Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 26-й де́нь.
Па́мять свята́го священному́ченика Евѳи́мія, епи́скопа Сардíйскаго.

[Зри́:] Слу́жба его́ пое́тся на повече́ріи во и́нъ де́нь.

Кано́нъ священному́ченику, гла́съ 4, его́же краегране́сіе: Рожде́нный тя́ Христо́съ пелена́ми вѣнча́етъ, о́тче. Ѳеофа́ново.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Припѣ́въ: Священному́чениче Евѳи́міе, моли́ Бо́га о на́съ.

Рожде́нному присносу́щему Го́споду и пелена́ми пови́тому спови́вся я́звенными ра́нами, благоче́стно поклони́лся еси́, и къ Нему́, Евѳи́міе, со благоду́шіемъ отше́лъ еси́.

Въ я́слехъ поло́жся, Госпо́дь, да́ръ Рождества́, твои́хъ крове́й, о́тче, ка́пли и ра́нъ твои́хъ я́звы па́че зла́та, и лива́на, и па́че сми́рны прія́тъ.

Зла́то у́бо отъ волхво́въ пріе́млетъ ро́ждся Госпо́дь, е́же къ Нему́ любо́вь твою́, святи́телю, прилѣ́жную, и тве́рдость, и крѣ́пость при́снаго терпѣ́нія твоего́.

Сме́ртію сме́рти Влады́чнѣй подо́бяся, Влады́чни возгласи́лъ еси́ гла́сы, о убива́ющихъ тя́ свѣ́тло моля́ся, священноявле́нне всече́стне.

Богоро́диченъ: Изъ Тебе́, Благослове́нная, дне́сь всѣ́хъ Творе́цъ пло́тію ражда́ется по на́мъ и пелена́ми повива́ется, пови́вый мо́ре мгло́ю, Ма́ти Приснодѣ́во.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Гное́нія му́ченическая вмѣ́сто лива́на, и зла́та, и сми́рны же я́ко святи́тель прине́слъ еси́ въ Виѳлее́мѣ ро́ждшемуся Христу́.

Стефа́на подо́бникъ, первому́ченика Христо́ва, бы́лъ еси́, о спасе́ніи убива́ющихъ тя́ моля́ся, Евѳи́міе.

Тве́рдостію ума́ и до́блестію души́ обличи́лъ еси́ злочести́ваго Ле́онта, на Спа́са шата́ющагося.

Соблю́лъ еси́ прилѣ́жно Спа́сову за́повѣдь, преподо́бне, и ду́шу положи́лъ еси́ по твои́хъ друзѣ́хъ, Евѳи́міе.

Богоро́диченъ: Село́, вмѣсти́мое Невмѣсти́маго Содѣ́теля, была́ еси́, Сего́ пло́тію вмѣсти́вши, Обра́дованная Всенепоро́чная.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Зауша́емь по лицу́, отъ Боже́ственныя благода́ти просвѣти́ся и слове́съ му́дростію бы́лъ еси́ соприча́стникъ Христу́, всеблаже́нне, на́съ ра́ди зауше́нному пло́тію.

Свяще́нства че́сти не постыдѣ́вшеся, и сѣди́нъ честны́хъ не усра́мльшеся, и ста́рости твоея́ не почествова́вше, безу́мніи неми́лостивно тя́ ураня́ху.

Пелена́ми пови́тому и въ я́слехъ возлежа́щему Изба́вителю, Евѳи́міе, многоцѣ́ненъ да́ръ, о́тче, прине́слъ еси́: честну́ю кро́вь твою́, любо́вію за Него́ излія́нную.

Богоро́диченъ: Невеще́ственная существа́ содѣ́лавый, пло́тію я́ко Человѣ́къ изъ Тебе́, Богома́ти, дне́сь ражда́ется. Тому́ воспое́мъ: сла́ва въ вы́шнихъ Христу́ Бо́гу.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Тебѣ́ одушевле́нъ о́бразъ, Спа́се, прино́сится, поче́тшій о́бразъ честна́го тѣ́ла Твоего́ и воображе́ніе тѣле́сное.

Тебѣ́, Влады́ко, па́стырь благоду́шія тезоимени́тъ, ра́ны тѣлесе́ Твоего́ нося́ на свое́мъ тѣ́лѣ, прино́сится.

Огнь погаси́лъ еси́ я́рости беззако́нныхъ, Евѳи́міе, излія́ніемъ непра́ведно пролія́нныхъ твои́хъ крове́й, свяще́ннѣйшій преблаже́нне.

