Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 27-й де́нь.
Свята́го апо́стола, первому́ченика и архидіа́кона Стефа́на. И преподо́бнаго отца́ на́шего и исповѣ́дника Ѳео́дора Начерта́ннаго, бра́та Ѳеофа́на творца́.

[ВЕЧЕРЪ,]
На Го́споди воззва́хъ: стихи́ры апо́стола 3 и преподо́бнаго 3.
Стихи́ры апо́стола, гла́съ 4. Подо́бенъ: Яко до́бля.

Ду́ха благода́тію* просвѣти́въ помышле́ніе,* зра́комъ я́ко а́нгелъ* яви́лся еси́, Стефа́не,* облиста́вшу тѣлеси́ вну́треннею свѣ́тлостію* и зарю́ душе́вную явля́ющу ви́дящимъ,* ея́же ра́ди получи́лъ еси́ и свѣ́та зрѣ́ніе,* небесе́мъ, тебѣ́ пресла́вно отве́рзенымъ,* нача́ло му́чениковъ и похвало́.

Яко степе́ни* и лѣ́ствица на небе́сный восхо́дъ,* ка́менная мета́нія бы́ша тебѣ́.* На ня́же вше́дъ, ви́дѣлъ еси́* стоя́ща Го́спода одесну́ю Отца́,* тебѣ́ тезоимени́тъ вѣне́цъ простира́юща* десни́цею живоно́сною,* Его́же бли́зъ я́ко добропобѣ́дникъ, предстои́ши* и страда́льцевъ верхо́вный.

Зна́меньми, и чудесы́ блиста́яйся,* и догма́ты, пребеззако́нныхъ погаси́лъ еси́ собо́рище,* и отъ ни́хъ убива́емь,* и ка́меніемъ мета́емь,* за убива́ющія тя́* о оставле́ніи моли́лся еси́,* подо́бяся гла́су Спа́сову,* Его́же въ ру́ки пре́далъ еси́ тво́й ду́хъ,* свяще́нный Стефа́не.

Ины стихи́ры преподо́бнаго, гла́съ и подо́бенъ то́йже:

Стра́нничества я́звамъ* приложи́шася тебѣ́ я́звы* заточе́нія, преподо́бне, лютѣ́йшая,* пребеззако́нно держа́щему* престо́лъ зако́нный,* и смуща́ющу лю́тѣ зако́ны вѣ́ры,* и пречи́стый Спа́совъ о́бразъ низлага́ющу,* его́же благода́тію Боже́ственною,* Христо́въ уго́дниче, посрами́лъ еси́.

Ни темни́ца тя́, ни тѣснота́,* ниже́ тма́ несвѣ́тлая,* ни ра́ны, ни біе́нія, о́тче,* возмого́ша къ Бо́гу любве́* разлучи́ти, Ѳео́доре,* ниже́ неду́гъ лю́тъ, и до́лгъ, и нестерпи́мь,* ниже́ ску́дость пи́щи, богоглаго́ливе,* но непрело́жнѣ претерпѣ́лъ еси́,* прови́дя твои́хъ трудо́въ воздая́ніе.

Вмѣ́сто ско́рби осла́бу,* вмѣ́сто болѣ́зней наслажде́ніе,* вмѣ́сто тмы́ осія́ніе* тебѣ́ дарова́* Подвигополо́жникъ пра́ведный.* Вмѣ́сто же, чу́дне, на лицѣ́ твое́мъ писа́нія* написа́лся еси́ въ кни́зѣ жи́зни,* Це́ркви же перворо́дныхъ вчини́лся еси́ въ вы́шнихъ* и ко а́нгеловъ торжеству́* прера́достно прише́лъ еси́.

Сла́ва, гла́съ 2. Анато́ліево:

Царю́ и Влады́цѣ всѣ́хъ, ро́ждшемуся на земли́, вѣне́цъ пресвѣ́телъ прино́сится, не отъ ка́меній честны́хъ устро́енъ, но отъ свои́хъ крове́й процвѣте́нъ. Но, о мучениколю́бцы! Пріиди́те, пѣ́сній цвѣ́ты взе́мше, главы́ увязе́мъ и, пѣ́сни воспѣва́юще, рце́мъ: му́дростію и благода́тію ду́шу просвѣти́вый, первому́чениче, Христа́ Бо́га, проси́ на́мъ ми́ра и ве́лія ми́лости.

И ны́нѣ, гла́съ то́йже:

Ве́ліе и пресла́вное чу́до соверши́ся дне́сь: Дѣ́ва ражда́етъ и утро́ба не истлѣва́етъ, Сло́во воплоща́ется и Отца́ не отлуча́ется. Ангели съ па́стыри сла́вятъ, и мы́ съ ни́ми вопіе́мъ: сла́ва въ вы́шнихъ Бо́гу, и на земли́ ми́ръ.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Изъ Отца́ пре́жде вѣ́къ возсія́вша,* и я́ко Сы́на* въ нѣ́дрѣ Отчемъ присносу́ща,* па́ки въ послѣ́дняя на рука́хъ Ма́тернихъ,* я́ко на престо́лѣ, сѣдя́щаго,* и отъ а́нгеловъ, па́стырей, волхво́въ же,* ны́нѣ покланя́емаго воспои́мъ.

Сти́хъ: Изъ чре́ва пре́жде денни́цы роди́хъ Тя́,* [кля́тся Госпо́дь и не раска́ется].

Въ Виѳлее́мъ соше́дшеся, вѣ́рніи,* у́зримъ всѣ́хъ Творца́,* лежа́щаго во я́слѣхъ,* и отъ земли́ Халде́йскія* да́ръ избра́нный прине́сшія тривеще́ственный* я́ко Царю́ и Бо́гу* и на́съ ра́ди тридне́вному су́щу мертвецу́.

Сти́хъ: Рече́ Госпо́дь Го́сподеви моему́:* сѣди́ одесну́ю Мене́.

Изъ Дѣ́вы роди́лся еси́ въ верте́пѣ,* и во́инства а́нгельская, обстоя́ще, вопія́ху:* сла́ва въ вы́шнихъ Тебѣ́, Бо́гу,* ро́ждшемуся въ ра́біи о́бразѣ,* и обно́вльшему мíръ,* во чре́вѣ Дѣ́вы* и неискусому́жныя Ма́тере.

