Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 21-й де́нь.
Предпра́зднство Рождества́ Христо́ва.
И святы́я му́ченицы Іуліанíи, я́же въ Никомидíи.

[ВЕЧЕРЪ,]
На Го́споди воззва́хъ: стихи́ры предпра́зднства, гла́съ 4. Подо́бенъ: Да́лъ еси́ зна́меніе.

Сто́гъ гуме́нный* Твое́ чре́во, Всенепоро́чная Богоро́дице, показу́ется,* кла́съ невоздѣ́ланный* па́че ума́ и сло́ва нося́що неизрече́нно.* Его́же въ верте́пѣ Виѳлее́мстѣмъ роди́ши,* тва́рь всю́ Боже́ственными ра́зумы* хотя́щаго пита́ти благода́тію* и отъ гла́да человѣ́чество* душетлѣ́ннаго изба́вити.

Юница непоро́чная,* упита́нного Юнца́ нося́щи во чре́вѣ,* гряде́тъ во святы́й верте́пъ* пресла́внымъ сло́вомъ Сего́ породи́ти,* и пелена́ми пови́ти, я́ко Человѣ́ка,* и положи́ти въ я́слѣхъ, я́ко Младе́нца.* Тва́рь, предпра́зднствуй,* ра́достно велича́ющи,* такова́я пресла́вная на земли́ Содѣ́лавшаго.

И святы́я, гла́съ то́йже. Подо́бенъ: Яко до́бля.

Багре́ніи кро́вными* спасе́нія оде́жду себѣ́,* всехва́льная, обагри́вши* и просвѣти́вшися Ду́хомъ,* Го́споду обручи́лася еси́, Безсме́ртному Царю́,* соблюда́ющему тя́ непоро́чну,* нерастлѣ́нну во вѣ́къ вѣ́ка* въ черто́зѣхъ небе́сныхъ,* я́ко дѣ́ву преудо́бренну и нетлѣ́нну.

Ра́намъ пріобщи́вшися,* и со огне́мъ бра́вшися,* и пло́ти терза́нія претерпѣ́вши,* и коно́бная врѣ́нія до́блественнѣ поне́сши,* не побѣди́лася еси́ по́мысломъ,* истука́ннымъ не поже́рла еси́,* но, прекло́нши Бо́гу вы́ю,* ме́чнымъ муче́ніемъ вѣнцено́сица* на небеса́ возшла́ еси́.

Ка́плями кро́ве уясни́вшися,* возсія́ла еси́ проявле́нно, я́ко со́лнце,* и отгна́ла еси́, всехва́льная,* безбо́жія тму́ благода́тію,* му́ченице Іуліанíе,* и вѣ́рныя просвѣти́ла еси́,* чту́щія твоя́ до́блественныя по́двиги* и па́мять свѣ́тлую, и свѣтоно́сную,* и по всему́ спаси́тельную.

Сла́ва, и ны́нѣ, предпра́зднства, гла́съ 6:

Сіо́не, торжеству́й, Іерусали́ме, весели́ся, гра́де Христа́ Бо́га, подыми́ Зижди́теля, въ верте́пѣ и я́слѣхъ вмѣща́емаго. Отве́рзите ми́ врата́ и, вше́дъ въ ня́, узрю́ я́ко Младе́нца, пелена́ми повива́емаго, дла́нію же содержа́щаго тва́рь, Его́же пою́тъ а́нгели непреста́ннымъ гла́сомъ, Жизнода́вца Го́спода, спаса́ющаго ро́дъ на́шъ.

На стихо́внѣ стихи́ры предпра́зднства, гла́съ 2. Подо́бенъ: До́ме Евфра́ѳовъ.

Всѣ́хъ проро́ковъ* прорече́нія исполня́ются:* Христо́съ бо ражда́ется* въ Виѳлее́мѣ гра́дѣ* изъ Чи́стыя Богоотрокови́цы.

Сти́хъ: Бо́гъ отъ ю́га пріи́детъ* и Святы́й изъ горы́ пріосѣне́нныя ча́щи.

Сла́ва земноро́дныхъ,* и ра́дованіе, и хвала́,* Виѳлее́ме честны́й,* митропо́лія Боже́ственная,* подыми́ Зижди́теля твоего́.

Сти́хъ: Го́споди, услы́шахъ слу́хъ Тво́й и убоя́хся,* Го́споди, разумѣ́хъ дѣла́ Твоя́ и ужасо́хся.

Сло́во Отчее,* Имже вся́ бы́ша,* безстра́стно и нете́чно,* Ѵпоста́сь зри́тся еди́на* во двою́ естеству́.

