Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 6-й де́нь.
Иже во святы́хъ отца́ на́шего Никола́я, архіепи́скопа Мѵрликíйскихъ, чудотво́рца.

Аще хо́щетъ настоя́тель, твори́мъ бдѣ́ніе.

НА МАЛѢЙ ВЕЧЕРНИ,
На Го́споди воззва́хъ, стихи́ры на 4, гла́съ 4. Подо́бенъ: Яко до́бля.

Мѵ́ромъ Боже́ственнымъ* тя́ пома́за Боже́ственная благода́ть Ду́ха,* мѵ́ряномъ предсѣда́тельствовавша* и мѵроблагоуха́вша добродѣ́тельми* свяще́ннѣйше, мíра концы́,* сладкодохнове́нными же твои́ми моли́твами* злосмра́дныя прогоня́ща стра́сти всегда́.* Сего́ ра́ди тя́ вѣ́рою благохва́лимъ* и па́мять твою́ всесвяту́ю соверша́емъ, Нико́лае.

Яко осія́теля тя́ незаходи́маго,* я́ко свѣти́льника всемíрнаго,* на тве́рди возсія́вша церко́внѣй, Нико́лае,* и мíръ просвѣща́юща,* и бѣ́дъ лю́тыхъ мглу́ отгоня́ща,* и изыма́юща печа́лей зимы́,* и тишину́ содѣ́ловающа глубо́кую,* по до́лгу ублажа́емъ.

И здѣ́ сы́й,* и явля́яся въ со́ніихъ, Нико́лае,* и́же непра́ведно иму́щія умре́ти* спа́слъ еси́, я́ко сострада́теленъ,* я́ко благолюби́вый,* я́ко изба́витель теплѣ́йшій,* я́ко предста́тель и́стинный* вѣ́рно прося́щихъ твоего́ защище́нія,* свяще́ннѣйшій о́тче,* а́нгеловъ сограждани́не,* апо́столовъ и проро́ковъ равностоя́телю.

Пресла́вное житіе́ твое́* всю́ду преди́вна тя́ показа́,* богому́дре о́тче свяще́ннѣйшій,* святи́телей благолѣ́піе,* преподо́бныхъ украше́ніе.* И, я́ко со́лнце на земли́,* лучи́ распросте́ръ,* озари́лъ еси́ вѣ́рныхъ сердца́,* соверша́ющихъ свѣтоно́сную твою́* и боже́ственную па́мять,* всеблаже́нне Нико́лае.

Сла́ва, гла́съ 6:

Возсія́, я́коже со́лнце, твоя́, святи́телю, па́мять, вѣ́рныхъ сердца́ мы́сленно просвѣща́ющи, ю́же и мы́, свѣ́тло соверша́юще дне́сь, моле́бно тебѣ́ вопіе́мъ: ра́дуйся, держа́во цѣлому́дрія, непорабоще́нно души́ соблю́дъ достоя́ніе, воздержа́нія щито́мъ обложи́вся; ра́дуйся, па́стырю и учи́телю христоимени́тыхъ люде́й твои́хъ; ра́дуйся, церко́вное украше́ніе, архіере́евъ добро́то, мона́шествующихъ похвало́, Нико́лае пресвяще́нне, всеблаже́нне о́тче, Христа́ Бо́га моли́ непреста́нно ми́ръ пода́ти вселе́ннѣй и спасти́ ду́ши на́ша.

И ны́нѣ, богоро́диченъ: Никто́же притека́яй къ Тебѣ́...

На стихо́внѣ стихи́ры, гла́съ 6. Подо́бенъ: Тридне́венъ воскре́слъ еси́.

Нико́лае блаже́нне,* припа́дающа мя́ уще́дри,* молю́ся тебѣ́,* и о́чи, прему́дре,* просвѣти́ души́ моея́,* да чи́стѣ узрю́* Свѣтода́вца и Ще́драго.

