Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 22-й де́нь.
Предпра́зднство Рождества́ Христо́ва, и святы́я великому́ченицы Анастасíи Фармаколи́тріи, е́же е́сть Узорѣши́тельницы.

[ВЕЧЕРЪ,]
На Го́споди воззва́хъ: стихи́ры предпра́зднства 3 и святы́я 3.
Стихи́ры предпра́зднства, гла́съ 1. Подо́бенъ: Всехва́льніи му́ченицы.

Земля́ вся́, зря́щи* Бо́жіе снизхожде́ніе, весели́тся:* волсви́ да́ры Мнѣ́ прино́сятъ,* не́бо свы́ше вѣща́етъ звѣздо́ю,* а́нгели сла́вятъ,* па́стыріе, свиря́юще, дивя́тся,* я́сли подъе́млютъ,* я́коже престо́лъ Мя́ огнезра́чный.* Ра́дуйся, Ма́ти, сія́ ви́дящи.

Свѣ́тъ во открове́ніе язы́ковъ* прише́лъ еси́, обложи́мь Моего́ зра́ка подо́біемъ,* Сы́не Мо́й Безнача́льне,* Отца́ Пребезнача́льнаго* несказа́нное рожде́ніе,* обогати́ти бо гряде́ши* обнища́вшее человѣ́чество нището́ю,* е́юже обложи́мь еси́,* воспѣва́ю, Го́споди, Твое́ благоутро́біе.

Яко Младе́нца Мя́ зря́щи,* на Твои́хъ почива́юща, Ма́ти, дла́нѣхъ, возвесели́ся:* пріидо́хъ бо болѣ́знь всю́ отъя́ти Ада́мову,* ю́же пострада́* злѣ́йшимъ совѣ́томъ змíя,* дре́вле вкуси́въ, и сла́дости внѣ́ бы́въ ра́йскія,* и растли́вся.

Ины стихи́ры святы́я му́ченицы, гла́съ 8. Подо́бенъ: Что́ вы́ нарече́мъ?

Мíра кра́сныхъ пренебре́гши* и къ си́мъ пло́ти твоея́ не пощади́вши, честна́я,* всю́ вдала́ еси́ себе́ саму́ю служи́ти боголѣ́пно святы́мъ,* во страда́ніихъ терпѣли́вѣйше,* гно́й о́ныхъ отира́ющи* и къ му́жеству мудрѣ́йше* словесы́ му́дрыми укрѣпля́ющи,* моли́ е́же спасти́ся душа́мъ на́шимъ.

Бога́тство тре́бующимъ расточи́ла еси́ привре́менное, честна́я,* вѣ́чнующая те́плѣ взыску́ющи* и Христо́вымъ стопа́мъ Боже́ственнымъ* неукло́нною вѣ́рою послѣ́дующи, и вопія́ше:* уязви́хся Твои́мъ жела́ніемъ, Безсме́ртне,* Твои́хъ страда́ній сообра́зну мя́* и сла́вы Боже́ственныя соприча́стницу покажи́,* я́ко Ще́дръ и Человѣколю́бецъ.

Стра́сть претерпѣ́вши блаже́нную,* стра́сти на́ша, Анастасíе, и́стинно омыва́еши* струя́ми врачева́ній твои́хъ при́сно.* Тѣ́мъ тя́ по до́лгу блажи́мъ,* и любо́вію пра́зднуемъ* па́мять твою́,* и покланя́емся моще́мъ,* свяще́ніе почерпа́юще.* Моли́ спасти́ся душа́мъ на́шимъ.

Сла́ва, святы́я, гла́съ 2:

Воскресе́нія да́ръ прія́ла еси́, Анастасíе всехва́льная, пострада́вши на суди́щи: де́моновъ бо мно́жество погуби́вши, мо́рю предала́ еси́, страстоно́сице, му́ченице досточу́дная.

И ны́нѣ, предпра́зднства, гла́съ 4:

Виѳлее́ме, украша́йся, воспо́й, гра́де Сіо́не, ра́дуйся, пусты́не, предобруча́ющи ра́дость: звѣзда́ бо предыде́тъ въ Виѳлее́мъ, возвѣща́ющи хотя́щаго роди́тися Христа́, и верте́пъ пріе́млетъ Невмѣсти́маго всѣ́ми, и я́сли гото́вятся воспрія́ти Жи́знь вѣ́чную. Тому́ вси́ воспои́мъ и возопіи́мъ: спаси́ ду́ши на́ша, Іису́се Бо́же, воплоти́выйся на́съ ра́ди.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Гряде́тъ Христо́съ* лука́ваго сокруши́ти,* су́щія во тмѣ́ просвѣти́ти* и разрѣши́ти свя́занныя,* предусря́щимъ Того́.

Сти́хъ: Бо́гъ отъ ю́га пріи́детъ* и Святы́й изъ горы́ пріосѣне́нныя ча́щи.

Лику́й, Сіо́не,* верте́пе, благоукраси́ся,* Виѳлее́ме, гото́вися:* се́ бо Дѣ́ва* роди́ти Христа́ гряде́тъ.

Сти́хъ: Го́споди, услы́шахъ слу́хъ Тво́й и убоя́хся;* Го́споди, разумѣ́хъ дѣла́ Твоя́ и ужасо́хся.

Воспо́йте, оте́чествія язы́ковъ,* хвалу́ и сла́ву,* волсви́ съ да́ры,* па́стыріе, свиря́юще,* усе́рдно потщи́теся.

Сла́ва, святѣ́й, гла́съ 4. Студи́тово:

Живоно́снаго воста́нія Христо́ва тезоимени́тна бы́вши, честны́мъ жи́тельствомъ зва́нію преизя́щно послѣ́довала еси́ и, естество́ укрѣ́пльши, вмужи́вшися же мудрова́ніемъ, червлени́цу истка́ла еси́ обагре́ніемъ крове́й твои́хъ и, ца́рски, я́коже ски́птръ, кре́стъ держа́щи, Бо́гу и Спа́су сца́рствуеши, Анастасíе всеблаже́нная. Того́ моли́ и на́съ облиста́ти Боже́ственною сла́вою Его́.