Сла́ва, и ны́нѣ, гла́съ 6. Византíево:

Безневѣ́стная Дѣ́во, отку́ду пришла́ еси́? Кто́ роди́вый Тя́, кто́ и ма́ти Твоя́? Ка́ко Зижди́теля но́сиши на руку́? Ка́ко не растли́лася еси́ утро́бою? О, вели́кихъ пресла́вныхъ на Тебѣ́ стра́шныхъ та́инствъ, на земли́ соверша́емыхъ, зри́мъ, Всесвята́я! и предуготовля́емъ досто́йный Тебѣ́ до́лгъ, на земли́ верте́пъ, и отъ небе́съ про́симъ пода́ти звѣзду́. И волсви́ же прихо́дятъ отъ восто́ковъ земли́ къ за́падомъ ви́дѣти человѣ́ческое Спасе́ніе, въ я́слѣхъ пелена́ми повива́емое.

Тропа́рь, гла́съ 4:

Агница Твоя́, Іису́се, Іуліанíя, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.

Сла́ва, и ны́нѣ, гла́съ то́йже:

Гото́вися Виѳлее́ме, отве́рзися всѣ́мъ, Еде́ме, красу́йся Евфра́ѳо, я́ко дре́во живота́ въ верте́пѣ процвѣте́ отъ Дѣ́вы: ра́й бо Оноя чре́во яви́ся мы́сленный, въ не́мже боже́ственный са́дъ: отъ него́же я́дше, жи́ви бу́демъ, не я́коже Ада́мъ у́мремъ; Христо́съ ражда́ется пре́жде па́дшій возста́вити о́бразъ.

[Зри́:] Вѣ́домо бу́ди, идѣ́же пра́зднуется свята́го Петра́ митрополи́та пра́здникъ, пое́мъ кано́нъ святы́я Іуліанíи на повече́ріи, вку́пѣ съ трипѣ́снцемъ и послѣди́ стихи́ры ея́.


НА ПОВЕЧЕРІИ,
Трипѣ́снецъ, ирмо́съ по два́жды, тропари́ на 6, и па́ки послѣди́ ирмо́съ о́ба ли́ка вку́пѣ. Его́же краегране́сіе: Четве́ртому пою́. Гласъ 2.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Вотще́ со́нмище Иродово и во́лею собира́ется, скверноубíйственное, ражда́ющагося Го́спода уби́ти Христа́. Ему́же пое́мъ: Ты́ еси́ Бо́гъ на́шъ, и нѣ́сть пра́веденъ, па́че Тебе́, Го́споди.

Лю́тый совѣ́тъ Иродовъ покрыва́ется, богобо́рныя души́ сы́й, со младе́нцы Влады́ку уби́ти Христа́. Ему́же пое́мъ: Ты́ еси́ Бо́гъ на́шъ, и нѣ́сть пра́веденъ, па́че Тебе́, Го́споди.

Пѣ́снь 8.

Ирмо́съ: Глаго́лъ мучи́телевъ поне́же превозмо́же, седмери́цею пе́щь разжже́на бы́сть иногда́, въ не́йже о́троцы не опали́шася, царе́во попра́вше велѣ́ніе, но вопія́ху: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Излива́юще я́ко мѵ́ра сле́зы, на́съ ра́ди Христу́ ражда́ющемуся пло́тію, и́миже скве́рны очи́стимъ, Пречи́стому чи́стѣ приходя́ще и вопію́ще: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Слеза́ми умиле́нія сле́зъ да убѣжи́мъ, грѣ́шніи, му́ки бу́дущія стра́шныя, Христо́вы стопы́ пріе́мше, полага́ему въ пелена́хъ я́ко Младе́нцу, вопію́ще: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Священнодѣ́йствоватися избавле́нію вѣ́дяще отъ свои́хъ утро́бъ же и сле́зъ исто́чника, Христу́ исповѣ́даніемъ предъизмы́вшеся, вѣ́рніи, да присту́пимъ пло́тію къ Ро́ждшемуся въ верте́пѣ, вопію́ще: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Пѣ́снь 9.

Ирмо́съ: Душа́ми чи́стыми и нескве́рными устна́ми, пріиди́те, возвели́чимъ Нескве́рную и Пречи́стую Ма́терь Емману́илеву, Еюже изъ Нея́ къ Рожде́нному принося́ще моли́тву: пощади́ ду́ши на́ша, Христе́ Бо́же, и спаси́ на́съ.

Неразу́менъ никто́же, ни лука́въ, завистнообра́зникъ да бу́детъ, отъ принося́щихъ ны́нѣ да́ры Бо́гу прія́тны, вмѣ́сто сми́рны, и зла́та, и лива́на добродѣ́телей мѵроуха́ніе, пою́щихъ Христу́ ражда́ющемуся: пощади́ ду́ши на́ша, Христе́ Бо́же, и спаси́ на́съ.