Богоро́диченъ: Тече́ніе ста́ тлѣ́нія, Дѣ́ва бо нетлѣ́нно родила́ е́сть, истлѣ́вшее человѣ́ческое естество́ отъ тли́ Свобо́ждшаго.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Обнаже́ніемъ всѣ́хъ, Спа́совѣ наготѣ́ уподо́блься, о́тче, и ра́намъ, болѣ́зни претерпѣ́въ, твою́ кро́вь Того́ Кро́ви спролія́лъ еси́.

Любо́вь, и наде́жду, и вѣ́ру богому́дренну, во вѣ́ки пребыва́ющую, добродѣ́тельми обогати́вся, Рожде́нному отъ Дѣ́вы дароно́сиши, всеблаже́нне Евѳи́міе.

Зако́нно Христу́ служи́въ, боже́ственное священнодѣ́йство Сло́ва, мзду́ Сего́, о́тче богоглаго́ливе, прія́лъ еси́, е́же тебѣ́ сконча́тися кро́вію.

Богоро́диченъ: Созда́вый по о́бразу Своему́ человѣ́ка, за мно́гое благоутро́біе обновля́етъ сего́, изъ Тебе́, Дѣ́во Богома́ти, соверше́нно въ того́ одѣ́явся.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Прине́слъ еси́ Христу́, отъ Дѣ́вы рожде́нному, Евѳи́міе му́дре, я́ко волсви́ да́ры, пострада́въ терпѣли́внѣйше, святи́телю, кро́вь твою́. Тѣ́мже прія́лъ еси́ сугу́бъ вѣне́цъ побѣ́ды и предстои́ши Всесвятѣ́й Тро́ицѣ, моля́ спасти́ся на́мъ.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Свяще́нства, свяще́ннѣйше, богода́нное пома́заніе, смѣси́въ съ кро́вію твое́ю, свяще́ннѣе показа́лъ еси́: благослове́нъ еси́, Бо́же мо́й, зовы́й, въ хра́мѣ сла́вы Твоея́, Го́споди.

Поста́вивъ но́ги на ка́мени вѣ́ры, всѣ́ми прило́ги, всеблаже́нне, искуше́ній непревраще́нъ пребы́лъ еси́, благослове́нъ еси́, Бо́же мо́й, зовы́й, въ хра́мѣ сла́вы Твоея́, Го́споди.

Спривле́клъ еси́ благода́ть боже́ственнаго первому́ченика, его́же показа́лся еси́ изря́днѣйшій подража́тель, благослове́ньми возме́здія дая́ убива́ющимъ тя́ неми́лостивно, всеблаже́нне Евѳи́міе.

Богоро́диченъ: Вы́шняго освяще́нное Боже́ственное селе́ніе, ра́дуйся: Тобо́ю бо даде́ся ра́дость, Богоро́дице, зову́щимъ: благослове́нна Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Ста́лъ еси́ на суди́щи, крѣ́пко подвиза́яся, о́тче Евѳи́міе: соверше́ннѣйшему бо предѣ́лу любве́ поучи́лся еси́, я́ко изво́лилъ еси́ умре́ти за дру́ги твоя́, вопію́щія: благослови́те, вся́ дѣла́ Госпо́дня, Го́спода.

Свѣ́телъ и сло́вомъ и умо́мъ, свѣ́тлу стяжа́лъ еси́ ду́шу, свѣ́тло лице́, ны́нѣ же свѣтлѣ́е бы́лъ еси́ да́же до кро́ве, Евѳи́міе, царе́мъ богоненави́стнымъ проти́влься и вопія́: благослови́те, вся́ дѣла́ Госпо́дня, Го́спода.

Нападо́ша, блаже́нне, на тя́ крѣ́пціи земли́, умертви́ти тя́ беззако́ннѣйшая дѣ́лающіи; но ты́, простира́яся къ ро́ждшемуся Изба́вителю отъ Дѣ́вы Чи́стыя, взыва́лъ еси́: благослови́те, вся́ дѣла́ Госпо́дня, Го́спода.

Богоро́диченъ: Се́ ны́нѣ оскудѣ́ я́вѣ отъ Іу́дова колѣ́на кня́зь и игу́менъ: Ты́ бо, Всенепоро́чная, родила́ еси́, я́же Тому́ пе́рвѣе угото́вана, ча́яніе язы́ковъ, Христа́, Ему́же пое́мъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Къ тиша́йшему приста́нищу преста́вился еси́, о́тче, отъ су́щихъ здѣ́: я́коже бо вра́бій, изба́вился еси́ отъ сѣ́ти ловя́щихъ тя́, благословя́ Изба́вльшаго, священному́чениче благоду́шнѣйше.

