Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Кано́нъ моле́бный преподо́бному равноапо́стольному Нау́му Охридскому, чудотво́рцу [1].

Тропа́рь, гла́съ 4: [2]

Сла́ва, и ны́нѣ:

Не умолчи́мъ никогда́, Богоро́дице, си́лы Твоя́ глаго́лати, недосто́йніи. Аще бо Ты́ не бы́ предстоя́ла, моля́щи, кто́ бы на́съ изба́вилъ отъ толи́кихъ бѣ́дъ? Кто́ же бы сохрани́лъ до ны́нѣ свобо́дны? Не отсту́пимъ, Влады́чице, отъ Тебе́, Твоя́ бо рабы́ спаса́еши при́сно отъ вся́кихъ лю́тыхъ.

Кано́нъ, гла́съ 1.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяномъ пу́ть глубины́ новосодѣ́лавшая.

Воспѣ́ти твою́ честну́ю па́мять усе́рдствующу мнѣ́ благомо́щную сло́ва благода́ть съ небесе́ испроси́ и усе́рдіе въ дѣ́ло, блаже́нне, произведи́.

Мѵ́ра за благоутро́біе щедро́тъ на зе́млю истощи́вшемуся, Нау́ме приснопа́мятне, Христу́ Бо́гу на́шему, обоня́лъ еси́ отъ младе́нства изря́днѣ благово́нія Того́, о́тче, и послѣ́довалъ еси́.

Млады́й проявле́нъ во́зрастъ тѣле́сный, о́тче, [имѣ́я], ста́ростію же ра́зума престарѣ́лую и тве́рдую стезю́ стяжа́лъ еси́, и́мже ху́дшее, Нау́ме, премѣни́лъ еси́ на лу́чшее.

Яко во цвѣ́тницѣ свяще́нномъ добродѣ́телей рая́ вше́лъ еси́, отъ всѣ́хъ цвѣто́въ собра́въ, испле́лъ еси́ неувяда́емый вѣне́цъ, его́же на версѣ́ твое́мъ ны́нѣ но́сиши, Нау́ме всече́стне.

Богоро́диченъ: Тебѣ́, Невмѣсти́маго Бо́га въ Твое́мъ чре́вѣ пріе́мшую, Пречи́стая, пѣ́ти жела́юще и велича́ти любе́знѣ хотя́ще, сло́во недоумѣ́емъ: вы́ше бо е́сть сло́ва Рождество́ Твое́.

Пѣ́снь 3.

Ирмо́съ: Еди́не Вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й: одушевле́нный хра́ме неизрече́нныя сла́вы Твоея́, Человѣколю́бче.

Возненави́дѣлъ еси́ отъ ю́ности вся́кое сладостра́стіе и, кре́стъ на ра́мена взе́мъ, Распя́тому, Нау́ме, послѣ́довалъ еси́, тѣ́мже, изря́дно Тому́ подо́бяся, и досто́инъ похва́лъ [яви́лся еси́, и́хже] ны́нѣ получи́лъ еси́.

Да́ръ тя́ Свята́го Ду́ха, Нау́ме му́дре, спротяже́нно пое́мъ, я́ко мо́щна тя́ ны́нѣ благода́тію, моли́твами твои́ми тя́ сла́вящія искуше́ній и бѣ́дъ изба́ви, преподо́бне, и жи́зни неконча́емѣй сподо́би.

Ангельское житіе́ на земли́ усе́рдно подража́лъ еси́ и, отступи́въ земны́хъ, всесла́вне, со а́нгелы ны́нѣ весели́шися: си́хъ бо житію́ на земли́ поревнова́лъ еси́, съ ни́миже и водворе́ніе получи́лъ еси́.

Ви́дя, не я́коже пре́жде, лице́ Бо́жіе въ зерца́лѣ гада́ній и въ сѣ́ни, свя́те, ны́нѣ невозбра́нно въ [Не́] взира́я, хва́лящимъ тя́, Нау́ме приснопа́мятне, испроси́ прегрѣше́ній оставле́ніе.

