Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 12-й де́нь.
Пра́вило и́же во святы́хъ отца́ на́шего Спиридо́на чудотво́рца, епи́скопа Тримиѳу́нтскаго.

[Изъ ру́кописей Славя́но-Бо́лгарскія Зогра́фскія оби́тели на Аѳо́нѣ.]

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 8. Подо́бенъ: О, пресла́внаго чудесе́!

Отче Спиридо́не блаже́нне,* всѣ́мъ благи́мъ о́бразъ дово́ленъ бы́лъ еси́,* къ го́рнему житію́ веду́щь смире́ніемъ и кро́тостію,* тѣ́мже отсю́ду Христо́съ па́стыр[я] тя́ лю́демъ Свои́мъ устроя́етъ:* Це́ркве предста́тель бы́лъ еси́,* и Аріево хуле́ніе собо́рнѣ низложи́лъ еси́,* тѣ́мже, чудодѣ́йствуя дѣ́ломъ и сло́вомъ,* о́тче пресвяты́й, Спа́са моли́* спасти́ся душа́мъ на́шимъ. [Два́жды.]

Отче святи́телю Спиридо́не,* ты́, я́ко архіере́й свяще́нъ,* ме́ртвую, я́коже жи́ву, вопроси́лъ еси́,* любве́ ра́ди Бо́жія;* змію́ же преложи́лъ еси́ въ зла́то,* нището́ю обдержи́мому;* тече́ніе же удержа́лъ еси́ рѣки́,* сострада́тельствовавъ лю́демъ;* царю́ же предста́лъ еси́* вра́чь про́мысломъ Бо́жіимъ.* Но о, блаже́ннѣйшій о́тче,* моли́ся ко Го́споду* спасти́ся душа́мъ на́шимъ.

Отче Спиридо́не пресла́вне,* архіере́ю Христо́въ, утѣше́ніе стра́нныхъ,* вра́чь неду́жныхъ, обурева́емыхъ приста́нище,* врага́ вселука́ваго и пребезу́мнаго Арія удави́лъ еси́,* и велѣ́ніе Боже́ственное всѣ́мъ уясни́лъ еси́,* Еди́но Божество́ Святы́я Тро́ицы проповѣ́далъ еси́.* Но о, отце́въ досточу́дне и учи́телей собесѣ́дниче,* Спа́су моли́ся спасти́ ду́ши на́ша.

Сла́ва, гла́съ 1:

Преподо́бне о́тче, блаже́нне Спиридо́не му́дре, ме́ртвую, я́коже жи́ву, вопроси́лъ еси́ любве́ ра́ди Бо́жія; змію́ же преложи́лъ еси́ въ зла́то нището́ю обдержи́мому, тече́ніе же удержа́лъ еси́ рѣки́, сострада́тельствовавъ лю́демъ; царю́ же предста́лъ еси́ вра́чь про́мысломъ Бо́жіимъ; ме́ртвыя же па́ки возста́вилъ еси́, я́ко Того́ учени́къ, и вѣ́ру уясни́лъ еси́ посредѣ́ отце́въ мно́гихъ. Вся́ у́бо могíй во укрѣпля́ющемъ тя́ Христѣ́, Того́ и ны́нѣ моли́ спасти́ся душа́мъ на́шимъ.

И ны́нѣ, предпра́зднства, гла́съ 6:

Предпра́зднуимъ, лю́діе, Христо́во Рождество́, и, у́мъ воздви́гше, къ Виѳлее́му, вознесе́мся мы́слію, и у́зримъ въ верте́пѣ ве́ліе та́инство: отве́рзеся бо Еде́мъ отъ Дѣ́вы Святы́я Бо́гу происходя́щу, соверше́нъ Сы́й то́йжде въ Божествѣ́ и человѣ́чествѣ. Тѣ́мже воззове́мъ: Святы́й Бо́же — Отче Безнача́льный, Святы́й Крѣ́пкій — Сы́не Воплоти́выйся, Святы́й Безсме́ртный — Утѣ́шительный Ду́ше: Тро́ице Свята́я, сла́ва Тебѣ́.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Ра́дуйся, іера́рше* Спиридо́не богому́дре,* ты́, предстоя́й* Святѣ́й Тро́ицѣ,* моли́ся прилѣ́жно* спасти́ся душа́мъ на́шимъ.

Сти́хъ: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ.

До́мъ Ду́ха Свята́го* яви́лся еси́, святи́телю,* вну́трь имѣ́я сло́во прему́дрости,* Спиридо́не блаже́нне,* о на́съ моли́ся* Христу́ Бо́гу.

Сти́хъ: Уста́ пра́веднаго поуча́тся прему́дрости, и язы́къ его́ возглаго́летъ су́дъ.

До́мъ Ду́ха Свята́го* бы́лъ еси́,* благода́тію испо́лненъ* Боже́ственныхъ уче́ній,* на Собо́рѣ филосо́фы* посрами́лъ еси́.

Сла́ва, гла́съ 8:

Ра́дуйся и весели́ся, сла́внѣйшій гра́де Керки́ро, свѣ́тло торжеству́й, Христо́ва Це́рковь, лику́й, богособра́нн[ая] па́ство: дне́сь созыва́етъ на́съ архипа́стыря всемíрное торжество́. Пріиди́те у́бо свѣ́тло пра́зднуемъ въ па́мяти его́, глаго́люще: ра́дуйся, святи́телю богому́дре, дне́сь обстоя́ще всечестны́я мо́щи твоя́, любе́зно облобыза́емъ, священнонача́льниче Спиридо́не, моли́ спасти́ся душа́мъ на́шимъ.

И ны́нѣ, предпра́зднства, гла́съ то́йже:

Виѳлее́ме, угото́вися, благоукраси́теся, я́сли, верте́пе, пріими́: Истина пріи́де. Сѣ́нь мимотече́, и Бо́гъ человѣ́комъ отъ Дѣ́вы яви́ся, вообрази́вся я́коже мы́ и обожи́въ пло́ть. Тѣ́мъ Ада́мъ обновля́ется, со Евою зову́ще: на земли́ благоволе́ніе яви́ся, во е́же спасти́ ро́дъ на́шъ.

Тропа́рь, гла́съ 4:

Яко правосла́вныхъ побо́рника и всѣ́хъ невѣ́рныхъ противобо́рца, всеблаже́нне Спиридо́не, пое́мъ тя́, и мо́лимъ тя́ храни́ти гра́дъ тво́й всѣ́хъ нападе́ній ва́рваровъ неприча́стенъ.

[Сла́ва, и ны́нѣ,] богоро́диченъ догма́тикъ отъ ма́лыхъ, гла́съ то́йже:

Отъ всѣ́хъ бѣ́дъ рабы́ Твоя́ сохраня́й, Благослове́нная Богоро́дице, да Тя́ сла́вимъ, Наде́жду ду́шъ на́шихъ.


НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., [1-й антифо́нъ.] На Го́споди воззва́хъ: стихи́ры на 8, гла́съ 1. Подо́бенъ: Небе́сныхъ чино́въ.

Небе́сныхъ чино́въ ра́дованіе* и на земли́ архіере́евъ похвалу́,* свяще́нниковъ сла́ву, Спиридо́на му́драго,* мона́шествующихъ пра́вило и защи́тника,* Це́ркве утвержде́ніе и учи́теля,* вся́ злосла́вныя посрамля́юща,* потреби́теля Аріева и того́ посо́бниковъ,* его́же ра́ди си́хъ шата́ніе Христо́съ низложи́,* имѣ́яй ве́лію ми́лость. [Два́жды.]

Небе́сныхъ чино́въ ра́дованіе* о па́мяти твое́й, святи́телю Христо́въ, Спиридо́не богому́дре,* дне́сь мно́жество люде́й къ ра́цѣ моще́й твои́хъ притека́етъ* и пріе́млетъ неду́говъ разли́чныхъ исцѣле́ніе.* Но, о преблаже́ннѣйшій о́тче,* до́мъ и пребыва́ніе Пресвятѣ́й Тро́ицѣ бы́лъ еси́,* Юже моли́ дарова́ти* душа́мъ на́шимъ ве́лію ми́лость.

Небе́снымъ чино́мъ поревнова́лъ еси́,* и на земли́, богоно́се,* освяще́нъ сосу́дъ яви́лся еси́* и жили́ще Свята́го Ду́ха.* Ве́лій засту́пникъ еси́ и те́плый* въ бѣда́хъ обрѣта́ющимся, сла́вне,* свя́те Спиридо́не, священнопроповѣ́дниче Христо́въ,* су́щимъ на земли́ и по мо́рю пла́вающимъ,* су́щимъ дале́че и бли́зъ обрѣта́ющимся,* ми́лостивый засту́пникъ* и моле́бникъ о душа́хъ на́шихъ.

Ины стихи́ры, гла́съ то́йже. Подо́бенъ: О, ди́вное чу́до!

О, ди́вное чу́до!* Свѣти́льника пресвѣ́тлаго* дне́сь а́нгелы воспѣва́ютъ,* спра́зднуемъ же и мы́, бра́тіе,* духо́внѣ торжеству́юще и уми́льно взыва́юще:* о́тче Спиридо́не преди́вне, святи́телю Христо́въ,* ме́ртвую, я́коже жи́ву, вопроси́лъ еси́ любве́ ра́ди Бо́жія;* ороше́нія на главу́ твою́ во вре́мя жа́твы небеса́ иска́паша,* бу́дущее прозна́меновавше;* престо́лу Христо́ву предстоя́,* моли́ спасти́ся на́мъ. [Два́жды.]

