Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 23-й де́нь.
Предпра́зднство Рождества́ Христо́ва. И святы́хъ десяти́ му́ченикъ, и́же въ Кри́тѣ.

ВЕЧЕРЪ,
На Го́споди воззва́хъ: стихи́ры предпра́зднства 3 и святы́хъ 3.
Предпра́зднства стихи́ры, гла́съ 4. Подо́бенъ: Яко до́бля.

Въ кимва́лѣхъ возгласи́мъ,* въ пѣ́снехъ воскли́кнемъ:* Христо́во явле́ніе показа́ся,* проро́ческая проповѣ́данія коне́цъ прія́ша.* Его́же бо прореко́ша* пло́тію человѣ́комъ яви́тися,* ражда́ется во святѣ́мъ верте́пѣ,* и въ я́слѣхъ возлега́етъ я́ко Отроча́,* и пелена́ми повива́ется я́ко Младе́нецъ.

Виѳлее́ме, угото́вися,* Еде́ме, ны́нѣ отве́рзися:* роди́ти Всесвята́я и́детъ.* Небеса́ да веселя́тся,* да игра́ютъ человѣ́цы,* въ я́слѣхъ Жи́знь, въ верте́пѣ Бога́тый,* прихо́дитъ мно́жества ра́ди ми́лости,* нищету́ Ада́мову воспріи́мъ,* кромѣ́ преложе́нія и смѣше́нія.

Ины стихи́ры святы́хъ му́чениковъ, гла́съ и подо́бенъ то́йже:

Десяти́це богозва́нная* и свѣща́ десятосвѣ́тлая,* Боже́ственными сія́ніи озаря́ющи церко́вное исполне́ніе,* столпи́ непоколе́бленніи,* звѣ́зды свѣ́тлыя,* и́же зе́млю онебеси́вше* свѣтлостьми́ велича́йшихъ подвиго́въ,* похвала́ми свяще́нными* велегла́сно да восхва́лятся дне́сь.

Да похва́лится Ѳеоду́лъ,* Зо́тикъ же и Помпíй.* Васили́дъ, Евпо́ръ, Агаѳо́пусъ же и Саторни́нъ,* Гела́сій же и боже́ственный Еваре́стъ,* съ ни́миже и Евникіа́нъ* ны́нѣ да почти́тся пѣ́сньми,* всеблаготи́шная су́щимъ въ бу́ри приста́нища,* и́же пре́лесть обличи́вше* и вѣне́цъ побѣди́тельный пріе́мше.

Кри́тская прозябе́нія,* церко́вная утвержде́нія* и вѣ́рныхъ неувяда́емая украше́нія,* ра́йстіи сладкодохнове́нніи цвѣ́ти честнíи,* благопрія́тная Христо́ва* и кра́сная заколе́нія* и возложе́нія небе́снаго хра́ма,* десяти́цу Тро́ицы святу́ю* страстоте́рпцевъ почти́мъ.

Сла́ва, гла́съ 3:

Предпра́зднственный дне́сь му́чениковъ наста́ пра́здникъ, рожде́ственный на́мъ предподпису́ющь де́нь, отъ Со́лнца Со́лнце, отъ Дѣ́вы Бо́га, я́вльшася пло́тію, проповѣ́дающъ, десяти́ца му́чениковъ, въ Кри́тѣ крѣ́пко пострада́вшая, вѣнцы́ побѣ́ды отъ небесе́ прія́ша. Къ ни́мже возопіи́мъ: ли́че святоизбра́нный, моли́те Христа́, святíи му́ченицы, о вѣ́рою соверша́ющихъ всечестну́ю па́мять ва́шу.

И ны́нѣ, гла́съ то́йже:

Благоукраси́ся, Виѳлее́ме, отве́рзеся бо Еде́мъ, гото́вися, Евфра́ѳо, обновля́ется бо Ада́мъ и Ева съ ни́мъ: кля́тва бо разори́ся, спасе́ніе мíру процвѣте́, и ду́ши пра́ведныхъ украша́ются, я́ко да́ръ дароно́сія, вмѣ́сто мѵ́ра пѣ́ніе принося́ще, спасе́ніе душе́вное и нетлѣ́ніе пріе́млюще. Се́ бо въ я́слѣхъ Возлежа́й предповелѣва́етъ пѣ́ніе духо́вное соверша́ти вопію́щимъ непреста́нно: Го́споди, сла́ва Тебѣ́.

На стихо́внѣ стихи́ры, гла́съ 6. Подо́бенъ: Тридне́венъ.

Безмѣ́рная му́дрость Бо́жія, до́мъ Себѣ́ па́че ума́ отъ Дѣ́вы созда́ Христо́съ и хо́щетъ въ верте́пѣ и я́слѣхъ безслове́сныхъ пло́тію роди́тися па́че смы́сла.

Сти́хъ: Бо́гъ отъ ю́га пріи́детъ, и Святы́й изъ горы́ пріосѣне́нныя ча́щи.

Яви́лся еси́ проро́комъ, Христе́, я́ко мо́щно бѣ́ ви́дѣти Тя́, Зижди́теля, въ послѣ́днихъ же времена́хъ всѣ́мъ показа́лся еси́ человѣ́комъ во гра́дѣ Виѳлее́мѣ, Человѣ́къ бы́въ.

