Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 11-й де́нь.
[Пое́мъ и́мъ въ недѣ́лю, ближа́йшую къ 11-му числу́.]
Недѣ́ля святы́хъ пра́отецъ.

Подоба́етъ вѣ́дати о недѣ́ли святы́хъ пра́отецъ.
Егда́ у́бо быва́етъ недѣ́ля святы́хъ пра́отецъ, оставля́ется послѣ́дованіе прилучи́вшагося свята́го въ ту́ недѣ́лю, и пое́мъ пре́жде въ пято́къ на повече́ріи.

Въ суббо́ту на ма́лѣй вече́рни пое́мъ по обы́чаю.

НА ВЕЛИЦѢЙ ВЕЧЕРНИ,
По обы́чной каѳи́смѣ, на Го́споди воззва́хъ: стихи́ры воскре́сны 3, и Анато́ліевы 3, и пра́отцевъ на 4, гла́съ 8. Подо́бенъ: Иже во Еде́мѣ.

Пра́отцевъ дне́сь, вѣ́рніи, соверша́юще па́мять,* воспои́мъ Христа́ Изба́вителя,* возвели́чившаго и́хъ во всѣ́хъ язы́цѣхъ* и чуде́съ пресла́вная вѣ́рно соверши́вшаго Го́спода,* я́ко держа́вна и си́льна,* и отъ ни́хъ показа́вша же́злъ си́лы на́мъ —* Еди́ну Неискусому́жную и Богоотрокови́цу Марíю Чи́стую,* изъ Нея́же цвѣ́тъ про́йде — Христо́съ,* израсти́вый всѣ́мъ жи́знь, и неиждива́емую пи́щу,* и спасе́ніе вѣ́чное.

Иже святы́я о́троки изъ огня́ изба́вивый, Влады́ко,* и отъ у́стъ льво́выхъ Даніи́ла,* благослови́вый Авраа́ма,* и Исаа́ка раба́ Твоего́,* и сего́ сы́на Іа́кова,* благоволи́вый отъ сѣ́мене и́хъ бы́ти по на́мъ,* да пре́жде поползну́вшіяся спасе́ши пра́отцы на́ша* Кресто́мъ Твои́мъ и Воскресе́ніемъ* и, расто́ргнувъ сме́ртныя у́зы,* совозста́виши вся́, я́же отъ вѣ́ка су́щія въ ме́ртвыхъ,* покланя́ющіяся Тебѣ́, Христе́, Царю́ вѣко́въ.

Якоже въ хла́дѣ,* посредѣ́ пла́мене росо́ю Ду́ха,* ра́дующеся, о́троцы Бо́жіи хожда́ху,* та́инственно въ не́мъ прообрази́вше Тро́ицу* и воплоще́ніе Христо́во,* и, я́ко му́дріи, вѣ́рою угаси́ша си́лу о́гненную,* и Даніи́лъ же пра́ведный льво́въ яви́ся обузда́тель;* и́хже моли́твами умоле́нъ бы́въ, Человѣколю́бче Спа́се,* и на́съ негаси́маго вѣ́чнаго изба́ви огня́* и сподо́би ны́ Ца́рствія Твоего́, Го́споди.

Якоже въ росѣ́ су́ще,* вѣ́рніи и святíи о́троцы Твои́* въ пещи́ пла́мене о́гненнаго* предживописа́ху та́инственно е́же изъ Дѣ́вы Твое́ прише́ствіе,* неопа́льно возсія́вшее на́мъ,* и Даніи́лъ же пра́ведный и во проро́цѣхъ чу́дный,* я́сно Боже́ственное второ́е Твое́ прише́ствіе проявля́я,* ви́дѣхъ, до́ндеже престо́ли поста́вишася, — глаго́летъ, —* и Судія́ сѣ́де, и о́гненная потече́ рѣка́,* ея́же да изба́вимся, Христе́,* моли́твами и́хъ, Влады́ко.

Сла́ва, гла́съ 6:

[Анато́лія:] Иже пре́жде зако́на отцы́ вся́ восхва́лимъ дне́сь, вѣ́рніи, Авра́ама боголюби́ваго, и Исаа́ка, отъ обѣща́нія рожде́ннаго, и Іа́кова, и двана́десять патріа́рхи, Дави́да кротча́йшаго, и Даніи́ла, жела́ній проро́ка, и три́ о́троки съ ни́ми сла́вяще, пе́щь въ ро́су преложи́вшія, прося́ще оставле́нія отъ Христа́ Бо́га, прославля́емаго во святы́хъ Свои́хъ.

И ны́нѣ, богоро́диченъ пе́рвый, гла́са.

На литíи стихи́ра хра́ма. Сла́ва, гла́съ 1:

Луча́ми облиста́вшеся богоглаго́ланія, великоимени́тіи проро́цы при́сно блажа́тся и, рече́нія Ду́ха пло́дствующе, несказа́нное рождество́ Христа́ Бо́га всѣ́мъ проповѣ́даша; зако́нно же кончи́ну соверши́ша, пожи́вше жи́знь пречу́дную.

И ны́нѣ, богоро́диченъ: Се́, испо́лнися Иса́іино прорече́ніе...

Стихо́вна воскре́сна. Сла́ва, гла́съ 3:

[Ге́рманово:] Пра́отцевъ собо́ръ, празднолю́бцы, пріиди́те, псало́мски да восхва́лимъ: Ада́ма пра́отца, Ено́ха, Но́я, Мелхиседе́ка, Авраа́ма, Исаа́ка и Іа́кова; по зако́нѣ Моисе́я и Ааро́на: Іису́са, Саму́ила и Дави́да; съ ни́миже Иса́ію, Іеремíю, Іезекíиля, и Даніи́ла, и двана́десять, ку́пно Илію́, Елиссе́я и вся́; Заха́рію, и Крести́теля, и проповѣ́давшія Христа́ — Жи́знь и Воскресе́ніе ро́да на́шего.

