Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 33.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 21-й де́нь.
Предпра́зднство Рождества́ Христо́ва.
И преставле́ніе и́же во святы́хъ отца́ на́шего Петра́, митрополи́та Кíевскаго и всея́ Россíи.

Аще хра́мъ или́ настоя́тель изво́литъ, твори́мъ бдѣ́ніе.

НА МАЛѢЙ ВЕЧЕРНИ,
[На Го́споди воззва́хъ:] стихи́ры свята́го, гла́съ 1. Подо́бенъ: Небе́сныхъ чино́въ.

Небе́сныхъ чино́въ ра́дованіе* и на земли́ архіере́евъ похвала́,* свяще́нниковъ сла́ва, Пе́тре му́дре,* мона́шествующихъ пра́вило и Це́ркве утвержде́ніе.* Тѣ́мже тя́ мо́лимъ:* не оскудѣ́й, помоществу́я на́мъ,* притека́ющимъ къ тебѣ́ рабо́мъ твои́мъ.

На небесѣ́хъ водворя́яся,* пріими́ ны́нѣ хвалу́ ча́дъ твои́хъ, о́тче,* пра́зднующихъ че́стно па́мять успе́нія твоего́,* и пода́ждь серде́чная проше́нія,* уго́дниче Христо́въ Пе́тре,* и Пречи́стѣй Ма́тери прилѣ́жно моли́ся* спасти́ отъ бѣ́дъ ду́ши на́ша.

Сла́ва, гла́съ 6. Самогла́сенъ:

Боже́ственная благода́ть въ па́мяти успе́нія твоего́, осѣня́ющи притека́ющія къ ра́цѣ моще́й твои́хъ, неду́говъ исцѣле́ніе подава́етъ, святи́телю о́тче Пе́тре, моли́ся о душа́хъ на́шихъ.

Или́ предпра́зднства, гла́съ то́йже:

По́йте Го́споду, ро́ждшемуся отъ Дѣ́вы; воспо́йте пѣ́снь, во́инства небе́сная, земнíи восплещи́те рука́ми: Бо́гъ бо въ человѣ́цѣхъ, Человѣ́къ Бо́гъ воздая́ніемъ. Се́ та́инство соверша́ется на́мъ дне́сь, Ца́рь Изра́илевъ, Христо́съ прихо́дитъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ духо́вный* Пе́тръ яви́ся* поспѣше́ніемъ благода́ти Свята́го Ду́ха,* Имже ны́нѣ соше́дшеся,* того́ воспое́мъ.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Ра́дуйся, святи́телей,* Пе́тре, похвало́,* свяще́нниковъ сла́во,* пра́вило мона́ховъ,* Це́ркве утвержде́ніе.

Сти́хъ: Восхва́лятся преподо́бніи во сла́вѣ* и возра́дуются на ло́жахъ свои́хъ.

Пріими́ ны́нѣ пѣ́ніе* ча́дъ твои́хъ, о́тче,* и лю́бящимъ тя́* подава́й* обы́чная проше́нія.

Сла́ва, и ны́нѣ, гла́съ то́йже:

До́ме Евфра́ѳовъ,* гра́де святы́й,* проро́ковъ сла́во,* украси́ до́мъ,* въ не́мже Боже́ственный ражда́ется.

Тропа́рь, гла́съ 4:

Яже пре́жде безпло́дная, земле́, ны́нѣ весели́ся: се́ бо Христо́съ свѣти́льника въ тебѣ́ показа́, я́вѣ сія́юща въ мíрѣ и исцѣлева́юща неду́ги и болѣ́зни на́ша. Сего́ ра́ди лику́й и весели́ся со дерзнове́ніемъ: святи́тель бо е́сть Вы́шняго, сія́ содѣ́ловаяй.

Инъ тропа́рь, гла́съ 8:

Лику́й свѣ́тло, благосла́внѣйшій гра́де Москва́, имѣ́яй въ себѣ́ архіере́я Петра́, я́ко зарю́ со́лнца, всю́ Россíю чудодѣя́ніи озаря́юща: то́й бо не́мощи врачу́етъ и неду́ги, я́ко тму́, прого́нитъ отъ вопію́щихъ ему́: ра́дуйся, іера́рше Бо́га Вы́шняго, тобо́ю сія́ па́ствѣ твое́й содѣ́ловающаго.

Сла́ва, и ны́нѣ, предпра́зднства, гла́съ 4:

Гото́вися Виѳлее́ме, отве́рзися всѣ́мъ, Еде́ме, красу́йся Евфра́ѳо, я́ко дре́во живота́ въ верте́пѣ процвѣте́ отъ Дѣ́вы: ра́й бо Оноя чре́во яви́ся мы́сленный, въ не́мже боже́ственный са́дъ: отъ него́же я́дше, жи́ви бу́демъ, не я́коже Ада́мъ у́мремъ; Христо́съ ражда́ется пре́жде па́дшій возста́вити о́бразъ.

И отпу́стъ.



НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., [1-й антифо́нъ.] На Го́споди воззва́хъ.., стихи́ры на 8: предпра́зднства 3 и свята́го 5.
Предпра́зднства стихи́ры, гла́съ 4. Подо́бенъ: Яко до́бля.

Предпра́зднственныя пѣ́сни* мы́сли пра́востію* Христо́ва Рождества́ предвозгласи́мъ:* Отцу́ бо и Ду́ху* Сы́й равноче́стенъ,* за милосе́рдіе въ на́ше обо́лкся смѣше́ніе,* хо́щетъ роди́тися въ Виѳлее́мѣ;* Его́же Рождество́ несказа́нное* па́стыріе со а́нгелы воспѣ́ша.

Въ кимва́лѣхъ возгласи́мъ,* въ пѣ́снехъ воскли́кнемъ:* Христо́во явле́ніе показа́ся,* проро́ческая проповѣ́данія коне́цъ прія́ша.* Его́же бо прореко́ша* пло́тію человѣ́комъ яви́тися,* ражда́ется во святѣ́мъ верте́пѣ,* и въ я́слѣхъ возлега́етъ я́ко Отроча́,* и пелена́ми повива́ется я́ко Младе́нецъ.

Виѳлее́ме, угото́вися,* Еде́ме, ны́нѣ отве́рзися:* роди́ти Всесвята́я и́детъ.* Небеса́ да веселя́тся,* да игра́ютъ человѣ́цы,* въ я́слѣхъ Жи́знь, въ верте́пѣ Бога́тый,* прихо́дитъ мно́жества ра́ди ми́лости,* нищету́ Ада́мову воспріи́мъ,* кромѣ́ преложе́нія и смѣше́нія.

Стихи́ры чудотво́рца Петра́, гла́съ 2. Подо́бенъ: Кíими похва́льными.

Кíими похва́льными вѣнцы́ увязе́мъ святи́теля? Свяще́нства вѣне́цъ, благоче́стія управле́ніе, свѣ́тлое Це́ркве украше́ніе, исто́чникъ Боже́ственныхъ исцѣле́ній неисчерпа́емый, проли́тіе дарова́ній духо́вныхъ, рѣку́ мно́гихъ чуде́съ, зе́млю Россíйскую веселя́ща тече́ньми, Петра́, те́плаго предста́теля на́шего и храни́теля. [Два́жды.]

Кíими смире́нными устна́ми воспои́мъ святи́теля? Ди́внаго въ чудесѣ́хъ и безпло́тныхъ сожи́теля, освяще́ннаго отъ пеле́нъ, столпа́ Це́ркве неподви́жима, весе́ліе земли́ на́шея, пра́вды пра́вило, сирота́мъ пита́теля, оби́димыхъ засту́пника и больны́хъ врача́ безме́здна. [Два́жды.]

Пріиди́те, вѣ́рныхъ собо́ри, псало́мски воспле́щимъ рука́ми: печа́льныхъ утѣше́ніе и отча́янныхъ засту́пника, боже́ственнаго Петра́ воспѣва́юще, похвалу́ земли́ Россíйскія и всего́ свяще́нства украше́ніе, рѣку́ ми́лости, вои́стинну Боже́ственнаго Христо́ва смире́нія ревни́теля, подаю́щаго мíрови ве́лію ми́лость.

Сла́ва, гла́съ 1. Самогла́сенъ:

Боже́ственнаго свы́ше явле́нія свѣ́тлостію просвѣти́вся, Пе́тре, тве́рдый умо́мъ, зако́новъ избѣ́глъ еси́ есте́ственныхъ, я́коже сѣ́ни, благода́тію и́стинною, всему́дре, окропле́нъ; отону́дуже, прія́телище Пресвята́го Ду́ха бы́въ, чуде́съ да́ръ воспрія́лъ еси́ и обогаща́еши си́ми ча́да твоя́. И ны́нѣ, съ первосвяти́тели предстоя́ Христу́, моли́ся о душа́хъ на́шихъ.