О, ди́вное чу́до!* Дне́сь гра́дъ Керки́ра ра́дуется* и Тріе́стъ весели́тся,* и кра́сная пѣ́нія составля́ютъ,* ви́дяще свѣти́льника своего́,* и преди́внаго засту́пника своего́ и святи́теля,* рука́ми архіере́йскими носи́ма,* и уми́льно взыва́ютъ:* те́плый предста́телю,* изба́ви на́съ отъ находя́щихъ бѣ́дъ и сопоста́тъ на́шихъ.* Мы́ же дне́сь собра́вшися, уми́льно глаго́лемъ:* ра́дуйся, Тро́ицы честны́й до́ме,* благово́нный сосу́де, церко́вное утвержде́ніе,* Арія побѣди́телю и того́ единомы́сленниковъ,* о́тче Спиридо́не, правосла́вныхъ похвало́,* моли́ спасти́ся душа́мъ на́шимъ.

О, ди́вное чу́до!* Вели́кій архіере́й и преди́вный предста́тель,* Спиридо́нъ му́дрый,* на Пе́рвомъ Собо́рѣ Нике́йскомъ* честнѣ́йшій Сѵмво́лъ утверди́въ съ богоно́сными отцы́,* и Аріевы пле́велы до конца́ исто́ргъ.* Тѣ́мже, чу́дне, велегла́сно па́мять твою́ почита́емъ,* и мо́щи нетлѣ́нныя твоя́ чти́мъ,* и́миже источа́еши врачева́ній Боже́ственныя струи́* и ве́лію ми́лость.

Сла́ва, и ны́нѣ, осмогла́сна.
Творе́ніе Емману́ила Хриса́фи ду́ки. Поя́шеся въ ца́рствующемъ гра́дѣ.

[Гла́съ 1:] Богонача́льнымъ манове́ніемъ, отвсю́ду человѣ́ческая собра́нія, отъ свои́хъ обита́лищь носи́мая, [Гла́съ 5:] Дости́гше пречестны́й моще́й твои́хъ ковче́гъ, досто́йно лобза́ютъ, [Гла́съ 6:] Богоно́сное и достохва́льное тѣ́ло воспѣва́юще, стра́хомъ одержи́ми, восхваля́ютъ, и я́сно восклица́ютъ тебѣ́ пѣ́сней богогла́сіе: се́, досточу́дный Спиридо́нъ дне́сь прелага́ется, [Гла́съ 7:] Сего́ бо ра́ди всеро́дное спасе́ніе быва́етъ, ему́же не довлѣ́ютъ вси́ язы́цы досто́йное возда́ти пѣ́ніе, [Гла́съ 4:] Сего́ бо чудеса́ превосхо́дятъ вся́къ у́мъ. [Гла́съ 8:] И у́бо прему́дрый священнонача́льниче, всегда́ съ Ма́терію Іису́совою и по преставле́ніи моли́ся непреста́нно, сохрани́ти и спасти́ отъ вся́каго прираже́нія проти́внаго достоя́ніе твое́, твое́ бо а́ще предста́тельство стяжа́хомъ, [Гласъ 1:] Во вѣ́ки благогла́сно ублажа́юще.

Та́же вхо́дъ. Свѣ́те ти́хій... Проки́менъ дне́ и чте́нія три́.

При́тчей чте́ніе. [Главы́ 10, 3 и 8.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устнѣ́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе. [Главы́ 10 и 11.]

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 4:

Духо́внѣ учрежда́ющеся дне́сь, бра́тіе, оста́вивше жите́йская су́етная попече́нія, весели́теся, человѣ́цы: се́ бо предста́тель на́шъ, вели́кій Спиридо́нъ му́дрый, предлага́етъ по́двиги и труды́ своя́, я́же за Христо́ву Це́рковь, со еретики́ пря́ся, претерпѣ́, и си́лою Свята́го Ду́ха си́хъ побѣди́. Це́ркве вели́кое заступле́ніе и вселе́нныя свѣти́льниче, моли́ся Христу́ Бо́гу спасти́ся душа́мъ на́шимъ.

Дре́вле тебѣ́ гла́съ, я́ко жи́ва, уме́ршая, вопро́шшу ти́, о́тче, даде́. О, чудесе́ изря́днаго! О, благода́ти! Юже получи́лъ еси́, житіе́мъ украша́емь а́нгельскимъ, досточу́дне. Беззло́бивъ, пра́въ, любо́венъ и ми́лостивъ страннолю́бецъ, іера́рхъ свяще́ннѣйшій Архіере́я Вели́каго, Христа́ Бо́га на́шего, Спиридо́не, му́дрый бы́лъ еси́. Тѣ́мже свѣтоно́сный тво́й пра́здникъ любо́вію соверша́емъ: моли́ спасти́ся душа́мъ на́шимъ.

Вельми́ тя́ просла́ви въ чудесѣ́хъ Госпо́дь, и жи́ва до конца́, іера́рше Спиридо́не: кто́ бо вѣ́рою и любо́вію а́ще и́мя твое́ свято́е призове́тъ, и не а́біе услы́шанъ быва́етъ и те́пла тя́ предста́теля обрѣта́етъ? Иже въ неду́зѣхъ — врача́, и въ бѣда́хъ — изба́вителя, грѣ́шныхъ — засту́пника, ни́щихъ — сокро́вище, спу́тник[а] — путеше́ствующихъ, въ мо́ри су́щихъ — прави́теля и утѣ́шителя. Тѣ́мже вопіе́мъ ти́: изба́ви ны́ отъ бѣ́дъ и спаси́ ста́до твое́ моли́твами твои́ми.

Преподо́бне о́тче, іера́рше прехва́льне, апо́стольскаго уче́нія бы́въ испо́лненъ и Боже́ственнаго Ду́ха жили́ще добродѣ́тельнаго ра́ди житія́ показа́лся еси́, во́лка отъ Це́ркве уче́ньми отгна́лъ еси́ и правосла́вныхъ вѣ́ру уясни́лъ еси́, сто́лпъ яви́лся еси́ благоче́стія и побо́рникъ. Тѣ́мже, и чудодѣ́йствуя въ концѣ́хъ, змію́ въ зла́то преложи́лъ еси́ и ме́ртвую къ вопроше́нію воздви́глъ еси́. Но о, отце́въ досточу́дне и учи́телей собесѣ́дниче, Спа́су моли́ся спасти́ ду́ши на́ша.

Торжеству́йте дне́сь, вси́ священнонача́льницы, пріиди́те, вѣ́рніи, учреди́мся. Спиридо́нъ бо му́дрый всѣ́хъ на́съ созыва́етъ, духо́вную представля́я трапе́зу: сего́ бо чудеса́ превосхо́дятъ вся́к[ъ] смы́слъ. Возме́мъ у́бо пѣ́снь, и по си́лѣ воспои́мъ архіере́евъ вели́кую сла́ву, его́же не довлѣ́ютъ вси́ язы́цы досто́йную возда́ти хвалу́: сего́же во вѣ́ки богогла́сно ублажа́емъ.

Пресла́вное, всему́дре, житіе́ твое́, мíру тя́ пресла́вна содѣ́ла, земны́й а́нгеле, Спиридо́не, и небе́сный человѣ́че. Пѣснопѣ́ніе и хвалу́ принося́ на вся́къ де́нь красно́, Еди́ному Бо́гу возложи́въ ду́шу и помышле́ніе, бы́лъ еси́ чи́стое Его́ прія́телище, Ему́же моли́ся, всеблаже́нне, спасти́ся душа́мъ на́шимъ.

Пріиди́те, вси́ собо́ри христіа́нстіи, припаде́мъ къ ра́цѣ Спиридо́на чу́днаго и возопіе́мъ ему́ съ весе́ліемъ: ра́дуйся, преблаже́нне, я́ко си́лою Христо́вою ди́венъ яви́лся въ житіи́ твое́мъ. И кто́ мо́жетъ изчести́ чудеса́ твоя́? Въ да́льнихъ бо страна́хъ по мо́рю, я́ко по су́ху ходя́ща, ви́дѣнъ бы́лъ еси́, и корабли́ свобожда́я отъ потопле́нія, діа́вольскую прогоня́[лъ еси] си́лу, тѣ́мже, свѣти́льниче Це́ркве, моли́ спасти́ся ста́д[у] твое[му́].

Дне́сь возсія́ на́мъ па́мять твоя́, сла́вне, я́ко со́лнце свѣтоза́рное, луча́ми озаря́ющее мíръ и тму́ но́щ[и] злы́хъ духо́въ отъ на́съ отгоня́ющее. Дне́сь и мы́ грѣ́шніи, припа́дающе, мо́лимся: о́тче Спиридо́не свяще́нне, изми́ на́съ отъ настоя́щихъ бѣ́дъ и спаси́ моли́твами твои́ми, уми́льно взыва́ющихъ ти́: ра́дуйся, Тро́ицы честно́е прія́телище; ра́дуйся, догма́товъ вѣ́рныхъ утверди́телю; ра́дуйся, правосла́вныхъ похвало́. Тѣ́мже мо́лимъ тя́: утѣша́й на́съ духо́внѣ, архіере́овъ вѣ́рныхъ предста́телю и вели́кое заступле́ніе; ра́дуйся, небоявле́нное іера́рховъ пра́вило.