И ны́нѣ, богоро́диченъ: Безъ сѣ́мене отъ Боже́ственнаго Ду́ха...

На благослове́ніи хлѣ́бовъ: тропа́рь Богоро́дице Дѣ́во... два́жды.
Та́же пра́отцевъ, еди́ножды. Гла́съ 2:

Вѣ́рою пра́отцы оправда́лъ еси́, отъ язы́къ тѣ́ми предобручи́вый Це́рковь: хва́лятся въ сла́вѣ святíи, я́ко отъ сѣ́мене и́хъ е́сть Пло́дъ благосла́венъ — безъ сѣ́мене Ро́ждшая Тя́. Тѣ́хъ моли́твами, Христе́ Бо́же, поми́луй на́съ.


НА УТРЕНИ,
На Бо́гъ Госпо́дь: тропа́рь воскре́сенъ два́жды. Сла́ва, и ны́нѣ, пра́отцевъ.

По обои́хъ каѳи́смахъ сѣда́льны во окто́ихѣ и чте́ніе. Та́же поліеле́й, и тропари́: Ангельскій собо́ръ... и ипакои́ гла́са.
И пра́отцевъ сѣда́ленъ, гла́съ 8. Подо́бенъ: Прему́дрости.

Авраа́ма, Исаа́ка же и Іа́кова восхва́лимъ вси́ пѣ́сненно, Дави́да кро́ткаго, Іису́са и двана́десять патріа́рхи, ку́пно съ треми́ ю́ношами, угаси́вшими о́гненный пла́мень си́лою духо́вною, ра́дуйтеся, — вопію́ще къ ни́мъ, — пре́лесть до́блественнѣ обличи́вше царя́ безу́мнаго, и Христу́ моли́теся согрѣше́ній оставле́ніе дарова́ти пра́зднующимъ любо́вію святу́ю па́мять ва́шу. [Два́жды.]

Сла́ва, и ны́нѣ, богоро́диченъ:

Благода́рственное похвале́ніе до́лжно, я́коже вдови́ца о́ная два́ ле́пта, приношу́ Тебѣ́, Влады́чице, о всѣ́хъ дарова́ніихъ Твои́хъ: Ты́ бо яви́лася еси́ покро́въ, ку́пно и по́мощь, напа́стей и скорбе́й при́сно мя́ изыма́ющи. Тѣ́мже, я́ко отъ среды́ горя́щія пе́щи, изба́влься оскорбля́ющихъ мя́, отъ се́рдца взыва́ю Тебѣ́: Богоро́дице, помози́ ми, моля́щи Христа́ Бо́га согрѣше́ній оставле́ніе да́ти мнѣ́, Тя́ бо имѣ́ю наде́жду, ра́бъ Тво́й.

Кано́ны три́: воскре́сенъ со ирмосо́мъ на 4, и святы́хъ тріе́хъ отроко́въ на 4, и пра́отцевъ на 6.

Кано́нъ святы́хъ тріе́хъ отроко́въ, [его́же краестро́чіе: Три́ о́троки пою́ и Даніи́ла вели́каго]. Творе́ніе Ѳеофа́ново. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Безнача́льное Сло́во, изъ Отца́ пре́жде всѣ́хъ вѣко́въ рожде́нно боголѣ́пно, въ пещи́ ю́ношамъ обра́зно ви́дѣно бы́вшее, просла́вимъ.

Глаго́лы мучи́теля злочести́ваго благоро́дніи о́троцы оплева́вше терпѣли́вно, снѣ́дьми беззако́нныхъ оскверни́тися халде́йски не восхотѣ́ша.

Пита́стеся у́бо сло́вомъ душе́выѣ, снѣ́дьми же самора́сленными пло́тски, па́че пита́ющихся дебе́лыми снѣ́дьми, царю́ краснѣ́йшіи ли́цы яви́стеся.

Богоро́диченъ: Ядъ зміи́нъ, въ слу́хи го́рько излія́вшійся Евины, я́же изъ Дави́да возра́стшая, Отрокови́це, исцѣля́еши, Изба́вителя ро́ждши.

Кано́нъ святы́хъ пра́отцевъ, [его́же краестро́чіе: Отце́мъ хвалу́ въ лѣ́поту ны́нѣ приноша́ю]. Творе́ніе Іо́сифово. Гласъ 1.
Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Отце́мъ пѣ́ніе принесе́мъ, пре́жде зако́на и въ зако́нѣ возсія́вшимъ, и изъ Дѣ́вы возсія́вшему Го́споду и Влады́цѣ во́лею пра́вою угоди́вшимъ, и незаходи́маго просвѣще́нія ны́нѣ наслажда́ющимся.

Ада́ма пе́рваго почти́мъ, руко́ю почте́ннаго Зижди́теля, и всѣ́хъ на́съ пра́отца уже́ бы́вшаго, и въ ски́ніяхъ небе́сныхъ со всѣ́ми избра́нными почива́юща.

Авеля, да́ры прине́сшаго душе́ю благоро́днѣйшею, прія́тъ всѣ́хъ Бо́гъ и Госпо́дь; сего́ же па́ки, скверноубíйственною руко́ю умерщвле́на, принесе́ къ свѣ́ту я́ко боже́ственна му́ченика.

Богоро́диченъ: Рече́ній боже́ственныхъ услы́шимъ, вопію́щихъ Христо́во явле́ніе: се́ бо въ верте́пѣ ражда́ется изъ Отрокови́цы Неискусому́жныя, Его́же стра́шное Рождество́ провозвѣща́етъ звѣздосло́вцемъ звѣзда́ я́вльшаяся.

Катава́сія: Христо́съ ражда́ется...

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Ра́зумъ стяжа́вше богонауче́нный, Влады́ко, о́троцы Дави́довы зако́ны оте́ческія богому́дренно соблюдо́ша.

Огнь не опали́ чистѣ́йшая тѣлеса́ благочести́выхъ: посто́мъ бо душепита́тельнымъ напая́хуся.

