Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 10-й де́нь.
Слу́жба и́же во святы́хъ отцу́ на́шему Іоаса́фу, епи́скопу Бѣлогра́дскому.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 1:

Воспои́мъ, бра́тіе, свѣтлопра́зднственную пѣ́снь,* новоявле́ннаго уго́дника Бо́жія ублажа́юще* и къ тому́ вознося́ще моли́тву,* во е́же очи́стити серде́цъ на́шихъ очеса́* и па́мятію чуде́съ его́* просвѣти́ти ду́ши на́ша.

Іоаса́фе, уго́дниче Христо́въ,* всѣ́хъ добродѣ́телей подви́жникъ бы́лъ еси́,* на земли́ у́бо ско́рби поне́съ,* на небеси́ же ра́дость вѣ́чную отъ Бо́га пріе́мъ,* услы́ши моле́ніе ча́дъ твои́хъ* и моли́ спасти́ и просвѣти́ти ду́ши на́ша.

Ни́щія и ско́рбныя возлюби́вый* и о грѣ́шныхъ лю́дехъ моли́тву всегда́ возноси́вый,* са́мъ отъ Христа́ возлю́бленъ бы́лъ еси́,* Іоаса́фе святи́телю:* помина́й на́съ, по́двиги твоя́ почита́ющихъ,* и моли́тву сотвори́ ко Го́споду* спасти́ и просвѣти́ти ду́ши на́ша.

Кто́ исчи́слитъ мно́жество исцѣле́ній,* отъ чудотво́рныхъ моще́й твои́хъ источа́емыхъ, уго́дниче Христо́въ?* Кто́ не подиви́тся вели́кому твоему́ заступле́нію?* Ко́е ли се́рдце человѣ́ческое любо́вію твое́ю не умили́тся?* Ди́вно просла́вися въ тебѣ́ Госпо́дь,* просвѣща́яй и спаса́яй ду́ши на́ша.

Сла́ва, гла́съ 6:

Отрочеству твоему́ наче́ншуся, преподо́бне,* подъ кро́въ Влады́чицы прія́тъ бы́лъ еси́,* я́коже роди́тель тво́й видѣ́ніемъ въ то́мъ увѣ́рися;* сконча́вшуся же земно́му житію́ твоему́,* ино́е видѣ́ніе лю́ди увѣря́етъ,* я́ко ду́хъ тво́й просла́вленъ е́сть отъ Бо́га.* Тому́ и о на́съ моли́ся, святи́телю Христо́въ,* поми́ловатися душа́мъ на́шимъ.

И ны́нѣ, богоро́диченъ, [гла́съ то́йже]:

Богоро́дице, Ты́ еси́ лоза́ и́стинная,* возрасти́вшая на́мъ Пло́дъ живота́,* Тебѣ́ мо́лимся:* моли́ся, Влады́чице, со святы́ми апо́столы,* поми́ловати ду́ши на́ша.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Іоаса́фе, святи́телю Бо́жій,* моли́твы непреста́нныя кади́ло* и предста́телю о лю́дехъ теплѣ́йшій,* и на́съ, пою́щихъ тя́, не отри́ни,* но помо́щникъ бу́ди на́мъ при́сный.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Воспои́мъ, бра́тіе,* уго́дника Христо́ва Іоаса́фа,* того́ подвиза́юще на моли́тву* отъ бѣ́дъ изба́витися на́мъ* и дарова́тися на́мъ пре́жде конца́ покая́нію.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Не довлѣ́ютъ тебѣ́, святи́телю Христо́въ,* человѣ́ческая благохвале́нія,* зане́ отъ Пречи́стыя Богоро́дицы* во млады́хъ лѣ́тѣхъ твои́хъ* я́ко избра́нникъ Бо́жій свидѣ́тельствованъ еси́.

Сла́ва, гла́съ 6:

Преподо́бне о́тче,* во всю́ зе́млю изы́де вѣща́ніе исправле́ній твои́хъ,* тѣ́мже на небесѣ́хъ обрѣ́лъ еси́ мзду́ трудо́въ твои́хъ,* де́монская разори́лъ еси́ по́лчища,* и дости́глъ еси́ чино́въ а́нгельскихъ,* и́хже житію́ непоро́чно поревнова́лъ еси́.* Дерзнове́ніе имѣ́я ко Христу́ Бо́гу,* ми́ръ испроси́ душа́мъ на́шимъ.

И ны́нѣ, богоро́диченъ, [гла́съ тойже]:

Вели́кихъ дарова́ній,* Чи́стая Дѣ́во Богома́ти,* Ты́ сподо́билася еси́:* я́ко родила́ еси́ пло́тію* Еди́наго отъ Тро́ицы Христа́ Жизнода́вца,* во спасе́ніе ду́шъ на́шихъ.

Тропа́рь, гла́съ 3:

Святи́телю, Христу́ Бо́гу возлю́бленне,* при́вило вѣ́ры и о́бразъ милосе́рдія лю́демъ бы́лъ еси́,* бдѣ́ніемъ же, посто́мъ и моли́твою,* я́ко свѣти́льникъ пресвѣ́тлый, просія́лъ еси́* и просла́вленъ отъ Бо́га яви́лся еси́:* тѣ́ломъ у́бо въ нетлѣ́ніи почива́я,* ду́хомъ же Престо́лу Бо́жію предстоя́,* чудеса́ пресла́вная источа́еши.* Моли́ Христа́ Бо́га,* да утверди́тъ оте́чество на́ше въ Правосла́віи и благоче́стіи* и спасе́тъ ду́ши на́ша.

