Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 10-й де́нь.
Па́мять свята́го Іоа́нна, де́спота Се́рбскаго.

НА МАЛѢЙ ВЕЧЕРНИ,
На Го́споди воззва́хъ: поста́вимъ стихи́ры на 4, гла́съ 1. Подо́бенъ: Прехва́льніи му́ченицы.

Весели́ся, свята́я митропо́ліе, хра́ме Бо́жія Ма́тере, иму́щи въ себѣ́ многоцѣ́нное сокро́вище, мо́щи но́ваго сего́ на́шего предста́теля и моле́бника къ Бо́гу, благочести́ваго сего́ Іоа́нна, и́же вы́ну предстои́тъ Ему́, и зри́тъ неизрече́нную Его́ сла́ву, и мо́лится при́сно дарова́ти душа́мъ на́шимъ ми́ръ и ве́лію ми́лость.

Возра́довашася пра́ведныхъ ли́цы, удиви́шася наро́ды се́рбстіи, зря́ще сію́ пра́ведную ду́шу, я́ко многосвѣ́тлую лучу́, отъ земли́ на не́бо возноси́му и покланя́ющуся Боже́ственному престо́лу, мо́лимся: и та́мо о на́съ не преста́й моля́ся Благодѣ́телю Бо́гу дарова́ти душа́мъ на́шимъ ми́ръ и ве́лію ми́лость.

Сла́ва, гла́съ 6:

Пріиди́те, богосо́бранніи собо́ри, кра́сный ли́че и́ноческій, пріиди́те и вси́ се́рбстіи наро́ди, ста́ріи же и ю́ніи, бога́тіи и ни́щіи, стеце́мся въ це́рковь Бо́жія Ма́тере, идѣ́же лежи́тъ многоцѣле́бное тѣ́ло пра́веднаго Іоа́нна, свѣ́томъ вселе́нную озаря́ющее. Се́й бо блаже́нный разли́чная дарова́нія исцѣле́ній, я́ко и́скры, испуща́етъ. Тѣ́мъ и мы́ возопіе́мъ къ нему́, си́це глаго́люще: ра́дуйся, благоче́стія ца́рская о́трасле, ско́рый на́шъ помо́щниче и те́плый засту́пниче, я́ко вели́каго да́ра сподо́бился еси́ здѣ́ и во о́номъ вѣ́цѣ. Тѣ́мже мо́лимся: сподо́би и на́съ тѣле́снаго здра́вія и душе́внаго спасе́нія моли́твами твои́ми, преблаже́нне.

И ны́нѣ, богоро́диченъ:

Чи́стая, еди́на Бо́га ро́ждшая, душе́вныхъ прегрѣше́ній изба́ви мя́, Дѣ́во, молю́ся, и спаси́ мя, умерщвле́ннаго: Ты́ бо наде́жда еси́ ненадѣ́ющихся и Помо́щница мíра, иму́щи, е́же мощи́, Отрокови́це, я́ко Ма́ти Госпо́дня, не пре́зри мое́ моле́ніе, ниже́ оста́ви, всегосподова́нная Влады́чице, но, я́ко Благолюби́вая, спаси́ мя.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ Пресвята́го и Животворя́щаго Ду́ха поспѣше́ніемъ и благода́тію яви́лся еси́, Іоа́нне, тѣ́мже и мы́, соше́дшеся, Тому́ воспои́мъ пѣ́снь.

Сти́хъ: Пра́ведникъ, я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится.

Ра́дуйся, царе́й правосла́вныхъ похвало́, во́иновъ соблюде́ніе, ва́рваровъ побѣжде́ніе, сиро́тъ и вдови́цъ и люде́й твои́хъ засту́пниче те́плый.

Сти́хъ: Насажде́ни въ дому́ Госпо́дни, во дво́рѣхъ Бо́га на́шего [процвѣту́тъ].

Пріими́ ны́нѣ пѣ́ніе люде́й твои́хъ, богоблаже́нне, и моля́щимся ти́ у Христа́ испроси́ отъ грѣхо́въ избавле́ніе, да ублажа́ютъ тя́, приснопа́мятне.

Сла́ва гла́съ 3:

Кто́, ны́нѣ зря́, не удиви́тся богодарова́нному тебѣ́ воспрія́тію, прехва́льне? Блаже́нна бо имену́ю тя́, я́ко блаже́нство наслѣ́довалъ еси́ и измла́да за́повѣди Христа́ Бо́га испо́лнилъ еси́, Того́ неотло́жно взыску́я, сиро́тъ пита́тель, плѣ́нныхъ свободи́тель бы́лъ еси́, тѣ́мъ вше́лъ еси́ въ ра́дость Го́спода твоего́. Ему́же со а́нгелы предстоя́, моли́ о вѣ́рою творя́щихъ па́мять твою́.

И ны́нѣ, богоро́диченъ:

Подъ Твое́ держа́вное предста́тельство прибѣга́ющіи при́сно, Богороди́тельнице Дѣ́во, страсте́й мучи́тельства и лука́выхъ помышле́ній избавля́ются. Тѣ́мже рабы́ Твоя́ спаси́ отъ вся́каго вре́да и тли́, благопрія́тною Твое́ю моли́твою изба́вивши, я́ко Благосе́рдна, да вѣ́рою вси́ благослови́мъ держа́ву Твою́, Влады́чице.

[Тропа́рь свято́му [зри́ на вели́цѣй вече́рни]. Сла́ва, и ны́нѣ, богоро́диченъ.]



НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ. На Го́споди воззва́хъ:] стихи́ры [на 8], гла́съ 2. Подо́бенъ: Кíими похва́льными.

Кíими златокова́нными вѣнцы́ увязе́мъ Іоа́нна, блаже́ннаго новопроявле́ннаго, благоче́стія побо́рника, свѣти́льника незаходи́маго, со́лнце мíрови, пра́вды пра́вило, весе́ліе земли́ Се́рбскія и оби́тели своея́ свѣ́тлое украше́ніе, си́рыхъ и оби́димыхъ засту́пника, столпа́ непоколеби́маго? Его́же ра́ди шата́нія враго́въ Христо́съ низложи́, имѣ́яй ве́лію ми́лость. [Два́жды.]

О, ка́ко недосто́йными устна́ми воспое́мъ Іоа́нна прему́драго, ева́нгельскихъ слове́съ подража́теля, и роди́телемъ свои́мъ въ послуша́ніи вѣнца́ свѣтлосія́тельнаго, и ста́ду своему́ по кончи́нѣ неотъе́млема назира́теля, Всечестны́я Тро́ицы моли́твенника, чуде́съ мно́гихъ пода́теля оби́льна? Мо́лится бо о душа́хъ на́шихъ.

Свѣ́тлое украше́ніе це́ркви Бо́жія Ма́тере твоя́ мо́щи яви́шася, преблаже́нне Іоа́нне, сія́ютъ бо па́че зла́та и сапфи́ра, созыва́юще на́съ на духо́вное торжество́, и просвѣща́етъ ду́ши и тѣлеса́ всѣ́хъ, вѣ́рою приходя́щихъ къ нему́, и мо́лится Го́сподеви поми́ловати лю́ди своя́.

Ины стихи́ры, гла́съ 8. Подо́бенъ: О, пресла́внаго чудесе́!

О, пресла́внаго чудесе́! Ка́ко многовре́менное тече́ніе лѣ́тъ не истли́ многоцѣле́бное сокро́вище, тѣ́ло твое́, преблаже́нне Іоа́нне? Бо́гъ, Его́же отъ младе́нства возлюби́лъ еси́, То́й тя́ ны́нѣ прославля́етъ вои́стинну въ похвалу́ и утвержде́ніе вѣ́ры на́шея. Мы́ же, обстоя́ще ра́ку моще́й твои́хъ, зря́ще зна́менія и чудеса́, дивя́щеся, вопіе́мъ: о, кра́снаго твоего́ дарова́нія, свя́те, и́мже Христо́съ одари́лъ тя́ е́сть, я́ко Благоутро́бенъ. [Два́жды.]

О, какова́го дарова́нія отъ Спа́са причасти́хомся и обогати́хомся вои́стинну! Ца́ріе и святи́теліе, бога́тіи и ни́щіи, ра́дуйтеся, и свѣ́тлость дне́сь торжество́ пра́зднуимъ о́бщаго на́шего засту́пника, Іоа́нна пра́веднаго. Воспо́йте, пусты́нніи безмо́лвницы и про́стіи лю́діе: о, неизрече́ннаго Твоего́ милосе́рдія, Влады́ко Го́споди, и́мже просла́вилъ еси́ Тебе́ сла́вящія.

О, пресла́внаго твоего́ воспрія́тія, свя́те, е́же отъ Бо́га получи́лъ еси́. Кто́, зря́, не удиви́тся въ тебѣ́, блаже́нне Іоа́нне? Съ роди́тели бо твои́ми въ ра́йстѣй пи́щи весели́шися, я́ко отню́дъ невозмо́же тебе́, блаже́нне, ни цвѣ́тъ ю́ности, ни земна́го во́инства попече́ніе, я́же къ Бо́гу любве́ отлучи́ти, пра́вдою бо и ми́лостынями украша́яся. О, кра́снаго твоего́ селе́нія, свя́те, и́мже тя́ Христо́съ Бо́гъ прія́тъ, веселя́щася.

Сла́ва, гла́съ 6:

Ра́дуйся, Са́вво святи́телю, Правосла́вія наста́вниче и чистотѣ́ учи́телю. Ра́дуйся, Симео́не, ко́рене благоче́стія. Ра́дуйся, Стефа́не де́споте, изъ тебе́ бо произы́де красе́нъ пло́дъ духо́внаго наслажде́нія, и́мже пита́ется Це́рковь Христо́ва и наслажда́ется. Ра́дуйся, Макси́ме преблаже́нне, святи́телей удобре́ніе, и́ноковъ и бѣльце́въ и всѣ́хъ вѣ́рныхъ свѣ́тлое просвѣще́ніе. Ра́дуйся, Ангели́но преподо́бная, лозо́ честна́я, отъ тебе́ бо прозябе́ намъ гро́здъ виногра́да спасе́ннаго, отъ него́же пита́ющеся, услажда́емъ ду́ши на́ша. Ра́дуйся, Іоа́нне, це́ркве Богома́тере свѣ́тлое украше́ніе и земли́ Се́рбскія утвержде́ніе; ра́дуйся, стра́нныхъ и безкро́вныхъ покрови́телю; ра́дуйся, вдови́цъ и сиро́тъ пита́телю; ра́дуйся, похвало́ вѣ́ры на́шея и те́плый моли́твениче о душа́хъ на́шихъ.

