Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 11-й де́нь.
Преподо́бнаго отца́ на́шего Даніи́ла Сто́лпника.

Аллилу́ія или́ тропа́рь.

[ВЕЧЕРЪ,]
На Го́споди воззва́хъ: стихи́ры 3, гла́съ 8. Подо́бенъ: Что́ вы́ нарече́мъ?

Что́ тя, Даніи́ле, провѣща́емъ?* страсте́й искорени́теля* и садотща́теля добродѣ́телей,* и́стинна чудодѣ́лателя* и моли́твенника о грѣ́шныхъ,* духо́въ прогони́теля до́блественнѣйша,* свѣти́льника, благоче́стіемъ сія́юща,* Ду́ха жили́ще, Це́ркве побо́рника.* Моли́ спасти́ся душа́мъ на́шимъ.

Что́ тя́, Даніи́ле, возъимену́емъ?* по́стника, я́ко стра́сти покори́лъ еси́ уму́,* страда́льца, я́ко вся́ку претерпѣ́лъ еси́ лю́тость,* на высоту́ отъ земли́* столпа́ воздвиза́ема,* на ка́мени и́стины водружа́ема,* подви́жника усе́рднѣйша* и врача́ иску́снѣйша.* Моли́ спасти́ся душа́мъ на́шимъ.

Что́ тя, Даніи́ле, ны́нѣ нарече́мъ?* мона́шествующихъ о́бразъ* и воздержа́нія наказа́теля,* украше́ніе вѣ́рныхъ и цѣле́ній самодѣ́теля,* свѣти́льника, су́щимъ во тмѣ́ свѣ́тъ облиста́юща,* а́нгеловъ сограждани́на и равноче́стна,* рая́ жи́теля и небе́снаго человѣ́ка.* Моли́ спасти́ся душа́мъ на́шимъ.

Ины стихи́ры Пресвяты́я Богоро́дицы, гла́съ и подо́бенъ то́йже.
[Аще Аллилу́ія, пою́тся сíи стихи́ры пре́жде.]

Стра́нно та́инство, Чи́стая,* безсѣ́меннаго Твоего́ рождества́, Дѣ́во, и ужа́сно,* превосходя́що вели́чествомъ вся́ку мы́сль человѣ́чу.* Его́же бо не терпя́тъ зрѣ́ти многоочи́тіи,* и чи́ни вси́ святы́хъ а́нгелъ трепе́щутъ,* на́мъ пло́тію породила́ еси́* неотсту́пльша же Отча существа́:* сла́вимъ ро́ждшую Тя́, Богоневѣ́сто.

Кому́ уподо́билася еси́, окая́нная,* къ покая́нію ника́коже возни́чущи, душе́?* и огня́ не ужаса́ешися, злы́хъ жду́щаго,* воста́ни, и Еди́ну къ заступле́нію* ско́рую призови́, и возопíй:* Дѣ́во Ма́ти, моли́* Твоего́ Сы́на и Бо́га на́шего* изба́вити мя́ сѣ́тей льсти́ваго.

Огнь ро́ждши нестерпи́мый,* попаля́ющій грѣхи́* и ороша́ющій вѣ́рныя,* ве́щная безмѣ́рныхъ мои́хъ, Пренепоро́чная, Чи́стая, согрѣше́ній* попали́ моли́твами Твои́ми* и росо́ю иста́явшую страстьми́* ду́шу мою́ прохлади́,* я́ко да Твою́ велегла́сно ми́лость и си́лу* велича́ю, ра́бъ Тво́й.

Сла́ва, и ны́нѣ, богоро́диченъ, гла́съ и подо́бенъ то́йже:

Всѣ́хъ заступле́ніе, Влады́чице,* пучи́ною обурева́емому мнѣ́ тмы́* и лю́тыхъ житія́ треволне́ньми* погружа́ему ми́ при́сно,* ка́плю ми́лости Твоея́ низпосли́,* и ру́ку по́мощи Твоея́ пода́ждь ми́,* и ча́сти сподо́би мя́* избра́нныхъ и пра́ведныхъ,* я́ко бе́здну ро́ждшая — Человѣколю́бца.

