Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 26 сентября 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 20-й де́нь.
Предпра́зднство по пло́ти Рождества́ Го́спода Бо́га и Спа́са на́шего Іису́са Христа́.
И па́мять свята́го священному́ченика Игна́тія Богоно́сца.

[ВЕЧЕРЪ,]
На Го́споди, воззва́хъ: стихи́ры предпра́зднства 3 и свята́го 3.
Стихи́ры предпра́зднства, гла́съ 1. Самогла́сны. Анато́лія:

Предпра́зднуимъ, лю́діе, Христо́во Рождество́, и, у́мъ возне́сше къ Виѳлее́му, вознесе́мся мы́слію, и у́зримъ въ верте́пѣ ве́ліе та́инство: отве́рзеся бо Еде́мъ отъ Дѣ́вы Чи́стыя Бо́гу происходя́щу, соверше́нъ Сы́й то́йжде въ Божествѣ́ и человѣ́чествѣ. Тѣ́мже воззове́мъ: Святы́й Бо́же — Отче Безнача́льный, Святы́й Крѣ́пкій — Сы́не Воплоти́выйся, Святы́й Безсме́ртный — Утѣ́шительный Ду́ше: Тро́ице Свята́я, сла́ва Тебѣ́.

Слы́ши, не́бо, и внуши́, земле́: се́ бо Сы́нъ и Сло́во Бо́га и Отца́ прихо́дитъ роди́тися отъ Отрокови́цы Неискусому́жныя благоволе́ніемъ Роди́вшаго Его́ безстра́стно и содѣ́йствомъ Свята́го Ду́ха. Виѳлее́ме, гото́вися, отве́рзи врата́, Еде́ме, я́ко Сы́й быва́етъ, е́же не бѣ́, и Содѣ́тель всея́ тва́ри назида́ется, подая́й мíру ве́лію ми́лость.

Ины стихи́ры свята́го, гла́съ 4. Подо́бенъ: 3ва́нный свы́ше.

Богоно́сецъ нарица́емый досто́йно,* егда́ Влады́ка тя́,* блаже́нне Игна́тіе,* я́ко ми́лостивъ, объя́тъ,* любому́дрія го́рнѣйшаго явля́я догма́ты,* тогда́ многосвѣ́тлую лучу́ воспрія́лъ еси́,* я́коже гу́ба во́ды,* отъ бе́здны просвѣще́ній поче́рплъ еси́.* Тѣ́мъ и стопа́мъ послѣ́довалъ еси́* зову́щему Христу́ Бо́гу на́шему,* Его́же моли́* спасти́ и просвѣти́ти ду́ши на́ша.

Уя́звенъ любо́вію соверше́нною,* егда́ спасе́нное раче́ніе* разжже́ твою́ ду́шу, свяще́ннѣйше,* ко Влады́цѣ тя понужда́ющее, о́тче, ити́.* Тогда́ приснопѣ́тое* сло́во возопи́лъ еси́:* пшени́ца е́смь Созда́вшаго* и зубы́ звѣре́й подоба́етъ ми́ вся́ко смоло́тися,* да Сло́ву чистѣ́йшій хлѣ́бъ явлю́ся* и Бо́гу на́шему,* Его́же моли́* спасти́ и просвѣти́ти ду́ши на́ша.

Сраспя́лся еси́ Христу́,* священноявле́нне,* егда́ богодухнове́нное сло́во возопи́лъ еси́:* мое́ раче́ніе распя́тися* и пріобщи́тися Того́ стра́сти зѣло́ тщу́ся.* Отсю́ду, Игна́тіе,* я́коже со́лнце отъ восто́ка, устреми́вся на за́падъ,* просвѣща́я, блаже́нне, обте́клъ еси́* и, ца́рскою діади́мою укра́шенъ,* Христу́ приве́лся еси́,* Его́же моли́* спасти́ и просвѣти́ти ду́ши на́ша.

Сла́ва, гла́съ 8. Анато́ліево:

Богоно́се Игна́тіе, твоего́ жела́емаго Христа́ вперси́въ, мзду́ воспрія́лъ еси́ священнодѣ́йства Ева́нгелія Христо́ва, е́же сконча́тися кро́вію. Тѣ́мже, пшени́ца бы́въ Безсме́ртнаго Дѣ́лателя, зубы́ звѣре́й смеле́нъ бы́лъ еси́ и хлѣ́бъ сла́докъ Тому́ яви́лся еси́; моли́ о на́съ, страда́льче блаже́нне.

И ны́нѣ, гла́съ то́йже:

Воспріими́, Виѳлее́ме, Бо́жію митропо́лію, Свѣ́тъ бо незаходи́мый въ тебѣ́ роди́тися прихо́дитъ; а́нгели, удиви́теся на небеси́, человѣ́цы, просла́вите на земли́, волсви́, отъ Перси́ды пресла́вный да́ръ принеси́те, па́стыріе, свиря́юще, трисвято́е пѣ́ніе сла́дцѣ воспо́йте: вся́кое дыха́ніе да хва́литъ Вседѣ́теля.

[Зри́:] Аще случи́тся предпра́зднство Рождества́ Христо́ва въ суббо́ту: Въ пято́къ ве́чера богоро́диченъ 1-й мимоше́дшаго гла́са не пое́тся. Та́кожде и въ предпра́зднство святы́хъ Богоявле́ній.

На стихо́внѣ стихи́ры, самогла́сны, гла́съ 2. Кипріа́ново:

Се́, вре́мя прибли́жися спасе́нія на́шего, гото́вися, верте́пе: Дѣ́ва приближа́ется, е́же роди́ти. Виѳлее́ме, земле́ Іу́дова, красу́йся и весели́ся, я́ко изъ тебе́ возсія́ Госпо́дь на́шъ. Услы́шите, го́ры, и хо́лми, и окре́стныя страны́ Іуде́йскія, я́ко гряде́тъ Христо́съ, да спасе́тъ, его́же созда́, человѣ́ка, я́ко Человѣколю́бецъ.

Сти́хъ: Бо́гъ отъ ю́га пріи́детъ и Святы́й изъ горы́ пріосѣне́нныя ча́щи.

Виѳлее́ме, земле́ Іу́дова, е́же по пло́ти жи́тельство, свѣ́тло угото́ви Боже́ственный верте́пъ, въ не́мже Бо́гъ пло́тію ражда́ется отъ Неискусому́жныя Святы́я Дѣ́вы, во е́же спасти́ ро́дъ на́шъ.

Сти́хъ: Го́споди, услы́шахъ слу́хъ Тво́й и убоя́хся, Го́споди, разумѣ́хъ дѣла́ Твоя́ и ужасо́хся.

Андре́я Пи́рскаго:

Пріиди́те вси́, Христо́во Рождество́ вѣ́рно предпра́зднуимъ и, мы́сленнѣ пѣ́ніе, я́ко звѣзду́, предлага́юще, волхво́въ славосло́вія съ па́стырьми возопіи́мъ: пріи́де Спасе́ніе человѣ́комъ изъ дѣ́вственныхъ ложе́снъ, вѣ́рныя воззыва́я.

Сла́ва, гла́съ 1. Студи́тово:

О, тве́рдыя и адама́нтскія твоея́ души́, достоблаже́нне Игна́тіе! Ты́ бо къ су́щему твоему́ Рачи́телю неосла́бное имѣ́я жела́ніе, глаго́лалъ еси́: нѣ́сть во мнѣ́ о́гнь любовеще́ственъ, вода́ же, па́че жива́я и глаго́лющая во мнѣ́, вну́трь ми́ глаго́лющи: гряди́ ко Отцу́. Тѣ́мже, Боже́ственнымъ Ду́хомъ распаля́емь, звѣ́ри избра́лъ еси́ мíра тя́ скорѣ́е разлучи́ти и къ жела́емому препосла́ти Христу́, Его́же моли́ спасти́ ду́ши на́ша.

