Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 29-й де́нь.
Слу́жба преподо́бнымъ отце́мъ Пече́рскимъ Ма́рку и Ѳео́филу.

ВЕЧЕРЪ,
Блаже́нъ му́жъ, 1-й антифо́нъ. На Го́споди воззва́хъ: стихи́ры, гла́съ 5. Подо́бенъ: Ра́дуйся.

Мно́гимъ, на пути́ житія́ заблужда́ющимъ* и жестосе́рдіемъ зва́нія небе́снаго отрица́ющимся,* гла́съ Госпо́день,* призыва́ющъ на ве́черю небе́сную,* преподо́бне, я́ко услы́шалъ еси́,* молвы́ вѣ́ка сего́ оста́вилъ еси́,* и спѣ́шно поте́къ, имѣ́я свѣти́льникъ,* любо́вію предукра́шенъ,* вше́лъ еси́ въ Черто́гъ небе́сный,* въ о́ньже вни́ти и мы́ да сподо́бимся,* мо́лимъ тя́, моли́ся прилѣ́жно Влады́цѣ* и испроси́ душа́мъ на́шимъ мно́жество щедро́тъ* и ве́лію ми́лость.

Вѣ́ка сего́ любо́вь преходя́щую* и пло́ть, сластьми́ ласкосе́рдствующую,* преблаже́нне о́тче, презрѣ́въ,* любо́вію приснопребыва́ющею* у́мъ сво́й въ Бо́га впери́лъ еси́,* Его́же ра́ди, кре́стъ сво́й взе́мши,* вся́ у́ды распя́лъ еси́,* и міроде́ржца умертви́въ,* бы́лъ еси́ по́стникомъ сія́ніе,* преподо́бнымъ украше́ніе.* Съ ни́миже предстоя́ Влады́цѣ,* не закосни́ Того́ моли́ти,* дарова́ти душа́мъ на́шимъ ми́ръ* и ве́лію ми́лость.

Ины стихи́ры, гла́съ 1. Подо́бенъ: Прехва́льніи му́ченицы.

Ма́рко преблаже́нне,* ты́, любве́ ра́ди Христо́вы* простра́нное житіе́ оста́вивъ,* въ тѣ́сную пеще́ру всели́лся еси́,* въ не́йже да вы́ну па́мять* и ча́съ сме́ртный предъ очесы́ имѣ́еши,* гро́бы свои́ми рука́ми* бра́тіи уме́ршей угото́валъ* и свое́ къ Бо́гу отше́ствіе прови́дѣлъ еси́.* Ему́же ны́нѣ предстоя́,* моли́ дарова́ти душа́мъ на́шимъ* ми́ръ и ве́лію ми́лость.

Отче преподо́бне,* твоего́ гла́са ме́ртвіи услы́шавше,* велѣ́нію твоему́ повину́шася,* и пріе́мше дыха́ніе па́ки,* ожида́ху, до́ндеже и́мъ повели́ши* къ жела́емому отыти́ Влады́цѣ,* Ему́же и ты́ по кончи́нѣ свое́й предстоя́,* прилѣ́жно моли́ся* дарова́ти душа́мъ на́шимъ* безконе́чную жи́знь и ве́лію ми́лость.

Отче досточу́дне,* ты́, мно́гими труды́ себе́ обложи́въ,* свирѣ́пѣющаго дома́шняго врага́ своего́ смири́лъ еси́,* и вери́гами того́ связа́въ,* покори́лъ еси́ ду́ху,* тѣ́мже бы́лъ еси́ и́ночествующимъ похвала́,* съ ни́миже моли́ся* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 2:

Кто́ исповѣ́сть по достоя́нію труды́ и по́двиги твоя́, преподо́бне о́тче? Отне́лѣ бо прія́лъ еси́ а́нгельскій на ся́ о́бразъ, не да́лъ еси́ тѣ́лу своему́ упокое́нія, но о́чи возводи́лъ ко Го́споду, устнѣ́ же устро́евалъ еси́ вы́ну на моли́тву, слу́хъ тво́й простира́лъ еси́ къ слы́шанію сло́ва Бо́жія, ру́цѣ утвержда́лъ еси́ на копа́ніе гробо́въ. Блаже́нъ еси́, всѣ́ми у́ды Христу́ рабо́тавъ, Ему́же ны́нѣ предстоя́, моли́ умири́ти мíръ и спасти́ ду́ши на́ша.

И ны́нѣ, пра́здника, гла́съ 1:

Сла́ва въ Вы́шнихъ Бо́гу, въ Виѳлее́мѣ слы́шу отъ безпло́тныхъ дне́сь, на земли́ ми́ръ Благоволи́вшему бы́ти. Ны́нѣ Дѣ́ва небе́съ ши́рши, возсія́ бо свѣ́тъ омраче́ннымъ и смире́нныя возвы́си, а́нгельски пою́щія: сла́ва въ Вы́шнихъ Бо́гу.

Вхо́дъ. Проки́менъ дне́ и чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внѣ стихи́ры пра́здника, гла́съ 6. Подо́бенъ: Тридне́венъ.

Та́инство ужа́сное зрю́... [Зри́ въ мине́и, въ 29-й де́нь].