Богоро́диченъ: Превосхо́дитъ, Отрокови́це, Твоего́ стра́шнаго Рождества́ чу́до вся́каго сло́ва и ра́зума и недоумѣ́ніемъ покрыва́ется. Ка́ко Ма́ти была́ еси́, и Дѣ́ва пребыла́ еси́, и Созда́теля, созда́ніе, родила́ еси́?

[Сѣда́ленъ, гла́съ 8. Подо́бенъ: Прему́дрости.

Яко му́дръ и разу́менъ, отъ ю́наго во́зраста подклони́лъ еси́, о́тче, себе́ подъ и́го ле́гкое Влады́ки Твоего́ и, бла́гости испо́лнився, боже́ственнаго же Кли́мента спомо́щника прія́лъ еси́, земледѣ́лалъ еси́ съ ни́мъ сердца́ невѣ́рныхъ и сѣ́ялъ еси́ въ ни́хъ правовѣ́рія сѣ́мя. Тѣ́мже къ неболѣ́зненнымъ преше́лъ еси́ страна́мъ, трудо́въ воздая́ніе всегда́ пожина́я, преблаже́нне Нау́ме, моли́ Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять твою́.

Сла́ва, и ны́нѣ, богоро́диченъ:

Яко Всенепоро́чная Невѣ́ста Творцу́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная Нетлѣ́нная, отжени́ о́блакъ страсте́й и вы́шняго прича́стія сподо́би и Свѣ́та невече́рняго моли́твами Твои́ми.]

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Славе́нскія ро́ды и за́падныя ва́съ восхваля́ютъ, Нау́ме чу́дне съ Кли́ментомъ па́стыремъ, ва́съ бо ра́ди спасе́ніе обрѣто́ша и и́дольскаго изба́вльшеся помраче́нія.

Честна́ сме́рть твоя́ бы́сть, преподо́бне, предъ Созда́телемъ и Содержи́телемъ вся́ческихъ, Нау́ме приснопа́мятне, живя́ бо, Тому́ угоди́лъ еси́, и по сме́рти то́чиши чудеса́.

Ве́сь отъ ю́ности Бо́гу возложе́нъ, ве́сь прія́телище добродѣ́телей и дѣ́латель Того́ повелѣ́ній бы́лъ еси́, Нау́ме блаже́нне, ве́сь и Свята́го Ду́ха испо́лнь яви́лся еси́ и свидѣ́тель Того́ чуде́съ.

Исто́чникъ боля́щимъ и злостра́ждущимъ тво́й гро́бъ, о́тче Нау́ме, точа́щ[ій] всѣ́мъ бога́тно разли́чная исцѣле́нія, неистощи́мый бо исто́чникъ показа́ся Боже́ственныхъ чуде́съ всѣ́мъ, приходя́щимъ съ вѣ́рою.

Богоро́диченъ: Сло́во Отчее па́че сло́ва сло́вомъ вмѣсти́ла еси́ боголѣ́пно и Сего́ родила́ еси́ на́мъ, безслове́сія всѣ́хъ, и́же отъ Ада́ма, избавля́ющаго, Его́же уми́лостиви, Дѣ́во, рабо́мъ Твои́мъ.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія правосла́вно пою́щихъ Тя́.

Обрѣ́лъ еси́ вои́стинну, я́коже возлюби́лъ еси́, Нау́ме приснопа́мятне, я́же о́ко землено́е ника́коже ви́дѣ, ниже́ у́хо услы́ша, ниже́ въ сердца́ сластолюби́выхъ человѣ́къ взыдо́ша когда́.

Гора́ яви́лся еси́, добродѣ́тельми Боже́ственнымъ вся́ присѣ́нная, въ не́йже, о́тче, Бо́гъ жи́ти изво́ли и всели́ся въ коне́цъ въ тя́, Нау́ме богоно́се, спаса́й всѣ́хъ, къ тебѣ́ притека́ющихъ.

Спасе́ніе дае́тся всѣ́мъ, во хра́мъ тво́й прибѣга́ющимъ, Нау́ме боже́ственне, и вѣ́рно прося́щимъ по́мощь: Спа́су бо всѣ́хъ досто́инъ служи́тель яви́лся еси́, подража́я твоего́ учи́теля.