И ны́нѣ, гла́съ то́йже:

Предпра́зднуимъ, лю́діе, Христо́во Рождество́, и, возне́сше у́мъ къ Виѳлее́му, вознесе́мся мы́слію, и усмо́тримъ Дѣ́ву душе́вными очесы́, иду́щую роди́ти въ верте́пѣ всѣ́хъ Го́спода и Бо́га на́шего. Его́же Іо́сифъ ви́дѣвъ чуде́съ вели́чество, мня́ше человѣ́ка зрѣ́ти, я́ко младе́нца, пелена́ми повива́ема, поразумѣва́ше же отъ веще́й Бо́га бы́ти и́стиннаго, подаю́щаго душа́мъ на́шимъ ве́лію ми́лость.

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодухнове́нне, и видѣ́нія восхо́дъ: сего́ ра́ди, сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Игна́тіе, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, предпра́зднства, гла́съ то́йже:

Гото́вися Виѳлее́ме, отве́рзися всѣ́мъ, Еде́ме, красу́йся Евфра́ѳо, я́ко дре́во живота́ въ верте́пѣ процвѣте́ отъ Дѣ́вы: ра́й бо Оноя чре́во яви́ся мы́сленный, въ не́мже боже́ственный са́дъ: отъ него́же я́дше, жи́ви бу́демъ, не я́коже Ада́мъ у́мремъ; Христо́съ ражда́ется пре́жде па́дшій возста́вити о́бразъ.


НА ПОВЕЧЕРІИ,

Пое́мъ трипѣ́снецъ, гла́съ 2. Ирмо́съ: Непроходи́мое волня́щееся.., по два́жды, тропари́ на 6 и послѣди́ ирмо́съ о́ба ли́ка вку́пѣ. А идѣ́же двоирмо́сенъ трипѣ́снецъ, и пое́мъ 1-го творца́ ирмо́съ, два́жды. Тропари́ же обою́ творцо́въ на 6 и послѣди́ ирмо́съ 2-го кано́на о́ба ли́ка вку́пѣ. Си́це пое́мъ кано́нъ и ирмосы́, и на про́чихъ повече́ріихъ въ предпра́зднство Христо́ва Рождества́. Припѣва́емъ на трипѣ́снцѣ: Сла́ва Тебѣ́, Бо́же на́шъ, сла́ва Тебѣ́.

[Зри́:] Вѣ́домо же бу́ди и сіе́: Яко на повече́ріи въ предпра́зднства Христо́ва Рождества́, на трипѣ́снцѣ и на кано́нѣхъ на 8-й пѣ́сни пое́мъ: Хва́лимъ, благослови́мъ.., и пое́мъ ирмо́съ 8-я пѣ́сни о́ба ли́ка вку́пѣ и покло́нъ. На повече́ріи конда́къ предпра́зднства: Дѣ́ва дне́сь...

[Зри́:] Вѣ́домо же и сіе́ да бу́детъ: Яко отъ двадеся́таго дне́ Деке́мврія до 14-го Іаннуа́рія, до́ндеже отда́стся пра́здникъ святы́хъ Богоявле́ній, окто́ихъ не пое́тся, кромѣ́ еди́ныхъ недѣ́ль, въ ни́хже пое́тся воскре́сна слу́жба. Поліеле́я же не пое́мъ, кромѣ́ вели́каго свята́го. На у́трени стихосло́вимъ по двѣ́ каѳи́смы, на вече́рни каѳи́сма рядова́я. Сѣда́льны глаго́лются предпра́зднства и попра́зднства. Не пое́тся же и междоча́сіе, и кано́нъ Богоро́дицы на повече́ріи.

Трипѣ́снецъ, гла́съ 2. Его́же краегране́сіе: Второ́му.

Пѣ́снь 1.

Ирмо́съ: Непроходи́мое волня́щееся мо́ре Бо́жіимъ Свои́мъ велѣ́ніемъ изсуши́вшему и пѣшеше́ствовати сквозѣ́ е́ изра́ильтескія лю́ди наста́вльшему, Го́сподеви пои́мъ: сла́вно бо просла́вися.

Припѣ́въ: Сла́ва Тебѣ́, Бо́же на́шъ, сла́ва Тебѣ́.

Неизрече́нное Сло́ва Бо́жія низше́ствіе: Са́мъ бо я́ко Богочеловѣ́къ Христо́съ познава́ется, Бо́гъ нехище́ніе бы́ти вмѣня́емь, воображе́ніемъ раба́ показу́ется всѣ́мъ на́мъ, сла́вно бо просла́вися.

Послужи́ти Христо́съ во́льно прихо́дитъ, Его́же о́бразъ Зижди́тель ны́нѣ пріе́млетъ, обнища́вшаго Ада́ма обогаща́я Божество́мъ, стра́нное обновле́ніе и возрожде́ніе, я́ко благоутро́бенъ, да́руя.

Пѣ́снь 8.

Ирмо́съ: Устраши́ся отроко́въ бла́гочести́выхъ сообра́знаго души́ нескве́рнаго тѣ́ла и устрани́ся воспита́нный въ безмѣ́рномъ веществѣ́ неутружде́нъ о́гнь: присноживу́щу же изувя́дшу пла́меню вѣ́чнующая пѣ́снь воспѣва́шеся: Го́спода вся дѣла́ по́йте, и превозноси́те во вся́ вѣ́ки.

Ва́съ, Моя́ вся́ сро́дники ны́нѣ положу́, а́ще Моя́ за́повѣди соблюдете́, — глаго́летъ Христо́съ человѣ́комъ, изъ утро́бы Чи́стыя проше́дый, и́мже ми́ръ дая́й, и смире́нная му́дрствовати ны́нѣ предлага́етъ, — и Го́спода зна́юще Мя́, по́йте и превозноси́те во вся́ вѣ́ки.

Чи́на проти́внаго въ Тебѣ́ плотска́го е́сть Рождество́, Сло́ве Бо́жій, не кро́вь бо и пло́ть Твою́ святу́ю пло́ть соста́виша, но Ду́ха Свята́го прише́ствіе и Вы́шняго Боже́ственное осѣне́ніе, я́ко, Го́спода вѣ́дяще Тя́, пое́мъ и превозно́симъ во вся́ вѣ́ки.

Инъ двопѣ́снецъ, его́же краегране́сіе: И тре́тіему.

Ирмо́съ: Велѣ́нію мучи́телеву преподо́бніи тріе́ о́троцы не повину́вшеся, въ пе́щь вве́ржени, Бо́га исповѣ́даху, пою́ще: благослови́те, дѣла́ Госпо́дня, Го́спода.

Лѣ́ности со́нъ отъ на́съ отложи́мъ и душе́внымъ бо́дрствомъ ражда́ющагося отъ Отрокови́цы Чи́стыя Христа́ сря́щимъ, зову́ще: благослови́те, дѣла́ Госпо́дня, Го́спода.

Дово́льно бу́ди дѣя́ніе благо́е, на́ше душе́вное сокро́вище, я́ко да свѣ́тлымъ лице́мъ Христу́ ражда́емому пое́мъ: благослови́те, дѣла́ Госпо́дня, Го́спода.

Тала́нтъ дѣ́лы благи́ми возрасти́вше, я́коже да́ры да́вшему, вмѣ́сто зла́та, и лива́на, и сми́рны принесе́мъ Христу́, гряду́щему роди́тися изъ Дѣ́вы Богоотрокови́цы.

Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки.

Ирмо́съ: Велѣ́нію мучи́телеву преподо́бніи тріе́ о́троцы не повину́вшеся, въ пе́щь вве́ржени, Бо́га исповѣ́даху, пою́ще: благослови́те, дѣла́ Госпо́дня, Го́спода.

И покло́нъ.

Пѣ́снь 9.

Ирмо́съ: Возвели́чилъ еси́, Христе́, ро́ждшую Тя́ Богоро́дицу, отъ Нея́же, Созда́телю на́шъ, въ подобостра́стное на́мъ обле́клся еси́ тѣ́ло, на́шихъ прегрѣше́ній рѣши́тельное. Сію́ ублажа́юще, вси́ ро́ди, Тебе́ велича́емъ.

