Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 7-й де́нь.
Слу́жба святи́телю Амвро́сію, епи́скопу Медіола́нскому.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 8:

Аще и не красна́ похвала́ во устѣ́хъ грѣ́шныхъ,* и сего́ ра́ди досто́итъ на́мъ люби́ти молча́ніе па́че,* ниже́ хвалы́ слага́ти святы́мъ.* Оба́че, вѣ́дуще, недосто́йніи,* я́ко па́мять пра́веднаго пра́зднуется съ похвала́ми,* мо́лимъ Тя́, Го́споди:* да́ждь на́мъ уста́ и си́лу* почти́ти дне́сь па́мять святи́теля Твоего́ Амвро́сія* пѣ́ніи и пѣ́сньми духо́вными.

Пріиди́те, ча́да но́ваго Сіо́на,* ли́къ себѣ́ совоку́пльше,* согла́сно воспои́мъ святи́телю Амвро́сію:* ра́дуйся, о́тче свяще́ннѣйшій;* ра́дуйся, красото́ Медіола́на,* па́стырю до́брый, архіере́ю Бо́жій святы́й;* ра́дуйся, звѣздо́ на тве́рди церко́внѣй осія́вшая мíра концы́;* ра́дуйся, слуго́ Христо́въ вѣ́рнѣйшій,* до́брѣ слу́жбу свою́ соверши́вый.* И ны́нѣ, со а́нгелы, лику́я горѣ́ не премолчи́,* вопія́ за ны́ ко Го́споду.

Подража́теля человѣколю́бію Спа́сову* и́стиннаго стра́жа до́му Бо́жія неусы́пнаго,* строи́теля благода́ти Бо́жія,* му́драго церкве́й украси́теля,* плѣне́нныхъ искупи́теля,* ста́ду Христо́ву па́стыря до́браго,* вы́ну гото́ваго положи́ти ду́шу свою́ за о́вцы своя́, свята́го Амвро́сія,* восхва́лимъ, вѣ́рніи, по достоя́нію,* чту́ще па́мять его́.

На стра́сти вельми́ подвиза́вся въ жи́зни вре́меннѣй,* и пло́ть свою́ ду́хови покори́въ,* про́чее во пло́ти, а́ки безпло́тенъ,* на земли́, а́ки еди́нъ отъ небе́сныхъ пожи́лъ еси́, святи́телю,* и Бо́гови до конца́ угоди́лъ еси́.* Сего́ ра́ди зове́мъ ти́:* ра́дуйся, а́нгеле земны́й и человѣ́че небе́сный;* ра́дуйся, соверше́нства духо́внаго рачи́телю;* ра́дуйся, подвиго́мъ вели́кихъ отце́въ подража́телю;* ра́дуйся, Амвро́сіе, богоно́се о́тче на́шъ.

Сла́ва, гла́съ 7:

Проро́ку Иліи́ подража́я въ ре́вности, Предте́чи въ дерзнове́ніи, всѣ́мъ же святы́мъ во благоче́стіи, святи́телю Амвро́сіе, бы́лъ еси́ вои́стинну человѣ́къ Бо́жій, іера́рхъ вели́кій, му́жъ пра́вды, грѣ́шныхъ исправле́ніе, невѣ́рныхъ богому́дренное обраще́ніе и просвѣще́ніе. Тѣ́мже, въ воздая́ніи святолѣ́пному житію́ твоему́, предстои́ши ны́нѣ го́рнему престо́лу Царя́ Христа́, и те́плѣ мо́лиши Его́ о душа́хъ на́шихъ.

И ны́нѣ, гла́съ то́йже:

Еже ра́дуйся, Тебѣ́ зове́мъ, со а́нгеломъ, Богоневѣ́сто, черто́гъ, и две́рь, и престо́лъ о́гненный нарица́юще Тебе́, и несѣко́мую го́ру, и купину́ неопали́мую.

На стихо́внѣ стихи́ры, гла́съ 6:

Яко до́брый ко́рмчій,* святи́телю Амвро́сіе,* преплы́въ душепа́губную пучи́ну аріа́нскія зло́бы,* до́брѣ упра́вилъ еси́ кора́бль Це́ркве Мила́нскія,* ко приста́нищу и́стинныя вѣ́ры и упова́нія.

Сти́хъ: Честна́ предъ Го́сподемъ* сме́рть преподо́бныхъ Его́.

Се́ днíе мои́, оскудѣва́юще пома́лу, исчеза́ютъ,* хра́мъ мо́й тѣле́сный къ разруше́нію приклоня́ется,* и уже́ ча́съ сме́рти моея́ не косни́тъ.* Что́ бу́ду про́чее?* Ка́ко изы́ти и́мать душа́ моя́* отъ бре́ннаго тѣлесе́ сего́?* Ка́ко предста́ну лицу́ Созда́теля моего́,* ве́сь въ скве́рнахъ сы́й?* Но ты́, о наде́ждо моя́, святы́й Амвро́сіе,* предста́ни ми́ тогда́* и покро́й срамоту́ души́ моея́,* вѣ́мъ бо, я́ко святíи, и́же на небесѣ́хъ,* тща́тся на зе́млю сходи́ти* во е́же помощи́ умира́ющимъ,* съ вѣ́рою же проси́вшимъ и́хъ заступле́нія* проти́ву духо́въ зло́бы поднебе́сныхъ.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Кто́ пла́калъ, и ты́ не рыда́лъ еси́ съ ни́мъ?* Ра́довался, и ты́ не сора́довался еси́, ми́лостиве?* Вои́стинну ты́ всѣ́мъ бы́лъ еси́ вся́.* Тѣ́мже, преше́дъ юдо́ль сѣ́тованія и пла́ча,* досто́йно вселя́ешися съ преподо́бными,* въ Ца́рствѣ ра́дости несконча́емыя,* идѣ́же нѣ́сть болѣ́знь, ни печа́ль, ни воздыха́ніе,* но жи́знь безконе́чная.

Сла́ва, гла́съ 2:

Яко фи́никсъ процвѣ́лъ еси́ вѣ́рою, я́ко кри́нъ облагоуха́лся еси́ наде́ждою и любо́вію, и я́ко ке́дръ, и́же въ Лива́нѣ, умно́жился еси́ всѣ́ми благи́ми дѣ́лы, о́тче Амвро́сіе, бы́въ ста́ду твоему́ и́стинный па́стырь, Це́ркви оте́цъ и учи́тель, а́нгелъ и чудотво́рецъ, просла́вивый Бо́га въ тѣлеси́ и души́ свое́й.

И ны́нѣ, гла́съ то́йже:

Яко ле́въ, рыка́яй, хо́дитъ діа́волъ, при́сно зія́я пожре́ти мя́ и свести́ во а́дъ жи́ва, но Ты́, наде́ждо моя́, Богоро́дице, изба́ви мя́ лю́тыхъ че́люстей губи́теля сего́.

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́ я́же веще́й и́стина. Сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче священнонача́льниче Амвро́сіе, моли́ Христа́ Бо́га, спасти́ся душа́мъ на́шимъ.

Инъ тропа́рь, гла́съ то́йже:

Боже́ственнаго вдохнове́нія орга́не, добродѣ́телей апо́стольскихъ прича́стниче, Ри́ма кра́сное процвѣте́ніе, Амвро́сіе, іера́рше блаже́нне, царя́ обличи́лъ еси́ и вселе́нную въ благоче́стіи утверди́лъ еси́. Тѣ́мже моли́ся Христу́, дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 2:

Пріиди́те, лю́ди Бо́жіи,* ста́немъ до́брѣ, ста́немъ со стра́хомъ* въ дому́ Бо́га на́шего,* хва́ляще святи́теля Амвро́сія,* медіола́новъ сладкоглаго́ливаго наста́вника,* іера́рховъ украше́ніе,* Правосла́вія побо́рника:* се́ бо съ го́рнихъ высо́тъ* призира́етъ на пѣ́ніе на́ше,* и ѳиміа́мъ моли́твъ свои́хъ о на́съ* возно́ситъ ко Го́споду.

Медіола́на не оставля́я,* Ри́мъ посѣща́я,* и къ на́мъ прихо́диши ду́хомъ,* святи́телю Амвро́сіе,* вѣ́рно чту́чимъ па́мять твою́,* и отъ души́ зову́щимъ:* не забу́ди на́съ, о́тче,* любо́вію хва́лящихъ тя́.

