Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 15-й де́нь.
Свята́го священному́ченика Елевѳе́рія и преподо́бнаго отца́ на́шего Па́вла, и́же въ Ла́трѣ.

Аще изво́лиши, по́й Аллилу́ія.

[ВЕЧЕРЪ,]
На Го́споди воззва́хъ: стихи́ры священному́ченика 3 и преподо́бнаго 3.
Стихи́ры священному́ченика, гла́съ 4. Подо́бенъ: Да́лъ еси́ зна́меніе.

Сосу́дъ свяще́ннѣйшій* Ду́ха Боже́ственнаго бы́лъ еси́,* ду́шу очи́стивъ отъ страсте́й, свяще́ннѣйше.* Отсю́ду Боже́ственное пома́заніе свято́е прія́лъ еси́,* архіере́й бы́въ, и наста́вникъ люде́й богому́дрый,* и му́ченикъ непобѣди́мь* на́съ ра́ди стра́сти Претерпѣ́вшаго* и безстра́стіе Источи́вшаго,* страда́льче Елевѳе́ріе.

До́брѣ по́двигъ тя́* ви́дѣвши сконча́вша,* я́же до́брѣ тя́ ро́ждшая,* ра́вное жела́ющи тебѣ́* проити́ тече́ніе,* тебе́ объе́мши посредѣ́ три́знища, му́дре,* я́коже ю́ница, закала́ется.* Съ не́юже мо́лимъ тя́:* о на́съ, Елевѳе́ріе, Спа́са и Го́спода умоли́, преблаже́нне.

Тѣ́ло преоби́дѣлъ еси́,* ураня́емо біе́ньми* и огню́ приближа́ющееся.* Умъ бо впери́лъ еси́ непобѣди́мымъ жела́ніемъ,* краснѣ́йшею добро́тою Боже́ственнаго рачи́теля,* Его́же сла́дкимъ уязви́лся еси́ жела́ніемъ,* му́чениковъ удобре́ніе, архіере́евъ украше́ніе,* страда́льче Елевѳе́ріе, а́нгеловъ собесѣ́дниче.

Стихи́ры преподо́бнаго, гла́съ 2. Подо́бенъ: Егда́ отъ дре́ва.

Па́вле, мона́шествующихъ добро́та, прозябе́ніе кра́сное пусты́ни, преподо́бныхъ хвала́, Ла́тра честносло́віе, вѣ́рныхъ тве́рдь, любо́вію соверша́ющія твою́ всечестну́ю па́мять и моще́й твои́хъ облобыза́ющія ра́ку изба́ви обстоя́нія вся́каго и о́гненнаго осужде́нія, ко Влады́цѣ твои́ми моли́твами.

Хра́мъ Тро́ицы тебе́ сама́го содѣ́лавъ, о́тче богоблаже́нне, хра́мъ бо и́мени Сея́ воздви́глъ еси́, въ пусты́ни же непрохо́дныя Ла́трскія вше́дъ, я́ко Моисе́й въ Сина́йскую го́ру, всели́лся еси́, идѣ́же, пріе́мъ Боже́ственный зако́нъ, мона́шествующихъ мно́жества и́стинно науча́еши изря́днѣйшимъ, всечу́дне.

Имѣ́я дерзнове́ніе къ Бо́гу, па́ствѣ, ю́же соста́вилъ еси́ мно́гими по́ты, преподо́бне, моли́ сохрани́тися отъ искуше́ній врага́ и язы́ческихъ нахожде́ній, огня́ же и меча́ и вся́каго прило́га навѣ́та лука́ваго: тебе́ бо градоде́ржца и покро́въ иму́ще, на тя́ наде́жду съ Бо́гомъ стяжа́хомъ, блаже́нне.

Сла́ва, и ны́нѣ, богоро́диченъ. Подо́бенъ то́йже.

Еди́на невмѣсти́маго Бо́га нетѣсномѣ́стно во чре́вѣ носи́ла еси́, Человѣ́ка бы́вша за бла́гость, Пресвята́я Богоневѣ́сто. Тѣ́мже молю́ Тя́: утѣсня́ющихъ мя́ страсте́й измѣни́, я́ко да тѣ́сную и пра́вую стезю́, ше́ствовавъ, дости́гну, ю́же къ жи́зни, Дѣ́во, водя́щую.

