Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 25-й де́нь.
Еже по пло́ти Рождество́ Го́спода Бо́га и Спа́са на́шего Іису́са Христа́.

[НА ВЕЛИЦѢЙ ВЕЧЕРНИ,]

При часѣ́ 7-мъ дне́ ударя́етъ въ вели́кій кампа́нъ и во вся́ тя́жкая; и, собра́вшеся во хра́мъ, начина́емъ вече́рню по обы́чаю. Діа́конъ глаго́летъ: Благослови́, влады́ко. Іере́й: Благослове́но Ца́рство... и по Ами́нь: предстоя́тель: Царю́ Небе́сный... Трисвято́е и по Отче на́шъ... Го́споди, поми́луй, [12], Сла́ва, и ны́нѣ. Пріиди́те, поклони́мся.., три́жды. И псало́мъ: Благослови́, душе́ моя́, Го́спода... Посе́мъ діа́конъ глаго́летъ ектенію́ вели́кую. И а́ще у́бо въ суббо́ту ве́чера, пое́мъ: Блаже́нъ му́жъ.., каѳи́сму всю́, а́ще же въ недѣ́лю ве́чера, пое́мъ то́чію 1-й антифо́нъ. Аще ли и́нъ де́нь, стихоло́гія не быва́етъ, но по ектеніи́ а́біе пое́мъ: Го́споди, воззва́хъ къ Тебѣ́.., на гла́съ 2-й. Іере́й же твори́тъ проскоми́дію. Та́же діа́конъ кади́тъ хра́мъ по обы́чаю, ли́кове же пою́тъ

Стихи́ры пра́здника на 8. Гла́съ 2, самогла́сны.

Ге́рманово: Пріиди́те, возра́дуемся Го́сподеви,* настоя́щую та́йну сказу́юще:* средостѣ́ніе граде́жа разруши́ся,* пла́менное ору́жіе плещи́ дае́тъ,* и херуви́мъ отступа́етъ отъ дре́ва жи́зни,* и а́зъ ра́йскія пи́щи причаща́юся,* отъ него́же произгна́нъ бы́хъ преслуша́нія ра́ди;* неизмѣ́нный бо Образъ Оте́чь,* Образъ присносу́щія Его́,* зра́къ раба́ пріе́млетъ,* отъ Неискусобра́чныя Ма́тере проше́дъ,* не преложе́ніе претерпѣ́въ,* е́же бо бѣ́ пребы́сть, Бо́гъ Сы́й и́стиненъ,* и е́же не бѣ́ прія́тъ, Человѣ́къ бы́въ человѣколю́бія ра́ди.* Тому́ возопіи́мъ:* рожде́йся отъ Дѣ́вы Бо́же, поми́луй на́съ. [Два́жды.]

Анато́ліево: Го́споду Іису́су ро́ждшуся отъ Святы́я Дѣ́вы,* просвѣти́шася вся́ческая:* па́стыремъ бо свиря́ющимъ и волхво́мъ покланя́ющимся,* а́нгеломъ воспѣва́ющимъ, Иродъ мятя́шеся,* я́ко Богъ во пло́ти яви́ся,* Спа́съ ду́шъ на́шихъ. [Два́жды.]

Ца́рство Твое́, Христе́ Бо́же,* Ца́рство всѣ́хъ вѣко́въ,* и Влады́чество Твое́ во вся́комъ ро́дѣ и ро́дѣ,* воплоти́выйся отъ Ду́ха Свята́го* и отъ Приснодѣ́вы Марíи вочеловѣ́чивыйся,* свѣ́тъ на́мъ возсія́, Христе́ Бо́же,* Твое́ прише́ствіе:* Свѣ́тъ отъ Свѣ́та, Отчее сія́ніе,* всю́ тва́рь просвѣти́лъ еси́,* вся́кое дыха́ніе хва́литъ Тя́.* Образъ сла́вы Отчія,* Сы́й, и пре́жде Сы́й,* и возсія́вый отъ Дѣ́вы, Бо́же, поми́луй на́съ. [Два́жды.]

Что́ Тебѣ́ принесе́мъ, Христе́,* я́ко яви́лся еси́ на земли́* я́ко Человѣ́къ на́съ ра́ди?* Ка́яждо бо отъ Тебе́ бы́вшихъ тва́рей благодаре́ніе Тебѣ́ прино́ситъ:* а́нгели — пѣ́ніе; небеса́ — звѣзду́;* волсви́ — да́ры; па́стыріе — чу́до;* земля́ — верте́пъ; пусты́ня — я́сли;* мы́ же — Ма́терь Дѣ́ву.* Иже пре́жде вѣ́къ, Бо́же, поми́луй на́съ. [Два́жды.]

