Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія во 8-й де́нь.
Преподо́бнаго отца́ на́шего Пата́пія.

Аще изво́литъ настоя́тель, аллилу́ія или́ тропа́рь, да пое́тъ по уста́ву.

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Всехва́льніи му́ченицы.

Отче Пата́піе,* пло́ти стремле́нія* воздержа́ніемъ увяди́въ разжже́ніе,* въ пусты́ню всели́лся еси́,* я́ко Илія́ дре́вле,* у́мъ очища́я непреста́нными къ Бо́гу моли́твами.* И ны́нѣ моли́* дарова́ти душа́мъ на́шимъ* ми́ръ и ве́лію ми́лость.

Отче Пата́піе,* лико́мъ по́стническимъ причи́слился еси́,* безстра́стіемъ украша́яся,* и всели́лся еси́ во оби́телехъ преподо́бныхъ,* идѣ́же свѣ́тъ незаходи́мый,* идѣ́же е́сть дре́во жи́зни.* И ны́нѣ моли́* дарова́ти душа́мъ на́шимъ* ми́ръ и ве́лію ми́лость.

Отче Пата́піе,* свѣти́льникъ изъ Еги́пта возсія́лъ еси́,* просвѣща́я подсо́лнечную* чуде́съ свѣ́тлостьми,* душетлѣ́нныхъ неду́гъ отгоня́я мра́къ,* де́моновъ охужда́я тму́.* И ны́нѣ моли́ Христа́* дарова́ти душа́мъ на́шимъ* ми́ръ и ве́лію ми́лость.

Ины стихи́ры Пресвятѣ́й Богоро́дицѣ, гла́съ и подо́бенъ то́йже:

Нетлѣ́нно родила́ еси́ Бо́га,* тлю́ потре́бльшаго* и нетлѣ́ніе источи́вшаго,* Нетлѣ́нная Непоро́чная.* Тѣ́мже молю́ Тя́:* лю́тыми истлѣ́вшаго мя́* моли́твами Твои́ми, Чи́стая, обнови́,* да сла́влю Тя́,* да любо́вію велича́ю Тя́,* ро́дъ на́шъ возвели́чившую.

Всепѣ́тая Влады́чице,* наде́жде вѣ́рныхъ и утвержде́ніе,* прибѣ́жище и по́мощь,* Тя́ мо́лимъ: отъ вся́кихъ бѣ́дъ рабы́ твоя́ сохрани́,* вѣ́рою покланя́ющіяся Рождеству́ Твоему́.* Христу́ моли́ся* дарова́ти душа́мъ на́шимъ* ми́ръ и ве́лію ми́лость.

Увы́ мнѣ́, что́ бу́ду,* у́мъ, и ду́шу, и тѣ́ло оскверни́въ прегрѣше́ньми?* что́ сотворю́? ка́ко же избѣ́гну* пла́мене неугаси́маго* и нерѣши́мыхъ у́зъ вѣ́чныхъ?* но, о Всенепоро́чная,* пре́жде конца́ умоли́ Сы́на Твоего́* пода́ти ми́ оставле́ніе.

Сла́ва, и ны́нѣ, богоро́диченъ. Подо́бенъ то́йже:

Огнь Божества́ —* Христа́ во утро́бѣ носи́ла еси́,* Его́же ны́нѣ моли́,* Всечи́стая,* удобопали́мую ве́щь* страсте́й мои́хъ угаси́ти всю́,* и изба́вити мя́ огня́ вѣ́чнующаго,* и свѣ́тлости пра́ведныхъ сподо́бити мя́,* егда́ пріи́детъ суди́ти вся́ческая.

Крестобогоро́диченъ:

Своего́ Агнца* Агница и непоро́чная Влады́чица* на Крестѣ́ я́ко ви́дѣ,* зра́ка не иму́ща, ниже́ добро́ты, —* увы́ Мнѣ́! — рыда́ющи, глаго́лаше, —* гдѣ́ добро́та Твоя́ за́йде, Сладча́йшій?* гдѣ́ благолѣ́піе?* гдѣ́ благода́ть блиста́ющая о́браза Твоего́,* Сы́не Мо́й вселюбе́знѣйшій?

На стихо́внѣ окто́иха.

