Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Недѣ́ля предъ Рождество́мъ Христо́вымъ, святы́хъ оте́цъ.

На ма́лѣй вече́рни: стихи́ры воскре́сны и Богоро́дицы по обы́чаю.

НА ВЕЛИЦѢЙ ВЕЧЕРНИ,
По предначина́тельномъ псалмѣ́ пое́мъ Блаже́нъ му́жъ.., каѳи́сму всю́.
На Го́споди воззва́хъ: стихи́ры воскре́сны 3 и восто́чны [Анато́ліевы3, и отце́въ 4.
Аще же вну́трь 20-го числа́: пое́мъ стихи́ры воскре́сны 3, и восто́ченъ [Анато́ліевъ1, и предпра́зднства три́, и святы́хъ отце́въ три́.
Стихи́ры предпра́зднства, гла́съ 6. Подо́бенъ: Все отло́жше.

Незаходи́мое Со́лнце* изъ дѣ́вственныхъ ложе́снъ* возсія́ти и́детъ,* просвѣти́ти всю́ подсо́лнечную,* чи́стыми очесы́* и чи́стыми дѣя́ньми* срѣ́сти Сего́ потщи́мся* и подъя́ти ны́нѣ угото́вимся ду́хомъ* гряду́щаго во Своя́ стра́ннымъ рождество́мъ, я́коже благоволи́,* я́ко да устра́ншіяся ны́ еде́мскаго житія́* возведе́тъ, я́ко Благоутро́бенъ,* въ Виѳлее́мѣ ражда́ется.

На плеща́хъ носи́мый херуви́мскихъ,* Бо́гъ Сло́во, пло́ти по ѵпоста́си соедини́вся,* во всенепоро́чное чре́во всели́ся, и бы́сть Человѣ́къ,* и на зе́млю гряде́тъ отъ Іу́дова пле́мене роди́тися,* верте́пъ свя́тъ Всецарю́ благоукраси́ся,* я́ко велича́йшая пала́та,* я́сли же, я́ко престо́лъ огнезра́ченъ,* въ ни́хже я́ко Младе́нца* Дѣ́ва Марíя полага́етъ,* во обновле́ніе созда́нія* неопредѣле́ннаго.

Въ безслове́сныхъ я́слѣхъ Тя́ полага́етъ Дѣ́ва,* Бо́жіе Сло́во Безнача́льное,* нача́ло пріе́мшее па́че ума́,* мое́ бо разрѣши́ти безслове́сіе гряде́ши,* е́же подъя́хъ за́вистію зміи́ною,* пелена́ми же пови́тися,* я́ко да расто́ргнеши ру́бы и плени́цы прегрѣше́ній мои́хъ,* еди́не Бла́же и Человѣколю́бче.* Тѣ́мже Тя́ сла́влю,* пою́ и покланя́юся прера́достно во пло́ти прише́ствію Твоему́,* и́мже свободи́хся.

Стихи́ры святы́хъ отце́въ, подо́бенъ то́йже:

Яви́ся мíра конце́мъ пра́отцевъ па́мять,* свѣ́та и́стинно испо́лнена* и заря́ми благода́ти сія́ющи:* Христо́съ бо, Со́лнце свѣ́тлое,* свы́ше просія́въ издале́ча,* звѣ́здъ собо́ръ веде́тъ,* съ Ни́мъ возсія́вшій,* и Рождество́ Богочеловѣ́чное явля́ется вну́трь Виѳлее́ма бы́ти.* Вси́, у́бо вѣ́рою Сего́ Рождество́* благоче́стно пле́щуще, лику́имъ* хвалу́ предпра́зднственную. [Два́жды.]

Сла́вою украша́ется* Боже́ственнаго прича́стія* Ада́мъ, ра́дуяся дне́сь,* я́ко основа́ніе и утвержде́ніе пра́отцевъ му́дрыхъ,* совзыгра́етъ же Авель, и Ено́хъ весели́тся,* и лику́етъ Си́ѳъ и Но́е ку́пно;* съ патріа́рхи же пое́тъ Авраа́мъ всехва́льный,* и рожде́ніе безъ отца́ ны́нѣ* Мелхиседе́къ ви́дитъ свы́ше.* Тѣ́мже боже́ственную па́мять Христо́выхъ пра́отцевъ* и мы́ соверша́юще, мо́лимъ* спасти́ся душа́мъ на́шимъ.

Облиста́ ве́село* и́же въ пещи́ дѣте́й богому́дрыхъ собо́ръ* и Христо́во Рождество́ проповѣ́дуетъ на земли́;* я́ко бо честна́я роса́ низше́дъ, Госпо́дь* Ро́ждшую спаса́етъ неопа́льну,* соблюда́етъ непоро́чну* и обогаща́етъ Боже́ственными дарова́ніи.* Тѣ́мже и богопрія́тный* ра́дуется Даніи́лъ, весел́ся,* Ка́мень бо изъ Горы́ несѣ́ченъ прови́дя я́вѣ,* со дерзнове́ніемъ мо́лится* ны́нѣ о душа́хъ на́шихъ.

Сла́ва, отце́въ, гла́съ 6:

Даніи́лъ, му́жъ жела́ній, ка́мень, безъ руки́ отсѣ́ченъ, ви́дѣвъ Тя́, Го́споди, Младе́нца, безъ сѣ́мене рожде́на, пронарече́ Тя́, изъ Дѣ́вы воплоще́нна Сло́ва, непремѣ́ннаго Бо́га и Спа́са ду́шъ на́шихъ.

И ны́нѣ, предпра́зднства, гла́съ то́йже:

Византíево: Верте́пе, благоукраси́ся, Агница бо гряде́тъ, чревонося́щи Христа́, я́сли же, подъими́те сло́вомъ разрѣши́вшаго отъ безслове́снаго дѣя́нія на́съ, земноро́дныхъ. Па́стыріе, свиря́юще, свидѣ́тельствуйте чудеси́ стра́шному, и волсви́ отъ Перси́ды, зла́то, и лива́нъ, и сми́рну Царю́ принеси́те, я́ко яви́ся Госпо́дь изъ Дѣ́вы Ма́тере. Ему́же и, прини́кше, ра́бски Ма́ти поклони́ся и привѣща́ше къ Держи́мому на объя́тіихъ Ея́: ка́ко всѣ́ялся еси́ Мнѣ́? Или́ ка́ко прозя́блъ еси́ во Мнѣ́, Изба́вителю мо́й и Бо́же?

Аще внѣ́ 20-го числа́: И ны́нѣ, богоро́диченъ настоя́щаго гла́са.

Вхо́дъ. Проки́менъ дне́. Чте́нія три́.

Бытія́ чте́ніе. [Глава́ 14.]

Слы́шавъ Авра́мъ, я́ко плѣне́нъ бы́сть Ло́тъ, брата́ничь его́, сочте́ свои́хъ си́ домоча́децъ, три́ста и осмьна́десять, и погна́ во слѣ́дъ и́хъ да́же до Да́на. И нападе́ на ня́ но́щію са́мъ и о́троцы его́ съ ни́мъ; и порази́ и́хъ, и гони́ и́хъ до Хова́ла, е́же е́сть ошу́юю Дама́ска. И возврати́ вся́каго коня́ содо́мскаго, и Ло́та, брата́нича своего́, возврати́, и вся имѣ́нія его́, и жены́, и лю́ди. Изы́де же ца́рь Содо́мскій въ срѣ́теніе ему́, повнегда́ возврати́тися ему́ отъ сѣ́ча Ходоллогомо́рскаго, и съ царьми́, и́же съ ни́мъ, во удо́ль Сави́ну; сіе́ же бя́ше по́ле царе́во. И Мелхиседе́къ, ца́рь Сали́мскій, изнесе́ хлѣ́бы и вино́, бя́ше же свяще́нникъ Бо́га Вы́шняго. И благослови́ Авра́ма, и рече́: благослове́нъ Авра́мъ Бо́гу Вы́шнему, Иже созда́ не́бо и зе́млю; и благослове́нъ Бо́гъ Вы́шній, Иже предаде́ враги́ твоя́ подъ ру́ки тебѣ́.