Аще ли среда́ или́ пято́къ:
И ны́нѣ, крестобогоро́диченъ, гла́съ и подо́бенъ то́йже:

Агница Агнца я́ко ви́дѣ на дре́вѣ,* просте́рта во́лею, кре́стнѣмъ,* вопія́ше ма́терски,* болѣ́знующи съ пла́чемъ:* Сы́не Мо́й, что́ стра́нное сіе́ видѣ́ніе?* Всѣ́мъ живо́тъ дая́й я́ко Госпо́дь,* ка́ко умерщвля́ешися, Долготерпѣли́ве,* земны́мъ подая́ воскресе́ніе?* сла́влю Твое́ мно́гое, Бо́же мо́й, снизхожде́ніе.

Аще ли, Бо́гъ Госпо́дь... Сла́ва, гла́съ 5. Студи́тово:

Ввѣ́ренный тебѣ́ тала́нтъ отъ Христа́ до́брѣ дѣ́лавъ, преподо́бне о́тче, яви́лся еси́ и по сме́рти де́моновъ прогони́тель и вра́чь разли́чныхъ болѣ́зней, сто́лпъ и утвержде́ніе и гора́ свята́я Це́ркве Христо́вы. Тѣ́мъ тя́ мо́лимъ, Даніи́ле чудотво́рче, ми́ръ испроси́ и душа́мъ на́шимъ ве́лію ми́лость.

И ны́нѣ, богоро́диченъ.

На стихо́внѣ окто́иха.

Тропа́рь, гла́съ 1:

Терпѣ́нія сто́лпъ бы́лъ еси́, ревнова́вый пра́отцемъ, преподо́бне, Іову во страсте́хъ, Іо́сифу во искуше́ніихъ, и безпло́тныхъ жи́тельству сы́й въ тѣлеси́, Даніи́ле, о́тче на́шъ, моли́ Христа́ Бо́га спасти́ся душа́мъ на́шимъ.


НА УТРЕНИ,
Оба кано́на окто́иха и преподо́бнаго на 4, его́же краегране́сіе: Пѣ́сньми честву́ю Даніи́ла Сто́лпника. Іо́сифъ. Гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Пѣ́сньми благовосхвали́ти хотя́щу па́мять твою́, блаже́нне, свѣтоно́сную ми́ зарю́, Даніи́ле, съ небесе́ низпосли́.

Ве́ліе со́лнце и́стинно, о́тче, возсія́лъ еси́ конце́мъ, добродѣ́телей свѣ́тлостію озаря́яй вѣ́рныхъ собра́нія.

Зако́номъ Влады́чнимъ, о́тче, повину́яся, умертви́лъ еси́ воздержа́ніемъ пло́ть и повину́лъ еси́ сію́ ду́ху.

Богоро́диченъ: Ве́сь Человѣ́къ яви́ся, пребы́въ е́же бѣ́ и по воплоще́ніи, и́же изъ Тебе́, Богоро́дице, роди́выйся неизмѣ́нный Госпо́дь.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Жезло́мъ воздержа́нія страсте́й мо́ре, о́тче, растерза́въ, преше́лъ еси́ непотопле́нъ, и го́ру дости́глъ еси́ и́стиннаго безстра́стія, и Бо́гу бесѣ́довалъ еси́ ума́ чистото́ю.

Возше́дъ на высоту́ добродѣ́телей, зна́емь бы́лъ еси́ мíру: на столпѣ́ бо стоя́ возвы́шенъ и сія́ніемъ пресла́вныхъ чуде́съ озаря́яй вѣ́рою къ тебѣ́ притека́ющія.

Водруже́нъ на ка́мени Бо́жія зна́нія, всѣ́ми козньми́ бѣсо́вскими яви́лся еси́ непоколеби́мь: на сто́лпъ у́бо тѣ́ло твое́ на земли́ возвы́силъ еси́, ду́шу же впери́лъ еси́ къ небе́снымъ.