И ны́нѣ, предпра́зднства, гла́съ то́йже. Подо́бенъ: Пріими́, Симео́не.

Пріими́те, я́сли, Его́же въ купинѣ́ Моисе́й законополо́жникъ прови́дѣ въ Хори́вѣ, ны́нѣ ражда́ема отъ Дѣ́вы Ду́хомъ Боже́ственнымъ. Та́ е́сть, Яже въ зако́нѣ рече́нная, Та́ е́сть про́роческая печа́ть, Яже Бо́га пло́тію тлѣ́ннымъ явля́ющи, Ему́же поклони́мся.

Вхо́дъ. Проки́менъ дне́. Чте́нія три́.

При́тчей чте́ніе. [Глава́ 3.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе. [Глава́ 4-5.]

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

Прему́дрости Соломо́ни чте́ніе. [Глава́ 10.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

На литíи стихи́ра хра́ма и свята́го, гла́съ 4:

Свѣ́тло дне́сь Це́рковь украша́ется и ра́дуется, зову́щи, уясни́ся моя́ добро́та па́че всѣ́хъ: святи́телемъ бо красота́, сла́вный Пе́тръ взы́де на небеса́ къ Царю́ всѣ́хъ ца́рствующему. Пріиди́те же, празднолю́бцы, правосла́вныхъ собо́ри, пѣ́нія и похвалы́ Тому́ принесе́мъ, зову́ще: о святи́телей добро́то! Моли́ся Христу́ Бо́гу изба́вити христоимени́тыя лю́ди отъ вся́кія ско́рби и спасти́ ду́ши на́ша.

Гла́съ 6:

Ду́ха Боже́ственная благода́ть святи́теля тя́ показа́ и учи́теля изря́дна яви́; тѣ́мъ, мра́къ нече́стія обличи́въ, лю́ди богоразу́мія уче́ньми просвѣти́лъ еси́, святи́телю богому́дре Пе́тре, архіере́евъ сла́ва еси́ и красота́, и всѣ́мъ бы́лъ еси́ извѣ́стенъ о́бразъ уче́ній. Дерзнове́ніе имѣ́я ко Христу́ Бо́гу, Того́ при́сно моли́ спасти́ся душа́мъ на́шимъ.

До́блестей твои́хъ, свяще́нне о́тче, пло́дъ уясни́ вѣ́рныхъ сердца́, кто́ бо слы́ша безмѣ́рное твое́ смире́ніе и терпѣ́нію не удиви́тся? И е́же къ ни́щимъ ти́хость, и къ скорбя́щимъ ми́лованіе. Вся́ боголѣ́пно научи́лъ еси́, святи́телю Пе́тре, и ны́нѣ на небесѣ́хъ, неувяда́емымъ вѣнча́вся вѣнце́мъ, моли́ о душа́хъ на́шихъ.

Сла́ва, гла́съ 6. Самогла́сенъ:

Преподо́бне треблаже́нне свяще́нный о́тче, па́стырю до́брый, я́ко Пастыренача́льника, Христа́, учениче́, положи́вый ду́шу твою́ за о́вцы, са́мъ и ны́нѣ, прехва́льне святи́телю Пе́тре, испроси́ моли́твами твои́ми дарова́ти на́мъ ве́лію ми́лость.

И ны́нѣ, предпра́зднства, гла́съ то́йже:

Сіо́не, торжеству́й, Іерусали́ме, весели́ся, гра́де Христа́ Бо́га, подыми́ Зижди́теля, въ верте́пѣ и я́слѣхъ вмѣща́емаго; отве́рзите ми́ врата́, и вше́дъ въ ня́, узрю́ я́ко Младе́нца пелена́ми повива́емаго, дла́нію же содержа́щаго тва́рь. Его́же пою́тъ а́нгели непреста́ннымъ гла́сомъ, Жизнода́вца Го́спода, спаса́ющаго ро́дъ на́шъ.

На стихо́внѣ стихи́ры предпра́зднства, гла́съ 1. Подо́бенъ: Всехва́льніи му́ченицы.

Ви́дящи держи́ма* рука́ми Свои́ми, Всечи́стая, Творца́,* вѣща́ше: Ча́до Сла́дкое,* ка́ко Тя́ Младе́нца зрю́* и разумѣ́ти не могу́ непостижи́маго* Твоего́ ны́нѣ снизхожде́нія?* Пою́ держа́ву Твою́,* покланя́юся милосе́рдію Твоему́,* его́же ра́ди спасти́ мíръ прише́лъ еси́.

Сти́хъ: Бо́гъ отъ ю́га пріи́детъ,* и Святы́й изъ горы́ пріосѣне́нныя ча́щи.

Яви́ся, воплоща́емь* изъ Тебе́, Ма́ти Неискусобра́чная,* и въ верте́пѣ ражда́емь,* и ви́димь боже́ственными* го́рними чи́нми Неви́димый:* человѣ́ка бо пріи́де изба́вити* отъ ле́сти зміи́ныя.* Не удивля́йся, Всенепоро́чная, о рождествѣ́,* естество́ превосходя́щемъ.

Сти́хъ: Го́споди, услы́шахъ слу́хъ Тво́й и убоя́хся,* Го́споди, разумѣ́хъ дѣла́ Твоя́ и ужасо́хся.

Тя́, Младе́нца пресоверше́нна, зрю́,* въ я́слѣхъ возлежа́ща,* не вѣ́мъ же та́йны* глубину́ несказа́нну:* ка́ко и по рождествѣ́ нетлѣ́нна пребы́хъ,* зако́ны преше́дши естества́?* Ку́ю у́бо хвалу́ Тебѣ́ принесу́?* Ка́ко просла́влю Тя́? —* Дѣ́ва Отрокови́ца вѣща́ше.

Сла́ва, гла́съ 8:

Пріиди́те, вси́ вѣ́рніи, согла́сно воспои́мъ Петра́ всеблаже́ннаго, благоче́стія свѣти́ло, воздержа́нія пра́вило, терпѣ́нія сто́лпъ, простоты́ сокро́вище, смире́нія рѣку́ оби́льную, ни́щихъ утѣше́ніе, стра́нныхъ страннопріе́мника, и и́стинныя любве́ Христо́вы дѣ́лателя вои́стинну блаже́ннаго. Се́й у́бо жи́въ и, преше́дъ, человѣ́комъ засту́пникъ и спаси́тель показа́ся, болѣ́зней и страсте́й неисцѣ́льныхъ вра́чь и отъ вся́ческихъ напа́стей свободи́тель, и Христа́ мо́литъ спасти́ся душа́мъ на́шимъ.

И ны́нѣ, гла́съ то́йже:

Воспріими́, Виѳлее́ме, Бо́жію митропо́лію, Свѣ́тъ бо незаходи́мый въ тебѣ́ роди́тися прихо́дитъ; а́нгели, удиви́теся на небеси́, человѣ́цы, просла́вите на земли́, волсви́, отъ Перси́ды пресла́вный да́ръ принеси́те, па́стыріе, свиря́юще, трисвято́е пѣ́ніе сла́дцѣ воспо́йте: вся́кое дыха́ніе да хва́литъ Вседѣ́теля.

Тропа́рь свята́го, гла́съ 4: Якоже пре́жде безпло́дная... [Пи́санъ на ма́лѣй вече́рни.] Сла́ва, и ны́нѣ, предпра́зднства: Гото́вися, Виѳлее́ме...



НА УТРЕНИ,
На Бо́гъ Госпо́дь: Тропа́рь предпра́зднства: Гото́вися, Виѳлее́ме.., два́жды. Сла́ва, свята́го. И ны́нѣ, предпра́зднства.

По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й.

Вели́кій Христо́въ святи́тель да воспое́тся, сто́лпъ свѣ́тлый, просвѣща́ющій ны́ чуде́съ свѣтлостьми́, о́блакъ ро́сный, пла́мень страсте́й погаша́ющій и ороша́ющій вѣ́рныхъ мы́сли, боже́ственный Пе́тръ. [Два́жды.]

Сла́ва, и ны́нѣ, предпра́зднства, гла́съ то́йже:

Приклони́вый небеса́ и въ Дѣ́ву всели́выйся, происхо́дитъ пло́тію въ Виѳлее́мстѣмъ верте́пѣ роди́тися, я́коже пи́шется, яви́тися же Младе́нецъ, младе́нцы оживля́яй во утро́бѣ. Сего́, ра́дующеся, ны́нѣ сря́щимъ вси́ се́рдца пра́востію.

По 2-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.

