Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Недѣ́ля по Рождествѣ́ Христо́вѣ.
Па́мять сотворя́емъ святы́хъ пра́ведныхъ Іо́сифа Обру́чника, и Дави́да царя́, и Іа́кова, бра́та Госпо́дня.

Подоба́етъ вѣ́дати, а́ще по Рождествѣ́ Христо́вѣ недѣ́ля сія́ случи́тся въ 26-й, и въ 27-й, и въ 28-й, и въ 29-й, и въ 30-й де́нь: въ суббо́ту на ма́лѣй вече́рни стихи́ры воскре́сны, и Богоро́дицы по обы́чаю.

НА ВЕЛИЦѢЙ ВЕЧЕРНИ,
По обы́чномъ псалмѣ́ пое́мъ каѳи́сму 1-ю всю́. На Го́споди воззва́хъ: стихи́ры воскре́сны 3, и пра́здника 4, пое́мыя на са́мый пра́здникъ, и святы́хъ 3, гла́съ 1. Подо́бенъ: Небе́сныхъ чино́въ.

Богоотца́ вси́ восхва́лимъ,* Дави́да царя́,* изъ него́ бо про́йде же́злъ — Дѣ́ва.* И изъ Нея́ возсія́ цвѣ́тъ — Христо́съ,* и Ада́ма со Евою* отъ тли́ воззва́,* я́ко Благоутро́бенъ.

Проро́ческая прорече́нія ви́дѣ въ ста́рости* я́вѣ Іо́сифъ Обру́чникъ,* проявле́нно исполня́емая,* обруче́ніе вои́стинну стра́нное,* открове́ніе а́нгелы пріе́мъ, —* Бо́гу сла́ва, — вопію́щихъ, —* на зе́млю ми́ръ низпосла́вшему.

Бра́та Бо́жія вси́ восхва́лимъ,* я́ко святи́теля су́ща,* муче́ніемъ же па́ки просія́вша до́блественнѣ.* Его́же моли́твами, Іису́се Бо́же на́шъ,* въ верте́пѣ и въ пелена́хъ пови́выйся,* спаси́ вся́, пою́щія Тя́.

Сла́ва, гла́съ 6:

Па́мять соверша́емъ Дави́да и Іа́кова благочести́выхъ, царя́-проро́ка, и апо́стола, пе́рваго епи́скопа: тѣ́хъ бо уче́ньми ле́сти изба́вльшеся, Христа́ славосло́вимъ, отъ Дѣ́вы возсія́вшаго и вопло́щшагося, е́же спасти́ ду́ши на́ша.

И ны́нѣ, богоро́диченъ гла́са. Вхо́дъ. Проки́менъ дне́.

На литíи стихи́ры пра́здника, пое́мыя на са́мый пра́здникъ.
Сла́ва, и ны́нѣ: Волсви́ перси́дстіи...

На стихо́внѣ стихи́ры воскре́сны. Сла́ва, гла́съ 6:

Свяще́нныхъ па́мять, и царе́й держа́ва, и весе́ліе бы́сть Рождество́ Твое́, и въ не́мъ, хва́лящеся, глаго́лемъ: Отче на́шъ, Иже еси́ на небесѣ́хъ, да святи́тся и́мя Твое́, Человѣколю́бче.

И ны́нѣ, гла́съ то́йже:

Дне́сь неви́димое Естество́ человѣ́комъ отъ Дѣ́вы совокупля́ется; дне́сь безмѣ́рное Существо́ въ Виѳлее́мѣ пелена́ми обвива́ется; дне́сь Бо́гъ звѣздо́ю волхвы́ въ поклоне́ніе приво́дитъ, провозвѣща́я Свое́ тридне́вное погребе́ніе, я́ко въ зла́тѣ, и сми́рнѣ, и лива́нѣ. Ему́же пое́мъ: воплоти́выйся отъ Дѣ́вы, Христе́ Бо́же, спа́си ду́ши на́ша.

