Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 15-й де́нь.
Слу́жба на преставле́ніе преподо́бнаго отца́ на́шего Три́фона, Пече́нгскаго чудотво́рца.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гласъ 8. Подо́бенъ: О, пресла́внаго чудесе́!

Преподо́бне Три́фоне богому́дре, чи́стая твоя́ душа́, богопросвѣще́ннымъ смы́сломъ сія́ющи, облиста́ющи добродѣ́телей свѣтлостьми́, озаря́етъ вѣ́рныхъ исполне́ніе, бѣсо́вскую тму́ отгоня́ющи, того́ ра́ди ублажа́емъ тя́.

Имѣ́я ду́шу ми́лостивну, и чи́стъ по́мыслъ, и се́рдце бо́дро, вѣ́ру небла́зненну и любо́вь, вои́стинну нелицемѣ́рну, отъ земли́ преста́вился еси́ къ небе́снымъ, преподо́бне о́тче на́шъ Три́фоне, и съ ли́ки проповѣ́дниковъ и пустынножи́телей водворя́ешися; тѣ́мже тя́ почита́емъ свяще́нными пѣ́сньми и благоче́стно сла́вимъ.

Сла́ва, гла́съ 1:

Преподо́бне о́тче на́шъ Три́фоне, удивля́емся житію́ твоему́ непоро́чному и хва́лимъ тя́, равноа́нгельне, почита́емъ по́мысла твоего́ цѣлому́дріе, воспѣва́емъ крѣ́пости твоея́ смире́нное и молчали́вое, блажи́мъ тя́, въ ми́лости неоску́днаго и всѣ́ми добродѣ́тельми чу́днаго. Си́хъ бо ра́ди свяще́нныхъ по́двигъ твои́хъ наслажда́ешися у Христа́ Бо́га неизрече́нныя Его́ ра́дости въ небе́снѣмъ Ца́рствіи.

И ны́нѣ, богоро́диченъ:

Грѣ́шныхъ моли́твы пріе́млющи и скорбя́щихъ воздыха́нія не презира́ющи, Ма́ти Милосе́рдая, Иже изъ Тебе́ ро́ждшагося Сы́на, Христа́ Бо́га на́шего, моли́ спасти́ся душа́мъ на́шимъ.

Проки́менъ дне́.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ и жили́ще Ду́ху Свято́му, прему́дре о́тче на́шъ Три́фоне, бы́лъ еси́, тѣ́мже вопіе́мъ: Ца́рствію Бо́жію рабы́ твоя́ прича́стники сотвори́, святу́ю твою́ па́мять любо́вію почита́ющія.

Сти́хъ: Честна́ предъ Го́сподемъ сме́рть преподо́бныхъ Его́.

Житіе́ твое́, преподо́бне, я́ко со́лнце, во страна́хъ сѣ́верныхъ возсія́, чудеса́ испуща́я; тѣ́мже и на́съ свѣ́томъ невече́рнимъ озари́, па́мять твою́ воспѣва́ющихъ при́сно.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Преподо́бне о́тче, не преста́й моля́ся о оби́тели твое́й и о при́сныхъ твои́хъ рабѣ́хъ, и́хже духо́внымъ благовѣ́стіемъ твои́мъ породи́лъ еси́, да вси́ честно́е твое́ пра́зднество, веселя́щеся, почита́емъ.

Сла́ва, гла́съ 4:

Земна́го а́нгела и небе́снаго человѣ́ка, преподо́бнаго отца́ на́шего Три́фона, бра́тіе, вси́ почти́мъ, исто́чника умиле́нія, ми́лости тече́ніе, струю́ исцѣле́ній, ма́слину Бо́жію, въ пусты́ни плодови́ту, и припаде́мъ ему́, глаго́люще: преподо́бне о́тче, еле́емъ пусты́нныхъ твои́хъ трудо́въ просвѣща́й на́съ, вѣ́рно хва́лящихъ и любо́вію чту́щихъ святу́ю па́мять твою́.

И ны́нѣ, богоро́диченъ:

Изба́ви на́съ отъ бѣ́дъ, Богоро́дице Дѣ́во, Ма́ти Христа́ Бо́га, да вси́ вопіе́мъ Ти́: ра́дуйся, Еди́на Вино́вная спасе́нію ду́шъ на́шихъ.

Тропа́рь, гла́съ 8:

Пути́, вводя́щаго въ жи́знь, наста́вникъ и учи́тель бы́лъ еси́: пе́рвѣе бо, преподо́бне о́тче на́шъ Три́фоне, прише́лъ еси́ въ ча́сть Норве́гскія земли́ и въ послѣ́днихъ концѣ́хъ сѣ́верныя страны́ язы́ки просвѣти́лъ еси́, породи́въ водо́ю и Ду́хомъ Святы́мъ, и свяще́нная твоя́ ча́да въ безпло́днѣй пусты́ни, я́ко древа́ ма́сличная, насади́лъ еси́, ве́лію оби́тель Святы́я и Живонача́льныя, Единосу́щныя и Нераздѣ́льныя Тро́ицы созда́лъ еси́ и мона́ховъ мно́жество собра́въ. Тѣ́мъ, я́ко апо́столомъ и пустынножи́телемъ равноче́стна чту́ще тя́, прилѣ́жно припа́дающе, вопіе́мъ: моли́ всѣ́хъ Бо́га за Импера́тора, за о́бласть твою́ и за вся́ лю́ди, почита́ющія па́мять твою́.

[Сла́ва, и ны́нѣ, богоро́диченъ:

Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.]


