Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 21-й де́нь.
Слу́жба святѣ́й благовѣ́рнѣй княги́нѣ Іуліанíи Новото́ржстѣй.

НА МАЛѢЙ ВЕЧЕРНИ,
На Го́споди воззва́хъ: стихи́ры, гла́съ 1. Подо́бенъ: Всехва́льніи му́ченицы.

Богому́драя блаже́нная княги́ня Іуліанíя, кро́вными твои́ми ка́плями одѣя́ніе души́ твоея́ украси́ла еси́, отъ си́лы бо благоче́стно въ си́лу и отъ сла́вы въ сла́ву прешла́ еси́. И ны́нѣ моли́ся дарова́ти душа́мъ на́шимъ ми́ръ и ве́лію ми́лость.

Освяща́еми есмы́ твоя́ му́жественная боре́нія и по́двиги сла́вящіи, му́ченица всечестна́я Іуліанíя, и́миже сожи́тельница а́нгеломъ была́ еси́ и всѣ́мъ страстоте́рпцемъ соприча́стница, съ ни́ми же моли́ся дарова́ти душа́мъ на́шимъ ми́ръ и ве́лію ми́лость.

Сла́ва, и ны́нѣ, богоро́диченъ:

Увы́ мнѣ́, что́ бу́ду у́мъ, и ду́шу, и тѣ́ло оскверни́въ прегрѣше́ньми? Что́ сотворю́? Ка́ко же избѣ́гну пла́мене нестерпи́маго, нерѣши́мыхъ у́зъ и вѣ́чныхъ? Но, о Всенепоро́чная, пре́жде конца́ моли́ Сы́на Твоего́ пода́ти ми́ грѣхо́въ оставле́ніе.

На стихо́внѣ стихи́ры, гла́съ 4. Подо́бенъ: Яко до́бля.

Серде́чнаго раче́нія, любви́ боже́ственныя и страда́нію твоему́, блаже́нная, ли́цы а́нгельстіи извѣ́стно удиви́шася, ка́ко, му́жескимъ сплете́ніемъ врага́ неви́димаго низложи́вши, побѣ́дный вѣне́цъ отъ Бо́га досто́йно прія́ла еси́.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

По Христѣ́ да́же до сме́рти подвиза́ющися, разже́ннымъ мудрова́ніемъ пла́мень погаси́ла еси́ по́хоти и, свѣщу́ душе́вную неугаси́му соблю́дши, вошла́ еси́ ко Христу́ въ черто́гъ небе́сный. Тѣ́мъ вси́ благоче́стно воспѣва́емъ, страстоте́рпице, святу́ю твою́ па́мять, освяща́еми благода́тію.

Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ.

Стра́сти претерпѣ́ла еси́ мно́гихъ му́къ, всехва́льная, крѣ́пко присту́пльши, отсю́ду къ неболѣ́зненному преста́вилася еси́ воспрія́тію незаходи́маго сія́нія, и свѣ́тлѣй ра́дости, и вѣ́чному Боже́ственному наслажде́нію, тѣ́мъ тя́ ублажа́емъ и свято́е твое́ дне́сь соверша́емъ торжество́, страстоте́рпица до́блественная.

Сла́ва, гла́съ 4:

Житія́, до́лу влеку́щаго, и пи́щи наслажде́ніе, и цвѣту́щую сла́ву, прехва́льная, оста́вльши я́ко вре́менну, Христу́ прилѣпи́лася еси́ цѣлому́дріемъ, добро́тою Его́ кра́сною распала́ема, и приступи́ла, я́ко благоуха́нный шипо́къ, и вѣнце́мъ нетлѣ́ннаго Ца́рства вѣнча́ся, богоимени́тая.

И ны́нѣ, богоро́диченъ:

Свѣще́ неугаси́мая, престо́ле пра́ведный, Пресвята́я Влады́чице, моли́ спасти́ся душа́мъ на́шимъ.

Тропа́рь, гла́съ 2:

Благоче́стно въ зако́нѣ пожи́вши и благи́ми дѣ́лы украси́вшися, я́ко крѣ́пкій адама́нтъ, яви́ся, цѣлому́дренная свята́я благовѣ́рная княги́ня Іуліанíя, тлѣ́нную сла́ву и добро́тство тѣле́сное презрѣ́вши, злоко́зненнаго врага́ побѣди́ла еси́, цѣлому́дрія ра́ди му́ченическую сме́рть прія́ла еси́. Сего́ ра́ди отъ Христа́ Бо́га нетлѣ́ннымъ и вѣ́чнымъ вѣнце́мъ вѣнча́вшися, ны́нѣ съ ли́ки му́ченикъ лику́еши и на́мъ ве́лія чудеса́, приходя́щимъ ко гро́бу твоему́, оби́льно источа́еши. Тѣ́мже ти́ вопіе́мъ: моли́ся Христу́ Бо́гу о всѣ́хъ на́съ, вѣ́рою и любо́вію страда́нія твоя́ почита́ющихъ.