Кíйждо ли́къ, пропѣ́въ ирмо́съ, твори́тъ покло́нъ.

Скве́рну всю́ стра́стную отри́нувше, досто́йно прише́ствіе Христо́во ра́зумомъ воспріи́мемъ цѣлому́дрымъ, и́бо нескве́рно предгряде́тъ пло́ть понести́ и всѣ́мъ дарова́ти Боже́ственное Ду́хомъ обновле́ніе.

Взира́юще на Христа́ смиря́ющагося, возвы́симся отъ долѣре́тныхъ страсте́й; ре́вностію же до́брою не му́дрствовати высо́кая, вѣ́рѣ научи́вшеся, въ ду́сѣ да смири́мся, я́ко да ражда́емаго высокотво́рными дѣ́лы возвы́симъ.

Инъ.

Ирмо́съ: Невмѣсти́маго Бо́га во чре́вѣ вмѣсти́вшая и ра́дость мíру роди́вшая, Тя́ пое́мъ, Богоро́дице Дѣ́во.

Благоразу́мнымъ Христо́съ бо́дрствовати заповѣ́даетъ Того́ надѣ́ющимся прише́ствія изъ Дѣ́вы: се́ бо прихо́дитъ роди́тися.

Во второ́мъ Твое́мъ, Христе́, прише́ствіи, сожи́теля десны́мъ мя́ причти́ овца́мъ Твои́мъ, Твое́ чту́щаго въ пло́ти прише́ствіе.

Ирмо́съ: Невмѣсти́маго Бо́га во чре́вѣ вмѣсти́вшая и ра́дость мíру роди́вшая, Тя́ пое́мъ, Богоро́дице Дѣ́во.

И покло́нъ.



НА УТРЕНИ,
На Бо́гъ Госпо́дь: Тропа́рь предпра́зднства, два́жды. Сла́ва, свята́го. И ны́нѣ, предпра́зднства.

По 1-й стихоло́гіи, сѣда́ленъ, гла́съ 1. Подо́бенъ: Гро́бъ Тво́й, Спа́се.

Весели́ся, Виѳлее́ме, Евфра́ѳо, гото́вися: се́ бо Агница, Па́стыря Вели́каго въ ложесна́хъ нося́щи, роди́ти гряде́тъ, и, предви́дяще боже́ственную звѣзду́, волсви́ ра́дуются, съ па́стырьми пою́ще се́рдца пра́востію.

Сла́ва, и ны́нѣ:

Приклони́вый небеса́, и въ Дѣ́ву Всели́выйся, происхо́дитъ пло́тію въ Виѳлее́мстѣмъ верте́пѣ роди́тися, я́коже писа́ся, ви́дѣтися же Младе́нецъ, мла́денцы оживля́яй во утро́бѣ. Сего́, ра́дующеся ны́нѣ, сря́щемъ вси́ се́рдца пра́востію.

По 2-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Дѣ́вы, предначни́те дѣви́ческую ра́дость; ма́тери, восхвали́те провожде́ніе Ма́тере Христа́, Бо́га на́шего; волсви́ со а́нгелы, съ на́ми па́стыріе; гряде́тъ бо Дѣ́ва во гра́дѣ Виѳлее́мѣ роди́ти Сы́на, Превѣ́чнаго Бо́га, спаса́ющаго мíръ отъ тлѣ́нія.

Сла́ва, и ны́нѣ, гла́съ то́йже:

Ра́дуйся Сіо́не, Виѳлее́ме украси́ся, всѣ́хъ Содержи́тель звѣзду́ предпосла́въ, возвѣсти́ безмѣ́рное Свое́ схожде́ніе: Его́же трепе́щутъ небе́сныя си́лы, вои́стинну ражда́ется отъ Дѣ́вы непрело́жно еди́нъ Человѣколю́бецъ.

По каѳи́смахъ чте́мъ муче́ніе свята́го Игна́тія на дво́е и сло́во Златоу́стово, е́же о блаже́ннѣмъ Филого́ніи, на дво́е. Псало́мъ 50-й.

[Зри́:] Вѣ́домо же бу́ди, я́ко отъ дне́шняго дне́ Го́сподеви пое́мъ... въ пѣ́снехъ не глаго́лемъ, до́ндеже отда́стся пра́здникъ святы́хъ Богоявле́ній.

Кано́на два́: предпра́зднства со ирмосо́мъ на 8 и свята́го на 6.

Кано́нъ предпра́зднства, его́же краегране́сіе: Пое́тся сія́ предпра́зднственная. Іо́сифъ. Гла́съ 1.
Пѣ́снь 1.

Ирмо́съ, по два́жды: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Начне́мъ дне́сь предпра́зднствовати Христо́во Рождество́, ро́ждшагося пло́тію отъ Дѣ́вы Ма́тере въ верте́пѣ Виѳлее́мстѣмъ за благоутро́біе мно́гое.

Узъ отрѣша́я мя́ грѣхо́вныхъ, пелена́ми повива́ется и въ я́слѣхъ полага́ется Младе́нецъ ви́димь, Превѣ́чный Бо́гъ: сла́ва держа́вѣ Его́.

Богоро́диченъ: Еде́мъ отверза́ется Тебѣ́, ро́ждшуся отъ Дѣ́вы Богоотрокови́цы во гра́дѣ, Влады́ко, Виѳлее́мѣ пло́тію: пѣсносло́вимъ стра́шное смотре́ніе Твое́.

Инъ кано́нъ свята́го Игна́тія, гла́съ и ирмо́съ то́йже. Творе́ніе Андре́я Кри́тскаго.

Свѣ́тло пра́зднующе, да учреди́мся, му́ченикъ Игна́тій свяще́нно созыва́етъ Це́рковь Христо́ву на страда́ніе его́ многопѣ́тое.

Свѣти́льникъ пресвѣ́тлѣйшій Це́ркве сы́й, Игна́тіе, просвѣща́еши вся́ земны́я концы́ и за́падная озаря́еши, отъ восто́ка прише́дъ.

Па́вловымъ подо́бяся по мѣ́стомъ бѣда́мъ, Игна́тіе, и сы́й ю́зникъ, не стужи́лъ еси́, утвержда́я писа́ньми ча́стыми Це́ркви Христо́вы.

Сла́вную па́мять твою́ вси́ пое́мъ, всеблаже́нне Игна́тіе, и пѣ́сньми почита́емъ Вѣнча́вшаго тво́й всечестны́й ве́рхъ, богоблаже́нне.

Да стру́жется пло́ть моя́, кро́вь да ліе́тся, жела́ніемъ тщу́ся, ко звѣре́мъ гото́въ, къ сомле́нію укра́шенъ, ко огню́, къ мечу́, къ снѣде́нію, — му́ченикъ вопія́ше.

Богоро́диченъ: Еде́ме, украси́ся, Евфра́ѳа бо Созда́телю угото́вася, роди́тися хотя́щу отъ Дѣ́вы Ма́тере въ верте́пѣ Виѳлее́мстѣмъ за благоутро́біе мно́гое.

Пѣ́снь 3.

Ирмо́съ: Ка́мень, его́же небрего́ша зи́ждущіи, се́й бы́сть во главу́ у́гла: то́й е́сть Ка́мень, на не́мже утверди́ Це́рковь Христо́съ, ю́же отъ язы́къ искупи́.

Пѣ́снь предпра́зднственную вся́ да припѣва́етъ тва́рь, пре́жде денни́цы отъ Отца́ Ро́ждшемуся, и ны́нѣ изъ Дѣ́вы неизрече́нно Просія́вшему, и Ражда́ющемуся пло́тію въ Виѳлее́мѣ за милосе́рдіе мно́гое.

