Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 14 декабря 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 19-й де́нь.
Свята́го му́ченика Вонифа́тія.

Аллилу́ія или́ тропа́рь.

[ВЕЧЕРЪ,]
На Го́споди воззва́хъ: стихи́ры му́ченика, гла́съ 4. Подо́бенъ: Да́лъ еси́ зна́меніе.

Благозва́нія возжела́лъ еси́,* нарече́ннаго му́ченикомъ,* страстоте́рпче многострада́льне,* и болѣ́зни претерпѣ́лъ еси́* де́рзостнымъ ра́зумомъ,* къ неболѣ́зненному поко́ю преложи́тися ожида́я* и по́чести ища́ прія́ти, всеблаже́нне, небе́сныя,* и ра́йское селе́ніе,* и Свѣ́тъ невече́рній и жи́знь вѣ́чную.

Ногте́й терза́нія,* и лю́тая боде́нія,* и о́лова врѣ́ніе,* главы́ отъя́тіе* и свирѣ́пѣйшія претерпѣ́лъ еси́ болѣ́зни* и приложи́лся еси́ ли́ку страстоте́рпецъ,* ра́дуяся, многострада́льне.* Тѣ́мже лѣ́тнее твое́* соверша́емъ торжество́, страда́льче Вонифа́тіе,* а́нгеломъ собесѣ́дниче.

Раба́ тя предпосла́вши,* боже́ственнаго влады́ку воспрія́* Аглаи́да, Вонифа́тіе,* страстьми́ облада́вша,* ца́рствовавша надъ мучи́тели,* низло́жша враги́* и побѣ́ды вѣнце́мъ одѣ́янна.* Тѣ́мже хра́мъ тебѣ́ святы́й и прекра́сенъ созда́вши,* въ не́мже положи́ла е́сть, свяще́нно восхваля́ющи тя́.

Ины стихи́ры Пресвятѣ́й Богоро́дицѣ, гла́съ и подо́бенъ то́йже:

Одожди́ ми, Влады́чице,* Твоея́ ми́лости бе́здну,* и опа́льшееся зно́емъ страсте́й се́рдце мое́,* я́ко ми́лостива, напо́й, Отрокови́це,* и умиле́нія ка́пли точи́ти* непреста́нно сотвори́, молю́ся,* и́миже утѣше́нія сподо́блюся, Чи́стая,* е́же получи́ти и́мутъ* и́же и́скренно пла́кавшіися.

Де́монскими коле́блема прило́ги* и въ ро́въ поги́бели вве́ржена, уще́дри, Влады́чице,* и утверди́ мя на ка́мени добродѣ́телей,* и, совѣ́ты враго́въ разори́вши,* сподо́би мя́ твори́ти повелѣ́нія* Сы́на Твоего́ и Бо́га на́шего,* я́ко да получу́ оставле́ніе* въ де́нь Суда́.

Въ разбо́йники впадо́хъ* скверноубíйственныя, Всенепоро́чная,* и нетлѣ́нныя оде́жды вы́шнія свѣ́тлости,* си́хъ нахожде́ньми совлече́нъ бы́хъ,* Отрокови́це,* и отъ ни́хъ неми́лостивно уязви́хся,* и низве́рженъ бы́хъ* въ мѣ́сто озлобле́нія е́ле жи́въ,* но предвари́, и ру́ку Твою́ простри́,* и воздви́гни мя́, молю́ся.

Сла́ва, и ны́нѣ, гла́съ и подо́бенъ то́йже:

На одрѣ́ низлежу́ уны́нія, Всенепоро́чная,* и лѣ́ностно прохожду́ житіе́,* и ужаса́юся конца́ моего́ вре́мене, Богоро́дице,* да не, я́коже ле́въ, неща́дно расто́ргнетъ* смире́нную мою́ ду́шу* змíй вселука́вый.* Тѣ́мже Твое́ю бла́гостію,* пре́жде конца́ предвари́вши,* къ покая́нію мя́ воздви́гни.

Крестобогоро́диченъ. Подо́бенъ: Яко до́бля.