Сла́ва, и ны́нѣ, богоро́диченъ:

Вся́, па́че смы́сла, вся́ пресла́вная Твоя́, Богоро́дице, та́инства, чистотѣ́ запеча́танной и дѣ́вству храни́му, Ма́ти позна́лася еси́ нело́жна, Бо́га ро́ждши Истиннаго. Того́ моли́ спасти́ся душа́мъ на́шимъ.


НА ВЕЛИЦѢЙ ВЕЧЕРНИ,
По обы́чнѣмъ псалмѣ́ пое́мъ: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 8.

Благоче́стія прозябе́ніе че́стно, добродѣ́тели цвѣ́тъ неувяда́емый, ло́зы Христо́вы розго́ многострада́льная, благовѣ́рная княги́ня Іуліанíя вся́ призыва́етъ свѣ́тло вѣ́рныя въ па́мять свою́ честну́ю воспѣ́ти сію́, я́ко побѣди́тельницу на земли́, Бо́га просла́вльшую.

Зако́номъ повину́ющися на́съ ра́ди пло́ть на земли́ Пріи́мшаго и стра́сть кре́стную Претерпѣ́вшаго, цѣлому́дренная и благовѣ́рная, на пре́лесть му́жествовала еси́, Іуліанíе, огневѣща́ннымъ язы́комъ твои́мъ беззако́ннаго неи́стово посрами́ла еси́, тѣ́мже и со а́нгелы ра́дуяся, княги́не великоимени́тая, моли́ Христа́ Бо́га спасти́ся душа́мъ на́шимъ.

Струя́ми крове́й твои́хъ, му́драя, за чистоту́ ума́ и любо́вь, я́же къ Бо́гу и бли́жнему излія́нными, зе́млю освяти́ла еси́, ду́хомъ же ду́хи возвесели́ла еси́ безпло́тныхъ и, съ ли́ки му́чениковъ предстоя́щи Бо́гу и съ си́ми соединя́ющися, блаже́нная вѣнцено́сица Боже́ственнаго Ду́ха си́лою яви́лася еси́, я́ко ма́слина, псало́мски рещи́, плодови́та, богодѣ́йственно иска́пающи благочести́вымъ еле́й благода́ти Бо́жія, моли́ спасти́ся душа́мъ на́шимъ.

Испещре́на оде́ждою чистоты́ и просвѣще́на вѣ́рою боже́ственною, имѣ́ющи въ се́рдцѣ свое́мъ о́гнь Боже́ственнаго Ду́ха, си́мъ опали́вши нечистоты́ стремле́ніе и ле́сть я́вственно вра́жію низложи́вши, обрѣ́теся крѣ́пкая сопротивобо́рница врага́ льсти́ваго, Іуліанíя цѣлому́дренная, въ стезя́хъ пра́выхъ Бо́гу рабо́тающи, зако́нно пострада́вши, вѣне́цъ получи́ла еси́ отъ Христа́ Бо́га. Его́ же моли́ прегрѣше́ній оставле́ніе дарова́ти пра́зднующимъ святу́ю па́мять твою́.

Сла́ва, гла́съ 1:

Украше́на добро́тами боже́ственныя красоты́, а́нгеловъ добро́ты зри́ши, душе́вною чистото́ю Спа́су Христу́ жили́ще содѣ́лавшися, благовѣ́рная, му́жественнѣ, я́коже зла́то, искуси́лася еси́ въ горни́лѣ страда́ній твои́хъ, въ цѣлому́дріи и въ любви́ Бо́жіи вознесла́ся еси́, тѣ́мже и по сме́рти источа́еши бога́тно чудеса́, я́ко во́ды, вѣ́рою приходя́щимъ ко гро́бу твоему́, благоуха́нія всѣ́хъ духо́внаго исполня́ющи и тму́ бѣсо́вскую дале́че отгоня́ющи. Тѣ́мже вопіе́мъ ти́: о, всеблаже́нная княги́ня Іуліанíя, моли́ Царя́ Небе́снаго Импера́тору на́шему зда́віе пода́ти и на проти́вныя побѣ́ды, гра́ду же и на́мъ спасе́ніе и исцѣле́ніе.

