Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 23 мая 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 7-й де́нь.
Иже во святы́хъ отца́ на́шего Амвро́сія, епи́скопа Медіола́нскаго.

Аллилу́ія или́ тропа́рь.

[ВЕЧЕРЪ,]
На Го́споди воззва́хъ: стихи́ры Амвро́сія, гла́съ 1. Подо́бенъ: Небе́сныхъ чино́въ.

Влады́чества престо́лъ украша́я добродѣ́тельми,* отъ вдохнове́нія Боже́ственна* священнонача́ліе подо́бнѣ прія́лъ еси́;* тѣ́мже вѣ́ренъ строи́тель благода́ти* во обои́хъ, Амвро́сіе, бы́въ,* сугу́бъ вѣне́цъ наслѣ́довалъ еси́.

Въ воздержа́ніи, и болѣ́знехъ,* и во бдѣ́ніихъ мно́зѣхъ,* и моли́твахъ спротяже́нныхъ* ду́шу и тѣ́ло очи́стилъ еси́, богому́дре,* сосу́дъ про́чее избра́нъ яви́вся Христу́ Бо́гу,* апо́столомъ ра́венъ я́влься,* воспрія́лъ еси́ дарова́нія.

Благочести́ваго царя́, согрѣши́вша иногда́,* я́ко Дави́да Наѳа́нъ, дерзнове́ніемъ обличи́лъ еси́,* Амвро́сіе всеблаже́нне,* сего́ я́вѣ отлуче́нію подложи́лъ еси́,* и покая́ніемъ наказа́въ боголѣ́пно,* сочи́слилъ еси́ па́ствѣ твое́й.

Ины стихи́ры Богоро́дицы, гла́съ и подо́бенъ то́йже:
(Аще Аллилу́ія: сі́и стихи́ры пою́тся пре́жде.)

Жезло́мъ Твоего́ предста́тельства,* Богороди́тельнице Чи́стая,* звѣри́ныя стра́сти окая́нныя души́ моея́ отжени́,* и отвсю́ду ми́рно къ жи́зни мя́ управля́ющи,* свято́му ста́ду* избра́нныхъ Твои́хъ ове́цъ причти́.

Яко помо́щница Ты́ еси́ безпо́мощныхъ человѣ́ковъ,* я́ко наде́жда еси́ всѣ́хъ ненаде́жныхъ,* рѣше́ніе, Богоро́дице, въ лю́тыхъ* и по́мощь мнѣ́ бу́ди,* грѣхо́въ и бѣ́дъ, я́ко ми́лостива,* избавля́ющи мя́, Пречи́стая.

Всегуби́тельныхъ страсте́й мои́хъ огнепа́льная стремле́нія* росо́ю Боже́ственною,* во́льнымъ одожде́ніемъ Твои́мъ угаси́, Дѣ́во,* да и а́зъ, я́коже о́троцы,* Бо́га, изъ Тебе́ рожде́ннаго, благодарю́* и сла́влю и благословлю́ благода́ть Твою́, Влады́чице.

Сла́ва, и ны́нѣ, богоро́диченъ, гла́съ и подо́бенъ то́йже:

Нра́вомъ гнилы́мъ попо́лзся, ни́цъ лежу́* и къ Твое́й, Дѣ́во, притека́ю тишинѣ́,* отъ бу́ри сопроти́вныя* и искуше́ній многообра́зныхъ мя́ изба́ви,* да пою́ Твою́ благода́ть непреста́нно,* Богоро́дице Ма́ти, Приснодѣ́во.

Крестобогоро́диченъ. Подо́бенъ то́йже:

У Креста́ предстоя́щи Сы́на и Бо́га Твоего́* и долготерпѣ́ніе Того́ смотря́ющи,* глаго́лаше, пла́чущи, Ма́ти Чи́стая:* увы́ Мнѣ́, Ча́до Сладча́йшее,* что́ сія́ стра́ждеши непра́ведно, Сло́ве Бо́жій,* да спасе́ши человѣ́чество?

На стихо́внѣ стихи́ры окто́иха.

