Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 24-й де́нь.
Предпра́зднство Рождества́ Христо́ва, и па́мять святы́я преподобному́ченицы Евге́ніи.

[ВЕЧЕРЪ,]
На Го́споди воззва́хъ: стихи́ры предпра́зднства, гла́съ 5. Подо́бенъ: Ра́дуйся.

Но́сиши Ада́мовъ зра́къ, во о́бразѣ Бо́жіи Сы́й всесоверше́нный, и хо́щеши рука́ми держа́тися, руко́ю вся́ содержа́й си́лою Твое́ю, — Чи́стая Всенепоро́чная провѣщава́ше глаго́лющи, — ка́ко Тя́ пелена́ми повію́ я́ко Младе́нца? Ка́ко сосца́ми пита́ю Тя́, вся́ческая пита́ющаго? Ка́ко Твое́й па́че ума́ нищетѣ́ удивлю́ся? Ка́ко Тя́ Сы́на Моего́ нареку́, раба́ Твоя́ ны́нѣ су́щи? Пою́, благословлю́ Тя, подаю́щаго мíру ве́лію ми́лость.

Младе́нца, воплоща́ема изъ Нея́, предвѣ́чнаго Бо́га, Всенепоро́чная зря́щи, рука́ми держа́щи, и облобыза́ющи ча́сто, и ра́дости исполня́ющися, провѣщава́ше Ему́: Бо́же Вы́шній, Царю́ Неви́димый, ка́ко зрю́ Тя́ и разумѣ́ти та́инства не могу́, безмѣ́рныя нищеты́ Твоея́? Верте́пъ бо малѣ́йшій и се́й чу́ждій вну́трь вмѣща́етъ Тя́, ро́ждшагося, и дѣ́вства не рѣши́вша, ложесна́ соблю́дшаго, я́ко пре́жде рождества́, и даю́щаго ве́лію ми́лость.

Сія́ ра́бски Чи́стая, ужа́сно вѣща́ющи, услы́шаше волхво́въ предъ верте́помъ, ку́пно предстоя́щихъ, и къ ни́мъ рече́: Кого́ и́щете вы́? Яко ви́жду бо, отъ инода́льныя страны́ пріидо́сте, пе́рсскій о́бразъ и мудрова́ніе иму́ще. Стра́ненъ исхо́дъ и ше́ствіе сотвори́сте и къ стра́нствовавшему свы́ше и стра́нно въ Мя́ Все́льшемуся, я́ко вѣ́сть, со тща́ніемъ пріидо́сте Тому́ поклони́тися, да́рующему мíру ве́лію ми́лость.

Ины стихи́ры святы́я, гла́съ 8. Подо́бенъ: О, пресла́внаго чудесе́!

Мíра оста́вльши красоту́,* души́ благоро́діе,* благоро́дія свы́ше* добро́тами уясни́ла еси́,* Евге́ніе всехва́льная,* о́браза благода́ть нему́тну житіе́мъ сохра́ньши,* му́ченице непобѣди́мая,* дѣ́вства забра́ло богови́дно* и цвѣ́те естества́ всеблагоро́днѣйшій.

Сло́вомъ, и житіе́мъ, и благода́тію,* и терпѣ́ніемъ души́ украси́вшися,* привела́ еси́ страда́лецъ во́инства* и дѣ́въ собо́ръ* отъ Дѣ́вы Возсія́вшему* и свидѣ́тельства я́вѣ Отве́рзшему всѣ́мъ вхо́дъ,* Евге́ніе всему́драя,* съ ни́миже и ны́нѣ Сего́ умоли́* спасти́ ста́до твое́.

Пра́вды Строи́тель* тя, я́ко дѣ́ву чи́сту* и я́ко сла́вну му́ченицу,* сугу́быми вѣнцы́ благолѣ́пно украси́,* красе́нъ черто́гъ тебѣ́ дарова́въ,* свѣтоявле́ньми просвѣще́нный,* идѣ́же все́льшися,* вѣ́чнующимъ, невѣ́сто Христо́ва,* ны́нѣ блаже́нствомъ я́вѣ обогати́лася еси́.

Сла́ва и ны́нѣ, предпра́зднства, гла́съ 2:

Се́ вре́мя прибли́жися спасе́нія на́шего, гото́вися, верте́пе, Дѣ́ва приближа́ется роди́ти; Виѳлее́ме, земле́ Іу́дова, красу́йся и весели́ся, я́ко изъ тебе́ возсія́ Госпо́дь на́шъ. Услы́шите, го́ры и хо́лми, и окре́стныя страны́ Іуде́йскія, я́ко гряде́тъ Христо́съ, да спасе́тъ, его́же созда́, человѣ́ка, я́ко Человѣколю́бецъ.

На стихо́внѣ стихи́ры предпра́зднства, гла́съ 1. Подо́бенъ: Всехва́льніи му́ченцы.

Да́ры Тебѣ́ принося́ще, Сы́не,* ца́ріе пріидо́ша восто́чніи,* Царя́ Тя́ увѣ́дѣвше роди́тися,* лива́нъ, и сми́рну, и зла́то,* и се́ стоя́тъ предъ две́рьми.* Си́мъ повели́ ви́дѣти Тя́, Младе́нца,* на руку́ Мое́ю держи́ма,* дре́вняго Ада́ма старѣ́йша.

Сти́хъ: Бо́гъ отъ ю́га пріи́детъ* и Святы́й изъ горы́ пріосѣне́нныя ча́щи.

Пріиди́те, вни́дите со тща́ніемъ, —* Дѣ́ва рече́ дре́вле волхво́мъ, —* и ви́дите Неви́димаго,* ви́дима я́вльшася и Младе́нца бы́вша.* Они́ же со усе́рдіемъ* внидо́ша, и поклони́шася,* и да́ры принесо́ша,* проро́чество Боже́ственное испо́лнивше.

Сти́хъ: Го́споди, услы́шахъ слу́хъ Тво́й и убоя́хся,* Го́споди, разумѣ́хъ дѣла́ Твоя́ и ужасо́хся.