Крестобогоро́диченъ:

Егда́ нескве́рная Агница ви́дѣ Своего́ Агнца на заколе́ніе, я́ко Человѣ́ка, во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, ро́ждшую Тя́, что́ сіе́ сотвори́лъ еси́, Изба́вителю вся́ческихъ, оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ, апо́столомъ бы́въ, дѣя́ніе обрѣ́лъ еси́, богодохнове́нне, въ видѣ́нія восхо́дъ, сего́ ра́ди, сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Елевѳе́ріе, моли́ Христа́ Бо́га спасти́ся душа́мъ на́шимъ.

Сла́ва, преподо́бнаго, гла́съ то́йже:

Яко безпло́тныхъ единовсе́льника и всѣ́мъ преподо́бнымъ соо́бщника, всесла́вне Па́вле, пое́мъ тя́ и мо́лимъ тя́: моли́ся всегда́ о на́съ, я́ко да обря́щемъ ми́лость.

И ны́нѣ, богоро́диченъ.



НА УТРЕНИ,
Еди́нъ кано́нъ окто́иха и святы́хъ два́.

Кано́нъ священному́ченика, его́же краегране́сіе: Страсте́й свобо́дна мя́ покажи́, всеблаже́нне. Іо́сифъ. Гла́съ 1.
Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Страсте́й омраче́ніемъ порабоще́ннаго, свѣ́тлыми моли́твами твои́ми, му́чениче Елевѳе́ріе, ны́нѣ свободи́, да я́ко раба́ тя́ Христо́ва Боже́ственными воспою́ пѣ́сньми.

Страда́нія возсія́лъ еси́ чистѣ́йшими заря́ми, свяще́ннѣйше, обагри́лъ еси́ кро́вію свяще́нную твою́ оде́жду и бы́лъ еси́ свѣтови́дѣнъ ду́хомъ.

Бо́гу прилѣпля́яся чистѣ́йшимъ умо́мъ отъ ю́ности, плотска́го мудрова́нія ду́шу удали́лъ еси́ и чуде́съ оби́льною благода́тію обогати́лся еси́.

Богоро́диченъ: Яко престо́лъ огнезра́ченъ, но́сиши Зижди́теля, я́ко одушевле́нъ черто́гъ и красна́ пала́та, Царя́ вмѣща́еши, бы́вшаго, е́же есмы́, кромѣ́ преложе́нія и смѣше́нія.

Инъ кано́нъ преподо́бнаго, гла́съ то́йже.
Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Но́вое тебѣ́ пѣ́ніе похва́льное привнести́ во отверзе́ніе у́стъ, Па́вле богоно́се, тща́щуся, пода́ждь ми́ глаго́лати твои́ми моли́твами, преподо́бне, благода́ть, я́ко да по́двиги твоя́ честны́я проповѣ́мъ.

Отъ ю́ности, преподо́бне, яре́мъ Госпо́день воспріе́мь, и, въ бразда́хъ твоего́ се́рдца пшени́цу сѣ́явъ духо́вную, кла́съ пожа́лъ еси́, утвержда́ющь ду́ши, богоблаже́нне.

По́ты мно́жайшими воспрія́лъ еси́ вы́шнее Ца́рство, я́ко безпло́тенъ на земли́ жи́въ и тѣ́ломъ пожи́въ а́нгельское житіе́. И ны́нѣ у́бо, въ высоча́йшихъ Тро́ицѣ предстоя́, на́съ помина́й.

Богоро́диченъ: Тлѣ́нную мою́ пло́ть, Богоневѣ́сто, пріе́мъ отъ Твои́хъ крове́й Безпло́тный и, въ я́слехъ возлегíй во́лею, сію́, ю́же прія́тъ, обожа́етъ пло́ть, Богома́ти, отъ соедине́нія ея́ Преблагíй.

Пѣ́снь 3.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

За Христа́ страда́ти изво́ливый, я́звы терпи́ши тѣле́сныя, услажда́яся, му́дре, болѣ́зньми и скорбьми́; сего́ ра́ди неболѣ́зненну жи́знь ны́нѣ воспрія́лъ еси́.