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ. На Го́споди воззва́хъ:] стихи́ры [на 8], гла́съ 6:

Видѣ́ній и дѣя́ній богомы́сліемъ возве́дся, богоподража́теленъ показа́лся еси́, преподо́бне Три́фоне, посредѣ́ непрохо́дныхъ пусты́нь процвѣты́й, я́ко фи́никсъ, оби́тель Всесвяты́я Тро́ицы и ины́я хра́мы возгради́лъ еси́, и́нокъ мно́жество собра́въ; сего́ ра́ди, вѣ́рная ча́да твоя́, любе́зно почита́емъ па́мять твою́. [Два́жды.]

Прему́дре Три́фоне, проразумѣ́въ мимотеку́щихъ пре́лесть, ученико́мъ твои́мъ, я́ко злогуби́тельна го́рькаго мо́ря, бѣ́гати мíра повелѣ́лъ еси́ и ны́нѣ, къ вы́шнимъ оби́телемъ преста́влься, не преста́й уча́ на́съ и моля́ся о душа́хъ на́шихъ.

Въ настоя́щемъ вѣ́цѣ жи́зни сея́ ничто́же сла́дко и красно́ проразсуди́вый, о́тче на́шъ Трифоне, въ пусты́няхъ, въ гора́хъ и въ де́брехъ безмо́лвно стра́нствуя, ко еди́ному Бо́гу при́сно взира́лъ еси́, се́рдце твое́ Святѣ́й Тро́ицѣ до́мъ чи́стъ соблюды́й, ду́шу же твою́ вся́кія стра́сти свобо́дну содѣ́лалъ еси́. Святу́ю Тро́ицу моли́ о душа́хъ на́шихъ.

Ины стихи́ры, гла́съ 8:

Преподо́бне о́тче Три́фоне, у́ды твоя́ рабы́ пра́вды сотвори́лъ еси́ и во обы́чаи твое́мъ воспрія́лъ еси́ сла́дцѣ, е́же о скоротеку́щихъ не смуща́тися, ниже́ болѣ́зновати мы́слію, ду́шу же твою́, сле́зными моли́твами цвѣту́щу, всегда́ имѣ́лъ еси́, того́ ра́ди разу́мное въ Бо́зѣ гряду́щее блаже́нство получи́лъ еси́. Моли́ся Го́сподеви о душа́хъ на́шихъ. [Два́жды.]

Преподо́бне о́тче на́шъ, исповѣ́дниче Христо́въ Три́фоне, ты́ просвѣти́лъ еси́ язы́ческій наро́дъ благовѣ́стіемъ, и, во оби́тели Святы́я Тро́ицы ча́да твоя́ возрасти́въ, изоби́льно сло́вомъ Бо́жіимъ па́че ме́да напита́лъ еси́, и пре́жде всѣ́хъ Ца́рствія Бо́жія и пра́вды его́ иска́ти повелѣ́лъ еси́. Того́ ра́ди ве́лій да́ръ цѣле́нія отъ Бо́га воспрія́вый, моли́ся о душа́хъ на́шихъ.

Преподо́бне о́тче Три́фоне, ты́, въ пусты́ни на діа́вола хра́бро во́инствовавъ, въ зна́меніе побѣ́ды ку́щу свою́, я́ко на небеси́, въ непрохо́дныхъ водрузи́лъ еси́, сего́ ра́ди Христа́ Бо́га до́брый во́инъ бы́лъ еси́ и ны́нѣ, со а́нгелы водворя́яся во свѣ́тѣ непристу́пнѣмъ, моли́ся о душа́хъ на́шихъ.

Сла́ва, гла́съ 8:

Мона́ховъ мно́жество, равноапо́стольне и пусты́нный жи́телю Три́фоне, наста́вника тя́ почита́емъ: ты́ апо́стольское сло́во показа́лъ еси́, дѣла́ Христа́ Бо́га невѣ́дущему язы́ку проповѣ́далъ еси́, и, духо́внымъ мече́мъ себе́ закла́въ, ве́ліимъ смиренному́дріемъ высо́къ показа́лся еси́, и всѣ́мъ служи́тель и послу́шникъ бы́лъ еси́. Сего́ ра́ди Іису́съ, Свѣ́тъ Ти́хій, вознесе́ тя и воспросла́ви, обогати́въ чудесы́. Его́же моли́ о душа́хъ на́шихъ.

И ны́нѣ, богоро́диченъ:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

[Вхо́дъ.] Проки́менъ дне́. [И чте́нія три́, преподо́бническая.]

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 5:

Преподо́бне о́тче на́шъ Три́фоне, почита́емъ въ убо́жествѣ бога́тство твое́ и въ преселе́ніи одержа́ніе, въ безче́стіи сла́ву, въ не́мощи си́лу, въ безбра́чіи по Бо́зѣ рожде́нное доброча́дство. Тѣ́мъ, я́ко люби́мый, Святѣ́й Тро́ицѣ пря́мо прибли́жился еси́, моли́ о душа́хъ на́шихъ.

Преподо́бне о́тче, исповѣ́дниче Христо́въ Три́фоне, тя́ всего́ себе́ по вся́кому совокупле́нію устро́ивый въ Ду́сѣ: за ра́дость пла́чь, за весе́ліе вре́тище, за пра́зднство осе́льскихъ ка́меней ноше́ніе соизво́ливъ, и па́че зла́та и ка́меній многоцѣ́нныхъ оте́чество го́рнее возлюби́лъ еси́. Моли́ о душа́хъ на́шихъ.

