Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 9-й де́нь.
Зача́тіе святы́я Анны, егда́ зача́тъ Пресвяту́ю Богоро́дицу.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 2. Подо́бенъ: Кíими похва́льными.

Кíими недосто́йными устна́ми* восхва́лимъ ны́нѣ Заче́ншуюся,* Святѣ́йшую тва́ри и Честнѣ́йшую су́щи* херуви́мовъ и всѣ́хъ святы́хъ?* Престо́лъ ца́рскій недви́жимый,* до́мъ, въ не́мже всели́ся Вы́шній,* спасе́ніе мíра,* Бо́жіе свяще́ніе,* подаю́щу вѣ́рнымъ,* въ боже́ственнѣмъ зача́тіи Ея́,* ми́ръ и ве́лію ми́лость? [Два́жды.]

Ка́я духо́вная пѣ́нія* ны́нѣ принесе́мъ Ти́, Всесвята́я?* Еже бо въ непло́днѣй,* Твои́мъ зача́тіемъ ве́сь мíръ освяти́ла еси́,* и Ада́ма отъ у́зъ изба́вила еси́,* и Еву отъ болѣ́зни свободи́ла еси́.* Тѣ́мже а́нгельстіи ли́цы спра́зднуютъ,* не́бо и земля́ ра́дуются,* и совоспле́щутъ ду́ши пра́ведныхъ,* пѣ́сни вѣ́рно взыва́юще* во сла́ву зача́тія Твоего́.

Ка́я стра́шная пѣ́нія,* я́же принесо́ша Ти́ тогда́, Дѣ́во?* Окрестъ зача́тія Твоего́* отрокови́цы ра́дующася* и со стра́хомъ вопію́ще:* зача́тся пала́та Царе́ва,* возсіява́етъ киво́тъ свяще́нія,* две́ри непло́дныя отверза́ются,* Бо́жія бо две́рь благоча́діе добродѣ́телей вво́дитъ,* подаю́щи мíрови ми́ръ и ве́лію ми́лость.

Сла́ва, и ны́нѣ, гла́съ то́йже:

Дне́сь изъ ко́рене Дави́дова ца́рская порфи́ра прозя́бши, отъ Іессе́я израсти́ти начина́етъ цвѣ́тъ та́инственный въ Не́йже Христо́съ Бо́гъ на́шъ прозябе́, спаса́яй ду́ши на́ша.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Ли́къ проро́ческій, ра́дуйтеся:* се́ бо Анна прозяба́етъ Пло́дъ,* Имже проро́чествія ва́ша* испо́лнитися произы́дутъ.

Стихъ: Кля́тся Госпо́дь Дави́ду и́стиною* и не отве́ржется ея́.

Сра́дуйтеся, колѣ́на вся́,* непло́днѣй Аннѣ:* я́ко Пло́дъ чре́ва па́че наде́жды прозяба́етъ,* живота́ на́шего Хода́таицу.

Сти́хъ: Отъ плода́ чре́ва Твоего́* посажду́ на престо́лѣ Твое́мъ.

Концы́ земнíи, весели́теся:* се́ бо Творца́ всѣ́хъ Ма́терь* отъ непло́днаго чре́ва* прозяба́етъ дне́сь.

Сла́ва, и ны́нѣ. Подо́бенъ то́йже:

Ра́дуйся, Іоаки́ме,* и Анно, ра́дуйся,* я́ко спасе́нія Хода́таицу* и Ра́дость мíра, плодоно́сите дне́сь.

Тропа́рь, гла́съ 4:

Дне́сь безча́дія у́зы разрѣша́ются, Іоаки́ма бо и Анну услы́шавъ, Бо́гъ па́че наде́жды роди́ти тѣ́мъ я́вѣ обѣщава́етъ Богоотрокови́цу, изъ Нея́же Са́мъ роди́ся Неопи́санный, Человѣ́къ бы́въ, а́нгеломъ повелѣ́въ вопи́ти Ей: ра́дуйся, Благода́тная, Госпо́дь съ Тобо́ю.


НА ВЕЛИЦѢЙ ВЕЧЕРНИ,
Блаже́нъ му́жъ, 1-й антифо́нъ. На Го́споди воззва́хъ: стихи́ры на 8, гла́съ 4. Подо́бенъ: Зва́нный свы́ше.

Плодородя́щи непло́ды па́че наде́жды* Дѣ́ву, хотя́щую роди́ти Бо́га пло́тію,* ра́достію свѣ́тится* и лику́етъ, ра́дующися,* велегла́сно взыва́ющи:* колѣ́на вся́, сра́дуйтеся мнѣ́, Изра́илева.* Се́ во чре́вѣ ношу́* и поноше́ніе безча́дства отлага́ю,* я́коже благоизво́ли Содѣ́тель,* услы́шавъ моли́тву мою́,* и болѣ́зни исцѣли́въ се́рдца* въ жела́емыхъ ми́. [Три́жды.]