Распина́ема Христа́ Человѣколю́бца ви́дящи, Пречи́стая,* и ре́бра ископова́ема копіе́мъ,* пла́чущи, вопія́ше: что́ сіе́, Сы́не Мо́й?* что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ,* и тщи́шися безча́дствовати Мя́, Вселюбе́знѣйшій?* Удивля́юся, Благоутро́бне,* Твоему́ во́льному распя́тію.


НА УТРЕНИ,
Оба кано́на окто́иха и свята́го на 4, его́же краегране́сіе: Вѣ́рнѣ тя́ пою́, му́чениче пресвѣ́тле. Творе́ніе Іо́сифово. Гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Усе́рднымъ по́мысломъ подвиго́мъ ревнова́въ до́блихъ страда́льцевъ, пострада́лъ еси́ крѣ́пко и змíя умертви́лъ еси́ страда́ніи твои́ми живоно́сными, страда́льче Вонифа́тіе, святы́хъ а́нгеловъ собесѣ́дниче.

Ви́дѣвъ на земли́ вра́жію ле́сть, излія́нну лю́тѣ, до́блій страда́льче, ду́шу распали́въ жела́ніемъ боже́ственнѣйшимъ, вше́лъ еси́ въ три́знище небоя́зненнымъ, треблаже́нне, мудрова́ніемъ.

Му́дростію Боже́ственною просвѣща́емый, блаже́нне, нему́дрыя враги́ объюро́дилъ еси́, Христа́ возвѣща́я, дебельство́мъ пло́ти уподо́бльшася, и́мже яви́тися восхотѣ́, Вонифа́тіе, му́чениче многострада́льне.

Богоро́диченъ: Го́ру Бо́жію, ю́же прови́дѣ Даніи́лъ, ски́нію мы́сленную, Марíю Чи́стую, сла́вы свяще́ніе, трапе́зу, Боже́ственный хлѣ́бъ вмѣ́щшую, вси́ вѣ́рніи, единому́дренно воспои́мъ.

Пѣ́снь 3.

Ирмо́съ: Яко непло́ды роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Якоже возжелѣ́лъ еси́, сла́вне, свобо́ду вы́шнюю, отъ и́га рабо́ты избавля́ешися, страсте́мъ честны́мъ поревнова́въ, сла́вне, Иже за милосе́рдіе раба́ Бы́вшаго.

Плотски́хъ вы́шшій я́влься мудрова́ній измѣне́ніемъ боже́ственнымъ, внеза́пу вся́къ прило́гъ лю́тыхъ претерпѣ́лъ еси́, ра́дуяся, му́чениче Вонифа́тіе.

Тебе́ сама́го отве́рглся еси́, и къ подвиго́мъ и боре́ніемъ врага́ изше́лъ еси́, Креста́ ору́жіемъ укрѣпи́вся, и, побѣди́тель бы́въ, просла́вился еси́, му́чениче Вонифа́тіе.

Богоро́диченъ: Себе́ Сама́го истощи́, Оте́ческихъ не истощи́въ во чре́вѣ Твое́мъ нѣ́дръ, пресу́щный Бо́гъ и Тво́й Сы́нъ бы́сть, Всенепоро́чная, спаса́я человѣ́чество.

Сѣда́ленъ, гла́съ 4. Подо́бенъ: Вознесы́йся.

Къ сосло́вію по́сланъ му́чениковъ, му́ченикъ бы́лъ еси́ и́стиненъ, пострада́въ за Христа́ крѣпча́йше, всехва́льне, бре́мя же, блаже́нне, отда́лся еси́ вѣ́рою посла́вшей тя́, Вонифа́тіе блаже́нне. Но прилѣ́жно моли́ прія́ти всѣ́мъ согрѣше́ній соверше́нное проще́ніе.

Сла́ва, и ны́нѣ, богоро́диченъ:

Грѣхолюби́въ сы́й, молю́ Тя, безгрѣ́шнаго Бо́га ро́ждшую, взе́млющаго грѣхи́ мíра, Пречи́стая, многогрѣ́шную ду́шу мою́ уще́дрити и грѣхи́ моя́ мно́гія очи́стити: грѣ́шнымъ бо Ты́ еси́ очище́ніе, и спасе́ніе вѣ́рнымъ, и заступле́ніе.

