Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 23-й де́нь.
Предпра́зднство Рождества́ Го́спода на́шего Іису́са Христа́.
И па́мять преподо́бнаго отца́ на́шего равноапо́стольнаго Нау́ма Охридскаго, чудотво́рца.

НА ВЕЛИЦѢЙ ВЕЧЕРНИ,
Пе́рвыя каѳи́смы пе́рвый антифо́нъ: Блаже́нъ му́жъ... На Го́споди воззва́хъ: поста́вимъ стихо́въ 8 и пое́мъ стихи́ры предпра́зднства пре́жде, гла́съ 4. Подо́бенъ: Яко до́бля.

Въ кимва́лѣхъ возгласи́мъ,* въ пѣ́снехъ воскли́кнемъ:* Христо́во явле́ніе показа́ся,* проро́ческая проповѣ́данія коне́цъ прія́ша.* Его́же бо прореко́ша* пло́тію человѣ́комъ яви́тися,* ражда́ется во святѣ́мъ верте́пѣ,* и въ я́слѣхъ возлега́етъ я́ко Отроча́,* и пелена́ми повива́ется я́ко Младе́нецъ.

Виѳлее́ме, угото́вися,* Еде́ме, ны́нѣ отве́рзися:* роди́ти Всесвята́я и́детъ.* Небеса́ да веселя́тся,* да игра́ютъ человѣ́цы,* въ я́слѣхъ Жи́знь, въ верте́пѣ Бога́тый,* прихо́дитъ мно́жества ра́ди ми́лости,* нищету́ Ада́мову воспріи́мъ,* кромѣ́ преложе́нія и смѣше́нія.

Ины стихи́ры преподо́бному, гла́съ 2. Подо́бенъ: Кíими похва́льными.

Кíими похва́льными вѣнцы́* увязе́мъ Нау́ма преподо́бнаго?* Боже́ственнаго неботаи́нника* и проповѣ́дника Правосла́вія су́щаго,* рѣку́ Боже́ственныхъ та́инствъ,* гра́ды нече́стія потопля́ющую,* лю́ди же Боже́ственнымъ креще́ніемъ очища́ющую,* и каменосерде́чныхъ и́хъ въ хра́мъ воздви́гшаго благолѣ́пный* Христа́ Бо́га на́шего,* Иже имѣ́яй ве́лію ми́лость. [Два́жды.]

Кíими пѣ́сненными добро́тами* воспои́мъ Нау́ма преподо́бнаго?* Пріобрѣ́теніе благода́ти,* кра́сное прія́телище Ду́ха* и свѣ́тлую пала́ту Сло́ва,* Отца́ же оби́телище избра́нное,* Тро́ицы пребыва́лище всецѣ́лое,* въ Тріе́хъ у́бо Ли́цѣхъ,* во Еди́нѣмъ же Естествѣ́* проповѣ́давшаго бо́лгаромъ* Бо́га покланя́емаго бсеблагоче́стно,* Иже имѣ́яй ве́лію ми́лость. [Два́жды.]

Кíими богоглаго́ливыми словесы́* восхва́лимъ тя́, Нау́ме преподо́бне,* и́же честну́ю па́мять твою́ любо́вію соверша́ющіи* и вѣ́рою предстоя́щіи ра́цѣ боже́ственныхъ моще́й твои́хъ* и благогоговѣ́йнѣ покланя́ющіися?* Но свободи́ на́съ отъ неду́говъ и напа́стей,* озлобле́нія де́моновъ и муже́й непра́ведныхъ* твои́ми къ Бо́гу моли́твами,* Иже имѣ́яй ве́лію ми́лость.

Сла́ва гла́съ 6:

Прему́дрости благода́ть пріи́мъ отъ Бо́га, Нау́ме всече́стне, и мно́жества научи́въ бо́лгарская благоче́стію, Правосла́вія еси́ основа́ніе же и утвержде́ніе, и всѣ́хъ преподо́бныхъ по́стниковъ удобре́ніе. Дерзнове́ніе имѣ́я ко Го́споду, Того́ моли́ спасти́ся душа́мъ на́шимъ.

И ны́нѣ, предпра́зднства, гла́съ 3:

Благоукраси́ся, Виѳлее́ме, отве́рзеся бо Еде́мъ, гото́вися, Евфра́ѳо, обновля́ется бо Ада́мъ и Ева съ ни́мъ: кля́тва бо разори́ся, спасе́ніе мíру процвѣте́, и ду́ши пра́ведныхъ украша́ются, я́ко да́ръ дароно́сія, вмѣ́сто мѵ́ра пѣ́ніе принося́ще, спасе́ніе душе́вное и нетлѣ́ніе пріе́млюще. Се́ бо въ я́слѣхъ Возлежа́й предповелѣва́етъ пѣ́ніе духо́вное соверша́ти вопію́щимъ непреста́нно: Го́споди, сла́ва Тебѣ́.

Вхо́дъ. Свѣ́те ти́хій... Проки́менъ дне́ и чте́нія три́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 2:

Звѣзду́ богосвѣ́тлую, Болга́ріи свѣти́льника и вѣ́ры побо́рника, Нау́ма боже́ственнаго, вѣ́рніи, восхва́лимъ, со а́нгелы бо ра́дуется, пріи́мъ вѣне́цъ нетлѣ́нія отъ Самого́ Бо́га, и мо́лится спасти́ся душа́мъ на́шимъ.

Всеблаже́нне Нау́ме му́дре, ты́ и по сме́рти на небесѣ́хъ живе́ши во Христѣ́, Того́ бо ра́ди мíру распя́вся и внѣ́ пло́ти вои́стинну пожи́въ, не себѣ́ жи́лъ еси́, но живя́ше па́че въ тебѣ́ Христо́съ Бо́гъ, Его́же моли́ спасти́ся душа́мъ на́шимъ.

Гла́съ 6:

Возсія́вшу свѣ́ту уче́нія твоего́ на земли́ Бо́лгарстѣй, преподо́бне Нау́ме о́тче, я́ко не́бо сла́ву Бо́жію возвѣсти́лъ еси́, со́лнца поте́клъ еси́ свѣтлѣ́йше и свѣти́лъ яснѣ́йше возсія́лъ еси́, отону́дуже мно́жество болга́ръ приве́лъ еси́ Христу́ отъ се́рдца вѣ́ровавшихъ, и́хже ны́нѣ помина́й, я́ко дерзнове́ніе имѣ́я ко Го́споду.

Сла́ва, гла́съ 5:

Преподо́бне о́тче, не да́лъ еси́ сна́ твои́мъ очесе́мъ, ни вѣ́ждомъ твои́мъ дрема́нія, до́ндеже ду́шу и тѣ́ло отъ страсте́й свободи́лъ еси́ и себе́ угото́валъ еси́ Ду́ха жили́ще. Прише́дъ бо Христо́съ со Отце́мъ, оби́тель въ тебѣ́ сотвори́ и Единосу́щныя Тро́ицы тя́ прія́телище чи́стое содѣ́ла. И ны́нѣ, Нау́ме блаже́ннѣйше, моли́ спасти́ся душа́мъ на́шимъ.

И ны́нѣ, предпра́зднства, гла́съ то́йже:

Не дря́хлуй, Іо́сифе, зря́ Мою́ утро́бу: узри́ши бо ражда́емаго отъ Мене́, и возра́дуешися, и я́ко Бо́гу поклони́шися, — Богоро́дица глаго́лаше ко Своему́ обру́чнику, хотя́щи роди́ти Христа́. Сію́ воспои́мъ, глаго́люще: ра́дуйся, Обра́дованная, съ Тобо́ю Госпо́дь и Тебе́ ра́ди съ на́ми.