Сла́ва, гла́съ 6. Анато́ліево:

Пе́рвый въ му́ченицѣхъ показа́лся еси́ и въ діа́конѣхъ, Стефа́не апо́столе, страда́льцевъ удобре́ніе, вѣ́рныхъ утвержде́ніе, сла́ва пра́ведныхъ. Честну́ю твою́ па́мять пра́зднующимъ проси́, я́ко предстоя́ престо́лу Христа́ Всецаря́, прегрѣше́ній очище́нія и Ца́рствія небе́снаго сподо́битися.

И ны́нѣ, гла́съ то́йже. Ге́рманово:

Лику́ютъ а́нгели вси́ на небеси́, и ра́дуются человѣ́цы дне́сь; игра́етъ же вся́ тва́рь ро́ждшагося ра́ди въ Виѳлее́мѣ Спа́са Го́спода, я́ко вся́кая ле́сть и́дольская преста́, и ца́рствуетъ Христо́съ во вѣ́ки.

Тропа́рь свята́го, гла́съ 4:

По́двигомъ до́брымъ подвиза́лся еси́, первому́чениче Христо́въ, и апо́столе, и мучи́телей обличи́лъ еси́ нече́стіе: ка́меніемъ бо побіе́нъ отъ ру́къ беззако́нныхъ, вѣне́цъ отъ я́же свы́ше десни́цы прія́лъ еси́ и къ Бо́гу взыва́лъ еси́, вопія́: Го́споди, не поста́ви и́мъ грѣха́ сего́.

Сла́ва, преподо́бнаго. Тропа́рь, гла́съ 8:

Правосла́вія наста́вниче, благоче́стія учи́телю и чистоты́, вселе́нныя свѣти́льниче, мона́шествующихъ богодохнове́нное удобре́ніе, Ѳео́доре прему́дре, уче́ньми твои́ми вся́ просвѣти́лъ еси́, цѣвни́це духо́вная; моли́ Христа́ Бо́га спасти́ся душа́мъ на́шимъ.

И ны́нѣ, пра́здника, [гла́съ 4]:

Рождество́ Твое́, Христе́ Бо́же нашъ, [возсія́ мíрови свѣ́тъ ра́зума, въ не́мъ бо звѣзда́мъ служа́щіи звѣздо́ю уча́хуся Тебѣ́ кла́нятися, Со́лнцу Пра́вды, и Тебе́ вѣ́дѣти съ высоты́ Восто́ка. Го́споди, сла́ва Тебѣ́].


НА УТРЕНИ,
На Бо́гъ Госпо́дь: Тропа́рь пра́здника, еди́ножды, и апо́стола, еди́ножды. Сла́ва, преподо́бнаго. И ны́нѣ, пра́здника.

По 1-й стихоло́гіи сѣда́ленъ, гла́съ 3. Подо́бенъ: Дѣ́ва дне́сь.

Безсѣ́менное зача́тіе Изба́вителя ражда́етъ, и волсви́ прихо́дятъ Жи́зни поклони́тися, человѣ́цы со а́нгелы славосло́вятъ, верте́пъ же и я́сли дароно́сятъ, воспѣва́юще рожде́ннаго Отроча́ Мла́до, Превѣ́чнаго Бо́га.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

Невмѣсти́мый вездѣ́, ка́ко вмѣсти́ся во чре́во? Сы́й въ нѣ́дрѣхъ Отчихъ, ка́ко на рука́хъ Ма́тернихъ? Вся́ко, я́ко вѣ́сть, я́ко восхотѣ́ и я́ко благоволи́: безпло́тенъ бо Сы́й воплоти́ся во́льно. И бы́сть Сы́й, е́же не бѣ́, на́съ ра́ди, и, не отступи́въ естества́, причасти́ся на́шему смѣше́нію, сугу́бъ роди́ся Христо́съ, вы́шній мíръ хотя́ испо́лнити.

Сла́ва, и ны́нѣ, то́йже.

Кано́нъ пра́здника пе́рвый, со ирмосо́мъ на 6, и святы́хъ два́ кано́на на 8.

Кано́нъ пра́здника, гла́съ 1.
Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Истлѣ́вша преступле́ніемъ, по Бо́жію о́бразу бы́вшаго, всего́ тлѣ́нія су́ща, лу́чшія отпа́дша боже́ственныя жи́зни, па́ки обновля́етъ му́дрый Содѣ́тель, я́ко просла́вися.

Ви́дѣвъ Зижди́тель ги́блема человѣ́ка, рука́ми его́же созда́, приклони́въ небеса́, схо́дитъ; Сего́ же отъ Дѣ́вы боже́ственныя Чи́стыя всего́ осуществу́етъ, вои́стинну вопло́щся, я́ко просла́вися.

Му́дрость, Сло́во и Си́ла, Сы́нъ Сы́й Отчій и Сія́ніе, Христо́съ Бо́гъ, си́лъ утаи́вся, ели́ко премíрныхъ и ели́ко на земли́, и, вочеловѣ́чся, обнови́лъ есть насъ, я́ко просла́вися.

Кано́нъ апо́стола, творе́ніе Іоа́нна Дамаскина́, гла́съ 5.
Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Гряди́те, вѣнцы́ пѣ́сней первому́ченика Христо́ва Це́ркви сла́вно вѣнча́имъ и, Боже́ственною вѣнча́еми Стефа́новою благода́тію, побѣ́дную пѣ́снь воспои́мъ.

Нося́ Учи́телевъ кро́ткій смы́слъ и е́же отъ любве́ боготво́рное смире́ніе, досто́йно, Стефа́не, діа́коновъ старѣ́йшина и предста́тель вдови́цамъ бы́лъ еси́.

Ты́ на по́мощь апо́столовъ Христо́выхъ досто́йно призва́лся еси́ и я́ко вѣ́ренъ діа́конъ, тезоимени́те Стефа́не, бы́лъ еси́, идѣ́же Христо́съ, кро́вію преше́лъ еси́.