Втора́го зако́на чте́ніе. [Глава́ 1.]

Во дне́хъ о́нѣхъ, рече́ Моисе́й къ сыно́мъ Изра́илевымъ: ви́дите, преда́хъ предъ лице́мъ ва́шимъ зе́млю, вше́дше, наслѣ́дуйте ю́, ю́же кля́тся Госпо́дь отце́мъ ва́шимъ — Авраа́му, и Исаа́ку, и Іа́кову — да́ти и́мъ и сѣ́мени и́хъ по ни́хъ. И реко́хъ къ ва́мъ во вре́мя о́но, глаго́ля: не возмогу́ еди́нъ води́ти ва́съ. Госпо́дь Бо́гъ на́шъ умно́жилъ вы́ е́сть, и се́, есте́ дне́сь, я́ко звѣ́зды небе́сныя, мно́жествомъ. Госпо́дь Бо́гъ оте́цъ на́шихъ да приложи́тъ ва́мъ, я́ко да бу́дете ты́сящами сугу́бо, и да благослови́тъ ва́съ, я́коже глаго́ла ва́мъ. И взя́хъ отъ ва́съ му́жы му́дры, и свѣ́домы, и смы́сленны и поста́вихъ и́хъ владѣ́ти надъ ва́ми: тысященача́льники, и стонача́льники, и пятдесятонача́льники, и десятонача́льники, и письмоводи́тели судія́мъ ва́шимъ. И заповѣ́дахъ судія́мъ ва́шимъ во вре́мя о́но, глаго́ля: разслу́шайте посредѣ́ бра́тій ва́шихъ и суди́те пра́ведно посредѣ́ му́жа, и посредѣ́ бра́та его́, и посредѣ́ прише́льца его́. Да не позна́ете лица́ въ судѣ́, ма́лому и вели́кому су́диши, и не устыди́шися лица́ человѣ́ческа, я́ко су́дъ Бо́жій е́сть.

Втора́го зако́на чте́ніе. [Глава́ 10.]

Во дне́хъ о́нѣхъ, рече́ Моисе́й къ сыно́мъ Изра́илевымъ: се́ Го́спода Бо́га твоего́ не́бо, и не́бо небесе́, земля́ и вся́, ели́ка су́ть на не́й. Оба́че отцы́ ва́ша произво́ли Госпо́дь люби́ти и́хъ, и избра́ сѣ́мя и́хъ по ни́хъ, ва́съ, па́че всѣ́хъ язы́къ, въ де́нь се́й. И обрѣ́жите жестосе́рдіе ва́ше и вы́я ва́ша не ожесточи́те ктому́. Ибо Госпо́дь Бо́гъ на́шъ, Се́й Бо́гъ бого́въ и Госпо́дь господе́й; Бо́гъ Вели́кій, и Крѣ́пкій, и Стра́шный, Иже не диви́тся лицу́, ниже́ взе́млетъ да́ръ. Творя́й су́дъ прише́льцу, и си́ру, и вдови́цѣ, и лю́битъ прише́льца, да́ти ему́ хлѣ́бъ и ри́зу. И возлюби́те прише́льца, прише́льцы бо бѣ́сте въ земли́ Еги́петстѣй. Го́спода Бо́га твоего́ да убои́шися, и Тому́ еди́ному послу́жиши, и къ Нему́ прилѣпи́шися, и и́менемъ Его́ клене́шися. То́й хвала́ твоя́, и То́й Бо́гъ тво́й, Иже сотвори́лъ ти́ е́сть вели́кая и сла́вная сія́, я́же ви́дѣстѣ о́чи твои́.

На литíи стихи́ра хра́ма и отце́въ, гла́съ 1:

Луча́ми облиста́вшеся богоглаго́ланія, великоимени́тіи проро́цы при́сно ублажа́ются и, раче́нія Ду́ха плодонося́ще, неизрече́нное Рождество́ Христа́ Бо́га всѣ́мъ проповѣ́даша, зако́нно же кончи́ну прія́ша, пожи́вше жи́знь пречу́дную.

Сла́ва, гла́съ 3:

Ге́рманово: Пра́отцевъ собо́ръ, празднолю́бцы, пріиди́те, псало́мски да восхва́лимъ: Ада́ма пра́отца, Ено́ха, Но́я, Мелхиседе́ка, Авраа́ма, Исаа́ка и Іа́кова; по зако́нѣ Моисе́я, и Ааро́на, и Іису́са, Самуи́ла и Дави́да; съ ни́миже Иса́ію, Іеремíю, Іезекíиля, и Даніи́ла, и двана́десять, вку́пѣ Илію́, Елиссе́я и всѣ́хъ; Заха́рію, и Крести́теля, и проповѣ́давшія Христа́ — Жи́знь и Воскресе́ніе ро́да на́шего.

И ны́нѣ, предпра́зднства, гла́съ то́йже:

Благоукраси́ся, Виѳлее́ме, отве́рзеся бо Еде́мъ, гото́вися, Евфра́ѳо, обновля́ется бо Ада́мъ и Ева съ ни́мъ: кля́тва бо разори́ся, спасе́ніе мíру процвѣте́, и ду́ши пра́ведныхъ украша́ются, я́ко да́ръ дароно́сія, вмѣ́сто мѵ́ра пѣ́ніе принося́ще, спасе́ніе душе́вное и нетлѣ́ніе пріе́млюще. Се́ бо въ я́слехъ Возлежа́й предповелѣва́етъ пѣ́ніе духо́вное соверша́ти вопію́щимъ непреста́нно: Го́споди, сла́ва Тебѣ́.

Аще внѣ́ 20-го Деке́мврія: И ны́нѣ, богоро́диченъ:

Безъ сѣ́мене отъ Боже́ственнаго Ду́ха [во́лею же Отчею зачала́ еси́ Сы́на Бо́жія, отъ Отца́ безъ ма́тере пре́жде вѣ́къ су́ща, на́съ же ра́ди, изъ Тебе́ безъ отца́ бы́вша, пло́тію родила́ еси́ и Младе́нца млеко́мъ пита́ла еси́. Тѣ́мже не преста́й моли́ти изба́витися отъ бѣ́дъ душа́мъ на́шимъ].

На стихо́внѣ стихи́ра воскре́сна, и по алфави́ту.

Аще же въ 24-й де́нь: Предпра́зднства, самоподо́бенъ гла́съ 2:

До́ме Евфра́ѳовъ,* гра́де святы́й,* проро́ковъ сла́во,* украси́ до́мъ,* въ не́мже Боже́ственный ражда́ется.

Сти́хъ: Бо́гъ отъ ю́га пріи́детъ, и Святы́й изъ горы́ пріосѣне́нныя ча́щи.

Самогла́сны: Виѳлее́ме, земле́ Іу́дова, су́щему по пло́ти жи́тельство свѣ́тло, угото́ви боже́ственный верте́пъ, въ не́мже Бо́гъ пло́тію ражда́ется изъ Неискусому́жныя Святы́я Дѣ́вы, во е́же спасти́ ро́дъ на́шъ.

Сти́хъ: Го́споди, услы́шахъ слу́хъ Тво́й и убоя́хся, Го́споди, разумѣ́хъ дѣла́ Твоя́ и ужасо́хся.

Пріиди́те вси́, Христо́во Рождество́ вѣ́рно предпра́зднуимъ и мы́сленнѣ пѣ́ніе, я́ко звѣзду́, предлага́емъ, волхво́въ славосло́вія съ пасты́рьми возопіе́мъ: пріи́де Спасе́ніе человѣ́комъ изъ Дѣ́вственныхъ ложе́снъ, вѣ́рныя призыва́я.

Сла́ва, гла́съ то́йже, самогла́сенъ.