На стихо́внѣ стихи́ры, гла́съ 5. Подо́бенъ: Ра́дуйся, по́стническихъ.

Ра́дуйся, Нау́ме преподо́бне,* Болга́ріи свѣти́льниче, мѣ́рило догма́товъ,* Правосла́вія пра́вило,* не́бо, сла́ву повѣ́дающее Христа́ Всецаря́,* о́ко неусы́пное, прозря́щее отъ коне́цъ въ концы́,* я́же и напо́лнилъ еси́ Боже́ственнаго проповѣ́данія,* и испо́лнися на тебѣ́ проро́ческое рѣче́ніе,* во всю́ бо зе́млю востече́ твое́ вѣща́ніе* благода́тію Христа́ Бо́га на́шего,* Его́же моли́ дарова́ти душа́мъ на́шимъ* ми́ръ и ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуйся, Нау́ме преподо́бне,* проповѣ́дниче Ева́нгелія въ концѣ́хъ Болга́ріи,* и́же вся́цѣй души́ человѣ́честѣй* Ца́рства Христо́ва любо́вь вложи́вый.* Тѣ́мже и, пре́лести удали́въ, собра́нія вся́* правосла́вно научи́лъ еси́ покланя́тися Тро́ицѣ Несозда́ннѣй —* Безнача́льному Роди́телю, Сы́ну же Собезнача́льному и Ду́ху Боже́ственному,* непосре́дственнѣ отъ Отца́ происходя́щему,* Его́же моли́ дарова́ти душа́мъ на́шимъ* ми́ръ и ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Ра́дуйся, Нау́ме преподо́бне,* мона́шествующихъ честно́е удобре́ніе вои́стину,* въ мѣ́сто селе́нія ди́вна до дому́ Бо́жія проше́дый* ра́достію и весе́ліемъ души́,* идѣ́же гла́съ пра́зднующаго* кра́снаго слы́шанія и сла́дкаго хвале́нія,* Его́же Еди́наго вожделѣ́въ, пло́ть умертви́лъ еси́* и улучи́лъ еси́ Боже́ственную пра́вду Христа́ Бо́га на́шего,* Его́же моли́ дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 8:

Молвы́ жите́йскія оста́вль, Нау́ме преподо́бне, и кре́стъ Спа́совъ на ра́мо взе́мъ, всего́ себе́ Бо́гу возложи́лъ еси́. Тѣ́мже и въ мíрѣ сы́й, внѣ́ пло́ти показа́лся еси́, всехва́льне. Спротяже́ннымъ же на вся́къ де́нь воздержа́ніемъ подвиза́вся, со а́нгелы Ду́ху сопрису́тствуеши всегда́ и свесели́шися. Дерзнове́ніе у́бо имѣ́я ко Го́споду, моли́ изба́витися отъ бѣ́дъ и скорбе́й вѣ́рно соверша́ющимъ присночестну́ю па́мять твою́.

И ны́нѣ, предпра́зднства, гла́съ то́йже:

Воспріими́, Виѳлее́ме, Бо́жію митропо́лію, Свѣ́тъ бо незаходи́мый въ тебѣ́ роди́тися прихо́дитъ. Ангели, удиви́теся на небеси́; человѣ́цы, просла́вите на земли́; волсви́, изъ Перси́ды пресла́вныя да́ры принеси́те; па́стыріе, свиря́юще, трисвято́е пѣ́ніе пѣсновоспо́йте. Вся́кое дыха́ніе да хва́литъ Вседѣ́теля.

Тропа́рь, гла́съ 4:

Мíръ оста́вилъ еси́, прилепи́вся Христу́,* пло́ть распя́лъ еси́, пожи́въ Ду́ху,* Нау́ме всеблаже́нне,* потща́лся еси́ апо́стольскимъ подвиза́тися тече́ніемъ* и улови́лъ еси́ къ вѣ́рѣ бо́лгарская неисче́тная мно́жества.* Тѣ́мже моли́твами твои́ми* изба́ви на́съ отъ искуше́ній.

Сла́ва, и ны́нѣ, предпра́зднства, гла́съ то́йже:

Гото́вися Виѳлее́ме,* отве́рзися всѣ́мъ, Еде́ме,* красу́йся Евфра́ѳо,* я́ко дре́во живота́ въ верте́пѣ процвѣте́ отъ Дѣ́вы:* ра́й бо Оноя чре́во яви́ся мы́сленный,* въ не́мже боже́ственный са́дъ:* отъ него́же я́дше, жи́ви бу́демъ,* не я́коже Ада́мъ у́мремъ;* Христо́съ ражда́ется пре́жде па́дшій возста́вити о́бразъ.


НА УТРЕНИ,
На Бо́гъ Госпо́дь: Тропа́рь предпра́зднства, два́жды. Сла́ва, [свята́го.] И ны́нѣ, предпра́зднства.

По 1-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Краснѣ́йшія вои́стину но́зѣ твои́,* ми́ръ, преподо́бне, преиму́щъ вся́къ у́мъ,* я́ко проповѣ́давша боголѣ́пно,* звѣре́й су́щихъ овца́мъ смѣси́лъ еси́,* ро́ды ди́вія болга́ръ во дво́ръ о́вчій Христа́ Бо́га вве́лъ еси́.* Тѣ́мже ми́ръ безмяте́жный испроси́ на́мъ* и ве́лію ми́лость. [Два́жды.]

Сла́ва, и ны́нѣ, предпра́зднства, гла́съ и подо́бенъ то́йже:

Чу́до пресла́вно зри́тся дне́сь:* Спаси́тель бо на́шъ въ верте́пѣ пло́тію* отъ Дѣ́вы на́съ ра́ди роди́тися ны́нѣ тщи́тся.* Волсви́ же съ да́ры я́ко Царю́ покло́нятся,* и па́стыріе со а́нгелы славосло́вятъ Его́;* съ ни́миже и мы́ вопіе́мъ:* сла́ва на́съ ра́ди Вочеловѣ́чшемуся.

По 2-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й.

Чуде́съ самодѣ́латель бы́въ, богоно́се,* и всѣ́хъ къ Бо́гу моли́твенникъ и хода́тай,* Нау́ме всеблаже́ннѣйше,* Болга́ріи похвало́,* изба́ви, мо́лимся, настоя́щія бѣды́ рабы́ твоя́* и пла́мене бу́дущаго* боже́ственною моли́твою твое́ю. [Два́жды.]

Сла́ва, и ны́нѣ, предпра́зднства, гла́съ и подо́бенъ то́йже:

Весели́ся, Виѳлее́ме, Евфра́ѳо, гото́вися: се́ бо Агница, Па́стыря Вели́каго въ ложесна́хъ нося́щи, роди́ти гряде́тъ, и, предви́дяще боже́ственную звѣзду́, волсви́ ра́дуются, съ па́стырьми пою́ще се́рдца пра́востію.

По поліеле́и сѣда́ленъ, гла́съ 8. Подо́бенъ: Прему́дрость и Сло́во.