Хвалу́ всемíрную и многопѣ́тую пою́тъ о́троцы тріе́, посредѣ́ пе́щи чу́дно ороша́еми.

Богоро́диченъ: Да рождество́, Влады́ко, изъ дѣ́вствующаго тѣлесе́ пока́жеши на́мъ, спаса́еши въ пещи́ дѣ́вствующая тѣлеса́.

Инъ.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Пое́тся въ мíрѣ Си́ѳово къ Зижди́телю разжже́ніе, и́бо въ непоро́чнѣмъ жи́тельствѣ и душе́внѣй любви́ Тому́ и́стинно угоди́, и ны́нѣ во странѣ́ живы́хъ вопіе́тъ: Свя́тъ еси́, Го́споди.

Усты́, и язы́комъ, и се́рдцемъ Ено́съ чу́дный призва́ти богому́дрено Влады́ку всѣ́хъ и Бо́га надѣ́яшеся въ Ду́сѣ и, благоуго́дно пожи́въ на земли́, сла́ву воспрія́тъ.

Священносло́віи свяще́нными Ено́ха ублажи́мъ, благоугоди́въ бо Го́споду, преста́вися въ сла́вѣ, яви́вся лу́чши сме́рти, я́коже писа́ся, и́мже Бо́жій бы́въ ра́бъ и́скреннѣйшій.

Богоро́диченъ: Ны́нѣ ча́яніе язы́ковъ отъ Дѣ́вы предгряде́тъ, и Виѳлее́мъ заключе́нный отверза́етъ свѣ́тло Еде́ма, Сло́во воплоща́емое пріе́мля, и въ я́слехъ пло́тію возле́гшаго.

Катава́сія: Пре́жде вѣ́къ...

Ипакои́, гла́съ 2:

Въ ро́су дѣ́темъ о́гнь прелага́шеся, пла́чь въ ра́дость жена́мъ премѣня́шеся: а́нгелъ бо во обои́хъ служа́ше чудесѣ́хъ, о́вымъ у́бо во упокое́ніе претвори́вый пе́щь, си́мъ же воскресе́ніе возвѣсти́вый тридне́вное. Нача́льниче жи́зни на́шея, Го́споди, сла́ва Тебѣ́. [Еди́ножды.]

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Даніи́лъ мудрѣ́йшій, боже́ственнѣ умо́мъ просвѣща́емь, со́нія разрѣши́ самоде́ржцевъ Боже́ственною благода́тію.

Облиста́етъ чудесми́, е́же въ пещи́, отроко́въ страда́ніе: мучи́теля бо улови́ша къ позна́нію Твоему́, Веси́льне.

Согла́сія орга́ны и мусикíи пѣ́сни всесли́чныя до́блественныхъ не привлеко́ша и злато́му о́бразу не подклони́ша.

Богоро́диченъ: Пѣ́сньми, Всепѣ́тая, и́же въ Вавило́нѣ дѣ́ти почита́ютъ Сы́на Твоего́ Пребоже́ственнаго, Его́же въ пещи́ позна́ша.

Инъ.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Хвалу́ принесе́мъ Бо́гу, чту́ще пѣ́сньми Но́я, вои́стинну су́ща пра́веднаго: во всѣ́хъ бо за́повѣдехъ Боже́ственныхъ украша́емь яви́ся, Христу́ благоугоди́въ, Ему́же пѣснопое́мъ, вѣ́рніи: сла́ва си́лѣ Твое́й, Го́споди.

Ви́дѣвъ твое́ Бо́гъ благоро́дное нра́ва, и просто́е, и по всему́, Но́е, соверше́на, втора́го мíра я́вѣ началовождя́ тя показу́етъ, спа́сшаго тому́ вся́каго ро́да отъ пото́па чу́вственнаго сѣ́мя, я́коже Са́мъ повелѣ́.

Но́я, сохра́ньшаго Бо́жій зако́нъ невреди́мь, и обрѣ́тшася тогда́ пра́ведна въ ро́дѣ свое́мъ, и дре́вянымъ спа́сша дре́вле ковче́гомъ безслове́сныхъ ро́ды повелѣ́ніемъ Вседѣ́тельнымъ, пѣ́сньми благоче́стно ублажи́мъ.

Вино́ умиле́нія на́мъ то́читъ, чту́щимъ тя́, Но́е блаже́нне, па́мять твоя́, веселя́щее и ду́ши, и сердца́ всегда́ чи́стѣ блажа́щихъ нра́вы твоя́ честны́я и жи́тельство боже́ственное.

Богоро́диченъ: Ны́нѣ Избавле́ніе на́ше въ я́слѣхъ возлега́етъ и пелена́ми повива́ется, я́коже Младе́нецъ. И волсви́, восто́чніи ца́ріе, прихо́дятъ Сего́ я́ко Бо́га и Царя́ ро́ждшагося отъ Чи́стыя, ви́дѣти и поклони́тися съ да́ры вѣ́рно.

Катава́сія: Же́злъ изъ ко́рене...

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Научи́вшеся зако́ну, Спа́се, не отверго́шася Твои́ уго́дницы, Даніи́лъ вели́кій съ треми́ ю́ношами богому́дрыми, но, крѣ́пость пріе́мше отъ Тебе́, Благодѣ́теля, мучи́тели му́жески побѣди́ша.

Мы́сленно науча́шеся Даніи́лъ, Человѣколю́бче, Твои́мъ та́йнамъ: на о́блацѣ бо я́ко Сы́на Тя́ Человѣ́ча гряду́ща, язы́ковъ всѣ́хъ я́ко Судію́ и Царя́ зря́ше ума́ чистото́ю.

Украси́ся, о дѣ́ти! па́че ка́мене сапфи́ра ва́ше совокупле́ніе, я́ко заря́ злата́я, благоче́стія ре́вностію распа́льшеся, ходя́ще ра́достно въ пещи́ и собира́юще ликова́ніе всемíрное.