Богоро́диченъ: Ты́ у́бо за человѣ́ки, Христе́, человѣ́ка отъ Дѣ́вы поне́съ я́ко Младе́нецъ пови́тся, Тво́й же посы́панъ первому́ченикъ ка́меней мета́ніи, человѣ́ка совлачи́тся.

Инъ кано́нъ, преподо́бнаго, его́же краегране́сіе: Твоя́, бра́те, бли́жняя плету́ хвалы́. Ѳеофа́нъ. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Ти́тлу твоего́ честна́го лица́ ви́дѣвше, херуви́ми отступа́ютъ отъ дре́ва жи́зни; пла́менное же ору́жіе всеблагоговѣ́йно плещи́ тебѣ́ дае́тъ, всему́дре Ѳео́доре.

Ти́тла надъ главо́ю лежа́ше Царя́ Христа́, напи́сана на Дре́вѣ Кре́стнѣмъ; твоя́ же ти́тла, всему́дре, на лицѣ́ твое́мъ начерта́ся, напи́сана благолѣ́пнѣ.

Возвы́сися у́бо на Кре́стъ Госпо́дь и прободе́нъ бы́сть въ ре́бра; ты́ же, протяже́нъ на скаміи́, терпѣли́вно боде́нія претерпѣ́лъ еси́, я́коже ове́нъ наро́читъ, священнотаи́нниче, назна́менаемь.

Му́дростію вся́кою украша́емь, о́тче Ѳео́доре, предста́теля обличи́лъ еси́ я́вѣ злы́я е́реси, терпѣ́ніемъ же дѣ́лъ, сего́ мудрова́нія ужаси́лъ еси́.

Богоро́диченъ: Му́дрости прему́дростныя была́ еси́ прія́телище, Пречи́стая Богороди́тельнице, Еди́на вѣ́рныхъ спасе́ніе и пѣ́ніе: Ты́ бо на́мъ родила́ еси́ дне́сь Боже́ственное избавле́ніе.

Пѣ́снь 3.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Иже дохнове́нія прича́щся лу́чшаго Ада́мъ пе́рстный и къ тлѣ́нію попо́лзся же́нскою ле́стію, Христа́ отъ Жены́ ви́дя, вопіе́тъ: Иже мене́ ра́ди по мнѣ́ бы́въ, Свя́тъ еси́, Го́споди.

Сообра́зенъ бре́нному умале́нію растворе́ніемъ, Христе́, бы́въ и прича́стіемъ пло́ти го́ршія, пода́въ Боже́ственнаго естества́, зе́мленъ бы́въ, и пребы́въ Богъ, и возвы́сивый ро́гъ на́шъ, Свя́тъ еси́, Го́споди.

Виѳлее́ме, весели́ся, князе́й Іу́довыхъ Сы́й Ца́рь: Изра́иля бо пасы́й на ра́мѣхъ херуви́мскихъ, изъ тебе́ про́йде Христо́съ я́вѣ и вознесы́й ро́гъ на́шъ надъ всѣ́ми воцари́ся.

Инъ.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Зако́нно, я́ко Христо́въ во́инъ, Стефа́нъ, къ богоубíйцамъ ополчи́вся, въ непобѣди́мую Его́ си́лу одѣ́янъ, пребеззако́нныхъ обличи́ все́ лука́вное противле́ніе.

Ре́вностію Христо́вы разже́гся любве́ и къ подвиго́мъ совле́кся, вѣ́ры и Ду́ха испо́лнився Боже́ственнаго, первому́ченикъ, ры́барей извѣсти́лъ еси́ всѣ́мъ богосу́дную про́повѣдь.

Яко проповѣ́дникъ сокрове́нныя вои́стинну и боже́ственныя жи́зни, настоя́щую я́коже забы́въ, дѣ́ломъ показа́ я́вѣ всѣ́мъ первому́ченикъ побѣдоно́сную и́стину, Влады́ко, произво́ливъ сме́рть.

Богоро́диченъ: Въ жите́йскій на́съ ра́ди Влады́ка верте́пъ вни́де о́бразомъ низхожде́нія; му́чениковъ же нача́льникъ Стефа́нъ отъ тя́жести человѣ́ческія исхо́дитъ, любо́вію Влады́чнею побѣжда́емь.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Не имѣ́я что́ твои́мъ уче́ніемъ противорещи́, преподо́бне, на ра́ны обраща́ется, е́ллинскаго неи́стовства испо́лненный.

Подъя́лъ еси́ терпѣли́вно е́же на ра́мѣхъ и на пе́рсехъ ра́ны Христа́ ра́ди, богодохнове́нне, и по главѣ́ ударе́нія.

Му́дростію духо́вною и усе́рдіемъ по́мысла посрами́лъ еси́ злочести́ваго и беззако́ннаго свяще́ннѣйшими твои́ми догма́ты.

Богоро́диченъ: Дави́дъ, я́коже ковче́гъ, въ Виѳлее́мѣ проро́ческими очесы́, Ма́ти Бо́жія, ви́дитъ Тя́, Младе́нца Пребоже́ственнаго нося́щу.

Конда́къ, гла́съ 3:

Дѣ́ва дне́сь Пресу́щественнаго ражда́етъ, и земля́ верте́пъ Непристу́пному прино́ситъ. Ангели съ па́стырьми славосло́вятъ, волсви́ же со звѣздо́ю путеше́ствуютъ: на́съ бо ра́ди роди́ся Oтроча́ Мла́до, Превѣ́чный Бо́гъ.

Икосъ:

Еде́мъ Виѳлее́мъ отве́рзе, пріиди́те, ви́димъ, пи́щу въ та́йнѣ обрѣто́хомъ; пріиди́те, пріи́мемъ су́щая ра́йская вну́трь верте́па: та́мо яви́ся ко́рень ненапое́нъ, прозяба́я отпуще́ніе, та́мо обрѣ́теся кла́дязь неиско́панъ, изъ него́же Дави́дъ пи́ти дре́вле возжада́ся. Та́мо Дѣ́ва ро́ждши Младе́нца, жа́жду уста́ви а́біе Ада́мову и Дави́дову. Сего́ ра́ди къ Нему́ и́демъ, гдѣ́ роди́ся Отроча́ Мла́до, Превѣ́чный Бо́гъ.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Апо́столе Христо́въ, діа́коновъ пе́рвый, первому́чениче му́дре, му́чениковъ ве́рхъ, мíра концы́ освяти́въ страда́ніи твои́ми, и чудесы́ ду́ши человѣ́ковъ просвѣти́лъ еси́. Чту́щія тя́ изба́ви вся́ческихъ бѣ́дъ, всехва́льне Стефа́не.