И ны́нѣ, гла́съ то́йже:

Иса́іе, лику́й, Сло́во Бо́жіе воспріе́мъ, прорцы́ Отрокови́цѣ Марíи: купинѣ́ горѣ́ти и огне́мъ не сгара́ти заре́ю Божества́. Виѳлее́ме, благоукраси́ся, отве́рзи врата́, Еде́ме, и волсви́, иди́те ви́дѣти спасе́ніе, въ я́слѣхъ повива́емое: Его́же звѣзда́ показа́ верху́ верте́па, Жизнода́вца Го́спода, спаса́ющаго ро́дъ на́шъ.

Тропа́рь му́ченицѣ, гла́съ 4:

Агница Твоя́, Іису́се, Анастасíя, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.

Сла́ва, и ны́нѣ, предпра́зднства, гла́съ то́йже:

Гото́вися Виѳлее́ме, [отве́рзися всѣ́мъ, Еде́ме, красу́йся Евфра́ѳо, я́ко дре́во живота́ въ верте́пѣ процвѣте́ отъ Дѣ́вы: ра́й бо Оноя чре́во яви́ся мы́сленный, въ не́мже боже́ственный са́дъ: отъ него́же я́дше, жи́ви бу́демъ, не я́коже Ада́мъ у́мремъ; Христо́съ ражда́ется пре́жде па́дшій возста́вити о́бразъ].


НА ПОВЕЧЕРІИ,
Кано́нъ, гла́съ 6, Его́же краегране́сіе: Вели́каго четвертка́ до́лгую пѣ́снь пою́. Ирмо́съ по два́жды, тропари́ на 6 и па́ки ирмо́съ на схо́дѣ.

Пѣ́снь 1.

Ирмо́съ: Сѣче́ное сѣче́тся мо́ре Чермно́е, волнопита́емая же изсуша́ется глубина́, та́яжде ку́пно безору́жнымъ бы́вши проходи́ма, и всеору́жнымъ гро́бъ. Пѣ́снь же богокра́сная воспѣва́шеся: сла́вно просла́вися Христо́съ, Бо́гъ на́шъ.

Всевино́вная и вседержи́тельная Жи́знь, безмѣ́рная Му́дрость Бо́жія, созда́ до́мъ Себѣ́ отъ Чи́стыя Неискусому́жныя Ма́тере: хра́момъ бо тѣле́снымъ обложи́вся, сла́вно просла́вися Христо́съ, Бо́гъ на́шъ.

Тайноводя́щи волхвы́, созыва́етъ нача́токъ Бо́жія Му́дрость отъ язы́ковъ, безслове́сныя пре́жде напита́ти та́инственно, въ безслове́сныхъ я́слѣхъ трапе́за лежи́тъ та́йная: къ не́йже тща́тся, съ дарми́ путеше́ствующе, звѣздѣ́ предсія́ющей.

Да услы́шимъ ны́нѣ проро́ческія, исполня́емыя Ду́хомъ, гла́сы: Дѣ́ва бо, пріе́мши во чре́вѣ, прихо́дитъ Пресу́щественнаго роди́ти; Его́же волхво́мъ у́бо не́бо показа́, па́стыремъ же а́нгели, я́ко Младе́нца носи́ма.

Пѣ́снь 3.

Ирмо́съ: Госпо́дь, Сы́й, всѣ́хъ и Зижди́тель Бо́гъ, созда́нное, Безстра́стный, обнища́въ, Себѣ́ соедини́, и я́ко Младе́нецъ, носи́мь пло́тію, въ я́слѣхъ убо́гихъ покланя́емь быва́етъ, — яди́те, — вопія́, — Тѣ́ло Мое́ и вѣ́рою утверди́теся.

Избавле́ніе за мíръ истощи́ти ны́нѣ Свою́ Кро́вь Христа́ гряду́ща, Иродъ свирѣ́пствуетъ уби́ти пре́жде вре́мене, неи́стовствуя пре́жде неи́стовства Пила́това: тѣ́мже убíйственнымъ суровство́мъ младе́нецъ мно́жество закла́.

Безу́менъ му́жъ рече́: нѣ́сть Бо́га. Иже неи́стовства испо́лнився коне́чнаго, христоубíйствомъ неду́гуетъ, ра́зума же де́рзостію отпа́дъ, ко убіе́нію младе́нецъ неискусозло́бныхъ всего́ себе́ вооружи́ и зе́млю оскверни́ кровьми́.

Пѣ́снь 4.

Ирмо́съ: Прови́дѣвъ проро́къ та́йну Твою́ неизрече́нную, Христе́, провозгласи́: положи́лъ еси́ тве́рдую любо́вь крѣ́пости, Отче Ще́дрый, Единоро́днаго бо Сы́на, Благíй, очище́ніе въ мíръ посла́лъ еси́.

На руно́, я́ко до́ждь, низше́дъ, и, я́коже ка́пля, на зе́млю, на Ро́ждшую Тя́, Го́споди, гряде́ши ми́лостивно роди́тися и съ человѣ́ки пожи́ти: Единоро́днаго бо Тя́, очище́ніе, Оте́цъ въ мíръ посла́.

Пріобща́ешися человѣ́ческія, Христе́, пло́ти отъ сѣ́мене Авраа́мля, и благода́ть вмѣ́сто благода́ти гряде́ши пода́ти, и спасти́ о́бразъ, и обезтли́ти; Единоро́днаго бо Тя́, очище́ніе, Оте́цъ въ мíръ посла́.

Питіе́ но́вое, е́же дре́вле пи́ти Дави́дъ, жа́ждавъ, возжелѣ́, въ верте́пѣ происхо́дитъ источи́тися Виѳлее́мли и уста́вити прибы́вшую душе́вную жа́жду, Ада́мову же и Дави́дову, изъ ни́хже по пло́ти ражда́ется Христо́съ.

