Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 24 iюня 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 16-й де́нь.
Слу́жба святы́я и преподо́бныя ма́тере на́шея благовѣ́рныя вели́кія княги́ни Софíи Су́ждальскія.

Творе́ніе господи́на преосвяще́ннаго Серапіо́на, архіепи́скопа Су́ждальскаго и Тару́сскаго.

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ. На Го́споди воззва́хъ:] стихи́ры [на 6], гла́съ 4. [Подо́бенъ: Яко до́бля.]

Ра́зумомъ духо́внымъ* посрами́ла еси́ вра́жію крѣ́пость,* кре́стнымъ бо ору́жіемъ* сего́ попра́ла еси́* и Бо́жія Ма́тере оби́тель* украси́ла еси́ чудесы́ свои́ми,* въ не́мже дре́во живо́тное, [кре́стъ,] водрузи́.* Трапе́зу — Бо́жію Ма́терь иму́щи,* исто́чникъ неисчерпа́емый — благода́ть Бо́жію;* Его́же моли́ непреста́нно* о творя́щихъ па́мять твою́. [Два́жды.]

Духо́вно возвесели́ся,* вся́ Су́ждальская страна́,* па́мять чту́щи Софíи богому́дрыя,* она бо мо́лится ны́нѣ ко Христу́* съ ли́ки преподо́бныхъ же́нъ,* помо́щницу иму́щи Пресвяту́ю Богоро́дицу,* изба́витися гра́ду Су́ждалю* отъ бѣ́дъ и печа́лей,* вѣ́рою творя́щимъ* всечестну́ю па́мять ея́. [Два́жды.]

Сла́ва, гла́съ 4:

Ра́дуйся, всеблаже́нная Софíе, я́ко отъ младе́нства Христо́ву красоту́ возлюби́ла еси́, отъ Сама́го [бо] Вседержи́теля утвержда́ема, духо́вною пи́щею наслади́тися па́че всѣ́хъ вожделѣ́ла еси́, и земны́я красоты́ не восхотѣ́ла еси́, Су́ждальскую страну́ чудесы́ свои́ми удиви́ла еси́, и бы́сть небе́снымъ си́ламъ собесѣ́дница, съ ни́ми же у престо́ла Влады́чня ликовству́еши, дерзнове́ніе иму́щи, преблаже́нная Софíе, Христа́ Бо́га моли́ непреста́нно о всѣ́хъ на́съ, и́же вѣ́рою чту́щихъ святу́ю па́мять твою́.

И ны́нѣ, богоро́диченъ:

Иже Тебе́ ра́ди [богооте́цъ проро́къ Дави́дъ пѣ́сненно о Тебѣ́ провозгласи́, вели́чія тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́ждшее горохи́щное обрѣ́тъ овча́, на ра́мо воспріи́мъ, къ Отцу́ принесе́тъ, и Своему́ хотѣ́нію, съ небе́сными соедини́тъ си́лами, и спасе́тъ, Богоро́дице, мíръ, Христо́съ имѣ́яй ве́лію и бога́тую ми́лость].

Вхо́дъ, проки́менъ дне́ и чте́нія три́ преподо́бническія.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

[На стихо́внѣ] стихи́ры, гла́съ 1:

[Преподо́бная ма́ти Софíе,* твоя́ пресла́вная па́мять* по́стницамъ украше́ніе и тве́рдое заступле́ніе,* твои́мъ бо житіе́мъ чудесы́* Христо́съ благода́ть да́руетъ* съ вѣ́рою приходя́щимъ къ моще́мъ твои́мъ,* Его́же моли́ дарова́ти душа́мъ на́шимъ* ми́ръ и ве́лію ми́лость. [1]

Сти́хъ: Ди́венъ Бо́гъ во святы́хъ Свои́хъ,* Бо́гъ Изра́илевъ.]