И ны́нѣ, богоро́диченъ:

Всемíрную сла́ву, отъ человѣ́къ прозя́бшую и Влады́ку ро́ждшую, небе́сную две́рь воспои́мъ, Марíю Дѣ́ву, безпло́тныхъ пѣ́снь и вѣ́рныхъ удобре́ніе: Сія́ бо яви́ся не́бо и хра́мъ Божества́, Сія́, прегражде́ніе вражды́ разруши́вши, ми́ръ введе́ и Ца́рствіе отве́рзе; Сію́ у́бо иму́ще вѣ́ры утвержде́ніе, Побо́рника и́мамы, изъ Нея́ ро́ждшагося Го́спода. Дерза́йте у́бо, дерза́йте, лю́діе Бо́жіи, и́бо То́й побѣди́тъ враги́, я́ко Всеси́ленъ.

Вхо́дъ. Проки́менъ дне́. [И чте́нія три́.]

Проро́чества Иса́іина чте́ніе.

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ры, гла́съ 3:

Страда́льческое торжество́, вѣ́рніи, богому́дреннѣ соверша́емо, ви́дяще, чу́дному въ совѣ́тѣхъ Бо́гу на́шему благода́рственное пѣснопѣ́ніе воспои́мъ: неви́димую бо держа́ву проти́вныя си́лы въ же́нстѣмъ естествѣ́ побѣди́ и, Боже́ственную Свою́ си́лу въ не́мощи соверши́вши доброму́ченицы, тоя́ моли́твами спаса́етъ ду́ши на́ша.

Гла́съ 8:

Мíра оста́вльши красоту́, души́ благоро́діе благоро́дія свы́ше добро́тами уясни́ла еси́, блаже́нная княги́ня Іуліанíя, о́браза благода́ть житіе́мъ сохра́ньши, му́ченице непобѣди́мая, цѣлому́дрія забра́ло богови́дное и цвѣ́те естества́ всеблагоро́днѣйшій.

Гла́съ 4:

Добро́та тѣлесе́ и красота́ боже́ственная души́ твоея́ стеко́стеся, я́ко кри́нъ, просія́ла еси́, одѣ́яна добродѣ́тельми, непобѣжде́на и преукра́шена еле́емъ чистоты́ и кро́вію страда́нія, тѣ́мже и вѣне́цъ сугу́бъ Благода́тель тебѣ́ дарова́, къ Нему́ же возшла́ еси́, испещре́на свѣ́тло, въ черто́гъ неразори́мый, я́ко му́ченица непобѣди́мая.

Сла́ва, гла́съ 6:

Страда́льческимъ ше́ствовавши путе́мъ, мучи́тельскаго избѣжа́ла еси́ совѣ́та, цѣлому́дренная княги́ня Іуліанíя, я́ко дѣ́ва у́бо мудра́, свѣщу́ нося́щи, вошла́ еси́ во дво́ры Го́спода твоего́; я́ко му́ченица, му́жествомъ благода́ть прія́ла еси́ исцѣли́ти плотскíя стра́сти, но и на́съ, воспѣва́ющихъ тя́, душе́вныхъ болѣ́зней изба́ви, я́же къ Бо́гу моли́твами твои́ми.

И ны́нѣ, богоро́диченъ:

Тя́ стѣ́ну стяжа́хомъ, Богоро́дице Пречи́стая, и благоути́шное приста́нище, и утвержде́ніе, тѣ́мже молю́ся: и́же въ житіи́ обурева́ема окорми́ и спаси́ мя́.

На стихо́внѣ стихи́ры, гла́съ 4. Подо́бенъ: Яко до́бля.

Серде́чнаго раче́нія любви́ боже́ственнѣй и страда́нію твоему́, блаже́нная, ли́цы а́нгельстіи извѣ́стно удиви́шася: ка́ко му́жескимъ сплете́ніемъ врага́ неви́димаго низложи́вши, побѣ́дный вѣне́цъ досто́йно отъ дла́ни Живоно́сныя я́вственно прія́ла еси́?

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

По Христѣ́ скончава́ема, разже́ннымъ мудрова́ніемъ пла́мень погаси́ла еси́ по́хоти и, свѣщу́ душе́вную неугаси́му соблю́дши, возшла́ еси́ ко Христу́ въ черто́гъ небе́сный. Тѣ́мъ вси́ благоче́стно воспѣва́емъ, страстоте́рпица, святу́ю па́мять твою́, освяща́еми благода́тію.

Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ.

Стра́сти претерпѣ́ла еси́ мно́гихъ му́къ, всехва́льная, крѣ́пко присту́пльши, отсю́ду къ неболѣ́зненному преста́вилася еси́ воспрія́тію незаходи́маго сія́нія и свѣ́тлѣй ра́дости, вѣ́чному Боже́ственному наслажде́нію. Тѣ́мъ тя́ ублажа́емъ и свято́е твое́ дне́сь соверша́емъ торжество́, страстоте́рпице непобѣди́мая.