Тропа́рь, гла́съ 8:

Въ тебѣ́, о́тче, извѣ́стно спасе́ся е́же по о́бразу: пріи́мъ бо кре́стъ, послѣ́довалъ еси́ Христу́ и, дѣ́я, учи́лъ еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй. Тѣ́мже и со а́нгелы сра́дуется, преподо́бне Пата́піе, ду́хъ тво́й.

Сла́ва, и ны́нѣ, богоро́диченъ.



НА УТРЕНИ,
Оба кано́на окто́иха и преподо́бнаго на 4, гла́съ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Свѣ́тлаго твоего́ житія́ свѣ́тлая хотя́щу исправле́нія похвали́ти, молю́ся тебѣ́, преподо́бне, лучу́ богатода́тну съ небесе́ ми дарова́ти Го́споду помоли́ся, о́блакъ отгоня́щу невѣ́дѣнія моего́, Пата́піе.

Еги́птяны пе́рвѣе глубино́ю покры́вый Боже́ственнымъ манове́ніемъ, я́ко изъ глубины́ мірска́го смѣше́нія тя́ воспріи́мъ, просвѣти́ Боже́ственными осія́ніи и всесвѣ́тлу тя́ показа́ звѣзду́, о́тче преподо́бне.

Разже́гся, я́ко у́гль мы́сленный, теплото́ю Ду́ха, мра́зъ де́монскій ты́ растопи́лъ еси́, разжже́нныя же стрѣ́лы грѣхо́вныя угаси́лъ еси́, преподо́бне, и къ безстра́стія высотѣ́ возве́лся еси́ чистѣ́йшъ.

Богоро́диченъ: Дре́внія избавле́ніе кля́твы мíру подава́я, Изба́витель изъ Тебе́, Дѣ́во, ражда́ется, Человѣ́къ бы́въ, и́же преподо́бнаго Пата́пія показа́ исто́чникъ исцѣле́ній всѣ́мъ, вѣ́рою къ нему́ прири́щущимъ.

Пѣ́снь 3.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Сле́зъ тече́ньми напои́въ изря́дно душе́вную твою́ бразду́, пшени́цу боже́ственную прине́слъ еси́ дѣя́ній, въ жи́тницахъ вы́шнихъ соблюда́ему.

Любо́вію вооружа́емь, я́коже мече́мъ, преподо́бне, и щито́мъ покрыва́емь, боже́ственнымъ твои́мъ смире́ніемъ де́моновъ полки́ потреби́лъ еси́.

Воздержа́нія цвѣ́томъ, я́коже кри́нъ, процвѣ́лъ еси́, благово́нствуя, преподо́бне, сердца́ воспѣва́ющихъ тя́ и соверша́ющихъ вѣ́рою па́мять твою́.

Богоро́диченъ: На объя́тіяхъ носи́мь ро́ждшія Тя́, Го́споди, еги́петскія и́долы си́лою Твое́ю сокруши́лъ еси́, изъ него́же мно́жество преподо́бныхъ прозябе́.

Сѣда́ленъ, гла́съ 8. Подо́бенъ: Прему́дрости.

Воздержа́нія по́ты по́стническими угаси́лъ еси́ пла́мень страсте́й, всѣ́мъ источи́въ чуде́съ пучи́ну, и въ не́й, я́коже вторы́й Моисе́й, потопи́лъ еси́ ле́стная стремле́нія де́моновъ полки́. Тѣ́мже, соше́дшеся, по до́лгу почита́емъ всечестну́ю па́мять твою́ моле́бную, преподо́бне богоно́се Пата́піе: моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Ми́лостиваго Сло́ва и милосе́рдаго я́ко ро́ждшая, Влады́чице всѣ́хъ, поми́луй вся́, къ Тебѣ́ прибѣга́ющія, и напа́стей, и болѣ́зней, и вся́каго озлобле́нія, и вѣ́чнующаго пла́мене свободи́, я́ко да благода́рственно мно́гихъ щедро́тъ Твои́хъ бога́тство просла́вимъ и безмѣ́рную ми́лость, и вопіе́мъ Ти́ всегда́: моли́ Христа́ Бо́га грѣхо́въ оставле́ніе пода́ти покланя́ющимся вѣ́рою Рождеству́ Твоему́.

