Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 17-й де́нь.
Свята́го проро́ка Даніи́ла. И святы́хъ тріе́хъ отроко́въ Ана́ніи, Аза́ріи и Мисаи́ла.

[ВЕЧЕРЪ,]
На Го́споди воззва́хъ: стихи́ры проро́ка, гла́съ 4. Подо́бенъ: Яко до́бля.

Даніи́лъ чу́дный,* се́рдце стяжа́въ чи́сто Ду́ха жили́ще* и отъ Него́ просвѣща́емый,* бу́дущихъ явле́ніе* прорица́етъ я́вственно:* проро́чества свѣ́тлостію удобря́емый* и я́сно сказу́яй держа́вныхъ* пребеззако́нныхъ царе́й* сокрове́нная со́нія.

Предукрѣпи́въ тѣ́ло твое́* посто́мъ неосла́бнымъ,* льво́въ уста́ заткну́лъ еси́:* посредѣ́ бо и́хъ стоя́, проро́че чу́дный,* и къ Бо́гу благо́му взира́я,* пребы́лъ еси́ не уя́звенъ* несказа́нною си́лою* вся́ дѣ́йствующаго пресла́вно,* Изба́вителя ду́шъ на́шихъ.

На престо́лѣ сѣдя́щаго* и а́нгелы обстои́маго,* непости́жнаго ви́дѣлъ еси́ Судію́,* су́ща пра́веднаго,* проро́че чу́дный.* Уди́вль же ся ужа́сному и стра́шному видѣ́нію,* назна́меналъ еси́ су́щимъ пото́мъ всѣ́мъ,* написа́въ второ́е прише́ствіе* вопло́щшагося Бо́га на́шего.

Ины стихи́ры святы́хъ отроко́въ, гла́съ то́йже. Подо́бенъ: Да́лъ еси́ зна́меніе.

Зако́новъ держа́щеся богода́нныхъ,* всеблаже́нніи,* ме́рзостными не оскверни́стеся пи́щами,* но, нетлѣ́нну душе́вную* добро́ту сохра́нше,* соблюдо́сте пло́ти невре́дный* и неувяда́емый цвѣ́тъ чу́дный* и кра́сную лѣ́поту* Влады́цѣ, прославля́ющу Своя́ уго́дники.

Боже́ственнымъ распаля́еми ю́ноши пла́менемъ* о́гнь преоби́дѣша,* въ не́мже ороша́еми, честнíи,* ли́къ пресвѣ́телъ вообрази́вше,* пѣ́снь многопѣ́тую, ви́дѣшася, пою́ще:* и́бо непрее́мное Даніи́лъ* Ца́рствіе Христо́во ви́дѣвъ, ра́довашеся,* я́ко проро́къ всеизря́днѣйшій.

Словеси́ прему́дрости твоея́* уди́вльшеся мучи́тели,* Даніи́ле досточу́дне,* и отроко́въ ра́зуму,* Халде́йскою страно́ю нача́льствовати* и владѣ́ти ва́съ поста́виша, честнíи:* добродѣ́тели бо вѣ́сть я́вственнѣйше чуди́тися и супоста́тъ,* и житія́ свѣ́тлости,* стра́сти бо удержа́вше, вла́стели бы́сте.

Сла́ва, гла́съ 2. Анато́ліево:

Духо́вно на́съ, вѣ́рніи, собра́ дне́сь проро́къ Даніи́лъ и трапе́зу предложи́ добродѣ́телей оби́льно бога́тымъ и ни́щимъ, и стра́ннымъ, и дома́шнимъ, и ча́шу у́мну, пролива́ющу во́ду благоче́стія, и веселя́щу сердца́ вѣ́рныхъ, и Ду́ха Свята́го благода́ть подаю́щу. Се́й бо проро́къ — свѣтлѣ́йшій свѣти́льникъ, просія́вый въ мíрѣ, служе́нія вся́ ассирíйская низложи́ и звѣре́й неукроти́мыхъ уста́ загради́. Съ си́мъ и тріе́ о́троцы да восхва́лятся, не зла́ти естество́мъ су́ще, и зла́та иску́сншіи показа́вшеся: не слія́ бо и́хъ о́гнь пе́щный, но сохрани́ цѣ́лы, и́хже на́фѳа, и смола́, и ро́ждіе вѣнча́ша. Приведы́й же на́съ на обхожде́ніе лѣ́та Госпо́дь да сподо́битъ ны́ дости́гнути и въ Госпо́дскій и честны́й де́нь Рождества́ Христо́ва, подаю́щаго на́мъ тѣ́хъ моли́твами очище́ніе грѣхо́въ и ве́лію ми́лость.

