Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 16-й де́нь.
Свята́го проро́ка Агге́я.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: Му́ченицы Твои́, Го́споди.

Селе́ніе Го́спода твоего́* и хра́мъ одушевле́нъ бы́въ* житія́ свѣ́тлостію и пребыва́ніемъ,* безду́шный воздви́глъ еси́ хра́мъ,* дре́вле па́дшій, всече́стне,* вселе́нныя Ца́рствующему,* Того́ твои́ми моли́твами моли́* всѣ́мъ дарова́ти ве́лію ми́лость.

Сосу́дъ яви́лся еси́ Ду́ха,* съ небе́съ тебѣ́ подае́мая пріе́мля свѣтоли́тія,* и сія́ній прія́тенъ.* Тѣ́мъ прорица́еши спаси́тельное всѣ́мъ человѣ́комъ избавле́ніе;* Того́ твои́ми моли́твами умоли́* всѣ́мъ дарова́ти ве́лію ми́лость.

Заре́ю лучено́сною облія́емь,* и видѣ́нія сподобля́емь,* и чистѣ́йшаго и невече́рняго просвѣще́нія* я́влься, блаже́нне, испо́лненъ,* тя́ воспѣва́ющія соблюди́,* моля́ еди́наго Го́спода* всѣ́мъ да́ти ве́лію ми́лость.

Ины стихи́ры Пресвятѣ́й Богоро́дицѣ, гла́съ и подо́бенъ то́йже:

Исхити́ мя, Влады́чице, изъ руки́ змíя человѣкоубíйцы, борю́щаго мя́ ле́стію пожре́ти до конца́, сокруши́ че́люсти сего́, молю́ся, и кова́рствія разори́, я́ко да, изба́влься сего́ ногте́й, велича́ю си́лу Твою́.

Азъ е́смь дре́во непло́дное, Всенепоро́чная, неплодя́щее плода́ спасе́ннаго; тѣ́мже и трепе́щу посѣче́нія, да не ка́ко вве́рженъ бу́ду во о́гнь негаси́мый, окая́нный. Тѣ́мже Ти́ припа́даю: сего́ изба́ви мя́ и плодоно́сна покажи́, Чи́стая, Сы́ну Твоему́ хода́тайствомъ Твои́мъ.

Помышле́нія нечи́ста и уста́ льсти́ва, дѣла́ же моя́ вся́ оскверне́на, и что́ сотворю́? ка́ко усря́щу Судію́? Влады́чице Дѣ́во, моли́ Сы́на Твоего́ и Зижди́теля и Го́спода, я́ко да въ покая́ніи пріи́метъ ду́хъ мо́й, я́ко Еди́нъ Благоутро́бенъ.

Сла́ва, и ны́нѣ, богоро́диченъ:

Го́ре прогнѣ́вавшему своего́ Бо́га, увы́ мнѣ́, въ невѣ́дѣніи и пребыва́ющу во уны́ніи и лѣ́ности, я́коже а́зъ. Влады́чице Дѣ́во! Ты́ помози́ ми́, омраче́нному, и моли́ся Твоему́ Сы́ну и Содѣ́телю да́ти ми́ согрѣше́ній проще́ніе.

Крестобогоро́диченъ:

Юница Нескве́рная Юнца́ ви́дящи на дре́вѣ, пригвожда́ема во́лею, рыда́ющи жа́лостнѣ: увы́ Мнѣ́! — вопія́ше, — люби́мѣйшее Ча́до! что́ Ти со́нмъ воздаде́ безблагода́тный евре́йскій, хотя́ Мя обезча́дствовати отъ Тебе́, Вселюбе́зне?


НА УТРЕНИ,
Оба кано́на окто́иха и проро́ка [канонъ] на 4, его́же краегране́сіе: Богода́нная пое́мъ Агге́ева словеса́. Ѳеофа́ново. Гла́съ 7.

Пѣ́снь 1.

Ирмо́съ: Измѣ́ншему Бо́гу Изра́иля отъ мо́ря Чермна́го побѣ́дную пѣ́снь пои́мъ, я́ко просла́вися.

Богови́днѣйшій, Бо́гу предстоя́, я́ко проро́къ и́стиненъ, пою́щихъ честну́ю па́мять твою́, блаже́нне, помина́й.

На основа́ніи тве́рдѣмъ добродѣ́телей тебе́ сама́го назда́въ, возложи́лся еси́ хра́мъ одушевле́нъ, богоблаже́нне.

Чистѣ́йшій тво́й у́мъ, при́сно зря́ Бо́га, я́ко мо́щно, та́мошними далечесія́тельно дарова́ніи, блаже́нне, облиста́.

Богоро́диченъ: Тя́, безма́терня пе́рвѣе, Сло́во Бо́жіе, Дѣ́ва, во утро́бѣ заче́нши пло́тски, родила́ е́сть, Сы́на безо́тча.