Сти́хъ: Честна́ предъ Го́сподемъ* сме́рть преподо́бныхъ Его́.

Враго́въ, и́щущихъ злосотвори́ти мнѣ́,* свя́те, изми́ мя,* дерзнове́ніе къ Бо́гу я́ко имѣ́я,* іера́рше Нико́лае всеблаже́нне,* и отъ муже́й крове́й спаси́ мя.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Приста́нище тя́ небу́рное,* и стѣ́ну необори́мую, іера́рше,* тя́ стяжа́хомъ, вѣ́рніи,* и сто́лпъ утвержде́нія,* и две́рь покая́нія,* и наста́вника ду́шъ, и побо́рника.

Сла́ва, и ны́нѣ, богоро́диченъ:

Возревнова́въ, сопе́рникъ проти́ву ста́ду Твоему́, Пречи́стая, на кíйждо де́нь и́щетъ лука́вый снѣ́дь сотвори́ти, но Ты́, Богоро́дице, того́ вре́да изми́ ны.

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́, я́же веще́й и́стина. Сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче священнонача́льниче Нико́лае, моли́ Христа́ Бо́га, спасти́ся душа́мъ на́шимъ.

Сла́ва, и ны́нѣ, богоро́диченъ: Еже отъ вѣ́ка утае́нное...



НА ВЕЛИЦѢЙ ВЕЧЕРНИ,
Блаже́нъ му́жъ, 1-й антифо́нъ. На Го́споди воззва́хъ: стихи́ры на 8, гла́съ 2. Подо́бенъ: Егда́ отъ дре́ва Тя́.

Въ Мѵ́рѣхъ пожи́въ чу́вственно,* мѵ́ро вои́стинну яви́лся еси́,* мѵ́ромъ пома́зався у́мнымъ,* свя́те Нико́лае, святи́телю Христо́въ,* и благоуха́еши ли́ца,* вѣ́рою и любо́вію* твою́ всесла́вную па́мять* соверша́ющихъ при́сно,* разрѣша́я бѣ́дъ, и напа́стей,* и скорбе́й си́хъ, о́тче,* къ Бо́гу твои́ми моли́твами.

Побѣ́ды тезоимени́тъ вои́стинну,* вѣ́рнымъ лю́демъ яви́лся еси́* въ напа́стехъ крѣ́покъ, свя́те Нико́лае,* святи́телю Христо́въ;* вездѣ́ бо призыва́емь, бы́стро предваря́еши* любо́вію притека́ющихъ подъ кро́въ тво́й:* ты́ бо, во дни́ и но́щи вѣ́рнымъ явля́яся,* спаса́еши отъ напа́стей и обстоя́ній.

Яви́лся еси́ Константи́ну царю́ и Авла́вію во снѣ́* и, си́мъ стра́хъ вложи́въ,* си́це тѣ́мъ ре́клъ еси́:* разрѣши́те у́бо вско́рѣ,* я́же держите́ свя́занныя въ темни́цѣ,* непови́нни бо су́ть беззако́ннаго заколе́нія.* Оба́че а́ще преслу́шаеши мене́,* мольбу́ сотворю́ царю́ на тя́,* ко Го́споду моля́ся.

Ве́лій засту́пникъ и те́плый* въ бѣда́хъ обрѣта́ющимся еси́, сла́вне,* свя́те Нико́лае,* священнопроповѣ́дниче Христо́въ,* су́щимъ на земли́ и пла́вающимъ,* су́щимъ дале́че и бли́зъ обрѣта́ющимся* я́ко зѣло́ ми́лостивнѣйшій и моле́бникъ крѣ́пкій.* Тѣ́мже, соше́дшеся, вопіе́мъ:* моли́ся ко Го́споду,* я́ко да вся́каго изба́вимся обстоя́нія.

Ины стихи́ры, гла́съ то́йже. Подо́бенъ: Кíими похва́льными.