Сла́ва, преподо́бному, гла́съ 8:

Пріиди́те, лю́діе, дне́сь въ лѣ́тнюю па́мять богоно́снаго отца́ соше́дшеся, ви́дите, ка́ко въ ме́ртвенномъ се́мъ тѣ́лѣ сы́й, сме́ртію облада́ше? сло́вомъ воззва́въ ме́ртвыя, и послу́шаху гла́са его́: о́въ еле́й возлія́ са́мъ на ся́, о́въ же повелѣ́ніемъ мѣ́сто свое́ уступа́ше ино́му, и́нъ же по кончи́нѣ, па́ки ожи́въ, пребы́сть, до́ндеже угото́вася мѣ́сто ему́. Сего́ у́бо, я́ко толи́ку благода́ть отъ Бо́га пріе́мша, похва́льными пѣ́сньми ублажа́юще, мо́лимъ: да мо́лится о на́съ Христу́, е́же воздви́гнути на́съ отъ прегрѣше́ній на́шихъ, и изба́вити отъ бѣ́дъ ду́ши на́ша.

И ны́нѣ, пра́здника, гла́съ то́йже:

Го́споди, въ Виѳлее́мъ прише́дъ, въ верте́пъ всели́лся еси́, не́бо престо́лъ имѣ́я, въ я́слѣхъ восклони́лся еси́, Его́же во́инства окружа́ютъ а́нгелъ, къ па́стыремъ снизше́лъ еси́, да спасе́ши, я́ко Благоутро́бенъ, ро́дъ на́шъ, сла́ва Тебѣ́.

Тропа́рь, гла́съ 1:

Умертви́въ плотскíя по́хоти мно́гимъ воздержа́ніемъ и копа́ніемъ гробо́въ святы́мъ, при́сно, а́ки ме́ртвъ, въ пеще́рѣ живя́, ме́ртвыя повелѣ́ніемъ свои́мъ воздвиза́лъ еси́, Ма́рко прехва́льне. Умертви́ и на́ша мудрова́нія плотска́я и наста́ви на́съ на тече́ніе добродѣ́телей, моля́ о на́съ Еди́наго Человѣколю́бца.

Сла́ва, и ны́нѣ, пра́здника.



НА УТРЕНИ,
На Бо́гъ Госпо́дь: Тропа́рь пра́здника [два́жды]. Сла́ва, препо́добнаго. И ны́нѣ, пра́здника.

По 1-мъ стихосло́віи сѣда́ленъ, гла́съ 1. Подо́бенъ: Ли́къ а́нгельскій.

Гла́съ Боже́ственный въ се́рдцѣ свое́мъ пріе́мь, мíръ оста́вилъ, и зва́нію Го́спода своего́ послѣ́довалъ еси́. Тѣ́мъ кре́стъ, а́ки же́злъ, въ ру́цѣ свои́ взе́мь, ти́хо о не́мъ житія́ сего́ мо́ре преше́лъ еси́, мы́сленнаго же фарао́на въ бе́зднѣ трудо́въ свои́хъ потопи́лъ еси́ и бы́лъ еси́ преподо́бнымъ украше́ніе, Ма́рко досточу́дне. [Два́жды.]

Сла́ва, и ны́нѣ, пра́здника. Или́ се́й богоро́диченъ:

Гла́съ Гавріи́ловъ прино́симъ Ти́, Чи́стая Дѣ́во: ра́дуйся, заче́ншая Творца́ всѣ́хъ, Бо́га, и обно́вльшая обетша́вшее человѣ́ческое естество́; ра́дуйся, я́ко была́ еси́ въ рождествѣ́ Дѣ́ва и по рождествѣ́ па́ки Дѣ́ва пребыва́еши.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Кто́ по достоя́нію исповѣ́сть человѣколю́біе Твое́ къ земны́мъ, Влады́ко? я́ко кре́стъ Тво́й да́лъ еси́ и́мъ въ по́мощь, его́же и уго́дникъ Тво́й, въ ру́цѣ пріе́мь, побѣди́ вся́ де́монскія полки́: се́й бо бы́сть ему́ броня́ и шле́мъ спасе́нія, се́й бы́сть пи́ща и питіе́ сла́дкое, се́й бы́сть ему́ сла́ва и предъ преподо́бными украше́ніе. [Два́жды.]

Сла́ва, и ны́нѣ, пра́здника. Или́ се́й богоро́диченъ:

Кто́ досто́йно восхва́литъ Рождество́ Твое́, Пречи́стая? безсѣ́менно бо зачала́ еси́ отъ Ду́ха Свята́го и пре́жде вѣ́къ отъ Отца́ рожде́нное Сло́во въ лѣ́то родила́ еси́. Тѣ́мъ Тя́, я́ко и́стиннаго Бо́га на́шего Ма́терь, въ пѣ́снехъ, чту́ще, пое́мъ и велича́емъ.

По поліеле́и сѣда́ленъ, гла́съ 8. Подо́бенъ: Прему́дрости.