Сти́хъ: Го́споди, услы́шахъ слу́хъ Тво́й и убоя́хся,* Го́споди, разумѣ́хъ дѣла́ Твоя́ и ужасо́хся.

Обтече́, возвѣща́ющи звѣзда́ Со́лнце пра́вды — Христа́ — звѣздосло́вцемъ во гра́дѣ Виѳлее́мѣ, и а́нгели па́стыремъ ны́нѣ благовѣству́ютъ, съ ни́миже потеце́мъ, богому́дріи.

Сла́ва, гла́съ 2:

Кри́тъ предпра́зднствуетъ дне́сь Рождество́ Христо́во въ па́мяти страстоте́рпцевъ. Тѣ́мже моли́твами и́хъ, Го́споди, спаси́ ду́ши на́ша.

И ны́нѣ, гла́съ то́йже:

Се́ вре́мя прибли́жися спасе́нія на́шего, гото́вися, верте́пе, Дѣ́ва приближа́ется роди́ти; Виѳлее́ме, земле́ Іу́дова, красу́йся и весели́ся, я́ко изъ тебе́ возсія́ Госпо́дь на́шъ. Услы́шите, го́ры, и хо́лми, и окре́стныя страны́ Іуде́йскія, я́ко гряде́тъ Христо́съ, да спасе́тъ, его́же созда́, человѣ́ка, я́ко Человѣколю́бецъ.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.

Сла́ва, и ны́нѣ, предпра́зднства:

Гото́вися Виѳлее́ме, отве́рзися всѣ́мъ, Еде́ме, красу́йся Евфра́ѳо, я́ко дре́во живота́ въ верте́пѣ процвѣте́ отъ Дѣ́вы: ра́й бо Оноя чре́во яви́ся мы́сленный, въ не́мже боже́ственный са́дъ: отъ него́же я́дше, жи́ви бу́демъ, не я́коже Ада́мъ у́мремъ; Христо́съ ражда́ется пре́жде па́дшій возста́вити о́бразъ.


НА ПОВЕЧЕРІИ,
Трипѣ́снецъ, его́же краегране́сіе: Предсуббо́тіе же. Ирмо́съ по два́жды, тропари́ на 6, послѣди́ же ирмо́съ о́ба ли́ка вку́пѣ. Гла́съ 6.

Пѣ́снь 5.

Ирмо́съ: Къ Тебѣ́ у́тренюю, благоутро́бія ра́ди Себе́ истощи́вшему непрело́жно и зра́къ раба́ отъ Дѣ́вы носи́вшему, Сло́ве Бо́жій. Ми́ръ пода́ждь ми́, па́дшему, Человѣколю́бче.

Омы́вше смы́слы и предочи́стившеся та́йны причаще́ніемъ стра́шнаго смотре́нія, тѣ́ломъ и душе́ю къ Виѳлее́му гра́ду взы́демъ Влады́ку ви́дѣти ражда́ющася.

Зри́те, дру́зи, и не бо́йтеся, безу́мный бо Иродъ всу́е шата́ется Зижди́теля уби́ти ро́ждшася, но То́й, я́ко жи́знь и сме́рть содержа́й, живе́тъ и спаса́етъ мíръ, я́ко Человѣколю́бецъ.

Пѣ́снь 8.

Ирмо́съ: Сто́лпъ зло́бы противобо́жныя о́троцы боже́ственніи обличи́ша; на Христа́ же, шата́яся, Иродъ свирѣ́пѣетъ, совѣ́туетъ тще́тная, уби́ти поучава́ется живота́ Держа́щаго дла́нію, Его́же вся́ тва́рь благослови́тъ, сла́вящи во вѣ́ки.

Отъ вѣ́ждей лѣ́ности со́нъ вси́, вѣ́рніи, оттрясе́мъ, въ моли́твѣ же побди́мъ, искуше́нія отража́юще, я́же отъ лука́ваго, и съ па́стырьми зри́теліе сла́вы яви́мся Христа́ ро́ждшагося, Его́же вся́ тва́рь благослови́тъ, сла́вящи во вѣ́ки.

Глубину́ прему́дрости и ра́зума Зижди́телева кто́ испыта́етъ человѣ́ковъ? Бо́жіихъ суде́бъ бе́здну кто́ прему́дръ пости́гнетъ? Ихже ра́ди, небеса́ преклони́въ, съ человѣ́ки Плотоно́сецъ поживе́, Его́же вся́ тва́рь благослови́тъ, сла́вящи во вѣ́ки.

Скве́рну сло́ву отъ усте́нъ изы́ти, вѣ́рніи, возбрани́мъ, поучи́вшеся же, словеса́ боже́ственная Христу́ ны́нѣ принесе́мъ, разрѣ́шшему ны́ безслове́сія, въ безслове́сныхъ лежа́щему я́слѣхъ, Его́же вся́ тва́рь благослови́тъ, сла́вящи во вѣ́ки.

Отрица́тися плотски́хъ страсте́й и мíра кра́сныхъ потщи́мся, духо́вныхъ же держи́мся попече́ній, богому́дріи, досто́йны себе́ самы́я ражда́ющемуся, представля́юще отъ дѣ́лъ, Влады́цѣ, Его́же вся́ тва́рь благослови́тъ, сла́вящи во вѣ́ки.

Пѣ́снь 9.

Ирмо́съ: Честнѣ́йшую херуви́мъ и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу, Тя́ велича́емъ.

