Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 26 сентября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 13-й де́нь.
Святы́хъ му́ченикъ Евстра́тія, Авксе́нтія, Евге́нія, Марда́рія и Оре́ста и святы́я му́ченицы Лукíи дѣ́вы.

Зри́: Вѣ́домо да е́сть, я́ко а́ще случи́тся па́мять святы́хъ си́хъ въ недѣ́лю пра́отецъ, вку́пѣ возслѣ́дованіе и му́чениковъ пое́тся.

ВЕЧЕРЪ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры на 6, гла́съ 4. Подо́бенъ: Да́лъ еси́ зна́меніе.

Сія́етъ па́мять* страстоте́рпца Твоего́, Го́споди, Евстра́тія,* я́ко со́лнце, свѣ́тлостію* скры́вшаго непобѣди́мыми словесы́ многобо́жіе,* я́коже несвѣ́тлу сѣ́нь, упражня́ему отъ вѣ́ры,* и четы́ри сострада́льцы* и соо́бщники сотво́ршаго.* Ихже ра́ди на́мъ да́руй очище́ніе,* я́ко Человѣколю́бецъ.

Ка́меніе позна́ти* Твое́ влады́чество* Евстра́тій слове́сное устро́и,* ощути́ти си́лу въ пло́ти свое́й* Твою́ пону́дивша, я́же отъ му́къ стра́шныхъ* отложи́ти внеза́пно ра́ны* и, лжу́ погубля́юща,* богосло́вити Тя́ усты́,* Іису́се Всеси́льне,* Спа́се ду́шъ на́шихъ.

Словесы́, и страда́ніи,* и многообра́зными лише́ньми жи́зни* показа́ша любо́вь святíи* къ Тебѣ́ соверше́ну, непоколеби́му,* со Евстра́тіемъ му́дрымъ* и Авксе́нтіемъ подвиза́вшіися* Оре́стъ и Марда́рій* со Евге́ніемъ сла́вніи,* тѣ́хъ моли́твами, Го́споди, спаси́ ду́ши на́ша.

Ины стихи́ры, гла́съ то́йже. Подо́бенъ: Яко до́бля.

Яко до́брѣ во́инствовавъ Царю́ си́лъ,* тебе́ сама́го, Евстра́тіе,* пре́далъ еси́ во́льно на муче́ніе* и ну́ждную сме́рть,* приводя́ съ собо́ю ли́къ му́чениковъ, блаже́нне.* Съ ни́миже пострада́лъ еси́* и побѣ́ды прія́лъ еси́ вѣнцы́;* съ тѣ́ми моли́ся* о на́съ, всесла́вне.

Богому́дрый Евстра́тій,* до́блій Авксе́нтій,* сла́вный Евге́ній и Марда́рій* со Оре́стомъ до́бльствоваша, враги́ побѣди́вше* и возсія́вше я́вѣ, я́ко звѣ́зды многосвѣ́тлы,* уясни́ша вѣ́рныхъ сердца́* и пре́лести отгна́ша тму́* свѣтозаре́ніемъ Ду́ха.

Неосла́бно біе́мь,* и огне́мъ изнуря́емь,* и въ сапоги́ желѣ́зны, всему́дре, пригвожда́емь,* и въ пу́техъ гони́мь,* въ темни́цѣ заключа́емь* и, я́ко же́ртва чиста́, въ пещи́ пеко́мь,* прине́слся еси́ тебе́ ра́ди Поже́ршемуся,* я́ко благово́нно сожже́ніе на вы́шнюю трапе́зу,* му́чениче Евстра́тіе.

Сла́ва, гла́съ 6:

Пріиди́те, мучениколю́бцы, Христо́выхъ страда́льцевъ въ пѣ́снехъ почти́мъ, Евстра́тія, непобѣди́маго му́ченика, Авксе́нтія, и Евге́нія, и Марда́рія, и Оре́ста, пятоза́рный му́чениковъ ли́къ, и́же до́брѣ подвиза́вшеся на неви́димаго врага́, и, вѣнцы́ побѣ́дными увязе́ни, мо́лятся Христу́ о и́же вѣ́рою и любо́вію соверша́ющихъ па́мять и́хъ.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

[Вхо́дъ.] Проки́менъ дне́, и чте́нія три́.

Проро́чества Иса́іина чте́ніе.

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На стихо́внѣ стихи́ры, гла́съ 5. Подо́бенъ: Ра́дуйся.

Сто́лпъ свѣтлоявле́нъ, страда́льче, и́же му́дрости испуща́я свѣ́тлость, воздви́глся еси́ на высоту́ терпѣ́нія, му́дре, и къ свѣ́ту напра́вился еси́ ра́зума, на́съ боже́ственными твои́ми свѣ́тлыми, Евстра́тіе, му́дрыми словесы́ озаря́я, сла́вне, твое́ю любо́вію окриля́емыхъ, блаже́нне. Тѣ́мже и похвала́ми твою́ па́мять чту́ще, му́чениче, отъ любве́, Боже́ственнаго человѣколю́бія про́симъ улучи́ти твои́ми моли́твами, и мíру дарова́ти ве́лію ми́лость.