Глаго́лаше ко прише́дшимъ Иродъ волхво́мъ му́дрымъ: ше́дше, поищи́те ро́ждшагося ны́нѣ Царя́ и, обрѣ́тше, возвѣсти́те мнѣ́, — поучи́вся лю́тый о убíйствѣ скверноубíйственнымъ се́рдцемъ. Пощади́ ду́ши на́ша, Христе́ Бо́же, и спаси́ на́съ.

О, слѣпо́тнаго скверноубíйства, вседе́рзостнѣ! Имже забве́ніе получи́лъ еси́, я́ко Бо́га никто́же е́мь рука́ми убіе́тъ; преразже́гся же я́ростію, свирѣ́по младе́нцы закала́еши, Ироде. Пощади́ ду́ши на́ша, Христе́ Бо́же, и спаси́ на́съ.


НА УТРЕНИ,
[На Бо́гъ Госпо́дь: Тропа́рь предпра́зднства, два́жды. Сла́ва, святы́я. И ны́нѣ, предпра́зднства.]

По 1-й каѳи́смѣ сѣда́ленъ предпра́зднства, гла́съ 2. Подо́бенъ: Благообра́зный.

Непристу́пный Бо́гъ, за благоутро́біе присту́пенъ мнѣ́ бы́въ, во́лею прихо́дитъ пло́тію роди́тися, я́ко Человѣ́къ, во гра́дѣ Виѳлее́мѣ изъ Дѣ́вы Отрокови́цы. Его́же прія́ти усе́рдно потщи́мся, вопію́ще со стра́хомъ: Го́споди, сла́ва Тебѣ́.

Сла́ва, и ны́нѣ, гла́съ 1. Подо́бенъ: Гро́бъ Тво́й.

Приклони́вый небеса́ и въ Дѣ́ву всели́выйся, предгряде́тъ пло́тію въ Виѳлее́мстѣмъ верте́пѣ роди́тися, я́коже пи́шется, яви́тися же Младе́нецъ, младе́нцы оживля́яй во утро́бѣ. Сего́, ра́дующеся, ны́нѣ сря́щимъ вси́ се́рдца пра́востію.

По 2-й каѳи́смѣ сѣда́ленъ, гла́съ 5. Подо́бенъ: Собезнача́льное.

Виѳлее́ме, гото́вися на срѣ́теніе Дѣ́вы Марíи и Богома́тере: се́ бо гряде́тъ къ тебѣ́, Младе́нца нося́щи Христа́, Собезнача́льнаго Отцу́ и Ду́ху при́сно, Его́же въ верте́пѣ роди́тъ и по Рождествѣ́ Дѣ́ва па́ки яви́тся.

Сла́ва, и ны́нѣ, гла́съ 3. Подо́бенъ: Красотѣ́.

Чу́до пресла́вно зри́тся дне́сь: Спаси́тель бо на́шъ въ верте́пѣ пло́тію отъ Дѣ́вы на́съ ра́ди роди́тися ны́нѣ тщи́тся. Волсви́ же съ да́ры я́ко Царю́ покло́нятся, и па́стыріе со а́нгелы славосло́вятъ Его́; съ ни́миже и мы́ вопіе́мъ: сла́ва на́съ ра́ди Вочеловѣ́чшемуся.

Кано́нъ предпра́зднства со ирмосо́мъ на 8 и святы́я на 4.

Кано́нъ предпра́зднства, его́же краегране́сіе, по алфави́ту. Іо́сифъ. Гла́съ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Ра́дуйся, не́бо, и земле́, весели́ся: Бо́гъ бо на́шъ, бы́въ пло́тію отъ Дѣ́вы Отрокови́цы, ражда́ется и пелена́ми повива́ется, плени́цы же разрѣша́етъ мои́хъ прегрѣше́ній, я́ко благоутро́бенъ.

Цари́ца Чи́стая Царя́ всѣ́хъ ражда́етъ па́че ума́, вы́шнее вѣ́рнымъ Ца́рство отверза́ющаго и и́же въ на́съ окая́нно ца́рствующій всегда́ грѣ́хъ коне́чно отъе́млющаго.

Писа́нія проро́ческая коне́цъ пріе́млютъ: се́ бо, Его́же провозвѣсти́ша Христа́, во гра́дѣ Виѳлее́мѣ явля́ется воплоща́емь. Сего́ ны́нѣ предпра́здновати Рождество́ потщи́мся пра́востію мы́сли дне́сь.