Кипріа́ново: Ра́дуйтеся, проро́цы честнíи, и́же зако́нъ Госпо́день до́брѣ учини́вше и вѣ́рою я́вльшеся непобѣди́міи столпи́ и непрекло́нніи; вы́ бо и хода́таи яви́стеся Но́ваго Завѣ́та Христо́ва и, преста́вльшеся къ небеси́, Того́ моли́те умири́ти мíръ и спасти́ ду́ши на́ша.

И ны́нѣ, предпра́зднства, гла́съ то́йже:

Кипріа́ново: Се́ вре́мя прибли́жися спасе́нія на́шего, гото́вися, верте́пе, Дѣ́ва приближа́ется роди́ти; Виѳлее́ме, земле́ Іу́дова, красу́йся и весели́ся, я́ко изъ тебе́ возсія́ Госпо́дь на́шъ. Услы́шите, го́ры, и хо́лми, и окре́стныя страны́ Іуде́йскія, я́ко гряде́тъ Христо́съ, да спасе́тъ, его́же созда́, человѣ́ка, я́ко Человѣколю́бецъ.

Аще внѣ́ 20-го: И ны́нѣ, богоро́диченъ:

О, чудесе́ но́ваго, [всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша].

На благослове́ніи хлѣ́бовъ: Богоро́дице Дѣ́во, ра́дуйся... [Два́жды.]
И отце́въ тропа́рь, гла́съ 2:

Ве́лія вѣ́ры исправле́нія: во исто́чницѣ пла́мене, я́ко на водѣ́ упокое́нія, святíи тріе́ о́троцы ра́довахуся, и проро́къ Даніи́лъ льво́мъ па́стырь, я́ко овца́мъ, явля́шеся. Тѣ́хъ моли́твами, Христе́ Бо́же, спаси́ ду́ши на́ша. [Еди́ножды.]

Аще же случи́тся въ 24-й де́нь: На благослове́ніи хлѣ́бовъ, тропари́: отце́въ: Ве́лія вѣ́ры.., два́жды; и предпра́зднства: Написова́шеся иногда́.., еди́ножды; и чте́ніе.


НА УТРЕНИ,
На Бо́гъ Госпо́дь: Тропа́рь воскре́сенъ, два́жды. Сла́ва, отце́въ. И ны́нѣ, богоро́диченъ или́ предпра́зднства.

И обы́чныя каѳи́смы, и сѣда́льны воскре́сны, и богоро́дичны и́хъ, и чте́ніе во Ева́нгеліи толково́мъ.

Аще же въ 24-й де́нь, пое́мъ настоя́щія сѣда́льны:

По 1-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Во отцѣ́хъ, Бо́же, предвозгласи́лъ еси́ та́инственно хотя́щее бы́ти на земли́ богоявле́ніе та́инственнѣ превѣ́чнаго Сы́на Твоего́ отъ Дѣ́вы, во Авраа́мѣ, Исаа́кѣ и Іа́ковѣ, Іу́дѣ и про́чихъ, Іессе́и, и Дави́дѣ, и проро́цѣхъ всѣ́хъ, Ду́хомъ предвозвѣща́я въ Виѳлее́мѣ Христа́ я́вльшася, су́щія въ мíрѣ вся́ взыва́юща.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 8. Подо́бенъ: Прему́дрости.

Пра́здникъ пра́зднуимъ, вѣ́рніи, отце́въ боже́ственныхъ ра́достно: Ада́ма, Авеля чту́ще, Си́ѳа, Ено́са блажа́ще, Ено́ха, Но́я, Си́ма же, Іа́феѳа воспои́мъ; Авраа́ма, пре́жде зако́на вѣ́рою просія́вша, и боже́ственнаго Исаа́ка, Іа́кова и Іу́ду, Левíю и цѣлому́дреннаго Іо́сифа восхва́лимъ и вѣ́рно возопіи́мъ: богоно́сніи пра́отцы, моли́те Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять ва́шу.

Сла́ва, и ны́нѣ, то́йже.

По непоро́чныхъ тропари́ и́хъ.
И сѣда́льны отце́въ, гла́съ 8. Подо́бенъ: Прему́дрости.

Авраа́ма, Исаа́ка же и Іа́кова восхва́лимъ вси́ пѣ́сненно, Дави́да кро́ткаго, Іису́са и двана́десять патріа́рхи вку́пѣ съ треми́ ю́ношами, угаси́вшими о́гненный пла́мень си́лою духо́вною, — ра́дуйтеся, — вопію́ще къ ни́мъ, — пре́лесть до́блественнѣ обличи́вше царя́ безу́мнаго; и Христу́ моли́теся, согрѣше́ній оставле́ніе дарова́ти, пра́зднующимъ любо́вію святу́ю па́мять ва́шу.

Сла́ва, и ны́нѣ, другíй, подо́бенъ то́йже:

Изъ нѣ́дръ Оте́ческихъ низше́лъ еси́ и несказа́ннымъ истоща́ніемъ ю́же по на́мъ нищету́ воспрія́лъ еси́, па́че естества́, Человѣколю́бче, въ верте́пъ всели́тися благоволи́лъ еси́, Го́споди, и я́ко Младе́нецъ сосцы́ пита́ешися, Зижди́тель и Госпо́дь. Тѣ́мже, звѣздо́ю наставля́еми, волсви́ да́ры Тебѣ́ прино́сятъ, я́ко Влады́цѣ тва́ри, па́стыріе и а́нгели дивля́хуся, зову́ще: сла́ва въ вы́шнихъ Бо́гу, на зе́млю гряду́щему роди́тися я́ко Человѣ́ку.

Аще же внѣ́ предпра́зднства, богоро́диченъ глаго́ли се́й:

Благода́рственное похвале́ніе до́лжнѣ, я́коже вдови́ца о́ная два́ ле́пта, приношу́ Тебѣ́, Влады́чице, о всѣ́хъ дарова́ніихъ Твои́хъ: Ты́ бо яви́лася еси́ покро́въ ку́пно и по́мощь, напа́стей и скорбе́й при́сно мя́ изыма́ющи. Тѣ́мже я́ко отъ среды́ горя́щія пе́щи изба́влься оскорбля́ющихъ мя́, отъ се́рдца взыва́ю Тебѣ́: Богоро́дице, помози́ ми, моля́щи Христа́ Бо́га, прегрѣше́ній оставле́ніе да́ти мнѣ́, Тя́ бо имѣ́ю наде́жду, ра́бъ Тво́й.

Степе́нна, и проки́менъ гла́са.

Кано́на два́, отце́въ на 8. Ирмосы́ по два́жды. Тропари́ на 6. Въ ни́хже предваря́ютъ воскре́сны тропаря́ два́, сего́ ра́ди, а́ще въ 24-й де́нь, во окто́ихѣ не пое́тся, и предпра́зднства на 6.

Кано́нъ воскре́сенъ, гла́съ 6.
Пѣ́снь 1.

Ирмо́съ: Волно́ю морско́ю Скры́вшаго дре́вле, гони́теля мучи́теля — подъ земле́ю скры́ша спасе́нныхъ о́троцы; но мы́ я́ко отрокови́цы, Го́сподеви пои́мъ, сла́вно бо просла́вися.

Стра́хомъ Тебѣ́ сме́ртная отверза́ются врата́, и сокруша́ются вереи́ вѣ́чныя: честны́мъ бо Твои́мъ схожде́ніемъ воста́ша дре́вніи мертвецы́, весе́ліемъ пою́ще, Христе́, Воскресе́ніе Твое́.

Суди́щу Пила́тову предстои́тъ хотя́й, беззако́нному суду́, я́ко осу́жденникъ, Судія́, и отъ руки́ непра́ведныя въ лице́ ударя́ется Бо́гъ, Его́же трепе́щутъ земна́я и небе́сная.

Кано́нъ отце́въ.

