Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 12-й де́нь.
Слу́жба преподо́бному Ге́рману, Аля́скинскому чудотво́рцу.

НА МАЛѢЙ ВЕЧЕРНИ,
На Го́споди воззва́хъ, стихи́ры на 4, гла́съ 1. Подо́бенъ: Небе́сныхъ чино́въ.

Це́ркве Христо́вы ра́дованіе,* проповѣ́давъ сла́ву Бо́жію,* сла́вная наслѣ́довалъ еси́ на небеси́,* и отъ на́съ славле́ніе пріими́ на земли́,* моля́ Царя́ сла́вы, преподо́бне,* о́бщники сла́вы Его́ на́съ сотвори́ти. [Два́жды.]

Це́ркве Христо́вы ра́дованіе,* благовѣ́стническимъ и пусты́ннымъ твои́мъ житіе́мъ* тьму́ и́дольскую разгна́лъ еси́,* свѣ́ту Христо́ву язы́ки пріобща́я,* преподо́бне Ге́рмане,* о́бщники сея́ благода́ти и на́съ сотвори́.

Мра́комъ жите́йскимъ одержи́ми су́ще,* твои́мъ небе́снымъ посѣще́ніемъ* внеза́пу умо́мъ на́шимъ прія́хомъ озаре́ніе,* преподо́бне о́тче Ге́рмане,* тѣ́мже на твое́ предста́тельство къ Бо́гу* упова́ніе на́ше возложи́хомъ.

Сла́ва, гла́съ 8:

Прибли́зившуся отше́ствію преподо́бнаго, свѣще́мъ горя́щимъ и апо́стольскимъ дѣя́ніемъ у одра́ его́ что́мымъ, ди́вно просія́ святы́й Ге́рманъ, — сла́ва Тебѣ́, Го́споди, ре́къ, — и еще́ седми́цу днíй житія́ отъ Спа́са та́йно пріе́мъ, пожда́ прорече́ннаго дне́. Тогда́ же па́ки свѣще́мъ горя́щимъ и дѣя́ніемъ что́мымъ, почи́ во благоуха́ніи по́двига своего́, многопло́дно и пра́ведно пожи́въ, па́ки же вѣ́чно живы́й, Го́спода сла́вы моля́ при́сно о на́съ.

И ны́нѣ, богоро́диченъ, гла́съ то́йже:

Влады́чице Богоро́дице Дѣ́во, я́коже исцѣли́ла еси́ Ге́рмана преподо́бнаго, вне́млющи при́сно проше́ніемъ его́, и на́съ воспѣва́ющихъ Тя́ поми́луй.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ благода́ти* Ду́ха Боже́ственна* Госпо́дь яви́ тя́:* научи́, о́тче,* я́же на́мъ подоба́етъ твори́ти.

Сти́хъ: Честна́ предъ Го́сподемъ* сме́рть преподо́бныхъ Его́.

Бу́ри морскíя* ничто́же ти́ бя́ху,* Христу́ сія́ющу,* я́ко со́лнце свы́ше,* сего́ ра́ди, преподо́бне, сла́вимъ тя́.

Сти́хъ: Что́ возда́мъ Го́сподеви о всѣ́хъ,* я́же воздаде́ ми?

Вѣ́ры ревни́телю,* си́рыхъ защи́тниче,* мона́ховъ сла́во,* утверди́, о́тче,* тебѣ́ хвалы́ своя́ принося́щихъ.

Сла́ва, гла́съ 6:

Ка́я нѣ́дра земли́ или́ ка́я лѣ́та, о Ге́рмане преподо́бне, возмо́гутъ сокры́ти сла́ву твою́, су́щую на небесѣ́хъ? Тѣ́мъ ны́нѣ сла́вяще припа́даемъ ти́, мы́ ча́да твоего́ наро́да, хода́тая тя́ имѣ́я предъ Го́сподемъ, Его́ же моли́ пода́ти спасе́ніе стра́ждущей странѣ́ Россíйстѣй, странѣ́ се́й благоде́нствіе и душа́мъ на́шимъ ве́лію ми́лость.

И ны́нѣ, богоро́диченъ, гла́съ то́йже:

Богоро́дице, Ты́ еси́ лоза́ и́стинная, возрасти́вшая на́мъ пло́дъ живота́, Тебѣ́ мо́лимся: моли́ся, Влады́чице, со апо́столы и всѣ́ми святы́ми, поми́ловати ду́ши на́ша.

Тропа́рь, гла́съ 4:

Пусты́ни сѣ́верныя подви́жниче и о все́мъ мíрѣ благода́тный моли́твенниче, правосла́вныя вѣ́ры обучи́телю и благоче́стія до́брый наста́вниче, Аля́ски украше́ніе и всея́ Аме́рики ра́дованіе, преподо́бне Ге́рмане, моли́ Христа́ Бо́га, да спасе́тъ ду́ши на́ша.

Сла́ва, и ны́нѣ, богоро́диченъ, гла́съ то́йже:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.


НА ВЕЛИЦѢЙ ВЕЧЕРНИ,
Стихологису́емъ Блаже́нъ му́жъ, 1-й антифо́нъ. На Го́споди воззва́хъ, стихи́ры на 8, гла́съ 3. Самогла́сны:

Взыгра́йте, во́ды Валаа́ма,* лику́йте о́строви Аля́ски,* по́йте лю́діе но́выя страны́,* да ра́дуется не́бо и земля́:* собесѣ́дникъ бо а́нгеловъ прославля́ется,* и въ концы́ вселе́нныя пра́вая вѣ́ра возвѣща́ется,* и мы́ велегла́сно Христу́ Бо́гу возопіи́мъ:* моли́твами отца́ на́шего Ге́рмана,* Го́споди, спаси́ ду́ши на́ша.