Преподо́бная ма́ти Софíе,* тебѣ́ Богоро́дица поручи́* па́ствити слове́сное Ея́ ста́до,* украси́ла бо еси́* Ея́ пресла́вную оби́тель чудесы́ свои́ми,* въ не́йже лежа́тъ пречестны́я твоя мо́щи* во гро́бѣ [неразруши́мы],* исцѣле́ніе подаю́тъ* къ ни́мъ притека́ющимъ,* Христа́ у́бо умоли́* дарова́ти душа́мъ на́шимъ* ми́ръ и ве́лію ми́лость.

Сти́хъ: Въ це́рквахъ благослови́те Бо́га,* [Го́спода отъ исто́чникъ Изра́илевыхъ].

Преподо́бная ма́ти Софíе,* испроси́ я́же къ Бо́гу моли́твами свои́ми* Су́ждалю утвержде́ніе,* Благовѣ́рному Импера́тору на́шему [и́мярекъ]* здра́віе и побѣ́ды на враги́ да́руй моли́твами свои́ми,* всѣ́мъ, вѣ́рою притека́ющимъ къ ра́цѣ моще́й твои́хъ,* Христо́ви моли́ся* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 8:

Ра́дуйся и весели́ся, гра́де Су́ждалю, и лику́й, свѣ́тло торжеству́ющи, це́рковь Бо́жія Ма́тере, въ не́йже лежи́тъ сокро́вище — пречестны́я мо́щи преподо́бныя Софíи: не восхотѣ́ бо земны́я красоты́ самодержа́вства и всели́ся во оби́тель Пречи́стыя Бо́жія Ма́тере. Сего́ ра́ди пріиди́те, вси́ лю́діе, пріиди́те и собери́теся въ це́рковь Бо́жія Ма́тере, поклони́мся съ вѣ́рою моще́мъ преподо́бныя Софíи; лику́й и ра́дуйся, Су́ждальская и вся́ окре́стныя страны́, Софíя богому́драя гра́ду на́шему утвержде́ніе, и́нокинямъ похвала́ и удобре́ніе и на́мъ, вѣ́рнымъ, спасе́ніе; испроси́ моли́твами ея́ дарова́ти на́мъ ве́лію ми́лость.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

Тропа́рь, гла́съ 4:

Вы́шняго красото́ю я́вственно украша́яся, по́стническими бо труды́ подвиза́ся преподо́бная Софíя, и бы́сть наслѣ́дница небе́сному Ца́рствію, и вни́де въ небе́сный черто́гъ наслади́тися Христо́вы красоты́, Его́же моли́ спасти́ся гра́ду Су́ждалю отъ вра́жіихъ нахожде́ній и междоусо́бныя бра́ни и пода́ждь душа́мъ на́шимъ ве́лію ми́лость.

[Сла́ва, и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА УТРЕНИ,
На Бо́гъ Госпо́дь: Тропа́рь [святы́я,] два́жды. Сла́ва, и ны́нѣ, богоро́диченъ.

По 1-й каѳи́смѣ сѣда́ленъ, гла́съ 1:

Иноческое житіе́ возлюби́ла еси́, преподо́бная, и Христу́ послѣ́довала еси́, Софíе богому́драя, отвсю́ду бо просія́ла еси́ добродѣ́тельнымъ житіе́мъ свои́мъ, въ моли́твахъ, поще́ніихъ и бдѣ́ніихъ о́бразъ была́ еси́ и́нокинямъ, тѣ́мъ вопіе́мъ ти́: сла́ва Да́вшему ти́ крѣ́пость, сла́ва Вѣнча́вшему тя́, сла́ва Подаю́щему тобо́ю всѣ́мъ исцѣле́нія. [Два́жды.]

Сла́ва, и ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ же и сло́ва, непреста́нно моли́ съ вы́шними си́лами, пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно Тя́ сла́вящимъ.