Иже отъ немо́кренна, ка́мене* источи́вый во́ду,* пло́дъ чре́ву твоему́, Анно,* да́руетъ — Приснодѣ́ву Влады́чицу,* изъ Нея́же вода́ спасе́нія хо́щетъ произы́ти.* Не ктому́, я́ко непло́дная земля́,* пребу́деши на земли́,* поноше́ніе отчужди́вши:* Зе́млю бо возрасти́вши, плодонося́щу жи́зни Кла́съ,* поноше́нія отъе́млющій всѣ́мъ человѣ́комъ,* я́коже благоизво́ли* за милосе́рдіе ми́лости вообрази́тися въ чужде́е. [Три́жды.]

Проро́ческая рече́нія* ны́нѣ исполня́ются:* гора́ бо свята́я* въ ложесна́хъ водружа́ется,* лѣ́ствица Боже́ственная насажда́ется,* престо́лъ вели́кій Царе́въ проуготовля́ется,* мѣ́сто украша́ется боговходи́мое,* купина́ неопали́мая* начина́етъ прозяба́ти,* мѵрополо́жница святы́ни уже́ истека́етъ,* непло́дствія рѣ́ки простира́ющи богому́дренныя Анны,* ю́же вѣ́рою ублажа́емъ. [Два́жды.]

Сла́ва, и ны́нѣ, гла́съ 2. Ге́рманово:

Недовѣ́домое а́нгеломъ и человѣ́комъ вели́кое, е́же отъ вѣ́ка сокрове́нное та́инство пресла́вное: дне́сь въ ложесна́хъ цѣлому́дренныя Анны младоно́сится Марíя Богоотрокови́ца, уготовля́ема во вселе́ніе всѣ́хъ Царя́ вѣко́въ и во обновле́ніе ро́да на́шего. Юже чи́стою со́вѣстію умо́лимъ, вопію́ще къ Не́й: моли́ Сы́на Твоего́ и Бо́га, я́ко предста́тельница су́щи на́съ христіа́нъ, спасти́ ду́ши на́ша.

Вхо́дъ. Проки́менъ дне́. И чте́нія.

Бытія́ чте́ніе.

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе.

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе.

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 1. Самогла́сны. Мала́кса.

Весели́теся, пра́ведніи богоотцы́, Іоаки́ме и Анно, дне́сь, вы́ бо пронарече́ни бы́сте отъ всѣ́хъ родо́въ бы́ти роди́теліе Ро́ждшія пло́тію Единоро́днаго Сы́на Бо́жія, Марíи, неискусому́жныя Богома́тере, и коне́цъ пода́ти Тоя́ ра́ди всѣ́мъ зна́меніемъ же и та́йнамъ неизрече́ннымъ, и прорече́ніемъ проро́ческимъ, та́инству Сло́ва воплоще́нія. Весели́ся и ты́ дне́сь, проро́ческій ли́че, съ Дави́домъ и Авраа́момъ пра́отцы, пріи́де бо сла́ва проповѣ́данія ва́шего и всемíрное избавле́ніе.

Гла́съ 2:

Дне́сь Облакъ свѣ́телъ въ невла́жной утро́бѣ составля́ется, отъ него́же Со́лнце пра́вды — Христо́съ Бо́гъ на́шъ, превы́ше естества́ возсія́етъ, просвѣти́ти во тмѣ́ и сѣ́ни сме́ртнѣй сѣдя́щія, и всѣ́мъ дарова́ти ве́лію ми́лость.

Гла́съ 6:

О, чуде́съ пресла́вныхъ! О, веще́й преесте́ственныхъ! Ангелъ съ небесе́, всечестно́му сою́зу, рожде́ніе Богоро́дично предвозвѣща́етъ, и неродя́щая непло́ды плодоно́ситъ Богоотрокови́цу, изсо́хшая же утро́ба затворе́нную Вы́шняго две́рь прозяба́етъ, именова́ніе безча́дныхъ супру́говъ въ богооте́цъ тезоимени́тство преложи́ся благоча́дія ра́ди. Тѣ́мже возопіе́мъ: Иже вся́ содѣва́яй и то́чію хотѣ́ніемъ премѣня́яй, Го́споди, сла́ва Тебѣ́.

Сла́ва, и ны́нѣ, гла́съ 5:

Ра́дуйся и весели́ся, Анно, Бо́гомъ почте́нная, я́ко отъ обѣща́нія плодоно́сиши отъ а́нгела ра́дость пріи́мшую и отъ неражда́ющія утро́бы прозяба́еши отъ безсѣ́менныя утро́бы прозя́бшую Садодѣ́лателя всѣ́хъ. Блаже́нъ до́мъ, отъ него́же роди́ся, блаже́нный ко́рень вои́стинну, изъ него́же произы́де, блаже́нный пло́дъ роди́телей, изъ ни́хже произведе́ся. Ра́дуйся со Іоаки́момъ богому́дрымъ: вы́ бо Боже́ственнымъ ма́ніемъ роди́теліе вои́стинну показа́стеся, еди́ныя въ жена́хъ благослове́нныя Дѣ́вы и Богома́тере.

На стихо́внѣ стихи́ры, гла́съ 5. Подо́бенъ: Ра́дуйся.