Пріиди́те вси́ въ пѣ́ніихъ псало́мскихъ* честна́го воздержа́нія побѣ́ду возгласи́мъ:* и́мъ бо змíя злонача́льнаго расто́ргнувъ,* въ ли́цѣ а́нгеловъ кро́ткій Ге́рманъ вкуша́етъ торжество́.* Восхва́лимъ у́бо, бра́тіе,* крася́щаго по́стниковъ сосло́віе* и, ликовству́я, свѣ́тло возопіи́мъ:* ра́дуйся, преподо́бне Ге́рмане,* ангелоподо́бная и́ноковъ похвало́.

О, Ге́рмане преподо́бне,* суро́выя Аля́ски подви́жниче,* и небе́сныхъ селе́ній жи́телю!* Кíими похвала́ми почти́мъ тя́,* или́ кíими имены́ возвели́чимъ,* и что́ славле́ніе на́ше проти́ву сла́вы небе́сныя?* Ра́дуйся на́шъ соплеме́нниче,* вкуша́яй небе́сную сла́ву,* испо́лни ра́дости и сердца́* въ смире́ніи ти́ припа́дающихъ.

Ины стихи́, гла́съ 6. Подо́бенъ: Всю́ отложи́вше.

Ны́нѣ соше́дшеся,* просла́вимъ ди́внаго,* су́ща отъ земноро́дныхъ,* небе́сныхъ же дости́гшаго,* и́же свѣ́тъ Христо́въ* дѣ́лы же и словесы́* до коне́цъ вселе́нныя пронесе́* непросвѣще́ннымъ лю́демъ,* мра́зомъ идолослуже́нія отягоще́ннымъ.* Того́ моли́твами Христо́съ* да спасе́тъ ду́ши на́ша.

Ра́дуйся Валаа́ме,* Бо́жіе жили́ще,* я́ко воспита́лъ еси́* ди́внаго подви́жника Христо́ва,* и́же, я́ко свѣща́ на свѣ́щницѣ,* просія́ на о́стровѣхъ Аля́ски,* странѣ́ невѣ́домѣй и но́вѣй,* и лю́ди невѣ́рныя* къ пра́вой вѣ́рѣ приведе́,* съ ни́ми же просла́вимъ Бо́га,* ди́внаго во святы́хъ Свои́хъ.

Еди́но имѣ́я жела́ніе,* е́же лю́ди невѣ́рныя* къ Бо́гу Еди́ному привести́,* всѣ́мъ вся́ бы́лъ еси́:* Свяще́нному Писа́нію* и е́же по нему́ науча́я житію́,* рукодѣ́ланію же наставля́я,* и засту́пникъ быва́я предъ властьми́,* вся́ко пѣ́стуя ты́я, я́ко младе́нцы,* да та́ко лю́ди къ Бо́гу приведе́ши,* и на́съ тя́ пою́щихъ не оста́ви.

Сло́ву Апо́стола послѣ́дуя,* е́же да́ти мѣ́сто гнѣ́ву Бо́жію,* жестосе́рдія міролю́бцевъ уклони́вся,* на о́стровъ Ело́вый удали́лся еси́,* обрѣ́тъ та́мо но́вый Валаа́мъ,* съ пти́цами и звѣрьми́ лѣсны́ми* предпочты́й житіе́,* Бо́гу и а́нгеломъ собесѣ́дуя,* вы́шними видѣ́ніи озаря́емь,* ны́нѣ же въ вы́шнихъ живы́й,* моли́ся о душа́хъ на́шихъ.

Что́ е́сть па́че всего́:* не Госпо́дь ли Созда́тель,* лѣ́поты Украси́тель,* жи́зни Пода́тель,* вся́ческихъ Содержи́тель и Пита́тель,* не Сего́ ли подоба́етъ люби́ти,* я́ко любве́ досто́йнѣйшаго,* и въ Не́мъ сча́стіе свое́ полага́ти?* Та́ко учи́лъ еси́, преподо́бне,* тѣ́мже и на́съ научи́* всѣ́мъ се́рдцемъ Бо́га люби́ти.

Сла́ва, гла́съ то́йже, самогла́сенъ:

Ка́я нѣ́дра земли́ или́ ка́я лѣ́та, о Ге́рмане преподо́бне, возмо́гутъ сокры́ти сла́ву твою́, су́щую на небесѣ́хъ? Тѣ́мъ ны́нѣ сла́вяще припа́даемъ ти́, мы́ ча́да твоего́ наро́да, хода́тая тя́ имѣ́я предъ Го́сподемъ, Его́ же моли́ пода́ти спасе́ніе стра́ждущей странѣ́ Россíйстѣй, странѣ́ се́й благоде́нствіе и душа́мъ на́шимъ ве́лію ми́лость.

И ны́нѣ, богоро́диченъ, догма́тикъ, гла́съ то́йже:

Кто́ Тебе́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая, Всеблаже́нная, поми́ловатися душа́мъ на́шимъ.

Вхо́дъ, проки́менъ дне́, чте́нія три́, преподо́бническія:

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На литíи стихи́ра хра́ма, та́же преподо́бнаго, гла́съ 8:

Но́ваго Валаа́ма подви́жниче, любе́зна тебѣ́ бра́тія бы́сть, съ не́ю же на Валаа́мѣ оте́чественнѣмъ пожи́лъ еси́. Стокра́тъ же вожделѣ́нннѣе ти́ бя́ху безпло́тніи дру́зи, и́же восхища́ху къ богозрѣ́нію ду́шу твою́, съ ни́ми же ны́нѣ соводворя́яся, ра́дуйся, о́тче, о прославля́ющихъ па́мять твою́, наставля́я неви́димо ны́ къ до́брому покая́нію: Ру́сскія земли́ прозябе́ніе, Ла́дожскихъ во́дъ воспита́ніе, Алеу́тскихъ острово́въ и Аля́ски церко́вное благослове́ніе, Аме́рики до́брая наде́ждо, Правосла́вія благода́тное свидѣ́тельство, Ге́рмане, уго́дниче Бо́жій, испроси́ на́мъ ми́ръ Бо́жій, превосходя́й вся́къ у́мъ, и ве́лію ми́лость.