Сла́ва, гла́съ 6:

Преподо́бне о́тче, изъ младе́нства приле́жно обучи́лся еси́, и во Христа́ обле́клся еси́, тѣ́мже тя́ стра́жа ове́цъ Свои́хъ поставля́етъ, ловца́ волко́въ и всему́драго пле́веловъ любодѣ́йчищныхъ исторга́теля, сѣ́ятеля же пра́выхъ догма́товъ всечу́днаго, гони́теля ерети́чествующихъ зѣло́ крѣпча́йшаго, Арія безу́мнаго и безбо́жнаго ле́сть прогна́вша, уста́ филосо́фовъ загради́теля, на Собо́рѣ благосказа́ніемъ слове́съ твои́хъ вся́ у́мствовавшія упраздни́лъ еси́, и Святы́я Тро́ицы держа́ву во все́мъ мíрѣ я́сно возвѣсти́лъ еси́: въ ру́цѣ держа́ пли́нѳу, и исти́снувъ о́ную, изы́де о́гнь и вода́, и бре́ніе въ ру́цѣ оста́ся; си́це и въ Святѣ́й Тро́ицѣ Три́ Лица́, а Еди́нъ Бо́гъ словеси́ подтверди́лъ еси́. Тѣ́мже, святѣ́йшій о́тче, приступа́юще дне́сь съ весе́ліемъ, свяще́нное и свято́е тѣ́ло твое́ со стра́хомъ лобза́емъ, и, ра́дующеся, велича́емъ просла́вльшаго тя́ Го́спода, Ему́же моли́ся о душа́хъ на́шихъ.

И ны́нѣ, гла́съ то́йже:

Верте́пе, благоукраси́ся, Агница бо гряде́тъ, чревонося́щи Христа́, я́сли же, подъими́те сло́вомъ разрѣши́вшаго отъ безслове́снаго дѣя́нія на́съ, земноро́дныхъ. Па́стыріе, свиря́юще, свидѣ́тельствуйте чудеси́ стра́шному, и волсви́ отъ Перси́ды, зла́то, и лива́нъ, и сми́рну Царю́ принеси́те, я́ко яви́ся Госпо́дь изъ Дѣ́вы Ма́тере. Ему́же и, прини́кше, ра́бски Ма́ти поклони́ся и привѣща́ше къ Держи́мому на объя́тіихъ Ея́: ка́ко всѣ́ялся еси́ Мнѣ́? Или́ ка́ко прозя́блъ еси́ во Мнѣ́, Изба́вителю мо́й и Бо́же?

На стихо́внѣ стихи́ры, гла́съ 5. Подо́бенъ: Ра́дуйся по́стническихъ.

Ра́дуйся, архіере́евъ пра́вило,* Це́ркве непоколеби́мое утвержде́ніе,* сла́во правосла́вныхъ,* чуде́съ исто́чниче,* любве́ струя́ неистощи́мая,* свѣти́льниче многосвѣ́тлый,* Ду́ха орга́не,* у́ме боже́ственныи,* кро́ткій и незло́бивый,* и́же простото́ю и́стинною украша́емь,* человѣ́че небе́сный, земны́й а́нгеле,* виногра́да дѣ́лателю,* Христо́въ дру́же и́скренній,* Того́ моли́ пода́ти тебе́ чту́щимъ ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Кро́токъ и наслѣ́дникъ земли́ ты́ кро́ткихъ* вои́стинну показа́лся еси́, Спиридо́не,* отце́въ сла́во,* и́же жи́лами му́дрыхъ и просты́хъ твои́хъ слове́съ Боже́ственною благода́тію* врага́ вселука́ваго и пребезу́мнаго Арія удави́лъ еси́* и, велѣ́ніе Боже́ственное всѣ́мъ уясни́въ,* вѣ́рнымъ показа́лъ еси́,* и спаси́тельное возвы́сивъ ду́хомъ,* вся́ же правосла́вныя просвѣти́въ яснѣ́йше* Еди́но сла́вити Сло́во,* я́ко вои́стинну Единосу́щное Отцу́ Пребезнача́льному,* подаю́щее мíру ве́лію ми́лость.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Стра́сти умертви́въ плотскíя,* ме́ртвыя благода́тію Бо́жіею возста́вилъ еси́,* и змію́ въ зла́то претвори́лъ еси́,* и рѣки́ стремле́ніе моли́твою твое́ю, о́тче, обузда́лъ еси́;* но́щію же царю́ я́влься бѣ́дствующему,* сего́ исцѣли́лъ еси́ къ се́рдцу приближе́ніемъ,* Го́споду тя́ пресла́вно прославля́ющу.* Тѣ́мже велегла́сно твою́ па́мять почита́емъ* и моще́й цѣле́бную и освяще́нную ра́ку чти́мъ,* изъ нея́же истека́етъ врачева́ній Боже́ственныя струи́* и ве́лія ми́лость.

Сла́ва, гла́съ 2:

Святи́телей боже́ственный сосу́дъ, о́тче преподо́бне, Спиридо́не му́дре, ты́ добродѣ́тельми показа́лся еси́: сего́ ра́ди Це́ркве предста́тель бы́въ, ересенача́льники изгна́лъ еси́ и Аріево хуле́ніе собо́рнѣ на зе́млю низложи́лъ еси́. Тѣ́мже, чудодѣ́йствуя дѣ́ломъ и сло́вомъ, Спа́са моли́ спасти́ся душа́мъ на́шимъ.

И ны́нѣ, гла́съ то́йже:

Се́ вре́мя прибли́жися спасе́нія на́шего, гото́вися, верте́пе, Дѣ́ва приближа́ется роди́ти; Виѳлее́ме, земле́ Іу́дова, красу́йся и весели́ся, я́ко изъ тебе́ возсія́ Госпо́дь на́шъ. Услы́шите, го́ры, и хо́лми, и окре́стныя страны́ Іуде́йскія, я́ко гряде́тъ Христо́съ, да спасе́тъ, его́же созда́, человѣ́ка, я́ко Человѣколю́бецъ.

Тропа́рь, гла́съ 1:

Собо́ра Пе́рваго показа́лся еси́ побо́рникъ и чудотво́рецъ, богоно́се Спиридо́не, о́тче на́шъ. Тѣ́мже ме́ртву ты́ во гро́бѣ возгласи́въ, и змію́ въ зла́то претвори́лъ еси́, и внегда́ пѣ́ти тебѣ́ святы́я моли́твы, а́нгелы, сослужа́щія тебѣ́, имѣ́лъ еси́, свяще́ннѣйшій. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.

Сла́ва, и ны́нѣ, богоро́диченъ:

Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.


НА УТРЕНИ,
[На Богъ Господь: Тропарь святаго: Собо́ра Пе́рваго.., дважды. Слава, и нынѣ, богородиченъ.]

По 1-й стихологіи сѣдаленъ, гласъ 1. Подобенъ: Гробъ Твой.

Гряди́те, вси́ вѣ́рніи, вои́стину, уви́димъ чу́до преди́вно: тлѣ́нна бо нетлѣ́нна пребыва́ютъ и чудотворе́ніемъ украша́ема. Тѣ́мже мы́, о́тче Спиридо́не, взыва́емъ и я́сно восклица́емъ пѣ́снь тебѣ́ благогла́сную, те́плый на́шъ засту́пниче.

Сла́ва:

Спиридо́не прему́дре, наста́ со́лнца свѣтлѣ́йшій пра́здникъ, и озаря́етъ приходя́щія къ ра́цѣ моще́й твои́хъ; и отту́ду тѣлесе́мъ почерпа́емъ здра́віе и душа́мъ весе́ліе; тѣ́мже во всечестнѣ́мъ хра́мѣ твое́мъ пра́зднуемъ досточу́дную па́мять твою́.

И ны́нѣ, [богоро́диченъ]:

Марíе, честно́е Влады́ки прія́телище, воскреси́ ны па́дшія въ про́пасть лю́таго отча́янія, и прегрѣше́ній и скорбе́й, Ты́ бо еси́ грѣ́шнымъ спасе́ніе и по́мощь, и крѣ́пкое предста́тельство, и спаса́еши ду́ши на́ша.

По 2-й стихоло́гіи сѣда́ленъ, гла́съ 8. Подо́бенъ: Прему́дрость и Сло́во.

Священнонача́льствомъ и́стиннымъ житіе́ уясни́лъ еси́, Госпо́дне благоче́стно сло́во всѣ́ялъ еси́ человѣ́комъ, святи́телю, Ду́ха заре́ю излива́я уче́ній ту́чи земли́, прему́дре, насади́въ обы́чаи бла́ги и мíра всего́ концы́ просвѣти́лъ еси́, тѣ́мже, во хра́мѣ твое́мъ дне́сь лику́юще, архіере́евъ пра́вило, моли́ Христа́ Бо́га прегрѣше́ній оставле́ніе дарова́ти, пра́зднующимъ любо́вію святу́ю па́мять твою́.

Сла́ва:

Авраа́мову страннолю́бному нра́ву ты́ уподо́бився, Іа́ковлю же ове́цъ па́стырству, Іов[лю] терпѣ́нію, Дави́дов[ѣ] кро́тост[и], Моисе́еву незло́бію, Ду́ха бы́лъ еси́ жили́ще, святи́телю Спиридо́не, богому́дре, злосла́вныя во́лки отгна́лъ еси́ словесы́ твои́ми, и правосла́вныхъ вѣ́ру утверди́лъ еси́, Елиссе́еву же благода́ть стяжа́въ, іера́рше блаже́нне, моли́ Христа́ Бо́га, прегрѣше́ній оставле́ніе дарова́ти, пра́зднующимъ любо́вію святу́ю па́мять твою́.