Богоро́диченъ: Изба́ви мя́ страсте́й наше́ствія, Влады́чице, и борю́щія мя́ враги́ ны́нѣ пребори́; утверди́ мя на ка́мени Бо́жія во́ли, ду́шу мою́ просвѣти́, две́ре Боже́ственнаго Свѣ́та.

Сѣда́ленъ, гла́съ 1. Подо́бенъ: Гро́бъ Тво́й.

На сто́лпъ тебе́ сама́го возвы́сивъ, о́тче, воздержа́ніемъ, Даніи́ле, пло́ть изнури́лъ еси́. Тѣ́мъ и Ду́ха сосу́дъ досто́инъ бы́лъ еси́; благода́ть же Боже́ственную воспріе́мъ, треблаже́нне, неду́гъ вся́кій отго́ниши вѣ́рою чту́щихъ па́мять твою́.

Сла́ва, и ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ и сло́ва, непреста́нно моли́ о воспѣва́ющихъ Тя́, пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно сла́вящимъ Тя́.

Крестобогоро́диченъ:

Нескве́рная Агница, Агнца и Па́стыря, повѣ́шена на дре́вѣ, ме́ртва зря́щи, пла́чущи, вѣща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тіе и во́льныя стра́сти, Бо́же Преблагíй?

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Яко свѣтоза́рное со́лнце, о́тче приснопа́мятне, на столпѣ́ блиста́юща ви́дѣлъ еси́ Бо́жія раба́ Симео́на и истека́ющими отъ того́ Боже́ственными свѣтлостьми́ Боже́ственно озари́лся еси́, Даніи́ле, и во слѣ́дъ того́ жи́тельства ходи́лъ еси́.

Де́монскія полки́ ору́жіемъ вѣ́ры побѣди́лъ еси́, струя́ми же потопи́лъ еси́ моли́твъ, па́губу тѣ́хъ, о́тче, отгна́въ, ю́же творя́ху пла́вающимъ, и спа́слъ еси́ вѣ́рою Бо́гу пѣснопою́щія: си́лѣ Твое́й сла́ва, Человѣколю́бче.

Возстолпля́я, о́тче, тебе́ сама́го, всеблаже́нне, всено́щнѣ стоя́лъ еси́, я́ко безпло́тенъ, не высо́ко душе́вное о́ко стяжа́въ и чи́сто, я́коже зерца́ло, Ду́ха зарю́ и Боже́ственная явле́нія чи́стымъ по́мысломъ пріе́мля.

Богоро́диченъ: Зако́ни въ Тебѣ́ естества́ обновля́ются: Законода́вца бо Сло́ва родила́ еси́, па́че вины́ я́ко и́стинно, Пречи́стая, и Сло́ва, безслове́сія изба́вльшаго ро́дъ человѣ́ческій, вѣ́рно пѣснопою́щихъ: си́лѣ Твое́й сла́ва, Человѣколю́бче.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Да безсме́ртныя сла́вы получи́ши, плотска́я умертви́лъ еси́ жела́нія, о́тче, и страсте́й стремле́нія обузда́лъ еси́ воздержа́нія труды́, и рѣка́ чуде́съ яви́лся еси́, и исто́чникъ врачева́ній, приснопа́мятне.

Еже хожда́ше стезею́, о́тче, на земли́, Симео́нъ чу́дный, во у́жасѣ, блаже́нне, бы́вшу тебѣ́ яви́ся, показу́я тебѣ́ со двѣма́ а́нгелы, — гряди́, — вопія́, — и ста́ни у мене́, къ Бо́гу возвыша́яся благода́тію.

Просвѣща́емь заре́ю, о́тче, невече́рнею и Боже́ственнымъ осія́ніемъ, бѣсо́вскій мра́къ и страсте́й мглу́ отгна́лъ еси́ и яви́лся еси́ сто́лпъ свѣтови́дѣнъ и лѣ́ствица, и́стинно къ Бо́гу вѣ́рныя возводя́щая.