На благослове́ніи хлѣ́бовъ: Тропа́рь, Рождество́ Твое́... [Два́жды.]
И святы́хъ, гла́съ 2:

Благовѣству́й, Іо́сифе, Дави́ду чудеса́, богоотцу́: Дѣ́ву ви́дѣлъ еси́ ро́ждшую, съ па́стыри славосло́вилъ еси́, съ волхвы́ поклони́лся еси́, а́нгеломъ вѣ́сть пріе́мъ. Моли́ Христа́ Бо́га спасти́ ду́ши на́ша. [Еди́ножды.]

А идѣ́же нѣ́сть всено́щнаго бдѣ́нія, на повече́ріи по трисвято́мъ конда́къ богоотце́въ. Сла́ва, и ны́нѣ, пра́здника.



НА УТРЕНИ,
На Бо́гъ Госпо́дь: Тропа́рь воскре́сенъ, два́жды. Сла́ва, святы́хъ. И ны́нѣ, пра́здника.


По каѳи́смахъ, сѣда́льны воскре́сны, съ богоро́дичны и́хъ. И чте́ніе во Ева́нгеліи толково́мъ отъ Матѳе́я, недѣ́ля по Рождествѣ́ Христо́вѣ; или́ сло́во Григо́рія Ни́сскаго о Святѣ́й Тро́ицѣ и о Авраа́мѣ, на двѣ́ ча́сти. И пое́мъ непоро́чны, и тропари́ и́хъ. Ипакои́ гла́са. Степе́нна и проки́менъ гла́са. Ева́нгеліе воскре́сное. Воскресе́ніе Христо́во ви́дѣвше... По 50-мъ псалмѣ́ стихи́ра воскре́сна.

Кано́нъ воскре́сенъ со ирмосо́мъ на 4, и Богоро́дицѣ на 2, и пра́здника на 4, и настоя́щій кано́нъ на 4. Творе́ніе Космы́ мона́ха. Гла́съ 4.

Пѣ́снь 1.

Ирмо́съ: Воспою́ Тебѣ́, Го́споди Бо́же мой, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Ели́цы рожде́ственная сотворя́емъ Вопло́щшагося на́съ ра́ди, ра́достію воспои́мъ Іа́кова богобра́та и Дави́да богоотца́.

Сла́ва въ вы́шнихъ, — ли́цы а́нгельстіи въ Виѳлее́мѣ Іо́сифу предста́ша, глаго́люще, съ ни́миже Благоизво́лившаго воплоти́тися воспои́мъ.

Дави́де богоо́тче, съ гу́сльми, отъ ко́рене Іессе́ова вопло́щшася Го́спода, Іа́кова пра́веднаго привле́къ, воспо́й.

Богоро́диченъ: Воспою́ Тебѣ́, Го́споди Бо́же мо́й, я́ко роди́лся еси́ изъ Ма́тере Дѣ́вы святы́я и Сію́ показа́лъ еси́ наде́жду ду́шъ на́шихъ.

Катава́сія: Христо́съ ражда́ется...

Пѣ́снь 3.

Ирмо́съ: Утвержде́ніе на Тя́ надѣ́ющихся, Христе́ Бо́же, въ вѣ́рѣ правосла́внѣй Твое́й утверди́ на́съ, я́ко Человѣколю́бецъ.

Ро́ждшагося пло́тію отъ Дѣ́вы безъ сѣ́мене Христа́ Бо́га со а́нгелы вси́ воспое́мъ, — сла́ва въ вы́шнихъ Бо́гу, — взыва́юще.

Всепра́зднственный на́съ ра́ди Истощи́вшагося, вѣ́рніи, пра́здникъ съ Дави́домъ же и Іа́ковомъ пѣ́сньми по достоя́нію почти́мъ.

Яко жениху́ отъ черто́га, изъ ма́тернихъ ложе́снъ Дави́дъ рече́ Го́споду изы́ти, его́же ны́нѣ со Іа́ковомъ воспое́мъ.

Богоро́диченъ: Безневѣ́стную и Богоро́дицу Марíю почти́мъ: Тоя́ бо ра́ди на́мъ возсія́ пра́вды Со́лнце.

Конда́къ пра́здника, гла́съ 3. Подо́бенъ:

Дѣ́ва дне́сь Пресу́щественнаго ражда́етъ, и земля́ верте́пъ Непристу́пному прино́ситъ. Ангели съ па́стырьми славосло́вятъ, волсви́ же со звѣздо́ю путеше́ствуютъ: на́съ бо ра́ди роди́ся Oтроча́ Мла́до, Превѣ́чный Бо́гъ.