Звѣзда́ уже́ возсія́ отъ пле́мене Іу́дова, ю́же позна́вше, ца́ріе движе́ніе отъ восто́ковъ творя́тъ и дости́гнути тща́тся, я́ко да у́зрятъ Христа́, въ Виѳлее́мѣ пло́тію ражда́ема.

Богоро́диченъ: Сіе́ воплоще́ніе Христо́во увѣ́дѣвъ, Иса́ія Ду́хомъ Святы́мъ я́вѣ предглаго́летъ: Отроча́ изъ Дѣ́вы ражда́ется, Госпо́дь, въ возрожде́ніе на́ше, Его́же вла́сть на ра́мѣ Его́.

Свята́го. Ирмо́съ то́йже.

Образъ свяще́ннаго страда́нія показа́лся еси́, о́тче, сто́лпъ терпѣ́нія, и пра́вило му́жества, и сто́лпъ Це́ркве, и вѣ́ры утвержде́ніе, и добродѣ́тели подписа́ніе, страда́ньми честны́ми вѣнча́вся во Христѣ́.

Вои́стинну тезоиме́нно наре́клся еси́ Богоно́сецъ, о́тче: младе́нецъ бо еще́ во́зрастомъ сы́й, на рука́хъ носи́мь Го́спода поста́вился еси́, возглаша́ющаго къ на́мъ: бу́дите Мнѣ́, я́ко отроча́ сіе́.

Пшени́ца чиста́ Бо́жія е́смь, — вопія́лъ еси́, о́тче, — тщу́ся отъ звѣре́й ди́віихъ смоло́тися, да сокруши́тся мое́ тѣ́ло, да снѣдя́тся удеса́ моя́, и снѣ́дь да бу́ду звѣре́мъ, да Бо́гу чи́стъ хлѣ́бъ явлю́ся.

Стра́нное муче́нія три́знище терпѣли́внѣ соверши́лъ еси́, чу́дно па́че всѣ́хъ предпострада́вшихъ му́жество показа́лъ еси́, любо́вію разжига́емь неосла́бнаго раче́нія, я́коже бо о́гнь твою́ возжже́ ду́шу.

Горя́й при́сно ду́хомъ, священному́ченикъ взыва́ше съ любо́вію посредѣ́ бѣ́дъ: Христа́ гоню́, ра́дуяся, Христу́ сраспина́юся; живу́ же не ктому́ у́бо а́зъ, живе́тъ же, — глаго́летъ, — во мнѣ́ еди́нъ Христо́съ.

Богоро́диченъ: Гряди́, Иса́іе, возопíй: се́ Дѣ́ва и́мать во чре́вѣ Изба́вителя мíра и роди́тъ въ верте́пѣ, и бу́детъ и́мя ражда́емаго Іису́съ, Бо́гъ съ на́ми, Емману́илъ Савао́ѳъ.

Конда́къ предпра́зднства, гла́съ 3. Подо́бенъ: Дѣ́ва дне́сь.

Дѣ́ва дне́сь Превѣ́чное Сло́во въ верте́пѣ гряде́тъ роди́ти неизрече́нно; лику́й, вселе́нная, услы́шавши, просла́ви со а́нгелы и па́стырьми хотя́щаго яви́тися Отроча́ Мла́до, Превѣ́чнаго Бо́га.

Икосъ:

О, ужа́снаго вои́стинну и па́че сло́ва чудесе́! Еже бы́ти дая́й всѣ́мъ ра́ди бла́гости во чре́во святы́я Дѣ́вы вни́де, и въ верте́пѣ роди́тися гряде́тъ, и въ я́слѣхъ положи́тися. Звѣзда́ же Сего́ проповѣ́дуетъ свы́ше волхво́мъ, иду́щимъ на поклоне́ніе Его́ съ да́ры, издале́ча привлача́щи, со тща́ніемъ послѣ́дующія Валаа́мову прорече́нію, ре́кшаго: звѣзда́ хо́щетъ провозвѣсти́ти Отроча́ Мла́до, Превѣ́чнаго Бо́га.

Сѣда́ленъ, гла́съ 3. Подо́бенъ: Красотѣ́ дѣ́вства.

Рукополага́емь отъ Христа́ Бо́га, просвѣти́лъ еси́ свяще́нную твою́ оде́жду, свидѣ́тельство и́стинно получи́въ, богоно́се: звѣ́ри бо раздражи́лъ еси́ отъ мíра отлучи́ти тя́, Па́влу подо́бяся, чу́дному апо́столу. Тѣ́мже и въ Ри́мѣ сконча́лъ еси́, о́тче, досто́йнѣ муче́ніе.

Сла́ва, гла́съ 8. Подо́бенъ: Прему́дрости.

Отъ восто́ка возсія́въ, я́коже звѣзда́, и луча́ми слове́съ озаря́я, мíръ просвѣти́лъ еси́, и тму́ отгна́лъ еси́, и, я́ко Па́велъ, тече́ніе до́блественнѣ соверши́лъ еси́, претерпѣ́въ бѣды́ въ язы́цѣхъ же и градѣ́хъ. Отону́дуже и, я́ко пшени́ца, звѣре́й зубы́ сомле́лся еси́, блаже́нне, приноше́ніе Го́споду твоему́, богоно́се Игна́тіе. Моли́ся Христу́ Бо́гу прегрѣше́ній разрѣше́ніе дарова́ти чту́щимъ любо́вію святу́ю па́мять твою́.

И ны́нѣ, [предпра́зднства]:

Изъ чре́ва пре́жде вѣ́къ отъ Отца́ возсія́въ неслія́ннѣ, Сло́во Бо́жіе безсѣ́менно предгряде́тъ отъ Твоея́ утро́бы, Пречи́стая, вре́менми послѣди́, вознося́й дре́вле лю́тѣ попо́лзшагося, и къ дре́внѣй добро́тѣ возводя́, я́ко Милосе́рдъ. Его́же Рождеству́ во́инства безпло́тныхъ предъи́дутъ, и человѣ́комъ побѣ́дная та́йно возсыла́ютъ: Сла́ва, — взыва́юще, — Бо́гу, дарова́вшему на́мъ ми́ръ, разруши́вшему средостѣ́ніе вражды́, я́коже изво́ли.

Пѣ́снь 4.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ — позна́ешися, внегда́ пріити́ вре́мени — пока́жешися. Сла́ва си́лѣ Твое́й, Го́споди.

Го́ры, хо́лми же и древа́ дубра́вная, рѣ́ки, и моря́, и вся́кое дыха́ніе, въ весе́ліи взыгра́йте: ны́нѣ приближа́ется спасе́ніе, Іису́съ изъ Дѣ́вы во гра́дѣ Виѳлее́мѣ роди́тися.

Воспріими́, проро́че Дави́де, псалти́рь и пѣснопо́й Ду́хомъ Святы́мъ я́вѣ: отъ Дѣ́вы бо ражда́ется неслія́нно пре́жде денни́цы изъ чре́ва Отча возсія́вый, Госпо́дь сла́вы, Христо́съ Бо́гъ.

Ка́ко пріи́метъ Тя́, Сло́ве, ражда́ема пло́тію, верте́пъ малѣ́йшій и зѣло́ худы́й? Ка́ко же повíешися пелена́ми, Одѣява́яй не́бо о́блаки? Ка́ко въ я́слѣхъ безслове́сныхъ возля́жеши, я́ко Младе́нецъ?

Свята́го. Ирмо́съ то́йже.

Уясни́лъ еси́ заре́ю страда́ній твои́хъ зе́млю, свяще́нне Игна́тіе, у́зникъ яви́вся: обте́къ бо, я́ко со́лнце, луча́ми муче́нія, ве́черъ отъ восто́ка, ве́сь уясня́я, просвѣти́лъ еси́.

Якоже Па́велъ, свя́занъ звѣрьми́ слове́сными, въ Ри́мъ те́клъ еси́, Игна́тіе му́дре, но не преста́лъ еси́ и свя́занъ сы́й, утвержда́я Це́ркви, посыла́я по вся́ гра́ды всѣ́мъ Христо́вымъ іера́рхомъ дерза́ти.