Па́губное велѣ́ніе вражде́бнаго, смуща́ющаго Рождество́ Іису́сово, младе́нцевъ незло́бивыхъ содѣ́ла убíйство; мы́ же Ро́ждшагося вѣ́рою почти́мъ.

Зако́ны есте́ственныя преоби́дя и завѣ́ты Боже́ственныя отме́ща, Иродъ лю́тый ма́тери беззако́нно обезча́дстви и младе́нцы уби́ неви́нно за всѣ́хъ Жи́знь.

Язы́комъ отве́рзеся Еде́мская две́рь, ражда́ющуся въ верте́пѣ Изба́вителю; исто́чникъ же безсме́ртія жа́ждущимъ источа́етъ Госпо́дь сла́вы, Его́же велича́емъ.

Окружа́ху, я́ко престо́лъ херуви́мскій, а́нгели я́сли, верте́пъ бо не́бо зря́ху, лежа́щу въ не́мъ Влады́цѣ, и, — сла́ва въ вы́шнихъ Бо́гу, — вопія́ху.


НА УТРЕНИ,
На Бо́гъ Госпо́дь: Тропа́рь предпра́зднства, два́жды. Сла́ва, му́чениковъ. И ны́нѣ, предпра́зднства.

По 1-й стихоло́гіи сѣда́ленъ, гла́съ 3. Подо́бенъ: Боже́ственныя вѣ́ры.

Ра́дуется дне́сь Це́рковь, пое́тъ, краси́тся, предпра́зднствуетъ Спа́сово вои́стинну Рождество́: всесвято́е бо соверша́ется торжество́ и въ Госпо́дню сла́ву облачи́тся. Вси́ воззове́мъ Христу́ Бо́гу: Человѣколю́бче, поми́луй ны́, пою́щія Тя́.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 8. Подо́бенъ: Прему́дрости.

Изъ нѣ́дръ Оте́ческихъ соше́лъ еси́ и несказа́ннымъ истоща́ніемъ ю́же по на́мъ нищету́ воспрія́лъ еси́ па́че естества́, Человѣколю́бче, въ верте́пъ всели́тися благоволи́лъ еси́, Го́споди, и, я́ко Младе́нецъ, сосцы́ пита́ешися, Зижди́тель и Госпо́дь. Тѣ́мже, звѣздо́ю наставля́еми, волсви́ да́ры Тебѣ́ прино́сятъ, я́ко Влады́цѣ тва́ри; па́стыріе и а́нгели дивля́хуся, зову́ще: сла́ва въ вы́шнихъ Бо́гу, на зе́млю гряду́щему роди́тися, я́ко Человѣ́ку.

Сла́ва, и ны́нѣ, то́йже.

Кано́нъ предпра́зднства со ирмосо́мъ на 8 и святы́хъ на 6.

Кано́нъ предпра́зднства, его́же краегране́сіе по алфави́ту. Іо́сифъ. Гла́съ 6.
Пѣ́снь 1.

Ирмо́съ: Волно́ю морско́ю Скры́вшаго дре́вле гони́теля мучи́теля — въ я́слѣхъ сокрыва́емаго уби́ти и́щетъ Иродъ, но мы́ съ волхвы́ пои́мъ: Го́сподеви воспои́мъ, сла́вно бо просла́вися.

Кня́зь изъ Іу́ды оскудѣ́ уже́, ему́же бо завѣща́ся, я́коже предписа́ся, язы́ковъ ча́яніе — Іису́съ Христо́съ пріи́де и въ верте́пѣ ражда́ется кра́йнія ра́ди бла́гости.

Виѳлее́ме, весели́ся ра́достію: въ тебѣ́ бо ражда́ется Христо́съ Госпо́дь. Вселе́нная да игра́етъ, пріе́млющи избавле́ніе, да лику́етъ вся́ тва́рь, пра́зднующи.

Ро́дъ человѣ́ческій хотя́ спасти́, Преблагíй во утро́бу всели́ся Неискусобра́чныя Дѣ́вы и се́ роди́тися гряде́тъ. Тому́ поклони́мся: сла́вно бо просла́вися.

Инъ кано́нъ святы́хъ, его́же краегране́сіе въ богоро́дичнахъ: Гео́ргія. Гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Пресвѣ́тлыя дне́сь лучи́ возсія́ша, у́мнаго возвѣща́ющія Со́лнца всѣ́мъ Того́ въ мíрѣ во пло́ти осія́ніе и явле́ніе.

Духо́вную дне́сь предпра́зднственную страстоно́сцы трапе́зу всѣ́мъ предложи́ша, та́инственно пита́ющую ны́ блиста́ньми ражда́ющагося Христа́.

Яко свѣ́тлыя возсія́вше звѣ́зды, святíи, у́мному послѣ́довасте сла́вы Со́лнцу во вре́мя подвиго́въ и, сего́ ны́нѣ получи́вше, просвѣти́стеся.

Ополче́нія вра́жія разори́ша, единоду́шствовавше, му́ченицы и побѣди́тельная отъ ро́ждшагося въ верте́пѣ Христа́ неизглаго́ланно воспрія́ша.

Богоро́диченъ: Ро́дъ человѣ́ческій хвалу́ Тебѣ́ предпра́зднственную прино́ситъ, Богоневѣ́стная, я́ко о́бщія ра́дости Хода́тая и Вино́вника сла́витъ ро́ждшагося изъ Тебе́ Человѣколю́бца.