Прему́дръ бы́въ отъ млада́го во́зраста,* подложи́лся еси́ и́гу Влады́ки твоего́,* ника́коже тя́жкому,* но испо́лненному че́стности, о́тче.* Боже́ственному же Кли́менту споспѣ́шникъ бы́въ* и съ ни́мъ сердца́ болга́ръ воздѣ́лавъ,* къ нетру́дному преше́лъ еси́ концу́* и трудо́въ свои́хъ возме́здіе непреста́нно собира́еши.* Всеблаже́нне препо́добне,* моли́ Христа́ Бо́га прегрѣше́ній оставле́ніе дарова́ти* пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, предпра́зднства, гла́съ и подо́бенъ то́йже:

Изъ чре́ва пре́жде вѣ́къ отъ Отца́* возсія́въ неслія́ннѣ, Сло́во Бо́жіе* безсѣ́менно предгряде́тъ отъ Твоея́ утро́бы, Пречи́стая,* вре́менми послѣди́, вознося́й дре́вле лю́тѣ попо́лзшагося,* и къ дре́внѣй добро́тѣ возводя́, я́ко Милосе́рдъ.* Его́же Рождеству́ во́инства безпло́тныхъ предъи́дутъ,* и человѣ́комъ побѣ́дная та́йно возсыла́ютъ:* Сла́ва, — взыва́юще, — Бо́гу,* дарова́вшему на́мъ ми́ръ,* разруши́вшему средостѣ́ніе вражды́,* я́коже изво́ли.

И а́біе пое́мъ 1-й антифо́нъ 4-го гла́са: Отъ ю́ности моея́... Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе отъ Матѳе́я, зача́ло 43: Вся́ Мнѣ́ предана́ су́ть Отце́мъ Мои́мъ... и́го бо Мое́ бла́го и бре́мя Мое́ легко́ е́сть. 50-й псало́мъ. Сла́ва: Моли́тами преподо́бнаго Нау́ма... И ны́нѣ: Моли́твами Богоро́дицы... Сти́хъ: Поми́луй мя́, Бо́же...

И стихи́ра, гла́съ 6:

Излія́ся благода́ть во устна́хъ Твои́хъ, преподо́бне о́тче, и бы́лъ еси́ свѣти́льникъ Бо́лгарскаго всенаслѣ́дія, уча́ слове́сныя о́вцы вѣ́ровати въ Тро́ицу Единосу́щную, во Еди́номъ Божествѣ́.

Кано́нъ предпра́зднства, его́же краегране́сіе по алфави́ту. Творе́ніе Іо́сифово. Гла́съ 6.
Пѣ́снь 1.

Ирмо́съ: Волно́ю морско́ю Скры́вшаго дре́вле гони́теля мучи́теля — въ я́слѣхъ сокрыва́емаго уби́ти и́щетъ Иродъ, но мы́ съ волхвы́ пои́мъ: Го́сподеви воспои́мъ, сла́вно бо просла́вися.

Кня́зь изъ Іу́ды оскудѣ́ уже́, ему́же бо завѣща́ся, я́коже предписа́ся, язы́ковъ ча́яніе — Іису́съ Христо́съ пріи́де и въ верте́пѣ ражда́ется кра́йнія ра́ди бла́гости.

Виѳлее́ме, весели́ся ра́достію: въ тебѣ́ бо ражда́ется Христо́съ Госпо́дь. Вселе́нная да игра́етъ, пріе́млющи избавле́ніе, да лику́етъ вся́ тва́рь, пра́зднующи.

Ро́дъ человѣ́ческій хотя́ спасти́, Преблагíй во утро́бу всели́ся Неискусобра́чныя Дѣ́вы и се́ роди́тися гряде́тъ. Тому́ поклони́мся: сла́вно бо просла́вися.

Та́же кано́нъ свята́го, его́же краегране́сіе: Нау́ма, послѣ́днее пріобрѣ́тение Бо́га, восхвалю́, архипа́стырь Бо́лгарскій Константи́нъ Каваси́ла. Гла́съ 1.
Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припѣ́въ: Равноапо́стольне о́тче Нау́ме, моли́ Бо́га о на́съ.

Пото́ковъ полноту́ покажи́ мя́ Свята́го Ду́ха, Нау́ме, моли́твами твои́ми, я́ко рѣка́ Бо́жія, да провѣща́ю твоя́ дѣла́ пѣ́сньми и пѣ́ньми.

Послѣ́дователь бы́лъ еси́ верхо́вныхъ учи́телей Бо́лгарскія земли́ отъ ю́ности, прича́стникъ же споспѣ́шниковъ и́хъ и сподви́жникъ.

Жи́знь твоя́ равноа́нгельна и жи́тельство па́че человѣ́къ, страда́нія же и по́двизи твои́ вои́стину му́ченически, его́же ра́ди тя́ воспѣва́емъ.

Возне́сся превы́ше боже́ственныхъ ке́дровъ соверше́нствомъ, Нау́ме, ди́вныхъ исто́чниче, чудесы́ я́вѣ покры́лъ еси́ предѣ́лы Бо́лгарскія и концы́ земны́я.

Богоро́диченъ: Ма́терь Тя́ Дѣ́ву еди́ну па́че естества́ естество́ позна́ отъ вѣ́ка, Всечи́стая, Яже Содержи́теля человѣ́ковъ и всего́ во чре́вѣ носи́вшая.

Вторы́й кано́нъ, сосвя́занъ, имѣ́яй акрости́хъ пе́рвому. Гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Иже дре́вле бе́здну изсуши́вый лю́демъ пѣшеходя́щимъ, бе́здну изсуши́ мои́хъ грѣхопаде́ній и одожди́ ми́ разумѣ́нія ка́плю, я́ко да преподо́бнаго Твоего́ пѣ́сньми восхвалю́, Христе́.

Ви́дѣти жела́я сла́ву неизрече́нную, ско́рби претерпѣ́лъ еси́, и темни́цы, и му́ки и вся́кое мірско́е безсла́віе, до́брѣ за вѣ́ру подвиза́яся.

Мона́шествуя ду́хомъ и горя́ ре́вностію вѣ́ры, Христа́ поне́слъ еси́ и́гомъ духо́внымъ, и очи́стилъ еси́ ду́ши неи́стовствствовавшія, и сѣ́мя положи́лъ еси́ Боже́ственнаго разумѣ́нія.

Вмѣни́лъ еси́, блаже́нне, ве́сь мíръ, я́коже уме́ты, Христа́ же и бли́жняго пра́во возлюби́лъ еси́, и примири́лъ еси́ лю́ди удале́нныя всѣ́мъ Приближа́ющемуся вѣ́рою.

Богоро́диченъ: Ме́ртва мя́ бы́вша отъ многообра́зныхъ озлобле́ній, я́ко Жи́знь ро́ждшая, оживи́ мя, Влады́чице, и вы́шней жи́зни предста́ви мя́, да просла́влю Тя́ я́ко Жизнода́вицу всегда́.

[Катава́сія: Христо́съ ражда́ется...]

Пѣ́снь 3.

Ирмо́съ: Тебе́, на вода́хъ повѣ́сившаго всю́ зе́млю неодержи́мо, тва́рь, ви́дѣвши въ верте́пѣ ражда́ющася, ужа́сно содрога́шеся, нѣ́сть свя́тъ, па́че Тебе́, Го́споди, зову́щи.

Въ ра́бій облещи́ся о́бразъ восхотѣ́лъ еси́, я́ко да рабо́ты мя́ лука́ваго изба́виши, пѣсносло́влю Твое́ благоутро́біе, Сло́ве, Отцу́ Собезнача́льне и Соприсносу́щне. Сла́ва смотре́нію Твоему́.

Гряде́тъ Дѣ́ва Го́спода роди́ти въ верте́пѣ, предвари́те, волсви́; па́стыріе, ны́нѣ пріиди́те; пѣ́снь съ высоты́, а́нгели, возопíйте: яви́ся человѣ́комъ избавле́ніе.