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́ я́же веще́й и́стина. Сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Амвро́сіе, моли́ Христа́ Бо́га, спасти́ся душа́мъ на́шимъ.


НА УТРЕНИ,
Оба кано́на окто́иха. И свята́го кано́нъ на 4, его́же краегране́сіе: Всевели́каго Амвро́сія восхвалю́. Творе́ніе Іо́сифово. Гласъ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Боже́ственными свѣтоли́тіи, преподо́бне, облиста́емь, свѣ́тлое, и свѣтоно́сное, и свято́е твое́ успе́ніе благоче́стно чту́щія твои́ми моли́твами просвѣти́.

Сло́во Бо́жіе прему́дрости тебѣ́ сло́во дарова́, укра́шенное зна́ніемъ и́стиннымъ, іера́рше Амвро́сіе, ерети́чествующихъ безслове́сное отража́я зломы́сліе.

Ума твоего́ зри́тельное, пребога́те, предочи́стивъ отъ страстны́я мглы́, прія́тно чи́стыхъ блиста́ній Всесвята́го Ду́ха содѣ́лалъ еси́, всеблаже́нне.

Всему́дрыми и свяще́нными твои́ми догма́ты аріему́дрственную отгна́въ па́губу, я́ко па́стырь, на зла́цѣ упа́слъ еси́ Правосла́вія, всему́дре, слове́сныя твоя́ вѣ́рою о́вцы.

Богоро́диченъ: Безсѣ́менно Отчею во́лею отъ Боже́ственнаго Ду́ха Бо́жія зачала́ еси́ Сы́на и пло́тію родила́ еси́, изъ Отца́ безма́терня и на́съ ра́ди изъ Тебе́ безо́тча.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Велича́йшу благода́ть отъ Бо́га пріе́мъ и си́лу, твои́мъ чу́вственнымъ прикоснове́ніемъ разли́чныя стра́сти, о́тче Амвро́сіе, исцѣля́лъ еси́ приходя́щихъ къ тебѣ́.

Науче́нъ, я́ко іера́рхъ боже́ственный, преподо́бне, вся́кое разумѣ́ніе Писа́нія невѣ́дущимъ, о́тче Амвро́сіе, неудобопости́жная я́вѣ уясни́лъ еси́.

Тебѣ́, му́дростію духо́вною сія́ющу, несмы́сленно прибли́житися де́рзостно сквернѣ́йшую устре́мльшуюся скорѣ́йше умертви́лъ еси́ боже́ственнымъ приглаго́ланіемъ.

Богоро́диченъ: Ро́дъ человѣ́ческій обнови́ла еси́ еди́на, ро́ждши естества́ на́шего Содѣ́теля же и Го́спода, тѣ́мже Тя́ сла́вимъ, Богора́дованная.

Сѣда́ленъ, гла́съ 8. Подо́бенъ: Прему́дрости.

Проро́ка Илію́ ревнообразу́я и Іоа́нна та́кожде Крести́теля, му́жески обличи́лъ еси́ царя́ беззако́нновавша, іера́рше; престо́лъ боже́ственнѣ украси́лъ еси́ и чуде́съ мно́жествомъ мі́ръ обогати́лъ еси́. Тѣ́мже, и Боже́ственными Писа́ніи науче́нъ, вѣ́рныя утверди́лъ еси́ и невѣ́рныя обрати́лъ еси́, іера́рше Амвро́сіе, моли́ Христа́ Бо́га прегрѣше́ній оставле́ніе дарова́ти пра́зднующимъ любо́вію святу́ю па́мять твою́.

Сла́ва, и ны́нѣ, богоро́диченъ:

Помышле́ньми поползо́хся лука́выми, во глубину́ впадо́хъ грѣхо́вную и, стеня́, взыва́ю Ти́ отъ се́рдца, Пречи́стая: на мнѣ́ удиви́ бога́тую ми́лость, и Твоего́ милосе́рдія неизмѣ́рную пучи́ну, и щедро́тъ Твои́хъ неизче́тное бога́тство, и да́ждь ми́ покая́ніе и прегрѣше́ній проще́ніе, да любо́вію взыва́ю Тебѣ́: моли́ Христа́ Бо́га прегрѣше́ній оставле́ніе дарова́ти ми́: Тя́ бо наде́жду имѣ́ю, ра́бъ Тво́й.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущими, го́рько рыда́ющи, вопія́ше: мі́ръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Іера́рхъ показа́лся еси́, пома́зався мѵ́ромъ свяще́нства, соверша́я свяще́нники, всѣ́мъ спаси́тельное да́руя очище́ніе.