И ны́нѣ, [богоро́диченъ]:

Прему́дрость и Сло́во въ чре́вѣ Твое́мъ неопа́льно заче́нши, Ма́ти Бо́жія, мíру родила́ еси́ мíръ Содержа́щаго и во объя́тіяхъ имѣ́ла еси́ вся́ Содержа́щаго, Пищеда́теля всѣ́хъ и Творца́ тва́ри. Тѣ́мже молю́ Тя, Всесвята́я Дѣ́во, и вѣ́рою сла́влю Тя́, изба́витися мнѣ́ отъ прегрѣше́ній, и въ де́нь суда́, егда́ предста́ну предъ лице́мъ Созда́теля моего́, Влады́чице Чи́стая, Твою́ по́мощь тогда́ пода́ждь ми́: мо́жеши, ели́ка хо́щеши, Всепѣ́тая.

По поліеле́и сѣда́ленъ, гла́съ 3. Подо́бенъ: Красотѣ́ дѣ́вства.

Змíю претвори́лъ еси́ въ зла́то, свя́те, въ словесѣ́хъ же прѣ́нія, твои́ми препро́стыми словесы́, прего́рдаго и лука́ваго побѣди́лъ еси́ Арія, богому́дре, царя́ же содержи́ма огне́мъ исцѣли́лъ еси́, де́моны прогоня́я; тѣ́мже тя́ уми́льно воспѣва́емъ, іера́рховъ боже́ственное утвержде́ніе.

Сла́ва, гла́съ 8. [Подо́бенъ:] Прему́дрость и Сло́во.

Царе́ви и таи́нникомъ въ словопрѣ́ніи, боголѣ́пнѣ, всече́стне, простра́ннѣ изъясни́лъ еси́ почита́ніе Святы́я Тро́ицы въ Тре́хъ Ѵпоста́сѣхъ и Еди́нѣмъ Божествѣ́, проти́вныя посрами́лъ еси́, іера́рше ди́вне, моли́ Христа́ Бо́га грѣхо́въ оставле́ніе дарова́ти, пра́зднующимъ любо́вію святу́ю па́мять твою́.

И ны́нѣ, [богоро́диченъ]:

Яко дѣ́ву и еди́ну въ жена́хъ Тя́ безъ сѣ́мене ро́ждшую Бо́га пло́тію, вси́ ублажа́емъ ро́ди человѣ́честіи: Огнь бо всели́ся въ Тя́ Божества́, и я́ко младе́нца дои́ши Зижди́теля и Го́спода. Тѣ́мъ а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́, и согла́сно вопіе́мъ Ти́: моли́ Христа́ Бо́га, прегрѣше́ній оставле́ніе дарова́ти, покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Вся́кое дыха́ніе... Ева́нгеліе Іоа́нна, зача́ло 35 отъ полу́.]

По 50-мъ псалмѣ́ стихи́ра, гла́съ 6:

Преподо́бне, треблаже́нне, святѣ́йшій о́тче, па́стырю до́брый, по́лнь благода́ти бы́въ Боже́ственныя, возгремѣ́лъ еси́ уче́нія и вселе́нныя концы́ озари́въ чудесы́, Арія побѣди́лъ еси́, тѣ́мже мо́лимся, Спа́су моли́ся, спасти́ ду́ши на́ша.

Кано́нъ Богоро́дицы со ирмосо́мъ на 6 и свята́го два́ кано́на на 8.

Кано́нъ Пресвяты́я Богоро́дицы, его́же краегране́сіе: Пою́ хвалу́ живоно́снѣй Отрокови́цѣ. Гла́съ 2.
Пѣ́снь 1.

Ирмо́съ: Нетре́ну, необы́чну, немо́кренно морску́ю ше́ствовавъ стезю́, избра́нный вопія́ше Изра́иль: Го́сподеви пои́мъ, я́ко просла́вися.

Невеще́ственная дре́вле лѣ́ствица и стра́нно оляденѣ́вшій пу́ть мо́ря Твое́ явля́ше Рождество́, Чи́стая, Юже пое́мъ вси́, я́ко просла́вися. [Два́жды.]

Си́ла Вы́шняго Ѵпоста́сь соверше́нная, Бо́жія Му́дрость, вопло́щшаяся, Пречи́стая, изъ Тебе́, къ человѣ́комъ бесѣ́дова, я́ко просла́вися.

Про́йде сквозѣ́ две́рь непрохо́дную заключе́нныя утро́бы Твоея́ пра́вды Со́лнце, Чи́стая, и мíру возсія́, я́ко просла́вися.

Кано́нъ преподобнаго, его́же краегране́сіе: Тебѣ́, Спиридо́не, воспѣва́ю боже́ственное пѣ́ніе. Гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Кро́ткихъ зе́млю дости́гъ, о́тче, я́ко кро́токъ, и ми́лостивъ, и чи́стъ бы́въ, настоя́щую се́рдца моего́ укроти́ бу́рю, я́ко да, въ тишинѣ́ боже́ственнѣй бы́въ, пѣсносло́влю тя́.

Дѣ́ланіи боже́ственными ду́шу, о́тче, очи́стивъ, богови́дѣнъ, Спиридо́не, бы́лъ еси́ и Боже́ственнаго Ду́ха пресвѣ́тлымъ обогати́лся еси́ осія́ніемъ; тѣ́мъ озаря́еши чи́сто блажа́щія тя́.

Отъ па́ствы, я́коже Дави́дъ, тя́ воспріе́мъ, Содѣ́тель слове́сныя тя́ поста́ви па́ствы па́стыря всеизя́щнѣйша, простото́ю и кро́тостію сія́юща и беззло́біемъ, преподо́бне па́стырю, украша́ема.

Богоро́диченъ: Пресвята́я Дѣ́во Чи́стая, просвѣти́ и освяти́ помышле́нія и ду́шу мою́, молю́ся, о́блаки разоря́ющи невѣ́жества моего́ и тму́ отъе́млющи грѣхо́вную, я́ко да по до́лгу ублажа́ю Тя́.

Другíй кано́нъ свята́го, гла́съ 1.
Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Недоумѣ́ннымъ язы́комъ и устна́ми похвале́ніе ма́лое и моле́ніе Тебѣ́, Христе́, приношу́: озари́ у́мъ мо́й, молю́ся, я́ко да воспою́ уго́дника Твоего́ Спиридо́на свяще́ннаго.

Похваля́ю твое́ дерзнове́ніе, е́же ко Христу́ Бо́гу, Спиридо́не, имѣ́лъ еси́, тѣ́мже, о́тче, молю́ тя́: бога́тыхъ Ду́ха сокро́вищь, ка́плю ра́зума да́ждь ми́, я́ко да досто́йно похвалю́ тя́.

Сла́ва: Сказу́етъ вся́ подсо́лнечная, Спиридо́не треблаже́нне, чуде́съ твои́хъ добродѣ́телей пучи́на: ни́щимъ предста́теля, и сирота́мъ и вдови́цамъ пита́теля, и слѣпы́мъ путевожда́, всѣ́мъ же побо́рника.

И ны́нѣ, богоро́диченъ: Души́ моея́ стра́сти исцѣли́, и печа́ли недоумѣ́ніе побѣди́, Яже Бо́га ро́ждшая на спасе́ніе мíру.

Катава́сія: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Пѣ́снь 3.

Ирмо́съ: Лу́къ сокруши́ся си́льныхъ держа́вою Твое́ю, Христе́, и си́лою немощству́ющіи препоя́сашася.

Иже вре́мене внѣ́ вся́каго, я́ко време́нъ Творе́цъ, изъ Тебе́, Дѣ́во, во́льно Младе́нецъ созда́ся.

Неискусобра́чная Влады́чице, Яже Бо́га во утро́бѣ заче́нши, напа́стей и печа́лей всѣ́хъ на́съ изба́ви.

Чре́во, простра́ннѣйшее небе́съ, воспои́мъ, и́мже Ада́мъ на небесѣ́хъ, ра́дуяся, живе́тъ.

Непобѣди́мую стѣ́ну Тя́ и держа́вную наде́жду, вѣ́рніи стяжа́хомъ въ напа́стехъ, Ма́ти Дѣ́во.

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Умъ тво́й безстра́стіемъ просвѣти́въ и боже́ственнымъ смире́ніемъ украси́вся, дарова́нія Ду́ха прія́лъ еси́ отгони́ти ду́хи и рѣши́ти неду́ги вѣ́рно чту́щихъ тя́, свяще́ннѣйше.

Змíя началозло́бнаго уби́въ, нра́въ сребролю́бный попра́въ, ми́луя тре́бующаго, святи́телю, змíя преложи́лъ еси́ въ злату́ю у́тварь свяще́нными твои́ми моли́твами, о́тче преподо́бне.

Возше́лъ еси́ на го́ру безстра́стія, вше́лъ еси́ во хра́мъ боговидѣ́нія, въ скрижа́ли же се́рдца твоего́ прія́лъ еси́ зако́нъ спаси́тельный, я́ко свяще́ннѣйшій и уго́дникъ при́сный Влады́ки Твоего́.

Богоро́диченъ: Уврачи́ стру́пы души́ моея́, у́мъ мо́й, омраче́нный нерадѣ́ніемъ, Богоневѣ́сто, озари́, да пою́: нѣ́сть непоро́чны, па́че Тебе́, Непоро́чная, и нѣ́сть чи́сты, па́че Тебе́, Влады́чице.