Богоро́диченъ: Глубины́ стра́шнаго Твоего́ Рождества́, Богома́ти, и а́нгеловъ изрещи́ вои́стинну не мо́гутъ чи́ни, ка́ко отъ ни́хъ Носи́маго на объя́тіихъ но́сиши, я́ко Младе́нца? Па́че бо ума́ е́сть и слы́шанія.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Яко Влады́ка всѣ́хъ, всѣ́мъ промышля́яй, и всѣ́мъ покая́ніе ища́ и спасе́ніе, я́ко Бо́гъ, но́выя апо́столи, ва́съ посла́ къ за́паднымъ лю́демъ, богоблаже́нніи.

Хва́лятъ ва́шу па́мять, богодухнове́нніи, и любо́вію ублажа́ютъ бо́лгарскія лю́ди, Кли́менте и Нау́ме всеблаже́нніи, и моще́й ва́шихъ ра́ку почита́ютъ, и своя́ спаси́тели ва́съ проповѣ́даютъ.

Служи́ти Бо́гу всѣ́хъ святы́хъ бо́лгаровъ научи́сте и и́дольскаго служе́нія отврати́сте благода́тію слове́съ ва́шихъ, боже́ственне Нау́ме со всечестны́мъ па́стыремъ Кли́ментомъ.

Богоро́диченъ: Слу́жатъ Рождеству́ Твоему́, Отрокови́це Всечи́стая, а́нгеловъ во́инства и человѣ́ковъ мно́жество, я́ко Бо́га, Человѣ́ка непрело́жна бы́вша, [родила́ еси́,] Тебе́ же ублажа́ютъ, я́ко же прорекла́ еси́.

Го́споди поми́луй, три́жды. [Сла́ва, и ны́нѣ].

Конда́къ свято́му, [гла́съ 3. Подо́бенъ: Дѣ́ва дне́сь.]

Свѣ́тлыхъ по́двигъ твои́хъ [всечестна́я па́мять, я́коже ве́ліе со́лнце всѣ́мъ возсія́ющи, ли́ца тя́ воспѣва́ющихъ просвѣща́етъ, бѣ́сы же и вся́къ неду́гъ отгоня́етъ, сего́ ра́ди соше́дшеся, любо́вію сію́ вѣ́рно восхваля́емъ].

Пѣ́снь 7.

Ирмо́съ: Тебе́, у́мную, Богоро́дице, пе́щь разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Страда́ній твои́хъ и трудо́въ по́честь, о́тче Нау́ме му́дре, прія́лъ еси́ чуде́съ Боже́ственное дѣ́йствіе, и́миже притека́ющіи ко гро́бу твоему́ пою́тъ: хва́льный отце́въ Бо́гъ и препросла́вленный.

Крѣ́постію Бо́жіею благомо́щно укрѣпля́емь, полки́ отврати́лъ еси́ неви́димыхъ враго́въ, Нау́ме, крѣ́пко побѣ́ду поста́вилъ еси́ надъ ни́ми, приснопа́мятне, и побѣ́ды вѣне́цъ прія́лъ еси́ и со Христо́мъ ца́рствовати при́сно, о́тче, сподо́бился еси́.

Упра́вилъ еси́ тво́й пу́ть до́брѣ къ стезя́мъ Боже́ственныхъ повелѣ́ній, и́же свѣти́льникъ бы́ша, свѣ́тъ же стезя́мъ твои́мъ, и возведо́ша, идѣ́же Свѣ́тъ Невече́рній, идѣ́же сла́дость неконча́емая, Нау́ме преподо́бне.

Свы́ше назира́еши твоя́ пѣвцы́, Нау́ме свя́те, си́мъ подае́ши всегда́ неду́говъ исцѣле́нія, и страсте́й уставле́ніе, и искуше́ній вся́ческихъ избавле́ніе моли́твами твои́ми, я́ко да пою́тъ Бо́га препросла́вленнаго.