И ны́нѣ, богоро́диченъ:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ, проки́менъ дне́ и чте́нія.

При́тчей чте́ніе. [Глава́ 3.]

Сы́не, мои́хъ зако́новъ не забыва́й, глаго́лы же моя́ да соблюда́етъ твое́ се́рдце, долготу́ бо житія́, и лѣ́та жи́зни, и ми́ръ приложа́тъ тебѣ́. Ми́лостыни и вѣ́ры да не оскудѣва́ютъ ти́, обложи́ же я́ о твое́й вы́и, напиши́ я́ на скрижа́ли се́рдца твоего́, и обря́щеши благода́ть, и промышля́й до́брая предъ Го́сподемъ Бо́гомъ и человѣ́ки. Бу́ди, надѣ́яся всѣ́мъ се́рдцемъ на Бо́га, о твое́й же прему́дрости не возноси́ся, во всѣ́хъ путе́хъ твои́хъ познава́й ю́, да исправля́етъ пути́ твоя́, нога́ же твоя́ да не преткне́тся, не бу́ди му́дрый у себе́, бо́йся же Бо́га и уклоня́йся отъ вся́каго зла́. Тогда́ исцѣле́ніе бу́детъ тѣлеси́ твоему́ и попече́ніе косте́мъ твои́мъ. Чти́ Го́спода отъ твои́хъ пра́ведныхъ трудо́въ и нача́тствуй Ему́ отъ твои́хъ плодо́въ пра́вды. Да напо́лнятся сокро́вища твоя́ насыще́нія пшени́цы, вино́ же точи́ла твоя́ да источа́ютъ.

При́тчей чте́ніе. [Глава́ 10.]

Сы́нъ прему́дрый весели́тъ отца́, сы́нъ же безу́мный опечаля́етъ ма́терь. Не по́льзуютъ сокро́вища беззако́нныхъ, пра́вда же изба́витъ отъ сме́рти. Не убіе́тъ гла́домъ Госпо́дь ду́шу пра́веднаго, живо́тъ же нечести́выхъ отврати́тъ, убо́жество му́жа смиря́етъ, ру́ки же му́жественныхъ обогаща́ются, сы́нъ нака́занный му́дрый бу́детъ, безу́мный же слуго́ю употреби́тся. Спасе́ся отъ зно́я сы́нъ у́мный, вѣтротлѣ́ненъ же быва́етъ въ жа́тву сы́нъ беззако́нный. Благослове́ніе Госпо́дне на главѣ́ пра́веднаго, уста́ же нечести́выхъ покры́етъ пла́чъ безвре́менный. Па́мять пра́веднаго съ похвала́ми, и́мя же нечести́выхъ угаса́етъ. Му́дрый се́рдцемъ пріи́метъ за́повѣди, непокрове́нный же, устна́ма остроптѣва́я, поползне́тся. Иже хо́дитъ про́сто, хо́дитъ, надѣ́яся, развраща́яй же пути́ своя́ позна́ется. Намиза́яй о́комъ съ ле́стію собира́етъ муже́мъ печа́ли, облича́яй же со дерзнове́ніемъ миротвори́тъ. Исто́чникъ жи́зни въ руцѣ́ пра́веднаго, уста́ же нечести́выхъ покры́етъ па́губа. Нена́висть воздвиза́етъ сва́ръ, вся́ же нелюбопри́тельныя покрыва́етъ любо́вь. Иже отъ усте́нъ произно́ситъ прему́дрость, жезло́мъ біе́тъ му́жа безсе́рдна. Му́дрый скры́етъ чу́вство, уста́ же безсту́днаго приближа́ются сокруше́нію, стяжа́ніе бога́тыхъ гра́дъ тве́рдый, сокруше́ніе нечести́выхъ убо́жество. Дѣла́ пра́ведныхъ живо́тъ творя́тъ, пло́дове же нечести́выхъ грѣхи́. Пути́ жи́зни храни́тъ наказа́ніе, наказа́ніемъ же необличе́нный причаща́ется. Покрыва́ютъ вражду́ устны́ пра́ведныя, износя́щіи же укори́зны немы́сленѣйшіи су́ть. Отъ многосло́вія не избѣжи́ши грѣха́, щадя́й же устнѣ́, разу́менъ бу́деши, сребро́ раждеже́нное язы́къ пра́веднаго, се́рдце же нечести́ваго исче́знетъ. Устнѣ́ пра́ведныхъ вѣ́дятъ высо́кая, безу́мніи же въ ску́дости сконча́ются. Благослове́ніе Госпо́дне на главѣ́ пра́веднаго, сіе́ обогаща́етъ, и не приложи́тся ему́ печа́ль въ се́рдцы.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2. Самогла́сны:

Лику́й ны́нѣ и взыгра́й, но́вый Изра́илю, я́коже иногда́ богооте́цъ проро́къ, та́ко и мы́ дне́сь, ра́ки ва́ша обстоя́ще многоцѣле́бныя, не скрижа́ли ка́менныя въ себѣ́ иму́щія, но сокро́вища четверосія́тельная, заря́ми па́че со́лнца осіява́юща и вся́ чу́вствія на́ша проходя́щая воня́ми мѵ́рными облагоуха́ющая: оте́цъ съ сы́номъ, ма́ти съ ча́домъ прославля́ютъ Бо́га, просла́вльшаго и́хъ. Тѣ́мже усе́рдно возопіе́мъ къ ни́мъ: благíи на́ши засту́пницы, пріиди́те ко Христу́ Бо́гу, о на́съ моля́щеся, да спасе́тъ ду́ши на́ша.

Гла́съ 3:

Пріиди́те, славеносе́рбскаго наро́да собо́ри, пріиди́те, ма́тери съ ча́ды, припаде́мъ ма́тери на́шей, ско́рой помо́щницѣ, преподо́бной Ангели́нѣ, и пѣ́сненными похвала́ми воспои́мъ ю́, я́ко въ послѣ́днее вре́мя въ ма́терехъ просла́вися, таково́е сокро́вище отъ утро́бы своея́ произне́сши, и́мже мы́ дне́сь обогати́хомся, многоцѣле́бными тѣлесы́ Макси́ма блаже́ннаго и Іоа́нна преподо́бнаго, и возопіи́мъ къ ни́мъ: о прехва́льніи, моли́теся Христу́ Бо́гу о на́съ, да спасе́тъ ду́ши на́ша.

Гла́съ 4:

Весели́ся и лику́й, Си́рміе со окре́стными страна́ми, дне́сь бо предлага́етъ на́мъ трапе́зу духо́вную те́плый на́шъ засту́пникъ Іоа́ннъ де́спотъ, не бра́шно и питіе́, ни снѣ́дей тли́тельныхъ иму́щи, но слаждча́е ме́да благоуха́нное его́ тѣ́ло. Къ нему́ же прини́кнувше, чу́вства на́ша услади́мъ, душе́вная вку́пѣ и тѣле́сная, почерпа́юще вино́ весе́лія отъ исто́чника приснотеку́щаго, и мо́лимся ему́: да помо́литъ Христа́ Бога́ и спасе́тъ ду́ши на́ша.

Гла́съ 6:

Богопрія́тне пребога́те блаже́нне Іоа́нне, отъ ложе́снъ порожде́ніе свя́то, Бо́гови нарече́нъ еси́, благи́ми дѣ́лы свѣ́тло украси́лся еси́, ми́лостынями, чистото́ю и пра́вдою сосу́дъ Свята́го Ду́ха бы́лъ еси́, и́мже дѣ́йствуеши пресла́вная чудеса́ вѣ́рою приходя́щимъ къ ра́цѣ моще́й твои́хъ и мо́лишися о душа́хъ на́шихъ.

Гла́съ 7:

Іоа́нне боговѣнча́нне, ты́ яви́лся еси́ царе́й держа́ва свѣтоно́сна, во́ехъ похвала́ всече́стна, христіа́нъ всѣ́хъ побо́рникъ непобѣди́мъ, о ни́хже жи́въ сы́й, ду́шу твою́ полага́я си́це, и по сме́рти неотсту́пно оте́чество твое́ сохраня́й и правосла́внымъ во́емъ на́шимъ на ага́ряны посо́бствуй моли́твами твои́ми.

Гла́съ 8:

Красна́ похвала́ еси́ и весе́ліе земли́ Се́рбскія и украше́ніе, святы́й хра́ме Бо́жія Ма́тере, имѣ́я въ себѣ́ мо́щи благочести́ваго Стефа́на и Макси́ма блаже́ннаго, преподо́бныя Ангели́ны, Іоа́нна пра́веднаго. Тѣ́мъ ра́достно се́й пра́здникъ духо́вно восхва́лимъ, и пѣ́сньми почти́мъ, и мо́лимся я́ко те́плымъ на́шимъ засту́пникомъ, да мо́лятся о душа́хъ на́шихъ.

Сла́ва, гла́съ 5:

Востру́бимъ трубо́ю пѣ́сней и гла́сомъ ра́достнаго весе́лія пра́здникъ се́й воспои́мъ, свы́ше бо небеса́ ра́дуются и земля́ весели́тся, человѣ́комъ же сердца́ игра́ютъ. Ца́ріе, стецы́теся, друголю́біе показу́юще, рабы́, Влады́ку воспо́йте. Да дивя́тся язы́цы новода́ннѣй на́мъ благода́ти. Да красу́ется свята́я Це́рковь Бо́жія Ма́тере, имѣ́ющи въ нача́лѣ Симео́на и Са́вву утвержде́ніе, напослѣ́докъ же Стефа́на де́спота и преподо́бную Ангели́ну, я́же породи́ста на́мъ ро́ждіе виногра́да спасе́ннаго, Макси́ма блаже́ннаго и Іоа́нна пра́ведна. Къ ни́мъ у́бо припаде́мъ со слеза́ми и возопіе́мъ: о те́пліи на́ши засту́пницы и ско́ріи помо́щницы, убѣди́те роди́тели своя́ и вку́пѣ умоли́те Влады́ку Христа́: мона́хомъ и бѣльце́мъ, ста́рымъ и ю́нымъ, му́жемъ и жена́мъ душа́мъ спасе́ніе и тѣла́мъ здра́віе дарова́ти и ве́лію ми́лость.