Сла́ва, и ны́нѣ, гла́съ то́йже. Кассíино:

Августу единонача́льствующу на земли́,* многонача́ліе человѣ́ковъ преста́;* и Тебѣ́ вочеловѣ́чшуся отъ Чи́стыя,* многобо́жіе и́доловъ упраздни́ся,* подъ еди́нѣмъ ца́рствомъ мірски́мъ гра́ди бы́ша,* и во еди́но Влады́чество Божества́ язы́цы вѣ́роваша.* Написа́шася лю́діе повелѣ́ніемъ ке́саревымъ,* написа́хомся, вѣ́рніи, и́менемъ Божества́,* Тебе́, вочеловѣ́чшагося Бо́га на́шего.* Ве́лія Твоя́ ми́лость, Го́споди, сла́ва Тебѣ́.

Вхо́дъ со Ева́нгеліемъ. Свѣ́те Ти́хій... Проки́менъ дне́. И чте́нія по чи́ну и́хъ, съ тропари́ и со стихи́ и́хъ.
[Зри́:] Аще прилучи́тся на́вечеріе Рождества́ Христо́ва въ пято́къ, проки́менъ пое́тся: Кто́ Бо́гъ ве́лій, я́ко Бо́гъ на́шъ.., со стихи́ свои́ми. Дневны́й же оставля́ется.

Бытія́ чте́ніе. [Глава́ 1.]

Въ нача́лѣ сотвори́ Богъ не́бо и зе́млю. Земля́ же бѣ́ неви́дима и неустро́ена, и тма́ верху́ бе́здны, и Ду́хъ Бо́жій ноша́шеся верху́ воды́. И рече́ Бо́гъ: да бу́детъ свѣ́тъ. И бы́сть свѣ́тъ. И ви́дѣ Бо́гъ свѣ́тъ, я́ко добро́; и разлучи́ Бо́гъ между́ свѣ́томъ и между́ тмо́ю. И нарече́ Бо́гъ свѣ́тъ де́нь, и тму́ нарече́ но́щь. И бы́сть ве́черъ, и бы́сть у́тро, де́нь еди́нъ. И рече́ Бо́гъ: да бу́детъ тве́рдь посредѣ́ воды́, и да бу́детъ разлуча́ющи посредѣ́ воды́ и воды́. И бы́сть та́ко. И сотвори́ Бо́гъ тве́рдь; и разлучи́ Бо́гъ между́ водо́ю, я́же бѣ́ подъ тве́рдію, и между́ водо́ю, я́же бѣ́ надъ тве́рдію. И нарече́ Бо́гъ тве́рдь не́бо; и ви́дѣ Бо́гъ, я́ко добро́. И бы́сть ве́черъ, и бы́сть у́тро, де́нь вторы́й. И рече́ Бо́гъ: да собере́тся вода́, я́же подъ небесе́мъ, въ собра́ніе еди́но, и да яви́тся су́ша. И бы́сть та́ко. И собра́ся вода́, я́же подъ небесе́мъ, въ собра́нія своя́, и яви́ся су́ша. И нарече́ Бо́гъ су́шу зе́млю, и собра́нія во́дъ нарече́ моря́. И ви́дѣ Бо́гъ, я́ко добро́. И рече́ Бо́гъ: да прорасти́тъ земля́ бы́ліе травно́е, сѣ́ющее сѣ́мя по ро́ду и по подо́бію, и дре́во плодови́тое, творя́щее пло́дъ, ему́же сѣ́мя его́ въ не́мъ, по ро́ду на земли́. И бы́сть та́ко. И изнесе́ земля́ бы́ліе травно́е, сѣ́ющее сѣ́мя по ро́ду и по подо́бію, и дре́во плодови́тое, творя́щее пло́дъ, ему́же сѣ́мя его́ въ не́мъ по ро́ду на земли́. И ви́дѣ Бо́гъ, я́ко добро́. И бы́сть ве́черъ, и бы́сть у́тро, де́нь тре́тій.

Чи́слъ чте́ніе. [Глава́ 24.]