Пѣ́снь 5.

Ирмо́съ: Сою́зомъ любве́ связу́еми, я́ко братолю́бцы, Владу́щему всѣ́ми, мíръ зѣло́ Возлюби́вшему, и Да́вшему избавле́ніе Сы́на Возлю́бленнаго, дади́мъ сла́ву Даю́щему всѣ́мъ ми́ръ.

Неодержи́мую держа́щая и превы́спреннюю на возду́сѣ во́ду, бе́здны обуздава́ющая и моря́ востязу́ющая Бо́жія Прему́дрость, я́ко до́ждь, на руно́ низше́дши, всели́ся во утро́бу Дѣ́вы.

Ученики́ волхва́ Валаа́ма волхвы́ зове́тъ къ ра́зуму звѣздо́ю Христо́съ, о́блаки же не́бо одѣва́яй, пелена́ми повива́ется и въ я́слѣхъ возлежи́тъ, Его́же трепе́щутъ херуви́ми, въ верте́пѣ же вмѣща́ется исполня́яй вся́.

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́, и, волне́нія не ктому́ терпя́, я́ко Іо́на Влады́цѣ, вопію́ Ти: отъ тли́ мя возведи́.

Го́спода вѣ́дяще Тя́, небеса́ повѣ́даютъ Твою́ сла́ву, Спа́се, звѣздо́ю волхвы́ ны́нѣ съ да́ры призыва́юще къ позна́нію Твоему́ и боже́ственному поклоне́нію.

Скве́рну кто́ отте́ръ, да отве́ржетъ и та́ко Христу́ чи́стъ Чи́стому да прико́снется Младе́нцу, въ я́слѣхъ лежа́щу и глубину́ серде́цъ очища́ющу.

Пѣ́снь 7.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Зы́бля главо́ю, Иродъ, зла́я прови́дя, подви́жеся, благовре́менія ища́, умертви́ти жи́зни и сме́рти Бо́га, Иже всѣ́хъ е́сть Госпо́дь и Влады́ка тва́ри.

Ели́цы ва́съ, Христо́вы дру́зи, бѣ́гайте съ Бѣ́гающимъ въ Еги́петъ и, Сему́ до́брѣ покланя́ющеся, боголѣ́пно воззови́те и согла́сно просла́вите.

Иже кто́ со Мно́ю нѣ́сть, на Мя́ дѣ́етъ, — Христо́съ глаго́летъ, — не собира́яй же со Мно́ю расточа́ющему уподо́бися. Тѣ́мже сего́ убои́мся плотска́го низше́ствія.

Пѣ́снь 8.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное и, совоку́плени, и́мже не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Пито́мцы богому́дріи, въ Виѳлее́мъ Сло́ву предше́дшіи, со а́нгелы у́зримъ и па́стырьми чу́до, Су́щему въ вы́шнихъ сла́ву возсыла́юще Бо́гу, благоволе́ніе даю́щему человѣ́комъ и ми́ръ: Го́спода по́йте, дѣла́, и превозноси́те во вся́ вѣ́ки.

Зако́на любве́ держа́щеся, братолю́бія изволе́ніе да воспріи́мемъ, съ дру́гъ дру́ги ми́рствующе и еди́но сму́дрствующе: ми́ра бо Пода́тель прихо́дитъ Христо́съ, умиря́яй вся́ческая и спаса́я зову́щія: Го́спода по́йте, дѣла́, и превозноси́те во вся́ вѣ́ки.

Вмѣ́сто Сла́вы припѣ́въ: Благослови́мъ Отца́ и Сы́на и Свята́го Ду́ха, Го́спода.

Почита́етъ ле́стными словесы́ ражда́ющагося Христа́ Иродъ беззако́нный и къ волхво́мъ приклоня́шеся, я́ко и са́мъ бо поклони́тся; но не стыдя́шеся, гоня́ тая́щагося Христа́, ни младе́нцевъ уще́дри и вопи́ти не разумѣ́: Го́спода по́йте, дѣла́, и превозноси́те во вся́ вѣ́ки.

Та́же пое́мъ о́ба ли́ка вку́пѣ: Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки. И пое́мъ ирмо́съ: За зако́ны оте́ческія...

Пѣ́снь 9.

Ирмо́съ: Стра́нствія Влады́чня и безсме́ртныя трапе́зы во убо́зѣмъ верте́пѣ высо́кими умы́, вѣ́рніи, пріиди́те наслади́мся, воплоти́вшееся Сло́во неизрече́нно увѣ́дѣвше, Его́же велича́емъ.

Иди́те, — нача́льникомъ Иродъ рече́ волхво́въ, — поищи́те Отроча́те; егда́ же обря́щете Сего́, ми́ ско́ро возвѣсти́те, ле́сть въ се́рдцѣ ко́знствуя; но обличе́нъ бы́сть преле́стникъ, вотще́ беззако́ннуя.

Содѣ́тель, рожде́йся отъ Отца́ пре́жде вѣко́въ, ражда́ется отъ Дѣ́вы, му́дрость Сы́й Сло́во Бо́жіе и си́ла. Тѣ́мже еди́наго Сы́на вѣ́дяще, Богочеловѣ́ка Го́спода велича́емъ.

Яко человѣ́къ яви́лся еси́ существо́мъ, не мечта́ніемъ, та́ко Бо́гъ нра́вомъ воздая́нія, естество́мъ, Спа́се, е́же прія́лъ еси́. Тѣ́мже, отъ Дѣ́вы Боже́ственное прише́ствіе Твое́ чту́ще, велича́емъ.

Посе́мъ ирмо́съ и покло́нъ.



НА УТРЕНИ,
По 1-й стихоло́гіи сѣда́ленъ, гла́съ 1. Подо́бенъ: Ка́мени запеча́тану.