Крестобогоро́диченъ:

Изъ Безнача́льнаго Отца́ рожде́ннаго, напослѣ́докъ Тя́ пло́тію Ро́ждшая, на Крестѣ́ ви́сяща зря́щи, Христе́, увы́ Мнѣ́, Любе́знѣйшій Іису́се, вопія́ше, ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? Пою́ Тя, Долготерпѣли́ве.

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Ублажа́я стра́ждущихъ терпѣ́ніе, подо́біемъ, му́чениче, честны́хъ страда́ній си́мъ уподо́бился еси́, богому́дре пребога́те.

Иды́й вѣ́рою къ му́чениковъ боже́ственному сосло́вію, блаже́нне, тебе́ сама́го жела́ющи бре́мя досточу́дное, богому́дре, отда́лъ еси́.

Очище́нъ, я́коже зла́то, му́чениче, я́звъ горни́ломъ, чистѣ́йшій яви́лся еси́, нося́ Зижди́теля страсте́й изображе́ніе.

Богоро́диченъ: Дѣ́вство по Рождествѣ́ запеча́тано познава́ющи, Отрокови́це, несказа́нно рожде́ннаго Сло́ва изъ боку́ Твое́ю вѣ́рно велича́ла еси́.

Пѣ́снь 5.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Яко свѣтоза́рная возше́лъ еси́ звѣзда́ отъ за́падъ, и заше́лъ еси́, му́чениче, страда́ньми терпѣли́вно, а́біе къ за́падомъ возсія́лъ еси́, озаря́я концы́.

Му́ченически подвиза́лся еси́, ногте́й терза́нія, о́стрыми, му́чениче, тростьми́ сбода́емь, и лука́ваго жа́ла вѣ́рно притупля́я благода́тію.

Вра́жія изнемого́ша, богому́дре, на тя́ кова́рствія, и́бо къ Бо́гу воззрѣ́ніемъ неукло́ннымъ плотскíя ра́ны, я́коже безпло́тенъ, терпѣ́лъ еси́.

Богоро́диченъ: Скве́рны вся́кія омы́й, Дѣ́во, ду́шу мою́, вопію́ Ти, и спаси́ мя, Чи́стая, Яже и́стиннаго Бо́га Спа́са на земли́ вопло́щшая.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Біе́мый, ра́нами плотски́ми уязви́лъ еси́ безбо́жныя, неисцѣ́льно неду́гующія невѣ́дѣніемъ, и боля́щимъ яви́лся еси́ вра́чь, страда́льче Вонифа́тіе.

Возвыша́емь къ Бо́гу, блаже́нне, прило́гомъ подвиго́въ, враги́ неви́димыя разрази́лъ еси́ и низринове́ннымъ помо́щникъ, страстоте́рпче, бы́лъ еси́.

Влачи́мь по земли́, я́коже ка́мень многоцѣ́ненъ, страда́льче, пре́лести низложи́лъ еси́ утвержде́ніе, вѣ́рныхъ же сердца́ наипа́че вѣ́рою утверди́лъ еси́.

Богоро́диченъ: Купина́ Тя́ прообража́ше, Всенепоро́чная, пе́рвѣе, горя́щи и ника́коже опаля́ема, Пречи́стая, и́бо, я́коже она́, не опали́лася еси́, Бо́га вопло́щши.

Конда́къ, гла́съ 4. Подо́бенъ: Яви́лся еси́.

Свяще́ніе непоро́чное самово́льнѣ Тебе́ приве́лъ еси́, Иже отъ Дѣ́вы тебе́ ра́ди роди́тися хотя́щему, свя́те вѣнчено́сче, прему́дре Вонифа́тіе.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Колѣ́нъ не преклони́въ истука́ннымъ, во искуше́ніе ве́рглся еси́ велича́йшее, и́стинно, му́чениче, въ пе́щь, въ не́йже ороша́емый, благода́рствовалъ еси́ Христу́ во вѣ́ки.