Преподо́бне о́тче, ты́ въ пусты́ни дѣ́тельныя прему́дрости отъ Вы́шняго ча́ши поче́рплъ еси́, жи́знь кра́ткую отри́нулъ еси́; наставля́й на́съ, я́ко и́скреннихъ ча́дъ твои́хъ, единоу́міемъ пра́выя вѣ́ры въ до́брое твое́ о́тческое наслѣ́діе и моли́ Святу́ю Тро́ицу спасти́ся душа́мъ на́шимъ.

Сла́ва, гла́съ 6:

Преподо́бне о́тче Три́фоне, ты́, узрѣ́въ Бо́жій жре́бій ра́ди и́хъ безбо́жнаго и те́мнаго невѣ́дѣнія, въ гора́хъ и въ де́брехъ діа́вольскою ле́стію растерза́нный, ничто́же себѣ́ того́ печа́льнѣе и плаче́внѣе суди́лъ еси́ и, ко еди́ному Бо́гу въ моли́твахъ во́пльствовавъ, прилѣ́жно прося́ отъ обдержа́щихъ и́хъ зо́лъ рѣше́нія, не да́лъ еси́ сна́ очеса́мъ, ниже́ дрема́нія вѣ́ждома твои́ма, до́ндеже ди́віимъ поврежде́нныхъ ко свѣ́ту богоразу́мія обрати́лъ еси́. Моли́ Святу́ю Тро́ицу за Импера́тора и вся́ лю́ди, поми́ловатися душа́мъ на́шимъ.

И ны́нѣ, богоро́диченъ:

[Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.]

На стихо́внѣ стихи́ры, гла́съ 8:

Ра́дуйся, преподо́бне о́тче на́шъ Три́фоне, всесла́дкими уче́ній твои́хъ вода́ми напои́вый страну́ сѣ́верную, сего́ ра́ди Госпо́дь Бо́гъ возда́рова тя́ вѣнце́мъ небе́снымъ.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, равноапо́стольне Три́фоне, я́ко пре́лесть бѣсо́вскую соверше́нною не́навистію возненави́дѣвъ, въ пусты́ни протяже́нныя сѣ́ти зло́бы до конца́ истреби́лъ еси́, того́ ра́ди и Христо́съ Бо́гъ пома́за тя́ прича́стіемъ небе́сныя Своея́ ра́дости. Моли́ спасти́ся душа́мъ на́шимъ.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ра́дуйся, Три́фоне преподо́бне, исповѣ́дниче вѣ́ры, просвѣти́вый страну́ коне́чную и пусты́ню непрохо́дную, безмо́лвіемъ и въ моли́твахъ сле́зными пото́ки Бо́гови угоди́вый. Моли́ за на́съ Святу́ю Тро́ицу, любоче́стно па́мять твою́ пра́зднующихъ.

Сла́ва, гла́съ 2:

Преподо́бне о́тче Три́фоне, па́мять твоего́ успе́нія дне́сь возсія́, я́ко со́лнце, и, я́ко мѵ́ро, излія́ся въ сердца́хъ на́шихъ, благоуха́я обоня́ніемъ ду́ши на́ша. Ты́ бо по успе́ніи твое́мъ чудесы́ твои́ми царя́ и лю́ди удиви́лъ еси́. Святу́ю Тро́ицу моли́ спасти́ся душа́мъ на́шимъ.

И ны́нѣ, богоро́диченъ:

[О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.]

На благослове́ніи хлѣ́бовъ: Тропа́рь, гла́съ 8: Пути́, вводя́щаго въ жи́знь... [пи́санъ на ма́лѣй вече́рни], два́жды. И Богоро́дице Дѣ́во.., еди́ножды.



НА УТРЕНИ,
[На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.]

По 1-й каѳи́смѣ сѣда́ленъ, гла́съ 5. Подо́бенъ: Собезнача́льное Сло́во.

Тве́рдаго адама́нта и столпа́, непоколеби́ма вра́жіими прило́ги, преподо́бнаго и богоно́снаго отца́ на́шего Три́фона пѣ́сньми почти́мъ: терпѣ́ніемъ бо свои́мъ въ непроходи́мыхъ пусты́няхъ порази́лъ е́сть сопроти́внаго врага́, и безвѣ́стна того́ сотвори́, и ны́нѣ у престо́ла Бо́жія мо́лится о душа́хъ на́шихъ. [Два́жды.]

Сла́ва, и ны́нѣ, богоро́диченъ:

Ужа́сно чу́до зача́тія, и несказа́ненъ о́бразъ рождества́ въ Тебѣ́ позна́ся, Чи́стая Приснодѣ́во, ужаса́етъ мо́й у́мъ и удивля́етъ по́мыслъ, сла́ва бо Твоя́, Богоро́дице, всѣ́мъ простре́ся во спасе́ніе ду́шъ на́шихъ.

По 2-й каѳи́смѣ сѣда́ленъ, гла́съ 4:

По пусты́ни стра́ннымъ тече́ніемъ, и посто́мъ, и воздержа́ніемъ, и на о́стромъ ка́меніи лега́ніемъ увяди́лъ еси́ пло́ть свою́, ду́ши же мно́гихъ во Христа́ вѣ́рою обогати́въ и тѣ́мъ Бо́гу угоди́въ, отъ Него́ мно́гъ да́ръ исцѣле́ній прія́лъ еси́, преподо́бне Три́фоне. Того́ моли́ о чту́щихъ любо́вію святу́ю и досточу́дную па́мять твою́. [Два́жды.]