Инъ тропа́рь, гла́съ 2:

Моли́твенниче издѣ́тска преизря́дный,* богоизбра́нный святи́телю Христо́въ Іоаса́фе,* пра́вило вѣ́ры и о́бразъ милосе́рдія благоче́стнымъ житіе́мъ всѣ́мъ явля́еши* и съ вѣ́рою къ тебѣ́ притека́ющимъ оби́льно исцѣле́нія источа́еши.* Моли́ Христа́ Бо́га,* да утверди́тъ въ держа́вѣ Россíйстѣй правовѣ́ріе, ми́ръ и благоче́стіе* и спасе́тъ ду́ши на́ша.

Сла́ва, и ны́нѣ, богоро́диченъ, гла́съ 3.

Тя́, хода́тайствовавшую спасе́ніе ро́да на́шего,* воспѣва́емъ, Богоро́дице Дѣ́во:* пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ,* Кресто́мъ воспріи́мъ Стра́сть,* изба́ви на́съ отъ тли́, я́ко Человѣколю́бецъ.

Зри́: Слу́жбу вселе́нскихъ святы́хъ, въ ты́я дни́ па́мяти святи́теля Іоаса́фа прилучи́вшуюся, пое́мъ на повече́ріи во и́нъ де́нь.


НА ВЕЛИЦѢЙ ВЕЧЕРНИ,
Блаже́нъ му́жъ, 1-й антифо́нъ. На Го́споди воззва́хъ: стихи́ры на 8, гла́съ 8:

Ди́венъ Бо́гъ во святы́хъ Свои́хъ,* въ ро́дѣхъ христіа́нскихъ чудодѣ́йствуяй* и но́выя избра́нники Своя́ явля́яй:* зри́мъ бо и ны́нѣ Іоаса́фа уго́дника* отъ Христа́ прославля́ема,* и красото́ю добродѣ́телей свои́хъ страну́ на́шу озаря́юща,* и дерзнове́ніе ве́ліе иму́ща* ми́ръ вселе́ннѣй дарова́ти* и душа́мъ на́шимъ ве́лію ми́лость. [Два́жды.]

Ли́къ святы́хъ Твои́хъ, Го́споди, на небесѣ́хъ* умно́жися преставле́ніемъ святи́теля Твоего́ Іоаса́фа,* его́же и на земли́ Це́рковь воспѣва́етъ:* того́ у́бо моли́твы о на́съ пріими́, Человѣколю́бче,* я́ко имѣ́яй ве́лію ми́лость.

Нощнѣ́й тьмѣ́ огустѣва́ющей,* умножа́ется звѣ́здный бле́скъ* и къ тому́ о́чи заблу́ждшихъ ра́достно возво́дятся;* та́ко и умно́жившейся на земли́ грѣхо́внѣй тьмѣ́,* возведе́мъ горѣ́ о́чи на́ши, бра́тіе,* и сія́ніе добродѣ́телей святи́теля узрѣ́вше,* къ Небе́сному Оте́честву потщи́мся,* его́же да не лиши́тъ Госпо́дь на́съ, грѣ́шныхъ,* имѣ́яй ве́лію ми́лость.

Гла́съ 5. [Подо́бенъ: Ра́дуйся.]

Ра́дуйся, свяще́нная главо́,* святи́телю Бо́жій Іоаса́фе,* па́стырей богому́дрое пра́вило* и и́ноковъ наста́вниче предо́брый;* ра́дуйся, боля́щихъ цѣли́телю пресла́вный* и скорбя́щихъ утѣ́шителю ми́лостивый.* Моли́ся при́сно ко Го́споду* и на́мъ подража́телемъ тебѣ́ бы́ти,* и грѣхо́вная вся́ презрѣ́вшимъ,* еди́ному Бо́гу рабо́тати. [Два́жды.]

Ра́дуйся, страсте́й сопротивобо́рче* и духо́внаго дѣ́ланія тру́дниче;* ра́дуйся, пра́ведниче, смиренному́дрія испо́лненный,* го́рдыхъ мíра сего́ обличи́телю* и лѣни́выхъ гро́зный кара́телю.* Не преста́й моля́ся ко Го́споду о на́съ,* во е́же спасти́ся на́мъ.

Ра́дуйся, небе́сный жи́телю,* на зе́млю ми́лостивнымъ о́комъ призира́яй* и моли́твы пѣвце́въ твои́хъ пріе́мляй;* ра́дуйся, очеса́ твоя́ всегда́ на не́бо возводи́вый* и о земны́хъ стяжа́ніихъ небрегíй.* Научи́ у́бо и на́съ, святи́телю Христо́въ,* на небесѣ́хъ сокро́вище стяжа́ти* и твою́ та́мо сла́ву я́вѣ узрѣ́ти.

Сла́ва, гла́съ 2:

Кíими похва́льными вѣнцы́* увѣнча́емъ святи́теля Христо́ва,* Госпо́дню сла́ву непреста́нно возвѣща́вшаго* и благоче́стіе пра́вое повсю́ду насади́вшаго,* за́повѣдей Христо́выхъ живу́ю скрижа́ль,* на ли́ца человѣ́ковъ не взира́вшаго,* но ду́ши всѣ́хъ ко спасе́нію приводи́вшаго?* Сего́ бо вѣнцы́ нетлѣ́нными* вѣнча́етъ Христо́съ Бо́гъ на́шъ,* имѣ́яй ве́лію ми́лость.