И ны́нѣ, богоро́диченъ:

Хра́мъ и Две́рь еси́, Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Па́че со́лнечныя лучи́ просія́лъ еси́, преблаже́нне Іоа́нне, Се́рбскія земли́ свѣти́ло яви́лся еси́, зна́меньми же и чудесы́ просвѣща́еши лю́ди твоя́. Тѣ́мъ вси́, соше́дшеся, Христа́ воспое́мъ, спаса́ющаго на́съ отъ бѣ́дъ моли́твами твои́ми, свя́те.

Сти́хъ: Пра́ведникъ, я́ко фи́никсъ процвѣте́тъ, [я́ко ке́дръ, и́же въ Лива́нѣ, умно́жится].

Свѣ́томъ Боже́ственнымъ облиста́я, чудодѣ́йствуеши непреста́нно: Це́рковь твою́ зна́меньми уясня́еши, и лю́ди твоя́ отъ напа́стей избавля́еши, и ра́достію весели́ши. И ны́нѣ Христа́ Бо́га моли́, всехва́льне Іоа́нне, отъ бѣ́дъ изба́витися душа́мъ на́шимъ.

Сти́хъ: Насажде́ни въ дому́ Госпо́дни, [во дво́рѣхъ Бо́га на́шего процвѣту́тъ].

Земля́ ва́ша Си́рмія и ли́къ богосо́бранный, мона́си и бѣльцы́ чудеса́ твоя́ вселе́ннѣй возвѣща́ютъ, преблаже́нне, и свята́я Це́рковь Бо́жія Ма́тере, крася́щися, воспѣва́етъ велехва́льными пѣ́сньми. Христо́съ, бо тя́ свѣти́льника лю́демъ твои́мъ дарова́, просвѣща́юща и освяща́юща ду́ши на́ша.

Сла́ва, гла́съ 6:

Пріиди́те ны́нѣ, благоимени́тіи собо́ри, кра́сный ли́че и́ноческій съ благочести́выми людьми́, вку́пѣ же и святи́тели съ христолюби́вымъ мно́жествомъ во́инственныхъ чино́въ, свѣ́тло воспои́мъ пѣ́сньми новода́ннѣй на́мъ благода́ти ско́раго предста́теля и те́плаго засту́пника на́шего, Це́ркве Бо́жія Ма́тере и украше́ніе, и и́нокомъ ра́дованіе, и земли́ Се́рбскія окормле́ніе; пріиди́те, и припаде́мъ ему́, моля́щеся, я́ко да убѣди́тъ роди́тели своя́, да предста́нутъ Влады́цѣ Христу́, о на́съ моля́щеся, во е́же и на́мъ сподо́битися весе́лія вѣ́чнаго.

И ны́нѣ, богоро́диченъ:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

[На благослове́ніи хлѣ́бовъ:] Тропа́рь, гла́съ 4:

Ди́венъ, творя́й пресла́вная чудеса́ и прославля́яй по кончи́нѣ сла́вящія Тя́, нетлѣ́нная тѣлеса́ и́хъ явля́я и чудодѣ́йствіи лю́ди обогаща́я во сла́ву свята́го и́мене Своего́, дарова́вый на́мъ тѣ́ло уго́дника Своего́ Іоа́нна, моля́щагося о душа́хъ на́шихъ. [Два́жды.]

И Богоро́дице Дѣ́во... [Еди́ножды].



НА УТРЕНИ,
[На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Красу́йся и лику́й, свята́я це́ркви Бо́жія Ма́тере, въ не́йже лежи́тъ пречестно́е тѣ́ло Іоа́нна пра́веднаго и всѣ́мъ, къ нему́ приходя́щимъ, ми́лостивно подае́тъ разли́чная исцѣле́нія. Сего́ ра́ди и мы́ вопіе́мъ ему́: моли́твами, свя́те, твои́ми исцѣли́ неду́ги и болѣ́зни на́ша и отъ вся́кія вражды́ на́съ изба́ви и искуше́ній, да вѣ́рою и любо́вію па́мять твою́ почита́емъ. [Два́жды.]

Сла́ва, и ны́нѣ, богоро́диченъ:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по рождествѣ́ па́ки Дѣ́вою пребыва́етъ.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное.

Яко луча́ свѣтоза́рная, отъ за́пада прише́дъ, вселе́нную просвѣти́лъ еси́ и лю́ди оте́чества твоего́ расточе́нныя собра́лъ еси́, пра́вдою и ми́лостынею Святы́я Тро́ицы въ себѣ́ до́мъ сотвори́лъ еси́; сего́ ра́ди и по успе́ніи твое́мъ отъ мно́гихъ лѣ́тъ обрѣто́шася во гро́бѣ нетлѣ́нны мо́щи твоя́. Тѣ́мже и мы́, припа́дающе, мо́лимся: моли́ Христа́ Бо́га грѣхо́мъ оставле́ніе пода́ти служи́телемъ твои́мъ, прославля́ющимъ па́мять твою́. [Два́жды.]

Сла́ва, и ны́нѣ, богоро́диченъ:

Неискусобра́чная Невѣ́сто, Приснодѣ́во, со преподо́бными и пра́ведными восхваля́емъ Тя́, я́ко Тобо́ю на́мъ вели́чія сотвори́ Сы́нъ Тво́й и Бо́гъ на́шъ, Иже въ ложесна́ Твоя́ вмѣсти́тися благоизво́ли, да отъ ле́сти свободи́тъ ро́дъ на́шъ.

По поліеле́и сѣда́ленъ, гла́съ 8. Подо́бенъ: Повелѣ́нное та́йно.

Отъ млады́хъ ногте́й произбра́ тя Госпо́дь въ небе́сное селе́ніе, благоро́дне Іоа́нне, отъ Вседержи́теля Бо́га нетлѣ́нныя по́чести воспрія́лъ еси́ и, осія́нъ еси́ отъ Него́ Боже́ственнымъ свѣтозаре́ніемъ, вы́ну насыща́ешися ра́дости и весе́лія, тѣ́мже моли́ся за твое́ оте́чество и за вся́ лю́ди, въ правосла́віи живу́щія и твоя́ мо́щи вѣ́рою почита́ющія. [Два́жды.]

Сла́ва, и ны́нѣ, богоро́диченъ:

Со́лнца разу́мнаго родила́ еси́, Пречи́стая, отъ Него́же вся́ ви́димая и неви́димая просвѣща́ются и те́рніе грѣхо́вное искоренива́ется. Тѣ́мъ и а́зъ, убо́гій и недосто́йный ра́бъ Тво́й, молю́ся Ти́: просвѣти́ мра́къ души́ моея́ и сподо́би получи́ти ми́лость въ де́нь стра́шнаго испыта́нія, Твои́ми ма́терними къ Нему́ моли́твами.

Степе́нна 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе отъ Матѳе́я, зача́ло 10.

По 50-мъ псалмѣ́ стихи́ра, гла́съ 6:

Пріиди́те, богосо́бранніи правосла́вныхъ собо́ри, духо́вно возвесели́мся, ли́къ соста́вльше, рука́ми воспле́щемъ, пѣ́сньми похва́льными воспое́мъ, и, святы́мъ моще́мъ его́ приступа́юще, лобза́емъ, и, со слеза́ми мольбу́ смѣси́вше, къ нему́ си́це рце́мъ: Іоа́нне пра́ведне, на́съ, мона́хи и бѣльцы́, и́хже собра́лъ еси́ здѣ́, собери́ и та́мо, въ Ца́рствіи небе́снѣмъ.

Кано́нъ Богоро́дицѣ со ирмосо́мъ на 6, гла́съ 8, ирмо́съ: Во́ду проше́дъ, я́ко су́шу... И свято́му два́ кано́на на 8, гла́съ 1.

Пѣ́снь 1.

Ирмо́съ: Го́рькія рабо́ты изба́влься Изра́иль, непроходи́мое про́йде, я́ко су́шу, врага́ зря́ потопля́ема, пѣ́снь я́ко Благодѣ́телю пое́тъ Бо́гу, чудодѣ́ющему мы́шцею высо́кою, я́ко просла́вися.

Пріиди́те, ны́нѣ предпра́зднственная возгласи́мъ, съ волхвы́ Христу́ да́ры принесе́мъ и со а́нгелы возопіе́мъ: Свя́тъ еси́, Го́споди.

Отца ва́шего по отше́ствіи, благочести́ваго Стефа́на де́спота, ма́ти ва́ша Ангели́на преподо́бная, наказу́ющи ва́съ, жа́лостно ва́мъ глаго́лаше: ны́нѣ, ча́дца моя́, оте́цъ ва́шъ къ Бо́гу пресели́ся, кто́ отны́нѣ воско́рмитъ вы́? То́чію надѣ́йтеся на Го́спода Бо́га, не забу́детъ бо Свои́хъ рабо́въ, оба́че учи́теся со а́нгелы зва́ти: сла́ва въ вы́шнихъ Бо́гу.

Во смире́ніи, я́ко въ цвѣ́тѣ, прему́дростію и ра́зумомъ о́троцы укра́шени, исполни́тели яви́шася, послуша́ніемъ и покоре́ніемъ ма́тери свое́й, я́ко вѣнцы́ свѣ́тлыми, украша́хуся, за́повѣди Христа́ Бо́га исполня́юще, вопія́ху: сла́ва въ вы́шнихъ Бо́гу.

Богоро́диченъ: Аще и еди́нъ разумѣва́ется лице́мъ Емману́илъ, но естество́мъ сугу́бъ, сего́ двѣ́ возвѣща́емъ въ Не́мъ во́ли и дѣ́йства. Его́же Роди́тельницу Богоро́дицу исповѣ́дуемъ и съ Не́ю вопіе́мъ: сла́ва въ вы́шнихъ Бо́гу.

