Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 18-й де́нь.
Свята́го му́ченика Севастіа́на и дружи́ны его́.

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Всехва́льніи му́ченицы.

Крове́й твои́хъ честны́хъ обагре́ньми, му́чениче,* устро́илъ еси́ тебѣ́ самому́ порфи́ру многоцѣ́нну,* въ ню́же одѣ́явся,* живе́ши вои́стинну* въ Вы́шнѣмъ Ца́рствіи,* Бо́гу Всецарю́ предстоя́.* Того́ моли́* дарова́ти душа́мъ на́шимъ* ми́ръ и ве́лію ми́лость.

Съ Севастіа́номъ стра́ждетъ Зои́,* Ма́ркъ и Маркелли́нъ* и богому́дрый Тиву́ртій,* претерпѣ́вше треволне́нія болѣ́зней,* и ны́нѣ всели́шася къ неболѣ́зненному* и боже́ственному упокое́нію,* въ не́мже мо́лятся* дарова́ти душа́мъ на́шимъ* ми́ръ и ве́лію ми́лость.

Непобѣди́міи му́ченицы,* земли́ земна́я оста́вльше,* къ небесе́мъ востеко́сте,* ва́шими ра́нами укра́шени* и честны́ми страда́ніи* свѣ́тло упещре́ни, блаже́нніи.* Тѣ́мже мо́литеся* дарова́ти душа́мъ на́шимъ* ми́ръ и ве́лію ми́лость.

Стихи́ры Богоро́дицы, гла́съ и подо́бенъ то́йже:

Нетлѣ́нно родила́ еси́ Бо́га,* тлю́ потреби́вшаго* и нетлѣ́ніе источи́вшаго,* Нетлѣ́нная, Непоро́чная.* Тѣ́мже молю́ Тя:* лю́тыми истлѣ́вшаго мя́,* моли́твами Твои́ми, Чи́стая, обнови́,* да сла́влю Тя́, да любо́вію велича́ю Тя́,* ро́дъ на́шъ возвели́чившую.

Всепѣ́тая Влады́чице,* наде́жде вѣ́рныхъ и утвержде́ніе,* прибѣ́жище и по́мощь, Тя́ мо́лимъ:* отъ вся́кихъ бѣ́дъ рабы́ Твоя́ сохрани́,* вѣ́рою покланя́ющіяся Рождеству́ Твоему́.* Христу́ моли́ся дарова́ти* душа́мъ на́шимъ* ми́ръ и ве́лію ми́лость.

Увы́ мнѣ́, что́ бу́ду,* у́мъ, и ду́шу, и тѣ́ло оскверни́въ прегрѣше́ньми?* Что́ сотворю́?* ка́ко же избѣ́гну пла́мене негаси́маго,* нерѣши́мыхъ у́зъ и вѣ́чныхъ?* Но, о Всенепоро́чная!* пре́жде конца́ умоли́ Сы́на Твоего́* пода́ти ми́ оставле́ніе.

Сла́ва, и ны́нѣ, богоро́диченъ:

Огнь Божества́,* Христа́ во утро́бѣ носи́ла еси́,* Его́же ны́нѣ моли́, Всечи́стая,* удобозапали́мую ве́щь* страсте́й мои́хъ угаси́ти всю́,* и изба́вити мя́ огня́ вѣ́чнующаго,* и свѣ́тлости пра́ведныхъ сподо́бити мя́,* егда́ пріи́детъ суди́ти вся́ческая.

Крестобогоро́диченъ:

Дѣ́ва Нескве́рная,* иногда́ на дре́вѣ ви́дѣвши,* Его́же роди́ изъ безсѣ́менныя утро́бы,* не терпя́щи утро́бнаго уязвле́нія,* власы́ терза́ющи, глаго́лаше:* ма́ніемъ Содержа́й тва́рь всю́,* ка́ко, я́ко осужде́нный,* на Кре́стъ вознесе́нъ еси́,* вся́ко хотя́й спасти́ человѣ́чество?

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего, иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости, тѣ́хъ моли́твами спаси́ ду́ши на́ша.