Пра́ведно прія́лъ еси́, святи́телю Христо́въ,* и́мя сла́дости тезоимени́тое:* яви́ бо сіе́ Бо́гъ ро́емъ пче́лъ,* я́же, иногда́ спя́щу ти́,* влета́ху во уста́ твоя́,* ме́дъ на язы́цѣ полага́юще,* и полета́ху, не врежда́юще тя́.* Что́ показу́етъ сіе́ та́инство,* си́мъ Госпо́дь прозна́менова,* я́ко со́тове медо́вніи бу́дутъ словеса́ твоя́,* сла́дость же и́хъ — ду́шъ исцѣле́ніе.

Вои́стинну сла́дость духо́вная* медіола́номъ бы́лъ еси́, святи́телю Амвро́сіе,* сла́дкими твои́хъ уче́ній струи́* ду́ши и́хъ напоя́я,* отъ го́рести аріа́нскія очища́я,* сердца́ стра́ждущихъ услажда́я.* Услади́, о́тче, и на́ши ду́ши,* огорче́нныя пре́лестію змíевою,* и бу́ди на́мъ въ ско́рбехъ утѣше́ніе,* въ болѣ́знехъ исцѣле́ніе.

[Ины стихи́ры,] гла́съ 6. Подо́бенъ: Все́ отло́жше.

Отче святы́й Амвро́сіе,* ты́ не да́лъ еси́ очи́ма твои́ма сна́,* ниже́ вѣ́ждома твои́ма дрема́нія,* имѣ́я па́мять сме́рти незабы́тную,* тече́ніе сле́зъ неоску́дное,* воздыха́нія ко оте́честву го́рнему при́сныя,* бдѣ́ніе и труды́ неуста́нныя.* Сего́ ра́ди пѣ́сньми велича́емъ* ди́вное житіе́ твое́.

Вели́ка вѣ́мы тя́ въ ну́ждахъ помо́щника,* святи́телю ми́лостиве,* ни́щихъ пита́теля,* си́рыхъ отца́-покрови́теля,* оби́димымъ засту́пника,* всѣ́мъ скорбя́щимъ утѣ́шителя.* Тѣ́мже и блажи́мъ хвале́бно* ве́ліе твое́ милосе́рдіе.

Ка́ко не воспѣ́ти, о́тче,* и ре́вности твоея́ по Бо́зѣ?* Ду́хомъ бо Иліи́ поревнова́въ,* ты́ возбрани́лъ еси́ Ѳеодо́сію вни́ти въ це́рковь,* во е́же пріобщи́тися святы́я Евхари́стіи,* со дерзнове́ніемъ рекíй ему́:* не подоба́етъ ти́, о царю́, содѣ́явшу убíйство,* съ вѣ́рными пріобщи́тися.

Егда́ Ѳеодо́сій ца́рь,* хотя́й оправди́тися въ убíйствѣ свое́мъ,* вѣща́ше ти́ о преступле́ніи Дави́довѣ,* ты́, о́тче, ре́клъ еси́ къ нему́:* подража́лъ еси́ Дави́ду грѣша́щу,* подража́й ему́ и ка́ющуся.* И, преда́въ Ѳеодо́сія отлуче́нію,* учи́лъ еси́ его́ пла́чу о грѣсѣ́хъ свои́хъ.* Пла́кати возбуди́ и на́съ о грѣсѣ́хъ на́шихъ,* о́тче святы́й.

Сла́ва, гла́съ 5:

Что́ тя нарече́мъ, о святы́й Амвро́сіе? Па́стыря слове́сныхъ ове́цъ, я́ко бдѣ́лъ еси́ о душа́хъ и́хъ; наста́вника вѣ́рнымъ вели́каго, я́ко учи́лъ еси́ и́хъ сло́вомъ и житіе́мъ твои́мъ; дѣ́лателя вертогра́да Христо́ва, я́ко отреби́лъ еси́ его́ отъ пле́велъ Аріевыхъ; Наѳа́на втора́го, я́ко обличи́въ грѣ́хъ Ѳеодо́сія, учи́лъ еси́ того́ покая́нію. Къ сему́ же и на́съ возста́ви, во грѣсѣ́хъ пребыва́ющихъ.

И ны́нѣ, гла́съ 7:

Пре́жде вѣ́къ Сы́й въ нѣ́дрѣхъ Отчихъ, въ послѣ́докъ днíй чре́ва дѣви́ческаго не возгнуша́выйся, Іису́се, гряди́ роди́тися пло́тію въ Виѳлее́мѣ: се́ бо тва́рь па́дшая стене́тъ подъ и́гомъ рабо́ты вра́жія, ча́я Тебе́, Утѣ́хи Изра́илевы. Се́ уже́ гото́ва вся́ ко срѣ́тенію Твоему́: отъ земли́ — верте́пъ, съ небесѣ́ — звѣзда́, отъ а́нгелъ съ па́стырьми — славосло́віе, отъ волхво́въ — зла́то, лива́нъ и сми́рна, отъ на́съ же — пѣ́снь Дави́дска и гла́съ отроко́въ: О, Го́споди, спаси́ же! О, Го́споди, поспѣши́ же! Благослове́нъ Гряды́й во и́мя Госпо́дне! Оса́нна Ца́рь Изра́илевъ!

Вхо́дъ. Проки́менъ дне́. Чте́нія три́.

При́тчей чте́ніе. [Главы́ 15 и 16.]

Слу́шаяй обличе́ній живота́, посредѣ́ прему́дрыхъ водвори́тся. Иже отмета́етъ наказа́ніе, ненави́дитъ себе́; соблюда́яй же обличе́нія, лю́битъ свою́ ду́шу. Страхъ Госпо́день — наказа́ніе и прему́дрость, и нача́ло сла́вы отвѣща́етъ е́й, предъи́детъ же смире́ннымъ сла́ва. Вся́ дѣла́ смире́ннаго явле́нна предъ Бо́гомъ, нечи́стъ предъ Бо́гомъ вся́къ высокосе́рдый. Нача́ло пути́ бла́га, е́же твори́ти пра́ведная, прія́тна же предъ Бо́гомъ па́че, не́жели жре́ти же́ртвы. Ища́й Го́спода обря́щетъ ра́зумъ со пра́вдою, пра́вѣ же и́щущіи Его́ обря́щутъ ми́ръ. Ме́рзость царе́ви, творя́й зла́я, со пра́вдою бо уготовля́ется престо́лъ нача́льства. Прія́тны царю́ устнѣ́ пра́ведны, словеса́ же пра́вая лю́битъ Госпо́дь. Ярость царе́ва — вѣ́стникъ сме́рти, му́жъ же прему́дръ утоли́тъ его́. Угнѣжде́нія прему́дрости избра́ннѣе зла́та, вселе́нія же ра́зума дража́йши сребра́. Путіе́ жи́зни укланя́ются отъ злы́хъ, долгота́ же житія́ — путіе́ пра́ведни. Пріе́мляй наказа́ніе, во благи́хъ бу́детъ, храня́й же обличе́нія, умудри́тся. Иже храни́тъ своя́ пути́, соблюда́етъ свою́ ду́шу. Разу́мный въ ве́щехъ, обрѣта́тель благи́хъ; надѣ́яйся же на Го́спода блаже́нъ. Прему́дрыя и разу́мныя злы́ми нари́чутъ, сла́дціи же въ словеси́ мно́жае услы́шани бу́дутъ. Исто́чникъ живо́тенъ — ра́зумъ стяжа́вшимъ, наказа́ніе же безу́мныхъ — зло́. Се́рдце прему́драго уразумѣ́етъ, я́же отъ свои́хъ ему́ у́стъ, во устна́хъ же но́ситъ ра́зумъ. Со́тове медо́вніи — словеса́ до́брая, сла́дость же и́хъ — исцѣле́ніе души́.

Ца́рствъ вторы́хъ чте́ніе. [Глава́ 12.]