Сти́хъ: Воззва́ша пра́ведніи, и Госпо́дь услы́ша и́хъ.

Добро́тою и сла́достію и́стинною напо́лнена ча́ша му́дрости твоея́, вино́ благоче́стія въ сладча́йшихъ, му́дре, и оби́льныхъ словесѣ́хъ излія́лъ еси́, и́миже наслажда́еми, и́стинно въ нему́тное и сла́дкое та́инственно возво́димся зна́ніе боже́ственное Влады́ки, Евстра́тіе. Тѣ́мже и похвала́ми твоя́ страда́нія чту́ще вѣ́рою и любо́вію, Боже́ственнаго человѣколю́бія про́симъ улучи́ти твои́ми моли́твами и мíру дарова́ти ве́лію ми́лость.

Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь.

По́лкъ му́ченическій свѣтоза́рный, побѣдоно́сный, свѣ́тлый и пяточи́сленный да почти́тся похвала́ми, притяжа́въ свѣ́тлаго верхо́вника и́стинно Евстра́тія, те́плѣ изобличи́вша е́ллинскія же́ртвы, христіа́номъ же боговѣща́нная уче́нія утверди́вша слове́сными велѣ́ньми. Сего́ у́бо восхва́лимъ, налія́вшаго му́дрости ча́шу и духо́вно на́съ веселя́ща, Христа́ моля́ща, подаю́щаго мíру ве́лію ми́лость.

Сла́ва, гла́съ то́йже:

Му́чащихъ свирѣ́пства не убоя́вшеся, па́че Христо́ву вѣ́ру я́снѣ проповѣ́давше, строга́нія мно́гая и му́ки претерпѣ́сте, Евстра́тіе и Авксе́нтіе, Евге́ніе и Оре́сте и сла́вный Марда́ріе. Тѣ́мже моли́теся Царю́ и Бо́гу о на́съ, вѣ́рою соверша́ющихъ па́мять ва́шу.

И ны́нѣ, богоро́диченъ:

Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую Предста́тельницу и прибѣ́жище ду́шъ на́шихъ.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.

Инъ тропарь, гласъ тойже: [1]

Му́ченикъ всечестны́хъ пяточи́сленныхъ, сла́ву земну́ю презрѣ́вшихъ, со́лнца свѣ́тлаго Евстра́тія, прему́драго витíю со страда́льцы, на о́гнь и му́ки дерзну́вшихъ за всѣ́хъ Царя́ Христа́ и отъ престо́ла Того́ сла́вы почестьми́ вѣнце́въ обдаре́нныхъ, моли́твами, Христе́ Бо́же, спаси́ ду́ши на́ша.

Сла́ва, и ны́нѣ, богоро́диченъ:

Еже отъ вѣ́ка утае́нное, [и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].


НА УТРЕНИ,
[На Бо́гъ Госпо́дь: Тропа́рь святы́мъ, два́жды. Сла́ва, и ны́нѣ, богоро́диченъ.]

По 1-й стихоло́гіи, сѣда́ленъ, гла́съ 4. Подо́бенъ: Ско́ро предвари́.

Му́жествомъ вѣ́ры въ броня́ обле́кся, му́дростію боже́ственною вооружи́вся благоче́стно, Евстра́тіе сла́вне, вся́ діа́воли побѣди́лъ еси́ полки́ и обличи́лъ еси́ безбо́жныхъ немощну́ю де́рзость, я́ко имѣ́я дерзнове́ніе къ Бо́гу, моли́ спасти́ся на́мъ. [Два́жды.]

Сла́ва, и ны́нѣ, богоро́диченъ:

Мно́гими согрѣше́ньми а́зъ, блу́дный, у́мъ омрачи́въ, вопію́ тве́рдому Твоему́ заступле́нію: просвѣти́, Богоро́дице, души́ моея́ зѣ́ницы, возсія́й ми́ покая́нія свѣ́тлую зарю́ и облецы́ мя во ору́жіе свѣ́та, Богороди́тельнице Чи́стая.

По 2-й стихоло́гіи сѣда́ленъ, гла́съ 4:

Ору́жіемъ слове́съ твои́хъ мучи́теля уязви́лъ еси́, воево́да бы́въ христоно́сныхъ люде́й, Евстра́тіе богому́дре: облиста́лъ еси́ заря́ми чуде́съ мíру, вѣне́цъ же исплете́ся твое́й главѣ́ свы́ше. Тѣ́мже и въ па́мяти твое́й Христа́ прославля́емъ. [Два́жды.]

Сла́ва, и ны́нѣ, богоро́диченъ:

Пое́мъ Тя́, Богоневѣ́сто, Ма́ти Христа́ Бо́га, сла́вяще Рождество́ Твое́ непостижи́мое, и́мже изба́вихомся отъ ле́сти діа́воли и вся́кихъ бѣ́дъ, Богоро́дице Влады́чице, и вѣ́рно вопіе́мъ: поми́луй ста́до Твое́, еди́на Всепѣ́тая.