Бы́сть Ду́хъ Бо́жій на Валаа́мѣ и, воспріе́мъ при́тчи своя́, рече́: ко́ль добри́ до́ми твои́, Іа́кове, и ски́нія твоя́, Изра́илю? Яко страны́ осѣня́ющія, я́ко са́діе при рѣка́хъ, и я́ко ски́нія, я́же водрузи́ Госпо́дь, и я́ко ке́дри при вода́хъ. Изы́детъ человѣ́къ отъ сѣ́мене его́, и облада́етъ язы́ки мно́гими, и возвы́сится ца́рство его́, и возрасте́тъ. Бо́гъ наста́витъ его́ изъ Еги́пта, я́ко сла́ву единоро́га его́. Поя́стъ язы́ки вра́гъ свои́хъ, и то́лщу и́хъ изможди́тъ, и стрѣла́ми свои́ми устрѣли́тъ врага́. Возле́гъ, почи́, я́ко ле́въ и я́ко ски́менъ, кто́ возста́витъ его́? Благословя́щіи Тя́ благослове́ни, и проклина́ющіи Тя́ про́кляти. Возсія́етъ звѣзда́ отъ Іа́кова, и воста́нетъ челове́къ отъ Изра́иля, и ссѣче́тъ кня́зи Моави́тскія, и плени́тъ вся́ сы́ны Си́ѳовы, и бу́детъ Едо́мъ достоя́ніе, и бу́детъ наслѣ́діе Иса́въ вра́гъ его́, и Изра́иль сотвори́ крѣ́пость.

Проро́чества Михе́ина чте́ніе. [Главы́ 4 и 5.]

Во дне́хъ о́нѣхъ глаго́летъ Госпо́дь: соберу́ сокруше́нную и отринове́нную пріиму́, я́же отри́нухъ. И положу́ сотре́нную во оста́нокъ и отринове́нную въ язы́къ крѣ́покъ, и воцари́тся Госпо́дь надъ ни́ми въ горѣ́ Сіо́нстѣй отъ ны́нѣ и во вѣ́ки. И ты́, Виѳлее́ме, до́ме Евфра́ѳовъ, еда́ ма́лъ еси́ е́же бы́ти въ ты́сящахъ Іу́довыхъ? Изъ тебе́ бо Мнѣ́ изы́детъ Старѣ́йшина, е́же бы́ти въ кня́зя во Изра́или, и исхо́ди Его́ изъ нача́ла отъ дне́й вѣ́ка. Сего́ ра́ди да́стъ я́, до вре́мене ражда́ющія породи́тъ, и про́чіи отъ бра́тій Его́ обратя́тся къ сыно́мъ Изра́илевымъ. И ста́нетъ, и у́зритъ, и упасе́тъ ста́до Свое́ крѣ́постію Госпо́дь. И въ сла́вѣ и́мени Го́спода Бо́га Своего́ пребу́дутъ, зане́ ны́нѣ возвели́чится да́же до коне́цъ земли́.

Та́же возгласи́тъ чте́цъ, гла́съ 6, и на́мъ, воста́вшимъ, глаго́летъ тропа́рь се́й:

Та́йно роди́лся еси́ въ верте́пѣ,* но не́бо Тя́ всѣ́мъ проповѣ́да,* я́коже уста́, звѣзду́ предлага́я, Спа́се,* и волхвы́ Ти́ приведе́,* вѣ́рою покланя́ющіяся Тебѣ́;* съ ни́миже поми́луй на́съ.

Сти́хъ 1: Основа́нія Его́ на гора́хъ святы́хъ,* лю́битъ Госпо́дь врата́ Сіо́ня па́че всѣ́хъ селе́ній Іа́ковлихъ,* пресла́вная глаго́лашася о Тебѣ́, гра́де Бо́жій.* Помяну́ Ра́авъ и Вавило́на, вѣ́дущимъ мя́.

И пое́мъ коне́цъ: И волхвы́ Ти́ приведе́, вѣ́рою покланя́ющіяся Тебѣ́;* съ ни́миже поми́луй на́съ.

Сти́хъ 2: И се́ иноплеме́нницы, и Ти́ръ, и лю́діе Еѳіо́пстіи,* сíи бы́ша та́мо.* Ма́ти Сіо́нъ рече́тъ:* Человѣ́къ и Человѣ́къ роди́ся въ не́мъ,* и То́й основа́ и́ Вы́шній.

