Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 26 сентября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 20-й де́нь.
Па́мять и́же во святы́хъ отца́ на́шего Даніи́ла, архіепи́скопа Се́рбскаго.

НА МАЛѢЙ ВЕЧЕРНИ,
[На Го́споди воззва́хъ:] стихи́ры свята́го [на 4], гла́съ 1:

Небе́сныхъ чино́въ ра́дованіе и на земли́ архіере́емъ похвала́, свяще́нникомъ сла́ва, Даніи́ле прему́дре, мона́шествующимъ пра́вило и Це́ркве утвержде́ніе. Тѣ́мъ тя́ мо́лимъ: не оскудѣ́й, спомоществу́я на́мъ, притека́ющимъ и облобыза́ющимъ ра́ку моще́й твои́хъ.

На небесѣ́хъ водворя́яся, пріими́ ны́нѣ хвалу́ ча́дъ твои́хъ, о́тче, пра́зднующихъ че́стно па́мять успе́нія твоего́, и да́ждь исполне́ніе и́хъ проше́ніямъ, моля́ся прилѣ́жно Пречи́стѣй Ма́тери Бо́жіей спасти́ся отъ бѣ́дъ душа́мъ на́шимъ.

Сла́ва, гла́съ 6. Самогла́сенъ:

Боже́ственная благода́ть въ па́мяти успе́нія твоего́, осѣня́ющи притека́ющія къ ра́цѣ моще́й твои́хъ, неду́говъ исцѣле́ніе подава́етъ, святи́телю о́тче Даніи́ле, моли́ся о душа́хъ на́шихъ.

И ны́нѣ, предпра́зднства, [гла́съ то́йже:

По́йте Го́споду, ро́ждшемуся отъ Дѣ́вы; воспо́йте пѣ́снь, во́инства небе́сная, земнíи восплещи́те рука́ми: Бо́гъ бо въ человѣ́цѣхъ, Человѣ́къ Бо́гъ воздая́ніемъ. Се́ та́инство соверша́ется на́мъ дне́сь, Ца́рь Изра́илевъ, Христо́съ прихо́дитъ.]

На стихо́внѣ стихи́ры, гла́съ 2:

До́мъ духо́вный яви́ся Даніи́лъ поспѣше́ніемъ благода́ти Свята́го Ду́ха, тѣ́мже, ны́нѣ соше́дшеся, того́ воспои́мъ.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Ра́дуйся, Даніи́ле, святи́телей похвало́, свяще́нникомъ сла́во, мона́хомъ пра́вило, Це́ркве утвержде́ніе.

Сти́хъ: Восхва́лятся преподо́бніи во сла́вѣ и возра́дуются на ло́жахъ свои́хъ.

Пріими́ ны́нѣ пѣ́ніе ча́дъ твои́хъ, о́тче, и подава́й лю́бящимъ тя́ обы́чная проше́нія.

Сла́ва, и ны́нѣ, предпра́зднству, гла́съ то́йже:

До́ме Евфра́ѳовъ, гра́де святы́й, украси́ до́мъ, въ не́мже Боже́ственный ражда́ется.

Тропа́рь пи́санъ на вели́цѣй вече́рни.



НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8: предпра́зднству 3 и свято́му 5.
Стихи́ры свято́му Даніи́лу, гла́съ 2:

Кíими похва́льными вѣнцы́ увязе́мъ святи́теля? Свяще́нства вѣне́цъ, благоче́стія управле́ніе, свѣ́тлое Це́ркве Се́рбскія украше́ніе, исто́чникъ боже́ственныхъ исцѣле́ній неисчерпа́емый, проли́тіе даро́въ духо́вныхъ, рѣку́ мно́гихъ чуде́съ, веселя́щую Се́рбскую зе́млю тече́ньми, Даніи́ла, те́плаго предста́теля на́шего и храни́теля.

Кíими смире́нными устна́ми воспои́мъ святи́теля? Ди́внаго въ чудесе́хъ и безпло́тныхъ сожи́теля, освяще́ннаго столпа́ Це́ркве Се́рбскія неподви́жима, ея́ побо́рника и весе́ліе земли́ на́шея, пра́вды пра́вило, сирота́мъ пода́теля, оби́димыхъ засту́пника и больны́мъ врача́ безме́здна?

Кíими всехва́льными вѣнцы́ воспои́мъ и соста́вимъ ликова́ніе въ честнѣ́мъ пра́здницѣ твоего́ успе́нія, іера́рше? Оба́че, духо́вно пра́зднующе, мо́лимся ти́: моли́ Влады́ку всѣ́хъ дарова́ти побѣ́ду правосла́внымъ на сопроти́вныя, тебе́ бо те́пла моли́твенника къ Влады́цѣ стяжа́хомъ, подаю́щему мíру ве́лію ми́лость.

Кíими похва́льными добро́тами воспои́мъ во архіере́ехъ сла́внаго, въ вѣ́рѣ вели́каго и пелена́хъ доброразсу́днаго, во уче́ніи язы́ка сла́дкаго, уче́ніемъ Се́рбскую Це́рковь обогаща́юща струя́ми слове́съ свои́хъ? Тѣ́мъ мо́лимъ тя́, святи́телю Христо́въ Даніи́ле: моли́ся Христу́ Бо́гу и Пресвятѣ́й Богоро́дицѣ, да изба́вимся отъ бѣ́дъ моли́твами твои́ми.

Кíими духо́вными пѣ́сньми воспои́мъ архіере́я? Уче́ніемъ къ богоразу́мію всѣ́хъ наста́вльшаго, исто́чника чуде́съ пречу́дна и учи́теля прему́дра, столпа́ непоколеби́ма патріа́ршескія Ла́вры, и всея́ Се́рбскія земли́ удобре́ніе, и тве́рдое защище́ніе, и моли́твенника о душа́хъ на́шихъ.

