Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 22 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 11-й де́нь.
Слу́жба преподо́бному Ни́кону Сухо́му, Пече́рскому.

[ВЕЧЕРЪ,]
Стихи́ры на Го́споди воззва́хъ, гла́съ 4. Подо́бенъ: Да́лъ еси́ зна́меніе.

Огне́мъ искуша́емь и озлобля́емь вся́чески, благода́рственная возсыла́лъ еси́, блаже́нне, Творцу́ и Бо́гу, тѣ́мъ, изба́влься отъ руки́ нечести́выхъ, ста́лъ еси́ въ це́рквѣ святѣ́й, и ны́нѣ, предстоя́ въ Це́рквѣ торжеству́ющихъ, да изба́вимся и мы́ отъ искуше́ній, моли́ Іису́са Человѣколю́бца и Спа́са ду́шъ на́шихъ.

Огнь любве́ твоея́, я́же къ Бо́гу, угаси́ о́гнь чу́вственный, струи́ же крове́й твои́хъ потопи́ша мы́сленного врага́ полки́, и побѣди́лъ еси́ му́чащихъ тя́, преподо́бне, тѣ́мъ и дарова́ тебѣ́ по́честь вы́шнихъ чинонача́лій Іису́съ Человѣколю́бецъ и Спа́съ ду́шъ на́шихъ.

Сла́ва, гла́съ 6:

Мона́ховъ мно́жества терпѣ́нію твоему́ удивля́ются, ка́ко, отъ невѣ́рныхъ озлобля́емь, огне́мъ искуша́емь и ножи́ ссѣка́емь, ва́ръ и зно́й, гла́дъ и жа́жду терпя́ и на Бо́га имѣ́я наде́жду спасе́нія своего́, ле́гко тѣ́сный пу́ть преше́лъ еси́ и кра́йняго доспѣ́лъ еси́ блаже́нства. Блаже́нъ еси́, си́це Христо́ви рабо́тавъ, и прія́лъ еси́ мзду́ дѣ́ланія своего́: съ а́нгелы селе́ніе и Боже́ственнаго свѣ́та прича́стіе. Тѣ́мъ мо́лимъ тя́, Ни́коне преблаже́нне, я́ко имѣ́я дерзнове́ніе ко Христу́ Бо́гу, ми́ра испроси́ мíрови и душа́мъ на́шимъ ве́лію ми́лость.

И ны́нѣ, богоро́диченъ или́ крестобогоро́диченъ.

На стихо́внѣ во окто́ихѣ. Сла́ва, гла́съ 6:

Пріиди́те, Россíйстіи христолюби́віи собо́ри и и́ноческихъ лико́въ совокупле́нія, пріиди́те благоче́стно къ святѣ́й Пеще́рѣ, похва́льныя пѣ́сни любому́дренно въ да́ръ принесе́мъ и поклони́мся моще́мъ Ни́кона сла́внаго, я́ко да его́ святы́ми моли́твами пріи́мемъ вѣне́цъ неувяда́емыя сла́вы отъ Христа́ Бо́га и Спа́са ду́шъ на́шихъ.

Тропа́рь, гла́съ 8:

Бо́га Блага́го возлюби́въ, и́ноческое прія́лъ еси́ житіе́ и, до́брѣ въ не́мъ подвиза́вся, плѣне́нъ бы́лъ еси́ по́ловцы, и́миже мно́го му́чимь, крѣпкоду́шне Ни́коне, благода́тію Христо́вою свободи́лся еси́ отъ ни́хъ неви́димо, и ны́нѣ во свѣ́тѣ пребыва́я непристу́пнѣмъ, моли́ спасти́ся на́мъ, твою́ па́мять почита́ющимъ.


[НА УТРЕНИ,]
Кано́нъ свято́му, гла́съ 4.

Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Воспѣ́ти ми́ всечестну́ю па́мять преподо́бнаго Твоего́ спосо́бствуй, Го́споди Бо́же мо́й, и пѣсносло́віи почти́ти Ни́кона сла́внаго, посли́ Паракли́та Пресвята́го, да, бо́дростію препоя́санъ, пѣ́снь Тебѣ́ принесу́, подаю́щему всѣ́мъ си́лу.