Инъ кано́нъ святы́я, его́же краегране́сіе: Пѣ́ти тя́, му́ченице, да приложи́тъ Бо́гъ благода́ть. Іо́сифъ. Гла́съ то́йже.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Му́ченическою я́вѣ свѣ́тлостію облиста́ющи, о Бо́зѣ лику́еши, свяще́нно обожа́ема, всехва́льная, и просвѣще́ніе моли́твами твои́ми подава́еши пою́щимъ тя́.

Уязви́лася еси́ сладча́йшимъ раче́ніемъ Христо́вымъ, всехва́льная, и, плотскíя оста́вльши сла́сти и обру́чника тлѣ́ннаго, обручи́лася еси́, непоро́чная чи́стая дѣ́во, Сотво́ршему.

Осія́въ свѣтлоявле́нными добро́тами твою́ мы́сль, Созда́тель всѣ́хъ и Бо́гъ небе́сныхъ тя́ черто́говъ, дѣ́вственно лику́ющую, му́ченице богому́драя, удосто́й.

Богоро́диченъ: Дѣ́ва Созда́теля естества́ роди́ти и́детъ въ верте́пѣ, пло́ть изъ Нея́ по ѵпоста́си несказа́нно преесте́ственнѣ поне́сшаго, я́ко да обожи́тъ человѣ́чество.

Пѣ́снь 3.

Ирмо́съ: Яко непло́ды роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Даніи́лъ Тя́, отъ горы́ дѣ́вственныя ка́мень, Сло́ве, отсѣ́ченъ зри́тъ и истнѣва́ющь хра́мы и́дольскія держа́вою Твое́ю; сего́ ра́ди Тя́ стра́хомъ сла́вимъ.

Отъ восто́ка волсви́ Тебѣ́, Царю́ всѣ́хъ, наста́влени бы́вше звѣздо́ю, да́ры прино́сятъ, Христе́, сми́рну, зла́то и лива́нъ, уди́вльшеся Твоему́ снисхожде́нію.

Живоно́сный кла́съ ни́ва неора́нная но́ситъ, роди́ти во гра́дѣ Виѳлее́мѣ Маріа́мъ всѣ́хъ ду́ши пита́ющаго, зову́щихъ: Свя́тъ еси́, Го́споди.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Соверши́ла еси́ ду́шу хра́мъ Бо́жій пресвя́тъ, сла́вная, Боже́ственнымъ храмо́мъ вы́ну пѣ́сньми и моли́твами присѣдя́щи.

Велича́йшихъ улучи́ти жела́ющи дарова́ній, всечестна́я, болѣ́зни плотскíя терпѣ́ла еси́ я́ко въ чужде́мъ тѣлеси́.

Крове́й твои́хъ ка́плями безбо́жія о́гнь погаси́ла еси́ и вѣ́рныхъ напои́ла еси́, Іуліанíе, ра́зумы.

Богоро́диченъ: Избавля́яй человѣ́ки Изба́витель отъ Чи́стыя ражда́ется въ Виѳлее́мѣ, пелены́ я́коже Младе́нецъ пріе́мъ.

Конда́къ святы́я, гла́съ 3. Подо́бенъ: Дѣ́ва дне́сь.

Дѣ́вства добро́тами преочище́на, дѣви́це, и муче́нія вѣнцы́, Іуліанíе, ны́нѣ вѣнча́вшися, дае́ши су́щимъ въ ну́ждахъ и неду́зѣхъ исцѣле́ніе и спасе́ніе, приступа́ющимъ къ ра́цѣ твое́й: Боже́ственную бо благода́ть Христо́съ источа́етъ и жи́знь вѣ́чную.

Сѣда́ленъ, гла́съ 4. Подо́бенъ: Ско́ро предвари́.

Жениха́ возлюби́вши Творца́ и Бо́га, жениха́ тлѣ́ннаго оста́вила еси́, му́ченице честна́я, и, ра́дующися, претерпѣ́ла еси́ му́ки и терза́нія и о́гненное томле́ніе. Тѣ́мже, вѣнцено́сица, къ Боже́ственному черто́гу возшла́ еси́, испроша́ющи всѣ́мъ прегрѣше́ній проще́ніе.

Сла́ва, и ны́нѣ, предпра́зднства, гла́съ 3. Подо́бенъ: Красотѣ́ дѣ́вства.