Кíими похва́льными вѣнцы́ увязе́мъ святи́теля?* Пло́тію въ Мѵ́рѣхъ су́ща,* и духо́вно всѣ́мъ достиза́юща,* чи́стѣ того́ лю́бящимъ,* всѣ́хъ предста́теля и засту́пника,* и всѣ́хъ ско́рбныхъ утѣ́шителя,* и всѣ́хъ су́щихъ въ бѣда́хъ прибѣ́жище,* благоче́стія столпа́,* вѣ́рныхъ побо́рника.* Его́же ра́ди шата́нія враго́въ Христо́съ низложи́,* имѣ́яй ве́лію ми́лость. [Два́жды.]

Кíими пѣ́сненными пѣ́ніи похва́лимъ святи́теля?* Нече́стія противоборца́* и благоче́стія побо́рника,* Це́ркве первостоя́теля,* вели́каго засту́пника же и учи́теля,* вся́ злосла́вныя посрамля́юща,* потреби́теля Аріева и того́ посо́бниковъ.* Его́же ра́ди си́хъ шата́ніе Христо́съ низложи́,* имѣ́яй ве́лію ми́лость.

Кíими проро́ческими пѣ́сньми похва́лимъ святи́теля?* Иже дале́че су́щая прови́дяща* и отстоя́щая, я́ко бли́зъ су́ща,* проро́чествующа нело́жно,* и всю́ вселе́нную назира́юща,* и вся́ оби́димыя избавля́юща,* во снѣ́ я́вльшася царю́ богому́дрому* и дре́вле свя́занныя заколе́нія непра́веднаго изба́вльша,* и да́рующа ве́лію ми́лость.

Сла́ва, гла́съ 6:

Святи́телей удобре́ніе и отце́въ сла́ву, исто́чника чуде́съ и вѣ́рныхъ засту́пника вели́каго, соше́дшеся, о празднолю́бцы, пѣ́сненными похвала́ми воспои́мъ, глаго́люще: ра́дуйся, мѵ́ряномъ храни́телю, и первосѣда́телю честны́й, и сто́лпе неподви́жимый; ра́дуйся, свѣти́льниче всесвѣ́тлый, и́же мірскíя концы́ просвѣща́я чудесы́; ра́дуйся, скорбя́щихъ боже́ственная ра́досте и оби́димыхъ те́плый предста́телю. И ны́нѣ, всеблаже́нне Нико́лае, не преста́й моля́ся Христу́ Бо́гу о вѣ́рою и любо́вію чту́щихъ приснора́достную и всепра́зднственную па́мять твою́.

И ны́нѣ, предпра́зднства, гла́съ то́йже:

Верте́пе, благоукраси́ся, Агница бо гряде́тъ, чревонося́щи Христа́; я́сли же, подыми́те сло́вомъ разрѣши́вшаго отъ безслове́снаго дѣя́нія на́съ, земноро́дныхъ; па́стыріе, свиря́юще, свидѣ́тельствуйте чудеси́ стра́шному; и волсви́ отъ Перси́ды, зла́то, и лива́нъ, и сми́рну Царю́ принеси́те, я́ко яви́ся Госпо́дь изъ Дѣ́вы Ма́тере. Ему́же и, прини́кши, ра́бски Ма́ти поклони́ся и привѣща́ше къ Держи́мому на объя́тіихъ Ея́: ка́ко всѣ́ялся еси́ Мнѣ́ или́ ка́ко прозя́блъ еси́ во Мнѣ́, Изба́вителю Мо́й и Бо́же?

Вхо́дъ. Проки́менъ дне́. Чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма. Та́же стихи́ры Никола́я, гла́съ 2, самогла́сны. Византíево:

Пра́вило вѣ́ры и о́бразъ кро́тости яви́ тя ста́ду твоему́ Христо́съ Бо́гъ, святи́телю Нико́лае, въ Мѵ́рѣхъ у́бо благоуха́ющу ти́, всю́ду сія́ютъ свѣ́тло боже́ственная твоя́ исправле́нія, си́рыхъ и вдови́цъ предста́телю. Тѣ́мже моли́ся непреста́нно спасти́ ду́ши на́ша.