И ны́нѣ, богоро́диченъ, [гла́съ то́йже]:

Пре́йде сѣ́нь зако́нная,* благода́ти прише́дши:* я́коже бо купина́ не сгара́ше, опаля́ема,* та́ко Дѣ́ва родила́ еси́* и Дѣ́ва пребыла́ еси́.* Вмѣ́сто столпа́ о́гненнаго,* пра́ведное возсія́ Со́лнце,* вмѣ́сто Моисе́я — Христо́съ,* спасе́ніе ду́шъ на́шихъ.

Вхо́дъ. Проки́менъ дне́ и чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́новы чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ра хра́ма и свята́го, гла́съ 1:

Подоба́ше непоро́чно соблюде́нному* святи́теля дѣ́вственному тѣ́лу* и нетлѣ́ніемъ вѣ́чнымъ просла́витися:* сіе́ бо, добродѣ́тельми преподо́бнаго очища́емо,* еще́ жи́ву ему́ су́щу,* хра́мъ Свята́го Ду́ха быва́етъ* и по преставле́ніи его́ исто́чникъ чуде́сныхъ дарова́ній явля́ется,* и́мже со умиле́ніемъ дивя́щеся,* ко уго́днику вознесе́мъ моли́тву,* о спасе́ніи ду́шъ на́шихъ.

Сла́ва, гла́съ 6:

Ди́вный во святы́хъ Госпо́дь* въ житіи́ святи́теля Іоаса́фа просла́вися,* и по преставле́ніи его́ нетлѣ́нными моща́ми чудодѣ́йствуетъ,* и безчи́сленныя лю́ди вѣ́ровати* и упова́ти на по́мощь небе́сную науча́етъ.* Потщи́мся у́бо, о бра́тіе,* е́же еди́но на потре́бу иска́ти,* и ду́ши на́ша покая́ніемъ очища́ти,* святи́теля въ по́мощь призыва́юще,* и въ Тро́ицѣ воспѣва́емаго Бо́га* прославля́ти во вѣ́ки.

И ны́нѣ, богоро́диченъ, [гла́съ то́йже]:

Творе́цъ и Изба́витель мо́й, Пречи́стая,* Христо́съ Госпо́дь, изъ Твои́хъ ложе́снъ проше́дъ,* въ мя́ оболкíйся,* пе́рвыя кля́твы Ада́ма свободи́.* Тѣ́мже Ти́, Всечи́стая,* я́ко Бо́жіи Ма́тери же и Дѣ́вѣ вои́стину,* вопіе́мъ немо́лчно:* ра́дуйся, а́нгельски,* ра́дуйся, Влады́чице,* предста́тельство, и покро́ве,* и спасе́ніе ду́шъ на́шихъ.

На стихо́внѣ стихи́ры, гла́съ 7:

Украси́теся, черто́зи небе́сніи,* отве́рзитеся, две́ри до́му Бо́жія:* се́ бо отъ земли́ вознесе́ся пра́ведная душа́ святи́теля* и со а́нгелы водворя́ется,* и́мже житіе́мъ свои́мъ поревнова́.* Того́ моли́твами, Христе́ Бо́же,* пощади́ и спаси́ ду́ши на́ша.

[Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.]

Пра́ведныхъ ду́ши въ руцѣ́ Бо́жіей,* и не ко́снется и́хъ му́ка,* но и ме́ртвенное тѣ́ло пра́веднаго Іоаса́фа* тлѣ́нію неприча́стно пребыва́етъ* и растлѣ́ннымъ грѣхми́ душа́мъ исто́чникъ благода́ти явля́ется,* еще́ же и боля́щимъ здра́віе да́руетъ,* егда́ моли́твъ уго́дника Бо́жія воспро́сятъ* и къ моща́мъ его́ съ вѣ́рою притека́ютъ.

[Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.]

Поревну́имъ о благоче́стіи, бра́тіе,* зри́мъ бо сіе́ вѣ́чною сла́вою вѣнча́емо:* возненави́димъ горды́ню и сребролю́біе,* я́ко, та́я отри́нувъ, святи́тель Христо́въ* на небеси́ и на земли́ вѣ́чную сла́ву прія́тъ* и сокро́вище обрѣ́те неиждива́емое;* тѣ́мже и о грѣ́шныхъ лю́дехъ моли́тися дерзнове́ніе* и исцѣле́ній благода́ть отъ Бо́га стяжа́,* да и беззако́нныя путе́мъ Бо́жіимъ научи́тъ,* и нечести́выя ко Го́споду обрати́тъ.

Сла́ва, и ны́нѣ, богоро́диченъ, [гла́съ то́йже]:

Подъ кро́въ Тво́й, Влады́чице,* вси́ земноро́дніи, прибѣга́юще, вопіе́мъ Ти́:* Богоро́дице, упова́ніе на́ше,* изба́ви ны́ отъ безмѣ́рныхъ прегрѣше́ній* и спаси́ ду́ши на́ша.


НА УТРЕНИ,
На Бо́гъ Госпо́дь: тропа́рь свята́го, два́жды. Сла́ва, и ны́нѣ, богоро́диченъ: Тя́, хода́тайствовавшую...

