Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 7-й де́нь.
Па́мять преподо́бныя ма́тере на́шея Филоѳе́и Те́рновскія.

И а́ще хра́мъ ея́ или́ изво́литъ настоя́тель соверши́ти всено́щое бдѣ́ніе:

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1. Подо́бенъ: Небе́сныхъ чино́въ.

Небе́сныхъ чино́въ обра́довала еси́,* дѣ́вственныхъ возжелѣ́вши сія́ній,* Филоѳе́е богому́драя,* и сле́зными ка́плями о́блакъ сласте́й отгна́ла еси́,* супру́жника твоего́ богому́дреннѣ къ нетлѣ́нію наста́вивши:* моли́ спасти́ся душа́мъ на́шимъ.

Небе́сное свѣти́ло* отча́яннымъ во тмѣ́ прегрѣше́ній мно́гихъ,* дѣ́вства заря́ми яви́лася еси́,* Филоѳе́е свята́я,* мо́лимъ тя́, я́коже Константи́на* твоего́ обру́чника,* и на́съ мольба́ми къ Бо́гу те́плыми* къ чи́стому приведи́ житію́.

Сла́ва, гла́съ 6:

Свѣтоно́сную па́мять пѣ́сньми почти́мъ,* боголюбе́зныя отрокови́цы,* я́же вся́ мимотеку́щая преоби́дѣвши,* я́ко се́рна къ го́рнымъ пото́комъ* житія́ нескве́рнаго притече́.

И ны́нѣ, богоро́диченъ:

Упра́ви у́мъ мо́й, Влады́чице, тружда́ющійся въ пучи́нѣ скорбе́й, и потопля́емый наше́ствіемъ тлѣтво́рныхъ страсте́й, мене́ же спаси́, Богоро́дице, къ Тебѣ́ прибѣга́ющаго: ины́я бо по́мощи, Чи́стая, ра́звѣ Тебе́, не зна́ю.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ многосвѣ́тлый* дѣ́вственныя красоты́,* и хра́мъ Ду́ха Свята́го* пло́ти удруче́ніемъ яви́лася еси́,* Филоѳе́е треблаже́нная.

Сти́хъ: Ди́венъ Бо́гъ во святы́хъ Свои́хъ,* Бо́гъ Изра́илевъ.

До́мъ Бо́жій* па́че селе́ній грѣ́шничихъ* возлю́бльши, Филоѳе́е,* въ моли́твахъ издѣ́тска пребыва́ла еси́,* тѣ́мъ са́мую себе́* до́мъ Ду́хови Бо́жіему,* сотвори́ла еси́ досто́инъ.

Сти́хъ: Честна́ предъ Го́сподемъ* сме́рть преподо́бныхъ Его́.

До́мъ роди́телей твои́хъ* ра́достію испо́лнила еси́,* рождество́мъ твои́мъ, Филоѳе́е,* боголю́бное вои́стину житіе́,* я́ко иму́щая мíру показа́ти.

Сла́ва, гла́съ 5:

Истинное на небеси́ житіе́ па́че привре́меннаго,* отъ мя́гкихъ ногте́й предызбра́вши, боголю́бице,* цвѣ́тъ дѣ́вства отъ и́нея сласте́й* невре́дно сохрани́ла еси́,* и я́ко непоро́ченъ кри́нъ,* въ нау́тріи невече́рняго дне́ возсія́ла еси́,* росо́ю Ду́ха свѣтя́щися чу́дно.

И ны́нѣ, гла́съ то́йже:

Иже изъ Твоея́ утро́бы пресу́щественно, Дѣ́во, Воплоти́выйся, мíръ богоразу́мія заре́ю просвѣти́, Пречи́стая.

Тропа́рь, гла́съ 4:

Отъ ма́тернихъ пеле́нъ Бо́га возлюби́вши,* въ Боже́ственныхъ Писа́ніихъ при́сно поуча́вшися,* посто́мъ, слеза́ми, моле́ньми и воздыха́ніи непреста́нными,* хра́мъ Бо́жій яви́лася еси́, Филоѳе́е достохва́льная,* тѣ́мже и па́мять твою́ любо́вію пра́зднующимъ,* освяще́нія и цѣльбы́ неску́дно да́рующи,* сохраня́й гра́дъ тво́й* и вся́ лю́ди, вѣ́рно чту́щія тя́,* отъ вся́кихъ бѣ́дъ и напа́стей.

Сла́ва, и ны́нѣ, [богоро́диченъ]:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.


НА ВЕЛИЦѢЙ ВЕЧЕРНИ,
Стихосло́вимъ: Блаже́нъ му́жъ.., 1 антифо́нъ. На Го́споди воззва́хъ: стихи́ры дре́внія на 8, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Ты́, Филоѳе́е честна́я,* въ ю́ности тѣле́снѣй* неразруше́нъ и соверше́нъ смы́слъ показа́ла еси́.* Еву дре́вле прельсти́вшаго* и рая́ лиши́вша,* Боже́ственною си́лою низложи́ла еси́,* си́лою и благода́тію отъ Чи́стыя Богоотрокови́цы Возсія́вшаго* и мíръ спа́сшаго. [Два́жды.]