И па́ки: И волхвы́ Ти́ приведе́, вѣ́рою покланя́ющіяся Тебѣ́;* съ ни́миже поми́луй на́съ.

Сти́хъ 3: Госпо́дь повѣ́сть въ писа́ніи люде́й* и князе́й си́хъ, бы́вшихъ въ не́мъ,* я́ко веселя́щихся всѣ́хъ жили́ще въ Тебѣ́.

И па́ки: И волхвы́ Ти́ приведе́, вѣ́рою покланя́ющіяся Тебѣ́;* съ ни́миже поми́луй на́съ.

Та́же, Сла́ва: пое́тъ ли́къ пра́вый коне́цъ тропаря́. И ны́нѣ: лѣ́вый пое́тъ та́кожде коне́цъ. Посе́мъ глаго́летъ чте́цъ ве́сь тропа́рь, и пое́тъ са́мъ коне́цъ его́:

Та́йно роди́лся еси́ въ верте́пѣ,* но не́бо Тя́ всѣ́мъ проповѣ́да,* я́коже уста́, звѣзду́ предлага́я, Спа́се,* и волхвы́ Ти́ приведе́,* вѣ́рою покланя́ющіяся Тебѣ́;* съ ни́миже поми́луй на́съ.

И чту́тся па́ки по обы́чаю чте́нія сія́.

Проро́чества Иса́іина чте́ніе. [Глава́ 11.]

Та́ко глаго́летъ Госпо́дь: изы́детъ Же́злъ отъ ко́рене Іессе́ова, и Цвѣ́тъ отъ ко́рене его́ взы́детъ, и почíетъ на Не́мъ Ду́хъ Бо́жій, Ду́хъ му́дрости и ра́зума, Ду́хъ совѣ́та и крѣ́пости, Ду́хъ вѣ́дѣнія и благоче́стія, Ду́хъ стра́ха Бо́жія испо́лнитъ Его́. Не по сла́вѣ су́дитъ, ниже́ по глаго́ланію обличи́тъ, но су́дитъ пра́вдою смире́нныхъ су́дъ, и обличи́тъ пра́востію сла́вныя земли́, и порази́тъ зе́млю сло́вомъ у́стъ Свои́хъ, и Ду́хомъ усте́нъ убіе́тъ нечести́ваго. И бу́детъ пра́вдою препоя́санъ по чре́слѣхъ Свои́хъ и и́стиною обви́тъ по ре́бромъ Свои́мъ. Тогда́ пожиру́етъ во́лкъ со а́гнцемъ, и ры́сь почíетъ съ ко́злищемъ, и теле́цъ, и ле́въ, и юне́цъ вку́пѣ пожиру́ютъ, и отроча́ ма́ло поведе́тъ и́хъ. Теле́цъ и ле́въ вку́пѣ пасу́тся, и вку́пѣ ча́да и́хъ бу́дутъ; и ле́въ, я́ко во́лъ, снѣ́сть пле́вы. И отроча́ мла́до на пеще́ру а́спидску и на ло́же пле́мене а́спидска ру́ку возложи́тъ. И не сотворя́тъ зла́, ниже́ и́мутъ погуби́ти ни еди́наго же на горѣ́ святѣ́й Мое́й, зане́же напо́лнися вся́ земля́ позна́ти Го́спода, я́ко водѣ́ мно́зѣ покры́ти моря́. И бу́детъ въ де́нь о́нъ ко́рень Іессе́евъ и возстая́й владѣ́ти язы́ки; на него́ язы́цы упова́ютъ, и бу́детъ поко́й его́ че́сть.

Проро́чества Іеремíина чте́ніе. [Вару́х. гл. 3 и 4.]

Се́й Бо́гъ на́шъ, и не приложи́тся и́нъ къ Нему́. Изобрѣ́те вся́къ пу́ть худо́жества, и даде́ и́ Іа́кову, о́троку Своему́, и Изра́илю, возлю́бленному отъ Него́. Посе́мъ же на земли́ яви́ся и съ человѣ́ки поживе́. Сія́ кни́га повелѣ́ній Бо́жіихъ, и зако́нъ сы́й во вѣ́ки; вси́, держа́щіися ея́, въ живо́тъ вни́дутъ, оста́вившіи же ю́, у́мрутъ. Обрати́ся, Іа́кове, и ими́ся ея́. Поиди́ къ сія́нію пря́мо свѣ́та ея́. Не да́ждь ино́му сла́вы твоея́ и поле́зныхъ тебѣ́ язы́ку чужде́му. Блаже́ни есмы́, Изра́илю, я́ко уго́дная Бо́гу на́мъ разу́мна су́ть.