Те́плымъ жела́ніемъ сотво́ршаго, страда́льче богому́дре, держи́мь, разжже́ннѣй тебе́ сама́го поверга́еши хи́трости, ороша́емь Ду́ха огне́мъ, Елевѳе́ріе.

Во свяще́нницѣхъ свяще́ннѣйшій и въ му́ченицѣхъ му́ченикъ твердѣ́йшій я́влься, вѣне́цъ сугу́бъ прія́лъ еси́, блаже́нне, лице́ Бо́жіе вы́ну ви́дя.

Богоро́диченъ: Же́злъ крѣ́пости прозябла́ еси́ — Христа́, Имже утвержда́емся: Тя́ бо вообража́ше Ааро́новъ же́злъ, иногда́ прозя́бшій, недѣ́ланная земле́, Чи́стая Голуби́це Приснодѣ́во.

Инъ.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

О, твоего́ му́жества! О, ду́шевныя до́блести, сла́вне! Ты́ бо, члено́вныя льво́въ сокруши́ти неви́димыхъ жела́я, два́ ка́меня носи́лъ еси́ превели́ка во вре́мя но́щи, тяготу́ на ра́менахъ.

Кто́ твоя́ по́двиги изрещи́ по достоя́нію возмо́жетъ? Ты́ бо, пути́ жесто́кія въ пусты́ни ше́ствуя, суро́выя же́луди ѣ́лъ еси́, вкуше́ніе навыца́я твое́ услажда́ти болѣ́зньми воздержа́нія.

Богови́децъ дре́вле Моисе́й въ купинѣ́ сподо́бися та́инственнаго видѣ́нія, всечестны́й же Па́велъ, огню́ я́вльшуся свы́ше, са́мъ позна́ я́вѣ себе́ сама́го, неопа́льно распаля́ема.

Богоро́диченъ: Безнача́ленъ Сы́й естество́мъ я́ко Бо́гъ и Отцу́ Сло́во равноче́стное, е́же подъ лѣ́томъ прія́лъ еси́, ро́ждся отъ Дѣ́вы, нача́ло, естество́мъ я́влься Человѣ́къ, и, младе́нствовавъ, я́ко Отроча́, Ты́, Христе́, яви́лся еси́, пелена́ми пови́тъ.

Конда́къ преподо́бнаго, гла́съ 8. Подо́бенъ: Взбра́нной.

Отъ ю́ности, му́дре, я́же па́че смы́сла вожделѣ́лъ еси́ му́жески, мірскíй мяте́жъ оста́вилъ еси́, и бы́лъ еси́ Боже́ственнаго ра́ди жи́тельства Тро́ицы жили́ще, и просвѣти́лъ еси́ вѣ́рою приступа́ющія тебѣ́. Тѣ́мъ зове́мъ: ра́дуйся, Па́вле пребога́те.

Сѣда́ленъ священному́ченика, гла́съ 1. Подо́бенъ: Гро́бъ Тво́й, Спа́се.

Свобо́денъ у́мъ отъ страсте́й стяжа́въ, бы́лъ еси́ Бо́жій и́скреннѣйшій ра́бъ и отъ ле́сти свободи́лъ еси́ до́брѣ послу́шавшія тебе́: пострада́въ же я́ко іере́й и му́ченикъ, Елевѳе́ріе, сугу́бъ прія́лъ еси́ вѣне́цъ: моли́ спасти́ся на́мъ.

Сла́ва, преподо́бнаго, гла́съ 8. Подо́бенъ: Прему́дрости.