Анна — Боже́ственная благода́ть,* иногда́ моля́щися о ча́дѣ,* возопи́ всѣ́хъ Бо́гу и Зижди́телю:* Адонаи́ Савао́ѳъ,* безча́дія вѣ́си поноше́ніе,* Са́мъ болѣ́знь се́рдца моего́ разрѣши́,* и хля́би утро́бныя разве́рзи,* и непло́дную плодоно́сну покажи́:* я́ко да ражда́емое да́ръ Ти́ принесе́мъ,* благосло́вяще, пою́ще* и единому́дренно сла́вяще* Твое́ благоутро́біе,* и́мже мíру дае́тся ве́лія ми́лость.

Сти́хъ: Кля́тся Госпо́дь Дави́ду и́стиною* и не отве́ржется ея́.

Дре́вле моля́щися вѣ́рно* Анна цѣлому́дренная* и Бо́га умоля́ющи,* а́нгельскій гла́съ услы́ша,* извѣству́ющій е́й проси́мыхъ* Боже́ственное сбытіе́.* Къ не́йже безтѣле́сный я́вственно бесѣ́доваше:* моле́ніе твое́ бо Го́споду прибли́жися,* не сѣ́туй и отъ сле́зъ отступи́,* благопло́дна бо бу́деши ма́слина,* прозяба́ющи вѣ́твь кра́сную — Дѣ́ву,* я́же цвѣ́тъ процвѣте́тъ Христа́ пло́тію,* подаю́щаго мíру ве́лію ми́лость.

Сти́хъ: Отъ плода́ чре́ва Твоего́* посажду́ на престо́лѣ Твое́мъ.

Супру́гъ плодороди́тъ че́стенъ* Боже́ственную Юницу,* изъ Нея́же произы́йдетъ Теле́цъ,* неизрече́ннымъ сло́вомъ упита́нный вои́стинну,* за ве́сь мíръ закала́емый.* Тѣ́мъ, ра́дующеся,* исповѣ́даніе непреста́нное* во умиле́ніи Го́сподеви прино́сятъ* и вся́ческая по́льзующую имѣ́ти бу́дутъ.* Сія́ у́бо да ублажи́мъ* и вѣ́рою ликовству́имъ* въ зача́тіи боже́ственнѣ,* я́же отъ ни́хъ Бо́га на́шего Ма́тере ражда́емыя,* Еюже дае́тся бога́тно ве́лія ми́лость.

Сла́ва, и ны́нѣ, гла́съ 2:

Дне́сь изъ ко́рене Дави́дова Ца́рская порфи́ра прозя́бши, отъ Іессе́я израсти́ти начина́етъ цвѣ́тъ та́инственный, въ Не́йже Христо́съ Бо́гъ на́шъ процвѣте́, спаса́яй ду́ши на́ша.

На благослове́ніи хлѣ́бовъ тропа́рь, гла́съ 4:
Дне́сь безча́дія у́зы разрѣша́ются... Ищи́ на ма́лѣй вече́рни.



НА УТРЕНИ,
На Бо́гъ Госпо́дь: тропа́рь пра́здника три́жды.

По 1-мъ стихосло́віи сѣда́ленъ, гла́съ 1. Подо́бенъ: Ли́къ а́нгельскій.

Но́вое Не́бо во чре́вѣ Анны зи́ждется, Бо́га Вседѣ́теля повелѣ́ніемъ, изъ него́же возсія́етъ невече́рнее Со́лнце, мíръ ве́сь просвѣща́ющее луча́ми Божества́, премно́жествомъ благоутро́бія, еди́нъ Человѣколю́бецъ.

Сла́ва, и ны́нѣ, то́йже.

По 2-й каѳи́смѣ сѣда́ленъ, гла́съ и подо́бенъ то́йже:

Ли́къ проро́ческій проповѣ́да дре́вле непоро́чную чи́стую и богоотрокови́цу Дѣ́ву, Юже Анна зача́тъ, непло́ды су́щи и безча́дна. Сію́ дне́сь весе́ліемъ се́рдца ублажи́мъ, спа́сшеся Ея́ ра́ди, я́ко еди́ну Непоро́чную.

Сла́ва, и ны́нѣ, то́йже.

[Велича́ніе: [1]

Велича́емъ Тя́, Пресвята́я Дѣ́во, и чте́мъ святы́хъ Твои́хъ роди́телей, и всесла́вное сла́вимъ зача́тіе Твое́.

Псало́мъ избра́нный: Помяни́, Го́споди, Дави́да и всю́ кро́тость его́...]

По поліеле́и сѣда́ленъ, гла́съ 4. Подо́бенъ: Удиви́ся Іо́сифъ.

Возопíй, Дави́де, что́ кля́тся тебѣ́ Бо́гъ? Яже мнѣ́ кля́тся, рече́, и испо́лни уже́, отъ плода́ чре́ва моего́ да́вый Дѣви́цу, изъ Нея́же Содѣ́тель Христо́съ, но́вый Ада́мъ, роди́ся, Ца́рь на престо́лѣ мое́мъ, и ца́рствуетъ дне́сь, имѣ́яй ца́рство недви́жимо. Непло́ды зачина́етъ Богоро́дицу и Пита́тельницу жи́зни на́шея.

Сла́ва, и ны́нѣ, то́йже.