Сла́ва, гла́съ 6:

Пріиди́те, гра́дстіи лю́діе, просла́вимъ благовѣ́рную княги́ню Іуліанíю: та́ бо змíеву главу́ сокруши́, чистоту́ тѣле́сную соблю́дши, и кро́вію зе́млю освяти́, отъ су́щихъ здѣ́ преста́вися къ вѣ́чнымъ оби́телемъ и отъ Вседержи́тельныя руки́ по́двиговъ по́честь прія́тъ, про́ситъ очище́нія душа́мъ на́шимъ и ве́лія ми́лости.

И ны́нѣ, предпра́зднства или́ богоро́диченъ:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

[На благослове́ніи хлѣ́бовъ: Тропа́рь святы́я, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.]



НА УТРЕНИ,
На Бо́гъ Госпо́дь: Тропа́рь святы́я и предпра́зднства или богоро́диченъ.

По 1-й каѳи́смѣ сѣда́ленъ, гла́съ 5. Подо́бенъ: Собезнача́льное Сло́во.

Благоче́стно послѣ́довавши за́повѣдемъ Вседержи́теля, цѣлому́дрія тли́телю не покори́лася еси́, но претерпѣ́ла еси́ тве́рдо ру́къ отъя́тіе и но́гъ отсѣче́ніе и преста́вилася еси́ къ Бо́гу, благовѣ́рная княги́ня Іуліанíя, моли́ся о на́съ, соверша́ющихъ па́мять твою́. [Два́жды.]

Сла́ва, и ны́нѣ, богоро́диченъ:

Те́плая предста́тельница и непобѣди́мая, упова́ніе извѣ́стное и непосты́дное, стѣно́, и покро́ве, и приста́нище прибѣга́ющихъ къ Тебѣ́, Приснодѣ́во Чи́стая, Сы́на Твоего́ и Бо́га моли́ со а́нгелы умире́ніе да́ти мíру, и спасе́ніе, и ве́лію ми́лость.

По 2-й каѳи́смѣ сѣда́ленъ, гла́съ 4. Подо́бенъ: Гро́бъ Тво́й.

Отсѣче́ніе удо́въ тѣле́сныхъ до́блественно претерпѣ́ла еси́, и къ свѣ́ту преста́вилася еси́ боже́ственному и невеще́ственному, и по кончи́нѣ блаже́ннѣй источа́еши же исцѣле́ній ка́пли, Іуліанíя благовѣ́рная, уставля́еши разже́ніе страсте́й си́лою духо́вною. [Два́жды.]

Сла́ва, и ны́нѣ, богоро́диченъ:

Моли́твы Твои́хъ ра́бъ пріими́, Богоро́дице, и изба́ви на́съ отъ вся́кія ско́рби, я́ко ро́ждшая Христа́ Спа́са, Изба́вителя ду́шъ на́шихъ.

По Хвали́те и́мя Госпо́дне... Велича́ніе:

Велича́емъ тя́, свята́я благовѣ́рная княги́ня Іуліанíе, и чте́мъ честна́я страда́нія твоя́, я́же за Христа́ претерпѣ́ла еси́.

Псало́мъ избра́нный: Бо́гъ на́мъ прибѣ́жище и си́ла...

По поліеле́и сѣда́ленъ, гла́съ 4:

Ревни́тельницу по благоче́стіи, побѣди́тельницу на врага́ до́блюю, въ вели́кихъ чудесѣ́хъ возсія́вшую, при́сно вси́ восхваля́емъ вѣ́рою благовѣ́рную княги́ню Іуліанíю: то́читъ бо цѣльбы́ притека́ющимъ съ вѣ́рою, и утоля́етъ стра́сти лю́тыя, и су́щія въ ско́рбехъ человѣ́ки заступа́етъ. [Два́жды.]

Сла́ва, и ны́нѣ, богоро́диченъ:

Стѣна́ непобѣди́мая на́мъ, христіа́номъ, еси́, Богоро́дице Дѣ́во, къ Тебѣ́ бо прибѣга́юще, невреди́ми пребыва́емъ и, па́ки согрѣша́юще, и́мамы моли́твенницу Тя́. Тѣ́мъ, благодаря́ще, вопіе́мъ Ти́: ра́дуйся, Благода́тная, Госпо́дь съ Тобо́ю.

Степе́нна, 1-й антифо́нъ 4-го гла́са. Проки́менъ, [гла́съ 4]: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Вся́кое дыха́ніе... Ева́нгеліе му́ченицѣ, [Ма́рка, зача́ло 21].