Сла́ва, преподо́бнаго сѣда́ленъ, гла́съ 3. Подо́бенъ: Боже́ственныя вѣ́ры.

Уста́ бы́лъ еси́ де́рзости, горды́ню мучи́телеву велему́дренно посрами́въ терпѣ́ніемъ страда́ній твои́хъ, уязвля́емь бо бы́въ въ лице́, Ѳео́доре, за Христо́ву ико́ну всечестну́ю, извѣсти́лъ же еси́ чти́ти и сла́вити вся́, прося́ на́мъ ве́лію ми́лость.

И ны́нѣ, богоро́диченъ:

Рождество́ безсѣ́менное смотря́ющи, Всенепоро́чная, дивя́щися, изъ Нея́ Рожде́нному вѣща́ше: а́ще и зра́комъ человѣ́ческимъ обложи́лся еси́, но Бо́га Тя́ проповѣ́дуютъ ве́щи, Ча́до Безнача́льное Безнача́льнаго Отца́, Собезнача́льне, всѣ́мъ подая́й ве́лію ми́лость.

Пѣ́снь 4.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Его́же дре́вле прорече́ Іа́ковъ, язы́ковъ ожида́ніе, Христе́, отъ колѣ́на Іу́дова возсія́лъ еси́ и си́лу Дама́скову, Самарíйскую же коры́сть прише́лъ еси́ испроврещи́, лесть премѣня́я въ вѣ́ру боголѣ́пну: сла́ва си́лѣ Твое́й, Го́споди.

Волхва́ дре́вле Валаа́ма словесы́ ученики́, му́дрыя звѣздоблюсти́тели, ра́дости испо́лнилъ еси́, звѣзда́ отъ Іа́кова, возсія́въ, Влады́ко, язы́ковъ нача́токъ вводи́мый прія́лъ же еси́ я́вѣ: сла́ва си́лѣ Твое́й, Го́споди.

Яко на руно́, во чре́во Дѣ́вы сше́лъ еси́ до́ждь, Христе́, и я́ко ка́пли, на зе́млю ка́плющія. Еѳіо́пія, и Ѳарси́съ, и Арави́тстіи о́строви же, Сава́, Ми́довъ всю́ зе́млю держа́щіи, припадо́ша Тебѣ́, Спа́се: сла́ва си́лѣ Твое́й, Го́споди.

Инъ.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Поревнова́въ а́нгельскому усе́рдію и зра́комъ а́нгельскимъ свѣ́тло украси́вся, зри́ши сла́ву Боже́ственную и сея́ озаре́ніе.

Клеветни́къ, судія́ же и мучи́тель, человѣкоубíйца и оте́цъ лжи́ явля́ется, Стефа́не, но себе́ побѣжда́етъ, сѣ́ти на ся́ простира́я.

Яко пе́рвый му́чениковъ Стефа́нъ, путесотвори́въ же на́мъ муче́нія вхо́дъ, вѣнцено́сецъ лику́етъ, вѣнце́мъ му́ченическимъ вѣнча́емь.

Богоро́диченъ: Просія́въ отъ Дѣ́вы, я́ко со́лнце, совозсія́вшу, Христе́, я́ко денни́цу, сла́вную первому́ченика па́мять Свое́ю украша́еши свѣ́тлостію.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Просте́ртъ на дсцѣ́, начерта́нъ бы́сть, я́ко покланя́ющся, Ѳео́доре, Христо́вѣ ико́нѣ и Богома́тере, на́глостію свирѣ́пства и ва́рварскимъ суровство́мъ.

Служи́въ отъ ю́ности Влады́цѣ и къ Нему́ непреста́нно жела́ніе имѣ́я, блаже́нне, воздержа́ніемъ, му́ченическою кро́вію а́біе украси́лся еси́ свѣтлѣ́йше.

Свѣ́телъ, я́ко со́лнце, богоно́се, отъ восто́ка устреми́лся еси́, зари́ испуща́я исповѣ́данія твоего́ и велему́дреннаго и до́блественнѣйшаго противле́нія.

Богоро́диченъ: Благослове́нъ гряды́й Бо́гъ Сло́во въ Виѳлее́мъ, я́ко Благоутро́бенъ, отъ неискусобра́чнаго, Пречи́стая, чре́ва Твоего́. Его́же ны́нѣ моли́ спасти́ къ Тебѣ́ прибѣга́ющія.

Пѣ́снь 5.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Въ рабѣ́хъ ке́саревымъ повелѣ́ніемъ написа́тися поко́рься, и на́съ, рабы́ су́щія, врага́ и грѣха́ свободи́лъ еси́, Христе́, ве́сь же по на́мъ обнища́въ, и пе́рстнаго отъ самаго́ едине́нія и обще́нія богосодѣ́лалъ еси́.

Се Дѣ́ва, я́коже дре́вле рече́, во чре́вѣ пріе́мши, родила́ е́сть Бо́га вочеловѣ́чшася и пребыва́етъ Дѣ́ва. Ея́же ра́ди примири́вшеся Бо́гу, грѣ́шніи, Богоро́дицу су́щую вои́стинну, вѣ́рніи, воспои́мъ.

Инъ.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Облиста́, я́ко а́нгелъ, первому́ченикъ Тво́й, небе́сныхъ круго́въ, Христе́, бы́въ превы́шше и сла́вы неизглаго́ланныя Твоея́ насы́щся, Человѣколю́бче.

Богоглаго́ливыхъ у́стъ одожде́ніи низложи́ скверноубíйцы первому́ченикъ, отъ ни́хже безчи́сленными ка́меней одожде́ньми я́ко побѣди́тель вѣнча́ся.