Та́же степе́нна, 1-й антифо́нъ 4-го гла́са. Проки́менъ, гла́съ 4: Отъ плода́ чре́ва твоего́* посажду́ на престо́лѣ твое́мъ. Сти́хъ: Помяни́, Го́споди, Дави́да и всю́ кро́тость его́. Вся́кое дыха́ніе... Ева́нгеліе Луки́, зача́ло 4.

По 50-мъ псалмѣ́, Сла́ва, гла́съ 8:

Ра́дуйся, естество́ человѣ́ческое, добродѣ́тельми пре́жде непло́дствующее, непло́ды бо ны́нѣ зачина́етъ непло́дствія твоего́ Разрѣше́ніе.

И ны́нѣ, то́йже.
Поми́луй мя́, Бо́же, по вели́цѣй...
Та́же стихи́ра, гла́съ 6:

Нача́токъ спасе́нія на́шего, лю́діе, дне́сь бы́сть, начина́ется у́бо Дѣ́ва Маріа́мь и зи́ждется во утро́бѣ непло́дныя, и мíръ съ Не́ю обновля́ется. Весели́тся Іоаки́мъ со Анною, непло́дствія разрѣ́шшися, и Ада́мъ ра́дуется, отъ у́зъ свобожда́емь. Съ ни́миже и мы́ ра́достію къ Не́й возопіе́мъ: ра́дуйся, Обра́дованная, Госпо́дь съ Тобо́ю.

Кано́на два́ святы́я Анны: пе́рвый со ирмосо́мъ на 8, вторы́й на 6. Творе́ніе Андре́ево. Гла́съ 1.

Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Зача́тіе дне́сь, богому́драя Анно, твое́ пра́зднуемъ, я́ко Вмѣсти́вшую нигдѣ́же Вмѣсти́маго зачала́ еси́, непло́дныхъ отрѣ́шшися у́зъ.

Пра́ведныхъ услы́шалъ еси́ моли́тву, святы́хъ испо́лнилъ еси́ обѣща́ніе, Го́споди, пра́отецъ Твои́хъ и си́мъ да́лъ еси́ пло́дъ Тебе́ ро́ждшую, Чи́стую.

Анна сла́вная ны́нѣ зачина́етъ Чи́стую, безпло́тнаго заче́ншую Го́спода Преблага́го, и роди́ти и́мать пло́тію иму́щую роди́ти Христа́.

Отъ тлѣ́нныхъ возсія́ла еси́, Дѣ́во, ложе́снъ, въ нетлѣ́ннѣ бо чре́вѣ сла́вы Со́лнце носи́ла еси́, бы́вша, я́коже есмы́, кромѣ́ враще́нія и смѣше́нія.

Другíй кано́нъ, его́же краегране́сіе по алфави́ту. Гла́съ то́йже.
Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Чи́стую Дѣ́ву Богоотрокови́цу, Ма́терь бы́ти хотя́щую Созда́теля, во чре́вѣ пріе́мши Анна, ра́достно вопія́ше: колѣ́на вся́ Изра́илева, сра́дуйтеся мнѣ́, се́ бо и а́зъ зача́хъ.

Кни́гу, ю́же прорече́ проро́къ, запеча́тану Ду́хомъ Боже́ственнымъ, въ ложесна́хъ свои́хъ содержа́щи, Анна всѣ́мъ вопія́ше: Юже вся́ списа́нія проявля́ютъ, возвелича́юся а́зъ, прозяба́ющи дне́сь.

Во чре́вѣ вмѣща́ется и созида́ется хра́мъ Боже́ственный и спаси́тельный въ ложесна́хъ ма́тернихъ, насажда́ется лѣ́ствица, я́же къ вы́шнимъ вся́ человѣ́ки возводя́щая. Ея́же зача́тіе вѣ́рно да торжеству́емъ.

Катава́сія: Христо́съ ражда́ется...

Пѣ́снь 3.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Пло́дъ чре́ва а́ще пода́си мнѣ́, — вопія́ше Анна ко Го́споду, — возвели́чуся и Тебѣ́ принесу́ се́й. Сего́ ра́ди зачина́етъ Чи́стую Богома́терь.

Яже по зако́ну сконча́вши и Бо́гу непоро́чно рабо́тавши, чревоно́сиши вои́стинну Законода́вца ро́ждшую, Анно всечестна́я, тѣ́мже тя́, вѣ́рніи, ублажа́емъ.

Въ саду́ моля́щейся тебѣ́, гла́съ услы́ша высоча́йшій, Анно богому́драя, и пло́дъ чре́ву Твоему́ дае́тъ — рая́ Отве́рзшую две́рь благода́тію.

Богоро́диченъ: Непло́дствующія мы́сли моея́ непло́діе вся́кое отжени́, и плодоно́сну добродѣ́тельми ду́шу мою́ покажи́, Всесвята́я Богоро́дице, вѣ́рныхъ по́моще.

Инъ.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Пріе́млетъ съ высоты́ моля́йся Го́споду Іоаки́мъ вожделѣ́нное вѣща́ніе, предста́вшу а́нгелу ему́ и глаго́лющу: отыди́, твоя́ проше́нія, пра́ведне, всѣ́хъ Бо́гъ испо́лни.

Призыва́ющи всѣ́хъ Бо́га, Анна иногда́ въ саду́ стоя́щи, предста́вша зря́ше себѣ́ а́нгела и глаго́люща: да не скорби́ши, Ма́тери бо Бо́жіей ма́ти и́маши бы́ти.