Пѣ́снь 3.

Ирмо́съ: Тебе́, на вода́хъ повѣ́сившаго всю́ зе́млю неодержи́мо, тва́рь, ви́дѣвши въ верте́пѣ ражда́ющася, ужа́сно содрога́шеся, нѣ́сть свя́тъ, па́че Тебе́, Го́споди, зову́щи.

Въ ра́бій облещи́ся о́бразъ восхотѣ́лъ еси́, я́ко да рабо́ты мя́ лука́ваго изба́виши, пѣсносло́влю Твое́ благоутро́біе, Сло́ве, Отцу́ Собезнача́льне и Соприсносу́щне. Сла́ва смотре́нію Твоему́.

Гряде́тъ Дѣ́ва Го́спода роди́ти въ верте́пѣ, предвари́те, волсви́; па́стыріе, ны́нѣ пріиди́те; пѣ́снь съ высоты́, а́нгели, возопíйте: яви́ся человѣ́комъ избавле́ніе.

Ища́й мя́, заблу́ждшаго, Человѣколю́бче, и верте́пъ я́вльшася разбо́йническій дѣ́лы непло́дными, въ верте́пъ ны́нѣ прише́лъ еси́ отъ Дѣ́вы дне́сь роди́тися, Влады́ко: сла́ва, Сло́ве, прише́ствію Твоему́.

Инъ.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Пелена́ми пови́вся, пло́тію ро́ждшееся Сло́во раздра́ ри́зы дре́вняго осужде́нія и на́съ въ нетлѣ́ніе облече́.

Со́нмъ, прему́дріи, безбо́жія разори́сте си́лою во пло́ти я́вльшагося Христа́ Бо́га и Сего́ любви́ связа́стеся.

Богоро́диченъ: Разрѣши́хомся у́зъ осужде́нія, Зижди́телю, пелена́ми пови́вшуся, и оде́ждею облеко́хомся, Богоро́дице, пе́рвыя красоты́.

Конда́къ предпра́зднства, гла́съ 3. Подо́бенъ: Дѣ́ва дне́сь.

Дѣ́ва дне́сь Превѣ́чное Сло́во въ верте́пѣ гряде́тъ роди́ти неизрече́нно; лику́й, вселе́нная, услы́шавши, просла́ви со а́нгелы и па́стырьми хотя́щаго яви́тися Отроча́ Мла́до, Превѣ́чнаго Бо́га.

Икосъ:

О, ужа́снаго вои́стинну и па́че сло́ва чудесе́! Еже бы́ти дая́й всѣ́мъ ра́ди бла́гости во чре́во святы́я Дѣ́вы вни́де, и въ верте́пѣ роди́тися гряде́тъ, и въ я́слѣхъ положи́тися. Звѣзда́ же Сего́ проповѣ́дуетъ свы́ше волхво́мъ, иду́щимъ на поклоне́ніе Его́ съ да́ры, издале́ча привлача́щи, со тща́ніемъ послѣ́дующія Валаа́мову прорече́нію, ре́кшаго: звѣзда́ хо́щетъ провозвѣсти́ти Отроча́ Мла́до, Превѣ́чнаго Бо́га.

Сѣда́ленъ святы́хъ, гла́съ 1. Подо́бенъ: Гро́бъ Тво́й, Спа́се.

Кри́тстіи свѣ́тліи и честнíи градоде́ржцы, страда́вше крѣ́пко, побѣди́ша вѣ́рою змíя злонача́льнаго и зако́ннѣ вѣнча́ни бы́ша. Си́хъ дне́сь достохва́льную па́мять пра́зднуемъ, велегла́сно всѣ́хъ сла́вяще Го́спода. [Два́жды.]

Сла́ва, и ны́нѣ, предпра́зднства, гла́съ и подо́бенъ то́йже:

Ра́дуйся, Сіо́не, Виѳлее́ме, украси́ся, всѣ́хъ Содержи́тель, звѣзду́ предпосла́въ, возвѣсти́ Свое́ безмѣ́рное схожде́ніе: Его́же бо трепе́щутъ небе́сныя си́лы, Се́й ражда́ется отъ Дѣ́вы непревра́щно, еди́ный Бо́гъ на́шъ.

Пѣ́снь 4.

Ирмо́съ: Отъ Дѣ́вы прише́ствіе Твое́ прови́дя Авваку́мъ, ужа́сся, вопія́ше: Ты́ отъ ю́га, воплоща́яся, прише́лъ еси́, Изба́вителю, Ада́ма отринове́ннаго воззва́ти.

Свѣтоза́рный о́блакъ гряде́тъ возсія́ти Христа́ изъ Ма́тернихъ ложе́снъ, пра́вды Со́лнце, всю́ зе́млю луча́ми Боже́ственными просвѣща́ющаго.

Бо́гъ человѣ́комъ яви́ся подо́бенъ, и обнищава́етъ пло́тію, да на́съ обогати́тъ, и въ верте́пѣ ражда́ется: Сего́, вѣ́рніи, чи́стымъ се́рдцемъ поды́мемъ.

Се́ Христо́съ во гра́дѣ ражда́ется Виѳлее́мѣ, я́ко да Еде́мъ на́мъ отве́рзетъ, преслуша́ніемъ пе́рвѣе змíя окраде́нія заключе́нный, боже́ственно торжеству́имъ.

