Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 27-й де́нь.
Свята́го апо́стола, первому́ченика и архидіа́кона Стефа́на.

[Зри:] Аще е́сть первому́ченика хра́мъ, и быва́етъ бдѣ́ніе. На ма́лѣй вече́рни: стихи́ры пра́здника и апо́стола, по обы́чаю. На вели́цѣй вече́рни, на Го́споди воззва́хъ: стихи́ры пра́здника и апо́стола пое́мъ на 8. Преподобноисповѣ́дника же [Ѳео́дора Начерта́ннаго] слу́жба пое́тся на повече́ріи во и́нъ де́нь.

НА МАЛѢЙ ВЕЧЕРНИ, [1]
На Го́споди воззва́хъ: стихи́ры [на 4], гла́съ 4. Подо́бенъ: Яко до́бля.

Соше́дшеся, празднолю́бцы, та́йно,* моле́бную и честну́ю пра́зднуемъ* первому́ченика дне́сь па́мять,* въ се́й пріе́млюще исцѣле́нія* честны́хъ дарова́ній его́,* и возопіи́мъ:* достопѣ́тый му́чениче,* моли́ изба́витися отъ бѣ́дъ* творя́щимъ па́мять твою́. [Два́жды.]

Яко степе́ни* и лѣ́ствица на небе́сный восхо́дъ,* ка́менная мета́нія бы́ша тебѣ́.* На ня́же вше́дъ, ви́дѣлъ еси́* стоя́ща Го́спода одесну́ю Отца́,* тебѣ́ тезоимени́тъ вѣне́цъ простира́юща* десни́цею живоно́сною,* Его́же бли́зъ я́ко добропобѣ́дникъ, предстои́ши* и страда́льцевъ верхо́вный.

Ду́ха благода́тію* просвѣти́въ помышле́ніе,* зра́комъ я́ко а́нгелъ* яви́лся еси́, Стефа́не,* облиста́вшу тѣлеси́ вну́треннею свѣ́тлостію* и зарю́ душе́вную явля́ющу ви́дящимъ,* ея́же ра́ди получи́лъ еси́ и свѣ́та зрѣ́ніе,* небесе́мъ, тебѣ́ пресла́вно отве́рзенымъ,* нача́ло му́чениковъ и похвало́.

Сла́ва, гла́съ 5. [Кипріа́ново]:

Первому́чениче апо́столе и перводіа́коне, две́рь му́чениковъ и сла́ва пра́ведныхъ, апо́столовъ похвало́, ты́ небеса́ ви́дѣлъ еси́ отве́рста, на суди́щи стоя́, и Сы́на Бо́жія, одесну́ю стоя́ща неви́димаго Отца́. Тѣ́мже, я́ко а́нгелъ, возсія́въ лице́мъ, въ ра́дости взыва́лъ еси́ о побива́ющихъ тя́ ка́меніемъ: не поста́ви и́мъ грѣха́ сего́. И ны́нѣ испроси́ отъ любве́ хва́лящимъ тя́ очище́ніе грѣхо́въ и ве́лію ми́лость.

И ны́нѣ, пра́здника, [гла́съ то́йже. Іоа́нна мона́ха:

Волсви́, перси́дстіи ца́ріе, позна́вше я́вѣ на земли́ ро́ждшагося Царя́ Небе́снаго, отъ свѣ́тлыя звѣзды́ води́ми, достиго́ша въ Виѳлее́мъ, да́ры нося́ще избра́нныя, зла́то, и лива́нъ, и сми́рну, и, па́дше, поклони́шася: ви́дѣша бо въ верте́пѣ Младе́нца лежа́ща безлѣ́тнаго.]

На стихо́внѣ стихи́ры, гла́съ 2:

Пе́рвый въ діа́конѣхъ, пе́рвый и въ му́ченицѣхъ показа́лся еси́, всесвяты́й Стефа́не: пу́ть бо бы́лъ еси́ святы́мъ, и мно́ги Го́споду приве́лъ еси́ му́ченики. Тѣ́мъ не́бо тебѣ́ отве́рзеся, и Бо́гъ тебѣ́ яви́ся. Того́ моли́ спасти́ся душа́мъ на́шимъ.

Сти́хъ: Пра́ведникъ, я́ко фи́никсъ, процвѣте́тъ, я́ко ке́дръ, и́же въ Лива́нѣ, умно́жится.

Во святы́ню одѣ́ялся еси́, Стефа́не блаже́нне, первому́чениче и перводіа́коне, а́нгеловъ соприча́стниче: хода́тайствуй и моли́ся о на́съ Спа́су, Го́споду безгрѣ́шному.

Сти́хъ: Насажде́ни въ дому́ Госпо́дни во дво́рѣхъ Бо́га на́шего процвѣту́тъ.

Первому́ченика и до́бляго Христо́ва уго́дника Стефа́на перводіа́кона досто́йно почти́мъ: то́й бо, стоя́ посреди́ беззако́нникъ, одесну́ю Отца́ Сы́на ви́дѣ.

Сла́ва, гла́съ 8:

Ра́дуйся о Го́сподѣ, вѣнцено́сче Стефа́не, подо́бникъ Влады́ки, зане́же и первому́ченикъ бы́лъ еси́ Христа́ Царя́ на́шего и ле́сть беззако́нныхъ іуде́й упраздни́лъ еси́, моля́ся о на́съ ко Го́споду.

И ны́нѣ, пра́здника, [гла́съ то́йже. Іоа́нна мона́ха:

Ка́ко изреку́ вели́кое та́инство? Безпло́тный воплоща́ется, Сло́во одебелѣва́етъ, Неви́димый ви́дится, и Неосяза́емый осяза́ется, и Безнача́льный начина́ется: Сы́нъ Бо́жій, Сы́нъ человѣ́чь быва́етъ, Іису́съ Христо́съ вчера́, и дне́сь, То́йже и во вѣ́ки].

Тропа́рь свята́го, гла́съ 4:

По́двигомъ до́брымъ подвиза́лся еси́, первому́чениче Христо́въ, и апо́столе, и мучи́телей обличи́лъ еси́ нече́стіе: ка́меніемъ бо побіе́нъ отъ ру́къ беззако́нныхъ, вѣне́цъ отъ я́же свы́ше десни́цы прія́лъ еси́ и къ Бо́гу взыва́лъ еси́, вопія́: Го́споди, не поста́ви и́мъ грѣха́ сего́.

[Сла́ва, и ны́нѣ, пра́здника, гла́съ 4:

Рождество́ Твое́, Христе́ Бо́же нашъ, возсія́ мíрови свѣ́тъ ра́зума, въ не́мъ бо звѣзда́мъ служа́щіи звѣздо́ю уча́хуся Тебѣ́ кла́нятися, Со́лнцу Пра́вды, и Тебе́ вѣ́дѣти съ высоты́ Восто́ка. Го́споди, сла́ва Тебѣ́].


НА ВЕЛИЦЕЙ ВЕЧЕРНИ,
[Блаженъ мужъ.., 1-й антифонъ.] На Господи воззвахъ: [стихиры праздника 3 и апостола 5. Стихи́ры пра́здника, гла́съ 6. Подо́бенъ: Ангельскія.

Вождеству́етъ пра́здникъ ра́достію вся́ тва́рь,* и небеса́ съ на́ми ра́дуются:* во я́слѣхъ бо Зижди́тель,* отъ Дѣ́вы воплоща́емый,* и въ Виѳлее́мѣ Іуде́йстѣмъ* Младе́нецъ ви́дѣнъ бы́сть пресла́вно.* Лю́діе, рце́мъ:* благослове́нъ Рожде́йся,* Бо́же на́шъ, сла́ва Тебѣ́.

Да земны́я небе́сны сотвори́ши,* прише́лъ еси́ на зе́млю, вопло́щся отъ Дѣ́вы,* и Младе́нецъ ви́димъ бы́лъ еси́,* Сло́во Сы́й Превѣ́чное,* волхвы́ подви́глъ еси́ отъ Перси́ды* въ Твое́ поклоне́ніе, Ще́дре.* Съ ни́ми же взыва́емъ:* благослове́нъ Рожде́йся,* Бо́же на́шъ, сла́ва Тебѣ́.

Мла́до на́съ ра́ди, Іису́се,* яви́лся еси́ Отроча́,* изъ Отца́ пре́жде вѣ́къ возсія́въ,* обветша́вшія преступле́ніемъ* хотя́ вся́ обнови́ти человѣ́ки.* Тѣ́мъ Тебѣ́ вси́* благода́рно при́сно зове́мъ:* благослове́нъ Рожде́йся,* Бо́же на́шъ, сла́ва Тебѣ́].

Стихи́ры апо́стола, гла́съ 4. Подо́бенъ: Яко до́бля.

Ду́ха благода́тію* просвѣти́въ помышле́ніе,* зра́комъ я́ко а́нгелъ* яви́лся еси́, Стефа́не,* облиста́вшу тѣлеси́ вну́треннею свѣ́тлостію* и зарю́ душе́вную явля́ющу ви́дящимъ,* ея́же ра́ди получи́лъ еси́ и свѣ́та зрѣ́ніе,* небесе́мъ, тебѣ́ пресла́вно отве́рзенымъ,* нача́ло му́чениковъ и похвало́. [Два́жды.]