Богоро́диченъ: Влады́ку ро́ждшая, яви́лася еси́ превы́шши го́рнихъ си́лъ и земны́хъ естество́ обожи́ла еси́, Отрокови́це Богоневѣ́стная. Тѣ́мъ Богоро́дицу Тя́ всеи́стинную душе́ю и язы́комъ, вѣ́рніи, Дѣ́во, сла́вимъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Умъ тво́й къ Бо́гу приближе́ніемъ облиста́емь, нея́тенъ сла́достей огне́мъ, о́тче, пребы́сть, и страсте́й го́рншій, и къ пло́ти пристра́стія вы́шшій.

Во́дъ животво́рныхъ дарова́ній Ду́ха испо́лншися твоя́ душа́, богому́дре всеблаже́нне, рѣ́ки источи́ врачева́ній и́стинно, то́ки страсте́й суша́щія.

Богоро́диченъ: Тя́, Предста́тельницу, вѣ́рніи, и стѣ́ну вси́ стяжа́хомъ, во глубинѣ́ злы́хъ и молвѣ́ скорбе́й при́сно бѣ́дствующе, Богоро́дице, еди́на земны́хъ прибѣ́жище.

Конда́къ, гла́съ 8. Подо́бенъ: Яко нача́тки.

Якоже звѣзда́ многосвѣ́тлая, ты́, возше́дъ, блаже́нне, на сто́лпъ, мíръ просвѣти́лъ еси́ преподо́бными дѣ́лы твои́ми и тму́ пре́лести отгна́лъ еси́, о́тче. Тѣ́мже мо́лимъ тя́: и ны́нѣ облиста́й въ сердца́хъ ра́бъ твои́хъ незаходя́щій свѣ́тъ ра́зума.

Икосъ:

Пѣ́снь скве́рна къ похвале́нію по́двигъ твои́хъ, о́тче, прино́сится: не и́мамъ бо чи́сто се́рдце мое́, я́ко сіе́ сра́мно окаля́хъ, но пода́ждь ми́ сло́во, свя́те, чи́стѣ воспѣ́ти твое́ житіе́, ему́же удиви́шася вои́стинну и а́нгели, и́бо бы́лъ еси́, я́коже безтѣле́сенъ, пріе́мъ свѣ́тъ незаходя́щій ра́зума.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Чи́ни а́нгельстіи твоему́ стоя́нію удиви́шася, всеблаже́нне богоно́се: съ тѣ́ломъ бо тѣ́хъ жи́тельство воспріе́мъ, взыва́лъ еси́: благослове́нъ еси́, Го́споди Бо́же, во вѣ́ки.

Высото́ю невеще́ственнаго жи́тельства и проро́чества сія́я свѣтозаре́ніемъ, врачева́ній на́мъ облиста́лъ еси́ лучи́, благоче́стно чту́щимъ тя́, Даніи́ле чудоно́сне.

Разрѣши́ страсте́й мои́хъ мглу́ свѣ́тлостію, всеблаже́нне, твоея́ моли́твы и на стезю́ жи́зни наста́ви, вопію́ща: благослове́нъ еси́, Го́споди Бо́же, во вѣ́ки.