Сла́ва, и ны́нѣ, богоро́диченъ:

Обнови́ла еси́, Пречи́стая, Боже́ственнымъ Рождество́мъ Твои́мъ истлѣ́вшее страстьми́ земноро́дныхъ ме́ртвенное существо́ и возста́вила еси́ вся́ отъ сме́рти къ жи́зни нетлѣ́нней, тѣ́мже Тя́ по до́лгу велича́емъ вси́, Дѣ́во Препросла́вленная, я́коже прорекла́ еси́.

По поліеле́и:

Ублажа́емъ тя́, преподо́бне о́тче Три́фоне, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода...

По поліеле́и сѣда́ленъ, гла́съ 4. Подо́бенъ: Ско́ро предвари́.

Яви́лся еси́ чу́денъ въ терпѣ́ніи твое́мъ, преподо́бне Три́фоне, про́повѣдію, и́ночествомъ и всѣ́ми благи́ми ви́ды Христо́ви угоди́вый. Избра́въ бо до́брая, е́же Бо́га ра́ди въ пусты́нехъ скита́тися и лю́ди на спасе́нныя стези́ наставля́ти, му́жески разсужда́я, глаго́лалъ еси́: а́ще и я́ръ невѣ́рный язы́къ, но про́повѣди ра́ди сла́докъ ра́й; болѣ́зненно по пусты́немъ скита́ніе и стра́нство, но блаже́нно безсме́ртное воспрія́тіе. Тѣ́мже, о́тче на́шъ, мо́лимъ тя́: Христу́ моли́ся за всѣ́хъ на́съ, да сподо́бимся небе́снаго Ца́рствія. [Два́жды.]

Сла́ва, и ны́нѣ, богоро́диченъ:

Тебе́ велича́емъ, Богоро́дице, вопію́ще: Ты́ еди́на Благослове́нная, изъ Тебе́ бо неизрече́нно роди́ся Христо́съ Бо́гъ на́шъ. Ра́дуйся, Живота́ на́шего Ма́ти Препросла́вленная.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви [о всѣ́хъ, я́же воздаде́ ми]? Вся́кое дыха́ніе... Ева́нгеліе отъ Матѳе́я, зача́ло 10.

По 50-мъ псалмѣ́ стихи́ра, гла́съ 6:

Боже́ственнымъ Ду́хомъ свы́ше обле́кся, со дерзнове́ніемъ проповѣ́далъ еси́ и́мя Христа́ Бо́га на́шего беззако́ннымъ, преподо́бне о́тче Три́фоне, бѣсо́вскія ссѣ́клъ еси́ полки́ и а́нгельскія дости́глъ еси́ чи́ны, того́ ра́ди въ небе́сныхъ селе́ніихъ обрѣ́лъ еси́ мзду́ трудо́въ твои́хъ. И ны́нѣ, имѣ́я дерзнове́ніе ко Святѣ́й Тро́ице, ми́ръ испроси́ душа́мъ на́шимъ.

[Кано́нъ Богоро́дицѣ со ирмосо́мъ на 6 и преподо́бному на 8.]

Кано́нъ преподо́бному отцу́ на́шему Три́фону, Пече́нгскому чудотво́рцу, гла́съ 1.

Пѣ́снь 1.

Ирмо́съ: Пои́мъ, вси́ лю́діе, отъ го́рькія рабо́ты фарао́ни Изра́иля Измѣ́ншему и во глубинѣ́ морстѣ́й нога́ми немо́крыми Наста́вльшему пѣ́снь побѣ́дную, я́ко просла́вися.

Пои́мъ, вси́ лю́діе, вели́каго въ чудесѣ́хъ преподо́бнаго отца́ на́шего Три́фона, отъ го́рькія діа́вольскія рабо́ты лю́ди изба́вльшаго и во свято́е креще́ніе приве́дшаго, и воздади́мъ сла́ву Христу́ Бо́гу: сла́вно бо просла́вися.

Пои́мъ, вси́ лю́діе, я́ко втора́го Па́вла, вели́каго отца́ на́шего Три́фона, зва́нію Го́спода своего́ послѣ́довавша, Его́же, я́ко драго́е сокро́вище, обрѣ́те на селѣ́ пусты́ннѣмъ и тѣ́мъ обогати́ свое́ се́рдце. Сего́ ра́ди, преподо́бне, мо́лимъ тя́: моли́ Святу́ю Тро́ицу, да пода́стъ на́мъ ми́ръ и бога́тую ми́лость.

Пои́мъ, вси́ бра́тіе, равноа́нгельнаго Три́фона, огне́мъ Боже́ственныя любве́ распали́вшагося, любо́вь роди́телей свои́хъ и до́мъ оста́вльшаго. Сего́ ра́ди имѣ́яй дерзнове́ніе ко Го́споду мо́лится о душа́хъ на́шихъ.

Богоро́диченъ: Пои́мъ, вси́ лю́діе, Спа́са Ро́ждшую и Бо́га, Яже, мно́гое на́ше уны́ніе и печа́ль отгоня́ющи, душа́мъ на́шимъ подае́тъ ве́лію ми́лость. Сего́ ра́ди возопіи́мъ къ Не́й: Богоро́дице, Пречи́стая Дѣ́во, моли́твою къ Сы́ну Твоему́ и Бо́гу на́шему отъ тя́жкихъ и лю́тыхъ на́съ спаси́.

Пѣ́снь 3.

Ирмо́съ: Утверди́ мене́, Христе́, на недви́жимомъ ка́мени за́повѣдей Твои́хъ и просвѣти́ мя свѣ́томъ лица́ Твоего́: нѣ́сть бо свя́тъ, па́че Тебе́, Человѣколю́бче.