Яко непобѣди́мо первому́ченика боже́ственныя ре́вности дерзнове́ніе, и́бо да́же до кро́ве къ богоубíйцамъ му́жески ополчи́ся.

Богоро́диченъ: Прише́дшаго отъ Неискусому́жныя Ма́тере, первому́ченикъ, въ недви́жимѣмъ Отца́ Божествѣ́ и сла́вѣ, стоя́ща на небесѣ́хъ, ви́дѣ.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

На земли́ стра́ннѣй обита́яй, стра́нничество, озлобле́ніе, ра́ны, заточе́нія и темни́цы лютѣ́йшія подъя́лъ еси́ терпѣли́вно.

Ны́нѣ ра́дуешися вои́стинну, побѣдоно́сное вѣнча́ніе пріе́мъ въ де́нь свѣ́тлый и свѣтоно́сный боже́ственнаго первому́ченика.

Еже имѣ́лъ еси́ отъ дѣ́вства благоче́стія обѣща́ніе, соблю́лъ еси́ да́же до конца́, не превраще́нъ пребы́въ, непобѣди́ме Ѳео́доре.

Богоро́диченъ: Тя́ ору́жіе непобѣди́мое на враги́ предлага́емъ, Тя́ по́мощь и наде́жду на́шего спасе́нія, Богоневѣ́сто, стяжа́хомъ.

Пѣ́снь 6.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Пріи́де, вопло́щся, Христо́съ Бо́гъ на́шъ изъ чре́ва, Его́же Оте́цъ пре́жде денни́цы ражда́етъ; правле́нія же держа́ пречи́стыхъ си́лъ, въ я́слѣхъ ско́тіихъ возлежи́тъ и пелена́ми повива́ется, разрѣша́етъ же многоплете́нныя плени́цы прегрѣше́ній.

Юно изъ Ада́ма отроча́ смѣше́нія, роди́ся Сы́нъ и вѣ́рнымъ даде́ся, бу́дущаго вѣ́ка Се́й е́сть Оте́цъ и Нача́льникъ и нарица́ется Вели́каго Совѣ́та Ангелъ. Се́й крѣ́покъ Бо́гъ е́сть и держа́й о́бластію всю́ тва́рь.

Инъ.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Сла́вный чинонача́льникъ му́чениковъ Стефа́нъ, вѣ́рніи зако́ны естества́ благода́тію преше́дъ, Боже́ственною сла́вою озаря́ется.

Подо́бникъ всеизря́днейшій бы́въ, Влады́ко Христе́, честны́я стра́сти Твоея́, Стефа́нъ убíйцамъ благослове́ніемъ отмща́етъ.

Скверноубíйственнаго дѣя́нія неприча́стны сохрани́, Христе́, и первому́ченика сподо́би Твоя́ пѣвцы́ наслѣ́дія, я́ко Благоутро́бенъ.

Богоро́диченъ: Всемíрнаго бы́сть спасе́нія, Влады́ко Христе́, нача́ло рождество́ Твое́ и му́ченикомъ боголѣ́пнаго исповѣ́данія основа́ніе.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

По́томъ подвиго́въ еще́ ка́пая, Подвигополо́жнику предста́лъ еси́, пра́веднымъ судо́мъ всю́ тва́рь пра́вящему, богоно́се всеблаже́нне Ѳео́доре.

Ничто́же тя́ Христо́вы любве́ отлучи́, ни уране́ніе тѣ́ла, ни сме́ртнаго осужде́нія преще́ніе, ни тщета́ прису́щихъ, всеблаже́нне Ѳео́доре.

Сы́нъ сы́й и свѣ́та и дне́ пресвѣ́тлый, по́лнъ свѣ́та, преста́вился еси́, къ Боже́ственному сія́нію возраста́емь, дне́мъ и но́щію неоскудѣва́емь, богопрія́тне.

Богоро́диченъ: Тя́ еди́ну посреди́ те́рнія обрѣ́тъ, я́ко честнѣ́йшій кри́нъ и удо́льный цвѣ́тъ, о Богома́ти, Жени́хъ мы́сленный въ Тя́ всели́ся.

Конда́къ, гла́съ 3. Подо́бенъ: Дѣ́ва дне́сь.

Влады́ка вчера́ на́мъ пло́тію прихожда́ше, и ра́бъ дне́сь отъ пло́ти исхожда́ше. Вчера́ Ца́рствуяй пло́тію роди́ся, дне́сь ра́бъ ка́меніемъ побива́ется; Того́ ра́ди и скончава́ется первому́ченикъ и боже́ственный Стефа́нъ.

Икосъ:

Яко звѣзда́ свѣ́тлая, дне́сь совозсія́ Рождеству́ Христо́ву первому́ченикъ Стефа́нъ, облиста́яй, просвѣща́яй земны́я концы́, іуде́йское то́кмо омрачи́ все́ злоче́стіе. Му́дростію сло́ва си́хъ изобличи́въ, отъ Писа́ній бесѣ́дуяй, и увѣщава́я сія́, ро́ждшагося отъ Дѣ́вы Іису́са, Сы́на Бо́жія бы́ти и Бо́га. И посрами́ си́хъ нечести́вое злодѣ́йство первому́ченикъ и боже́ственный Стефа́нъ.

Пѣ́снь 7.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Па́стыріе, свиря́юще, ужа́сно свѣтоявле́ніе получи́ша: сла́ва бо Госпо́дня облиста́ и́хъ, и а́нгелъ, — воспо́йте, — вопія́, — я́ко роди́ся Христо́съ, отце́въ Бо́гъ благослове́нный.

Внеза́пу съ сло́вомъ а́нгеловымъ небе́сная во́инства, — сла́ва, — вопія́ху, — Бо́гу въ вы́шнихъ, на земли́ ми́ръ, въ человѣ́цѣхъ благоволе́ніе: Христо́съ возсія́, отце́въ Бо́гъ благослове́нный.

Глаго́лъ что́ се́й? — реко́ша па́стыріе, — прише́дше, уви́димъ бы́вшее, Боже́ственнаго Христа́. Виѳлее́ма же доше́дше, съ Ро́ждшею покланя́хуся, воспѣва́юще: отце́въ Бо́же, благослове́нъ еси́.