Богоро́диченъ: Киво́тъ Моисе́й Тя́ прописа́ и трапе́зу, Хлѣ́бъ Живо́тный нося́щую, и свѣ́щникъ святоу́мный, Богоро́дице, и ста́мну, иму́щую Сла́дость всея́ тва́ри, я́же мы́, я́вственно въ Тебѣ́ исполня́ему, Отрокови́це, взира́емъ.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Земледѣ́лавъ до́брѣ твою́ ни́ву серде́чную, Ева́нгельское сѣ́мя посѣ́явъ бога́тно, и кла́съ пожа́лъ еси́ тмори́чный тобо́ю спасе́ннымъ лю́демъ и сла́вящимъ Христа́ во вѣ́ки.

Крѣпча́йшую всю́ вра́жію пре́лесть, я́ко ке́дри Лива́нскія возвы́шенную, преврати́лъ еси́ крѣ́пкими твои́ми по́двиги, сла́вне, и вопія́лъ еси́: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Гро́бъ тво́й предлежи́тъ славе́нскимъ наро́домъ, лю́бящимъ тя́, я́ко исто́чникъ сла́дкій, отъ него́же вси́ пію́ще питіе́ Боже́ственныя воды́, вопію́тъ: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Богоро́диченъ: Гавріи́ловъ, Отрокови́це, гла́съ Тебѣ́, Благослове́ннѣй, возглаша́емъ, досто́йнѣйше же сего́ наипа́че ничто́же иму́щи рещи́, и два́жды Тебѣ́ взыва́емъ: ра́дуйся, ра́дуйся, Дѣ́во, мно́гажды и мно́жицею ра́дуйся, Благода́тная, ра́дуйся, мíру Ра́досте.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Ве́сь просвѣще́нія испо́лненъ бы́въ, и ко Свѣ́ту и́стинному Христа́, Бо́га же и Человѣ́ка, наста́вилъ еси́ во тмѣ́ невѣ́дѣнія спя́щія славе́нскія наро́ды, и пре́лести и́дольскія изба́вилъ еси́.

Здра́віе разсла́бленнымъ, преподо́бне, хромы́мъ тече́ніе и глухи́мъ слы́шаніе, всѣ́мъ вся́ прося́щимъ подае́ши моли́твами твои́ми, всесла́вне Нау́ме, Сло́ва проповѣ́дниче, на земли́ я́вльшемуся благода́тію.

Ви́ждь мою́ премно́гую къ тебѣ́ любо́вь, о́тче, ви́ждь и жела́ніе, принося́щему ти́ сіе́ убо́гое тебѣ́ пѣ́ніе, грѣхо́въ мои́хъ испроси́ разрѣше́ніе и вѣ́чныя жи́зни наслажде́ніе.

Всего́ порабоще́на мя́ страсте́мъ, всего́, богому́дре, оскверне́на мя́ прегрѣше́ньми, очи́сти моли́твами твои́ми, Нау́ме преподо́бне, и огня́ гее́нскаго изба́ви, на сіе́ спомо́щника имѣ́я боже́ственнаго Кли́мента, съ ни́мже тя́ велича́емъ.

Богоро́диченъ: Ты́ па́че ума́ и смы́сла, неизрече́нно и неизглаго́ланно, Пречи́стая, во утро́бѣ Твое́й зачала́ и родила́ еси́ Бо́жіе Бо́гъ Сло́во. Тѣ́мже Тя́ сла́вимъ, я́коже мо́щно человѣ́комъ, по достоя́нію бо а́ще мо́гутъ а́нгели.

Примѣчаніе:
[1] «Пое́мый на освяще́ніе ко́лива».
[2] Тропарь и кондакъ святому Науму приводятся по изданію: «Служби на българските светии. Света Гора, Атон: Славянобългарски манастир «Св. Вмчк Георги Зограф», 2007. С. 614, 620».

Источникъ: П. А. Лавровъ. Житія св. Наума Охридскаго и служба ему. // «Извѣстія Отдѣленія русскаго языка и словесности Императорской Академіи наукъ». 1907 г. Тома XII-го книжка 4-я. — СПб.: Типографія Императорской Академіи наукъ, 1908. — С. 33-37.

Свѣрено съ изданіемъ: Мине́я Дека́брь. Ча́сть втора́я. — М.: Издательскій совѣтъ Русской Православной Церкви, 2002. — С. 276 – 281.

/ Къ оглавленію раздѣла /


Наверхъ / Къ титульной страницѣ

0