И ны́нѣ, предпра́зднства, гла́съ то́йже. Андре́я Пи́рскаго:

Пріиди́те вси́, Христо́во Рождество́ предпра́зднуемъ вѣ́рно, и мы́сленнѣ пѣ́ніе, я́ко звѣзду́, предлага́юще волхво́въ славосло́вія, съ па́стырьми возопіи́мъ: пріи́де избавле́ніе человѣ́ковъ изъ дѣ́вственныхъ ложе́снъ, вѣ́рныя призыва́ющее.

На стихо́внѣ окто́иха. Сла́ва, и ны́нѣ, гла́съ 6:

Даніи́лъ, му́жъ жела́ній, ка́мень, безъ руки́ отсѣ́ченъ, ви́дѣвъ Тя́, Го́споди, Младе́нца, безъ сѣ́мене рожде́на, пронарече́ Тя, изъ Дѣ́вы воплоще́нна Сло́ва, непремѣ́ннаго Бо́га и Спа́са ду́шъ на́шихъ.

Тропа́рь, гла́съ 2:

Ве́лія вѣ́ры исправле́нія: во исто́чницѣ пла́мене, я́ко на водѣ́ упокое́нія, святíи тріе́ о́троцы ра́довахуся, и проро́къ Даніи́лъ, льво́мъ па́стырь, я́ко овца́мъ, явля́шеся. Тѣ́хъ моли́твами, Христе́ Бо́же, спаси́ ду́ши на́ша.


НА УТРЕНИ,
Еди́нъ кано́нъ окто́иха и святы́хъ два́.

Кано́нъ проро́ка, его́же краегране́сіе: Му́драго Даніи́ла пѣ́сньми увѣнча́ю. Творе́ніе Ѳеофа́ново. Гла́съ 8.
Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ.

Спа́се Благодѣ́телю, всѣ́хъ благи́хъ Вино́вный, свѣтоно́снымъ Твои́мъ сія́ніемъ у́мъ мо́й просвѣти́, Человѣколю́бче, я́ко да Твоего́ проро́ка восхвалю́ сла́вную па́мять.

Утро я́ко, возсія́лъ еси́, му́дре, цѣлому́дрія, цѣлому́дренную предбѣ́дствовавшую спа́слъ еси́ Соса́нну: Бо́гъ бо тя́ воздви́же, Вѣ́дѣтель та́йныхъ, ста́рцы лю́тыя осуди́ти.

Стра́хомъ укрѣпля́еми Бо́жіимъ, Авраа́мовы вну́цы, пи́щу пребеззако́нную отри́нуша до́блественнѣ, и боже́ственнымъ пита́ющеся жела́ніемъ благоче́стія, къ велича́йшей взя́шася сла́вѣ.

Богоро́диченъ: Го́ру ви́дѣлъ еси́ мы́сленную, Даніи́ле свяще́ннѣйше, еди́ну Пречи́стую Приснодѣ́ву Отрокови́цу, изъ Нея́же отсѣче́ся Ка́мень краеуго́льный, и ле́сть сокруши́ всю́.

Инъ кано́нъ святы́хъ тріе́хъ отроко́въ, его́же краегране́сіе: Три́ о́троки пою́ и Даніи́ла вели́каго. Творе́ніе Ѳеофа́ново. Гла́съ то́йже.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Безнача́льное Сло́во, изъ Отца́ пре́жде всѣ́хъ вѣко́въ рожде́нно боголѣ́пно, е́же въ пещи́ ю́ношамъ обра́зно ви́дѣнное, просла́вимъ.

Глаго́лы мучи́теля злочести́ваго благоро́дніи о́троцы оплева́вше терпѣли́вно, снѣ́дьми пребеззако́нныхъ оскверни́тися халде́йски не восхотѣ́ша.

Пита́стеся у́бо сло́вомъ душе́внѣ, снѣ́дьми же самора́сленными пло́тски, па́че пита́ющихся дебе́лыми снѣ́дьми, царю́ краснѣ́йшіи ви́ды показа́стеся.

Богоро́диченъ: Ядъ зміи́нъ, въ слу́хи го́рько излія́вшійся Евы, я́же изъ Дави́да возра́стшая, Отрокови́це, исцѣля́еши, Изба́вителя поро́ждши.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Ра́зумъ и му́дрость отъ Бо́га пріе́мъ, сказа́лъ еси́ свѣтоявле́нно сѣно́вная царе́мъ со́нія.

Змíя умертви́лъ еси́, пи́щу вве́ргъ, сла́вне, чу́вственнаго, пе́рвѣе бо неви́димыя побѣди́лъ еси́ де́моны.

