Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 10-й де́нь.
Святы́хъ му́ченикъ Ми́ны, Ермоге́на, Евгра́фа.

[ВЕЧЕРЪ,]
На Го́споди воззва́хъ: стихи́ры, окто́иха 3, и святы́хъ 3, гла́съ 1. Подо́бенъ: Всехва́льніи.

Му́чениче пресла́вне Ми́но,* по плесна́мъ біе́мь,* и очесы́ избода́емь,* и отъе́млему богосло́вному язы́ку* твердѣ́йше терпѣ́лъ еси́,* на боже́ственная воздая́нія зря́.* Тѣ́мже моли́* дарова́ти душа́мъ на́шимъ* ми́ръ и ве́лію ми́лость.

Ру́къ отсѣче́ніе* и но́гъ лю́битъ отъя́тіе* Ермоге́нъ сла́вный* и, взира́я на о́гнь,* мно́жайшу теплоту́ серде́чную явля́ше,* Бо́гу прилѣпля́яся.* Ему́же и мо́лится ны́нѣ* дарова́ти душа́мъ на́шимъ* ми́ръ и ве́лію ми́лость.

Удесы́ сокруша́еми, му́дріи,* во глубину́ морску́ю вве́ржени бы́сте, святíи,* ма́ніемъ же лу́чшимъ* къ ти́хому приста́нищу* сла́дости напра́вистеся,* пото́пльше зло́бу змíеву.* Тѣ́мже моли́теся* дарова́ти душа́мъ на́шимъ* ми́ръ и ве́лію ми́лость.

Сла́ва, и ны́нѣ, богоро́диченъ. Гла́съ и подо́бенъ то́йже:

Нетлѣ́нно родила́ еси́ Бо́га,* тлю́ потреби́вшаго и нетлѣ́ніе источи́вшаго,* Нетлѣ́нная, Непоро́чная.* Тѣ́мже молю́ Тя:* лю́тыми истлѣ́вшаго мя́,* моли́твами Твои́ми, Чи́стая, обнови́,* да сла́влю Тя́,* да любо́вію велича́ю Тя́,* ро́дъ на́шъ возвели́чившую.

Крестобогоро́диченъ, гла́съ и подо́бенъ то́йже:

Дѣ́ва Нескве́рная* иногда́ на дре́вѣ ви́дѣвши,* Его́же роди́ изъ безсѣ́менныя утро́бы,* не терпя́щи утро́бнаго уязвле́нія,* власы́ терза́ющи, глаго́лаше:* ма́ніемъ содержа́й тва́рь всю́,* ка́ко, я́ко осужде́нный,* на Кре́стъ вознесе́нъ еси́,* вся́ко хотя́й спасти́ человѣ́чество?

На стихо́внѣ окто́иха.

Тропа́рь, гла́съ 8:

Воздержа́ніемъ страсте́й огнепа́льныя умертви́вше зра́ки и движе́нія, Христо́вы му́ченицы прія́ша благода́ть неду́ги отгоня́ти немощны́хъ, и жи́вше и по кончи́нѣ чудодѣ́йствовати. Вои́стинну чу́до пресла́вно, я́ко ко́сти на́ги источа́ютъ исцѣле́нія, сла́ва Еди́ному и Созда́телю Бо́гу.


НА УТРЕНИ,
Оба кано́на окто́иха и святы́хъ кано́нъ на 4, его́же краегране́сіе: Тве́рдыя воспою́ му́ченики вѣнцено́сныя. Іо́сифъ. Гла́съ 1.

Пѣ́снь 1.

Ирмо́съ: Го́рькія рабо́ты изба́влься Изра́иль, непроходи́мое про́йде, я́ко су́шу, врага́ зря́ потопля́ема, пѣ́снь я́ко Благодѣ́телю пое́тъ Бо́гу, чудодѣ́ющему мы́шцею высо́кою, я́ко просла́вися.