Кто́ тя́ досто́йно восхва́литъ, о́тче блаже́ннѣйшій, отъ ю́ности возлюби́вшаго Го́спода своего́ и Тому́ во́льною нището́ю послѣ́довавшего да́же до сме́рти? Тѣ́мъ ны́нѣ, живы́й со а́нгелы, моли́ и на́мъ посла́ти къ терпѣ́нію си́лу.

Тму́ и мра́къ любостра́стнаго мíра любо́вію ко Христу́ пыла́ющею непреткнове́нно преше́дъ и свѣ́тлости а́нгельскаго о́браза приче́тся, а́ки внѣ́ пло́ти бы́лъ еси́, сего́ ра́ди пое́ши Пода́вшему ти́ си́лу.

Богоро́диченъ: Тму́, ослѣпи́вшую страстьми́ мы́сленныя ми́ о́чи, молю́ся, прожени́, Чи́стая Дѣ́во: Ты́ бо еси́ свѣтопріе́мная свѣща́ во тмѣ́ су́щимъ, огне́мъ возжже́нная невеще́ственнымъ, и наставля́еши на ра́зумъ Боже́ственный пою́щихъ: ра́дуйся, Свѣти́ло Незаходи́маго Свѣ́та.

Пѣ́снь 3.

Ирмо́съ: Яко непло́ды, роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Яко непло́ды ра́дуется, пріе́мшая во утро́бѣ, та́ко весели́тся Пече́рская гора́, стяжа́вшая тя́ свѣти́льника преподо́бнымъ, и съ и́ноческими чи́нми пое́тъ: Свя́тъ еси́, Го́споди.

Пе́рвымъ отце́мъ подража́я, ра́достію кре́стъ возложи́въ на ра́мо, Ни́коне сла́вне, того́ великоду́шнѣ носи́лъ еси́ да́же до сме́рти, любве́ ра́ди Го́спода своего́, Ему́же пое́ши ны́нѣ: Свя́тъ еси́, Го́споди.

Крѣ́пкія вѣ́ры щито́мъ воору́жся, ше́лъ еси́ въ плѣ́нъ, преподо́бне, и плѣни́ти хотя́щаго врага́ та́мо въ развраще́ніе великоду́шіемъ связа́лъ еси́, наступи́въ ного́ю, укрѣпля́ющему же тя́ Бо́гу воспѣ́лъ еси́: Свя́тъ еси́, Го́споди.

Богоро́диченъ: Крѣ́постію страсте́й востаю́щаго на мя́ врага́ не могíй одолѣ́ти, къ Тебѣ́ прибѣга́ю, Ма́ти Бо́жія, помози́ ми, Ты́ бо еси́ сто́лпъ крѣ́пкій, ору́жіе на бра́ни и непреобори́мая Воево́да.

Сѣда́ленъ, гла́съ 8:

Ни́ву души́ своея́ хотя́ воздѣ́лати, кре́стъ, а́ки яре́мъ, во́льнаго терпѣ́нія возложи́лъ еси́ на ся́, и си́мъ, а́ки ра́ломъ, воздѣ́лалъ еси́ непло́дствующую страсте́й зе́млю, сѣ́явъ слеза́ми, мета́ющи сѣ́мя по́стническихъ трудо́въ, изъ ни́хже ны́нѣ ра́достныя пожина́еши рукоя́ти, предстоя́ Христу́ Бо́гу, Его́же моли́, Ни́коне сла́вне, я́ко при́сно сы́й моли́твенникъ о блажа́щихъ любо́вію святу́ю па́мять твою́.

Сла́ва, и ны́нѣ, богоро́диченъ:

Ра́дуйся, неора́нная Ни́во, возрасти́вшая Кла́съ несѣ́янный, изъ Него́же хлѣ́бъ спаси́тельный мíру сотвори́ся, си́мъ напита́й ду́ши любо́вію чту́щихъ непоро́чное зача́тіе Твое́, Чи́стая Дѣ́во.