Икосъ:

Еде́мъ Виѳлее́мъ отве́рзе, пріиди́те, ви́димъ, пи́щу въ та́йнѣ обрѣто́хомъ; пріиди́те, пріи́мемъ су́щая ра́йская вну́трь верте́па: та́мо яви́ся ко́рень ненапое́нъ, прозяба́я отпуще́ніе, та́мо обрѣ́теся кла́дязь неиско́панъ, изъ него́же Дави́дъ пи́ти дре́вле возжада́ся. Та́мо Дѣ́ва ро́ждши Младе́нца, жа́жду уста́ви а́біе Ада́мову и Дави́дову. Сего́ ра́ди къ Нему́ и́демъ, гдѣ́ роди́ся Отроча́ Мла́до, Превѣ́чный Бо́гъ.

Сѣда́ленъ, гла́съ 3. Подо́бенъ: Дѣ́ва дне́сь.

Іо́сифа пра́веднаго, Дѣ́вы обру́чника, съ Дави́домъ Іа́кова достодо́лжно воспое́мъ: сíи бо, пра́ведною ходи́вше стезе́ю, достиго́ша небе́сныя оби́тели, досто́йно лику́юще со а́нгелы, на́мъ про́сятъ согрѣше́ній оставле́ніе.

Сла́ва, гла́съ и подо́бенъ то́йже:

Дѣ́ва роди́ Творца́ вся́ческихъ, и волсви́ гряду́тъ Сему́ пло́тію поклони́тися; человѣ́цы со а́нгелы славосло́вятъ; верте́пъ же и я́сли дароно́сятъ, воспѣва́юще ро́ждшагося Отроча́ Мла́до, Превѣ́чнаго Бо́га.

И ны́нѣ, гла́съ 1. Подо́бенъ: Ли́къ а́нгельскій.

Ли́къ проро́ческій пра́зднуетъ Боже́ственнѣ чу́до, въ Тебѣ́ бы́вшее, о Дѣ́во́, Бо́га бо, вопло́щшася на земли́, породила́ еси́. Тѣ́мже а́нгели съ па́стырьми пою́тъ, волсви́ же вѣ́рою со Іо́сифомъ вопію́тъ Дави́ду чудеса́, богоотцу́.

Пѣ́снь 4.

Ирмо́съ: Твоего́ на земли́ явле́нія, Христе́ Бо́же, проповѣ́дая проро́къ прише́ствіе, съ весе́ліемъ вопія́ше: сла́ва си́лѣ Твое́й, Го́споди.

Съ волхвы́ Ро́ждшемуся поклони́мся и со а́нгелы и Іо́сифомъ лику́имъ, боголѣ́пно взыва́юще: сла́ва въ вы́шнихъ Христу́ Бо́гу.

Ца́рствуяй всѣ́ми царьми́ Христо́съ, по пло́ти отъ сѣ́мене Дави́дова рожде́йся, избра́ннаго Іа́кова прія́тъ, бра́та, я́коже изво́ли.

Отъ Дѣ́вы Госпо́дь яви́выйся во пло́ти, спросла́ви па́мять ва́шу, святíи, апо́столовъ лу́чшій, Іа́кове, и Дави́де всеблаже́нне.

Богоро́диченъ: Херуви́мскихъ чино́въ преиму́щи и Бо́га, на руку́ носи́ма, съ пло́тію поне́сши, ра́дуйся, Богоро́дице Безневѣ́стная.

Пѣ́снь 5.

Ирмо́съ: Возсія́вый Свѣ́тъ, и просвѣти́вый у́тро, и показа́вый де́нь, сла́ва Тебѣ́, сла́ва Тебѣ́, Іису́се, Сы́не Бо́жій.

Отъ Дѣ́вы Чи́стыя благоволи́вый роди́тися, Бо́же воплоти́выйся, сла́ва Тебѣ́, сла́ва Тебѣ́, — Іо́сифъ вопія́ше.