Труды́ и по́двиги твоя́ кто́ исповѣ́сть, преблаже́нне? вѣ́ренъ бо ра́бъ Го́споду своему́ бы́въ и вѣ́рнѣ Тому́ служа́, ввѣ́ренный тебѣ́ тала́нтъ умно́жилъ еси́ и съ благи́ми дѣ́латели дина́рій жи́зни вѣ́чныя прія́лъ еси́. Тѣ́мже, я́ко имѣ́я дерзнове́ніе, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Въ лѣ́ности проводя́ живота́ моего́ вре́мя, погуби́хъ тала́нтъ, ввѣ́ренный ми́ отъ Го́спода моего́, и, ны́нѣ лише́нъ Бо́жія благода́ти, къ Тебѣ́ зову́, Чи́стая: Ма́терними Твои́ми моли́твами бу́ди мнѣ́ Хода́таица блага́ къ Человѣколю́бцу Бо́гу, помяни́ сро́дное Свое́ промышле́ніе о рабѣ́хъ Твои́хъ и испроси́ согрѣше́ній проще́ніе любо́вію чту́щему и благоче́стно покланя́ющемуся всесвято́му Рождеству́ Твоему́.

Степе́нна, 1-й антифо́нъ, 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, [я́же воздаде́ ми́?] Вся́кое дыха́ніе... Ева́нгеліе Луки́, зача́ло 44.

По 50-мъ псалмѣ́ стихи́ра, гла́съ 2:

Кто́ исповѣ́сть по достоя́нію труды́ и по́двиги твоя́, [преподо́бне о́тче? Отне́лѣ бо прія́лъ еси́ а́нгельскій на ся́ о́бразъ, не да́лъ еси́ тѣ́лу своему́ упокое́нія, но о́чи возводи́лъ ко Го́споду, устнѣ́ же устро́евалъ еси́ вы́ну на моли́тву, слу́хъ тво́й простира́лъ еси́ къ слы́шанію сло́ва Бо́жія, ру́цѣ утвержда́лъ еси́ на копа́ніе гробо́въ. Блаже́нъ еси́, всѣ́ми у́ды Христу́ рабо́тавъ, Ему́же ны́нѣ предстоя́, моли́ умири́ти мíръ и спасти́ ду́ши на́ша].

Кано́нъ пра́здника на 6 и преподо́бныхъ на 6, гла́съ 1.

Пѣ́снь 1.

Ирмо́съ: Пои́мъ, вси́ лю́діе, отъ го́рькія рабо́ты фарао́ни Изра́иля Измѣ́ншему и во глубинѣ́ морстѣ́й нога́ми немо́крыми Наста́вльшему пѣ́снь побѣ́дную, я́ко просла́вися.

Пои́мъ вси́, соше́дшеся въ пречестны́й хра́мъ се́й восхвали́ти Бо́жія уго́дника па́мять, я́ко сла́вно о и́мени Христа́ Го́спода своего́ просла́вися.

Ангельскій о́бразъ на ся́ пріе́мь, а́нгельски въ пеще́рѣ пожи́лъ еси́, свя́те, копа́я же свои́ми рука́ми мѣста́ мно́га бра́тіи усо́пшей, преше́лъ еси́ отъ си́хъ въ мѣста́ кро́ва ди́вна пѣ́ти Го́сподеви: сла́вно просла́вися.

Сме́рть да имѣ́еши предъ очи́ма свои́ма, о́тче, гро́бы копа́лъ еси́ бра́тіямъ, ко Христу́ отше́дшимъ, на плеща́хъ пе́рсть износя́, тѣ́мже по кончи́нѣ честна́ предъ Го́сподемъ сме́рть твоя́ бы́сть, блаже́нне, и со а́нгелы прославля́ющемуся въ святы́хъ Свои́хъ Бо́гу пое́ши: я́ко просла́вися.

Любве́ ра́ди ко всѣ́мъ тружда́яся, ту́не устроя́лъ еси́ гро́бы, ничесо́же ни отъ кого́ пріе́мля, ча́я то́кмо воздая́нія отъ Бо́га, тѣ́мже ны́нѣ мзда́ твоя́ мно́га на небеси́, преподо́бне, идѣ́же пое́ши Бо́гу: я́ко просла́вися.

Богоро́диченъ: Пресла́вную Тя́ Ма́терь Бо́жію во всѣ́хъ родѣ́хъ кто́ досто́йно восхвали́ти мо́жетъ? Тѣ́мже ни а́зъ вы́ше ума́ дерза́ю, то́кмо а́нгельское приношу́ цѣлова́ніе: ра́дуйся.

Пѣ́снь 3.

Ирмо́съ: Утверди́ мене́, Христе́, на недви́жимомъ ка́мени за́повѣдей Твои́хъ и просвѣти́ мя свѣ́томъ лица́ Твоего́: нѣ́сть бо свя́тъ, па́че Тебе́, Человѣколю́бче.

Утвержде́нъ на ка́мени за́повѣдей Госпо́днихъ, до́мъ Ду́ха Свята́го хотя́ бы́ти, окова́лъ еси́ чре́сла твоя́ желѣ́зы, блаже́нне, е́же на вся́къ де́нь, проходя́щи ду́шу твою́, разжже́ тя́ пѣ́ти: нѣ́сть свя́тъ, па́че Тебе́, Го́споди.

Поста́вивъ врата́ — моли́тву чи́сту, и стѣ́ну тве́рду — поще́ніе зѣ́льно, [отъ креста́ бо мѣ́дяна то́кмо пія́лъ еси́ во́ду], хра́мъ непристу́пенъ и стра́шенъ враго́мъ показа́лся еси́, о́тче, и́хже до конца́ побѣди́въ, съ весе́ліемъ воспѣва́лъ еси́: нѣ́сть свя́тъ, па́че Тебе́, Го́споди.