Благода́тію обогати́вшися исцѣле́ній,* о Филоѳе́е честна́я, врачева́ти неду́ги* и ду́хи лука́выя отгоня́ти, сла́вная,* свѣтозаре́ніемъ Бо́жія Ду́ха,* къ честнѣ́й це́ркви твое́й притека́юще,* прикаса́емся ра́цѣ твое́й, сла́вная,* ра́достію пѣ́сньми почита́емъ* Христа́ Бо́га на́шего.

Дѣ́вственное украше́ніе,* по́стникомъ удобре́ніе,* и преподо́бнымъ вѣне́цъ,* же́нск[ую] похвал[у]́* и вѣ́рнымъ спасе́ніе,* Филоѳе́ю дне́сь вси́* пѣ́сненными цвѣ́ты вѣнча́имъ,* и похвала́ми почти́мъ* за ны́ моля́щуюся.

Ины́я стихи́ры, гла́съ 4. Подо́бенъ: Яко до́бля.

Яко до́брую въ дѣ́вахъ* непоро́чно на земли́ пожи́вши,* и а́нгельскимъ предстоя́ніемъ въ моли́твахъ Бо́гу угоди́вши,* сокро́вище на небесѣ́хъ нетлѣ́емое обрѣла́ еси́,* сокро́вищемъ же хода́тайствъ, чуде́съ и исцѣле́ній,* ро́дъ на́шъ обогати́ла еси́,* и гра́да Те́рнова покро́въ яви́лася еси́,* тѣ́мже о всѣ́хъ па́мять твою́* че́стно пра́зднующихъ,* Бо́гу моли́ся,* преподо́бная Филоѳе́е. [Два́жды.]

Яко достоя́ніе неотъе́млемое,* отъ Бо́га земли́ Бо́лгарстѣй дарова́ніе,* стяжа́хомъ [в]си́ засту́пницу те́плую, Филоѳе́ю пречу́дную,* те́рновскія лю́ди моща́ми свои́ми дре́вле благослови́вшую,* и ны́нѣ о чту́щихъ ю́ непреста́нно Христу́ моля́щуюся,* дарова́тися прегрѣше́ній оставле́нію,* болѣ́зней исцѣле́нію и въ ско́рбехъ утѣше́нію,* вѣ́рою пра́зднующимъ,* всечестну́ю па́мять ея́. [Два́жды.]

Сла́ва, гла́съ 6:

Свѣтоно́сную па́мять пѣ́сньми почти́мъ,* боголюбе́зныя отрокови́цы,* я́же вся́ мимотеку́щая преоби́дѣвши,* я́ко се́рна къ го́рнымъ пото́комъ* житія́ нескве́рнаго притече́.

И ны́нѣ, богоро́диченъ, гла́съ то́йже:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ: Свѣ́те ти́хій... Проки́менъ дне́ и чте́нія 3 преподо́бнѣй женѣ́.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1. Самогла́сны:

При гра́дѣ Моливо́тъ о́стровъ осо́бый обрѣ́тши,* я́ко го́рлица та́мо вогнѣзди́лася еси́,* вся́ сѣ́ти мірскíя прелетѣ́вши.* Острое житіе́ подъя́ла еси́* по́стническихъ лише́ній, бдѣ́ній и долулежа́ній,* николи́же отъ Христа́ отсту́пльши моли́твою.* Тѣ́мже, я́ко къ Бо́гу иму́щая дерзнове́ніе,* моли́ о на́съ, ма́ти на́ша,* Филоѳе́е многоми́лостивая.

Сла́ва, гла́съ 2:

Страхова́ній, привидѣ́ній и тмори́чныхъ ко́зней діа́вола посрами́ла еси́ доблему́жнѣ, Филоѳе́е пресла́вная, бдѣ́нными стоя́ньми; сле́зными же дождя́ми сѣ́мена покая́нія твоего́ напая́ющи, село́ многопло́дное была́ еси́, кра́сная; тѣ́мже и въ са́дъ красоты́ неувяда́ющія всели́лася еси́, моля́щися непреста́нно о душа́хъ на́шихъ.

И ны́нѣ, богоро́диченъ:

О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.

На стихо́внѣ стихи́ры, гла́съ 5:

Небому́дріемъ возпари́вшую въ нетлѣ́нную тве́рдь,* небе́сную пти́цу небе́сныя си́лы* дне́сь прему́дро восхваля́ютъ.* Мы́ же, дебельство́мъ слове́съ земны́хъ* неудо́бь сію́ прославля́юще,* прегрѣше́ній оставле́ніе моли́твами ея́* вои́стину прія́ти ча́емъ.