Христо́въ тщу́ся бы́ти, Христа́ еди́наго жела́ю, ве́сь бо Христо́въ е́смь, — вопія́лъ еси́, страда́льче. — Того́ гоню́, Того́ иду́ дости́гнути, и сего́ ра́ди о́гнь, и ме́чь, и звѣ́ри — вся́ терплю́, да получу́, е́же жи́ти.

Сладка́ мнѣ́ ско́рбь, любе́зны у́зы за Жела́емаго, — вопія́лъ еси́, страда́льче, — гоне́нія ми́ сла́ждшая оте́чества, и сомле́нія моя́ па́че вся́каго весе́лія, болѣ́зни па́че вся́каго здра́вія тѣле́снаго.

Звѣре́й мнѣ́ да бу́дутъ уста́ закла́ніе и чре́ва гро́бы, — вопія́лъ еси́, страда́льче. — Никто́же да стужа́етъ, никто́же ми́ сокруша́етъ крѣ́пость: а́зъ бо тщу́ся сомле́тися, я́коже пшени́ца, и хлѣ́бъ обрести́ся Бо́гу чи́стъ.

Богоро́диченъ: Въ верте́пѣ земленѣ́мъ роди́тися на́съ ра́ди Бо́гъ сы́й изво́лилъ еси́, обнища́въ, Бла́же, на́шею нището́ю за милосе́рдіе и изъ Дѣ́вы проше́дъ, воплоще́нъ, пребы́въ еди́нъ Сы́нъ изъ Отца́ и Ма́тере.

Пѣ́снь 5.

Ирмо́съ: Тво́й ми́ръ да́ждь на́мъ, Сы́не Бо́жій, ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Да кропя́тъ, ра́дующеся, о́блацы сла́дость: уже́ бо приближа́ется Госпо́дь роди́тися я́коже Младе́нецъ изъ Чи́стыя Дѣ́вы въ худѣ́мъ верте́пѣ.

Боже́ственніи ны́нѣ взыгра́йте, проро́цы Бо́жіи: прихо́дитъ бо Христо́съ Истина испо́лнити про́повѣди ва́шего боже́ственнаго язы́ка, ражда́яся я́ко Младе́нецъ.

Богоро́диченъ: Еде́ме, заключи́выйся мнѣ́ дре́вле, отве́рзися про́чее, ви́дя Христа́, младе́нствующа пло́тію и во гра́дѣ, я́ко благоволи́, Виѳлее́мѣ отъ Дѣ́вы ражда́ющася Отрокови́цы.

Свята́го. Ирмо́съ то́йже.

Тако́въ на́мъ подоба́ше му́дръ архіере́й, преподо́бенъ, вѣ́ренъ, нескве́рненъ, незло́бивъ, — вопія́ Па́велъ, преднаписа́ свяще́нный о́бразъ свяще́нныхъ твои́хъ нра́вовъ.

Свя́занъ, отводи́мь пострада́ти, архіере́й, у́зникъ Христо́въ, Игна́тіе, писа́лъ еси́ Це́рквамъ и градо́мъ, утвержда́я вся́ во исповѣ́даніи.

Па́вловымъ исправле́ніемъ поревнова́въ благочести́вно, вся́ его́ бѣды́ претерпѣ́лъ еси́, священному́чениче досточу́дне, восто́чная свѣ́тлосте и вече́рняя звѣздо́.

Жела́ніемъ ретя́ся Па́вловымъ, у́зы имѣ́я на рука́хъ, мíръ обте́клъ еси́, священному́чениче, да благоявле́нъ свяще́нными твои́ми страда́ньми яви́шися всѣ́мъ.

Пое́мъ по́двиги твоя́, честву́емъ у́зы кажде́ніи и псалмы́, пе́рсть честву́емъ твои́хъ моще́й, я́ко арома́ты мѵрома́занную, му́чениче, свяще́нными твои́ми страда́ньми.

Богоро́диченъ: Бо́гъ человѣ́комъ подобе́нъ бы́въ изъ Тебе́, Младе́нецъ на́съ ра́ди ражда́ется, Богоневѣ́сто, и пребыва́етъ ве́сь неизмѣ́ненъ, и во пло́ти ви́дится Бо́гъ вочеловѣ́чивыйся.

Пѣ́снь 6.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.

Не́бо на земли́ Небе́снаго показу́етъ звѣздо́ю свѣ́тлою Царя́, на́съ ра́ди ражда́ющагося, звѣздосло́вцемъ ны́нѣ во гра́дѣ Дави́довѣ.

Витíйствуетъ и вопіе́тъ проро́къ я́вѣ: до́ме ты́ Евфра́ѳовъ, Виѳлее́ме, въ не́мже Бо́гъ яви́тся отъ Дѣ́вы, игра́й и лику́й.

Богоро́диченъ: Въ верте́пѣ Виѳлее́мстѣмъ Дѣ́ва ражда́етъ я́вственнѣ Го́спода, всѣ́хъ Творца́, и я́ко Человѣ́ка пови́вши пелена́ми, въ я́слѣхъ восклоня́етъ ны́нѣ.

Свята́го. Ирмо́съ то́йже.

Яко вои́стинну Жела́теля возлюби́въ неукло́нно и о́гнь и́же къ Нему́ воспали́въ разу́мнѣ, Игна́тіе, во́ду имѣ́лъ еси́ въ тебѣ́ живу́щую и глаго́лющую.

Свидѣ́тельство твоея́ со́вѣсти исполня́я, не удово́лился еси́, зря́ звѣре́й стремле́нія, не устраши́лся еси́, я́коже пшени́ца хотя́ члено́вными сомле́тися.

До́лгая твоя́ гоне́нія и нерѣши́мыя у́зы, я́же въ Ри́мѣ терза́нія и о́гнь гони́телей въ ничто́же вмѣня́лъ еси́, священному́чениче, за твоего́ Рачи́теля.

Вельми́ горя́, страда́льче, любо́вію Христо́вою, ко огню́ искуше́ній я́ко на ро́су у́треннюю поте́клъ еси́, Онаго пости́гнути су́що су́щаго Рачи́теля.

Аще и пи́лъ еси́ Христо́ву ча́шу жажда́, но пре́былъ еси́ при́сно е́же пострада́ти, па́че е́же жи́ти. И вопія́лъ еси́: ничто́же мнѣ́ сія́, ко е́же получи́ти мнѣ́ е́же жи́ти.

Богоро́диченъ: Украси́ся, Виѳлее́ме, угото́вися, Евфра́ѳо: безъ ма́тере бо отъ Отца́ и безъ отца́ Ма́терію чревоно́сится и ражда́ется, спаса́я ны́.

Конда́къ, гла́съ 3. Подо́бенъ: Дѣ́ва дне́сь.

Свѣ́тлыхъ по́двигъ твои́хъ свѣтоно́сный де́нь предпроповѣ́дуетъ всѣ́мъ въ верте́пѣ Рожде́ннаго: Сего́ бо жажда́я отъ любве́ наслади́тися, потща́лся еси́ отъ звѣре́й снѣде́нъ бы́ти, сего́ ра́ди и Богоно́сецъ наре́клся еси́, Игна́тіе всему́дре.

Икосъ:

Авраа́мъ у́бо иногда́ сы́на жря́ше, закла́ніе предвообража́я вся́ Содержа́щаго и ны́нѣ въ верте́пѣ тща́щагося роди́тися, ты́ же, богому́дре, всего́ прине́слъ еси́ тебе́ сама́го, я́коже заколе́ніе, и, звѣре́й снѣ́дь бы́въ, пшени́ца чиста́ яви́лся еси́ Зижди́телю твоему́, въ жи́тницахъ небе́сныхъ вѣ́чнуяй вои́стинну и твоего́ раче́нія наслажда́яся. Его́же ра́ди ве́сь мíръ оста́вивъ, Богоно́сецъ наре́клся еси́, Игна́тіе всему́дре.