Проро́чества Даніи́лова чте́ніе. [Глава́ 2.]

Рече́ Даніи́лъ Навуходоно́сору: ты́, царю́, ви́дѣлъ еси́, и се́ о́бразъ еди́нъ, о́бразъ о́ный вели́къ, и обли́чіе его́ окру́гло, стоя́ше предъ лице́мъ твои́мъ, и видѣ́ніе его́ стра́шно. Образъ, его́же глава́ отъ зла́та чи́ста; ру́цѣ, и пе́рси, и мы́шцы его́ сре́бряны; чре́во и сте́гны мѣ́дяны; го́лени желѣ́зны; но́зѣ ча́сть у́бо желѣ́зна, и ча́сть нѣ́кая скуде́льна. Ви́дѣлъ еси́, до́ндеже отто́ржеся ка́мень отъ горы́ безъ ру́къ и порази́ о́бразъ, на но́ги желѣ́зныя и скуде́льныя, и истни́ я́ до конца́. Тогда́ истни́шася во еди́но скуде́ль, желѣ́зо, мѣ́дь, сребро́, зла́то, и бы́ша, я́ко пра́хъ отъ гумна́ жа́твеннаго, и взя́тъ я́ мно́жество дохнове́нія, и мѣ́сто не обрѣ́теся и́мъ; ка́мень же, порази́вый о́бразъ, бы́сть въ го́ру ве́лію и испо́лни всю́ зе́млю. Сіе́ е́сть со́ніе, и сказа́ніе его́ рече́мъ предъ царе́мъ: возста́витъ Бо́гъ Небе́сный Ца́рство, е́же во вѣ́ки не истлѣ́етъ, и Ца́рство Его́ лю́демъ ины́мъ не оста́вится. И истни́тъ, и изможди́тъ вся ца́рствія, и то́ воста́нѣтъ во вѣ́ки. Имже о́бразомъ ви́дѣлъ еси́, я́ко отъ горы́ отсѣче́ся ка́мень безъ ру́къ и сотры́ скуде́ль, желѣ́зо, мѣ́дь, сребро́, зла́то. Бо́гъ вели́кій сказа́ царю́, и́мже подоба́етъ бы́ти по си́хъ, и и́стинно со́ніе и вѣ́рно сказа́ніе Его́.

Посе́мъ чте́цъ глаго́летъ тропа́рь се́й, гла́съ 6:

Возсія́лъ еси́, Христе́, отъ Дѣ́вы, разу́мное Со́лнце пра́вды,* и звѣзда́ Тя́ показа́ въ верте́пѣ,* вмѣща́ющася Невмѣсти́маго.* Волхвы́ наста́вилъ еси́ на поклоне́ніе Твое́,* съ ни́миже Тя́ велича́емъ:* Жизнода́вче, сла́ва Тебѣ́.

Сти́хъ 1, псало́мъ 92: Госпо́дь воцари́ся, въ лѣ́поту облече́ся,* облече́ся Госпо́дь въ си́лу и препоя́сася,* и́бо утверди́ вселе́нную, я́же не подви́жится.* Гото́въ престо́лъ Тво́й отто́лѣ,* отъ вѣ́ка Ты́ еси́.

Та́же, па́ки: Волхвы́ наста́вилъ еси́ на поклоне́ніе Твое́,* съ ни́миже Тя́ велича́емъ:* Жизнода́вче, сла́ва Тебѣ́.

Сти́хъ 2: Воздвиго́ша рѣ́ки, Го́споди,* воздвиго́ша рѣ́ки гла́сы своя́.* Во́змутъ рѣ́ки сотре́нія своя́* отъ гласо́въ во́дъ мно́гихъ.

Та́же, па́ки: Волхвы́ наста́вилъ еси́ на поклоне́ніе Твое́,* съ ни́миже Тя́ велича́емъ:* Жизнода́вче, сла́ва Тебѣ́.

Сти́хъ 3: Ди́вны высоты́ морскíя,* ди́венъ въ высо́кихъ Госпо́дь.* Свидѣ́нія Твоя́ увѣ́ришася зѣло́:* до́му Твоему́ подоба́етъ святы́ня, Го́споди, въ долготу́ днíй.