Богоро́диченъ: Заре́ю просвѣща́емь, явле́нную зри́ши, сла́вне, го́ру Бо́жію благослове́нную, человѣ́ковъ украше́ніе.

Инъ. Ирмо́съ то́йже.

Ра́зумъ стяжа́вше богонауче́нный, Влады́ко, о́троцы Дави́довы зако́ны оте́ческія богому́дренно соблюдо́ша.

Огнь не опали́ чистѣ́йшая тѣлеса́ благочести́выхъ, посто́мъ бо душепита́тельнымъ напая́хуся.

Хвалу́ всемíрную и многопѣ́тую пою́тъ о́троцы тріе́, посредѣ́ пе́щи чу́дно ороша́еми.

Богоро́диченъ: Да Рождество́, Влады́ко, изъ дѣ́вствующаго тѣлесе́ пока́жеши на́мъ, спаса́еши въ пещи́ дѣ́вствующая тѣлеса́.

Конда́къ проро́ку, гла́съ 3. Подо́бенъ: Дѣ́ва дне́сь.

Просвѣти́вшееся Ду́хомъ чи́стое твое́ се́рдце проро́чества бы́сть свѣтлѣ́йшаго прія́телище: зри́ши бо, я́ко настоя́щая, дале́че су́щая. Львы́ укроти́лъ еси́, вве́рженъ въ ро́въ, сего́ ра́ди тя́ почита́емъ, проро́че блаже́нне, Даніи́ле сла́вне.

Икосъ:

Іису́са Христа́, Истиннаго Бо́га на́шего, Его́же боже́ственное я́сно прише́ствіе провозгласи́лъ еси́, моли́ непреста́нно съ весе́ліемъ боже́ственную сію́ творя́щимъ па́мять твою́ и вѣ́рою чту́щимъ тя́ искуше́ній вся́кихъ спасти́ся, и грѣхо́въ, и обстоя́ній я́ко дерзнове́ніе, богому́дре, имѣ́я. И во отверзе́ніе мои́мъ пода́ждь устна́мъ тя́ пѣ́ти незазо́рно сло́во. И ника́коже мене́ гнуша́йся, проро́че блаже́нне Даніи́ле сла́вне.

Сѣда́ленъ, гла́съ 8. Подо́бенъ: Прему́дрости.

Тро́ицы о́бразъ проро́чески изъ невеще́ственныхъ шаро́въ въ пла́мени о́троцы написа́ша тро́стію вѣ́ры, и Сло́ва кра́йнее на зе́млю низше́ствіе та́инственно ви́дѣша, и всѣ́мъ проповѣ́даша. Тѣ́мже, и ро́су съ небесе́ пріе́мше духо́вную, источа́ютъ вѣ́рнымъ дарова́нія и согла́сно вопію́щимъ Тебѣ́: да́руй, Христе́ Бо́же, прегрѣше́ній оставле́ніе, я́ко благоутро́бенъ, пра́зднующимъ любо́вію святу́ю па́мять ва́шу.

Сла́ва, и́нъ сѣда́ленъ, подо́бенъ то́йже:

Проро́чествія благода́тію обогати́вся, Дѣ́вы Рождество́ сѣннопи́шеши и рѣши́ши со́нія царе́мъ я́вственнѣ; вве́рженъ же бы́въ въ ро́въ, я́ко му́ченикъ научи́лъ еси́ пресла́вно, блаже́нне, пости́тися львы́. Тѣ́мъ разори́лъ еси́ безбо́жныхъ служе́ніе, змíя уби́лъ еси́, до́бльствовавъ свѣтлѣ́йше, Даніи́ле досточу́дне. Моли́ Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять твою́.

И ны́нѣ, богоро́диченъ:

Ра́дуйся, престо́ле огнезра́чный Бо́жій; ра́дуйся, Отрокови́це, сѣда́лище Ца́рское, о́дре преиспещренноустла́нный, златопорфи́рный черто́же, хлами́до червленосвѣ́тлая, укра́шенный хра́ме, молнено́сное ору́жіе, свѣти́льниче многосвѣ́тлый; ра́дуйся, Богоро́дице, дванадесятостѣ́нный гра́де, и две́ре златокова́нная, и черто́же свѣтлообра́зный, свѣтлопозлаще́нная трапе́зо, богоукраше́нная ски́ніе; ра́дуйся, сла́вная Невѣ́сто, Со́лнце ка́плющая; ра́дуйся, еди́на души́ моея́ благолѣ́піе.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися, богови́дно усмотри́, и со стра́хомъ славосло́вяше си́лу Твою́.