Соблю́лъ еси́ па́ству твою́ отъ вся́каго вре́да проти́вныхъ, блаже́нне, и Аріеву ле́сть всю́ омрачи́лъ еси́ сія́ніемъ слове́съ твои́хъ.

Ду́ха си́лою огражде́нъ, лука́выя отгоня́еши зло́бы, всеблаже́нне, ду́хи, не терпя́щія твоего́ запреще́нія.

Богоро́диченъ: Вся́ во́лею содѣ́тельствовавый, содѣ́тельствуется хотя́ отъ чи́стыхъ Твои́хъ крове́й, спаса́я вѣ́дущія Тя́, Чи́стую Богома́терь.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мі́ръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Умъ, сія́ющъ свѣ́томъ невеще́ственнымъ, стяжа́въ, облиста́лъ еси́ врачева́ній и чуде́съ зари́, Амвро́сіе блаже́нне.

Воздви́глъ еси́ тебе́ сама́го свяще́нное жили́ще Ду́ха, разори́лъ еси́ хра́мы и́дольскія, Амвро́сіе богодохнове́нне.

Велича́йшихъ добродѣ́телей свѣтозаре́ніемъ сія́юща, постыдѣ́шася ца́ріе тебе́ и предѣ́ла язы́ка твоего́ не поколеба́ша.

Богоро́диченъ: Хотѣ́ніемъ все́ му́дрѣ содѣ́ловая, хотя́ обнови́ти человѣ́ки, Дѣ́во, въ Твою́ утро́бу всели́ся.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Ри́мъ твоя́ честна́я благохва́литъ исправле́нія: я́ко бо звѣзда́ свѣтови́дна, всю́ду лучи́ чуде́съ твои́хъ, іера́рше, испусти́лъ еси́, вѣ́рно удивля́емь.

Утреневавъ ко Христу́, та́мо су́щими свѣтлостьми́ озари́лся еси́ бога́тно, и свѣ́та напо́лнился еси́ Боже́ственнѣйшаго, и просвѣща́еши вѣ́рно чту́щія тя́ всегда́.

Тѣ́ло и ду́шу твою́ Бо́гу освяти́въ, и прія́тно содѣ́лалъ еси́ дарова́ній, о́тче, твое́ се́рдце, непреста́нно вне́млющее сла́дкому жела́нію.

Богоро́диченъ: Исцѣли́ души́ моея́, Дѣ́во, я́звы, осѣне́ніемъ Твои́мъ боже́ственнымъ и у́мъ мо́й просвѣти́, омраче́нный лѣ́ностію и зло́бою врага́ борца́.

Конда́къ, гла́съ 3. Подо́бенъ: Боже́ственныя вѣ́ры.

Боже́ственными догма́ты облиста́я, помрачи́лъ еси́ Аріеву пре́лесть, священнотаи́нниче и па́стырю Амвро́сіе; чудодѣ́йствуя же си́лою Ду́ха, стра́сти разли́чныя я́вѣ исцѣли́лъ еси́, о́тче преподо́бне, Христа́ Бо́га моли́, спасти́ся душа́мъ на́шимъ.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Боже́ственное вѣща́ніе твои́хъ догма́товъ, о́тче всему́дре, я́коже мо́лнія, про́йде всю́ зе́млю и чуде́съ показа́ньми, я́ко свѣ́тъ, облиста́, я́же во мра́цѣ сердца́ просвѣща́ющее.

Законоположе́ніемъ Спа́са ты́ послѣ́дуя, о́тче, да́нный тебѣ́ тала́нтъ, я́ко ра́бъ блажа́йшій, тща́тельно умногосугу́билъ еси́, Влады́чнія сподобля́емь ра́дости.