Ношу́ Тя я́ко Младе́нца рука́ми,* вся́ческая нося́щаго,* и удивля́юся, —* глаго́лаше Неискусобра́чная, —* ка́ко Тя млеко́мъ воспита́ю,* пита́ющаго вся́, Сы́не Мой и Тво́рче Мой?* Сла́влю Твое́ безмѣ́рное къ человѣ́комъ снизше́ствіе,* и́мже спаса́еши мíръ погиба́ющій.

Сла́ва, и ны́нѣ, предпра́зднства гла́съ 6:

Сіо́не, торжеству́й, Іерусали́ме, весели́ся, гра́де Христа́ Бо́га, подыми́ Зижди́теля, въ верте́пѣ и я́слѣхъ вмѣща́емаго, отве́рзите мнѣ́ врата́ и, вше́дъ въ ня́, узрю́ я́ко Младе́нца, пелена́ми, повива́емаго, дла́нію же содержа́щаго тва́рь, Его́же пою́тъ а́нгели непреста́ннымъ гла́сомъ, Жизнода́вца Го́спода, спаса́ющаго ро́дъ на́шъ.

Тропа́рь, гла́съ 4:

Написова́шеся иногда́ со ста́рцемъ Іо́сифомъ, я́ко отъ сѣ́мене Дави́дова, въ Виѳлее́мѣ Маріа́мъ, чревонося́щи безсѣ́менное Рожде́ніе. Наста́ же вре́мя рождества́, и мѣ́сто ни еди́ноже бѣ́ обита́лищу, но, я́коже кра́сная пала́та, верте́пъ Цари́цѣ показа́шеся. Христо́съ ражда́ется пре́жде па́дшій воскреси́ти о́бразъ.


НА ПОВЕЧЕРІИ,
Кано́нъ, его́же краегране́сіе: Дне́сь же суббо́ту пою́ вели́кую. Ирмосы́ по два́жды, тропари́ же на 6. Гла́съ 6.

Пѣ́снь 1.

Ирмо́съ: Волно́ю морско́ю Скры́вшаго дре́вле гони́теля мучи́теля — въ я́слѣхъ сокрыва́емаго уби́ти и́щетъ Иродъ, но мы́ съ волхвы́ пои́мъ: Го́сподеви воспои́мъ, сла́вно бо просла́вися.

Го́споди Бо́же мо́й, рожде́ственное пѣ́ніе и предпра́зднственную пѣ́снь Тебѣ́ воспою́, рожде́ніемъ Твои́мъ Боже́ственнымъ, возрожде́ніе даю́щему мнѣ́ и къ пе́рвому мя́ благоро́дію возводя́щу.

Горѣ́ Тя́ на престо́лѣ и до́лѣ въ я́слѣхъ премíрная и земна́я разумѣ́вше, Спа́се мо́й, дивля́хуся держа́вѣ Твое́й, яви́лся еси́ бо па́че ума́, сугу́бъ естество́мъ, Богочеловѣ́къ.

Да Твоея́ сла́вы вся́ческая испо́лниши, приклони́въ небеса́, на зе́млю прише́лъ еси́: я́ко бо на руно́, низше́лъ еси́ до́ждь во чре́во дѣ́вственное, изъ Нея́же ны́нѣ роди́тися сугу́бъ гряде́ши, Бо́гъ же и Человѣ́къ.

Послѣди́ же ирмо́съ о́ба ли́ка вку́пѣ.

Пѣ́снь 3.

Ирмо́съ: Тебе́, на вода́хъ повѣ́сившаго всю́ зе́млю неодержи́мо, тва́рь, ви́дѣвши въ верте́пѣ ражда́ющася, ужа́сно содрога́шеся, нѣ́сть свя́тъ, па́че Тебе́, Го́споди, зову́щи.

Образы неизрече́ннаго Твоего́ воплоще́нія проявля́я, Ще́дре, умно́жилъ еси́ видѣ́нія и проро́чествія вдохну́лъ еси́, я́же, ны́нѣ прише́дъ, испо́лнилъ еси́, пло́тію ражда́яся изъ Чи́стыя Отрокови́цы во гра́дѣ Дави́довѣ.

Простре́ земля́ плещи́ своя́ и пріе́млетъ пріе́млющаго Зижди́теля сла́ву отъ а́нгелъ, отъ небе́съ же звѣзду́, отъ па́стырей хвале́ніе, отъ волхво́въ же да́ры и отъ всего́ мíра позна́ніе.

Волхва́, звѣздоче́тца Валаа́ма, гада́нія ны́нѣ исполня́ются: возсія́ бо звѣзда́ отъ Іа́кова и наста́ви къ Со́лнцу сла́вы да́ры нося́щія волхвы́, отъ Перси́ды цари́.

Пѣ́снь 4.

Ирмо́съ: Отъ Дѣ́вы прише́ствіе Твое́ прови́дя Авваку́мъ, ужа́сся, вопія́ше: Ты́ отъ ю́га, воплоща́яся, прише́лъ еси́, Изба́вителю, Ада́ма отринове́ннаго воззва́ти.

Приближа́ется и прихо́дитъ ны́нѣ Госпо́дь, жда́ніе язы́ковъ и спасе́ніе мíра; угото́ви верте́пъ, гра́де Виѳлее́ме, и съ волхвы́ па́стыріе, теку́ще, приспѣ́йте.

Крѣ́постію Божества́ сраствори́вся человѣ́комъ едине́ніемъ несли́тнымъ, пло́ти въ подо́біи, Спа́се, Ада́ма обновля́еши и спаса́еши воспрія́тіемъ.

Сло́во, пло́ть яви́вся, одебелѣва́етъ и вселя́ется въ ны́ неизрече́ннымъ про́мысломъ. Пріиди́те, вѣ́рніи, у́зримъ сла́ву Его́, сла́ву я́ко Единоро́днаго отъ Бо́га и Отца́.

Пѣ́снь 5.

Ирмо́съ: Богоявле́нія Твоего́, Христе́, е́же къ намъ ми́лостивно бы́вшаго, Иса́ія, Свѣ́тъ ви́дѣвъ Невече́рній, отъ но́щи у́треневавъ, взыва́ше: се́ Дѣ́ва во чре́вѣ пріи́метъ и породи́тъ воплоща́емое Сло́во, и вси́ земноро́дніи возра́дуются.