Сла́ва, гла́съ 6:

Архіере́евъ похвалу́, свяще́нникомъ украше́ніе, къ Бо́гу моли́твенника непреста́ннаго, исто́чника чуде́съ преизоби́льна, дне́сь любо́вію соше́дшеся, се́рбскій наро́де, іера́рха Даніи́ла похва́лимъ и, честны́я мо́щи его́ обстоя́ще, лобжемъ и рце́мъ: ра́дуйся, архіере́е Даніи́ле, свѣти́льниче свѣ́тлый, озари́ изря́дное достоя́ніе — кня́зя и лю́ди, о ни́хже непреста́нно Христу́ моли́ся, дарова́ти и́мъ ми́рное житіе́, да вси́ честно́е твое́ успе́ніе любо́вію почита́емъ.

И ны́нѣ, предпра́зднства, гла́съ 8:

[Воспріими́, Виѳлее́ме, Бо́жію митропо́лію, Свѣ́тъ бо незаходи́мый въ тебѣ́ роди́тися прихо́дитъ; а́нгели, удиви́теся на небеси́, человѣ́цы, просла́вите на земли́, волсви́, отъ Перси́ды пресла́вный да́ръ принеси́те, па́стыріе, свиря́юще, трисвято́е пѣ́ніе сла́дцѣ воспо́йте: вся́кое дыха́ніе да хва́литъ Вседѣ́теля.]

Вхо́дъ. Проки́менъ дне́, чте́нія три́ святи́телемъ.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ры свято́му, гла́съ 4. Самогла́сенъ:

Свѣ́тло дне́сь Це́рковь Се́рбская украша́ется и ра́дуется, зову́щи: уясни́ся моя́ добро́та па́че всѣ́хъ, святи́телемъ бо красота́, сла́вный Даніи́лъ взы́де на небеса́ къ Царю́, всѣ́ми ца́рствующему.

Пріиди́те у́бо, празднолю́бцы, правосла́вныхъ собо́ри, и принесе́мъ ему́ пѣ́нія и похвалы́, зову́ще: о святи́телей добро́то и се́рбская хвало́, моли́ся Христу́ Бо́гу изба́вити христоимени́тыя лю́ди отъ вся́кія ско́рби и спасти́ ду́ши на́ша.

Ду́ха Боже́ственная благода́ть святи́теля тя́ показа́ и учи́теля изря́дна яви́, тѣ́мже мра́къ нече́стія обличи́лъ еси́ и лю́ди богоразу́мія уче́ньми просвѣти́лъ еси́, святи́телю богому́дре Даніи́ле, архіере́емъ сла́ва и красота́, ро́ду же се́рбскому и всѣ́мъ бы́лъ еси́ извѣ́стенъ о́бразъ уче́нія, дерзнове́ніе имѣ́я ко Христу́ Бо́гу, Того́ при́сно моли́ спасти́ся душа́мъ на́шимъ.

До́блестей твои́хъ, свяще́нне о́тче Даніи́ле, пло́дъ уясни́ вѣ́рныхъ сердца́. Кто́ бо, слы́ша безмѣ́рное твое́ смире́ніе, и терпѣ́нію не удиви́тся, и е́же къ ни́щимъ ти́хость и скорбя́щимъ ми́лованіе? Вся́ бо боголѣ́пно научи́лъ еси́, святи́телю о́тче Даніи́ле, и ны́нѣ на небесѣ́хъ, неувяда́емымъ вѣнча́вся вѣнце́мъ, моли́ Христа́ Бо́га и Пресвяту́ю Богоро́дицу о душа́хъ на́шихъ.

Сла́ва, гла́съ 6:

Ты́ еси́ па́стырь до́брый и учи́тель те́плый, святи́телю о́тче Даніи́ле, тя́ всегда́ хва́ляще, вопіе́мъ ти́: тобо́ю украси́ Бо́гъ Це́рковь, и Ма́тере Своея́ чудотво́рный о́бразъ въ хра́мѣ предстои́тъ и неисчерпа́емую благода́ть ро́ду се́рбскому подае́тъ, идѣ́же и твоя́ нетлѣ́нныя мо́щи покрове́нны лежа́тъ отъ толи́кихъ лѣ́тъ. Тѣ́мже тя́ мо́лимъ и вопіе́мъ: о святи́телю Христо́въ Даніи́ле, моли́ся непреста́нно о хва́лящихъ и чту́щихъ святу́ю па́мять твою́, грѣхо́въ оставле́ніе получи́ти во спасе́ніе ду́шъ на́шихъ.

И ны́нѣ, предпра́зднства, гла́съ 1:

Пріими́те, я́сли, Его́же въ купинѣ́ Моисе́й законополо́жникъ прови́дѣ въ Хори́вѣ, ны́нѣ ражда́ема отъ Дѣ́вы Ду́хомъ Боже́ственнымъ. Та́ е́сть, Яже въ зако́нѣ рече́нная, Та́ е́сть про́роческая печа́ть, Яже Бо́га пло́тію тлѣ́ннымъ явля́ющи, Ему́же поклони́мся.

На стихо́внѣ стихи́ры предпра́зднству, гла́съ 2. Самогла́сны:

Се́ вре́мя прибли́жися спасе́нія на́шего, гото́вися, верте́пе: Дѣ́ва приближа́ется е́же роди́ти. Виѳлее́ме, земле́ Іу́дова, красу́йся и весели́ся, я́ко изъ тебе́ возсія́ Госпо́дь на́шъ. Услы́шите, го́ры и хо́лмы и окре́стныя страны́ Іуде́йскія, я́ко гряде́тъ Христо́съ, да спасе́тъ, его́же созда́, человѣ́ка, я́ко Человѣколю́бецъ.

Сти́хъ: Бо́гъ отъ ю́га пріи́детъ и Святы́й изъ горы́ пріосѣне́нныя ча́щи.

Виѳлее́ме, земле́ Іу́дова, е́же по пло́ти жи́тельство, свѣ́тло угото́ви боже́ственный верте́пъ, въ не́мже Бо́гъ пло́тію ражда́ется отъ Неискусому́жныя Святы́я Дѣ́вы, во е́же спасти́ ро́дъ на́шъ.

Сти́хъ: Го́споди, услы́шахъ слу́хъ Тво́й и убоя́хся, Го́споди, разумѣ́хъ дѣла́ Твоя́ и ужасо́хся.