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Любо́вь твоя́ бы́сть, о́тче, крѣпка́ къ Бо́гу, за Него́же страда́ти отъ невѣ́рныхъ жела́я, ника́коже искупле́нъ бы́ти восхотѣ́лъ еси́, возлюби́въ бо возлюби́вшаго тя́ Го́спода, и на Того́ надѣ́яся, взыва́лъ еси́: Свя́тъ еси́, Го́споди.

Наказа́ніе Госпо́дне пріе́мь любе́зно, сла́дцѣ искуше́ніе болѣ́зней преше́лъ еси́, блаже́нне, глаго́ля съ Дави́домъ: блаже́нъ человѣ́къ, его́же нака́жеши, Го́споди, тѣ́мъ и зову́ Ти́: сла́ва си́лѣ Твое́й, Го́споди.

На бу́дущая взира́я, настоя́щія болѣ́зни ни во что́ же вмѣни́лъ еси́, Ни́коне чу́дне, а́ще и о́гнь, и мра́зъ, и желѣ́зо прирази́шася тебѣ́, но вся́ сія́ истаева́ху, ты́ же, а́ки адама́нтъ крѣ́пкій, пребы́лъ, рекíй: Свя́тъ еси́, Го́споди.

Богоро́диченъ: На бу́дущая не взира́я, прильпе́ земли́ душа́ моя́ и уподо́бихся ското́мъ несмы́сленнымъ, но Ты́, Чи́стая Дѣ́во, отве́рзи ми́ мы́сленныя о́чи и удиви́ ми́лость Твою́ на мнѣ́, да, разумѣ́я, вопію́: свята́ еси́ и ди́вна въ пра́вду.

Пѣ́снь 5.

Ирмо́съ: Ты́, Го́споди мо́й, Свѣ́тъ въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія, вѣ́рою воспѣва́ющія Тя́.

Ты́, о́тче, вся́чески отъ невѣ́рныхъ озлобля́емь, неради́лъ еси́ о се́мъ, но, благода́рственная возсыла́я Бо́гу, глаго́лалъ еси́: спаси́ мя, Бо́же, я́ко внидо́ша во́ды до души́ моея́, Ты́ бо Еди́нъ еси́, изводя́й окова́нныя му́жествомъ, вѣ́рою воспѣва́ющія Тя́.

Терпѣ́ніе твое́, преблаже́нне, смути́ плѣни́вшаго тя́ по́ловчанина, сего́ ра́ди три́ лѣ́та пребы́сть, му́ча тя́ на вся́къ де́нь, озлобля́ющи гла́домъ, жа́ждою, сту́денію и ва́ромъ, но ты́, свя́те, наде́жду имѣ́лъ на Бо́га, я́ко То́й избавля́етъ вѣ́рою воспѣва́ющія Его́.

Струи́ крове́й твои́хъ, подрѣ́занія лы́стовъ и и́ныя му́ки ви́дя, вра́гъ мы́сленный наусти́ по́ловчанина, и́же слы́ша иму́щее тебѣ́ бы́ти свобожде́ніе свы́ше, тя́жкія вери́ги возложи́ти на тя́, но ты́, о́тче, псало́мски взыва́лъ еси́: Бо́же, въ по́мощь мою́ вонми́, Ты́ бо Еди́нъ еси́, спаса́яй вѣ́рою воспѣва́ющія Тя́.

Богоро́диченъ: Струя́ми по́мощи Твоея́, Богоневѣ́стная Дѣ́во, потопи́ неви́димыя враги́, влеку́щія вери́гами страсте́й ду́шу мою́ во а́дову про́пасть, да, свобо́дь сы́й отъ си́хъ, вопію́ Ти́: ра́дуйся, Мо́ре, потопи́вшее мы́сленнаго фарао́на.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Желѣ́зо скорбе́й пронза́ше ду́шу твою́, Ни́коне сла́вне, до́ндеже Евстра́тій му́ченикъ даде́ извѣще́ніе свобожде́нія, по́сланнаго ти́ вско́рѣ отъ Бо́га, къ Нему́же взыва́лъ еси́: на Тя́, Го́споди, упова́хъ, пра́вдою Твое́ю изба́ви мя́, Іису́се, Царю́ си́лъ.