Инъ кано́нъ, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Ликовству́юще пѣ́сньми, благочести́ваго Іоа́нна де́спота, соше́дшеся дне́сь, по достоя́нію восхва́лимъ, я́ко мно́гихъ чуде́съ пода́теля оби́льна, мо́лится бо о на́съ Го́сподеви. Тѣ́мъ и мы́ съ ни́мъ возопіе́мъ: сла́ва смотре́нію Твоему́, Го́споди.

Угринъ о́нъ, а́ще и иновѣ́ренъ бя́ше, но егда́ ви́дѣ ва́съ, о́троцы преблаже́нніи, жа́луя сиро́тства ва́шего, ра́достно ва́съ пріе́млетъ, и подае́тъ ва́мъ Си́рмію во обдержа́ніе, и, зря́ красоту́ лица́ ва́шего, диви́тся: краснѣ́йши же душе́ю вои́стинну яви́стеся, о преблаже́нніи! Тѣ́мъ съ ва́ми воспое́мъ: сла́ва смотре́нію Твоему́, Го́споди.

Вельми́ тя хра́бра и оружено́сна на сопроти́вныя Бо́гъ показа́, отгоня́ и́хъ отъ ста́да твоего́, а́ки во́лки суро́выя, соблюда́я лю́ди оте́чества твоего́ неврежде́ни, и ны́нѣ мо́лимъ тя́, преблаже́нне Іоа́нне: сохрани́ и на́съ, служи́тели твоя́, отъ нахожде́ній ча́дъ ага́рянскихъ, да вси́ пѣ́снь пое́мъ: сла́ва смотре́нію Твоему́, Го́споди.

Богоро́диченъ: Алава́стръ, Чи́стая, мы́сленный Ты́ еси́, мѵ́ра, излія́вшагося на зе́млю съ небесе́; и мене́ ны́нѣ благоуха́нія испо́лни, да воспою́ пѣ́снь: чу́дная дѣла́ Тобо́ю сотвори́ Сы́нъ Тво́й и Бо́гъ, Пречи́стая Дѣ́во.

Катава́сія: Спасе́ лю́ди...

Пѣ́снь 3.

Ирмо́съ: Не му́дростію и бога́тствомъ да хва́лится сме́ртный свои́мъ, но вѣ́рою Госпо́днею, правосла́вно взыва́я Христу́ Бо́гу и поя́ при́сно: на ка́мени Твои́хъ за́повѣдей утверди́ мя, Влады́ко.

Стефа́нъ де́спотъ, роди́тель тво́й, Бо́гу хотя́щу отъ житія́ сего́ отхо́дитъ, тебе́, я́ко а́гня незло́бивое, въ чу́ждемъ ста́дѣ оставля́етъ. Ты́ же, свя́те, Христа́ Бо́га любя́ и ма́тере твоея́ за́повѣди сохраня́я, наказа́ніемъ до́брѣ утвержда́емь, непреста́нно Бо́гу поя́: Свя́тъ еси́, Го́споди.

Пома́занникъ Ри́мскія держа́вы а́ще и восхотѣ́, но не возмо́же ва́съ удержа́ти отъ полу́ченнаго ва́мъ путеше́ствія, Бо́гу ему́ возбраня́ющу, но съ ми́ромъ и дарми́ отпуще́ніе ва́мъ да́руетъ. Вы́ же, путеше́ствіе творя́ще и Бо́га благода́ряще, поете́: Свя́тъ еси́, Го́споди.

Любо́вію приходя́щимъ къ ра́цѣ моще́й ва́шихъ и́нокомъ и бѣльце́мъ, благочести́ве Стефа́не, Макси́ме преблаже́нне, Ангели́но преподо́бная и Іоа́нне пра́ведне, душа́мъ спасе́ніе и тѣлесе́мъ здра́віе всѣ́мъ на́мъ дарова́ти мо́лимся къ Бо́гу ва́шими моли́твами, да съ ва́ми вопіе́мъ: Свя́тъ еси́, Го́споди.

Богоро́диченъ: Его́же трепе́щетъ, Чи́стая, вся́кое созда́ніе, Сего́ на руку́ имѣ́ла еси́, за милосе́рдіе на́съ ра́ди Младе́нца бы́вша, Сего́ моли́ спасти́ся всѣ́мъ, вѣ́рою зову́щимъ: Свя́тъ еси́, Го́споди.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Тебе́ отню́дъ невозмо́же, блаже́нне, ничто́же отъ Правосла́вія отлучи́ти: ни сиро́тство роди́телей, ни чужестра́нствіе, ниже́ цвѣ́тъ ю́ности. Стра́хъ Бо́жій въ се́рдцѣ твое́мъ имѣ́я, послѣ́довалъ еси́ стопа́мъ роди́телей твои́хъ, до́йде и пости́же съ ни́ми вку́пѣ во дворы́ Госпо́дни, веселя́ся, вопія́: спасе́ мя десни́ца Твоя́, Го́споди.

О, я́ко Бо́гу изво́лившу просла́вити святы́я Своя́, та́ко и просла́ви. Юноша нѣ́кій на одрѣ́ слежа́ше о́смь лѣ́тъ, отъ враче́въ исцѣле́нія не получи́, слы́ша зна́менія и чудеса́, дѣ́ема тобо́ю, преблаже́нне, отцу́ и ма́тери глаго́лаше: неси́те мя́ къ моще́мъ пра́веднаго Іоа́нна, да и а́зъ насы́щуся, я́ко пе́съ, отъ крупи́цъ, па́дающихъ отъ трапе́зы бога́таго. Оле зна́меній и чуде́съ дѣ́емыхъ! Еще́ ему́ во врата́ це́ркве Богома́тере внесе́ну бы́вшу, здра́въ бы́сть, я́ко и не болѣ́, ве́ліимъ гла́сомъ возопи́: моли́твами пра́веднаго Іоа́нна спасе́ мя́ десни́ца Твоя́, Го́споди.

Ны́нѣ весе́лія испо́лнися хра́мъ Богома́тере, въ не́мже лежи́тъ сокро́вище неги́блемо, тѣ́ло блаже́ннаго, чудесы́ удивля́емо: вси́ у́бо, приближа́ющеся къ ра́цѣ моще́й его́ съ вѣ́рою, исцѣле́нія да́ры пріе́млютъ, здра́ви отхо́дятъ и, Бо́га благодаря́ще, пою́тъ: спасе́ на́съ десни́ца Твоя́, Го́споди.

Богоро́диченъ: Изба́ви на́съ гее́нны и вся́каго преще́нія въ ча́съ Суда́, рабы́ Твоя́, Пренепоро́чная, и прича́стники сотвори́ Сы́на и Бо́га Твоего́ Ца́рствію, да вси́ пое́мъ Ему́: спасе́ на́съ десни́ца Твоя́, Го́споди.

Сѣда́ленъ, гла́съ 4. Подо́бенъ: Ско́ро предвари́.

Яко цвѣ́тъ прекра́сенъ, процвѣ́лъ еси́ во оте́чествіи твое́мъ, благоро́дне Іоа́нне, и́маши бо мо́щи твоя́, пребыва́ющія во хра́мѣ Бо́жія Ма́тере, и лежа́щія въ честнѣ́й ра́цѣ, цѣ́лы, невреди́ми, я́ко кри́нъ благоуха́нный и я́ко ки́тра доброво́нная, облагоуха́ющая вся́, приходя́щія къ ни́мъ съ вѣ́рою, и исцѣле́ній да́ры невозбра́нно подава́ющая, и ны́нѣ не забу́ди рабы́ твоя́, мо́лимся. [Два́жды.]

Сла́ва, и ны́нѣ, богоро́диченъ:

Яже отъ всѣ́хъ родо́въ предъизбра́нная, отъ всѣ́хъ проро́ковъ пронарече́нная, и отъ всѣ́хъ человѣ́къ препросла́вленная, и отъ а́нгелъ удивля́ема, Ма́ти Бо́га Вы́шняго, удиви́ на ны́ ми́лость Твою́. Умоли́ Сы́на Твоего́ и Бо́га на́шего, изба́витися на́мъ отъ вся́каго зла́, да Тя́ непреста́нно, я́ко Ма́терь Бо́жію, велича́емъ.

Пѣ́снь 4.

Ирмо́съ: Слы́ша дре́вле Авваку́мъ, Христе́, чу́дный Тво́й слу́хъ и стра́хомъ взыва́ше: отъ ю́га Бо́гъ пріи́детъ и Святы́й отъ горы́ пріосѣне́нныя ча́щи спасти́ пома́занныя. Сла́ва си́лѣ Твое́й, Го́споди.

Красу́йся, Це́ркви Бо́жія, ликовству́йте, се́рбстіи наро́ди, богосо́бранный ли́че, зря́ще ве́щь ди́вну и прекра́сну, въ це́ркви Бо́жія Ма́тере лежа́щу, мо́щи богопросла́вленныхъ де́спотъ, оте́цъ съ сы́ны, ма́ти съ ча́ды, мо́лятся бо непреста́нно о лю́дехъ свои́хъ, я́ко чадолю́бцы, и оби́тель свою́ сохраня́ютъ отъ вся́кія напа́сти. Тѣ́мъ и мы́ пѣ́снь воспое́мъ: сла́ва си́лѣ Твое́й, Го́споди.

Аще и посредѣ́ иноязы́чныхъ учи́телей водворя́ешися, богоблаже́нне, но Правосла́вія оте́ческаго николи́же погрѣши́, Бо́гу сохраня́ющу тя́, до́ндеже жела́емый гла́съ получи́лъ еси́: вни́ди, ра́бе, въ ра́дость Го́спода твоего́! Тому́ и мы́ надѣ́емся, зову́ще: сла́ва си́лѣ Твое́й, Го́споди.

Ни са́на вели́чество, ни во́инственное попече́ніе, ниже́ бра́чное совокупле́ніе возмо́же тебе́ отдали́ти отъ любве́ Христо́вы, пра́ваго пути́ держа́ся неотсту́пно, до́ндеже вше́лъ еси́ въ ра́йская селе́нія, идѣ́же пра́ведникъ совокупле́нія, веселя́ся съ роди́тели твои́ми. Тѣ́мже и мы́ мо́лимся, блаже́нне Іоа́нне: помяни́те и на́съ во весе́ліи Го́спода своего́, да вси́ вопіе́мъ: сла́ва си́лѣ Твое́й, Го́споди.