Новотвори́ши земноро́дныя, пе́рстенъ бы́въ, Зижди́телю. Ясли же, и пелены́, и верте́пъ — Твоего́ смире́нія о́бразы. Обру́чникъ же Твоея́ Ма́тере, Тво́й мни́мый оте́цъ по пло́ти, ро́ждшаго Тя́ Отца́ ны́нѣ вообража́етъ совѣ́тъ.

Сми́рною — сме́рть, зла́томъ — ца́рскую держа́ву, лива́номъ же — Божества́ преиму́щество проявля́ютъ ца́ріе язы́ковъ, нача́тки даронося́ще Тебѣ́, въ верте́пѣ рожде́нному Виѳлее́мстѣмъ изъ Неискусому́жныя Ма́тере.

Изъ безму́жныя проше́дъ, Отца́ соприсносу́щное Сло́во, пло́тски всели́лся еси́ въ верте́пъ, я́ко престо́лъ, я́сли вмѣни́въ; удивля́еши же стра́шнымъ строе́ніемъ Твои́мъ волхвы́ и па́стыри, а́нгелы же ужаси́лъ еси́: сла́ва держа́вѣ Твое́й.

Пѣ́снь 6.

Ирмо́съ: Ятъ бы́сть, но не удержа́нъ въ пе́рсѣхъ ки́товыхъ Іо́на: Твой бо о́бразъ нося́, Ро́ждшагося и пло́тію Явльшагося, я́ко отъ черто́га, отъ звѣ́ря изы́де. Рожде́нный бо ны́нѣ пло́тію, во гро́бъ и сме́рть хотѣ́лъ еси́ вни́ти, и па́ки воскре́снути тридне́венъ.

Поги́бе ны́нѣ и разори́ся дре́внія вражды́ средостѣ́ніе плотски́мъ Твои́мъ прише́ствіемъ, Христе́, и пла́менное ору́жіе всѣ́мъ дае́тъ плещи́, живоно́снаго же Еде́мскаго дре́ва причаща́юся вѣ́рно, безсме́ртныхъ садо́въ а́біе Дѣ́латель показу́яся.

Ца́рствуетъ со грѣхо́мъ а́дъ, отъ Ада́ма да́же до Тебе́, но погиба́етъ тѣ́хъ безсту́дное мучи́тельство пло́тію ражда́ющуся Тебе́, Изба́вителю, отъ пле́мене Дави́дова, и на престо́лѣ ца́рствія его́ посажде́ну я́вѣ, и во вѣ́ки ца́рствующу.

Дѣтоубíйца, но не христоубíйца яви́ся Иродъ лю́тый: а́ще бо и младе́нцы пожа́тъ го́рько, я́ко траву́, но Кла́са жи́зни не возмо́же удержа́ти и умертви́ти. Жи́зни бо Сы́й Пода́тель утаи́ся, — я́ко Бо́гъ, Боже́ственною си́лою, — гони́теля.

Пѣ́снь 7.

Ирмо́съ: Неизрече́нное чу́до: въ пещи́ изба́вивый преподо́бныя о́троки изъ пла́мене, въ я́слѣхъ убо́гихъ Младе́нецъ возлеже́ во спасе́ніе на́съ, пою́щихъ: Изба́вителю Бо́же, благосло́венъ еси́.

Уязви́ся льсте́цъ врагъ, Бо́га ви́дя я́ко Младе́нца, лежа́ща въ я́слѣхъ худы́хъ, и крѣ́пкою руко́ю Боже́ственною убива́ется во спасе́ніе на́съ, пою́щихъ: Изба́вителю Бо́же, благослове́нъ еси́.

Блаже́нны я́сли, въ себѣ́ бо пріе́мше я́ко Младе́нца Содѣ́теля, я́ко херуви́мскій престо́лъ показа́шася во спасе́ніе на́съ, пою́щихъ: Изба́вителю Бо́же, благослове́нъ еси́.

Зако́номъ человѣ́ческимъ въ пелена́хъ положе́ніе пріе́млеши, Младе́нецъ я́влься, и́миже у́зы рѣши́ши прегрѣше́ній на́шихъ, свобо́ду да́руя вопію́щимъ: Изба́вителю Бо́же, благослове́нъ еси́.

Пѣ́снь 8.

Ирмо́съ: Ужасни́ся, боя́йся, не́бо, и да подви́жатся основа́нія земли́: се́ бо пелена́ми повива́ется вся́ Нося́й дла́нію и во я́слѣхъ ма́лѣхъ страннопріе́млется, Его́же, о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Разрѣши́ся свя́занный Ада́мъ, свобо́да же всѣ́мъ вѣ́рнымъ дарова́ся, пелена́ми, Спа́се, повива́ему Тебѣ́ и въ верте́пѣ ма́лѣмъ и въ я́слѣхъ безслове́сныхъ положе́ну. Тѣ́мъ Тебѣ́, ра́дующеся, предпра́зднственную пѣ́снь въ Твое́мъ Рождествѣ́ прино́симъ вѣ́рою.

Преста́ пре́лесть Пе́рсская, звѣздосмотри́теле бо, ца́ріе восто́чніи, ро́ждшемуся да́ры прино́сятъ Христу́ Всецарю́, зла́то же и сми́рну съ лива́номъ. Его́же, о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

О, чуде́съ но́выхъ! О, благосты́ни! О, неизрече́ннаго терпѣ́нія! Се́ бо я́ко Младе́нецъ вмѣня́ется въ вы́шнихъ Живы́й и бѣ́гаетъ Бо́гъ во́лею Ирода. Его́же, о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Не диви́ся ны́нѣ, о Ма́ти, ви́дящи я́ко Младе́нца, Его́же изъ чре́ва пре́жде денни́цы роди́ Оте́цъ: возста́вити бо и сопросла́вити человѣ́ческое па́дшее естество́ пріидо́хъ я́вственно, вѣ́рою и любо́вію Тя́ велича́ющее.