Пѣ́снь 7.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́ я́ко еди́нѣми усты́ поя́ху и благословля́ху, глаго́люще: благослове́нъ Бо́гъ оте́цъ на́шихъ.

Христо́во во пло́ти показу́я явле́ніе, Іеремíя вопія́ше: на земли́, вопло́щся, Бо́гъ яви́ся; худо́жества же обрѣ́те вся́къ пу́ть, рожде́йся въ Виѳлее́мѣ изъ Ма́тере.

Се́ изъ ко́рене Іессе́ева прозябе́ же́злъ, цвѣ́тъ, прозяба́ющь Христа́, и на Не́мъ, ны́нѣ ражда́емѣмъ въ верте́пѣ, Ду́хъ почíетъ ра́зума, и совѣ́та, и Боже́ственнаго вѣ́дѣнія.

Да услы́шимъ словеса́ свяще́нная: Госпо́дь ражда́ется, Отроча́ ра́ди на́съ, Его́же нача́льство на ра́мѣ бы́сть, и нарица́ется Ангелъ совѣ́та вели́ка Отча, Нача́льникъ ми́ра — Христо́съ.

Свята́го. Ирмо́съ то́йже.

Не имѣ́лъ еси́ огня́ любове́щна въ тебѣ́, Игна́тіе, во́ду же живу́ю па́че и глаго́лющую, во́ду зову́щую: гряди́ ко Отцу́; во́ду теку́щую, отъ жи́зни въ жи́знь преводя́щую на́съ.

Звѣре́й зу́бы, — глаго́летъ, — да бу́дутъ мнѣ́ ме́чь, и ору́жія, и закла́нія; гро́бъ же мнѣ́ льво́вы утро́бы да бу́дутъ, и о́гнь да поя́стъ мя́ пре́жде тли́ ко́жныя оста́нки.

Мнѣ́ сладка́ сме́рть, — глаго́летъ, — сладка́ мнѣ́ вся́ трудо́въ болѣ́зненная, звѣ́ріе ра́достни, о́гнь се́й роса́ мнѣ́ е́сть, а́ще еже́ жи́ти воздержу́. Тѣ́мже и тщу́ся умре́ти, да живу́ со Христо́мъ.

Еже жи́ти мнѣ́ не е́сть рачи́тельно въ тѣлеси́, ду́хомъ бо жи́ти жела́ю. Мнѣ́ е́же жи́ти Христо́съ, Боже́ственное рачи́тельство; къ Нему́ иду́, Того́, — глаго́летъ, — люблю́, Того́ получи́ти надѣ́юся.

Богоро́диченъ: Проро́комъ дре́вле прорече́нный, приближа́ется мнѣ́ Младе́нецъ, изъ Дѣ́вы рожде́йся, ра́дуется Ада́мъ, и прама́ти Ева болѣ́зней разрѣши́ся, и сликовству́етъ Дави́дъ, Ражда́ющія оте́цъ.

Пѣ́снь 8.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Госпо́дь гряде́тъ стра́ннымъ Рождество́мъ я́вѣ во Своя́, пріи́мемъ Его́, я́ко да устра́ншіяся ра́йскія сла́дости па́ки присво́итъ, ражда́яся въ верте́пѣ.

Се́ Воззва́ніе на́ше прихо́дитъ, возгласи́мъ пѣ́нія ра́достная тща́ніемъ и воспои́мъ пѣ́сни предпра́зднственныя въ малѣ́йшемъ Вмѣща́ющемуся верте́пѣ.

Богоро́диченъ: Яко кля́тся Госпо́дь, испо́лни уже́, отъ сѣ́мене да́въ на́мъ Дави́дова Свою́ Ма́терь Дѣ́ву; изъ Нея́же Младе́нецъ пло́тію роди́ся во гра́дѣ Виѳлее́мѣ па́че сло́ва.

Свята́го. Ирмо́съ то́йже.

Пѣ́тъ бу́ди Игна́тій, Боже́ственный іере́й, сугу́бо вѣнча́емь, я́ко му́ченикъ и па́стырь: страда́въ бо се́й за любо́вь Бо́жію, жела́я возжелѣ́нъ бы́ти, пострада́ти не отмета́шеся.

Тече́ніи вѣ́ры, я́ко со́лнце, зе́млю до́блественнѣ прете́клъ еси́ отъ коне́цъ небесе́ и, заше́дъ незаходи́мо отъ земли́ ко Христу́, облистава́еши мíру свѣ́тъ нетлѣ́нія.

Жажда́я ча́ши стра́сти Христо́вы, свя́занъ, те́клъ еси́, Игна́тіе му́дре, и дости́гъ три́знища, не преста́лъ еси́, вопія́: жа́жду жажда́ти Христа́ во вѣ́ки.

О, любве́ и теплоты́ Боже́ственнаго раче́нія! Жела́ніемъ распя́тся и да живе́тъ Рачи́телю; жа́ждетъ, е́же возжажда́тися, и лю́битъ, е́же люби́тися, за е́же па́ки жи́ти, умре́ти произволя́я.

Пе́рсть отложи́въ, невеще́ственно къ Су́щему у́мъ впери́лъ еси́, жела́я Рачи́теля: То́й бо е́сть при́сное жела́ніе, и и́стинно му́дрость, и жи́знь бы́вшихъ.

Богоро́диченъ: Звѣзда́ возсія́, Христо́съ отъ Іа́кова, и волсви́ стека́ются во гра́дъ Виѳлее́мъ пѣ́ти, чествова́ти и поклони́тися Ему́, рожде́нному изъ ложе́снъ Чи́стыя Богоро́дицы.

Пѣ́снь 9.

Ирмо́съ: Живопріе́мный исто́чникъ приснотеку́щій, свѣтоно́сный свѣти́льникъ благода́ти, хра́мъ одушевле́нный, сѣ́нь пречи́стую, небесе́ и земли́ простра́ннѣйшую, Богоро́дицу, вѣ́рніи, велича́емъ.

Съ патріа́рхи, и пра́ведными всѣ́ми, и со святы́ми проро́ки взыгра́имъ, отъ Дѣ́вы Госпо́дь Іису́съ, избавле́ніе, просвѣще́ніе, и жи́знь, и спасе́ніе, ны́нѣ во гра́дѣ Дави́довѣ ражда́ется.

Уже́ Боже́ственнаго Сло́ва воплоще́нія всѣ́мъ отверзо́шася я́вѣ преддве́рія. Небеса́, ра́дуйтеся, а́нгели, взыгра́йте, и да весели́тся земля́ съ человѣ́ки, съ па́стырьми и волхвы́ ду́хомъ.

Богоро́диченъ: Но́ситъ Христа́, я́коже мѵ́ро неистоще́нное, у́мный Дѣ́ва алава́стръ, и сіе́ предъи́детъ въ верте́пѣ излія́ти Ду́хомъ я́вѣ, я́ко да напо́лнитъ благоуха́нія Его́ ду́ши на́ша.

Свята́го. Ирмо́съ то́йже.

Презира́тель до́льнихъ Игна́тій и служи́тель вы́шнихъ та́инъ, я́ко слу́жбу непоро́чну соверша́я, и, соверша́емь, священнодѣ́йствуетъ себе́ сама́го муче́ніемъ, и къ звѣре́мъ и огню́ гото́вится.

Еже по о́бразу любя́ одѣ́ятися, ве́тхія о́бразы измѣни́лъ еси́. Тѣ́мже но́востію, а не ве́тхостію первообра́знаго зра́ка пе́рвую добро́ту воспріе́мъ, Христо́ви соводворя́ешися.

Свяще́нную твою́ оде́жду, свяще́ннѣйше, свяще́ннѣйшу содѣ́лалъ еси́ страда́ньми твои́ми, тѣ́мже и вѣне́цъ сугу́бъ воспріе́мъ, съ му́ченики пое́ши и па́стыри, священному́чениче, Христа́ Бо́га на́шего.