Богоро́диченъ: О, преукраше́нна добро́тою добродѣ́телей Богома́ти Чи́стая, со благочести́вымъ Стефа́номъ и Макси́момъ блаже́ннымъ, Ангели́ною преподо́бною и Іоа́нномъ пра́веднымъ моли́ о на́съ, Его́же родила́ еси́, Христа́, Человѣколю́бца Бо́га, изба́витися на́мъ отъ вся́каго зла́, да вси́ пое́мъ Ему́: сла́ва си́лѣ Твое́й, Го́споди.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Ру́цѣ твои́, преблаже́нне, имѣ́я просте́ртѣ къ тре́бующимъ и маломо́щныя заступа́я, бога́тство твое́ во утро́бы ни́щихъ влага́я, отону́дуже тя́ Богатода́вецъ Христо́съ сугу́бою мздо́ю обогати́ и дарова́ тебѣ́ съ роди́тели твои́ми вѣ́чное наслажде́ніе. Моли́теся, святíи, та́мо и на́мъ съ ва́ми улучи́ти ма́лое утѣше́ніе, да вси́ пое́мъ: ди́венъ Бо́гъ во святы́хъ Свои́хъ.

Наказу́я словесы́ твоя́ лю́ди, преблаже́нне, и бди́те, моли́теся, глаго́ля, и внима́йте, не вѣ́мы бо, въ ко́й ча́съ та́ть пріи́детъ; крѣ́пко ста́немъ, не пощади́мъ пло́ти на́шея, проти́ву бра́ни бори́теля ополчи́мся, Бо́га Помо́щника призове́мъ, да держа́ву оте́чества на́шего сохрани́тъ; сохрани́ и на́съ, свя́те, моли́твами твои́ми, пою́щія: ди́венъ Бо́гъ во святы́хъ Свои́хъ.

Еще́ отъ ю́ности, свя́те, Бо́га любя́, Того́ ища́, Того́ гоня́, до́ндеже и пости́глъ еси́, и То́й тя́ во весе́ліе прія́тъ, и оби́тель въ тебѣ́ Ду́ха Свята́го сотвори́, и просла́ви во вселе́ннѣй чудесы́ въ хвалу́ и увѣре́ніе ро́ду на́шему. Да вси́ вопіе́мъ: ди́венъ Бо́гъ во святы́хъ Свои́хъ.

Богоро́диченъ: Ди́вный и прекра́сный ли́че, свята́я и богоизбра́нная четвери́це, мы́, смире́нніи служи́тели ва́ши, мо́лимся: съ Богоро́дицею и арха́нгеломъ Гавріи́ломъ моли́теся Христу́ Бо́гу изба́витися на́мъ безго́дныя болѣ́зни и го́рькія сме́рти, да Тя́ непреста́нно, Ма́терь Бо́жію, въ пѣ́снехъ велича́емъ.

Пѣ́снь 5.

Ирмо́съ: Свѣ́тъ Тво́й незаходи́мый возсія́й, Христе́, въ сердца́ вѣ́рно пою́щихъ Тя́, ми́ръ подава́яй на́мъ па́че ума́; тѣ́мъ, отъ но́щи невѣ́дѣнія ко дню́ свѣ́томъ Твои́мъ теку́ще, славосло́вимъ Тя́, Человѣколю́бче.

О, богода́ннаго ва́мъ ра́зума, святíи! Чу́дныя гра́ды и страны́ проходя́ще отъ мѣ́ста на мѣ́сто, я́коже иногда́ дре́вній Изра́иль по пусты́ни, Бо́гу ва́съ сохраня́ющу, отню́дъ не погрѣши́сте оте́ческаго преда́нія, до́ндеже изво́ли Бо́гъ просла́вити зе́млю и лю́ди оте́чества ва́шего: земны́мъ бо ца́рствомъ небе́сное воспрія́сте, и со а́нгелы непреста́нно лику́ете, и на́съ та́мо не забу́дите, вѣ́рою воспѣва́ющихъ вы́.

Се́й блаже́нный ревну́я и поревнова́ по лю́дехъ оте́чества своего́, Бо́га николи́же отступа́я, де́нь и но́щь моли́твами и ми́лостынями себе́ Тому́ приводя́. То́й тя́ и прія́тъ и сотвори́ въ тебѣ́ оби́телище Свято́му Ду́ху. Сподо́би и на́съ Ду́ха Свята́го моли́твами, свя́те, твои́ми, вѣ́рою воспѣва́ющихъ тя́.

О, та́ко Бо́гу изво́лившу: Гео́ргій, старѣ́й бра́тъ тво́й, остриза́етъ власы́ своя́, ма́тери, и всѣ́мъ лю́демъ, и тебѣ́, преблаже́нне, изво́ли лу́чше рабо́тати Бо́гу, не́жели имѣ́ти вре́менную сего́ мíра сла́дость. Сего́ ра́ди обрѣ́те на небесѣ́хъ ра́дость, и на́съ та́мо не забу́ди, свя́те, вѣ́рою воспѣва́ющихъ тя́.

Богоро́диченъ: О, лозо́, Ду́хомъ Святы́мъ насажде́нна! О, четвери́це богоизбра́нная! Мо́щи бо ва́ша светосія́тельны мно́га зна́менія и чудеса́ содѣва́ютъ во хра́мѣ Богома́тере. Съ Не́юже и со арха́нгеломъ Гавріи́ломъ моли́теся Человѣколю́бцу Бо́гу о на́съ, да въ ми́рѣ пое́мъ изъ Нея́ ро́ждшагося Го́спода.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

И не хотя́щу ти́, блаже́нне Іоа́нне, де́спотства са́нъ вруча́ется ти́. Ты́ же, свя́те, я́ко во́инъ крѣ́покъ, обою́ду о́стрымъ ору́жіемъ на ага́ряны хра́брствуя и Влады́цѣ Христу́ безлѣ́ностно рабо́тая, своего́ оте́чества лю́ди отъ бѣ́дъ избавля́я и на́съ къ небе́сному Ца́рствію направля́я, да вси́ зове́мъ: чу́дна дѣла́ Твоя́, Го́споди.

Ничто́же возмо́же ва́съ премѣни́ти отъ богода́ннаго ва́мъ ра́зума и благоче́стія, о богоблаже́нніи: ни чужестра́нствія хожде́ніе, ни иносла́вныхъ вели́чество, но, я́ко адама́нти тве́рдіи, соблюдо́сте тѣлеса́ ва́ша чи́ста. Тѣ́мже и Тро́ицы Святы́я жили́ще въ себѣ́ сотвори́сте, и благода́ть Свята́го Ду́ха всели́ся въ ва́съ, и си́ла Бо́жія дѣ́йствуетъ ва́ми. Тѣ́мже мо́лимся: и о на́съ моли́теся Святѣ́й Тро́ицѣ, я́ко те́пліи на́ши засту́пницы, да вси́ зове́мъ: чу́дна дѣла́ Твоя́, Го́споди.

Ихже о́ко не ви́дѣ, у́хо не слы́ша, и на се́рдце человѣ́ку не взыдо́ша, я́же угото́ва Бо́гъ лю́бящимъ Его́; ва́мъ сія́ дарова́нна бы́ша, о благочести́ве Стефа́не, преблаже́нне Макси́ме, Ангели́но преподо́бная и Іоа́нне пра́ведне, мо́лимся и мы́ получи́ти грѣхо́въ проще́ніе, ду́шъ спасе́ніе и тѣле́съ здра́віе, и́нокомъ, и бѣльце́мъ, и всѣ́мъ, приходя́щимъ къ ра́цѣ моще́й ва́шихъ, да вси́ зове́мъ: чу́дна дѣла́ Твоя́, Го́споди.

Богоро́диченъ: Вси́ къ водѣ́ медото́чнаго Твоего́ исто́чника, Богоро́дице Дѣ́во, еди́на ра́досте ро́да на́шего, притека́емъ, зову́ще, Пресвята́я: ми́ръ испроси́ це́рквамъ Твои́мъ, да вси́ Сы́ну Твоему́ зове́мъ: чу́дна дѣла́ Твоя́, Го́споди.

Пѣ́снь 6.

Ирмо́съ: Ве́сь отъ страсте́й безмѣ́рныхъ содержу́ся и ки́томъ зо́лъ снизпадо́хъ, но возведи́ изъ нетлѣ́нія мя́, Бо́же, я́коже пре́жде Іо́ну, и вѣ́рою безстра́стіе ми́ да́руй, я́ко да во гла́сѣ хвале́нія и спасе́нія ду́хомъ пожру́ Ти.

Лику́й, Си́рміе, страно́ Се́рбская, весели́ся, свята́я митропо́ліе, хра́ме Бо́жія Ма́тере, красу́йся положе́ніемъ святы́хъ моще́й Стефа́на благочести́ваго, Макси́ма блаже́ннаго, Ангели́ны преподо́бныя, Іоа́нна пра́веднаго, мо́лятся бо о лю́дехъ свои́хъ, я́ко отечестволю́бцы, да въ ми́рѣ пѣ́снь пое́мъ: сла́ва Бо́гу, сотво́ршему пресла́вная.

Агаря́нинъ нѣ́кій бя́ше бѣсну́яся, жи́въ бо бѣ́съ во чре́вѣ его́ валя́шеся. Мно́гая бѣды́ и труды́ на тѣ́ло его́ нанесе́, мно́жицею бо на земли́ лежа́, я́ко ме́ртвъ, зря́шеся. Приве́дше же его́ къ ра́цѣ моще́й ва́шихъ, о преди́вная четвери́це! Онъ, а́ще и невѣ́ренъ, оба́че рыда́я, бя́ше пла́чася. Вы́ же, святíи, я́ко богатода́вцы, и псо́мъ невозбра́нно отъ крупи́цъ святы́я ва́шея трапе́зы неща́дно подае́те, та́ко и агаря́нину ско́рое исцѣле́ніе. Онъ же, здра́въ бы́въ, возопи́: нѣ́сть вѣ́ры, па́че вѣ́ры христіа́нскія. Сла́вы же ра́ди земны́я не возлюби́ небе́сныя, оба́че бя́ше поя́: сла́ва Бо́гу, сотво́ршему чудеса́ пресла́вная.