Утверди́вся вѣ́рою во Святу́ю Тро́ицу, я́ко щито́мъ крѣ́пкимъ, преподо́бне, вся́ мíра сего́ бога́тая и кра́сная презрѣ́лъ еси́, съ Па́вломъ суди́вый ничто́же и́но, то́кмо Христа́ Іису́са вѣ́дѣти и Того́ ра́спята, Его́же моли́, да изба́витъ на́съ отъ вся́кихъ лю́тыхъ.

Утверди́въ Христа́ Бо́га зва́ніемъ мы́сль твою́, отъ страны́ твоея́, я́ко пра́ведный Авраа́мъ, избѣ́глъ еси́. Сего́ ра́ди зове́мъ ти́: ра́дуйся, пра́отцемъ единонра́вный о́тче на́шъ.

Утверди́вый Госпо́дь Бо́гъ на́шъ, Іису́съ Христо́съ, пе́рвыхъ Свои́хъ ученико́въ на ка́мени Своего́ повелѣ́нія, То́й же Всемогу́щій утверди́ тя въ послѣ́днемъ вѣ́цѣ, во страну́ конце́въ посла́въ, да та́мо лю́ди свѣ́томъ вѣ́ры просвѣти́ши. Моли́ за Царя́ и за лю́ди, почита́ющія па́мять твою́.

Богоро́диченъ: Утвержде́ніе на́ше въ бу́ри и благоути́шное приста́нище во свирѣ́помъ волне́ніи, Тя́, Пресвяту́ю Дѣ́ву, еди́наго отъ Тро́ицы, Христа́, ро́ждшую, мо́лимъ, я́ко благолюби́ву, помощи́ на́мъ и изба́вити на́съ отъ язы́ка льсти́ва.

Сѣда́ленъ, гла́съ 8:

Тро́ицы рачи́теля, вели́каго отца́ Три́фона, науча́юща сѣ́верныя страны́ я́сно вѣ́рѣ Боже́ственнѣй и оби́тель во сла́ву Святы́я Тро́ицы созда́вшаго, въ пѣ́снехъ досто́йно, вѣ́рніи, почти́мъ, взыва́юще: ра́дуйся, проповѣ́дниче вѣ́ры. [Два́жды.]

Сла́ва, и ны́нѣ, богоро́диченъ:

Тя́ пѣ́сньми немо́лчными ублажа́емъ, Дѣ́во, я́ко отъ Тро́ицы Еди́наго родила́ еси́, Богоро́дице, и но́сиши на блаже́нную руку́ Пребога́тое Сло́во, непремѣ́нно и неизмѣ́нно.

Пѣ́снь 4.

Ирмо́съ: Ве́лія та́йна Твоего́, Христе́, смотре́нія: сію́ бо свы́ше прови́дя богозри́тельно, Авваку́мъ изше́лъ еси́, вопія́ше Тебѣ́, во спасе́ніе люде́й Твои́хъ, Человѣколю́бче.

Ве́лію та́йну Твоего́, Христе́, явле́нія преподо́бный оте́цъ на́шъ Три́фонъ бли́зъ до́му своего́ въ пусты́ни ви́дѣвъ, потече́ въ да́льныя страны́ и та́мо наро́ды спасе́ною стезе́ю введе́ въ небе́сное Ца́рствіе. Мо́лимъ Тя́, Бо́же на́шъ, упра́ви и на́съ браздо́ю покая́нія во о́ное блаже́нное гражда́нство.

Ве́лію та́йну Бо́жія повелѣ́нія, преподо́бне Три́фоне, показа́вый дѣ́ломъ, во и́мя Святы́я и Живонача́льныя Тро́ицы хра́мъ созда́въ, оби́тель возгради́въ и мно́жество учени́къ собра́въ, моли́ Святу́ю Тро́ицу поми́ловатися душа́мъ на́шимъ.

Ве́лію та́йну, преподо́бне о́тче, твои́хъ пусты́нныхъ трудо́въ, алка́ніе, жа́жду, во благовѣ́стіи отъ язы́ческаго наро́да біе́ніе, о зе́млю ударе́ніе и разли́чныхъ муче́ній преще́ніе кто́ исповѣ́сть? То́кмо еди́ному вѣ́дущу Бо́гу. Сего́ ра́ди вопіе́мъ ти́: ра́дуйся, Христа́ ра́ди Бо́га на́шего многострада́льный о́тче на́шъ Три́фоне.

Богоро́диченъ: Вели́кими и многоразли́чными та́йнами, Богоро́дице Дѣ́во, рождество́ Твое́ дре́вле прообразова́ся, мы́ же, сбытіе́ зря́ще, я́ко къ Ма́тери Бо́жіей притека́емъ и сле́зно мо́лимъ: скры́й на́съ въ та́йнѣ кро́ва Твоего́.

Пѣ́снь 5.

Ирмо́съ: Озари́ на́шъ у́мъ, Бо́же, свѣ́томъ за́повѣдей Твои́хъ, и свѣ́тлостію благода́ти Твоея́, да́руя на́мъ, Бла́же, Твоя́ ми́лости, зане́ свѣ́тъ и ми́ръ повелѣ́нія Твоя́.

Озари́въ у́мъ тво́й, преподо́бне о́тче Три́фоне, Бо́жіимъ зако́номъ, измла́да моли́твами сле́зными Святу́ю Тро́ицу уми́лостивилъ еси́, сего́ ра́ди, просія́въ вели́кими чудесы́, моли́ о душа́хъ на́шихъ.