Отче Нико́лае, мѵрополо́жница моще́й твои́хъ Мѵ́ры обогаща́етъ, въ ни́хже и свя́занныя, непра́ведно осужде́нныя, во снѣ́ царю́ видѣ́ніемъ твои́мъ яви́вся, свободи́лъ еси́ отъ сме́рти, и у́зъ, и темни́цы. Но и ны́нѣ, я́коже тогда́ и при́сно, видѣ́ніемъ твои́мъ яви́ся, моля́й о душа́хъ на́шихъ.

Отче Нико́лае, а́ще и Мѵ́рская страна́ молчи́тъ, но мíръ ве́сь, и́же тобо́ю просвѣще́нный, мѵ́ра же благоуха́ніи и чуде́съ мно́жествы взыва́етъ благохва́льными пѣ́сньми; и спа́сшіися тобо́ю осужде́нніи, съ су́щими въ Мѵ́рѣхъ и мы́, пою́ще, вопіе́мъ: моли́ спасти́ся душа́мъ на́шимъ.

Гла́съ 4:

Отче Нико́лае, Пресвята́го Ду́ха мѵрополо́жница сы́й, я́ко въ Мѵ́рѣхъ благоуха́еши Боже́ственными арома́ты: Христо́вымъ бо апо́столомъ подо́бникъ бы́въ, вселе́нную обхо́диши словесы́ чуде́съ твои́хъ. Тѣ́мже и да́льнимъ, я́ко бли́зъ, во снѣ́ явля́яся, отъ сме́рти избавля́еши, и́же непра́веднымъ судо́мъ умре́ти иму́щія, спаса́я пресла́вно отъ бѣ́дъ мно́гихъ призыва́ющія тя́. Тѣ́мже, и на́съ, отъ находя́щихъ лю́тыхъ свободи́ твои́ми моли́твами, при́сно восхваля́ющхъ тя́.

Гла́съ 8:

До́блестей твои́хъ, преподо́бне о́тче, пло́дъ просвѣти́лъ е́сть вѣ́рныхъ сердца́: кто́ бо, слы́ша безмѣ́рное твое́ смире́ніе, терпѣ́нію не удиви́ся, е́же къ ни́щимъ ти́хости, къ скорбя́щимъ утѣше́нію? Вся́ боголѣ́пно научи́лъ еси́, святи́телю Нико́лае, и ны́нѣ неувяда́емымъ вѣнце́мъ увя́злся еси́, моли́ся о душа́хъ на́шихъ.

На хвалу́ поте́клъ еси́ Госпо́дню, Нико́лае, во вре́меннѣй жи́зни, и То́й тя́ просла́ви на небе́снѣй и и́стиннѣй жи́зни. Тѣ́мже дерзнове́ніе стяжа́въ къ Нему́, моли́ спасти́ ду́ши на́ша.

Сла́ва, гла́съ 6:

Благíй, ра́бе вѣ́рный, дѣ́лателю виногра́да Христо́ва, ты́ и тяготу́ дневну́ю поне́слъ еси́, ты́ и да́нный тебѣ́ тала́нтъ возрасти́лъ еси́, и по тебѣ́ прише́дшимъ не зави́дѣлъ еси́. Тѣ́мже врата́ небе́сная отверзо́шася тебѣ́, вни́ти въ ра́дость Го́спода твоего́, и моли́ о на́съ, свя́те Нико́лае.