Ди́вно дре́во, красны́ же вѣ́тви, но и пло́дъ вои́стинну сладча́йшій ме́да, пріиди́те, ны́нѣ вкуси́вше оби́льно, чу́вства на́ша тѣле́сна вку́пѣ и душе́вна услади́мъ, и въ ра́дости со святы́ми Христа́ Бо́га возвели́чимъ, и пѣ́сньми воспои́мъ: сла́ва Бо́гу, сотво́ршему пресла́вная.

Богоро́диченъ: Исцѣли́ я́звы моея́ души́, и многому́тное помышле́ній волне́ніе, Влады́чице, утиши́, и ми́рное ми́ устрое́ніе пода́ждь, да въ ми́рѣ Сы́ну Твоему́ пое́мъ: сла́ва Бо́гу, сотво́ршему пресла́вная.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Ко твоему́ оте́честву пріити́ тебѣ́ сотвори́ Бо́гъ и не хотя́ща, преблаже́нне Іоа́нне, обогаща́я тя́ да́ры сла́вою немимотеку́щею. Тѣ́мъ приходя́щіи къ ра́цѣ моще́й твои́хъ почерпа́ютъ пи́во отъ исто́чника приснотеку́щаго, исцѣле́нія отъ тебе́ бога́тыя да́ры, да вси́ зове́мъ: славосло́вимъ Тя́, Человѣколю́бче.

Аще и лише́ни роди́теля, но ва́съ, о богоблаже́нніи, ке́сарь, въ держа́вѣ свое́й че́стнѣ назира́я и я́ко сиро́тства ва́шего жалѣ́я, ца́рскими ва́съ учрежда́етъ; вы́ же, святíи, я́ко рабы́ Бо́га Вы́шняго, и въ чу́ждей земли́ непогрѣши́сте десна́го стоя́нія. И на́съ та́мо приведи́те ва́шими моли́твами, пѣ́снь Бо́гу пою́щія: славосло́вимъ Тя́, Человѣколю́бче.

По преставле́ніи твое́мъ, Іоа́нне преблаже́нне, я́ко го́лубь цѣлому́дренный, на фи́никсъ добродѣ́телей возше́лъ еси́, крилѣ́ имѣ́я позлаще́ни, и́маже возлетѣ́въ, въ ра́йстѣй красотѣ́ водвори́лся еси́ и, боже́ственныя пи́щи наслажда́яся, съ ра́достію пое́ши: славосло́вимъ Тя́, Человѣколю́бче.

Богоро́диченъ: Еди́ну Пречи́стую, еди́ну Нескве́рную молю́ Тя́, Отрокови́це: сла́стными оскве́рншуюся страстьми́ ду́шу мою́ окая́нную Твои́ми моли́твами очи́сти, да досто́йно воспою́ Сы́ну Твоему́, зовы́й: славосло́влю Тя́, Человѣколю́бче.

Конда́къ, гла́съ 8. Подо́бенъ: Взбра́нной.

Пріиди́те, достодо́лжно почти́мъ Іоа́нна, но́выя благода́ти служи́теля новопросла́вленнаго, сла́ву вѣ́ры на́шея и на́шего моли́твенника. Созыва́етъ бо пѣ́ти благода́рными гла́сы и просла́вити Просла́вльшаго святы́я Своя́ и мо́лится о творя́щихъ па́мять его́ и о зову́щихъ ему́: ра́дуйся, Іоа́нне, но́вое процвѣте́ніе.

Икосъ:

Вели́ка тя́ Се́рбстѣй земли́ свѣти́льника Бо́гъ показа́ въ послѣ́дняя времена́, Іоа́нне блаже́нне: неви́димо Христо́выя лю́ди непрестае́ши посѣща́я и ско́рая исцѣле́нія подава́я всѣ́мъ, вѣ́рою приходя́щимъ къ ра́цѣ моще́й твои́хъ. Тѣ́мъ вси́ согла́сно вопіе́мъ ти́ сія́: ра́дуйся, сто́лпе пресвѣ́тлый, просвѣща́я на́съ чудесы́ и зна́меньми; ра́дуйся, отца́ благочести́ваго ко́рене; ра́дуйся, преподо́бныя ма́тере вѣ́тви прекра́сная; ра́дуйся, наги́хъ покрови́телю и плѣне́ныхъ свободи́телю; ра́дуйся, я́ко воспрія́лъ еси́ вмѣ́сто тлѣ́нныхъ нетлѣ́нныя; ра́дуйся, зри́телю Свѣ́та Непристу́пнаго; ра́дуйся, са́де, новосажде́нный въ ра́йстѣмъ селе́ніи; ра́дуйся, я́ко лику́еши со а́нгелы; ра́дуйся, о́блаче ро́сный, вѣ́рныхъ сердца́ ороша́я; ра́дуйся, земли́ Се́рбстѣй засту́пниче; ра́дуйся, це́ркви твое́й свѣ́тлое украше́ніе; ра́дуйся, благочести́вымъ де́спотомъ на́шимъ ра́дованіе; ра́дуйся, во́иномъ правосла́внымъ во бра́нехъ крѣ́пкій помо́щниче; ра́дуйся, всѣ́мъ на́мъ нело́жный храни́телю и похвало́. Ра́дуйся, Іоа́нне, но́вое процвѣте́ніе.

Синакса́рь свято́му Іоа́нну де́споту.

Се́й святы́й человѣ́къ и Бо́жій слуга́ бѣ́ сы́нъ Стефа́на и Ангели́ны. Стефа́нъ же бѣ́ сре́дній сы́нъ де́спота Гео́ргія Бра́нковича Смедере́вскаго. Ро́дный, единоутро́бный бра́тъ ему́ бя́ше святы́й преподо́бный Макси́мъ архіепи́скопъ. — Неща́стіе, поси́гшее до́мъ роди́телей сего́ ми́лостиваго Іоа́нна, изведе́ его́ на по́прище духо́внаго по́двига, су́щу ему́ а́ки о́троку и ю́ноши. Присту́пенъ бы́въ оба́че возвыше́ннымъ вдохнове́ніямъ Правосла́вныя вѣ́ры, терпѣли́во понесе́ возложе́нная на́нь, непоколеба́вся во вѣ́рѣ пра́отцевъ свои́хъ, а́ще и полага́шеся стара́ніе, е́же отто́ргнути его́, ниже́ смути́вся душе́ю отъ ча́стаго преселе́нія среди́ иностра́нныхъ предѣ́ловъ. Наконе́цъ пріи́де съ ма́терію и бра́томъ въ Ку́пиново-Купини́къ, въ Си́рміи-Сре́мѣ, де́спотствовавшу тогда́ въ тѣ́хъ кра́ехъ Во́лку Второ́му Бра́нковичу, и ту́ поживе́ нѣ́кое вре́мя. Егда́ же преста́вися де́спотъ Во́лкъ, у́гри, владѣ́вшіи то́ю страно́ю до рѣки́ Са́вы, не хотѣ́ли дабы́ и про́чее продолжа́лося де́спотствованіе се́рбское въ Си́рміи: ничи́мъ ме́ньше оста́ де́спотское ти́тло въ лицѣ́ Гео́ргія, ста́ршаго бра́та Іоа́ннова. А егда́ Гео́ргій, бра́комъ не сочета́нъ бы́въ, и́ноческое житіе́ возлюби́ па́че мірска́го, и дѣйстви́тельно постри́жеся, получи́въ и́мя Макси́ма, тогда́ ти́тло де́спотское пре́йде на мла́дшаго бра́та Іоа́нна, кото́рый зане́ Сирмíйская страна́ се́рбами населе́нна бѣ́, вся́чески имѣ́лъ бя́ше и нѣ́которую вла́сть въ ви́дѣ правле́нія поне́ надъ о́ными во́инами, и́же а́ки ко́нницы прида́ни бы́ша въ по́мощь Владисла́ву, кра́лю Угарскому.

Іоа́ннъ де́спотъ ожени́лся Еле́ною, дще́рію Стефа́на Іа́кшича, сынови́цею Дими́трія Іа́кшича, кото́рый бы́лъ зя́ть де́споту Ла́зарю, сы́ну Гео́ргія Бра́нковича. Съ се́ю супру́гою роди́лъ Іоа́ннъ еди́ну то́чію дще́рь Марíю, обруче́нную Фердина́нду Франгепа́ну, гро́фу Хорва́тскому, изъ ко́его бра́ка роди́лися Стефа́нъ Франгепа́нъ и Екате́рина. Стефа́нъ бы́лъ жупа́номъ Модру́зія, Екате́рина же вступи́ла въ супру́жество съ Нико́лаемъ Зри́ній, ба́номъ Хорва́тскимъ.

Поели́ку же въ тогда́шняя времена́ ча́сто нападе́нія троря́ху ага́ряне объ о́нъ по́лъ рѣки́ Са́вы, того́ ра́ди де́спотъ Іоа́ннъ пресели́ся въ Берка́сово, да́льше отъ грани́цы, и ту́ пожи́въ нѣ́кое вре́мя богоуго́дно, заключи́ дни́ вѣ́ку своему́ мѣ́сяца Деке́мврія 10-го дне́, лѣ́та Госпо́дня 1503. Въ не́мъ исчезе́ ря́дъ де́спотовъ Се́рбскихъ: о́нъ бо бѣ́ послѣ́дній. Лѣ́та живота́ его́ бя́ху испо́лнена благи́хъ дѣ́лъ, я́коже преда́ніе глаго́летъ, хотя́ са́мъ не изоби́ловаши: но зане́ все́, е́же творя́ше, отъ блага́го се́рдца происхожда́ше, Бо́гъ же призира́етъ ели́ко на мно́жество благотворе́ній, толи́ко и на намѣре́ніе. Того́ ра́ди яви́ Свою́ благода́ть на мо́щехъ его́, сотвори́въ и́хъ цѣле́бными. Егда́ же премину́ Макси́мъ архіепи́скопъ, тогда́ пренесе́ны бы́ша мо́щи отца́ и ма́тере и́хъ въ монасты́рь Крушедо́лъ въ Си́рміи, и ту́ вку́пѣ съ мощми́ Макси́ма и Іоа́нна положе́нны въ це́ркви пря́мо престо́льнымъ ико́намъ. Тѣ́хъ моли́твами, Го́споди Многоми́лостиве, испра́ви пу́ть на́шъ, во е́же пожи́ти на́мъ благоуго́дно и беззазо́рно, и оправди́тися предъ Тобо́ю во вре́мя пра́веднаго суда́ Твоего́. Ами́нь.