Ища́й мя́, заблу́ждшаго, Человѣколю́бче, и верте́пъ я́вльшася разбо́йническій дѣ́лы непло́дными, въ верте́пъ ны́нѣ прише́лъ еси́ отъ Дѣ́вы дне́сь роди́тися, Влады́ко: сла́ва, Сло́ве, прише́ствію Твоему́.

Инъ.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Ле́гкое и́го Госпо́дне поне́съ, преподо́бне, гоне́нія и темни́цы, ско́рби же и ра́ны на возвраще́ніе вѣ́ры до́блественно претерпѣ́лъ еси́.

Предѣ́лы естества́ преступи́въ и къ боговидѣ́нію приступи́въ, просвѣти́лся еси́ мы́слію и прія́лъ еси́ Ду́ха незави́стныя благода́ти.

Люде́й бо́лгарскихъ просвѣти́лъ еси́, во тмѣ́ предлежа́щихъ нече́стія, о́тче, и хра́мъ содѣ́лалъ еси́ Ду́ха боже́ственными твои́ми уче́ньми.

Богоро́диченъ: Го́ру Тя́ проповѣ́даша проро́цы, Дѣ́во, ста́мну и трапе́зу, кади́льницу злату́ю и киво́тъ освяще́нія. Мы́ же я́ко боговмѣсти́вшую ски́нію восхваля́емъ Тя́.

Инъ.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Бо́лгарскую избра́лъ еси́ по́здѣ страну́ послѣ́днихъ угло́въ, преподо́бне, и подвиза́лся еси́ съ учи́тельми твои́ми, и апо́стольскихъ нра́вовъ потща́лся еси́ бы́ти соприча́стникъ.

Боже́ственный Нау́мъ споспѣ́шникъ бы́въ іера́рха Кли́мента, къ бо́лгаромъ приспѣ́ и сія́ просвѣти́ свѣ́томъ проповѣ́данія, его́же ра́ди и ны́нѣ спрославля́ется.

Сы́ны Авраа́му отъ ка́меній, я́коже глаго́летъ Предте́ча, бо́лгарскій же ро́дъ тобо́ю воздви́же Госпо́дь, Нау́ме, и́же и пребыва́я ны́нѣ, прославля́етъ тя́ разу́мно.

Лю́діе бо́лгарстіи сѣдя́ще во тмѣ́ лю́таго невѣ́рія, тобо́ю ви́дѣша свѣ́тъ ра́зума, тѣ́мже почита́ютъ па́мять твою́ ра́достными пѣ́сньми.

Богоро́диченъ: Тишины́ мя́ испо́лни, Богоро́дице, ве́дрость ду́шъ су́щая, и утоли́ волне́ніе всу́е борю́щихъ мя́, и въ глубину́ толку́щихъ мя́ и въ а́дову про́пасть, Влады́чице.

Конда́къ предпра́зднства, гла́съ 3. Подо́бенъ: Дѣ́ва дне́сь.

Дѣ́ва дне́сь* Превѣ́чное Сло́во въ верте́пѣ гряде́тъ* роди́ти неизрече́нно;* лику́й, вселе́нная, услы́шавши,* просла́ви со а́нгелы и па́стырьми* хотя́щаго яви́тися Отроча́ Мла́до,* Превѣ́чнаго Бо́га.

Икосъ:

О, ужа́снаго вои́стинну и па́че сло́ва чудесе́! Еже бы́ти дая́й всѣ́мъ ра́ди бла́гости во чре́во святы́я Дѣ́вы вни́де, и въ верте́пѣ роди́тися гряде́тъ, и въ я́слѣхъ положи́тися. Звѣзда́ же Сего́ проповѣ́дуетъ свы́ше волхво́мъ, иду́щимъ на поклоне́ніе Его́ съ да́ры, издале́ча привлача́щи, со тща́ніемъ послѣ́дующія Валаа́мову прорече́нію, ре́кшаго: звѣзда́ хо́щетъ провозвѣсти́ти Отроча́ Мла́до, Превѣ́чнаго Бо́га.

Сѣда́ленъ, гла́съ 4. Подо́бенъ: Удиви́ся Іо́сифъ.

Апо́столовъ подража́тель,* архіере́евъ пра́вило,* преподо́бныхъ добро́та,* сострада́лецъ страда́льцевъ,* безъ кро́ве, я́ко му́ченикъ, вѣнча́лся еси́,* Нау́ме преподо́бне,* лю́тыми бо скорбьми́ обраща́лся еси́,* нося́ Христа́ Боже́ственное и́мя* и дерзнове́нно всегда́ проповѣ́дуя Тро́ицы та́инство,* Ейже и моли́тися не преста́й о восхваля́ющихъ тя́. [Два́жды.]

Сла́ва, и ны́нѣ, предпра́зднства, гла́съ 1. Подо́бенъ: Гро́бъ Тво́й, Спа́се.

Ра́дуйся, Сіо́не,* Виѳлее́ме, украси́ся,* всѣ́хъ Содержи́тель, звѣзду́ предпосла́въ,* возвѣсти́ Свое́ безмѣ́рное схожде́ніе:* Его́же бо трепе́щутъ небе́сныя си́лы,* Се́й ражда́ется отъ Дѣ́вы непревра́щно,* еди́ный Бо́гъ на́шъ.

Пѣ́снь 4.

Ирмо́съ: Отъ Дѣ́вы прише́ствіе Твое́ прови́дя Авваку́мъ, ужа́сся, вопія́ше: Ты́ отъ ю́га, воплоща́яся, прише́лъ еси́, Изба́вителю, Ада́ма отринове́ннаго воззва́ти.

Свѣтоза́рный о́блакъ гряде́тъ возсія́ти Христа́ изъ Ма́тернихъ ложе́снъ, пра́вды Со́лнце, всю́ зе́млю луча́ми Боже́ственными просвѣща́ющаго.

Бо́гъ человѣ́комъ яви́ся подо́бенъ, и обнищава́етъ пло́тію, да на́съ обогати́тъ, и въ верте́пѣ ражда́ется: Сего́, вѣ́рніи, чи́стымъ се́рдцемъ поды́мемъ.

Се́ Христо́съ во гра́дѣ ражда́ется Виѳлее́мѣ, я́ко да Еде́мъ на́мъ отве́рзетъ, преслуша́ніемъ пе́рвѣе змíя окраде́нія заключе́нный, боже́ственно торжеству́имъ.

Инъ.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ — позна́ешися, внегда́ пріити́ вре́мени — пока́жешися. Сла́ва си́лѣ Твое́й, Го́споди.

Се́ твоему́ проповѣ́данію вня́ша язы́цы каменосерде́чніи и позна́ша Бо́га, я́коже испо́лнитися всему́ ра́зума Бо́жія, я́коже пи́шетъ Иса́ія. Тѣ́мже твою́ па́мять сла́вимъ.

Му́дрости Прему́драго по́лнъ яви́вся, бо́лгарскихъ гру́быхъ люде́й научи́лъ еси́ почита́ти Тро́ицу Ли́цы, Еди́наго же Бо́га естество́мъ, неизмѣ́нно и несли́тно объедине́ннаго, — сла́ва Тому́ — взыва́ющихъ.

Мо́ре безбо́жія возмути́лъ еси́ по проро́ку, я́коже ко́нь богоизбра́нный, му́дре Нау́ме, и человѣ́ковъ во глубинѣ́ невѣ́рія пла́вающихъ, я́коже ры́бы, извле́клъ еси́, — сла́ва Го́споду, — вопію́щихъ.