Разори́ти крѣ́пость твоего́ исповѣ́данія тща́ся, льстивому́дренный во вну́тренняя твоя́ клоко́чущее о́лово неми́лостивно влива́етъ, но я́вѣ посрами́ся.

Посѣ́ченъ бы́въ усе́рдно въ честну́ю твою́ главу́, врага́ льсти́ваго многоко́зненную главу́ отсѣ́клъ еси́ твоего́ му́жества мече́мъ, му́чениче Христо́въ богому́дре.

Богоро́диченъ: Да гла́сы подоба́ющими пѣсносло́влю Тя́, Отрокови́це, страсте́й мя́ изба́ви моли́твами Твои́ми, бѣ́дъ же и скорбе́й и лука́выхъ человѣ́къ, озло́бити мя́ и́щущихъ.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Поле́зно твое́ дѣ́лая спасе́ніе Христо́съ, Вонифа́тіе, взыска́юща моще́й добропобѣ́дныхъ му́чениковъ, тя́ укрѣпля́етъ, е́же вѣ́рно взыска́лъ еси́ са́мъ бы́ти.

Блаже́ннѣй госпожи́ блаже́нно сокро́вище пода́лся еси́, блаже́нне, и́мже обогати́вшися, поя́ше весе́лымъ се́рдцемъ: вся́ дѣла́, благослови́те, по́йте Го́спода.

Со тща́ніемъ сла́вная жена́, воздви́гши хра́мъ свяще́ннѣйшій, тя́ въ не́мъ положи́, су́щій Боже́ственныя Тро́ицы хра́мъ, страстоте́рпче Христо́въ Вонифа́тіе.

Умертви́вся за любо́вь Зижди́теля, умерщвля́ющаго стра́сти тлетво́рныя, животворя́й моли́твою твое́ю я́сно вопію́щія: вся́ дѣла́, благослови́те, по́йте Го́спода.

Богоро́диченъ: На Тя́, Чи́стую, Пребоже́ственный, низше́дъ, я́коже вѣ́сть, воплоти́ся и человѣ́ки обожи́, пѣснопою́щія, Дѣ́во: вся́ дѣла́, благослови́те, по́йте Го́спода.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Ви́дѣвши тя́, бре́мя свяще́нное, ра́довашеся, вопію́щи, приснопо́мнимая: раба́ посла́хъ тя́, блаже́нне, господи́на и́стинна пріе́млю, рабо́ты мя́ зо́лъ избавля́юща твои́ми благопрія́тными мольба́ми.

Яко кри́нъ, во удо́ліихъ мы́сленныхъ процвѣ́лъ еси́ му́чениковъ, Вонифа́тіе, я́коже фи́никсъ, возвы́сился еси́, я́ко ке́дръ, позна́лся еси́ мѵродыха́ненъ, яви́лся еси́ избра́нный, я́ко кипари́съ, благово́нствуя ду́ши на́ша.

Дне́сь па́мять твоя́ на́мъ возсія́, страстоте́рпче, я́коже со́лнце, сія́ніемъ Боже́ственныхъ дарова́ній, просвѣща́ющи ду́ши пою́щихъ тя́, страсте́й же мглу́ отгоня́ющи, му́чениче богому́дре всеблаже́нне.

Яко со́лнце отъ за́падъ, возсія́лъ еси́ и восто́чнаго гра́да дости́глъ еси́, идѣ́же пострада́въ и сме́ртію заше́дъ, къ жи́зни восте́клъ еси́ и Ри́мъ свѣ́тлый дости́глъ еси́, сего́ огражда́я мольба́ми твои́ми.

Богоро́диченъ: Свѣ́томъ мя́ озари́ Твои́мъ, Всенепоро́чная, во тмѣ́ содержи́маго грѣхо́внѣй, Богоро́дице, и пода́ждь во дне́ ходи́ти Боже́ственныхъ повелѣ́ній, Богоневѣ́сто, я́ко да пою́ Тя, Всепѣ́тую.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 161 об. – 165.

/ Къ оглавленію раздѣла /


Наверхъ / Къ титульной страницѣ

0