Пріиди́те, вси́ Христо́во Рождество́ вѣ́рно предпра́зднуимъ и, мы́сленнѣ пѣ́ніе, я́ко звѣзду́, предлага́юще, волхво́въ славосло́вія съ па́стырьми возопіи́мъ: пріи́де спасе́ніе человѣ́ковъ изъ дѣ́вственныхъ ложе́снъ, вѣ́рныя воззыва́я.

Сла́ва, свято́му, гла́съ 4:

Яко со́лнце пресвѣ́тлое, просвѣща́еши страну́ всю́ Се́рбскую: тебе́ бо показа́ Бо́гъ отъ ю́ности, святи́телю блаже́нне Даніи́ле, па́стыря слове́сному своему́ ста́ду и оте́честву твоему́. Ты́ украси́лъ еси́ всечу́дно це́рковь Бо́жія Ма́тере, въ не́йже и до ны́нѣ лежа́тъ честны́я мо́щи твоя́, иму́щи въ себѣ́ да́ръ исцѣле́нія благода́тію. Сего́ ра́ди не забу́ди въ моли́твахъ испроси́ти благовѣ́рному и христолюби́вому наро́ду се́рбскому побѣ́ды на сопроти́вныя враги́. Тебе́ бо Христо́съ показа́ свѣти́ло вели́кое патріа́ршеской собо́рной Це́ркви, ты́ еси́ похвала́ земли́ на́шей и крѣ́пкое заступле́ніе. Тѣ́мже, пра́зднующе дне́сь свѣ́тло па́мять твою́, мо́лимъ тя́, святи́телю Христо́въ Даніи́ле, ми́ръ мíру испроси́ти и душа́мъ на́шимъ ве́лію ми́лость.

И ны́нѣ, предпра́зднства, гла́съ 5:

Виѳлее́ме, гото́вися на срѣ́теніе Дѣ́вѣ Марíи и Богома́тере: се́ бо гряде́тъ къ тебѣ́, Младе́нца нося́щи Христа́, Собезнача́льнаго Отцу́ и Ду́ху при́сно, Его́же во верте́пѣ роди́тъ, и по рождествѣ́ Дѣ́ва па́ки яви́тся.

Ны́нѣ отпуща́еши... Трисвято́е, [и по Отче на́шъ...]
Тропа́рь, гла́съ 3:

Чу́до яви́ся извѣще́нія, дѣла́ми добродѣ́телей Бо́жіихъ возсія́лъ еси́, мона́шествующихъ ли́ки упа́слъ еси́, архіере́йская сѣда́лища утверди́лъ еси́, ерети́ческаго нападе́нія не усумнѣ́вся, Це́рковію Христо́вою управля́я, преподо́бне о́тче, Даніи́ле прему́дре, усну́въ, я́ко спя́, тѣ́ло же твое́ цѣ́ло и нетлѣ́нно соблюде́но бы́сть, и подае́тъ цѣльбы́ боля́щимъ отъ разли́чныхъ неду́говъ, и де́моны прогоня́етъ. Сего́ ра́ди мо́лимъ тя́: моли́ спасти́ся душа́мъ на́шимъ.

Сла́ва, и ны́нѣ, предпра́зднству:

[Гото́вися Виѳлее́ме, отве́рзися всѣ́мъ, Еде́ме, красу́йся Евфра́ѳо, я́ко дре́во живота́ въ верте́пѣ процвѣте́ отъ Дѣ́вы: ра́й бо Оноя чре́во яви́ся мы́сленный, въ не́мже Боже́ственный са́дъ: отъ него́же я́дше, жи́ви бу́демъ, не я́коже Ада́мъ у́мремъ; Христо́съ ражда́ется пре́жде па́дшій возста́вити о́бразъ.]


НА УТРЕНИ,
На Бо́гъ Госпо́дь: Тропа́рь предпра́зднству, два́жды. Сла́ва, свято́му. И ны́нѣ, предпра́зднству.

По 1-мъ стихосло́віи сѣда́ленъ, гла́съ 1:

Служи́тель бы́въ Христу́, вся́ческихъ Влады́цѣ, просвѣти́лъ и научи́лъ еси́ лю́ди боже́ственнымъ поуче́ніемъ, къ разумѣ́нію наставля́я, святи́телю Даніи́ле. Тѣ́мже тя́ вси́ имену́емъ проповѣ́дника и́стины, учи́теля и уго́дника Христо́ва. [Два́жды.]

Сла́ва, и ны́нѣ, предпра́зднства, гла́съ то́йже:

Весели́ся, Виѳлее́ме, Евфра́ѳо, гото́вися: се́ бо Агница, Па́стыря Вели́каго въ ложесна́хъ нося́щи, роди́ти гряде́тъ, и, предви́дяще боже́ственную звѣзду́, волсви́ ра́дуются, съ па́стырьми пою́ще се́рдца пра́востію.

По 2-й каѳи́смѣ сѣда́ленъ, гла́съ 4:

Отъ ю́ности взе́мь кре́стъ сво́й, благоче́стно послѣ́довалъ еси́ Христу́, усѣкну́въ плотско́е мудрова́ніе воздержа́ніемъ, тѣ́мже, на святи́тельстѣмъ сѣда́лищи сѣ́дъ, святи́телю, непреста́нно украша́еши Це́рковь Христо́ву во сла́ву Влады́ки твоего́ и Пречи́стыя Ма́тере Его́. Того́ ра́ди и Христо́съ разли́чными дарова́ньми украси́ твою́ ра́ку, Даніи́ле всеблаже́нне. [Два́жды.]

Сла́ва, и ны́нѣ, предпра́зднству, гла́съ то́йже:

Дѣ́вы, предначни́те дѣви́ческую ра́дость; ма́тери, восхвали́те провожде́ніе Ма́тере Христа́, Бо́га на́шего; волсви́ со а́нгелы, съ на́ми па́стыріе; гряде́тъ бо Дѣ́ва во гра́дѣ Виѳлее́мѣ роди́ти Сы́на, Превѣ́чнаго Бо́га, спаса́ющаго мíръ отъ тлѣ́нія.