По поліеле́и, сѣда́ленъ, гла́съ 8. Подо́бенъ: Прему́дрости.

Тро́ическою вѣ́рою утве́рждся, и́стины пра́щею воору́жся, ле́сти низложи́лъ еси́ иноплеме́нную де́рзость и вра́жій восхи́тилъ еси́ слове́съ ме́чь, тѣ́мъ ссѣ́клъ еси́ лжи́вое противле́ніе. Сего́ ра́ди побѣ́дами обличи́въ ле́сть, тѣ́ломъ у́мерлъ еси́ и ду́хомъ ожи́лъ еси́, страстоте́рпче Евстра́тіе. Моли́ Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихтися, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Степе́нна, 1-й антифо́нъ 4-го гла́са. Проки́менъ, гла́съ 4: Воззва́ша пра́ведніи,* и Госпо́дь услы́ша и́хъ. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь. Вся́кое дыха́ніе... Ева́нгеліе Матѳе́я, зача́ло 36.

По 50-мъ псалмѣ́ стихи́ра, гла́съ 1. Самогла́сна:

Пяточи́сленный ли́къ святы́хъ восхва́лимъ, лю́діе, Спа́са воспѣва́юще Христа́, Евстра́тія терпѣливоду́шнаго и тве́рдаго страстоте́рпца, съ ни́мъ Авксе́нтія, Евге́нія, Марда́рія и Оре́ста: сíи бо, по вѣ́рѣ пострада́вше, треволне́нія попра́ша вра́жія и Спа́су мо́лятся очище́ніе и оставле́ніе грѣхо́въ дарова́ти вѣ́рою соверша́ющимъ па́мять и́хъ.

Кано́нъ Богоро́дицы со ирмосо́мъ на 6 и святы́хъ два́, на 8.

Кано́нъ пе́рвый Іоа́нна мона́ха, гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Раздава́яй на небесѣ́хъ да́ры су́щимъ на земли́ страда́льцемъ, Подвигополо́жникъ сѣди́тъ Христо́съ, десни́цею Вседержи́тельною Евстра́тія су́щимъ обою́ду боже́ственныя вѣнцы́ простира́я.

Ли́къ му́ченическій пяточи́сленъ, пріиди́те, ви́димъ, пресвѣ́тлымъ блиста́ющійся свѣ́томъ, имѣ́яй чинонача́льника возжелѣ́ннаго Евстра́тія, благода́тію Боже́ственною вѣнча́ема.

По́ясъ земна́го во́инства отрѣши́вый, и́стинному привно́сиши Царю́ страда́нія, зна́меніе отъ Христа́, Евстра́тіе, чрезъ Авксе́нтія пріе́мъ.

Богоро́диченъ: Село́ вмѣсти́тельно была́ еси́ Боже́ственнаго естества́, Богороди́тельнице Чи́стая. Тѣ́мъ тя́ Лукíя возжела́вши, дѣ́вственно въ слѣ́дъ Тебе́ Твоему́ Сы́ну приведе́ся.

Другíй кано́нъ, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Небе́сныхъ круго́въ Ца́рь Дарода́тель предсѣди́тъ, страда́вшимъ на земли́ со Евстра́тіемъ, Христо́съ, простира́я тѣ́мъ побѣ́ды вѣнцы́.

Пѣснослове́сный ли́къ боговѣнча́нный страда́льцевъ пяточи́сленныхъ восхва́лимъ, вѣ́рніи, му́драго Евстра́тія, вѣ́рна иму́ща о Христѣ́ боже́ственнаго чинонача́льника.

Во́инства вы́шняго жела́я, по́честь Евстра́тіе, отда́въ обра́зно, Бо́гу приве́дъ, му́дре, твою́ жи́знь, свяще́нно очище́нъ.

Богоро́диченъ: Добропобѣ́дныхъ му́ченикъ ли́къ, ра́дуйся, пое́тъ Тя́, Чи́стая, и́же побѣ́ды вѣне́цъ прія́тъ: Тобо́ю бо не́бо человѣ́комъ бы́сть вхо́дно, я́ко родила́ еси́ па́че ума́ Творца́ небесе́.

Катава́сія: Христо́съ ражда́ется...

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Наде́ждею муче́ній, я́коже невеще́ственнаго сокро́вища, преесте́ственно бы́лъ еси́ испо́лненъ вся́кія ра́дости, всеблаже́нне Евстра́тіе.

Му́дростію духо́вною, терпѣ́ніемъ же напа́стей обличи́лъ еси́, му́чениче Христо́въ Авксе́нтіе, мучи́тельское безбо́жіе.

Якоже красота́ пресвѣ́тлая Це́ркве вѣ́рныхъ, му́ченицы Христо́выми я́звами, я́ко цвѣ́ты, обложе́ни бы́сте.