По 2-й каѳи́смѣ сѣда́ленъ, гла́съ 3:

Иму́щи Ду́хъ и́стины, прему́драя Софíе, тѣ́мже и мы́, соше́дшеся, пѣ́сньми па́мять твою́ возвели́чимъ и облобыза́емъ честну́ю твою́ ра́ку, исцѣле́ніе получи́вше неоску́дно и пою́ще, си́це рце́мъ: Софíе преподо́бная, Христо́ви моли́ся сохрани́ти оте́чество твое́ неруши́мо отъ иноплеме́нныхъ нахожде́ній, и укроти́ти междоусо́бную бра́нь твои́ми моли́твами, и дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Красотѣ́ дѣ́вства Твоего́ и пресвѣ́тлой чистотѣ́ Твое́й Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возымену́ю Тя́? Недоумѣва́ю и ужаса́юся. Тѣ́мже, я́ко повелѣ́нъ бы́хъ, вопію́ Ти: ра́дуйся, Благода́тная.

[Велича́ніе:

Ублажа́емъ тя́, преподо́бная ма́ти, вели́кая княги́не Софíе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Терпя́, потерпѣ́хъ Го́спода...]

По поліеле́и сѣда́ленъ, гла́съ 4:

Вели́кій гра́дъ Су́ждаль торжеству́етъ о Бо́зѣ и Пресвятѣ́й Богоро́дицѣ въ па́мять твою́, преподо́бная Софíе, моли́твами бо твои́ми спаса́еши ста́до твое́ отъ искуше́ній и бѣ́дъ и отъ вся́каго преще́нія, находя́щаго на ны́, и па́ки, преподо́бная Софíе, непреста́нно моли́ся Христу́ Бо́гу спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Мно́гими прегрѣше́ніи а́зъ, блу́дный, у́мъ помрачи́въ, вопію́ къ Твоему́ крѣ́пкому заступле́нію, Богоро́дице: просвѣти́ души́ моея́ зѣ́ницы, и возсія́й ми покая́нія свѣ́тлую зарю́, и облецы́ мя́ во ору́жіе свѣ́та, Богороди́тельнице Чи́стая.

[Та́же степе́нна, 1 антифо́нъ, 4-го гла́са. Проки́менъ гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Вся́кое дыха́ніе... Ева́нгеліе отъ Матѳе́я, зача́ло 104.]

По 50-мъ псалмѣ́ стихи́ра, гла́съ 6:

Вся́къ гра́дъ и страна́, сла́вному гра́ду Су́ждалю воскли́кнемъ псало́мски и воспле́щемъ рука́ми вку́пѣ, духо́вное торжество́ пра́зднующе, Софíю богому́друю пѣ́сньми восхва́лимъ, въ честно́й оби́тели Бо́жія Ма́тере соверша́юще и въ весе́ліи вопію́ще: о, преблаже́нная и преподо́бная ма́ти Софíе! Пріими́ пѣ́ніе люде́й свои́хъ и моли́ся Го́сподеви, да пода́стъ на́мъ неоску́дное исцѣле́ніе отъ всѣ́хъ зо́лъ и скорбе́й, находя́щихъ на ны́, и спасе́тъ ду́ши на́ша.

Кано́нъ [Богоро́дицы со ирмосо́мъ на 6 и] преподо́бныя Софíи [на 8], гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Іису́су: Пѣ́снь Твое́й уго́дницѣ Софíи принести́, Бо́же, да́руй ми́, и́же на земли́ Тебѣ́ просла́вльшей, я́ко да Смыслода́вца пѣ́сньми Тя́ возвели́чу.

Благочести́ваго ко́рене о́трасль была́ еси́, и роди́телей лише́ніе никто́же ти́ возбрани́, но всѣ́мъ жела́ніемъ и тща́ніемъ обрати́лася еси́ ко еди́ному Содѣ́телю.

Спа́сову за́повѣдь послу́шала еси́ отъ ю́ности, прему́драя Софíе, и жи́знь свою́ ни во что́же вмѣни́вши, [и кре́стъ Госпо́день носи́ти возжелѣ́вши,] и земно́е ца́рство презрѣ́вши, на небе́сное взира́юще.