Отъ Дѣ́вы рожде́йся и па́мять уясни́вый Дави́да и Іа́кова, сла́ва Тебѣ́, сла́ва Тебѣ́, Іису́се, Сы́не Бо́жій.

Его́же проро́къ Дави́дъ До́ждь на Руно́ нарица́ше богодохнове́нно, Іа́ковъ проповѣ́да Іису́са, Сы́на Бо́жія.

Богоро́диченъ: Ангела гла́съ немо́лчно тва́рь прино́ситъ Тебѣ́, Дѣ́во: ра́дуйся, Ма́ти Чи́стая Іису́са, Сы́на Бо́жія.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ силъ.

Предстоя́ху, ужаса́ющеся, чи́ни небе́сніи верте́пу и Рождество́ пречи́стое воспѣ́ша немо́лчно: сла́ва въ вы́шнихъ Бо́гу ро́ждшуся.

Сѣ́лъ еси́ на престо́лѣ, я́коже кля́лся еси́, Влады́ко, проро́ку Дави́ду, отъ плода́ чре́ва Его́ проше́дъ, Іа́кову же Це́ркве пре́далъ еси́ престо́лъ, Христе́.

Ца́рь у́бо Дави́дъ, и проро́къ чу́денъ, и пра́отецъ показа́ся Боже́ственнаго воплоще́нія, первоепи́скопъ же учени́къ Іа́ковъ Іису́совъ.

Богоро́диченъ: Мо́лимся, о рабѣ́хъ Твои́хъ, Дѣ́во Богоро́дице, изъ Тебе́ Воплоще́ннаго моли́, я́ко Тя́ и еди́ну Предста́тельницу на́шу вѣ́мы.

Конда́къ, гла́съ 3. Подо́бенъ: Дѣ́ва дне́сь.

Весе́лія дне́сь Дави́дъ исполня́ется боже́ственный, Іо́сифъ же хвале́ніе со Іа́ковомъ прино́ситъ: вѣне́цъ бо сро́дствомъ Христо́вымъ пріе́мше, ра́дуются, и неизрече́нно на земли́ Ро́ждшагося воспѣва́ютъ, и вопію́тъ: Ще́дре, спаса́й Тебе́ чту́щія.

Икосъ:

Неизрече́ннымъ совѣ́томъ ражда́ется пло́тію, Безпло́тный опису́ется ны́нѣ тѣ́ломъ, неопи́санный, и спаса́етъ непрело́жно о́ба существа́; нача́ло пріе́млетъ, Иже естество́мъ Безнача́льный и Еди́нъ Безлѣ́тенъ; зри́тся Младе́нецъ, Сый всесоверше́нный; но́сится рука́ми, нося́й вся́ческая. Тѣ́мже Того́ сро́дствомъ почте́нныя я́ко Богъ вѣнча́етъ Свои́мъ Рождество́мъ, я́же прославля́юще вѣ́рою, немо́лчно вопіе́мъ: Ще́дре, спаса́й Тебе́ чту́щія.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Па́че сло́ва Рождеству́ Богоро́дицы Марíи ли́цы а́нгельстіи дивя́щеся, Іо́сифу вопія́ху: въ вы́шнихъ сла́ва, и на земли́ ми́ръ.

Невѣстово́децъ у́бо Дави́дъ, черто́жникъ же Боже́ственныя Це́ркве Іа́ковъ бы́вше, глаго́лаху: воплоще́йся на́съ ра́ди, Бо́же, благослове́нъ еси́.

Иже во проро́цѣхъ ца́рь и во царѣ́хъ проро́къ, со Іа́ковомъ богому́дрымъ и на́мъ воспо́й: воплоще́йся на́съ ра́ди, Христе́, благослове́нъ еси́.

Богоро́диченъ: Въ неопа́льнѣй купинѣ́ и росода́тельнѣй пе́щи Ты́ прописа́вшися, Ма́ти Пречи́стая, безъ сѣ́мене родила́ еси́ воплоще́ннаго Бо́га, Присноблагослове́нная.

Пѣ́снь 8.

Ирмо́съ: Царя́ Христа́, Его́же исповѣ́даша плѣне́нніи о́троцы, въ пещи́, глаго́люще ве́ліимъ гла́сомъ: вся дѣла́, по́йте Го́спода.