По 1-мъ стихосло́віи сѣда́ленъ, гла́съ 4:

Да возвели́чится Іоаса́фъ, святи́тель Христо́въ,* да наслѣ́дитъ угото́ванное ему́ вѣ́чное Ца́рство:* то́й бо Христу́ вѣ́рно служа́ше,* о ме́ньшей бра́тіи Его́ при́сно пекíйся,* и ка́ющіяся въ любо́вь свою́ пріима́ше,* и ны́нѣ мо́лится о душа́хъ на́шихъ. [Два́жды.]

Сла́ва, и ны́нѣ, богоро́диченъ:

Те́плое заступле́ніе су́щимъ въ бѣда́хъ,* и помо́щницу на́шу,* и къ Бо́гу примире́ніе,* Еюже отъ тли́ изба́вихомся,* Богоро́дицу, вѣ́рніи, ублажа́емъ.

По 2-мъ стихосло́віи сѣда́ленъ, гла́съ 8:

Въ житіи́ твое́мъ, уго́дниче Христо́въ,* посто́мъ и труды́ тѣ́ло твое́ изнури́лъ еси́,* сего́ ра́ди по сме́рти твое́й нетлѣ́ніемъ процвѣте́* и исто́чникъ исцѣле́ній вѣ́рнымъ быва́етъ.* Моли́ приле́жно Христа́ Бо́га* спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Яко всенепоро́чная Невѣ́ста Творца́,* я́ко неискусому́жная Ма́ти Изба́вителя,* я́ко вмѣсти́лище Вы́шняго су́щи, Всепѣ́тая,* беззако́ній мя́ су́ща скве́рное жили́ще* и въ ра́зумѣ бы́вша бѣсо́мъ игра́лище* потщи́ся отъ си́хъ злодѣ́йствія мя́ изба́вити,* свѣ́тлое жили́ще добродѣ́телію содѣ́лавши;* Свѣтопріе́мнице нетлѣ́нная,* отжени́ о́блакъ страсте́й* и сподо́би го́рнія свѣ́тлости* и неле́стнаго осія́нія* Свѣ́та Невече́рняго Твоего́.

Поліеле́й и велича́ніе:

Велича́емъ тя́, святи́телю о́тче Іоаса́фе, и чти́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Услы́шите сія́, вси́ язы́ци...

По поліеле́и сѣда́ленъ, гла́съ 2:

Пріиди́те, вси́ вѣ́рніи,* обстоя́ще многоцѣле́бныя мо́щи святи́теля,* изліе́мъ сердца́ на́ша въ моли́твѣ,* да пребу́детъ съ на́ми ду́хомъ свои́мъ,* и на блага́я дѣя́нія да наста́витъ на́съ,* и да научи́тъ искуше́нія пло́ти побѣжда́ти* и еди́ному Бо́гу угожда́ти. [Два́жды.]

Сла́ва, и ны́нѣ, богоро́диченъ:

Боже́ственнаго естества́ не отлу́чься,* Пло́ть бы́сть во чре́вѣ Твое́мъ,* но Бо́гъ и вочеловѣ́чься пребы́сть,* Иже по рождествѣ́ Ма́терь Тя́ Дѣ́ву,* я́коже пре́жде рождества́, сохрани́ всенепоро́чну, еди́нъ Госпо́дь.* Того́ приле́жно моли́* дарова́ти на́мъ ве́лію ми́лость.

Степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы. внуши́те, вси́ живу́щіи по вселе́ннѣй. Вся́кое дыха́ніе... Ева́нгеліе отъ Іоа́нна, зача́ло 36.

По Ева́нгеліи стихи́ра, гла́съ 6:

Непреста́нною моли́твою,* учи́тельнымъ сло́вомъ,* вели́кимъ милосе́рдіемъ и добродѣ́тельнымъ житіе́мъ* о́бразъ вѣ́рнымъ бы́лъ еси́, богому́дре Іоаса́фе,* всѣ́хъ ко Христу́ приводя́* и на пу́ть спасе́нія наставля́я;* твоего́ пастыренача́льства не лиши́ и на́съ,* вели́кій святи́телю Бо́жій,* почита́ющихъ па́мять твою́ вѣ́рно.

Кано́нъ Богоро́дицы на 6 и свята́го на 8.

Кано́нъ святи́телю Іоаса́фу, имѣ́яй краегране́сіе сицево́: Іоаса́фе святи́телю, моли́ся о царѣ́ и лю́дехъ. Гла́съ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Іоаса́фа святи́теля воспѣва́юще по́двиги, очи́стимъ по́мыслы ума́ на́шего, бра́тіе, того́ подвиза́юще на моли́тву о проще́ніи грѣ́хъ на́шихъ и благода́тнаго умиле́нія дарова́ніи.

О твое́мъ благоче́стіи измла́да потща́вшеся, роди́теліе твои́, уго́дниче Христо́въ, досто́йную мзду́ трудо́въ свои́хъ въ тебѣ́ стяжа́ша, я́ко отъ младе́нчества твоего́ благочести́вымъ нра́вомъ ра́дость тѣ́мъ бы́лъ еси́.

Аннѣ пра́веднѣй уподо́бися оте́цъ тво́й, святи́телю: та́ бо Дще́рь свою́ во Свято́е святы́хъ вводи́му ви́дѣ, се́й же тя́ отъ Тоя́жде Пресвяты́я Богоро́дицы архіере́йскою сла́вою вѣнча́нна въ видѣ́ніи чу́днѣмъ позна́ти сподо́бися.