Инъ.

Ирмо́съ: Услы́шахъ, Го́споди, слу́хъ Тво́й и убоя́хся, разумѣ́хъ дѣла́ Твоя́, и диви́хся, и возопи́хъ: сла́ва си́лѣ Твое́й, Го́споди.

Небеса́ да ра́дуются, земля́ та́инственнаго да испо́лнится весе́лія: Христо́съ бо пріи́де обнови́ти вся́ческая.

Десяти́ца, провозвѣща́ющи страда́льцевъ рожде́ніе Зижди́телево, съ на́ми лику́етъ и сра́дуется.

Христо́во соше́ствіе къ небеси́ возвы́си Боже́ственно до́блественныя му́ченики страда́ніемъ.

Богоро́диченъ: Яко о́бщую ра́дость, о Богоро́дице, вся́ тва́рь пѣ́сньми Тя́ почита́етъ, предпра́зднствующи.

Пѣ́снь 5.

Ирмо́съ: Къ Тебѣ́ у́тренюю, благоутро́бія ра́ди Себе́ истощи́вшему непрело́жно и зра́къ раба́ отъ Дѣ́вы носи́вшему, Сло́ве Бо́жій. Ми́ръ пода́ждь ми́, па́дшему, Человѣ́колюбче.

Се́рдце вся́кое земноро́дныхъ да игра́етъ, да весели́тся тва́рь: Госпо́дь ражда́ется изъ Отрокови́цы Чи́стыя въ верте́пѣ Виѳлее́мстѣмъ, и волсви́ Тому́ прино́сятъ да́ры досто́йныя.

Лю́діе, дре́вле въ сѣ́ни сме́ртнѣй сѣдя́щіи, у́зрите Свѣ́тъ, ва́мъ возсія́вшій отъ Дѣ́вы, и мно́гаго душесла́достія испо́лнитеся, обнища́вшаго Сло́ва велича́юще при́сно.

Въ ма́лѣмъ верте́пѣ гряде́ши вмѣсти́тися, Невмѣ́стный естество́мъ, я́ко да мя́, ума́лившагося преступле́ніемъ, возвели́чиши за ми́лость безмѣ́рную. Покланя́юся Твоему́ благоутро́бію, Долготерпѣли́ве.

Инъ.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Вѣ́ру Христу́, я́ко зла́то, и пѣснопѣ́ніе, я́ко лива́нъ прія́тенъ, и чи́стую любо́вь, я́ко сми́рну, принесе́мъ, вѣ́рніи, на́съ ра́ди роди́тися пло́тію благоволи́вшему.

Защище́ніе страда́льцевъ, въ согла́сіе собра́вшеся дне́сь еди́но Христо́во, враго́въ многообра́зныя низложи́ ко́зни и побѣ́ды по́чести досто́йнѣ прія́ша.

Во пло́ти Христо́во прише́ствіе, прему́дріи му́ченицы, увѣ́дѣвше я́вственно, плотску́ю любо́вь отри́нуша. Тѣ́мже за любо́вь Его́ и пострада́ша.

Богоро́диченъ: Изба́вльшеся пре́лести, Чи́стая, и́дольскія, Тебе́ ра́ди позна́хомъ Творца́ и Еди́наго Спа́са. Тѣ́мъ въ Того́ рождествѣ́ Тя́ любо́вію почита́емъ, Пречи́стая.

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́ и, волне́нія не ктому́ терпя́, я́ко Іо́на Влады́цѣ, вопію́ Ти: отъ тли́ мя́ возведи́.

Зако́новъ Тя́ Дѣ́ва плотски́хъ кромѣ́, Го́споди, прихо́дитъ роди́ти въ верте́пѣ и во я́слѣхъ пло́тію восклони́ти, я́ко Младе́нца.

Стра́нна мя́ бы́вша отъ Бо́га преступле́ньми, Пребоже́ственный, рожде́йся отъ Отрокови́цы Неискусобра́чныя ми́лости ра́ди, граждани́на небе́снаго явля́етъ.

Го́ры же, и хо́лмы, и удо́лія, возвесели́теся: Госпо́дь бо пло́тію ражда́ется, обновля́яй тва́рь, истлѣ́вшую лука́выми преступле́ньми.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Съ высоты́ на́мъ возсія́вшая за неизрече́нную ми́лость восто́чная звѣзда́, возвѣща́ющая, привѣща́ше, су́щимъ въ ми́рѣ озаре́ніе.

Въ нощи́ житія́ свѣтя́ще въ пучи́нѣ пре́лести ходя́щимъ, свѣ́томъ Христо́вымъ упра́висте къ Нему́ человѣ́ки, всесла́вніи.

Изъ глубины́ безбо́жія возвлече́ къ боговѣ́дѣнія высотѣ́ му́ченики за неизрече́нную ми́лость въ верте́пѣ Рожде́йся, я́ко Человѣколю́бецъ.

Богоро́диченъ: Ро́ждшагося изъ Тебе́, Богоневѣ́сто, во пло́ти Христа́ Бо́га па́че смы́сла, Боже́ственнаго возрожде́нія, земноро́дніи, и че́сти сподо́бихомся.

Конда́къ, гла́съ 4. Подо́бенъ: Яви́лся еси́ дне́сь.

Денни́ца возсія́ му́чениковъ честно́е страда́льчество предозаря́ющее на́мъ въ верте́пѣ Ражда́емаго: Его́же Дѣ́ва безсѣ́менно роди́.