Вѣнцы́ сла́вы украша́еміи, и престо́лу Бо́жію предстоя́щіи, и Боже́ственнаго свѣ́та исполня́еміи, любо́вію свѣтоно́сную па́мять ва́шу соверша́ющія, омраче́нія страсте́й, му́ченицы, изба́вите.

Боже́ственное лю́бяще благосла́віе, Бо́жія добро́ты жела́юще, житія́ кра́сная отри́нусте и всю́ си́лу прея́вственно и сме́ртію безконе́чную жи́знь, му́ченицы, обрѣто́сте.

Боже́ственною ре́вностію распаля́емы, о́гнь нече́стія угаси́ша, и свѣти́льницы, свѣ́тъ сія́юще всѣ́мъ благоче́стія пресвѣ́тло, яви́шася вѣ́рою, Ермоге́нъ и Ми́на велему́дренніи.

Богоро́диченъ: Изба́витися, Отрокови́це Всенепоро́чная, страсте́й одержа́нія рабо́мъ Твои́мъ, Твоего́ прилѣ́жно моли́ Го́спода и Влады́ку, Его́же изъ Твои́хъ, Пречи́стая, крове́й воплоти́ла еси́, на́мъ приобщи́вшагося.

Пѣ́снь 3.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Заре́ю небе́сною я́сно просвѣти́вшеся му́ченицы, тму́ разори́ша и́дольскія ле́сти и сія́ніе на́мъ исцѣле́ній облиста́ша, пѣснопою́щимъ всѣ́хъ Бо́гу: свя́тъ еси́, Го́споди.

Ме́ртвости жива́го послѣ́дуя Влады́ки, Ми́но чу́дне, плесна́ми сокруша́ешися и главу́ мучи́теля сокруша́еши врага́, утвержда́я но́ги твоя́ на тве́рдѣмъ муче́нія пути́, му́чениче му́жественнейше.

Пое́тъ Спа́са Ермоге́нъ, рука́ми усѣка́емь, свяще́нства оде́жду свѣтлѣ́йшу крове́й омоче́ньми я́сно содѣ́лавъ и подража́тель Страда́вшаго пло́тію благода́тію явля́емь.

Богоро́диченъ: Еди́ну въ жена́хъ Тя́ Кра́сный Кра́сную обрѣ́тъ, Плотоно́сецъ изъ чре́ва Твоего́ произы́де, Отрокови́це, Христо́съ, Боже́ственными красота́ми просвѣща́я ро́дъ на́шъ: тѣ́мъ Тя́ почита́емъ.

Конда́къ, гла́съ 1. Подо́бенъ: Ли́къ а́нгельскій.

Ми́ну чу́днаго, Ермоге́на боже́ственнаго и Евгра́фа ку́пно свяще́нными сладкопѣ́ніи почти́мъ вси́, я́ко почествова́вшія Го́спода, и страда́льчествовавшія за Него́, и ли́ка безпло́тныхъ на небесѣ́хъ дости́гшія, и чудеса́ точа́щія.

Сѣда́ленъ, гла́съ 8. Подо́бенъ: Прему́дрости.

Презрѣ́вше сла́ву мірску́ю, окрили́вшеся сла́вою Боже́ственною, Ми́на, Ермоге́нъ же и сла́вный Евгра́фъ и усе́рднымъ нра́вомъ тя́гость претерпѣ́ша лю́тыхъ муче́ній, пло́ти не пощадѣ́вше. Тѣ́мже, по кончи́нѣ во глубину́ морску́ю вве́ржени бы́вше, напра́вишася къ Боже́ственному хотѣ́нію. Имже вѣ́рою возопіе́мъ: моли́те Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять ва́шу.

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве, Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же. Сла́ва си́лѣ Твое́й, Го́споди.

Зако́ны возвѣща́я свѣтоза́рныя, беззако́нно твои́хъ оче́съ избоде́ніе, Ми́но, претерпѣ́лъ еси́, се́рдца очеса́ къ Свѣ́ту незаходи́мому имѣ́я прилѣ́жно смотря́ющая и поя́ ра́достно: сла́ва си́лѣ Твое́й, Го́споди.