Окормля́емь си́лою вседѣ́тельною и вѣ́триломъ вкриля́емь кре́стнымъ, легко́ преплы́лъ еси́ жите́йскую бу́рю и къ боже́ственнымъ и́стинно приста́нищемъ дости́глъ еси́, добродѣ́телей ку́плю мно́гу стяжа́въ, ю́же Влады́цѣ всѣ́хъ прине́слъ еси́ и е́же, благíй ра́бе, слы́шалъ еси́ и си́мъ послѣ́дующая. Тѣ́мже, Па́вле блаже́нне, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

И ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Крестобогоро́диченъ:

Дѣ́ва и Ма́ти Изба́вителя, Кресту́ предстоя́ще, болѣ́зненно со слеза́ми рыда́ющи, ма́терски вопія́ше: что́ стра́нное сіе́ и пресла́вное, Сы́не? Источа́яй всѣ́мъ человѣ́комъ безстра́стіе, посредѣ́ осужде́нною на Крестѣ́ распя́тся, въ ре́бра пробода́емь и же́лчію напоя́емь отъ ру́къ, я́же созда́лъ еси́. Но воста́ни и да́руй прегрѣше́ній оставле́ніе вѣ́рою пою́щимъ Боже́ственная Твоя́ страда́нія.

Пѣ́снь 4.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ — позна́ешися, внегда́ пріити́ вре́мени — пока́жешися. Сла́ва си́лѣ Твое́й, Го́споди.

Ни зія́нія льво́въ, ни врѣ́нія огня́, ни лю́тыхъ преще́нія крѣ́пости твоего́, священнотаи́нниче, разсла́биша терпѣ́нія, но, я́ко адама́нтъ, му́ками услажда́лся еси́, ре́вностію Боже́ственною распаля́емь.

Во́дъ живото́чныхъ уста́ твоя́ испо́лнена, рѣ́ки источи́ша Боже́ственныхъ уче́ній, священному́чениче, потопля́ющія беззако́ннующихъ руга́нія и напая́ющія сердца́ позна́вшихъ Христа́ Бо́га.

Вельми́ тя прославля́я тво́й Содѣ́тель, за Него́же усе́рдствовалъ еси́ страда́ти, страстоте́рпче, го́лубя тебѣ́ посыла́етъ, приноша́юща пи́щу а́нгельскую, равноа́нгельну бы́вшу страда́ній свѣтлѣ́йшими сія́ньми.

Богоро́диченъ: Ужасо́шася зря́ще а́нгельская во́инства, ка́ко Неви́димый зра́комъ су́щимъ по на́мъ изъ Тебе́ ви́дѣнъ бы́сть, Дѣ́во Богороди́тельнице: Его́же моли́ спасе́нія сподо́бити вся́, вѣ́рно Тя́ сла́вящія.

Инъ.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Сно́мъ побѣди́вшуся тебѣ́ иногда́ во вре́мя ю́ности и ко всено́щному осла́бившуся стоя́нію, тво́й, ви́дѣвъ, честны́й учи́тель Пе́тръ по лицу́, о́тче, ударя́етъ и, тебѣ́ зауше́ніе да́въ, дае́тъ а́біе исцѣле́ніе.

Бо́гу осо́бь бесѣ́дуя и Сему́ прибли́жився несре́дственнѣ, Па́велъ, оте́цъ на́шъ, никогда́же побѣди́вся, отъ сна́ пребы́сть по я́звѣ учи́телевѣ, но, я́коже безпло́тенъ сы́й, бо́дръ при́сно бы́сть.

Сосу́дъ свяще́ннѣйшій я́влься, мѵ́ро небе́сное — Христа́ прія́лъ еси́ се́рдцемъ твои́мъ и, свѣщу́ твоего́ терпѣли́внаго воздержа́нія жи́тельствомъ добродѣ́тельнымъ вже́гъ свѣ́тло, къ невѣ́стнику Боже́ственному восте́клъ еси́.

Богоро́диченъ: Имѣ́я, Сло́ве, престо́лъ не́бо, зе́млю же подно́жіе, въ ложесна́ Дѣ́вы, воплоща́яся, вше́лъ еси́ и во убо́гъ верте́пъ всели́лся еси́; отъ волхво́въ же, царе́й перси́дскихъ, я́ко Ца́рь да́ры и Богочеловѣ́къ прія́лъ еси́.

Пѣ́снь 5.

Ирмо́съ: Тво́й ми́ръ да́ждь на́мъ, Сы́не Бо́жій, ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Ле́стными ухищря́яй укра́сти тя́ словесы́, му́чениче, вра́гъ вселука́вый смѣ́хъ зри́тся, му́дростію твое́ю мудре́цъ зло́бы прехищря́емь.