Богоро́диченъ: Даніи́лъ Тя́, Дѣ́во, го́ру прописа́ я́вѣ боже́ственный, тріе́ же о́троцы, ви́дѣвше пла́мень ороша́ющь, Твое́ Боже́ственное Рождество́ пѣснопѣ́сненно восхваля́ютъ я́ко Спа́са, и Зижди́теля, и Го́спода.

Инъ.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Хвала́ми боже́ственными да почти́тся Си́мъ, оте́ческое благослове́ніе приплоди́въ, и, предъ Бо́гомъ благоуго́денъ я́влься, къ пра́отеческимъ лико́мъ причте́ся, и во странѣ́ живы́хъ ра́достно почива́етъ.

Ви́дѣти сподо́бися я́ко дру́гъ Бо́жій Авраа́мъ де́нь Зижди́теля своего́ и испо́лнь быва́етъ ра́дости духо́вныя; сего́ у́бо, ума́ пра́востію чту́ще, ублажи́мъ вси́, я́ко Христо́ва боже́ственна пра́отца.

Ви́дѣлъ еси́, я́коже е́сть мо́щно человѣ́ку ви́дѣти, Тро́ицу и Ту́ю угости́лъ еси́, я́ко дру́гъ при́сный, преблаже́нне Авраа́ме; тѣ́мже мзду́ прія́лъ еси́ стра́ннаго гоще́нія, е́же бы́ти тебѣ́ безчи́сленныхъ язы́ковъ отцу́ вѣ́рою.

Богоро́диченъ: По́лный истощава́ется пло́тію на́съ ра́ди, и нача́ло Безнача́льный пріе́млетъ; обнищева́етъ же Бога́тый, и Сло́во — Сы́й Бо́гъ — въ я́слѣхъ безслове́сныхъ возлежи́тъ, я́ко Младе́нецъ, воззва́ніе всѣ́хъ су́щихъ отъ вѣ́ка содѣ́ловая.

Катава́сія: Бо́гъ Сы́й ми́ра...

Пѣ́снь 6.

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́ отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю! и спаси́.

Облада́вше душе́вными страстьми́ си́лою сло́ва, страны́ язы́къ халде́йскихъ вла́стели бы́сте, вѣ́сть бо добродѣ́тель че́сть дарова́ти стяжа́вшимъ ю́, о Дави́довы му́дріи вну́цы!

Въ ме́ртвость Даніи́лъ живоно́сную одѣ́явся дре́вле, я́ко бо́га, халде́емъ злочести́вно мни́маго, убива́етъ снѣ́дію змíя злѣ́йшаго. Свяще́нники же злочести́выя му́дрѣ уби́лъ е́сть.

Богоро́диченъ: Ми́лостива ми́ Судію́, Сы́на Твоего́, Богоро́дице Дѣ́во, Твои́ми моли́твами бы́ти въ де́нь Суда́ Изба́вителя же лю́тыхъ, Ма́ти, умоли́: на Тя́ бо еди́ну наде́жду мою́ возлага́ю.

Инъ.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Образъ Христо́вы стра́сти бы́лъ еси́ я́вѣ, Исаа́че преблаже́нне, возводи́мь о́тчимъ благопокоре́ніемъ, е́же закала́тися. Сего́ ра́ди ублажи́лся еси́ и ра́бъ Бо́жій вои́стинну яви́лся еси́ бли́жній, со всѣ́ми пра́ведными вселя́яся.

Яви́ся Іа́ковъ уго́дникъ, вѣ́рнѣйшій всѣ́хъ Бо́га; тѣ́мже и бра́ся со Ангеломъ, у́мъ зря́ Бо́га нарече́ся и, спя́, Боже́ственную лѣ́ствицу ви́дѣ, на не́йже Бо́гъ утвержда́шеся, пло́тію обложи́выйся за благосты́ню.

Любя́ Іо́сифъ ко отцу́ благопокоре́ніе, въ ро́въ вве́рженъ, продаде́ся во о́бразъ закла́ннаго и въ ро́вѣ положе́ннаго Христа́; пшеницода́вецъ же Еги́пта бы́сть, цѣлому́дръ бы́въ и пра́веденъ, ца́рь же страсте́й и́стиннѣйшій.

Богоро́диченъ: Мла́до на земли́ Отроча́ познава́ется, Сы́й со Отце́мъ при́сно и Ду́хомъ, пелена́ми же повива́ется, Иже зе́млю повива́яй мгло́ю я́вѣ, и въ я́слѣхъ безслове́сныхъ возлежи́тъ. Сего́ ны́нѣ предпра́зднуимъ, ра́дующеся, безсѣ́менное рождество́.

Катава́сія: Изъ утро́бы Іо́ну...

Конда́къ, гла́съ 6:

Рукопи́саннаго о́браза не поче́тше, но Неопи́саннымъ существо́мъ защити́вшеся, треблаже́нніи, въ по́двизѣ огня́ просла́вистеся, средѣ́ же пла́мене нестерпи́маго стоя́ще, Бо́га призва́сте: ускори́, о Ще́дрый, и потщи́ся, я́ко Ми́лостивъ, въ по́мощь на́шу, я́ко мо́жеши хотя́й.

Икосъ:

Простри́ Твою́ ру́ку, е́юже дре́вле прія́ша искуше́ніе еги́птяне борю́щіи и евре́е бори́міи. Не оста́ви на́съ, да не пожре́тъ на́съ сме́рть, жа́ждущая на́съ, и сатана́, ненави́дяй на́съ, но прибли́жися на́мъ и пощади́ ду́ши на́ша, я́коже пощади́лъ еси́ иногда́ о́троки Твоя́, су́щія въ Вавило́нѣ, непреста́нно сла́вящія Тя́, и вве́рженныя Тебе́ ра́ди въ пе́щь, и отъ сея́ вопію́щія Ти́: ускори́, Ще́дрый, и потщи́ся, я́ко Ми́лостивъ, на по́мощь на́шу, я́ко мо́жеши хотя́й.