Сла́ва, коне́цъ тропаря́. И ны́нѣ, па́ки коне́цъ. Та́же тропа́рь, ве́сь:

Возсія́лъ еси́, Христе́, отъ Дѣ́вы, разу́мное Со́лнце пра́вды,* и звѣзда́ Тя́ показа́ въ верте́пѣ,* вмѣща́ющася Невмѣсти́маго.* Волхвы́ наста́вилъ еси́ на поклоне́ніе Твое́,* съ ни́миже Тя́ велича́емъ:* Жизнода́вче, сла́ва Тебѣ́.

Коне́цъ же тропаря́ пое́тъ чте́цъ са́мъ и посе́мъ чте́тъ:

Проро́чества Иса́іина чте́ніе. [Глава́ 9.]

Отроча́ роди́ся на́мъ, Сы́нъ, и даде́ся на́мъ, Его́же нача́льство бы́сть на ра́мѣ Его́; и нарица́ется и́мя Его́: вели́каго совѣ́та Ангелъ, Чу́денъ, Совѣ́тникъ, Бо́гъ Крѣ́покъ, Власти́тель, Нача́льникъ ми́ра, Оте́цъ бу́дущаго вѣ́ка, приведе́тъ бо ми́ръ на нача́льники, и здра́віе Его́, и ве́ліе нача́льство Его́, и ми́ра Его́ нѣ́сть предѣ́ла. На престо́лъ Дави́довъ и на ца́рство Его́, испра́вити е́ и заступи́ти е́ судьбо́ю и пра́вдою отъ ны́нѣ и до вѣ́ка. Ре́вность Го́спода Савао́ѳа сотвори́тъ сія́.

Проро́чества Иса́іина чте́ніе. [Главы́ 7 и 8.]

Приложи́ Госпо́дь глагола́ти ко Аха́зу, глаго́ля: проси́ себѣ́ зна́менія у Го́спода Бо́га твоего́ во глубину́ или́ въ высоту́. И рече́ Аха́зъ: не и́мамъ проси́ти, ниже́ искуси́ти Го́спода. И рече́ Иса́ія: услы́шите у́бо, до́ме Дави́довъ: еда́ малъ вамъ трудъ дая́ти человѣ́комъ, и ка́ко Го́споду тру́дъ даете́? Сего́ ра́ди да́стъ Госпо́дь Са́мъ ва́мъ зна́меніе: се́ Дѣ́ва во чре́вѣ пріи́метъ и роди́тъ Сы́на, и нареку́тъ и́мя Его́ Емману́илъ; ма́сло и ме́дъ и́мать снѣ́сти, пре́жде не́же увѣ́дѣти Ему́ или́ изво́лити лука́вое, избере́тъ благо́е: Зане́ пре́жде, не́же разумѣ́ти Отроча́ти благо́е или́ зло́е, отри́нѣтъ лука́вая, избере́тъ благо́е. И рече́ Госпо́дь ко мнѣ́: пріими́ себѣ́ сви́токъ но́въ, вели́къ и напиши́ въ не́мъ писа́ломъ человѣ́ческимъ: е́же ско́ро плѣне́ніе сотвори́ коры́стей, настоя́тъ бо. И свидѣ́тели мнѣ́ сотвори́ вѣ́рны человѣ́ки, Урíю іере́я, и Заха́рію, сы́на Варахíина. И приступи́хъ ко проро́чицѣ, и во чре́вѣ прія́тъ и роди́ сы́на. И рече́ мнѣ́ Госпо́дь: нарцы́ и́мя ему́ — ско́ро плѣни́ и напра́сно испрове́рзи. Зане́ пре́жде, не́же разумѣ́ти отроча́ти назва́ти отца́ или́ ма́терь, пріи́метъ си́лу Дама́скову и коры́сти Самарíйскія пря́мо царю́ Ассирíйскому. Съ на́ми Богъ, разумѣ́йте, язы́цы, и покаря́йтеся. Услы́шите да́же до послѣ́днихъ земли́, могу́щіи, покаря́йтеся; а́ще бо па́ки возмо́жете и па́ки побѣжде́ни бу́дете. И и́же а́ще совѣ́тъ совѣщава́ете, разори́тъ Госпо́дь; и сло́во, е́же а́ще возглаго́лете, не пребу́детъ въ ва́съ, я́ко съ на́ми Богъ.