Инъ.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Пре́жде па́стырь ове́цъ, вели́кій Спиридо́не, бы́лъ еси́, послѣди́ же па́стырь богопроизведе́нъ Це́ркве. Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Прему́драго іера́рха восхва́лимъ, я́ко те́пла въ бѣда́хъ и въ ско́рбехъ су́ща отъ Бо́га помо́щника и защи́тника, вси́ Спиридо́на, вѣ́рніи, богоно́снаго, благоче́стно воспои́мъ.

Сла́ва: Воздержа́ніемъ житіе́ украси́въ, и вѣ́ры испо́лненъ, о́тче треблаже́нне, и́дола бо вели́каго сокруши́лъ еси́ и злоче́стіе его́ обличи́лъ еси́, тѣ́мъ Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

И ны́нѣ, богоро́диченъ: Все́ вре́мя живота́ моего́ ижди́хъ въ блудѣ́хъ и я́звахъ лю́тыхъ, и ны́нѣ веду́тъ смире́нную мою́ ду́шу си́хъ дѣ́латели. Богороди́тельнице Дѣ́во, помози́ ми́, да воззову́ къ Бо́гу: Свя́тъ еси́, Го́споди.

Катава́сія: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Конда́къ, гла́съ 8: Подо́бенъ: Взбра́нной Воево́дѣ.

Ке́ркир[ы] свободи́телю ны́нѣ да отве́рземъ уста́ къ похвале́нію, я́ко одолѣ́нія чу́вственная: рабы́ твоя́, богоно́се, имѣ́яй при́сно сострада́ніе, отъ ва́рваръ, о Спиридо́не, сохраня́й зову́щихъ: ра́дуйся, о́тче приснопа́мятне.

Сѣда́ленъ, гла́съ 8. Подо́бенъ: Прему́дрость и Сло́во.

Отъ па́ствы ове́цъ предста́тельствовати Христо́вѣ Це́ркви вручи́вся, па́стырь богопроизведе́нъ ты́, Спиридо́не, возсія́лъ еси́, злосла́вія во́лки отгна́лъ еси́ словесы́ твои́ми, на благоче́стія па́жити сію́ воспита́въ. Тѣ́мже посредѣ́ богоно́сныхъ отце́въ вѣ́ру утверди́лъ еси́ му́дростію Ду́ха, іера́рше блаже́нне, моли́ Христа́ Бо́га, прегрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ. Подо́бенъ:

Яко Всенепоро́чная Невѣ́ста Творцу́, я́ко Неискусому́жная Ма́ти Изба́вителя, я́ко прія́телище су́щи Утѣ́шителя, Всепѣ́тая, беззако́нія мя́ су́ща скве́рное жили́ще и бѣсо́въ игра́лище въ ра́зумѣ бы́вша, потщи́ся си́хъ злодѣ́йства мя́ изба́вити, свѣ́тлое жили́ще добродѣ́телей содѣ́лавши, свѣтода́тельная, нетлѣ́нная. Отжени́ о́блакъ страсте́й и вы́шняго прича́стія сподо́би и свѣ́та невече́рняго, моли́твами Твои́ми.

Пѣ́снь 4.

Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Се́ превознесе́ся Боже́ственная гора́ до́му Госпо́дня превы́шше си́лъ, Богома́терь я́вственнѣйши. [Два́жды.]

Зако́новъ есте́ственныхъ кромѣ́, еди́на, Дѣ́во, ро́ждши Влады́чествующаго тва́рію, сподо́билася еси́ боже́ственнаго зва́нія.

Утро́ба Твоя́, Препѣ́тая, и сосца́ боже́ственна, Дѣ́во, тѣ́хъ бо ра́ди жи́знь вси́ обрѣто́хомъ.

Инъ.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Угльми Честна́го разже́гся Ду́ха, страсте́й удобопопаля́емую ве́щь, всеблаже́нне, поже́глъ еси́, мíръ же огнесія́ньми добродѣ́телей твои́хъ, Спиридо́не, просвѣти́лъ еси́.

Умертви́въ твоя́ плотска́я движе́нія, богодохнове́нне, ме́ртвыя возста́вилъ еси́ животво́рнымъ твои́мъ приглаго́ланіемъ. Тѣ́мже молю́ тя: умерщвле́нную ду́шу мою́, о́тче, оживи́.

Повину́ющися, ме́ртвая тебѣ́ гла́съ, о́тче, даде́ и рѣ́чная стремле́нія твои́ми удержа́шася повелѣ́ніи: яви́лся еси́ бо, блаже́нне, чудодѣ́латель, Боже́ственную благода́ть пріе́мь.

Богоро́диченъ: Проро́цы Твоего́ та́инства глубину́ провозвѣсти́ша недомы́сленную: еди́на бо родила́ еси́, Чи́стая, Недоразумѣва́емаго, воплоще́нна за милосе́рдіе неисповѣди́мое.

Инъ.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Вѣ́рнымъ предста́тельствуеши, покрыва́я и соблюда́я ты́я, блаже́нне, вся́кія ско́рби избавля́я я́вѣ, Спиридо́не преподо́бне, іера́рховъ краснѣ́йшая сла́во и похвало́.

Ве́лій засту́пникъ и те́плый въ бѣда́хъ обрѣта́ющимся еси́, сла́вне, су́щимъ на земли́, и пла́вающимъ, су́щимъ въ дале́чныхъ страна́хъ, засту́пниче ми́лостивый.

Сла́ва: Враго́въ, и́щущихъ зла́ сотвори́ти мнѣ́, свя́те, изми́ мя́, [я́]коже ни́щаго препита́лъ еси́, бога́таго же жи́тницы изпрове́рглъ еси́, іера́рше Спиридо́не всему́дре.

И ны́нѣ, богоро́диченъ: Возревнова́въ сопе́рникъ проти́ву ста́да твоего́, Пречи́стая, на кíйждо де́нь и́щетъ лука́вый снѣ́дь сотвори́ти, но Ты́, Богоро́дице, того́ вре́да изми́ ны́.

Катава́сія: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Пѣ́снь 5.

Ирмо́съ: Угль Иса́іи проявле́йся, Со́лнце изъ дѣ́вственныя утро́бы возсія́, во тмѣ́ заблу́ждшимъ, богоразу́мія просвѣще́ніе да́руя.

Всѣ́хъ Царя́, Цари́це, и Го́спода на рука́хъ Твои́хъ понесла́ еси́, и млеко́мъ пита́ла еси́, Ма́ти, вся́ Пита́ющаго, а́нгелъ Превы́шшая.

Облацы, весе́лія сла́дость кропи́те су́щимъ на земли́, я́ко Отроча́ даде́ся, Сы́й пре́жде вѣ́къ, отъ Дѣ́вы вопло́щся, Бо́гъ на́шъ.

Житію́ и пло́ти мое́й свѣ́тъ возсія́, и дря́хлость грѣха́ разруши́, напослѣ́докъ изъ Дѣ́вы безъ сѣ́мене вопло́щся, Вы́шній.

Ра́дость Тебѣ́, и́же пра́отцемъ сѣ́тованіе разрѣша́ющую, Гавріи́лъ свяще́нный арха́нгелъ, съ небесе́ слетѣ́въ благовѣствова́ше, Чи́стая Богоневѣ́сто.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Рѣка́ су́щихъ въ тебѣ́ дарова́ній вся́кое напоя́етъ, преподо́бне, се́рдце, всѣ́мъ да́руетъ бога́тно здра́віе, вся́ Бо́га къ сла́вѣ возставля́етъ, тебе́ просла́вльшаго и чудодѣ́йствы вся́кими почествова́вшаго.

Тя́ ца́рь земны́й, блаже́нне, Царя́ Небе́снаго я́вѣ позна́ и́скренняго раба́ и дарова́ній Боже́ственныхъ испо́лненнаго, внегда́ пріити́ тебѣ́ къ нему́ вели́каго врача́ къ Бо́гу возвѣща́я.

Авраа́мову страннолю́бному нра́ву ты́ уподо́бився, всѣ́мъ до́ма твоего́ вхо́ды отве́рзлъ еси́, и всѣ́мъ вся́къ бы́лъ еси́, и промышля́я су́щими во обстоя́ніи, Спиридо́не блаже́нне.

Богоро́диченъ: Но́ва на́мъ породила́ еси́ Младе́нца, пре́жде вѣко́въ, Отрокови́це, рожде́нна отъ Отца́ Безнача́льна. Его́же умоли́, я́ко Сы́на и Бо́га Твоего́, уще́дрити Богоро́дицу Тя́, Пречи́стая, душе́ю чи́стою возвѣща́ющія.

Инъ.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Си́лою Пода́вшаго тебѣ́ знамена́тельнѣ, отъ беззако́нныхъ ру́къ Керки́рскій гра́дъ спа́слъ еси́, и на́съ ны́нѣ, вопію́щихъ тебѣ́, отъ мірски́хъ сѣте́й изба́ви, чудотво́рче ди́вне, Спиридо́не сла́вне.

Ве́сь свяще́нный Собо́ръ удиви́ся чудесы́ твои́ми, свяще́нный Спиридо́не, и, пли́нѳою показу́я Святу́ю Тро́ицу, Аріево посрами́лъ еси́ злоче́стіе, блаже́ннѣйшій.

Сла́ва: Показа́вый еди́нство Святы́я Тро́ицы, и увѣ́рити хотя́ злочести́выя сердца́, о́гнь и во́ду отсла́въ во свое́ существо́, земля́ же еди́на оста́ся въ рука́хъ твои́хъ, блаже́ннѣйшій, и вѣ́рныхъ сердца́ просвѣща́еши.