Вопло́щшагося Христа́, Его́же славосло́виша небе́сныя си́лы и Іо́сифъ обру́чникъ непреста́нно воспѣва́етъ: вся́ дѣла́, Го́спода по́йте и превозноси́те Его́ во вѣ́ки.

Вопло́щшагося Христа́, Его́же прорече́ Дави́дъ богооте́цъ, и лю́демъ проповѣ́да Іа́ковъ, вопія́: вся́ дѣла́, Го́спода по́йте и превозноси́те Его́ во вѣ́ки.

Отъ Дѣ́вы ро́ждшагося Христа́ и возвели́чившаго Дави́дову и Іа́ковлю свяще́нную па́мять, я́ко друго́въ Его́, вся́ дѣла́, Го́спода по́йте и превозноси́те Его́ во вѣ́ки.

Богоро́диченъ: Царя́ Христа́, Его́же намъ роди́ Богоро́дица Марíя, и по Рождествѣ́ пребы́сть Дѣ́ва Чи́стая, вся́ дѣла́, Го́спода по́йте и превозноси́те Его́ во вѣ́ки.

На 9-й пѣ́сни пое́мъ: Честнѣ́йшую...

Пѣ́снь 9.

Ирмо́съ: Моисе́й на горѣ́ неопали́мую купину́ ви́дѣ, Іо́сифъ въ верте́пѣ неизрече́нное Рождество́ слы́ша, Нескве́рная Дѣ́во, Безму́жная Ма́ти, пѣ́сньми Тя́, Богоро́дице, велича́емъ.

Ро́ждшемуся отъ Дѣ́вы вся тварь тре́петомъ послужи́: небеса́ у́бо — звѣздо́ю, земля́ же — я́сльми, гора́ — верте́помъ, волсви́ — дарми́, па́стыріе — чудесе́мъ, а́нгели же — сла́ва въ вы́шнихъ Бо́гу.

Ца́рь отъ па́стырей дре́вле у́бо Дави́дъ бы́сть, отъ колѣ́на же Іу́дова и ца́рскаго ты́, Іа́кове, па́стырь па́ствы показа́лся еси́ Вопло́щшагося, Агнца Вы́шняго и Сы́на Бо́жія.

Виѳлее́ме, ны́нѣ весели́ся, гра́дъ бы́въ Но́ваго Дави́да, и Сіо́не, возвѣща́й Церкве́й старѣ́йшинство, о́бщее весе́ліе, всѣ́хъ Царя́, и Того́ уго́дники ны́нѣ воспріе́мши.

Богоро́диченъ: Ангельстіи собо́ри Тя́, Богороди́тельнице, сла́вятъ, и человѣ́ческій ро́дъ Тя́ непреста́нно пѣ́сньми почита́етъ, Ты́ бо Боже́ственнымъ Рождество́мъ земны́я съ небе́сными совокупи́ла еси́. Тѣ́мже Тя́ почита́емъ.

Свѣти́ленъ воскре́сенъ. Сла́ва, святы́хъ. Подо́бенъ: Со ученики́.

Со Іа́ковомъ воспои́мъ, сла́внымъ богобра́томъ, Дави́да богоотца́, Іо́сифа же боже́ственнаго, Богоро́дицы обру́чника: Христо́ву Боже́ственному Рождеству́ послужи́ша во гра́дѣ Виѳлее́мѣ боголѣ́пно, со а́нгелы, волхвы́ же и па́стырьми Тому́ пѣснь пою́ще, я́ко Бо́гу и Влады́цѣ.

И ны́нѣ, пра́здника.

На хвали́техъ стихи́ры воскре́сны 4 и пра́здника 4, 4-го гла́са, съ припѣ́вы пра́здника. Сла́ва, гла́съ 8:

Кро́вь, и о́гнь, и куре́ніе ды́ма, чудеса́ на земли́, я́же прови́дѣ Іо́иль: кро́вь — воплоще́ніе, о́гнь — Божество́, куре́ніе же ды́ма — Ду́хъ Святы́й, наше́дый на Дѣ́ву и мíръ облагоуха́вшій. Ве́ліе та́инство Твоего́ вочеловѣ́ченія, Го́споди, сла́ва Тебѣ́.