Сти́хъ: Ди́венъ Бо́гъ во святы́хъ Свои́хъ,* Бо́гъ Изра́илевъ.

Нестерпѣ́вши идолочте́цъ смра́дныхъ же́ртвъ,* мече́мъ слове́съ богодохнове́нныхъ* у́зы блуже́ній и́хъ растерза́ла еси́, му́драя дѣ́во,* тѣ́мъ и души́ моея́ блуже́ній око́вы разори́,* и свѣ́томъ добронра́вія тму́ мою́,* Филоѳе́е честна́я, спасите́льнѣ озари́.

Сти́хъ: Честна́ предъ Го́сподемъ* сме́рть преподо́бныхъ Его́.

Живоро́дными слеза́ми,* по́хоти смертото́чныя умертви́ла еси́,* по́стническими страстьми́ страсте́й жа́ло исто́ргла еси́,* дѣ́во отрокови́це Филоѳе́е,* кре́стъ взе́мши любо́вію,* и Боже́ственному животу́ обрѣ́тши вхо́дъ,* моли́ о на́съ Тро́ицу Пребоже́ственную,* спасти́ся душа́мъ чту́щимъ святу́ю па́мять твою́.

Сла́ва, гла́съ 5:

Истинное на небеси́ житіе́ па́че привре́меннаго,* отъ мя́гкихъ ногте́й предызбра́вши, боголю́бице,* цвѣ́тъ дѣ́вства отъ и́нея сласте́й* невре́дно сохрани́ла еси́,* и я́ко непоро́ченъ кри́нъ,* въ нау́тріи невече́рняго дне́ возсія́ла еси́,* росо́ю Ду́ха свѣтя́щися чу́дно.

И ны́нѣ, богоро́диченъ:

Хра́мъ и Две́рь еси́, Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.

На благослове́ніи хлѣ́бовъ: Тропа́рь преподо́бныя: Отъ ма́тернихъ пеле́нъ Бо́га возлюби́вши.., два́жды. Та́же: Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь преподо́бныя, гла́съ 4:

Отъ ма́тернихъ пеле́нъ Бо́га возлюби́вши,* въ Боже́ственныхъ Писа́ніихъ при́сно поуча́вшися,* посто́мъ, слеза́ми, моле́ньми и воздыха́ніи непреста́нными,* хра́мъ Бо́жій яви́лася еси́, Филоѳе́е достохва́льная,* тѣ́мже и па́мять твою́ любо́вію пра́зднующимъ,* освяще́нія и цѣльбы́ неску́дно да́рующи,* сохраня́й гра́дъ тво́й* и вся́ лю́ди, вѣ́рно чту́щія тя́,* отъ вся́кихъ бѣ́дъ и напа́стей. [Два́жды.]

Сла́ва, и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

По 1-мъ стихосло́віи сѣда́ленъ, гла́съ 8. Подо́бенъ: Свирѣ́лей па́стырскихъ.

Свирѣ́ль сладкослы́шанная уста́ твоя́ бы́сть: отры́гнувши бо сло́во слове́снымъ овца́мъ, наказа́нія Боже́ственнаго ме́домъ серде́цъ сла́ность услади́ла еси́, краснослове́сная го́рлице, и го́рькихъ заблужде́ній слія́нія волна́ми благода́тныхъ уче́ній потопи́ла еси́. [Два́жды.]

Сла́ва, и ны́нѣ, богоро́диченъ:

Богоречи́віи проро́цы проповѣ́даху та́инства Твоего́ глубину́, Дѣ́во Богора́дованная, богоно́сная же отрокови́ца Филоѳе́я та́йными сія́ніи добродѣ́тельнаго житія́ соглаго́лаше и́мъ, свѣтоли́тіемъ моли́твъ и благоуха́ніемъ до́брыхъ дѣ́лъ.

По 2-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Красоту́ дѣ́вства твоего́ небла́зненно сохра́ньши, дѣви́це пресла́вная, пресла́достное пѣ́ніе де́нь и но́щь Бо́гу возноси́ла еси́, невѣ́рныхъ бо сладостра́стію посо́бствующую тму́ боголю́бнѣ осія́ла еси́, неразлу́чно Тро́ицы свѣтлосте́мъ срастворя́ющися, моле́ньми, бдѣ́ніи и славосло́віи Боже́ственными. [Два́жды.]

Сла́ва, и ны́нѣ, богоро́диченъ:

Красотѣ́ дѣ́вства Твоего́, и пресвѣ́тлой чистотѣ́ Твое́й, Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возимену́ю Тя́? Недоумѣва́ю и ужаса́юся. Тѣ́мже я́ко повелѣ́нъ бы́хъ, вопію́ Ти́: ра́дуйся, Благода́тная.

[Велича́ніе:

Ублажа́емъ тя́, преподо́бная ма́ти Филоѳе́е, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 4. Подо́бенъ: Ско́ро предвари́.