Сла́ва, гла́съ 8:

Прибли́зившуся отше́ствію преподо́бнаго, свѣще́мъ горя́щимъ и апо́стольскимъ дѣя́ніемъ у одра́ его́ что́мымъ, ди́вно просія́ святы́й Ге́рманъ, — сла́ва Тебѣ́, Го́споди, ре́къ, — и еще́ седми́цу днíй житія́ отъ Спа́са та́йно пріе́мъ, пожда́ прорече́ннаго дне́. Тогда́ же па́ки свѣще́мъ горя́щимъ и дѣя́ніемъ что́мымъ, почи́ во благоуха́ніи по́двига своего́, многопло́дно и пра́ведно пожи́въ, па́ки же вѣ́чно живы́й, Го́спода сла́вы моля́ при́сно о на́съ.

И ны́нѣ, богоро́диченъ, гла́съ то́йже:

Влады́чице Богоро́дице Дѣ́во, я́коже исцѣли́ла еси́ Ге́рмана преподо́бнаго, вне́млющи при́сно проше́ніемъ его́, и на́съ воспѣва́ющихъ Тя́ поми́луй.

На стихо́внѣ стихи́ры, гла́съ 5. Подо́бенъ: Ра́дуйся, Живо́носный Кре́сте.

Ра́дуйся, Живоно́сный Кре́сте,* благоче́стія непобѣди́мая побѣ́да,* тобо́ю бо две́рь ра́йская отве́рзеся* и дарова́ся но́вымъ зе́млямъ озаре́ніе,* и тля́ и́дольская упраздни́ся,* и попра́ся сме́ртная держа́ва,* и земноро́дніи возно́сятся къ небе́снымъ.* Ра́дуйтеся, вѣ́рніи и весели́теся,* я́ко сла́ва Живоно́снаго Креста́,* но́выхъ му́чениковъ* и преподо́бнаго Ге́рмана упова́ніе,* въ странѣ́ но́вѣй провозглаша́ется* и всѣ́мъ вѣ́рнымъ подае́тъ* ве́лію и бога́тую ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуйся, преподо́бный наста́вниче,* новоизбра́ннаго ста́да Христо́ва,* благода́тію сло́ва Бо́жія* сердца́ невѣ́дущія просвѣти́вый,* ду́хомъ кро́тости и смире́нія* благоче́стію научи́вый,* братолю́біемъ и милосе́рдіемъ* вѣ́ры и́стину вкорени́вый.* О, ди́вне ста́рче Ге́рмане,* свѣ́та Христо́ва провозвѣ́стниче* и тьмы́ бѣсо́вскія отгони́телю,* просвѣти́ и на́ша сердца́,* отгна́въ тьму́ невѣ́рія,* да обря́щемъ у Го́спода ве́лію ми́лость.

Сти́хъ: Что́ возда́мъ Го́сподеви о всѣ́хъ,* я́же воздаде́ ми?

Ра́дуйся, засту́пниче предъ си́льными мíра сего́* за новопросвѣще́нныя лю́ди,* препро́стыя и смире́нныя!* Ты́ бо кро́вію се́рдца своего́* хода́тай бы́лъ еси́ къ си́мъ,* я́ко пѣ́стунъ и слуга́ нижа́йшій ро́да и́хъ;* та́же дру́гъ неду́гующимъ я́звою неисцѣ́льною,* денноно́щно слы́ша во́пли и сто́ны и́хъ,* утѣша́я, вле́клъ еси́ и́хъ къ врачевству́ небе́сному,* о безстра́шный па́стырю ста́да своего́,* а́ще и уклони́лся еси́ са́на іере́йска!* Ра́дуйся, звѣ́ря ди́вія ми́луяй,* я́коже Серафи́мъ преподо́бный;* ра́дуйся, пла́менемъ вѣ́ры укроти́вый пожа́ра веще́ственный о́гнь.

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ: тѣ́мже на небесѣ́хъ обре́лъ еси́ мзду́ трудо́въ твои́хъ, де́монская разори́лъ еси́ по́лчища, и а́нгельскія дости́глъ еси́ чи́ны, и́хже житію́ непоро́чно поревнова́лъ еси́; дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ, гла́съ то́йже:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Де́вѣ, вои́стинну вопіе́мъ немо́лчно: ра́дуйся а́нгельски, ра́дуйся Влады́чице, предста́тельство, и покро́ве, и спасе́ніе ду́шъ на́шихъ.

Тропа́рь, гла́съ 4:

Пусты́ни сѣ́верныя подви́жниче и о все́мъ мíрѣ благода́тный моли́твенниче, правосла́вныя вѣ́ры обучи́телю и благоче́стія до́брый наста́вниче, Аля́ски украше́ніе и всея́ Аме́рики ра́дованіе, преподо́бне Ге́рмане, моли́ Христа́ Бо́га, да спасе́тъ ду́ши на́ша.

Сла́ва, и ны́нѣ, богоро́диченъ, гла́съ то́йже:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.


НА УТРЕНИ,
На Бо́гъ Госпо́дь: тропа́рь преподо́бному, два́жды. Сла́ва, и ны́нѣ: Еже отъ вѣ́ка утае́нное...

По 1-й каѳи́смѣ сѣда́ленъ, гла́съ 3. Подо́бенъ: Красотѣ́ дѣ́вства.

Вне́мля зо́ву Госпо́дню и вся́ кра́сная мíра въ уме́ты вмѣни́въ, краснѣ́йшія пусты́ни дости́глъ еси́, въ странѣ́ ди́віей и да́льней, идѣ́же полки́ де́моновъ му́жески отрази́въ, а́нгелы имѣ́лъ еси́ собесѣ́дники и споспѣ́шники: сего́ ра́ди я́ко ди́вное украше́ніе пусты́ни, тя́ восхваля́емъ. [Два́жды.]