Аще внѣ́ 20-го случи́тся недѣ́ля святы́хъ оте́цъ: Кано́нъ окто́иха воскре́сенъ со ирмосо́мъ на 4, и крестовоскре́сенъ на 2, и Богоро́дицы 2, и отце́мъ отъ здѣ́ чте́тся на 6. Та́кожде и во про́чихъ пѣ́снѣхъ отце́мъ.

Дне́сь собо́ръ боже́ственныхъ оте́цъ Христо́во Рождество́ предпра́зднуетъ свѣ́тло, и пропису́етъ сіе́ пресла́вная благода́ть: Авраа́мъ бо о́бразъ зако́на и о́троцы су́ть.

Дре́вле пріе́млетъ Божество́ Еди́но Тріѵпоста́сное свяще́нный Авраа́мъ, ны́нѣ же сопресто́льное Сло́во Отчее Боже́ственнымъ Ду́хомъ къ дѣ́темъ прихо́дитъ, сла́вно восхваля́емое.

Число́мъ и вѣ́рою Боже́ственныя Тро́ицы безбо́жіе низве́ргше, въ пещи́ дѣ́ти о́бразы чу́вственными сокрове́нныя Бо́жія та́йны мíру прояви́ша.

Авраа́мъ изба́вися отъ руки́ непра́ведныя, пла́мене же пе́щнаго боже́ственніи о́троцы иногда́, и Даніи́лъ проро́къ отъ звѣре́й и ро́ва спасе́ся. Тѣ́мже ны́нѣ Рождество́ Христо́во предпра́зднуемъ.

Богоро́диченъ: Обра́дованная, Безневѣ́стная Ма́ти, Дѣ́во нетлѣ́нная, блажи́мъ Тя́: и́бо отъ ро́да Авраа́мля и пле́мене Дави́дова процвѣла́ еси́, Христа́ же родила́ еси́, проро́ки проповѣ́даннаго пре́жде.

Кано́нъ предпра́зднства [а́ще внѣ́ 20-го числа́ — оставля́ется], гла́съ 1.
Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Христа́, пло́тію младе́нствовавшаго, Христа́, во́лею обнища́вшаго, Христа́, ви́дима бы́вша, гряде́тъ Дѣ́ва въ Виѳлее́мѣ ны́нѣ роди́ти, не́бо же и земля́ да ра́дуются.

Го́ры и хо́лми, взыгра́йте, проро́цы богогла́сніи, лику́йте, лю́діе и язы́цы, восплещи́те: всѣ́хъ Спасе́ніе и Просвѣще́ніе бли́зъ наста́, во гра́дѣ Виѳлее́мстѣ ражда́емое.

Богоро́диченъ: Ни́щь бога́тый быва́етъ, обогаща́я и́же зло́бою обнища́вшія, Человѣ́къ Бо́гъ познава́ется отъ Дѣ́вы Неискусобра́чныя кромѣ́ преложе́нія; вси́ хвала́ми воспое́мъ Его́, я́ко просла́вися.

Катава́сія: Христо́съ ражда́ется...

Пѣ́снь 3.

Ирмо́съ: Тебе́, на вода́хъ повѣ́сившаго всю́ зе́млю неодержи́мо, тва́рь, ви́дѣвши на Ло́бнѣмъ ви́сима, у́жасомъ мно́гимъ содрога́шеся, нѣ́сть свя́тъ, ра́звѣ Тебе́, Го́споди, взыва́ющи.

Во гро́бѣ тридне́вствовавый воскреси́лъ еси́ животво́рнымъ воста́ніемъ уме́ршія отъ вѣ́ка, и, осужде́нія разрѣ́шшеся, ве́село ра́довахуся: се́ избавле́ніе прише́лъ еси́, Го́споди, взыва́юще.

Сла́ва Твоему́ воста́нію, Спа́се на́шъ, я́ко на́съ отъ а́да, тли́ и сме́рти изба́вилъ еси́, я́ко Всеси́ленъ, и, воспѣва́юще, глаго́лемъ: нѣ́сть свя́тъ, ра́звѣ Тебе́, Го́споди Человѣколю́бче.

Отце́мъ.

Юже по о́бразу сла́ву и по подо́бію Бо́жію вѣ́рно соблюда́юще, злата́го о́браза пла́мень огне́мъ духо́внымъ страда́льчески угаси́ша о́троцы, пою́ще: еди́наго Го́спода зна́емъ.

Му́дростію обложе́ни и Ду́ха си́лою, о́троцы мудрецы́ вавило́нскія плѣне́нніи посрами́ша и де́рзостнѣ взыва́ху: нѣ́сть свя́тъ, ра́звѣ Тебе́, Го́споди Человѣколю́бче.

Ра́дуется и сликовству́етъ съ дѣтьми́ и проро́ки зако́нъ и предъигра́етъ Госпо́дню Боже́ственному прише́ствію дне́сь, и Авраа́мъ ра́дуется, я́ко отъ сѣ́мене его́ ви́дѣ Го́спода воплоща́ема.

Богоро́диченъ: Зача́тіе безъ стра́сти, прія́тіе па́че сло́ва про́йде Рождества́ Твоего́, Богоро́дице: проро́ки бо проповѣ́данное па́че естества́ та́инство на́мъ яви́ся, Сло́во Бо́жіе, Сы́й Бо́гъ.

Инъ:

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Иже пре́жде вѣ́къ изъ Отца́ ро́ждся па́че мы́сли, изъ Дѣ́вы напослѣ́докъ воплоти́ся, я́коже вѣ́сть Са́мъ, хотя́ человѣ́чество обнови́ти, истлѣ́вшее лука́ваго змíя совѣ́томъ.

Иже въ вы́шнихъ сосѣдя́й Отцу́ и Ду́ху, смири́вшееся естество́ человѣ́ческое ви́дѣвъ, Сы́нъ Бо́жій Безнача́льный нача́ло пріе́млетъ и хо́щетъ пло́тію роди́тися, я́ко человѣ́къ.

Богоро́диченъ: Святѣ́йши а́нгелъ и всея́ тва́ри, Совѣ́та Вели́каго ны́нѣ Ангела безъ сѣ́мене ражда́етъ пло́тію на воззва́ніе всѣ́мъ, пою́щимъ непреста́нно Ему́: Свя́тъ еси́, Го́споди.

Катава́сія: Пре́жде вѣ́къ...

Ипакои́, гла́съ 8:

Ангелъ отроко́въ ороси́ пе́щь, ны́нѣ же же́нъ пла́чь разрѣши́, глаго́ля: Что́ прино́сите мѵ́ра? Кого́ и́щете во гро́бѣ? Воста́ Христо́съ и Бо́гъ: е́сть бо Жи́знь и Спасе́ніе ро́да человѣ́ческаго.

Пѣ́снь 4.

Ирмо́съ: На Крестѣ́ Твое́ Боже́ственное истоща́ніе прови́дя, Авваку́мъ, ужа́сся, вопія́ше: Ты́ си́льныхъ пресѣ́клъ еси́ держа́ву, Бла́же, пріобща́яся су́щимъ во а́дѣ, я́ко Всеси́ленъ.

Во а́дъ Боже́ственное низше́ствіе Твое́, Христе́ Бо́же, ме́ртвымъ жи́знь яви́ся: Ты́ бо врага́ связа́лъ еси́ держа́ву до́лѣ, Благíй, и небе́сную стезю́ человѣ́комъ отве́рзлъ еси́.

Не истлѣ́ во гро́бѣ пречи́стое тѣ́ло Изба́вителя лежа́що, но, я́ко си́ленъ, сокруши́ а́довы вереи́ и воскре́се во сла́вѣ, Христе́, тридне́вно.

Отце́мъ.

Отце́въ нача́токъ: Авраа́ма, Исаа́ка и Іа́кова почти́мъ, я́ко изъ тѣ́хъ сѣ́мене возсія́ Христо́съ, вопло́щся изъ Дѣ́вы, я́ко Всеси́ленъ.