Инъ.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Зубы́ скреже́щуще убíйственнѣ, беззако́нніи, я́ко звѣ́ріе восхи́тивше, убива́ху Стефа́на, боже́ственнѣ пою́ща: Бо́же, благослове́нъ еси́.

Яко пе́стрыми цвѣ́ты и кра́сными, Стефа́не, ка́меніемъ украша́емь, тебе́ сама́го приве́лъ еси́ Христу́ Жизнода́вцу, поя́: Бо́же, благослове́нъ еси́.

Яко непобѣди́мо Па́влово противле́ніе, гоня́ща пе́рвое Бо́жія уго́дники, приводя́ща же язы́ки ны́нѣ ко Христу́ во вѣ́ки.

Взя́тъ бы́въ Ду́хомъ Святы́мъ, Стефа́не, неизрече́нно ви́дѣлъ еси́ Сы́на со Роди́телемъ, зовы́й Тро́ицѣ: Бо́же, благослове́нъ еси́.

Богоро́диченъ: Тебѣ́, возсія́вшему отъ Дѣ́вы боже́ственныя Чи́стыя, принесе́ся одушевле́нный я́ко Царю́ вѣне́цъ, боже́ственнѣ пѣснопоя́ Тебѣ́: Бо́же, благослове́нъ еси́.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Распаля́емь правосла́вною ре́вностію, всему́дре, снѣде́ніе скве́рныя е́реси и лю́тыя де́рзостнѣ отри́нулъ еси́, — благослове́нъ еси́, Бо́же мо́й, — зовя́, — и Го́споди.

Сло́во му́дрости, сло́во догма́товъ, сло́во зна́нія, сло́во уче́ній, о́тче, всеблагочести́выхъ Бо́гъ Сло́во тебѣ́ дарова́, — благослове́нъ еси́, Бо́же мо́й, — зову́щу, — и Го́споди.

Возсія́въ отъ восто́ка, я́коже со́лнце, зарю́ благоче́стія сѣ́ялъ еси́ на земли́, ико́ны поклоне́ніе Христо́вы, просвѣща́ющую и уча́щую, о́тче Ѳео́доре.

Богоро́диченъ: Укра́шена, препросла́влена, пресія́ющая свѣ́томъ дѣ́вства яви́лася еси́, Ма́ти, Бо́га тѣ́ломъ ро́ждшая и пелена́ми пови́вшая, вся́ я́вѣ повива́ющаго.

Пѣ́снь 8.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Влече́тъ Вавило́ня дщи́ о́троки плѣне́нныя Дави́довы отъ Сіо́на къ себѣ́; дароно́сцы же сле́тъ волхвы́ дѣ́ти, Дави́довѣ богопрія́тнѣй дще́ри моля́щіяся. Тѣмъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Орга́ны уклони́ша плаче́вныя пѣ́сни, не поя́ху бо въ земли́ чужде́й о́троцы Сіо́новы, вавило́нскую же разрѣша́етъ ле́сть всю́ и мусикíйскія соста́вы, въ Виѳлее́мѣ возсія́въ, Христо́съ. Тѣ́мъ, воспѣва́юще, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Коры́сти Вавило́нъ ца́рства Сіо́ня и плѣне́нное бога́тство прія́тъ, сокро́вища же Христо́съ въ Сіо́нъ сего́, и цари́ звѣздо́ю наставля́я, звѣздоблюсти́тели влече́тъ. Тѣ́мъ, воспѣва́юще, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Инъ.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Пріиди́те, мы́сленно Стефа́новою сла́вою облиста́еми, воспои́мъ вопло́щшемуся Бо́гу: дѣла́ вся́кая, Го́спода по́йте и превозноси́те во вся́ вѣ́ки.

Тебѣ́, я́ко побѣди́телю пребезза́конныя ле́сти, страда́ній вѣне́цъ исплете́ся, Стефа́не. Тѣ́мъ вопія́лъ еси́: Го́спода по́йте и превозноси́те во вся́ вѣ́ки.

Яви́ся тебѣ́ Христо́съ во Отчей сла́вѣ, страда́ній возвѣща́я тебѣ́ я́вѣ возме́здія; тѣ́мже вопія́лъ еси́: Го́спода по́йте и превозноси́те во вся́ вѣ́ки.

Исплете́ на́мъ Влады́чнее Рождество́ ли́къ и па́мять первому́ченика; тѣ́мъ непреста́нно Го́спода пое́мъ и превозно́симъ во вся́ вѣ́ки.

Богоро́диченъ: Тебе́, па́че ума́ богому́жно сло́вомъ ро́ждшую Го́спода и дѣ́вствующую, вся́ дѣла́, Дѣ́во, благослови́мъ и превозно́симъ во вся́ вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Яко ле́въ, всеблаже́нне, упова́въ души́ тве́рдостію, не устраши́лся еси́ ерети́ческаго стремле́нія, неи́стовства тезоимени́таго, его́же оплева́въ, лю́демъ, ра́дуяся, вопія́лъ еси́: благослови́те, вся́ дѣла́ Госпо́дня, Го́спода.

Украси́въ му́жествомъ ду́шу, цѣлому́дріемъ же, блаже́нне, жела́ніе, у́мъ, ра́зума испо́лненъ, стяжа́въ, соверши́лъ еси́, пра́вдою же твоя́ смы́слы упра́вилъ еси́ и вопіе́ши: благослови́те, вся́ дѣла́ Госпо́дня, Го́спода.

Стремли́во теку́щій то́къ е́реси, о́тче, изсуши́лъ еси́, твои́ми наказа́ніи, преподо́бне, и всему́дрыми указа́ньми хи́трости злочести́выхъ разоря́я и зовя́: благослови́те, вся́ дѣла́ Госпо́дня, Го́спода.

Богоро́диченъ: Созда́вый естество́ въ нача́тцѣхъ человѣ́ческое, Бо́гъ въ сіе́ облачи́тся отъ пречи́стаго Твоего́, Всечи́стая, и свята́го чре́ва, дне́сь въ Виѳлее́мѣ проро́чески ражда́яся; тѣ́мъ Тя́ вси́ благослови́мъ, Марíе Богоневѣ́сто.