Посла́ Госпо́дь Наѳа́на проро́ка къ Дави́ду. И вни́де къ нему́ и рече́ ему́: сія́ глаго́летъ Госпо́дь, Бо́гъ Изра́илевъ: Азъ е́смь пома́завый тя́ въ царя́ надъ Изра́илемъ, и Азъ е́смь изба́вивый тя́ отъ руки́ Сау́ловы; и да́хъ ти́ до́мъ господи́на твоего́ и да́хъ ти́ до́мъ Изра́илевъ и Іу́динъ; и а́ще ма́ло ти́ е́сть, приложу́ тебѣ́ къ си́мъ. И что́, я́ко презрѣ́лъ еси́ сло́во Госпо́дне, е́же сотвори́ти лука́вое предъ очи́ма Его́? Урíю Хетте́анина уби́лъ еси́ мече́мъ и жену́ его́ поя́лъ еси́ себѣ́ въ жену́, и того́ уби́лъ еси́ мече́мъ сыно́въ Аммо́нихъ. И ны́нѣ не отсту́питъ ме́чь отъ до́му твоего́ до вѣ́ка, зане́ уничижи́лъ Мя́ еси́. И рече́ Дави́дъ къ Наѳа́ну: согрѣши́хъ ко Го́споду. И рече́ Наѳа́нъ къ Дави́ду: и Госпо́дь отъя́ согрѣше́ніе твое́, не у́мреши. И оты́де Наѳа́нъ въ до́мъ сво́й. И сокруши́ Госпо́дь дѣ́тище, е́же роди́ жена́ Урíина Дави́ду, и разболѣ́ся. И взыска́ Дави́дъ Бо́га о дѣ́тищи, и пости́ся Дави́дъ посто́мъ, и вни́де и водвори́ся, и лежа́ше на земли́. И внидо́ша къ нему́ старѣ́йшины до́му его́ воздви́гнути его́ отъ земли́, и не восхотѣ́, и не яде́ съ ни́ми хлѣ́ба.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 5:

Пріиди́те, о ча́да Це́ркве Христо́вой, очище́нными умы́ и чу́вствы, наслади́мся утѣше́нія духо́внаго: дне́сь бо Влады́ка Христо́съ учреди́ на́мъ пи́ръ духо́вный — па́мять святи́теля Амвро́сія, веселя́щую ду́ши на́ша.

Пра́зднующе па́мять святи́теля Амвро́сія и восхваля́юще житіе́ его́, о возлю́бленніи бра́тіе, поревну́емъ вѣ́рѣ и добродѣ́телемъ его́: сіе́ бо е́сть прія́тно предъ Спаси́телемъ на́шимъ Бо́гомъ, и уго́дно Спаси́телю па́че всѣ́хъ хвале́ній на́шихъ.

Кíими добродѣ́тельми не украси́лъ еси́ ду́шу твою́, святи́телю? Ревну́я, поревнова́лъ еси́ всѣ́мъ святы́мъ: Ма́тери Бо́жіей во смире́ніи, а́нгеламъ въ пѣснопѣ́ніи, святи́телямъ въ прему́дрости, му́ченикомъ въ терпѣ́ніи, преподо́бнымъ въ моли́твѣ и поще́ніи. Тѣ́мже вся́ имѣ́я до́брая, ели́ка прелюбе́зна Го́сподеви, наста́ви и на́съ твори́ти во́лю Его́.

Сла́ва, гла́съ 7:

Вѣ́дая, прему́дре, я́ко я́рость царе́ва вѣ́стникъ сме́рти е́сть, и я́ко гнѣ́въ быва́етъ вино́венъ вся́кія злы́я ве́щи подъ небесе́мъ, утоля́лъ еси́ я́рость Ѳеодо́сія царя́, и учи́лъ еси́ того́ не износи́ти ско́ро су́дъ на пови́нныя. Наста́ви и на́съ, о́тче, не износи́ти сло́ва осужде́нія на бли́жняя своя́, подави́ я́рость серде́цъ на́шихъ, и утоли́ гнѣ́въ Бо́жій, дви́жимый на на́съ, грѣ́хъ ра́ди на́шихъ.

И ны́нѣ, гла́съ 3:

Виѳлее́ме, гото́вися на срѣ́теніе Дѣ́вы Марíи Богома́тере: се́ бо гряде́тъ къ тебѣ́, Младе́нца нося́щи Христа́, собезнача́льнаго Отцу́ и Ду́ху при́сно. Его́же въ верте́пѣ роди́тъ, и по рождествѣ́ Дѣ́ва па́ки яви́тся.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Бога́тство скороги́бнущее,* сребро́ и зла́то,* сла́ву и по́чести су́етныя,* о́тче Амвро́сіе,* вмѣни́въ, я́ко цвѣ́тъ травны́й,* у́трѣ цвѣту́щій и на ве́черъ отпа́дающій,* и Христа́ еди́наго возжелѣ́въ,* я́ко сокро́вища дража́йшаго всѣ́хъ сокро́вищъ,* путе́мъ приско́рбнымъ ше́ствовалъ еси́,* и соверше́нствомъ духо́внымъ,* а́ки би́серомъ свѣтлѣ́йшимъ,* ду́шу твою́ на земли́ украси́лъ еси́.* Тѣ́мже ны́нѣ укра́шенъ еси́,* вѣнце́мъ нетлѣ́нія на небеси́* отъ десни́цы Христа́ Бо́га.

Сти́хъ: Честна́ предъ Го́сподемъ* сме́рть преподо́бныхъ Его́.

Честна́ и прече́стна вои́стинну сме́рть твоя́,* о́тче, сла́дости тезоимени́те,* и досто́итъ ю́ нарещи́ па́че со́нъ, не́же сме́рть:* услади́ бо го́ресть ея́ сла́дость церко́вная — Сладча́йшій Іису́съ,* прише́дый ко одру́ твоему́, ра́дуяся* и свѣ́тлое Свое́ лице́ явля́яй.* Помози́ же и мнѣ́, о́тче,* въ стра́шный ча́съ сме́ртный,* да не я́та бу́детъ душа́ моя́* зубы́ лю́тыхъ де́моновъ.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Отче святы́й Амвро́сіе,* благода́ть святи́тельства отъ Го́спода пріе́мъ,* не въ земли́ тала́нтъ сво́й сокры́лъ еси́,* но, единоревни́теленъ въ труда́хъ апо́столомъ бы́въ,* во сто́ кра́тъ о́ный умно́жилъ еси́,* и сего́ ра́ди вше́лъ еси́ въ небе́сный черто́гъ Царя́ сла́вы,* идѣ́же святíи вси́ сія́ютъ, я́коже свѣти́ла,* причаща́яся сла́дости р́айскія.

Сла́ва, гла́съ 1:

Сла́ва Тебѣ́, Вседѣ́телю, поста́вивый на свѣ́щницѣ Медіола́нстѣмъ свѣти́льника вели́каго, Амвро́сія, и́же просія́ добродѣ́тельми мно́гими, проповѣ́даніемъ немо́лчнымъ, ре́вностію о сла́вѣ Христо́вой пла́менною, вѣ́рою тве́рдою, любо́вію нелицемѣ́рною, упова́ніемъ крѣ́пкимъ, моли́твою непреста́нною. Его́же мольба́ми, о Святы́й Го́споди, и на́съ укрѣпи́ твори́ти во́лю Твою́.

И ны́нѣ, гла́съ то́йже:

Па́стыріе виѳлее́мстіи, не дади́те очи́ма ва́шима сна́, ниже́ вѣ́ждома ва́шима дрема́нія. Волсви́ перси́дстіи, взе́мше да́ры — зла́то, и лива́нъ и сми́рну, тецы́те къ Виѳлее́му, жре́бію Іу́дову. Пѣвцы́ небе́сніи, потщи́теся угото́вити ги́мнъ: сла́ва въ вы́шнихъ Бо́гу, и на земли́ ми́ръ, во человѣ́цѣхъ благоволе́ніе! Се́ бо Ца́рь сла́вы — Іису́съ Пребоже́ственный, прикло́нь небеса́ и во утро́бу Дѣ́выя все́лься, гряде́тъ въ Не́й, я́ко на престо́лѣ Божества́ и во о́блацѣ ле́гцѣ, разруши́ти дѣла́ діа́воля, и свободи́ти тва́рь Свою́ отъ рабо́ты истлѣ́нія.

На благослове́ніи хлѣ́бовъ: Тропа́рь, два́жды. И Богоро́дице Дѣ́во.., еди́ножды.