Ра́дости испо́лнитеся, вся́ концы́: Богоро́дица бо роди́ти приближа́ется Царя́ вся́ческихъ. О, чудесе́ неизрече́ннаго! Безнача́льный начина́ется, и Безпло́тный воплоща́ется; верте́пъ пріе́млетъ содержа́щаго вся́ческая. Виѳлее́ме, ра́дуйся, и лику́й, тва́рь, де́нь предпра́зднственный.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

Свята́я мѵрополо́жница честна́го свяще́нія въ Виѳлее́мѣ гра́дѣ сіе́ излія́ти прихо́дитъ, свяще́ніе на́мъ всѣ́мъ подаю́щаго, вопію́щимъ: сла́ва, Христе́, си́лѣ Твое́й.

Богоглаго́ливе Иса́іе, честна́я твоя́ проповѣ́данія бы́вшая ви́дя вещми́, ра́дуйся и лику́й: Дѣ́ва бо безсѣ́менно роди́ въ верте́пѣ пло́тію Виѳлее́мстѣмъ Невмѣсти́маго.

Іису́съ пло́тію ражда́ется, и въ лѣ́тѣ безлѣ́тный ви́димь е́сть Младе́нецъ, разрѣша́я моя́ лѣ́тная прегрѣше́нія, и неизрече́нною нището́ю ны́нѣ обогаща́етъ мя́, обнища́вшаго тлетво́рными преступле́ніями.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Просте́рту мы́сль стяжа́вши ко всѣ́хъ Го́споду, пло́тію просте́рта и ураня́ема лю́то, ника́коже брегла́ еси́, Іуліанíе, до́брая дѣ́во.

Превозмого́ша раче́нія Влады́чняя пло́ти, всехва́льная му́ченице, омрачи́ти, тѣ́мже пренебрегла́ еси́ и бога́тство, и обру́чника, и многообра́зныя му́ки.

Тя́, нескве́рную а́гницу, я́коже во́лцы, мучи́теліе терза́юще, му́ченице, ра́нами, непоро́чное цѣ́лое Бо́жіе соверши́ша Боже́ственное овча́ и заколе́ніе.

Богоро́диченъ: Дѣ́вство по рождествѣ́ запеча́тано, Богоро́дице, ви́дящи, у́жасомъ одержи́ма бы́вши. Ча́до, взыва́ше, ка́ко ны́нѣ повію́ Тя, песко́мъ повива́ющаго мо́ре?

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Отъ Дѣ́вы ражда́ется Бо́гъ Емману́илъ и, въ я́слѣхъ возле́гъ, на́ше воззва́ніе во́лею содѣ́ловаетъ, Сего́ Рождество́ благоче́стно предпра́зднуимъ.

Сло́во сы́й пребезнача́льное Отчее и соесте́ственное, въ я́слѣхъ возле́гъ безслове́сныхъ, разрѣши́лъ еси́ безслове́сія ны́, предпра́зднствующія благоче́стно Твое́ Рождество́.

Блаже́нъ бы́сть ко́рень Іессе́евъ, прозябы́й Чи́стую, цвѣ́тъ Боже́ственный, нося́щую Христа́ Го́спода. Его́же предпра́зднуимъ Рождество́, ра́дующеся.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Струю́, му́ченице, злочести́ваго безбо́жія изсуши́ла еси́ тече́ньми крове́й, непра́ведно пролива́емыми, и о́гнь пре́лести погаси́ла еси́.

Всецѣ́лу тебе́ саму́ю Бо́гу принесла́ еси́, че́рвлень дѣ́вства багре́ніи крове́й твои́хъ свѣтлѣ́йшу соверши́вши.

Твое́ю добро́тою ду́шу уязви́вши, претече́, о Влады́ко, дѣ́ва ви́димыя добро́ты, страда́ніемъ сія́ющи.

Богоро́диченъ: Чу́до новолѣ́пно: Дѣ́ва и́детъ Пречи́стая въ верте́пъ Виѳлее́мскій роди́ти Бо́га вочеловѣ́чшася.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Но́въ на земли́ на́мъ Отрочищъ ро́ждся, Иже пре́жде вѣко́въ отъ Отца́ неизрече́нно возсія́въ, дре́вняго вся́ свободи́ преступле́нія, я́ко благоутро́бенъ.

Стра́нна и пресла́вна слы́шана бы́ша въ Виѳлее́мѣ гра́дѣ роди́вшуся Тебѣ́, Безнача́льне Сло́ве: па́стыріе бо со а́нгелы пѣ́снь Тебѣ́ я́ко Влады́цѣ приноша́ху.

Звѣзда́ пра́вды возвѣща́етъ волхво́мъ неизрече́нно Со́лнца ро́ждшася: Его́же честно́е ны́нѣ предпра́зднуимъ, ра́дующеся, Рождество́.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Жела́ніемъ уя́звлена бы́вши Боже́ственнымъ, взыва́ла еси́: Христа́ иду́ дости́гнути кра́снаго добро́тою, тѣ́мже му́ки терплю́, неукло́ннымъ ра́дующися ра́зумомъ.