По 50-мъ псалмѣ́ стихи́ры, гла́съ 6:

[Страда́льческимъ ше́ствовавши путе́мъ, мучи́тельскаго избѣжа́ла еси́ совѣ́та, цѣлому́дренная княги́ня Іуліанíя, я́ко дѣ́ва у́бо мудра́, свѣщу́ нося́щи, вошла́ еси́ во дво́ры Го́спода твоего́; я́ко му́ченица, му́жествомъ благода́ть прія́ла еси́ исцѣли́ти плотскíя стра́сти, но и на́съ, воспѣва́ющихъ тя́, душе́вныхъ болѣ́зней изба́ви, я́же къ Бо́гу моли́твами твои́ми.]

Кано́нъ [пра́здника или́ Богоро́дицѣ со ирмосо́мъ на 6] и благовѣ́рнѣй княги́нѣ Іуліанíи [на 8], гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Лику́ющи, му́ченица, о Бо́зѣ и луча́ми исполня́ема отъ Него́, зарю́ мнѣ́ пода́ждь свѣтоно́сну твои́ми моли́твами, да пою́ твоя́ чудеса́.

Яко голуби́ца цѣлому́дренная, на высоту́ добродѣ́телей возшла́ еси́, крилѣ́ свяще́ннѣ посре́бренѣ иму́щи, и́миже возлетѣ́вши, въ ра́йстѣй оби́тели вогнѣзди́лася еси́, сла́вная Іуліанíя.

На земли́ подвиза́вшися цѣлому́дрія ра́ди, всебога́тая, и вре́менную сме́рть претерпѣ́вши, на небесѣ́хъ ны́нѣ воздая́нія отъ Влады́ки пріе́млеши, му́ченица непобѣди́мая, во вѣ́ки безконе́чныя.

Богоро́диченъ: Дѣ́во Всенепоро́чная, Христа́ ро́ждшая, и Сего́ въ ложесна́хъ понесла́ еси́, Неискусому́жная, разрѣши́ мра́къ души́ моея́ и просвѣти́ мя́, да пою́ Тя́.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Цѣлому́дрія жела́ніемъ одержа́ся, соблюла́ еси́ души́ и тѣлесе́ чистоту́, была́ еси́ прія́тна же́ртва Христу́, вопію́щи: свя́тъ еси́, Го́споди, спаса́яй ду́ши на́ша.

Оскверни́тися страстьми́ добро́тѣ кра́снѣй, душе́внѣй и богови́днѣй не стерпѣ́ла еси́, всему́драя, добро́ту несказа́нную честна́го Жениха́ твоего́ уразумѣ́вши, всесла́вная.

Боже́ственный вои́стину славíй, и́же ве́сну небе́сную дости́гши, чи́стая ла́стовица, кра́сная го́рлица, голуби́ца удобре́нная, лю́тыхъ обстоя́ній на́съ спаси́, Бо́жія сла́вы улучи́ти сподо́би.

Богоро́диченъ: Засту́пница скорбя́щимъ, спасе́ніе и упова́ніе ненадѣ́емымъ, Богоро́дице Всепѣ́тая, моли́ Христа́ Бо́га изба́витися на́мъ отъ бѣ́дъ.

Сѣда́ленъ, гла́съ 5. Подо́бенъ: Собезнача́льное.

Добродѣ́тели свѣ́тлостію просвѣща́ема и муче́нія по́двигомъ украша́ема, па́че со́лнца, прему́драя, сія́еши тве́рдѣ и просвѣща́еши вои́стинну творя́щихъ вѣ́рно па́мять твою́ свѣтоно́сную, пресла́вная страстоте́рпица Іуліанíя, вели́кая княги́ня, покланя́ющихся моще́мъ твои́мъ спаса́й. [Два́жды.]

Сла́ва, и ны́нѣ, богоро́диченъ:

Ужа́сно чу́до зача́тія и несказа́ненъ о́бразъ рождества́ въ Тебѣ́ позна́ся, Чи́стая Приснодѣ́во, ужаса́етъ мо́й у́мъ и удивля́етъ по́мыслъ, сла́ва Твоя́, Богоро́дице, во вся́ концы́ вселе́нныя дости́же во спасе́ніе ду́шъ на́шихъ.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Уязви́вши се́рдце твое́ любо́вію Жениха́ твоего́, вся́ку плотску́ю любо́вь отве́ргла еси́ тве́рдо, внегда́ убива́емѣй бы́ти, болѣ́зненнѣ вопію́щи: не разлучи́тъ любве́ Твоея́, Христе́, му́къ преще́ніе.

Была́ еси́ непоколеби́мъ и непреклони́мъ во вре́мя обстоя́нія сто́лпъ, всесла́вная, цѣлому́дрія основа́ніе, положено́ на ка́мени вѣ́ры, преблаже́нная.

Претерпѣ́ла еси́ му́жески по́двигъ, му́ченица многострада́льная. И пе́рвѣе умовре́дно вельми́ хва́лящагося съ шу́момъ погуби́ла еси́ кре́стною си́лою, о Іуліанíе всеблаже́нная.