Яко степе́ни* и лѣ́ствица на небе́сный восхо́дъ,* ка́менная мета́нія бы́ша тебѣ́.* На ня́же вше́дъ, ви́дѣлъ еси́* стоя́ща Го́спода одесну́ю Отца́,* тебѣ́ тезоимени́тъ вѣне́цъ простира́юща* десни́цею живоно́сною,* Его́же бли́зъ я́ко добропобѣ́дникъ, предстои́ши* и страда́льцевъ верхо́вный. [Два́жды.]

Зна́меньми, и чудесы́ блиста́яйся,* и догма́ты, пребеззако́нныхъ погаси́лъ еси́ собо́рище,* и отъ ни́хъ убива́емь,* и ка́меніемъ мета́емь,* за убива́ющія тя́* о оставле́ніи моли́лся еси́,* подо́бяся гла́су Спа́сову,* Его́же въ ру́ки пре́далъ еси́ тво́й ду́хъ,* свяще́нный Стефа́не.

Сла́ва, гла́съ 2. Анато́ліево:

Царю́ и Влады́цѣ всѣ́хъ, ро́ждшемуся на земли́, вѣне́цъ пресвѣ́телъ прино́сится, не отъ ка́меній честны́хъ устро́енъ, но отъ свои́хъ крове́й процвѣте́нъ. Но, о мучениколю́бцы! Пріиди́те, пѣ́сній цвѣ́ты взе́мше, главы́ увязе́мъ и, пѣ́сни воспѣва́юще, рце́мъ: му́дростію и благода́тію ду́шу просвѣти́вый, первому́чениче, Христа́ Бо́га, проси́ на́мъ ми́ра и ве́лія ми́лости.

И ны́нѣ, пра́здника, [гла́съ то́йже:

Ве́ліе и пресла́вное чу́до соверши́ся дне́сь: Дѣ́ва ражда́етъ и утро́ба не истлѣва́етъ, Сло́во воплоща́ется и Отца́ не отлуча́ется. Ангели съ па́стыри сла́вятъ, и мы́ съ ни́ми вопіе́мъ: сла́ва въ вы́шнихъ Бо́гу, и на земли́ ми́ръ].

Вхо́дъ. Проки́менъ дне́. И чте́нія три́. [2]

Собо́рнаго посла́нія Петро́ва чте́ніе. [Зача́ло 58.]

Пе́тръ, апо́столъ Іису́съ Христо́въ, избра́ннымъ прише́льцемъ разсѣ́янія, По́нта, Галатíи, Каппадокíи, Асíи и Виѳинíи, по прозрѣ́нію Бо́га Отца́ во святы́ню Ду́ха, въ послуша́ніе и кропле́ніе Кро́ве Іису́съ Христо́вы, благода́ть ва́мъ и ми́ръ да умно́жится. Благослове́нъ Бо́гъ и Оте́цъ Го́спода на́шего Іису́съ Христа́, Иже по мно́зѣй Свое́й ми́лости порожде́й на́съ во упова́ніе жи́во воскресе́ніемъ Іису́съ Христо́вымъ отъ ме́ртвыхъ, въ наслѣ́діе нетлѣ́нно, и нескве́рно, и неувяда́емо, соблюде́но на небесѣ́хъ ва́съ ра́ди, и́же си́лою Бо́жіею соблюде́ни вѣ́рою во спасе́ніе гото́вое яви́тися во вре́мя послѣ́днее. О не́мже ра́дуйтеся, ма́ло ны́нѣ, а́ще лѣ́по е́сть, приско́рбни бы́вше въ разли́чныхъ напа́стехъ, да искуше́ніе ва́шея вѣ́ры многочестнѣ́йше зла́та ги́бнуща, огне́мъ же искуше́на, обря́щется въ похвалу́, и че́сть, и сла́ву во открове́ніи Іису́съ Христо́вѣ. Его́же не ви́дѣвше, лю́бите, и на Него́же ны́нѣ не зря́ще, вѣ́рующе же, ра́дуетеся ра́достію неизглаго́ланною и просла́вленною, пріе́млюще кончи́ну вѣ́рѣ ва́шей спасе́ніе душа́мъ. О Не́мже спасе́ніи взыска́ша и испыта́ша проро́цы, и́же о ва́шей благода́ти прореко́ша, испыта́юще, въ каково́ или́ въ ко́е вре́мя явля́ше въ ни́хъ Ду́хъ Христо́въ, пре́жде свидѣ́тельствуя о Христо́вѣхъ страсте́хъ, я́же по си́хъ сла́вахъ, и́мже откры́ся, я́ко не и́мъ самѣ́мъ, но на́мъ служа́ху сія́, я́же ны́нѣ возвѣсти́шася ва́мъ, благовѣствова́вшими ва́мъ Ду́хомъ Святы́мъ, по́сланнымъ съ небесе́, въ ня́же жела́ютъ а́нгели прини́кнути. Тѣ́мже, возлю́бленніи, препоя́савше чре́сла помышле́нія ва́шего, трезвя́щеся, соверше́ннѣ упова́йте на приноси́мую ва́мъ благода́ть открове́ніемъ Іису́съ Христо́вымъ. Яко ча́да послуша́нія, не преобразу́ющеся пе́рвыми невѣ́дѣнія ва́шего похотѣ́ніи, но по зва́вшему вы́ Свято́му и са́ми свя́ти во все́мъ житіи́ бу́дите. Зане́ пи́сано е́сть: свя́ти бу́дите, я́ко Азъ Свя́тъ е́смь. И а́ще Отца́ называ́ете, нелицемѣ́рно судя́ща кому́ждо по дѣ́лу, со стра́хомъ житія́ ва́шего вре́мя жи́тельствуйте, вѣ́дяще, я́ко не истлѣ́ннымъ сребро́мъ или́ зла́томъ изба́вистеся отъ су́етнаго ва́шего житія́, отцы́ пре́даннаго, но честно́ю кро́вію я́ко Агнца Непоро́чна и Пречи́ста Христа́, предувѣ́дѣнаго у́бо пре́жде сложе́нія мíра, я́вльшася же въ послѣ́дняя лѣ́та ва́съ ра́ди. Иже Его́ ра́ди вѣ́руете въ Бо́га, воздви́гшаго Его́ изъ ме́ртвыхъ и сла́ву Ему́ да́вша, я́ко да вѣ́ра ва́ша и упова́ніе бу́детъ на Бо́га. Ду́ши ва́ша очи́стивше въ послуша́ніе и́стины ду́хомъ, въ братолю́біе нелицемѣ́рно, отъ чи́ста се́рдца дру́гъ дру́га люби́те прилѣ́жно, порожде́ни не отъ сѣ́мене истлѣ́нна, но неистлѣ́нна, сло́вомъ Жива́го Бо́га и пребыва́юща во вѣ́ки. Зане́ вся́ка пло́ть, я́ко трава́, и вся́ка сла́ва человѣ́ча, я́ко цвѣ́тъ тра́вный. Изсше трава́, и цвѣ́тъ ея́ отпаде́, глаго́лъ же Госпо́день пребыва́етъ во вѣ́ки, се́ же е́сть глаго́лъ благовѣствова́нный въ ва́съ. Отло́жше у́бо вся́ку зло́бу, и вся́ку ле́сть, и лицемѣ́ріе, и за́висть, и вся́ клеветы́, я́ко новорожде́ни младе́нцы, слове́сное и неле́стное млеко́ возлюби́те, я́ко да о не́мъ возрасте́те во спасе́ніе. Поне́же вкуси́сте, я́ко бла́гъ Госпо́дь. Къ Нему́же приходя́ще, Ка́меню Жи́ву, отъ человѣ́къ у́бо уничиже́ну, отъ Бо́га же избра́нну, че́стну, и са́ми, я́ко ка́меніе жи́во, зижди́теся въ хра́мъ духо́венъ, святи́тельство свя́то, возноси́ти же́ртвы духо́вны, благопрія́тны Бо́гови Іису́съ Христо́мъ. Зане́ пи́сано е́сть въ Писа́ніи: се́ полага́ю въ Сіо́нѣ Ка́мень Краеуго́ленъ, избра́нъ, че́стенъ, и вѣ́руяй въ Онь, не постыди́тся.

Собо́рнаго посла́нія Петро́ва чте́ніе. [Зача́ло 59.]

Возлю́бленніи, Христо́съ пострада́ по на́съ, на́мъ оста́вль о́бразъ, да послѣ́дуемъ стопа́мъ Его́. Иже грѣха́ не сотвори́, ни обрѣ́теся ле́сть во устѣ́хъ Его́, Иже укаря́емь, проти́ву не укаря́ше, стражда́, не преща́ше, предая́ше же судя́щему пра́ведно. Иже грѣхи́ на́ша са́мъ вознесе́ на тѣ́лѣ Свое́мъ на дре́во, да, отъ грѣ́хъ избы́вше, пра́вдою поживе́мъ, Его́же я́звою исцѣлѣ́сте. Бѣ́сте бо, я́ко о́вцы заблу́ждшія, не иму́ще па́стыря, но возврати́стеся ны́нѣ къ Па́стырю и Посѣти́телю ду́шъ ва́шихъ. Та́кожде же и жены́, повину́ющеся свои́мъ муже́мъ, да и а́ще нѣ́цыи не повину́ются сло́ву, же́нскимъ житіе́мъ безъ сло́ва плѣне́ни бу́дутъ, ви́дѣвше е́же со стра́хомъ чи́сто житіе́ ва́ше. Имже да бу́детъ не внѣ́шняя плете́нія вла́съ, и обложе́нія зла́та, или́ одѣя́нія ри́зъ лѣ́пота, но потае́нный се́рдца человѣ́къ въ неистлѣ́ніи кро́ткаго и молчали́ваго ду́ха, е́же е́сть предъ Бо́гомъ многоцѣ́нно. Та́ко бо иногда́ и святы́я жены́, упова́ющія на Бо́га, украша́ху себе́, повину́ющеся свои́мъ муже́мъ: я́коже Са́рра послу́шаше Авраа́ма, господи́на того́ зову́щи, ея́же бы́сте ча́да, благотворя́ще и не боя́щеся ни еди́наго стра́ха. Му́жіе, та́кожде вку́пѣ живу́ще съ свои́ми жена́ми по ра́зуму, я́ко немощнѣ́йшему сосу́ду, же́нскому воздаю́ще че́сть, я́ко и снаслѣ́дницы благода́тныя жи́зни, во е́же не прекраща́тися моли́твамъ ва́шимъ. Коне́цъ же — вси́ единому́дрени бу́дите, ми́лостиви, братолю́бцы, милосе́рдни, благоутро́бни, мудролю́бцы, смиреному́дри, не воздаю́ще зла́ за зло́ или́ досажде́нія за досажде́ніе, супроти́вное же благословя́ще, вѣ́дяще, я́ко на се́ зва́ни бы́сте, да благослове́ніе наслѣ́дите.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра пра́здника, гла́съ 1:

Не́бо и земля́ дне́сь проро́чески [да возвеселя́тся, а́нгели и человѣ́цы духо́вно да торжеству́ютъ, я́ко Бо́гъ во пло́ти яви́ся су́щимъ во тмѣ́ и сѣ́ни сѣдя́щимъ, рожде́йся отъ Дѣ́вы; верте́пъ и я́сли прія́ша Того́; па́стыріе чу́до проповѣ́дуютъ; волсви́ отъ восто́къ въ Виѳлее́мъ да́ры прино́сятъ. Мы́ же хвалу́ недосто́йными устна́ми а́нгельски Тому́ принесе́мъ: сла́ва въ вы́шнихъ Бо́гу, и на земли́ ми́ръ, пріи́де бо Ча́яніе язы́ковъ, прише́дъ, спасе́ на́съ отъ рабо́ты вра́жія].

Та́же стихи́ры апо́стола, гла́съ 8:

Стефа́не, му́чениковъ первострада́льне, служи́телей основа́ніе, апо́столовъ избра́нный, свѣ́тло творя́щія твое́ свѣтоно́сное торжество́, свѣ́томъ незаходи́мымъ, му́чениче, озари́, грѣхо́вную разоря́я тму́, благода́ть и ми́лость подая́ рабо́мъ твои́мъ, и къ животу́ вѣ́чнующему наставля́я твои́ми моли́твами.

Вѣне́цъ благода́тей тво́й ве́рхъ, Стефа́не, му́чениче Христо́въ, тезоимени́тно пріе́мь и, я́ко гри́вну злату́, добродѣ́телей обложи́въ твое́й вы́и, му́дрости бы́лъ еси́ прему́дростное жили́ще, ю́же поче́лъ еси́, притяжа́въ любе́зну себѣ́, ея́же ра́ди почти́лся еси́ сла́вою и благода́тію.

Вѣне́цъ Су́щему че́стенъ Царю́ и Бо́гу прине́слся еси́, апо́столе, ка́меннымъ біе́ніемъ, слове́сенъ и многоче́стенъ па́че зла́та и ка́мене честна́го, вѣнча́нъ сла́вою и благода́тію, Стефа́не всече́стне, му́чениковъ первострада́льне, сла́вное дѣ́ло же и и́мя, помяни́ всѣ́хъ на́съ.

Сла́ва, гла́съ 4:

Стефа́нъ, до́брое нача́ло му́чениковъ, по́лнъ благода́ти и си́лы, творя́й зна́менія и чудеса́ ве́лія въ лю́дехъ, отъ беззако́нныхъ, ка́меніемъ побіе́нъ быва́ше, но просвѣти́ся, я́ко а́нгелъ, и зри́тъ сла́ву Тебе́, распе́ншагося на́съ ра́ди, одесну́ю Си́лы и Ду́хомъ благода́ти на небеса́ взима́шеся; и сего́ ра́ди съ ликостоя́ніи а́нгельскими водворя́яся, мо́лится спасти́ся душа́мъ на́шимъ.

И ны́нѣ, пра́здника, гла́съ то́йже. Іоа́нна мона́ха:

Непостижи́мое соверша́емое въ Виѳлее́мѣ дне́сь та́инство: Неви́димый ви́дится, Безпло́тный воплоща́ется, Сло́во одебелѣва́етъ, и Сы́й быва́етъ, е́же не бѣ́. Дѣ́ва ражда́етъ въ верте́пѣ Младе́нца Мла́да, Зда́теля естества́. Ясли вообразу́ются въ престо́лъ небе́сный, ско́ти образу́ютъ херуви́мское предстоя́ніе. Па́стыріе чудя́тся. Волсви́ да́ры прино́сятъ. Ангели, воспѣва́юще, глаго́лютъ: сла́ва въ вы́шнихъ Бо́гу, и на зе́мли ми́ръ, въ человѣ́цѣхъ бо благоволе́ніе, неизмѣ́нный Емману́илъ.

На стихо́внѣ стихи́ры пра́здника, гла́съ 1. Подо́бенъ: Небе́сныхъ чино́въ.

Изъ Отца́ пре́жде вѣ́къ возсія́вша,* и я́ко Сы́на* въ нѣ́дрѣ Отчемъ присносу́ща,* па́ки въ послѣ́дняя на рука́хъ Ма́тернихъ,* я́ко на престо́лѣ, сѣдя́щаго,* и отъ а́нгеловъ, па́стырей, волхво́въ же,* ны́нѣ покланя́емаго воспои́мъ.

Сти́хъ: Изъ чре́ва пре́жде денни́цы роди́хъ Тя́,* [кля́тся Госпо́дь и не раска́ется].

Въ Виѳлее́мъ соше́дшеся, вѣ́рніи,* у́зримъ всѣ́хъ Творца́,* лежа́щаго во я́слѣхъ,* и отъ земли́ Халде́йскія* да́ръ избра́нный прине́сшія тривеще́ственный* я́ко Царю́ и Бо́гу* и на́съ ра́ди тридне́вному су́щу мертвецу́.

Сти́хъ: Рече́ Госпо́дь Го́сподеви моему́:* сѣди́ одесну́ю Мене́.

Изъ Дѣ́вы роди́лся еси́ въ верте́пѣ,* и во́инства а́нгельская, обстоя́ще, вопія́ху:* сла́ва въ вы́шнихъ Тебѣ́, Бо́гу,* ро́ждшемуся въ ра́біи о́бразѣ,* и обно́вльшему мíръ,* во чре́вѣ Дѣ́вы* и неискусому́жныя Ма́тере.

Сла́ва, гла́съ 6. Анато́ліево:

Пе́рвый въ му́ченицѣхъ показа́лся еси́ и въ діа́конѣхъ, Стефа́не апо́столе, страда́льцевъ удобре́ніе, вѣ́рныхъ утвержде́ніе, сла́ва пра́ведныхъ. Честну́ю твою́ па́мять пра́зднующимъ проси́, я́ко предстоя́ престо́лу Христа́ Всецаря́, прегрѣше́ній очище́нія и Ца́рствія небе́снаго сподо́битися.

И ны́нѣ, гла́съ то́йже. Ге́рманово:

Лику́ютъ а́нгели вси́ на небеси́, и ра́дуются человѣ́цы дне́сь; игра́етъ же вся́ тва́рь ро́ждшагося ра́ди въ Виѳлее́мѣ Спа́са Го́спода, я́ко вся́кая ле́сть и́дольская преста́, и ца́рствуетъ Христо́съ во вѣ́ки.

Тропа́рь свята́го, гла́съ 4:

Ца́рскимъ вѣнце́мъ вѣнча́ся тво́й ве́рхъ отъ страда́ній, я́же претерпѣ́лъ еси́ по Христѣ́ Бо́зѣ, му́чениковъ первострада́льче Стефа́не: ты́ бо іуде́йское обличи́въ неи́стовство, ви́дѣлъ еси́ твоего́ Спа́са одесну́ю Отца́, Того́ у́бо моли́ о душа́хъ на́шихъ.

Инъ тропа́рь, гла́съ то́йже:

По́двигомъ до́брымъ подвиза́лся еси́, первому́чениче Христо́въ, и апо́столе, и мучи́телей обличи́лъ еси́ нече́стіе: ка́меніемъ бо побіе́нъ отъ ру́къ беззако́нныхъ, вѣне́цъ отъ я́же свы́ше десни́цы прія́лъ еси́ и къ Бо́гу взыва́лъ еси́, вопія́: Го́споди, не поста́ви и́мъ грѣха́ сего́.

Тропа́рь пра́здника, гла́съ то́йже:

Рождество́ Твое́, Христе́ Бо́же нашъ, возсія́ мíрови свѣ́тъ ра́зума, въ не́мъ бо звѣзда́мъ служа́щіи звѣздо́ю уча́хуся Тебѣ́ кла́нятися, Со́лнцу Пра́вды, и Тебе́ вѣ́дѣти съ высоты́ Восто́ка. Го́споди, сла́ва Тебѣ́.


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, апо́стола. И ны́нѣ, пра́здника.

По 1-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й, Спа́се.