Ревну́ющи Аннѣ, су́щей пре́жде тебе́, моле́нія къ Бо́гу принесла́ еси́ и, безсѣ́менно пріе́мшую Сло́во Невмѣсти́мое, Чи́стую во утро́бѣ зачала́ еси́, благоча́діемъ твои́мъ вся́ ны, Анно, облагода́тивши.

Сѣда́ленъ, гла́съ 4. Подо́бенъ: Вознесы́йся.

Іоаки́мъ свяще́нный и Анна да́ръ принесо́ша дре́внимъ свяще́нникомъ и не прія́ти бы́вше, непло́ды су́ще, мольбу́ принесо́ша Да́телю вся́ческихъ, и, моли́тву и́хъ услы́шавъ, да́руетъ и́мъ су́що Две́рь Жи́зни, Ея́же свято́е почти́мъ зача́тіе.

Сла́ва, и ны́нѣ, гла́съ то́йже. Подо́бенъ: Удиви́ся Іо́сифъ.

Нескве́рная Агница и Пречи́стый Черто́гъ отъ пра́ведниковъ произы́ти ны́нѣ начина́етъ, вѣ́рніи, богоукраше́нная Марíя пресла́вно. Весели́теся про́чее, не́бо и земля́, и вси́ земноро́дни, совзыгра́йте: я́ко сотвори́ дне́сь пресла́вная Бо́гъ, во чре́вѣ непло́дствующія пло́дъ, еди́ну показа́въ Дѣ́ву, Юже вѣ́рно воспое́мъ.

Пѣ́снь 4.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ — позна́ешися, внегда́ пріити́ вре́мени — пока́жешися. Сла́ва си́лѣ Твое́й, Го́споди!

О, Боже́ственнаго вѣща́нія! О, стра́ннаго глаго́ланія! Аще и а́зъ зачну́? — а́нгелу къ не́й посла́вшуся, Анна, удивля́ющися, велегла́сно вопія́ше, — Бо́гу моему́ сла́ва, творя́щему пресла́вная.

Сра́дуйтеся мнѣ́, вся́ племена́ Изра́илева: во утро́бѣ зача́хъ но́вое Не́бо, изъ него́же Звѣзда́ спасе́нія возсія́етъ по ма́лѣ — Іису́съ Свѣтода́вецъ, — Анна, ра́дующися, взыва́ше.

Услы́ша Аннино Бо́гъ стена́ніе, и вня́тъ Госпо́дь моли́твѣ ея́ и, безча́дія о́блакъ разори́въ, свѣ́томъ озаря́етъ благоча́дія пресла́вно. Тѣ́мже зачина́етъ еди́ну Чи́стую.

Богоро́диченъ: Дѣ́во Богоро́дице, нескве́рная ски́ніе, оскверне́ннаго прегрѣше́ньми очи́сти мя́ ны́нѣ щедро́тъ Твои́хъ чистѣ́йшими кропле́ньми и да́ждь ми́ ру́ку по́мощи, да зову́: сла́ва Тебѣ́, Чи́стая Богопросла́вленная.

Инъ.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Отве́рзеся утро́ба твоя́, я́же пре́жде не ражда́ющая, и пріе́млеши, Анно, Облакъ небе́сный, изъ него́же на́мъ свѣ́тлое, возсія́въ, Со́лнце вся́ свѣ́томъ и́стины озари́ и глубо́кую тму́ безбо́жія отгна́.

Престо́лъ огнеобра́зный Бо́жій въ ложесна́хъ Твои́хъ водрузи́ся, на не́мже сѣ́дъ, воспочи́, и всѣ́хъ благочести́выхъ тру́дъ отъя́тъ, и чи́стое богозна́ніе водрузи́ на земли́, Анно блаже́нная, богопрія́тная.

Се́, Его́же прорече́ Соломо́нъ, во утро́бѣ Одръ прія́ла еси́, сохраня́емь и́стиннѣйше и́стинному Царю́ къ боже́ственному воззва́нію, ро́да человѣ́ча обраще́нію, тѣ́мже тя́ ра́достно, Анно, вѣ́рніи, ублажа́емъ.

Пѣ́снь 5.

Ирмо́съ: Тво́й ми́ръ да́ждь на́мъ, Сы́не Бо́жій: ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Изъ ко́рене прозя́бшая Дави́дова и Іессе́ева, Анна ны́нѣ расти́ти начина́етъ боже́ственный Же́злъ, прозя́бшій та́инственный Цвѣ́тъ — Христа́, всѣ́хъ Зижди́теля.

Ма́терь бы́вшую мя́, — Анна вопія́ше, — у́зрятъ лю́діе и учудя́тся: се́ бо рожду́, я́ко благоволи́ соу́зы Разрѣши́вый непло́дствія моего́.

Отрокови́цу, Юже зача́хъ а́зъ, проро́честіи гла́си издале́ча провозвѣсти́ша, го́ру и две́рь непрохо́дную, — прера́достно Анна вопія́ше приходя́щимъ.