Бдѣ́ніе, по́стъ и препоя́саніе чре́слъ желѣ́зы, а́ки ору́жіе, на ся́ пріе́мь, къ боре́нію борю́щія тя́ плотски́ми страстьми́ сме́рти изше́лъ еси́, тѣ́мже даде́ тебе́ Госпо́дь облада́ти е́ю, я́ко взыва́лъ еси́: нѣ́сть свя́тъ, па́че Тебе́, Го́споди.

Аки плѣ́нникъ, сме́рть бя́ше тебѣ́, свя́те, нево́лею бо повину́ющися, возвраща́ше ме́ртвыя, и пребыва́ху жи́ви, до́ндеже повелѣ́лъ еси́ усну́ти па́ки, и до о́бщаго Воскресе́нія во гробѣ́хъ пребыва́ти.

Богоро́диченъ: Плѣне́нна мя́ су́ща неви́димыми враги́, свободи́, Влады́чице, ско́рымъ предста́ніемъ Твои́мъ и си́лою, а́ки огне́мъ, о́ныя прогоня́ющею, я́ко да спасе́нъ бы́въ Тобо́ю, вы́ну воспою́ Ти́: нѣ́сть ины́я Предста́тельницы, ра́звѣ Тебе́, Пречи́стая Влады́чице мíру.

Сѣда́ленъ, гла́съ 8:

Воздержа́ніемъ живы́й, есте́ственныя стра́сти ду́ху покори́лъ еси́, бы́въ а́нгелъ во пло́ти и въ зако́нѣ повелѣ́нная дѣ́ломъ соверши́въ, тѣ́мже прія́лъ еси́ чудотворе́нія да́ръ отъ Бо́га: ме́ртвыя сло́вомъ на живо́тъ воздвиза́ти. Преста́вився же са́мъ къ животу́ вѣ́чному, моли́ о на́съ, свя́те, изба́витися отъ вѣ́чныя сме́рти чту́щимъ любо́вію святу́ю па́мять твою́, Ма́рко досточу́дне. [Два́жды.]

Сла́ва, и ны́нѣ, богоро́диченъ:

Па́че естества́ заче́ншая и па́че естества́ ро́ждшая Зижди́теля Твоего́ и Бо́га, моли́ о на́съ, при́сно согрѣша́ющихъ, да, свобожде́нни су́ще, любо́вію воспое́мъ Тя́, Чи́стая Дѣ́во Марíе.

Пѣ́снь 4.

Ирмо́съ: Ве́лія та́йна Твоего́, Христе́, смотре́нія: сію́ бо свы́ше прови́дя богозри́тельно, Авваку́мъ изше́лъ еси́, вопія́ше Тебѣ́, во спасе́ніе люде́й Твои́хъ, Человѣколю́бче.

Ве́лія та́йна словесе́ Твоего́, Христе́, ре́клъ бо еси́: вѣ́руяй въ Мя́, дѣла́, я́же Азъ творю́, и то́й сотвори́тъ. Якоже Са́мъ воздви́глъ еси́ уме́ршаго Ла́заря сло́вомъ, та́ко и уго́днику Твоему́ да́лъ еси́ си́лу воздви́гнути уме́ршаго глаго́ломъ и возлія́ти еле́й на ся́ во удивле́ніе всѣ́мъ предстоя́щимъ, Человѣколю́бче.

Бо́гъ на́шъ ми́ръ е́сть, и средостѣ́ніе вражды́ разруша́яй, да не бу́детъ на раба́ Его́ вражда́ неугото́ванного ра́ди уме́ршему гро́ба, чудотворе́ніемъ отъя́тъ зло́бу сію́, подви́гну бо ду́хъ уго́дника Своего́ рещи́ уме́ршему: бра́те, тѣ́сно е́сть мѣ́сто, са́мъ подви́гнися и возлíй еле́й на ся́. И су́щу сло́ву дѣ́ломъ, вси́ взыва́ху: сла́ва Ти́, Человѣколю́бче.

Въ простотѣ́ се́рдца и въ смире́ніи глубо́цѣ воззва́ преподо́бный, и Госпо́дь услы́ша и́, повелѣ́ ду́хъ сво́й ме́ртвому прія́ти и повелѣ́нное сотвори́ти, возлія́ бо еле́й на ся́, и отда́въ сосу́дъ, па́ки у́спе, е́же вси́, со стра́хомъ и у́жасомъ ви́дяще, возопи́ша: сла́ва смотре́нію Твоему́, Человѣколю́бче.

Смире́ннаго Твоего́ пеще́рника, Го́споди, моли́тва прохожда́ше о́блаки, его́же и мы́ во умилостивле́ніе Тебѣ́ приво́димъ и про́симъ: ми́лостивъ на́мъ бу́ди, рабо́мъ Твои́мъ, отыми́ вражду́ люде́й Твои́хъ, да́ждь ми́ръ Тво́й во спасе́ніе на́ше, Человѣколю́бче.

Богоро́диченъ: Яже Живо́тъ вѣ́чный Ро́ждшая и рождество́мъ Твои́мъ всѣ́хъ оживотвори́вшая, на́съ, грѣхо́внымъ я́домъ умерщвле́нныхъ, оживи́ и еле́емъ ми́лости Твоея́ уще́дри, да вопіе́мъ Ти́, Влады́чице: Ты́ еси́ вина́ и избавле́ніе жи́зни на́шея.

Пѣ́снь 5.