Ско́ро потщи́ся, чи́стая дѣ́во Филоѳе́е, въ по́мощь отъ нечи́стыхъ духо́въ стужа́емымъ, я́ко погиба́емъ во мно́жествѣ грѣхо́въ, не иму́ще крѣ́пости противобо́рствовати тѣ́мъ. Смире́нныя лю́ди не отве́ржи, съ пла́чемъ ти́ зову́щихъ: заступи́ на́съ, преблага́я ма́ти, а́ще и недосто́йны есмы́ заступле́нія твоего́. [Два́жды.]

Сла́ва, и ны́нѣ, богоро́диченъ:

Тебе́, незло́бивую помо́щницу смире́ннымъ, Богоро́дице Дѣ́во, мо́лимъ, озло́бленніи, Тебе́, Нескве́рная Ма́ти Еди́наго отъ Тро́ицы, скве́рніи умоля́емъ: просвѣти́ ду́ши на́ша омраче́нныя лука́вствомъ и нечистото́ю, уще́дри ны́, я́ко да кра́йнимъ Сы́на Твоего́ снисхожде́ніемъ вѣ́чныхъ му́къ свободи́мся, Тя́ сла́вяще во вся́ вѣ́ки.

Степе́нна, 1-й антифо́нъ 4-го гла́са. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Таже: Вся́кое дыха́ніе да хва́литъ Го́спода. Сти́хъ: Хвали́те Бо́га во святы́хъ Его́... Ева́нгеліе Матѳе́я, зача́ло 104: Рече́ Госпо́дь при́тчу сію́: уподо́бися Ца́рствіе небе́сное десяти́мъ дѣ́вамъ... И по 50-мъ псалмѣ́: Сла́ва, Моли́твами преподо́бныя, Ми́лостиве, очи́сти мно́жества согрѣше́ній на́шихъ. И ны́нѣ, Моли́твами Богоро́дицы, Ми́лостиве, очи́сти мно́жества согрѣше́ній на́шихъ. И по се́мъ: Поми́луй мя́, Бо́же...

И стихи́ра преподо́бныя, гла́съ 6:

По́двигомъ до́брымъ подвиза́вшися, и лѣ́ствицею добродѣ́телей восхожде́ніе Боже́ственное соверши́вши, въ черто́гъ нетлѣ́нныя жи́зни вошла́ еси́ съ му́дрыми дѣ́вами, и Ца́рство вѣ́чное получи́ла еси́, Филоѳе́́е пресла́вная, отону́дуже и вѣ́рою къ тебѣ́ притека́ющимъ кла́дязь незави́стный исцѣле́ній яви́лася еси́, ра́дованіе и покро́въ земли́ Бо́лгарскія, и вся́кой души́ христіа́нстѣй въ напа́стѣхъ засту́пница. Тѣ́мже, вои́стинну боголю́бія ра́ди Бо́гомъ просла́вленная, грѣхо́въ оставле́нію чту́щимъ тя́ вѣ́рою, у Христа́ Бо́га на́шего проси́ дарова́тися.

Кано́нъ [Богоро́дицѣ со ирмосо́мъ на 6 и] преподо́бнѣй Филоѳе́и [на 8], гла́съ 5, его́же краегране́сіе: Ра́дуйся, боголюби́вая дѣ́во, Филоѳе́е сла́вная.

Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Ро́ждіе честно́е лозы́ святы́я, Іоа́нна и Ири́ны прозябе́ніе благосла́вное, Филоѳе́е, отъ пеле́нъ Бо́га возлюби́вшая, тѣ́мъ и сердца́ роди́телей твои́хъ возвесели́вшая. Сердца́ на́ша, мо́лимся ти́, моли́твами твои́ми предочи́сти, да свѣ́тло воспое́мъ па́мять твою́ свѣтоно́сную.

Ангеломъ отъ младе́нчества поревнова́вши, по́стнически равноа́нгельное житіе́ твое́ начала́ еси́, не хотя́щи ма́терняго млека́ вкуше́нія отню́дъ: благода́тію бо Боже́ственною, а́ки млеко́мъ небе́снымъ, воспита́лася еси́, боголю́біе вои́стину явля́я ангелонра́вное.

Дѣви́ческую чистоту́ издѣ́тска возлюби́вши, плотска́го жи́тельства возненави́дѣла еси́, Филоѳе́е дѣ́во, и я́ко и́мене своего́ вои́стину досто́йна, боголю́біемъ супру́жника твоего́ Константи́на въ а́нгельское привела́ еси́ житіе́, нетлѣ́ніемъ веселя́щи дѣ́вственныя чи́ны а́нгельскія.

Удруче́ніемъ пло́ти положи́ла еси́ нача́ло подвиго́въ твои́хъ, бдѣ́нными же стоя́ньми, колѣнопреклоне́ніи, воздыха́ньми и сле́зными струя́ми фарао́на мы́сленнаго удави́вши, среду́ боголюбе́знаго житія́ дости́гла еси́, его́же, я́ко а́нгелъ во пло́ти, пречу́дная, сконча́ла еси́, мно́гими чудотворе́ніи и богозаре́нными, прему́драя, наставле́ніи.

