поклони́тися пріидо́хомъ. — Яря́ся, Иродъ смуща́шеся, Христа́ уби́ти богобо́рецъ шата́яся.

Испыта́ Иродъ вре́мя звѣзды́, ея́же вожде́ніемъ волсви́ въ Виѳлее́мѣ покланя́хуся Христу́ съ да́ры; е́юже, ко оте́честву наставля́еми, лю́таго дѣтоубíйцу оста́виша пору́гана.

Инъ:

Ирмо́съ: Яко сотвори́ Мнѣ́ вели́чія Си́льный и свя́то и́мя Его́, и ми́лость Его́ въ ро́дъ и ро́дъ боя́щимся Его́.

Ве́сь въ Тебѣ́ вмѣща́ется, Иже въ нѣ́дрѣхъ сы́й Отца́, и зи́ждется Зижди́тель небесе́, и истощава́ется мене́ ра́ди, и, въ пелена́хъ пови́вся, разрѣша́етъ прегрѣше́ній плени́цы.

Въ Ра́мѣ слы́шася Рахи́ли го́рькое рыда́ніе, пла́чь же, и увы́, и сокруше́ніе: скверноубíйца бо вра́гъ, на ча́да Виѳлее́мская, Иродъ показа́ся.

Богоро́диченъ: Рождество́мъ Твои́мъ, Дѣ́во, обожи́хомся, сме́ртніи: Бо́га бо, Пита́теля всѣ́хъ и единосла́вна Отцу́, и ражда́еши, и млеко́мъ пита́еши. О, стра́ннаго чудесе́!

Инъ:

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Позна́на показа́ся, Христе́, ми́лость, я́же па́че ума́, Твоего́ человѣколю́бія язы́комъ: пло́тію бо, Влады́ко, обнища́лъ еси́, да прича́стники бога́тства лу́чшаго, Го́споди, сотвори́ши ны́, я́ко Бла́гъ и Многоми́лостивъ.

Кре́стъ на ра́мена взе́мъ, блаже́нне, Христо́въ, и, Сего́ стра́сти подража́я, распя́лся еси́ мíру ве́сь, о́тче Марке́лле: прича́стникъ бо бы́лъ еси́ воскресе́нія и сла́вы лу́чшія, въ не́йже на́съ помина́й.

Богоро́диченъ: Сы́ны Бо́жія ны́ содѣ́ла рожде́йся пло́тію Бо́гъ изъ Тебе́, Всечи́стая, и пе́рвое даде́ достоя́ніе Того́ пріе́мшимъ, и Богома́терь Тя́ славосло́вящимъ прилѣ́жно, и велича́ющимъ.

Свѣти́ленъ младе́нцевъ. Подо́бенъ: Кре́стъ храни́тель.

Зла́чную ни́ву младе́нецъ, богобо́рствуя Иродъ, посла́въ, незрѣ́лую пожа́, окая́нный, и, ро́ждшагося Го́спода не возмо́гъ уби́ти, вся́каго сра́ма исполня́ется.

Сла́ва, и ны́нѣ, пра́здника:

Посѣти́лъ ны́ е́сть свы́ше Спа́съ на́шъ, Восто́къ восто́ковъ, и су́щіи во тмѣ́ и сѣ́ни обрѣто́хомъ и́стину, и́бо отъ Дѣ́вы роди́ся Госпо́дь.

На хвали́техъ стихи́ры, святы́мъ на 4, гла́съ 1. Самогла́сны. Кипріа́ново:

Пречи́стому Твоему́ Рождеству́, Христе́ Бо́же, пе́рвая же́ртва бы́сть младе́нцы: Иродъ бо я́ти Тя́, нея́таго, восхотѣ́въ, не позна́, му́ченическій приводя́ Тебѣ́ ли́къ. Тѣ́мъ Тя́ мо́лимъ, вочеловѣ́чшагося, спасти́ ду́ши на́ша. [Два́жды.]

Гла́съ 2:

Во у́ши Го́спода Савао́ѳа вни́де заколе́ніе ва́ше, младе́нцы честнíи: Того́ бо ра́ди кро́вь пролія́сте, и въ нѣ́дрѣхъ Авраа́мовыхъ почива́ете, и Иродову во вѣ́ки ме́рзскую зло́бу отри́нусте си́лою ро́ждшагося Христа́.

Гла́съ 3:

Ме́рзско Иродово дѣтоубíйство, ме́рзскаго убіе́нія Его́ ра́ди, и чиста́ дѣте́й же́ртва, я́ко све́рстныхъ Христу́ на́шего спасе́нія, но́ваго закла́нія предпожре́на и предпосла́на. Не пла́чи, Рахи́ль, ча́дъ, помина́ющи нѣ́дра Авраа́мова, идѣ́же всѣ́хъ е́сть веселя́щихся жили́ще.