Ирмо́съ: Отъ но́щи у́тренююще, пое́мъ Тя́, Христе́, Отцу́ Собезнача́льна и Спа́са ду́шъ на́шихъ, ми́ръ мíрови пода́ждь, Человѣколю́бче.

Отъ но́щи у́тренюя въ моли́твѣ къ Бо́гу, блаже́нне, претружде́нъ, не угото́валъ еси́ уме́ршему гро́ба, сего́ ра́ди ре́клъ еси́: иди́, рцы́ уме́ршему, да пожде́тъ до у́тра, до́ндеже ископа́ю мѣ́сто, и погребе́мъ и́, прославля́юще Человѣколю́бца.

По словеси́ твоему́, преподо́бне, по́сланный егда́ рече́: бра́те, глаго́летъ ти́ Ма́рко: еще́ да поживе́ши ма́ло. Абіе отве́рзе о́чи уме́рый всѣ́мъ зря́щимъ и пребы́сть до у́тра. Оле чудесе́! я́коже Ты́ Са́мъ, Бо́же, облада́еши живото́мъ и сме́ртію, си́це и рабо́мъ Свои́мъ подае́ши облада́ти, Человѣколю́бче.

Въ нощи́ и во дни́ тружда́яся, угото́валъ еси́ погребе́нію мѣ́сто и ре́клъ еси́, свя́те: глаго́лите уме́ршему — отда́ждь ду́хъ тво́й Бо́гу. Онъ же, послу́шавъ тя́, смѣжи́въ очеса́, преста́вися, и вси́, уди́вльшеся сло́ва твоего́ си́лѣ, просла́виша Бо́га Человѣколю́бца.

Стра́нно чу́до: ме́ртвымъ воздвиза́ти уме́ршія; но лю́бящему Бо́га вся́ поспѣ́шествуютъ во благо́е. Яже вся́ къ созида́нію на́шему быва́ютъ, да теплѣ́йшею любо́вію притеце́мъ ко Влады́цѣ и со преподо́бными просла́вимъ Его́, я́ко благоутро́бнаго Человѣколю́бца.

Богоро́диченъ: Стра́нно чу́до: ка́ко во чре́вѣ пло́тстѣмъ Огнь Боже́ственный прія́ла еси́, Дѣ́во, и пребыла́ неопали́ма, я́коже иногда́ купина́ несгара́ема, е́же все́ бы́сть, да на Тебѣ́, Чи́стая, сбу́дется смотре́нія Бо́жія та́инство.

Пѣ́снь 6.

Ирмо́съ: Проро́ка спа́слъ еси́ отъ ки́та, Человѣколю́бче, и мене́ изъ глубины́ прегрѣше́ній возведи́, молю́ся.

Славолю́бія оскверне́ніе очища́я, повелѣ́лъ еси́, блаже́нне, уме́ршему Іоа́нну, да вы́шшее Ѳео́филу пода́стъ мѣ́сто. О, чудесе́! послу́шавъ, ме́ртвый пре́йде на ни́жнее мѣ́сто, и вси́ испо́лнишася стра́ха, ты́ же, свя́те, со смире́ніемъ поклони́лся еси́, глаго́ля: отъ истлѣ́нія вражды́ возведи́ мя, Бо́же, молю́тися.

Припа́дающу къ нога́мъ твои́мъ Ѳео́филу и прося́щу оставле́нія, ре́клъ еси́, преподо́бне: Госпо́дь, Са́мъ отъе́мляй вражду́, повелѣ́ уме́ршему за любо́вь пода́ти тебѣ́ старѣ́йшинство, ты́ же да изведе́шися отъ мы́сленнаго ки́та, славолю́біемъ тя́ пояда́ющаго, Человѣколю́бцу моли́ся.

Бы́сть, а́ки гро́мъ, сло́во твое́, о́тче, его́же стра́ха убоя́ся Ѳео́филъ, мнѣ́въ, я́ко ту́ па́дъ, у́мретъ, но, ма́ло прише́дъ въ себе́ и вше́дъ въ ке́ллію, пребы́сть про́чая лѣ́та пла́чася, глаго́ля: отъ истлѣ́нія мя́, Бо́же, возведи́.

Наказа́ніе твое́, о́тче блаже́ннѣйшій, въ толи́кое приведе́ смире́ніе Ѳео́фила, я́ко никто́же можа́ше его́ отъ пла́ча востягну́ти, но бы́ша ему́ сле́зы бра́шно и питіе́, де́нь бо и но́щь взыва́ше: отъ грѣхопаде́нія мя́, Бо́же, возведи́, молю́тися.

Богоро́диченъ: Въ тлѣ́ніе славолю́бія ми́ попо́лзшуся и умиле́нія неиму́щу, пода́ждь, Влады́чице, сле́зъ то́ки, да, омы́въ оскверне́ніе души́, чи́стъ явлю́ся лицу́ Бо́жію, внегда́ яви́тимися сла́вѣ Его́.

Конда́къ, гла́съ 8:

Врача́ изря́дна и чудотво́рца, любо́вію, вѣ́рніи, ублажи́мъ, прося́ще его́, да моли́твами свои́ми уврачу́етъ на́ша стра́сти, душе́вныя и тѣле́сныя, и́мать бо на сіе́ благода́ть отъ Бо́га, и прого́нитъ ду́хи лука́выя отъ всѣ́хъ, вѣ́рно ко гро́бу его́ притѣка́ющихъ и зову́щихъ: ра́дуйся, Ма́рко, цѣли́телю не́мощей на́шихъ.