Богоро́диченъ: Исправле́ніе да́руй рабо́мъ Твои́мъ, Пречи́стая Дѣ́во, неисче́тныя не́мощи человѣ́ческія до́брѣ вѣ́дущи, и моли́твою твое́ю неду́ги на́ша неисцѣ́льныя, я́ко Блага́я, изврачу́й.

Пѣ́снь 3.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Сла́сти неприча́стна яви́лася еси́, добродѣ́во Филоѳе́е, боголюбе́зную добро́ту души́ отъ истлѣ́нія грѣхо́внаго му́дрѣ соблюда́ющи, тѣ́мже и́стинную сла́дость въ небе́снѣмъ Ца́рствіи обрѣ́тши, непреста́нно моли́ся изба́витися го́рькихъ му́къ сласте́мъ поработи́вшимся.

Якоже се́рна отъ ловя́щихъ сѣте́й изба́вльшися, о́стровнымъ отше́ствіемъ пре́лести ловле́ній избѣ́гла еси́, прему́драя Филоѳе́е, и та́мо а́нгельски пожи́вши, не лиши́лася еси́ лу́гъ небе́снаго Ца́рствія ту́чныя травы́, вѣ́чныя у Христа́ Безсме́ртнаго жи́зни.

Бла́то смра́дное страсте́й слеза́ми исся́че вся́чески твои́ми, и са́дъ прекра́сенъ добродѣ́телей душа́ твоя́ яви́ся, благопобѣ́дная боголю́бице, идѣ́же пти́цы небе́сныя гнѣзда́ своя́ сотво́рше, хвале́ньми Боже́ственными ду́шу ти́ на вся́къ ча́съ веселя́ху.

Богоро́диченъ: Обновле́ніе житія́ пода́ждь на́мъ, Преблагослове́нная Богоро́дице, я́ко на вся́къ ча́съ согрѣша́емъ и лука́выхъ помышле́ній ника́коже отступа́емъ. Изба́ви ны́, Многоми́лостивая, отъ порабоще́нія страсте́мъ, да чи́стымъ се́рдцемъ восхва́лимъ Ма́тернее Твое́ милосе́рдіе.

Сѣда́ленъ, гла́съ 5:

Исто́чникъ сле́зъ, сокро́вище моли́твъ непреста́нныхъ, е́зеро воздыха́ній глубо́кое и бдѣ́ній сто́лпъ житіе́мъ была́ еси́ достоди́внымъ, Филоѳе́е, несравне́нно Бо́га возлюби́вши. Тѣ́мже и почте́на бы́вши отъ Него́, яви́лася еси́ исто́чникъ исцѣле́ній, сокро́вище умиле́нія, е́зеро духо́вныхъ утѣше́ній и вѣ́ры и́стинныя сто́лпъ.

Сла́ва:

Зла́то очище́нное — души́ твоея́ къ Бо́гу любы́, и мѵ́ро сладкоуха́нное — и́мене твоего́ призыва́ніе, засту́пнице земли́ Бо́лгарскія, яви́стася, Филоѳе́е ма́ти, тѣ́мже ра́дуйся, добродѣ́во, всѣ́мъ призыва́ющимъ тя́ ско́рая по́моще.

И ны́нѣ, богоро́диченъ, гла́съ то́йже:

Ра́дости, Обра́дованная, сподо́бившися, Филоѳе́я вопіе́тъ Ти́, Со́лнцу отъ Тебе́ возсія́вшему предстоя́щи: ра́дуйся, Живота́ Ма́ти; ра́дуйся, Приснодѣ́во, ра́досте всѣ́мъ чи́стымъ се́рдцемъ.

Пѣ́снь 4.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Го́рнимъ умо́мъ ни́жнихъ похотѣ́ній попра́ла еси́, досточу́дная, Наго́рныя про́повѣди блаже́нствъ вся́чески и́щущи и пои́стинѣ получа́ющи, я́ко вѣ́рна. Помози́ и на́мъ, невѣ́рнымъ, возлюби́ти Христа́ Бо́га на́шего и въ се́й ча́съ житія́ боголюби́ваго нача́ло тве́рдое поста́вити.

Острымъ житіе́мъ твои́мъ вся́ стрѣ́л[ы] лука́ваго притупи́ла еси́, сокруши́[вши] вы́ю льстивому́дреннаго веліа́ра, и обостри́вши сугу́бо у́мъ сво́й бдѣ́нно, мра́комъ Боже́ственнаго вѣ́дѣнія, свѣ́тъ мíру яви́лася еси́.