По поліеле́и, сѣда́ленъ, гла́съ 8:

Святи́теля вели́каго Даніи́ла ка́ко досто́йно воспое́мъ? Му́жа чи́стаго ума́, богоза́рнаго свѣ́та, освѣща́ющаго на́съ и боже́ственный ра́зумъ подаю́щаго, та́инъ глуби́нныхъ повѣ́дателя, ему́же согла́сно вси́ рце́мъ: ра́дуйся, о́тче отце́въ, Даніи́ле. [Два́жды.]

Сла́ва, и ны́нѣ, предпра́зднству, гла́съ 5:

Виѳлее́ме, гото́вися на срѣ́теніе Дѣ́вы Марíи и Богома́тере: се́ бо гряде́тъ къ тебѣ́, Младе́нца нося́щи Христа́, Собезнача́льнаго Отцу́ и Ду́ху при́сно, Его́же во верте́пѣ роди́тъ и по рождествѣ́ па́ки яви́тся Дѣ́ва.

Та́же, степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. Вся́кое дыха́ніе... Ева́нгеліе отъ Іоа́нна, зача́ло 35 отъ полу́.

По 50-мъ псалмѣ́ стихи́ра, гла́съ 6:

Егда́ преставле́ніе честна́го твоего́ тѣ́ла, о́тче, приспѣ́, тогда́ мно́жество вѣ́рныхъ, обступи́вше о́дръ тво́й, уми́льно провожда́ху тя́, и, зря́ще тя́ благословя́ща, лю́ди удивля́хуся. Ца́рь же Душа́нъ со слеза́ми вопія́ше: о влады́ко, что́ ти́ возда́мъ за боговѣ́дѣніе, е́же на́мъ дарова́лъ еси́, пріе́мь благода́ть отъ Бо́га? Тѣ́мже, святи́телю Даніи́ле, моли́ся прилѣ́жно Христу́ Бо́гу и Пресвятѣ́й Богоро́дицѣ, да призира́етъ на на́съ неотсту́пно пречи́стымъ Свои́мъ чудотво́рнымъ о́бразомъ, и́мже ты́ хра́мъ украси́лъ еси́, оте́честву и ста́ду своему́ непоколеби́мый сто́лпъ оставля́я. Твои́ми моли́твами да спасе́мся.

Кано́нъ [предпра́зднству со ирмосо́мъ на 6 и] свято́му Даніи́лу на 8, гла́съ 1.

Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Отче богому́дре, святи́телю Даніи́ле, отве́рзи моя́ недосто́йная уста́ воспѣва́ти тя́ и пріими́, я́ко благово́нное кади́ло, отъ убо́жества моего́, е́же тебѣ́ принесо́хъ недосто́йный а́зъ. [Два́жды.]

Воспои́мъ вси́ вели́каго святи́теля Даніи́ла, почти́мъ засту́пника и утвержде́ніе земли́ Се́рбскія, его́же дарова́ Госпо́дь оби́тели собо́рной храни́теля бо́дра.

Спаси́тельнымъ Христо́вымъ за́повѣдемъ послѣ́довалъ еси́, прему́дре святи́телю Даніи́ле, вдо́въ и сиро́тъ бы́лъ еси́ предста́тель и земли́ Се́рбстѣй вели́кое защище́ніе.

Вели́кій ны́нѣ Даніи́лъ, па́стырь Це́ркве собо́рныя, па́стыри вку́пѣ и пасо́мыя и всю́ Це́рковь въ па́мять свою́ призыва́етъ. Тѣ́мже, собра́вшеся, торжеству́имъ свѣ́тло въ де́нь па́мяти его́.

Благода́ть Ду́ха пріе́мъ, о́тче, во свое́ се́рдце, Христо́въ святи́телю, уясни́ язы́къ и се́рдце просвѣти́ твои́хъ пѣвце́въ, е́же святу́ю твою́ па́мять воспѣ́ти свѣ́тло, Даніи́ле преподо́бне.

Аще и побѣжда́ютъ твоя́ исправле́нія словеса́ на́ша и помышле́нія, о́тче Даніи́ле, оба́че душе́вное на́ше предложе́ніе, по си́лѣ прино́симое тебѣ́, пріими́ съ любо́вію, досточу́дне, е́же бо по досто́инству пѣ́сни тебѣ́ соплести́ невозмо́жно е́сть на́мъ.

Богоро́диченъ: Пречи́стая Богоро́дице, Содѣ́теля и Спа́са ро́ждши, спаси́ отъ бѣ́дъ гра́дъ тво́й, непреста́нно моля́щи Сы́на Твоего́ и Бо́га на́шего за ны́.

Пѣ́снь 3.

Ирмо́съ: Ка́мень, его́же небрего́ша зи́ждущіи, се́й бы́сть во главу́ у́гла: то́й е́сть Ка́мень, на не́мже утверди́ Це́рковь Христо́съ, ю́же отъ язы́къ искупи́.

Ты́ прояви́лъ еси́, Влады́ко, въ послѣ́днемъ ро́дѣ на́шемъ святи́теля вели́каго Са́вву, и́же просвѣти́ свое́ оте́чество со святи́тели и архіере́и, ему́же послѣ́дуетъ Даніи́лъ, цвѣ́тъ пречу́дный. [Два́жды.]

Тебѣ́ прикосну́выйся, свя́те, су́щему въ честнѣ́мъ гро́бѣ твое́мъ, исцѣле́ніе получи́ти сподо́бися: рука́мъ бо того́, къ пе́рсемъ согбе́ннымъ, Бо́жіею благода́тію дае́ши простира́тися.

Сокруши́ ага́ряны и вся́ сопоста́ты безбо́жныя, преподо́бне Даніи́ле, моле́ніемъ твои́мъ къ Творцу́ и Бо́гу на́шему, и си́лу и́хъ, борю́щую на ны́, не́мощну покажи́, и покори́ и́хъ благовѣ́рному кня́зю на́шему.