А идѣ́же нѣ́сть всено́щнаго бдѣ́нія: на вели́цѣй вече́рни, по Ны́нѣ отпуща́еши.., глаго́лемъ тропа́рь еди́ножды. Сла́ва, и ны́нѣ, богоро́диченъ воскре́сенъ.



НА УТРЕНИ,
На Бо́гъ Госпо́дь: Тропа́рь: Пра́вило вѣ́ры.., или́ Боже́ственнаго вдохнове́нія орга́не.., два́жды. Сла́ва, и ны́нѣ, богоро́диченъ: Еже отъ вѣ́ка утае́нное...

По 1-мъ стихосло́віи сѣда́льны, гла́съ 2:

Образъ медіола́номъ бы́лъ еси́, уго́дниче Бо́жій Амвро́сіе, сло́вомъ, житіе́мъ, любо́вію, ду́хомъ, вѣ́рою, чистото́ю, озаря́я Це́рковь Христо́ву свѣ́томъ твои́хъ добродѣ́телей, и вся́ къ Бо́гу направля́я прему́дрыми твои́ми словесы́.

Сла́ва, гла́съ 3:

Же́злъ святи́тельства твоего́, богому́дре, вои́стинну бы́сть же́злъ пра́вости: пра́во бо пра́вилъ еси́ сло́во и́стины Христо́вы, имѣ́я о́бразъ здра́выхъ слове́съ во устѣ́хъ свои́хъ, и аріа́нъ, а́ки псо́въ ла́ющихъ, прогоня́я отъ огра́ды ове́цъ твои́хъ, пра́щею твоего́ уче́нія и ка́менемъ твоея́ вѣ́ры.

И ны́нѣ, гла́съ 8:

Сіо́не, торжеству́й, Іерусали́ме, весели́ся, гра́де Христа́ Бо́га, подыми́ Зижди́теля, въ верте́пѣ и я́слѣхъ вмѣща́емаго, отве́рзите ми́ врата́ и, вше́дъ въ ня́, узрю́ я́ко Младе́нца, пелена́ми, повива́емаго, дла́нію же содержа́щаго тва́рь, Его́же пою́тъ а́нгели непреста́ннымъ гла́сомъ, Жизнода́вца Го́спода, спаса́ющаго ро́дъ на́шъ.

По 2-мъ стихосло́віи сѣда́ленъ, гла́съ 4:

Аще и обыше́дше, обыдо́ша тя́ злочести́віи аріа́не, разгорѣ́шася на тя́ зло́бою, я́ко о́гнь въ те́рніи: оба́че имѣ́я же́злъ си́лы — крѣ́пость ева́нгельскую, по́сланную ти́ отъ Сіо́на небе́снаго, госпо́дствовалъ еси́ посредѣ́ враго́въ твои́хъ, святи́телю Амвро́сіе.

Сла́ва, гла́съ то́йже:

Глаго́лалъ еси́ о свидѣ́ніихъ Сладча́йшаго ти́ Го́спода предъ цари́ и цари́цы, и не стыди́лся и не боя́лся еси́ гнѣ́ва и́хъ, уго́дниче Бо́жій, гото́вый умре́ти па́че, не́же и́стину преда́ти въ поруга́ніе беззако́ннымъ. Тѣ́мже и Госпо́дь не устыдѣ́ся тебе́, егда́, по отше́ствіи отъ житія́ вре́меннаго, предста́лъ еси́ лицу́ Его́, но просла́ви тя́ сла́вою вѣ́чною, и па́ки просла́витъ, егда́ пріи́детъ во сла́вѣ Отца́ Своего́ суди́ти мíрови.

И ны́нѣ, гла́съ 8:

Предпра́зднуимъ, лю́діе, Христо́во Рождество́, и, возне́сше у́мъ къ Виѳлее́му, вознесе́мся мы́слію, и усмо́тримъ Дѣ́ву душе́вныма очи́ма, иду́щую роди́ти въ верте́пѣ всѣ́хъ Го́спода и Бо́га на́шего. Его́же Іо́сифъ ви́дѣвъ чуде́съ вели́чество, мня́ше человѣ́ка зрѣ́ти, я́ко младе́нца, пелена́ми повива́ема, поразумѣва́ше же отъ веще́й Бо́га бы́ти и́стиннаго, подаю́щаго душа́мъ на́шимъ ве́лію ми́лость.

Псало́мъ 134: Хвали́те и́мя Госпо́дне...

Велича́ніе: Велича́емъ тя́, святи́телю о́тче Амвро́сіе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы...

По поліеле́и сѣда́ленъ, гла́съ 4:

Не За́падъ то́чію хва́литъ исправле́нія твоя́, чудотво́рче вели́кій, но и мы́, ча́да Правосла́вныя Восто́чныя Це́ркве, велича́емъ тя́, и чте́мъ святу́ю па́мять твою́, ты́ бо дне́сь сопрису́тствуя на́мъ ду́хомъ твои́мъ, и вне́мля пѣ́нію и моле́нію на́шему, вы́ну мо́лиши за на́съ на небеси́ Христа́ Бо́га на́шего. [Два́жды.]

Сла́ва, и ны́нѣ, богоро́диченъ, гла́съ 3:

Всю́ Тя́ Бо́гъ освяти́, Дѣ́ву до́брую и непоро́чную въ жена́хъ, проро́ки прообрази́въ че́стно, іере́и благослови́въ, во Свята́я святы́хъ всели́, а́нгеломъ воспита́въ, съ небесе́ пи́щу хлѣ́бъ пода́въ, Са́мъ же Преблагíй, Единоро́дное Бо́гъ Сло́во, всели́ся въ Тя́ и пло́тію про́йде изъ Тебе́. Тѣ́мже Ти́ покланя́емся и чти́мъ я́ко вои́стинну и́стинную су́щую Богоро́дицу.

Та́же степе́нна, 1-й антифо́нъ 4-го гла́са: Отъ ю́ности моея́... Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... И проч. Ева́нгеліе Іоа́нна, зача́ло 36: Рече́ Госпо́дь ко прише́дшимъ къ Нему́ іуде́омъ: Азъ е́смь... Та́же псало́мъ 50-й.

По 50-мъ псалмѣ́ стихи́ра, гла́съ 6:

Не прела́зя и́нудѣ, но две́рьми во дво́ръ о́вчій воше́лъ еси́, святи́телю Амвро́сіе: Са́мъ бо Госпо́дь призва́ тя́ на святи́тельство гла́сомъ младе́нца немощству́ющаго, въ Це́ркви воззва́вшаго: Амвро́сій епи́скопъ! Тѣ́мже вси́, вне́мше гла́су отроча́те, еди́наго тя́ изволя́ху епи́скопа имѣ́ти. Ты́ же, смиренному́дре, а́ще и бѣ́галъ еси́ святи́тельскаго са́на, оба́че повину́яся во́ли наро́да и царя́, па́че же зва́нію небе́сному, прія́лъ еси́ епи́скопство, и до́брѣ упа́слъ еси́ Бо́гомъ да́нныхъ тебѣ́ ове́цъ.

Кано́нъ Одиги́тріи Богоро́дицы со ирмосо́мъ на 6 и святи́теля на 8.

[Кано́нъ Богоро́дицы, гла́съ 4:]
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Ра́достно, Чи́стая, ны́нѣ наста́вшее хвале́ніе приноша́ю, ра́дуяся, и ти́химъ гла́сомъ, Одиги́тріе, вопію́ Ти: ра́дуйся и испо́лни мя́ ра́зума, пѣ́ти начина́юща.

Христа́ роди́вшая, ра́дость на́мъ вѣ́чную, о, ра́дуйся, Всепѣ́тая, правосла́внымъ наде́жда, Одиги́тріе, всепѣ́тая Дѣви́це! Ра́дости испо́лни мя́ мíрови жела́нныя.

Лику́ютъ вси́ человѣ́цы и а́нгели, всегда́ согла́сно вопію́ще на небеси́ и на земли́, Одиги́тріе: ра́дуйся, Дѣви́це, ра́дости бо Рождество́мъ Твои́мъ вся́ческая испо́лнила еси́.

Ра́дуйся, Одиги́тріе, со стра́хомъ Ти́ вопію́щихъ ра́дости сподо́би, Ма́ти су́щія ра́дости, избавля́ющи скорбе́й вся́ческихъ, и всѣ́хъ поми́луй, къ Тебѣ́ прибѣга́ющихъ.