Ми́лостивому Христо́ву уго́днику, незло́бивому и кро́ткому, вси́ тебѣ́ любо́вію зове́мъ, прилѣ́жно моля́щеся: разрѣши́ междоусо́бную страсте́й на́шихъ бра́нь, разруши́ злочести́вая ага́рянъ кова́рствія, и покори́ ты́я царе́мъ правовѣ́рнымъ, присноблаже́нне, и вся́ческихъ изба́ви искуше́ній, любо́вію воспѣва́ющихъ тя́. [Два́жды.]

Сла́ва, и ны́нѣ, предпра́зднства, гла́съ 1:

Весели́ся, Виѳлее́ме, Евфра́ѳо, гото́вися: се́ бо Агница, Па́стыря Вели́каго въ ложесна́хъ нося́щи, роди́ти гряде́тъ, и, предви́дяще боже́ственную звѣзду́, волсви́ ра́дуются, съ па́стырьми пою́ще пра́востію серде́чною.

[Велича́ніе:

Велича́емъ тя́, святи́телю о́тче Пе́тре, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы, внуши́те вси́ живу́щіи по вселе́ннѣй...]

По поліеле́и сѣда́ленъ, гла́съ 5. Подо́бенъ: Собезнача́льное Сло́во.

Правосла́вными сія́ніи, я́ко во тмѣ́ лежа́щія ны́, отягче́нныя во грѣсѣ́хъ, просвѣти́лъ еси́ и вся́ кова́рства лука́выхъ духо́въ отгна́лъ еси́, чуде́съ самодѣ́теленъ яви́вся, о́тче, сла́вимь про́мысломъ Вы́шняго бы́лъ еси́. Тѣ́мъ тя́ вѣ́рою почита́емъ, святи́телю Пе́тре, апо́столовъ и патріа́рховъ единокро́вниче. [Два́жды.]

Сла́ва, и ны́нѣ, предпра́зднства, гла́съ и подо́бенъ то́йже:

Виѳлее́ме, гото́вися на срѣ́теніе Дѣ́вы Марíи и Богома́тере: се́ бо гряде́тъ къ тебѣ́, Младе́нца нося́щи Христа́, Собезнача́льнаго Отцу́ и Ду́ху при́сно, Его́же въ верте́пѣ роди́тъ и по Рождествѣ́ Дѣ́ва па́ки яви́тся.

Та́же степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. Вся́кое дыха́ніе... Ева́нгеліе отъ Іоа́нна, зача́ло 35 отъ полу́.

По 50-мъ псалмѣ́ стихи́ра, гла́съ 6:

Егда́ преставле́ніе честна́го твоего́ тѣ́ла, о́тче, приспѣ́, тогда́ мно́жество вѣ́рныхъ, обступи́вше о́дръ, уми́льно провожда́ху тя́. И о́въ бо зря́ тя, благословля́юща лю́ди, удивля́шеся, кня́зь же Іоа́ннъ со слеза́ми вопія́ше: о влады́ко, что́ ти возда́мъ проти́ву твоего́ благодѣя́нія, е́же на́мъ дарова́лъ еси́, пріе́мъ отъ Бо́га благода́ть? Тѣ́мже, святи́телю Пе́тре, моли́ся прилѣ́жно Христу́ Бо́гу на́шему спасти́ся невоева́ну гра́ду твоему́.

Кано́нъ предпра́зднства со ирмосо́мъ на 6 и свята́го два́ на 8.

Кано́нъ предпра́зднства, [его́же краегране́сіе, по алфави́ту. Іо́сифъ. Гла́съ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Ра́дуйся, не́бо, и земле́, весели́ся: Бо́гъ бо на́шъ, бы́въ пло́тію отъ Дѣ́вы Отрокови́цы, ражда́ется и пелена́ми повива́ется, плени́цы же разрѣша́етъ мои́хъ прегрѣше́ній, я́ко благоутро́бенъ. [Два́жды.]

Цари́ца Чи́стая Царя́ всѣ́хъ ражда́етъ па́че ума́, вы́шнее вѣ́рнымъ Ца́рство отверза́ющаго и и́же въ на́съ окая́нно ца́рствующій всегда́ грѣ́хъ коне́чно отъе́млющаго.

Писа́нія проро́ческая коне́цъ пріе́млютъ: се́ бо, Его́же провозвѣсти́ша Христа́, во гра́дѣ Виѳлее́мѣ явля́ется воплоща́емь. Сего́ ны́нѣ предпра́здновати Рождество́ потщи́мся пра́востію мы́сли дне́сь].

Кано́нъ свята́го Петра́, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Отче богому́дре, святи́телю Пе́тре, отве́рзи моя́ недосто́йная устна́ воспѣ́ти тя́ и пріими́, я́ко благово́нное кади́ло, отъ убо́жества моего́, е́же тебѣ́ принесо́хъ, недосто́йный.

Воспои́мъ вси́ вели́каго святи́теля Петра́, почти́мъ засту́пника и утвержде́ніе земли́ Россíйскія, его́же дарова́ Госпо́дь гра́ду Москвѣ́ храни́теля бо́дра.

Спаси́тельнымъ Христо́вымъ за́повѣдемъ послѣ́довалъ еси́, прему́дре святи́телю Пе́тре, вдо́въ и сиро́тъ бы́лъ еси́ предста́тель и земли́ Россíйскія вели́кое защище́ніе.

Богоро́диченъ: Пречи́стая Богоро́дице, Содѣ́теля и Спа́са ро́ждшая всѣ́хъ пою́щихъ Тя́, спаси́ отъ бѣ́дъ гра́дъ Тво́й, непреста́нно моля́щи Сы́на Твоего́ и Бо́га на́шего за ны́.

Другíй кано́нъ чудотво́рца Петра́, гла́съ 1.
Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Благода́ть Ду́ха пріе́мъ, о́тче, во твое́ се́рдце, Христо́въ святи́телю, уясни́ язы́къ и се́рдце просвѣти́ твои́хъ пѣве́цъ, е́же твою́ па́мять воспѣ́ти свѣ́тло, Пе́тре преподо́бне.

Вели́кій ны́нѣ Пе́тръ, па́стырь Це́ркве держа́вный, па́стыря вку́пѣ и пасо́мыя и всю́ Це́рковь въ па́мять свою́ призыва́етъ: тѣ́мже, собра́вшеся, я́ко о́бщему отцу́ свѣ́тло торжеству́емъ.

Аще и побѣжда́ютъ твоя́ исправле́нія словеса́ на́ша и помышле́нія, о́тче Пе́тре, оба́че душе́вное на́ше предложе́ніе, по си́лѣ приноси́мое тебѣ́, пріими́ съ любо́вію, досточу́дне: е́же бо по досто́инству пѣ́сни тебѣ́ соплести́ не возмо́жно е́сть и всѣ́мъ на́мъ.

Богоро́диченъ: Свѣ́тлое прихо́дитъ со́лнце, отъ вра́тъ заключе́нныхъ явля́ющееся: но́щь бо явле́ннѣ упраздни́ся, де́нь же прибли́жися. Тѣ́мже, естество́ на́ше тлѣ́нное, пріе́мли Влады́ку отъ Дѣ́вы, Тебе́ ра́ди тлѣ́нна быва́ема.

Катава́сія: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Пѣ́снь 3.

[Ирмо́съ: Яко непло́ды роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Даніи́лъ Тя́, отъ горы́ дѣ́вственныя ка́мень, Сло́ве, отсѣ́ченъ зри́тъ и истнѣва́ющь хра́мы и́дольскія держа́вою Твое́ю; сего́ ра́ди Тя́ стра́хомъ сла́вимъ. [Два́жды.]

Отъ восто́ка волсви́ Тебѣ́, Царю́ всѣ́хъ, наста́влени бы́вше звѣздо́ю, да́ры прино́сятъ, Христе́, сми́рну, зла́то и лива́нъ, уди́вльшеся Твоему́ снисхожде́нію.

Живоно́сный кла́съ ни́ва неора́нная но́ситъ, роди́ти во гра́дѣ Виѳлее́мѣ Маріа́мъ всѣ́хъ ду́ши пита́ющаго, зову́щихъ: Свя́тъ еси́, Го́споди.

Инъ.]

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Сокруши́ ага́ряны и вся́ сопоста́ты безбо́жныя, преподо́бне Пе́тре, моле́ніемъ твои́мъ къ Творцу́ и Бо́гу на́шему, и си́лу и́хъ, борю́щую ны́, не́мощну покажи́, и свирѣ́пства злолю́тая покори́ Вѣ́рному ИМПЕРАТОРУ на́шему.

Ты́ прояви́лъ еси́, Влады́ко, въ послѣ́днемъ ро́дѣ на́шемъ чудотво́рца святи́теля Петра́, земли́ Россíйскія утвержде́ніе, Це́ркве Твоея́ пра́вое пра́вило и іере́йскаго чи́на чинонача́льника.