Въ стра́ннѣмъ Твое́мъ Рождествѣ́, болѣ́зней избѣ́гши преесте́ственно, ублажи́хся, Безнача́льне Сы́не; ны́нѣ же Тя́ зря́щи, Ирода бѣ́гающа, ору́жіемъ печа́ли смуща́юся душе́ю, взыва́ющи: спаса́й Тебе́ почита́ющія.

Въ зе́млю у́бо иду́ Еги́петскую, но Еги́петская, о Ма́ти, рукотворе́нная низложу́ тру́сомъ; души́ же Моея́ всу́е и́щущія враги́ пошлю́ во а́дъ, я́ко Еди́нъ держа́венъ, вознесу́ и спасу́ Тебе́ почита́ющія.

Да ра́дуется тва́рь: зи́ждется бо Зижди́тель, и, пре́жде Сы́й, ны́нѣ новъ познава́ется Богъ; съ да́ры волсви́ да предсрѣта́ютъ, па́стыріе чу́до да пле́щутъ вѣ́рнѣ, и человѣ́цы со а́нгелы да веселя́тся.


НА УТРЕНИ,
На Бо́гъ Госпо́дь: тропа́рь предпра́зднства, три́жды.

По 1-й каѳи́смѣ сѣда́ленъ, гла́съ 6. Подо́бенъ: Ангельскія си́лы.

Проро́ческая рече́нія ны́нѣ испо́лнишася: Бо́гъ бо на́шъ у́трѣ ражда́ется изъ Дѣ́вы Марíи па́че сло́ва, и пребыва́етъ, я́коже бѣ́ пре́жде рождества́. Собира́ются волсви́, да́ры нося́ще; свиря́ютъ па́стыріе, да припѣва́емъ и мы́: Иже отъ Дѣ́вы рожде́йся, Го́споди, сла́ва Тебѣ́.

Сла́ва, и ны́нѣ, то́йже.

По 2-й каѳи́смѣ сѣда́ленъ, гла́съ 8:

Свирѣ́лей па́стырскихъ преставля́ющее пѣ́сни, во́инство а́нгельское возгласи́, къ ни́мъ глаго́ля: преста́ните, свиря́юще, и́же надъ чреда́ми пасо́мыхъ старѣ́йшины, возопíйте, пою́ще, я́ко роди́ся Христо́съ Госпо́дь, благоволи́вый спасти́ я́ко Бо́гъ ро́дъ человѣ́ческій.

Сла́ва, и ны́нѣ, то́йже.

Кано́нъ предпра́зднства со ирмосо́мъ на 8 и святы́я на 4.

Предпра́зднства кано́нъ, его́же краегране́сіе по алфави́ту. Творе́ніе Іо́сифово. Гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Написа́лся еси́ ке́саревымъ повелѣ́ніемъ, хотя́ написа́ти въ кни́зѣ жи́зни, Всецарю́, человѣ́ка; стра́нно во Своя́ прише́лъ еси́, лю́тѣ устра́ньшагося отъ рая́ на не́бо призыва́я.

Виѳлее́ме, пріими́ Христа́, къ тебѣ́ бо Воплоти́выйся прихо́дитъ, Еде́мъ отверза́я мнѣ́; угото́вися, верте́пе, Невмѣсти́маго у́зриши, вмѣща́ющася въ тебѣ́ пресла́вно, бога́тствомъ благоутро́бія ны́не обнища́вша.

Роди́тися гряде́тъ Христо́съ, стра́нное возрожде́ніе су́щимъ изъ Ада́ма я́ко Богъ да́руя. Возвесели́ся, пусты́не неражда́ющая, земны́хъ естество́ все́: пріи́де бо Влады́ка тя́ многоча́дну содѣ́яти.

Кано́нъ святы́я, творе́ніе Ѳеофа́но. Его́же краегране́сіе: Евге́ніи вели́кую сла́ву въ пѣ́снехъ изря́дно пою́. Гла́съ то́йже.
Пѣ́снь 1. Ирмо́съ то́йже.

Евге́ніе, му́ченице Христо́ва, ны́нѣ ликовству́ющи ра́достно со а́нгельскими во́инствы, я́ко дѣ́ва непоро́чна и я́ко му́ченица, вѣнцено́сица всебога́тая, благода́ть дарова́ти моли́ся любо́вію воспѣва́ющимъ тя́.

Пѣснопѣ́нія, невѣ́сто Христо́ва, боже́ственнаго послу́шавши, къ высо́кому впери́лася еси́ благоро́дію: я́ко бо свѣтъ возсія́ въ се́рдце твое́, пѣ́сней Ду́ха богосло́віе, вся́ко безбо́жіе отгоня́.

Же́нское естество́ тво́й у́мъ забы́въ, къ му́жескимъ дѣя́ніемъ востече́, вмужи́вся благода́тію, и Бо́гу промы́сленнѣ управля́яся, му́ченице Евге́ніе, боже́ственнаго благоро́дія тезоимени́тная.

Осія́вшися свѣ́томъ у́мнымъ, мно́жайшія осія́нія сопричасти́тися содѣ́лала еси́, богому́драя; его́же ны́нѣ пою́щія тя избавля́ющи грѣха́, сподо́би твои́ми мольба́ми, му́ченице Евге́ніе всеблаже́нная.

Богоро́диченъ: Умерщвле́ни бы́вше зна́нія са́домъ, дре́вомъ жи́зни, Чи́стая, къ жи́зни, вѣ́рніи, воззва́хомся, изъ Тебе́ прозя́бшимъ па́че смы́сла, Богоро́дице, Христо́мъ Бо́гомъ; Ему́же со дерзнове́ніемъ моли́ся спасти́ся душа́мъ на́шимъ.

Пѣ́снь 3.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Узъ избавля́я мя́ злы́хъ, Го́споди, пови́тися пелена́ми, я́коже младе́нецъ, прихо́диши, Человѣколю́бче. Покланя́юся Боже́ственному Твоему́ низхожде́нію.