Пѣ́снь 7.

Ирмо́съ: Отроцы богочести́віи въ Вавило́нѣ, о́бразу злато́му не поклони́шася, но посредѣ́ пе́щи о́гненныя, ороша́еми, пѣ́снь воспѣва́ху, глаго́люще: превозноси́мый отце́въ и на́шъ Бо́же, благослове́нъ еси́.

Гла́съ боголюбе́зенъ поя́шеся изъ среды́ огня́ Вседержи́телю, Аза́рія бо, боже́ственный ли́къ соста́вивъ, пѣ́снь воспѣва́я, глаго́лаше: благослове́нъ Бо́гъ оте́цъ на́шихъ.

Цѣвни́ца ю́ношей богосло́вствуетъ всѣ́хъ Бо́га и Вседержи́теля, тѣ́мъ въ пещи́ я́сно я́вльшагося, и пѣ́снь воспѣва́ху, глаго́люще: благослове́нъ Бо́гъ оте́цъ на́шихъ.

Три́, въ пе́щь вве́рженныя, ви́дѣвъ ца́рь, я́ко узрѣ́ четве́ртаго ви́дъ, Сы́на пронарече́ Бо́жія, и всѣ́мъ возопи́: благослове́нъ Бо́гъ оте́цъ на́шихъ.

Богоро́диченъ: Имѣ́я просвѣще́нъ Боже́ственною заре́ю у́мъ, Даніи́ле богоблаже́нне, Дѣ́вы рождество́ я́вѣ предви́дѣлъ еси́, та́инственными о́бразы образу́емо, благослове́нъ, — вопія́, — Бо́же оте́цъ на́шихъ.

Инъ.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Да воспое́тся Ана́нія, Аза́рія, Мисаи́лъ съ Даніи́ломъ, пе́щь угаси́вше о́гненную, и льво́въ обузда́вше стремле́нія, и Христу́ согла́сно пою́ще: отце́въ Бо́же, благослове́нъ еси́.

Зако́нно пострада́въ въ напа́стехъ и неосла́бныхъ ско́рбехъ, уго́дникъ нарече́ся Іовъ Бо́жій всеи́стиннѣйшій, кро́токъ, незло́бивъ, пра́въ, соверше́нъ, непоро́ченъ, вопія́: отце́въ Бо́же, благослове́нъ еси́.

Вѣ́рою Моисе́я, Ааро́на же и Ора почти́мъ, восхваля́юще Іису́са и Левíю свяще́ннѣйшаго, Гедео́на же и Сампсо́на, и взыва́емъ: отце́въ Бо́же, благослове́нъ еси́.

Богоро́диченъ: Се́, я́коже прорече́ проро́къ, во чре́вѣ зача́ Неискусобра́чная Бо́га и роди́ти я́вѣ и́детъ въ верте́пѣ Виѳлее́млѣ. Ему́же вси́ пое́мъ: отце́въ Бо́же, благослове́нъ еси́.

Катава́сія: Отроцы благоче́стію...

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Авраа́мово благоро́діе сохрани́ти тща́щеся, сво́йственное къ нему́ стяжа́сте основа́ніе вѣ́ры и наде́жды, преподо́бніи, терпѣ́ніе и напа́стемъ пожда́ніе, вопію́ще: благослови́те, свяще́нницы, Влады́ку, лю́діе, превозноси́те Его́ во вѣ́ки.

Яко свѣти́ла просія́вше, и зе́млю онебеси́вше, и благоче́стія просвѣще́ніемъ осія́вшеся, всемíрное соста́вльше ликостоя́ніе, пою́тъ отъ напа́стей спа́сшему Влады́цѣ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Юношески погаси́вше распали́мую пе́щь и льво́въ че́люсти загра́ждше, Дави́довы вну́цы, ны́нѣ ра́дующеся, пою́тъ Тя́, Благодѣ́теля, Царя́ всѣ́хъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Тайнонауча́етъ, Пречи́стая, Даніи́лъ мудрѣ́йшій, и предживопису́ютъ о́троцы тріе́ Рождество́ Твое́, богому́дренніи, о́бразы зря́ще изъ утро́бы Твоея́ Проше́дшаго несказа́нно; Его́же дѣ́ти благословя́тъ, свяще́нницы воспѣва́ютъ, лю́діе превозно́сятъ во вся́ вѣ́ки.

Инъ.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Дне́сь су́щихъ отъ вѣ́ка боже́ственную па́мять соверша́емъ честны́хъ оте́цъ, Ада́ма, Авеля же, Си́ѳа, и Но́я, и Ено́са, и Ено́ха, и Авраа́ма, Мелхиседе́ка и Іова, Исаа́ка и вѣ́рнаго Іа́кова, да благослови́тъ тва́рь, вопію́ще, Го́спода и превозно́ситъ во вся́ вѣ́ки.

По́лкъ богокра́сный боже́ственныхъ оте́цъ да восхва́лимъ, Вара́ка, и Наѳа́на, и Елеаза́ра, Іосíю и Дави́да, Іефѳа́я, Саму́ила же, пре́дняя зря́ща че́стнѣ и взыва́юща: да благослови́тъ тва́рь вся́ Го́спода и превозно́ситъ Его́ во вѣ́ки.

Похвалу́ пѣснопѣ́сненно да принесе́мъ Бо́жіимъ проро́комъ, восхваля́юще Іосíю и Михе́я, Софо́нія и Авваку́ма, Заха́рію и Іо́ну, Агге́я же и Амо́са и со Авдíемъ Малахíя и Нау́ма, Иса́ію, и Іеремíю, и Іезекíиля, ку́пно Даніи́ла, Илію́ и Елиссе́я.

Глаго́лы Тро́ическими Всесвяту́ю воспои́мъ, вѣ́рніи, Тро́ицу, Отца́ Безнача́льнаго, Сы́на же и Пра́ваго Ду́ха Свята́го — Еди́ницу Тріѵпоста́сную, Юже вся́кое дыха́ніе сла́витъ, зову́ще: да благослови́тъ тва́рь вся́ Го́спода и превозно́ситъ во вся́ вѣ́ки.