Икосъ:

Отъ Дѣ́вы на́съ ра́ди рожде́ннаго въ верте́пѣ Христа́ Жизнода́вца лю́бяще, ору́жницы по́лкъ воздвиго́ша свѣ́телъ на веліа́ра и, побѣди́вше я́вственно, на зе́млю того́ низверго́ша, безмѣ́рно сего́ дре́вле хва́лящася. Тѣ́мже свѣ́тятъ су́щимъ во тмѣ́, я́ко свѣти́ла су́ще мы́сленнаго Со́лнца: звѣзда́ бо у́бо пре́жде волхво́мъ предста́, путеводя́щи въ Виѳлее́мъ, гра́дъ Іу́довъ, сíи же на́мъ проповѣ́даютъ чрезъ му́ки, Его́же Дѣ́ва безсѣ́менно роди́.

Пѣ́снь 7.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Ка́ко Тя́ малѣ́йшій, Сло́ве, поды́метъ верте́пъ, нището́ю мно́гою нищету́ Ада́мову отъе́мшаго и бога́тствомъ Боже́ственныя благода́ти человѣ́ки обогати́вшаго?

Глаго́лы стра́нныя па́стыріе слы́шавше, потща́шася Виѳлее́мъ ви́дѣти и въ я́слѣхъ безслове́сныхъ разрѣша́ющаго безслове́сія вся́ человѣ́ки Возлежа́щаго.

Усты́ же и се́рдцемъ пло́тію приходя́щаго роди́тися Христа́ въ верте́пѣ отъ Дѣ́вы Отрокови́цы, пѣсносло́вити потщи́мся и вѣ́рно поклони́мся.

Инъ.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Бога́тство Своего́ неизрече́ннаго Христо́съ человѣколю́бія, пло́тію обнища́въ, показа́: вочеловѣ́чився бо, отве́рзе благи́хъ оби́льство, немо́лчно зову́щимъ: благослове́нъ еси́, Бо́же оте́цъ на́шихъ.

Боже́ственнымъ Христо́вымъ благово́ніемъ мы́сленнѣ услади́вшеся, страстоно́сцы возгнуша́шася сла́дкихъ всѣ́хъ красо́тъ и страда́ніемъ Сему́ послѣ́доваша, зову́ще: благослове́нъ еси́, Бо́же оте́цъ на́шихъ.

Же́ртва Христу́ предпра́зднственная, му́дріи, показа́вшеся, благоуха́ніе страда́нія, я́ко мѵ́ро, Сему́ принесо́сте. Тѣ́мже мѵроуха́ніемъ чуде́съ вы́ просла́ви, вопію́щія: благослове́нъ еси́, Бо́же оте́цъ на́шихъ.

Богоро́диченъ: Ви́дѣти чи́стыми мы́сли очесы́ разумѣва́емую, въ верте́пѣ изъ Тебе́, Всечи́стая, пло́тію ро́ждшагося Бо́га на́шего, сла́ву и свѣ́тлость Боже́ственную, Твое́ю сподо́би ны́ моли́твою, вѣ́рно пѣсносло́вящія Тя́.

Пѣ́снь 8.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное, и совоку́плени, и́мже, не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Па́че сло́ва Еди́наго Го́спода воплоще́ннаго, Отрокови́це, и обложе́ннаго человѣ́ческимъ подо́біемъ, держа́щи рука́ми, и покланя́ющися, и лобыза́ющи ма́терски, — Ча́до, — глаго́лала еси́, — Сладча́йшее, ка́ко Тя́ си́це держу́, держа́щаго руко́ю всю́ тва́рь и отъ руки́ рабо́ты сію́ свобожда́ющаго?

Пѣсносло́вити, боже́ственніи а́нгели, на земли́ Ро́ждшагося угото́витеся; волсви́, да́ры, путеводи́ми звѣздо́ю, принеси́те; па́стыріе, Сего́ потщи́теся ви́дѣти на Ма́тернихъ, я́коже Младе́нца, сѣдя́ща объя́тіихъ, вопію́ще: Го́спода по́йте, дѣла́, и превозноси́те во вся́ вѣ́ки.

Свѣ́та о́блаче, Неискусобра́чная, ка́ко пелена́ми повива́еши о́блаки одѣва́ющаго небеса́ неизглаго́ланнымъ ма́ніемъ? Ка́ко въ безслове́сныхъ я́слѣхъ воскланя́еши безслове́сія человѣ́ки за безмѣ́рную ми́лость избавля́ющаго Влады́ку? Ему́же вся́ покланя́ется стра́хомъ тва́рь, пѣсносло́вящи во вся́ вѣ́ки.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Вся́ тва́рь нача́тки гото́витъ Тебѣ́, Христе́, въ верте́пѣ отъ Чи́стыя Дѣ́вы иму́щу роди́тися, и пое́тъ хвалу́ предпра́зднственную, Тя́ славосло́вящи, Еди́наго Благодѣ́теля.

Рожде́нному на земли́ послѣ́дующе Христу́, страстоно́сцы, вѣ́ру предводи́теля, я́коже звѣзду́ свѣ́тлую, иму́ще, ви́дѣша, и принесо́ша да́ры Сему́ боже́ственныя муче́ніемъ.