И ны́нѣ, гла́съ то́йже:

Сіо́не, торжеству́й, Іерусали́ме, весели́ся, гра́де Христа́ Бо́га, подыми́ Зижди́теля, въ верте́пѣ и я́слѣхъ вмѣща́емаго, отве́рзите ми́ врата́ и, вше́дъ въ ня́, узрю́ я́ко Младе́нца, пелена́ми повива́емаго, дла́нію же содержа́щаго тва́рь. Его́же пою́тъ а́нгели непреста́ннымъ гла́сомъ, Жизнода́вца Го́спода, спаса́ющаго ро́дъ на́шъ.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, свяще́нная главо́,* чи́стый добродѣ́телей до́ме,* Боже́ственнѣйшаго свяще́нства пра́вило,* па́стырю вели́кій,* свѣти́льниче свѣтлѣ́йшій,* и́же побѣ́ды нося́ и́мя,* и моля́щимся ми́лостивенъ преклони́тель,* проница́яй къ немощны́хъ проше́ніямъ,* изба́вителю гото́вѣйшій,* храни́телю спаси́тельный* всѣ́мъ, вѣ́рою чту́щимъ всесла́вную па́мять твою́,* Христа́ моли́, преблаже́нне,* низпосла́ти мíру ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуйся, свяще́ннѣйшій у́ме,* Тро́ицы чи́стое обита́лище,* сто́лпе церко́вный,* вѣ́рныхъ утвержде́ніе,* побѣжда́емымъ по́мощь,* звѣздо́, я́же сія́ньми благопрія́тныхъ твои́хъ моли́твъ* разоря́я напа́стей же и скорбе́й тму́ всегда́,* святи́телю Нико́лае,* приста́нище ти́хое, въ не́же притека́юще* треволне́ньми житія́ одержи́міи спаса́ются,* Христа́ моли́* душа́мъ на́шимъ да́ти ве́лію ми́лость.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Ра́дуйся, ре́вности Боже́ственныя испо́лнивыйся* и наведе́нія зла́ изба́вль непра́ведно хотя́щихъ умре́ти* предста́ніемъ стра́шнымъ и сна́ запреще́ньми,* исто́чниче, источа́яй въ Мѵ́рѣхъ, Нико́лае, мѵ́ро бога́тно* и ду́ши напоя́ющее,* смра́ды же страсте́й отгоня́ющее,* ме́чь, пле́велы пре́лести посѣка́ющій,* лопа́та, развѣва́ющая Аріева пле́вельная уче́нія.* Христа́ моли́ низпосла́ти* душа́мъ на́шимъ ве́лію ми́лость.

Сла́ва, гла́съ 6. Іоа́нна мона́ха:

Человѣ́че Бо́жій и вѣ́рный ра́бе, слуго́ Госпо́день, му́жу жела́ній, сосу́де избра́нный, сто́лпе и утвержде́ніе Це́ркве, Ца́рствія наслѣ́дниче, не премолчи́, вопія́ за ны́ ко Го́споду.

И ны́нѣ, гла́съ то́йже. Византíево:

Безневѣ́стная Дѣ́во, отку́ду пришла́ еси́? Кто́ роди́вый Тя́? Кто́ и ма́ти Твоя́? Ка́ко Зижди́теля но́сиши на руку́? Ка́ко не растли́лася еси́ утро́бою? О, вели́кихъ, пресла́вныхъ на Тебѣ́ стра́шныхъ та́инствъ, на земли́ соверша́емыхъ, зри́мъ, Всесвята́я! И предуготовля́емъ досто́йный Тебѣ́ до́лгъ, на земли́ верте́пъ, и отъ небе́съ про́симъ пода́ти звѣзду́, и волсви́ же прихо́дятъ отъ восто́ковъ земли́ къ за́падомъ ви́дѣти человѣ́ческое Спасе́ніе, во я́слѣхъ пелена́ми повива́емое.

На благослове́ніи хлѣ́бовъ тропа́рь, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.

Зри: А идѣ́же нѣ́сть всено́щнаго бдѣ́нія.
На вели́цѣй вече́рни, по Ны́нѣ отпуща́еши.., глаго́лемъ тропа́рь еди́ножды.
Сла́ва, и ны́нѣ, богоро́диченъ воскре́сенъ.