Зако́нъ благоче́стно сохрани́въ, о проро́че! вои́стинну му́дрости позна́лъ еси́ Да́теля, та́йнымъ же науча́юща и глубо́кимъ и я́же во тмѣ́ тя́ просвѣща́юща.

Свяще́нну жи́знь пожи́въ, богоявле́нне, жела́ній му́жъ наре́клся еси́, му́жественно бо стра́сти попра́въ, къ нестарѣ́ющейся преста́вился еси́ жи́зни.

Все́льшаяся въ тебѣ́ Утѣ́шителя благода́ть, Даніи́ле, показу́етъ тя́ свѣтоно́сна, и побѣди́теля мучи́телей и царе́й, и прему́дрости жили́ще.

Богоро́диченъ: Ка́мень Тя́, безъ руки́ отсѣ́ченъ, Сло́ве, отъ горы́ зри́тъ, Дѣ́вы Богоро́дицы, Даніи́лъ проро́къ, взыва́я и воспѣва́я Твое́ Божество́.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Даніи́лъ мудрѣ́йшій, боже́ственнѣ умо́мъ просвѣща́емь, со́нія разрѣши́ самоде́ржцевъ Боже́ственною благода́тію.

Облиста́етъ чудесы́ е́же въ пещи́ отроко́въ страда́ніе, мучи́теля бо улови́ша къ позна́нію Твоему́, Всеси́льне.

Согла́сія орга́ны и мусикíи пѣ́сни всесли́чныя до́блественныхъ не привлеко́ша и злато́му о́бразу не подклони́ша.

Богоро́диченъ: Пѣ́сньми, Всепѣ́тая, и́же въ Вавило́нѣ дѣ́ти почита́ютъ Сы́на Твоего́ Пребоже́ственнаго, Его́же въ пещи́ позна́ша.

Пѣ́снь 5.

Ирмо́съ: Отъ но́щи невѣ́дѣнія боговѣ́дѣніемъ просвѣти́вый концы́, просвѣти́ мя́ у́тромъ человѣколю́бія Твоего́, Го́споди.

Страда́льческія по́двиги проро́чествія уясни́въ проповѣ́даніемъ, сія́еши обои́ми, Боже́ственнаго вдохнове́нія испо́лненъ.

Прему́дръ показа́лся еси́, блаже́нне, па́че ума́ прему́дрости сія́ньми, велича́йшій богоглаго́ливе Даніи́ле, и вся́ просвѣти́лъ еси́.

Богоро́диченъ: Тайновождеству́етъ о́бразы неизглаго́ланнаго воплоще́нія, Чи́стая, и́же изъ Тебе́ Высоча́йшаго Даніи́лъ проро́къ сла́вный.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Научи́вшеся зако́ну, Спа́се, не отверго́шася Твои́ уго́дницы, Даніи́лъ вели́кій съ треми́ ю́ношами богоразу́мными, но, крѣ́пость пріе́мше отъ Тебе́, Благодѣ́теля, мучи́телей му́жески побѣди́ша.

Мы́сленно науча́шеся Даніи́лъ, Человѣколю́бче, Твои́мъ та́йнамъ: на о́блацѣ бо я́ко Сы́на Тя́ человѣ́ча гряду́ща, язы́ковъ всѣ́хъ я́ко Судію́ и Царя́ зря́ше ума́ чистото́ю.

Украси́ся, о дѣ́ти, па́че ка́мене сапфи́ра ва́ше совокупле́ніе, я́ко заря́ злата́я; благоче́стія ре́вностію распа́льшеся, ходя́ще ра́достно въ пещи́ и пле́щуще ли́къ всемíрный.

Богоро́диченъ: Даніи́лъ Тя́, Дѣ́во, го́ру прописа́ я́вѣ боже́ственный, тріе́ же о́троцы, ви́дѣвше пла́мень ороша́ющь, Твое́ Боже́ственное Рождество́ пѣ́сненно восхваля́ютъ я́ко Спа́са, и Зижди́теля и Го́спода.

Пѣ́снь 6.

Ирмо́съ: Якоже проро́ка изба́вилъ еси́ изъ глубины́ преиспо́днія, Христе́ Бо́же, и мене́ отъ грѣхо́въ мои́хъ изба́ви, я́ко Человѣколю́бецъ, и упра́ви живо́тъ мо́й, молю́ся.

Ангельскія ты́ ли́ки во свѣ́тѣ свѣтлѣ́йшемъ зря́, подража́тель всеизря́днѣйшій си́хъ бы́лъ еси́, Всецаря́ наслажда́яся сія́ньми.