Пѣ́снь 7.

Ирмо́съ: Образу служи́ти мусикíйскому согла́сію созыва́ющу лю́ди, отъ пѣ́сней сіо́нскихъ пою́ще оте́чески, о́троцы Дави́довы мучи́телево разори́ша злочести́вое велѣ́ніе и пла́мень въ ро́су преложи́ша, пѣ́снь воспѣва́юще: превозноси́мый отце́въ и на́шъ Бо́же, благослове́нъ еси́.

Чу́до пресла́вно на земли́ яви́ся, о преблаже́нне Іоа́нне: по изнесе́ніи отъ земны́хъ нѣ́дръ свята́го твоего́ тѣ́ла мно́гій наро́дъ стече́ся, разсла́бленныя принесо́ша, слѣпы́я приведо́ша, и, егда́ святы́я твоя́ мо́щи облагоуха́ша, тогда́ вси́, кíйждо отъ свои́хъ я́звъ, здра́ви бы́ша, сла́ву Бо́гу и тебѣ́, уго́днику Его́, возда́ша, съ ни́мже и мы́ воспои́мъ: благослове́нъ Бо́гъ оте́цъ на́шихъ.

Украси́лъ еси́ оте́чества твоего́ лю́ди и бы́лъ еси́ похвала́ роди́телей твои́хъ, Іоа́нне пра́ведне: яви́ся бо тѣ́ло твое́, я́ко ки́тра благово́нная, зна́менія и чудеса́, я́ко и́скры, испуща́ющая и всѣ́мъ, вѣ́рою приходя́щимъ къ ра́цѣ моще́й твои́хъ, исцѣле́нія подава́ющая. Тѣ́мъ вси́ вопіе́мъ: благослове́нъ Бо́гъ оте́цъ на́шихъ.

Яже мы́ зна́емъ, сія́ и глаго́лемъ, и отъ мно́гихъ ма́ло рече́мъ: жену́ нѣ́кую, бѣсну́ему, желѣ́зы око́ванну, роди́тели ея́ приведо́ша къ ра́цѣ моще́й ва́шихъ, преблаже́нніи, я́же гла́сы испуща́ше, и, ска́чущи, нелѣ́пая глаго́лаше. Вы́ же, благочести́ве Стефа́не, Макси́ме преблаже́нне, Ангели́но преподо́бная и Іоа́нне пра́ведне, напра́снаго бѣ́са ско́рымъ исцѣле́ніемъ отъ нея́ отгна́сте. Она́ же здра́ва, зря́щи сія́, диви́тся, со слеза́ми отъ ра́дости ни́цъ на зе́млю па́дши, вели́чія Бо́гу и ва́мъ, уго́дникомъ Его́, возда́вше, пою́щи: благослове́нъ Бо́гъ оте́цъ на́шихъ.

Богоро́диченъ: Стени́ и пла́чися, душе́ моя́, и себе́ отню́дъ рыда́й, моля́щися Ма́тери Бо́жіей и глаго́лющи: мене́, осужде́ннаго, стра́шныя изба́ви му́ки, да возмогу́ Сы́ну Твоему́ зва́ти: благослове́нъ Бо́гъ оте́цъ на́шихъ.

Инъ.

Ирмо́съ: Отъ Іуде́и доше́дше, о́троцы въ Вавило́нѣ иногда́ вѣ́рою Тро́ическою пла́мень пе́щный попра́ша пою́ще: отцевъ Бо́же, благослове́нъ еси́.

Красе́нъ видѣ́ніемъ, краснѣ́йшій же душе́ю во исправле́ніихъ твои́хъ, свя́те, яви́лся еси́, е́же къ Бо́гу имѣ́лъ еси́, въ таковы́хъ же тя́ и коне́цъ пости́же, и процвѣ́лъ еси́, блаже́нне Іоа́нне, я́ко фи́никсъ во дво́рѣхъ Го́спода твоего́, идѣ́же, веселя́ся, пое́ши: благослове́нъ Бо́гъ оте́цъ на́шихъ.

Яко дре́во ма́слинное при исхо́дящихъ во́дъ, псало́мски вои́стинну насажде́нъ еси́, и вся́, ели́ка а́ще плоди́тъ, успѣ́ютъ; та́ко и вы́, преблаже́нніи, принесо́сте пло́дъ красе́нъ Христу́ Бо́гу: Макси́ма блаже́ннаго и Іоа́нна пра́веднаго, Стефа́не де́споте и Ангели́но преподо́бная, тѣ́мже и Христо́съ ва́съ вку́пѣ прія́тъ и введе́ въ ра́йское селе́ніе. Сподо́бите и на́съ съ ва́ми ра́дости Го́спода своего́, пою́щихъ: оте́цъ на́шихъ Бо́же, благослове́нъ еси́.

Въ лѣ́то преставле́нія ва́шего, о богоблаже́нніи, обсирѣ́ престо́лъ Се́рбскаго влады́чества, ага́рянская же ча́да, я́ко пси́ безобра́зніи, нападо́ша на зе́млю люде́й оте́чества ва́шего. Вы́ же, святíи, моли́твами ва́шими, я́ко пра́щею, отжени́те отъ ста́да своего́ и отны́нѣ мече́мъ моли́твъ ва́шихъ ссѣцы́те враги́ на́ша, мо́лимся, да Влады́цѣ Христу́ непреста́нно пѣ́снь пое́мъ: оте́цъ на́шихъ Бо́же, благослове́нъ еси́.

Богоро́диченъ: Украше́на красото́ю, ро́ждши Вседѣ́теля, утро́бою ши́ршая небе́съ еси́, Дѣ́во Всепѣ́тая, оледенѣ́вшую ду́шу мою́ любо́вію Твое́ю прохлади́, у Сы́на же Твоего́ и Бо́га прича́стника Ца́рствія сотвори́, да Тя́ непреста́нно, Ма́терь Бо́жію, въ пѣ́снехъ велича́ю.

Пѣ́снь 8.

Ирмо́съ: Чу́да преесте́ственнаго показа́ о́бразъ огнеро́сная пе́щь дре́вле: о́гнь бо не опали́ ю́ныя дѣ́ти, Христо́во явля́я безсѣ́менное отъ Дѣ́вы Боже́ственное рождество́. Тѣ́мъ, воспѣва́юще, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Прему́дростію и ра́зумомъ о́троцы украше́ни, исполни́тели яви́шася послуша́ніемъ и покоре́ніемъ ма́тери свое́й, я́ко вѣнцы́ свѣ́тлыми, украша́хуся и, за́повѣди Христа́ Бо́га своего́ исполня́юще, крѣпля́хуся, пою́ще: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Ра́дуйся, благочести́ваго царя́ о́трасле, ско́рый на́шъ помо́щниче и те́плый засту́пниче Іоа́нне пра́ведне, мо́лимся: непреста́й моля́ся ко Влады́цѣ Христу́ Бо́гу, ми́ръ, и здра́вія, и и́но, а́ще что́, на потре́бу лю́демъ твои́мъ дарова́ти, пою́щимъ: благослови́те, вся́ дѣла́ Госпо́дня, Гос́пода и превозноси́те во вся́ вѣ́ки.

Изво́ли Бо́гъ просла́вити тобо́ю зе́млю оте́чества твоего́, пребога́те Іоа́нне: яви́ бо тя́ посредѣ́ люде́й твои́хъ, я́ко ки́тру благово́нну, и вси́, приходя́ще къ ра́цѣ моще́й твои́хъ, ду́ши на́ши и тѣлеса́ наполня́емъ мѵ́ра благово́нна, пою́ще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Богоро́диченъ: Изба́ви мя́ страсте́й и бѣ́дъ, Богоневѣ́сто, Ма́ти Христа́ Бо́га, Тебе́ бо положи́ Бо́гъ къ Нему́ Хода́таицу моему́ смире́нію, да вси́ зове́мъ: благослове́нъ Пло́дъ чре́ва Твоего́, Пречи́стая Дѣ́во.

Инъ.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Го́споди Бо́же мо́й, припа́даю и молю́тися, да осѣни́тъ на́съ благода́ть Свята́го Ду́ха Твоего́, да возгласи́мъ пѣ́снь но́ву отъ у́стъ недосто́йныхъ, е́же похвала́ми просла́вити пра́здникъ уго́дника Твоего́ Іоа́нна и воспѣ́ти Тебѣ́, Бо́гу: да Тя́ тва́рь благослови́тъ во вся́ вѣ́ки.

У Жениха́ Христа́ водворя́яся, на земли́ чуде́съ лучи́ испусти́лъ еси́ и разли́чныя неду́ги и болѣ́зни отъ человѣ́къ отгна́лъ еси́, отъ ковче́га моще́й твои́хъ благода́ть источа́еши и здра́віе о Бо́зѣ всѣ́мъ подава́еши, преблаже́нне Іоа́нне. Тѣ́мъ вси́ зове́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Мо́лимся тебѣ́, преблаже́нне Іоа́нне, та́мо, идѣ́же водвори́лся еси́ у Христа́ Царя́, со святы́ми веселя́ся, и на́съ, мона́хи, и бѣльцы́, и вся́, служа́щія ти́, помяни́ во весе́ліи Го́спода твоего́, пою́щія: да благослови́тъ тва́рь вся́ Го́спода и превозно́ситъ во вся́ вѣ́ки.

Богоро́диченъ: На Тя́ всю́ наде́жду на́шу возложи́хомъ, Пречи́стая Дѣ́во. Хра́мъ бо Тво́й святы́й четы́рьми мощми́ свѣтосія́тельными краси́тся, удивля́ютъ бо вся́къ ра́зумъ и прему́дрость и всѣ́мъ, во хра́мъ Тво́й приходя́щимъ, исцѣле́нія да́ры подава́ютъ. Тѣ́мъ мо́лимся Ти́, Ма́ти Бо́жія: моли́твами святы́хъ Твои́хъ спаси́ на́съ.

Пѣ́снь 9.

Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую.