Яви́ся язы́къ тво́й огне́мъ Ду́ха мудрѣ́йше изощре́нъ, внегда́ отсѣщи́ся: глаго́лаше бо, поя́ Бо́жія чудеса́, и мучи́теля безгла́сіе преводя́ во благочести́вую сла́ву я́вѣ Сотво́ршаго.

Вельми́ стра́сть терпя́, нога́ми отсѣца́ется Ермоге́нъ, зміи́ную попира́я главу́ и пу́ть гото́вя нра́вомъ неукло́ннымъ свидѣ́тельства, вводя́щь къ жи́зни небе́сныя свѣ́тлости.

Неуя́звлену соблюда́ющу ду́шу, Христо́съ тебѣ́ явля́ется, твоя́ я́звы, Ми́но, исцѣля́я, му́жески же терпѣ́ти тебѣ́ повелѣва́я: я́ко да тебе́ ра́ди спасе́ніе ми́лости хоти́тель всѣ́хъ зря́щихъ содѣ́лаетъ.

Богоро́диченъ: Же́злъ изъ ко́рене Іессе́ева израсти́ла еси́, процвѣ́тшая Садодѣ́лателя всея́ тва́ри, увяди́вшаго сады́ непло́днаго зна́нія, вѣ́ру же на́мъ и́стиннѣйшую всади́вшаго благоче́стно, Чи́стая Дѣ́во Всепѣ́тая.

Пѣ́снь 5.

Ирмо́съ: Бо́гъ Сы́й мíра, Оте́цъ щедро́тъ, Вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Что́ всу́е мяте́шися? — вопія́ху ку́пно судіи́ пребеззако́нному му́ченицы, — си́лу Подая́й предстои́тъ на́мъ, Еди́нъ въ крѣ́пости непобѣди́мь Сы́й, Его́же ра́ди ра́ны терпи́мъ крѣпча́йше.

Бя́ше внеза́пное преложе́ніе чу́днаго Ермоге́на ко Го́споду: ба́нею бо очища́ется и судо́мъ Боже́ственнымъ архіере́йства свѣ́тъ воспріе́млетъ, уче́ньми озаря́яй въ нощи́ лю́тыхъ су́щія.

Витíй оста́вльше неиску́сный у́мъ, непи́смянниковъ плете́ньми улови́стеся, умудри́вшу Ду́ху вы́, я́ко и́стинно му́ченицы, и ко вся́кой му́къ бу́ри си́льны въ крѣ́пости содѣ́лавшу вѣ́рою.

Богоро́диченъ: Святы́хъ а́нгелъ, Дѣ́во Чи́стая, преиму́щи яви́лася еси́, ро́ждшая Совѣ́та Вели́каго Ангела — Бо́га Емману́ила, человѣ́ки небе́сными Свои́мъ сни́тіемъ содѣ́лавша, Отрокови́це, за благоутро́біе неисповѣди́мое.

Пѣ́снь 6.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ нетлѣ́нія, Ро́ждшую сохрани́ неврежде́нну.

Спа́слъ еси́ Іо́ну отъ звѣ́ря тридне́внаго, образу́юща погребе́ніе твое́, Всеси́льне; тѣлеса́ же му́ченикъ, въ пучи́ну вве́ржена, напра́вилъ еси́ къ тиша́йшему приста́нищу погребе́нія, идѣ́же твое́ Боже́ственное хотѣ́ніе, въ на́ше вѣ́рныхъ снабдѣ́ніе.

Тѣлеса́ ва́ша, непобѣди́міи му́ченицы, глубина́ невре́дно су́ши подае́тъ, предводя́щимъ небе́снымъ а́нгеломъ, блаже́нніи, и всѣ́мъ положе́ніе повѣ́дающимъ ва́ше, су́щее исцѣле́ній источе́ніе и страсте́й душе́вныхъ избавле́ніе.