Богоро́диченъ: Облакъ, и ра́й, и две́рь Тя́ свѣ́та, трапе́зу, и руно́ вѣ́мы, и ста́мну, вну́трь ма́нну нося́щую, сла́дость мíра, Чи́стая Дѣ́во Ма́ти.

Инъ.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Сни́де съ горы́ Іоаки́мъ, не скрижа́ли зако́на пріе́мый, но Юже зако́нъ преднаписа́ и вся́ проро́ческая откры́та рече́нія — Бо́жію Ма́терь Чи́стую, и, игра́я, вопія́ше: возвели́чися се́рдце мое́.

Въ ложесна́хъ я́ко ощути́ Анна иногда́ насажде́нную благопло́дную Ло́зу, изъ нея́же Гро́здъ процвѣте́ зрѣ́лый, на́мъ вино́ безсме́ртія оби́льно иска́пающій, что́ Ти возда́мъ, благоутро́бне Го́споди, вѣща́ше?

Не терпя́ Іоаки́мъ тва́рь зрѣ́ти, благоче́стіемъ непло́дствующу, непло́дству Аннину преити́ моля́шеся и сію́ возымѣ́ти Отрокови́цу, изъ Нея́же Сы́нъ даде́ся, вся́ сыноположи́вый Своему́ Отцу́, Высоча́йшій.

Пѣ́снь 6.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.

Ка́ко вмѣща́ется во чре́вѣ Вмѣсти́вшая Бо́га? ка́ко ражда́ется Христа́ Роди́вшая пло́тію? ка́ко же сосца́ми пита́ется, Яже Зижди́теля млеко́мъ Напои́вшая?

Мольбу́ ва́шу услы́шавъ, Бо́гъ плодови́тъ пло́дъ ны́нѣ да́руетъ ва́мъ, Іоаки́ме и Анно, всехва́льніи.

Чи́стую Голуби́цу заче́нши во чре́вѣ, ра́дости духо́вныя испо́лнися и́стинно, принося́щи пѣ́сни благода́рныя Анна Бо́гу.

Богоро́диченъ: Треволне́нія помысло́въ, и страсте́й наведе́нія, и глубина́ грѣхо́въ окая́нную ду́шу мою́ обурева́ютъ: помози́ ми, Свята́я Влады́чице.

Инъ.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Зако́на сѣ́ни я́вѣ прехо́дятъ: се́ бо заря́ Боже́ственныя благода́ти показу́ется, Дѣ́ва о́блакъ, изъ него́же свѣ́тлое Божества́ возсія́етъ вои́стинну Со́лнце, — Анна, ра́дующися, взыва́ше, Бо́га Изра́илева велича́ющи.

Стра́нное, а́ще и а́зъ зачну́, зрѣ́ніе, — я́же пре́жде непло́дна и неражда́ющая, Анна глаго́лаше, вѣща́ющаго а́нгела я́ко услы́ша, я́ко отроча́ роди́тся, и взыва́ше: до́брѣ блага́го слы́шанія, а́ще слове́съ сбытіе́ бу́детъ.

Го́ры и хо́лми, поля́ и мо́ре, а́нгельское мно́жество и все́ естество́ человѣ́ческое да веселя́тся, — Влады́ки бо Боже́ственный хра́мъ, нача́токъ примире́нія прія́тъ Анна, егда́ ощути́ себе́ саму́ю заче́ншую, вѣща́ше.

Конда́къ, гла́съ 4. Подо́бенъ: Яви́лся еси́ дне́сь.

Пра́зднуетъ дне́сь вселе́нная Аннино зача́тіе, бы́вшее отъ Бо́га, и́бо та́ породи́ па́че сло́ва Сло́во Ро́ждшую.

Икосъ:

Іоаки́мъ чу́дный и Анна богому́драя, о́ба живу́ще во вся́комъ благоче́стіи, по зако́ну Моисе́еву, непло́дни бя́ху и моля́хуся Бо́гу все́ю душе́ю, глаго́люще: Го́споди Савао́ѳъ Преблагíй, вся́ческихъ наде́жда, безча́дствія болѣ́знь и укори́зну вѣ́си и печа́ль, пода́ждь у́бо на́мъ пло́дъ изъ чре́ва, и принесе́мъ того́ въ хра́мъ Тво́й — да́ръ свяще́нъ, и приноше́ніе испо́лнено, па́че сло́ва Сло́во Ро́ждшую.

Пѣ́снь 7.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́, я́ко еди́нѣми усты́, поя́ху и благословля́ху, глаго́люще: благослове́нъ Бо́гъ оте́цъ на́шихъ.

Безча́дства укори́зны убѣжа́ти моля́ше Анна всѣ́хъ Влады́ку, и сея́ ми́лостивый гла́съ услы́шавъ, Того́ Ро́ждшую, пло́дъ подаде́ то́й, я́коже благоволи́.

Ца́рская порфи́ра въ твое́мъ чре́вѣ истка́тися, Анно, начина́ется, Юже Бо́гъ и Ца́рь всѣ́хъ поне́съ, человѣ́комъ яви́тся и смири́тъ враги́, борю́щія ны́.

Мѵ́ро благово́нное во утро́бѣ зачала́ еси́, Анно, Мѵ́ро жи́зни преесте́ственно воспріе́мшую — Влады́ку, дыха́ньми благода́ти помышле́нія на́ша облагоуха́вшаго.