Спаси́тельное Сло́ва прише́ствіе возвѣща́я, предвозвѣсти́лъ еси́ и хра́ма разоре́ніе, зако́на же исполне́ніе и благода́ти па́че ума́ дарова́нія.

Богоро́диченъ: Се́ Дѣ́ва во утро́бѣ я́вѣ зачина́етъ Христа́ Бо́га, осія́вшися Ду́хомъ, Ея́же проображе́ніе прови́дяше Даніи́лъ сла́вный.

Инъ.

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́ отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю! и спаси́.

Облада́вше есте́ственными страстьми́ си́лою Сло́ва, странѣ́ язы́къ халде́йскихъ вла́стели бы́сте: вѣ́сть бо добродѣ́тель че́сть дарова́ти стяжа́вшимъ ю́, о Дави́довы му́дріи вну́цы!

Въ ме́ртвость Даніи́лъ живоно́сную одѣ́явся дре́вле, я́ко бо́га халде́емъ злочести́вно мни́маго убива́етъ снѣ́дію змíя злѣ́йшаго, свяще́нники же злочести́выя му́дрѣ уби́лъ е́сть.

Богоро́диченъ: Ми́лостива ми́ Судію́ и Сы́на Твоего́, Богоро́дице Дѣ́во, Твои́ми моли́твами бы́ти въ де́нь Суда́, Изба́вителя же лю́тыхъ, Ма́ти, умоли́, на Тя́ бо еди́ну наде́жду мою́ возлага́ю.

Конда́къ, гла́съ 6:

Рукопи́саннаго о́браза не поче́тше, но Неопи́саннымъ существо́мъ защити́вшеся, треблаже́нніи, въ по́двизѣ огня́ просла́вистеся, средѣ́ же пла́мене нестерпи́маго стоя́ще, Бо́га призва́сте: ускори́, о Ще́дрый, и потщи́ся, я́ко Ми́лостивъ, въ по́мощь на́шу, я́ко мо́жеши хотя́й.

Икосъ:

Простри́ Твою́ ру́ку, е́юже дре́вле прія́ша искуше́ніе еги́птяне борю́щіи и евре́е бори́міи. Не оста́ви на́съ, да не пожре́тъ на́съ сме́рть, жа́ждущая на́съ, и сатана́, ненави́дяй на́съ, но прибли́жися на́мъ и пощади́ ду́ши на́ша, я́коже пощади́лъ еси́ иногда́ о́троки Твоя́, су́щія въ Вавило́нѣ, непреста́нно сла́вящія Тя́, и вве́рженныя Тебе́ ра́ди въ пе́щь, и отъ сея́ вопію́щія Ти́: ускори́, Ще́дрый, и потщи́ся, я́ко Ми́лостивъ, на по́мощь на́шу, я́ко мо́жеши хотя́й.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Зако́номъ, проро́че, огражде́нъ, не прія́лъ еси́ оскверни́тися пребеззако́нно, но, Боже́ственнѣ умо́мъ просвѣща́емь, вопія́лъ еси́: благослове́нъ еси́, Го́споди Бо́же, во вѣ́ки.

Вся́ ужаса́етъ твое́ чу́до, я́коже проро́ку бо проро́къ тебѣ́ предста́, восхище́нъ, пи́щу нося́ тебѣ́ и поя́: благослове́нъ еси́, Го́споди Бо́же, во вѣ́ки.

Вну́трь ро́ва затворе́нъ и льво́мъ на снѣ́дь предложе́нъ, спа́слся еси́, Бо́гу, покры́вшу тя́, блаже́нне, благослове́нъ еси́, зову́ща, Бо́же оте́цъ на́шихъ.

Богоро́диченъ: Струю́ незави́стно источа́еши врачева́ній, о Дѣ́во Богома́ти! Даніи́лъ бо я́сно узрѣ́ Тя́ го́ру, изъ нея́же Спа́съ возсія́, Бо́гъ оте́цъ на́шихъ.

Инъ.

Ирмо́съ: Отроцы богочести́віи въ Вавило́нѣ, о́бразу злато́му не поклони́шася, но посредѣ́ пе́щи о́гненныя, ороша́еми, пѣ́снь воспѣва́ху, глаго́люще: превозноси́мый отце́въ и на́шъ Бо́же, благослове́нъ еси́.

Гла́съ боголюбе́зенъ пѣснопоя́шеся изъ среды́ огня́ Вседержи́телю: Аза́рія бо, боже́ственный ли́къ соста́вивъ, пѣ́снь воспѣва́я, глаго́лаше: благослове́нъ Бо́гъ оте́цъ на́шихъ.