Смире́нъ яви́лся еси́, кро́токъ же и ти́хъ, Даніи́ле, отону́дуже Ду́ха благода́ть, оби́льнѣ излія́вшися на тя́, вели́ка показа́ тя́, чуде́съ луча́ми зе́млю на́шу осіява́юща. [Два́жды.]

Жезло́мъ воздержа́нія страсте́й мо́ре раздѣли́въ, блаже́нне, я́ко Моисе́й, на безстра́стія го́ру возше́лъ еси́ и, пріе́мъ мы́сленныя скрижа́ли, па́ству твою́ научи́лъ еси́ зако́ну Христо́ву.

Богоро́диченъ: Бу́ди ми́, Дѣ́во, прибѣ́жище и приста́нище, стѣна́ необори́мая и засту́пница, Бо́га пло́тію ро́ждшая, Пречи́стая, Изба́вителя Всеще́драго и Спа́са пою́щихъ Тя́, Богоневѣ́стная.

[Конда́къ и и́косъ предпра́зднства.]
Сѣда́ленъ свято́му, гла́съ 4:

Свѣти́льникъ свѣтосія́ненъ яви́лся еси́ земли́ Се́рбстѣй, просвѣща́яй блиста́ньми боже́ственныхъ твои́хъ слове́съ вѣ́рныхъ помышле́нія, святи́телю о́тче Даніи́ле. Тѣ́мъ вси́ свяще́нную твою́ и боже́ственную па́мять дне́сь ра́достно соверша́емъ. [Два́жды.]

Сла́ва, и ны́нѣ, предпра́зднства, гла́съ то́йже.

Дѣ́вы, предначни́те дѣви́ческую ра́дость; ма́тери, восхвали́те провожде́ніе Ма́тере Христа́ Бо́га на́шего; волсви́ со а́нгельми, съ на́ми па́стыріе лику́йте: гряде́тъ бо Дѣ́ва во гра́дѣ Виѳлее́мстѣмъ роди́ти Сы́на, Превѣ́чнаго Бо́га, спаса́ющаго мíръ отъ истлѣ́нія.

Пѣ́снь 4.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ — позна́ешися, внегда́ пріити́ вре́мени — пока́жешися. Сла́ва си́лѣ Твое́й, Го́споди.

Благода́тію Ду́ха пома́зался еси́, архіере́е всеизря́дне Даніи́ле, во Христа́ бо одѣ́яся житія́ ра́ди чи́стаго, тѣ́мъ научи́лъ еси́ сла́вити въ Тро́ицѣ Еди́наго Бо́га.

Изба́ви твое́ ста́до отъ бу́рь грѣха́, преподо́бне святи́телю Даніи́ле, бѣ́дъ же и скорбе́й, приводя́ ны въ приста́нища ти́хая Боже́ственныя во́ли Христо́вы.

Христо́въ яви́лся еси́ уго́дникъ, о́тче преподо́бне Даніи́ле, преосвяще́нне архіере́е. Тѣ́мъ моля́ся непреста́й ко Го́споду отъ напа́стей, бѣ́дъ и скорбе́й изба́вити ста́до твое́ отъ искуше́ній.

Умертви́ мудрова́ніе, прему́дре, пло́ти моея́ неисцѣ́льное и къ боже́ственнымъ стезя́мъ наста́ви ны́, я́ко крѣ́покъ и си́ленъ, зако́номъ же благи́мъ повини́ мя, блаже́нне, и раба́ покажи́ мя Христо́ва, порабоще́нна лю́тыми страстьми́.

Сна́ очесе́мъ твои́мъ и дрема́нія вѣ́ждома не да́лъ еси, до́ндеже обрѣ́те мѣ́сто поко́йно се́рдце твое́, о́тче. Тѣ́мъ, очи́стившеся досто́йнѣ, узрѣ́ жили́ще сла́вы всѣ́хъ Содѣ́теля, Царя́ и Бо́га вѣ́чнаго. [Два́жды.]

Ве́сь у́бо у́мъ впери́въ къ высотѣ́ и земна́я ни во что́же вмѣни́въ, смире́ніемъ, достоблаже́нне Даніи́ле, высо́кая прія́лъ еси́.

Богоро́диченъ: Ка́я Сія́, я́ко вои́стинну бли́зъ Бо́га, я́ко превозше́дшая вся́ а́нгельскія чи́ны, Еди́на, добро́тою дѣ́вства сія́ющи, я́ко Ма́ти Вседержи́теля?

Пѣ́снь 5.

Ирмо́съ: Тво́й ми́ръ да́ждь на́мъ, Сы́не Бо́жій, ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Окрестъ стоя́ще ра́ки твоея́, святи́телю преподо́бне Даніи́ле, имѣ́емъ тя́ хода́тая къ Бо́гу и заступле́ніе земли́ Се́рбстѣй, утвержде́ніе же незы́блемое.

Ми́лостивъ бы́въ убо́гимъ, ми́лость душе́вную испроси́, прехва́льне, ми́лостынею бо стяжа́лъ еси́, о́тче Даніи́ле, свѣщу́ и ту́ю свѣ́тло украси́лъ еси́.

Жили́ще бы́лъ еси́ Свята́го Ду́ха вои́стинну, блаже́нне Даніи́ле, и того́ явле́ньми разбогатѣ́лъ еси́ до́брѣ Боже́ственными дарми́.

Кро́токъ яви́лся еси́ ку́пно и смире́нъ дѣ́ломъ и сло́вомъ и си́мъ вся́ къ себѣ́ привле́клъ еси́, любо́вію же и до́брыми дѣлми́ вся́ укроти́лъ еси́ и сердца́ возвесели́лъ еси́ твои́ми чудеса́ми. [Два́жды.]

Вели́кій Па́стырь всѣ́хъ Христо́съ ове́цъ Свои́хъ па́стыря тя́, блаже́нне, показа́ и учи́теля слове́сныхъ. Тѣ́мже заблужда́ющаго мя́ на гора́хъ поги́бели, я́ко па́стырь, твоего́ овча́те взыщи́.