НА УТРЕНИ,
На Бо́гъ Госпо́дь, тропа́рь: Пра́вило вѣ́ры.., два́жды. Сла́ва и ны́нѣ, богоро́диченъ: Еже отъ вѣ́ка утае́нное...

По 1-мъ стихосло́віи сѣда́льны, гла́съ 1. Подо́бенъ: Гро́бъ Тво́й.

Въ Мѵ́рѣхъ живы́й чу́вственнѣ, іера́рше, мѵ́ромъ разу́мно духо́внымъ яви́лся еси́ пома́занъ, о́тче Нико́лае. Тѣ́мже мѵ́ры чуде́съ твои́хъ мíръ облагово́нилъ еси́, мѵ́ро приснотеку́щее пролива́я, мѵ́рными твои́ми благово́нными словесы́ и па́мятію твое́ю.

Сла́ва:

Облистава́еши на земли́ чуде́съ луча́ми, Нико́лае му́дре, и дви́жеши вся́къ язы́къ на сла́ву же и хвалу́ на земли́ тя́ Просла́вльшаго, Его́же моли́ вся́кія ну́жды изба́витися, па́мять твою́ вѣ́рою и любо́вію почита́ющимъ, отце́мъ избра́ніе.

И ны́нѣ, богоро́диченъ:

Всѣ́хъ Творца́, Бо́га же и Содѣ́теля, Всенепоро́чная Чи́стая, Ду́хомъ Боже́ственнымъ въ ложесна́хъ зачала́ еси́, и тлѣ́нія кромѣ́ родила́ еси́, Его́же сла́вяще, Тя́ воспѣва́емъ Дѣ́во, я́ко пала́ту Всецаря́ и мíра защище́ніе.

По 2-мъ стихосло́віи сѣда́льны, гла́съ 4. Подо́бенъ: Яви́лся еси́ дне́сь.

Вѣ́рнымъ предста́тельствуеши, покрыва́я, соблюда́я ты́я, блаже́нне, вся́кія ско́рби избавля́я я́вѣ, іера́рховъ краснѣ́йшая сла́во и хвало́, Нико́лае преподо́бне.

Сла́ва, гла́съ 8. Подо́бенъ: Прему́дрости.

Исто́чникъ чуде́съ, о́тче му́дре, пріе́мъ отъ Го́спода, всѣ́мъ вѣ́рнымъ источа́еши, блаже́нне, медото́чныя во́ды: я́ко бо па́стырь сы́й и проповѣ́дникъ вѣ́ры, и́стиннаго Па́стыря словеса́ соблю́лъ еси́. Тѣ́мже, дерзнове́ніе къ Нему́ имѣ́я, человѣ́ки спа́слъ еси́ отъ сме́рти, Нико́лае, іера́рше блаже́нне, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

И ны́нѣ, богоро́диченъ:

Въ ти́ну впа́дъ грѣхо́въ, и нѣ́сть мнѣ́ постоя́нія, лю́тѣ потопи́ мя бу́ря прегрѣше́ній; но я́ко ро́ждшая Сло́во, еди́наго Человѣколю́бца, на мя́, раба́ Твоего́, при́зри и изба́ви мя́ вся́каго грѣха́, и страсте́й душетлѣ́нныхъ, и вся́каго озлобле́нія лука́ваго убíйцы, Богоро́дице Неискусому́жная, моли́ Христа́ Бо́га, грѣхо́въ оставле́ніе да́ти мнѣ́, Тя́ бо наде́жду и́мамъ, ра́бъ Тво́й.

По поліеле́и сѣда́ленъ, гла́съ 5. Подо́бенъ: Собезнача́льное Сло́во.