Цѣвни́ца ю́ношей богосло́вяше всѣ́хъ Бо́га и Вседержи́теля, тѣ́мъ въ пещи́ я́сно я́вльшагося, и пѣ́снь воспѣва́ху, глаго́люще: благослове́нъ Бо́гъ оте́цъ на́шихъ.

Три́, въ пе́щь вве́рженныя, ви́дѣвъ ца́рь, я́ко узрѣ́ четве́ртаго ви́дъ, Сы́на пронарече́ Бо́жія и всѣ́мъ возопи́: благослове́нъ Бо́гъ оте́цъ на́шихъ.

Богоро́диченъ: Имѣ́я просвѣще́нъ Боже́ственною заре́ю у́мъ, Даніи́ле богоблаже́нне, Дѣ́вы Рождество́ я́вѣ предви́дѣлъ еси́ та́инственными о́бразы образу́емо, благослове́нъ, вопія́, Бо́гъ оте́цъ на́шихъ.

Пѣ́снь 8.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода].

Священноявле́нъ показа́лся еси́, о проро́че! и дѣ́ятельнымъ видѣ́ніемъ со безтѣле́сными пѣ́лъ еси́: благослови́те, вся́ дѣла́ Госпо́дня, Го́спода.

Тя́, всеблаже́нне, благохва́лимъ вси́, и въ честно́е торжество́ твое́ ра́дующеся, взыва́емъ: благослови́те, вся́ дѣла́ Госпо́дня, Го́спода.

Богоро́диченъ: Пречу́дную Отрокови́цу богоглаго́ливый образова́тельными о́бразы усмотри́въ, взыва́лъ еси́: благослови́те, вся́ дѣла́ Госпо́дня, Го́спода.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Авраа́мово благоро́діе сохрани́ти тща́щеся, сво́йственное къ нему́ стяжа́сте основа́ніе вѣ́ры и наде́жди, преподо́бніи, терпѣ́ніе и напа́стемъ пожда́ніе, вопію́ще: благослови́те, свяще́нницы, Влады́ку, лю́діе, превозноси́те Его́ во вѣ́ки.

Яко свѣти́ла просія́вше, и зе́млю онебеси́вше, и благоче́стія просвѣще́ніемъ осія́вшеся, всемíрное соста́вльше ликостоя́ніе, пою́тъ и́же отъ напа́стей спа́сшему Влады́цѣ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Юношески погаси́вше распали́мую пе́щь и льво́въ че́люсти связа́вше, Дави́довы вну́цы, ны́нѣ ра́дующеся, пою́тъ Тя́, Благодѣ́теля, Царя́ всѣ́хъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Тайнонауча́етъ, Пречи́стая, Даніи́лъ мудрѣ́йшій, и предживопису́ютъ о́троцы тріе́ Рождество́ Твое́ богому́дренніи, чрезъ о́бразы зря́ще изъ утро́бы Твоея́ проше́дшаго несказа́нно, Его́же о́троцы благословя́тъ, свяще́нницы воспѣва́ютъ, лю́діе превозно́сятъ во вся́ вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Пожа́лъ еси́ твои́хъ болѣ́зней припло́дія, на небесѣ́хъ со проро́ки лику́я при́сно, о́крестъ высоча́йшаго престо́ла Вседержи́телева.

Свѣ́томъ трисо́лнечнымъ ны́нѣ вѣнцено́сецъ жела́ній кра́йнѣйшему предстои́ши, съ безтѣле́сными ли́ки веселя́ся.

Богоро́диченъ: Красна́ сла́ва твоя́, ея́же ны́нѣ наслажда́ешися: Всепѣ́тую бо Отрокови́цу, проро́че честны́й, о́бразы возвѣща́ти всѣ́мъ сподо́бился еси́.

Инъ. Ирмо́съ то́йже.

Достиго́сте кончи́ну жела́нную и жела́ній Кра́йнѣйшему предстоите́ въ небе́сныхъ черто́зѣхъ, о́троцы всебога́тіи.

Ра́дующеся, рукоя́тіе, е́же отъ сле́зъ, до́браго ва́шего дѣ́ланія прія́сте, нетлѣ́нія кла́съ плодоноси́вше.

Возсія́ свѣ́тлость ны́нѣ ва́мъ досто́йно, и весе́ліе се́рдца процвѣте́: отону́дуже бо отбѣже́ печа́ль, всели́стеся.

Богоро́диченъ: Па́жить сме́рти уста́вила еси́, Дѣ́во, Жизнода́вца ро́ждши и Го́спода, животворя́щаго вѣ́рою велича́ющія Тя́.