Богоро́диченъ: Вои́стину освяще́нъ показа́лася еси́ Бо́гу хра́мъ и пала́та, Дѣ́во Марíе. Того́ у́бо уми́лостиви ка́ла грѣхо́внаго на́съ очи́стити, я́ко да до́мъ пока́жемся и жили́ще Ду́ха.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Яко сто́лпъ вѣ́ры недви́жимый показа́лся еси́, искуше́ньми ника́коже смуща́емь ду́хомъ и въ многообра́зныхъ озлобле́ніихъ враща́лся еси́, враго́мъ Ду́ха противустоя́.

Вѣтíйствуя вели́чія Бо́жія предъ лице́мъ язы́къ и царе́й, ри́торовъ лю́тое загради́лъ еси́ блядосло́віе [или́: буесло́віе] простото́ю сло́ва, благоче́стіе же и Христо́ву сла́ву уясни́лъ еси́.

Яко апо́столъ печа́ль вся́кую претерпѣ́лъ еси́ за благоче́стіе. Тѣ́мже вся́кую печа́ль отжени́ отъ на́съ, твою́ па́мять соверша́ющихъ.

Богоро́диченъ: Вжили́ ума́ моего́ движе́нія, Богома́ти, и души́ моея́ чу́вства просвѣти́, Чи́стая, и си́льна на враги́ мя́ содѣ́лай, да зову́ Ти́: сла́ва, Дѣ́во, Рождеству́ Твоему́.

Пѣ́снь 5.

Ирмо́съ: Къ Тебѣ́ у́тренюю, благоутро́бія ра́ди Себе́ истощи́вшему непрело́жно и зра́къ раба́ отъ Дѣ́вы носи́вшему, Сло́ве Бо́жій. Ми́ръ пода́ждь ми́, па́дшему, Человѣ́колюбче.

Се́рдце вся́кое земноро́дныхъ да игра́етъ, да весели́тся тва́рь: Госпо́дь ражда́ется изъ Отрокови́цы Чи́стыя въ верте́пѣ Виѳлее́мстѣмъ, и волсви́ Тому́ прино́сятъ да́ры досто́йныя.

Лю́діе, дре́вле въ сѣ́ни сме́ртнѣй сѣдя́щіи, у́зрите Свѣ́тъ, ва́мъ возсія́вшій отъ Дѣ́вы, и мно́гаго душесла́достія испо́лнитеся, обнища́вшаго Сло́ва велича́юще при́сно.

Въ ма́лѣмъ верте́пѣ гряде́ши вмѣсти́тися, Невмѣ́стный естество́мъ, я́ко да мя́, ума́лившагося преступле́ніемъ, возвели́чиши за ми́лость безмѣ́рную. Покланя́юся Твоему́ благоутро́бію, Долготерпѣли́ве.

Инъ.

Ирмо́съ: Свѣ́тлый на́мъ возсія́й Свѣ́тъ Присносу́щный, у́тренюющимъ о судьба́хъ за́повѣдей Твои́хъ, Влады́ко Человѣколю́бче, Христе́, Бо́же на́шъ.

Но́вый апо́столъ бы́лъ еси́, о́тче, седми́десяти уподо́бленный, послѣ́дуя Меѳо́дію, я́коже Па́влу, про́повѣди возвѣща́ющему та́инство.

Пріобрѣ́теніе благода́ти вои́стину яви́лся еси́ по избра́нію, му́дре, я́коже дре́вле проро́къ богодухнове́нный, пе́рвый Нау́мъ, его́же и и́мя до́брѣ наслѣ́довалъ еси́.

Возлюби́лъ еси́ Христа́ па́че си́лы отъ се́рдца твоего́, отъ мы́сли же и души́ твоея́, преподо́бне. Тѣ́мже па́че ны́нѣ Ему́ возлюби́лся еси́ и сла́вы сподо́бился еси́.

Богоро́диченъ: Преложе́ньми наси́льными обурева́юся и обстоя́ньми и да́льними безпредѣ́льствіи, Влады́чице. Ко приста́нищу Твоему́ приведи́ мя́, я́же безнаде́жныхъ наде́жда.

Инъ.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Слы́шатель при́сный бы́лъ еси́ прему́дрыхъ уче́ній боже́ственнаго Меѳо́дія, Пано́нію поро́ждшаго боже́ственныхъ преда́ньми, его́же нра́ва поревнова́лъ еси́.

Кра́снѣ но́зѣ твои́ бы́ша, я́снымъ проповѣ́даніемъ Боже́ственнаго Ева́нгелія обте́кша страну́ многокру́жную и претыка́ющихся ка́меніемъ въ нощи́ невѣ́рія къ свѣ́ту Боже́ственному возводя́ща.

Обнови́вше зе́млю Бо́лгарскую, преподо́бне, объя́сте ю́ ты́ у́бо и Кли́ментъ же боже́ственный, догма́ты въ не́й всѣ́явше, и ны́нѣ пріе́млете пло́дъ боже́ственное разумѣ́ніе и лѣ́тнія пѣ́сни.

Богоро́диченъ: Увѣнча́й на́съ, Влады́чице, я́коже ору́жіемъ благоволе́нія, щедро́тами Твои́ми, помощми́ и заступле́ньми укрѣпля́ющи, о́крестъ бо жи́зни на́шея неща́днѣ ополчи́ся злы́хъ собо́рище.

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́ и, волне́нія не ктому́ терпя́, я́ко Іо́на Влады́цѣ, вопію́ Ти: отъ тли́ мя́ возведи́.

Зако́новъ Тя́ Дѣ́ва плотски́хъ кромѣ́, Го́споди, прихо́дитъ роди́ти въ верте́пѣ и во я́слѣхъ пло́тію восклони́ти, я́ко Младе́нца.

Стра́нна мя́ бы́вша отъ Бо́га преступле́ньми, Пребоже́ственный, рожде́йся отъ Отрокови́цы Неискусобра́чныя ми́лости ра́ди, граждани́на небе́снаго явля́етъ.

Го́ры же, и хо́лмы, и удо́лія, возвесели́теся: Госпо́дь бо пло́тію ражда́ется, обновля́яй тва́рь, истлѣ́вшую лука́выми преступле́ньми.

Инъ.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.

Учени́къ четвери́цу испо́лнилъ еси́ проповѣ́дникъ Христо́выхъ и му́дрыхъ тайново́дцевъ бо́лгарскаго ро́да, Кири́лла же и Меѳо́дія.

Прогна́ни бы́сте дале́че, таи́нницы и тайново́дцы, претерпѣ́сте темни́цы и ра́нени бы́сте, произше́ствія ра́ди Ду́ха Свята́го бѣ́дствующе.

Спѣши́ши пути́ да́льныя съ Кири́лломъ и Меѳо́діемъ отъ сѣ́вера да́же до Ри́ма, трудо́мъ и́хъ обща́яся, болга́ръ же по́слѣжде просвѣти́лъ еси́.

Богоро́диченъ: Отъ лю́таго заблужде́нія свободи́ на́съ, и страсте́й и искуше́ній и вся́ческихъ бѣ́дъ, Всенепоро́чная, и отъ вся́каго вре́да ско́ро исхи́ти.

Инъ.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Сло́во богодухнове́нное на тебѣ́ испо́лнися, во всю́ бо зе́млю Бо́лгарскую изы́де вѣща́ніе твое́ и да́же до конце́въ твои́ глаго́лы.

Отъ коне́цъ сѣ́вера до коне́цъ за́пада въ мо́ри хожде́ніе поло́жше, блаже́нніи, въ Ри́мъ внидо́сте Но́вый Завѣ́тъ возвѣсти́ти.