Просвѣти́ся тва́рь, Зижди́тель бо предгряде́тъ роди́тися въ верте́пѣ за неизрече́нную ми́лость. Па́стыріе, сря́щите со тща́ніемъ, зря́ще чу́до стра́шно. Пріиди́те, волсви́, да́ры рука́ми держа́ще и глаго́люще: сла́ва рожде́нному Царю́, сла́ва путево́дствовавшему ны́. Сему́, я́ко Царю́ всѣ́хъ, поклони́мся пло́тію.

Сла́ва, и ны́нѣ, гла́съ 4. Подо́бенъ: Ско́ро предвари́.

Боже́ственнѣ весели́тся тва́рь вся́ дне́сь: Христо́съ бо Госпо́дь, Бо́жій Сы́нъ, изъ Дѣ́вы ражда́ется Чи́стыя, ве́сь ро́дъ человѣ́чь обезсме́ртствуя, разрѣша́я же кля́тву прама́тере Евы. Тѣ́мъ я́ко Благодѣ́телю на́шему пѣ́ніе принесе́мъ.

По 2-й стихоло́гіи сѣда́ленъ, гла́съ 6. Подо́бенъ: Упова́ніе мíра.

Изъ Перси́ды ца́ріе зла́то, сми́рну и лива́нъ рожде́нному Царю́ и Бо́гу принесо́ша дре́вле, мы́ же ны́нѣ, предпра́зднующе Рождество́ Его́, благочестному́дреннѣ отъ души́ наде́жду, вѣ́ру и любо́вь принесе́мъ Ему́, Дѣ́ву пою́ще.

Сла́ва, и ны́нѣ, гла́съ 3. Подо́бенъ: Дѣ́ва дне́сь.

Дѣ́ву, ражда́ющую Превѣ́чное Сло́во, Іо́сифъ пра́ведный пѣсносло́вя, вопія́ше: ви́жду Тя́, бы́вшую хра́мъ Госпо́день, нося́щую вся́ человѣ́ки спасти́ прише́дшаго, и воспѣва́ющія Того́ за милосе́рдіе, боже́ственныя хра́мы показу́ющаго.

Кано́на два́: предпра́зднства на 8, и святы́я на 6.

Кано́нъ предпра́зднства, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Изъ дѣ́вственнаго о́блака вели́кое на́мъ возсія́ Со́лнце, Іису́съ Просвѣще́ніе, су́щіи во тмѣ́ пое́мъ Ему́, озаря́еми свѣ́тло Сего́ сія́ньми.

Язы́ковъ ча́яніе, Ца́рь мíра гряде́тъ ра́тника уби́ти. Срѣ́сти потщи́мся Того́, ражда́ема въ Виѳлее́мѣ на спасе́ніе на́ше.

Проро́честіи соверша́ются Боже́ственніи гла́си, стра́шное явле́ніе прозна́меновавше Христо́во: Агница бо приближа́ется роди́ти Агнца и Изба́вителя и всѣ́хъ Го́спода.

Богоро́диченъ: Тя́, Чи́стую Влады́чнюю голуби́цу, честну́ю, и непоро́чную, и до́брую въ жена́хъ, я́ко всѣ́хъ ро́ждшую Бо́га, ублажа́емъ вѣ́рно, Богоблаже́нная.

Кано́нъ святы́я, его́же краегране́сіе: Пою́ тя, му́ченице Анастасíе, любо́вію. Іо́сифъ. Гла́съ 8.
Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ.

Пѣ́ніе возсле́мъ Бо́гу, роди́тися хотя́щему пло́тію изъ Дѣ́вы въ Виѳлее́мѣ гра́дѣ и въ я́слѣхъ положи́тися Отроча́ти, я́ко младе́нцу, да спасе́тъ человѣ́ческій ро́дъ.

Еди́ныя вожделѣ́нныя Христо́вы, Анастасíе сла́вная, добро́ты и́щущи, претекла́ еси́ добро́ты мірскíя тве́рдостію нра́ва и безсме́ртнаго наслѣ́дія, му́ченице, сподо́билася еси́.

Но́щь ле́стнаго омраче́нія, просвѣще́ніемъ Ду́ха озаря́ема, честна́я, претекла́ еси́ смы́сленнѣ и ны́нѣ всели́лася еси́, идѣ́же е́сть Боже́ственное сія́ніе Несозда́нныя Тро́ицы.

Богоро́диченъ: Яви́ся неви́димый Бо́гъ, преесте́ственно ражда́емь, за благоутро́біе мно́гое изъ Тебе́, Дѣ́во Ма́ти, обнища́въ, бога́тый, я́ко да безсме́ртіемъ человѣ́ческій ро́дъ обогати́тъ.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Сло́вомъ простры́й небеса́, вхо́дитъ въ верте́пъ и въ безслове́сныхъ восклони́тися я́слѣхъ Христо́съ, безслове́сія на́съ за милосе́рдіе хотя́ изба́вити.

Вопіе́тъ проро́къ я́вственно: Бо́гъ на́шъ Се́й, не вмѣни́тся у́бо и́нъ кто́ къ Нему́. Изобрѣ́те вся́къ пу́ть худо́жества, человѣ́комъ соедини́вся.

Не терпи́тъ зрѣ́ти херуви́мъ, и ка́ко стерпя́тъ Тя́ я́сли, невмѣсти́маго естество́мъ, за милосе́рдіе мно́гое ражда́ема на́съ ра́ди отъ Дѣ́вы, Го́споди Человѣколю́бче?

Богоро́диченъ: Прови́дя Тя́ го́ру иногда́ Даніи́лъ проро́къ, изъ нея́же ка́мень отсѣче́ся, Богоро́дице, тре́бища и́дольскія истни́ и разори́, Всечи́стая Богоневѣ́сто.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Пелена́ми повива́емый Младе́нецъ, неосяза́емый Госпо́дь, хо́щетъ ви́дѣнъ бы́ти, въ я́слѣхъ возлежа́й; го́ры, взыгра́йте, и ра́достію боже́ственною, хо́лми, облецы́теся, свѣ́та исполня́еми.