Пѣ́снь 9.

Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Изря́дное тече́ніе зря́ще волсви́ необы́чныя но́выя звѣзды́ новосія́ющія, небеса́ просвѣща́ющія, Христа́ Царя́ зна́менующія на земли́, ро́ждшагося въ Виѳлее́мѣ на спасе́ніе на́ше.

Новорожде́нное, — волхво́мъ, глаго́лющимъ, — Отроча́ Ца́рь, Его́же звѣзда́ яви́, гдѣ́ е́сть? Тому́ бо поклони́тися пріидо́хомъ. — Яря́ся, Иродъ смуща́шеся, Христа́ уби́ти богобо́рецъ шата́яся.

Испыта́ Иродъ вре́мя звѣзды́, ея́же вожде́ніемъ волсви́ въ Виѳлее́мѣ покланя́хуся Христу́ съ да́ры; е́юже, ко оте́честву наставля́еми, лю́таго дѣтоубíйцу оста́виша пору́гана.

Инъ.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Похва́лъ, Стефа́не, преше́лъ еси́ вся́къ чи́нъ и но́сиши по коему́ждо сло́ву нело́жно ты́ побѣди́тельная: изнемога́етъ бо человѣ́ческій у́мъ соплести́ вѣне́цъ похва́лъ тебѣ́ досто́йный.

О, блаже́ннаго твоего́, его́же провѣща́лъ еси́, Стефа́не, гла́са! Не поста́ви убíйцамъ, Влады́ко, — вопія́, — Христе́, беззако́нія, но, я́ко Бо́гъ и Содѣ́тель, пріими́ ду́хъ мо́й, я́коже же́ртву благово́ннѣйшу.

Ты́ болѣ́зней воздая́ніе прія́лъ еси́, побѣди́тельный отъ Вседержи́тельныя вѣне́цъ десни́цы, и ны́нѣ, всеблаже́нне, предстоя́ Всецарю́, сла́вою и благода́тію пою́щія Тя́ увѣнча́й.

Богоро́диченъ: Вре́меннаго бытія́ отъ Дѣ́вы прія́тъ нача́ло пло́тію отъ Отца́ безлѣ́тный Сы́нъ; Его́же ра́ди убива́емь подо́бникъ Христо́въ Стефа́нъ, ны́нѣ наслѣ́дова отъ нача́ла вѣ́чную жи́знь.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Боже́ственнымъ побѣжда́емь жела́ніемъ, гоне́ній ополче́нія удо́бо претерпѣ́лъ еси́, богому́дре, и, гони́теля свирѣ́пство низложи́въ, воспрія́лъ еси́ подвиго́въ, о́тче, вѣне́цъ.

Бога́тство небе́сное обрѣ́лъ еси́ и пребыва́ющую хра́мину вмѣ́сто го́рькаго заточе́нія, и стра́нничества, и прехожде́нія, и ны́нѣ пита́ешися, пріе́мля вѣ́чное наслажде́ніе.

Пѣ́ніе Влады́цѣ принося́, о́тче, и мольбы́, не преста́й о мое́й не́мощи, и сообита́ніи, и бра́тствѣ, я́ко да, вку́пѣ пожи́вше, улучи́мъ вку́пѣ обоже́ніе.

Богоро́диченъ: Тя́, па́че ума́ же и сло́ва въ Виѳлее́мѣ Бо́га Сло́ва дне́сь ро́ждшую, Дѣ́во, и въ пелена́хъ Сего́ пови́вшую, я́ко вои́стинну Богоотрокови́цу и Богоро́дицу велича́емъ.

Свѣти́ленъ. Подо́бенъ: Ду́хомъ во святи́лищи.

Одесну́ю стоя́ща Отца́, ви́дѣлъ еси́ Сло́ва Пребезнача́льнаго, и Свѣ́та неизглаго́ланнаго лице́ испо́лнилъ еси́, апо́столовъ похвало́ и му́чениковъ сла́во; украси́лся же еси́ вѣнце́мъ ка́меній мета́ньми и кончи́ну прія́лъ еси́ боже́ственную.

Сла́ва, и ны́нѣ, свѣти́ленъ пра́здника:

Въ я́слѣхъ положи́ся, младе́нствовавъ, я́ко Младе́нецъ; звѣзда́ же призва́ тро́ицу волхво́въ; па́стыріе же, чудеси́ уди́вльшеся, потща́шася Бо́га ви́дѣти вочеловѣ́чшася; а́нгельстіи же ли́цы, дивя́щеся, — сла́ва въ вы́шнихъ, — вопія́ху.

На хвали́техъ стихи́ры на 6, самогла́сны, гла́съ 1. Кипріа́ново:

Страда́льческій вѣне́цъ первострада́льцу, вѣ́рніи, исплете́мъ отъ слове́сныхъ цвѣто́въ: то́й бо му́ченикомъ проугото́ва пу́ть и въ ра́дости вопія́ше: се́ небеса́ отве́рста ви́жду и Сы́на Бо́жія, одесну́ю стоя́ща неви́димаго Отца́.

Гла́съ 2. Анато́ліево:

Пе́рвый въ діа́конѣхъ, пе́рвый и въ му́ченицѣхъ показа́лся еси́, всесвяты́й Стефа́не: пу́ть бо бы́лъ еси́ святы́мъ, и мно́ги Го́споду приве́лъ еси́ му́ченики. Тѣ́мъ не́бо тебѣ́ отве́рзеся, и Бо́гъ тебѣ́ яви́ся. Того́ моли́ спасти́ся душа́мъ на́шимъ.

Во святы́ню одѣ́ялся еси́, Стефа́не блаже́нне, первому́чениче и перводіа́коне, а́нгеловъ соприча́стниче: хода́тайствуй и моли́ся о на́съ Спа́су, Го́споду безгрѣ́шному.

Первому́ченика и до́бляго Христо́ва уго́дника Стефа́на перводіа́кона досто́йно почти́мъ: то́й бо, стоя́ посреди́ беззако́нникъ, одесну́ю Отца́ Сы́на ви́дѣ.