Пропису́яй бу́дущая соше́ствію Христо́ву Даніи́лъ звѣ́ри, я́ко о́вцы, показа́ всѣ́мъ я́вѣ: прови́дѣ бо бу́дущее, я́ко проро́къ Бо́жій.

Грѣхо́внымъ не привлече́ни я́домъ, отъ пла́мене изба́вистеся, дѣ́ти: зла́та бо чистѣ́йше су́ще му́дріи, въ пещи́ пре́лести не слія́шася.

Богоро́диченъ: Велегла́сно проповѣ́дуется ожида́ніе язы́ковъ и спасе́ніе мíра — па́че естества́ Рождество́ Твое́, Пречи́стая, Честна́я, Его́же пое́тъ оте́ческая па́мять дне́сь.

Инъ:

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Же́злъ изъ ко́рене Іессе́ова, Дѣ́во, прозябла́ еси́, цвѣ́тъ процвѣ́тшая неувяда́емый — всѣ́хъ Содѣ́теля, зе́млю цвѣта́ми всю́ я́ко Бо́га украша́ющаго, вопію́щую Ему́: сла́ва си́лѣ Твое́й, Го́споди.

Снѣ́дію мя́ окра́дена лука́вою и ра́зумомъ попо́лзшася и уподо́бльшася безслове́снымъ, Сло́ве Бо́жій, прише́лъ еси́, назида́я, Младе́нецъ бы́въ и во я́слехъ безслове́сныхъ возле́гъ: сла́ва си́лѣ Твое́й, Го́споди.

Богоро́диченъ: Изъ горы́ пріосѣне́нныя, Іису́се, Дѣ́вы, Тя́, воплоще́ннаго, Авваку́мъ прови́дѣ, го́ры злы́я и хо́лмы сокруша́ющаго и исчезнове́нію предаю́ща возноше́нія лука́ваго и де́монская возвыше́нія.

Катава́сія: Же́злъ изъ ко́рене...

Пѣ́снь 5.

Ирмо́съ: Богоявле́нія Твоего́, Христе́, къ на́мъ ми́лостивно бы́вшаго, Иса́ія, Свѣ́тъ ви́дѣвъ Невече́рній, изъ но́щи у́треневавъ взыва́ше: воскре́снутъ ме́ртвіи, и воста́нутъ су́щіи во гробѣ́хъ, и вси́ земноро́дніи возра́дуются.

Блиста́яйся, ра́дость вообража́я я́вственнѣ, а́нгелъ, во гро́бѣ свѣтлоно́сецъ показу́ется, жена́мъ проповѣ́дая воста́ніе, и, оста́вльше пла́чь, ра́довахуся Христу́ воскре́сшу, отъ Него́же и непреста́нну ра́дость прія́ша.

За милосе́рдіе Благíй, Иже по на́мъ пріе́мъ зра́къ, во́лею на Крестѣ́ пригвозди́лся еси́ мене́ ра́ди, пе́рвѣе отве́ргша святу́ю Твою́ за́повѣдь снѣ́ди ра́ди въ раи́, и умира́еши человѣколѣ́пно, живо́тъ подая́ мнѣ́.

Отце́мъ.

Отце́въ нача́токъ, я́ко началовожда́ зако́на и благода́ти, отъ ро́да Авраа́мля дне́сь Даніи́ла боже́ственнаго почти́мъ: я́ко проро́къ бо Бо́жій предвозвѣсти́ Христа́ отъ Дѣ́вы и Сего́ предусрѣта́етъ Боже́ственное рожде́ніе.

Прописа́вше я́сно къ на́мъ Госпо́дне прише́ствіе а́нгеловымъ соше́ствіемъ, угаси́ша Авраа́мстіи о́троцы пе́щь и, тучеро́сенъ о́гнь содѣ́лавше, въ се́мъ вѣ́рою о́браза злата́го сла́ву изнури́ша.

Загради́ уста́ звѣре́й Даніи́лъ въ ро́вѣ Ду́хомъ, о́гненную же крѣ́пость угаси́ша Авраа́мстіи о́троцы благода́тію и, спа́сшеся сíи отъ тли́, предвозвѣща́ютъ Христа́ изъ Дѣ́вы, моля́ще я́ко Изба́вителя спасе́нія на́шего.

Богоро́диченъ: Боже́ственнымъ Ду́хомъ явля́я отъ на́съ безстра́стно Твое́ прія́тіе, Иса́ія вопія́ше, Го́споди, бо́дрствуя зако́номъ благода́ти: отъ ро́да у́бо Авраа́мля, отъ пле́мене же Іу́дова по пло́ти Дѣ́ва, безъ сѣ́мене, гряде́тъ, ражда́ющи.

Инъ:

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Естество́мъ Влады́ка, въ рабѣ́хъ соверше́ннѣ, Сы́нъ Бо́жій всесоверше́нный благоволи́лъ за милосе́рдіе зва́тися и Сы́нъ Человѣ́ческій Всеще́дрый. Тѣ́мже въ верте́пѣ во́лею обнища́въ, гряде́ши роди́тися, Пребла́же.

Невмѣсти́мый естество́мъ, Христе́ Царю́, ка́ко ма́лый Тя́ пріи́метъ верте́пъ? Ка́ко я́сли возмо́гутъ Тя́ вмѣсти́ти, на́съ ра́ди отъ Ма́тере Неискусому́жныя пло́тію приходя́ща во Своя́? Яко да устра́ншіяся спасе́ши, Го́споди.

Богоро́диченъ: Агница Па́стыря пріи́де роди́ти, гото́вися, святы́й верте́пе, па́стыріе, спѣши́те, Па́стыря и Агнца ро́ждшагося ви́дѣти, волсви́, съ да́ры угото́витеся, Сему́ я́ко Царю́ поклони́тися пло́тію.

Катава́сія: Бо́гъ Сы́й мíра...

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Сме́рти умерщвле́ніе и а́да, Бла́же, содѣ́лалъ еси́ разруше́ніе, тридне́внымъ погребе́ніемъ Твои́мъ, жи́знь же источи́лъ еси́, боголѣ́пно воскре́съ су́щимъ въ ми́рѣ, Іису́се благíй. [Два́жды.]

Отце́мъ.

Нра́въ страннолюби́въ, вѣ́ра же высока́ Авраа́ма, су́ща пра́отца; тѣ́мже, Боже́ственное та́инство обра́знѣ пріе́мъ, ра́довашеся, предъ Христо́мъ же текíй ны́нѣ весели́тся.

Тва́рь повину́ ны́нѣ вѣ́ра отроко́мъ да́ромъ Зижди́теля: о́гнь бо всея́децъ и безсту́дный устыдѣ́ся чту́щихъ огня́ дѣ́лателя, Іису́са Христа́.

Мíра свирѣ́пство прише́ствіемъ Христо́вымъ сочисля́тися изъяви́, къ мíру глубо́кому боголѣ́пно, загради́въ уста́ льво́въ, Даніи́лъ проро́къ въ ро́вѣ иногда́.

Богоро́диченъ: Изъ ложе́снъ родила́ еси́ дѣ́вственныхъ Христа́, Марíе, Ма́ти безму́жная, Его́же проро́цы ви́дѣвше духо́внѣ, Того́ предликовству́ютъ ны́нѣ отцы́ рожде́ственная.

Инъ:

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Но́вое не́бо су́щи, Влады́чице, изъ утро́бы Твоея́, я́ко изъ о́блака, Христа́, сла́вы Со́лнца, возсія́ти гряде́ши въ верте́пѣ пло́тію, я́ко хотя́ща сія́ньми Свои́ми свѣ́тло вся́ земна́я исполне́нія озари́ти за милосе́рдіе безмѣ́рное.