Богоро́диченъ: Мольбу́ Тебѣ́ прино́симъ, Богоро́дице, отъ у́стъ на́шихъ недосто́йныхъ сію́ пріими́, Влады́чице, я́ко вдовы́ о́ныя двѣ́ ца́тѣ, тѣ́мже со умиле́ніемъ вопіе́мъ Ти́, о Преблагослове́нная Ма́ти, [прибѣга́юще къ] покро́ву Твоему́.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Безпомо́щнымъ бу́ди помо́щница, преблаже́нная Софíе, и печа́льнымъ ми́лостивное утѣше́ніе, да твои́ми моли́твами отъ всѣ́хъ зо́лъ избавля́еми, почита́емъ тя́.

Прему́дрости жела́ніемъ ко гра́ду Су́ждалю, Софíе преподо́бная, до́йде, я́ко пчела́ му́драя, и любодѣ́льно чистотѣ́ совоку́пльшися и неполе́зная оста́вила еси́.

Уста́ льсти́выхъ звѣре́й загради́ла еси́, отве́рсты бо ю́ностныя, самоде́ржцу супру́га предо́брая была́ еси́ и ца́рство земно́е оста́вила еси́, наставле́ніе воспріи́мъ Боже́ственнаго ра́зума.

Богоро́диченъ: Напа́стьми мно́гими одержи́ми есмы́, болѣ́зньми и пла́чемъ вопіе́мъ Ти́: изба́ви, Богоро́дице, отъ обдержа́щихъ на́съ скорбе́й и вѣ́чнаго муче́нія и Ца́рствія Сы́на Твоего́ сподо́би на́съ моли́твами уго́дницы Твоея́ блаже́нныя Софíи.

Сѣда́ленъ, гла́съ 4:

Яко всесвѣ́тлая звѣзда́, возсія́вши свѣтолу́чными сія́ніи, просвѣти́ла еси́ чудесы́ свои́ми, Софíе преподо́бная, Святы́мъ Ду́хомъ наставля́ема, пришла́ еси́ во оби́тель Бо́жія Ма́тере, въ не́йже трудолю́бно подвиза́ся, отъ земны́хъ къ небе́сному селе́нію ны́нѣ [преста́вилася еси́,] преблаже́нная Софíе, моли́ся непреста́нно о творя́щихъ па́мять твою́. [Два́жды.]

Сла́ва, и ны́нѣ, богоро́диченъ:

Сло́во Отчее, Христа́ Бо́га на́шего, изъ Тебе́ воплоти́вшагося, позна́хомъ, Богоро́дице Дѣ́во, еди́на Чи́стая и Благослове́нная, непреста́нно Тебе́ велича́юще, воспѣва́емъ.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Яко въ небе́сныхъ оби́телехъ съ ли́ки преподо́бныхъ и пра́ведныхъ веселя́ся, предстои́ши Пресвятѣ́й Богоро́дицѣ, непреста́нно моля́ся о душа́хъ на́шихъ.

Пріи́мши и́го ле́гкое Спа́са Христа́, Того́ бо стра́хомъ составля́ема, очи́щши ду́шу и тѣ́ло воздержа́ніемъ, и́нокинямъ наста́вница была́ еси́, преподо́бная.

Лю́тый вселука́вый вра́гъ тща́шеся отлучи́ти отъ тебе́ жела́емая тобо́ю, Софíе преподо́бная, ты́ же сего́ ни во что́ вмѣни́ла еси́, непреста́нно вопія́ше: сла́ва си́лѣ Твое́й, Го́споди.

Богоро́диченъ: На престо́лѣ высо́цѣ стра́шно сѣдя́й на Ма́тернюю ру́ку Младе́нецъ бы́въ, ниспа́дшій о́бразъ возводя́ и обоже́ніе су́щимъ подава́я.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Освяти́ся [пречестна́я] оби́тель Бо́жія Ма́тере твое́ю ра́кою, Софíе преблаже́нная, отъ нея́же источа́еши чудеса́, съ вѣ́рою приходя́щимъ ти́ неоску́дно благода́ть подава́еши.