И ны́нѣ, богоро́диченъ: Святы́хъ Святѣ́йшую Тя́ разумѣва́емъ, я́ко еди́ну ро́ждшую Христа́ Бо́га, Царя́ и Влады́ку всѣ́хъ, Дѣ́во Нескве́рная, Ма́ти Безневѣ́стная, вѣ́рныхъ Похвало́.

Катава́сія: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Пѣ́снь 6.

Ирмо́съ: Гла́съ глаго́лъ моле́бныхъ отъ болѣ́зненныя, Влады́ко, души́ услы́шавъ, отъ лю́тыхъ мя́ изба́ви: еди́нъ бо еси́ на́шего спасе́нія вино́венъ.

Яже исто́чникъ безсме́ртія ро́ждши, Влады́чице, Христа́, уя́звленнаго мя́ страстьми́, Отрокови́це, исцѣли́, и огня́ вѣ́чнаго исхи́ти, еди́на Богоблагода́тная.

Естество́ человѣ́ческое, рабо́тающее грѣху́, Влады́чице Чи́стая, Тобо́ю свобо́ду улучи́: Тво́й бо Сы́нъ, я́ко агнецъ, за всѣ́хъ закала́ется.

Вопіе́мъ Ти́ вси́, и́стиннѣй Ма́тери Божіи: прогнѣ́вавшія рабы́ изба́ви, Еди́на бо дерзнове́ніе къ Сы́ну и́маши.

Кля́тся, я́коже рече́ Госпо́дь, и́стиною дре́вле Дави́ду, изъ чре́ва Твоего́ проше́дъ, испо́лни: родила́ бо еси́, Отрокови́це, не́бомъ и земле́ю Ца́рствующаго.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Зла́то, я́ко ка́лъ, тебѣ́ вмѣни́ся, па́че зла́та безстра́стіемъ сія́ющу и обогати́вшуся, преподо́бне, дарова́ніи всезлаты́ми Ду́ха.

Чи́сто служа́ Влады́цѣ Твоему́, мно́жество имѣ́лъ еси́, преподо́бне, послу́шающее Тебе́ а́нгельскихъ си́лъ, неви́димыми гла́сы, свяще́ннѣйше.

Пресла́вное, всему́дре, житіе́ твое́ мíру тя́ пресла́вна, о́тче, содѣ́ла. Тѣ́мже боже́ственную па́мять твою́, ра́дующеся, соверша́емъ, пою́щіи Тя́.

Богоро́диченъ: Небе́съ ши́рши чре́во Твое́ бы́сть, Неискусому́жная, Бо́га вмѣсти́вшее, нигдѣ́же вмѣсти́маго, Всесвята́я Дѣ́во Богоневѣ́сто.

Инъ.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Проповѣ́дуетъ твоя́, о́тче, чудеса́, ны́нѣ Керки́рская вели́кая митропо́лія, и це́рковь твоя́, въ Тріе́стѣ су́щая, и вся́ оте́чествія твоя́ чудодѣ́йства, Спиридо́не богому́дре.

Тріе́стская твоя́ це́рковь дне́сь, о́тче, въ па́мяти твое́й красу́ется, и вся́ язы́ки созыва́етъ, я́ко трубо́ю, чудеса́ми твои́ми на похвале́ніе хвалы́ досто́йнаго.

Сла́ва: Стра́нна и ужа́сна содѣва́еши чудеса́, Спиридо́не, по все́й земли́ и въ мо́ри дале́че бѣ́дствующимъ, скороте́чными моли́твами предста́тельствуя лю́демъ вѣ́рнымъ, богоблаже́нне.

И ны́нѣ, богоро́диченъ: Ве́сь вопло́щься во утро́бѣ Твое́й, Пречи́стая, Христо́съ Бо́гъ, безъ сѣ́мене роди́ся: не стерпѣ́ бо Свои́хъ ру́къ созда́ніе отъ льсти́ваго зрѣ́ти му́чимо.

Катава́сія: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Конда́къ, гла́съ 2. Подо́бенъ: Вы́шнихъ ища́.

Любо́вію Христо́вою уязви́вся свяще́ннѣйшій, у́мъ впери́въ заре́ю Ду́ха, дѣ́тельнымъ видѣ́ніемъ твои́мъ дѣя́ніе обрѣ́лъ еси́, богопрія́тне, же́ртвенникъ Боже́ственный бы́въ, прося́ всѣ́мъ Боже́ственнаго сія́нія.

Икосъ:

Изъ чре́ва освяще́ннаго іера́рха Госпо́дня, восхва́лимъ ны́нѣ Спиридо́на, благода́ти скрижа́ли пріе́мшаго Боже́ственныя сла́вы, и въ чудесѣ́хъ пресла́внаго все́й тва́ри, и я́ко те́пла и самови́дца Боже́ственнаго осія́нія, я́ко ни́щихъ предста́теля и согрѣша́ющихъ душево́дца: то́й бо Боже́ственна престо́лу Христо́ву же́ртва бы́сть, прося́ всѣ́мъ Боже́ственнаго сія́нія.

Та́же чте́ніе изъ Про́лога:
Мѣ́сяца Деке́мврія во 12-й де́нь, па́мять и́же во святы́хъ отца́ на́шего Спиридо́на, епи́скопа Тримиѳу́нтскаго, чудотво́рца.

Се́й бя́ше въ ца́рство Константи́на Вели́каго и Конста́нтія, сы́на его́, бѣ́ же нра́вомъ препро́стъ и смире́нъ се́рдцемъ. Бя́ше же изнача́ла па́стырь овца́мъ, та́же и женѣ́ пріобщи́вся, и по уме́ртвіи ея́ поста́вленъ бы́сть епи́скопъ. Толи́ко же вдана́ бы́сть ему́ благода́ть чуде́съ отъ Бо́га, я́ко въ бездо́ждіе до́ждь сведе́, и па́ки его́ умноже́нію бы́вшу, моли́твою уста́ви и́. И бы́вшаго гла́да, отъ хлѣбопрода́вца нѣ́коего наро́дъ изба́ви, разруши́вшимся его́ жи́тницамъ. И змію́ въ зла́то преложи́, и ме́ртвую о поло́зѣ вопроси́въ, отвѣ́тъ отъ нея́ получи́, и царя́ Константи́на отъ одержи́мыя стра́сти уврачева́, и отроча́ нѣ́которыя жены́, уме́ршее, оживи́. И спослушеству́ющу сему́ свято́му а́нгелы яви́шася, «и со духо́мъ твои́мъ», внегда́ въ це́ркве ему́ по обы́чаю ми́ръ всѣ́мъ пода́ти, и е́же слове́съ му́дрствующихъ въ Нике́йстѣмъ Собо́рѣ си́лою Свята́го Ду́ха воспяти́. Толи́ко же бя́ше ми́лостивъ, я́ко нѣ́когда прише́дшимъ тате́мъ въ ста́до его́, укра́сти отъ ове́цъ его́ хотя́щимъ, не то́чію о́нѣхъ незрѣ́нія держи́мыя стра́сти измѣни́въ, но и овна́ еди́наго пода́въ и́мъ, и отпусти́ и́хъ, ре́къ: «пріими́те сіе́, да не всу́е бу́детъ бдѣ́ніе ва́ше». Се́й вруче́нную ему́ па́ству до́брѣ упа́съ, и ко а́нгельскому житію́ и прибы́тку пресели́ся. Соверша́ется же собо́ръ его́ въ це́ркви святы́хъ апо́столъ вели́кихъ, идѣ́же честно́е тѣ́ло его́ положено́ бы́сть.

Пѣ́снь 7.

Ирмо́съ: Вѣтíи яви́шася о́троцы любому́дрѣйшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Зря́ще въ нощи́, Іа́ковъ у́бо я́ко въ гада́ніи Бо́га, воплоще́нъ же изъ Тебе́, свѣ́тлостію яви́ся пою́щимъ: Пребоже́ственный отце́въ Бо́гъ и препросла́вленъ.

Зна́менія е́же въ Тебѣ́ неизрече́ннаго проявля́я сплете́нія, со Іа́ковомъ бо́рется: чрезъ е́же во́льно соедини́ся человѣ́комъ, Чи́стая, Пребоже́ственный отце́въ Бо́гъ и препросла́вленъ.

Ме́рзокъ, не проповѣ́дуяй еди́наго Дѣ́вы Тя́ Сы́на отъ Всепѣ́тыя Тро́ицы, и несомнѣ́нною мы́слію, и язы́комъ вопія́: Пребоже́ственный отце́въ Бо́гъ и препросла́вленъ.

Вѣ́рнымъ предста́тельнице, стѣно́ неразруши́мая, благохва́лящихъ Тя́, Ма́ти Бо́жія, всему́ ро́ду человѣ́ческому яви́ся Тобо́ю спасе́ніе, Пребоже́ственный отце́въ Бо́гъ и препросла́вленъ.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Моисе́ево незло́біе, Дави́дову кро́тость, Іова Авси́тидскаго непоро́чное стяжа́въ, Ду́ха бы́лъ еси́ жили́ще, поя́, свяще́ннѣйше: Сы́й благослове́нъ и препросла́вленъ.

Ороше́нія на главу́ твою́ во вре́мя жа́твы небеса́ иска́паша, бу́дущее прозна́меноваша: Бо́гъ бо, я́коже рече́, боже́ственную па́мять твою́, преподо́бне, просла́ви, вѣ́рныя освяща́я хода́тайствомъ твои́мъ.