Богоро́диченъ: Госпо́дственно и и́стинно Тя́, Богоро́дицу, вѣ́рніи чти́мъ: Ты́ бо Бо́га родила́ еси́, пло́ть бы́вша, Всенепоро́чная.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Тве́рдостію ума́ упова́ніе твое́ все́ возложи́въ, блаже́нне, къ Вы́шнему Бо́гу, наде́ждею ра́нъ утѣше́нія испо́лненъ ве́сь бы́лъ еси́.

Процвѣ́лъ еси́ любо́вію Христо́вою, боже́ственною му́дростію, терпѣ́ніемъ же му́къ, Авксе́нтіе, безу́міе облича́еши гони́телей, на́глость и су́етіе.

Неукроти́мый, му́дре, Лисíевъ гнѣ́въ вмѣни́ся Тебѣ́ со́нъ и о́гнь му́къ си́льныхъ, утве́рждся бо о Христѣ́, преоби́дѣлъ еси́, я́коже ино́му стра́ждущу.

Богоро́диченъ: Священнослове́сными Тя́ гла́сы, Богома́ти Дѣ́во, всѣ́хъ вино́вную Вино́вника по на́мъ бы́ти, боголѣ́пно воспѣва́юще, вѣ́рніи, ублажа́емъ.

Катава́сія: Пре́жде вѣ́къ...

Конда́къ, гла́съ 2. Подо́бенъ: Въ моли́твахъ.

Свѣти́льникъ яви́лся еси́ свѣтлѣ́йшій во тмѣ́ невѣ́дѣнія сѣдя́щимъ, страстоте́рпче: вѣ́рою бо, я́ко копіе́мъ, обложи́вся, враго́въ шата́нія не убоя́лся еси́, Евстра́тіе, ри́торовъ сы́й благоязы́чнѣйшій.

Сѣда́ленъ, гла́съ 8. Подо́бенъ: Прему́дрости.

Ни ме́чь, ни звѣ́ріе, ни о́гнь, ниже́ и́но что́ страша́щихъ чу́вственныхъ, отню́дъ устраши́ти твою́ тве́рдость возмого́ша: вра́жію бо попра́въ тече́ніемъ си́лу, я́ко безстра́стенъ премину́лъ еси́ житіе́ и безпло́тенъ. Тѣ́мже вѣ́рнымъ исцѣле́нія подава́еши, любо́вію притека́ющимъ въ па́мять твою́, свя́те страстоте́рпче Евстра́тіе. Моли́ Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Егда́ пріи́детъ суди́ти все́й земли́ всѣ́хъ Влады́ка и Творе́цъ, овца́мъ мя́ причти́ десны́мъ, осужде́ннаго, и кромѣ́шнія тмы́, и вся́каго муче́нія Твоего́ непотре́бнаго раба́ исхити́, молю́ся: да благода́рно велича́ю бога́тство Твоея́ бла́гости, Богоро́дице Всенепоро́чная, и вопію́ Ти, ра́дуяся: моли́ Христа́ Бо́га согрѣше́ній оставле́ніе дарова́ти, Тя́ бо и́мамъ наде́жду, ра́бъ Тво́й.

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза, на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Отложи́лъ еси́ съ я́звами пло́ти твоея́ душе́вныя скве́рны, стрѣ́лы сокруши́лъ еси́ лука́ваго змíя вѣ́рою, Евстра́тіе.

Просла́вися твои́ми ра́нами, страстоте́рпче, Ца́рь Сла́вы и неизрече́нныя тя́ сла́вы си́лою испо́лни чуде́съ, Евстра́тіе.

Ры́барскому поревнова́въ дерзнове́нію, му́ченическою мре́жею Влады́цѣ приво́диши му́драго Евге́нія, улови́въ, Евстра́тіе.

Богоро́диченъ: Всенепоро́чная и Еди́на Святѣ́йшая херуви́мовъ я́вльшися, ду́ши на́ша спаси́ отъ вся́каго обстоя́нія вѣ́рою пою́щихъ Тя́.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Всеси́льный боже́ственное жела́ніе въ души́ твое́й вже́гъ, чудодѣ́йственна показа́ изря́дно, всецѣ́лы плотскíя ра́ны твоя́ творя́.

Мре́жею духо́вною ры́барей, му́дре, улови́въ, приво́диши Царю́ му́драго Евге́нія, его́же улови́въ, Христу́ приве́лъ еси́, Евстра́тіе.

Гвоздьми́, всему́дре, но́зѣ разжига́емь, муче́ніемъ сапо́гъ желѣ́зныхъ, ве́сь себе́ обагри́лъ еси́, Царя́ Іису́са подо́бяся стра́сти.

Богоро́диченъ: Необъе́млемый и неизмѣ́нный, Бо́га Отца́ Сло́во, измѣни́вся видѣ́ніемъ, Пренепоро́чная, изъ Тебе́ воплоща́емь, обожа́етъ человѣколю́бно мя́ человѣ́ка.