Сла́ва, и ны́нѣ, богоро́диченъ:

Яко еди́но христіа́нъ упова́ніе и къ Бо́гу предста́тельница, Влады́чице, со преподо́бнымъ Ге́рманомъ моли́ Сы́на Твоего́ о рабѣ́хъ Твои́хъ.

По 2-й каѳи́смѣ сѣда́ленъ, гла́съ 1. Подо́бенъ: Гро́бъ Тво́й Спа́се.

Язы́ки невѣ́дущія науча́я, обраща́я же невѣ́рующія, вѣ́ру и́стинную насажда́лъ еси́, вся́ко тружда́яся и благоче́стіемъ свои́мъ назида́я, тѣ́мже и на́съ, преподо́бне Ге́рмане, и́стинствовати научи́ и благоче́стная твори́ти. [Два́жды.]

Сла́ва, и ны́нѣ, богоро́диченъ:

Иму́ще Тя́, Пречи́стая Ма́ти, при́сное упова́ніе и покро́въ, на Тя́ надѣ́ющеся, вра́жіихъ навѣ́тъ не убои́мся, я́ко спаса́еши ду́ши на́ша отъ вся́кихъ лю́тыхъ.

Поліеле́й и велича́ніе:

Ублажа́емъ тя́, преподо́бне о́тче на́шъ Ге́рмане, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...

По поліеле́и сѣда́ленъ, гла́съ 3. Подо́бенъ: Красотѣ́ дѣ́вства.

На бре́ннѣмъ корабли́, преподо́бне, бу́рную пучи́ну мо́ря пресѣка́еши, да́же до страны́ да́льнія доше́дъ, идѣ́же о́стровъ Ело́вый бя́ше ти́ духо́вный кора́бль, на не́мже сло́вомъ благовѣствова́нія и дѣ́лы благоче́стія дости́глъ еси́ при́стани небе́сныя, ра́дуяся о Го́сподѣ. [Два́жды.]

Сла́ва, и ны́нѣ, богоро́диченъ:

Влады́чице на́ша, Богоро́дице, Превѣ́чное Сло́во пло́тски на́мъ яви́вшая, къ Тебѣ́ прибѣга́емъ, я́ко къ на́шему покро́ву и заступле́нію: покры́й на́съ Твои́мъ моли́твеннымъ омофо́ромъ отъ вся́кихъ навѣ́товъ вра́жіихъ, да безпрепя́тственно возмо́жемъ служи́ти Сы́ну Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе отъ Матѳе́я, зача́ло 43.

По 50-мъ псалмѣ́, стихи́ра, гла́съ 6:

Ка́я нѣ́дра земли́ или́ ка́я лѣ́та, о Ге́рмане преподо́бне, возмо́гутъ сокры́ти сла́ву твою́, су́щую на небесѣ́хъ? Тѣ́мъ ны́нѣ сла́вяще припа́даемъ ти́, мы́ ча́да твоего́ наро́да, хода́тая тя́ имѣ́я предъ Го́сподемъ, Его́ же моли́ пода́ти спасе́ніе стра́ждущей странѣ́ Россíйстѣй, странѣ́ се́й благоде́нствіе и душа́мъ на́шимъ ве́лію ми́лость.

Кано́нъ Богоро́дицы, моле́бный на 6: Во́ду проше́дъ.., и преподо́бнаго Ге́рмана на 8, гла́съ 3. Краегране́сіе: Возлю́бимъ Бо́га па́че всего́ и Ге́рмана воспои́мъ.

Пѣ́снь 1.

Ирмо́съ: Во́ды дре́вле, ма́ніемъ Боже́ственнымъ, во еди́но со́нмище совокупи́вый, и раздѣли́вый мо́ре Изра́ильтескимъ лю́демъ, Се́й Бо́гъ на́шъ, препросла́вленъ е́сть, Тому́ Еди́ному пои́мъ, я́ко просла́вися.

Воспѣ́ти помози́ ми́, Всеми́лостивый Спа́се, уго́дника Твоего́ Ге́рмана, просвѣща́я помраче́нныя о́чи души́ моея́, да просла́вится се́й въ концы́ вселе́нныя, сла́вный во святы́хъ Твои́хъ.

Оте́чества небе́снаго, преподо́бне Ге́рмане, отъ ю́ности взыска́ти восхотѣ́въ и Бо́гу Еди́ному порабо́тати, небе́сному покро́ву вда́лся еси́, засту́пники вы́ну имѣ́я Се́ргія и Ге́рмана Валаа́мскихъ.

За́повѣди Госпо́дни, преподо́бне, имы́й вы́ну въ се́рдцѣ свое́мъ, никогда́ же пу́томъ лѣ́ности вда́лъ еси́ тѣ́ло твое́, при́сно тружда́яся и Боже́ственными озаре́ніи просвѣща́я ду́шу твою́.

Любо́вь къ Бо́гу имѣ́яй превы́ше всего́, Тому́ все́ житіе́ свое́ пре́далъ еси́, бесѣ́ду съ вы́шними ли́ки наипа́че возлю́бль; оба́че и я́же къ бра́тіи любве́ не чужда́лся еси́, преподо́бне, ку́пно моля́ся и вопія́ съ ни́ми: Іису́се Сладча́йшій, спаси́ на́съ грѣ́шныхъ.

Богоро́диченъ: Юнаго Ге́рмана, Богоро́дице, отъ сме́ртнаго неду́га исцѣли́ла еси́, того́ горя́чему моле́нію вне́мля: тѣ́мже и на́съ не пре́зри, къ Тебѣ́ припа́дающихъ и въ моли́тву къ Тебѣ́ того́ призыва́ющихъ.

Пѣ́снь 3.

Ирмо́съ: Иже отъ не су́щихъ вся́ приведы́й, Сло́вомъ созида́емая, соверша́емая Ду́хомъ, Вседержи́телю Вы́шній, въ любви́ Твое́й утверди́ мене́.