Тебѣ́ прикосну́выйся, свя́те, су́щему въ честно́мъ гро́бѣ твое́мъ, исцѣле́ніе получи́ти сподо́бися: рука́мъ бо того́, къ пе́рсемъ прико́рчившимся, Бо́жіею благода́тію дае́ши простира́тися.

Богоро́диченъ: Бу́ди ми́, Дѣ́во, прибѣ́жище и приста́нище, стѣна́ необори́мая и Засту́пница, Бо́га пло́тію ро́ждшая, Пречи́стая, Изба́вителя Всеще́драго и Спа́са пою́щихъ Тя́, Богоневѣ́стная.

Инъ.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Позна́ тя́, богоно́се, Всевѣ́децъ Бо́гъ пре́жде, е́же зача́тися тебѣ́ во утро́бѣ, и, роди́вшася, освяща́етъ тя́ и па́стыря ове́цъ Свои́хъ вели́ка устроя́етъ: я́ко бо апо́столу Петру́, ввѣря́етъ тебѣ́ Своя́ а́гнцы.

Жезло́мъ воздержа́нія страсте́й мо́ре раздѣли́въ, блаже́нне, я́ко Моисе́й, на безстра́стія го́ру возше́лъ еси́ и, пріе́мъ мы́сленныя скрижа́ли, па́ству твою́ научи́лъ еси́ Христо́ву зако́ну.

Смире́нъ яви́лся еси́, кро́токъ же и ти́хъ, Пе́тре, отону́дуже Ду́ха благода́ть, оби́льнѣ излія́вшеся на тя́, вели́ка показа́ тя́, чуде́съ луча́ми зе́млю на́шу осіява́юща.

Богоро́диченъ: Крѣ́пкій, держа́вный, воплоти́выйся ны́нѣ Бо́гъ яви́ся су́щимъ во тмѣ́ сѣ́ни сме́ртныя. Свѣ́тъ уви́дите, вѣ́рніи, вели́къ — Христа́ въ пеще́рѣ, иму́ща отъ Дѣ́вы роди́тися стра́шно, Юже вѣ́рно воспои́мъ.

Катава́сія: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Конда́къ предпра́зднства, гла́съ 3. Подо́бенъ: Дѣ́ва дне́сь.

Дѣ́ва дне́сь Превѣ́чное Сло́во въ верте́пѣ гряде́тъ роди́ти неизрече́нно; лику́й, вселе́нная, услы́шавши, просла́ви со а́нгелы и па́стырьми хотя́щаго яви́тися Отроча́ Мла́до, Превѣ́чнаго Бо́га.

Икосъ:

О, ужа́снаго вои́стинну и па́че сло́ва чудесе́! Еже бы́ти дая́й всѣ́мъ ра́ди бла́гости во чре́во святы́я Дѣ́вы вни́де, и въ верте́пѣ роди́тися гряде́тъ, и въ я́слѣхъ положи́тися. Звѣзда́ же Сего́ проповѣ́дуетъ свы́ше волхво́мъ, иду́щимъ на поклоне́ніе Его́ съ да́ры, издале́ча привлача́щи, со тща́ніемъ послѣ́дующія Валаа́мову прорече́нію, ре́кшаго: звѣзда́ хо́щетъ провозвѣсти́ти Отроча́ Мла́до, Превѣ́чнаго Бо́га.

Сѣда́ленъ, гла́съ 4. Подо́бенъ: Ско́ро предвари́.

Свѣти́льникъ свѣтосія́ненъ яви́лся еси́ мíру, просвѣща́яй блиста́ньми Боже́ственныхъ твои́хъ слове́съ вѣ́рныхъ помышле́нія, святи́телю о́тче Пе́тре. Тѣ́мже вси́ свяще́нную твою́ и Боже́ственную па́мять дне́сь ра́достно соверша́емъ. [Два́жды.]

Сла́ва, и ны́нѣ, предпра́зднства, гла́съ то́йже:

Дѣ́вы, предначни́те дѣви́ческую ра́дость; ма́тери, восхвали́те провожде́ніе Ма́тере Христа́, Бо́га на́шего; волсви́ со а́нгелы, съ на́ми па́стыріе; гряде́тъ бо Дѣ́ва во гра́дѣ Виѳлее́мѣ роди́ти Сы́на, Превѣ́чнаго Бо́га, спаса́ющаго мíръ отъ тлѣ́нія.

Пѣ́снь 4.

[Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

Свята́я мѵрополо́жница честна́го свяще́нія въ Виѳлее́мѣ гра́дѣ сіе́ излія́ти прихо́дитъ, свяще́ніе на́мъ всѣ́мъ подаю́щаго, вопію́щимъ: сла́ва, Христе́, си́лѣ Твое́й. [Два́жды.]

Богоглаго́ливе Иса́іе, честна́я твоя́ проповѣ́данія бы́вшая ви́дя вещми́, ра́дуйся и лику́й: Дѣ́ва бо безсѣ́менно роди́ въ верте́пѣ пло́тію Виѳлее́мстѣмъ Невмѣсти́маго.

Іису́съ пло́тію ражда́ется, и въ лѣ́тѣ безлѣ́тный ви́димь е́сть Младе́нецъ, разрѣша́я моя́ лѣ́тная прегрѣше́нія, и неизрече́нною нището́ю ны́нѣ обогаща́етъ мя́, обнища́вшаго тлетво́рными преступле́ніями.

Инъ.]

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Благода́тію Ду́ха пома́зался еси́ архіере́й, всеизря́дне Пе́тре, во Христа́ бо одѣ́явся житія́ ра́ди чи́стаго. Тѣ́мъ научи́лъ еси́ сла́вити въ Тро́ицѣ Еди́наго Бо́га.

Изба́ви твое́ ста́до отъ бу́ри грѣха́, преподо́бне святи́телю Пе́тре, бѣ́дъ же и скорбе́й, приводя́ ны въ приста́нища ти́хая Боже́ственныя во́ли Христо́вы.

Христо́въ яви́лся еси́ уго́дникъ, о́тче пресвяще́нне Пе́тре: тѣ́мъ моля́ся не преста́й ко Го́споду отъ напа́стей, и бѣ́дъ, и скорбе́й изба́вити ста́до твое́, и отъ ну́ждныхъ искуше́ній.

Богоро́диченъ: Свяще́нно Тя́ сла́вятъ святи́тельстіи собо́ри и вси́ преподо́бныхъ ли́цы: Зижди́теля бо всѣ́хъ, Сы́на, Сло́во Бо́жіе, я́ко Младе́нца на руку́ Твое́ю понесла́ еси́.

Инъ.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Зако́номъ отъ сосе́цъ ма́тернихъ подклони́вся духо́внымъ, зако́ны плотскíя превше́лъ еси́, преподо́бне, я́же въ жи́зни твое́й умертви́лъ еси́ воздержа́ніемъ крѣ́пкимъ. Его́же ра́ди да́нъ еси́ вѣ́рнымъ чудотво́рецъ вели́къ, Пе́тре блаже́нне.

Сна́ очесе́мъ твои́мъ и дрема́нія вѣ́ждомъ не да́лъ еси́, до́ндеже обрѣ́те мѣ́сто поко́йно всѣ́хъ Содѣ́тель, о́тче, се́рдце твое́, е́же очи́стившееся досто́йнѣ показа́ Свое́ жили́ще сла́вы Ца́рь и Бо́гъ вѣ́чный.

Умертви́ мудрова́ніе, прему́дре, пло́ти моея́ неисцѣ́льное, и къ Боже́ственнымъ стезя́мъ наста́ви мя́, я́ко крѣ́покъ и си́ленъ, и зако́номъ благи́мъ мя́ повини́, блаже́нне, и раба́ покажи́ мя́ Христо́ва, порабоще́ннаго страстьми́ лю́тыми.

Богоро́диченъ: Избавле́ніе посла́ Госпо́дь, я́коже пи́сано е́сть, лю́демъ, и племене́мъ, и язы́комъ ны́нѣ. Лю́ди бо Себѣ́ вся́ содѣва́етъ, еди́ному вѣ́рою покланя́ющіяся воплоще́нію Сыно́вню и Тебе́, Богоро́дицу, исповѣ́дающія.

Катава́сія: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Пѣ́снь 5.

[Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Отъ Дѣ́вы ражда́ется Бо́гъ Емману́илъ и, въ я́слѣхъ возле́гъ, на́ше воззва́ніе во́лею содѣ́ловаетъ, Сего́ Рождество́ благоче́стно предпра́зднуимъ. [Два́жды.]