Прему́драго іера́рха восхва́лимъ, я́ко те́пла въ бѣда́хъ и въ ско́рбехъ су́ща отъ Бо́га помо́щника и защи́тника, вси́ Никола́я, вѣ́рніи, богоно́снаго благоче́стно: мо́лится бо ко Го́споду о вѣ́рою творя́щихъ и пою́щихъ Боже́ственную па́мять его́.

Сла́ва, гла́съ 4. Подо́бенъ: Ско́ро предвари́.

Предста́тель теплѣ́йшій Це́ркве Христо́вы показа́лся еси́, Нико́лае, и ересе́й безбо́жная уче́нія разруша́я со дерзнове́ніемъ, и пра́вило показа́лся еси́ всѣ́мъ Правосла́вія, о всѣ́хъ моля́ся, послѣ́дующихъ твои́мъ Боже́ственнымъ уче́ніемъ и наказа́ніемъ.

И ны́нѣ, богоро́диченъ:

Ско́ро пріими́, Влады́чице, моли́твы на́ша, и сія́ принеси́ Твоему́ Сы́ну и Бо́гу, Госпоже́ Всенепоро́чная, изба́ви обстоя́ній къ Тебѣ́ притека́ющія, сокруши́ кова́рства и низложи́ де́рзость вооружа́ющихся безбо́жныхъ, Пречи́стая, на рабы́ Твоя́.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе Іоа́нна, зача́ло 36.

По 50-мъ псалмѣ́ стихи́ра, гла́съ 6:

Наслѣ́дниче Бо́жій, соприча́стниче Христо́въ, служи́телю Госпо́день, свя́те Нико́лае, по и́мени твоему́ та́ко и житіе́ твое́: спросія́ бо сѣди́нѣ ра́зумъ, свидѣ́тельствоваше свѣ́тлость лица́ твоего́ душе́вное незло́біе, извѣ́ствоваше кро́тость сло́ва молчали́вое. Жи́знь твоя́ сла́вна и успе́ніе со святы́ми, моли́ о душа́хъ на́шихъ.

Кано́нъ Богоро́дицы со ирмосо́мъ на 6 и свята́го два́ кано́на на 8.

Кано́нъ Богоро́дицы, гла́съ 1.
Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою, и спа́сшему Изра́иля, я́ко просла́вися.

Прему́дрости бе́здну ро́ждшая, ка́пли му́дрости ми́ исто́чникъ благода́тно точа́щій, Чи́стая, низпосли́, пѣсносло́вити благода́тей Твои́хъ пучи́ну.

Пою́ Тя, Всепѣ́тая, Юже воспѣва́ютъ а́нгеловъ чи́ни, я́ко Бо́га ро́ждшую препѣ́таго, Его́же вся́ тва́рь воспѣва́етъ, я́ко просла́вися.

Инъ кано́нъ свята́го, его́же краегране́сіе: Тебѣ́, Нико́лае, воспѣва́ю Боже́ственное пѣ́ніе. Творе́ніе Ѳеофа́ново. Гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Вѣнцено́сецъ престо́лу Христо́ву, прему́дре Нико́лае, предстоя́ со а́нгельскими во́инствы, просвѣще́ніе ми́ да́руй, озаря́ющее души́ моея́ омраче́ніе, я́ко да восхвалю́, ра́дуяся, твою́, всеблаже́нне, па́мять.

Прославля́яй вся́ Госпо́дь Того́ сла́вящія, тя́ вѣ́рнымъ прибѣ́жище даде́, напа́стей избавля́юща притека́ющія къ твоему́ кро́ву, Нико́лае, и призыва́ющія тя́ вѣ́рою и любо́вію, пресла́вне.

Богоро́диченъ: Сравни́тися жела́ніе ми́ вложи́въ змíй вселука́вый, Содѣ́телю, я́ко плѣ́нника, восхи́ти. Тобо́ю же, Всечи́стая, воззва́нъ бы́хъ, обожи́вся и́стиннѣйше: Ты́ бо, о Богома́ти, мене́ Обожи́вшаго родила́ еси́.