Себе́ сама́го пла́чу окая́нный а́зъ, отъ ю́ности страсте́мъ поработи́вся: поми́луй мя́ предста́тельствомъ твои́мъ, святи́телю, отъ ю́ности стра́сти поработи́вый и еди́ному Бо́гу до сме́рти послужи́вый.

Богоро́диченъ: Го́ру святу́ю, превы́шнее носи́ло, Ма́терь Бо́жію и Дѣ́ву и́стинную по рождествѣ́ воспои́мъ.

Катава́сія 4-го Септе́мврія: Кре́стъ начерта́въ, Моисе́й... 10-го Деке́мврія: Спасе́ лю́ди чудодѣ́йствуяй Влады́ка... или́: Христо́съ ражда́ется...

Пѣ́снь 3.

Ирмо́съ: Съ высоты́ снизше́лъ еси́ во́лею на зе́млю, превы́ше вся́каго нача́ла, и смире́нное возне́слъ еси́ изъ а́да преиспо́дняго естество́ человѣ́ческое: нѣ́сть бо свя́тъ па́че Тебе́, Человѣколю́бче.

Аще и ча́до послу́шное роди́телемъ твои́мъ бы́лъ еси́, Іоаса́фе, но, Го́спода па́че си́хъ возлюби́въ, изъ оте́ческаго до́ма спасе́нія ра́ди удали́лся еси́, и науче́ніе кни́жное воспріи́мъ, во оби́тель и́ноческую себе́ заключи́лъ еси́.

Фарисе́йскаго возноше́нія чу́ждь яви́лся еси́, о́тче преподо́бне, мона́шеское же смире́ніе отъ ю́ности возлюби́въ, та́йными по́двиги пло́ть смиря́лъ еси́ и ду́шу твою́ моли́твою предъ Отце́мъ Небе́снымъ просвѣща́лъ еси́.

Еже жи́ти ми́ — Христо́съ, и сме́рть — пріобрѣ́теніе, — глаго́лалъ еси́ въ себѣ́, Христо́въ уго́дниче, и болѣ́знемъ пло́ть твою́ сокруша́ющимъ, труды́ ко трудо́мъ Го́спода ра́ди прилага́лъ еси́.

Свято́е послуша́ніе воспріи́мъ и свяще́нства оде́ждою укра́шенъ, Іоаса́фъ, уго́дникъ Христо́въ, учи́тель до́бръ отроко́мъ быва́етъ, сло́вомъ и житіе́мъ тѣ́хъ благоче́стію науча́я и во млады́хъ лѣ́техъ у́мъ зрѣ́лый явля́я.

Богоро́диченъ: Неискусобра́чная, Бо́га пло́тію ро́ждшая, стра́стными прило́ги преклоне́на мя́ утверди́: нѣ́сть бо, Чи́стая, ра́звѣ Тебе́ помо́щница.

Сѣда́ленъ, гла́съ 6:

Ка́я добродѣ́тель не обрѣ́те въ души́ твое́й обита́лища? Ко́его по́двига не бы́лъ еси́ побо́рникъ? Нищета́ бо духо́вная, и о Ца́рствіи небе́снѣмъ пла́чь, и нра́ва кро́тость, и пра́вды иска́ніе, и ко бли́жнимъ милосе́рдіе, и се́рдца чистота́ во твое́мъ непоро́чнѣмъ житіи́ просія́ша. Тѣ́хъ у́бо дарова́ній о́бщники ны́, моля́щіяся, сотвори́, и о душа́хъ на́шихъ предста́тель бу́ди, Іоаса́фе, избра́нниче Бо́жій. [Два́жды.]

Сла́ва, и ны́нѣ, богоро́диченъ:

Благослове́нную нарекíй Твою́ Ма́терь, прише́лъ еси́ на Стра́сть во́льнымъ хотѣ́ніемъ, возсія́въ на Крестѣ́, взыска́ти хотя́ Ада́ма, глаго́ля а́нгеломъ: сра́дуйтеся Мнѣ́, я́ко обрѣ́теся поги́бшая дра́хма. Вся́ му́дрѣ устро́ивый, Бо́же на́шъ, сла́ва Тебѣ́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный, нетлѣ́нною дла́нію, и спасе́ зову́щія: сла́ва, Христе́, си́лѣ Твое́й.

Вѣ́мъ и а́зъ пу́ть, ко спасе́нію веду́щій, но лѣ́ности пло́ти моея́ не побѣжда́ю, увы́ мнѣ́! Сего́ ра́ди тя́, святи́телю, призыва́ю въ моли́тву, да жела́ніе спасе́нія во мнѣ́ утверди́ши.

Якорь спасе́нія имѣ́я — наде́жду на Го́спода, служе́ніе игу́менское прія́лъ еси́, и къ попече́ніемъ о строи́тельствѣ домо́внѣмъ понужда́емь, ду́шу твою́ устроя́ти ко спасе́нію не преста́лъ еси́; сему́ и мене́, многосу́етнаго, науча́й, о́тче преподо́бне.

Труды́ ко трудо́мъ прилага́я и оби́тель Лубе́нскую отъ разруше́нія воздвиза́я, по земли́ же Россíйстѣй за ми́лостынею стра́нствуя, святи́тель Іоаса́фъ цари́цу во благоче́стіи утвержда́етъ и вся́ лю́ди спасе́нію ду́шъ науча́етъ.