Сло́во сы́й пребезнача́льное Отчее и соесте́ственное, въ я́слѣхъ возле́гъ безслове́сныхъ, разрѣши́лъ еси́ безслове́сія ны́, предпра́зднствующія благоче́стно Твое́ Рождество́.

Блаже́нъ бы́сть ко́рень Іессе́евъ, прозябы́й Чи́стую, цвѣ́тъ Боже́ственный, нося́щую Христа́ Го́спода. Его́же предпра́зднуимъ Рождество́, ра́дующеся.

Инъ.]

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Окрестъ стоя́ще ра́ки твоея́, святи́телю преподо́бне Пе́тре, имѣ́емъ тя́ хода́тая къ Бо́гу, и заступле́ніе земли́ Россíйскія, и утвержде́ніе незы́бленное.

Ми́лостивъ бы́въ убо́гимъ, ми́лость душе́вную испроси́, прехва́льне: ми́лостыню бо стяжа́въ, о́тче святы́й Пе́тре, свѣщу́ свѣ́тлу устро́илъ еси́.

Жили́ще бы́лъ еси́ Свята́го Ду́ха вои́стинну, блаже́нне Пе́тре, и Того́ явле́нными Боже́ственными да́ры до́брѣ разбогати́лся еси́.

Богоро́диченъ: Мѵ́ро Тя́ имену́емъ, Пречи́стая, я́ко ро́ждшую Бо́га пло́тію, истоще́нное благода́тное мѵ́ро всѣ́мъ, притека́ющимъ подъ кро́въ Тво́й.

Инъ.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Яко вели́кое бога́тство твои́хъ щедро́тъ яви́ся въ земли́ на́шей, безчи́сленное проли́тіе ми́лости твоея́, слуго́ Христо́въ: ты́ бо прося́щимъ су́щая подае́ши и ты́я насы́тити тщи́шися твои́мъ предложе́ніемъ, блаже́нне.

Кро́токъ яви́лся еси́, ку́пно и смире́нъ дѣ́ломъ и сло́вомъ, и си́мъ вся́ къ себѣ́ привле́клъ еси́. Любо́вію и до́брыми дѣ́лы вся́ укроти́лъ еси́ и сердца́ возвесели́лъ еси́ укрѣпля́емыхъ твои́ми чудесы́.

Вели́кій па́стырь всѣ́хъ Христо́съ ове́цъ тя́, блаже́нне, показа́ Свои́хъ па́стыря и учи́теля слове́сныхъ. Тѣ́мже заблужда́ющаго мя́ на гора́хъ поги́бели, я́ко па́стырь сострада́теленъ, твое́ ны́нѣ овча́ взыщи́.

Богоро́диченъ: Вели́кій человѣ́ковъ Па́стырь и Святи́тель отъ Дѣ́вы я́ко Человѣ́къ прихо́дитъ пучи́ною неизрече́нныхъ щедро́тъ; Виѳлее́ме, угото́вися, па́стыріе, воспѣва́йте, о́бщее возведе́ніе возвѣща́юще конце́мъ.

Катава́сія: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Пѣ́снь 6.

[Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Но́въ на земли́ на́мъ Отрочищъ ро́ждся, Иже пре́жде вѣко́въ отъ Отца́ неизрече́нно возсія́въ, дре́вняго вся́ свободи́ преступле́нія, я́ко благоутро́бенъ. [Два́жды.]

Стра́нна и пресла́вна слы́шана бы́ша въ Виѳлее́мѣ гра́дѣ роди́вшуся Тебѣ́, Безнача́льне Сло́ве: па́стыріе бо со а́нгелы пѣ́снь Тебѣ́ я́ко Влады́цѣ приноша́ху.

Звѣзда́ пра́вды возвѣща́етъ волхво́мъ неизрече́нно Со́лнца ро́ждшася: Его́же честно́е ны́нѣ предпра́зднуимъ, ра́дующеся, Рождество́.

Инъ.]

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Житіе́ твое́ цѣлому́дренно, священноявле́нне, соверши́лъ еси́, пра́вдою украси́вся и му́жествомъ смы́сла добродѣ́тели сочета́въ себѣ́, преблаже́нне святи́телю Пе́тре.

Храни́ гра́дъ тво́й, святи́телю Пе́тре преблаже́нне, отъ безбо́жныхъ и чужевѣ́рныхъ нахожде́ній и отъ междоусо́бныя ра́ти, моля́ся непреста́нно Влады́цѣ Христу́, е́же ми́ръ па́ствѣ твое́й дарова́ти.

Ты́ у́бо и по сме́рти сла́вимь, я́ко жи́въ, чудодѣ́йствуеши немощны́мъ и сля́ченнымъ дае́ши исцѣле́ніе Боже́ственною благода́тію, глаго́летъ бо Госпо́дь: прославля́ющаго Мя́ просла́влю.

Богоро́диченъ: Превы́шши была́ еси́ небе́сныхъ си́лъ, заче́нши Сло́во Бо́жіе неизрече́нное, Иже, вся́ческая сло́вомъ соверши́въ, и отъ Отца́ пре́жде вѣ́къ роди́ся; Того́, Чи́стая, моля́щи не преста́й.

Инъ.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Ты́ сиро́тъ вои́стинну бы́лъ еси́ оте́цъ и вдо́въ засту́пникъ, сла́вне, печа́льныхъ же и су́щихъ въ ско́рбехъ сла́дкое утѣше́ніе, вра́чь душе́вныхъ страсте́й, ку́пно и тѣле́сныхъ. Тѣ́мже вси́ призыва́емъ тя́, е́же бы́ти тебѣ́ на́мъ предста́телю во обстоя́ніихъ на́шихъ.

Му́жіе свяще́нніи, ра́достно съ наро́домъ дне́сь, твою́, о́тче, па́мять пра́зднующе, торжеству́ютъ, и́мже согла́сно и́стинніи безмо́лвницы и простíи вси́ о́бще тя́ воспѣва́ютъ, предста́теля же вку́пѣ и учи́теля.

Ча́до поро́чное а́зъ еди́нъ бы́хъ, о́тче, страстьми́ скве́рными и того́ ра́ди недосто́инъ до́браго твоего́, сла́вне, и кра́снаго пра́зднованія; но ты́, очи́стивъ мою́ скве́рну, преподо́бне, душе́вную и тѣле́сную, покажи́ мя торжества́ твоего́ бы́ти досто́йна.

Богоро́диченъ: Чу́до настоя́щее, чу́до превосходя́щее и сло́ва и ума́ всего́ вы́шше, и́бо Дѣ́ва та́яжде и Ма́ти познава́ется, и ро́ждшееся ку́пно Бо́гъ и Человѣ́къ. Сего́ свѣ́тлое рожде́ніе предпра́зднующе, воспѣва́емъ ра́достная.

Катава́сія: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Конда́къ, гла́съ 8. Подо́бенъ: Взбра́нной.

Взбра́нному и ди́вному на́шея земли́ чудотво́рцу, дне́сь любо́вію тебѣ́ притека́емъ, пѣ́снь, богоно́се, плету́ще, я́ко, имѣ́я дерзнове́ніе ко Го́споду, многообра́зныхъ изба́ви на́съ обстоя́ній, да зове́мъ ти́: ра́дуйся, утвержде́ніе гра́ду на́шему.

Икосъ:

Но́вый чудотво́рецъ яви́лся еси́, исцѣле́нія подава́я всѣ́мъ, усе́рдно отъ души́ приходя́щимъ: и Христо́вы лю́ди, богоно́се, неви́димо посѣща́я, зе́млю на́шу просвѣща́еши, я́ко да согла́сно зове́мъ ти́ си́це: ра́дуйся, свѣ́та безстра́стнаго до́ме; ра́дуйся, страсте́й те́мныхъ прогони́телю; ра́дуйся, де́монскія разруши́вый ко́зни; ра́дуйся, а́нгельскія возвесели́вый чи́ны; ра́дуйся, высото́ боговидѣ́нія чи́стаго; ра́дуйся, глубино́ смире́нія, болѣ́зни омыва́ющая; ра́дуйся, я́ко бы́лъ еси́ зри́тель неви́димыхъ; ра́дуйся, я́ко сообщи́лся еси́ лико́мъ святи́телей; ра́дуйся, земли́ Россíйскія па́стырю и учи́телю; ра́дуйся, святи́телемъ изря́дная похвало́; ра́дуйся, его́же ра́ди показа́ Бо́гъ чудодѣ́йствія ве́лія; ра́дуйся, его́же ра́ди Бо́гъ сла́вится; ра́дуйся, утвержде́ніе гра́ду на́шему.

Пѣ́снь 7.