Ви́дѣлъ еси́ на́шу болѣ́знь и озлобле́ніе, ще́дрый Христе́, и не пре́зрилъ еси́ на́съ, но истощи́лъ еси́ Тебе́ Сама́го, не отступи́въ Роди́теля, и всели́лся еси́ во утро́бу неискусобра́чную, я́же неболѣ́зненно роди́ти Тя́ пло́тію въ верте́пѣ предгряде́тъ.

Богоро́диченъ: Го́ры и хо́лми, и поля́ и де́бри, лю́діе и колѣ́на, язы́цы и вся́кое дыха́ніе, воскли́кните, весе́лія боже́ственнаго исполня́еми: пріи́де и приспѣ́ всѣ́хъ избавле́ніе — Сло́во Бо́жіе безлѣ́тное, подъ лѣ́томъ за милосе́рдіе бы́вшее.

Катава́сія: Изъ утро́бы Іо́ну...

Аще внѣ́ 20-го числа́, Конда́къ отце́въ, гла́съ 6:

Рукопи́саннаго о́браза не поче́тше, но Неопи́саннымъ Существо́мъ защити́вшеся, треблаже́нніи, въ по́двизѣ огня́ просла́вистеся; средѣ́ же пла́мене нестерпи́маго стоя́ще, Бо́га призва́сте: ускори́, о Ще́дрый! и потщи́ся, я́ко ми́лостивъ, въ по́мощь на́шу, я́ко мо́жеши хотя́й.

Икосъ:

Простри́ Твою́ ру́ку, е́юже дре́вле прія́ша искуше́ніе еги́птяне борю́щіи и евре́и бори́міи, не оста́ви на́съ, да не пожре́тъ на́съ сме́рть, жа́ждущая на́съ, и сатана́, ненави́дяй на́съ; но прибли́жися на́мъ и пощади́ ду́ши на́ша, я́коже пощади́лъ еси́ иногда́ о́троки Твоя́, су́щія въ Вавило́нѣ, непреста́нно сла́вящія Тя́, и вве́рженныя Тебе́ ра́ди въ пе́щь, и отъ сея́ вопію́щія Ти́: ускори́, Ще́дрый, и потщи́ся, я́ко ми́лостивъ, на по́мощь на́шу, я́ко мо́жеши хотя́й.

Аще же вну́трь предпра́зднства, Конда́къ, гла́съ 1. Подо́бенъ: Ли́къ а́нгельскій.

Весели́ся, Виѳлее́ме, Евфра́ѳо, гото́вися: се́ бо Агница, Па́стыря вели́каго во утро́бѣ нося́щи, е́же роди́ти тщи́тся, Его́же зря́ще, богоно́сніи отцы́ веселя́тся, съ па́стырьми пою́ще Дѣ́ву доя́щую.

Икосъ:

Твоего́ Рождества́, Дѣ́во, свѣ́тлость зря́ще сія́ющую, Авраа́мъ боголюби́вый, Исаа́къ приснопа́мятный, Іа́ковъ и ве́сь богосо́бранный ли́къ святы́хъ ра́дуется и тва́рь приведо́ша къ Твоему́ срѣ́тенію ра́достными рече́ніи: ра́дости бо Хода́таица всѣ́мъ яви́лася еси́, во утро́бѣ заче́ншая иногда́ въ Вавило́нѣ Ви́дѣннаго, и о́троки, въ пе́щь непра́веднѣ вве́рженныя, неопа́льны Соблю́дшаго, и Тя́ Показа́вшаго па́че вся́каго ра́зума. Тѣ́мъ и воспѣва́ютъ Зри́маго въ рука́хъ Юницы, пою́ще Дѣ́ву доя́щую.

Пѣ́снь 7.

Ирмо́съ: Неизрече́нное чу́до: въ пещи́ Изба́вивый преподо́бныя о́троки изъ пла́мене, во гро́бѣ ме́ртвъ, бездыха́ненъ полага́ется, во спасе́ніе на́съ пою́щихъ: Изба́вителю Бо́же, благослове́нъ еси́.

О, стра́ннаго чудесе́! Въ вы́шнихъ сѣдя́й на престо́лѣ Госпо́дь, То́йже прія́тіемъ пло́ти сме́рть претерпѣ́, но воскре́се Божества́ крѣ́постію, совоскреси́въ ме́ртвыя су́щія отъ вѣ́ка.

Ты́ сме́ртную крѣ́пость сотрясе́ и воскре́се, воста́ніе дая́ Тебе́ вои́стинну Го́спода сла́вящимъ и Правосла́вною вѣ́рою Тебѣ́ вопію́щимъ: Изба́вителю Бо́же, благослове́нъ еси́.

Отце́мъ.

Христа́ роди́въ по пло́ти, вѣ́рою, родонача́льниче о́тче Авраа́ме, яви́лся еси́ язы́ковъ ду́хомъ оте́цъ я́вѣ, во спасе́ніе на́съ, пою́щихъ: Изба́вителю Бо́же, благослове́нъ еси́.

Безду́шнаго шу́ма, вотще́ восклица́ющаго, одушевле́нныхъ посрами́ пѣ́снь: пе́щь бо, огне́мъ горя́щую, тѣлесы́ попира́юще, о́троцы невре́дно Изба́вителю пою́тъ: Бо́же, благослове́нъ еси́.

Видѣ́ніемъ воззрѣ́въ духо́внымъ, проро́къ дре́вле Даніи́лъ Христо́во яви́ второ́е прише́ствіе и я́же въ не́мъ стра́шная предвозвѣща́етъ, вопія́: Изба́вителю Бо́же, благослове́нъ еси́.

Богоро́диченъ: Стра́нное чу́до, во проро́цѣхъ повѣству́емое и отце́мъ дре́вле явле́нно: Дѣ́ва Чи́стая, роди́ти хотя́щи, пріи́де на спасе́ніе на́съ, пѣснопою́щихъ: Изба́вителю Бо́же, благослове́нъ еси́.

Инъ:

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Лоза́ боже́ственная, нетлѣ́нный гро́здъ узрѣ́ливши, ближа́щися, и́детъ роди́ти весе́лія вино́ точа́щаго и напая́ющаго на́съ, Ему́ вопію́щихъ: отце́въ на́шихъ Бо́же, благослове́нъ еси́.

Боже́ственная Мѵрополо́жница, благово́нное Мѵ́ро вну́трь нося́щи, въ верте́пѣ Виѳлее́мли истощи́ти сіе́ гряде́тъ, благово́нія та́инственнаго исполня́ющее пою́щія: отце́въ Бо́же, благослове́нъ еси́.

Богоро́диченъ: Клеща́, ю́же Иса́ія проро́къ дре́вле ви́дѣ, Боже́ственный у́гль, Христа́, во чре́вѣ прихо́дитъ иму́щи, вся́ку ве́щь грѣхо́вную попаля́ющій, вѣ́рныхъ же ду́ши просвѣща́ющій.

Катава́сія: Отроцы, благоче́стію...

Пѣ́снь 8.

Ирмо́съ: Ужасни́ся, боя́йся, не́бо, и да подви́жатся основа́нія земли́: се́ бо въ мертвецѣ́хъ вмѣня́ется въ вы́шнихъ Живы́й, и во гро́бъ ма́лъ страннопріе́млется. Его́же, о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

О, неизрече́ннаго Твоего́, Христе́, снизхожде́нія, на́съ ра́ди смире́нныхъ! Се́ бо сме́рти вкуси́въ, Бо́гъ безсме́ртенъ Сы́й, во гро́бѣ я́ко Человѣ́къ положи́лся еси́, но воскре́слъ еси́, Сло́ве, совоскреси́въ до́льняя, Тебе́ превознося́щія во вся́ вѣ́ки.

Ужасе́ся вся́къ слу́хъ, ка́ко Вы́шній во́лею пріи́де на зе́млю а́дову крѣ́пость разори́ти Кресто́мъ и погребе́ніемъ, и вся́ совозста́ви взыва́ти: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Отце́мъ.