Богоро́диченъ: Ви́ждь ми́лостивымъ о́комъ Твои́мъ, и посѣти́ озлобле́ніе, е́же и́мамъ, и лю́тыхъ напа́стей, и вре́да, и бѣ́дъ, и искуше́ній мя́ изба́ви безмѣ́рною ми́лостію Твое́ю, Богоро́дице Приснодѣ́во.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Жену́ тя по естеству́ нарица́емъ, но па́че си́лы же́нскія подви́глася еси́ о цѣлому́дріи, да Христо́въ зако́нъ испо́лнивши, за Него́ же му́жественно пострада́ла еси.

О, безчеловѣ́чнаго и немилосе́рдаго мучи́тельства суровства́! Ру́цѣ бо и но́зѣ твои́ лю́тѣ, страстоте́рпица, мече́мъ отсѣче́ и тѣ́мъ главу́ не пощаде́, у́мъ утвержда́ющу Подвигополо́жнику Христу́.

О, му́жества страстоте́рпицы! О, чистоты́ крѣ́пости! О, ра́зума непрекло́нна! Яко уязвля́ема вельми́ и разсѣка́ема неми́лостивно, яви́ся страстоно́сица велича́йшая.

Богоро́диченъ: Крѣ́посте моя́, Пречи́стая, прибѣ́жище, и необори́мая стѣно́, и къ Бо́гу моли́твенница су́щая, вѣ́чнующаго пла́мени и гее́нны свободи́ мя.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Руко́ю Влады́ки твоего́ окормля́ема, преплыла́ еси́ непостоя́нное мо́ре нече́стія, честна́я, и устреми́лася еси́ ко приста́нищу, Іуліанíя, вы́шнія свѣ́тлости, богоблаже́нная.

Не дово́ленъ бы́въ злочести́вый мучи́тель убіе́ніемъ благовѣ́рныя княги́ни, но и тѣ́ло твое́, разсѣче́нное на ча́сти, въ рѣку́ вве́рже окая́нный, не устыди́вся благоро́дія твоего́, всечестна́я.

Спасы́й отъ чре́ва ки́това содержи́маго въ не́мъ проро́ка пресла́вно, отъ рѣ́чныхъ во́дъ твоя́ спаса́етъ побѣдоно́сныя мо́щи по кончи́нѣ, страстоте́рпице всехва́льная.

Богоро́диченъ: Ма́терь Дѣ́ву Отрокови́цу Боже́ственнымъ просвѣща́еми Ду́хомъ, Пречи́стая, свяще́нніи проро́цы свяще́нными Тя́ гла́сы провозвѣсти́ша, изъ Нея́же Бо́гъ Сло́во па́че вины́ же и сло́ва воплоти́ся за милосе́рдіе безконе́чное.

Конда́къ, гла́съ 2:

Воспое́мъ дне́сь Благодѣ́теля всѣ́хъ Бо́га, просла́вльшаго въ Россíи Іуліанíю богому́друю, да моли́твами ея́ пода́стъ душа́мъ на́шимъ грѣхо́въ оставле́ніе и ве́лію ми́лость.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Красото́ю страда́ній уподо́билася еси́, му́драя, прекра́сному Жениху́, Христу́. Ему́же предстоя́щи, пое́ши, ра́дующися: препѣ́тый отце́въ Госпо́дь и Бо́гъ, благослове́нъ еси́.

Ка́пли твои́хъ крове́й, му́ченица, иска́пающи, багряни́цу многоцѣ́нну и нетлѣ́ннаго весе́лія ри́зу истка́ша, е́юже ны́нѣ, богому́драя, на небесѣ́хъ одѣ́яна, у́мно Жениху́ предстои́ши.

Жениха́ Безсме́ртнаго, Жизнода́вца жела́ющи, я́ко да́ръ страда́ніе Сему́ принесла́ еси́ и воспрія́ла еси́ небе́сное Ца́рство и вѣне́цъ нетлѣ́ненъ, му́ченице сла́вная.

Богоро́диченъ: Изъ дѣви́ческаго боку́ вопло́щся, яви́лся еси́ на спасе́ніе на́ше. Тѣ́мъ, Твою́ Ма́терь вѣ́дуще, Богоро́дицу, благода́рно взыва́емъ: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Тѣ́ла ме́ртвеннаго ты́ не пощадѣ́ла еси́, тѣ́мже безсме́ртіе пребыва́ющее наслѣ́довала еси́: умертви́лася еси́ любве́ ра́ди, сла́вная, стра́сти Умертви́вшаго.