Зако́ну Бо́жію послѣ́дуя и повелѣ́нію Его́ повину́яся, наста́вница бо и пра́вило извѣ́стнѣйшее и́нокинямъ бы́сть, наказа́тельница заблу́ждшимъ и свѣти́льница земны́мъ, Софíе преблаже́нная.

Свѣ́тлыми заря́ми по́двигъ твои́хъ отгони́ми бы́ша лю́тыхъ бѣсо́въ мно́жество отъ жили́ща твоего́, поспѣ́шествова бо тебѣ́ благода́ть Свята́го Ду́ха, Его́же осѣне́ніемъ исцѣле́ніе подава́еши, Софíе преподо́бная.

Богоро́диченъ: Ума́ моего́ превраще́ніе исцѣли́, Пречи́стая, уврачу́й стра́сти души́ моея́ и лѣ́ностную тму́ отжени́, я́ко да хвала́ми Тя́ ублажа́емъ, Всенепоро́чная.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

О, преподо́бная ма́ти Софíе, вели́кая свѣти́льнице! Освяти́ и просла́ви святу́ю оби́тель Бо́жія Ма́тере и и́же любо́вію тя́ въ пѣ́снехъ сла́вящихъ.

Инокинямъ наста́вница и о́бразъ добродѣ́телей, всѣ́хъ украси́ла еси́, во оби́тели су́щихъ безъ супру́жнаго пребыва́нія.

Моли́твами, и бдѣ́ніемъ, и псало́мскимъ пѣ́ніемъ непреста́ннымъ ду́шу свою́ ра́й живоно́сенъ сотвори́въ, въ не́мже просла́ви Спа́са Го́спода.

Богоро́диченъ: Все́ вре́мя живота́ на́шего во страстѣ́хъ ижди́хомъ и ны́нѣ на́ша моле́нія прино́симъ Тебѣ́, Пречи́стая: разрѣше́ніе пода́ждь на́мъ и вѣ́чнаго на́съ изба́ви муче́нія.

Конда́къ, гла́съ 1:

Но́щи стра́стныя избѣ́гши, богому́драя Софíе преподо́бная, къ Незаходи́мому же Со́лнцу, Христу́, прише́дши, умертви́ла еси́ плотско́е мудрова́ніе, посто́мъ же, воздержа́ніемъ и моли́твами показа́ся равна́ а́нгеломъ, на земли́ бо поживе́ и ду́хи нечи́стыя отъ человѣ́къ отгна́ла еси́, [и разли́чная] исцѣле́нія подава́еши, отъ мно́гихъ бѣ́дъ и зо́лъ избавля́еши, Софíе преподо́бная, моли́ спасти́ся душа́мъ на́шимъ.

Икосъ:

Изъ мла́да Бо́гови вдала́ся еси́, Софíе преподо́бная, я́ко зда́ніе благо́е, и Госпо́дне благо́е и́го усе́рдно отъ ю́ности взе́мши, отлучи́ся своего́ самоде́ржца и невкуси́мо ло́жа жите́йскаго восхотѣ́ пребыва́ти во святѣ́й оби́тели Бо́жія Ма́тере. Тѣ́мже, я́ко безпло́тная, подвиза́лася, воздержа́ніемъ же и моли́твами равна́ а́нгеламъ показа́лася, въ не́йже отхо́диши въ небе́сная селе́нія, и по преставле́ніи свое́мъ отъ пречи́стыя твоея́ ра́ки разли́чная исцѣле́нія подава́еши, и отъ мно́гихъ бѣ́дъ и зо́лъ избавля́еши, Софíе преподо́бная, моли́ спасти́ся душа́мъ на́шимъ.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Въ болѣ́знехъ и́же къ тебѣ́ прибѣга́ющихъ избавля́еши отъ неду́гъ разли́чныхъ [и отъ духо́въ нечи́стыхъ,] Софíе преподо́бная, ко Христу́ вопію́щи: оте́цъ на́шихъ Бо́же, благослове́нъ еси́.