И ны́нѣ: Преблагослове́нна еси́, Богоро́дице Дѣ́во...
Славосло́віе вели́кое. Тропа́рь воскре́сенъ и отпу́стъ.


Стихи́ра ева́нгельская, ча́съ 1-й, и коне́чный отпу́стъ. На часѣ́хъ тропа́рь воскре́сенъ. Сла́ва, пра́здника. И ны́нѣ, богоро́диченъ. И святы́хъ тропа́рь, премѣня́юще, глаго́лемъ. По Отче на́шъ.., конда́къ пра́здника и святы́хъ, премѣня́юще, глаго́лемъ.


НА ЛИТУРГІИ,

Блаже́нна гла́са на 4, и пра́здника на 4, и святы́хъ пѣ́снь 6-я на 4. По вхо́дѣ тропа́рь воскре́сенъ, и пра́здника, и святы́хъ. Сла́ва, конда́къ святы́хъ. И ны́нѣ, пра́здника. Проки́менъ гла́са и святы́хъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Гала́томъ, зача́ло 200. Аллилу́ія [гла́са и святы́хъ], гла́съ 4: Помяни́, Го́споди, Дави́да, и всю́ кро́тость его́. Ева́нгеліе отъ Матѳе́я, зача́ло 4. Прича́стенъ: Хвали́те Го́спода [съ небе́съ, хвали́те Его́ въ вы́шнихъ]. Другíй: Ра́дуйтеся [пра́ведніи о Го́сподѣ, пра́вымъ подоба́етъ похвала́].


Ука́зъ о Апо́столѣхъ и о Ева́нгеліяхъ, я́же быва́етъ суббо́та и недѣ́ля по Рождествѣ́ Христо́вѣ, и друга́я суббо́та и недѣ́ля, пре́дъ Богоявле́ніемъ.

Подоба́етъ вѣ́дати, я́ко а́ще случи́тся Рождество́ Христо́во въ недѣ́лю и тогда́ быва́етъ между́ Рождество́мъ Христо́вымъ и Богоявле́ніемъ еди́на суббо́та и недѣ́ля, и пое́мъ недѣ́лю по Рождествѣ́ Христо́вѣ нау́тріе пра́здника Рождества́ Христо́ва въ понедѣ́льникъ Деке́мврія въ 26-й де́нь, я́коже указа́ся на ряду́ въ понедѣ́льникъ нау́тріе пра́здника. На литургíи чте́мъ Апо́столъ и Ева́нгеліе недѣ́ли, я́же по Рождествѣ́ Христо́вѣ. А суббо́тѣ, я́же по Рождествѣ́ Христо́вѣ, чте́мъ Апо́столъ и Ева́нгеліе въ суббо́ту на отда́ніе пра́здника Рождества́ Христо́ва пре́жде, та́же суббо́тѣ предъ Богоявле́ніемъ. Проки́менъ же, аллилу́ія и прича́етенъ, пра́здника. А въ 1-е Іаннуа́рія проки́менъ, Апо́столъ и Ева́нгеліе чте́мъ недѣ́ли предъ Богоявле́ніемъ, я́коже въ настоя́щей главѣ́ въ ряду́ изъяви́тся.

[Зри́:] Аще ли Рождество́ Христо́во въ понедѣ́льникъ:

И тогда́ быва́етъ между́ Рождество́мъ Христо́вымъ и Богоявле́ніемъ суббо́та и недѣ́ля еди́на, и суббо́та по Рождествѣ́ Христо́вѣ тогда́ быва́етъ Деке́мврія въ 30-й де́нь. На литургíи: проки́менъ, Апо́столъ, аллилу́ія, Ева́нгеліе и прича́стенъ, пре́жде чте́мъ суббо́тѣ по Рождествѣ́ Христо́вѣ, та́же Апо́столъ и Ева́нгеліе суббо́тѣ предъ Богоявле́ніемъ. А недѣ́ли, я́же по Рождествѣ́ Христо́вѣ, чте́мъ на литургíи во отда́ніе пра́здника Рождества́ Христо́ва, Апо́столъ и Ева́нгеліе, я́коже указа́ся на ряду́. А недѣ́ли, я́же предъ Богоявле́ніемъ, проки́менъ, Апо́столъ, аллилу́ія и Ева́нгеліе чте́мъ Іаннуа́рія въ 1-й де́нь, я́коже ука́жется на ряду́, егда́ случи́тся Обрѣ́заніе и Васи́лія въ недѣ́лю.