[Инъ кано́нъ святи́теля,] его́же краегране́сіе сіе́: Амвро́сію святи́телю приноше́ніе ма́лое. [Гла́съ 8.]
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Аще и вы́ну со Христо́мъ ца́рствуеши, предстоя́ Боже́ственнѣй Тро́ицѣ на небеси́, уго́дниче Бо́жій Амвро́сіе, оба́че и до́лу су́щія съ вѣ́рою же прося́щія по́мощи твоея́, огражда́еши мощны́мъ покро́вомъ защище́нія твоего́ отъ бѣ́дъ и зо́лъ.

Медіола́номъ че́стію взыска́нный, и недосто́йна таковы́я, вмѣни́вый себе́, преподо́бне, наста́ви и мене́ то́жде смиренному́дрствовати о себѣ́, да пріе́млю поноше́ніе и уничиже́ніе, я́ко сла́ву и возвыше́ніе; укори́зны и досажде́нія, я́ко че́сть и благохвале́ніе.

Во́лю Бо́жію, зову́щую тя́ на святи́тельство, уразумѣ́въ, любому́дре, повину́лся еси́ о́нѣй, я́ко ра́бъ послушли́вый своему́ Влады́цѣ, си́це и мене́ научи́ разумѣ́ти, что́ е́сть во́ля Бо́жія блага́я, уго́дная и соверше́нная, и при́сно слѣ́довати тоя́ хотѣ́нію.

Богоро́диченъ: Ро́ждшая Зижди́теля моего́, Влады́чице, бу́ди ми́ обурева́ему отъ искуше́ній бѣсо́вскихъ благонаде́жное окормле́ніе, приста́нище и спасе́ніе.

Катава́сія: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Христа́, Вы́шняго Царя́, о, ра́дуйся, непоколеби́мая чи́стая и одушевле́нная пала́то! Ра́дуйся, Одиги́тріе: ра́дуйся, Тобо́ю неруши́мь на́шъ гра́дъ сохраня́ется.

Вмѣсти́ти Его́же не возмо́же тва́рь, во утро́бу неискусобра́чную, Одиги́тріе Дѣви́це, тѣле́сно вмѣсти́ла еси́, тѣ́мже Ти́, ра́дуйся, пое́мъ, по до́лгу велича́юще.

Ра́дость многопѣ́тая мíрови, ра́достно Ти́ пою́ще при́сно, вѣ́чнующія, Чи́стая, ра́дости сподобля́емся Твои́ми ма́терними моли́твами къ Ро́ждшемуся изъ Тебе́, Одиги́тріе.

Злату́ю Тя́ ста́мну, и свѣ́щникъ, и же́злъ, и трапе́зу, Чи́стая, призыва́емъ, Одиги́тріе, и гла́съ е́же, ра́дуйся, Тебѣ́ при́сно привноша́емъ съ си́ми же имены́.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Отче святы́й Амвро́сіе, и́же Це́рковь Медіола́нскую отъ крамолы́ наро́дныя неврежде́нну соблюды́й и тишину́ въ не́й уста́вивый, соблюда́й и ны́нѣ мольба́ми твои́ми Це́рковь Христо́ву отъ мяте́жей, ересе́й и раско́ловъ, и испроси́ ми́ръ душа́мъ на́шимъ.

Спасти́ся хотя́ отъ избра́нія во епи́скопа, бѣ́галъ еси́ сю́ду и сю́ду, благоче́стне, но нико́е же мѣ́сто можа́ше укры́ти тя́, его́же благоволи́ Бо́гъ, я́ко гра́дъ верху́ горы́, и я́ко свѣщу́ на свѣ́щницѣ, на степе́ни святи́тельскомъ поста́вити, да свѣ́тиши всѣ́мъ, и́же въ Це́ркви Хри́стовѣй су́ть свѣ́тлостію уче́нія житія́ твоего́.

Іису́са, Его́же возлюби́лъ еси́, Іису́са, Ему́же усе́рдно послужи́лъ еси́, богому́дре, бы́въ Це́ркви Медіола́нстѣй а́нгелъ ми́ра, утѣше́нія и просвѣще́нія, моли́ утверди́ти на́съ въ любви́ святѣ́й, и спасти́ ду́ши на́ша.

Богоро́диченъ: Юже Іа́ковъ въ лѣ́ствицѣ ви́дѣ, Юже Моисе́й въ купинѣ́ усмотрѣ́, къ Се́й, во смире́ніи се́рдца припаде́мъ, зову́ще: Ма́ти Изба́вителя, при́зри на на́съ, погиба́ющихъ во грѣсѣ́хъ, со іера́рхомъ Амвро́сіемъ моля́щи Того́ спасти́ ду́ши на́ша.

Катава́сія: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Сѣда́ленъ, гла́съ 3:

Благода́тными твои́ми уче́ньми, я́ко рѣ́чными устремле́ніи, веселя́щими гра́дъ Бо́жій — Це́рковь святу́ю, ду́ши вѣ́рныхъ къ плодоноше́нію ороси́шася, витíйство Симма́ха злому́драго потопи́, Фритиги́лда къ животу́ вѣ́чному привлече́ся, аріа́нстіи полцы́ низложе́ни бы́ша. Тѣ́мже, я́ко вторы́й Моисе́й, безбѣ́дно проше́дый мо́ре жите́йскихъ волне́ній, и фарао́на мы́сленнаго глубино́ю богому́дрія своего́ потопи́вый, воспѣ́лъ еси́ побѣ́дную пѣ́снь Боже́ственнѣй Тро́ицѣ: Тебе́, Бо́га, хва́лимъ, Тебе́, Го́споди, исповѣ́дуемъ, и не постыди́мся во вѣ́ки. Ами́нь. [Два́жды.]

Сла́ва, и ны́нѣ:

Се́, я́коже прорече́ проро́къ, во чре́вѣ зача́ Неискусобра́чная Бо́га и роди́ти я́вѣ и́детъ въ верте́пѣ Виѳлее́млѣ. Ему́же вси́ пое́мъ: отце́въ Бо́же, благослове́нъ еси́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Ра́дуйся, чу́до чудесе́мъ, Одиги́тріе Влады́чице; ра́дуйся, всѣ́мъ ра́досте градово́мъ, и ве́семъ непобѣди́мое христіа́нское въ бѣда́хъ храни́лище, и предгра́діе, и на враги́ побѣжде́ніе.

Ра́дуйся, ра́дуйся, царе́мъ правосла́внымъ похвало́, и христолюби́вымъ во́инствомъ покро́въ пребыва́еши всѣ́мъ, Цари́це; ра́дуйся, Одиги́тріе, прибѣ́жище всѣ́мъ на́мъ и утвержде́ніе.

Ра́дуйся, всѣ́мъ ско́рое въ бѣда́хъ избавле́ніе; ра́дуйся, гото́вое всѣ́мъ скорбя́щимъ утѣше́ніе; ра́дуйся, Всепѣ́тая; ра́дуйся, Одиги́тріе Всеблагослове́нная, всѣ́мъ немощны́мъ Цѣли́тельнице.

Ра́дуйся, Ея́же вели́чія вся́ тва́рь сла́вити у́бо спѣши́тъ по достоя́нію, но не возмога́етъ, Одиги́тріе, и сего́ ра́ди зове́тъ Ти́: ра́дуйся, Влады́чице, Боговмѣсти́мое жили́ще.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Суде́й непра́вды изоблича́вый иногда́ въ бесѣ́дѣ свое́й къ Валентиніа́ну царю́, святи́телю, умоли́ Всеблага́го Царя́ сла́вы, да не обличи́тъ моя́ сокрове́нная, ниже́ посрами́тъ мене́ предъ а́нгелы, егда́ пріи́детъ сотвори́ти пра́ведный су́дъ, но да́руетъ ми́ пре́жде конца́ покая́ніе.

Вѣ́руяй улучи́ти спасе́ніе во мно́зѣ совѣ́тѣ, о́тче, я́коже са́мъ внима́лъ еси́ му́дрымъ совѣ́томъ дру́га души́ твоея́ — Симплитіа́на, та́ко и мене́ наста́ви твори́ти вся́ съ совѣ́томъ богому́дрыхъ пѣ́стуновъ и отце́въ, да не отпаду́тъ исправле́нія моя́, я́коже ли́ствіе злодѣ́йствомъ вра́жіимъ.