Всю́ обтече́ тва́рь житіе́ твое́ и исправле́ніе, Софíе преподо́бная, и [въ] пресла́вную оби́тель Бо́жія Ма́тере пришла́ еси́, въ не́йже Христу́ вопію́щи: оте́цъ на́шихъ Бо́же, благослове́нъ еси́.

Воздержа́ніемъ истяза́ніе житія́ своего́ показа́ла еси́, Софíе преподо́бная, поще́ніемъ бо кра́йнимъ со безпло́тными соедини́вшися, вопія́ше: оте́цъ на́шихъ Бо́же, благослове́нъ еси́.

Богоро́диченъ: Хра́мъ, освяще́нъ Бо́гови, бы́вши, Марíе Богороди́тельнице, Сего́ моли́ я́ко Человѣколю́бца, Чи́стая, уще́дрити лю́ди согрѣши́вшія и спасти́ отъ бѣ́дъ лю́тыхъ и страсте́й треволне́нія.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Іису́су: Очи́сти и прости́ согрѣше́нія на́ша, Го́споди, моли́твами Твоея́ уго́дницы преподо́бныя Софíи, да пое́мъ Тя́, Христа́, во вѣ́ки.

На земли́ я́ко человѣ́къ ходя́ и житіе́ на небесѣ́хъ вои́стинну стяжа́ла еси́, со а́нгелы непреста́нно пое́ши Христа́ во вѣ́ки.

Твоя́ по́двиги воспѣ́ша а́нгельскія си́лы, Софíе преподо́бная, и твое́ житіе́ ли́ки святы́я похвали́ша, съ ни́ми же согла́сно зове́ши Христа́ во вѣ́ки.

Богоро́диченъ: Твоя́ ми́лости и на мнѣ́ удиви́, Чи́стая, уязвле́нную ду́шу мою́ исцѣли́, и бу́дущаго изба́ви муче́нія, и Ца́рствію Сы́на Твоего́ сподо́би мя́.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Ра́дуйся, гра́де Су́ждалю, воспріи́мъ бо отъ Бо́га сокро́вище некра́домо, помо́щницу вели́кую и засту́пницу те́плую и богоблаже́нную преподо́бную Софíю, и́же ны́нѣ съ ли́ки и́нокинь весели́тся и Богоро́дицу сла́витъ.

Отъ ю́ности своея́ чи́сту со́вѣсть иму́щи къ Бо́гу и Его́ ра́ди благоче́стно пожи́вши, къ вы́шнему пре́йде, моли́ Христа́ Бо́га о на́съ, да тя́ любо́вію почита́емъ.

Въ чистотѣ́ и цѣлому́дріи, и въ чи́стѣмъ пребыва́ніи, и въ житіи́ нескве́рне, я́ко безпло́тна, на земли́ поживе́, востекла́ еси́ въ небе́сныя оби́тели, и съ ли́ки святы́хъ ра́дуешися, съ [преподо́бными и пра́ведными] моли́ о всѣ́хъ Христа́ Человѣколю́бца.

Богоро́диченъ: Львы́, рыка́ющія на мя́, ути́ши, Пречи́стая, мене́ же цѣльбы́ Боже́ственныя сподо́би, Влады́чице, да узрю́ свѣ́тъ богоразу́мія и съ ра́достію воспою́ покро́въ Тво́й, Богоро́дице.

Свѣти́ленъ:

Все́ житіе́ оста́вила еси́ и Христа́ Еди́наго возжела́ла еси́, трудополо́жно пожи́вши, и сме́рть сла́вно воспрія́ла еси́, тѣ́мже па́мять твою́ почита́емъ, Софíе богому́драя. [Два́жды.]

Сла́ва, и ны́нѣ, богоро́диченъ:

Бо́га на́мъ, Пречи́стая, родила́ еси́, и вси́, прароди́тельныя кля́твы изба́вльшеся, воспѣва́емъ Тя́, Пречи́стая.