Ли́цы му́ченичестіи святу́ю твою́ па́мять въ пѣ́снехъ и пѣ́ніихъ, апо́столе Стефа́не, чту́тъ, пресла́вною бо душе́ю твое́ю красоту́ свою́ воспрія́ша. Тѣ́мже дне́сь и честна́я Це́рковь, велича́ющи тя́, Царя́ ро́ждшагося прославля́етъ, Еди́наго Человѣколю́бца. [Два́жды.]

Сла́ва, и ны́нѣ, пра́здника, гла́съ 3. Подо́бенъ: Дѣ́ва дне́сь.

Безсѣ́менное зача́тіе Изба́вителя ражда́етъ, и волсви́ прихо́дятъ Жи́зни поклони́тися, человѣ́цы со а́нгелы славосло́вятъ, верте́пъ же и я́сли дароно́сятъ, воспѣва́юще рожде́ннаго Отроча́ Мла́до, Превѣ́чнаго Бо́га.

По 2-мъ стихосло́віи сѣда́ленъ, гла́съ 3. Подо́бенъ: Боже́ственныя вѣ́ры.

Ка́мень че́стенъ Це́ркви, сохраня́емь въ сокро́вищахъ небе́сныхъ, бы́лъ еси́, первому́чениче Стефа́не, нечести́выя іуде́и обличи́лъ еси́ и муче́нія ча́шу, ка́меннаго ра́ди побіе́нія, испи́лъ еси́, му́чениковъ первострада́льне, Христа́ Бо́га моли́ дарова́ти на́мъ ве́лію ми́лость. [Два́жды.]

Сла́ва, и ны́нѣ, пра́здника, гла́съ 4. Подо́бенъ: Удиви́ся Іо́сифъ.

Невмѣсти́мый вездѣ́, ка́ко вмѣсти́ся во чре́во? Сы́й въ нѣ́дрѣхъ Отчихъ, ка́ко на рука́хъ Ма́тернихъ? Вся́ко, я́ко вѣ́сть, я́ко восхотѣ́ и я́ко благоволи́: безпло́тенъ бо Сы́й воплоти́ся во́льно. И бы́сть Сы́й, е́же не бѣ́, на́съ ра́ди, и, не отступи́въ естества́, причасти́ся на́шему смѣше́нію, сугу́бъ роди́ся Христо́съ, вы́шній мíръ хотя́ испо́лнити.

[Велича́ніе:
Велича́емъ тя́, святы́й первому́чениче и архидіа́коне Стефа́не, и чте́мъ честна́я страда́нія твоя́, я́же за Христа́ претерпѣ́лъ еси́. Псало́мъ избра́нный: Небеса́ повѣ́даютъ сла́ву Бо́жію...]

По поліеле́и сѣда́ленъ, гла́съ 5. Подо́бенъ: Собезнача́льное Сло́во.

Ду́ха заре́ю осіява́емь и му́дростію су́щею совоздви́женъ, іуде́йскую мглу́ очерни́лъ еси́ и, на три́знищи врага́ страда́льчески низложи́въ, му́ченикомъ вѣне́цъ яви́лся еси́. Но моли́ся Го́сподеви поми́ловатися душа́мъ на́шимъ. [Два́жды.]

Сла́ва, и ны́нѣ, пра́здника, гла́съ 3. Подо́бенъ: Красотѣ́ дѣ́вства.

Чу́до пресла́вно зри́тся дне́сь, Спаси́тель бо на́шъ въ верте́пѣ пло́тію отъ Дѣ́вы на́съ ра́ди роди́тися ны́нѣ тщи́тся, волсви́ съ да́ры я́ко Царю́ покло́нятся, па́стыріе со а́нгелы славосло́вятъ Его́. Съ ни́миже и мы́ вопіе́мъ: сла́ва на́съ ра́ди Вочеловѣ́чшемуся.

Степе́нна, 1-й антифо́нъ 4-го гла́са. Проки́менъ, гла́съ 4: Пра́ведникъ, я́ко фи́никсъ, процвѣте́тъ,* [я́ко ке́дръ, и́же въ Лива́нѣ, умно́жится]. Сти́хъ: Насажде́ни въ дому́ Госпо́дни [во дво́рѣхъ Бо́га на́шего процвѣту́тъ]. Вся́кое дыха́ніе... Ева́нгеліе отъ Ма́рка, зача́ло 53. Сла́ва: Моли́твами свята́го апо́стола первому́ченика Стефа́на... И ны́нѣ: Моли́твами Богоро́дицы... Та́же, сти́хъ: Поми́луй на́съ, Бо́же...

Посе́мъ стихи́ра, гла́съ 6:

Пе́рвый въ му́ченицѣхъ [показа́лся еси́ и въ діа́конѣхъ, Стефа́не апо́столе, страда́льцевъ удобре́ніе, вѣ́рныхъ утвержде́ніе, сла́ва пра́ведныхъ. Честну́ю твою́ па́мять пра́зднующимъ проси́, я́ко предстоя́ престо́лу Христа́ Всецаря́, прегрѣше́ній очище́нія и Ца́рствія небе́снаго сподо́битися].

Кано́нъ пра́здника [пе́рвый], со ирмосо́мъ на 6, и апо́стола на [8].

Кано́нъ пра́здника, гла́съ 1.
Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Истлѣ́вша преступле́ніемъ, по Бо́жію о́бразу бы́вшаго, всего́ тлѣ́нія су́ща, лу́чшія отпа́дша боже́ственныя жи́зни, па́ки обновля́етъ му́дрый Содѣ́тель, я́ко просла́вися.

Ви́дѣвъ Зижди́тель ги́блема человѣ́ка, рука́ми его́же созда́, приклони́въ небеса́, схо́дитъ; Сего́ же отъ Дѣ́вы боже́ственныя Чи́стыя всего́ осуществу́етъ, вои́стинну вопло́щся, я́ко просла́вися.

Му́дрость, Сло́во и Си́ла, Сы́нъ Сы́й Отчій и Сія́ніе, Христо́съ Бо́гъ, си́лъ утаи́вся, ели́ко премíрныхъ и ели́ко на земли́, и, вочеловѣ́чся, обнови́лъ есть насъ, я́ко просла́вися.

Кано́нъ апо́стола, творе́ніе Іоа́нна Дамаскина́, гла́съ 5.
Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Гряди́те, вѣнцы́ пѣ́сней первому́ченика Христо́ва Це́ркви сла́вно вѣнча́имъ и, Боже́ственною вѣнча́еми Стефа́новою благода́тію, побѣ́дную пѣ́снь воспои́мъ.

Нося́ Учи́телевъ кро́ткій смы́слъ и е́же отъ любве́ боготво́рное смире́ніе, досто́йно, Стефа́не, діа́коновъ старѣ́йшина и предста́тель вдови́цамъ бы́лъ еси́.

Ты́ на по́мощь апо́столовъ Христо́выхъ досто́йно призва́лся еси́ и я́ко вѣ́ренъ діа́конъ, тезоимени́те Стефа́не, бы́лъ еси́, идѣ́же Христо́съ, кро́вію преше́лъ еси́.

Богоро́диченъ: Ты́ у́бо за человѣ́ки, Христе́, человѣ́ка отъ Дѣ́вы поне́съ я́ко Младе́нецъ пови́тся, Тво́й же посы́панъ первому́ченикъ ка́меней мета́ніи, человѣ́ка совлачи́тся.

Катава́сія пра́здника: Христо́съ ражда́ется...

Пѣ́снь 3.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Иже дохнове́нія прича́щся лу́чшаго Ада́мъ пе́рстный и къ тлѣ́нію попо́лзся же́нскою ле́стію, Христа́ отъ Жены́ ви́дя, вопіе́тъ: Иже мене́ ра́ди по мнѣ́ бы́въ, Свя́тъ еси́, Го́споди.

Сообра́зенъ бре́нному умале́нію растворе́ніемъ, Христе́, бы́въ и прича́стіемъ пло́ти го́ршія, пода́въ Боже́ственнаго естества́, зе́мленъ бы́въ, и пребы́въ Богъ, и возвы́сивый ро́гъ на́шъ, Свя́тъ еси́, Го́споди.

Виѳлее́ме, весели́ся, князе́й Іу́довыхъ Сы́й Ца́рь: Изра́иля бо пасы́й на ра́мѣхъ херуви́мскихъ, изъ тебе́ про́йде Христо́съ я́вѣ и вознесы́й ро́гъ на́шъ надъ всѣ́ми воцари́ся.

Инъ.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Зако́нно, я́ко Христо́въ во́инъ, Стефа́нъ, къ богоубíйцамъ ополчи́вся, въ непобѣди́мую Его́ си́лу одѣ́янъ, пребеззако́нныхъ обличи́ все́ лука́вное противле́ніе.

Ре́вностію Христо́вы разже́гся любве́ и къ подвиго́мъ совле́кся, вѣ́ры и Ду́ха испо́лнився Боже́ственнаго, первому́ченикъ, ры́барей извѣсти́лъ еси́ всѣ́мъ богосу́дную про́повѣдь.

Яко проповѣ́дникъ сокрове́нныя вои́стинну и боже́ственныя жи́зни, настоя́щую я́коже забы́въ, дѣ́ломъ показа́ я́вѣ всѣ́мъ первому́ченикъ побѣдоно́сную и́стину, Влады́ко, произво́ливъ сме́рть.

Богоро́диченъ: Въ жите́йскій на́съ ра́ди Влады́ка верте́пъ вни́де о́бразомъ низхожде́нія; му́чениковъ же нача́льникъ Стефа́нъ отъ тя́жести человѣ́ческія исхо́дитъ, любо́вію Влады́чнею побѣжда́емь.