Богоро́диченъ: Яви́лся еси́ отъ дѣ́вственныхъ, Христе́, крове́й, воплоща́емь неизрече́ннымъ сло́вомъ и я́ко Младе́нецъ соверше́нъ въ верте́пѣ премно́жествомъ благоутро́бія, Іису́се, ражда́яся; звѣзда́ же Тя́ издале́ча возвѣсти́ звѣздосло́вцемъ, по́йте, вѣ́рою зову́щимъ, и превозноси́те Христа́ во вѣ́ки.

Катава́сія: Чу́да преесте́ственнаго...

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Достиго́сте кончи́ну жела́емую и жела́ній Кра́йнѣйшему предстоите́ въ небе́сныхъ черто́зѣхъ, о́троцы всебога́тіи.

Ра́дующеся, рукоя́тіе, е́же отъ сле́зъ, до́браго ва́шего земледѣ́ланія прія́сте, нетлѣ́нія кла́съ плодоноси́вше.

Возсія́ свѣ́тлость ны́нѣ ва́мъ досто́йно, и весе́ліе се́рдца процвѣте́: отону́дуже бо отбѣже́ печа́ль, всели́стеся.

Богоро́диченъ: Па́жить сме́ртную уста́вила еси́, Дѣ́во, Жизнода́вца ро́ждши и Го́спода, животворя́щаго вѣ́рою велича́ющія Тя́.

Инъ.

Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Крѣ́постію Твое́ю дре́вле си́лы сотвори́ша дще́ри, Го́споди, Анна, и Іуди́ѳъ, и Дево́ра, Олда́, Іаи́ль же, Есѳи́рь, Са́рра, Маріа́мъ же Моисе́ева, Рахи́ль, и Реве́кка, и Ру́ѳь, велему́дрыя.

Яко угаси́вшія о́троки святы́я пе́щь свяще́нно почти́мъ ку́пно съ Даніи́ломъ проро́комъ и всѣ́ми пра́ведными я́вѣ, пре́жде зако́на облиста́вшими до́брѣ и въ зако́нѣ Влады́цѣ угоди́вшими.

Прему́дріи боже́ственніи проро́цы бы́вше Авраа́мовы вну́цы, Еже отъ Авраа́ма и Іу́ды ро́ждшееся Сло́во Бо́жіе провозвѣсти́ша Ду́хомъ, тѣ́хъ мольба́ми, Іису́се, вся́ уще́дри.

Освяти́ся вся́ тва́рь па́мятію ва́шею и, торжеству́ющи, зове́тъ, ра́бски вопію́щи: мольбу́ Го́споду при́сно принеси́те, блаже́нніи, улучи́ти вѣ́чныхъ бла́гъ благохва́лящимъ ва́съ.

Богоро́диченъ: Облекíйся въ мя́, отъ Дѣ́вы предгряде́тъ, и въ верте́пѣ ражда́ется Сло́во Отчее несли́тно: лику́й, тва́рь, гла́сы благода́рственными велича́ющи Того́ е́же за милосе́рдіе всесвято́е снизше́ствіе.

Катава́сія: Та́инство стра́нное...

Свѣти́ленъ воскре́сенъ. Сла́ва, пра́отцевъ. Подо́бенъ: Жены́, услы́шите.

Ада́ма восхва́лимъ, Авеля, Си́ѳа и Ено́са, Ено́ха и Но́я, Авраа́ма, Исаа́ка и Іа́кова, Моисе́я, Іова и Ааро́на, Елеаза́ра и Іису́са, Вара́ка, Сампсо́на и Іефѳа́я, Дави́да и Соломо́на.

И ны́нѣ:

Со́лнце вели́кое — Созда́тель — отъ Неискусому́жныя Дѣ́вы, я́же отъ Ада́ма просвѣти́ти въ Виѳлее́мъ тщи́тся. Тѣ́мже возвѣща́етъ чу́до пра́отецъ всесвѣтлѣ́йшая па́мять.

На хвали́техъ стихи́ры воскре́сны 4 и святы́хъ пра́отцевъ 4, гла́съ 2. Подо́бенъ: До́ме Евфра́ѳовъ.

Вси́ честны́хъ ны́нѣ* пра́отецъ па́мять* соверша́емъ, пою́ще* богоуго́дное си́хъ житіе́,* его́же ра́ди возвели́чишася. [Дважды.]

Сти́хъ: Благослове́нъ еси́, Го́споди Бо́же оте́цъ на́шихъ,* и хва́льно, и просла́влено и́мя Твое́ во вѣ́ки.

Угаси́ша си́лу* о́троцы о́гненную,* лику́юще посредѣ́ пе́щи* и пою́ще Бо́га всеси́льнаго.

Сти́хъ: Яко пра́веденъ еси́ о всѣ́хъ,* я́же сотвори́лъ еси́ на́мъ.

Въ ро́вѣ заключе́нъ,* звѣре́мъ сообита́тель,* Даніи́лъ проро́къ* неприча́стенъ си́хъ* показа́ся озлобле́нія.

Сла́ва, гла́съ 7:

[Ге́рманово:] Пріиди́те вси́, вѣ́рно торжеству́имъ пре́жде зако́на оте́цъ, Авраа́ма и су́щихъ съ ни́мъ, лѣ́тнюю па́мять. Іу́дово пле́мя досто́йно почти́мъ, и́же въ Вавило́нѣ о́троки, угаси́вшія пе́щный пла́мень, я́ко Тро́ицы о́бразъ съ Даніи́ломъ восхва́лимъ, проро́ческая прорече́нія извѣ́стно держа́ще, со Иса́іемъ велегла́сно возопіи́мъ: се́ Дѣ́ва во чре́вѣ пріи́метъ и роди́тъ Сы́на Емману́ила, Иже е́сть съ на́ми Бо́гъ.