Хра́мъ боже́ственный и Бо́жіе честно́е жили́ще отъ ю́ности сы́й богоно́се Нау́ме, и мене́ твои́ми моли́твами прія́телище сотвори́ Ду́ха.

Богоро́диченъ: Что́ бу́ду, отвсю́ду всегда́ ра́туемь? Ты́ ми́ коне́цъ прибѣ́жища бу́ди, Богоневѣ́стная, оби́димыхъ По́моще Необори́мая.

Конда́къ, гла́съ 3. Подо́бенъ: Дѣ́ва дне́сь.

Свѣ́тлыхъ по́двигъ твои́хъ* всечестна́я па́мять,* я́коже ве́ліе со́лнце* всѣ́мъ возсія́ющи, ли́ца тя́ воспѣва́ющихъ просвѣща́етъ,* бѣ́сы же и вся́къ неду́гъ отгоня́етъ,* сего́ ра́ди соше́дшеся,* любо́вію сію́ вѣ́рно восхваля́емъ.

Икосъ:

Оте́цъ на́шъ Нау́мъ, велича́йшій предста́тель и свѣти́льникъ я́сный яви́ся дне́сь. Пріиди́те, стеце́мся, болга́ръ мно́жество, тому́ возра́дуимся: се́й бо всѣ́хъ на́съ просвѣти́ и тму́ пре́лести разгна́, се́й по стопа́мъ Христу́ послѣ́дова и же́ртву себѣ́ благопрія́тну предаде́, се́й и досточу́дную свою́ па́мять же и пра́здникъ учрежде́ніе духо́вное всѣ́мъ вѣ́рнымъ ны́нѣ предлага́етъ, ю́же любо́вію вси́ вѣ́рно восхваля́емъ.

Пѣ́снь 7.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Ка́ко Тя́ малѣ́йшій, Сло́ве, поды́метъ верте́пъ, нището́ю мно́гою нищету́ Ада́мову отъе́мшаго и бога́тствомъ Боже́ственныя благода́ти человѣ́ки обогати́вшаго?

Глаго́лы стра́нныя па́стыріе слы́шавше, потща́шася Виѳлее́мъ ви́дѣти и въ я́слѣхъ безслове́сныхъ разрѣша́ющаго безслове́сія вся́ человѣ́ки Возлежа́щаго.

Усты́ же и се́рдцемъ пло́тію приходя́щаго роди́тися Христа́ въ верте́пѣ отъ Дѣ́вы Отрокови́цы, пѣсносло́вити потщи́мся и вѣ́рно поклони́мся.

Инъ.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́ я́ко еди́нѣми усты́ поя́ху и благословля́ху, глаго́люще: благослове́нъ Бо́гъ оте́цъ на́шихъ.

Дѣ́йствуяй чудесы́ Бо́гъ спасе́ тя́ чуде́снѣ отъ ва́рварскія темни́цы со стаи́нники, внеза́пу разрѣ́шшимся у́замъ ру́къ и но́гъ.

Внуше́ньми боже́ственныхъ уче́ній бы́лъ еси́ учи́тель люде́й, ко злу́ подви́жныхъ, измѣне́ньми же боже́ственными си́хъ обдѣ́лалъ еси́ вмѣ́сто звѣре́й въ богонауче́нная овча́та кро́ткаго Христа́.

Колесни́ца Госпо́дня яви́лся еси́, Нау́ме преподо́бне, и́мя Христо́во нося́ по Писа́нію предъ лице́мъ мно́гихъ язы́къ и царе́й, прославля́я же дѣя́ньми и отъ Него́ сла́вно прославля́емь.

Богоро́диченъ: Моле́бныя пріими́ моли́твы ра́бъ Твои́хъ, Всесвята́я Непоро́чная Чи́стая, и злы́хъ обстоя́ній находя́щихъ изба́ви на́съ моли́твами Твои́ми и соприча́стники Твоея́ боже́ственныя сла́вы содѣ́лай.

Инъ.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

По́ту по́стническому смѣси́лъ еси́ по́тъ вои́стину апо́стольскій, о́тче, произволе́ніемъ же и му́ченикъ по́слѣжде яви́лся еси́ безкро́вный, взыва́я: Бо́же оте́цъ на́шихъ, благослове́нъ еси́.

Мертвотво́рная помышле́ній санда́лія, я́коже Моисе́й, съ но́гъ я́вѣ отложи́лъ еси́ и Бо́га чи́стѣ смотрѣ́лъ еси́, лю́ди же пѣ́ти увѣща́лъ еси́: Бо́же оте́цъ на́шихъ, благослове́нъ еси́.

Иже хотѣ́нія творя́й боя́щихся Его́, проше́нія твоя́ о на́съ ника́коже отри́нетъ, о́тче. Тѣ́мже помина́й всегда́ се́рдцемъ и душе́ю пѣсносло́вящихъ: Бо́же оте́цъ на́шихъ, благослове́нъ еси́.

Богоро́диченъ: Отъ плотски́хъ страсте́й, отъ душе́вныхъ сокруше́ній, отъ бѣ́дъ лю́тыхъ, отъ злодѣ́йства враго́въ борю́щихъ мя́, раба́ Твоего́, исхити́ и держа́вою Твое́ю, Дѣ́во, огради́ мя́.

Пѣ́снь 8.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное, и совоку́плени, и́мже, не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Па́че сло́ва Еди́наго Го́спода воплоще́ннаго, Отрокови́це, и обложе́ннаго человѣ́ческимъ подо́біемъ, держа́щи рука́ми, и покланя́ющися, и лобыза́ющи ма́терски, — Ча́до, — глаго́лала еси́, — Сладча́йшее, ка́ко Тя́ си́це держу́, держа́щаго руко́ю всю́ тва́рь и отъ руки́ рабо́ты сію́ свобожда́ющаго?

Пѣсносло́вити, боже́ственніи а́нгели, на земли́ Ро́ждшагося угото́витеся; волсви́, да́ры, путеводи́ми звѣздо́ю, принеси́те; па́стыріе, Сего́ потщи́теся ви́дѣти на Ма́тернихъ, я́коже Младе́нца, сѣдя́ща объя́тіихъ, вопію́ще: Го́спода по́йте, дѣла́, и превозноси́те во вся́ вѣ́ки.

Свѣ́та о́блаче, Неискусобра́чная, ка́ко пелена́ми повива́еши о́блаки одѣва́ющаго небеса́ неизглаго́ланнымъ ма́ніемъ? Ка́ко въ безслове́сныхъ я́слѣхъ воскланя́еши безслове́сія человѣ́ки за безмѣ́рную ми́лость избавля́ющаго Влады́ку? Ему́же вся́ покланя́ется стра́хомъ тва́рь, пѣсносло́вящи во вся́ вѣ́ки.

Инъ.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Нау́ма, богодухнове́нный орга́нъ Ду́ха, воспои́мъ въ словесѣ́хъ свяще́нныхъ, вѣ́рніи, вопію́ще ко Го́споду: его́ моли́твами спаси́ восхваля́ющихъ держа́ву Твою́.

Обте́клъ еси́ вся́ страны́ Бо́лгарскія съ Кли́ментомъ, твои́мъ совоспита́нникомъ, всему́дре, Охридъ и окре́стная вся́, лю́ди путеводя́ ко стези́ пра́вѣй твои́ми уче́ньми.

Кре́стъ тво́й на ра́мо взе́мъ, Нау́ме му́дре, Христу́ послѣ́довалъ еси́, еди́ному Царю́, отъ Него́же и побѣ́ды вѣне́цъ прія́лъ еси́, я́ко подвиза́выйся зако́нно, богоблаже́нне.