Икосъ:

Ангеловъ и всея́ тва́ри Творца́ воспѣ́вша и ангелови́днымъ житіе́мъ Тому́ на земли́ всегда́ послужи́вша, со а́нгелы же ны́нѣ трисвяту́ю пѣ́снь непреста́нно пою́ща, восхваля́емъ тя́, всеблаже́нне, си́це: ра́дуйся, отве́ргшійся всѣ́хъ земны́хъ веще́й; ра́дуйся, у́мъ сво́й ве́сь горѣ́ впери́вый. Ра́дуйся, я́ко ме́ртвъ, жи́во погребы́йся въ пеще́рѣ; ра́дуйся, я́ко въ то́й мно́ги труды́ и по́ты излія́вый. Ра́дуйся, мно́гимъ святы́мъ въ не́й гро́бы ископа́вый; ра́дуйся, ме́ртвыя повелѣ́ніемъ свои́мъ воздви́гнувый. Ра́дуйся, Іоа́нна ме́ртваго подви́гнутися отъ мѣ́ста сотвори́вый; ра́дуйся, Ѳео́фила ко спасе́нію наста́вивый. Ра́дуйся, кре́стъ ве́лій и по́ясъ желѣ́зенъ нетя́жестнѣ на себѣ́ носи́вый; ра́дуйся, смире́нное тѣ́ло свое́ просфиро́ю еди́ною и водо́ю умѣ́ренною съ креста́ дово́льствовавый. Ра́дуйся, кресто́мъ свои́мъ мно́ги стра́сти врачу́яй; ра́дуйся, ко гро́бу твоему́ притѣка́ющимъ всѣ́мъ по́мощь въ ну́ждахъ подава́яй. Ра́дуйся, Ма́рко, цѣли́телю не́мощей на́шихъ.

Пѣ́снь 7.

Ирмо́съ: Образу служи́ти, мусикíйскому согла́сію созыва́ющу лю́ди, отъ пѣ́сней Сіо́нскихъ пою́ще оте́чески, о́троцы Дави́довы мучи́телево разори́ша злочести́вое велѣ́ніе и пла́мень въ ро́су преложи́ша, пѣ́снь воспѣва́юще: превозноси́мый отце́въ и на́шъ Бо́же, благослове́нъ еси́.

Лицу́ Бо́жію яви́тися егда́ прихожда́ше ти́ вре́мя, призва́лъ еси́, о́тче, блаже́ннаго Ѳео́фила, ре́къ: прости́ ми́, я́ко оскорби́хъ тя́, се́ бо отхожду́ уже́, ты́ же моли́ за мя́, да сподо́бимся о́ба со святы́ми пѣ́ти: Бо́же, благослове́нъ еси́.

Словеса́ твоя́, свя́те, пла́чущему рыда́нія приложи́ша, и́бо не терпя́ себе́ оста́вленіе отъ тебе́ бы́ти, глаго́лаше: вѣ́мъ, я́ко услы́шитъ тя́ Госпо́дь, а́ще восхо́щеши поя́ти мя́ съ собо́ю пѣ́ти: Бо́же, благослове́нъ еси́.

Пла́чущегося утѣша́я, ре́клъ еси́, преподо́бне, да не скорби́тъ, ни да и́щетъ ви́дѣти чу́вственнаго свѣ́та, зане́ мы́сленныма очи́ма, о грѣсѣ́хъ рыда́я, свѣ́тъ разу́мный уви́дитъ и сподо́бится блаже́нства пла́чущихъ, пла́чущіи бо утѣ́шатся, пою́ще: Бо́же, благослове́нъ еси́.

Во утѣше́ніе скорбя́щему извѣсти́лъ еси́, о́тче, зна́меніе отше́ствія его́ къ Бо́гу сіе́: я́ко пре́жде тре́хъ дне́й кончи́ны своея́ прозрѣ́ти и́мать, и та́ко пре́йдетъ къ неплаче́внымъ мѣсто́мъ въ непристу́пномъ свѣ́тѣ со святы́ми пѣ́ти: Бо́же, благослове́нъ еси́.

Богоро́диченъ: Въ ско́рби отча́янія моего́ су́щи, утѣше́нія не и́мамъ, тѣ́мъ къ Тебѣ́, Влады́чице ми́ра, прибѣга́ю, глаго́ля: Ра́досте моя́, изба́ви мя́ отъ обыше́дшихъ мя́, обыдо́ша бо мя́ пси́ мно́зи и нѣ́сть могу́щаго изъя́ти мя́, ра́звѣ Тебе́, Благослове́нная Дѣ́во.

Пѣ́снь 8.

Ирмо́съ: Въ пла́мени о́гненнѣ горя́щія пе́щи сохра́ншаго дѣ́ти и во зра́цѣ а́нгела Снизше́дшаго къ ни́мъ, по́йте Го́спода и превозноси́те Его́ во вѣ́ки.

Святы́й Ду́хъ, проро́чествія да́ръ подава́яй, приведе́ въ сбы́тіе словеса́ твоя́, преподо́бне, по кончи́нѣ твое́й, ду́хъ сво́й преда́лъ еси́ въ ру́цѣ Бо́гу, Ему́же ны́нѣ предстоя́, пое́ши съ проро́ки: Го́спода по́йте и превозноси́те Его́ во вѣ́ки.