И ны́нѣ: Преблагослове́нна еси́, Богоро́дице Дѣ́во...
Славосло́віе вели́кое. Ектеніи́, и отпу́стъ.
И стихи́ра ева́нгельская. Ча́съ 1-й и коне́чный отпу́стъ.



НА ЛИТУРГІИ,

Блаже́нна окто́иха, на 6 и пра́отцевъ пѣ́снь 3-я, на 4. По вхо́дѣ тропа́рь воскре́сенъ и пра́отцевъ. Сла́ва, и ны́нѣ, конда́къ пра́отцевъ. Проки́менъ, пѣ́снь отце́въ, гла́съ 4: Благослове́нъ еси́, Го́споди Бо́же оте́цъ на́шихъ,* и хва́льно и просла́влено и́мя Твое́ во вѣ́ки. Сти́хъ: Яко пра́веденъ еси́ о всѣ́хъ, я́же сотвори́лъ еси́ на́мъ. Апо́столъ пра́отцевъ, къ Колосса́емъ, зача́ло 257. Аллилу́ія, гла́съ 4: Моисе́й и Ааро́нъ во іере́ехъ Его́, и Саму́илъ въ призыва́ющихъ и́мя Его́. [Сти́хъ: Призыва́ху Го́спода, и То́й послу́шаше и́хъ.] Ева́нгеліе Луки́, зача́ло 76. Прича́стенъ: Хвали́те Го́спода съ небе́съ, [хвали́те Его́ въ вы́шнихъ]. Другíй: Ра́дуйтеся пра́ведніи о Го́сподѣ, [пра́вымъ подоба́етъ похвала́].


(Мрк) Подоба́етъ вѣ́дати: а́ще случи́тся святы́хъ тріе́хъ отроко́въ и свята́го проро́ка Даніи́ла въ недѣ́лю святы́хъ пра́отецъ. Пое́тся возслѣ́дованіе и́хъ вку́пѣ съ воскре́сною слу́жбою си́це:

На ма́лѣй вече́рни на Го́споди, воззва́хъ... стихи́ры воскре́сны и Богоро́дицы, по обы́чаю.

На вели́цѣй вече́рни на Го́споди воззва́хъ... стихи́ры воскре́сны 3, и пра́отцевъ 3, и проро́ка Даніи́ла 2, гла́съ 4. Подо́бенъ: Яко до́бля. И отроко́въ 2, гла́съ то́йже. Подо́бенъ: Да́лъ еси́ зна́меніе. Сла́ва, пра́отцевъ, гла́съ 6: Иже пре́жде зако́на... И ны́нѣ, богоро́диченъ пе́рвый, гла́са. Вхо́дъ. Проки́менъ дне́. На литíи: стихи́ра хра́ма и проро́ка Даніи́ла, гла́съ 4: На престо́лѣ сѣдя́щаго... [пи́сана на Го́споди воззва́хъ... въ ря́ду послѣ́дняя]. И отроко́въ, гла́съ то́йже: Словесе́ прему́дрости Твоея́... [пи́сана на Го́споди же, воззва́хъ... послѣ́дняя], и гла́съ 2: Духо́вно на́съ вѣ́рніи... Сла́ва, пра́отцевъ, гла́съ 1: Луча́ми облиста́вшеся... И ны́нѣ, богоро́диченъ: Се́ испо́лнися... На стихо́внѣ стихи́ры воскре́сны. Сла́ва, пра́отцевъ, гла́съ 3: Пра́отцевъ собо́ръ... И ны́нѣ, проро́ка, гла́съ 6: Даніи́лъ, му́жъ жела́ній... На благослове́ніи хлѣ́бовъ тропа́рь: Богоро́дице Дѣ́во.., два́жды, и пра́отцевъ еди́ножды. И Бу́ди и́мя Госпо́дне.., три́жды. Псало́мъ 33: Благословлю́ Го́спода... и чте́ніе въ посла́ніихъ апо́стольскихъ.

Зри́: А идѣ́же бдѣ́ніе не быва́етъ, на повече́ріи [глаго́лемъ] по Досто́йнѣ и по трисвято́мъ конда́къ святы́хъ пра́отцевъ.

На у́трени, на Бо́гъ Госпо́дь... тропа́рь воскре́сенъ два́жды. Сла́ва, отроко́въ. И ны́нѣ, пра́отцевъ. По каѳи́смахъ сѣда́льны воскре́сны съ богоро́дичны и́хъ, и чте́ніе во Ева́нгеліи толково́мъ, недѣ́ля ря́дъ. По полиеле́и тропари́: Ангельскій собо́ръ... ипакои́ гла́са и сѣда́ленъ пра́отцевъ. И чте́ніе во Ева́нгеліи, недѣ́ля святы́хъ пра́отцевъ. Степе́нна и проки́менъ гла́са. Ева́нгеліе воскре́сно, псало́мъ 50-й, стихи́ра воскре́сна и про́чее. Кано́нъ воскре́сенъ со ирмосо́мъ на 4, проро́ка и отроко́въ, о́ба кано́на на 6. И пое́мъ въ ко́ейждо пѣ́сни проро́ка три́ тропаря́, богоро́диченъ оставля́ется, и отроко́въ пе́рвыя стихи́ два́ за еди́нъ, та́же тропа́рь еди́нъ, и богоро́диченъ. И пра́отцевъ на 4, и держи́мъ стихо́въ 12, кромѣ́ Сла́ва, и ны́нѣ; всѣ́хъ же на 14. Катава́сія: Христо́съ ражда́ется... По 3-й пѣ́сни конда́къ, и и́косъ проро́ка, и сѣда́ленъ его́. Сла́ва, отроко́въ. И ны́нѣ, ипакои́ пра́отцевъ и чте́ніе. По 6-й пѣ́сни конда́къ пра́отцевъ, и и́косъ, и чте́мъ про́логъ. По 9-й пѣ́сни свѣти́ленъ воскре́сенъ и пра́отцевъ. Сла́ва, проро́ка. И ны́нѣ: Со́лнце вели́кое... На хвали́техъ стихи́ры воскре́сны 4, и святы́хъ пра́отцевъ на 4, съ припѣ́вы: Благослове́нъ еси́, Го́споди... 2-й: Яко пра́веденъ еси́... Сла́ва, пра́отцевъ, гла́съ 7: Пріиди́те вси́, вѣ́рно торжеству́имъ... И ны́нѣ: Преблагослове́нна еси́... Славосло́віе вели́кое. По трисвято́мъ тропа́рь воскре́сенъ, ектеніи́, и отпу́стъ, и обы́чное исхожде́ніе. Сла́ва, и ны́нѣ, стихи́ра ева́нгельская, и ча́съ 1-й.