Богому́дрый Наза́рій на Валаа́мъ изъ Саро́ва прише́дъ, къ вну́треннему дѣ́ланію любо́вь водвори́, тѣ́мже и ты́, преподо́бне, пріобщи́вся сея́ благода́ти, духо́вными озаре́ніи угото́валъ еси́ ду́шу твою́ на по́двигъ благовѣ́стія.

Иже виногра́да Христо́ва ро́ждіе плодоно́сніи су́ще, Се́ргіе и Ге́рмане Валаа́мстіи, гроздьми́ добродѣ́телей но́ваго Ге́рмана напита́вшіи, вино́мъ Боже́ственнаго весе́лія испо́лните и на́ша сердца́.

Моли́твою и дѣя́ніемъ угото́валъ еси́ ду́шу твою́ на вся́кое послуша́ніе, тѣ́мже и страны́ да́льнія дости́глъ еси́, ку́пно съ бра́тіею благовѣ́стническою приводя́ жи́тели Аля́ски ко Іису́су Сладча́йшему.

Богоро́диченъ: Блага́го Царя́ Блага́я Ма́ти, благодѣя́нія на рабы́ Твоя́ при́сно излива́ющая, на вся́кое благо́е дѣ́ло наста́ви на́съ, отъ вся́кихъ дѣ́йствъ злы́хъ огражда́ющи.

Сѣда́ленъ, гла́съ 3. Подо́бенъ: Красотѣ́ дѣ́вства.

Приспѣ́ дне́сь па́мять твоя́, о́тче Ге́рмане прехва́льне, веселя́щи избра́нное твое́ ста́до: просвѣща́й на́съ чуде́съ твои́хъ свѣтлостьми́, отъ честны́хъ твои́хъ моще́й исходя́щихъ, погаша́й пла́мень страсте́й на́шихъ и ороша́й вѣ́рныхъ ра́зумы, любо́вію при́сно тя́ сла́вящихъ. [Два́жды.]

Сла́ва, и ны́нѣ, богоро́диченъ:

Ра́дуйся, Благода́тная Дѣ́во, я́ко избра́нника Твоего́ но́ваго на́мъ явля́еши, въ сѣ́верной пусты́ни прозя́бшаго и небе́сными да́ры новопросвѣще́нный кра́й облагоуха́вшаго, тѣ́мъ Тя́ Влады́чицу мíра благода́рными пѣ́сньми почти́мъ.

Пѣ́снь 4.

Ирмо́съ: Положи́лъ еси́ къ на́мъ тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́лъ еси́. Тѣ́мже Ти́ зове́мъ, благодаря́ще: сла́ва си́лѣ Твое́й, Го́споди.

Образъ до́браго па́стыря и чадолюби́ваго отца́ яви́лъ еси́ на́мъ, преподо́бне, я́ко убо́гимъ, немощны́мъ и боля́щимъ бы́лъ еси́ по́мощь и исцѣле́ніе, сирота́мъ же кро́въ и науче́ніе; тѣ́мже и на́съ я́ко си́рыхъ не лиши́ своего́ моли́твенного покро́ва.

Ге́рмане преподо́бне, дивля́хуся лю́діе, ка́ко мо́жеши въ лѣсу́ еди́нъ жи́ти? Не еди́нъ а́зъ, ре́клъ еси́, но со мно́ю Бо́гъ, Иже вездѣ́ сы́й, и а́нгели Его́ святíи, тѣ́мже ка́ко возмо́жно уныва́ти, таковы́я собесѣ́дники имѣ́я? Ны́нѣ же небе́сныхъ сожи́телю, на́съ су́щихъ на земли́ не оста́ви.

Аля́ски храни́телю, но́выхъ наро́довъ слугу́ и пѣ́стуна себе́ именова́вый, и по сме́рти свое́ попече́ніе о си́хъ простира́еши. Се́ ны́нѣ и мы́ твои́ми словесы́ взыва́емъ ти́: бу́ди на́мъ оте́цъ и покрови́тель, отри́ сле́зы беззащи́тныхъ сиро́тъ, прохлади́ сердца́, жа́ромъ печа́ли та́ющая, да́ждь разумѣ́ти, что́ е́сть отра́да Госпо́дня.

Богоро́диченъ: Пріиди́те воспои́мъ Пречи́стую Дѣ́ву, Свои́мъ смире́ніемъ е́же Евы преле́стное испра́вившую, и но́ваго Ада́ма на́мъ я́вльшую, да но́вое усыновле́ніе воспріи́мше, наслѣ́дницы бу́демъ вѣ́чныя жи́зни.

Пѣ́снь 5.

Ирмо́съ: Къ Тебѣ́ у́тренюю, всѣ́хъ Творцу́, преиму́щему вся́къ у́мъ мíрови, зане́ свѣ́тъ повелѣ́нія Твоя́, въ ни́хже наста́ви мя́.

Ада́му первозда́нному уподо́бился еси́, егда́ мно́гими скорбьми́, бдѣ́ніи и моли́твами очи́стившу ти́ ду́шу твою́ и въ красоту́ пе́рвую обле́кшу, лѣснíи звѣ́ри повинова́хуся тебѣ́, е́же ра́йское и ца́рское въ тебѣ́ обоня́въ.

Чу́вственныя стра́сти бразда́ми воздержа́нія и моли́твою непреста́нною препобѣжда́я, на высоту́ безстра́стія дости́глъ еси́, сего́ ра́ди припа́даемъ ти́, я́ко къ благода́тному врачу́: уврачу́й на́ша стра́сти и подви́гни на дѣла́ блага́я.

Еди́ному Бо́гу та́йно порабо́тати хотя́, въ пеще́рѣ посели́лся еси́, е́же стра́стное пло́ти тща́ся погребсти́, да душе́ю воскре́снеши, небе́сными озаре́ніи осіява́емь, вѣ́чныя Па́схи предвкуша́я сла́дость.