Протяза́ти неми́лостивно и же́зліемъ сокруша́ти Госпо́дню а́гницу лука́вый гони́тель повелѣва́ше, просте́рту ко Христу́ мы́сль иму́щую.

Утреневала еси́ ко Христу́, Невече́рнему Со́лнцу, и Того́ свѣтлостьми́ ду́шу, богому́драя, и се́рдце озари́ла еси́ и къ Свѣ́ту преложи́лася еси́ присносу́щному.

Богоро́диченъ: Мо́ре пови́вый мгло́ю, во́лею ражда́ется Зижди́тель изъ Дѣ́вы Отрокови́цы и пелены́ я́ко Младе́нецъ пріе́млетъ, мíръ избавля́яй.

Конда́къ, гла́съ 2. Подо́бенъ: Вы́шнихъ ища́.

Въ Виѳлее́мѣ зря́ще пелена́ми Повива́емаго, всю́ зе́млю держа́ща руко́ю Свое́ю, предпра́зднственныя пѣ́сни Ро́ждшей Сего́ прино́симъ: ма́терски бо весели́тся, держа́щи въ нѣ́дрѣхъ Сы́на Бо́жія.

Икосъ:

Сы́на Бо́жія Дѣ́ва держа́щи во объя́тіихъ, ма́терскими облобыза́ньми цѣлу́ющи, вѣща́ше: сѣ́мене не позна́хъ въ зача́тіи и тлѣ́нія не подъя́хъ въ рожде́ніи, нынѣ́ же чиста́ е́смь, я́коже пре́жде, ку́пно и по рождествѣ́. Тѣ́мъ Твое́ проповѣ́дую, Ча́до, мно́гое благоутро́біе и непостижи́мое вели́чество, е́же показа́лъ еси́ на Мнѣ́. Отону́дуже и ра́дуюся, держа́щи въ нѣ́дрѣхъ Сы́на Бо́жія.

Пѣ́снь 7.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство преложи́ша, и посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Ка́ко Тя́ верте́пъ вмѣсти́тъ, гряду́ща на́съ ра́ди роди́тися, Невмѣсти́маго? Ка́ко Тя́ воздои́тъ Дѣ́ва, Пита́теля всѣ́хъ, Благоутро́бне Іису́се, су́ща.

Глаго́ломъ послѣ́дующе волхва́ Валаа́ма, волсви́ тща́тся Христу́ поклони́тися съ да́ры, разумѣ́юще Сего́, вся́кимъ дыха́ніемъ ца́рствующа.

Непло́дствующее человѣ́ческое естество́ вся́кія добродѣ́тели, ра́дуйся и лику́й: гряде́тъ бо Христо́съ отъ Дѣ́вы пло́тію роди́тися, я́ко да пока́жетъ Тя́ до́брымъ благоча́дно.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Безу́міемъ въ разжже́нный коно́бъ, му́ченице, судія́ тя́ вмета́етъ неми́лостивно; а́нгеломъ же Тя́ Госпо́дь невре́дну спасе́, Сего́ почита́ющу.

Не ужаса́ющися мужему́дренно, па́че же, всечестна́я му́ченице, ко огню́ гряде́ши, восхлажде́ніе чу́вствующи и вопію́щи: благослове́нъ еси́ въ хра́мѣ сла́вы Твоея́, Го́споди.

Ты́ Жениху́, я́коже вѣ́но, принесла́ еси́ наро́дъ и лю́ди, вѣ́ровавшіи въ Того́, и ле́сти омраче́ніе свѣтоно́сными твои́ми чудотворе́ньми отрази́ла еси́.

Богоро́диченъ: Ра́дуйся, село́ Невмѣсти́маго, Ма́ти Дѣ́во: Сего́ бо Плотоно́сца хотя́щи на́съ ра́ди въ верте́пѣ роди́ти, Пречи́стая, исправля́юща Свои́хъ ру́къ созда́ніе.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Мно́гими мя́, Христе́, преступле́ньми разбо́йниковъ бы́вшаго верте́пъ, за благоутро́біе неизрече́нное спаса́я, роди́тися въ верте́пѣ отъ Дѣ́вы Чи́стыя изво́лилъ еси́.

Подпису́я соверше́нное мнѣ́ оставле́ніе, написа́лся еси́ ке́саревымъ повелѣ́ніемъ Творе́цъ тва́ри съ рабы́: пою́ Твоего́ благоутро́бія безмѣ́рную, Влады́ко, пучи́ну.