Въ лѣ́то бы́вша Тя, безлѣ́тно возсія́вша изъ Отца́, предгряде́тъ Дѣ́ва роди́ти, лѣ́тныя разрѣша́юща стра́сти ду́шъ на́шихъ.

Искíй мя, заблу́ждшаго преступле́ніемъ, верте́пъ, я́коже не́бо, оби́тель сотвори́лъ еси́, оби́тели ми́ благоуготовля́я та́мошнія, Ще́дре Многоми́лостиве.

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Якоже же́ртва непоро́чна Влады́цѣ принесла́ся еси́ мы́слію соверше́ннѣйшею и бога́тство тлѣ́емое отри́нула еси́, вопію́щи, всему́драя: Ты́ еси́ Бо́гъ на́шъ, и нѣ́сть свя́тъ, па́че Тебе́, Го́споди.

Всечи́стая, позна́ся твоя́ чистота́, просія́ страда́ній Твои́хъ крѣ́пость, дѣя́ніе бо восхожде́ніе видѣ́нія содѣ́лала еси́, вопію́щи: Ты́ еси́ Бо́гъ на́шъ, и нѣ́сть свя́тъ, па́че Тебе́, Го́споди.

Цѣлому́дрія жела́ніемъ одержа́ся, соблюла́ еси́ хвалу́ чистоты́, была́ еси́ прія́тна прему́дрости, Христу́ вопію́щи: Ты́ еси́ Бо́гъ на́шъ, и нѣ́сть свя́тъ, па́че Тебе́, Го́споди.

Богоро́диченъ: Марíю, Пречи́стую Богоро́дицу, воспои́мъ, я́ко Хода́таицу спасе́нія я́вльшуюся, богому́дріи, и вопіе́мъ: нѣ́сть чи́сты, я́коже Ты́, Пречи́стая, и нѣ́сть непоро́чны, па́че Тебе́, Влады́чице.

Сѣда́ленъ, гла́съ 8. Подо́бенъ: Прему́дрости.

Воздержа́вшися въ трудѣ́хъ страда́льческихъ, просла́вилася еси́ по́двиги му́ченическими, мно́ги приве́дши спасае́мыя Зижди́телю твоему́: боже́ственною бо любо́вію оста́вивши привре́менная, му́жескія по́двиги соверши́ла еси́, сла́вная. Тѣ́мже по кончи́нѣ безконе́чную обрѣла́ еси́ жи́знь, пребыва́ющи съ Женихо́мъ твои́мъ всегда́, Евге́ніе равноа́нгельная. Моли́ Христа́ Бо́га прегрѣше́ній оставле́ніе дарова́ти чту́щимъ любо́вію всечестну́ю па́мять твою́.

Сла́ва, и ны́нѣ:

Не́бо мнѣ́ показа́ся дне́сь земля́, на не́й бо ражда́ется Творе́цъ и въ я́слѣхъ восклоня́ется въ Виѳлее́мѣ Іуде́йстѣмъ. Со а́нгелы пою́тъ па́стыріе непреста́нно: въ вы́шнихъ сла́ва, ми́ръ въ мíрѣ; ви́дѣша бо звѣзду́, путеше́ствующу съ волхвы́, ско́ро же теку́ще принести́ да́ры, зла́то, сми́рну и лива́нъ, я́ко всѣхъ су́щему Бо́гу, и Царю́ вѣ́чному, и Зижди́телю вся́ческихъ, въ верте́пѣ за милосе́рдіе ро́ждшемуся.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Тва́рь ны́нѣ обветша́ніе все́ отве́ржи, Зижди́теля, зи́ждема и обновля́юща тя́, ви́дящи, младе́нца бы́вша, и къ пе́рвой тя́ добро́тѣ возводя́ща.

Дивя́щеся пресла́вному Рождеству́, стоя́ху волсви́, путеводи́мы Боже́ственною звѣздо́ю, и ви́дѣша Со́лнце, восходя́щее изъ дѣ́вственнаго о́блака, да́ры Тому́ принесо́ша.

Се́ прихо́дитъ Дѣ́ва, я́ко ю́ница, нося́щи юнца́ во чре́вѣ упита́ннаго, отъе́млющаго мíра грѣхи́, да ра́дуется тва́рь, пра́зднующи.

Про́повѣди проро́ковъ, Христо́во возъявле́ніе возвѣща́ющія, прія́ша дне́сь коне́цъ спаси́тельный: пріи́де бо просвѣти́ти пло́тію во тмѣ́ бѣ́дствующія.

Инъ. Ирмо́съ то́йже.

Прише́лъ еси́, воплоти́вся отъ Дѣ́вы, Вы́шній, Себѣ́ обручи́въ дѣ́въ соста́вы, Тебе́ Еди́наго возлю́бльшія, дѣ́вственнаго Жениха́ зна́емаго.

Рождества́ плотска́го совлекла́ еси́ покрыва́ло: пакирожде́нія же нетлѣ́нную оде́жду, му́ченице всесла́вная, свѣтови́дно облекла́ еси́ креще́ніемъ.

Возсія́ свѣтоно́сная заря́ се́рдцу твоему́, ле́сти отгоня́щи излія́нный мра́къ блиста́ніемъ благода́ти, му́ченице Христо́ва Евге́ніе, до́брая дѣ́во.

Удобре́нно твое́ и красно́ житіе́ просвѣти́ла еси́, воздержа́ніемъ пе́рвѣе плотскíя стра́сти увяди́вши, послѣди́ же страда́ніемъ пресвѣ́тло, Евге́ніе, сія́ющи.

Богоро́диченъ: Превы́шшая а́нгелъ была́ еси́, Всепѣ́тая, Отча ро́ждши совѣ́та вели́каго Ангела, Человѣ́ка бы́вша за мно́гое благоутро́біе, Человѣколю́бца.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Лю́діе, иногда́ во тмѣ́ сѣдя́щіи, да ви́дятъ Свѣ́тъ возсія́вшій Невече́рній: Его́же звѣзда́ дре́вле возвѣсти́ о́гнь почита́ющимъ отъ Перси́ды царе́мъ.