Ладіе́ю смире́ннаго житія́, треволне́нія душегу́бныхъ страсте́й преплы́вши неботе́чнѣ, приста́нище дости́гла еси́ многоти́хое нетлѣ́нія, добродѣ́во благосе́рдая, отону́дуже ти́хими заря́ми пу́ть спасе́нія вѣ́рнымъ показу́еши.

Юность твою́ всерачи́тельнѣ Бо́гу твоему́ освяти́ла еси́, ту́чныя па́жити грѣха́ оста́вивши, и по́стнически Ѳаво́рскія свѣ́тлости возлюби́вши, пусты́нная го́рлице, отону́дуже и отъ ка́менія воздержа́нія ме́дъ и млеко́ добродѣ́телей сса́ла еси́.

Богоро́диченъ: Безкрѣ́постнымъ крѣ́посте, нему́дрымъ му́дросте, Дѣ́во Всепѣ́тая, не оста́ви на́съ си́рыхъ: изнемога́емъ отъ мно́жества грѣхо́въ, и въ отча́яніи на́шемъ къ Тебѣ́ еди́нѣй вопіе́мъ: потщи́ся заступи́ти лю́ди смире́нныя, о́чи го́рдыхъ де́моновъ до а́да смиря́ющи.

Пѣ́снь 5.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Издруче́ніемъ немощны́я пло́ти, дѣ́во [1], всю́ мни́мую мо́щь вра́жію въ пе́рсть попра́ла еси́ Филоѳе́е, многомо́щную въ не́мощехъ Боже́ственную по́мощь прему́дрѣ взыска́вши.

Воскреси́вшему Ла́заря тве́рдо вѣ́ровавши, не отступи́ла еси́ отъ Него́, до́ндеже слеза́ми возставле́ніе соверше́нное о́браза пречу́днаго Того́ прія́ла еси́.

Агницу Христо́ву Филоѳе́ю ны́нѣ вся́ земля́ Бо́лгарская да пое́тъ любопра́здненственно, ублажа́ющи труды́ ея́: утѣше́ній бо пото́ками напая́етъ ду́ши лю́бящихъ ю́.

Якоже кра́сный лу́гъ, цвѣ́ты чудноуха́нными преиспещре́нъ, па́мять твоя́ вои́стину благоуха́нна, Филоѳе́е, воня́ми бо добродѣ́телей твои́хъ вся́ Це́рковь ны́нѣ исполня́ется.

Богоро́диченъ: Дави́дскую вѣ́твь, проро́ческое исполне́ніе, ве́сну благоза́рную зиму́ющимъ во грѣсѣ́хъ, Дѣ́ву Пречи́стую почти́мъ: неоскудѣ́имъ, вѣ́рніи, пѣ́сньми и хвале́ньми, Всепѣ́тую при́сно пою́ще.

Пѣ́снь 6.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Евѳи́міевыми словесы́ че́стно восхва́ленная, Филоѳе́е пресла́вная, и на́ша убо́гая хвале́нія не отри́ни ны́нѣ: ле́нъ бо куря́щійся на́ша словеса́, ты́ же пла́мень боголю́бія въ сердца́ на́ша возжжи́.

Возра́довася Те́рновъ гра́дъ, чудоно́сную рѣку́ — мо́щи твоя́ пріобрѣ́тъ, и съ патріа́рхомъ вку́пѣ вся́къ во́зрастъ и сосло́віе вопія́ху тебѣ́: ра́дуйся, возвесели́вшая всю́ зе́млю Бо́лгарскую.

Окрестъ святы́хъ моще́й твои́хъ со свѣща́ми, кади́льницы и благоуха́ньми всему́ церко́вному при́чту собра́вшемуся, патріа́рхъ Те́рновскій взыва́ше ти́, дѣ́во преподо́бна: и́скренняя рабо́ Христо́ва, пти́це пусты́нная, ка́ко сѣ́мо прелетѣ́ла еси́?

Богоро́диченъ: Фіа́лъ благово́ній Ду́ха свѣтлопозлаще́нъ, освяти́вшій мíръ ве́сь, Дѣ́во Богома́ти, яви́лася еси́, въ ро́дѣхъ родо́въ Благослове́нная Пречи́стая, излива́ющій освяще́ній сту́дно зача́тымъ, свѣтлѣ́тися творя́щи но́вую тва́рь.

Конда́къ преподо́бнѣй, гла́съ 5:

Наста́ дне́сь пра́здникъ лучеза́рный дѣ́вы боголюбе́зныя,* въ о́ньже вся́ Це́рковь Христо́ва свѣ́тло лику́етъ,* небеса́ ра́дуются,* сла́вный гра́дъ Те́рновъ святы́хъ свѣ́тлостей исполня́ется,* и земля́ Бо́лгарская,* свѣ́тлая чудеса́ Филоѳе́и воспомина́ющи,* духо́вно торжеству́етъ.