[Ирмо́съ: Юноши три́ въ Вавило́нѣ, велѣ́ніе мучи́телево на бу́йство преложи́ша, и посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Ка́ко Тя́ верте́пъ вмѣсти́тъ, гряду́ща на́съ ра́ди роди́тися, Невмѣсти́маго? Ка́ко Тя́ воздои́тъ Дѣ́ва, Пита́теля всѣ́хъ, Благоутро́бне Іису́се, су́ща. [Два́жды.]

Глаго́ломъ послѣ́дующе волхва́ Валаа́ма, волсви́ тща́тся Христу́ поклони́тися съ да́ры, разумѣ́юще Сего́, вся́кимъ дыха́ніемъ ца́рствующа.

Непло́дствующее человѣ́ческое естество́ вся́кія добродѣ́тели, ра́дуйся и лику́й: гряде́тъ бо Христо́съ отъ Дѣ́вы пло́тію роди́тися, я́ко да пока́жетъ Тя́ до́брымъ благоча́дно.

Инъ.]

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Отве́рзи ми́ две́ри покая́нія, преблаже́нне, архіере́ю Пе́тре, да омы́ю скве́рну окая́нныя моея души́ и тѣ́ла, вся́ чу́вствія и со́вѣсть направля́я Бо́гу пѣ́ти: отце́въ на́шихъ Бо́же, благослове́нъ еси́.

Имамы тя́ засту́пника те́пла, твои́ раби́, и стѣ́ну необори́му гра́да твоего́ Москвы́, и утвержде́ніе, и не убои́мся сопоста́тныхъ враго́въ, но побѣжда́емъ ты́я си́лою Христо́вою, пою́ще: оте́цъ на́шихъ Бо́же, благослове́нъ еси́.

Уста́вы оте́ческія утверди́лъ еси́, му́дре, и Це́рковь Пресвяты́я Бо́жія Ма́тере свяще́нства лѣ́потою прекра́сну устро́илъ еси́, и уче́ніи твои́ми лю́ди наказа́лъ еси́ пѣ́ти: оте́цъ на́шихъ Бо́же, благослове́нъ еси́.

Богоро́диченъ: Спаси́тельное приста́нище, Богоро́дице Дѣ́во, Тя́ иму́ще ны́нѣ, жите́йскихъ бѣ́дъ и бу́ри избѣга́емъ, къ приста́нищу тишины́ Твоея́ прибѣга́юще, Сы́ну Твоему́ зове́мъ: оте́цъ на́шихъ Бо́же, благослове́нъ еси́.

Инъ.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Земля́ на́ша и страны́ согла́сно, о́тче, чудеса́ твоя́ возвѣща́ютъ, я́же повсю́ду уча́ще пѣ́ти Христу́ прера́достно: отце́въ на́шихъ Бо́же, благослове́нъ еси́.

Жени́хъ, кра́сный добро́тою па́че всѣ́хъ сыно́въ человѣ́ческихъ, я́коже пи́сано е́сть, невѣ́стѣ, блаже́нне, свое́й, Це́ркви, краснѣ́йша тя́ показа́ жениха́, Того́ нося́ща о́бразы подо́бія.

Украси́въ твое́ житіе́ милостынею, и кро́тостію, и любо́вію и́стинною, подража́тель показа́лся еси́ изря́дный Па́стыря до́браго, избра́въ Того́ добродѣ́тели до́брѣ.

Богоро́диченъ: Прихо́дитъ Влады́ка въ верте́пъ роди́тися я́ко Человѣ́къ; предусря́щимъ, вѣ́рніи, Дѣ́ву Чи́стую, воспѣва́юще Ей ра́достно: ра́дуйся, мíра Ра́досте, ра́дуйся, Дѣ́во, Ма́ти Христо́ва.

Катава́сія: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Пѣ́снь 8.

[Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Мно́гими мя́, Христе́, преступле́ньми разбо́йниковъ бы́вшаго верте́пъ, за благоутро́біе неизрече́нное спаса́я, роди́тися въ верте́пѣ отъ Дѣ́вы Чи́стыя изво́лилъ еси́. [Два́жды.]

Подпису́я соверше́нное мнѣ́ оставле́ніе, написа́лся еси́ ке́саревымъ повелѣ́ніемъ Творе́цъ тва́ри съ рабы́: пою́ Твоего́ благоутро́бія безмѣ́рную, Влады́ко, пучи́ну.

Свѣ́тлая Влады́чня пала́то, ка́ко возшла́ еси́ въ малѣ́йшій верте́пъ, Царя́ Го́спода, на́съ ра́ди вопло́щшася, роди́ти, Всесвята́я Дѣ́во Богоневѣ́сто?

Инъ.]

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Побѣжде́нъ бы́въ отъ врага́ прегрѣше́ніи мно́гими мо́лвъ жите́йскихъ, вѣ́рою прихожду́ и, я́ко Манассíя, въ покая́ніи вопію́ Ти́, Христе́: Го́спода по́йте, дѣла́, и превозноси́те Его́ во вѣ́ки.

Моли́твы, преблаже́нне, и моле́нія твори́ прилѣ́жно къ Бо́гу при́сно за рабы́ твоя́, въ печа́лехъ засту́пника и побо́рника тя́ иму́щія, отъ бѣ́дъ спаса́емся, Го́спода пою́ще и превознося́ще Его́ во вѣ́ки.

Вооружа́ются на лю́ди твоя́ смире́нныя, святи́телю пречестны́й о́тче Пе́тре, сы́нове ага́рины; сокруши́ ты́я неви́димою си́лою моли́твъ твои́хъ ко Влады́цѣ за ны́, при́сныя рабы́ твоя́, Го́спода пою́щія и превознося́щія Его́ во вѣ́ки.

Богоро́диченъ: Влады́чице Дѣ́во Пречи́стая и Пресла́вная, со святи́телемъ Петро́мъ Твоему́ Сы́ну и Царю́ моли́ся прилѣ́жно отъ вся́кія ну́жды и бѣ́дъ изба́вити гра́дъ тво́й и́скренній Москву́, и ИМПЕРАТОРА здра́ва сотвори́ и ве́села Тебе́ вѣ́рою блажа́ща, Госпоже́, и пою́ща, и превознося́ща во вся́ вѣ́ки.

Инъ.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Окорми́ моли́твою твое́ю па́ству сію́ многочеловѣ́чную твою́, и бу́ри вѣ́тръ проти́вныхъ, чу́вственныхъ и мы́сленныхъ уста́ви твои́ми моли́твами, и изба́ви вся́кихъ искуше́ній и смуще́ній, и да́же до конца́ неврежде́ну соблюда́й.

Падо́ша востаю́щіи на ны́, о́тче, твои́ми моли́твами побѣжда́еми ага́рины вну́цы, хотя́щіи наслѣ́діе твое́ озло́бити, и смѣ́хъ бы́ша и поруга́ніе, паде́нія своего́ пла́чуще; мы́ же воспѣва́емъ ра́достно твою́ свяще́нную па́мять.

Неизрече́нно твое́ чадолю́біе, о́тче, превосходя́ще оте́ческую любо́вь: всегда́ у́бо неви́димо на́съ посѣща́еши, непреста́нными твои́ми моли́твами спасе́ніе на́мъ испроша́я и подава́я на́мъ съ ти́хостію, Пе́тре, ра́достная.

Богоро́диченъ: Всего́ мя́, па́дша, Богоро́дице Дѣ́во, и погуби́вша, е́же по о́бразу, Чи́стая, Бо́гъ, Своего́ созда́нія не презрѣ́въ, Тобо́ю всего́ мя́ обнови́. Его́же ра́ди Тебе́, вину́ спасе́нія на́шего, вся́ тва́рь воспѣва́етъ, зову́щи: благослове́нна Ты́ въ жена́хъ еси́, Всенепоро́чная Влады́чице.

Катава́сія: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Пѣ́снь 9.

[Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Лику́имъ, вси́ вѣ́рніи, взыгра́имъ и согла́сно воскли́кнемъ: гряде́тъ всѣ́хъ Спасе́ніе, приближа́ется роди́тися Госпо́дь, спасти́ Его́ Рождество́ богому́дренно пра́зднующія. [Два́жды.]

Псалти́рь, святы́й Дави́де, воспріими́ и гу́сли, и пѣсновоспо́й: до́ме Евфра́ѳовъ, весели́ся: Оте́цъ бо, изъ чре́ва Его́же роди́, въ Тебѣ́ пресвѣ́тло ражда́ется, отъ Дѣ́вы воплоща́яся.

Яко ту́ча, я́ко вели́кій до́ждь, во утро́бу Твою́ Влады́ка сни́де, и мра́чная безбо́жія земли́ оляденѣ́вшая напои́ и пре́лести моря́ изсуши́, Богороди́тельнице Ма́ти Дѣ́во.

Инъ.]