Конда́къ пра́здника, гла́съ 3:

Дѣ́ва дне́сь Пресу́щественнаго ражда́етъ, и земля́ верте́пъ Непристу́пному прино́ситъ. Ангели съ па́стырьми славосло́вятъ, волсви́ же со звѣздо́ю путеше́ствуютъ: на́съ бо ра́ди роди́ся Oтроча́ Мла́до, Превѣ́чный Бо́гъ.

Икосъ:

Еде́мъ Виѳлее́мъ отве́рзе, пріиди́те, ви́димъ, пи́щу въ та́йнѣ обрѣто́хомъ; пріиди́те, пріи́мемъ су́щая ра́йская вну́трь верте́па: та́мо яви́ся ко́рень ненапое́нъ, прозяба́я отпуще́ніе, та́мо обрѣ́теся кла́дязь неиско́панъ, изъ него́же Дави́дъ пи́ти дре́вле возжада́ся. Та́мо Дѣ́ва ро́ждши Младе́нца, жа́жду уста́ви а́біе Ада́мову и Дави́дову. Сего́ ра́ди къ Нему́ и́демъ, гдѣ́ роди́ся Отроча́ Мла́до, Превѣ́чный Бо́гъ.

Сѣда́ленъ апо́стола, гла́съ 1. Подо́бенъ: Гро́бъ Тво́й, Спа́се.

Апо́столе Христо́въ, діа́коновъ пе́рвый, первому́чениче му́дре, му́чениковъ ве́рхъ, мíра концы́ освяти́въ страда́ніи твои́ми, и чудесы́ ду́ши человѣ́ковъ просвѣти́лъ еси́. Чту́щія тя́ изба́ви вся́ческихъ бѣ́дъ, всехва́льне Стефа́не. [Два́жды.]

Сла́ва, и ны́нѣ, гла́съ 3:

Рождество́ безсѣ́менное смотря́ющи, Всенепоро́чная, дивя́щися, изъ Нея́ Рожде́нному вѣща́ше: а́ще и зра́комъ человѣ́ческимъ обложи́лся еси́, но Бо́га Тя́ проповѣ́дуютъ ве́щи, Ча́до Безнача́льное Безнача́льнаго Отца́, Собезнача́льне, всѣ́мъ подая́й ве́лію ми́лость.

Пѣ́снь 4.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Его́же дре́вле прорече́ Іа́ковъ, язы́ковъ ожида́ніе, Христе́, отъ колѣ́на Іу́дова возсія́лъ еси́ и си́лу Дама́скову, Самарíйскую же коры́сть прише́лъ еси́ испроврещи́, лесть премѣня́я въ вѣ́ру боголѣ́пну: сла́ва си́лѣ Твое́й, Го́споди.

Волхва́ дре́вле Валаа́ма словесы́ ученики́, му́дрыя звѣздоблюсти́тели, ра́дости испо́лнилъ еси́, звѣзда́ отъ Іа́кова, возсія́въ, Влады́ко, язы́ковъ нача́токъ вводи́мый прія́лъ же еси́ я́вѣ: сла́ва си́лѣ Твое́й, Го́споди.

Яко на руно́, во чре́во Дѣ́вы сше́лъ еси́ до́ждь, Христе́, и я́ко ка́пли, на зе́млю ка́плющія. Еѳіо́пія, и Ѳарси́съ, и Арави́тстіи о́строви же, Сава́, Ми́довъ всю́ зе́млю держа́щіи, припадо́ша Тебѣ́, Спа́се: сла́ва си́лѣ Твое́й, Го́споди.

Инъ.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Поревнова́въ а́нгельскому усе́рдію и зра́комъ а́нгельскимъ свѣ́тло украси́вся, зри́ши сла́ву Боже́ственную и сея́ озаре́ніе.

Клеветни́къ, судія́ же и мучи́тель, человѣкоубíйца и оте́цъ лжи́ явля́ется, Стефа́не, но себе́ побѣжда́етъ, сѣ́ти на ся́ простира́я.

Яко пе́рвый му́чениковъ Стефа́нъ, путесотвори́въ же на́мъ муче́нія вхо́дъ, вѣнцено́сецъ лику́етъ, вѣнце́мъ му́ченическимъ вѣнча́емь.

Богоро́диченъ: Просія́въ отъ Дѣ́вы, я́ко со́лнце, совозсія́вшу, Христе́, я́ко денни́цу, сла́вную первому́ченика па́мять Свое́ю украша́еши свѣ́тлостію.

Пѣ́снь 5.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Въ рабѣ́хъ ке́саревымъ повелѣ́ніемъ написа́тися поко́рься, и на́съ, рабы́ су́щія, врага́ и грѣха́ свободи́лъ еси́, Христе́, ве́сь же по на́мъ обнища́въ, и пе́рстнаго отъ самаго́ едине́нія и обще́нія богосодѣ́лалъ еси́.

Се Дѣ́ва, я́коже дре́вле рече́, во чре́вѣ пріе́мши, родила́ е́сть Бо́га вочеловѣ́чшася и пребыва́етъ Дѣ́ва. Ея́же ра́ди примири́вшеся Бо́гу, грѣ́шніи, Богоро́дицу су́щую вои́стинну, вѣ́рніи, воспои́мъ.

Инъ.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Облиста́, я́ко а́нгелъ, первому́ченикъ Тво́й, небе́сныхъ круго́въ, Христе́, бы́въ превы́шше и сла́вы неизглаго́ланныя Твоея́ насы́щся, Человѣколю́бче.

Богоглаго́ливыхъ у́стъ одожде́ніи низложи́ скверноубíйцы первому́ченикъ, отъ ни́хже безчи́сленными ка́меней одожде́ньми я́ко побѣди́тель вѣнча́ся.

Яко непобѣди́мо первому́ченика боже́ственныя ре́вности дерзнове́ніе, и́бо да́же до кро́ве къ богоубíйцамъ му́жески ополчи́ся.

Богоро́диченъ: Прише́дшаго отъ Неискусому́жныя Ма́тере, первому́ченикъ, въ недви́жимѣмъ Отца́ Божествѣ́ и сла́вѣ, стоя́ща на небесѣ́хъ, ви́дѣ.

Пѣ́снь 6.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Пріи́де, вопло́щся, Христо́съ Бо́гъ на́шъ изъ чре́ва, Его́же Оте́цъ пре́жде денни́цы ражда́етъ; правле́нія же держа́ пречи́стыхъ си́лъ, въ я́слѣхъ ско́тіихъ возлежи́тъ и пелена́ми повива́ется, разрѣша́етъ же многоплете́нныя плени́цы прегрѣше́ній.

Юно изъ Ада́ма отроча́ смѣше́нія, роди́ся Сы́нъ и вѣ́рнымъ даде́ся, бу́дущаго вѣ́ка Се́й е́сть Оте́цъ и Нача́льникъ и нарица́ется Вели́каго Совѣ́та Ангелъ. Се́й крѣ́покъ Бо́гъ е́сть и держа́й о́бластію всю́ тва́рь.

Инъ.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Сла́вный чинонача́льникъ му́чениковъ Стефа́нъ, вѣ́рніи зако́ны естества́ благода́тію преше́дъ, Боже́ственною сла́вою озаря́ется.

Подо́бникъ всеизря́днейшій бы́въ, Влады́ко Христе́, честны́я стра́сти Твоея́, Стефа́нъ убíйцамъ благослове́ніемъ отмща́етъ.

Скверноубíйственнаго дѣя́нія неприча́стны сохрани́, Христе́, и первому́ченика сподо́би Твоя́ пѣвцы́ наслѣ́дія, я́ко Благоутро́бенъ.

Богоро́диченъ: Всемíрнаго бы́сть спасе́нія, Влады́ко Христе́, нача́ло рождество́ Твое́ и му́ченикомъ боголѣ́пнаго исповѣ́данія основа́ніе.

Конда́къ апо́стола, гла́съ 3. Подо́бенъ: Дѣ́ва дне́сь.

Влады́ка вчера́ на́мъ пло́тію прихожда́ше, и ра́бъ дне́сь отъ пло́ти исхожда́ше. Вчера́ Ца́рствуяй пло́тію роди́ся, дне́сь ра́бъ ка́меніемъ побива́ется; Того́ ра́ди и скончава́ется первому́ченикъ и боже́ственный Стефа́нъ.

Икосъ:

Яко звѣзда́ свѣ́тлая, дне́сь совозсія́ Рождеству́ Христо́ву первому́ченикъ Стефа́нъ, облиста́яй, просвѣща́яй земны́я концы́, іуде́йское то́кмо омрачи́ все́ злоче́стіе. Му́дростію сло́ва си́хъ изобличи́въ, отъ Писа́ній бесѣ́дуяй, и увѣщава́я сія́, ро́ждшагося отъ Дѣ́вы Іису́са, Сы́на Бо́жія бы́ти и Бо́га. И посрами́ си́хъ нечести́вое злодѣ́йство первому́ченикъ и боже́ственный Стефа́нъ.

Пѣ́снь 7.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Па́стыріе, свиря́юще, ужа́сно свѣтоявле́ніе получи́ша: сла́ва бо Госпо́дня облиста́ и́хъ, и а́нгелъ, — воспо́йте, — вопія́, — я́ко роди́ся Христо́съ, отце́въ Бо́гъ благослове́нный.