Крестобогоро́диченъ:

Дѣ́ва и Ма́ти Изба́вителя, Кресту́ предстоя́щи, болѣ́зненно со слеза́ми рыда́ющи, ма́терски вопія́ше: что́ стра́нное сіе́ и пресла́вное, Сы́не, источа́яй всѣ́мъ человѣ́комъ безстра́стіе, посредѣ́ осужде́нною на Крестѣ́ распя́тся, въ ре́бра пробода́емь и же́лчію напоя́емь отъ ру́къ, я́же созда́? Но воста́ни и да́руй прегрѣше́ній оставле́ніе вѣ́рою пою́щимъ Боже́ственная Твоя́ страда́нія.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Бе́здна те́плыхъ твои́хъ сле́зъ потопи́ де́монская во́инства и грѣхо́вныя во́лны, пучи́на же чуде́съ су́щимъ во глубинѣ́ страсте́й показа́ся.

Смире́ніе, бдѣ́ніе, и спротяже́нную моли́тву, и любо́вь нелицемѣ́рну, и вѣ́ру, и наде́жду стяжа́въ, бы́лъ еси́ собесѣ́дникъ небе́снымъ а́нгеломъ, о́тче преподо́бне.

Успи́лъ еси́ страсте́й многообра́зныхъ волне́нія боже́ственными восхожде́ніи и непреста́нными очище́ніи. Тѣ́мже къ невече́рнему сія́нію по успе́ніи отше́лъ еси́.

Богоро́диченъ: Возсія́лъ еси́ изъ Дѣ́вы, я́ко изъ о́блака со́лнце, звѣ́зды озаря́ющія показа́въ преподо́бныя Твоя́, мíру и страсте́мъ распе́ншихся, Ще́дре, си́лою Твое́ю.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Просвѣще́ніе во тмѣ́ лежа́щихъ, возсія́й ми́ зарю́ боже́ственными преподо́бнаго Твоего́ моли́твами, разори́ о́блаки окая́нныя души́ моея́, одожди́ ми струю́ оставле́нія: ино́го бо, ра́звѣ Тебе́, Бо́га не вѣ́мъ.

Скве́рны страсте́й очи́стивъ о́ко мы́сленное, о́тче богоно́се, воздержа́ніемъ, боже́ственною же моли́твою ты́ отве́рзлъ еси́ зѣ́ницы ослѣпле́нныя и разори́лъ еси́ сія́ніемъ исцѣле́ній лю́тыхъ омраче́ніе.

Здра́віе душе́вное, здра́віе тѣле́сное, вси́ незави́стную благода́ть, пріиди́те, почерпе́мъ, я́ко отъ исто́чника, боже́ственныя ра́ки му́драго Пата́пія: чудеса́ бо источа́етъ, я́ко во́ды, вѣ́рою несомнѣ́нною къ нему́ притека́ющимъ.

Богоро́диченъ: Да́теля жи́зни, вся́ческихъ содержа́щего, родила́ еси́ неизрече́ннымъ Рождество́мъ, во святы́хъ сла́вимаго, Отрокови́це, и на преподо́бныхъ почива́ющаго, Его́же о на́съ моли́, Богоневѣ́сто.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Свѣтлѣ́йшими у́мъ просвѣща́яй, о́тче, восхожд́ніи, я́коже безпло́тенъ, съ пло́тію пожи́лъ еси́, не умокри́вся грѣхми́, Пата́піе.

Илію́ Ѳесви́тянина подража́я и послѣ́дуя Іоа́нну Предте́чи, въ пусты́ню пе́рвѣе всели́лся еси́, безмо́лвіемъ у́мъ очи́стивъ.

Изъ Еги́пта свѣти́льникъ богоза́рнѣйшій, въ Константи́новѣ гра́дѣ сія́ніемъ исцѣле́ній просвѣща́емь, облиста́лъ еси́, свѣтлѣ́йшій о́тче Пата́піе.

Богоро́диченъ: На о́блацѣ ле́гцѣ сѣдя́й, дре́вле во Еги́петъ Христо́съ пріи́де и, низложи́въ и́долы, и преподо́бныхъ ли́ки собра́.

Конда́къ, гла́съ 3. Подо́бенъ: Дѣ́ва дне́сь.