На колесни́цѣ взима́емь Боже́ственныхъ добродѣ́телей, сла́вне, высоту́ дости́глъ еси́ муче́нія и низложи́лъ еси́ лука́выхъ бѣсо́въ превознесе́нную горды́ню.

Ви́дѣти красоту́ жела́я Іису́сову, преподо́бне, тебе́ сама́го украси́лъ еси́ муче́нія красото́ю и къ Нему́ прише́лъ еси́, вѣнча́вся свѣ́тлымъ вѣнце́мъ.

Богоро́диченъ: Удивля́етъ вся́къ у́мъ чу́до Твое́, Чи́стая: ражда́еши бо Бо́га пло́тію и Пита́теля пита́еши млеко́мъ, искуше́нія му́жеска не позна́вши, Са́мъ я́ко вѣ́сть Еди́нъ.

Инъ.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Отъ ка́ла страсте́й очи́стивъ у́мъ, нескве́рно зерца́ло бы́лъ еси́, осія́нія Ду́ха пріе́мъ при́сно. Тѣ́мже тебѣ́ искуси́тель посрами́ся, прирази́вся, и́же са́да зло́бы не́мощь изучи́вый.

Му́дрость су́що — Христа́ Бо́га во твое́мъ се́рдцы стяжа́въ обита́ющую, нему́драго низложи́лъ еси́ зло́бы мудреца́ нога́ми твои́ми кра́сными, мудростьми́ разли́чными прельсти́ти тя́, Па́вле богому́дре, покуша́ющася.

Свѣ́та сы́й прія́телище, дне́ сы́нъ, тмы́ прельсти́лъ еси́ нача́льника, я́коже льва́, на тя́ навѣ́тующа, земны́ми тру́сы и колеба́ніи ка́меній, безсту́діемъ устраша́юща, Па́вле, и мечта́ніи свирѣ́пствующа.

Богоро́диченъ: Изве́рженна пе́рваго Ада́ма изъ Еде́ма, Приснодѣ́во Отрокови́це Богоневѣ́сто, Сло́во Пребезнача́льное, изъ Тебе́ вопло́щся и въ я́сли безслове́сныхъ восклони́вся я́ко Младе́нецъ, на́шъ ро́дъ отъ безслове́сія изба́ви.

Пѣ́снь 6.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.

Наро́читый ове́нъ па́ствъ Христо́выхъ, па́стырь слове́снѣйшій, по́двиговъ стезя́ прославля́ется, Бо́га просла́вивъ свои́ми удесы́.

Вжили́вся къ Бо́гу воззрѣ́ніи, му́дре, обезжи́лилъ еси́ врага́ многоко́зненнаго тве́рдо, приснопа́мятне, му́чениковъ сла́во, свяще́нства пра́вило.

Къ ра́намъ терпя́, ко огню́ самоидя́, успи́лъ еси́ звѣре́й свирѣ́пыхъ стремле́нія, неусы́пну къ Зижди́телю имѣ́я любо́вь.

Богоро́диченъ: Свяще́нія сѣ́нь я́вльшися, Марíе, оскверне́нную сластьми́ окая́нную мою́ ду́шу освяти́ и Боже́ственныя сла́вы прича́стницу сотвори́.

Инъ.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Якоже Спа́съ, Христо́съ Бо́гъ на́шъ, ма́лыми хлѣ́бы наро́дъ насы́ти многочи́сленъ, та́кожде и Па́велъ, таи́нникъ Христо́въ, скуде́ла малѣ́йшаго ма́лою водо́ю мно́жества до сы́тости возвесели́, и сы́тость явля́етъ оби́ліе.

Уставля́еши зно́й моли́твами твои́ми, чу́дне, и рѣши́ши гла́дъ прети́мый: вода́ми же, свы́ше пролія́вшимися, упая́еши зе́млю и напая́еши сухíя сея́ бразды́, прозяба́я и богатя́ дарова́ніи и умножа́яй сея́ дѣ́ланіе.