На 1-мъ часѣ́ тропа́рь воскре́сенъ. Сла́ва, пра́отцевъ. И ны́нѣ, богоро́диченъ часо́въ. По трисвято́мъ конда́къ пра́отцевъ, и про́чее, и соверше́нный отпу́стъ. На 3-мъ часѣ́ тропа́рь воскре́сенъ. Сла́ва, проро́ка. И ны́нѣ, богоро́диченъ часо́въ. По трисвято́мъ конда́къ пра́отцевъ.

На литургíи, блаже́нна гла́са на 4, и пра́отцевъ пѣ́снь 3-я на 4, и проро́ка пѣ́снь 6-я на 4. По вхо́дѣ тропа́рь воскре́сенъ, та́же святы́хъ. Сла́ва, конда́къ проро́ка. И ны́нѣ, пра́отцевъ. Проки́менъ, пѣ́снь отце́въ и святы́хъ. Апо́столъ и Ева́нгеліе недѣ́ли пра́отцевъ и святы́хъ. Ря́дъ же недѣ́ли оставля́ется. Прича́стенъ: Хвали́те Го́спода... Другíй: Ра́дуйтеся, пра́ведніи о Го́сподѣ...

Зри́: Си́це пое́мъ слу́жбу и вели́каго свята́го пра́зднуемаго, а́ще случи́тся въ сію́ недѣ́лю, то́кмо по поліеле́и: И ны́нѣ, сѣда́ленъ пра́отцевъ. На литургíи: проки́менъ пра́отцевъ и свята́го. И вся́ слу́жба, я́коже пре́жде явле́но е́сть.


Зри́: Вѣ́дати подоба́етъ, я́ко отъ сего́ 11-го дне́ начина́ется недѣ́ля пра́отеческая и восхо́дитъ сего́ же Деке́мврія до 17-го дне́. Быва́етъ же си́це:

Аще у́бо случи́тся Рождество́ Христо́во въ недѣ́лю, и тогда́ пра́отеческая недѣ́ля быва́етъ Деке́мврія въ 11-й де́нь. А святы́хъ оте́цъ недѣ́ля, я́же предъ Рождество́мъ Христо́вымъ, Деке́мврія въ 18-й де́нь.

Аще ли случи́тся Рождество́ Христо́во въ понедѣ́льникъ, и тогда́ пра́отеческая недѣ́ля быва́етъ Деке́мврія въ 17-й де́нь. А недѣ́ля святы́хъ оте́цъ, я́же предъ Рождество́мъ Христо́вымъ, тогда́ быва́етъ Деке́мврія въ 24-й де́нь.

Аще ли случи́тся Рождество́ Христо́во во вто́рникъ, и тогда́ пра́отеческая недѣ́ля быва́етъ Деке́мврія въ 16-й де́нь. А святы́хъ оте́цъ недѣ́ля, я́же предъ Рождество́мъ Христо́вымъ, Деке́мврія въ 23-й де́нь.

Аще ли случи́тся Рождество́ Христо́во въ сре́ду, и тогда́ быва́етъ пра́отеческая недѣ́ля Деке́мврія въ 15-й де́нь. А святы́хъ оте́цъ недѣ́ля Деке́мврія въ 22-й де́нь.

Аще ли случи́тся Рождество́ Христо́во въ четверто́къ, и тогда́ быва́етъ прао́теческая недѣ́ля Деке́мврія въ 14-й де́нь. А святы́хъ оте́цъ недѣ́ля Деке́мврія въ 21-й де́нь.

Аще ли случи́тся Рождество́ Христо́во въ пято́къ, и тогда́ быва́етъ пра́отеческая недѣ́ля Деке́мврія въ 13-й де́нь. А святы́хъ оте́цъ недѣ́ля въ 20-й де́нь.

Аще ли случи́тся Рождество́ Христо́во въ суббо́ту, и тогда́ быва́етъ пра́отеческая недѣ́ля Деке́мврія въ 12-й де́нь. А недѣ́ля святы́хъ оте́цъ, я́же предъ Рождество́мъ Христо́вымъ, Деке́мврія въ 19-й де́нь.

Отъ здѣ́ блюди́ недѣ́лю святы́хъ пра́отецъ, въ ко́е число́ прилучи́тся.

Аще и пре́жде недѣ́ли 28-я или́ по́слѣжде: И на Литургíи Ева́нгеліе чти́ недѣ́ли 28-я, отъ Луки́, зача́ло 76: Человѣ́къ нѣ́кій сотвори́ ве́черю ве́лію... непремѣ́нно еди́но. А въ 28-ю недѣ́лю чти́ рядово́е, ко́е прилучи́тся ины́я недѣ́ли.

Источникъ: Мине́я пра́здничная, имену́емая Анѳоло́гіонъ, содержа́щая слу́жбы Госпо́дскимъ и Богоро́дичнымъ пра́здникомъ и святы́мъ избра́ннымъ. — М.: Сѵнода́льная Тѵпогра́фія, 1901. — Л. 135 об. – 143 об.

/ Къ оглавленію раздѣла /


Наверхъ / Къ титульной страницѣ

0