Катава́сія: Же́злъ изъ ко́рене...

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ты́, я́коже звѣзда́ свѣтоно́сная, возсія́лъ еси́ въ полцѣ́ му́ченикъ далечесія́тельно, непобѣди́мый Евстра́тіе.

О, жре́бія блага́го! О, ча́сти богода́нныя! О, жены́ добрѣ́йшія, совѣ́томъ побѣди́вшія ле́сть прама́тернюю.

Ты́ вся́ кра́сная вмѣни́лъ еси́, я́ко уме́ты, Марда́ріе, побѣди́въ естества́ зако́ны любо́вію страда́нія.

Богоро́диченъ: Умъ зе́мленъ Твоего́ па́че ума́ зача́тія не мо́жетъ разумѣ́ти, Дѣ́во Ма́ти, Отрокови́це: Бо́га бо родила́ еси́.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Чу́денъ, я́коже звѣзда́, бы́въ Це́ркви, издале́ча посредѣ́ му́ченикъ возсія́лъ еси́, му́ченическими осія́я заря́ми, Евстра́тіе, мíръ па́че со́лнца.

Зарелу́чными сія́ніи зарю́ испуща́юща тя́ ви́дѣвъ, богоглаго́ливый Марда́рій тебѣ́, я́коже а́гнецъ па́стырю незло́бивъ, простото́ю се́рдца послѣ́дова.

Превознесе́ся сро́днаго естества́ мужелю́бная жена́ и, разу́мная, и христолюби́вая, изря́дно предпобѣжда́етъ и соверше́ннѣ, пома́завши му́жа къ муче́нію.

Богоро́диченъ: Иже Богоро́дицу отъ души́ и Влады́чицу мíра, Блага́я, исповѣ́дающія Тя́ спаса́й: Тя́ бо Предста́тельницу непобѣди́му стяжа́хомъ, су́щую Богороди́тельницу.

Катава́сія: Бо́гъ Сы́й ми́ра...

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Христо́съ мнѣ́ вмѣ́сто всѣ́хъ е́сть, — Марда́рій велегла́сно вопія́ше, — и оте́чество, и че́сть, и и́мя; отъ тебе́ бо сему́ научи́хся, Евстра́тіе.

Язы́къ отрѣ́занъ пѣ́сней непреста́етъ, отсѣ́ченныя же твоя́ ру́ки къ Бо́гу, Евге́ніе, возвыша́хуся, спасе́нія прося́ще пою́щимъ па́мять твою́.

Нога́мъ провертѣ́ннымъ повѣ́шенъ бы́сть стремгла́въ, разжже́нными же рожны́ пали́мь по плеще́мъ, ду́хъ Влады́цѣ пре́далъ еси́, Марда́ріе.

Богоро́диченъ: Крѣ́пость Тя́ обрѣ́тши, Дѣ́во, и тве́рдь, страстоте́рпица ра́ны до́блественнѣ терпи́тъ и, ра́дующися, въ слѣ́дъ Тебе́, всѣ́хъ Влады́цѣ, приво́дится.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Са́мъ вмѣ́сто всѣ́хъ мнѣ́ Христо́съ е́сть оте́ческихъ, — возопи́въ, о Марда́ріе. Пятѣ́ сокруше́ннѣй рожны́, разжже́ннымъ огне́мъ, стрѣла́ми же ра́мена, ра́дуяся, сконча́лся еси́.

Отрѣ́занъ бы́въ, Евге́ніе, тво́й язы́къ Христа́ пѣсносло́вити не преста́етъ, ру́ки же отсѣ́чены къ Бо́гу, блаже́нне, возвыша́ются, пою́щимъ тя́ избавле́нія прося́ще.

Яко досточу́дна му́жественная твоя́ душа́, всеблагоро́дне Евге́ніе, сокруше́ннымъ бо ну́ждею твои́мъ го́ленемъ, ду́хъ пре́далъ еси́ въ ру́цѣ Влады́ки всѣ́хъ, ра́дуяся.

Богоро́диченъ: Пречи́стая Влады́чице, ро́ждшая земны́хъ Ко́рмчію и Го́спода, страсте́й мои́хъ непостоя́нное и лю́тое утиши́ смуще́ніе и тишину́ пода́ждь се́рдцу моему́.

Катава́сія: Изъ утро́бы Іо́ну...

Конда́къ, гла́съ 3. Подо́бенъ: Дѣ́ва дне́сь.

Витíйствуя предъ беззако́ннующими боже́ственная, біе́нія претерпѣ́лъ еси́ му́жественнѣйшимъ се́рдцемъ, облиста́лъ еси́ богозна́меньми, пречу́дне, угаси́лъ еси́ возвы́шенный пре́лести пла́мень, сего́ ра́ди тя́ честву́емъ, всеблаже́нне му́чениче Христо́въ Евстра́тіе.