Озари́лъ еси́ свѣ́томъ Ева́нгельскія про́повѣди лю́ди ослѣпле́нныя, и мы́, раби́ твои́, вѣ́дяще тобо́ю проповѣ́даннаго Сы́на Бо́жія, Свѣ́та Невече́рняго, Ему́же ны́нѣ предстои́ши, мо́лимся: моли́ за царя́ и за всѣ́хъ, спасти́ся душа́мъ на́шимъ.

Озари́ на́съ, о́тче Три́фоне, послуша́ніемъ за́повѣдей Бо́жіихъ, и наста́ви на стезю́ покая́нія, и сподо́би на́съ, грѣ́шныхъ, по исхо́дѣ ду́шъ получи́ти страну́ десну́ю, почита́ющихъ святу́ю па́мять твою́.

Богоро́диченъ: Озаре́ніе на́ше, Свята́я Дѣ́во Ма́ти, Ты́ денни́ца у́тренняя, Вели́кое Со́лнце, Христа́ Бо́га на́шего, къ на́мъ вводя́щая, Его́же моли́ спасти́ся душа́мъ на́шимъ.

Пѣ́снь 6.

Ирмо́съ: Проро́ка спа́слъ еси́ отъ ки́та, Человѣколю́бче, и мене́ изъ глубины́ прегрѣше́ній возведи́, молю́ся.

Проро́ческое прозрѣ́ніе, преподо́бне о́тче на́шъ Три́фоне, са́мою и́стиною изобрази́въ, а́лчущихъ хлѣ́бомъ живо́тнымъ сла́дцѣ насы́тивъ, и о на́съ блага́го Бо́га моли́, да сподо́битъ предража́йшія Своея́ Трапе́зы причасти́тися невозбра́нно.

Проро́ку Іо́нѣ, преподо́бне о́тче, подража́лъ еси́: о́нъ бо вели́кій гра́дъ Ниневíю покая́ніемъ отъ я́звы па́губныя спасе́, ты́ же, расточе́нныхъ во единомы́сліе собра́вый, во Святу́ю Тро́ицу вѣ́ровати научи́лъ еси́. Въ моли́твахъ твои́хъ не забыва́й на́съ, ча́дъ твои́хъ.

Проро́ческое Писа́ніе о воплоще́ніи Сы́на Бо́жія я́сно невѣ́дущему язы́ку показа́лъ еси́ и, я́ко драги́мъ сокро́вищемъ, о́ный обогати́въ, Святѣ́й Тро́ицѣ моли́ся о душа́хъ на́шихъ.

Богоро́диченъ: Проро́цы святíи издале́ча прореко́ша, Ма́ти Свята́я, Твое́ рождество́: Еди́наго бо отъ Тро́ицы, Сы́на Бо́жія, безму́жно родила́ еси́ и по рождествѣ́ Дѣ́ва пребыла́ еси́. Моли́ Его́ поми́ловати ду́ши на́ша.

Конда́къ, гла́съ 8. Подо́бенъ: Взбра́нной Воево́де.

Все́ твое́ у́мное жела́ніе къ Бо́гу впери́въ, Того́ зва́нію невозвра́тно отъ души́ послѣ́довалъ еси́, въ пусты́ню коне́чную всели́вся, и, та́мо а́нгельски и равноапо́стольнѣ пожи́въ, мно́гимъ пу́ть бы́лъ еси́ ко спасе́нію. Сего́ ра́ди и Христо́съ тя́ просла́ви и да́ромъ чуде́съ обогати́. Ибо вели́кихъ царе́й Іоа́нна и Ѳео́дора Россíйскихъ удиви́лъ еси́. Тѣ́мже вси́ вопіе́мъ ти́: ра́дуйся, исповѣ́дниче Христа́ Бо́га на́шего; ра́дуйся, гра́ду твоему́ неколеби́мое утвержде́ніе, Три́фоне, о́тче на́шъ.

Икосъ:

Лоза́ преподо́бства и сте́бль первонача́льства, цвѣ́тъ пусты́нный и пло́дъ богода́нный, при́сно цвѣту́щій, новопросвѣще́ннѣй странѣ́ дарова́лся еси́. Сего́ ра́ди, почита́ющіи па́мять твою́, вопіе́мъ ти́: ра́дуйся, преподо́бне, отъ ю́ности бла́гости научи́выйся; ра́дуйся, тре́звый во всѣ́хъ благо́ю со́вѣстію; ра́дуйся, Христо́ва розга́, всехва́льне; ра́дуйся, за́повѣдемъ Бо́жіимъ послу́шникъ до́брый; ра́дуйся, отъ за́пада въ сѣ́вѣръ, я́ко со́лнце, возсія́лъ еси́; ра́дуйся, ви́дѣвый наро́дъ Лопа́рскій во идолобѣ́сіи, о обраще́ніи и́хъ предъ Бо́гомъ въ моли́твахъ го́рько рыда́лъ еси́. Ра́дуйся, приснопа́мятный чудотво́рче Три́фоне, о́тче на́шъ.

Пѣ́снь 7.

Ирмо́съ: Образу служи́ти, мусикíйскому согла́сію созыва́ющу лю́ди, отъ пѣ́сней сіо́нскихъ пою́ще оте́чески, о́троцы Дави́довы мучи́телево разори́ша злочести́вое велѣ́ніе и пла́мень въ ро́су преложи́ша, пѣ́снь воспѣва́юще: превозноси́мый отце́въ и на́шъ Бо́же, благослове́нъ еси́.