Пшени́ца Бо́жія чиста́ е́смь, — глаго́лалъ еси́, — и зубы́ звѣре́й мелю́ся, да хлѣ́бъ бу́ду священносоверша́емь, Рачи́телю и Бо́гу очище́нъ, Его́же и любя́, умре́ти не отрица́юся.

Непристу́пнымъ свѣ́томъ осіява́емь и въ вы́шнихъ оби́телехъ водворя́яся, свяще́нне Игна́тіе, Бо́гу и Зижди́телю твоему́ о ста́дѣ твое́мъ се́мъ моля́ся неоску́дно не преста́й, мо́лимся.

Богоро́диченъ: Ра́дуйся, Чи́стая, Бо́жій гра́де одушевле́нный, въ не́мже Бо́гъ вмѣсти́тися благоволи́, не оста́вль бо го́рнихъ, къ Тебѣ́ сни́де, я́ко до́ждь на зе́млю, Богороди́тельнице, и во гра́дѣ Виѳлее́мѣ Младе́нецъ ражда́ется.

Свѣти́ленъ. Подо́бенъ: Ду́хомъ во святи́лищи.

Сло́во Пребезнача́льное, Бо́жія Му́дрость, неизрече́нною бла́гостію земны́мъ пріобщи́вся, уча́ дре́вле лю́ди, на рука́хъ держа́ше тя́, Игна́тіе Богоно́се; въ Бо́зѣ же жи́въ, муче́ніе проше́лъ еси́ страда́нія, радуяся.

Сла́ва, и ны́нѣ, предпра́зднства. Подо́бенъ: Предугото́вися.

Украси́ся, Виѳлее́ме, но́вое жили́ще, я́сли и верте́пъ, па́стырей со́нмища, волсви́ отъ восто́ковъ въ него́ предвари́те, звѣзды́ свѣ́тлостію: Дѣ́ва бо уже́ Всесоверше́ннаго, я́ко Младе́нца въ то́мъ ражда́етъ.

На хвали́техъ стихи́ры предпра́зднства, гла́съ 6, на 4, по алфави́ту. Творе́ніе Рома́на Пѣвца́. Самоподо́бенъ:

Ангельскія предъиди́те си́лы,* и́же въ Виѳлее́мѣ угото́вайте я́сли:* Сло́во бо ражда́ется,* Му́дрость происхо́дитъ,* пріе́млетъ цѣлова́ніе Це́рковь.* На ра́дость Богоро́дицы,* лю́діе, рце́мъ:* благослове́нъ прише́дый* Бо́же на́шъ, сла́ва Тебѣ́.

Го́ры сла́дость да ка́плютъ,* се́ бо прихо́дитъ Бо́гъ отъ ю́га,* язы́цы, покаря́йтеся,* ра́дуйтеся, проро́цы,* патріа́рси, взыгра́йте,* человѣ́цы, восплещи́те рука́ми:* Крѣ́пкій и Вели́кій Кня́зь Христо́съ ражда́ется,* Ца́рь небе́съ на зе́млю прихо́дитъ.

Отъ земли́ вознося́ человѣ́чество,* Зижди́тель пріи́де,* ца́рскій обновля́я па́ки о́бразъ.* Сра́дуйтеся, го́рнихъ си́лы, и воспо́йте,* вражды́ средостѣ́ніе, разори́ся,* пріи́де, Ему́же прилѣжа́ше:* Бо́гъ бо Человѣ́къ быва́етъ,* Ца́рь Изра́илевъ,* Христо́съ Бо́гъ на́шъ.

Гряди́, Изра́илю тяжкосе́рдый,* отве́ржи и́же въ души́ твое́й* надлежа́щій тебѣ́ о́блакъ,* позна́й Созда́теля, въ верте́пѣ ражда́ющагося.* Се́й язы́ковъ ча́яніе,* Се́й разори́тъ пра́здники твоя́,* вопи́ти бо не повину́ешися:* Ца́рь Изра́илевъ,* Христо́съ прихо́дитъ.

Сла́ва, гла́съ и подо́бенъ то́йже:

Приближа́ется Христо́съ,* Виѳлее́ме, предугото́вися,* уже́ язы́ковъ спасе́ніе озаря́етъ,* благоукраси́ я́сли,* па́стыри собери́,* призови́ волхвы́ отъ Перси́ды,* во́инства безпло́тныхъ умо́въ, воззови́те:* Ца́рь небе́съ* на зе́млю прихо́дитъ.

И ны́нѣ, гла́съ и подо́бенъ то́йже:

За́висть же и о́гнь поя́стъ тя́,* безу́мный преле́стниче, вои́стинну* и зако́нная кля́тва:* се́ бо Дѣ́ва,* я́коже Иса́ія прорече́,* имѣ́ во чре́вѣ* и въ я́слѣхъ восклони́тъ Царя́,* Имже вси́ отъ колѣ́на Іу́дова* си́льніи оскудѣ́ютъ.

На стихо́внѣ стихи́ры самогла́сны, гла́съ 4:

Виѳлее́ме, украша́йся, воспо́й, гра́де Сіо́не, ра́дуйся, пусты́не, предобруча́ющи ра́дость: звѣзда́ бо предъи́детъ въ Виѳлее́мъ, возвѣща́ющи хотя́щаго роди́тися Христа́, и верте́пъ пріе́млетъ Невмѣсти́маго всѣ́ми, и я́сли гото́вятся воспрія́ти Жи́знь вѣ́чную. Тому́ вси́ воспои́мъ и возопіи́мъ: спаси́ ду́ши на́ша, Іису́се Бо́же, воплоти́выйся на́съ ра́ди.

Сти́хъ: Бо́гъ отъ ю́га пріи́детъ и Святы́й изъ горы́ пріосѣне́нныя ча́щи.

Христо́съ гряды́й — я́вѣ Бо́гъ на́шъ, пріи́детъ и не укосни́тъ, отъ Неискусобра́чныя Отрокови́цы яви́тся, въ верте́пѣ же про́чее препочíетъ и въ я́слѣхъ безслове́сныхъ, Его́же не вмѣща́етъ не́бо, пріими́ Хотя́щаго пелена́ми пови́тися въ тебѣ́, сло́вомъ Разрѣ́шшаго ны́ отъ безслове́сія. Звѣзда́ возвѣща́етъ, волсви́ покланя́ются, па́стыріе свиря́ютъ, чу́до зря́ще стра́шное, и а́нгели воспѣва́ютъ на земли́, ви́дяще Избавле́ніе ро́да на́шего.

Сти́хъ: Го́споди, услы́шахъ слу́хъ Тво́й и убоя́хся, Го́споди, разумѣ́хъ дѣла́ Твоя́ и ужасо́хся.

Иса́іе, лику́й, Сло́во Бо́жіе воспріе́мъ, прорцы́ Отрокови́цѣ Марíи, купинѣ́ горѣ́ти и огне́мъ не сгара́ти заре́ю Божества́. Виѳлее́ме, благоукраси́ся, отве́рзи врата́, Еде́ме, и волсви́, иди́те ви́дѣти Спасе́ніе, въ я́слѣхъ повива́емое, Его́же звѣзда́ показа́ верху́ верте́па, Жизнода́вца Го́спода, спаса́ющаго ро́дъ на́шъ.

Сла́ва, свята́го, гла́съ 1. Студи́тово:

Сто́лпъ одушевле́нъ и вдохнове́нный о́бразъ, лѣ́тный тво́й наста́ пра́здникъ, богоно́се Игна́тіе, тайново́дства твоя́ и до́блести твоя́ проповѣ́даяй, е́же за вѣ́ру да́же до кро́ве противостоя́ніе, блаже́нный о́нъ и приснопа́мятный гла́съ: я́ко пшени́ца е́смь Бо́жія, — глаго́лющій, — и зубы́ звѣри́ными мелю́ся. Тѣ́мже, подо́бникъ страсте́й Христа́ твоего́ бы́въ, моли́ спасти́ся душа́мъ на́шимъ.