Богоро́диченъ: Отроцы прописа́ша, ника́коже опаля́еми, утро́бу Твою́, Всечи́стая, николи́же огне́мъ Божества́ опале́нную, Са́мымъ же Бо́гомъ вои́стину сохране́нную, Дѣ́во, во вѣ́ки.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Сло́во, Еже всѣ́хъ человѣ́къ восхотѣ́ безслове́сія изба́вити, о́гненный язы́къ тебѣ́ дарова́, и́мже безслове́сный ро́дъ Бо́лгарскій въ ра́зумъ благослове́сный приве́лъ еси́, всѣ́хъ пѣ́ти научи́въ Христа́ во вѣ́ки.

Низложи́лъ еси́ мучи́телей неи́стовство стоя́ніемъ твои́мъ и сотру́дникъ твои́хъ, Нау́ме всепѣ́тый, я́звы же и ра́ны и темни́цы претерпѣ́лъ еси́, боря́ся за происхожде́ніе Ду́ха отъ Сама́го Боже́ственнаго Исто́чника безвино́внаго.

Отону́дуже отбѣже́ болѣ́знь, уны́ніе, печа́ль и воздыха́ніе и вся́кое озлобле́ніе, идѣ́же неизрече́нная ра́дость и наслажде́ніе перворо́дныхъ, та́мо ны́нѣ жили́ще, Нау́ме, въ не́мже всели́ тя́ Христо́съ досто́йно, пріе́мъ труды́ твоя́, я́же за Него́.

Наси́льными окружа́еми ну́ждами отъ вра́гъ ви́димыхъ же и неви́димыхъ, печа́льми ветша́юще, неду́ги, обстоя́ніи, отведе́ньми непра́ведными же и презрѣ́ньми го́рькими, вопіе́мъ въ печа́ли се́рдца: спаси́ ны́, Спа́се, моли́твами Твоего́ преподо́бнаго.

Богоро́диченъ: Поги́бе бѣ́гство отъ мене́ въ коне́цъ и нѣ́сть по Писа́нію взыска́ющихъ мя́. Ты́ бу́ди ми́, Влады́чице, покро́въ и крѣ́пость, прибѣ́жище и утвержде́ніе, весе́ліе и извѣ́стнаго спасе́нія моего́ наде́жда, да Тя́ сла́влю во вся́ вѣ́ки.

Пѣ́снь 9.

Ирмо́съ: Не диви́ся ны́нѣ, о Ма́ти, ви́дящи я́ко Младе́нца, Его́же изъ чре́ва пре́жде денни́цы роди́ Оте́цъ: возста́вити бо и сопросла́вити человѣ́ческое па́дшее естество́ пріидо́хъ я́вственно, вѣ́рою и любо́вію Тя́ велича́ющее.

Ра́дуйся, прія́телище, Пречи́стая, ра́дости неизглаго́ланныя: се́ бо гряде́ши роди́ти въ верте́пѣ неизрече́нно Влады́ку, хотя́щаго тва́рь всю́, истлѣ́вшую преступле́ніемъ пе́рвѣе, обнови́ти вои́стинну, Сего́ пѣсносло́вяще вѣ́рою, Тя́ велича́емъ.

Ду́ши пра́ведныхъ вси́, и подземна́я ку́пно ра́дуйтеся: се́ бо избавле́ніе всѣ́хъ яви́ся, во гра́дѣ Виѳлее́мѣ ражда́ющееся; звѣзда́ же Сего́ возвѣща́етъ волхво́мъ, и́щущимъ благоче́стно, Его́же и ви́дѣвше въ верте́пѣ, у́жаса испо́лнишася.

Яко не́бо Тя́ ино́е воспѣва́емъ, Дѣ́во, пра́вды Со́лнце на́мъ изъ ложе́снъ пречи́стыхъ хотя́щую возсія́ти у́треннее, просвѣща́ющее во тмѣ́ су́щія сме́рти и тли́. Тѣ́мже до́лжно хвала́ми Тя́ велича́емъ.

Инъ.

Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую.

Достодо́лжно чти́тъ Болга́рія твою́ па́мять, ты́ бо тоя́ еси́ свѣтово́ждь съ боже́ственнымъ Гора́здомъ, Кли́ментомъ чудотво́рцемъ, Ангела́ріемъ же, всему́дрыми священнотаи́нники, ю́же моли́твами ва́шими соблюда́йте при́сно.

Ри́мъ ви́дѣ тече́ніе ва́ше равноапо́стольное, боже́ственне Меѳо́діе и Кири́лле богоблаже́нне, и Бо́жіихъ я́же на ва́съ устраши́ся пресла́вныхъ. Тѣ́мже и Нау́ма, ва́шего сказа́теля, восхваля́емъ лѣ́тными пѣ́сньми.

Ликостоя́нія отце́въ и апо́столовъ, іера́рховъ, проро́ковъ, преподо́бныхъ и му́чениковъ богоно́сныхъ воспрія́ша тя́ ны́нѣ со сподви́жники твои́ми, житіе́ бо подража́лъ еси́ всѣ́хъ, съ ни́миже на́съ помяни́.

Свяще́ннѣйшій зна́юще тя́ киво́тъ, завѣ́та Бо́жія словеса́ нося́й, спаса́ющая бо́лгаръ мно́жества въ зе́млю обѣтова́нія вѣ́чнующую, почита́емъ моще́й твои́хъ ра́ку, къ боже́ственнѣй возводи́ми жи́зни.

Богоро́диченъ: Отъ беззако́ннующихъ человѣ́къ и кова́рства бѣсо́въ, отъ страсте́й вся́ческихъ, туги́ тягча́йшія, отъ разли́чныхъ искуше́ній и лю́таго одержа́нія, Всепѣ́тая, свободи́ всѣ́хъ упова́ющихъ на Тя́.

Инъ.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Ста́немъ, бра́тіе, въ хра́мѣ Госпо́дни, во дво́рѣхъ до́му Бо́га на́шего и Того́ просла́вимъ вели́чія и чудеса́, ди́венъ бо е́сть во святы́хъ Свои́хъ, повину́ющихся Того́ повелѣ́ніемъ, и́мже сра́дуется Нау́мъ чу́дный.

Да тя́, Нау́ме, согла́сно сла́вимъ торжеству́юще, изба́ви на́съ моли́твами твои́ми вся́каго кова́рства, и обстоя́нія, и бѣ́дъ, и скорбе́й, и вся́каго ина́го гнѣ́ва, моля́ Показа́вшаго тя́ за́повѣдей Свои́хъ исполни́теля.

Лю́діе, я́же твои́ми труды́ насади́лъ еси́ и по́ты твои́ми напои́лъ еси́ и по́двиги твои́ми вкорени́лъ еси́, плодонося́тъ лѣ́тнюю твою́ па́мять и нача́тки пѣ́нія ти́ прино́сятъ, и́мже Бо́га уми́лостиви.

Осла́би ми́, Христе́, Еди́не вѣ́дый не́мощи моя́, я́ко да отра́ду отъ ни́хъ улучу́ пре́жде исхо́да моего́, Влады́ко, моли́твами Твоего́ уго́дника, и не да́ждь ми́ бы́ти ра́дованіе бѣсо́мъ ниже́ ны́нѣ, ниже́ въ бу́дущемъ.