Благоче́стнымъ дерзнове́ніемъ гони́телей притупи́ла еси́ разжже́нныхъ глаго́лъ стрѣ́лы, спаси́тельнымъ Сло́вомъ обогати́вшися, Анастасíе, и Боже́ственною любо́вію двиза́нія душе́вная упра́вивши.

То́чію, — му́ченице, вопія́ла еси́, — ищу́ Го́спода, къ еди́ной Того́ любви́ ду́шу привяза́хъ, Сего́ осія́тися чистѣ́йшими бога́тно блиста́ньми иду́, обы́чая простото́ю.

Богоро́диченъ: Неискусобра́чная Отрокови́це, руко́ю Нося́щаго всю́ тва́рь во утро́бѣ но́сиши, воплоща́ема, Его́же и ражда́ема восклоня́еши въ я́слѣхъ, младе́нца зри́ма Превѣ́чнаго.

Конда́къ предпра́зднства, гла́съ 3. Подо́бенъ: Дѣ́ва дне́сь.

Дѣ́ва дне́сь Превѣ́чное Сло́во въ верте́пѣ гряде́тъ роди́ти неизрече́нно; лику́й, вселе́нная, услы́шавши, просла́ви со а́нгелы и па́стырьми хотя́щаго яви́тися Отроча́ Мла́до, Превѣ́чнаго Бо́га.

Икосъ:

О, ужа́снаго вои́стинну и па́че сло́ва чудесе́! Еже бы́ти дая́й всѣ́мъ ра́ди бла́гости во чре́во святы́я Дѣ́вы вни́де, и въ верте́пѣ роди́тися гряде́тъ, и въ я́слѣхъ положи́тися. Звѣзда́ же Сего́ проповѣ́дуетъ свы́ше волхво́мъ, иду́щимъ на поклоне́ніе Его́ съ да́ры, издале́ча привлача́щи, со тща́ніемъ послѣ́дующія Валаа́ма прорече́нію, ре́кшаго: звѣзда́ хо́щетъ провозвѣсти́ти Отроча́ Мла́до, Превѣ́чнаго Бо́га.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Яко невѣ́сту тя́ Христо́ву восхваля́емъ, дѣ́во, я́ко Ѳе́клу честну́ю досто́йно почита́емъ. Тѣ́мже и въ па́мяти твое́й пролива́ются рѣ́ки исцѣле́ній: ты́ бо прія́ла еси́ благода́ть, я́ко храня́щи за́повѣди Госпо́дни си́лою Ду́ха.

Сла́ва, и ны́нѣ, предпра́зднства, гла́съ 8. Подо́бенъ: Повелѣ́нное та́йно.

Рождества́ Христо́ва предпра́зднственная соверша́юще, вѣ́рніи, торжеству́имъ и досто́йнѣ вси́ предусря́щимъ, я́ко волсви́, даронося́ще добродѣ́тели, воспѣ́ти а́нгельскую пѣ́снь но́вую отъ Дѣ́вы Богоотрокови́цы въ Виѳлее́мѣ безъ сѣ́мене ро́ждшемуся Бо́гу на́шему, Его́же славосло́вятъ вся́ческая.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Се́ возсія́ звѣзда́ издале́ча, я́же предвозвѣсти́ся дре́вле изъ Іа́кова; Человѣ́къ бы́въ необъе́млемый Бо́гъ, и зри́тся, пелена́ми повива́емь.

Всѣ́хъ Госпо́дь избавле́ніе зри́тся Младе́нецъ, въ дѣ́вственныхъ нѣ́дрѣхъ сѣдя́й, Иже въ нѣ́дрѣхъ Отчихъ, я́ко Сы́нъ, почива́яй.

Еде́ме, заключи́вшійся мнѣ́ окраде́ніемъ снѣ́ди иногда́, отве́рзися: ны́нѣ бо въ Виѳлее́мѣ ражда́ется Облекíйся въ мя́, отлучи́вый мя́ твоего́ безболѣ́зненнаго наслажде́нія.

Богоро́диченъ: Проро́къ Авваку́мъ Ду́хомъ прови́дя Тя́, Дѣ́во, го́ру Бо́жію, добродѣ́тельми пріосѣне́нную, изъ нея́же яви́ся на́мъ Просвѣща́яй ду́ши на́ша.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Рече́нія уже́ исполня́ются проре́кшихъ Боже́ственнымъ Ду́хомъ: Дѣ́ва бо и́детъ въ верте́пѣ роди́ти Всесоверше́ннаго.

Му́ченическое благосла́віе любо́вію взыска́вши, сего́ получи́ла еси́, тве́рдо пострада́вши несомнѣ́нною во́лею, терпѣливоду́шная.

Истка́нною отъ свы́ше благода́ти ри́зою и́стинно одѣ́ялася еси́ совлече́ніемъ тѣ́ла, страстоте́рпице му́ченице всехва́льная.

Богоро́диченъ: Плотоно́сецъ происхо́дитъ отъ Твоего́ свѣтоно́снаго ложесна́, Пречи́стая, Ца́рь Небе́сный, я́ко на престо́лѣ, въ я́слехъ возлегíй.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Евфра́ѳовъ до́ме, Виѳлее́ме, Нача́льникъ изы́детъ изъ тебе́ во Изра́или, призыва́я язы́ки отринове́нныя, я́коже предрече́, Ду́хомъ Михе́я озаря́емь.

Па́ствити па́ству Свою́ еди́ный крѣ́постію Іису́съ изъ Дѣ́вы роди́тся, до коне́цъ же земли́ возвели́чится, проро́къ богоглаго́ливый дре́вле провозвѣсти́.

Ду́хъ прему́дрости, Ду́хъ Бо́жій, Ду́хъ крѣ́пости и совѣ́та, зна́нія же и ра́зума, Ду́хъ Боже́ственнаго стра́ха изъ ложе́снъ Твои́хъ Сы́на вопло́щшагося, Дѣ́во, испо́лни.