Икосъ:

Свяще́нный соверша́етъ Це́рковь дне́сь пра́здникъ та́инственно, свѣ́тло проповѣ́дающи твоя́ до́блести, болѣ́зни и труды́, я́же па́че естества́ боже́ственная боре́нія, я́же всю́ду ра́ны, и́миже низложи́ многоко́зненнаго, сла́ва страда́льцевъ ве́лія и хвала́, му́жества сто́лпъ, свѣти́льникъ всѣ́хъ тя́ чту́щихъ благоче́стно, врачева́ній сокро́вище, богати́телю ни́щихъ, первопобѣ́дниче честны́хъ му́чениковъ, всеблаже́нне му́чениче Христо́въ Евстра́тіе.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Непрело́жно исповѣ́данія мудрова́ніе имѣ́я въ Тро́ицѣ чествова́ти Еди́наго Бо́га, му́ки преоби́дѣлъ еси́, зовя́й: благослове́нъ еси́ въ хра́мѣ сла́вы Твоея́, Го́споди.

Яко блаже́нъ въ непоро́чномъ пути́ ходи́лъ еси́, колѣ́ни благоразу́мно преклони́лъ еси́ Изба́вителю, ду́шу же преда́въ Влады́цѣ въ ру́ки, я́ко благово́ннѣйшу же́ртву, Авксе́нтіе.

Иже вра́номъ Иліи́ пи́щу подава́яй Бо́гъ, То́й и о честнѣ́й твое́й главѣ́ чудотворя́, жела́ющимъ откры́, я́ко многожела́нное чрежде́ніе мíру, Авксе́нтіе.

Богоро́диченъ: Дѣ́во Ма́ти, я́ко Чи́сту Тя́ и нетлѣ́нну Сло́во Чи́стое возлюби́ и, изъ Тебе́ вопло́щся, возсозда́ всего́ человѣ́ка, и́же Лукíю просла́вивый чудесы́.

Инъ.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Побѣдоно́сецъ къ небе́сному Ца́рству, Авксе́нтіе, восте́клъ еси́: по искуше́ніи бо му́къ многови́дныхъ, Христа́ Бо́га исповѣ́дая, сконча́лся еси́ за Него́, во главу́ усѣ́ченъ.

Пречу́дно е́сть благоразу́мное, Оре́сте, му́жество твое́, на суди́щи бо показу́еши ра́зумъ, ду́шу же Лисíеву кресто́мъ унза́еши, поя́: благослове́нъ Бо́гъ оте́цъ на́шихъ.

Муче́нія путе́мъ спу́тника тебѣ́ и съ тобо́ю теку́ща сою́зника Оре́ста и сострада́льца имѣ́я, обогати́лъ еси́, поя́ съ ни́мъ: благослове́нъ Бо́гъ оте́цъ на́шихъ.

Богоро́диченъ: Юноши три́ пе́щь не опали́, Рождество́ прообразу́ющи Твое́, Боже́ственный бо Огнь Тя́ не опали́, всели́вся въ Тя́, и вся́ просвѣти́ вопи́ти: благослове́нъ Бо́гъ оте́цъ на́шихъ.

Катава́сія: Отроцы, благоче́стію...

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Устна́ разве́рзъ чи́сто, Боже́ственный привле́клъ еси́ Ду́хъ, Евстра́тіе, и душетлѣ́нныхъ у́бо обличи́лъ еси́ служе́ній не́мощь, въ Тро́ицѣ же Бо́га чествова́ти взыва́лъ еси́: благослови́те, вся́ дѣла́ Госпо́дня, Го́спода.

Му́дрыми наказа́ніи твои́ми укрѣпи́въ смы́слъ, му́чениче Евстра́тіе, на одрѣ́ желѣ́знѣмъ просте́ртъ бы́въ, непобѣди́мый Оре́стъ вопія́ше разори́телемъ пла́мене, дѣ́темъ подо́бяся: благослови́те, вся́ дѣла́ Госпо́дня, Го́спода.

Просте́ръ тѣ́ло терпѣли́вно, Оре́сте сла́вне, ты́ на одрѣ́ разжже́ннѣмъ сопричта́лся еси́ у́бо му́чениковъ, въ Го́сподѣ ра́дуяся, воспочи́лъ же еси́ въ ски́ніяхъ небе́сныхъ, вопія́: благослови́те, вся́ дѣла́ Госпо́дня, Го́спода.

Богоро́диченъ: Яви́лася еси́ превы́шши небе́съ, Бо́га небе́снаго поро́ждши, онебеси́вшаго, Всечи́стая, земноро́дныхъ все́ смѣше́ніе и Лукíи честны́я па́мять уясни́вшаго, Ему́же вопіе́мъ всегда́: благослови́те, вся́ дѣла́ Госпо́дня, Го́спода.

Инъ.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Еди́наго естества́ Тро́ицы безмѣ́рную си́лу со дерзнове́ніемъ проповѣ́дая, богосло́вилъ еси́ и и́дольское служе́ніе су́етное обличи́лъ еси́, всему́дре Евстра́тіе, богому́дре.