НА УТРЕНИ,
Оба кано́на окто́иха и святы́хъ кано́нъ, на 4, его́же краегране́сіе: Боже́ственную че́сть тебѣ́, му́чениче, му́дренно даю́. Творе́ніе Іо́сифово. Гла́съ 1.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Боже́ственными уясня́емь заря́ми честны́я Тро́ицы, приснопа́мятне, вѣ́рою чту́щія твое́ свѣтоза́рное и свяще́нное торжество́ твои́ми моли́твами свѣ́та прича́стники покажи́.

Имѣ́я по́мыслъ свѣтови́денъ и прія́тенъ честны́хъ осія́ній, Еди́наго возжелѣ́лъ еси́, вои́стинну Су́щаго, я́ко смы́сленъ и му́дръ, му́чениче страстоте́рпче, и Сего́ вѣ́рою получи́лъ еси́.

По́ты боже́ственными и́стинно плотска́я мудрова́нія очерни́лъ еси́, кровьми́ страда́нія му́тныя пото́ки изсуши́лъ еси́ многобо́жія, богому́дре му́чениче пребога́те.

По́лкъ приве́лъ еси́ страда́льцевъ уче́ніи твои́ми боже́ственными Зижди́телю, вся́кое злоче́стіе гони́телей низложи́въ благода́тію Свята́го Ду́ха, съ ни́миже мо́лишися спасти́ся на́мъ.

Богоро́диченъ: Мла́да породила́ еси́ Сы́на, пре́жде вѣ́къ со Отце́мъ Су́щаго, естества́ обно́вльшая зако́ны, Чи́стая Дѣ́во, Ма́ти Пречи́стая, преесте́ственнымъ честны́мъ и боже́ственнымъ Рождество́мъ Твои́мъ.

Пѣ́снь 3.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Во́инство веды́й честно́е, боже́ственными ору́жіи вѣ́ры утвержде́нно, му́чениче непобѣди́ме, ополче́нія борца́ и кова́рствія мучи́телей вся́ низложи́сте си́лою Ду́ха.

Утверди́въ на ка́мени у́мнѣмъ восхожде́нія се́рдца твоего́ благочестному́дренно, му́чениче многострада́льне, не преврати́лся еси́ кова́рствы льсти́ваго змíя, но всѣ́мъ утвержде́ніе благоче́стія въ Ду́сѣ бы́лъ еси́.

Члено́въ боде́нія лю́тая претерпѣ́лъ еси́, свя́занъ и на дре́вѣ, му́чениче, протяза́емь, Бо́га же Боже́ственною си́лою, сла́вне, неврежде́нъ, всецѣ́лъ а́біе показа́лся еси́, посрамля́я вра́жія кова́рствія.

Богоро́диченъ: Свяще́ніе яви́лася еси́ мы́сленное вся́ Освяща́ющаго и чи́сто, Всенепоро́чная, селе́ніе: изъ Тебе́ бо яви́ся Бо́гъ воплоща́емь и сугу́бъ естество́мъ мíру познава́емь во еди́ной ѵпоста́си, Богоневѣ́сто.

Сѣда́ленъ, гла́съ 4. Подо́бенъ: Вознесы́йся на Кре́стъ.

Крове́й твои́хъ обагре́ніи омочи́лъ еси́ страда́нія оде́жду, одѣ́ялся еси́, я́коже багряни́цею честно́ю, Севастіа́не. Тѣ́мже и всели́лся еси́ со Христо́мъ въ Вы́шнее безконе́чное Ца́рство, съ страда́вшими съ тобо́ю и вѣнцы́ прія́лъ еси́, му́дре, съ ни́миже лику́я, на́съ при́сно помина́й.

Сла́ва, и ны́нѣ, богоро́диченъ:

Иже на престо́лѣ херуви́мстѣмъ сѣдя́й и въ нѣ́дрѣхъ Отчихъ водворя́яся, я́ко на престо́лѣ святѣ́мъ сѣди́тъ Свое́мъ, Влады́чице, въ нѣ́дрѣхъ Твои́хъ: вопло́щся бо Бо́гъ вои́стинну, воцари́ся надъ всѣ́ми язы́ки, и разу́мно ны́нѣ пои́мъ Ему́. Его́же умоли́ спасти́ся рабо́мъ Твои́мъ.

Крестобогоро́диченъ:

Изъ Безнача́льнаго Отца́ Рожде́ннаго, напослѣ́докъ Тя́ пло́тію Ро́ждшая, на Крестѣ́ ви́сяща зря́щи, Христе́, увы́ Мнѣ́, Любе́знѣйшій Іису́се, вопія́ше, ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? пою́ Тя́, Долготерпѣли́ве.