Богоро́диченъ: Ору́жія вся́ вра́жія, Пречи́стая Всенепоро́чная, Чи́стая, и́стинно въ коне́цъ оскуди́ла еси́: Ты́ бо всѣ́хъ Бо́га родила́ еси́, копіе́мъ низложи́вшаго сего́ свирѣ́пство.

Инъ.

Ирмо́съ: Утренююще вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Возсія́ звѣзда́ Іу́дова отъ земли́ Халде́йскія, дви́жущи на поклоне́ніе звѣздосло́вцы, я́ко писа́ся.

Зако́нно подвиза́лася еси́, беззако́нныя побѣди́вши, му́ченице всесла́вная, си́лою Ду́ха.

Воскресе́ніе Бо́жіе образу́еши тезоимени́тствомъ, враги́ проклина́ющи неви́димыя, всехва́льная.

Богоро́диченъ: Въ верте́пѣ подзе́мнѣмъ роди́тися отъ Дѣ́вы Христо́съ гряде́тъ, да веселя́тся вся́ческая.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Се́ во Своя́ прихо́дитъ Христо́съ, присво́имся Ему́ благода́тію, добродѣ́тельми Боже́ственными, вѣ́рніи, и Сего́ пріи́мемъ, душа́ми и сердцы́ просвѣща́еми.

Ко́рень прозябе́ Іессе́евъ, и изъ него́ проше́дъ Бо́гъ на́шъ, наде́жда язы́ковъ, упокое́ніе и че́сть, я́коже дре́вле прорече́ Иса́ія, боже́ственно просвѣща́емь.

Плени́цы моя́ разрѣша́я мно́гихъ грѣхо́въ пеле́ннымъ пови́тіемъ, обогаща́я же мя́, лю́тѣ зло́бою обнища́вшаго, Іису́се мо́й, обнищава́еши воплоща́емь.

Богоро́диченъ: Обурева́етъ зима́ сопроти́вныхъ помышле́ній смире́нное се́рдце мое́ лука́выхъ духо́въ навѣ́тами, благолюби́вая Влады́чице: укроти́ сію́ хода́тайствомъ Твои́мъ.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Естество́, е́же отъ на́съ Благоутро́бный пріе́мъ, ви́димь е́сть я́ко Младе́нецъ, зи́ждай во чре́вѣ младе́нцы, и повива́ется, и въ я́слѣхъ возлега́етъ, и разрѣша́етъ мои́хъ страсте́й многоплете́нныя плени́цы бла́гостію.

Святы́хъ му́ченикъ слѣдя́щи терпѣли́вно Христа́ ра́ди по́двиги, и тѣ́хъ потре́бамъ служа́щи, и гное́нія, преподо́бная, отира́ющи, обогати́лася еси́ пресвѣ́тло, тѣ́хъ сія́ющи благосла́віемъ.

Ка́пли врачева́ній излива́еши ту́чами Боже́ственныхъ дарова́ній, и страсте́й рѣ́ки воспря́туеши, и помоществу́еши лю́тѣ бѣ́дствующимъ, всесла́вная му́ченице Христо́ва, Боже́ственнаго Воскресе́нія тезоимени́тая.

Богоро́диченъ: Исцѣля́я человѣ́ческое естество́, дре́внимъ преступле́ніемъ истлѣ́вшее, безъ тли́ но́въ ражда́ется Младе́нецъ и въ Твои́хъ нѣ́дрѣхъ, я́ко на престо́лѣ, сѣди́тъ, Безневѣ́стная, Оте́ческаго не оста́вль сосѣдѣ́нія Божество́мъ.

Конда́къ, гла́съ 2. Подо́бенъ: Вы́шнихъ ища́.

Во искуше́ніихъ и ско́рбехъ су́щіи, къ твоему́ хра́му притека́юще, пріе́млютъ честна́я дарова́нія отъ живу́щія въ тебѣ́ Боже́ственныя благода́ти, Анастасíе: ты́ бо при́сно мíру то́чиши исцѣле́нія.

Икосъ:

Воскресе́нія Христо́ва тезоимени́та су́щи, па́дша мя́ ны́нѣ воскреси́ моли́твами твои́ми, отъ чуде́съ твои́хъ ка́плю иска́павши, му́ченице, души́ мое́й и запале́нія лю́таго грѣха́ угаша́ющи. Мíръ бо спаса́еши отъ страсте́й многообра́зныхъ всегда́, и́миже и а́зъ искуша́емь е́смь: ты́ бо, всѣ́мъ вся́ подаю́щи, мíру то́чиши исцѣле́нія.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Всесоверше́нный ражда́ется, я́ко Младе́нецъ пелена́ми повива́емь, и Безнача́льный отъ Дѣ́вы пріе́млетъ нача́ло, обожи́ти прія́тіе искíй: да ра́дуется не́бо, и да весели́тся земля́.

Яко ца́рскою багряни́цею, обло́жся пло́тію, ны́нѣ предгряде́тъ отъ ложе́снъ Твои́хъ, мíра, Отрокови́це, Ца́рь, сокруши́въ враги́, я́ко си́ленъ, и умири́въ на́шу бори́му бы́вшую жи́знь.

Съ на́ми Бо́гъ яви́тся, воплоща́емь, разумѣ́йте, язы́цы проти́вніи, и покори́теся, на́шея удали́вшіися жи́зни: се́ воззва́ніе на́ше, Младе́нецъ въ я́слѣхъ Виѳлее́мскихъ возлещи́ хо́щетъ.

Богоро́диченъ: Отъ всѣ́хъ Тя́ родо́въ избра́, пала́ту нескве́рну, всели́выйся Ца́рь во утро́бу Твою́, Отрокови́це, Ему́же пѣснопое́мъ ны́нѣ благоче́стно: благослове́нъ еси́, Бо́же оте́цъ на́шихъ.