Словеса́ твоя́ бы́ша, преподо́бне, блаже́нному Ѳео́филу па́че сребра́ разжже́на, я́же помина́я, а́ще и сугу́бо рыда́ше, но не возмо́же угаси́ти, я́ко распаля́хуся въ се́рдцѣ, и́бо по вся́ дни́ ожида́ше кончи́ны своея́, хотя́й отыти́ ко Го́споду, хвала́ми превозноси́ти Его́ во вѣ́ки.

Ве́лій умиле́нія да́ръ и неоскудѣва́емый исто́чникъ словесы́ твои́ми, блаже́нне, ископа́лъ еси́ въ се́рдцѣ Ѳео́фила: ели́ко бо въ сосу́дъ излива́ше, толи́ко мно́жахуся сле́зныя струи́, и́миже погаси́ стра́стный пла́мень, возбраня́ющій пѣ́ти Го́спода во вѣ́ки.

Тро́иченъ: Трисія́тельный Свѣ́те, Тро́ице Свята́я, обѣща́ніе исполня́я уго́дника Твоего́ Ма́рка, просвѣти́лъ еси́ зѣ́ницы пла́чущаго, и пра́во узрѣ́ свѣ́тъ чу́вственныма очи́ма, мы́сленныма же отше́ствіе свое́ къ Тебѣ́, Бо́гу своему́, Ему́же всѣ́мъ се́рдцемъ жела́ше пѣ́ти со святы́ми во вѣ́ки.

Богоро́диченъ: Свѣ́тъ и́стинный ро́ждшая, Пречи́стая, во тмѣ́ мя́ грѣхолю́бія заблужда́юща и ви́дѣнія покая́нія неиму́ща, освѣти́ благода́тію Твое́ю: свѣща́ бо еси́, явля́ющая ско́ро су́щимъ во тмѣ́ свѣ́тъ, Богоро́дице Дѣ́во.

Пѣ́снь 9.

Ирмо́съ: Тебе́, свѣ́тлую свѣщу́ и Ма́терь Бо́жію, пречу́дную сла́ву и вы́шшую всѣ́хъ тва́рей, пѣ́сньми велича́емъ.

По словеси́ твоему́, свя́те, пре́жде тре́хъ дне́й увѣ́давъ отше́ствіе свое́, Ѳео́филъ покая́нія словеса́ изрече́, а́біе же во утоле́ніе рыда́нія того́, предста́въ, а́нгелъ показа́ сосу́дъ, напо́лненъ слеза́ми, прія́тно Бо́гу покая́ніе его́ ублажа́я.

Твои́мъ наказа́ніемъ, о́тче, Ѳео́филъ богому́дрый въ жи́зни свое́й сѣ́я слеза́ми, преста́вився же къ оби́телемъ небе́снымъ, ра́достныя пожина́етъ кла́сы и трудо́въ свои́хъ ны́нѣ пріе́млетъ возме́здіе, отъ всѣ́хъ во вѣ́ки ублажа́емь.

Въ юдо́лѣ плаче́внѣ изво́листе, отцы́ достоблаже́нніи, вся́ лѣ́та живота́ своего́ слеза́ми ку́плю дѣ́яти, да взы́щете многоцѣ́ннаго би́сера — Іису́са, Имже отъ вѣ́чныя сме́рти искупи́вшеся, ны́нѣ на мѣ́стѣ свѣ́тлѣ ра́дуетеся, ублажа́еми.

Дво́ицу оте́цъ, Ма́рка и Ѳео́фила, приво́димъ Тебѣ́ въ моли́тву, въ двои́хъ хотѣ́ніихъ и дѣ́йствіихъ Су́щему, Христе́ Бо́же, и́хже моле́ніе пріе́мь и отъ вра́жія на́съ кова́рства сохраня́я, Ду́хомъ Твои́мъ Святы́мъ наста́ви на́съ во вѣ́ки Тя́ велича́ти.

Богоро́диченъ: Ка́ко Тя́ ублажи́мъ, Чи́стая Дѣ́во, Юже небе́сныя си́лы по достоя́нію блажи́ти не мо́гутъ? Ка́ко просла́вимъ сла́вимую отъ всѣ́хъ родо́въ и Благослове́нную христіа́нъ всѣ́хъ Ма́терь?

Свѣти́ленъ:

Бы́ша сле́зы твоя́, а́ки благово́нное мѵ́ро, и́миже славолю́бія оскверне́ніе очи́стилъ еси́, и ны́нѣ въ вы́шнихъ оби́телехъ, я́ко звѣзда́ пресвѣ́тлая, сія́я, озари́ на́съ, во тмѣ́ грѣхолю́бія живу́щихъ, и моли́, Ѳео́филе, о́тче на́шъ, съ Ма́ркомъ блаже́ннымъ Человѣколю́бца Христа́, да, во свѣ́тѣ повелѣ́ній Его́ здѣ́ ходя́ще, сподо́бимся зрѣ́ти свѣ́тъ небе́сныя сла́вы. [Два́жды.]

Сла́ва, и ны́нѣ, пра́здника:

Посѣти́лъ ны́ е́сть свы́ше Спа́съ на́шъ, Восто́къ восто́ковъ, и су́щіи во тмѣ́ и сѣ́ни обрѣто́хомъ и́стину, и́бо отъ Дѣ́вы роди́ся Госпо́дь.