Свѣ́ту, съ высоты́ я́вльшуся восто́ка, просвѣще́нну, и свѣтоявле́ніемъ звѣзды́, отъ Іу́ды ны́нѣ возсія́вшія, преесте́ственно сія́я, ко Влады́цѣ изше́лъ еси́.

Ра́йскія ны́нѣ широты́ ликоходи́ти сподо́бился еси́, идѣ́же блаже́нныхъ свѣ́тлость и святы́хъ ра́дованіе, я́ко страда́льца, Евѳи́міе, тя́ побѣдоно́сна прія́ша.

Имѣ́я къ Бо́гу дерзнове́ніе, я́ко святи́тель же и му́ченикъ, ны́нѣ отъ настоя́щія зимы́ Це́ркви тишину́ испроси́ и согрѣше́ній оставле́ніе, тя́ пою́щимъ, всеблаже́нне.

Богоро́диченъ: Же́злъ прозябла́ еси́ изъ ко́рене Іессе́ева, Богороди́тельнице, цвѣ́тъ Божества́, Христа́, на́мъ ро́ждши, Пречи́стая, дне́сь, я́ко Бо́га невмѣсти́маго и ны́нѣ я́ко Младе́нца повива́емаго.

Стихи́ры, гла́съ 8. Подо́бенъ: О, пресла́внаго чудесе́!

Еще́ кро́вію ка́пая* и облія́нъ те́плою* и па́ры испуща́я кро́ви,* Христу́ предста́лъ еси́, богоглаго́ливе Евѳи́міе,* твои́хъ у́бо ра́нъ, о́тче, я́звы* въ моли́твы мѣ́сто ны́нѣ простира́я,* Тому́ моли́ся за пою́щія тя́* и прилѣ́жно, блаже́нне,* моли́ о па́ствѣ твое́й.

Да́ръ прине́слъ еси́, преподо́бне,* ро́ждшемуся Христу́* и пло́тію младе́нствовавшу:* сѣди́ну че́стну,* укра́шену дарова́ньми святи́тельства, о́тче,* и кро́вію очервле́ну твоего́ страда́нія;* вѣ́ру правосла́вну,* и наде́жду усе́рдну и нерасте́рзну и́стинно,* и непоколе́бленну любо́вь, преподо́бне.

Язы́къ, дви́жимь Ду́хомъ,* и вѣща́ющъ я́вѣ и́стины уче́нія,* богода́нною благода́тію боголѣ́пно иска́пающь,* благоче́стія цѣвни́ца боговѣща́нна,* правосла́вія основа́ніе недви́жимо,* уста́ медото́чна,* сокро́вище прему́дрости,* Це́рквей труба́ велегла́сна* показа́лся еси́, преподо́бне.

Сла́ва, и ны́нѣ, богоро́диченъ:

Пло́ть пріе́мъ отъ крове́й Твои́хъ, Превѣ́чный Бо́гъ* Тя́ Предста́тельницу показа́ человѣ́комъ, Чи́стая,* тѣ́мже изба́ви рабы́ Твоя́* отъ вся́кія ну́жды и обстоя́нія* и сѣте́й вселука́ваго врага́* и осія́нія причасти́тися сподо́би избра́нныхъ,* вся́ сла́вящія и покланя́ющіяся Тебѣ́.

[Зри́:] Подоба́етъ вѣ́дати, я́ко въ попра́зднство Христо́ва Рождества́ и Богоявле́нія, повече́ріе пое́тся ма́лое, безъ кано́на Богоро́дична. На повече́ріи къ 26 числу́, по Досто́йно.., и по трисвято́мъ, глаго́лемъ конда́къ Богоро́дицы, Собо́ру: Иже пре́жде денни́цы... На полу́нощницѣ глаго́лемъ каѳи́сму обы́чную. По 1-мъ трисвято́мъ вмѣ́сто: Се́ Жени́хъ.., глаго́лемъ тропа́рь пра́здника: Рождество́ Твое́, Христе́ Бо́же на́шъ... По 2-мъ трисвято́мъ глаго́лемъ конда́къ Богоро́дицы: Иже пре́жде денни́цы... Та́же: Го́споди, поми́луй, [12], и отпу́стъ. Моли́твы же: Помяни́, Го́споди.., не глаго́лемъ.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 261 – 263 об.

/ Къ оглавленію раздѣла /


Наверхъ / Къ титульной страницѣ

0