Твое́ заколе́ніе предъизобразу́я, Авраа́мъ, Христе́, его́же роди́ сы́на, на горѣ́ повину́яся Тебѣ́, Влады́ко, я́коже овча́, взы́де пожре́ти хотя́й вѣ́рою; но возврати́ся, ра́дуяся съ ни́мъ, и сла́вя и превознося́ Тя́, Изба́вителя мíра.

Пла́менемъ неутружде́ннымъ, Христе́, облече́ну Ти́, я́ко ри́зою Боже́ственною, о́гнь святы́хъ о́трокъ Твои́хъ угаси́ зѣло́, и роса́ Твои́мъ низхожде́ніемъ пою́щимъ шумя́ше: свяще́нницы по́йте, и превозноси́те Его́ во вѣ́ки.

Дае́тся льво́мъ въ снѣ́дь, судо́мъ непра́веднымъ, проро́къ Даніи́лъ, но имя́ше повелѣ́ніемъ воздержа́нія, спо́стники благоче́стно звѣ́ри во глубинѣ́ ро́вища. Того́ моли́твами, Авраа́ма же и отроко́въ, спаси́ въ ми́рѣ, Христе́, пою́щія Тя́.

Богоро́диченъ: Его́же провозвѣсти́ша вѣ́рно проро́честіи гла́си, Іису́са Емману́ила, въ человѣ́честѣ о́бразѣ гряду́ща, Бо́жія и Отча, Сы́на же и Собезнача́льное Сло́во, отъ Ду́ха Свята́го Дѣ́ва Марíя ражда́етъ неискусому́жно въ Виѳлее́мѣ гра́дѣ.

Инъ:

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Сла́ва въ вы́шнихъ Бо́гу, со а́нгелы возопіи́мъ въ весе́ліи: Спа́съ ражда́ется, Влады́ка прихо́дитъ, Его́же звѣзда́ показу́етъ, волсви́ тща́тся Его́ въ я́слехъ ви́дѣти; да благослови́тъ тва́рь вся́ Го́спода и превозно́ситъ во вся́ вѣ́ки.

Съ рабы́ написа́лся еси́ во́льно, Влады́ко, ке́сареву повину́яся зако́ну, я́ко да человѣ́чество отъ рабо́ты лука́ваго, Бо́же, свободи́ши, Многоми́лостиве. Тѣ́мже, ра́дующеся, воспѣва́емъ: да благослови́тъ тва́рь вся́ Го́спода и превозно́ситъ во вся́ вѣ́ки.

Богоро́диченъ: Младе́нца но́ва ношу́ Тя, Безнача́льне Сло́ве, иску́са же му́жеска отню́дъ не позна́хъ, — Дѣ́ва глаго́лаше недоумѣва́ющися. — Кого́ на земли́ возъимену́ю Твоего́ отца́? Не вѣ́мъ. Тѣ́мже со всѣ́ми воспѣва́ю Ти́: да благослови́тъ тва́рь вся́ Го́спода, и превозно́ситъ во вся́ вѣ́ки.

Катава́сія: Чу́да преесте́ственнаго...

Пѣ́снь 9.

Ирмо́съ: Не рыда́й Мене́, Ма́ти, зря́щи во гро́бѣ, Его́же во чре́вѣ безъ сѣ́мене зачала́ еси́, Сы́на: воста́ну бо, и просла́влюся, и вознесу́ со сла́вою, непреста́нно я́ко Бо́гъ, вѣ́рою и любо́вію Тя́ велича́ющія.

Что рыда́еши, тва́ре, на Крестѣ́ ви́дящи и во гро́бѣ жи́зни Да́теля, я́ко зе́млена? Воста́нетъ бо обновля́яй тя́ свѣ́тло, тридне́внымъ Воскресе́ніемъ а́дъ низложи́въ и ме́ртвыя совоздви́гъ, восхваля́ющія Его́.

Аще и во гро́бъ снизше́лъ еси́, я́ко ме́ртвъ, Жизнода́вче, но а́дову крѣ́пость разори́лъ еси́, Христе́, совоздви́гнувъ ме́ртвыя, я́же пре́жде пожре́, и воскресе́ніе по́далъ еси́, я́ко Бо́гъ, вѣ́рою и любо́вію Тя́ велича́ющимъ.

Отце́мъ.

Су́щихъ пре́жде зако́на отце́въ пра́здникъ соверша́юще, отъ ни́хъ боголѣ́пно почти́мъ Христа́: Авраа́мъ бо, ку́пно и Исаа́къ, и Іа́ковъ, проро́ковъ и зако́на яви́шася основа́ніе и благода́ти вѣ́рою Ду́ха проповѣ́дницы.

Огне́мъ показа́вый Моисе́ю въ купинѣ́ па́че ума́ богови́днѣ та́инство Бо́гъ, во о́гнь къ дѣ́темъ снизше́дъ То́йже, огне́мъ есте́ственнымъ Божества́ Его́ пе́щный пла́мень ро́су показа́.

Со Авраа́момъ, соше́дшеся, пресвятíи дѣ́ти и Даніи́лъ, ди́вный проро́къ Бо́жій, Исаа́къ и Іа́ковъ, съ Моисе́емъ и Ааро́нъ, Христо́ва пре́жде Рождества́ ликовству́ютъ вѣ́рно, моля́щеся непреста́нно, во е́же спасти́ся на́мъ.

Богоро́диченъ: Сра́дуется вся́ тва́рь Твоему́ Рождеству́, Дѣ́во, Еде́ма бо Виѳлее́мъ отве́рзе на́мъ. И се́ дре́ва жи́зни вси́ наслажда́ющеся вѣ́рно, вопіе́мъ прилѣ́жно: моли́твы на́ша, Влады́чице, испо́лни.

Инъ:

Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Та́инства стра́нная, стра́шная и пресла́вная: сла́вы Госпо́дь пріи́де на зе́млю и въ верте́пъ, обнища́въ, вни́де пло́тію, Ада́ма воззва́ти ища́ и Еву болѣ́зней изба́вити.

Пелена́ми Твои́ми рѣши́ши плени́цы грѣхопаде́ній, мно́гою же нището́ю вся́ обогаща́еши, Ще́дре; безслове́сныя зло́бы, поло́жся въ я́сли безслове́сныхъ, человѣ́ки измѣня́еши, Бо́жій Сло́ве Пребезнача́льне.

Богоро́диченъ: Про́повѣди проро́ческія коне́цъ прія́ша: Его́же бо прореко́ша пріити́ въ сконча́ніе лѣ́тъ, пріи́де и яви́ся, изъ Чи́стыя Дѣ́вы воплоща́емь, Того́ мы́слію чи́стою пріи́мемъ.

Катава́сія: Та́инство стра́нное...

Свѣти́ленъ воскре́сенъ. Сла́ва, отце́въ. Подо́бенъ: Ученико́мъ.

Патріа́рховъ избра́нніи и пре́жде зако́на отцы́ вѣ́рою предвозсія́ша, Авраа́мъ, Исаа́къ же и Іа́ковъ, я́ко свѣти́льницы: вси́ бо проро́цы и пра́ведницы возсія́ша отъ ни́хъ, я́ко свѣщи́ свѣтови́дныя, и тва́рь всю́ луча́ми просвѣти́ша честна́го проро́чества, и прилѣ́жно мо́лятся къ Бо́гу о ми́рѣ.

И ны́нѣ, [богоро́диченъ]:

Агница нескве́рная, Агнца ро́ждшая, Сло́ва Пребезнача́льнаго, въ послѣ́дняя времена́, бя́ше сіе́ чу́дно, Ада́мова вну́ка и Дави́дова по достоя́нію; Ея́же несказа́нное Рождество́ отце́въ мно́жество предпра́зднствуетъ досто́йно.

Аще въ 24-й де́нь: Воскре́сенъ свѣти́ленъ не глаго́лется, но отце́въ. [Подо́бенъ: Ду́хомъ пріи́де.]