[Зри́:] Аще ли Рождество́ Христо́во во вто́рникъ:

И тогда́ быва́етъ между́ Рождество́мъ Христо́вымъ и Богоявле́ніемъ двѣ́ суббо́ты, а недѣ́ля еди́на. И суббо́та, я́же по Рождествѣ́ Христо́вѣ, тогда́ быва́етъ Деке́мврія въ 29-й де́нь. На литургíи: проки́менъ, Апо́столъ, аллилу́ія, Ева́нгеліе и прича́стенъ, пре́жде суббо́тѣ по Рождествѣ́ Христо́вѣ и пото́мъ младе́нцемъ. А недѣ́ли, я́же по Рождествѣ́ Христо́вѣ, пое́мъ слу́жбу Деке́мврія въ 30-й де́нь, я́коже указа́ся на ряду́. А недѣ́ли, я́же предъ Богоявле́ніемъ, Ева́нгеліе у́треннее и на литургíи проки́менъ, Апо́столъ, аллилу́ія и Ева́нгеліе чте́мъ пре́жде Іаннуа́рія въ 1-й де́нь, и пото́мъ Обрѣ́занія, и Васи́лія еди́но. Прича́стенъ: Хвали́те Го́спода... Другíй: Въ па́мять вѣ́чную...

[Зри́:] Аще ли Рождество́ Христо́во въ сре́ду, или́ въ четверто́къ, или́ въ пято́къ:

И тогда́ быва́ютъ между́ Рождество́мъ Христо́вымъ и Богоявле́ніемъ двѣ́ суббо́ты и недѣ́ли. Въ 1-ю у́бо недѣ́лю чте́тся Апо́столъ и Ева́нгеліе суббо́тѣ и недѣ́ли по Рождествѣ́ Христо́вѣ. А во 2-ю суббо́ту и недѣ́лю чте́тся Апо́столъ и Ева́нгеліе суббо́тѣ и недѣ́ли, я́же предъ Богоявле́ніемъ.

[Зри́:] Аще ли Рождество́ Христо́во въ суббо́ту:

И тогда́ быва́ютъ между́ Рождество́мъ Христо́вымъ и Богоявле́ніемъ двѣ́ недѣ́ли, а суббо́та еди́на. И недѣ́ли, я́же по Рождествѣ́ Христо́вѣ, пое́мъ слу́жбу нау́тріе Рождества́ Христо́ва въ недѣ́лю, я́коже указа́ся на ряду́. А отда́ніе Рождества́ Христо́ва тогда́ быва́етъ въ пято́къ. И пое́мъ слу́жбу отда́нія Рождества́ Христо́ва, я́коже указа́ся на ряду́. То́чію на литургíи проки́менъ, аллилу́ія и прича́стенъ пра́здника. Апо́столъ же и Ева́нгеліе суббо́тѣ по Рождествѣ́ Христо́вѣ. Въ суббо́ту, я́же предъ Богоявле́ніемъ, на литургíи Апо́столъ и Ева́нгеліе чте́мъ Іаннуа́рія въ 1-й де́нь пре́жде Обрѣ́занія и пото́мъ суббо́тѣ предъ Богоявле́ніемъ. А нау́тріе въ настоя́щую недѣ́лю на у́трени Ева́нгеліе чте́мъ воскре́сное рядово́е. А на литургíи: проки́менъ, Апо́столъ, аллилу́ія и Ева́нгеліе пре́жде недѣ́ли предъ Богоявле́ніемъ, та́же свята́го. Ря́дъ же чте́мъ подъ зача́ло, а́ще не бу́детъ отсту́пки. Прича́стенъ: Хвали́те Го́спода... и свята́го.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 267 – 272.

/ Къ оглавленію раздѣла /


Наверхъ / Къ титульной страницѣ

0