Неболѣ́зненную жи́знь въ болѣ́знехъ воспрія́лъ еси́ и болѣ́зней лю́тыхъ уставля́еши озлобле́ніе, вѣ́рою прося́щимъ прія́ти врачева́нія отъ тебе́, всече́стне, отце́въ добро́то. Тѣ́мже разрѣши́ болѣ́зни моя́ душе́вныя и тѣле́сныя, молю́ся.

Богоро́диченъ: Сло́во Отчее, Сы́не Бо́жій безлѣ́тне и порожде́ніе Ма́тере Чи́стыя Богоотрокови́цы превѣ́чное, я́ко Бо́гъ и я́ко Человѣ́къ младе́нецъ Сы́й въ верте́пѣ вмѣсти́ся Невмѣсти́мый. Тѣ́мже вси́, дивя́щеся, покланя́емся вели́кому та́инству.

Конда́къ священному́ченику, гла́съ 2. Подо́бенъ: Тве́рдыя.

Яко удобре́ніе свяще́нниковъ, преподо́бне, и предувѣща́ніе страстоте́рпцевъ вси́ восхваля́емъ и про́симъ тя́, священному́чениче Елевѳе́ріе: любо́вію па́мять твою́ пра́зднующія бѣ́дъ многообра́зныхъ свободи́, моля́ непреста́нно о всѣ́хъ на́съ.

Икосъ:

Пре́зри, Благоутро́бне Жизнода́вче, я́ко Человѣколю́бецъ Еди́нъ и ще́дрый Бо́гъ, души́ моея́ омраче́ніе и всемо́щною десни́цею Твое́ю, Сло́ве, страсте́й свободи́ стуже́нія, я́ко да Твоего́ іера́рха воспою́ Елевѳе́рія, то́й бо и́стинно изъ утро́бы позна́ся Тебѣ́, и освяти́ся, и возложе́нъ бы́сть, я́ко Самуи́лъ, отъ ма́тере свяще́нныя Тебѣ́, Зижди́телю, моля́ непреста́нно о всѣ́хъ на́съ.

Пѣ́снь 7.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́ я́ко еди́нѣми усты́ поя́ху и благословля́ху, глаго́люще: благослове́нъ Бо́гъ оте́цъ на́шихъ.

Да велича́ется, — взыва́лъ еси́, му́дре, раздробля́емь, — ны́нѣ во пло́ти мое́й Христо́съ, не ужаса́юся распале́ній коно́бовъ, не бою́ся сме́рти, ни звѣре́й стремле́ній су́щія ра́ди жи́зни.

Еди́наго Бо́га добро́ты искíй, еди́ну Того́ сла́ву получи́ти жела́ю, да раздробля́ется и опаля́ется все́ тѣ́ло мое́, — взыва́лъ еси́, сла́вне, — свобожде́нія ищу́, порабоща́ющаго Христу́.

Смотря́я бу́дущую жи́знь, блаже́нне, мíру умертви́лся еси́ и́стинно, и, я́ко зла́то, я́звенными искуше́ніи разже́гся, просія́лъ еси́, и положи́лся еси́ въ сокро́вищахъ небе́сныхъ оби́телей.

Богоро́диченъ: Чистѣ́йшу Тя́ Еди́ну обрѣ́тъ, Всенепоро́чная, Сло́во Чистѣ́йшее Бо́жіе, изъ чре́ва Твоего́ роди́вся, вѣ́рныя очища́етъ оскверне́нія, Богоневѣ́сто, прибы́вшая на́мъ отъ неудержа́нія страсте́й.

Инъ.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Яко со́лнце возсія́въ, восто́къ а́біе просвѣти́лъ еси́, на сто́лпъ же возше́дъ, я́ко посредѣ́ небесе́ стоя́, вселе́нную всю́ уче́ніи возвесели́лъ еси́, — отце́въ, — вопія́, — Бо́же, благослове́нъ еси́.

Удали́лся еси́, бѣ́гая мірски́хъ во́лнъ, и, въ пусты́ни псало́мски водвори́вся, богоблаже́нне, прія́лъ еси́ Бо́га въ се́рдцы твое́мъ, а́нгельскимъ хране́ніемъ тебе́ соблюда́юща.