Свѣти́ленъ окто́иха. Сла́ва, проро́ка:

Иже во проро́цѣхъ велича́йшій Даніи́лъ ны́нѣ да почти́тся, Христа́ бо Бо́га на́шего ви́дѣ, ка́мень отсѣ́ченъ кромѣ́ ру́къ отъ горы́ — Чи́стыя Богоро́дицы. Съ ни́мъ да восхва́лятся и тріе́ о́троцы, я́же спасе́ отъ пе́щнаго огня́ неврежде́ны, о́бразъ Дѣ́вы боже́ственный и неизрече́нный, и́мже мíръ спасе́ся.

И ны́нѣ:

Тайнонауча́етъ, Всечи́стая, Ду́хомъ Боже́ственнымъ Даніи́лъ прему́дрѣйшій, и пропису́ютъ вѣ́рою Авра́амстіи тріе́ о́троцы Твое́ безсѣ́менное Рождество́: Сы́й бо Божество́мъ неопи́санное Сло́во изъ Тебе́ пло́тію хотя́ опису́ется, Богоро́дице, въ Виѳле́емѣ ражда́емь на спасе́ніе человѣ́ковъ.

На стихо́внѣ окто́иха. Сла́ва, и ны́нѣ, гла́съ 6. Мала́ксово:

Мы́сленному Со́лнцу Пра́вды изъ дѣви́ческія утро́бы возсія́ти хотя́щу, я́коже свѣ́тлыя звѣ́зды, предосія́ютъ на́мъ отъ пе́щи о́гненныя равночи́сленніи Тро́ицы о́троцы, стра́нное та́инства собо́ю предзна́менающе. Съ ни́ми у́бо и Даніи́лъ, свѣтлѣ́йшій проро́къ, предозаря́етъ конце́мъ свѣ́томъ прорече́нія, Христа́ проповѣ́дуя нерукосѣ́чный ка́мень, отъ горы́ присѣ́нныя, Дѣ́вы, происходя́щаго, во спасе́ніе ду́шъ на́шихъ.


НА ЛИТУРГІИ,

Блаже́нна, отъ кано́на проро́ка пѣ́снь 3-я и отроко́въ пѣ́снь 6-я. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Евре́емъ, зача́ло 330. Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 62. Прича́стенъ: Ра́дуйтеся [пра́ведніи о Го́сподѣ, пра́вымъ подоба́етъ похвала́].


(Мрк) Подоба́етъ вѣ́дати: а́ще случи́тся свята́го проро́ка Даніи́ла и святы́хъ тріе́хъ отроко́въ въ недѣ́лю святы́хъ пра́отецъ. Пое́тся возслѣ́дованіе и́хъ вку́пѣ съ воскре́сною слу́жбою си́це:

На ма́лѣй вече́рни на Го́споди, воззва́хъ... стихи́ры воскре́сны и Богоро́дицы, по обы́чаю.

На вели́цѣй вече́рни на Го́споди воззва́хъ... стихи́ры воскре́сны 3, и пра́отцевъ 3, и проро́ка Даніи́ла 2, гла́съ 4. Подо́бенъ: Яко до́бля. И отроко́въ 2, гла́съ то́йже. Подо́бенъ: Да́лъ еси́ зна́меніе. Сла́ва, пра́отцевъ, гла́съ 6: Иже пре́жде зако́на... И ны́нѣ, богоро́диченъ пе́рвый, гла́са. Вхо́дъ. Проки́менъ дне́. На литíи: стихи́ра хра́ма и проро́ка Даніи́ла, гла́съ 4: На престо́лѣ сѣдя́щаго... [пи́санъ на Го́споди воззва́хъ... въ ря́ду послѣ́дній]. И отроко́въ, гла́съ то́йже: Словеси́ прему́дрости Твоея́... [пи́санъ на Го́споди же, воззва́хъ... послѣ́дній], и гла́съ 2: Духо́вно на́съ вѣ́рніи... Сла́ва, пра́отцевъ, гла́съ 1: Луча́ми облиста́вшеся... И ны́нѣ, богоро́диченъ: Се́ испо́лнися... На стихо́внѣ стихи́ры воскре́сны. Сла́ва, пра́отцевъ, гла́съ 3: Пра́отцевъ собо́ръ... И ны́нѣ, проро́ка, гла́съ 6: Даніи́лъ, му́жъ жела́ній... На благослове́ніи хлѣ́бовъ тропа́рь: Богоро́дице Дѣ́во.., два́жды, и пра́отцевъ еди́ножды. И Бу́ди и́мя Госпо́дне.., три́жды. Псало́мъ 33: Благословлю́ Го́спода... и чте́ніе въ посла́ніихъ апо́стольскихъ.