Си́лою Христо́вою укрѣпля́еми, прему́дріи, наси́лованіе вра́жіе, страстоте́рпцы, побори́сте и сего́ не́мощна показа́сте, пѣсносло́вяще Христа́ во вѣ́ки вся́.

Богоро́диченъ: Иже въ нѣ́дрѣхъ Отчихъ, на дла́нѣхъ Ма́тернихъ Твои́хъ, Богоро́дице, рожде́йся въ верте́пѣ почи́ и всѣ́мъ, вѣ́рно пою́щимъ Тя́, на небесѣ́хъ отверза́етъ Ца́рство.

Пѣ́снь 9.

Ирмо́съ: Не диви́ся ны́нѣ, о Ма́ти, ви́дящи я́ко Младе́нца, Его́же изъ чре́ва пре́жде денни́цы роди́ Оте́цъ: возста́вити бо и сопросла́вити человѣ́ческое па́дшее естество́ пріидо́хъ я́вственно, вѣ́рою и любо́вію Тя́ велича́ющее.

Ра́дуйся, прія́телище, Пречи́стая, ра́дости неизглаго́ланныя: се́ бо гряде́ши роди́ти въ верте́пѣ неизрече́нно Влады́ку, хотя́щаго тва́рь всю́, истлѣ́вшую преступле́ніемъ пе́рвѣе, обнови́ти вои́стинну, Сего́ пѣсносло́вяще вѣ́рою, Тя́ велича́емъ.

Ду́ши пра́ведныхъ вси́, и подземна́я ку́пно ра́дуйтеся: се́ бо избавле́ніе всѣ́хъ яви́ся, во гра́дѣ Виѳлее́мѣ ражда́ющееся; звѣзда́ же Сего́ возвѣща́етъ волхво́мъ, и́щущимъ благоче́стно, Его́же и ви́дѣвше въ верте́пѣ, у́жаса испо́лнишася.

Яко не́бо Тя́ ино́е воспѣва́емъ, Дѣ́во, пра́вды Со́лнце на́мъ изъ ложе́снъ пречи́стыхъ хотя́щую возсія́ти у́треннее, просвѣща́ющее во тмѣ́ су́щія сме́рти и тли́. Тѣ́мже до́лжно хвала́ми Тя́ велича́емъ.

Инъ.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Царя́ вся́ческихъ прише́ствіе Боже́ственное, во́инство страда́льцевъ предте́кшее все́й тва́ри весе́лія трапе́зу возвѣща́етъ и вся́ пріе́млетъ вѣ́рныя, своя́ до́блести предложи́въ, я́коже снѣ́ди.

Якоже звѣзду́, вѣ́ру, страстоте́рпцы Госпо́дни, зря́ще и держа́ще тве́рдо къ невече́рнему Со́лнцу, тоя́ ра́ди непреткнове́нно ко Христу́ наста́вистеся, му́дріи, и кро́ви Сему́ я́ко да́ры принесо́сте.

Отъ нетлѣ́нныхъ злачнико́въ, страстоно́сцы, цвѣ́ты поже́нше ра́зума Христо́ва, благово́нія Его́ напо́лнистеся, пострада́вше, и мѵ́ра благово́ннѣйшая Тому́ муче́ніемъ са́ми себе́ принесо́сте.

Богоро́диченъ: Излія́ся благода́ть, Богоро́дице Дѣ́во, во всѣ́хъ родѣ́хъ земноро́дныхъ, и чуде́съ Твои́хъ бога́тство истека́етъ оби́льно во свѣ́тлѣй Рождества́ Твоего́ ра́дости и богати́тъ вѣ́рою и любо́вію Тя́ сла́вящія.

Свѣти́ленъ. Подо́бенъ: Со ученики́.

Съ Ѳеоду́ломъ вѣнча́емъ Зо́тика, Агаѳопо́да и Саторни́на, Помпíя, вку́пѣ Евникіа́на, сла́внаго Васили́да, Евпо́ра же боже́ственнаго, и сла́внаго Гела́сія, и Ева́реста пѣ́сньми ра́достно, я́ко да моли́твами тѣ́хъ изба́вимся прегрѣше́ній и вѣнцы́ пріи́мемъ отъ Христа́ Спаси́теля.

Сла́ва, и ны́нѣ, предпра́зднства. Подо́бенъ: Жены́, услы́шите.

Та́инство сокрове́нное, а́нгеломъ несказа́нное, Отца́ благоволе́ніемъ и Ду́ха содѣ́йствомъ хо́щетъ соверши́тися, потщи́мся: Сло́во бо Безнача́льное, нача́ло пріе́мь, я́ко Человѣ́къ отъ Дѣ́вы ражда́ется на спасе́ніе мíра.

На хвали́техъ стихи́ры, на 4, гла́съ 6. Подо́бенъ: Ангельская предыди́те.

Предопредѣле́нное Отце́мъ пре́жде вѣ́къ* и предпроповѣ́данное проро́ки въ послѣ́дняя,* та́инство яви́ся,* и Бо́гъ вочеловѣ́чися,* пло́ть пріе́мъ отъ Дѣ́вы,* зи́ждется несозда́нный во́лею,* Сы́й быва́етъ Ца́рь Изра́илевъ,* Христо́съ прихо́дитъ.