Внеза́пу съ сло́вомъ а́нгеловымъ небе́сная во́инства, — сла́ва, — вопія́ху, — Бо́гу въ вы́шнихъ, на земли́ ми́ръ, въ человѣ́цѣхъ благоволе́ніе: Христо́съ возсія́, отце́въ Бо́гъ благослове́нный.

Глаго́лъ что́ се́й? — реко́ша па́стыріе, — прише́дше, уви́димъ бы́вшее, Боже́ственнаго Христа́. Виѳлее́ма же доше́дше, съ Ро́ждшею покланя́хуся, воспѣва́юще: отце́въ Бо́же, благослове́нъ еси́.

Инъ.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Зубы́ скреже́щуще убíйственнѣ, беззако́нніи, я́ко звѣ́ріе восхи́тивше, убива́ху Стефа́на, боже́ственнѣ пою́ща: Бо́же, благослове́нъ еси́.

Яко пе́стрыми цвѣ́ты и кра́сными, Стефа́не, ка́меніемъ украша́емь, тебе́ сама́го приве́лъ еси́ Христу́ Жизнода́вцу, поя́: Бо́же, благослове́нъ еси́.

Яко непобѣди́мо Па́влово противле́ніе, гоня́ща пе́рвое Бо́жія уго́дники, приводя́ща же язы́ки ны́нѣ ко Христу́ во вѣ́ки.

Взя́тъ бы́въ Ду́хомъ Святы́мъ, Стефа́не, неизрече́нно ви́дѣлъ еси́ Сы́на со Роди́телемъ, зовы́й Тро́ицѣ: Бо́же, благослове́нъ еси́.

Богоро́диченъ: Тебѣ́, возсія́вшему отъ Дѣ́вы боже́ственныя Чи́стыя, принесе́ся одушевле́нный я́ко Царю́ вѣне́цъ, боже́ственнѣ пѣснопоя́ Тебѣ́: Бо́же, благослове́нъ еси́.

Пѣ́снь 8.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Влече́тъ Вавило́ня дщи́ о́троки плѣне́нныя Дави́довы отъ Сіо́на къ себѣ́; дароно́сцы же сле́тъ волхвы́ дѣ́ти, Дави́довѣ богопрія́тнѣй дще́ри моля́щіяся. Тѣмъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Орга́ны уклони́ша плаче́вныя пѣ́сни, не поя́ху бо въ земли́ чужде́й о́троцы Сіо́новы, вавило́нскую же разрѣша́етъ ле́сть всю́ и мусикíйскія соста́вы, въ Виѳлее́мѣ возсія́въ, Христо́съ. Тѣ́мъ, воспѣва́юще, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Коры́сти Вавило́нъ ца́рства Сіо́ня и плѣне́нное бога́тство прія́тъ, сокро́вища же Христо́съ въ Сіо́нъ сего́, и цари́ звѣздо́ю наставля́я, звѣздоблюсти́тели влече́тъ. Тѣ́мъ, воспѣва́юще, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Инъ.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Пріиди́те, мы́сленно Стефа́новою сла́вою облиста́еми, воспои́мъ вопло́щшемуся Бо́гу: дѣла́ вся́кая, Го́спода по́йте и превозноси́те во вся́ вѣ́ки.

Тебѣ́, я́ко побѣди́телю пребезза́конныя ле́сти, страда́ній вѣне́цъ исплете́ся, Стефа́не. Тѣ́мъ вопія́лъ еси́: Го́спода по́йте и превозноси́те во вся́ вѣ́ки.

Яви́ся тебѣ́ Христо́съ во Отчей сла́вѣ, страда́ній возвѣща́я тебѣ́ я́вѣ возме́здія; тѣ́мже вопія́лъ еси́: Го́спода по́йте и превозноси́те во вся́ вѣ́ки.

Исплете́ на́мъ Влады́чнее Рождество́ ли́къ и па́мять первому́ченика; тѣ́мъ непреста́нно Го́спода пое́мъ и превозно́симъ во вся́ вѣ́ки.

Богоро́диченъ: Тебе́, па́че ума́ богому́жно сло́вомъ ро́ждшую Го́спода и дѣ́вствующую, вся́ дѣла́, Дѣ́во, благослови́мъ и превозно́симъ во вся́ вѣ́ки.

Пѣ́снь 9.

Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Изря́дное тече́ніе зря́ще волсви́ необы́чныя но́выя звѣзды́ новосія́ющія, небеса́ просвѣща́ющія, Христа́ Царя́ зна́менующія на земли́, ро́ждшагося въ Виѳлее́мѣ на спасе́ніе на́ше.

Новорожде́нное, — волхво́мъ, глаго́лющимъ, — Отроча́ Ца́рь, Его́же звѣзда́ яви́, гдѣ́ е́сть? Тому́ бо поклони́тися пріидо́хомъ. — Яря́ся, Иродъ смуща́шеся, Христа́ уби́ти богобо́рецъ шата́яся.

Испыта́ Иродъ вре́мя звѣзды́, ея́же вожде́ніемъ волсви́ въ Виѳлее́мѣ покланя́хуся Христу́ съ да́ры; е́юже, ко оте́честву наставля́еми, лю́таго дѣтоубíйцу оста́виша пору́гана.

Инъ.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Похва́лъ, Стефа́не, преше́лъ еси́ вся́къ чи́нъ и но́сиши по коему́ждо сло́ву нело́жно ты́ побѣди́тельная: изнемога́етъ бо человѣ́ческій у́мъ соплести́ вѣне́цъ похва́лъ тебѣ́ досто́йный.

О, блаже́ннаго твоего́, его́же провѣща́лъ еси́, Стефа́не, гла́са! Не поста́ви убíйцамъ, Влады́ко, — вопія́, — Христе́, беззако́нія, но, я́ко Бо́гъ и Содѣ́тель, пріими́ ду́хъ мо́й, я́коже же́ртву благово́ннѣйшу.

Ты́ болѣ́зней воздая́ніе прія́лъ еси́, побѣди́тельный отъ Вседержи́тельныя вѣне́цъ десни́цы, и ны́нѣ, всеблаже́нне, предстоя́ Всецарю́, сла́вою и благода́тію пою́щія Тя́ увѣнча́й.

Богоро́диченъ: Вре́меннаго бытія́ отъ Дѣ́вы прія́тъ нача́ло пло́тію отъ Отца́ безлѣ́тный Сы́нъ; Его́же ра́ди убива́емь подо́бникъ Христо́въ Стефа́нъ, ны́нѣ наслѣ́дова отъ нача́ла вѣ́чную жи́знь.

Свѣти́ленъ. Подо́бенъ: Ду́хомъ во святи́лищи.

Одесну́ю стоя́ща Отца́, ви́дѣлъ еси́ Сло́ва Пребезнача́льнаго, и Свѣ́та неизглаго́ланнаго лице́ испо́лнилъ еси́, апо́столовъ похвало́ и му́чениковъ сла́во; украси́лся же еси́ вѣнце́мъ ка́меній мета́ньми и кончи́ну прія́лъ еси́ боже́ственную. [Два́жды.]

Сла́ва, и ны́нѣ, свѣти́ленъ пра́здника:

Въ я́слѣхъ положи́ся, младе́нствовавъ, я́ко Младе́нецъ; звѣзда́ же призва́ тро́ицу волхво́въ; па́стыріе же, чудеси́ уди́вльшеся, потща́шася Бо́га ви́дѣти вочеловѣ́чшася; а́нгельстіи же ли́цы, дивя́щеся, — сла́ва въ вы́шнихъ, — вопія́ху.

На хвали́техъ стихи́ры на 6: пра́здника 3 и свята́го 3:
Стихи́ры пра́здника, гла́съ 6. Подо́бенъ: Ангельскія си́лы.

Вождеству́етъ пра́здникъ ра́достію вся́ тва́рь,* и небеса́ съ на́ми ра́дуются:* во я́слѣхъ бо Зижди́тель,* отъ Дѣ́вы воплоща́емый,* и въ Виѳлее́мѣ Іуде́йстѣмъ* Младе́нецъ ви́дѣнъ бы́сть пресла́вно.* Лю́діе, рце́мъ:* благослове́нъ Рожде́йся,* Бо́же на́шъ, сла́ва Тебѣ́.

Да земны́я небе́сны сотвори́ши,* прише́лъ еси́ на зе́млю, вопло́щся отъ Дѣ́вы,* и Младе́нецъ ви́димъ бы́лъ еси́,* Сло́во Сы́й Превѣ́чное,* волхвы́ подви́глъ еси́ отъ Перси́ды* въ Твое́ поклоне́ніе, Ще́дре.* Съ ни́ми же взыва́емъ:* благослове́нъ Рожде́йся,* Бо́же на́шъ, сла́ва Тебѣ́.

Мла́до на́съ ра́ди, Іису́се,* яви́лся еси́ Отроча́,* изъ Отца́ пре́жде вѣ́къ возсія́въ,* обветша́вшія преступле́ніемъ* хотя́ вся́ обнови́ти человѣ́ки.* Тѣ́мъ Тебѣ́ вси́* благода́рно при́сно зове́мъ:* благослове́нъ Рожде́йся,* Бо́же на́шъ, сла́ва Тебѣ́].

Ины стихи́ры свята́го, гла́съ 1. Кипріа́ново:

Страда́льческій вѣне́цъ первострада́льцу, вѣ́рніи, исплете́мъ отъ слове́сныхъ цвѣто́въ: то́й бо му́ченикомъ проугото́ва пу́ть и въ ра́дости вопія́ше: се́ небеса́ отве́рста ви́жду и Сы́на Бо́жія, одесну́ю стоя́ща неви́димаго Отца́.