Несумнѣ́нну иму́щи вѣ́ру, еле́емъ просвѣ́щши крове́й твои́хъ, му́ченица, свѣщу́ твою́, вну́трь вошла́ еси́ черто́га, пою́щи въ небе́снѣй ра́дости: Го́спода по́йте, дѣла́, и превозноси́те Его́ во вѣ́ки.

Взя́тся у́мъ тво́й, блаже́нная Іуліанíя, къ боже́ственнѣй вои́стинну высотѣ́, высо́къ бо ты́ стяжа́ла еси́ ра́зумъ и въ черто́гъ свѣ́телъ всели́лася еси́, вопію́щи: Го́спода по́йте, дѣла́, и превозноси́те Его́ во вѣ́ки.

Богоро́диченъ: Во слѣ́дъ Тебѣ́ теко́ша жены́, мѵ́ра благово́ннаго благоуха́нія духо́внаго наслажда́ющися, Всечестна́я Богоневѣ́сто, еди́на Неискусобра́чная, изъ утро́бы Твоея́ возсія́вшаго Единоро́днаго Сы́на Христа́ Бо́га, и съ Тобо́ю ца́рствуютъ, и́стинно пѣсносло́вяще Его́ во вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Су́щи испо́лнена даро́въ духо́вныхъ, неду́ги неисцѣ́льныя цѣли́ти боля́щихъ, уставля́еши о́гненное опале́ніе, ду́хи отгоня́еши лука́выя и всѣ́мъ въ печа́лѣхъ помога́еши, досточу́дная.

Дне́сь па́мять твоя́ на́мъ возсія́, страстоте́рпица Іуліанíя, па́че со́лнца, всѣ́хъ веселя́щи сердца́ вѣ́рныхъ, мы́сли просвѣща́ющи и тмы́ неду́говъ отгоня́ющи, ю́же моле́бно пра́зднуемъ.

Яко предстоя́щи Зижди́телю со дерзнове́ніемъ Влады́цѣ, му́ченица Іуліанíя, со всѣ́ми отъ вѣ́ка святы́ми, проси́ согрѣше́ній проще́нія тя́ пою́щимъ.

Богоро́диченъ: Ра́дости испо́лни мя́ и весе́лія, Дѣ́во, я́ко пріи́мши Вину́ ра́дости: Ты́ бо источи́ла еси́ всѣ́мъ ра́дованіе.

Свѣти́ленъ:

Чи́ста же́ртва принесла́ся еси́, и приноше́ніе пресвѣ́тло, и я́ко благово́нный ѳиміа́мъ, Іуліанíя богому́драя, Христу́ Бо́гу на́шему, Его́же моли́ спасти́ и просвѣти́ти ду́ши на́ша. [Два́жды.]

Сла́ва, и ны́нѣ, предпра́зднства или́ богоро́диченъ:

Тя́ заступле́ніе вси́ и́мамы, грѣ́шніи, о Пречи́стая Дѣ́во, Ты́ благоувѣ́тлива на́мъ сотвори́ Сы́на Твоего́ ма́терними Твои́ми моли́твами.

На хвали́техъ стихи́ры, гла́съ 6:

Цѣлому́дреннымъ ше́ствовавши путе́мъ, прароди́тельскаго избѣжа́ла еси́ поползнове́нія ко грѣху́, Іуліанíя всечестна́я, и я́ко му́ченица му́жественна благода́ть прія́ла еси́ цѣли́ти плотскíя стра́сти. Но и на́съ, воспѣва́ющихъ тя́, душе́вныхъ болѣ́зней изба́ви къ Бо́гу твои́ми моли́твами.

Гла́съ 4:

Наста́, празднолю́бцы, свѣ́тлое торжество́, па́мять страстоте́рпицы, благовѣ́рныя княги́ни Іуліанíи, веселя́щи вся́ческая, сія́ющи заря́ми чуде́съ въ мíрѣ, принося́щи человѣ́комъ непреста́нную благода́ть. Тоя́ моли́твами, Христе́, спаси́ ду́ши на́ша.

Гла́съ 1:

Въ моли́твахъ та́йно бдя́щи и наслади́вшися писа́ньми богодухнове́нными, Іуліанíя сла́вная, на ра́мо взе́мши кре́стъ Госпо́день и Сему́ послѣ́дующи воздержа́ніемъ, всю́ ле́сть змíя низложи́ла еси́, зову́щи Христу́: Женише́ небе́сный, Ты́ бу́ди ми́ утвержде́ніе.

Яко на ка́мени тве́рдѣ цѣлому́дрія утверди́вшися, Іуліанíя сла́вная, убíйцу врага́ посрами́ла еси́ и вѣне́цъ побѣ́дный досто́йно прія́ла еси́.