Имѣ́я въ се́рдцѣ свое́мъ при́сную къ ни́щимъ любо́вь, Іоаса́фъ, Христо́въ уго́дникъ, оте́ческое попече́ніе о монасты́рскихъ тру́дницѣхъ явля́етъ и отъ доста́тка своего́ щедро́ты бли́жнимъ свои́мъ отверза́етъ.

Богоро́диченъ: Госпоже́ Всепѣ́тая, Богороди́тельнице, моя́ помышле́нія Твои́ми моли́твами очи́стивши, покажи́ мя благопло́дна, Ма́ти всѣ́хъ Бо́га.

Пѣ́снь 5.

Ирмо́съ: Ны́нѣ воста́ну, проро́чески рече́ Бо́гъ, ны́нѣ просла́влюся, ны́нѣ вознесу́ся, па́дшаго пріе́мъ отъ Дѣ́вы и къ свѣ́ту у́мному вознося́й Моего́ Божества́.

Тебе́, святи́телю Христо́въ, молю́ въ сокруше́ніи се́рдца: я́коже въ житіи́ твое́мъ ка́ющіяся проща́лъ еси́, та́ко, и моего́ се́рдца сокруше́ніе зря́, умоли́ Го́спода грѣхо́мъ мои́мъ проще́ніе дарова́ти.

Еле́нь на исто́чники водны́я устремля́ется, ты́ же, уго́дниче, ко сла́вѣ Це́ркве Христо́вы вся́ дѣя́нія и по́мыслы твоя́ при́сно устремля́лъ еси́, и та́ко оби́тели святи́теля Аѳана́сія и преподо́бнаго Се́ргія ели́ко строе́ніемъ церко́внымъ, толи́ко и благоче́стіемъ бра́тіи украси́лъ еси́.

Лю́діе, слы́шите и чуди́теся уго́дника смиренному́дрію, се́й бо свята́го Аѳана́сія въ видѣ́ніи зри́тъ и тому́ вопроси́вшу отвѣщава́етъ: хощу́, да мене́, я́коже грѣ́шника, нака́жеши.

Юнаго Соломо́на, не бога́тства, но му́дрости отъ яви́вшагося Го́спода прося́ща, похваля́етъ Вы́шній и вселе́нная при́сно прославля́етъ, но того́ му́дрѣйшій Іоаса́фъ показу́ется, наказа́нія грѣхо́мъ свои́мъ отъ я́вльшагося святи́теля испроша́я.

Богоро́диченъ: Воплоти́ся Бо́гъ по ѵпоста́си, Чи́стая, изъ Тебе́ пло́ти соединя́емь, пребы́въ неизмѣ́ненъ, по Боже́ственному существу́ безпло́тенъ.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Моли́твами преподо́бнаго Се́ргія, твои́ми же труды́ во сла́ву святы́хъ Бо́жіихъ, па́че же се́рдца чистото́ю, отъ Го́спода еще́ на земли́ возвели́ченъ бы́лъ еси́, уго́дниче, и святи́тельскимъ са́номъ во спасе́ніе па́ствы твоея́ облече́нъ бы́лъ еси́.

Огненную ре́вность о исправле́ніи церко́внѣмъ явля́лъ еси́ въ Бѣлогра́дстѣмъ предѣ́лѣ, Іоаса́фе святи́телю; тѣ́мже и дне́сь подава́й Це́ркви утвержде́ніе и царю́ одолѣ́ніе на враги́.

Любве́ сыно́внія не отпа́лъ еси́, на высотѣ́ святи́тельства пребыва́я, и роди́телю твоему́ земно́е поклоне́ніе возда́лъ еси́, Христу́ посредѣ́ ва́съ су́щу; у́бо и мое́ смири́ прего́рдое се́рдце и моли́твами твои́ми вразуми́ мя.

Инокъ нестяжа́теленъ на престо́лѣ архіере́йства пребы́лъ еси́, святи́телю, по́двиги поста́ и моли́твы умножа́я, до́брое о себѣ́ и о лю́дехъ вознося́ моле́ніе, іере́и же и вся́ лю́ди за́повѣдемъ Бо́жіимъ науча́я.

Богоро́диченъ: Вся́каго существа́ вы́шшее Сло́во Бо́жіе воплоще́нно на́мъ родила́ еси́; тѣ́мже Богоро́дицу Тя́ устна́ми и душе́ю проповѣ́дуемъ.

Конда́къ, гла́съ 8:

Многоразли́чныя по́двиги житія́ твоего́ кто́ исповѣ́сть?* Многообра́зныя ми́лости Бо́жія, тобо́ю явле́нныя, кто́ исчи́слитъ?* Дерзнове́ніе же твое́ у Пречи́стыя Богоро́дицы* и Всеще́драго Бо́га до́брѣ вѣ́дуще,* во умиле́ніи серде́чнѣмъ зове́мъ ти́:* не лиши́ и на́съ твоея́ по́мощи и заступле́нія,* святи́телю Христо́въ и чудотво́рче Іоаса́фе.

Икосъ:

Пречи́стою Богома́терію отъ ю́ности въ сосу́дъ благода́ти избра́нный, благочести́вымъ житіе́мъ вои́стину до́брый па́стырь слове́сныхъ ове́цъ яви́лся еси́, святи́телю: тѣ́мже прія́лъ еси́ да́ръ исцѣле́ній отъ возлюби́вшаго тя́ Христа́ Бо́га на́шего. Сего́ ра́ди зове́мъ ти́: не лиши́ и на́съ твоея́ по́мощи и заступле́нія, святи́телю Христо́въ и чудотво́рче Іоаса́фе.