Зрѣ́лъ еси́ муче́нія та́мошняя мы́сленными очесы́ и, человѣколю́бною твое́ю душе́ю се́рдцемъ болѣ́знуя, слеза́ми себе́ при́сно омака́лъ еси́, не я́ко Дави́дъ во вре́мя но́щи посте́лю.

Богоро́диченъ: Безпло́тный воплоща́ется, и Безлѣ́тный въ лѣ́то быва́етъ, и пелена́ми повива́ется на́съ ра́ди, Иже зе́млю повива́яй Госпо́дь мгло́ю, пло́ть Са́мъ па́че постиже́нія неизмѣ́нно яви́вся отъ Неискусому́жныя.

Пѣ́снь 8.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Процвѣ́тъ, прозя́блъ еси́ са́дъ красе́нъ муче́ній свѣ́тлостьми, му́чениковъ добро́то, и ны́нѣ рая́ цвѣ́ти яви́стеся, Боже́ственно благово́ніе испуща́юще Боже́ственнѣ.

Кропле́ньми крове́й твои́хъ, рожде́ннаго изъ нея́, кро́вь свою́ ма́ти пріобща́етъ: твоему́ бо тѣлеси́ объе́мшися, му́дре, мече́мъ скончава́ется и живе́тъ во вѣ́ки.

Исцѣле́ній во́ды, чуде́съ рѣ́ки излива́етъ тре́бующимъ ра́ка твоя́, му́дре, отмыва́юще скве́рны душетлѣ́нныхъ страсте́й, му́чениче іера́рше, во вся́ вѣ́ки.

Богоро́диченъ: Яко до́ждь, во утро́бу Твою́ сни́де Христо́съ и всю́ напои́ тва́рь вои́стинну, изсуши́въ, Дѣ́во, му́тныя рѣ́ки идолонеи́стовства, Еди́нъ Благодѣ́тель.

Инъ.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Спротяже́ну съ Дави́домъ благогла́сну пѣ́снь всестро́йну пѣ́лъ еси́, глаго́ля: я́ко утѣше́нія Твоя́ ду́шу мою́ боголѣ́пно человѣколю́бнымъ манове́ніемъ, Всецарю́, возвесели́ша. Тѣ́мже, ра́дуяся, взыва́лъ еси́: да благослови́тъ тва́рь вся́ Го́спода и превозно́ситъ Его́ во вѣ́ки.

Подава́яй тебѣ́ я́же проти́ву любви́ Зижди́тель, отъ ю́ности соблюда́я тя́ десни́цею, и треми́ пита́етъ тя́ сала́тами боголѣ́пно, я́ко отъ младе́нства вся́ко похотѣ́ніе попра́вша, руко́ю же а́нгела сія́ дае́тъ, я́ко а́нгельскому житію́ ревну́ющу, препросла́вленному тебѣ́, Па́вле богоно́се.

Возмого́ша убѣжа́ти осужде́нія тріе́ осужде́нніи свя́зани му́жіе, я́ко укло́ншеся служе́нія о́бщаго: у́зъ бо неви́димо и́менемъ разрѣ́шшеся твои́мъ, о́тче всесла́вне, свя́занныхъ отъ бѣ́дъ изба́ви, и еди́ною носи́мы руко́ю Содержа́щаго.

Богоро́диченъ: Со́лнце пра́вды ро́ждшая звѣздо́ю созыва́етъ волхвы́ со зла́томъ, и сми́рною же, и лива́номъ, новолѣ́пно покланя́ющеся невра́щно Младе́нствовавшему, Его́же па́стыріе возвели́чиша, и а́нгелъ мно́жества воспѣ́ша, сла́вяще, я́ко и по существу́ Бо́га и Человѣ́ка естество́мъ.

Пѣ́снь 9.

Ирмо́съ: Живопріе́мный исто́чникъ приснотеку́щій, свѣтоно́сный свѣти́льникъ благода́ти, хра́мъ одушевле́нный, сѣ́нь пречи́стую, небесе́ и земли́ простра́ннѣйшую, Богоро́дицу, вѣ́рніи, велича́емъ.