Богоро́диченъ: Яко отъ Тро́ицы еди́наго Тя́, Христе́, сла́вимъ, я́ко изъ Дѣ́вы вопло́щся, кромѣ́ враще́нія человѣ́ческа, вся́ поне́слъ еси́, не отступи́въ естества́ Оте́ческаго, Іису́се, а́ще и соедини́лся еси́ на́мъ.

Инъ.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Огнено́сную дре́вле купину́, Моисе́й на Сина́и ю́же ви́дѣ, Анна зача́тъ во чре́вѣ безча́дствія, о́гнь погаша́ющую я́ко нѣ́кое злоче́стіе, пою́щимъ: отце́въ Бо́же, благослове́нъ еси́.

Ка́пля твое́й утро́бѣ пресла́вно ны́нѣ, Анно, источи́ся, я́же Во́ду жи́зни всю́ вну́трь воспрія́ше, ороша́ющую вѣ́рно Тому́ зову́щія: отце́въ Бо́же, благослове́нъ еси́.

Пте́нчее я́ко узрѣ́ гнѣздо́, впери́лася еси́ ду́хомъ и моли́твою, Голуби́цу прія́ла еси нескве́рную, Суче́цъ, нося́щую Христа́, ма́слинный, Анно, мы́сленнаго пото́па на́съ свобожда́ющій.

Пѣ́снь 8.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Дави́дъ Юже прорече́ Цари́цу, се́, во чре́вѣ пріе́млю, — Анна вопія́ше, — и рожду́ всѣ́хъ Предста́тельницу вѣ́рныхъ, Царя́ Христа́ иму́щую роди́ти.

Земля́, въ ню́же всели́ся земли́ Содѣ́тель, ски́птръ святы́й, но́вый киво́тъ, ста́мна ма́нны въ ложесна́хъ ма́тере, Сего́ Ро́ждшую, начина́етъ прозяба́ти.

Купина́ неопа́льная, свѣ́щникъ златы́й, одушевле́нный черто́гъ Го́спода Бо́га, честны́й же́злъ во чре́вѣ ма́тере, Сего́ Ро́ждшую, начина́етъ прозяба́ти.

Богоро́диченъ: Возста́ви лежа́щаго мя́ во глубинѣ́ зо́лъ, ны́нѣ борю́щія мя́ побѣди́ враги́. Уя́звена безмѣ́стными сластьми́, Блага́я Чи́стая, не пре́зри, но уще́дри и спаси́.

Инъ.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Что́ ми утро́бу содѣ́лалъ еси́ безча́дствующу и сосцы́ сухíя? я́коже проре́клъ еси́ во проро́цѣхъ, Влады́ко, — вопія́ше Анна иногда́, — безча́дія моего́ укори́зну разрѣши́ и да́ждь ми́ пло́дъ, съ ни́мже вопію́: да благослови́тъ тва́рь вся́ Го́спода и превозно́ситъ во вся́ вѣ́ки.

Вни́де въ твою́, Анно, утро́бу свѣ́щникъ, и́же свѣщу́ Боже́ственную та́йно вмѣсти́, просвѣща́ющую вся́ко дыха́ніе сія́ніи та́йными Боже́ственнаго зна́нія. Тѣ́мже, ра́дующися, взыва́ла еси́: да благослови́тъ тва́рь вся́ Го́спода и превозно́ситъ во вся́ вѣ́ки.

Но́сятъ, я́коже краснѣ́йшій ны́нѣ сопру́гъ, боже́ственную Юницу, изъ Нея́же Теле́цъ кра́сный возсія́, за всѣ́хъ закла́выйся, сла́вный Іоаки́мъ и Анна, пою́ще: да благослови́тъ тва́рь вся́ Го́спода и превозно́ситъ во вся́ вѣ́ки.

Пѣ́снь 9.

Ирмо́съ: Живопріе́мный исто́чникъ приснотеку́щій, свѣтоно́сный свѣти́льникъ благода́ти, хра́мъ одушевле́нный, сѣ́нь пречи́стую, небесе́ и земли́ простра́ннѣйшую, Богоро́дицу, вѣ́рніи, велича́емъ.

Живопріе́мный исто́чникъ зачина́ющи, Анно богому́драя, ра́дость ны́нѣ пріими́, хра́мъ святы́й вну́трь во чре́вѣ твое́мъ пріе́млющи, свѣ́томъ пра́вды облиста́ему, Созда́теля велича́ющи.

Сопру́гъ честны́й и пресла́вный, Превѣ́чнаго Сы́на пра́отцы, зако́на храни́теліе извѣ́стніи бы́вше, нача́токъ ра́дости ро́ждшіи, Іоаки́мъ же и Анна почте́ни да бу́дутъ.

Юже Даніи́лъ го́ру вели́кую ви́дѣ, и Іо́иль зе́млю святу́ю узрѣ́, две́рь непрохо́дну, и́нъ же прорече́ запеча́танный исто́чникъ и боже́ственное руно́, — Богоро́дицу Дѣ́ву воспои́мъ.