Якоже въ до́льнѣмъ житіи́ свое́мъ, а́ки звѣ́зды, на тве́рди За́падныя Це́ркве сія́лъ еси́ добродѣ́тельми твои́ми, святи́телю, та́ко и ны́нѣ богода́ннымъ ти́ совѣ́томъ возсія́й къ ча́домъ тоя́, воспряну́въ отъ мра́ка заблужде́ній, обратя́тся къ Правосла́вію, и благоуго́дни бу́дутъ Восто́ку восто́комъ — Го́споду Іису́су.

Богоро́диченъ: Ты́ еси́ наде́жда моя́, Богоро́дице, Ты́ свѣ́тъ души́ мое́й, Ты́ поко́й и ра́дость се́рдцу моему́, Ты́ спору́чница о мнѣ́ къ Сы́ну Твоему́, тѣ́мже спаси́ мя́, Влады́чице моя́, мно́го Ти́ согрѣши́вшаго.

Катава́сія: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Благосты́ни бе́здно и щедро́тамъ еси́, ра́дуйся, Одиги́тріе Дѣви́це; ра́дуйся, всѣ́мъ ра́дость творя́щи вѣ́рнымъ; о, ра́дуйся, су́щимъ въ бѣда́хъ и скорбя́щимъ пребы́страя засту́пнице!

Ра́дости, отъ исполне́нія вели́чія чуде́съ Твои́хъ зря́ще, исполня́емся, вси́ незря́щіи, слы́шаще же, вѣ́рніи. Тѣ́мже, ра́дуйся, Тебѣ́ при́сно всю́ду и вси́, Одиги́тріе, пое́мъ.

Христа́ Бо́га на́шего, о, ра́дуйся, Одиги́тріе, жили́ще и до́мъ неизрече́нныя и Пребоже́ственныя, Дѣ́во, сла́вы Его́! О, ра́дуйся, пала́то преукраше́нная! Ра́дуйся, гра́де одушевле́нный, при́сно ца́рствующій!

Ра́дость неоску́дную Тя́ разсмотря́юще, я́ко мо́ре, Отрокови́це, Одиги́тріе Дѣви́це, ра́дующеся вси́, ра́дуйся, вопіе́мъ Ти́, и пою́ще, Боже́ственныхъ даро́въ неви́димо при́сно отъ Тебе́ ожида́юще.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Иже въ Ри́мѣ разсла́бленную здра́ву сотвори́вый, о́тче святы́й, ско́рое пода́ждь исцѣле́ніе и моему́ неду́гующему тѣлеси́ и укрѣпле́ніе сла́бой мое́й во́ли къ дѣ́ланію добра́.

Твои́мъ, свя́те, хода́тайствомъ Гратіа́ну дарова́ся побѣ́да надъ го́тѳы, Валентиніа́ну ми́ръ отъ Макси́ма царя́, и согрѣши́вшимъ во́иномъ проще́ніе отъ Ѳеодо́сія. Исхода́тайствуй подо́бнѣ и мнѣ́ отъ Царя́ си́лъ проще́ніе мои́хъ грѣхо́въ, ми́ръ помысло́въ и побѣ́ду на враги́ — ми́ръ, пло́ть и діа́вола, — и́же при́сно бо́рются со мно́ю.

Евѳи́мій, хотя́й отвезти́ тя́ въ заточе́ніе, са́мъ отвезе́нъ бы́сть въ не́, по велѣ́нію царе́ву; кувикула́ріи Гратіа́новы, и жена́, я́же отъ Сирíи, оби́дящіи тя́, внеза́пу изверго́ша ду́ши своя́; аріа́нинъ, ху́ляй тя́, а́біе пре́данъ бы́сть бѣ́су. Моли́ся у́бо, святи́телю, да не пости́гнетъ и мене́, я́коже о́нѣхъ, недре́млющій су́дъ пра́вды Бо́жія, за беззако́нія моя́.

Богоро́диченъ: Люде́й твои́хъ печа́ль на ра́дость преложи́, о Влады́чице, мíръ умири́, оби́тель сію́ отъ междоусо́бій и навѣ́товъ вра́жіихъ сохрани́, и всѣ́мъ на́мъ бу́ди покро́въ и заступле́ніе въ де́нь зо́лъ.

Катава́сія: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Христа́, Чи́стая, пріе́млющи, гла́съ, е́же ра́дуйся, Одиги́тріе Дѣви́це, слы́шаше, Его́же неизрече́нно ро́ждши, ра́дуйся, отъ всѣ́хъ слы́шиши всегда́.

Ра́дости вся́ испо́лнила еси́, вы́шнія и ни́жнія Ты́ совокупи́ла еси́, Одиги́тріе, тѣ́мже ра́достно и согла́сно ны́нѣ не́бо и вся́ земля́ зове́тъ Ти́.

Вдова́мъ, о, ра́дуйся, Всепѣ́тая, и всѣ́мъ си́рымъ, Одиги́тріе, утѣше́ніе; ра́дуйся, всѣ́мъ источа́ющи ни́щимъ бога́тство неистощи́мое.

Зла́та вся́каго блиста́ема и у́тра со́лнечнаго свѣтлѣ́йши, жили́ще Христо́во; ра́дуйся, Одиги́тріе, ра́дуйся, Дѣви́це, ра́дуйся, Невѣ́сто неневѣ́стная.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Іису́су: Юже въ Медіола́нѣ Це́рковь цѣ́лу отъ аріа́нъ сохрани́вый, Го́споди, уго́дникомъ Твои́мъ Амвро́сіемъ, гото́вымъ любе́знѣе кончи́ну му́ченическую прія́ти, не́же огра́ду о́вчую преда́ти волко́мъ, сохрани́ и ны́нѣ мольба́ми его́ Це́рковь святу́ю неприкоснове́нну отъ всѣ́хъ навѣ́тъ вра́жіихъ.

Подража́тель кро́ткаго Іису́са яви́лся еси́, незло́биве, егда́ моли́твою исцѣли́лъ еси́ усо́хшую ру́ку злодѣ́я, дерзну́вшую занести́ но́жъ на усѣче́ніе главы́ твоея́, и на́мъ препо́далъ еси́ о́бразъ любве́ ко враго́мъ на́шимъ, благотворе́нія ненави́дящимъ на́съ и моле́нія за творя́щихъ на́мъ напа́сть.

Рече́ нѣ́кій во́лхвъ: вои́стину Амвро́сій стра́шенъ бѣсо́мъ, я́ко не то́чію къ нему́, но ниже́ къ две́ремъ до́му его́ приступи́ти мо́гутъ! — Толи́ко стра́шенъ бы́вый де́мономъ, святи́телю, огради́ ны́ предста́тельствомъ твои́мъ отъ губи́тельныхъ стрѣ́лъ и́хъ.

Богоро́диченъ: Испроси́ на́мъ у Сы́на Твоего́, о Ма́ти Бо́жія, избавле́нія отъ вся́кія ско́рби, гнѣ́ва и ну́жды, здра́віе душе́вное и тѣле́сное, и проще́ніе согрѣше́ніемъ на́шимъ, во́льнымъ же и нево́льнымъ.

Катава́сія: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Конда́къ, гла́съ 3. Подо́бенъ: Боже́ственныя вѣ́ры.

Боже́ственными догма́ты облиста́я, помрачи́лъ еси́ Аріеву пре́лесть, священнотаи́нниче и па́стырю Амвро́сіе; чудодѣ́йствуя же си́лою Ду́ха, стра́сти разли́чныя я́вѣ исцѣли́лъ еси́, о́тче преподо́бне, Христа́ Бо́га моли́, спасти́ся душа́мъ на́шимъ.