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Мо́щь тебѣ́, Тиву́ртіе, да́руетъ Госпо́дь не́мощію плотско́ю побори́ти врага́: огню́ бо распаля́ему, ю́ношески вше́лъ еси́, му́чениче крѣпча́йше, и небе́сную ро́су воспрія́лъ еси́.

Совокупи́лся еси́ съ го́рними служи́тели, о Тиву́ртіе! я́ко послужи́въ Христу́ и возне́слъ еси́ чи́сты же́ртвы въ Ду́сѣ, священнодѣ́телю, му́чениковъ сла́ва и хвала́; сего́ ра́ди ра́достно тя́ почита́емъ.

Пра́вѣ повѣ́шенъ, и остны́ стру́жемь, и зѣ́льными ра́нъ окружа́емь стремле́ньми, и въ ро́вѣ засыпа́емь, и въ не́мъ боже́ственную кончи́ну пріе́мъ, доблему́дренный ра́довашеся Касту́лъ.

Врачева́нія въ Ду́сѣ Святѣ́мъ, блаже́нне, соверша́я, ко просвѣще́нію зря́щимъ благоче́стно лю́демъ спасе́ніе благолѣ́пно, Севастіа́не, возвѣсти́лъ еси́, му́ченически же тече́ніе соверши́лъ еси́.

Богоро́диченъ: Еди́ну Тя́ отъ всѣ́хъ родо́въ избра́ пресу́щественный Бо́гъ и осуществова́ся ра́ди на́съ, бы́въ Человѣ́къ, Зижди́тель человѣ́ческаго существа́, Богороди́тельнице Пренепоро́чная, Влады́чице.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Стези́ твоя́ и ше́ствія, къ еди́ному веду́щія Го́споду, безпу́тія враго́въ уклони́ша и мно́гимъ бы́ша пу́ть пра́въ и тве́рдъ, му́чениче Христо́въ всече́стне.

Витíйствуетъ Маркелли́нъ и Ма́рко мудрѣ́йшая предъ суди́щемъ, Христо́во спаси́тельное прише́ствіе; привя́зана же бы́вша вку́пѣ, остна́ми въ но́зѣ пригвожда́ются, му́ченически украша́ема.

Страда́ніе, стра́сти на́ша умертви́вшаго, Маркелли́нъ и Ма́рко крѣ́пко образу́юще, копіе́мъ пробода́ются, и вѣнцено́сцы съ ли́ки страда́лецъ совокупля́ются.

Богоро́диченъ: Пресвѣ́тлый со́лнца о́блаче, Всенепоро́чная, отжени́ души́ моея́ о́блаки моли́твами Твои́ми и у́мъ мо́й просвѣти́, нерадѣ́ніемъ омрачи́вшійся, я́ко да пою́ Тя, Всепѣ́тая.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Тве́рдостію ума́, честнѣ́йше, показа́лся еси́ неутомле́нъ, егда́ бія́ху тя́ па́лицами неща́дно и стреца́ху мно́гими стрѣла́ми. Тѣ́мже къ Свѣ́ту преше́лъ еси́, ра́дуяся, му́чениче, невече́рнему.

Вжиля́ше тя́ Христо́съ, подвиза́ющася, и де́моны ра́тующа, и ра́намъ приобща́ющася лю́тымъ, Севастіа́не му́чениче непобѣди́ме, и къ Нему́ смотря́юща серде́чными очесы́.

Заво́рами тве́рдыми прему́дрыхъ слове́съ твои́хъ пре́лесть сокруши́лъ еси́, и чти́лища разори́лъ еси́ враго́въ, и и́дольскія хра́мы потреби́лъ еси́, и тебе́ сама́го хра́мъ Боже́ственнаго Ду́ха воздви́глъ еси́.

Богоро́диченъ: Истлѣ́вшее на́ше отъ преступле́нія существо́ обнови́ла еси́, Обновля́ющаго вся́ Боже́ственною во́лею ро́ждши, еди́на въ жена́хъ Благослове́нная, Богора́дованная.