Пѣ́снь 7.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Святи́телю Іоаса́фу диви́мся, о лю́діе! Вѣ́дуще сего́, а́ки Никола́я Чудотво́рца, бѣ́дныхъ хи́жины та́йно посѣща́юща, или́ тѣ́мъ дрова́ свои́ма рука́ма уготовля́юща, и біе́нія отъ привра́тника пріе́млюща.

Язвы грѣхо́вныя на душа́хъ человѣ́ческихъ прови́дѣлъ еси́, святи́телю, и та́йная прегрѣше́нія и́хъ съ любо́вію и долготерпѣ́ніемъ облича́лъ еси́; тѣ́мже и на́съ моли́твою твое́ю къ покая́нію и исправле́нію житія́ приведи́ и ду́ши на́ша предста́тельствомъ твои́мъ поми́луй.

Оному власти́телю уподо́бихся а́зъ, окая́нный, и́же, са́мъ беззако́ненъ бы́въ, ко у́зникомъ зѣло́ же́стокъ явля́шеся; но я́коже того́ науче́ніемъ твои́мъ испра́вилъ еси́, о́тче Іоаса́фе, святи́телю Христо́въ, та́ко и мене́ научи́ ко бли́жнимъ ми́лостива, къ себѣ́ же же́стока бы́ти.

Царя́ Небе́снаго до́брый во́ине и ста́да Христо́ва вѣ́рный па́стырю, моли́тву сотвори́ о царѣ́ правосла́внѣмъ и лю́дехъ, да ти́хое житіе́ на земли́ пожи́вше, жи́зни вѣ́чныя на небесѣ́хъ сподо́бимся.

Богоро́диченъ: Превѣ́чно отъ Отца́ возсія́вша Бо́га Сло́ва во утро́бѣ пло́тію заче́ншую вси́ ублажа́емъ, я́ко Ма́терь всѣ́хъ Бо́га.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Аѳана́сію о́ному, тобо́ю возлю́бленному, подража́тель бы́въ, святи́телю, потща́лся еси́ земно́е житіе́ во стра́нничестѣмъ по́двизѣ сконча́ти и, кончи́ну свою́ прозрѣ́въ, пути́ дале́кому небоя́зненно вда́лся еси́.

Ре́клъ еси́ лю́демъ, отъ па́ствы твоея́ отходя́: не и́мате мене́ жи́ва узрѣ́ти. Тѣ́мже въ зало́гъ обще́нія та́мо гробни́цу тебѣ́ устро́ити повелѣ́лъ еси́. И на́съ у́бо научи́ ча́съ сме́ртный па́мятовати и о души́ свое́й попече́ніе непреста́нно храни́ти.

Ели́ка твоя́ о мона́шестѣмъ житіи́ бя́ше ре́вность, толи́ка и ко твои́мъ при́снымъ любы́: зане́ не по пло́ти то́чію свои́ тебѣ́ бы́ша, но и ду́хомъ еди́но въ Бо́зѣ съ тобо́ю яви́шася. Того́ ра́ди восхотѣ́лъ еси́ роди́тели твоя́ пре́жде кончи́ны твоея́ посѣти́ти и благослове́ніе Бо́жіе тѣ́мъ препода́ти.

Игу́менъ, бли́зъ мѣ́ста твоея́ пра́ведныя кончи́ны подвиза́выйся, о часѣ́ преставле́нія твоего́ видѣ́ніемъ извѣству́ется и свидѣ́тель вѣ́ренъ о твое́мъ отъ Бо́га прославле́ніи а́біе быва́етъ. И на мнѣ́ у́бо твоея́ моли́твы си́лу покажи́, Христо́въ уго́дниче, и то́ю отъ мучи́тельства страсте́й свободи́ мя́.

Богоро́диченъ: Всесвята́я Дѣ́во, Бо́га Сло́ва ро́ждшая пло́тію, души́ моея́ мра́къ Твои́ми моли́твами отгна́вши, просвѣти́ взыва́юща: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко Плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.

Любы́ николи́же отпа́даетъ, глаго́летъ Боже́ственный Ду́хъ. Истина сія́ въ чудесѣ́хъ любве́ твоея́ извѣсти́ся, святи́телю Христо́въ, я́ко боля́щимъ исцѣле́ніе и скорбя́щимъ утѣше́ніе отъ твои́хъ нетлѣ́нныхъ источа́еши моще́й.

Южскій Россíйскія земли́ предѣ́лъ благодаре́ній о чудесѣ́хъ твои́хъ испо́лнися издре́вле, ны́нѣ же и отъ да́льнихъ стра́нъ сѣ́верныхъ притека́ющія зри́мъ и исцѣле́нныя страда́льцы, о твое́мъ заступле́ніи ра́дующіяся.

Дѣ́ти стра́ждущія па́че ины́хъ возлюби́лъ еси́, святи́телю Христо́въ, тѣ́мъ исцѣле́нія и благода́тную по́мощь умножа́я и роди́тели и́хъ отъ ско́рби къ ра́дости премѣня́я.

Елиссе́я проро́ка косте́й прикоснове́ніемъ воста́ уме́рый, твои́хъ же моще́й цѣлова́ніемъ безчи́сленніи исцѣли́шася лю́діе. И мене́ у́бо припа́дающа исцѣли́ отъ грѣхо́вныхъ страсте́й и вѣ́ру укрѣпи́ многогрѣ́шныя души́ моея́, о́тче преподо́бне.