Икосъ:

Тако́въ вои́стинну подоба́ше Медіола́ну архіере́й, яко́въ бы́сть ему́ святы́й Амвро́сій — преподо́бенъ, незло́бивъ, умиле́нъ ду́хомъ, сокруше́нъ се́рдцемъ, пра́вило вѣ́ры, о́бразъ кро́тости, Правосла́вія побо́рникъ, злоче́стія Аріева потреби́тель. То́й посто́мъ, бдѣ́ніемъ, моли́твою небе́сная дарова́нія пріи́мъ, боля́щія исцѣля́ше, бѣ́сы изгоня́ше. Тѣ́мже, и соверша́ющимъ па́мять его́, досто́йно дне́сь зва́ти къ нему́: ра́дуйся, ди́вная лѣ́торосле Галлíйскія страны́; ра́дуйся, чу́дная сла́во Медіола́на гра́да; ра́дуйся, свѣтлѣ́йшій звѣ́здъ небе́сныхъ свѣти́льниче; ра́дуйся, благода́ти Бо́жія бога́тое сокро́вище; ра́дуйся, Амвро́сіе, вели́кій чудотво́рче! Христа́ Бо́га моли́, спасти́ся душа́мъ на́шимъ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Ра́дуйся, ра́дуйся, Богоро́дице Одиги́тріе, всѣ́хъ и всегда́ наставля́ющи вѣ́рныхъ ше́ствовати ко вся́кому пути́ спаси́тельному; ра́дуйся, Влады́чице, Тобо́ю бо при́сно избавля́емся настоя́щія ва́рварскія бѣды́.

Ра́дуйся, ра́дуйся, Одиги́тріе, бдя́щи и моля́щися о на́съ къ Бо́гу, и вся́кія зло́бы хода́тайствомъ Твои́мъ, вся́ческихъ скорбе́й, Богороди́тельнице, всѣ́хъ люде́й избавля́ющи.

Ра́дуйся, ра́дуйся, Пресвята́я Одиги́тріе, Яже проше́нія на́ша къ по́льзѣ на́мъ исполня́ющи, и хотя́щи всѣ́мъ при́сно всегда любодру́жное благо́е еди́нство, спѣ́шное же во изя́щныхъ.

Ра́дуйся, ра́дуйся, корабле́мъ, Одиги́тріе, ну́ждно пла́вающимъ, избавля́ющи вѣ́рныхъ и всѣ́мъ избавле́ніе отъ вся́кія ско́рби и неду́ги пестро́тныя и ме́дленныя разрѣша́ющи вско́рѣ.

Инъ.

Ирмо́съ: Бо́жія снизхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Наставля́емый иногда́ отъ а́нгела, глаго́люща ко у́ху, и мно́ги зловѣ́рныя къ со́нму правовѣ́рныхъ привлекíй, уго́дниче Бо́жій, испроси́ у Го́спода того́жде а́нгела, да ополче́ніемъ его́ соблюда́еми, дости́гнемъ въ соедине́ніе вѣ́ры и въ ра́зумъ и́стины.

Отче святы́й Амвро́сіе, уго́дниче Христо́въ вели́кій, покрови́телю на́шъ ми́лостивый! Не отри́ни убо́гаго моле́нія на́шего къ тебѣ́, но испроси́ у Го́спода ми́ръ и спасе́ніе душа́мъ на́шимъ, да зове́мъ ти́: ра́дуйся, о́тче, избавле́ніе на́ше.

Ше́ствоваху иногда́ издале́ча слове́снѣйшіи му́жи, ви́дѣти то́чію тебе́ хотя́ще, и, бесѣ́довавше съ тобо́ю на мно́зѣ, чуди́шася глубинѣ́ боговѣ́дѣнія твоего́. Осія́й о́нѣмъ и на́съ, о́тче, да возлю́бльше и́стину, не вла́емся вѣ́тромъ вся́каго уче́нія.

Богоро́диченъ: Егда́ отъ окая́ннаго тѣлесе́ сего́ изы́ти и́мать убо́гая душа́ моя́, тогда́ приклоня́ема милосе́рдіемъ Твои́мъ, предста́ни ми́, о Влады́чице, и простри́ ру́цѣ Твои́, я́ко голуби́нѣ крилѣ́, подъ сѣ́нію тѣ́хъ сохрани́ мя́ отъ стра́шнаго взо́ра лю́тыхъ де́моновъ, возду́шную бе́здну помози́ ми́ проити́ и го́рнихъ селе́ній дости́гнути.

Катава́сія: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Ра́дуйся, Всеблагослове́нная Марíе, изъ Тебе́ бо Всеблагослове́нный Бо́гъ одѣ́яся во всего́ мя, человѣ́ка, и, одѣ́явся, соедини́ Своему́ Божеству́ неизрече́ннымъ соедине́ніемъ, Дѣ́во Одиги́тріе; ра́дуйся, Обра́дованная, ра́досте всего́ мíра.

Ра́дуйся, лука́выхъ духо́въ Прогони́тельнице; ра́дуйся, Богоро́дице Одиги́тріе; ра́дуйся, я́ко Тебе́ небе́сная неви́димая во́инства славосло́вятъ всегда́ и велича́ютъ я́ко Ма́терь Бо́жію бы́вшую; ра́дуйся, Яже ни́жняя сочта́вши съ вы́шними.

Ра́дуйся, всѣ́хъ небе́сныхъ си́лъ безъ разсужде́нія превосходя́щая; ра́дуйся, Одиги́тріе; ра́дуйся, вся́кія тва́ри Бо́га ро́ждшая, госпо́дствующи, е́й, Влады́чице Всепѣ́тая; ра́дуйся, я́ко пребыва́еши Дѣ́вою, Чи́стая, и по рождествѣ́.

Ра́дуйся, жена́мъ всѣ́мъ сла́во, хра́ме преосвяще́нный Бо́га на́шего; ра́дуйся, Одиги́тріе; ра́дуйся, душеспаси́тельная все́й вселе́ннѣй; ра́дуйся, покрыва́ющій о́блаче, небе́съ ши́ршая; ра́дуйся, мѵрополо́жнице, Боже́ственнаго мѵ́ра полна́.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Нечи́стаго ду́ха отъ Пансо́фія изгна́вый, послѣди́ же сего́ воскреси́вый, святи́телю и чудотво́рче, воскреси́ и мою́, грѣхми́ умерщвле́нную и во гро́бѣ нечу́вствія лежа́щую ду́шу, и бу́ди ми́ помо́щникъ на зла́го моего́ сопроти́вника.

Іусти́на зло́бяшеся на тя́, я́коже Іезаве́ль на Илію́, Иродíя на Предте́чу, и па́кости мно́ги ти́ дѣ́яше, но вся́ сія́ терпѣ́вый и враго́мъ свои́мъ благотвори́вый, незло́биве, наста́ви и мене́ не воздава́ти зло́мъ за зло́ оби́дящимъ мя́, супроти́вное же, благословля́ти.

Егда́ грѣ́шніи исповѣ́даху ти́ грѣси́ своя́, толи́ко тогда́ пла́калъ еси́, о́тче, я́ко и жестосе́рдіи отъ ни́хъ умиля́хуся. О, дабы́ и мое́ се́рдце сокруши́лось благода́тію моли́твъ твои́хъ! Да слеза́ми покая́нія измы́лъ бы́хъ у́бо на вся́ку но́щь ло́же мое́ — нечи́стую со́вѣсть мою́, и омочи́лъ бы́хъ и́ми посте́ль мою́ — скве́рную пло́ть мою́.

Богоро́диченъ: Ма́ти Бо́жія Всеми́лостивая, не отступи́ отъ мене́, за е́же въ лѣ́ности иждива́ю днíе мои́, но бу́ди ми́ Одиги́трія въ се́й юдо́ли многоско́рбнаго стра́нствованія моего́, пла́чь мо́й пріими́, и въ го́рняя мя́ доведи́, да хвалю́, благословля́ю и покланя́юся та́мо Го́сподеви, поя́ и превознося́ Его́ во вся́ вѣ́ки.

Катава́сія: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Ра́дуйся, свѣще́, Свѣ́тъ невече́рній поне́сшая, и въ рождествѣ́ Твое́мъ многобо́жія тму́ разруши́вшая, и а́довы про́пасти изба́вльшая лю́ди; ра́дуйся, Одиги́тріе Богоро́дице, добро́тъ всѣ́хъ Предхода́таице.

Ра́дуйся, земле́, изъ нея́же кла́съ прозя́бшій небе́сный вѣ́рнымъ, и мíра всего́ душегу́бнаго гла́да изба́ви, разу́мная и одушевле́нная; о, ра́дуйся, виногра́де, и́же гро́здъ живо́тный ро́ждшая, Богоро́дице Чи́стая Одиги́тріе!