Яко Авваку́ма, неви́димо восхи́ти тя́ Вы́шняго десни́ца, стрегу́щіи же тя́ удиви́шася, гла́съ свы́ше слы́шаще, и постыдѣ́шася, невѣ́дуще Бо́га, я́ко То́й еди́нъ е́сть Ца́рь си́лъ.

Богоро́диченъ: Изба́вительнице крѣ́пкая, изба́ви мя́ отъ ру́къ сопроти́вныхъ, се́ бо понре́тъ глава́ моя́ въ про́пасть и не изы́ду отъ а́довыхъ закле́пъ вѣ́чныхъ, а́ще не Ты́ ми́ да́си по́мощь, су́щи Ма́ти Царя́ си́лъ.

Конда́къ, гла́съ 6:

Первому́ченику подо́бяся, о мучи́телѣ твое́мъ моли́лся еси́ и, изба́вивъ того́ отъ сме́рти, приве́лъ еси́ ко Христу́, преподобному́чениче Ни́коне сла́вне, тѣ́мже, съ первострада́льцемъ зря́ Христа́ одесну́ю Отца́, моли́ся о на́съ, да не пребу́демъ внѣ́ черто́га Христо́ва.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Стра́шнаго обще́нія Та́инъ вре́мени су́щу въ це́ркви, си́лою Бо́жіею восхище́нъ отъ плѣ́на, ста́лъ еси́ среди́ бра́тіи, Ни́коне сла́вне и вси́, узрѣ́вше у́зы твоя́ и кро́вь, ка́плющую отъ лы́стовъ, воздѣ́ша ру́цѣ о свобожде́ніи твое́мъ, глаго́люще: Бо́же, благослове́нъ еси́.

Иже пе́рвѣе имѣ́ тя, о́тче, въ плѣ́нѣ, се́ то́й послѣди́ узрѣ́въ тя́ свобо́дна десни́цею Вы́шняго среди́ бра́тіи, умили́вся и крести́вся, плѣни́ себе́ въ послуша́ніе Христо́во, зовы́й: Бо́же, благослове́нъ еси́.

Блаже́нни плѣ́нницы, иму́ще тя́ сплѣ́нника, му́дре, тобо́ю бо отъ неду́га свобожде́ни, отъ ру́къ нечести́выхъ избѣго́ша, и испо́лнися рече́нное въ Писа́ніи: мно́го мо́жетъ моли́тва пра́веднаго поспѣшеству́ема.

Богоро́диченъ: Плѣне́нъ сы́й отъ враго́въ мы́сленныхъ и свя́занъ вери́гами страсте́й отъ лю́таго веліа́ра, къ Тебѣ́ вопію́, Неискусобра́чная Ма́ти: исхи́ти мя́ отъ си́хъ, да, свобо́дь сы́й, воззову́: ра́дуйся, Ро́ждшая Свободи́теля плѣне́ннымъ.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Изба́вителя всѣ́хъ и Спа́са своего́ нося́й незло́біе, не убоя́лся еси́, о́тче, мучи́теля, распя́ти тя́ хотя́ща, но, благи́мъ за зло́е воздава́я, исцѣли́лъ еси́ его́, въ болѣ́зни лежа́ща, да и то́й, обра́щся, благослови́тъ Го́спода, и превозно́ситъ во вѣ́ки.

Въ скуде́льномъ тѣ́ла твоего́ сосу́дѣ, ко́ль мно́гое чте́мъ бы́ти сокро́вище чудотворе́нія, блаже́нне, и сла́вимъ Небе́снаго Отца́, да́вшаго ти́ сицева́я на по́льзу на́шу, си́мъ и на́съ испра́ви, мо́лимъ тя́, да тобо́ю пресла́вная Дѣ́ющаго воспое́мъ и превозно́симъ во вѣ́ки.

Ста́лъ еси́ проти́ву мíру и пло́ти, и обоя́ связа́въ, покори́лъ еси́ ду́ху, тѣ́мже, къ вы́шнему мíру возше́дъ, ра́дуешися, и со а́нгелы пое́ши, и превозно́сиши Го́спода во вѣ́ки.