Сла́ва, гла́съ 8:

Вся́къ язы́къ да подви́жится къ похвале́нію благовѣ́рныя княги́ни Іуліанíи, ве́сь ро́дъ и во́зрастъ вся́къ, ю́ноши и дѣ́вы, Христо́ву му́ченицу похвала́ми вѣнча́емъ. Зако́нно бо му́жествовавши и сла́бость же́нскую отве́ргши, страда́льческими болѣ́зньми неи́стоваго врага́ низложи́. Небе́снымъ же и боже́ственнымъ вѣнце́мъ украси́вшися, мо́лится Христу́ Бо́гу дарова́ти на́мъ ве́лію ми́лость.

И ны́нѣ, богоро́диченъ:

Арха́нгела Гавріи́ла гла́съ воспріи́мше, рце́мъ: ра́дуйся, Ма́ти Бо́жія, Яже Жизнода́вца Христа́ мíру ро́ждшая.

Та́же славосло́віе вели́кое, тропа́рь, [ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я, на 8. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 181. [Аллилу́ія, гла́съ 1: Терпя́ потерпѣ́хъ Го́спода, и вня́тъ ми́ и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе отъ Ма́рка, зача́ло 21. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].


Моли́тва.

О, блаже́нная госпоже́, пресла́вная Христо́ва му́ченица, небе́сныхъ а́нгеловъ сожи́тельница, благовѣ́рная княги́ня Іуліанíя, до́брѣ за чистоту́ подвиза́вшаяся, ея́ же ра́ди и Боже́ственными дара́ми обогати́вшаяся, во вре́меннѣй жи́зни лю́тѣ отъ злоко́зненнаго врага́ пострада́вшая, утѣше́ніе же неконча́емое отъ Христа́ Бо́га получи́вшая, благи́ми дѣ́лы и кро́тостію украси́вшаяся и кро́ткихъ зе́млю наслѣ́довавшая, благоче́стно въ зако́нѣ пожи́вшая и вельми́ ны́нѣ чудесы́ просія́вшая! Ты́, я́же чистоты́ ра́ди твоея́ серде́чныя, прія́ла въ тя́ свѣ́тъ Свята́го Ду́ха и была́ еси́ всѣ́хъ благи́хъ дѣ́лъ сокро́вище на земли́ и, сего́ ра́ди благíй коне́цъ му́ченичества улучи́вши, неизрече́ннаго свѣ́та сподо́блена еси́ въ вѣ́чныхъ кро́вѣхъ небе́снаго селе́нія. Ты́, я́же со святы́ми собо́ры водворя́ешися и съ му́ченикъ ли́ки весели́шися, помяни́ и на́съ, добродѣ́тельное твое́ житіе́ и страда́нія твоя́ му́ченическая похваля́ющихъ и съ духо́вною ра́достію почита́ющихъ твою́ па́мять. При́зри на ны́, волна́ми жите́йскими обурева́емыя, да твои́ми моли́твами, до́брѣ пожи́вше, діа́вольскихъ избѣжи́мъ сѣте́й и съ тобо́ю вѣ́чныхъ бла́гъ сподо́блены бу́демъ. О, всеблаже́нная страстоте́рпице, всѣ́хъ Влады́цѣ и Бо́гу блага́я и вѣ́рная рабо́ яви́вшаяся! Дне́сь, со́бранніи въ хра́мѣ твое́мъ, къ ра́цѣ моще́й твои́хъ припа́дающе, умиле́нно вопіе́мъ и мо́лимъ тя́: моли́ съ на́ми и о на́съ умоля́емаго отъ своего́ благоутро́бія Бо́га, да ми́лостивно услы́шитъ на́съ, прося́щихъ Его́ благосты́ню, и пода́стъ на́мъ вся́, я́же ко спасе́нію и житію́ ну́жная проше́нія, и всѣ́мъ, на вся́комъ мѣ́стѣ, во вся́кой ско́рби и обстоя́ніи тре́бующимъ Его́ человѣколю́бія и по́мощи, вели́кую Свою́ ми́лость. Да благода́тію Бо́жіею и твои́мъ те́плымъ хода́тайствомъ здра́ви всегда́ душе́ю и тѣ́ломъ пребыва́юще, сла́вимъ Ди́внаго во святы́хъ Свои́хъ Бо́га Изра́илева, не удаля́ющаго по́мощи Своея́ отъ на́съ всегда́, ны́нѣ, и при́сно, и во вѣ́ки вѣко́въ, ами́нь.

Источникъ: Слу́жба святѣ́й благовѣ́рнѣй княги́нѣ Іуліанíи Новото́ржстѣй. Мѣ́сяца Деке́мврія въ 21-й де́нь и Іу́нія во 2-й де́нь. — М.: Сѵнода́льная Тѵпогра́фія, 1913. — 20 л.

/ Къ оглавленію раздѣла /


Наверхъ / Къ титульной страницѣ

0