Инъ.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Го́рніи ли́цы славосло́вятъ безпло́тныхъ, на земли́ же покланя́емся, зря́ще, земнíи, на́мъ уподо́бльшагося и въ я́слѣхъ возлежа́ща Тя́, Христе́, Бо́же вся́ческихъ.

Огнь испепели́ла еси́ ле́стный, я́коже дѣ́ти, пла́мени пріобщи́вшися, пока́зоваше тепло́ раче́ніе, богому́драя, его́же къ твоему́ стяжа́ла еси́ Влады́цѣ и Жениху́.

Ту́чи пролива́еши врачева́ній, уставля́ющи пале́ніе неду́говъ, и лю́ди при́сно устроя́еши пѣснопѣ́ти: благослове́нъ еси́, Го́споди Бо́же, во вѣ́ки.

Богоро́диченъ: Чу́до, мы́сль удивля́ющее, соверша́емое въ Тебѣ́, Дѣ́во Ма́ти: роди́ти и́маши Бо́га и въ я́слѣхъ восклони́ти, херуви́момъ непристу́пнаго и невмѣсти́маго естество́мъ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Проро́къ богоглаго́ливыхъ рече́нія ны́нѣ испо́лнишася: Дѣ́ва приближа́ется роди́ти Го́спода. Вся́ земля́ да весели́тся, лику́ющи, и да ра́дуется во вся́ вѣ́ки.

Заря́ми свѣтя́ся Боже́ственныя благода́ти, зако́на сѣ́нь уставля́я, свѣтода́вецъ Іису́съ возсія́: омраче́нніи, у́зрите Свѣ́тъ вели́къ.

Бы́вша мя́ верте́пъ разбо́йниковъ, Го́споди, рожде́йся въ верте́пѣ, хра́мъ покажи́ Тво́й, и Отца́, и Боже́ственнаго Твоего́ Ду́ха, да сла́влю Тя́ во вся́ вѣ́ки.

Богоро́диченъ: Небе́сная изъ чре́ва Твоего́ звѣзда́ возсія́, звѣздосло́вцы подвиго́шася сію́ ви́дѣти, ра́зумомъ тоя́ просвѣ́щшеся Ду́хомъ, Пречи́стая Дѣ́во, при́сно Благослове́нная.

Инъ.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Ему́же предстоя́тъ горѣ́ ты́сящи и тмы́ а́нгеловъ, верте́пъ но́ситъ ражда́емаго; Его́же пое́мъ дѣла́ непреста́нно, я́ко Го́спода.

Хра́мъ Тро́ицы показа́лася еси́ въ Боже́ственныхъ хра́мѣхъ, моли́твами и поще́ніи, Анастасíе, упражня́ющися, — благослови́те, — взыва́ющи, — дѣла́ Госпо́дня, Го́спода.

Крѣпча́йшими словесы́ Хрисого́на, страстоте́рпице, укрѣ́пльшися, и́доловъ немощно́е попра́ла еси́ суровство́, до́блественнѣ пострада́вши.

Богоро́диченъ: О, Боговмѣсти́мая Отрокови́це! Роди́ши Младе́нца, Творца́ вѣко́въ и неизмѣ́ннаго Го́спода, въ Виѳлее́мѣ гра́дѣ за неизрече́нную ми́лость.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Се́ всѣ́хъ пріи́де воззва́ніе, очище́ніе, Христо́съ, спасе́ніе и си́ла, сокро́вище многоцѣ́нное кры́ется вну́трь верте́па, и́мже обогати́вшеся, волсви́ зла́то я́ко Царю́ прино́сятъ.

Христо́вы па́стыріе, побди́те, и у́мно во гра́дъ Виѳлее́мъ пріиди́те, и Бо́гу въ вы́шнихъ возопíйте: сла́ва и вели́чіе благоволи́вшему Младе́нцу яви́тися на́съ ра́ди за благосты́ню.

Пло́тію пелена́ми повива́емь, повива́яй мгло́ю зе́млю, песко́мъ же мо́ре, соу́зъ зо́лъ мои́хъ расто́рглъ еси́ и пра́вдою вся́ связа́лъ еси́, разсла́бленныя прило́гми борца́.

Богоро́диченъ: Черто́же и престо́ле Ца́рствующаго, горо́ Бо́жія, и гра́де избра́нный, и раю́, Со́лнца о́блаче всесвѣ́тлый, просвѣти́ ду́шу мою́, о́блакъ отгоня́щи беззако́ній мои́хъ мно́гихъ, Богора́дованная.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Игра́йте, го́ры, въ весе́ліи, и ра́достію, хо́лми, препоя́шитеся: ны́нѣ Дѣ́ва приближа́ется роди́ти Го́спода.

Де́нь весе́лія приноша́етъ ти́ тва́рь, Анастасíе, па́мять прославля́ющи, Его́же просла́вила еси́, Сло́ва, твои́ми кровьми́.

Свѣ́томъ чистѣ́йшимъ ны́нѣ осія́ема, моли́твами твои́ми просвѣща́тися свы́ше всѣ́мъ на́мъ проси́, му́ченице благода́рная.

Богоро́диченъ: Свѣ́тло вся́ тва́рь ны́нѣ да ра́дуется: Богоро́дица роди́ти гряде́тъ отъ Бо́га Бо́га Сло́ва, Человѣ́ка бы́вшаго.

Свѣти́ленъ. Подо́бенъ: Ду́хомъ во святи́лищи.

Хрисого́ну чу́дному, въ темни́цѣ заключе́ну, Анастасíе сла́вная, служи́ла еси́ и, сего́ словесе́мъ повину́вшися, въ Бо́зѣ сконча́ла еси́ муче́нія тече́ніе, отъ Него́же благода́ть исцѣле́ній пріе́мши, исцѣля́еши неду́ги.