Не вѣ́дый гони́тель терпѣ́нія твоего́, пла́меннымъ ви́домъ устраши́ти тя́ покуша́шеся, ты́ же, того́ суровство́ оплева́въ, ра́дуяся, Влады́ку, Евстра́тіе, воспѣва́лъ еси́.

Вѣща́ніи твои́ми боже́ственными наказу́емь, богому́дрый Оре́стъ на о́дръ вскочи́, игра́я, я́ко а́гнецъ непоро́ченъ всесожига́емь, Бо́гу Вѣнцеда́вцу вопія́: благослови́те, вся́ дѣла́ Госпо́дня, Го́спода.

Богоро́диченъ: Пречи́стая Дѣ́во, Ты́ мя́ спаси́, мое́й не́мощи бу́ди по́мощь, скорбе́й мно́гихъ и лю́тыхъ мя́ изба́ви, да Тя́ сла́влю, еди́ну Богоро́дицу.

Катава́сія: Чу́да преесте́ственнаго...

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Боже́ственныхъ причасти́тися та́инъ возжелѣ́въ, страстоте́рпче, и богоявле́нія свѣтоза́рнаго сподо́битися, блаже́нне Евстра́тіе, къ зову́щему тя́ на небеса́, жела́емому прибли́жился еси́ Христу́.

Зѣло́ веселя́ся, страстоте́рпче, ра́достному осужде́нію мучи́тельскаго пребезу́мія, Подвигополо́жника твоего́ велича́лъ еси́, пѣсносло́вя, Евстра́тіе, сме́рти разори́теля Христа́.

Пріиди́те, мучениколю́бцы вси́, пре́лести потреби́теля свяще́нными Евге́нія пѣ́сньми, му́драго Оре́ста же и Марда́рія, и съ ни́ми Авксе́нтія со Евстра́тіемъ возвели́чимъ.

Богоро́диченъ: Свѣ́тъ на́мъ возсія́ изъ ложе́снъ Неискусому́жныхъ Твои́хъ, Дѣ́во, Его́же свѣтосія́ніи боже́ственно озари́вшися, свѣ́тъ же бы́сть чу́дная Лукíя, Богороди́тельнице Дѣ́во Ма́ти.

Инъ.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Поя́, Евстра́тіе, жела́емаго и о́бщникъ боже́ственныхъ та́инъ бы́въ, богоявле́нія его́ въ темни́цѣ сподо́бился еси́, блаже́нне, зову́ща тя́ къ небе́снѣй жи́зни Ца́рствія Его́.

Укрѣпи́вся си́лою Христо́вою, Евстра́тіе, гони́телей ласка́нію посмѣя́лся еси́, велича́я, сла́вне, Христа́ пѣ́сньми: я́коже бо ю́ноши дре́вле въ пе́щь, ра́дуяся, я́ко въ кра́сный ра́й, блаже́нне, вну́трь вше́лъ еси́.

Пѣ́сньми и пѣ́ньми восхва́лимъ, вси́ вѣ́рніи, боже́ственныя во́ины, Авксе́нтія, Евге́нія, вку́пѣ и Марда́рія, сла́внаго Оре́ста и чинонача́льника, и сострада́льца, и наста́вника му́драго Евстра́тія.

Богоро́диченъ: Хра́мъ, Дѣ́во, ца́рствующаго со Отце́мъ и Ду́хомъ Христа́ была́ еси́; Тебе́ ра́ди, Чи́стая, хра́мы и мы́ благода́тію бы́вше, сподо́бихомся сынотворе́нія Его́ креще́ніемъ.

Катава́сія: Та́инство стра́нное...

Свѣти́ленъ. Подо́бенъ: Ду́хомъ во святи́лищи.

Соверши́лъ еси́ чу́дное страда́нія тече́ніе, Евстра́тіе блаже́нне, и приве́дъ ку́пно Евге́нія честна́го и му́драго Авксе́нтія, Марда́рія же со Оре́стомъ, и́хже вѣ́рѣ и де́рзости удиви́шася человѣ́честіи и а́нгельстіи собо́ри. [Два́жды.]

Сла́ва, и ны́нѣ, богоро́диченъ:

Несказа́ннаго Рождества́ Твоего́ была́ еси́, Пренепоро́чная Невѣ́ста, я́ко су́щи честнѣ́йшій хра́мъ, Богоро́дице: Ты́ бо Превѣ́чное, въ Тя́ все́льшееся, родила́ еси́ Бо́га Сло́во. Тѣ́мъ, пою́ще, Рождество́ Твое́ велича́емъ, о Всенепоро́чная Отрокови́це.

На хвали́техъ стихи́ры на 4, гла́съ 3. Ге́рманово:

Ри́торскими словесы́ Христо́въ во́инъ беззако́нныя ужаси́, страда́льческими ра́нами вра́жія си́лы му́жески побѣди́ Евстра́тій сла́вный и тве́рдый страда́лецъ, и́же тѣ́сный и приско́рбный ше́ствовавъ пу́ть и въ зе́млю дости́гъ вѣ́чныя жи́зни; въ не́йже и мо́литъ Христа́ дарова́ти на́мъ ве́лію ми́лость.