Свѣ́тлая Влады́чня пала́то, ка́ко возшла́ еси́ въ малѣ́йшій верте́пъ, Царя́ Го́спода, на́съ ра́ди вопло́щшася, роди́ти, Всесвята́я Дѣ́во Богоневѣ́сто?

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Горѣ́ твое́ о́ко и у́мъ къ могу́щему спасти́ иму́щи Бо́гу, коно́бная врѣ́нія благода́тію Боже́ственнаго Ду́ха угаси́ла еси́, воспѣва́ющи пѣ́снь о́троческую, му́ченице, вѣ́рою: благослови́те, вся́ дѣла́ Госпо́дня, Го́спода.

Глаго́лу мучи́теля злочести́ваго служа́ще, огня́ досто́йніи суему́дренніи жи́ву тя́, му́ченице, во о́гнь вложи́ша; но неопале́на была́ еси́ огне́мъ, Женихо́вою любо́вію, богоно́сная, ороша́ема, Сего́ почита́ющи.

Стоя́ла еси́ предъ суди́щемъ, Христа́ проповѣ́дающи, Бо́га Безсме́ртнаго, претерпѣ́вшаго распя́тіе, и пре́лесть умертви́вшаго, и безсме́ртную жи́знь вѣ́рнымъ подаю́щаго, вопію́щимъ: вся́ дѣла́, по́йте Го́спода.

Богоро́диченъ: Облаки восхожде́ніе Свое́ полага́я, Госпо́дь о́блакомъ на́мъ Дѣ́вою роди́тися гряде́тъ, я́ко да разори́тъ ду́шъ на́шихъ грѣха́ мра́чный о́блакъ, вопію́щихъ Ему́: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Лику́имъ, вси́ вѣ́рніи, взыгра́имъ и согла́сно воскли́кнемъ: гряде́тъ всѣ́хъ Спасе́ніе, приближа́ется роди́тися Госпо́дь, спасти́ Его́ Рождество́ богому́дренно пра́зднующія.

Псалти́рь, святы́й Дави́де, воспріими́ и гу́сли, и пѣсновоспо́й: до́ме Евфра́ѳовъ, весели́ся: Оте́цъ бо, изъ чре́ва Его́же роди́, въ Тебѣ́ пресвѣ́тло ражда́ется, отъ Дѣ́вы воплоща́яся.

Яко ту́ча, я́ко вели́кій до́ждь, во утро́бу Твою́ Влады́ка сни́де, и мра́чная безбо́жія земли́ оляденѣ́вшая напои́ и пре́лести моря́ изсуши́, Богороди́тельнице Ма́ти Дѣ́во.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Іуліанíи богоно́сныя су́щимъ о вѣ́рѣ подвиго́мъ а́нгели удиви́шася: ка́ко же́нскимъ естество́мъ посрами́ тоя́ прама́терь въ раи́ умори́вшаго.

Яко преудо́бренная страстоно́сица и преизря́дная дѣ́ва, вѣне́цъ воспрія́ла еси́ зако́нно пра́вды, попра́вши съ пло́тію безпло́тнаго и побѣдоно́сица бы́вши.

Тя́, разу́мную ла́стовицу, и нерастлѣ́нную го́рлицу, и голуби́цу, свидѣ́тельствомъ позлаще́нна иму́щу кри́ла, и къ Бо́гу полетѣ́вшую, и почи́вшую, почита́емъ.

Процвѣла́ еси́ во удо́лѣхъ му́ченическихъ, я́ко кри́нъ, страстоно́сице Іуліанíе, и, я́ко ши́покъ благово́ненъ, дѣ́вствомъ была́ еси́, и кра́сному Жениху́ твоему́ Боже́ственное обоня́ніе бы́вши.

Богоро́диченъ: Нося́щи Нося́щаго вся́, къ Виѳлее́му гряде́тъ Дѣ́ва Того́ и роди́ти, и во я́слѣхъ восклони́ти я́ко Младе́нца, человѣ́ковъ воззва́ніе изря́дно содѣ́ловающаго.

Свѣти́ленъ предпра́зднства. Подо́бенъ: Посѣти́лъ ны́ е́сть.

Предпра́зднственныя, вѣ́рніи, Рождества́ пѣ́сни пріиди́те, принесе́мъ вси́: гряде́тъ уже́ Христо́съ въ Виѳлее́мъ роди́тися, спасти́ Вселе́нную, я́ко еди́нъ Человѣколю́бецъ.