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Яко блудни́ца, и разбо́йникъ, и мыта́рь вопію́ Ти́ отъ се́рдца, Христе́: согрѣши́хъ, прости́ мнѣ́, Влады́ко, мно́гая моя́ согрѣше́нія и изба́ви мя́ отъ вся́каго гнѣ́ва Твоего́ святи́теля Петра́ моле́ніемъ, я́ко да непреста́нно Тя́ велича́ю.

Пріиди́те, собери́теся, вси́ Моско́встіи наро́ди, къ блаже́ннаго святи́теля Петра́ гро́бу и со слеза́ми возопíйте къ Бо́гу: изба́ви, Го́споди, отъ бѣ́дъ лю́ди Твоя́, глаго́люще, и ИМПЕРАТОРА на́шего здра́ва сотвори́ и ве́села, и покори́ ЕМУ ро́дъ Исма́ильскій, навѣ́тующій на́мъ, наслѣ́дію твоему́, да Тя́ велича́емъ во вѣ́ки.

Вельми́ ра́дуется о тебѣ́, пречестны́й о́тче святи́телю Пе́тре, со́бственный гра́дъ тво́й Москва́, помо́щника и засту́пника имѣ́я тя́, и ны́нѣ, влады́ко, не отходи́ ду́хомъ отъ на́съ, моли́тву творя́ за ны́ къ Бо́гу, я́ко да изба́витъ ны́ отъ наси́лія безбо́жныхъ ага́рянъ, враго́въ на́шихъ, да тя́ всегда́ велича́емъ.

Богоро́диченъ: Марíе, Пречи́стая Влады́чице, оскверне́нное се́рдце мое́ и ду́шу мольба́ми Твои́ми очи́сти и жи́зни вѣ́чныя наслѣ́дника мя́, Госпоже́, сотвори́, не помина́ющи мои́хъ безчи́сленныхъ зо́лъ, Сы́на Твоего́ и Бо́га умоли́ за мя́, окая́ннаго, и пѣвцы́ Твоя́ сохрани́, Всесвята́я.

Инъ.

Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Сла́ву твою́ воспѣ́ти по досто́инству невозмо́жно, чудеса́ бо премно́га и исцѣле́нія безчи́сленная оби́льно подае́ши съ те́плою вѣ́рою приходя́щимъ къ тебѣ́, Пе́тре святи́телю, похвало́ земли́ на́шея.

Положи́ тебе́ Це́ркве Своея́ основа́ніе Христо́съ, и столпа́ крѣ́пка и непозы́бленна во вѣ́къ, соблюда́юща и подтвержда́юща гра́дъ тво́й пребы́ти непоколеби́мъ до конца́ и отъ враго́въ ненавѣ́туемь.

Святи́теліе у́бо, ца́ріе же, и кня́зи, и сано́вницы, и вси́ лю́діе, му́жіе и жены́, ста́рцы со младе́нцы, и вся́къ во́зрастъ, и вся́кое досто́инство, святи́теля на́шего свѣ́тло па́мять да пра́зднуемъ.

Богоро́диченъ: Притеце́мъ чу́до превели́кое ви́дѣти, Дѣ́ва бо гряде́тъ, Младе́нца нося́щи во утро́бѣ, младе́нцы оживля́ющаго; па́стыріе со а́нгелы о́бщую пѣ́снь воспѣва́ютъ, въ пеще́рѣ спасе́ніе возвѣща́юще.

Катава́сія: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Свѣти́ленъ предпра́зднства. Подо́бенъ: Посѣти́лъ ны́ е́сть.

Предпра́зднственныя, вѣ́рніи, Рождества́ пѣ́сни пріиди́те, принесе́мъ вси́: гряде́тъ уже́ Христо́съ въ Виѳлее́мъ роди́тися, спасти́ Вселе́нную, я́ко еди́нъ Человѣколю́бецъ.

Сла́ва, свята́го. Подо́бенъ: Жены́, услы́шите.

Ду́хъ Святы́й святи́теля тя́ пома́за, Пе́тре преблаже́нне, Христо́ву па́ству па́ствити на па́житехъ спаси́тельныхъ. Тѣ́мъ и потща́лся еси́ наставля́ти лю́ди пра́выми стезя́ми: того́ ра́ди ны́нѣ сугу́быя вѣнцы́ отъ Вѣнцеда́вца прія́лъ еси́.

И ны́нѣ:

Гото́вися, Виѳлее́ме, украси́ до́мы твоя́: къ тебѣ́ бо гряде́тъ Дѣ́ва, Младе́нца нося́щи Христа́, Отцу́ Собезнача́льнаго; пріи́де бо да спасе́тъ ро́дъ человѣ́ческій.

На хвали́техъ стихи́ры на 8. Предпра́зднства 4, гла́съ 6. Подо́бенъ: Ангельскія.

Содѣ́тельная ны́нѣ предгряде́тъ Прему́дрость:* проро́честіи отверза́ются о́блацы,* благода́ть процвѣта́етъ,* и́стина возсія́;* престаю́тъ гада́нія сѣно́вная,* Еде́мова отве́рзеся две́рь.* Ада́ме, лику́й,* Созда́тель Бо́гъ на́шъ* во́льно созда́ся.

Рече́нія исполня́я проро́ческая и видѣ́нія,* ражда́ется пло́тію* и одебелѣва́етъ Сло́во* и въ я́слѣхъ безслове́сныхъ, ро́ждся, возлега́етъ.* Сіе́ кра́йнее схожде́ніе,* сіе́ стра́шное смотре́ніе,* его́же ра́ди пое́мъ:* Ца́рь Изра́илевъ,* Христо́съ прихо́дитъ.

Се́ Чи́стая па́че ума́ и сло́ва* ражда́етъ Сы́на Бо́жія,* Его́же проро́цы проповѣ́даша дре́вле,* прови́дяще Ду́хомъ Святы́мъ,* нескве́рну Тя́ сохраня́юща* и разрѣша́ющаго Ада́ма отъ грѣха́.* Лю́діе, рце́мъ:* Ца́рь на́шъ, Христо́съ* пло́тію прихо́дитъ.

Нѣ́дръ Оте́ческихъ не отсту́пль,* Человѣ́къ яви́лся еси́* и, дѣ́вственными держи́мь рука́ми,* волхвы́ отъ Перси́ды звѣздо́ю призва́лъ еси́,* Царю́ Тебѣ́ и Бо́гу покланя́ющіяся.* Ду́хомъ усте́нъ* нече́ствующія кня́зи язы́ческія погуби́ши* и упасе́ши лю́ди* осуществе́нныя.

Ины стихи́ры свята́го Петра́, гла́съ 8. Подо́бенъ: О, пресла́внаго чудесе́!

Преподо́бне о́тче Пе́тре,* ты́ еще́ во утро́бѣ ма́терни* святи́тельства прозва́ніе прія́лъ еси́,* нарече́нное отъ Бо́га.* Ты́ измла́да Христа́ возлюби́лъ еси́,* пріе́мъ отъ Него́ па́ству слове́сныхъ ове́цъ,* до́брѣ па́слъ еси́ Це́рковь Бо́жію.* Тѣ́мъ твое́ пра́зднуемъ успе́ніе,* ра́дующеся, Христа́ велича́емъ. [Два́жды.]

Сти́хъ: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ.

Преподо́бне святи́телю Пе́тре,* испроси́ къ Бо́гу моли́твами твои́ми Це́ркви утвержде́ніе,* архіере́ю па́ствы попече́ніе и управле́ніе,* Христолюби́вому ИМПЕРАТОРУ побѣ́ду на ага́ряны* и на вся́ враги́ одолѣ́ніе,* неподви́жимо и непобори́мо пребыва́ніе гра́да твоего́* и вѣ́рнымъ лю́демъ грѣхо́въ оставле́ніе,* всѣ́мъ, притека́ющимъ къ ра́цѣ моще́й твои́хъ,* за ны́, святи́телю, моля́ся.

Сти́хъ: Уста́ пра́веднаго поуча́тся прему́дрости,* и язы́къ его́ возглаго́летъ су́дъ.

Преподо́бне о́тче богому́дре,* ты́ и́стинно яви́лся еси́,* прельще́нная сердца́ наставля́я* на пу́ть и́стинный.* Ты́ бы́лъ еси́ убо́гихъ и вдо́въ защи́тникъ,* вельмо́жъ тве́рдое наказа́ніе,* и всѣ́мъ вѣ́рнымъ,* притека́ющимъ ко Пречи́стѣй Бо́жіи Ма́тери,* испроси́, свя́те, грѣхо́въ оставле́ніе.