Посе́мъ ектенія́ ма́лая и по возгла́сѣ трисвято́е и

Проки́менъ, гла́съ 1: Госпо́дь рече́ ко Мнѣ́: Сы́нъ Мо́й еси́ Ты́,* Азъ дне́сь роди́хъ Тя́. Сти́хъ: Проси́ отъ Мене́, и да́мъ Ти́ язы́ки, достоя́ніе Твое́ и одержа́ніе Твое́ концы́ земли́.

Апо́столъ ко Евре́емъ, зача́ло 303:

Многоча́стнѣ и многообра́знѣ дре́вле Бо́гъ, глаго́лавый отце́мъ во проро́цѣхъ. Въ послѣ́докъ днíй си́хъ глаго́ла на́мъ въ Сы́нѣ, Его́же положи́ наслѣ́дника всѣ́мъ, Имже и вѣ́ки сотвори́. Иже Сы́й сія́ніе сла́вы и о́бразъ ѵпоста́си Его́, нося́ же вся́ческая глаго́ломъ си́лы Своея́, Собо́ю очище́ніе сотвори́въ грѣхо́въ на́шихъ, сѣ́де одесну́ю престо́ла вели́чествія на высо́кихъ. Толи́ко лу́чшій бы́въ а́нгелъ, ели́ко пресла́внѣе па́че ихъ наслѣ́дствова и́мя. Кому́ бо рече́ когда́ отъ а́нгелъ: Сы́нъ Мо́й еси́ Ты́, Азъ дне́сь роди́хъ Тя́? И па́ки: Азъ бу́ду Ему́ во Отца́, и То́й бу́детъ Мнѣ́ въ Сы́на? Егда́ же па́ки вво́дитъ Перворо́днаго во вселе́нную, глаго́летъ: и да покло́нятся Ему́ вси́ а́нгели Бо́жіи. И ко а́нгеломъ у́бо глаго́летъ: творя́й а́нгелы Своя́ ду́хи и слуги́ Своя́ о́гнь паля́щъ. Къ Сы́ну же: престо́лъ Тво́й, Бо́же, въ вѣ́къ вѣ́ка, же́злъ пра́вости, же́злъ Ца́рствія Твоего́. Возлюби́лъ еси́ пра́вду и возненави́дѣлъ еси́ беззако́ніе, сего́ ра́ди пома́за Тя́, Бо́же, Бо́гъ Тво́й еле́емъ ра́дости па́че прича́стникъ Твои́хъ. И па́ки: въ нача́лѣ Ты́, Го́споди, зе́млю основа́лъ еси́, и дѣла́ руку́ Твое́ю су́ть небеса́. Та́ поги́бнутъ, Ты́ же пребыва́еши, и вся́, я́коже ри́за, обетша́ютъ, и, я́ко оде́жду, свіе́ши и́хъ, и измѣня́тся; Ты́ же то́йжде еси́, и лѣ́та Твоя́ не оскудѣ́ютъ.

Аллилу́ія, гла́съ 5: Рече́ Госпо́дь Го́сподеви моему́: сѣди́ одесну́ю Мене́, до́ндеже положу́ враги́ Твоя́ подно́жіе но́гъ Твои́хъ. Сти́хъ: Же́злъ си́лы по́слетъ Ти́ Госпо́дь отъ Сіо́на. Сти́хъ: Изъ чре́ва пре́жде денни́цы роди́хъ Тя́, кля́тся Госпо́дь и не раска́ется.

Ева́нгеліе Луки́, зача́ло 5:

Во дне́хъ о́нѣхъ изы́де повелѣ́ніе отъ ке́саря Августа написа́ти всю́ вселе́нную. Сіе́ написа́ніе пе́рвое бы́сть, владя́щу Сирíею Киринíю. И идя́ху вси́ написа́тися, ко́ждо во сво́й гра́дъ. Взы́де же и Іо́сифъ отъ Галиле́и изъ гра́да Назаре́та во Іуде́ю, во гра́дъ Дави́довъ, и́же нарица́ется Виѳлее́мъ, зане́ бы́ти ему́ отъ до́му и оте́чества Дави́дова, написа́тися съ Марíею, обруче́нною ему́ Жено́ю, су́щею непра́здною. Бысть же, егда́ бы́ша та́мо, испо́лнишася днíе роди́ти Ей. И роди́ Сы́на Своего́ пе́рвенца, и пови́тъ Его́, и положи́ Его́ въ я́слехъ, зане́ не бѣ́ и́мъ мѣ́ста во оби́тели. И па́стыріе бѣ́ху въ то́йже странѣ́, бдя́ще, и стрегу́ще стра́жу нощну́ю о ста́дѣ свое́мъ. И се́ а́нгелъ Госпо́день ста́ въ ни́хъ, и сла́ва Госпо́дня осія́ и́хъ, и убоя́шася стра́хомъ ве́ліимъ. И рече́ и́мъ а́нгелъ: не бо́йтеся, се́ бо благовѣству́ю ва́мъ ра́дость ве́лію, я́же бу́детъ всѣмъ лю́демъ, я́ко роди́ся вамъ днесь Спа́съ, Иже е́сть Христо́съ Госпо́дь, во гра́дѣ Дави́довѣ. И се́ ва́мъ зна́меніе: обря́щете Младе́нца пови́та, лежа́ща въ я́слехъ. И внеза́пу бы́сть со а́нгеломъ мно́жество во́й небе́сныхъ, хва́лящихъ Бо́га и глаго́лющихъ: сла́ва въ вы́шнихъ Бо́гу, и на земли́ ми́ръ, въ человѣ́цѣхъ благоволе́ніе. И бы́сть, я́ко отыдо́ша отъ ни́хъ на не́бо а́нгели, и человѣ́цы па́стыріе рѣ́ша дру́гъ ко дру́гу: пре́йдемъ до Виѳлее́ма и ви́димъ глаго́лъ се́й бы́вшій, его́же Госпо́дь сказа́ на́мъ. И пріидо́ша, поспѣ́шшеся, и обрѣто́ша Маріа́мь же и Іо́сифа, и Младе́нца, лежа́ща во я́слехъ. Ви́дѣвше же, сказа́ша о глаго́лѣ, глаго́ланномъ и́мъ о Отроча́ти Се́мъ. И вси слы́шавшіи диви́шася о глаго́ланныхъ отъ па́стырей къ ни́мъ. Маріа́мъ же соблюда́ше вся́ глаго́лы сія́, слага́ющи въ се́рдцы Свое́мъ. И возврати́шася па́стыріе, сла́вяще и хва́ляще Бо́га о всѣ́хъ я́же слы́шаша и ви́дѣша, я́коже глаго́лано бысть къ нимъ.

[Зри́:] Дне́ же ря́дъ: проки́менъ, Апо́столъ и Ева́нгеліе въ на́вечеріи Рождества́ Христо́ва и Богоявле́нія не чте́тся.
И по ря́ду Боже́ственная литургíя Вели́каго Васи́лія. Вмѣ́сто Досто́йно.., пое́мъ:

О Тебѣ́ ра́дуется, Благода́тная, вся́кая тва́рь, а́нгельскій собо́ръ и человѣ́ческій ро́дъ, освяще́нный хра́ме и раю́ слове́сный, дѣ́вственная похвало́, изъ Нея́же Бо́гъ воплоти́ся и Младе́нецъ бы́сть, пре́жде вѣ́къ сы́й Бо́гъ на́шъ, ложесна́ бо Твоя́ престо́лъ сотвори́ и чре́во Твое́ простра́ннѣе небе́съ содѣ́ла. О Тебѣ́ ра́дуется, Благода́тная, вся́кая тва́рь, сла́ва Тебѣ́.

Прича́стенъ еди́нъ: Хвали́те Го́спода съ небе́съ, хвали́те Его́ въ вы́шнихъ.

По отпу́стѣ литургíи вжига́етъ параекклисіа́рхъ свѣ́щникъ и поставля́етъ среди́ це́ркве. Кли́рицы же, ста́вше о́ба ли́ка вку́пѣ, пою́тъ возгла́сно тропа́рь пра́здника, гла́съ 4: Рождество́ Твое́, Христе́ Бо́же на́шъ... Сла́ва, и ны́нѣ, конда́къ, гла́съ 3: Дѣ́ва дне́сь Пресу́щественнаго ражда́етъ... По оконча́ніи же кондака́, многолѣ́тствуютъ ИМПЕРАТОРА, и Сѵно́дъ, и настоя́теля. И вхо́димъ въ трапе́зу, и яди́мъ варе́ніе съ еле́емъ, ры́бы же не яди́мъ, вино́ же піе́мъ, благодаря́ще Бо́га.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 245 об. – 250.

/ Къ оглавленію раздѣла /


Наверхъ / Къ титульной страницѣ

0