Въ ма́лый вни́ти Ца́рь вели́кій тщи́тся верте́пъ, ума́лена мя́ я́ко да возвели́читъ и обнища́вша безмѣ́рнымъ бога́тствомъ обогати́тъ, Пребоже́ственный.

Ны́нѣ изъ Іа́кова, я́коже Валаа́мъ рече́, ражда́ется Христо́съ: язы́ки же огоспо́дствуетъ, и возвы́сится благода́тію Ца́рство Его́, пребыва́ющее непрее́мно.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Тече́ніе твое́ направля́емо ви́дя ко спасе́нію, змíй душепа́губный, страстоно́сице, воздвиза́етъ искуше́нія тебѣ́ разли́чная, твою́ крѣ́пость разсла́бити покуша́яся; сего́ же, богому́драя чи́стая, попра́ла еси́.

Вся́ добра́ до́брыхъ Да́телю, и Благодѣ́телю, и Жениху́ ду́шъ, Христу́, яви́лася еси́, укра́шена въ по́стницѣхъ воздержа́ніемъ и му́ченическимъ страда́ніемъ сія́ющи, му́ченице Евге́ніе, Христо́ва до́брая дѣ́во.

Вѣне́цъ твоему́ верху́ наложи́ся дарова́ній: Боже́ственную бо почти́ла еси́ му́дрость, бога́тство и сла́ву оте́ческую презрѣ́вши, и съ крѣ́постію послѣ́довала еси́ возлю́бленному Жениху́ твоему́, всечестна́я.

Богоро́диченъ: Изъ Тебе́ Жизнь, возсія́вши мíру, Богороди́тельнице, пре́жде сме́ртію удержа́нныя воззыва́етъ къ жи́зни присносу́щнѣй причаще́ніемъ, вѣ́рою вопію́щія: ино́го, ра́звѣ Тебе́, Бо́га не зна́емъ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Страннообра́знѣ Христо́съ во Своя́ прихо́дитъ, устрани́мъ себе́ грѣхо́въ и Сего́ пріи́мемъ, въ кро́ткихъ душа́хъ обита́ющаго.

Ника́коже малѣ́йшій во градѣ́хъ, Виѳлее́ме, бу́деши: въ тебѣ́ бо ражда́ется Ца́рь и Госпо́дь, па́ствити лю́ди бога́тныя.

Ка́ко ма́лый Тя́ пріи́метъ верте́пъ, мíру невмѣсти́маго, Недомы́сленне? Ка́ко у́зришися, Младе́нецъ, Отцу́ соу́мственный, Безнача́льный?

Инъ. Ирмо́съ то́йже.

Дрема́нія твои́мъ вѣ́ждомъ не дала́ еси́, до́ндеже сладостра́стіе все́ угаси́ла еси́ и чи́стую Зижди́телю твоему́ тебе́ саму́ю соверши́ла еси́ оби́тель.

Еги́птяныни, нра́вомъ поревнова́вши, очернѣ́вшая дѣ́ломъ и и́менемъ, клевета́ти остри́тся честно́е житіе́ твое́, всечестна́я.

Тве́рдую показа́вши свѣ́тлость и врачева́ній благода́тію обогати́вшися бога́тствомъ вѣ́ры, чернори́зицъ составле́нію бы́сть учи́тельница.

Богоро́диченъ: Та́инственно уча́хуся несказа́нному вси проро́цы Твоему́, Всечи́стая, Рождеству́, духо́вно образу́юще и предглаго́люще всѣ́мъ бу́дущая.

Конда́къ, гла́съ 3. Подо́бенъ: Дѣ́ва дне́сь.

Дѣ́ва дне́сь Превѣ́чное Сло́во въ верте́пѣ гряде́тъ роди́ти неизрече́нно; лику́й, вселе́нная, услы́шавши, просла́ви со а́нгелы и па́стырьми хотя́щаго яви́тися Отроча́ Мла́до, Превѣ́чнаго Бо́га.

Икосъ:

Свяще́нная проро́ковъ рече́нія коне́цъ прія́ша: се́ бо Дѣ́ва ражда́етъ Всесоверше́ннаго въ Виѳлее́мѣ гра́дѣ, вну́трь верте́па. Тва́рь вся́, новосотвори́ся, ра́дуйся и лику́й: съ рабы́ пожи́ти Влады́ка всѣ́хъ пріи́де, влады́чества чужда́го избавля́я ны́, низведе́нныя тле́ю, и зри́тся я́ко Младе́нецъ, пелена́ми повива́емь въ я́слѣхъ, Отроча́ Мла́до, Превѣ́чный Богъ.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Да кропя́тъ свы́ше во́ду о́блацы, о́блаки полага́яй Себѣ́ че́стнѣ на восхожде́ніе о́блакомъ, носи́мь Дѣ́вою, гряде́тъ возсія́ти Свѣ́тъ Невече́рній су́щимъ пре́жде помраче́ннымъ и бѣ́дствующимъ.

Во́инство благоугото́вися Боже́ственныхъ а́нгелъ воспѣ́ти неизрече́нное Госпо́дне низхожде́ніе, волсви́, пости́гните, па́стыріе, потщи́теся: пріи́де, Ему́же належа́ше, Христо́съ, ожида́ніе язы́ковъ и избавле́ніе.

Что́ сіе́ стра́нное и велича́йшее чу́до? Ка́ко понесу́ Тя, нося́щаго глаго́ломъ вся́ческая? Неизглаго́ланное Рождество́, Сы́не Мо́й Безнача́льне, глаго́лаше Всечи́стая, Христа́ на дла́нѣхъ ужа́сно держа́щи.

Инъ. Ирмо́съ то́йже.

Изъясни́ла еси́ всѣ́мъ богодухнове́нныхъ писа́ній и́стину, же́нское естество́ ому́жествивши, и вся́ удиви́ла еси́ пресла́вно, честна́я, я́же привела́ еси́ свѣ́тлы вѣ́ровавшія Христу́, всебога́тая.

Явственно обличи́ла еси́ и́дольское неи́стовство, всехва́льная, боже́ственными твои́ми уче́ньми, и дѣ́въ неизче́тное мно́жество обручи́вши всѣ́ми ца́рствующему Христу́ свѣ́тлое му́ченическою кро́вію.