Сла́ва, и ны́нѣ:

Виѳлее́ме, земле́ Іу́дова, украси́ вхо́ды: въ тебѣ́ бо Дѣ́ва и Богоро́дица уже́ прихо́дитъ роди́ти, въ верте́пѣ и я́слѣхъ, Бо́га моего́ и Го́спода.

На хвали́техъ стихи́ры на 4, гла́съ 6. Подо́бенъ: Ангельскія предыди́те.

Содѣ́тельная ны́нѣ предгряде́тъ Прему́дрость:* проро́честіи отверза́ются о́блацы,* благода́ть процвѣта́етъ,* и́стина возсія́;* престаю́тъ гада́нія сѣно́вная,* Еде́ма отве́рзеся две́рь.* Ада́ме, лику́й,* Созда́тель Бо́гъ на́шъ* во́льно созда́ся.

Рече́нія исполня́я проро́ческая и видѣ́нія,* ражда́ется пло́тію* и одебелѣва́етъ Сло́во* и въ я́слѣхъ безслове́сныхъ, роди́вся, возлега́етъ.* Сіе́ кра́йнее снизхожде́ніе,* сіе́ стра́шное смотре́ніе,* его́же ра́ди пое́мъ:* Ца́рь Изра́илевъ,* Христо́съ прихо́дитъ.

Се́ Чи́стая па́че ума́ и сло́ва* ражда́етъ Сы́на Бо́жія,* Его́же проро́цы проповѣ́даша дре́вле,* прови́дяще Ду́хомъ Святы́мъ,* нескве́рну Тя́ сохраня́юща* и разрѣша́ющаго Ада́ма отъ грѣха́.* Лю́діе, рце́мъ:* Ца́рь на́шъ, Христо́съ* пло́тію прихо́дитъ.

Нѣ́дръ Оте́ческихъ не отсту́пль,* Человѣ́къ яви́лся еси́* и, дѣ́вственными держи́мь рука́ми,* волхвы́ отъ Перси́ды звѣздо́ю призва́лъ еси́,* Царю́ Тебѣ́ и Бо́гу покланя́ющіяся.* Ду́хомъ усте́нъ нече́ствующія кня́зи язы́ческія погуби́ши* и упасе́ши лю́ди осуществе́нныя.

Сла́ва, гла́съ и подо́бенъ то́йже:

Сло́во, Иже Отцу́ Единосу́щенъ Сы́й,* отъ дѣ́вственныхъ растворе́ніе пріе́мъ чисты́хъ крове́й,* и зи́ждется,* и расте́тъ вре́меннымъ разстоя́ніемъ,* па́ки и ражда́ется въ верте́пѣ.* Ужасъ ве́лій!* Ангели воспѣва́ютъ,* человѣ́цы же рука́ми пле́щутъ:* Ца́рь Изра́илевъ,* Христо́съ прихо́дитъ.

И ны́нѣ, гла́съ и подо́бенъ то́йже:

Волхва́ Валаа́ма прорече́нія* исполне́ніе пріе́млютъ:* Перси́дскими бо чудесы́ облія́ни бы́вше,* звѣзды́ необы́чныя осія́ніемъ,* незаходи́маго Со́лнца Христа́ осія́ни бы́вше,* въ Виѳлее́мѣ воплоще́ннаго* Бо́га Царя́* и во́льнаго Мертвеца́ дарми́ назна́менаютъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Просіява́етъ звѣзда́,* уже́ ражда́емаго* въ верте́пѣ прозна́менуя.* Па́стыріе со а́нгелы, волсви́ съ да́ры,* предвари́ти потщи́теся.

Сти́хъ: Бо́гъ отъ ю́га пріи́детъ* и Святы́й изъ горы́ пріосѣне́нныя ча́щи.

Да проро́ческая* испо́лнитъ прорече́нія,* въ Виѳлее́мѣ ражда́ется* и Еде́мъ отверза́етъ* су́щимъ изъ Ада́ма Госпо́дь.

Сти́хъ: Го́споди, услы́шахъ слу́хъ Тво́й и убоя́хся,* Го́споди, разумѣ́хъ дѣла́ Твоя́ и ужасо́хся.

Пома́жи мѵ́ромъ, Виѳлее́ме,* я́сли святíи:* въ тебѣ́ бо Влады́ка* простре́ти и́мать* лучи́ Своего́ Божества́.

Сла́ва, и ны́нѣ, подо́бенъ то́йже:

Пріиди́те, земноро́дніи,* согла́сно Дѣ́ву* Богоро́дицу Марíю* да воспое́мъ непреста́нно,* изъ Нея́же Христо́съ ражда́ется.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 176 об. – 184 об.

/ Къ оглавленію раздѣла /


Наверхъ / Къ титульной страницѣ

0