Сла́ва, гла́съ 5:

Преподо́бне о́тче, не да́лъ еси́ сна́ твои́мъ очесе́мъ, ни вѣ́ждомъ твои́мъ дрема́нія, до́ндеже ду́шу и тѣ́ло отъ страсте́й свободи́лъ еси́ и тебе́ сама́го угото́валъ еси́ Ду́ха жили́ще: прише́дъ бо, Христо́съ со Отце́мъ оби́тель въ тебѣ́ сотвори́; и Единосу́щныя Тро́ицы уго́дникъ бы́въ, великопроповѣ́дниче о́тче на́шъ Марке́лле, моли́ спасти́ся на́мъ.

И ны́нѣ, гла́съ то́йже:

Зря́щи Тя́, тва́рь вся́, въ Виѳлее́мѣ пло́тію ражда́ема, Созда́теля и Зижди́теля всѣ́хъ, новотвори́тся па́ки и обновля́ется; со́лнца же свѣ́тъ простре́, и земля́ ра́дуется, волсви́ изъ Перси́ды Царю́ всѣ́хъ да́ры прино́сятъ. Па́стыріе чудя́тся, уди́вльшеся, и Бо́гу во пло́ти съ Ро́ждшею покланя́хуся. О, чудесе́! Пита́тель пита́ется Ма́терію Всечи́стою ра́ди мірска́го спасе́нія и обновле́нія.

На стихо́внѣ стихи́ры, гла́съ 6. Подо́бенъ: Ангельскія.

Воспѣ́ша Христа́, отъ Дѣ́вы ро́ждшася,* го́ры и хо́лми, и удо́лія, и поля́;* звѣзда́ же Сего́ волхво́мъ съ небесе́ показа́,* лежа́ща я́ко Младе́нца въ верте́пѣ,* тѣ́ломъ ра́бскимъ одѣ́яна.* Къ Нему́же зове́мъ:* благослове́нъ рожде́йся,* Бо́же на́шъ, сла́ва Тебѣ́.

Сти́хъ: Изъ чре́ва пре́жде денни́цы роди́хъ Тя́,* [кля́тся Госпо́дь и не раска́ется].

Что́ Твоя́ мно́гая и недомы́сленная нищета́,* ея́же ра́ди обогати́ся Ада́мъ Боже́ственными? —* вопія́ше Дѣ́ва,* на объя́тіихъ держа́щи Емману́ила,* Бо́га и Зижди́теля,* пло́ть отъ Нея́ пріе́мшаго.* Къ Нему́же зове́мъ:* благослове́нъ рожде́йся,* Бо́же на́шъ, сла́ва Тебѣ́.

Сти́хъ: Рече́ Госпо́дь Го́споведи моему́:* сѣди́ одесну́ю Мене́.

Утро мы́сленное* возсія́ла еси́, Дѣ́во, Со́лнце Христа́,* на объя́тіихъ Твои́хъ держа́щи,* Имже просвѣща́ется слове́сное естество́ все́* сія́ніемъ позна́нія соверше́ннаго* и нетлѣ́нія сподобля́ется,* вѣ́рно зову́щее:* благослове́нъ рожде́йся,* Бо́же на́шъ, сла́ва Тебѣ́.

Сла́ва, гла́съ и подо́бенъ то́йже:

Ны́нѣ на земли́ явля́ется Отроча́,* Иже отъ Отца́ рожде́йся пре́жде вѣ́къ:* ра́дуйся, вся́ тва́рь,* небеса́ да веселя́тся,* ви́дящи у́бо пре́жде отринове́нныя,* па́ки Бо́гу присвое́ны,* и Тому́ зову́щія:* благослове́нъ рожде́йся,* Бо́же на́шъ, сла́ва Тебѣ́.

И ны́нѣ:

Усты́ приснопла́менными воспѣва́ютъ* небе́сныхъ премíрныя си́лы Ро́ждшагося въ верте́пѣ* за неизрече́нную ми́лость;* язы́ки и мы́ пѣ́ти* бре́нными да сподо́бимся,* непреста́нно Тому́ зову́ще:* благослове́нъ рожде́йся,* Бо́же на́шъ, сла́ва Тебѣ́.


НА ЛИТУРГІИ,

Блаже́нна пра́здника, отъ кано́на пѣ́снь 7-я, и святы́хъ младе́нцевъ пѣ́снь 6-я. Проки́менъ, гла́съ 6: Хвали́те, о́троцы, Го́спода, хвали́те и́мя Госпо́дне. Сти́хъ: Вселя́я непло́довь въ до́мъ, ма́терь, о ча́дѣхъ веселя́щуся. Апо́столъ къ Кори́нѳяномъ, зача́ло 180. Аллилу́ія, гла́съ 5: Пролія́ша кро́вь и́хъ, я́ко во́ду. Ева́нгеліе отъ Матѳе́я, зача́ло 4. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 289 об. – 298 об.

/ Къ оглавленію раздѣла /


Наверхъ / Къ титульной страницѣ

0