Чи́ни а́нгельстіи ва́шему удиви́шася терпѣ́нію, ка́ко безпло́тнаго съ тѣ́ломъ побѣди́сте, му́ченицы, змíя и побѣ́ды вѣнцы́ увязо́стеся, Престо́лу Бо́жію предстоя́ще и Боже́ственными заря́ми освѣща́еми.

Богоро́диченъ: Преста́ Тобо́ю, Дѣ́во, сме́рть, Жи́знь бо — Христа́ — родила́ еси́, да́рующаго чи́стѣ вѣ́рующимъ въ Того́ безсме́ртіе и боже́ственное ра́дованіе; Сему́, Всесвята́я, моли́ся изба́вити отъ бѣ́дъ рабы́ Твоя́.

Конда́къ, гла́съ 4. Подо́бенъ: Вознесы́йся.

Добропѣ́сненный гла́съ твои́хъ слове́съ, Ермоге́на изъ глубины́ поги́бели возве́дъ, поста́ви на ка́мени жи́зни, отону́дуже и Евгра́фъ, царя́ обличи́въ, ра́дуяся, посѣка́ется въ сла́вную главу́, но прилѣ́жно моли́, Ми́но, спасти́ся всѣ́мъ, любо́вію чту́щимъ тя́.

Икосъ:

Житіе́ твое́ боголѣ́пно, и сла́дко твое́ сло́во, мно́гое дерзнове́ніе, Ми́но, и уче́ніе твое́, и му́жество чу́дно бя́ше къ беззако́нникомъ, показу́яся тве́рдо, ника́коже убоя́вся; но, наказу́я, вся́ научи́лъ еси́ въ Тре́хъ Ли́цѣхъ покланя́тися Бо́гу Еди́ному и служи́ти несомнѣ́нною мы́слію, и, па́ки на́съ ра́ди ны́нѣ въ послѣ́дняя Сы́на Бо́жія пло́ть пріе́мша, Его́же исповѣ́дуя, улови́лъ еси́ Ермоге́на. Тѣ́мъ съ ни́мъ моли́ спасти́ся всѣ́мъ, любо́вію чту́щимъ тя́.

Пѣ́снь 7.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Гла́съ пра́зднующихъ чи́стѣ, идѣ́же и шу́мъ слы́шится, ра́достною душе́ю, страда́льцы, всели́стеся, весе́лія исполня́емы и пою́ще: отце́въ Бо́же, благослове́нъ еси́.

Сладка́ мнѣ́, вопія́ше Ермоге́нъ, е́юже умира́ю, сме́рть: мнѣ́ е́же жи́ти е́сть Христо́съ, е́же умре́ти же — приобрѣ́теніе безмѣ́рно; да отсѣку́тся мои́ у́ды, любо́вію пою́щу: отце́въ Бо́же, благослове́нъ еси́.

Му́дростію твердѣ́йшею въ живу́щихъ тебе́ сама́го написа́лъ еси́ кни́зѣ, о Евгра́фе му́дре, главѣ́ бо отсѣ́ченѣй, я́коже на колесни́цу, твое́ю всѣ́лъ еси́ кро́вію и къ невече́рнему Свѣ́ту преста́вился еси́.

Богоро́диченъ: Не опали́въ Твоего́ чре́ва, не поколеба́въ дѣ́вства зна́меній, вопло́щшееся Сло́во изъ Тебе́ про́йде, подая́ нетлѣ́ніе и жи́знь на́мъ, Отрокови́це, пою́щимъ: отце́въ Бо́же, благослове́нъ еси́.

Пѣ́снь 8.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Па́даетъ предъ нога́ми твои́ми суему́дренный, попира́емь, Ми́но богому́дре, оче́съ бо лиши́въ тя́ и язы́ка, твоего́ по́мысла не поколеба́ стоя́нія лу́чшаго. Тѣ́мже ра́достно взыва́лъ еси́: да благослови́тъ тва́рь вся́ Го́спода и превозно́ситъ во вся́ вѣ́ки.