Яко вели́кое бога́тство твои́хъ щедро́тъ яви́ся въ земли́ на́шей безчи́сленное проли́тіе ми́лости твоея́, слуго́ Христо́въ: ты́ бо прося́щимъ су́щая подае́ши и ты́я насы́тити тщи́шися твои́мъ предложе́ніемъ, блаже́нне.

Богоро́диченъ: Мѵ́ро Тя́ имену́емъ, Пречи́стая, я́ко ро́ждшую Бо́га пло́тію и благода́тное мѵ́ро точа́щую всѣ́мъ, притека́ющимъ подъ кро́въ Тво́й.

Пѣ́снь 6.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.

Житіе́ твое́ цѣлому́дренно соверши́лъ еси́, священноявле́нне, пра́вдою украси́вся и му́жествомъ смы́сла добродѣ́тели сочета́въ себе́, преблаже́нне святи́телю Даніи́ле.

Храни́ гра́дъ тво́й, святи́телю Даніи́ле преблаже́нне, отъ безбо́жныхъ и чужевѣ́рныхъ нахожде́ній и отъ междоусо́бныя бра́ни. Моли́ся же непреста́нно Влады́цѣ Христу́ и Пресвятѣ́й Богоро́дицѣ, е́же ми́ръ дарова́ти па́ствѣ свое́й.

Ты́ у́бо и по сме́рти сла́вимь, я́ко жи́въ, чудодѣ́йствуеши. Немощны́мъ бо сляче́ннымъ дае́ши исцѣле́ніе Боже́ственною благода́тію, зане́ глаго́летъ Госпо́дь: прославля́ющаго Мя́ просла́влю.

Испо́лнился еси́ свѣтоявле́нія, Даніи́ле му́дре, я́ко храни́тель за́повѣдей Христо́выхъ, очище́нъ же отъ страсте́й, бы́лъ еси́ вои́стинну жили́ще Пребоже́ственныя Тро́ицы.

Му́жіе свяще́нніи ра́достно съ наро́домъ дне́сь твою́, о́тче, па́мять пра́зднующе, торжеству́ютъ, и́мже согла́сно и́стинніи безмо́лвницы и про́стіи вси́ о́бще тя́ воспѣва́ютъ, предста́теля вку́пѣ и учи́теля. [Два́жды.]

Ти́ну страсте́й отъ души́ оттря́слъ еси́, Даніи́ле, низложи́въ вся́кое по́мысловъ возноше́ніе, на Христа́ превознося́щееся.

Богоро́диченъ: Совѣ́та превѣ́чнаго хра́мъ воздви́глъ еси́, святи́телю, архистрати́га Гавріи́ла ра́достное провѣща́ніе Богоро́дицѣ вседне́вно воспѣва́я: ра́дуйся, Невѣ́сто неневѣ́стная.

Конда́къ, гла́съ 8:

Возбра́нному и ди́вному на́шея земли́ свѣти́льнику дне́сь любо́вію притека́емъ и пѣ́снь тебѣ́, богоно́се, плете́мъ, я́ко иму́щему дерзнове́ніе ко Го́споду: изба́ви на́съ отъ многообра́зныхъ обстоя́ній, да зове́мъ ти́: ра́дуйся, утвержде́ніе оте́честву на́шему и вели́кій покрови́телю оби́тели своея́.

Икосъ:

Вели́кій свѣти́льникъ яви́лся еси́ ро́ду се́рбскому, струя́ми слове́съ твои́хъ вѣ́рныя просвѣща́я и всеусе́рдно приходя́щимъ къ тебѣ́ исцѣле́нія подава́я. Христо́вы бо лю́ди, богоно́се, неви́димо посѣща́еши и тѣ́мъ зе́млю на́шу просвѣща́еши, сего́ ра́ди согла́сно зове́мъ ти́ си́це: ра́дуйся, свѣ́та безстра́стнаго до́ме; ра́дуйся, страсте́й те́мныхъ прогони́телю; ра́дуйся, де́монскія разруши́вый ко́зни; ра́дуйся, а́нгельскія возвесели́вый чи́ны; ра́дуйся, высото́ боговидѣ́нія чи́стаго; ра́дуйся, глубино́ смире́нія, болѣ́зни омыва́ющая; ра́дуйся, я́ко бы́лъ еси́ зри́тель неви́димыхъ; ра́дуйся, я́ко сообщи́лся еси́ ли́ку святи́телей; ра́дуйся, земли́ Се́рбскія па́стырю и учи́телю; ра́дуйся, святи́телемъ изря́дная похвало́; ра́дуйся, я́ко тебе́ ра́ди посла́ Бо́гъ въ оби́тель твою́ чудотво́рный о́бразъ Ма́тере Своея́; ра́дуйся, я́ко тебе́ ра́ди пресвята́я чудотво́рная ико́на Ма́тере Бо́жія сла́вится; ра́дуйся, я́ко украша́еши престо́лъ первосвяти́телей се́рбскихъ; ра́дуйся, утвержде́ніе ро́ду се́рбскому.

Пѣ́снь 7.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́ я́ко еди́нѣми усты́ поя́ху и благословля́ху, глаго́люще: благослове́нъ Бо́гъ оте́цъ на́шихъ.

Отве́рзи ми́ две́ри покая́нія, преблаже́нне архіере́е Даніи́ле, да омы́ю скве́рну окая́нныя моея́ души́, мое́ тѣ́ло, и вся́ чу́вства, и со́вѣсть, во е́же пѣ́ти Бо́гу: отце́въ Бо́же, благослове́нъ еси́.

Имамы тя́ засту́пника те́пла, твои́ раби́, и стѣ́ну необори́му Це́ркве твоея́, и утвержде́ніе ро́ду се́рбскому, не бои́мся враго́въ и супоста́товъ, но побѣжда́емъ ты́я си́лою чудотво́рныя ико́ны, пою́ще: Христе́, Богоро́дицею благослове́нъ еси́.