Иже въ боже́ственнѣй му́дрости я́вльшася филосо́фа и въ добро́тѣ слове́съ показа́вшася ри́тора, въ свидѣ́телехъ вели́каго Евстра́тія страда́льческими похвала́ми увѣнча́имъ: сво́инство бо се́й Христо́въ во́инъ благочести́вое собра́въ, во вре́мя бра́ней къ подвиго́мъ страда́нія вчиня́я, вра́жій восхи́тивъ ме́чь, си́мъ того́ уязви́. Къ нему́же возопіи́мъ: му́чениковъ изря́днѣйше, съ пострада́вшими съ тобо́ю моли́ Христа́ Бо́га о вѣ́рою соверша́ющихъ всечестну́ю па́мять твою́.

Гла́съ 4. Іоа́нна мона́ха:

Да вѣнча́ются отъ на́съ похвала́ми добропобѣ́дніи и́стины свидѣ́тели: Евстра́тій, е́ллинскаго басносмышле́нія обличи́тель и христіа́нскаго богому́дрія проповѣ́дникъ; Авксе́нтій, и́же му́дростію слове́съ и терпѣ́ніемъ дѣ́лъ мучи́тельское обличи́вши безбо́жіе, къ си́мъ Евге́ній, Бо́гу благопотре́бный и мучи́телемъ непотре́бный спаси́тельнаго ра́ди исповѣ́данія, и Оре́стъ, и́стинный и чу́дный Царя́ всѣ́хъ во́инъ; съ ни́миже и Марда́рій, го́лубь незло́бивый, му́дрое посрами́вый змíя благода́тію Христа́ Бо́га и Спа́са ду́шъ на́шихъ.

Кассíи мона́хини:

Па́че е́ллинскихъ наказа́ній апо́стольскую му́дрость предпочто́ша святíи му́ченицы, кни́ги витíйскія оста́вльше и ры́барскую навы́кше: та́мо бо у́бо благоязы́чіе глаго́ламъ, въ некни́жныхъ же богогла́сіихъ Тро́ическому науча́хуся богоразу́мію. Въ не́мже моли́теся въ ми́рѣ сохрани́тися душа́мъ на́шимъ.

Сла́ва, гла́съ 4, тоя́же Кассíи:

Пятостру́нную цѣвни́цу и пятосвѣ́тлый свѣ́щникъ Бо́жія Це́ркве, богоно́сныя му́ченики тезоиме́ннѣ воспои́мъ и благоче́стнѣ похва́лимъ: ра́дуйся, и́же до́брѣ Бо́гомъ вво́инствованный въ небе́снѣмъ во́инствѣ и, вво́инившему тя́ угоди́въ, и́же въ витíяхъ витíй, Евстра́тіе богому́дре; ра́дуйся, и́же тала́нтъ отъ Бо́га, тебѣ́ ввѣ́ренный, возрасти́въ во мно́жество, Авксе́нтіе блаже́нне; ра́дуйся, краснѣ́йшая вѣ́твь боже́ственнаго благоро́дія, Евге́ніе богому́дре; ра́дуйся, кра́сный о́бразомъ, нра́вомъ же предо́брый и обоюдоизря́дный, и́же въ боже́ственныхъ гора́хъ пребыва́я ве́сь, всеблаже́нне Оре́сте; ра́дуйся, сія́яй прозра́чный би́сере, и́же му́ки го́рькія ра́достнѣ претерпѣ́вый, Марда́ріе непобѣди́ме; ра́дуйся, равночи́сленный ли́че му́дрыхъ дѣ́въ, я́же мо́лимъ вся́каго гнѣ́ва и ско́рби изба́вити и неизрече́нныя ва́шея сла́вы соприча́стники сотвори́ти лѣ́тнюю ва́шу па́мять чту́щія.

И ны́нѣ, богоро́диченъ:

Иму́ще Тя́, Богоро́дице, [упова́ніе и предста́тельство, вра́жіихъ навѣ́тъ не убои́мся, я́ко спаса́еши ду́ши на́ша].

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна 1-го кано́на пѣ́снь 3-я, на 4 и 2-го, пѣ́снь 6-я, на 4. Проки́менъ, гла́съ 4: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Апо́столъ къ Ефесе́емъ, зача́ло 233. Аллилу́ія, гласъ 4: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, [и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 106. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́].

Примѣчанія:
[1] Инъ тропарь мученикамъ приводится по изданію: Псалти́ръ съ возслѣ́дованіемъ. Черни́говъ: Въ Тѵпогра́фіи оби́тели Свя́то-Тро́ицкой Ильи́нской, 1763 г. Ли́стъ 419 об.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 104 об. – 114.

/ Къ оглавленію раздѣла /


Наверхъ / Къ титульной страницѣ

0