Пою́ Тя́, Царю́, пелена́ми пови́таго,* рѣши́ши бо плени́цы мои́хъ грѣхопаде́ній* и сла́вою безсме́ртною* и нетлѣ́нною почти́въ мя́,* всего́ Отцу́ присво́илъ еси́,* содѣ́тельствуя и воззида́я.* Тѣ́мъ вопію́ Ти:* Ца́рь Изра́илевъ,* Христо́съ прихо́дитъ.

Свѣ́тъ, отъ Свѣ́та произше́дшій* и отъ Дѣ́вы возсія́вшій* су́щимъ на земли́* звѣздо́ю, ви́дѣвше, звѣздосло́вцы волсви́* Перси́дскую отлага́ху тму́* и звѣ́здную всю́ пре́лесть* и въ ра́дости ро́ждшемуся Бо́гу поя́ху:* благослове́нъ прише́дый Бо́гъ на́шъ,* сла́ва Тебѣ́.

Зла́къ младе́нческій неи́стовнѣ пожина́етъ,* отъ му́дрыхъ наруга́нъ бы́въ Иродъ волхво́въ,* и руку́ скверноубíйственну* на Тя́ воздвиза́ти мня́ше,* но прише́лъ еси́,* еги́птяномъ тму́ глубоча́йшую отгоня́,* съ ни́миже пое́мъ:* благослове́нъ прише́дый Бо́гъ на́шъ,* сла́ва Тебѣ́.

Сла́ва, гла́съ и подо́бенъ то́йже:

По́й, но́вый Изра́илю, пѣ́снь но́ву;* воспо́й пѣ́ніе небе́сное о́но;* весели́ся и красу́йся ра́достію* и лику́й, принеси́* свѣ́тло пра́зднственная:* Бо́гъ отъ ю́га пло́тію яви́ся.* То́йже хо́щетъ* во Іорда́нскихъ струя́хъ омы́тися,* я́ко Человѣ́къ.

И ны́нѣ, подо́бенъ то́йже:

Яви́лся еси́ на земли́* и съ человѣ́ки пожи́лъ еси́,* ке́саря повелѣ́ньми съ рабы́ написа́лся еси́;* созда́лся еси́, не преложи́вся,* неизмѣ́ненъ пребы́лъ еси́,* ве́сь Сы́й Бо́гъ, а́ще и воплоти́лся еси́.* Сла́ва Твоему́ смотре́нію,* че́сть, хвала́, великолѣ́піе* и ны́нѣ, и во вѣ́ки, ами́нь.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Благоуха́й, Сіо́не,* я́сли святы́я:* въ тебѣ́ бо Влады́ка* простре́ти и́мать* лучи́ Своего́ Божества́.

Сти́хъ: Бо́гъ отъ ю́га пріи́детъ,* и Святы́й изъ горы́ пріосѣне́нныя ча́щи.

Вѣ́ру вмѣ́сто зла́та,* любо́вь же, я́ко сми́рну,* я́ко лива́нъ, дѣя́нія* принесе́мъ Зижди́телю,* гряду́щему во Своя́.

Сти́хъ: Го́споди, услы́шахъ слу́хъ Тво́й и убоя́хся,* Го́споди, разумѣ́хъ дѣла́ Твоя́ и ужасо́хся.

Приближа́ется Христо́съ,* звѣзда́ предозаря́етъ* небе́сное мно́жество,* во́инства приница́етъ* у́мныхъ си́лъ.

Сла́ва, гла́съ 3. Студи́тово:

До́бліи му́ченицы и́стины, ва́съ ни ну́жда мучи́тельская, ни ласка́ніе преле́стное, ни уде́съ отсѣче́нія, ниже́ сме́ртная преще́нія отъ Боже́ственныя любве́ разлучи́ти возмого́ша. Тѣ́мъ, дерзнове́ніе иму́ще ко Христу́, Иже надъ всѣ́ми Бо́гу, сіе́ воздая́ніе болѣ́зненныхъ страда́ній проси́те отъ Христа́ прія́ти моли́твами ва́шими и ве́лію ми́лость.

И ны́нѣ, предпра́зднства, гла́съ 8. Анато́ліево:

Въ Виѳлее́мѣ ражда́ется всѣ́хъ Творе́цъ, и Еде́мъ отверза́етъ Превѣ́чный Ца́рь, пла́менное ору́жіе плещи́ дае́тъ, средостѣ́ніе граде́жа разори́ся; небе́сныя си́лы съ земны́ми совокупля́ются, а́нгели съ человѣ́ки держа́вное торжество́ составля́ютъ, чи́стіи Чи́стому пѣ́ніе приноша́ютъ. Ви́димъ Дѣ́ву, я́ко престо́лъ сла́вы херуви́мскій, вмѣсти́вшую ника́коже вмѣсти́маго Бо́га и нося́щую, Его́же серафи́ми со стра́хомъ прославля́ютъ, я́ко да пода́стъ мíру ве́лію ми́лость.


НА ЛИТУРГІИ,

Блаже́нна предпра́зднства, пѣ́снь 3-я, и му́чениковъ, пѣ́снь 6-я. Проки́менъ, гла́съ 4: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, я́ко одесну́ю мене́ е́сть, да не подви́жуся. Апо́столъ къ Ефесе́емъ, зача́ло 233. Аллилу́ія, [гла́съ 4]: Воззва́ша пра́ведніи, [и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 106. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́.]

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 209 – 217 об.

/ Къ оглавленію раздѣла /


Наверхъ / Къ титульной страницѣ

0