Уста́вы оте́ческія утверди́лъ еси́, му́дре, и це́рковь Пресвяты́я Бо́жія Ма́тере чудотво́рнымъ о́бразомъ украси́лъ еси́, и свяще́нства лѣ́потою прекра́сну устро́илъ еси́, уче́ньми же твои́ми лю́ди наказа́лъ еси́ пѣ́ти: Бо́же, Богоро́дицею благослове́нъ еси́. [Два́жды.]

Земля́ на́ша и страна́ согла́сно, о́тче, поуче́нія твоя́ возвѣща́етъ, науче́нна тобо́ю пѣ́ти всю́ду Христа́: отце́въ на́шихъ Бо́же, благослове́нъ еси́.

Жени́хъ, красе́нъ добро́тою па́че всѣ́хъ сыно́въ человѣ́ческихъ, я́коже пи́сано е́сть, невѣ́стѣ, блаже́нне, Свое́й Це́ркви, краснѣ́йша тя́ показа́ жениха́, Того́ нося́ща о́бразъ и подо́біе.

Украси́въ свое́ житіе́ ми́лостынею и кро́тостію, любо́вію же и и́стиною, подража́тель показа́лся еси́ изря́дный Па́стыря до́браго, избра́въ Того́ добродѣ́тели до́брѣ.

Богоро́диченъ: Прихо́дитъ Влады́ка во верте́пъ роди́тися, я́ко Человѣ́къ. Предусря́щимъ, вѣ́рніи, Дѣ́ву Чи́стую, воспѣва́юще Ей ра́достно: ра́дуйся, мíру ра́досте; ра́дуйся, Дѣ́во, Ма́ти Христо́ва.

Пѣ́снь 8.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Побѣжде́нъ бы́въ отъ врага́ прегрѣше́ньми мно́гими и отъ мо́лвъ жите́йскихъ, прихожду́ съ вѣ́рою и, я́ко Манассíя, въ покая́ніи вопію́ Ти, Христе́: Го́спода по́йте, дѣла́, и превозноси́те Его́ во вѣ́ки.

Моли́твы, преблаже́нне, и моле́нія твори́ прилѣ́жно къ Бо́гу при́сно за рабы́ твоя́, въ печа́лехъ засту́пника бо и побо́рника тя́ иму́ще, спаса́емся отъ бѣ́дъ, Го́спода пою́ще и превознося́ще во вся́ вѣ́ки. [Два́жды.]

Вооружа́ются на лю́ди твоя́ смире́нныя, святи́телю пречестны́й о́тче Даніи́ле, сы́нове ага́рянстіи; сокруши́ и́хъ неви́димою си́лою моли́твъ твои́хъ ко Влады́цѣ и Богоро́дицѣ на́съ ра́ди, Го́спода пою́щихъ и превознося́щихъ во вся́ вѣ́ки.

Окорми́ моли́твою твое́ю па́ству сію́ многочеловѣ́чную твою́ и уста́ви бу́рю вѣтро́въ проти́вныхъ, чу́вственныхъ и мы́сленныхъ, моли́твами твои́ми, изба́ви же вся́кихъ искуше́ній и смуще́ній и да́же до конца́ неврежде́нну сохрани́.

Неизрече́нное твое́ чадолю́біе, о́тче, превосходя́щее оте́ческую любо́вь, посѣща́етъ на́съ всегда́ твои́ми моли́твами, испроша́я на́мъ спасе́ніе и подава́я на́мъ съ ти́хостію, Даніи́ле, ра́доватися.

Возду́хъ у́бо освяти́ся благово́ніемъ моще́й твои́хъ, Даніи́ле, прему́дре Христо́въ святи́телю, Це́рковь же, веселя́щися, вопіе́тъ: благослове́нъ Бо́гъ оте́цъ на́шихъ.

Богоро́диченъ: Звѣзда́ возсія́ — Христо́съ отъ Іа́кова, и волсви́ стека́ются во гра́дъ Виѳлее́мъ пѣ́ти, че́ствовати и поклони́тися Ему́, рожде́нному изъ ложе́снъ Чи́стыя Богоро́дицы.

Пѣ́снь 9.

Ирмо́съ: Живопріе́мный исто́чникъ приснотеку́щій, свѣтоно́сный свѣти́льникъ благода́ти, хра́мъ одушевле́нный, сѣ́нь пречи́стую, небесе́ и земли́ простра́ннѣйшую, Богоро́дицу, вѣ́рніи, велича́емъ.

Яко блудни́ца, и разбо́йникъ, и мыта́рь вопію́ Ти отъ се́рдца, Христе́: согрѣши́хъ, прости́ мнѣ́, Влады́ко, мно́гая моя́ согрѣше́нія и изба́ви мя́ отъ вся́каго гнѣ́ва, Твоего́ святи́теля моли́твами, я́ко да Тя́ непреста́нно велича́ю.

Пріиди́те, собери́теся, вси́ се́рби, ко блаже́ннаго святи́теля Даніи́ла гро́бу и со слеза́ми возопíйте къ Бо́гу: изба́ви, Го́споди, отъ бѣ́дъ лю́ди Твоя́, и сохрани́ кня́зя на́шего [и́мярекъ] здра́ва, покори́ же десни́цѣ его́ вся́ навѣ́тующія ему́, да Тя́ велича́емъ во вѣ́ки.

Вельми́ ра́дуется о тебѣ́, пречестны́й о́тче, святи́телю Даніи́ле, ро́дъ тво́й, помо́щника и засту́пника тя́ имѣ́я, и ны́нѣ, влады́ко, не отходи́ ду́хомъ отъ на́съ, моли́тву творя́ за ны́ ко Го́споду Бо́гу и Пресвятѣ́й Богоро́дицѣ, я́ко да изба́витъ на́съ отъ наси́лія безбо́жныхъ ага́ряновъ, враго́въ на́шихъ, да тя́ всегда́ велича́емъ.

Сла́ву твою́ воспѣ́ти по досто́инству невозмо́жно, чудеса́ бо премно́га и исцѣле́нія оби́льно подае́ши съ те́плою вѣ́рою приходя́щимъ къ тебѣ́, Даніи́ле святи́телю, похвало́ земли́ на́шея.