Изостри́въ богосло́вный тво́й у́мъ, струи́ свяще́нныхъ догма́товъ, я́ко рѣку́, испусти́лъ еси́, напоя́я вѣ́рныхъ исполне́ніе, священнотаи́нниче о́тче Амвро́сіе.

Богоро́диченъ: Се́, Дѣ́во, во утро́бѣ Твое́й зачала́ еси́ Сло́во, Отцу́ собезнача́льно, и пло́тію породила́ еси́ да́рующее всѣ́мъ воззва́ніе, су́щимъ изъ Ада́ма па́дшимъ, Всенепоро́чная.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Умертви́въ у́ды и ме́ртво плотско́е мудрова́ніе содѣ́лавъ, ду́шу оживи́лъ еси́, преподо́бне, и исто́чникъ чуде́съ источи́лъ еси́ умерщвле́ннымъ отъ страсте́й, жи́знь подаю́щи вопію́щимъ: благослови́те, вся́ дѣла́ Госпо́дня, Го́спода.

Увѣ́дѣлъ еси́ преставле́ніе, му́дре, е́же отъ тѣлесе́, Боже́ственнымъ Ду́хомъ, проро́чески бо сіе́ су́щимъ съ тобо́ю сказа́лъ еси́ и ра́достно на небеса́, вопія́, восте́клъ еси́: благослови́те, вся́ дѣла́ Госпо́дня, Го́спода.

Тѣ́ло, и се́рдце, и у́мъ предочи́стивъ отъ страсте́й смѣше́нія, огнено́сну лучу́ свы́ше прія́лъ еси́ Ду́ха, я́коже боже́ственніи ученицы́, вопія́, Амвро́сіе: благослови́те, вся́ дѣла́ Госпо́дня, Го́спода.

Богоро́диченъ: Яви́лася еси́ превы́шши небе́съ, Бо́га небе́снаго поро́ждши, земна́я, Пречи́стая, небе́снымъ совоку́пльшаго и позна́ніе Свое́ всѣ́мъ подаю́щаго, вопію́щимъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ви́дѣлъ еси́, во изступле́ніи бы́въ, вѣ́чныя святы́мъ, о́тче, лежа́щія по́чести; къ ни́мже преше́лъ еси́, воспріе́мъ твои́хъ трудо́въ, сла́вне, воздая́нія, веселя́ся.

Яко гро́здъ зрѣ́лъ, богому́дре, въ точи́лѣхъ го́рнихъ досто́йно сокро́вищствовался еси́, источа́я безсме́ртія вино́, Амвро́сіе, и врачева́ній дарова́нія благоче́стно къ тебѣ́ притека́ющимъ.

Тя́, златоза́рный о́тче, Боже́ственнаго Ду́ха свѣти́льникъ, свѣ́тъ благочести́выхъ уче́ній и врачева́ній лучу́ испуща́ющъ и вѣ́рныя просвѣща́ющъ, велегла́сно ублажа́емъ.

Днесвѣ́тлую тя́ звѣзду́ Це́рковь стяжа́вши, тмы́ избѣга́етъ вся́кія, всеблаже́нне, льсти́ и, свѣ́тлостьми свяще́нныхъ твои́хъ догма́товъ озаря́ема, блажи́тъ тя́.

Богоро́диченъ: Гла́съ Тебѣ́ вопіе́мъ, Дѣ́во, ра́достнѣ арха́нгеловъ: ра́дуйся, прокля́тства разрѣше́ніе лю́тыхъ всѣ́хъ; ра́дуйся, избавле́ніе, земны́я обожи́вшая па́че ума́ Рождество́мъ Твои́мъ.

Источникъ: Мині́а, мѣ́сяцъ Деке́мврій. — Кі́евъ: Въ тѵпогра́фіи Кі́ево-Пече́рской Ла́ѵры, 1893. — Л. 48 – 51 об.

/ Къ оглавленію раздѣла /


Наверхъ / Къ титульной страницѣ

0