Отъ сѣ́мене вво́дится Авраа́мля и боже́ственнаго Дави́да богоотца́ Пребезнача́льное Сло́во, Иже о́троки равночи́сленныя пе́рвѣе Тро́ицѣ, чу́дно а́нгела сше́ствіемъ изъ пла́мене спасы́й и рыда́ніе въ ра́дость преложи́вый же́нъ.

Сла́ва: Патріа́рховъ избра́нніи... [пи́санъ предъ си́мъ.]
И ны́нѣ, [предпра́зднства. Подо́бенъ: Ученико́мъ.]

Весели́ся Виѳлее́ме, и ты́, Евфра́ѳо, гото́вися: Богоро́дица бо прихо́дитъ въ верте́пѣ и я́слѣхъ роди́ти Бо́га неизрече́нно. О, стра́шнаго та́инства! Его́же ны́нѣ Боже́ственное Рождество́ Авраа́мъ, Исаа́къ же и Іа́ковъ, патріа́рси вси́ и проро́цы свѣ́тло предпра́зднуютъ и человѣ́цы со а́нгелы.

На хвали́техъ стихи́ры воскре́сны 4 и отце́въ 4.
Стихи́ры отце́въ, гла́съ 5. Подо́бенъ: Ра́дуйся по́стниковъ.

Возвы́си тво́й гла́съ и́стинно, Сіо́не, боже́ственный гра́де, и проповѣ́ждь отце́въ боже́ственную па́мять, со Авраа́момъ Исаа́ка и Іа́кова почита́юще присносла́внаго, се́ со Іу́дою и Левíемъ велича́емъ Моисе́я вели́каго и Ааро́на чу́днаго, и почита́емъ съ Дави́домъ Іису́са и Самуи́ла вси́. Предпра́зднеству Христо́ву боже́ственную похвалу́, пѣ́сньми боже́ственными пле́щуще, я́же отъ Него́ благода́ть улучи́ти про́симъ, и мíру дарова́ти ве́лію ми́лость. [Два́жды.]

Сти́хъ: Благослове́нъ еси́, Го́споди Бо́же оте́цъ на́шихъ, и хва́льно и просла́влено и́мя Твое́ во вѣ́ки.

Гряди́, на о́гненную иногда́ возсѣ́дый, Иліе́, боже́ственную колесни́цу, и богому́дре Елиссе́е со Езекíею во еди́но, Осíе, ку́пно сра́дуйтеся, честна́я же двоенадеся́тице проро́ковъ богодохнове́нная, Рождеству́ Христо́ву сликовству́йте и въ пѣ́снехъ вси́ пра́ведніи, воспо́йте, о́троцы всеблаже́нніи, росо́ю Ду́ха угаси́вшіи пла́мень пе́щный, о на́съ моли́те Христа́, низпосла́ти душа́мъ на́шимъ ве́лію ми́лость.

Сти́хъ: Яко пра́веденъ еси́ о всѣ́хъ, я́же сотвори́лъ еси́ на́мъ.

Яви́ся я́же отъ вѣ́ка на земли́ проповѣ́даемая проро́ки въ вѣща́ніихъ, Дѣ́ва Богоро́дица, Юже патріа́рси му́дріи и пра́ведныхъ собо́ри возвѣща́ютъ, съ ни́ми же сликовству́етъ и же́нъ благолѣ́піе: Са́рра, Реве́кка, Рахи́ль, и Анна же, и сла́вная Маріа́мъ Моисе́ева ку́пно. Съ ни́ми сра́дуются и мíра концы́, вся́ тва́рь почита́етъ, я́ко Зижди́тель всѣ́хъ и Бо́гъ прихо́дитъ пло́тію роди́тися и дарова́ти на́мъ ве́лію ми́лость.

Сла́ва: Зако́нныхъ уче́ній...

Ины стихи́ры, егда́ не пое́тся воскре́сно, гла́съ 4. Подо́бенъ: Зва́нный свы́ше.

Иса́іи гла́съ исполня́ется:* се́ бо Дѣ́ва Необъя́тнаго,* Опису́емаго пло́тію,* во утро́бѣ но́ситъ* и пресла́вно роди́ти прихо́дитъ.* Богопрія́тный верте́пе, украси́ся,* Виѳлее́ме, угото́вися:* Ца́рь бо тя́ изво́ли во оби́телище.* Пріими́те, я́сли,* повива́ема Младе́нца Христа́,* хотя́ща рѣши́ти плени́цы согрѣше́ній человѣ́ковъ бла́гостію.

Написа́вся съ рабы́ Влады́ка,* прегрѣше́ній рукописа́ніе раздра́ти хотя́* и написа́ти вся́ въ кни́зѣ живу́щихъ,* умерщвле́нныя украде́ніемъ змíя.* Дѣ́ва же но́ситъ Тя́, вся́ нося́щаго,* пло́тію ме́ртвенною обложе́на* и всели́тися въ ма́лый верте́пъ благоволи́вшаго.* Его́же ро́ждшася,* чи́ни го́рніи а́нгельстіи восхвали́ша* съ боже́ственными па́стыри,* дивя́щеся держа́вѣ Твое́й.

Свѣ́тлый же и одушевле́нный о́блакъ,* до́ждь нося́щи небе́сный,* се́й на зе́млю ны́нѣ предгряде́тъ пролія́ти,* я́ко да напои́тъ земли́ лице́.* Весна́ благода́ти,* мы́сленная ла́стовица,* вну́трь во утро́бѣ держа́щи,* неизглаго́ланнымъ сло́вомъ ражда́етъ,* зи́му безбо́жную разоря́ющи,* пала́та, чи́стая и нескве́рная,* Царя́ въ верте́пъ* привноша́етъ воплоща́емаго.

Сла́ва, отце́въ, гла́съ 8:

Зако́нныхъ уче́ній сосло́віе во пло́ти явля́етъ Христо́во Боже́ственное Рождество́, пре́жде зако́на благода́ть благовѣству́ющія, я́ко па́че зако́на въ вѣ́рѣ су́щія; тѣ́мже, тлѣ́нія измѣне́нію су́щу хода́тайственно, во а́дѣ держи́мымъ душа́мъ предпроповѣ́дяху Воскресе́нія ра́ди: Го́споди, сла́ва Тебѣ́.

И ны́нѣ: Преблагослове́нна еси́...
Славосло́віе вели́кое. По трисвято́мъ: тропа́рь воскре́сенъ, ектеніи́ и отпу́стъ.
Стихи́ру же ева́нгельскую пое́мъ въ притво́рѣ, и ча́съ 1-й, и соверше́нный отпу́стъ.



НА ЛИТУРГІИ,

Блаже́нна гла́са на 6 и отце́въ пѣ́снь 3-я на 4. По вхо́дѣ тропа́рь воскре́сенъ и отце́въ. Сла́ва, и ны́нѣ: конда́къ отце́въ. Проки́менъ, гла́съ 4, пѣ́снь отце́въ: Благослове́нъ еси́, Го́споди Бо́же оте́цъ на́шихъ, и хва́льно и просла́влено и́мя Твое́ во вѣ́ки. Сти́хъ: Яко пра́веденъ еси́ о всѣ́хъ, я́же сотвори́лъ еси́ на́мъ. Апо́столъ къ Евре́емъ, зача́ло 328. Аллилу́ія, гла́съ 4. Бо́же, уши́ма на́шима [услы́шахомъ, и отцы́ на́ши возвѣсти́ша на́мъ. Сти́хъ: Спа́слъ еси́ на́съ отъ стужа́ющихъ на́мъ, и ненави́дящія на́съ посрами́лъ еси́]. Ева́нгеліе Матѳе́я, зача́ло 1. Прича́стенъ: Хвали́те Го́спода съ небе́съ, [хвали́те Его́ въ вы́шнихъ]. Другíй: Ра́дуйтеся пра́ведніи о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 149 об. – 161.

/ Къ оглавленію раздѣла /


Наверхъ / Къ титульной страницѣ

0