Пѣ́снь 3.

Ирмо́съ: Утверди́ся вѣ́рою Христо́ва Це́рковь, и́бо непреста́нно пѣ́сньми вопіе́тъ, пою́щи: Свя́тъ еси́, Го́споди, и Тя́ пое́тъ ду́хъ мо́й.

Си́лою Боже́ственною де́монскаго лю́таго плѣне́нія на́съ разрѣши́въ, хра́мы твоя́ че́стны, Спа́се, покажи́, Свя́тъ еси́, — зову́щія, — спаса́яй ду́ши на́ша.

Въ высоча́йшихъ обита́яй и исполня́я вселе́нную святы́ни, проро́че, хра́мъ тя́ показу́етъ, Свя́тъ еси́, — зову́ща, — спаса́яй ду́ши на́ша.

Боже́ственный Ду́хъ, всѣ́мъ благода́ть раздава́яй, въ твое́ се́рдце всели́вся, вопи́ти тя́ науча́етъ: Свя́тъ еси́, Го́споди, спаса́яй ду́ши на́ша.

Богоро́диченъ: Сло́вомъ всю́ тва́рь му́дрѣ содѣ́тельствовавый, содѣ́тельствуется изъ Тебе́ по на́мъ, Богоро́дице, Человѣ́къ бы́въ за милосе́рдіе, Человѣколю́бецъ.

Сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственнымъ Ду́хомъ просвѣще́ну мы́сль имѣ́я, проро́че, Бо́жія прорица́еши та́инства, открыва́я бу́дущихъ явле́ніе и сказу́я веще́й сбытіе́, Агге́е всеблаже́нне, Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Боже́ственнаго естества́ не отлу́чся, пло́ть бы́въ во чре́вѣ Твое́мъ, но Бо́гъ вочеловѣ́чся и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ всенепоро́чну, Еди́нъ Госпо́дь; Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, Нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Услы́шахъ слу́хъ Тво́й, Го́споди, я́ко яви́лся еси́ на земли́, за е́же спасти́ ны, тѣ́мъ вопіе́мъ: сла́ва си́лѣ Твое́й, Го́споди.

Показа́лъ еси́ изъ Дѣ́вы одушевле́нный прія́тый Тебѣ́ до́мъ Твоему́ проро́ку, Христе́, съ ни́мже вопіе́мъ: сла́ва си́лѣ Твое́й, Го́споди.

Собра́лъ еси́ отринове́нныя, Го́споди, рабо́ты вра́жія свобожде́й на́съ, я́коже проро́къ глаго́летъ богопрія́тный.

Яви́лъ еси́ бу́дущее послѣди́ спасе́ніе язы́ковъ Твоему́ проро́ку, Христе́, Тебѣ́ вопію́щу: сла́ва си́лѣ Твое́й, Го́споди.

Богоро́диченъ: Преложи́ла еси́ на благослове́ніе, Влады́чице, прокля́тство Ада́мово, на́мъ ро́ждши Христа́. Къ Нему́же вопіе́мъ: сла́ва си́лѣ Твое́й, Го́споди.

Пѣ́снь 5.

Ирмо́съ: Къ Тебѣ́ у́тренюю и Тебѣ́ вопію́, благоутро́бне Го́споди: омраче́нную грѣхми́ ду́шу мою́, свѣ́томъ озари́въ за́повѣдей Твои́хъ, наста́ви.

Хра́мы бы́ти Бо́га Жива́го, блаже́нне, сподо́би свѣтоно́сный тво́й соверша́ющія пра́здникъ, на ка́мени утверди́въ твои́хъ догма́товъ моли́твами твои́ми.

Яко Благодѣ́тель, Тво́й ми́ръ да́ждь на́мъ, Го́споди, я́же на устрое́ніе, ми́ръ душе́вный, его́же боже́ственный Агге́й Ду́хомъ Боже́ственнымъ предглаго́ла.

Вели́ко бу́детъ Це́ркве и́стинно благосла́віе, па́че пе́рваго Изра́илева со́нмища, вопло́щшагося Сло́ва, и человѣ́комъ приобщи́вшася.

Богоро́диченъ: Благослове́нная препросла́вленная Ма́ти неискусому́жная, умерщвле́нную грѣхми́ ду́шу мою́ и страстьми́ невоздержа́нія погребе́нную оживотвори́.

Пѣ́снь 6.

Ирмо́съ: Іо́на изъ чре́ва а́дова вопія́ше: возведи́ отъ тли́ живо́тъ мо́й. Мы́ же Тебѣ́ вопіе́мъ: Всеси́льне Спа́се, поми́луй на́съ.

Юношески благоче́стію, блаже́нне, уча́, воздви́глъ еси́ Влады́цѣ всѣ́хъ хра́мъ освяще́нъ, оби́ліе благи́хъ обѣща́я.