Егда́ суро́вѣйшимъ произволе́ніемъ обои́хъ ру́къ и но́гъ тя́ мучи́тель лиши́ пребезу́мный, тогда́, му́дре, натрижне́нія жела́я, Ермоге́не, Христу́ пѣснопѣ́лъ еси́, ра́дуяся: да благослови́тъ тва́рь вся́ Го́спода и превозно́ситъ во вся́ вѣ́ки.

Пою́ твоя́, Ми́но, боже́ственная страда́нія, чту́ Ермоге́новы по́двиги, покланя́юся моще́мъ, воспѣва́ю ра́ны, ю́зы, гоне́нія и сме́рть, и́миже къ жи́зни взя́стеся, вопію́ще: да благослови́тъ тва́рь вся́ Го́спода и превозно́ситъ во вся́ вѣ́ки.

Богоро́диченъ: Ста́мну Тя́, ма́нну иму́щую Божества́, позна́хомъ, Отрокови́це, киво́тъ, и трапе́зу, и свѣ́щникъ, Престо́лъ Бо́жій, и пала́ту, и мо́стъ, преводя́щь къ Боже́ственнѣй жи́зни воспѣва́ющія: да благослови́тъ тва́рь вся́ Го́спода и превозно́ситъ во вся́ вѣ́ки.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Се́ свѣтоза́рное торжество́ свѣтови́дныхъ му́чениковъ всѣ́мъ просія́, озаря́ющее вселе́нныя концы́ и ду́шъ слѣпоту́ отъе́млющее; стеце́мся преусе́рдно, свяще́ніе почерпе́мъ.

Ихже бла́гъ получи́сте небе́сныя сла́вы, ея́же сподо́бистеся, вѣ́рою свѣ́тлую па́мять ва́шу чту́щимъ, я́ко Бо́гу предстоя́ще всегда́, получи́ти моли́теся, великому́ченицы, мо́лимся.

Тѣ́ло и ду́шу принесо́сте Творцу́ всѣ́хъ, же́ртву непоро́чну, всесожже́гшеся огне́мъ муче́ній, и му́чениковъ лико́мъ причи́слистеся, Свѣ́томъ чистѣ́йшимъ просвѣща́еми, всехва́льніи.

Взя́тся, ко оби́телемъ вселя́яся, свѣтови́дный му́чениковъ ли́къ боже́ственный и предстои́тъ Отцу́, Сы́ну же и Ду́ху, наслажда́яся я́сно обоже́нія, Ми́на со Ермоге́номъ и Евгра́фомъ, богому́дріи.

Богоро́диченъ: Сія́ніе блиста́нія Рождества́ Твоего́ отри́нувшееся естество́ на́ше, Всенепоро́чная, ви́дѣ и изъ но́щи невѣ́дѣнія изба́вися и страсте́й те́мнаго смуще́нія. Тѣ́мъ Тя́ я́ко вино́вну спасе́нія на́шего чти́мъ.

Свѣти́ленъ. Подо́бенъ: Не́бо звѣзда́ми.

Витíйскими твои́ми словесы́ и боже́ственными чудесы́, Ми́но, сострада́льца привле́клъ еси́ свяще́ннаго Ермоге́на, съ ни́мже тя́ и со Евгра́фомъ ны́нѣ прера́достно благохва́лимъ.

Сла́ва, и ны́нѣ, богоро́диченъ:

Гора́, ю́же прови́дѣ дре́вле боже́ственный Авваку́мъ, присѣ́нная и часта́ Ты́ показа́лася еси́, Дѣ́во, и Тя́ Дави́дъ имену́етъ усыре́нную и ту́чную.


НА ЛИТУРГІИ,

Проки́менъ, гла́съ 4: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Апо́столъ ко Ефесе́емъ, зача́ло 233. Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, [и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 106. Прича́стенъ: Ра́дуйтеся, пра́ведніи, [о Го́сподѣ, пра́вымъ подоба́етъ похвала́].

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 82 – 86 об.

/ Къ оглавленію раздѣла /


Наверхъ / Къ титульной страницѣ

0