Хра́мъ тво́й, свя́те, духо́вное врачевство́ лю́діе обрѣ́тше, со тща́ніемъ къ нему́ приходя́ще, цѣльбу́ неду́говъ про́сятъ прія́ти, рѣше́ніе же въ житіи́ прегрѣше́нныхъ: ты́ бо всѣ́хъ су́щихъ въ ну́ждахъ предста́тель яви́лся еси́, Пата́піе преподо́бне.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Огне́мъ мы́сленнымъ разже́глъ еси́ душе́вная чу́вствія, о́гнь грѣхо́вный испепели́лъ еси́ содѣ́йствомъ Ду́ха и свѣтови́денъ яви́лся еси́, воспѣва́я, Пата́піе: благослове́нъ еси́, Бо́же оте́цъ на́шихъ.

Слѣпы́я воочи́вый содѣ́йствомъ Боже́ственнымъ, богоблаже́нне, стра́сти разли́чныя исцѣли́лъ еси́ и боже́ственными призыва́ніи полки́ лука́выя де́моновъ отгна́лъ еси́, воспѣва́я: благослове́нъ еси́, Бо́же оте́цъ на́шихъ.

Чуде́съ глубина́, врачева́ній рѣка́, исто́чникъ непреста́ненъ, струя́, ника́коже оскудѣ́ема, тво́й гро́бъ показа́ся, о́тче, вѣ́рно приступа́ющимъ и те́плѣ взыва́ющимъ: благослове́нъ еси́, Бо́же оте́цъ на́шихъ.

Богоро́диченъ: Обожа́етъ мя́ изъ Тебе́, Дѣ́во, пребоже́ственный Бо́гъ, ра́бій зра́къ пріе́мъ, обновля́етъ же стези́ зна́нія, я́коже предѣ́лы естества́, мно́жество мона́ховъ и преподо́бныхъ приве́дъ, пою́щихъ: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго, и пла́мень въ ро́су прело́жшаго Бо́га, по́йте, дѣла́, я́ко Го́спода, и превозноси́те во вся́ вѣ́ки.

Очи́стивъ тя́ сама́го отъ ти́ны страсте́й попече́ніемъ, свѣтлѣ́йше яви́лся еси́, о́тче, прія́телище Бо́жіе, взыва́я: по́йте Го́спода и превозноси́те во вся́ вѣ́ки.

Устро́ивъ твою́ жи́знь боголѣ́пно, преподо́бне о́тче, строи́тель показа́лся еси́, служи́въ до́брѣ потре́бамъ святы́хъ, преподо́бне, съ ни́миже сподо́бился еси́ Вы́шняго наслѣ́дія.

Ко Го́споду моли́твами очи́сти ны́ отъ вся́кія скве́рны, те́плою твое́ю моли́твою отъ треволне́нія страсте́й, и болѣ́зней, и скорбе́й изба́ви тя́ досто́йно, Пата́піе, чту́щія.

Богоро́диченъ: Яже онебеси́вшая на́ше земно́е и тлѣ́нное, Чи́стая, существо́, а́нгеловъ сла́ва и преподо́бныхъ ра́дость, еди́на тва́рей Влады́чица, я́ко Бо́га ро́ждшая, да пое́тся во вѣ́ки.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Де́нь спаси́тельный — па́мять твоя́ возсія́, су́щая во тмѣ́ сердца́ просвѣща́ющій и страсте́й мглу́ рѣша́щій, сы́ны свѣ́та показу́яй, о́тче, ны́нѣ чту́щія тя́, Госпо́дня уго́дника.

Ѳиве́ановъ прозябе́ніе, пусты́ни хвале́ніе, мона́шествующихъ сла́ву и благолѣ́піе, византíйскаго свѣти́льника, на земли́ а́нгела я́вльшася, Пата́пія вси́ досто́йно ублажи́мъ.

Ангеловъ собесѣ́дникъ, преподо́бныхъ равностоя́тель, проро́ковъ и апо́столовъ, му́чениковъ, іера́рховъ, преподо́бне, соприча́стникъ бы́въ, и Честнѣ́й Тро́ицѣ служа́ ума́ чистото́ю, о всѣ́хъ на́съ моли́ся.

Богоро́диченъ: Вели́кое та́инство, е́же па́че ума́, рождества́ Твоего́, ужаса́етъ а́нгелы, Богора́дованная, услажда́етъ преподо́бныхъ собо́ры, Чи́стая, свяще́нныя весели́тъ отцы́, боже́ственно пою́щія Тя́, Богоро́дице Неискусобра́чная.

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 71 об. – 75.

/ Къ оглавленію раздѣла /


Наверхъ / Къ титульной страницѣ

0