Зри́: А идѣ́же бдѣ́ніе не быва́етъ, на повече́ріи глаго́лемъ по Досто́йнѣ и по трисвято́мъ конда́къ святы́хъ пра́отцевъ.

На у́трени, на Бо́гъ Госпо́дь... тропа́рь воскре́сенъ два́жды. Сла́ва, отроко́въ. И ны́нѣ, пра́отцевъ. По каѳи́смахъ сѣда́льны воскре́сны съ богоро́дичны и́хъ, и чте́ніе во Ева́нгеліи толково́мъ, недѣ́ля ря́дъ. По полиеле́и тропари́: Ангельскій собо́ръ... ипакои́ гла́са и сѣда́ленъ пра́отцевъ. И чте́ніе во Ева́нгеліи, недѣ́ля святы́хъ пра́отцевъ. Степе́нна и проки́менъ гла́са. Ева́нгеліе воскре́сно, псало́мъ 50-й, стихи́ра воскре́сна и про́чее. Кано́нъ воскре́сенъ со ирмосо́мъ на 4, проро́ка и отроко́въ, о́ба кано́на на 6. И пое́мъ въ ко́ейждо пѣ́сни проро́ка три́ тропаря́, богоро́диченъ оставля́ется, и отроко́въ пе́рвыя стихи́ два́ за еди́нъ, та́же тропа́рь еди́нъ, и богоро́диченъ. И пра́отцевъ на 4, и держи́мъ стихо́въ 12, кромѣ́ Сла́ва, и ны́нѣ; всѣ́хъ же на 14. Катава́сія: Христо́съ ражда́ется... По 3-й пѣ́сни конда́къ, и и́косъ проро́ка, и сѣда́ленъ его́. Сла́ва, отроко́въ. И ны́нѣ, ипакои́ пра́отцевъ и чте́ніе. По 6-й пѣ́сни конда́къ пра́отцевъ, и и́косъ, и чте́мъ про́логъ. По 9-й пѣ́сни свѣти́ленъ воскре́сенъ и пра́отцевъ. Сла́ва, проро́ка. И ны́нѣ: Со́лнце вели́кое... На хвали́техъ стихи́ры воскре́сны 4, и святы́хъ пра́отцевъ на 4, съ припѣ́вы: Благослове́нъ еси́, Го́споди... 2-й: Яко пра́веденъ еси́... Сла́ва, пра́отцевъ, гла́съ 7: Пріиди́те вси́, вѣ́рно торжеству́емъ... И ны́нѣ: Преблагослове́нна еси́... Славосло́віе вели́кое. По трисвято́мъ тропа́рь воскре́сенъ, ектеніи́, и отпу́стъ, и обы́чное исхожде́ніе. Сла́ва, и ны́нѣ, стихи́ра ева́нгельская, и ча́съ 1-й.

На 1-мъ часѣ́ тропа́рь воскре́сенъ. Сла́ва, пра́отцевъ. И ны́нѣ, богоро́диченъ часо́въ. По трисвято́мъ конда́къ пра́отцевъ, и про́чее, и соверше́нный отпу́стъ. На 3-мъ часѣ́ тропа́рь воскре́сенъ. Сла́ва, проро́ка. И ны́нѣ, богоро́диченъ часо́въ. По трисвято́мъ конда́къ пра́отцевъ.

На литургíи, блаже́нна гла́са на 4, и пра́отцевъ пѣ́снь 3-я на 4, и проро́ка пѣ́снь 6-я на 4. По вхо́дѣ тропа́рь воскре́сенъ, та́же святы́хъ. Сла́ва, конда́къ проро́ка. И ны́нѣ, пра́отцевъ. Проки́менъ, пѣ́снь отце́въ и святы́хъ. Апо́столъ и Ева́нгеліе недѣ́ли пра́отцевъ и святы́хъ. Ря́дъ же недѣ́ли оставля́ется. Прича́стенъ: Хвали́те Го́спода... Другíй: Ра́дуйтеся...

Зри́: Си́це пое́мъ слу́жбу и вели́каго свята́го пра́зднуемаго, а́ще случи́тся въ сію́ недѣ́лю, то́кмо по поліеле́и: И ны́нѣ, сѣда́ленъ пра́отцевъ. На литургíи: проки́менъ пра́отцевъ и свята́го. И вся́ слу́жба, я́коже пре́жде явле́но е́сть.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 137 – 144.

/ Къ оглавленію раздѣла /


Наверхъ / Къ титульной страницѣ

0