Уста́ Бо́жія бы́въ, отъ у́стъ чужда́го лю́ди суему́дренныя восхи́тивъ, показа́лъ еси́ наслѣ́дники благода́ти и, пострада́въ крѣ́пко, со іере́и и страда́льцы живе́ши, Елевѳе́ріе.

Чи́стая мѵрополо́жница Ду́ха, добродѣ́телей кра́сное жили́ще, а́гнецъ незло́бивый, свѣти́льникъ незаходи́мый, іера́рховъ степе́нь и му́чениковъ, да восхва́лится вѣ́рно Елевѳе́рій.

Во свѣ́тѣ живе́ши и́стинно невече́рнѣмъ, свѣ́тъ бы́въ со́лнца свѣтлѣ́йшій. Тѣ́мъ па́мять твою́ свѣтоно́сную дне́сь соверша́ющія страсте́й мглы́ изба́ви къ Бо́гу твои́ми моли́твами, Елевѳе́ріе.

Богоро́диченъ: Пощади́ на́съ, пою́щихъ Твое́, Го́споди, е́же изъ Дѣ́вы, неизрече́нное Рождество́, отъ напа́стей избавля́я, и страсте́й, и скорбе́й мольба́ми Ея́ Твоя́ рабы́, я́ко Благодѣ́тель и Еди́нъ Человѣколю́бецъ.

Инъ.

Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Повѣ́дуетъ е́же къ Бо́гу дерзнове́ніе твое́ и я́же соверши́лъ еси́, по е́же къ Нему́ отше́ствіи, чу́дная дѣла́: мно́гихъ бо еле́емъ твоего́ свѣтовожде́нія отъ неду́гъ разли́чныхъ свободи́лъ еси́.

Всесвѣ́тлу твою́ ду́шу имѣ́я, преподо́бне, я́ко мѵ́ромъ благода́ти ве́сь напои́вся, еле́емъ де́моны отго́ниши, прокаже́нныя очища́я и угрызе́нныя главы́ и кра́стъ лю́тыхъ уставля́я болѣ́зни.

Распа́дся, па́даетъ сатана́ вселука́вый о́бразомъ всесвирѣ́па звѣ́ря, зря́ просте́рта тебе́ еле́й канди́ла твоего́, я́ко мѵ́ро, на исцѣле́ніе разли́чныхъ неду́говъ, и, стра́хомъ одержи́мь, исчезе́.

Богоро́диченъ: Зачала́ еси́ въ послѣ́дняя лѣ́та въ ложесна́хъ Твои́хъ, Его́же Оте́цъ роди́, Сы́на, пре́жде вѣ́къ нетлѣ́нно, Неискусому́жная Ма́ти. Сего́ звѣздо́ю небеса́ показу́ютъ и земля́ пеще́рою земно́ю.

Свѣти́ленъ окто́иха. Сла́ва, преподо́бнаго. Подо́бенъ: Со ученики́ взы́демъ.

Дави́дски процвѣ́лъ еси́ въ дому́ Госпо́дни, я́ко фи́никсъ, о́тче преподо́бне, плоды́ твои́хъ трудо́въ во сто́ ны́нѣ умно́живъ. Тѣ́мже по́лкъ де́моновъ ту́чами сле́зъ твои́хъ, Па́вле блаже́нне, погру́жь, отъ Христа́ по́честь и вѣне́цъ побѣ́ды прія́лъ еси́ и чуде́съ, прему́дре, незави́стнобогатую благода́ть.

И ны́нѣ, богоро́диченъ:

Иже горѣ́ сла́вимый Бо́жески отъ а́нгелъ, нѣ́дръ Оте́ческихъ не отступи́въ, Чи́стая, неизрече́нно съ до́льними поживе́; Ты́ же сего́ была́ еси́ спасе́нія вино́вна, отъ чисты́хъ Твои́хъ крове́й Сему́, Чи́стая, па́че сло́ва пло́ть заимода́вши. Его́же моли́ рабо́мъ Твои́мъ избавле́ніе да́ти прегрѣше́ній.

На стихо́внѣ окто́иха.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 117 об. – 124 об.

/ Къ оглавленію раздѣла /


Наверхъ / Къ титульной страницѣ

0