Возве́лъ еси́ отъ да́льняго, Спа́се, плѣне́нія человѣ́ка, изъ глубины́ до́льнѣйшія, и къ Го́рнему гра́ду возве́лъ еси́ его́ я́ко Человѣколю́бецъ.

Ра́дуяся, Ду́ха заре́ю, проро́че, проре́клъ еси́ дѣ́ятельныхъ словеса́ и благоче́стія наказа́лъ еси́ на́съ оправда́ніемъ.

Богоро́диченъ: Хотѣ́ніемъ па́дъ, изгна́ся Ада́мъ изъ рая́, Сло́во же, вопло́щся изъ Дѣ́вы, сего́ взыва́етъ и къ Го́рнѣй сла́дости возво́дитъ.

Пѣ́снь 7.

Ирмо́съ: Въ пе́щь о́гненную вве́ржени, преподо́бніи о́троцы о́гнь въ ро́су преложи́ша, воспѣва́ніемъ си́це вопію́ще: благослове́нъ еси́, Го́споди, Бо́же оте́цъ на́шихъ.

Очи́стивъ тво́й у́мъ, воспрія́лъ еси́ сія́нія я́вѣ, проро́че, Ду́ха, свѣ́тло прорица́я и взыва́я: благослове́нъ еси́, Го́споди, Бо́же оте́цъ на́шихъ.

Свяще́ннѣйшую тя́ жи́знь проходя́ща ви́дѣвъ Бо́гъ, проро́ка предлага́етъ Своего́ прише́ствія, всѣ́мъ вопію́ща: благослове́нъ еси́, Го́споди, Бо́же оте́цъ на́шихъ.

Богоро́диченъ: Въ пещи́ о́гненнѣй три́ о́троки спасы́й, Дѣ́во, То́й, всели́вся во утро́бу Твою́, на Того́ надѣ́ющіяся спаса́етъ, вопію́щія: благослове́нъ, Всечи́стая, Пло́дъ чре́ва Твоего́.

Пѣ́снь 8.

Ирмо́съ: Еди́наго Безнача́льнаго Царя́ Сла́вы, Его́же благосло́вятъ небе́сныя си́лы и трепе́щутъ чи́ни а́нгельстіи, по́йте, свяще́нницы, лю́діе, превозноси́те Его́ во вѣ́ки.

Пѣсносло́вимъ тя́, всѣ́хъ Влады́ку, Его́же проро́къ богови́децъ Агге́й показа́ покланя́тися же и пѣ́ти: по́йте, свяще́нницы, лю́діе, превозноси́те Его́ во вѣ́ки.

Сло́ву Безнача́льному въ послѣ́днихъ временѣ́хъ яви́тися, богови́дче проро́че, провозвѣсти́лъ еси́ явле́нно, взыва́я: по́йте, свяще́нницы, лю́діе, превозноси́те Его́ во вѣ́ки.

Богоро́диченъ: Пре́жде Неви́дѣнный и Невмѣсти́мый естество́мъ, во чре́во Твое́ вмѣ́щся, ви́дѣнъ бы́сть, Всечи́стая. Ему́же вѣ́рно вопіе́мъ: по́йте, свяще́нницы, лю́діе, превозноси́те Его́ во вѣ́ки.

Пѣ́снь 9.

Ирмо́съ: Всепѣ́тая, небе́съ превы́шшая, Безнача́льное Сло́во безсѣ́менно заче́ншая и воплоще́ннаго Бо́га ро́ждшая человѣ́комъ, тѣ́мъ Тя́ вси́ велича́емъ.

Вкуси́въ е́же па́че сло́ва боговидѣ́нія, оттря́слъ еси́, проро́че, попече́нія земна́я и препросла́вленному Бо́гу предста́лъ еси́ досто́йно. Тѣ́мже вси́ тя́, вѣ́рніи, ублажа́емъ.

Боже́ственное и чу́дное твое́, блаже́нне, житіе́ предста́теля тя́ Бо́гу показа́, богому́дре, и со безпло́тными ли́ки весели́шися вѣ́чно. Тѣ́мже вси́ тя при́сно ублажа́емъ.

Подоба́ше тебѣ́, я́ко благоче́стія учи́телю, съ Бо́гомъ бы́ти и Сего́ страствори́тися Пречи́стѣйшему Свѣ́ту, Его́же, блаже́нне, ны́нѣ моли́ изба́вити искуше́ній ду́ши на́ша.

Богоро́диченъ: Ты́ была́ еси́ преесте́ственно, Богороди́тельнице, жили́ще и́стинно всѣ́хъ Царя́, и златови́дный ковче́гъ, Еди́наго Законода́вца вну́трь имѣ́я, Христа́ воплоща́ема.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 134 – 137.

/ Къ оглавленію раздѣла /


Наверхъ / Къ титульной страницѣ

0