Сла́ва, и ны́нѣ, предпра́зднства. Подо́бенъ то́йже:

Да ра́дуется не́бо, и земля́ да весели́тся. Верте́пе, просвѣти́ся, я́сли же, подыми́те Созда́вшаго человѣ́ка руко́ю я́ко Младе́нца, ражда́ющася отъ Дѣ́вы. Ангеловъ мно́жество, возопíйте я́сно: сла́ва Бо́гу въ вы́шнихъ.

На хвали́техъ стихи́ры на 4, гла́съ 6. Подо́бенъ: Ангельскія предыди́те.

Ны́нѣ дре́вняя разрѣша́ются явле́нія,* прія́тъ бо во утро́бѣ Дѣ́ва,* и́бо ка́мень изъ горы́ отсѣче́ся,* и же́злъ прозябе́ Іессе́евъ,* и роса́ ны́нѣ Гедео́нова* на земли́ пролія́ся.* Лю́діе, возопіе́мъ:* Ца́рь Изра́илевъ, Христо́съ прихо́дитъ.

Стра́ннаго Рождества́* стра́нны ве́щи ви́дятся:* ка́ко въ вы́шнихъ Отцу́ сосѣдя́й* въ я́слѣхъ безслове́сныхъ, восхотѣ́въ, восклоня́ется?* ка́ко Неосяза́емый* въ пелена́хъ?* ка́ко вездѣ́ Сы́й въ верте́пѣ?* Лю́діе, возопіе́мъ:* Ца́рь Изра́илевъ,* Христо́съ прихо́дитъ.

Иже чудеса́ Творя́й,* и Еги́пта уязвля́я,* одождя́я лю́демъ неразу́мнымъ ма́нну,* воплоща́ется и млеко́мъ пита́ется,* и Отроча́ зри́мо* бѣ́гаетъ гони́теля Ирода,* я́ко на о́блацѣ, Дѣ́вою Ма́терію носи́мь,* я́ко Иса́ія прозрѣ́* богови́днѣйшій.

Отроча́, пре́жде Сы́й Ца́рь вѣко́въ,* ражда́ется во́льно,* и Сы́нъ на́мъ даде́ся,* услы́шите, язы́цы,* Изра́илю, внуши́.* Разумѣ́йте и покаря́йтеся:* съ на́ми бо, Иже истни́тъ и разори́тъ отъ земли́* вся́кое и ца́рство, и нача́льство,* и́же Его́ не послу́шаша.

Сла́ва, подо́бенъ то́йже:

Жезло́мъ желѣ́знымъ упасе́нъ бу́деши, іуде́е,* я́ко не покори́выйся* и проро́комъ не вѣ́руяй:* Сы́ну бо ро́ждшуся* Оте́цъ наслѣ́діе дае́тъ язы́ки* и одержа́ніе земли́ всея́,* тебе́ же отри́нетъ скверноубíйственне,* вопи́ти бо не повину́ешися:* Ца́рь Изра́илевъ, Христо́съ прихо́дитъ.

И ны́нѣ, подо́бенъ то́йже:

Взыгра́й, Дави́де,* изъ чре́слъ бо твои́хъ Христо́съ;* ра́дуйся, Іессе́е,* процвѣте́ бо ко́рень тво́й;* отъ бедра́ твоего́, Іу́до, прихо́дитъ Госпо́дь,* по прорече́нію Валаа́мову.* Ви́дите, язы́цы, по вели́кому Иса́іи:* се́ роди́тъ Отроча́ Емману́ила* Дѣ́ва Всечи́стая.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Приближа́ется Христо́съ,* звѣзда́ предозаря́етъ* небе́сное мно́жество,* во́инства приница́етъ* у́мныхъ си́лъ.

Сти́хъ: Бо́гъ отъ ю́га пріи́детъ* и Святы́й изъ горы́ пріосѣне́нныя ча́щи.

Ра́дуйся, Виѳлее́ме,* па́ствуяй наста́,* Изра́иля спаса́яй,* не ктому́ мнíй бу́деши,* во Іу́довыхъ влады́кахъ.

Сти́хъ: Го́споди, услы́шахъ слу́хъ Тво́й и убоя́хся;* Го́споди, разумѣ́хъ дѣла́ Твоя́ и ужасо́хся.

Пріиди́те, земноро́дніи,* со а́нгелы и мы́* соста́вимъ ли́къ:* сла́ва въ вы́шнихъ* Бо́гу возопіи́мъ.

Сла́ва, святы́я, гла́съ 5. Византíево:

Предпра́зднственный де́нь дне́сь вочеловѣ́ченія Христа́ Бо́га и всехва́льныя му́ченицы пра́здникъ совозсія́ Анастасíи: се́ Дѣ́ва въ Виѳлее́мъ приближа́ется, Младе́нца, пелена́ми пови́та, восклони́ти въ я́слехъ безслове́сныхъ, свободи́вшаго ны́ отъ дре́внія кля́твы и спаса́ющаго ду́ши на́ша.

И ны́нѣ, предпра́зднства, гла́съ то́йже:

Не дря́хлуй, Іо́сифе, зря́ Мою́ утро́бу: узри́ши бо ражда́емаго отъ Мене́, и возра́дуешися, и я́ко Бо́гу поклони́шися, — Богоро́дица глаго́лаше ко Своему́ обру́чнику, хотя́щи роди́ти Христа́. Сію́ воспои́мъ, глаго́люще: ра́дуйся, Обра́дованная, съ Тобо́ю Госпо́дь и Тебе́ ра́ди съ на́ми.


НА ЛИТУРГІИ,

Блаже́нна предпра́зднства пѣ́снь 3-я и святы́я пѣ́снь 6-я. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Гала́томъ, зача́ло 208. Аллилу́ія, гла́съ 1: Терпя́ потерпѣ́хъ Го́спода, и вня́тъ ми́ [и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе Луки́, зача́ло 33. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 199 – 209.

/ Къ оглавленію раздѣла /


Наверхъ / Къ титульной страницѣ

0