Удиви́шася небе́сніи ли́цы, возра́довашася се́рбстіи наро́ди, зря́ще твою́ ду́шу, пра́ведне, отъ земли́ на не́бо возноси́му и съ роди́тели въ ра́йскомъ селе́ніи водворя́ему. Мо́лимтися, преблаже́нне Іоа́нне: и на́съ, си́рыхъ, не оста́ви безъ твоея́ по́мощи, да въ пѣ́снехъ пою́: вели́читъ душа́ моя́ Го́спода.

Любо́вію на́съ не забы́лъ еси́, а́ще и отъ на́съ преста́вленъ бы́лъ еси́, я́коже дре́вле Илія́, но на́мъ оста́вилъ еси́ святы́я твоя́ мо́щи, я́ко ми́лоть честнѣ́йшую; и́миже на́съ, преблаже́нне, покрыва́я, сохраня́й, да въ ми́рѣ воспѣва́ю: вели́читъ душа́ моя́ Го́спода.

Егда́ принесо́ша во хра́мъ Бо́жія Ма́тере тѣ́ло твое́, о пребога́те и пра́ведне Іоа́нне, тогда́ мно́жество наро́да се́рбскаго стече́ся, принося́ще неду́жныя, и вси́, твоя́ мо́щи лобыза́вшіи, отъ неду́гъ здра́ви бы́ша: слѣпíи зря́ху, нѣмы́й глаго́лаше, хромы́й скача́, игра́ше, сла́ву Бо́гу и тебѣ́, уго́днику Его́, воздава́ше, поя́: вели́читъ душа́ моя́ Го́спода.

Богоро́диченъ: О, Ма́ти вся́ческихъ Творца́, Дѣ́во Всепѣ́тая, печа́льныхъ утѣ́хо, потопля́емыхъ Предста́тельнице и пренемога́ющихся Засту́пнице, до живота́ моего́ Ты́ мя́ сохрани́.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Ничи́мже по достоя́нію похвали́ти тя́ умѣ́емъ: оба́че а́ще и недосто́йными устна́ми сіе́ ма́лое гране́сіе прино́симъ тебѣ́, преблаже́нне Іоа́нне, и, честны́я твоя́ вельми́ похваля́юще мо́щи, въ пѣ́снехъ Христа́ Бо́га велича́емъ, тебѣ́ да́вшему такову́ю благода́ть и си́лу. Пріими́ же отъ на́съ ма́лое моле́ніе и посо́бствуй, да принесе́мъ Бо́гу хвале́ніе.

Те́плою любо́вію и вѣ́рою притека́ющимъ къ ра́цѣ моще́й твои́хъ, благоро́дне Іоа́нне, и́нокомъ и бѣ́льцемъ пода́ждь душа́мъ спасе́ніе и тѣлесе́мъ здра́віе и изба́ви лю́тыхъ бѣ́дъ и обстоя́ній. Пріими же отъ на́съ ма́лое моле́ніе и посо́бствуй, да принесе́мъ Бо́гу хвале́ніе.

И тѣ́сно и недоумѣ́тельно ума́ моего́ хвале́ніе, но пріими́, о всече́стне Іоа́нне, а́ще и нелѣ́по и гру́бо соплето́хъ сіе́ ма́лое пѣ́сни моле́ніе, и твои́мъ предста́тельствомъ, е́же къ Бо́гу, во благо́е претвори́ и въ лѣ́поту учини́. Пріими́ же отъ на́съ ма́лое моле́ніе и посо́бствуй, да принесе́мъ Бо́гу хвале́ніе.

Богоро́диченъ: Юже принесо́хомъ, пріими́те похвалу́ и пѣ́ніе, о преблаже́нная и богопросла́вленная четвери́це, мы, недосто́йніи, мо́щи ва́ша обстоя́ще, во хра́мѣ Бо́жія Ма́тере мо́лимся: съ Госпоже́ю Богоро́дицею и съ арха́нгеломъ Гавріи́ломъ умоли́те Человѣколю́бца Бо́га ми́ръ це́рквамъ и тишину́ земли́ Се́рбстѣй, и́нокомъ, и бѣ́льцемъ, и всѣ́мъ лю́демъ тѣле́сное здра́віе и душе́вное спасе́ніе дарова́ти, да въ ми́рѣ Христа́ Бо́га и Пречи́стую Его́ Ма́терь непреста́нно велича́емъ.

Свѣти́ленъ. Подо́бенъ: Со ученики́ взы́демъ.

Яви́ся свѣ́тлое украше́ніе це́ркве Бо́жія Ма́тере, отъ пра́ведну бо бо́ку происхо́дитъ Іоа́ннъ де́спотъ, просвѣща́я на́ша ду́ши и тѣлеса́, це́рковь же свою́ исполня́я мѵ́ра благово́нна, и здра́віе подае́тъ неду́жнымъ всѣ́мъ, и́же вѣ́рою приходя́щимъ къ ра́цѣ моще́й его́, неоску́дно насыща́я весе́лія тѣле́снаго, вку́пѣ и душе́внаго. [Два́жды.]

[Сла́ва, и ны́нѣ,] богоро́диченъ:

Неизрече́ннаго прижи́тія была́ еси́, Всенепоро́чная Невѣ́сто, я́ко су́щи честнѣ́йшій хра́мъ, Богоро́дице: Свѣ́тъ бо Превѣ́чный въ Тя́ всели́ся, и породи́ Бо́га. Пою́ще у́бо Твое́ Рождество́, велича́емъ Тя́ досто́йно, Всенепоро́чная Отрокови́це.

На хвали́техъ, стихи́ры, гла́съ 2. Подо́бенъ: Егда́ отъ дре́ва.

Ты́ яви́лся еси́ свѣ́тлое украше́ніе це́ркве Бо́жія Ма́тере, пра́ведне Іоа́нне: мо́щи бо твоя́ свѣ́томъ вселе́нную просвѣща́ютъ, сія́ютъ бо па́че зла́та и ка́мене че́стна, созыва́юще на́съ на духо́вное торжество́, да просвѣти́мъ ду́ши на́ша и тѣлеса́ твои́ми моли́твами, досточу́дне.

Похвала́ еси́ земли́ Се́рбстѣй и вели́цѣй це́ркви Бо́жія Ма́тере, просвѣще́ніе же и щи́тъ лю́демъ оте́чества твоего́, и побѣ́да на сопроти́вныя, и всѣ́мъ на́мъ побо́рникъ и засту́пникъ. Тѣ́мже, преблаже́нне Іоа́нне, и отны́нѣ рабы́ твоя́ не забу́ди, но всегда́ покрыва́й, заступа́й и сохраня́й отъ вра́гъ ви́димыхъ и неви́димыхъ, мо́лимся.

Пріиди́те, се́рбстіи наро́ди вси́, возра́дуемся и возвесели́мся дне́сь, во всечестны́й се́й пра́здникъ Іоа́нна де́спота, и сла́ву и хвалу́ Христу́ Бо́гу воздади́мъ, да́вшему на́мъ такова́го къ Нему́ предста́теля и моли́твенника о душа́хъ на́шихъ.

Дне́сь весели́тся це́рковь Богома́тере, имѣ́ющи въ себѣ́ многоцѣле́бныя мо́щи пра́веднаго Іоа́нна, свѣ́томъ вселе́нную озаря́юща, ду́ши и тѣлеса́ на́ша просвѣща́юща, лю́ди же своя́ зна́меньми и чудесы́ удивля́юща, разли́чная дарова́нія всѣ́мъ, отъ него́ прося́щимъ, подава́юща, це́рковь же свою́ отъ вся́кія ско́рби и бѣды́ избавля́юща и служа́щія въ не́й мона́хи и бѣльцы́ душе́внаго весе́лія наслажда́юща. Тѣ́мъ мо́лимся, преблаже́нне: не преста́й моля́ся о на́съ Человѣколю́бцу Бо́гу дарова́ти душа́мъ на́шимъ ми́ръ и ве́лію ми́лость.

Сла́ва, гла́съ 6:

Лику́й, Си́рміе, и, страно́ Се́рбская, весели́ся, красу́йся, хра́ме Бо́жія Ма́тере, положе́ніемъ святы́хъ моще́й Стефа́на благочести́ваго и Макси́ма блаже́ннаго, Ангели́ны преподо́бныя и Іоа́нна пра́веднаго. Яко бо со́лнце многосвѣ́тлое, вселе́нную всю́ луча́ми просвѣща́ютъ, и мра́къ душе́внаго паде́нія озаря́ютъ, и отъ ни́хъ вѣ́рою прося́щимъ исцѣле́ній бога́тыя да́ры, я́ко и́скры, испуща́ютъ, и неща́дно тре́бующимъ подава́ютъ. Тѣ́мже и мы́ со слеза́ми си́це рце́мъ: о прекра́сная и преди́вная четвери́це, мы́, смире́нніи мона́си и бѣльцы́, ста́ріи же и ю́ніи, бога́тіи и ни́щіи, про́симъ оте́честву ва́шему ми́ръ и це́рквамъ въ любви́ единомы́сліе, на́мъ же и всѣ́мъ лю́демъ здра́віе тѣле́сное и душе́вное спасе́ніе дарова́ти е́же къ Бо́гу ва́шими моли́твами.

И ны́нѣ, [богоро́диченъ:]

Богоро́дице, Ты́ еси́ [лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна, пѣ́снь 3-я и 7-я на 8. Проки́менъ, гла́съ 7: Возвесели́тся пра́ведникъ о Го́сподѣ,* и упова́етъ на Него́. Сти́хъ: Услы́ши, Бо́же, гла́съ мо́й, [внегда́ моли́ти ми ся къ Тебѣ́]. Апо́столъ къ Ри́мляномъ, зача́ло 97. Аллилу́ія, [гла́съ 4]: Пра́ведникъ, я́ко фи́никсъ, процвѣте́тъ, [я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ]. Ева́нгеліе отъ Матѳе́я, зачало 43. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Кни́га Се́рблякъ, содержа́щая въ себѣ́ богослуже́бная моле́бная пра́вила святы́мъ се́рбскаго ро́да. — Бѣ́лградъ, 1861. — Л. 85 – 94 об.

/ Къ оглавленію раздѣла /


Наверхъ / Къ титульной страницѣ

0