Ви́дѣвши житіе́ твое́ свѣтоно́сное, Васи́лла сла́вная, боже́ственнѣ поревнова́вши и Христу́ обручи́ся, оста́вльши плотско́е все́ сладостра́стіе, и ны́нѣ му́ченическія ра́дости сподо́бися.

Богоро́диченъ: Па́жить исцѣли́ла еси́ сме́ртную, безсѣ́менно ро́ждши Жи́знь Ѵпоста́сную, Дѣ́во Всенепоро́чная, Богороди́тельнице Чи́стая. Тѣ́мъ же Тя́, ра́дующеся, исто́чникъ безсме́ртія имену́емъ.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Высоту́ вои́стинну неизрече́ннаго та́инства, небеса́ ра́зумомъ покры́вшему, Непоро́чная зря́щи, дивля́шеся и глаго́лаше: престо́лъ небе́сный пла́менствуется, Тебе́ держа́й, и ка́ко, Сы́не Мой, понесу́ Тя?

Но́сиши Оте́ческое подо́біе, Сы́не Мой, и ка́ко раба́ подо́біе, обнища́въ воспрія́лъ еси́? Ка́ко въ я́слѣхъ восклоню́ Тя безслове́сныхъ, избавля́ющаго вся́ отъ безслове́сія? Пѣсносло́влю Твое́ благоутро́біе.

Ра́дуйся, вся́ земле́, се Христо́съ приближа́ется, въ Виѳлее́мѣ ражда́яйся: мо́ре, возвесели́ся, проро́ческій со́нмъ, взыгра́й, сбытіе́ зря́ дне́сь Твои́хъ слове́съ, и вси́, ра́дуйтеся, пра́ведніи.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Въ рѣцѣ́ ю́ношески, во огни́ же терпѣли́вно искуси́лася еси́: проти́вная бо естества́ крѣ́пко прешла́ еси́, — Христа́ по́йте, дѣла́, — зову́щи, — и превозноси́те во вся́ вѣ́ки.

Страннолѣ́пно явле́йся Христо́съ тебѣ́, въ темни́цѣ держи́мѣй, препитава́етъ бога́тно и Рождество́мъ Свои́мъ совокупля́етъ го́рнимъ во́инствомъ тя́, славосло́вящую Его́ во вѣ́ки.

Твой Жени́хъ благолѣ́пно вѣнцы́ тя сугу́быми украша́етъ, Евге́ніе богому́драя, и тебѣ́ черто́гъ свѣ́телъ пра́ведно, я́ко пра́ведный, дае́тъ. Его́же превозно́симъ во вся́ вѣ́ки.

Благода́ть Бо́жія, свѣтови́дно облиста́вши тя́, ны́нѣ озаря́етъ во оби́телехъ небе́сныхъ, Ея́же напо́лнитися твои́ми моли́твами непреста́нно моли́ соверша́ющимъ твою́ па́мять, богому́драя.

Богоро́диченъ: Безсме́ртныя зари́ исто́чникъ вѣ́мы Тя́, Богоро́дице, я́ко ро́ждшую Сло́во Безсме́ртнаго Отца́, вся́ сме́рти избавля́ющаго превозноша́ющія Его́ во вѣ́ки.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Да пою́тъ, ра́дующеся, ца́рствія вся́ земна́я, оте́чествія же язы́ковъ да веселя́тся; го́ры, и удо́лія, и хо́лми, рѣ́ки, мо́ре и вся́ тва́рь Го́спода, ны́нѣ ро́ждшагося, велича́етъ.

Ви́дѣлся еси́, я́ко мо́щно бѣ́ проро́комъ Тя́ ви́дѣти; въ послѣ́дняя же времена́ Человѣ́къ бы́въ, всѣ́мъ яви́лся еси́ человѣ́комъ, въ Виѳлее́мѣ, гра́дѣ Іуде́йстѣмъ, звѣзда́ показу́ющи Тя́ звѣздосло́вцемъ, Несказа́нне.

О, Ча́до Сладча́йшее, ка́ко пита́ю Тя́, пита́ющаго? Ка́ко держу́ Тя, держа́щаго вся́ ма́ніемъ? Ка́ко же пелена́ми повію́ повива́ющаго всю́ зе́млю мгло́ю? — вопія́ше Всечи́стая Влады́чица, Юже непреста́нно велича́емъ.

Инъ. Ирмо́съ то́йже.

Во оби́тели все́льшися небе́сныя, сла́вная, ны́нѣ сла́дости ра́йскія сподо́билася еси́ я́вственно съ дѣ́вами, я́ко му́ченица всеи́стинна и съ му́ченицами дѣ́ва всенепоро́чная, Евге́ніе всеблаже́нная.

Жела́ніе получи́ла еси́ па́че ума́ и смы́сла, жела́ній кра́йнѣйшему предстоя́щи свѣ́тло и свѣтоза́рными луча́ми Нача́льныя Тро́ицы, богому́драя, я́вственно сія́ющи, Евге́ніе, до́брая дѣ́во.

Свѣщу́ держа́щи дѣ́вства неуга́сну, му́ченическимъ вѣнце́мъ украси́лася еси́, и ны́нѣ моля́щи не преста́й благоче́стно тя́ любо́вію почита́ющимъ спасти́ся моли́твами твои́ми, Евге́ніе всесла́вная.

Къ Боже́ственному ны́нѣ изшла́ еси́ прохлажде́нію, вседо́бляя, ра́нъ проше́дши о́гнь нестерпи́мый и непостоя́нную во́ду искуше́ній, му́ченице Евге́ніе. Христа́ у́бо моли́ спасти́ ду́ши на́ша.

Богоро́диченъ: Яко руно́, Всенепоро́чная, до́ждь небе́сный во чре́вѣ заче́нши, на́мъ родила́ еси́ безсме́ртіе даю́щаго, благоче́стно Того́ воспѣва́ющимъ и Тя́, Всенепоро́чную Богоро́дицу, велича́ющимъ.