Въ собо́рѣ отце́въ тя́ Бо́гъ прославля́етъ, на судѣ́ словеса́ твоя́ сохра́ньша, блаже́нне, я́же вѣ́рою прине́слъ еси́, безслове́снѣйшаго Арія обуя́ющая я́вѣ и упраздня́ющая сего́ противле́ніе.

Богоро́диченъ: Гро́здъ возрасти́ла еси́ неизрече́ннымъ сло́вомъ, я́ко лоза́, Дѣ́во, Еди́наго невоздѣ́ланнаго, вино́ источа́юща, вся́ веселя́щее, вся́ освяща́юща земны́я и вся́ко пія́нство лю́тыхъ отъе́млюща.

Инъ.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Вѣ́рою же изобличи́въ кова́рство Арія злочести́ваго, гряду́щу ти́ въ Собо́ръ, блаже́нне Спиридо́не му́дре, ученицы́ его́ злочести́віи, скоты́ твоя́ обезгла́виша, но вѣ́рою нече́стіе и́хъ посрами́лъ еси́, вопію́щу ти́: отце́въ Бо́же, благослове́нъ еси́. [Два́жды.]

Сла́ва: Кíй язы́къ изрещи́ возмо́жетъ пресла́вная чудеса́ твоя́, іера́рше Спиридо́не? Ка́я ли уста́ извитíйствовати возмо́жетъ дѣла́ пречу́дныя ми́лостыни твоея́? Ни́щія прекорми́лъ еси́, всегда́ взыва́я: отце́въ Бо́же, благослове́нъ еси́.

И ны́нѣ, богоро́диченъ: Изба́ви мя́, Влады́чице Блага́я, изъ глубины́ грѣхо́вныя и гее́нны муче́нія, и стра́сти се́рдца моего́ укроти́, Дѣ́во, да всегда́ взыва́ю: отце́въ Бо́же, благослове́нъ еси́.

Катава́сія: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Пѣ́снь 8.

Ирмо́съ: О подо́біи зла́тѣ небре́гше, треблаже́нніи ю́ноши, неизмѣ́нный и живы́й Бо́жій о́бразъ ви́дѣвше, среди́ огня́ воспѣва́ху: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Ви́дѣнъ бы́сть на земли́ Тобо́ю и съ человѣ́ки поживе́, Иже бла́гостію несравне́нный и си́лою. Ему́же пою́ще, вси́ вѣ́рніи, зове́мъ: осуществова́нная да пое́тъ Го́спода вся́кая тва́рь и превозно́ситъ во вся́ вѣ́ки.

Вои́стинно Тя́, Чи́стую, проповѣ́дающе, сла́вимъ Богоро́дицу: Ты́ бо Еди́наго родила́ еси́ отъ Тро́ицы воплоще́нна. Ему́же со Отце́мъ и Ду́хомъ вси́ пое́мъ: да пое́тъ Го́спода вся́кая тва́рь и превозно́ситъ во вся́ вѣ́ки.

Неискусобра́чно родила́ еси́, Дѣ́ва пребы́вши, и стра́ннымъ Рождество́мъ Твои́мъ, Богоро́дице, всѣ́хъ науча́еши взыва́ти: осуществова́нная да пое́тъ Го́спода вся́кая тва́рь и превозно́ситъ во вся́ вѣ́ки.

Укрѣпи́, Чи́стая, ду́шу мою́ разсла́бленную прегрѣше́ньми и страстьми́, я́ко да воспою́, Дѣ́во, Твое́ Рождество́: осуществова́нная да пое́тъ Го́спода вся́кая тва́рь и превозно́ситъ во вся́ вѣ́ки.

Инъ.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Пе́щь страсте́й боже́ственными одожде́ньми Боже́ственнаго Ду́ха погаси́лъ еси́ и ро́су источи́лъ еси́ неду́говъ, о́тче, зно́й отъе́млющую вѣ́рно къ тебѣ́ приходя́щихъ всегда́, блаже́нне Спиридо́не пребога́те.

Беззло́бивъ, пра́въ, кро́токъ же, и ми́лостивъ, и незлопа́мятливъ бы́лъ еси́, любо́венъ, страннолю́бецъ, іера́рхъ свяще́ннѣйшій, му́дростію укра́шенъ, преподо́бне, Правосла́вія. Тѣ́мже тя́ вѣ́рою почита́емъ.

Страннолю́бецъ, іера́рхъ свяще́ннѣйшій, му́дростію украше́нъ, преподо́бне, и Правосла́вія побо́рникъ яви́лся еси́. Тѣ́мже тя́ вѣ́рно почита́емъ.

Дре́вле тебѣ́ гла́съ, я́ко жива́, уме́ршая вопро́шшу ти́, о́тче, даде́. О, чудесе́ изря́дна! О, пресла́внаго та́инства! О, благода́ти, ю́же получи́лъ еси́, житіе́мъ украша́емь а́нгельскимъ, досточу́дне!

Богоро́диченъ: Стра́сти моего́ се́рдца исцѣли́ ми́лостію Твое́ю, Всепѣ́тая, у́мъ мо́й умири́, и ду́шу мою́ просвѣти́, и ходи́ти мя́ возблагопу́тстви на стези́ спаси́тельныя, я́ко да при́сно пою́ Тя, Всепѣ́тая.

Инъ.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Вѣ́ру твою́ дѣ́лы благи́ми показа́вый, ту́не пріе́мый, ту́не показа́вый, блаже́ннѣйше, всѣ́мъ твоя́ чудеса́, и ни́щія пи́щею прекорми́лъ еси́, и вся́ науча́еши взыва́ти: отце́въ Бо́же, благослове́нъ еси́.

Яви́лъ еси́ дѣла́ вѣ́ры, блаже́нне Спиридо́не, я́коже въ мо́ри пла́вающимъ, и корабле́мъ потопля́ющимся помо́глъ еси́. И ны́нѣ рабо́мъ твои́мъ, въ пучи́нѣ мíра сего́ потопля́ющимся, ско́р[у]ю по́мощь на́мъ изхода́тайствуй, да вси́ съ тобо́ю взыва́емъ: благослове́нъ Бо́гъ оте́цъ на́шихъ.

Благослови́мъ Отца́, и Сы́на, и Свята́го Ду́ха, Го́спода.

Еди́нственное сопресто́льное Отцу́ Сло́во, единоро́дна же Сы́на правосла́вно проповѣ́давъ, богому́дре Спиридо́не, а́біе науча́еши Ду́ху сопресто́льна, и единосу́щна, и соприсносу́щна.

И ны́нѣ, богоро́диченъ: Зачала́ еси́, Дѣ́во, безъ сѣ́мене вся́ческая созда́вшаго Сло́во Бо́жіе кромѣ́ хотѣ́ній плотски́хъ и болѣ́зней ма́терныхъ, тѣ́мъ Тя́, Богоро́дицу, и язы́комъ, и се́рдцемъ, исповѣ́дающе, велича́емъ.

Катава́сія: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Пѣ́снь 9.

Ирмо́съ: Ве́сь еси́ жела́ніе, ве́сь сла́дость, Сло́ве Бо́жій, Дѣ́вы Сы́не, Бо́же бого́въ, Го́споди святы́хъ Пресвяты́й, тѣ́мъ Тя́ вси́ съ Ро́ждшею велича́емъ.

Же́злъ крѣ́пости даде́ся естеству́ тлѣ́нному, Сло́во Бо́жіе во утро́бѣ Твое́й, Чи́стая, и сіе́ возста́ви, ко а́ду попо́лзшееся. Тѣ́мже Тя́, Всечи́стая, я́ко Богоро́дицу, велича́емъ. [Два́жды.]

Юже изво́лилъ еси́, Влады́ко, пріими́ ми́лостивно Моли́твенницу, Ма́терь Твою́, о на́съ, и Твоея́ бла́гости вся́ческая испо́лнятся, да Тя́ вси́, я́ко Благодѣ́теля, велича́емъ. [Два́жды.]

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Безнача́льна Роди́теля Сы́на я́сно проповѣ́далъ еси́, Единосу́щна Отцу́ и Соприсносу́щна, посредѣ́ богоно́сныхъ отце́въ возвели́чився, и беззако́ннующихъ загради́лъ еси́ уста́, святи́телю всеблаже́нне.

Многосвѣ́тлое со́лнце, отце́въ украше́ніе, іере́евъ сла́ва, а́нгеловъ совсе́льниче, твою́ свѣтоно́сную па́мять ра́достно ны́нѣ соверша́ющія, свѣ́та сподо́би невече́рняго моли́твами твои́ми.

Боже́ственная селе́нія, гра́дъ небе́сный, пра́зднующихъ кра́сный ли́къ освяще́нную ду́шу твою́ и добродѣ́тельми укра́шенную, всеблаже́нне, прія́тъ во гла́сѣ ра́дованія.

Богоро́диченъ: Ве́ліе та́инство па́че ума́ Рождества́ Твоего́ удивля́етъ а́нгелы, Богора́дованная, наслажда́етъ преподо́бныхъ собо́ръ, свяще́нныя же весели́тъ отцы́, боже́ственно пою́щія тя́, наде́жду ду́шъ на́шихъ.

Инъ.

Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Припѣ́въ: Велича́й, душе́ моя́, засту́пника тве́рдаго и предста́теля, Спиридо́на вели́каго.