Въ ра́й мы́сленный добродѣ́телей вше́лъ еси́, идѣ́же произрасти́лъ еси́ многоразли́чныя цвѣ́ты добродѣ́ланія, и́миже въ мíрѣ благоуха́еши, о́тче Ге́рмане, да́же и до ны́нѣ.

Богоро́диченъ: Святы́хъ а́нгеловъ ли́цы пою́тъ благолѣ́піе Твое́, а́зъ же грѣ́шный, Пренепоро́чная, молю́ Тя́: отжени́ отъ мене́ нелѣ́пая бѣсо́вская мечта́нія, въ тишинѣ́ соблюда́ющи се́рдце мое́.

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́, и исчеза́етъ ду́хъ мо́й; но простры́й, Влады́ко, высо́кую Твою́ мы́шцу, я́ко Петра́ мя́, Упра́вителю, спаси́.

Ева́нгельскаго ра́ди благовѣствова́нія да́же до коне́цъ вселе́нныя преше́лъ еси́ и мѣ́сто но́вое, о́стровъ Ело́вый, но́вый Валаа́мъ наре́клъ еси́, къ оте́чественному Валаа́му любо́вь показу́я, въ не́мъ же но́выя бра́тія, лю́ди новопросвѣще́нныя, стяжа́лъ еси́ сло́вомъ проповѣ́данія и дѣ́лы благоче́стія.

Госпо́дь просла́ви собра́тій твои́хъ, преподо́бне, я́ко вои́стину апо́стольскимъ подвиго́мъ уподо́бишася дѣя́нія и́хъ: въ ли́цѣ му́ченичестѣмъ пое́тъ Іувена́лій, въ чи́нѣ святи́тельстѣмъ, Іоаса́фъ и Инноке́нтій и и́ны съ ни́ми, и мы́ ку́пно къ Бо́гу воспое́мъ: сла́ва Тебѣ́, показа́вшему на́мъ свѣ́тъ.

Освяще́ніе и вѣнча́ніе пріе́млютъ труды́ твои́ и твои́хъ соблаговѣ́стниковъ, преподо́бне, исповѣ́даніемъ и му́ченическими кровьми́ алеу́та Петра́, его́же крѣ́пкой вѣ́рѣ и терпѣ́нію подиви́лся еси́; тѣ́мже тебе́ послѣ́дующе, воззове́мъ: святы́й новому́чениче Пе́тре, моли́ Бо́га о на́съ.

Истинныя вѣ́ры оправда́ніе яви́лъ еси́ житіе́мъ твои́мъ, преподо́бне, тѣ́мже и науче́ніе сло́ва твоего́, я́ко сотво́ршаго, дѣ́йствомъ проявля́шеся, жа́ждущая сердца́ влеча́ ко исправле́нію, тебѣ́ зову́щу: сла́ва судьба́мъ святы́мъ Ми́лостиваго Бо́га.

Богоро́диченъ: Гряди́те лю́діе, да ви́димъ, я́ко во́ды бу́рныя, иму́щія о́стровъ поглоти́ти, кро́ткому Ге́рману повину́ются: предъ ико́ною Бо́жія Ма́тери смиря́ются и въ бе́здну океа́на па́ки возвраща́ются; мы́ же волна́ми жите́йскими обурева́еми, со избра́нникомъ Бо́жія Ма́тери возопіи́мъ: Пресвята́я Богоро́дице, спаси́ на́съ.

Конда́къ, гла́съ 8:

Валаа́ма постри́женниче и Бо́жіей Ма́тери возлю́бленне, подвиго́мъ дре́внихъ пусты́нниковъ но́вый ревни́телю, моли́тву пріе́мъ, я́ко копіе́ и щи́тъ, стра́шенъ де́мономъ и тьмѣ́ язы́честѣй яви́лся еси́, сего́ ра́ди вопіе́мъ ти́: преподо́бне Ге́рмане, моли́ Христа́ Бо́га спасти́ся душа́мъ на́шимъ.

Икосъ:

Отъ ро́да на́шего бы́въ и отъ ю́ности ко Го́споду прибѣ́гъ, Ге́рману Валаа́мскому и́менемъ и по́двигомъ подо́бный, растя́ше въ мѣ́ру дре́внихъ отце́въ, въ терпѣ́ніи плодоприне́сшихъ; и посла́ся кро́ткій се́й ко алеу́тскимъ лю́демъ, еще́ не просвѣще́ннымъ: же́стоко бѣ́ его́ жи́тельство между́ язы́ка препро́ста, же́стоко же па́че и отъ соплеме́нникъ до́брымъ увѣща́ніемъ противле́ніе; оба́че и тѣ́хъ и си́хъ ми́луя, пѣ́стоваше кро́тость Ге́рманова; за вся́ та́я сла́вяще па́мять твою́, Ге́рмане преподо́бне, взыва́емъ ти́: моли́ Христа́ Бо́га, спасти́ся душа́мъ на́шимъ.

Пѣ́снь 7.

Ирмо́съ: Якоже дре́вле благочести́выя три́ о́троки ороси́лъ еси́ въ пла́мени халде́йстѣмъ, свѣ́тлымъ Божества́ огне́мъ и на́съ озари́, благослове́нъ еси́, взыва́ющія, Бо́же оте́цъ на́шихъ.

Естества́ чи́нъ премѣня́ется, Ду́ху Боже́ственному дѣ́йствующу: Его́же озаре́ніи, преподо́бне, просвѣти́въ душе́вныя о́чи твои́, зрѣ́лъ еси́ да́льняя, я́ко бли́зъ су́щая, и бу́дущая, я́ко настоя́щая, судьбы́ Боже́ственныя повѣ́дая къ назида́нію и исправле́нію.