Образу Святы́я Тро́ицы покланя́тися невѣ́жды научи́лъ еси́ и куми́рницы бѣсо́вскія опрове́рглъ еси́, преподо́бне о́тче на́шъ Три́фоне. Тобо́ю и мы́, грѣ́шніи, наста́вльшеся, Святу́ю Тро́ицу хва́ляще, воспѣва́емъ: отце́въ и на́шъ Бо́же, благослове́нъ еси́.

Образу смире́нія, и молча́нія, и послуша́нія ученико́въ твои́хъ научи́вый и, я́ко зерца́ломъ, собо́ю вся́каго изря́днаго ви́да о́бразъ показа́вый, помина́й на́съ, хва́лящихъ и пою́щихъ въ Тро́ицѣ еди́наго Бо́га, благослове́ннаго во вѣ́ки.

Образу Христо́ву и Его́ Богома́тере и всѣ́хъ святы́хъ покланя́тися наказа́лъ еси́ ученико́въ твои́хъ тве́рдо, и лю́торскаго и кальви́нскаго нече́стія повелѣ́лъ еси́ бѣ́гати и гнуша́тися; моли́твами же твои́ми ученицы́ твои́ и до ны́нѣ тѣ́ми ересьми́ гнуша́ются, хва́ляще и пою́ще благослове́ннаго Бо́га во вѣ́ки.

Богоро́диченъ: Образу Твоему́, Пресвята́я Дѣ́во Влады́чице, припа́дающе, мо́лимся: сохрани́, Ма́ти, ро́ждшая Бо́га, всѣ́хъ на́съ отъ навѣ́та вра́жія и отъ оклевета́нія язы́ка о́стра, вопію́щихъ къ Сы́ну Твоему́: отце́въ и на́шъ Бо́же, благослове́нъ еси́.

Пѣ́снь 8.

Ирмо́съ: Въ пла́мени о́гненнѣ горя́щія пе́щи сохра́ншаго дѣ́ти и во зра́цѣ а́нгела Снизше́дшаго къ ни́мъ, по́йте Го́спода и превозноси́те Его́ во вѣ́ки.

Въ пла́мени о́гненнѣ Сы́нъ, Сло́во Бо́жіе, спасе́ о́троки, и тебе́, преподо́бне, То́й же всемо́щный соблюде́, егда́ бы́лъ еси́ посредѣ́ идолопокло́нныхъ я́рости, я́ко посредѣ́ пе́щи, и, не обину́яся, взыва́лъ еси́: позна́йте, благослови́те, по́йте Бо́га препѣ́таго и превозноси́те Его́ во вѣ́ки.

Пла́менемъ пе́щнымъ, я́коже дре́вле халде́и, опаля́хуся, та́ко изъ твои́хъ у́стъ, я́ко свѣ́тлость огня́, про́повѣдь исходя́щая де́моны прогоня́ше, лю́ди же просвѣща́ше. Сего́ ра́ди ученицы́ твои́, тобо́ю воздвиза́еми, навыко́ша пѣ́ти: благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки.

Во пла́мени злоче́стія невѣ́дѣніемъ Бо́га мно́зи сгара́ху; ты́ же, преподо́бне о́тче на́шъ, водо́ю сле́зъ твои́хъ и струя́ми благоче́стнаго уче́нія идолобѣ́сія о́гнь погаси́лъ еси́ и, сгара́ющія ду́ши прохлади́въ, пѣ́ти научи́лъ еси́: отце́въ и на́шъ Бо́же, препѣ́тый и превозноси́мый во вѣ́ки.

Богоро́диченъ: Во пла́мени о́гненнѣ, Богома́ти Свята́я, егда́ ви́дѣ Тя́ вели́кій Моисе́й въ купинѣ́, прописа́ нетлѣ́нное рождество́ Твое́. Дѣ́ва Пречи́стая, изба́ви отъ зо́лъ на́съ, почита́ющихъ Тя́, моля́щихъ и хва́лящихъ Сы́на Твоего́ и Бо́га на́шего, препѣ́таго и превозноси́маго во вся́ вѣ́ки.

Пѣ́снь 9.

Ирмо́съ: Тебе́, свѣ́тлую свѣщу́ и Ма́терь Бо́жію, пречу́дную сла́ву и вы́шшую всѣ́хъ тва́рей, пѣ́сньми велича́емъ.

Свѣ́тлую свѣщу́ почита́емъ тя́, преподо́бне о́тче Три́фоне, на высотѣ́ свѣ́томъ про́повѣди и мно́гими чудесы́ свѣтя́щую. Сего́ ра́ди зове́мъ ти́: моли́ Святу́ю Тро́ицу за Импера́тора, и за о́бласть твою́ и за вся́ лю́ди, поми́ловатися душа́мъ на́шимъ.

Яко свѣ́тлую свѣщу́, вели́кій ца́рь Іоа́ннъ въ ца́рствующемъ гра́дѣ узрѣ́въ тя́, удиви́ся твоему́ честно́му зра́ку и возлюби́ тя́ зѣло́. Мы́ же, раби́ твои́, вѣ́рою и любо́вію мо́лимтися, цѣли́телю ду́шъ и тѣле́съ на́шихъ: моли́ ми́лостиваго Бо́га, да пода́стъ на́мъ грѣхо́въ оставле́ніе и ве́лію ми́лость.