И ны́нѣ, гла́съ 6:

Верте́пе, благоукраси́ся, Агница бо гряде́тъ, чревонося́щи Христа́, я́сли же, подъими́те сло́вомъ разрѣши́вшаго отъ безслове́снаго дѣя́нія на́съ, земноро́дныхъ. Па́стыріе, свиря́юще, свидѣ́тельствуйте чудеси́ стра́шному, и волсви́ отъ Перси́ды, зла́то, и лива́нъ, и сми́рну Царю́ принеси́те, я́ко яви́ся Госпо́дь изъ Дѣ́вы Ма́тере. Ему́же и, прини́кше, ра́бски Ма́ти поклони́ся и привѣща́ше къ Держи́мому на объя́тіихъ Ея́: ка́ко всѣ́ялся еси́ Мнѣ́? Или́ ка́ко прозя́блъ еси́ во Мнѣ́, Изба́вителю мо́й и Бо́же?

На часѣ́хъ тропа́рь предпра́зднства. Сла́ва, свята́го. И ны́нѣ, богоро́диченъ часо́въ. По Отче на́шъ: конда́къ предпра́зднства еди́нъ на всѣ́хъ часѣ́хъ.


НА ЛИТУРГІИ,

Блаже́нна отъ кано́на предпра́зднства пѣ́снь 3-я, со ирмосо́мъ на 4, и свята́го пѣ́снь 6-я, на 4. Проки́менъ, [гла́съ 7]: Возвесели́тся пра́ведникъ о Го́сподѣ [и упова́етъ на Него́]. Сти́хъ: Услы́ши, Бо́же, гла́съ мо́й, [внегда́ моли́ти ми ся къ Тебѣ́]. Апо́столъ къ Евре́емъ, зача́ло 311. Аллилу́ія, гла́съ 4: Пра́ведникъ, я́ко фи́никсъ, процвѣте́тъ, [я́ко ке́дръ, и́же въ Лива́нѣ, умно́жится]. Сти́хъ: Насажде́ни въ дому́ Госпо́дни [во дво́рѣхъ до́му Бо́га на́шего процвѣту́тъ]. Ева́нгеліе Ма́рка, зача́ло 41. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].


[Мрк.] Аще случи́тся недѣ́ля святы́хъ оте́цъ въ предпра́зднствѣ, вну́трь 20-го дне́, си́рѣчь, въ 20-й, въ 21-й, въ 22-й и въ 23-й де́нь.

Быва́етъ слу́жба си́це: На ма́лѣй вече́рни стихи́ры воскре́сны и Богоро́дицы по обы́чаю.

На вели́цѣй вече́рни, на Го́споди воззва́хъ: стихи́ры воскре́сны 3, и восто́ченъ [Анато́ліевъ] еди́нъ, и предпра́зднства 3, гла́съ 6, подо́бенъ: Все́ отло́жше... и отце́въ 3, гла́съ и подо́бенъ то́йже. Сла́ва, гла́съ 6: Даніи́лъ, му́жъ жела́ній... И ны́нѣ, предпра́зднства, гла́съ то́йже: Верте́пе, благоукраси́ся... Вхо́дъ. Проки́менъ дне́. И чте́нія три́ отце́въ. На литíи стихи́ры предпра́зднства на ряду́, ко́его дне́ недѣ́ля сія́ пое́тся, стихо́вныя, и отце́въ, гла́съ 1: Луча́ми облиста́вшеся... Сла́ва, гла́съ 3: Пра́отцевъ собо́ръ... И ны́нѣ, предпра́зднства, гла́съ то́йже: Благоукраси́ся, Виѳлее́ме... На стихо́внѣ стихи́ры воскре́сны. Сла́ва, гла́съ 2: Ра́дуйтеся, проро́цы... И ны́нѣ, предпра́зднства, гла́съ то́йже: Се́ вре́мя прибли́жися... На благослове́ніи хлѣ́бовъ тропа́рь: Богоро́дице Дѣ́во.., два́жды, и отце́въ: Ве́лія вѣ́ры.., еди́ножды. Бу́ди и́мя Госпо́дне.., три́жды. И чте́ніе въ толкова́ніихъ апо́стольскихъ.

На у́трени, на Бо́гъ Госпо́дь: Тропа́рь воскре́сенъ, два́жды. Сла́ва, отце́въ, гла́съ 2: Ве́лія вѣ́ры... И ны́нѣ, предпра́зднства, гла́съ 4: Гото́вися, Виѳлее́ме... и обы́чныя каѳи́смы, и сѣда́льны воскре́сны, и богоро́дичны и́хъ. И чте́ніе во Ева́нгеліи Толково́мъ, е́же отъ Матѳе́я, въ са́момъ нача́лѣ: Кни́га родства́ Іису́са Христа́... По непоро́чнахъ тропари́ и́хъ: Ангельскій собо́ръ... Ипакои́ и чте́ніе во Ева́нгеліи Толково́мъ, е́же на ряду́. Степе́нна гла́са. Проки́менъ. Вся́кое дыха́ніе... Ева́нгеліе воскре́сно, и Воскресе́ніе Христо́во... По 50-мъ псалмѣ́ стихи́ра воскре́сна. Кано́нъ воскре́сенъ со ирмосо́мъ на 4, и предпра́зднства на 4, и отце́въ на 6. Катава́сія: Христо́съ ражда́ется... По 3-й пѣ́сни: Ипакои́ отце́въ, гла́съ 8: Ангелъ отроко́мъ ороси́ пе́щь... и чте́ніе. По 6-й пѣ́сни: Конда́къ, гла́съ 1, подо́бенъ: Ли́къ а́нгельскій. Весели́ся, Виѳлее́ме... и и́косъ. И чте́мъ про́логъ. По 9-й пѣ́сни: Свя́тъ Госпо́дь Бо́гъ на́шъ... Свѣти́ленъ воскре́сенъ. Сла́ва, отце́въ. И ны́нѣ, предпра́зднства. На хвали́техъ стихи́ры воскре́сны 4, и отце́въ 4, гла́съ 5, подо́бенъ: Ра́дуйся. Сла́ва, отце́въ, гла́съ 8: Зако́нныхъ уче́ній... И ны́нѣ, Преблагослове́нна еси́, Богоро́дице Дѣ́во... Славосло́віе вели́кое. Тропа́рь воскре́сенъ. Ектеніи́ и отпу́стъ. Стихи́ра ева́нгельская въ притво́рѣ. И ча́съ 1-й. И коне́чный отпу́стъ.

На литургíи: Блаже́нна гла́са, на 4, и отце́въ отъ кано́на пѣ́снь 3-я, на 4, и предпра́зднства пѣ́снь 6-я, на 4. По вхо́дѣ: Тропа́рь воскре́сенъ, и отце́въ, и предпра́зднства. Сла́ва, конда́къ отце́въ. И ны́нѣ, предпра́зднства. Проки́менъ, пѣ́снь отце́въ, гла́съ 4: Благослове́нъ еси́, Го́споди Бо́же оте́цъ на́шихъ, и хва́льно и просла́влено и́мя Твое́ во вѣ́ки... Апо́столъ ко Евре́емъ, зача́ло 328. Аллилу́ія, гла́съ 4: Бо́же, уши́ма на́шима... Ева́нгеліе Матѳе́я, зача́ло 1. Ря́дъ же недѣ́ли оставля́ется. Прича́стенъ: Хвали́те Го́спода... Другíй: Ра́дуйтеся, пра́ведніи...

[Зри́:] О предпра́зднствѣ Христо́ва Рождества́ вѣ́дати подоба́етъ: Отъ 20-го дне́ начина́ется предпра́зднство. По́стъ у́бо е́сть, покло́ны же въ це́ркви не быва́ютъ.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 165 – 176 об.

/ Къ оглавленію раздѣла /


Наверхъ / Къ титульной страницѣ

0