Богоро́диченъ: Ми́лостива мнѣ́ бу́ди, Дѣ́во, и уя́звлена мя́ ору́жіемъ грѣха́ врачевство́мъ Твоея́ моли́твы излѣчи́, благослове́нъ, зову́ща, Пло́дъ чре́ва Твоего́.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Жела́ній коне́чное, до́брыхъ кра́йнѣйшее, о́тче, богоно́се, извѣ́стно дости́глъ еси́, кри́лы облегчева́яся добродѣ́тельныхъ дѣя́ній, и со безтѣле́сными, Даніи́ле, взыва́еши: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Бо́жія тя́ си́ла проявле́ннѣ укрѣпи́вши, терпѣ́ти зимы́ злосту́жное сотвори́, и со́лнца зно́й, и гни́лости твоея́ пло́ти, и отъ нея́ бы́вшихъ черве́й озлобле́ніе, вопію́ща: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Но́вый Іовъ ты́ яви́лся еси́, Даніи́ле досточу́дне, мно́жествомъ искуше́ній обдержи́мъ и скорбе́й, Дави́дову кро́тость, и Іа́ковле беззло́біе, и цѣлому́дріе Іо́сифово подража́лъ еси́, вопія́ благода́рственнѣ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Богоро́дицу, Влады́чице Всесвята́я, му́дрствующіи Тя́, глаго́ломъ послѣ́дующе Твои́мъ, Всепѣ́тая, Тя́ ны́нѣ блажи́мъ, я́ко Бо́га блаже́ннаго родила́ еси́ на́мъ, Его́же, во дву́ существа́хъ, еди́нѣй же ѵпоста́си, воспѣва́юще, вопіе́мъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Се́, тебѣ́ две́ри небе́сныя отверзо́шася, преста́вльшемуся и тече́ніе сконча́вшему, о́тче, и а́нгеловъ чи́ни воспрія́ша, Вѣнцеда́вецъ же Христо́съ сла́вою вѣнча́ тя́ пра́вды. Его́же пою́ще, вѣ́рніи, велича́емъ.

Яко кри́нъ, о́тче, се́льный въ раи́ воздержа́нія процвѣ́лъ еси́ и, я́ко кипари́съ, на высоту́ возвы́сился еси́ соверше́нства, я́ко ма́слина, псало́мски яви́лся еси́, ли́ца и сердца́ на́ша умаща́я еле́емъ болѣ́зней твои́хъ.

Сто́лпъ тя́, основа́ніемъ добродѣ́телей утвержда́емь, тва́рь позна́, забра́ло непоколеби́мо, чуде́съ исто́чникъ, приста́нище благоути́шное, врачева́ній сокро́вище, прія́телище Ду́ха. Тѣ́мъ твою́ дне́сь, Даніи́ле, сотворя́емъ па́мять.

Со́лнца дне́сь на́мъ возсія́ свѣтлѣ́е, преподо́бне, боже́ственная па́мять твоя́, вѣ́рныхъ сердца́ просвѣща́ющи свѣ́томъ пра́вды, мра́къ же отгоня́щи душетлѣ́нныхъ страсте́й: ю́же соверша́юще, благоче́стно воспѣва́емъ тя́.

Богоро́диченъ: Пощади́ мя́, Спа́се, рожде́йся и сохрани́въ Ро́ждшую Тя́ нетлѣ́нну по рождествѣ́, егда́ ся́деши суди́ти дѣла́ моя́, беззако́нія презира́я и грѣхи́ моя́, я́ко безгрѣ́шенъ, я́ко Бо́гъ, Ми́лостивъ и Человѣколю́бецъ.

Свѣти́ленъ окто́иха. Сла́ва, свята́го. Подо́бенъ: Свѣ́те Неизмѣ́нный.

Твоя́ по́двиги сто́лпъ вопіе́тъ гла́сы неглаго́льными, стра́ждуща безпокро́вно ка́чествы проти́вными, отону́дуже, я́ко свѣти́льникъ свѣтоно́сенъ, просія́лъ еси́, о́тче, озаря́я всю́ тва́рь.

И ны́нѣ, богоро́диченъ:

Тя́ пѣ́сньми немо́лчными блажи́мъ, Дѣ́во, я́ко отъ Тро́ицы Еди́наго родила́ еси́, Богоро́дице, и но́сиши боже́ственными рука́ми Пресу́щное Сло́во, невра́щно и неизмѣ́нно.

На стихо́внѣ окто́иха.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 86 об. – 90 об.

/ Къ оглавленію раздѣла /


Наверхъ / Къ титульной страницѣ

0