Икосъ:

Огнено́сною моли́твою врага́ попали́ла еси́ о́гненныя искуше́нія, о́гненныя язы́цы апо́столомъ дре́вле Низпосла́вшему, пѣ́сни де́нь и но́щь, а́ки славíй, возсыла́ющи. Тѣ́мже ны́нѣ отъ всѣ́хъ слы́шиши пѣ́снь сицеву́ю: ра́дуйся, сла́досте вѣ́рныхъ; ра́дуйся, а́нгельски на земли́ пожи́вшая; ра́дуйся, стори́чное весе́ліе на небеси́ обрѣ́тшая, о на́шихъ согрѣше́ній проще́ніи Христу́ моля́щаяся.

Пѣ́снь 7.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Имено́сно Бо́га возлюби́вшія Филоѳе́и свѣтоно́сная па́мять дне́сь наста́. Ли́къ соста́вльше, пое́мъ свято́е ея́ успе́ніе и чу́дное Бо́гомъ чудоно́сное прославле́ніе.

Лико́внѣ па́мять твою́ ны́нѣ, достоди́вная, пра́зднуетъ Бо́лгарская земля́ и Ромы́нская: пе́рвую бо вма́лѣ моще́й твои́хъ чуде́съ струя́ми напои́вши, свѣтода́рнымъ же облагода́тствовавше втору́ю при́снымъ спребыва́ніемъ, обою́ еси́, Филоѳе́е, чудодѣ́йное заступле́ніе предъ Бо́гомъ.

Око не ви́дѣ и у́хо человѣ́ческое николи́же слы́ша, и́мже досто́йно обогати́лася еси́ на небеси́, Филоѳе́е дѣ́во, сокро́вища добро́ты: во сла́вѣ бо ли́ку пра́ведныхъ сопричта́вшися, ли́къ Спа́са Христа́ я́вственнѣ созерца́еши.

Богоро́диченъ: Ѳиміа́мникъ Ду́ха, кади́льница злата́я, же́злъ, прозя́бшій цвѣ́тъ нетлѣ́нія нетлѣ́нно, Тя́ проро́ческихъ слове́съ велича́емъ сла́вное сбытіе́, Богоро́дице Всепѣ́тая, и въ моли́твахъ неусыпа́ющую ро́да человѣ́ческаго Засту́пницу.

Пѣ́снь 8.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Естество́мъ немощна́ су́щи, естества́ порабоще́ніе стра́стное си́лою Христо́вою разори́ла еси́, богогла́сная го́рлице, и вла́сть безстра́стіемъ на ду́хи нечи́стыя отъ Христа́ прія́ла еси́.

Егда́ вну́трь Те́рновскихъ стѣ́нъ вошла́ еси́, вся́ земля́ Бо́лгарская устна́ми патріа́ршескими взыва́ше тебѣ́: бла́го на́мъ, иму́щимъ такову́ю покрови́тельницу, чи́сто моли́твы о на́съ Бо́гу принося́щую, да житіе́ на́ше во благоче́стіи сконча́вше, сподо́бимся Ца́рствія небе́снаго.

Стру́пы грѣхо́вныя, ра́ны многолѣ́тныя, вся́ я́зи, болѣ́зни и неду́ги, тѣле́сныя и душе́вныя, ма́ти на́ша преподо́бная Филоѳе́е, ны́нѣ сла́вящихъ тя́ исцѣли́, я́ко да во свѣ́тѣ заступле́нія твоего́ свѣ́тъ у́зримъ Ца́рствія небе́снаго.

Богоро́диченъ: Лучеда́тное ско́рое заступле́ніе да́руй, Дѣ́во, въ бе́здну грѣхо́въ углѣ́бшимъ, и къ Тебѣ́ взо́ры по́мощи ча́юще просте́ршимъ, льще́нія и собла́зны ско́ро упраздни́ лука́ваго, пра́зднующія Филоѳе́и па́мять веселя́щи.

Пѣ́снь 9.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Аммо преди́вная на́ша, Филоѳе́е, мона́шествующихъ сла́во, отъ непрія́зни вѣ́рныхъ огражде́ніе, а́нгеломъ говѣ́йное ра́дованіе и мірски́мъ конце́мъ торжество́, не оскудѣва́й моля́щися о воспѣва́ющихъ ра́дость твою́.

Ве́сненнымъ пти́цамъ подо́бящися, на вѣ́твѣ боголю́бныя жи́зни до конца́ пребыла́ еси́, преподо́бная Филоѳе́е, среди́ цвѣто́въ Боже́ственныхъ Писа́ній Бо́гови пою́щи и вѣ́рныхъ сердца́ веселя́щи.

Небе́сный кла́съ златы́й, богоороше́нный зна́меньми и чудодѣ́йствіи, правосла́внымъ яви́ тя́ Зижди́тель мíру, Его́же неувя́дными благодѣя́ній зерна́ми вся́ земля́ Бо́лгарская насыща́ется.