Христе́ Бо́же, моли́твами Іоаса́фа, уго́дника Твоего́, ми́ръ Це́ркви пода́ждь и ца́рствомъ правосла́внымъ благостоя́ніе, отъ гла́да же и па́губы избавле́ніе и согрѣше́ній на́шихъ проще́ніе.

Богоро́диченъ: Пло́дъ чре́ва Твоего́, Ра́дость ро́ждшая, содѣ́я ликостоя́теля пѣ́снь пѣ́ти Тебѣ́ велегла́сно: ра́дуйся! — провѣщава́ше.

Свѣти́ленъ. Подо́бенъ: Жены́, услы́шите.

Свѣти́льникъ свѣ́тлый Іоаса́фъ* да воспое́тся посредѣ́ Це́ркве,* я́ко и́нокъ преподо́бенъ* и святи́тель че́стенъ,* нему́дрыхъ наказа́тель* и вѣ́ры учи́тель,* боля́щихъ вра́чь чудотворя́й,* бѣсо́въ изгони́тель* и о вселе́ннѣй предста́тель теплѣ́йшій.

Сла́ва, и ны́нѣ, богоро́диченъ:

Ве́ліе и пресла́вное* Рождества́ Твоего́ та́инство,* Богора́дованная Отрокови́це* и Богома́ти Дѣ́во,* проро́цы проповѣ́даша,* апо́столи научи́ша,* му́ченицы исповѣ́даша,* а́нгели же воспѣва́ютъ,* и человѣ́цы покланя́ются.

На хвали́техъ стихи́ры на 4, гла́съ 4. Подо́бенъ: Яко до́бля.

Святи́теля Госпо́дня мо́щи цѣлу́юще, вѣ́рніи,* очи́стимъ себе́ отъ скве́рны пло́ти и ду́ха* и па́мятію чуде́съ его́ сердца́ на́ша умили́мъ,* въ покая́ніи те́плѣ зову́ще Христу́:* Го́споди, уго́дника Твоего́ моли́твами* вложи́ въ на́съ тому́ подража́ти жела́ніе. [Два́жды.]

Никто́же то́щь отъ тебе́ исхо́дитъ,* святи́телю Бо́жій Іоаса́фе,* и исцѣле́ніе тѣ́ла и души́ освяще́ніе вся́къ пріе́млетъ,* а́ще съ вѣ́рою по́мощь твою́ призове́тъ,* и о грѣсѣ́хъ свои́хъ покая́ніе принося́,* житіе́ свое́ испра́вити потщи́тся.* Тому́ у́бо и на́съ научи́, свя́те,* и моли́тву сотвори́ о спасе́ніи ду́шъ на́шихъ.

Слеза́ми умиле́нія* ли́ца своя́ ороша́юще, вѣ́рніи,* цѣлу́имъ уго́дника нетлѣ́нныя мо́щи,* я́ко рѣку́ чуде́съ и исцѣле́ній исто́чникъ неоску́дный,* я́ко Боже́ственныя си́лы зна́меніе яснѣ́йшее,* е́же въ на́ша маловѣ́рная времена́ въ сердца́хъ вѣ́ру умножа́етъ,* невѣ́рныя же къ вѣ́рѣ возво́дитъ* и святи́теля Бо́жія чти́ти всѣ́хъ науча́етъ.

Сла́ва, гла́съ 8:

О, пресла́внаго чудесе́!* О, Боже́ственнаго къ на́мъ грѣ́шнымъ долготерпѣ́нія!* Яко умно́жившимся собла́зномъ на земли́ и вѣ́рѣ зѣло́ ума́леннѣй,* чуде́сная умножа́ются отъ моще́й святи́теля исцѣле́нія.* Зри́те у́бо, лю́діе россíйстіи* и вся́ вѣ́рная Христо́вы Це́ркве ча́да,* коли́ко мо́жетъ моли́тва пра́веднича,* ка́ко дре́внихъ чуде́съ подо́біе дне́сь на́мъ явля́ется.* Сла́ва Тебѣ́, Христе́ Бо́же,* я́ко Ты́ еси́ святы́ми чудодѣ́йствуяй;* сотвори́ ны досто́йны толи́кія благода́ти бы́ти,* слы́шатели и свидѣ́тели чуде́съ свята́го Іоаса́фа су́щія,* и изба́ви на́съ отъ безмѣ́рныхъ грѣхо́въ,* и ра́дость спасе́нія Твоего́ пода́ждь на́мъ.

И ны́нѣ, богоро́диченъ, [гла́съ то́йже]:

Влады́чице, пріими́ моли́твы ра́бъ Твои́хъ,* и изба́ви на́съ отъ вся́кія ну́жды и печа́ли.

Славосло́віе вели́кое, и отпу́стъ.



НА ЛИТУРГІИ,
Слу́жба вся́ святи́тельская.

[Блаже́нна, отъ кано́на святи́теля пѣ́снь 3 и 6. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Слу́жба и́же во святы́хъ отцу́ на́шему Іоаса́фу, епи́скопу Бѣлогра́дскому. — СПб.: Въ Сѵнода́льной Тѵпогра́фіи, 1911. — Л. 25.

/ Къ оглавленію раздѣла /


Наверхъ / Къ титульной страницѣ

0