На хвали́техъ стихи́ры на 6. Пра́здника на 3 и преподо́бныхъ 3, гла́съ 8. Самогла́сны:

Вся́кую сла́дость житія́ сего́* вы́шнія ра́ди сла́дости оплева́лъ еси́,* жесто́кому пути́ достоблаже́нныхъ оте́цъ поревнова́въ,* и страсте́й пе́щь мно́гими твои́ми труды́* угаси́ти потща́лся еси́,* бы́въ мона́шествующихъ честно́е украше́ніе,* тѣ́мже со а́нгелы ны́нѣ* въ вы́шнихъ ра́дуяся,* моли́ся о на́съ,* Ма́рко преподо́бне.

Узкимъ и тѣ́снымъ путе́мъ* отъ земли́ въ сла́ву небе́сную ше́ствовалъ еси́,* мно́гимъ по́двигомъ и ско́рбемъ* любве́ ра́ди Бо́жія предава́лся еси́,* тѣ́мъ ны́нѣ Влады́чню престо́лу предстоя́,* наслажда́ешися Того́ свѣ́тлостей,* и на́мъ, у́бо свѣ́тло твою́ па́мять чту́щимъ,* моли́твами твои́ми* пода́ждь Боже́ственныхъ прича́стіе* и вѣ́чныя ра́дости прія́тіе,* Ма́рко преподо́бне.

Возше́дши мы́сленно* къ Свѣ́ту Незаходи́мому, сла́вне,* и тмы́ житія́ изба́вльшися,* Вседержи́телю, Трисо́лнечному Свѣ́ту,* съ вы́шними чи́нми предста́лъ еси́,* отню́дуже низпуща́емыя свѣ́тлости* луче́ю озари́тися и на́мъ,* ра́цѣ моще́й твои́хъ кла́няющимся* и честно́е успе́ніе твое́ сла́вящимъ,* испроси́ моли́твами твои́ми,* Ма́рко преподо́бне.

Сла́ва, гла́съ 1:

До́брыя ло́зы виногра́да Христо́ва, поле́зная на́мъ израсти́вшія грозды́, отъ ни́хже истѣка́етъ вино́ благово́нное, веселя́щее притѣка́ющихъ сердца́, восхвали́ти любо́вію потщи́мся: о́ваго у́бо ви́дяще кре́стъ и вери́ги желѣ́зныя, лобыза́емъ мо́щи, та́ поне́сшія, и пріе́млемъ страсте́й исцѣле́ніе; о́ваго же окружа́юще, помина́емъ сле́зы его́ и пріе́млемъ умиле́ніе. О, до́брое сосло́віе достоблаже́нныхъ оте́цъ! Тѣ́мже мо́лимъ вы́, Ма́рко богоно́се съ Ѳео́филомъ, я́ко предстоя́ще Христу́ Бо́гу, испроси́те рабо́мъ ва́шимъ прія́ти грѣхо́въ оставле́ніе и ве́лію ми́лость.

И ны́нѣ, пра́здника, гла́съ то́йже:

Не́бо и земля́ дне́сь совокупи́шася ро́ждшуся Христу́, дне́сь Бо́гъ на зе́млю пріи́де, и человѣ́къ на небеса́ взы́де, дне́сь ви́димь е́сть пло́тію, естество́мъ неви́димый, человѣ́ка ра́ди. Сего́ ра́ди и мы́, славосло́вяще, возопіе́мъ Ему́: сла́ва въ вы́шнихъ Бо́гу, и на земли́ ми́ръ, дарова́ бо прише́ствіе Твое́, Спа́се на́шъ, сла́ва Тебѣ́.

Славосло́віе вели́кое, [ектеніи́] и отпу́стъ.



НА ЛИТУРГІИ,
Слу́жба [пра́зднику и] преподо́бнымъ.

[Блаже́нна пра́здника, пѣ́снь 7-я, на 4, и преподо́бнымъ, пѣ́снь 6-я, на 4. Проки́менъ, пра́здника, гла́съ 8: Вся́ земля́ да покло́нится Тебѣ́ и пое́тъ Тебѣ́, да пое́тъ же и́мени Твоему́, Вы́шній. Сти́хъ: Воскли́кните Го́сподеви, вся́ земля́, по́йте же и́мени Его́, дади́те сла́ву хвалѣ́ Его́. И преподо́бнымъ, гла́съ 7: Честна́ предъ Го́сподемъ сме́рть преподо́бныхъ Его́. Апо́столъ преподо́бнымъ, къ Гала́томъ, зача́ло 213. Аллилу́ія пра́здника, гла́съ 1: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Сти́хъ: Де́нь дни́ отрыга́етъ глаго́лъ, и но́щь но́щи возвѣща́етъ ра́зумъ. И преподо́бнымъ, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Ева́нгеліе отъ Матѳе́я, зача́ло 43, или́ отъ Луки́, зача́ло 24. Прича́стенъ пра́здника: Избавле́ніе посла́ Госпо́дь лю́демъ Свои́мъ. И преподо́бнымъ: Ра́дуйтеся пра́ведніи о Го́сподѣ, пра́вымъ подоба́етъ похвала́.]

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 40 – 45 об.

/ Къ оглавленію раздѣла /


Наверхъ / Къ титульной страницѣ

0