Ревну́я о небе́сныхъ на небеси́ сокро́вища своя́ полага́лъ еси́, тѣ́мже и́щущіи земны́хъ сокро́вищъ ничто́же обрѣто́ша въ ке́лліи твое́й; и на́съ ны́нѣ, о́тче безсре́бренниче, научи́ небе́сная сокро́виществовати и се́рдце свое́ къ еди́ному безцѣ́нному прилага́ти.

Мно́ги ско́рби пра́веднику, и отъ всѣ́хъ и́хъ избавля́ше тя́ Госпо́дь, небе́сною ра́достію наполня́я се́рдце твое́, ея́же ны́нѣ наслажда́ешися въ невече́рнемъ дни́ Ца́рствія Христо́ва. И о на́съ моли́ся, преподо́бне, да на́ша ско́рби Госпо́дь въ ра́дость претвори́тъ.

Богоро́диченъ: Ангеловъ Ра́дованіе и мона́шескаго чи́на Наста́вницу и всего́ ро́да христіа́нскаго Покрови́тельницу, пріиди́те вси́ почти́мъ и поклони́мся, я́ко Цари́цѣ небесе́ и земли́ и земноро́дныхъ къ Бо́гу непреста́нной Предста́тельницѣ.

Пѣ́снь 8.

Ирмо́съ: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Не́мощь твоя́, ста́рость и слѣпота́ очи́ма, ничто́же можа́ше возбрани́ти ти́ хода́тайствующу за лю́ди предъ вла́сть иму́щими, и́хже моли́лъ еси́ ми́лость твори́ти па́че же́ртвы, да са́ми у Го́спода обря́щутъ ю́; ны́нѣ же сы́й на небеси́, та́кожде и на́съ не лиши́ своего́ хода́тайства.

Ангельскимъ пѣ́ніемъ оглаша́шеся лѣсна́я ке́ллія твоя́, тебѣ́ еди́ному пою́щу, я́ко лю́демъ диви́тися зѣло́; та́же служа́ше ти́ а́нгелъ, благослове́ніемъ Іорда́новымъ освяти́въ во́ды, я́ко зва́ти ти́: благослови́те вся́ дѣла́ Госпо́дня Го́спода и превозноси́те во вся́ вѣ́ки.

Въ ри́зу спасе́нія и въ оде́жду весе́лія обо́лкся, сотка́нную отъ мно́гихъ трудо́въ и скорбе́й, вше́лъ еси́ въ небе́сный черто́гъ Царя́ Христа́, идѣ́же ку́пно съ ли́ки апо́столовъ и преподо́бныхъ пи́ра ра́дости вѣ́чно наслажда́ешися.

Богоро́диченъ: Огня́ нестерпи́маго подо́біемъ грѣси́ на́ши сожига́ютъ души́ блага́я начина́нія, сего́ ра́ди припа́даемъ Ти́, я́ко къ Влады́чицѣ небесе́ и земли́: ороси́ на́ша сердца́, да произрасте́тъ вся́кое дѣ́ло благо́е.

Пѣ́снь 9.

Ирмо́съ: Но́вое чу́до и боголѣ́пное, дѣви́ческую бо две́рь затворе́нную я́вѣ прохо́дитъ Госпо́дь, на́гъ во вхо́дѣ, и плотоно́сецъ яви́ся во исхо́дѣ Бо́гъ, и пребыва́етъ две́рь затворе́на; Сію́ неизрече́нно, я́ко Богома́терь велича́емъ.

Сла́ва Тебѣ́ Бо́же, яви́вшему на́мъ ди́внаго уго́дника Твоего́, его́же моли́твами сохрани́ на́съ отъ вся́каго навѣ́та вра́жія и душетлѣ́нныхъ страсте́й, вся́кому же бла́гу наста́ви, да вѣ́чнаго муче́нія избѣ́гше, дости́гнемъ Ца́рствія Твоего́.

Приспѣ́ ве́черъ живота́ твоего́, преподо́бне: кни́га твои́хъ дѣя́ній апо́стольскихъ заверши́ся въ невече́рнемъ осія́ніи лица́ твоего́, зна́менуя сла́ву твою́ въ оби́телехъ небе́сныхъ; и́хже и на́мъ помози́ дости́гнути твои́мъ предста́тельствомъ.

Огненный сто́лпъ ви́денъ бы́сть, зна́менуя отше́ствіе преподо́бнаго отъ земли́ на не́бо, я́ко зѣло́ диви́тися лю́демъ; сего́ ра́ди къ нему́ воззове́мъ: бу́ди на́мъ при́сно о́гненный сто́лпъ, свѣтя́й и указу́яй пу́ть въ го́рняя.

Истинному ученику́ Твоему́, Го́споди, недосто́йными усты́ вознесо́хомъ хвалы́, сла́вяще Тя́, ди́внаго во святы́хъ Твои́хъ, его́же моли́твеннымъ предста́тельствомъ сохрани́ страну́ сію́ и гра́ды ея́ отъ бѣ́дъ и губи́тельства, подая́ на́мъ ве́лію ми́лость.

Богоро́диченъ: Марíе, Бо́жіе жили́ще и чистоты́ наста́внице, мене́ ста́вша жили́ще грѣхо́вныхъ скве́рнъ и нечистоты́ и впа́дша въ сѣ́ти нечи́стыхъ духо́въ, Твои́мъ заступле́ніемъ чи́ста покажи́ и па́ки жили́ще Бо́гу сотвори́, да Тя́ благоче́стно велича́ю.

Свѣти́ленъ. Подо́бенъ: Жены́, услы́шите.

Свѣтода́вче Го́споди, моли́твами на́шего свѣти́льника благоче́стія, преподо́бнаго Ге́рмана, просвѣти́ невече́рнимъ свѣ́томъ Твои́мъ страну́ сію́ и на́съ, вѣ́рою Тебѣ́ служа́щихъ и благоче́стно пра́зднующихъ свѣтоно́сную па́мять его́. [Два́жды.]