Гла́съ 4. Іоа́нна мона́ха:

Стефа́не сла́вне, небесножи́телю, Христо́въ уго́дниче блаже́нне, моли́тву сотвори́ о душа́хъ на́шихъ.

Гла́съ то́йже:

Стефа́нъ, до́брое нача́ло му́чениковъ, по́лнъ благода́ти и си́лы, творя́й зна́менія и чудеса́ ве́лія въ лю́дехъ, отъ беззако́нныхъ, ка́меніемъ побіе́нъ быва́ше, но просвѣти́ся, я́ко а́нгелъ, и зри́тъ сла́ву Тебе́, распе́ншагося на́съ ра́ди, одесну́ю Си́лы и Ду́хомъ благода́ти на небеса́ взима́шеся; и сего́ ра́ди съ ликостоя́ніи а́нгельскими водворя́яся, мо́лится спасти́ся душа́мъ на́шимъ.

Сла́ва, гла́съ 5. Кипріа́ново:

Первому́чениче апо́столе и перводіа́коне, две́рь му́чениковъ и сла́ва пра́ведныхъ, апо́столовъ похвало́, ты́ небеса́ ви́дѣлъ еси́ отве́рста, на суди́щи стоя́, и Сы́на Бо́жія, одесну́ю стоя́ща неви́димаго Отца́. Тѣ́мже, я́ко а́нгелъ, возсія́въ лице́мъ, въ ра́дости взыва́лъ еси́ о побива́ющихъ тя́ ка́меніемъ: не поста́ви и́мъ грѣха́ сего́. И ны́нѣ испроси́ отъ любве́ хва́лящимъ тя́ очище́ніе грѣхо́въ и ве́лію ми́лость.

И ны́нѣ, гла́съ то́йже. Іоа́нна мона́ха:

Непостижи́мое соверша́емое въ Виѳлее́мѣ дне́сь та́инство: Неви́димый ви́дится, Безпло́тный воплоща́ется, Сло́во одебелѣва́етъ, и Сы́й быва́етъ, е́же не бѣ́. Дѣ́ва ражда́етъ въ верте́пѣ Младе́нца Мла́да, Зда́теля естества́. Ясли вообразу́ются въ престо́лъ небе́сный, ско́ти образу́ютъ херуви́мское предстоя́ніе. Па́стыріе чудя́тся. Волсви́ да́ры прино́сятъ. Ангели, воспѣва́юще, глаго́лютъ: сла́ва въ вы́шнихъ Бо́гу, и на зе́мли ми́ръ, въ человѣ́цѣхъ бо благоволе́ніе, неизмѣ́нный Емману́илъ.

На стихо́внѣ стихи́ры, гла́съ 6. Подо́бенъ: Ангельскія.

Вождеству́етъ пра́здникъ ра́достію вся́ тва́рь,* и небеса́ съ на́ми ра́дуются:* во я́слѣхъ бо Зижди́тель,* отъ Дѣ́вы воплоща́емый,* и въ Виѳлее́мѣ Іуде́йстѣмъ* Младе́нецъ ви́дѣнъ бы́сть пресла́вно.* Лю́діе, рце́мъ:* благослове́нъ Рожде́йся,* Бо́же на́шъ, сла́ва Тебѣ́.

Сти́хъ: Изъ чре́ва пре́жде денни́цы роди́хъ Тя́,* [кля́тся Госпо́дь и не раска́ется].

Да земны́я небе́сны сотвори́ши,* прише́лъ еси́ на зе́млю, вопло́щся отъ Дѣ́вы,* и Младе́нецъ ви́димъ бы́лъ еси́,* Сло́во Сы́й Превѣ́чное,* волхвы́ подви́глъ еси́ отъ Перси́ды* въ Твое́ поклоне́ніе, Ще́дре.* Съ ни́ми же взыва́емъ:* благослове́нъ Рожде́йся,* Бо́же на́шъ, сла́ва Тебѣ́.

Сти́хъ: Рече́ Госпо́дь Го́сподеви моему́:* сѣди́ одесну́ю Мене́.

Мла́до на́съ ра́ди, Іису́се,* яви́лся еси́ Отроча́,* изъ Отца́ пре́жде вѣ́къ возсія́въ,* обветша́вшія преступле́ніемъ* хотя́ вся́ обнови́ти человѣ́ки.* Тѣ́мъ Тебѣ́ вси́* благода́рно при́сно зове́мъ:* благослове́нъ Рожде́йся,* Бо́же на́шъ, сла́ва Тебѣ́.

Сла́ва, гла́съ 8. Кипріа́ново:

Ра́дуйся въ Го́сподѣ, вѣнцено́сче Стефа́не, подо́бникъ Влады́ки, зане́же и первому́ченикъ бы́лъ еси́ Христа́, Царя́ на́шего, и ле́сть беззако́нныхъ іуде́й упраздни́лъ еси́, моля́ся о на́съ ко Го́споду.

И ны́нѣ, гла́съ то́йже. Іоа́нна мона́ха:

Ка́ко изреку́ вели́кое та́инство? Безпло́тный воплоща́ется, Сло́во одебелѣва́етъ, Неви́димый ви́дится, и Неосяза́емый осяза́ется, и Безнача́льный начина́ется: Сы́нъ Бо́жій, Сы́нъ человѣ́чь быва́етъ, Іису́съ Христо́съ вчера́, и дне́сь, То́йже и во вѣ́ки.


НА ЛИТУРГІИ,

Блаже́нна пра́здника пѣ́снь 1-я на 4 и свята́го пѣ́снь 3-я на 4. Проки́менъ пра́здника, и до отда́нія. И апо́стола, гла́съ 8: Во всю́ зе́млю изы́де вѣща́ніе и́хъ, [и въ концы́ вселе́нныя глаго́лы и́хъ]. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ въ Дѣя́ніихъ, зача́ло 17. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ]. Ева́нгеліе Матѳе́я, зача́ло 87. Прича́стенъ пра́здника, и до отда́нія. И апо́стола: Во всю́ зе́млю [изы́де вѣща́ніе и́хъ, и въ концы́ вселе́нныя глаго́лы и́хъ].

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 272 – 282 об.

/ Къ оглавленію раздѣла /


Наверхъ / Къ титульной страницѣ

0