Пѣ́снь 7.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Си́лою Твое́ю держа́вною укрѣпля́еми, страстоте́рпцы Твои́, Христе́, побѣди́ша врага́, ле́сть попра́ша, тѣлеса́ преда́ша ра́намъ, воспѣва́юще: хва́льный отце́въ Бо́гъ и препросла́вленъ.

Богоза́рніи страстоно́сцы му́ченицы, подви́гшеся до́брѣ, Маркелли́нъ, и сла́вный Ма́ркъ, и Тиву́ртій, и Касту́лъ всему́дрый къ небеси́ преста́вишася, хва́льнаго воспѣва́юще Бо́га и препросла́вленнаго.

Юношески, страда́льче Тиву́ртіе, я́коже о́троцы, на пла́мень наступи́лъ еси́ мы́сленно, ро́су Ду́ха свы́ше пріе́мъ и пѣснопоя́ усе́рдно: хва́льный отце́въ Бо́гъ и препросла́вленъ.

Якоже а́гница повѣ́шена, сла́вная, удави́ла еси́ врага́ жи́лами терпѣли́вныхъ болѣ́зней твои́хъ, всехва́льная, живе́ши же по сме́рти, му́ченице Зои́, воспѣва́ющи: хва́льный отце́въ Бо́гъ и препросла́вленъ.

Богоро́диченъ: Ста́мну злату́ю, всесвяту́ю трапе́зу Боже́ственнаго хлѣ́ба жи́зни, имену́емъ Тя́, Чи́стая, мѣ́сто свяще́нія, престо́лъ высоча́йшій, на не́мже Бо́гъ почи́, хва́льный отце́въ Бо́гъ и препросла́вленъ.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Умертви́тися мíру восхотѣ́въ и су́щимъ въ мíрѣ всѣ́мъ, су́щія сподо́бился еси́, всече́стне, жи́зни, вопія́ усе́рднѣйше: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Положи́ша тя́ беззако́нніи лю́тѣ, въ ро́вѣ преиспо́днѣйшемъ, посыпа́юще и умерщвля́юще, воспѣва́юща те́плѣ, приснопа́мятне Касту́ле: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Блаже́нныя улучи́ла еси́ жи́зни, я́ко тезоимени́та сея́, удавле́ніемъ бо ну́жднѣйшимъ тлѣ́нную жи́знь оста́вила еси́, пою́щи: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Богоро́диченъ: Украси́лася еси́, ро́ждши Бо́га кра́снаго и Влады́ку, Боже́ственными уясня́ющаго ро́дъ человѣ́ческій, Чи́стая, красота́ми, Ему́же вопіе́мъ: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Да Боже́ственныя свѣ́тлости, и вѣ́чныя сла́вы и красоты́, Севастіа́не, сподо́бишися, всеблаже́нне, муче́нія, болѣ́зни и сме́рть претерпѣ́лъ еси́ му́жественнѣ; тѣ́мже тя́ вси́ велича́емъ.

Яви́лся еси́ среди́ звѣ́здъ со́лнце, стра́ждущихъ съ тобо́ю, му́чениче, и ны́нѣ просвѣща́ете страда́ніи свяще́нными, чи́стыми свѣтлостьми́, Це́ркве Боже́ственное утверже́ніе, и все́ діа́воле разоря́ете киче́ніе.

Лю́бяще Христа́, Тиву́ртій, и Маркелли́нъ, и Ма́ркъ, Зои́ и Касту́лъ съ Севастіа́номъ наста́вникомъ и богому́дрымъ стра́ждутъ и ра́вныя пріе́млютъ побѣ́ды вѣнцы́, о на́съ при́сно моля́щеся.

Взя́тся ко оби́телемъ, вселя́емь, свѣтови́днымъ му́чениковъ ли́къ боже́ственный, и небеса́ обхо́дитъ, ра́дуяся, о всѣ́хъ на́съ Человѣколю́бца при́сно умоля́юще, блажа́щихъ и́хъ всегда́.

Богоро́диченъ: Ужаса́ются мы́сленная во́инства, Отчее зря́ща Боже́ственное озаре́ніе, на Твои́хъ рука́хъ несказа́нно держи́мо и Твое́ иму́щее подо́біе, да земны́я обожи́тъ, Дѣ́во Ма́ти Всенепоро́чная.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 145 об. – 148 об.

/ Къ оглавленію раздѣла /


Наверхъ / Къ титульной страницѣ

0