Гла́съ 2. Анато́ліево:

Пе́рвый въ діа́конѣхъ, пе́рвый и въ му́ченицѣхъ показа́лся еси́, всесвяты́й Стефа́не: пу́ть бо бы́лъ еси́ святы́мъ, и мно́ги Го́споду приве́лъ еси́ му́ченики. Тѣ́мъ не́бо тебѣ́ отве́рзеся, и Бо́гъ тебѣ́ яви́ся. Того́ моли́ спасти́ся душа́мъ на́шимъ.

Во святы́ню одѣ́ялся еси́, Стефа́не блаже́нне, первому́чениче и перводіа́коне, а́нгеловъ соприча́стниче: хода́тайствуй и моли́ся о на́съ Спа́су, Го́споду безгрѣ́шному.

Сла́ва, гла́съ 5. Кипріа́ново:

Первому́чениче апо́столе и перводіа́коне, две́рь му́чениковъ и сла́ва пра́ведныхъ, апо́столовъ похвало́, ты́ небеса́ ви́дѣлъ еси́ отве́рста, на суди́щи стоя́, и Сы́на Бо́жія, одесну́ю стоя́ща неви́димаго Отца́. Тѣ́мже, я́ко а́нгелъ, возсія́въ лице́мъ, въ ра́дости взыва́лъ еси́ о побива́ющихъ тя́ ка́меніемъ: не поста́ви и́мъ грѣха́ сего́. И ны́нѣ испроси́ отъ любве́ хва́лящимъ тя́ очище́ніе грѣхо́въ и ве́лію ми́лость.

И ны́нѣ, пра́здника, гла́съ 8. Іоа́нна мона́ха:

Ка́ко изреку́ вели́кое та́инство? Безпло́тный воплоща́ется, Сло́во одебелѣва́етъ, Неви́димый ви́дится, и Неосяза́емый осяза́ется, и Безнача́льный начина́ется, Сы́нъ Бо́жій, Сы́нъ человѣ́чь быва́етъ: Іису́съ Христо́съ вчера́, и дне́сь, То́йже и во вѣ́ки.

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна пра́здника пѣ́снь 1-я на 4 и свята́го пѣ́снь 3-я на 4. Проки́менъ пра́здника, и до отда́нія. И апо́стола, гла́съ 8: Во всю́ зе́млю изы́де вѣща́ніе и́хъ, [и въ концы́ вселе́нныя глаго́лы и́хъ]. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ въ Дѣя́ніихъ, зача́ло 17. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ]. Ева́нгеліе Матѳе́я, зача́ло 87. Прича́стенъ пра́здника, и до отда́нія. И апо́стола: Во всю́ зе́млю [изы́де вѣща́ніе и́хъ, и въ концы́ вселе́нныя глаго́лы и́хъ].