Сла́ва, гла́съ 6:

Вся́къ гра́дъ и страна́, сла́вному гра́ду на́шему Москвѣ́, ра́дуйтеся, спра́зднующе дне́сь: ди́вный бо вра́чь и спаси́тель на́шъ вели́кій Пе́тръ небе́снаго врачевства́ лѣчбы́ предлага́етъ на́мъ, къ безме́зднымъ лѣчба́мъ свои́мъ вся́ любе́зно созва́, не хитростьми́ человѣ́ческими, ни обвяза́ньми, но дѣ́йствомъ Свята́го Ду́ха душе́вное и тѣле́сное исцѣле́ніе преесте́ственное подава́я. Еже пріе́млюще оби́льнѣ, ро́дъ вся́къ и во́зрастъ, сла́вимъ Христа́ Бо́га, подаю́щаго ра́ди уго́дника Своего́ того́ воспѣва́ющимъ ве́лію ми́лость.

И ны́нѣ, гла́съ то́йже:

Волхва́ Валаа́ма прорече́нія исполне́ніе пріе́млютъ: Пе́рскими бо зна́меніи облія́ни бы́вше, звѣзды́ необы́чныя осія́ніемъ, незаходи́маго Со́лнца Христа́ осія́ни бы́вше, въ Виѳлее́мѣ воплоще́ннаго Бо́га Царя́ и во́льнаго Мертвеца́ дарми́ назна́менаютъ.

Славосло́віе вели́кое. По трисвято́мъ тропа́рь свята́го. Сла́ва, и ны́нѣ, предпра́зднства. Ектеніи́, и отпу́стъ, и ча́съ 1-й.


На часѣ́хъ тропа́рь предпра́зднства и свята́го. По трисвято́мъ конда́къ предпра́зднства и свята́го глаго́лемъ, премѣня́юще.


НА ЛИТУРГІИ,

Блаже́нна, отъ кано́на предпра́зднства, пѣ́снь 3-я и свята́го пѣ́снь 6-я. По вхо́дѣ тропа́рь предпра́зднства и свята́го. Сла́ва, конда́къ свята́го. И ны́нѣ, предпра́зднства. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, [внуши́те вси́ живу́щіи по вселе́ннѣй]. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ [въ се́рдцѣ его́, и не за́пнутся стопы́ eго́]. Ева́нгеліе отъ Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].


[Зри́:] Подоба́етъ вѣ́дати, а́ще случи́тся [па́мять святи́теля] Петра́ митрополи́та въ недѣ́лю предъ Рождество́мъ Христо́вымъ, святы́хъ оте́цъ:

На ма́лѣй вече́рни, на Го́споди воззва́хъ: стихи́ры воскре́сны на 4. Сла́ва, Петру́, гла́съ 6, самогла́сенъ: Боже́ственная благода́ть... И ны́нѣ, предпра́зднства, гла́съ то́йже: По́йте Го́сподеви... На стихо́внѣ стихи́ра воскре́сна еди́на и свята́го стихо́вна вели́кія вече́рни, со стихи́ ея́. Сла́ва, свята́го, гла́съ 8: Пріиди́те, вси́ вѣ́рніи... [Пи́санъ на вели́цѣй вече́рни, на стихо́внѣ.] И ны́нѣ, предпра́зднства, гла́съ то́йже: Воспріими́, Виѳлее́ме, Бо́жію митропо́лію... По трисвято́мъ тропа́рь воскре́сенъ и отце́въ. Сла́ва, свята́го. И ны́нѣ, предпра́зднства. Та́же ектенія́ ма́лая и отпу́стъ.

На вели́цѣй вече́рни, на Го́споди воззва́хъ: стихи́ры воскре́сны 3, и отце́въ 3. Подо́бенъ: Все́ отло́жше. Сти́хъ 1: Яви́ся мíра конце́мъ... Сти́хъ 2: Сла́вою украша́ются... Сти́хъ 3: Облиста́ ве́село... И Петру́ со сла́внымъ 4, гла́съ 2, подо́бенъ: Кíими похва́льными. Сла́ва, отце́въ, гла́съ 6: Даніи́лъ, му́жъ жела́ній... И ны́нѣ, предпра́зднства, гла́съ то́йже: Верте́пе, благоукраси́ся... Та́же вхо́дъ. Проки́менъ дне́. И чте́нія отце́въ три́ и свята́го три́. На литíи стихи́ры предпра́зднства, оте́ческія недѣ́ли рядовы́я, гла́съ 6, подо́бенъ: Все́ отло́жше. Сти́хъ 1: Незаходи́мое со́лнце... И свята́го самогла́сны. И отце́въ гла́съ 1: Луча́ми облиста́вшеся... Сла́ва, отце́въ, гла́съ 3: Пра́отецъ собо́ръ... И ны́нѣ, предпра́зднства, гла́съ то́йже: Благоукраси́ся, Виѳлее́ме... На стихо́внѣ стихи́ры воскре́сны. Сла́ва, отце́въ, гла́съ 2: Ра́дуйтеся, проро́цы... И ны́нѣ, предпра́зднства, гла́съ то́йже: Се́ вре́мя прибли́жися... На благослове́ніи хлѣ́бовъ тропа́рь: Богоро́дице Дѣ́во.., еди́ножды, и отце́въ тропа́рь еди́ножды, и свята́го тропа́рь еди́ножды. И чте́ніе.

На у́трени, на Бо́гъ Госпо́дь: Тропа́рь воскре́сенъ, еди́ножды и отце́въ, еди́ножды. Сла́ва, свята́го. И ны́нѣ, предпра́зднства. По каѳи́смахъ сѣда́льны воскре́сны и богоро́дичны и́хъ. И чте́ніе во Ева́нгеліи Толково́мъ: Кни́га родства́ Іису́са Христа́... Поліеле́й и тропари́: Ангельскій собо́ръ... И сѣда́льны свята́го вси́ по еди́нощи. Сла́ва, и ны́нѣ, предпра́зднства и чте́ніе. Степе́нна гла́са. Проки́менъ и Вся́кое дыха́ніе... Ева́нгеліе воскре́сно. И Воскресе́ніе Христо́во... По 50-мъ псалмѣ́ стихи́ра воскре́сна. Кано́нъ воскре́сенъ со ирмосо́мъ на 4, и Петру́ на 4, и отце́въ на 6. Катава́сія: Христо́съ ражда́ется... По 3-й пѣ́сни конда́къ свято́му и и́косъ. Ипакои́ отце́въ и сѣда́ленъ свята́го, два́жды. Сла́ва, и ны́нѣ, предпра́зднства. По 6-й пѣ́сни конда́къ отце́въ, и и́косъ, и чте́ніе. На 9-й пѣ́сни пое́мъ Честнѣ́йшую... Свѣти́ленъ воскре́сенъ и отце́въ. Сла́ва, свята́го. И ны́нѣ, предпра́зднства. На хвали́техъ стихи́ры воскре́сны 3, и отце́въ 2, и свята́го со сла́внымъ 3, со стихи́ его́. Или́ оставля́ются стихи́ры воскре́сны, къ пое́мъ отце́въ на 4 и свята́го на 4. Сла́ва, отце́въ. И ны́нѣ, богоро́диченъ: Преблагослове́нна еси́, Богоро́дице... Славосло́віе вели́кое. Тропа́рь воскре́сенъ то́чію, и ектеніи́, и отпу́стъ. Посе́мъ: Сла́ва, и ны́нѣ, стихи́ра ева́нгельская и ча́съ 1-й, и коне́чный отпу́стъ.

[На часѣ́хъ:] На 1-мъ часѣ́ тропа́рь воскре́сенъ. Сла́ва, отце́въ. И ны́нѣ, богоро́диченъ часо́въ. По трисвято́мъ, конда́къ отце́въ. На 3-мъ часѣ́ тропа́рь воскре́сенъ. Сла́ва, свята́го. И ны́нѣ, богоро́диченъ часо́въ. По трисвято́мъ конда́къ свята́го. На про́чихъ же часѣ́хъ тропари́ и кондаки́ отце́въ и свята́го, премѣня́юще, глаго́лемъ; воскре́сенъ же тропа́рь на всѣ́хъ часѣ́хъ глаго́лемъ въ нача́лѣ непремѣ́нно.

На литургíи: Блаже́нна гла́са 4, и отце́въ, пѣ́снь 3-я на 4, и свята́го пѣ́снь 6-я на 4. По вхо́дѣ тропа́рь воскре́сенъ, и отце́въ, и предпра́зднства, и свята́го. Та́же конда́къ отце́въ. Сла́ва, свята́го. И ны́нѣ, предпра́зднства. Проки́менъ, Апо́столъ, аллилу́ія и Ева́нгеліе отце́въ и свята́го. Прича́стенъ: Хвали́те... Другíй: Ра́дуйтеся, пра́ведніи...

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 185 – 198 об.

/ Къ оглавленію раздѣла /


Наверхъ / Къ титульной страницѣ

0