На хвали́техъ стихи́ры [на 4], гла́съ 8: [Подо́бенъ: О, пресла́внаго чудесе́!]

О, пресла́вное чу́до!* Ка́ко премѣни́ся ра́зумъ тво́й* отъ суеты́ мíра на благоче́стіе?* Смире́нна и цѣлому́дренна показа́ся,* и́нокинямъ наста́вница бы́сть ко спасе́нію,* по́стницамъ похвала́ и утвержде́ніе,* молча́льницамъ удобре́ніе,* тѣ́мже любо́вію па́мять твою́,* Софíе преподо́бная, ублажа́емъ. [Два́жды.]

Имѣ́ Боже́ственную благода́ть,* Софíе, ма́ти преподо́бная,* благода́тію Свята́го Ду́ха* наставля́ема къ жела́нію Боже́ственному,* отону́дуже мірску́ю красоту́ оста́вила еси́* и къ ра́зуму и́стинному возшла́ еси́,* Софíе преподо́бная,* моли́ спасти́ся на́мъ.

Исто́чникъ чуде́съ показа́ла еси́ и рѣку́ дарова́ній,* ра́ку моще́й твои́хъ, Софíе преподо́бная,* слѣпы́мъ е́же ви́дѣти дарова́ла еси́,* прокаже́ннымъ очище́ніе,* одержи́мымъ отъ нечи́стыхъ духо́въ* цѣлому́дріе подава́еши* и отъ всѣ́хъ скорбе́й избавля́еши.

Сла́ва, гла́съ 2:

Преподо́бная Софíе, измла́да въ добродѣ́тели приле́жно подвиза́лася еси́, сосу́дъ бы́сть Свята́го Ду́ха, тѣ́мже и чуде́съ дарова́ніе отъ Бо́га прія́ла еси́, и́нокинь научи́ла еси́ сла́вити Святу́ю Тро́ицу, воздержа́ніемъ и моли́твами преоби́дѣти маловре́менныхъ, и ны́нѣ же неизрече́ннымъ Свѣ́томъ свѣ́тло сія́еши, просвѣти́ ду́ши на́ша помраче́нныя, ма́ти Софíе преподо́бная.

И ны́нѣ, богоро́диченъ, [гла́съ то́йже:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ].

Славосло́віе вели́кое. [Ектеніи́, и отпу́стъ.]



НА ЛИТУРГІИ,

Блаже́нна отъ кано́на, [пѣ́снь 3-я и 6-я. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ.] Апо́столъ къ Гала́томъ, зача́ло 208. [Аллилу́ія, гла́съ 1: Терпя́, потерпѣ́хъ Го́спода, и вня́тъ ми́ и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе отъ Матѳе́я, зача́ло 104. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Примѣчаніе:
[1] Первой стихиры нѣтъ въ службѣ; приводится по изданію: «Минея Декабрь. Часть первая. М., 2002., с. 565».

Источникъ: Служба святыя и преподобныя матере нашея благовѣрныя великія княгини Софіи Суждальскія. Твореніе господина преосвященнаго Серапіона, архіепископа Суждальскаго и Торусскаго. // Историческое и археологическое описаніе Покровскаго дѣвичьяго монастыря, въ городѣ Суздалѣ (Владимірской губерніи), въ связи съ житіемъ преподобной чудотворицы Софіи (въ мірѣ великой княгини Соломоніи) и царицы инокини Елены (въ мірѣ Евдокіи Ѳеодоровны Лопухиной). Съ 4-мя политипажами. / Составилъ И. Токмаковъ. — Владиміръ: Скоропечатня И. Коиль, 1913. — С. 3-12. [2-я паг.]— М.: Въ Сѵнодальной Тѵпографіи, 1872. — Л. 1 – 14 об.

Свѣрено съ изданіемъ: Мине́я Дека́брь. Ча́сть пе́рвая. — М.: Издательскій совѣтъ Русской Православной Церкви, 2002. — С. 564 – 574.

/ Къ оглавленію раздѣла /


Наверхъ / Къ титульной страницѣ

0