Богоро́диченъ: Порфи́ра, я́же руно́ обагри́вшая, неизрече́ннаго Сло́ва воплоще́нія, кади́льница злата́я, трапе́за, на не́йже Хлѣ́бъ Христо́съ возложи́ся, — Богоро́дица Дѣ́ва сла́вится.

Инъ.

Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Ликовству́йте вся́ ду́ши и взыгра́йте: ны́нѣ Земля́ созда́ся, я́же плодороди́тъ неора́ннѣ Кла́съ жизноно́сный, отъ Него́же я́дше, не вза́лчутъ когда́ благосты́ню Того́ велича́ющіи.

Псалти́рь съ гу́слію воспріими́, Дави́де, и пѣсновоспо́й: се́, Киво́тъ яви́ся Бо́жій, Его́же предре́клъ еси́ я́вѣ бу́дущій въ назда́ніе, Имже воста́хомъ мы́ отъ грѣхопаде́нія.

Яко велича́йшія двѣ́ звѣзды́, изнесо́сте всесвѣ́тлую Зарю́, Яже возсія́етъ вели́кое Со́лнце мíру. Тѣ́мже благохва́лимъ и сла́вимъ ва́съ, Іоаки́ме и Анно я́ко богому́дрыя.

Свѣти́ленъ. Подо́бенъ: Свѣ́те неизмѣ́нный.

Свѣ́тъ Ро́ждшая, всю́ озаря́ющій тва́рь, дне́сь начина́етъ прозяба́ти Анна непло́дными ложесны́. Тѣ́мже стеце́мся вси́, и́бо пріи́де избавле́ніе осужде́нія Евина.

Сла́ва, и ны́нѣ, то́йже.

На хвали́техъ стихи́ры на 4, гла́съ 1. Подо́бенъ: Небе́сныхъ чино́въ.

Еже пре́жде человѣ́ковъ естество́ непло́дствующее,* я́же къ Бо́гу наде́жды,* нача́токъ благоче́стія, прозяба́етъ Дѣ́ву,* Еюже до́брыхъ благопло́діе проповѣ́дуется,* въ зача́тіи Сея́ на земли́,* припода́ти прише́ствію Христо́ву. [Два́жды.]

Непроходи́мая две́рь Царя́ Христа́,* Яже Бо́жіимъ совѣ́томъ* въ непло́дныхъ ложесна́хъ зача́тіе пріе́млетъ.* Ейже, на земли́ предлага́емѣй,* во́змутся небе́сная врата́* и земны́мъ попу́стятъ вхо́дъ.

Иже пре́жде вѣ́къ неизрече́нно* отъ Бо́га земны́мъ проповѣ́данныхъ Боже́ственныхъ* и стра́шныхъ та́инствъ* нача́токъ вѣ́ры яви́ся,* Чи́стыя и Богоотрокови́цы зача́тіе.* Еюже дѣло́мъ тмы́ и страсте́мъ преста́ти предвозвѣща́етъ.

Сла́ва, и ны́нѣ, гла́съ 8. Мала́кса:

Пріиди́те, ра́достно дне́сь, вся́къ чи́нъ и во́зрастъ человѣ́ческій, со а́нгельскими ли́ки пресла́вное зача́тіе Богоро́дицы свѣ́тло пра́зднуемъ; патріа́рси — всѣ́хъ Царя́ Ма́терь; проро́цы — Юже ва́ми проповѣ́данную; пра́отцы — Юже отъ ва́съ Богома́терь; богоотцы́ — Богоотрокови́цу; дѣ́вы — Приснодѣ́ву; вѣ́рніи — Ко́рень вѣ́ры; свяще́нницы — всесвяще́нный Хра́мъ Бо́жій; святы́хъ всѣ́хъ ли́цы — Вину́ собра́нія ва́шего; а́нгельская же во́инства — ро́ждьшую Влады́ку всея́ тва́ри и Спа́са ду́шъ на́шихъ.

Славосло́віе вели́кое. По трисвято́мъ тропа́рь еди́ножды, [ектеніи́] и отпу́стъ.



НА ЛИТУРГІИ,

Блаже́нна отъ кано́на пе́рваго пѣ́снь 3-я и отъ втора́го пѣ́снь 6-я. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, [Го́спода отъ исто́чникъ Изра́илевыхъ]. Апо́столъ къ Гала́томъ, зача́ло 210, отъ полу́. Аллилу́ія, гла́съ 1: Спасе́ніе пра́ведныхъ отъ Го́спода, [и Защи́титель и́хъ е́сть во вре́мя ско́рби]. Ева́нгеліе Луки́, зача́ло 36. Прича́стенъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́].

Примѣчаніе:
[1] См. Псалти́ръ съ возслѣ́дованіемъ. Черни́говъ: Въ Тѵпогра́фіи оби́тели Свя́то-Тро́ицкой Ильи́нской, 1763 г. Ли́стъ 418 об.

Источникъ: Анѳоло́гіонъ, сíесть Цвѣтосло́віе, или́ Трефоло́гіонъ, сíесть Словопита́ніе. — Кíевъ: Въ Тѵпогра́фіи Кіевопече́рской Ла́ѵры, 1745. — Л. 223 – 228.

/ Къ оглавленію раздѣла /


Наверхъ / Къ титульной страницѣ

0