Ра́дуйся, гра́де Керки́ро, я́ко чудотво́рца вели́каго Спиридо́на сподо́бился еси́ прія́ти, си́лою же его́ двукра́тное спасе́ніе улучи́лъ еси́.

Припѣ́въ: Велича́й, душе́ моя́, засту́пника тве́рдаго и предста́теля, Спиридо́на вели́каго.

Ве́сь свяще́нный Собо́ръ чудесы́ твои́ми обогати́лъ еси́, и Арія злочести́ваго, ху́ляща на Сы́на Бо́жія, изъ Собо́ра изгна́лъ еси́, и кова́рство его́ все́ обличи́лъ еси́, му́дре, и проповѣ́далъ еси́ вѣ́ру избра́нную.

Припѣ́въ: Велича́й, душе́ моя́, Тріѵпоста́снаго и Нераздѣ́льнаго Божества́ Держа́ву.

Яко досто́йное пріими́ пѣ́ніе, Спиридо́не, ма́лаго труда́ сего́, я́коже Христо́съ прія́тъ вдовы́ [двѣ́ ле́птѣ]. Не возгнуша́йся окая́ннаго [мене́], не гордя́ся бо, треблаже́нне, дерзну́хъ.

Припѣ́въ: Велича́й, душе́ моя́, Честнѣ́йшую го́рнихъ во́инствъ, Дѣ́ву Пречи́стую, Богоро́дицу.

Богоро́диченъ: Потреби́ся вся́ка печа́ль Рождество́мъ Твои́мъ, и отъя́тъ Госпо́дь рыда́ніе, и печа́ль, и вся́ку сле́зу отъ вся́каго лица́ земноро́дныхъ, Чи́стая Богоро́дице Неискусобра́чная.

Катава́сія: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Свѣти́ленъ. Подо́бенъ: Жены́, услы́шите.

Спиридо́на преди́внаго и іера́рха пресла́внаго ны́нѣ вси́ да восхва́лимъ, я́ко похвалы́ досто́йнаго: источа́етъ бо чудеса́ и исцѣля́етъ вся́, вѣ́рою приходя́щія къ нему́. Въ Сѵно́дѣ бо безу́мнаго Арія посрами́лъ е́сть. [Два́жды.]

[Сла́ва, и ны́нѣ,] богоро́диченъ:

Проро́цы проповѣ́даша, апо́столи научи́ша, му́ченицы исповѣ́даша, и мы́ вѣ́ровахомъ Богоро́дицу Тя́ вои́стину су́щую, тѣ́мъ и велича́емъ Рождество́ Твое́ неизрече́нное.

На хвали́техъ стихи́ры на 4, гла́съ 1. Подо́бенъ: Небе́сныхъ чино́въ.

Церко́вныя цвѣ́ты облета́я,* я́коже птене́цъ Вы́шняго* и гнѣздо́ а́нгельское,* Спиридо́не богоно́се,* зове́ши при́сно къ Бо́гу* о всѣ́хъ на́съ. [Два́жды.]

Свяще́нныя оде́жды красоту́* дѣ́ятельными содѣ́лалъ еси́* добродѣ́тельми свѣтлѣ́йшую,* о́тче богому́дре,* тѣ́мже на́мъ священнодѣ́йствуеши ди́вная,* сла́вныхъ чуде́съ священнодѣ́лателю,* лю́тыхъ избавля́я ны́.

Неви́димыхъ добро́ты проходя́,* стра́шную о́ную* разумѣ́лъ еси́ сла́ву святы́хъ, свя́те,* тѣ́мже на́мъ небе́сная словеса́* присноживо́тныхъ о́ныхъ видѣ́ній явля́еши,* свяще́ннѣйшій.

Сла́ва, гла́съ 5:

Востру́бимъ трубо́ю пѣ́сней, взыгра́емъ пра́зднственная и ликовству́емъ, ра́дующеся, въ моле́бное торжество́ богоно́снаго отца́. Цари́ и кня́зи да стеку́тся, и ско́раго врача́ уми́льно да восхва́лятъ со стра́хомъ. Да воспою́тъ па́стыри и учи́тели до́браго па́стыря подобноревни́тельна. Соше́дшеся, восхва́лимъ, и́же въ неду́зехъ — врача́, въ бѣда́хъ — изба́вителя, грѣ́шнымъ — засту́пника, ни́щимъ — сокро́вище, и и́же въ ско́рбехъ — утѣ́шителя, спу́тника — путеше́ствующимъ, на мо́ри су́щіи — прави́теля и вся́ вездѣ́ те́плѣ предваря́юща. Вели́каго святи́теля восхваля́юще, си́це рце́мъ: пресвяты́й Спиридо́не, предвари́, и изба́ви ны́ отъ настоя́щія бѣды́, и спаси́ ста́до твое́ моли́твами твои́ми.

И ны́нѣ, [богоро́диченъ], гла́съ то́йже:

Востру́бимъ трубо́ю пѣ́сней, прекло́ншися бо свы́ше, Всецари́ца Ма́ти Дѣ́ва благослове́ньми вѣнчава́етъ воспѣва́ющія Ю. Цари́ и кня́зи да воспле́щутъ въ пѣ́снехъ Царя́ Ро́ждшую, сме́ртію одержи́мыя пе́рвѣе разрѣши́ти человѣколю́бно Благоизво́лившаго. Па́стыріе и учи́теліе, До́браго Па́стыря Пречи́стую Ма́терь, соше́дшеся, да восхва́лимъ, я́ко свѣ́щникъ златоза́рный, свѣтоно́сный о́блакъ, небе́съ Простра́ннѣйшую, одушевле́нный киво́тъ, огнезра́чный Влады́чень престо́лъ, маннопріе́мную злату́ю ста́мну, заключе́нную Сло́ва две́рь, всѣ́хъ христіа́нъ прибѣ́жище, пѣ́сньми благоглаго́ливыми похваля́юще, рце́мъ: пала́то Сло́ва, сподо́би на́съ смире́нныхъ небе́снаго Ца́рствія, ничто́же бо невозмо́жно хода́тайству Твоему́.

Славосло́віе вели́кое, [ектеніи́ и отпу́стъ.]



НА ЛИТУРГІИ,

Блаже́нна отъ 1-го кано́на [свята́го] пѣ́снь 3-я и отъ 2-го кано́на пѣ́снь 6-я. Проки́менъ, гла́съ 7: Возвесели́тся пра́ведникъ о Го́сподѣ,* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́тимися къ Тебѣ́. Апо́столъ ко Евре́омъ, зача́ло 318. Аллилу́ія, гла́съ 4: Свяще́нницы Твои́ облеку́тся въ пра́вду, и преподо́бніи Твои́ возра́дуются. [Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй.] Ева́нгеліе отъ Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].


По поліеле́и тропари́, гла́съ 5:

Благослове́нъ еси́, Го́споди, научи́ мя Спиридо́на пѣ́ти.

Ангельское мно́жество и ли́ки человѣ́честіи со удивле́ніемъ зову́тъ: сме́рти крѣ́пость Спиридо́нъ разори́, и́бо во гро́бѣ дѣ́йствуетъ чудес[ы]́ и безъ истлѣ́нія живе́тъ, я́ко безсме́ртный.

Благослове́нъ еси́, Го́споди, научи́ мя Спиридо́на пѣ́ти.

Почто́ сле́зъ то́ки источа́ете, вѣ́рніи, ко іера́рху? — небе́сный а́нгеловъ ли́къ глаго́лаше ко керкире́омъ, — ви́дите вы́ его́ ны́нѣ и ра́дуйтеся, я́коже у́бо жи́ва зри́те во гро́б[ѣ].

Благослове́нъ еси́, Го́споди, научи́ мя Спиридо́на пѣ́ти.

Зѣло́ тща́тельно Спиридо́нъ тече́ къ Сѵно́ду въ Нике́и, и предста́ де́рзостнѣ ко Арі[ю], и рече́: ба́сней вре́мя преста́, о безбо́жне, [въ] Тро́ицу же, я́ко и мы́, вѣ́руй.

Благослове́нъ еси́, Го́споди, научи́ мя Спиридо́на пѣ́ти.

Мѵрото́чныя мо́щи [твоя́] па́че на́рда, Спиридо́не всече́стне, благоуха́ютъ: а́нгелы бо сему́ содѣ́йствуютъ. Что́ бо, я́ко ме́ртва, жива́го вмѣня́ете? Не ме́ртвъ бо, но жи́въ на́мъ явля́ется.

Сла́ва Отцу́, и Сы́ну, и Свято́му Ду́ху.

Поклони́мся Отцу́, и Безлѣ́тному Сы́ну, отъ Того́ рожде́нному, и Утѣ́шителю Боже́ственному, отъ Отца́ происходя́щему, и со а́нгелы взыва́емъ: Свя́тъ, Свя́тъ, Свя́тъ еси́, Го́споди.

И ны́нѣ и при́сно и во вѣ́ки вѣко́въ. Ами́нь.

Живопода́тельная утро́ба Твоя́, Приснодѣ́во Отрокови́це, Сы́на и Бо́га Твоего́ заче́ншая неизрече́нно, и вмѣсти́вшая Еди́на, точа́щаго на́мъ правле́ніе къ жи́зни, хода́тайствы Твои́ми къ Бо́гу и человѣ́комъ.

Аллилуія, Аллилуія, Аллилуія, слава Тебѣ, Боже. [Три́жды.]

Источникъ — Зографская служба святителю Спиридону, епископу Тримиѳунтскому, чудотворцу.

/ Къ оглавленію раздѣла /


Наверхъ / Къ титульной страницѣ

0