Примѣчанія:
[1] Послѣдованіе Малой вечерни приводится по изданію: Пече́рская Минíа. [Ча́сть пе́рвая.] Кíевъ: Въ тѵпогра́фіи Кíево-Пече́рскія Ла́ѵры, 2007. стр. 217-219.
[2] Въ Печерской минеи (Ч. 1-я, Кіевъ, 2007, стр. 220-224) узазаны слѣд. чтенія:
       1-е: Дѣя́ній святы́хъ апо́столъ чте́ніе. [Главы́ 6, 1 – 7, 10.] Во дне́хъ же си́хъ умно́жившимся ученико́мъ, бы́сть ропта́ніе е́ллиновъ ко евре́омъ, я́ко презира́еми быва́ху во вседне́внѣмъ служе́ніи вдови́цы и́хъ. Призва́вше же двана́десять мно́жество учени́къ, рѣ́ша: не уго́дно е́сть на́мъ, оста́вльшымъ сло́во Бо́жіе, служи́ти трапе́замъ. Усмотри́те у́бо, бра́тіе, му́жи отъ ва́съ свидѣ́телствованы се́дмь, испо́лнены Ду́ха Свя́та и прему́дрости, и́хже поста́вимъ надъ слу́жбою се́ю, мы́ же въ моли́твѣ и служе́ніи сло́ва пребу́демъ. И уго́дно бы́сть сло́во сіе́ предъ всѣ́мъ наро́домъ, и избра́ша Стефа́на, му́жа испо́лнена вѣ́ры и Ду́ха Свя́та, и Фили́ппа, и Про́хора и Никано́ра, и Ти́мона и Парме́на, и Никола́я, прише́льца Антіохі́йскаго, и́хже поста́виша предъ апо́столы и помоли́вшеся возложи́ша на ня́ ру́цѣ. И сло́во Бо́жіе растя́ше, и мно́жашеся число́ учени́къ во Іерусали́мѣ зѣло́, мно́гъ же наро́дъ свяще́нниковъ послу́шаху вѣ́ры. Стефа́нъ же испо́лнь вѣ́ры и си́лы, творя́ше зна́менія и чудеса́ ве́лія въ лю́дехъ. Воста́ша же нѣ́ціи отъ со́нма, глаго́лемаго Ливерти́нска, и Киринíйска и Алекса́ндрска, и и́же отъ Киликі́и и Асі́и, стяза́ющеся со Стефа́номъ. И не можа́ху проти́ву ста́ти прему́дрости и Ду́ху, Имже глаго́лаше. Тогда́ подусти́ша му́жи, глаго́лющія: я́ко слы́шахомъ его́, глаго́люща глаго́лы ху́лныя на Моисе́я и на Бо́га. Сподвиго́ша же лю́ди, и ста́рцы, и кни́жники, и, напа́дше восхи́тиша его́, и приведо́ша на со́нмище. Поста́виша же свидѣ́тели ло́жны глаго́лющія: я́ко человѣ́къ се́й не престае́тъ глаго́лы ху́лныя глаго́ля на мѣ́сто свято́е сіе́ и зако́нъ. Слы́шахомъ бо его́ глаго́люща, я́ко Іису́съ Назоре́й, Се́й разори́тъ мѣ́сто сіе́ и измѣни́тъ обы́чаи, я́же предаде́ на́мъ Моисе́й. И, воззрѣ́вше на́нь, вси́, сѣдя́щіи въ со́нмищи, ви́дѣша лице́ его́, я́ко лице́ а́нгела. Рече́ же архіере́й: а́ще у́бо сія́ та́ко су́ть? Онъ же рече́: му́жіе, бра́тіе и отцы́, послу́шайте. Бо́гъ сла́вы яви́ся отцу́ на́шему Авраа́му, су́щу въ Месопота́міи, пре́жде да́же не всели́тися ему́ въ Харра́нь. И рече́ къ нему́: изы́ди отъ земли́ твоея́, и отъ ро́да твоего́, и отъ до́му отца́ твоего́ и пріиди́ въ зе́млю, ю́же а́ще ти́ покажу́. Тогда́, изше́дъ отъ земли́ Халде́йскія, всели́ся въ Харра́нь, и отту́ду, по уме́ртвіи отца́ его́, пресели́ его́ въ зе́млю сію́, на не́йже вы́ ны́нѣ живете́. И не даде́ ему́ наслѣ́дія въ не́й, ниже́ стопы́ но́гу, и обѣща́ да́ти ему́ ю́ во одержа́ніе и сѣ́мени его́ по не́мъ, не су́щу ему́ ча́ду. Глаго́ла же си́це Бо́гъ: я́ко бу́детъ сѣ́мя его́ прише́лцы въ земли́ чужде́й, и порабо́тятъ е́, и озло́бятъ лѣ́тъ четы́реста. И язы́ку, ему́же порабо́таютъ, сужду́ Азъ, рече́ Бо́гъ, и по си́хъ изы́дутъ, и послу́жатъ Ми́ на мѣ́стѣ се́мъ. И даде́ ему́ завѣ́тъ обрѣ́занія. И та́ко роди́ Исаа́ка, и обрѣ́за его́ въ де́нь осмы́й; и Исаа́къ Іа́кова, и Іа́ковъ двана́десять патріа́рхъ. И патріа́рси, позави́дѣвше Іо́сифу, прода́ша его́ во Еги́петъ, и бѣ́ Бо́гъ съ ни́мъ. И изъя́тъ его́ отъ всѣ́хъ скорбе́й его́, и даде́ ему́ благода́ть и прему́дрость предъ фарао́номъ, царе́мъ Еги́петскимъ, и поста́ви его́ нача́лника надъ Еги́птомъ и надъ всѣ́мъ до́момъ свои́мъ.
       2-е: Дѣя́ній святы́хъ апо́столъ чте́ніе. [Глава́ 7, 11-35.] Пріи́де же гла́дъ на всю́ зе́млю Еги́петскую и Ханаа́ню и ско́рбь ве́лія, и не обрѣта́ху сы́тости отцы́ на́ши. Слы́шавъ же іа́ковъ су́щую пшени́цу во Еги́птѣ, посла́ отцы́ на́ша пе́рвѣе. И внегда́ второ́е пріидо́ша, позна́нъ бы́сть іо́сифъ бра́тіи свое́й, и я́вѣ бы́сть фарао́ну ро́дъ іо́сифовъ. Посла́въ же, іо́сифъ призва́ отца́ своего́ іа́кова и все́ сро́дство свое́, се́дмьдесятъ и пя́ть ду́шъ. Сни́де же іа́ковъ во Еги́петъ и сконча́ся са́мъ и отцы́ на́ши. И принесе́ни бы́ша въ Cихе́мъ, и положе́ни бы́ша во гро́бѣ, его́же купи́ Авраа́мъ цѣно́ю сребра́ отъ сыно́въ Еммо́ра Cихе́мова. И я́коже приближа́шеся вре́мя обѣтова́нія, и́мже кля́тся Бо́гъ Авраа́му, возрасто́ша лю́діе и умно́жишася во Еги́птѣ, до́ндеже наста́ ца́рь и́нъ во Еги́птѣ, и́же не зна́ше іо́сифа. Се́й, злѣ́ умы́сливъ о ро́дѣ на́шемъ, озло́би отцы́ на́ша, умори́ти младе́нцы и́хъ и не оживи́ти. Въ не́же вре́мя роди́ся Моисе́й, и бѣ́ уго́денъ Бо́гови, и́же пита́нъ бы́сть мѣ́сяцы три́ въ дому́ отца́ своего́. Изве́ржена же его́, взя́тъ его́ дщи́ фарао́нова и воспита́ и́ себѣ́ въ сы́на. И нака́занъ бы́сть Моисе́й все́й прему́дрости еги́петстѣй, бѣ́ же си́ленъ въ словесѣ́хъ и дѣ́лѣхъ. Егда́ же исполня́шеся ему́ лѣ́тъ четы́редесятихъ вре́мя, взы́де на се́рдце ему́ посѣти́ти бра́тію свою́, сы́ны Изра́илевы. И, ви́дѣвъ нѣ́коего оби́дима, посо́бствова и сотвори́ отмще́ніе оби́димому, уби́въ еги́птянина. Мня́ше же разумѣ́ти бра́тіямъ свои́мъ, я́ко Бо́гъ руко́ю его́ да́стъ и́мъ спасе́ніе, они́ же не разумѣ́ша. Во у́трій же де́нь яви́ся и́мъ тя́жущимся, и привлача́ше и́хъ въ примире́ніе, ре́къ: му́жіе, бра́тія есте́ вы́, вску́ю оби́дите дру́гъ дру́га? Оби́дяй же бли́жняго отри́ну и́, ре́къ: кто́ тя́ поста́ви кня́зя и судію́ надъ на́ми? Еда́ уби́ти мя́ ты́ хо́щеши, и́мже о́бразомъ уби́лъ еси́ вчера́ еги́птянина? Бѣжа́ же Моисе́й о словеси́ се́мъ, и бы́сть пришле́цъ въ земли́ Мадіа́мстѣй, идѣ́же роди́ сы́на два́. И испо́лньшимся лѣ́томъ четы́редесятимъ, яви́ся ему́ въ пусты́ни горы́ Сина́йскія Ангелъ Госпо́день въ пла́мени о́гненѣ въ купинѣ́. Моисе́й же, ви́дѣвъ, дивля́шеся видѣ́нію. Приступа́ющу же ему́ разумѣ́ти, бы́сть гла́съ Госпо́день къ нему́: Азъ Бо́гъ оте́цъ твои́хъ, Бо́гъ Авраа́мовъ, и Бо́гъ Исаа́ковъ, и Бо́гъ іа́ковль. Тре́петенъ же бы́въ Моисе́й, не смѣ́яше смотри́ти. Рече́ же ему́ Госпо́дь: иззу́й сапоги́ ногу́ твое́ю, мѣ́сто бо, на не́мже стои́ши, земля́ свя́та́ е́сть. Ви́дя, ви́дѣхъ озлобле́ніе люді́й Мои́хъ, и́же во Еги́птѣ, и стена́ніе и́хъ услы́шахъ, и снидо́хъ изъя́ти и́хъ. И ны́нѣ гряди́, послю́ тя во Еги́петъ. Сего́ Моисе́я, его́же отри́нуша, ре́кше: кто́ тя́ поста́ви нача́лника и судію́? Сего́ Бо́гъ кня́зя и изба́вителя посла́ руко́ю Ангела, я́вльшагося ему́ въ купинѣ́.
       3-е: Дѣя́ній святы́хъ апо́столъ чте́ніе. [Глава́ 7, 35-60.] Се́й изведе́ и́хъ, сотво́рь чудеса́ и зна́менія въ земли́ Еги́петстѣй, и въ Чермнѣ́мъ мо́ри, и въ пусты́ни лѣ́тъ четы́редесять. Се́й е́сть Моисе́й, рекі́й сыно́мъ Изра́илевымъ: Проро́ка ва́мъ воздви́гнетъ Госпо́дь Бо́гъ ва́шъ отъ бра́тіи ва́шея я́ко мене́, Того́ послу́шайте. Се́й е́сть бы́вый въ це́ркви въ пусты́ни со Ангеломъ, глаго́лавшимъ ему́ на горѣ́ Сина́йстѣй, и со отцы́ на́шими, и́же прія́тъ словеса́ жи́ва да́ти на́мъ. Его́же не восхотѣ́ша послу́шати отцы́ на́ши, но отри́нуша и́, и обрати́шася се́рдцемъ свои́мъ во Еги́петъ, ре́кше Ааро́ну: сотвори́ на́мъ бо́ги, и́же преды́дутъ предъ на́ми, Моисе́ю бо сему́, и́же изведе́ на́съ отъ земли́ Еги́петскія, не вѣ́мы, что́ бы́сть ему́. И сотвори́ша тельца́ во дни́ о́ны, и принесо́ша же́ртву и́долу, и веселя́хуся въ дѣ́лѣхъ руку́ свое́ю. Отврати́ся же Бо́гъ и предаде́ и́хъ служи́ти во́емъ небе́снымъ, я́коже пи́сано е́сть въ кни́зѣ проро́къ: еда́ заколе́нія и же́ртвы принесо́сте Ми́ лѣ́тъ четы́редесять въ пусты́ни, до́ме Изра́илевъ? И воспрія́сте ски́нію Моло́хову и звѣзду́ бо́га ва́шего Ремфа́на, о́бразы, я́же сотвори́сте покланя́тися и́мъ: и преселю́ вы да́лѣе Вавило́на. Сѣ́нь свидѣ́нія бя́ше отце́мъ на́шимъ въ пусты́ни, я́коже повелѣ́ Глаго́ляй Моисе́ови, сотвори́ти ю́ по о́бразу, его́же ви́дѣ. Юже и внесо́ша, пріе́мше, отцы́ на́ши со Іису́сомъ во одержа́ніе язы́комъ, и́хже изри́ну Бо́гъ отъ лица́ оте́цъ на́шихъ, да́же до дні́й Дави́да, и́же обрѣ́те благода́ть предъ Бо́гомъ и испроси́ обрѣсти́ селе́ніе Бо́гу іа́ковлю. Соломо́нъ же созда́ ему́ хра́мъ. Но Вы́шній не въ рукотворе́нныхъ це́рквахъ живе́тъ, я́коже проро́къ глаго́летъ: небо Мнѣ́ престо́лъ е́сть, земля́ же подно́жіе нога́ма Мои́ма. Кі́й хра́мъ сози́ждете ми́, — глаго́летъ Госпо́дь, — или́ ко́е мѣ́сто поко́ищу Моему́? Не рука́ ли Моя́ сотвори́ сія́ вся́? Жестоковы́йніи и необрѣ́занніи сердцы́ и ушесы́! Вы́ при́сно Ду́ху Свято́му проти́витеся, я́коже отцы́ ва́ши, та́ко и вы́. Кого́ отъ проро́къ не изгна́ша отцы́ ва́ши? И уби́ша предвозвѣсти́вшія о прише́ствіи Пра́веднаго, его́же вы́ ны́нѣ преда́теле и уби́йцы бы́сте, и́же прія́сте зако́нъ устрое́ніемъ а́нгелскимъ и не сохрани́сте. Слы́шаще же сія́, распыха́хуся сердцы́ свои́ми и скрежета́ху зубы́ на́нь. Стефа́нъ же сы́й испо́лнь Ду́ха Свя́та, воззрѣ́въ на не́бо, ви́дѣ сла́ву Бо́жію и Іису́са, стоя́ща о десну́ю Бо́га, и рече́: се́, ви́жу небеса́ отве́рста и Сы́на Человѣ́ча одесну́ю стоя́ща Бо́га. Возопи́вше же гла́сомъ ве́ліимъ, затыка́ху у́ши свои́ и устреми́шася единоду́шно на́нь. И, изве́дше внѣ́ гра́да, ка́меніемъ побива́ху его́. И свидѣ́теліе, сне́мше ри́зы своя́, положи́ша при ногу́ ю́ноши, нарица́емаго Са́вла, и ка́меніемъ побива́ху Стефа́на, моля́щася и глаго́люща: Го́споди Іису́се, пріими́ ду́хъ мо́й. Прекло́нь же колѣ́на, возопи́ гла́сомъ ве́ліимъ: Го́споди, не поста́ви и́мъ грѣха́ сего́! И, сія́ ре́къ, у́спе.

Источникъ: Анѳоло́гіонъ, сíесть Цвѣтосло́віе, или́ Трефоло́гіонъ, сíесть Словопита́ніе. — Кíевъ: Въ Тѵпогра́фіи Кіевопече́рской Ла́ѵры, 1745. — Л. 312 об. – 316 об.

Текстъ стихиръ и тропарей службы свѣренъ съ изданіемъ: Пече́рская Минíа. [Часть вторая.] — Кíевъ: Въ тѵпогра́фіи Кíево-Пече́рскія Ла́ѵры, 2007. — С. 217-234.

/ Къ оглавленію раздѣла /


Наверхъ / Къ титульной страницѣ

0