Ангельское житіе́ отны́нѣ возлю́бимъ, вѣ́рніи, ангелонра́вныя отрокови́цы наслади́вшеся сія́ньми, ея́же вы́ну о́бразъ боголю́бія иму́ще, дости́гнемъ вѣ́чныхъ ра́достей исто́чникъ неисчерпа́емый, Христа́.

Богоро́диченъ: Язы́комъ землере́тнымъ не мо́щно восхвали́ти Тя́ досто́йно, Приснодѣ́во Богоро́дице, всесвѣ́тлый хра́ме Божества́, сія́ніемъ Свои́мъ вселе́нную всю́ озари́вшій и ро́дъ человѣ́ческій рождество́мъ па́че есте́ственнымъ обожи́вшій.

Свѣти́ленъ. Подо́бенъ: Жены́, услы́шите.

Жены́, услы́шите чу́дная Це́ркве вѣща́нія, отрокови́цы, взыгра́йте премно́гимъ весе́ліемъ: ра́дуется дне́сь жена́мъ украше́ніе и дѣ́вамъ удобре́ніе, земли́ на́шея заступле́ніе, Филоѳе́я преди́вная. [Два́жды.]

Сла́ва, и ны́нѣ:

Свѣтода́вцевъ хра́ме, ра́дуйся, свѣтоводи́тельнице дѣ́вамъ, мона́шествующимъ звѣздо́, ра́дуйся, Ма́ти свѣтонача́льнаго Сло́ва.

На хвали́техъ стихи́ры на 4, гла́съ 1. Подо́бенъ: О, ди́вное чу́до!

О, ди́вное чу́до,* исто́чникъ исцѣле́ній* во гро́бѣ полага́ется,* и мо́щи нетлѣ́нныя чудеса́ испуща́ютъ!* Весели́ся, гра́де Те́рновъ,* Филоѳе́и бо дре́вле приста́нище бы́лъ еси́.* Возопіе́мъ, вѣ́рніи,* преподо́бныя иму́ще предста́тельство:* боголюби́вая, ра́дуйся,* съ тобо́ю Госпо́дь,* подая́й лю́бящимъ тя́, тобо́ю ве́лію ми́лость. [Два́жды.]

О, ди́вное чу́до,* свѣти́льникъ обрѣ́те тя́* дре́вле престо́льный гра́дъ,* просвѣ́щшій вся́ восто́къ правосла́вныхъ!* Весели́ся, земле́ Бо́лгарская,* яви́вшуся тебѣ́ но́вому со́лнцу,* торжеству́йте, боголю́бніи,* боголюбе́знѣй Филоѳе́и сра́дуимся:* достосла́вная, ра́дуйся,* съ тобо́ю Госпо́дь,* подая́й мíрови тобо́ю ве́лію ми́лость.

О, ди́вное чу́до,* Боже́ственныя вѣ́ры* яви́лася еси́ побо́рница,* заткну́вши уста́ велере́чивыя!* Весели́ся, Це́рковь Бо́жія,* благода́тными красу́ющися звѣзда́ми,* преподо́бническими сія́ньми,* Филоѳе́и изря́днѣйшими свѣтлостьми́:* богоречи́вая, ра́дуйся,* съ тобо́ю Госпо́дь,* подая́й чту́щимъ тя́ тобо́ю ве́лію ми́лость.

Сла́ва, гла́съ 8:

Браконеиску́сную Богоро́дицу* подража́ющи многорачи́тельнѣ,* жениха́ твоего́ отъ сласте́й зако́нныхъ отврати́ла еси́,* и житіе́ повѣ́давши ему́ Амму́на достосла́внаго,* къ житію́ благода́тному того́ наста́вила еси́,* и съ Константи́номъ си́мъ тве́рдымъ* непоро́чнѣ, я́коже два́ а́нгела, пребыва́ли есте́.* Сего́ ра́ди и ны́нѣ моля́щихся тебѣ́* отъ собла́зновъ вра́жіихъ при́сно сохраня́еши.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

[Славосло́віе вели́кое. Ектеніи́. И отпу́стъ.]



НА ЛИТУРГІИ,

Блаже́нна отъ кано́на преподо́бныя, пѣ́снь 3-я и 6-я. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Гала́томъ, зача́ло 208. Аллилу́ія, гла́съ 1: Терпя́ потерпѣ́хъ Го́спода, и вня́тъ ми́ и услы́ша моли́тву мою́. [Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе Матѳе́я, зача́ло 104. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Быва́етъ же на трапе́зѣ утѣше́ніе бра́тіи, дово́льно же и духо́вно.

Коне́цъ и Бо́гу сла́ва.

Примѣчаніе:
[1] Въ текстѣ: «Дѣ́во Богоро́дице...».

Источникъ: Служби на българските светии. — Света Гора, Атон: Славянобългарски манастир «Св. Вмчк Георги Зограф», 2007. — Л. 658-674.

/ Къ оглавленію раздѣла /


Наверхъ / Къ титульной страницѣ

0