Сла́ва, и ны́нѣ, богоро́диченъ:

Богоневѣ́сто, свѣще́ та́инственная, дѣ́йствомъ Ду́ха Боже́ственнаго, Предвѣ́чный Свѣ́тъ мíру яви́вшая, и на́мъ, су́щимъ во тьмѣ́ неразу́мія, возсія́й свѣ́тъ и́стины и спаси́ всѣ́хъ благоче́стно Тя́, я́ко Ма́терь Бо́жію, велича́ющихъ.

На хвали́техъ стихи́ры, гла́съ 8. Подо́бенъ: О, пресла́внаго чудесе́!

Кро́ткій и смире́нный Ге́рманъ,* сла́вы Бо́жія ревни́тель сы́й,* на благовѣ́стіе Христо́во посыла́ется:* усты́ у́бо благовѣствова́ше,* благоче́стіемъ же утвержда́ше,* тѣ́мже сла́вная наслѣ́дова на небеси́,* и отъ на́съ да бу́детъ сла́вимъ на земли́,* его́же моли́твами, Христе́ Бо́же,* спаси́ ду́ши на́ша.

Слове́съ Госпо́днихъ благовѣ́стниче,* и си́хъ благоче́стный дѣ́лателю,* я́ко си́ленъ Ду́ха Свята́го благода́тію,* не́мощи немощны́хъ носи́лъ еси́:* я́коже пѣ́стунъ о младе́нцѣхъ* и я́ко оте́цъ о ча́дѣхъ пекíйся,* дѣ́лы же и словесы́ вся́ко наставля́я,* тѣ́мже и на́съ посѣти́,* исцѣля́я не́мощи на́ша.

Ты́ ре́клъ еси́ преподо́бне:* отъ сего́ дне́ и отъ сего́ часа́,* возлю́бимъ Бо́га превы́ше всего́,* сотвори́мъ святу́ю во́лю Его́,* да блага́я наслѣ́дуемъ.* О, Ге́рмане, ди́вный наста́вниче,* Правосла́вія утвержде́ніе,* сла́вы Бо́жія проповѣ́даніе,* на́мъ же грѣ́шнымъ науче́ніе!

О, пресла́внаго чудесе́!* Но́вая страна́ освяща́ется,* и́бо чудотво́рецъ Ге́рманъ* на высоту́ возноси́мь, явля́ется дне́сь:* ди́венъ Бо́гъ во святы́хъ Свои́хъ,* съ на́ми Бо́гъ, разумѣ́йте язы́цы!* Правосла́вію отъ Ге́рмана науча́йтеся,* его́же моли́твами, Христе́ Бо́же,* спаси́ ду́ши на́ша.

Сла́ва, гла́съ 8. Самогла́сенъ:

На лѣ́ствицу добродѣ́телей ди́вно возше́лъ еси́, преподо́бне, пріи́мъ бо моли́тву, се́рдца теплоту́ и сле́зы, очи́стилъ еси́ у́мъ отъ по́мысловъ су́етныхъ и се́рдце отъ многообра́зія чу́вствъ, и въ ра́йское безстра́стіе дости́глъ еси́, вы́шнихъ та́инствъ видѣ́ніи озаря́емь, я́же на небеса́ возво́дятъ и творя́тъ вѣ́дѣти Бо́га.

И ны́нѣ, богоро́диченъ, гла́съ то́йже:

Влады́чице, пріими́ моли́тву ра́бъ Твои́хъ, и изба́ви на́съ отъ вся́кія ну́жды и печа́ли.

Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.


МОЛИТВА
преподо́бному Ге́рману, Аля́скинскому чудотво́рцу.

По́стнически пожи́вый на земли́, ра́достнѣ же преше́дый къ жи́тельству на небеси́, преподо́бне о́тче Ге́рмане, ты́ пресе́льникъ въ странѣ́ да́льней бо́дръ и послушли́въ показа́лся еси́: въ се́рдцѣ бо свое́мъ имѣ́я ди́вный Валаа́мъ и оте́чество твое́ — зе́млю Ру́сскую; вѣ́ру Правосла́вную ты́ со апо́стольскою ре́вностію распространи́лъ еси́ и я́ко нача́тки трудо́въ твои́хъ, алеу́тскія и аля́скинскія лю́ди, любо́вію въ се́рдцѣ свое́мъ нетѣ́сно вмѣсти́лъ еси́, пѣ́стуя и́хъ и науче́ніемъ Ева́нгельскимъ снабдѣва́я. Услы́ши ны́нѣ моля́щіяся въ странѣ́ прише́льствія твоего́, слы́ши и стена́нія изъ страны́ оте́чествія твоего́, пріими́ моля́щіяся ти́ на вся́комъ мѣ́стѣ влады́чествія Бо́жія! Хода́тайствуй на́мъ ско́рое умягче́ніе ожесточе́нныхъ ду́шъ на́шихъ, испроси́ на́мъ разумѣ́ніе: что́ е́сть во́ля Бо́жія? И а́ще ничто́же бла́го сотвори́хомъ предъ Бо́гомъ, да поло́жимъ нача́ло благо́е. Якоже и ты́, кро́ткій проповѣ́дниче, ре́клъ еси́, да поне́ отъ сего́ дне́ и часа́ потщи́мся возлюби́ти Бо́га превы́ше всего́. Бо́гъ бо на́шъ вои́стину любы́ е́сть, Ему́же и сла́ва во вѣ́ки подоба́етъ, Отцу́, и Сы́ну, и Свято́му Ду́ху, ны́нѣ и при́сно и во вѣ́ки вѣко́въ. Ами́нь.

Источникъ: Слу́жба преподо́бному Ге́рману, Аля́скинскому чудотво́рцу. — Jordanville: Типогра́фія преп. Іова Поча́евскаго, 1982. — 14 л.

/ Къ оглавленію раздѣла /


17
Наверхъ / Къ титульной страницѣ

0