Богоро́диченъ: Тя́ и́стинную Ма́терь Созда́вшаго вся́ вѣ́рою мо́лимъ: совѣ́ты и мы́сли вражду́ющихъ на на́съ осуети́ я́ко Блага́я и отъ руки́ вра́жія рабы́ Твоя́ вся́ свободи́, па́стыри и па́ству, Всепѣ́тая.

Свѣти́ленъ, гла́съ 3. Подо́бенъ: Посѣти́лъ ны́ е́сть.

Посѣти́ ны́ Христо́съ,* лю́ди преогорчева́ющія,* и отъ руки́ лука́ваго* и тмы́ невѣ́рія тобо́ю спасе́,* и земля́ вся́ Бо́лгарская, Нау́ме,* испо́лнися Боже́ственнаго ра́зума.

Сла́ва, гла́съ и подо́бенъ то́йже:

Чуде́съ пото́къ,* исцѣле́ній исто́чникъ,* мона́шествующихъ похвала́,* іере́[евъ] добро́та, —* Нау́мъ боже́ственный* да почти́тся пѣ́сньми досто́йно.

И ны́нѣ, предпра́зднства, гла́съ и подо́бенъ то́йже:

Да ра́дуется не́бо,* и земля́ да весели́тся.* Верте́пе, просвѣти́ся,* я́сли же, подыми́те Созда́вшаго человѣ́ка руко́ю* я́ко Младе́нца, ражда́ющася отъ Дѣ́вы.* Ангеловъ мно́жество, возопíйте я́сно:* сла́ва Бо́гу въ вы́шнихъ.

На хвали́техъ поста́вимъ стихо́въ 6 и пое́мъ стихи́ры предпра́зднства пре́жде, гла́съ 6. Подо́бенъ: Ангельская предыди́те си́лы.

Предопредѣле́нное Отце́мъ пре́жде вѣ́къ* и предпроповѣ́данное проро́ки въ послѣ́дняя,* та́инство яви́ся,* и Бо́гъ вочеловѣ́чися,* пло́ть пріе́мъ отъ Дѣ́вы,* зи́ждется несозда́нный во́лею,* Сы́й быва́етъ Ца́рь Изра́илевъ,* Христо́съ прихо́дитъ.

Пою́ Тя́, Царю́, пелена́ми пови́таго,* рѣши́ши бо плени́цы мои́хъ грѣхопаде́ній* и сла́вою безсме́ртною* и нетлѣ́нною почти́въ мя́,* всего́ Отцу́ присво́илъ еси́,* содѣ́тельствуя и воззида́я.* Тѣ́мъ вопію́ Ти:* Ца́рь Изра́илевъ,* Христо́съ прихо́дитъ.

Свѣ́тъ, отъ Свѣ́та произше́дшій* и отъ Дѣ́вы возсія́вшій* су́щимъ на земли́* звѣздо́ю, ви́дѣвше, звѣздосло́вцы волсви́* Перси́дскую отлага́ху тму́* и звѣ́здную всю́ пре́лесть* и въ ра́дости ро́ждшемуся Бо́гу поя́ху:* благослове́нъ прише́дый Бо́гъ на́шъ,* сла́ва Тебѣ́.

[Зла́къ младе́нческій неи́стовнѣ пожина́етъ,* отъ му́дрыхъ наруга́нъ бы́въ Иродъ волхво́въ,* и руку́ скверноубíйственну* на Тя́ воздвиза́ти мня́ше,* но прише́лъ еси́,* еги́птяномъ тму́ глубоча́йшую отгоня́,* съ ни́миже пое́мъ:* благослове́нъ прише́дый Бо́гъ на́шъ,* сла́ва Тебѣ́.]

Стихи́ры преподо́бнаго, гла́съ 1. Подо́бенъ: Всехва́льніи му́ченицы.

Пріиди́те, празднолю́бцы вси́,* и́же слове́съ благода́ти* до́брѣ наслади́вшіися* и основа́ніе пріе́мшіи Ева́нгелія,* въ пѣ́снехъ и пѣ́ніихъ свяще́нныхъ Нау́ма,* честно́е прія́телище Ду́ха* похваля́юще увѣнча́имъ,* прегрѣше́ній разрѣше́нія прося́ще. [Два́жды.]

Сти́хъ: Честна́ предъ Го́сподемъ* сме́рть преподо́бныхъ Его́.

Сме́рть твоя́ вои́стину* честна́ предъ Го́сподемъ,* Нау́ме сла́вне,* жи́знь бо благоче́стія испо́лнь* и чистоты́ и вся́каго преподо́бія изоби́лующи,* отъ ни́хже приложи́ся ти́ обоже́ніе по прича́стію.* Тѣ́мже моли́ся* дарова́ти душа́мъ на́шимъ* ми́ръ и ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Отъ скорбе́й да́ждь на́мъ свобожде́ніе,* Нау́ме свя́те,* и искуше́ній всѣ́хъ изба́ви,* су́етна бо по́мощь человѣ́ческая,* ты́ же вы́ше человѣ́ка* и а́нгеловъ собесѣ́дникъ сы́й,* хода́тайствуеши о на́съ, о́крестъ сла́вящихъ тя́,* почита́ющихъ честны́я твоя́ мо́щи.

Сла́ва, гла́съ 8:

Преподо́бне о́тче Нау́ме, не да́лъ еси́ сна́ очи́ма твои́ма, ниже́ вѣ́ждома твои́ма дрема́нія, до́ндеже посѣ́ялъ еси́ въ бо́лгарѣхъ догма́ты благоче́стія. Тѣ́мже Христу́ дерзнове́нно ны́нѣ предстоя́, пло́дъ боже́ственныхъ твои́хъ трудо́въ утверди́, и соверша́ющихъ па́мять твою́ назира́й и спаса́й моли́твами твои́ми отъ бѣ́дъ ду́ши на́ша.

И ны́нѣ, предпра́зднства, гла́съ то́йже:

Въ Виѳлее́мѣ ражда́ется всѣ́хъ Творе́цъ, и Еде́мъ отверза́етъ Превѣ́чный Ца́рь, пла́менное ору́жіе плещи́ дае́тъ, средостѣ́ніе граде́жа разори́ся; небе́сныя си́лы съ земны́ми совокупля́ются, а́нгели съ человѣ́ки держа́вное торжество́ составля́ютъ, чи́стіи Чи́стому пѣ́ніе приноша́ютъ. Ви́димъ Дѣ́ву, я́ко престо́лъ сла́вы херуви́мскій, вмѣсти́вшую ника́коже вмѣсти́маго Бо́га и нося́щую, Его́же серафи́ми со стра́хомъ прославля́ютъ, я́ко да пода́стъ мíру ве́лію ми́лость.

Славословіе великое, [ектеніи] и отпустъ.



НА ЛИТУРГІИ,

Изобрази́тельная и отъ кано́новъ свята́го пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́емъ, зача́ло 335: Бра́тіе, повину́йтеся наста́вникомъ ва́шимъ... Ему́же сла́ва во вѣ́ки вѣко́въ, ами́нь. Аллилуія, гласъ 8: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́, ро́дъ пра́выхъ благослови́тся. Ева́нгеліе отъ Луки́, зача́ло 24: Во вре́мя о́но, ста́ Іису́съ на мѣ́стѣ ра́внѣ... Се́ бо мзда́ ва́ша мно́га на небеси́. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Коне́цъ и Бо́гу сла́ва.

Источникъ: Служби на българските светии. — Света Гора, Атон: Славянобългарски манастир «Св. Вмчк Георги Зограф», 2007. — С. 608-634.

/ Къ оглавленію раздѣла /


Наверхъ / Къ титульной страницѣ

0