Положи́ тебе́ Це́ркве Своея́ основа́ніе Христо́съ и столпа́, крѣ́пка и незы́блема во вѣ́къ, соблюда́юща оби́тель твою́ до конца́ отъ враго́въ. [Два́жды.]

Святи́теліе у́бо, ца́ріе и кня́зи, сано́вницы и вси́ лю́діе, му́жіе и же́ны, ста́рцы съ младе́нцами, и вся́къ во́зрастъ, и вся́кое досто́инство, святи́теля на́шего па́мять свѣ́тло да пра́зднуимъ.

Богоро́диченъ: Украси́ся, Виѳлее́ме, гото́вися, Евфра́фо: безъ ма́тере бо отъ Отца́ и безъ отца́ Ма́терію чревоно́сится и ражда́ется, спаса́я на́съ.

Свѣти́ленъ предпра́зднства:

Предпра́зднственныя, вѣ́рніи, Рождества́ пѣ́сни, пріиди́те, принесе́мъ вси́: гряде́тъ уже́ Христо́съ въ Виѳлее́мъ роди́тися, спасти́ вселе́нную, я́ко еди́нъ Человѣколю́бецъ.

Сла́ва, свято́му:

Ду́хъ Святы́й пома́за тя́, святи́телю Даніи́ле блаже́нне, Христо́ву па́ству пасти́ на па́житѣхъ спаси́тельныхъ. Тѣ́мъ и потща́лся еси́ наставля́ти лю́ди пра́выми стезя́ми, того́ ра́ди ны́нѣ сугу́быя вѣнцы́ отъ Вѣнцеда́вца прія́лъ еси́.

И ны́нѣ, предпра́зднства:

Гото́вися, Виѳлее́ме, украси́ до́мы твоя́, къ тебѣ́ бо гряде́тъ Дѣ́ва, Младе́нца нося́щи Христа́, Отцу́ Собезнача́льнаго: пріи́де бо, да спасе́тъ ро́дъ человѣ́ческій.

На хвали́техъ стихи́ры предпра́зднству 3 и свято́му 3, гла́съ 8:

Что́ тя́ нарече́мъ, святи́телю? Ангела, я́ко безпло́тенъ на земли́ пожи́лъ еси́? Апо́стола ли, я́ко благовѣ́рію научи́лъ еси́ Се́рбскую зе́млю? Му́ченика ли, я́ко Христа́ ра́ди подвиза́лся еси́ до сме́рти, обраща́я лю́ди отъ тмы́ нече́стія и приводя́ и́хъ на па́жить богоразу́мія? Моли́ спасти́ся душа́мъ на́шимъ.

Что́ тя́ имену́емъ, богоблаже́нне Даніи́ле? Рѣку́, духо́вныхъ во́дъ наполня́ему и проходя́щу се́рбскія концы́, жа́ждущая сердца́ напая́ющу твои́мъ уче́ніемъ? Ча́шу, Боже́ственнаго Ду́ха наполня́ему? Свѣщу́, Це́рковь озаря́ющую? Свѣти́льника, я́ко па́ству свою́ просвѣща́еши? Мно́га ти́ имена́ и бо́льшая дарова́нія. Моли́ спасти́ся душа́мъ на́шимъ.

Святи́телю Христо́въ, боже́ственныхъ преда́ній учи́телю, церко́вное [украше́ніе], тебе́, я́ко и́стиннаго па́стыря, Христо́съ показа́лъ е́сть новоизбра́нному Своему́ слове́сному ста́ду, се́рбскимъ лю́демъ, и́хже и отъ собла́зновъ спа́слъ еси́ и укрѣпи́лъ еси́ и́хъ бы́ти въ Правосла́віи, тѣ́мже ны́нѣ мо́лимъ тя́, Даніи́ле досточу́дне: моли́ся Бо́гу Спа́су о и́же вѣ́рою пра́зднующихъ пречестну́ю па́мять твою́.

Сла́ва, гла́съ 6:

Се прибли́жися весе́лое торжество́ и пресвѣ́тлая па́мять богоно́снаго отца́. Ра́дуйся и красу́йся, патріархіе Се́рбская, весели́ся, Пе́кская митропо́ліе, глаго́лющи: ра́дуйся, Це́ркве Се́рбскія храни́телю; ра́дуйся, царе́й Се́рбскихъ вѣнча́телю; ра́дуйся, пома́завый царя́ Душа́на на ца́рство; ра́дуйся, ро́ду се́рбскому честны́й наста́вниче и сто́лпе неподви́жимый; ра́дуйся, Це́рквамъ вели́кое пра́вило; ра́дуйся, сопресто́льниче престо́ла Се́рбскаго; ра́дуйся, учи́телю царе́й благочести́выхъ; ра́дуйся, свѣти́льниче всесвѣ́тлый, просвѣща́ющь Се́рбскія концы́ уче́ньми свои́ми; ра́дуйся, скорбя́щихъ боже́ственное утѣше́ніе и оби́димыхъ те́плый побо́рниче. Тѣ́мъ непреста́й моля́ся Христу́ Бо́гу и Пресвятѣ́й Богоро́дице спасти́ся душа́мъ на́шимъ.

И ны́нѣ, предпра́зднству, гла́съ 6:

Приближа́ется Христо́съ, Виѳлее́ме, предугото́вися, уже́ спасе́ніе язы́ковъ озаря́етъ, благоукраси́ я́сли, па́стыри собери́, призови́ волхвы́ отъ Перси́ды. Во́инства безпло́тныхъ умо́въ, воззови́те: Ца́рь небе́съ на зе́млю прихо́дитъ.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на предпра́зднству и свято́му. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́емъ, зача́ло 318 отъ полу́. Аллилу́ія, [гла́съ 2]: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. [Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́.] Ева́нгеліе Матѳе́я, зача́ло 11. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Кни́га Се́рблякъ, содержа́щая въ себѣ́ богослуже́бная моле́бная пра́вила святы́мъ се́рбскаго ро́да. — Бѣ́лградъ, 1861. — Л. 173 – 178 об.

/ Къ оглавленію раздѣла /


Наверхъ / Къ титульной страницѣ

0