Тебе́, свѣ́тлую свѣщу́, Іису́съ, проповѣ́дуемый тобо́ю, Боже́ственнымъ Свои́мъ манове́ніемъ по успе́ніи твое́мъ отъ конце́въ земны́хъ взя́ и, я́ко свѣти́льникъ, поста́ви предъ Царе́мъ; ты́ же, преподо́бне о́тче на́шъ, явле́ніемъ твои́мъ вели́каго Царя́ Ѳео́дора спа́слъ еси́. Сего́ ра́ди вопіе́мъ ти́: ра́дуйся, помо́щниче ско́рый, Три́фоне, о́тче на́шъ.

Богоро́диченъ: Тебе́, свѣ́тлую свѣщу́ и Ма́терь Бо́жію, Честнѣ́йшую херуви́мъ и Сла́внѣйшую безъ сравне́нія серафи́мъ, мо́лимъ: всѣ́хъ на́съ, благосе́рдая Ма́ти, спаса́й при́сно.

Свѣти́ленъ, гла́съ 8. Подо́бенъ: Прему́дрости наста́вниче.

Наслади́вся, богому́дре, воздержа́нія и жела́нія пло́ти обузда́въ, я́ко многосвѣ́тлая звѣзда́, заря́ми чуде́съ твои́хъ Лопа́рскій язы́къ просвѣти́лъ еси́, и ны́нѣ мо́лимся ти́: сохрани́ рабы́ своя́ отъ навѣ́та льсти́ва. [Два́жды.]

Сла́ва, и ны́нѣ, богоро́диченъ:

По Бо́зѣ на Тя́, Пречи́стая, упова́ніе возлага́емъ, Иже изъ Тебе́ проше́дшему сраспина́еми Христу́: Твои́ми же къ Нему́ мольба́ми подъ кро́вомъ Твои́мъ невре́дны да́же до конца́ сохрани́.

На хвали́техъ стихи́ры [на 4], гла́съ 4:

Бога́тство души́ твоея́, преподо́бне о́тче, ви́дѣвъ, многоко́зненный окра́сти подуща́ше свои́хъ служи́телей, я́ко и бія́ху тя́ за сло́во и́стины, но не возмо́же навѣ́тникъ духо́внаго твоего́ сокро́вища окра́сти, обрѣ́те бо вооруже́нну непоро́чную твою́ ду́шу. Тѣ́мже мо́лимтися: и на́съ искíй поглоти́ти да не, обнажи́въ, плѣни́тъ, предвари́, преподо́бне, и изба́ви льсти́ваго навѣ́та.

Вели́кимъ Анто́ніемъ хва́лится Еги́петъ, свяще́ннаго Са́вву почита́етъ Палести́на, первонача́льника оби́телей Россíйскихъ му́драго Анто́нія пое́тъ вели́кій гра́дъ Кíевъ, многото́чнаго чудесы́ преподо́бнаго Се́ргія вели́кая Россíя че́стно прославля́етъ; святы́я же оби́тели твоея́ мона́си и о́бласти твоея́ вси́ лю́діе, о́тче Три́фоне, въ про́повѣди болѣ́зни и пусты́нныя труды́ твоя́ любе́зно ублажа́емъ и мо́лимтися: Христа́ Бо́га на́шего моли́ о спасе́ніи ду́шъ на́шихъ.

Преподо́бне о́тче на́шъ Три́фоне, ты́ сѣ́верную страну́ и гра́дъ тво́й моли́твами твои́ми утверди́лъ еси́ и Тро́ическимъ исповѣ́даніемъ многобо́жія ле́сть разруши́лъ еси́, сего́ ра́ди прія́лъ Боже́ственную благода́ть вся́ вѣ́рныхъ стра́сти очища́ти. Еди́наго въ Тро́ицѣ Бо́га, свя́те Три́фоне, моли́ о душа́хъ на́шихъ.

Преподо́бне о́тче на́шъ, ты́, очи́стивъ у́мъ тво́й безстра́стіемъ, къ жела́нному и кра́йнему богомы́слію дости́глъ еси́, и Бо́гъ тя́ просла́ви: я́коже бо иногда́ преподо́бнаго Гера́сима при Іорда́нѣ, звѣ́ри тя́ послу́шаху и въ заповѣ́данныхъ тобо́ю пусты́няхъ не дерза́ху дѣ́яти па́костей. И ны́нѣ мо́лимъ тя́: изба́ви на́съ отъ ловле́нія душепа́губнаго звѣ́ря и моли́ Святу́ю Тро́ицу о спасе́ніи ду́шъ на́шихъ.

Сла́ва, гла́съ 3:

Ко Святѣ́й Тро́ицѣ вѣ́рное и и́скреннее упова́ніе имѣ́лъ еси́, ду́ху благоповинове́нія всѣ́хъ умудря́лъ еси́, смиренному́дрія предводи́тель я́влься и́стинный, и, я́ко Іо́сифъ Еги́пту, оби́тели твое́й загладнѣ́вшимъ прему́дрый промы́сленникъ показа́лся еси́, Три́фоне о́тче на́шъ. Христа́ Бо́га моли́ о душа́хъ на́шихъ.

[И ны́нѣ, богоро́диченъ, гла́съ то́йже:

Безъ сѣ́мене зачала́ еси́ отъ Ду́ха Свята́го, и, славосло́вяще, воспѣва́емъ Тя́: ра́дуйся, Пресвята́я Дѣ́во.]


НА ЛИТУРГІИ:

Слу́жба вся́ преподо́бническая: [Блаже́нна отъ кано́на, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Слу́жба преподо́бному Трѵ́фону Пече́нгскому. — М.: Въ Сѵнода́льной Тѵпогра́фіи, 1883. — Л. 2-21.

/ Къ оглавленію раздѣла /


Наверхъ / Къ титульной страницѣ

0