Свѣти́ленъ предпра́зднства. Подо́бенъ: Со ученики́.

Иже во свѣ́тѣ живы́й непристу́пнѣмъ и содержа́й вся́ческая за благоутро́біе неизрече́нное отъ Дѣ́вы ражда́ется и пелена́ми повива́ется, я́ко Младе́нецъ, въ верте́пѣ и въ я́слѣхъ безслове́сныхъ восклоня́ется: потщи́мся спѣ́шно пріити́ въ Виѳлее́мъ на поклоне́ніе Его́ съ волхвы́, плоды́ изря́днѣйшихъ дѣя́ній нося́ще я́ко да́ры.

Сла́ва, и ны́нѣ:

Пѣ́ніе, вѣ́рніи, принесе́мъ Дѣ́вѣ Марíи: се́ бо ны́нѣ предгряде́тъ во гра́дѣ Виѳлее́мѣ роди́ти Христа́ Спа́са. Тѣ́мже, волсви́, съ да́ры со звѣздо́ю тецы́те съ на́ми поклони́тися, па́стыріе же, возопи́ти потщи́теся со а́нгелы ражда́емому: сла́ва Тебѣ́, въ верте́пѣ и я́слѣхъ лежа́щему.

На хвали́техъ стихи́ры, гла́съ 6, на 4. Подо́бенъ: Ангельскія предыди́те.

Звѣзда́ возсія́ отъ Іа́кова въ верте́пѣ,* пріи́демъ и мы́, предпра́зднственная соверша́юще,* теце́мъ съ волхвы́, съ па́стырьми и́демъ,* ви́димъ Бо́га въ пелена́хъ,* ви́димъ Дѣ́ву млекопита́ющую.* О, ужа́сно видѣ́ніе!* Ца́рь Изра́илевъ,* Христо́съ прихо́дитъ.

Пѣ́сньми ли́къ а́нгельскій ны́нѣ почита́етъ Тебе́,* свѣ́тлую и Неискусому́жную Ма́терь,* ра́дуяся, лику́етъ Рождество́мъ Твои́мъ, Пречи́стая,* ра́дуйся, наде́жда правосла́вныхъ,* ра́дуйся, предста́тельство Тебе́ пою́щихъ.* Тѣ́мже рце́мъ:* благослове́нъ прише́дый* Бо́же на́шъ, сла́ва Тебѣ́.

Цвѣ́тъ изы́детъ изъ ко́рене Іессе́ева,* отъ свѣ́тлаго проповѣ́дася проро́ка,* зри́мъ бо Дѣ́ву,* па́че естества́ ро́ждшую* ши́покъ любе́зный въ верте́пѣ,* сопресто́ленъ Отцу́ въ вы́шнихъ.* Лю́діе, рцемъ:* благослове́нъ прише́дый* Бо́же на́шъ, сла́ва Тебѣ́.

Дне́сь Ада́мъ воззва́ся отъ пре́лести* и отъ мра́чныя сопроти́вника ле́сти,* Христо́съ бо изъ Дѣ́вы воплоща́ется* я́ко Человѣ́къ,* Иже, Ада́ма обнови́въ, отъя́тъ кля́тву Дѣ́вою.* Лю́діе, рце́мъ:* благослове́нъ прише́дый* Бо́же на́шъ, сла́ва Тебѣ́.

Сла́ва, гла́съ и подо́бенъ то́йже:

Гряди́, Виѳлее́ме,* гото́ви рожде́ственная,* пріиди́, Іо́сифе,* напиши́ся съ Марíею,* пречестны́я я́сли, богоно́сныя пелены́,* въ ни́хже Жизнь пови́вшися* плени́цы сме́ртныя расто́ргнетъ,* стяга́ющи къ нетлѣ́нію человѣ́ки,* Христо́съ Бо́гъ на́шъ.

И ны́нѣ, подо́бенъ то́йже:

О, блаже́нное Богоотрокови́цы чре́во,* я́же мы́сленнѣ* небесе́ бо́льши показа́ся!* Его́же бо не вмѣща́етъ не́бо,* Ты́ содержи́ши, въ Себѣ́ нося́щи.* О, блаже́нны сосцы́ Дѣ́вы,* я́же соссе́тъ пита́яй вся́ко дыха́ніе Христо́съ!* Въ ложесна́хъ пло́ть Себѣ́ созда́въ* безму́жныя Отрокови́цы.

На стихо́внѣ стихи́ры предпра́зднства, гла́съ 2. Подо́бенъ: До́ме Евфра́ѳовъ.

До́мъ Вседѣ́теля* показа́лася еси́, о Дѣ́во!* Въ Тебѣ́ бо всели́вся,* Госпо́дь сла́вы* роди́тися ны́нѣ происхо́дитъ.

Сти́хъ: Бо́гъ отъ ю́га пріи́детъ* и Святы́й изъ горы́ пріосѣне́нныя ча́щи.

Мла́до въ Виѳлее́мѣ* Дѣ́тище изъ Дѣ́вы,* Бо́гъ превѣ́чный,* въ я́слѣхъ безслове́сныхъ ражда́ется,* о, чудесе́!

Сти́хъ: Го́споди, услы́шахъ слу́хъ Тво́й и убоя́хся;* Го́споди, разумѣ́хъ дѣла́ Твоя́ и ужасо́хся.

Чи́ни у́мніи а́нгельстіи,* въ вы́шнихъ Бо́гу* съ па́стырьми воспо́йте* и съ волхвы́ ражда́ющемуся:* сла́ва Тебѣ́!

Сла́ва, подо́бенъ то́йже:

Сла́ва Тебѣ́, Отче,* Сы́не и Ду́ше,* Имже устро́ися* та́инство ужа́сное* человѣ́комъ на возрожде́ніе.

И ны́нѣ, подо́бенъ то́йже:

Ра́дуйся, Яже Жи́знь* ро́ждшая мíру,* Дѣ́во Богоро́дице,* отъ Ду́ха Свята́го* всѣ́хъ на избавле́ніе.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 217 об. – 227.

/ Къ оглавленію раздѣла /


Наверхъ / Къ титульной страницѣ

0