Ра́дуйся, та́йныхъ цвѣто́въ прекра́сный су́щій раю́; ра́дуйся, Ма́ти Дѣ́во, неви́димыхъ ра́зумъ чистото́ю страннолѣ́пно побѣ́ждши, Богороди́тельнице; ра́дуйся, Отрокови́це; ра́дуйся, Одиги́тріе, всемíрное чу́до и слы́шаніе.

Лѣ́то живота́ на́шего про́чее сохрани́ неврежде́но, поможе́ніемъ Твои́мъ, Дѣ́во Отрокови́це, и сподо́би коне́цъ благíй получи́ти на́мъ, воспѣва́ющимъ Тя́ и взыва́ющимъ: ра́дуйся, Всеблаже́нная Богоро́дице, Чи́стая Одиги́тріе.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Аще и подобостра́стную мнѣ́ приро́ду имѣ́лъ еси́, святи́телю, оба́че воздержа́ніемъ и моли́твою отъ страсте́й предочи́стився, еще́ въ жи́зни вре́меннѣй ви́димаго соше́ствія на тя́ Свята́го Ду́ха сподо́бился еси́, и чудотво́рецъ бы́лъ еси́, исцѣля́я неду́жныя. Сотвори́ же и мене́ прича́стника сего́ Ду́ха Утѣ́шителя, и утоли́ болѣ́зни моя́ душе́вныя и тѣле́сныя.

Лише́нія и ско́рби, по́двиги и труды́ земна́го стра́нствованія твоего́ кто́ изочте́тъ, святи́телю? Вся́ бо жи́знь твоя́ на земли́ — тру́дъ и болѣ́знь о спасе́ніи бли́жнихъ, и са́мъ ты́ бы́лъ еси́, я́ко же́ртва всесожже́нія Го́сподеви. Тѣ́мже издале́ча прови́дѣвъ, и, я́ко го́стью вожделѣ́нную, срѣ́тивъ кончи́ну свою́, восте́клъ еси́ въ го́рняя со тща́ніемъ къ Царю́ царе́й.

Отче святы́й Амвро́сіе, и́же здѣ́ лице́мъ къ лицу́ Го́спода узрѣ́вый, и та́мо на небеси́ при́сно съ Ни́мъ лику́яй, не забу́ди ны́ грѣ́шныя въ мольба́хъ твои́хъ у престо́ла Его́, да на за́падѣ дне́й на́шихъ сподо́битъ на́съ христіа́нскія кончи́ны безболѣ́знены, непосты́дны, ми́рны и до́браго отвѣ́та на стра́шнѣмъ суди́щи Свое́мъ.

Богоро́диченъ: Еди́но отъ о́чію Твое́ю, Ма́ти Бо́жія, еди́нъ Ма́терній хода́тайственный взо́ръ Тво́й къ Сы́ну Твоему́ мно́го мо́жетъ ко умилостивле́нію Его́ о грѣ́шницѣхъ. Тѣ́мже мо́лимъ Тя́: бу́ди о на́съ при́сная къ Нему́ хода́таица.

Катава́сія: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Свѣти́ленъ, гла́съ 6:

Во пло́ти безпло́тныхъ житіе́ проходя́, о́тче Амвро́сіе, и украси́въ ду́шу твою́ пе́рлома добродѣ́телей, содѣ́лался еси́ жили́ще а́нгельскія чистоты́. Сего́ ра́ди Влады́ка Христо́съ, восхи́тивъ ду́шу твою́ отъ мра́чныя юдо́ли сея́ къ невече́рнему свѣ́ту Ца́рствія Своего́, облече́ ю́ въ ри́зу спасе́нія вѣ́чнаго, я́ко жениху́ возложи́ е́й вѣне́цъ и, я́ко невѣ́сту Свою́, украси́ ю́ красото́ю Боже́ственнаго сія́нія.

Сла́ва:

Здѣ́ еще́ просія́вый лице́мъ, я́ко со́лнце, и убѣли́выйся, я́ко снѣ́гъ, по да́ру Утѣ́шителя Ду́ха, и та́мо въ черто́гахъ ра́йскихъ осіява́емый при́сно зрѣ́ніемъ Боже́ственныя Тро́ицы, святы́й Амвро́сіе, моли́ свѣтода́вца Го́спода просвѣти́ти одѣя́ніе души́ моея́, да и а́зъ съ му́дрыми дѣ́вы — чи́стыми и святы́ми душа́ми, вни́ду нѣ́когда въ небе́сный черто́гъ Боже́ственныя сла́вы Его́.

И ны́нѣ:

Богоро́дице Пречи́стая, Яже безъ сѣ́мене ро́ждши всѣ́хъ Влады́ку. Того́, со святи́телемъ Амвро́сіемъ, моли́ изба́вити мя́ возду́шныхъ мыта́рствъ и гее́нскаго муче́нія, да всегда́ прославля́ю Отца́ и Сы́на и Свята́го Ду́ха, и Твое́ ми́лостивное на мнѣ́ предста́тельство, во вѣ́ки вѣко́въ, ами́нь.

На хвали́техъ стихи́ры на 4, гла́съ 6:

Тебе́, Бо́га, хва́лимъ,* Тебе́, Го́спода, исповѣ́дуемъ, —* воспѣ́лъ еси́, богому́дре Амвро́сіе,* и научи́лъ еси́ на́съ сла́вити въ Тро́ицѣ Еди́наго Бо́га.* Тому́ моли́ся* безъ грѣха́ сохрани́тися на́мъ* и спасти́ся душа́мъ на́шимъ. [Два́жды.]

Идѣ́же пресла́вный апо́стольскій ли́къ,* идѣ́же проро́ческое хвале́бное число́,* идѣ́же пресвѣ́тлое му́ченическое во́инство,* та́мо и ты́, со іера́рхи и учи́тели церко́вными* сца́рствуеши въ вѣ́чнѣй сла́вѣ, свя́те Амвро́сіе.* Моли́ся Го́сподеви, безъ грѣха́ сохрани́тися на́мъ* и спасти́ся душа́мъ на́шимъ.

Престо́лу Влады́чню ны́нѣ предстоя́,* блаже́нне Амвро́сіе,* немо́лчну хвалу́ воспѣва́еши Тріеди́ному Бо́гу,* Ему́же вси́ а́нгели,* небеса́ и вся́ си́лы,* Ему́же херуви́мы и серафи́мы непреста́нными гла́сы взыва́ютъ:* Свя́тъ, Свя́тъ, Свя́тъ Госпо́дь Бо́гъ Савао́ѳъ!* Тому́ моли́ся безъ грѣха́ сохрани́тися на́мъ* и спасти́ ду́ши на́ша.

Сла́ва, гла́съ то́йже:

Аще по́лны су́ть небеса́ вели́чества сла́вы Твоея́, Тріѵпоста́сне Вседѣ́телю, оба́че и мы́, земля́ и пе́пелъ, Тебе́, Бо́га, хва́лимъ, Тебе́, Го́спода, исповѣ́дуемъ и мо́лимъ: не пре́зри на́съ, уничиже́нныхъ зѣло́, но, моли́твами уго́дника Твоего́ Амвро́сія, сподо́би безъ грѣха́ сохрани́тися на́мъ и спаси́ ду́ши на́ша.

И ны́нѣ, гла́съ то́йже:

Иже ко избавле́нію пріе́мый человѣ́ка, и дѣви́ческаго чре́ва не возгнуша́выйся, Царю́ сла́вы, Христе́ Бо́же на́шъ, не пре́зри на́съ до конца́, не отри́ни па́дшее созда́ніе Твое́, его́же ра́ди пречи́стую Кро́вь Твою́ на Крестѣ́ излія́лъ еси́, но, моли́твами Пречи́стыя Ма́тере Твоея́, изба́ви ны́ отъ страсте́й безче́стія и спаси́ ду́ши на́ша, я́ко Человѣколю́бецъ.

[Славосло́віе вели́кое. Ектеніи́, и отпу́стъ.



НА ЛИТУРГІИ,

Блаже́нна, отъ кано́на святи́теля пѣ́снь 3-я и 6-я. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 335. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ — Оптинская служба святителю Амвросію епископу Медіоланскому.

/ Къ оглавленію раздѣла /


Наверхъ / Къ титульной страницѣ

0