Богоро́диченъ: Предста́ни на́мъ въ по́мощь, ско́ро призыва́ющимъ Тя́, Пречи́стая Дѣ́во, и укрѣпи́ ны́, проти́ву мíра и пло́ти на ду́ха похотству́ющія, се́ бо приво́димъ Ти́ Ни́кона сла́внаго въ моли́тву, его́же ра́ди да́ждь на́мъ во свѣ́тѣ святы́хъ превозноси́ти Тя́ во вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Евинъ неду́гъ въ души́ свое́й исцѣли́ти хотя́ще, собра́ся по́лкъ доблему́дрыхъ оте́цъ на горѣ́ Пече́рской, отъ ни́хже Ни́конъ сла́вный, я́ко звѣзда́, просія́ и луча́ми свои́хъ моли́твъ просвѣща́етъ на́съ, тѣ́мже его́ велича́емъ.

Свѣ́томъ мы́сленнымъ озари́лся еси́, и́же пе́рвѣе отверже́ніемъ страсте́й отврати́лъ еси́ о́чи твои́ не ви́дѣти суеты́, тѣ́мже Поста́вльшаго рабу́ Своему́ сло́во Свое́ въ стра́хъ Сво́й, Христа́ велича́емъ.

Тро́иченъ: Ди́вна дѣла́ Твоя́, Несозда́нная Тро́ице, и сла́вишися во святы́хъ Свои́хъ, Бо́же Изра́илевъ, мольба́ми уго́дника Твоего́ Ни́кона удиви́ и на на́съ благода́ть Твою́, отвраще́ніемъ отъ дѣ́лъ неподо́бныхъ, да Тя́ вы́ну велича́емъ.

Богоро́диченъ: Ди́вна дѣла́ смотре́нія Своего́ сотвори́ на Тебѣ́ Вы́шній, Безневѣ́стная Дѣ́во, и велича́ютъ Тя́, блажа́ще отъ ро́да въ ро́дъ, вся́ земноро́дныхъ колѣ́на; мольба́ми преподо́бныхъ Пече́рскихъ да́ждь на́мъ, да и мы́ Тя́ во вѣ́ки велича́емъ.

Свѣти́ленъ:

Воздержа́ніемъ крѣ́пкимъ и муче́ніемъ отъ невѣ́рныхъ блюду́щаго пяты́ твоея́ змíя уби́лъ еси́, о́тче, по кончи́нѣ свое́й вѣне́цъ сугу́бый до́блестей твои́хъ прія́лъ еси́, и ны́нѣ, живы́й на небеси́, я́ко преподо́бнымъ сла́ва и му́ченикомъ сы́й похвала́, моли́ся о на́съ, да и мы́ прича́стницы сла́вы твоея́ бу́демъ, Ни́коне му́дре.

Сла́ва, и ны́нѣ, богоро́диченъ:

Невоздержа́ніемъ во тму́ все́льшійся ро́дъ на́шъ Рождество́мъ Твои́мъ приве́дшая къ свѣ́ту, на́съ невоздержа́нія изба́ви и къ свѣ́ту за́повѣдей Сы́на Твоего́ наста́ви, да пое́мъ Ти́, Богоро́дице: ра́дуйся, воздержа́нія неувяда́емый вѣ́нче.

На стихо́внѣ окто́иха. Сла́ва, гла́съ 5:

Земна́го а́нгела и небе́снаго граждани́на, преподо́бнымъ равностоя́теля, Ни́кона сла́внаго, пріиди́те, лю́діе, ублажи́мъ: то́й бо сугу́быми страда́ніи подвиза́ся, и по́двигомъ свои́мъ пріе́мь сугу́быя вѣнцы́, предстои́тъ Христу́ Бо́гу, непреста́нно моля́ за гра́дъ и оби́тель сію́, во е́же получи́ти е́й ве́лію ми́лость.

И ны́нѣ, богоро́диченъ или́ крестобогоро́диченъ, по гла́су.

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 36 об. – 39 об.

/ Къ оглавленію раздѣла /


Наверхъ / Къ титульной страницѣ

0