Другíй кано́нъ по алфави́ту, кромѣ́ тро́ичновъ и богоро́дичновъ. Гла́съ 1.
Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Недоумѣ́ннымъ язы́комъ и устна́ми, похвале́ніе ма́лое и моле́ніе принести́ твоему́, Нико́лае, пріидо́хъ богоподража́нному преизя́ществу; но́, я́ко богатода́вецъ, Спа́са и Бо́га ми́лостива пода́ждь ми́.

Человѣ́къ сы́й небе́сный, равноа́нгеленъ на земли́ яви́лся еси́, вдо́въ защи́тникъ гото́вый, и утружда́емыхъ отмсти́тель, и всѣ́мъ скорбя́щимъ въ бѣда́хъ помо́щникъ, о́тче Нико́лае.

Сказу́етъ вся́ подсо́лнечная, Нико́лае треблаже́нне, чуде́съ твои́хъ добродѣ́телей пучи́ну: ни́щіи — предста́теля, и сироты́ и вдовы́ — пита́теля, и слѣпíи — путевожда́, вси́ же — побо́рника.

Тро́иченъ: Тро́ицу честву́ю несозда́нную: Отца и Сы́на со Ду́хомъ — существо́ про́сто, Божество́, естество́ несѣко́мое суще́ственнѣ, три́ ѵпоста́си, раздѣля́я ли́чно и по ѵпоста́си.

Богоро́диченъ: Безсѣ́менно Сло́во зачала́ еси́, еди́наго отъ Тро́ицы, Всенепоро́чная, и Сего́ пло́тію родила́ еси́, пребы́вши по рождествѣ́ Дѣ́ва, я́ко и пре́жде. Сего́, я́ко Сы́на Твоего́ и Бо́га, о на́съ при́сно моли́.

Катава́сія: Христо́съ ражда́ется...

Пѣ́снь 3.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Небесъ чистѣ́йшее Царе́во оби́телище, благода́тно ды́шущій вои́стинну и благово́нный ра́й, наде́жду христіа́нъ, Богороди́тельницу мою́ воспѣва́ю.

Сло́вомъ Сло́во породила́ еси́, сло́вомъ все́ къ существу́ приве́дшаго слове́сное естество́, ку́пно и безслове́сное, безслове́сія избавля́ющаго человѣ́ки, Всеблагослове́нная.

Инъ.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Нико́лае блаже́нне, Влады́ки и́скренній учени́къ ты́ бы́въ, спаса́еши къ тебѣ́ притека́ющія отъ лю́тыхъ бѣ́дъ и сме́рти го́рькія.

Очи́сти рабы́ Твоя́, грѣхо́въ оставле́ніе, я́ко бла́гъ, да́руя, Никола́я, Твоего́ уго́дника, я́же къ Тебѣ́ хода́тайствы, Многоми́лостиве.

Богоро́диченъ: Утоли́ смуще́ніе души́ моея́, Пречи́стая, и жи́знь окорми́, Всесвята́я, Бо́га ро́ждшая, въ Не́мже утверди́ся се́рдце мое́.

Инъ.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Скрижа́ль въ се́рдцы стяжа́въ, богому́дре, мно́гихъ добродѣ́телей, напи́сану безсме́ртнымъ и пречи́стымъ пе́рстомъ Христа́ Бо́га, Нико́лае, па́че ме́да и со́та сла́дость то́чиши изъ усте́нъ твои́хъ.

Показа́ благода́ть на тебѣ́ пресла́внѣ чудеса́, Нико́лае: чи́стое бо житіе́ твое́, вои́стинну зла́та свѣтлѣ́йши, облиста́етъ мра́чныя ду́ши заре́ю Боже́ственнаго Ду́ха.

Живе́ши и по сме́рти, во снѣ́хъ я́вѣ явля́яся, и ю́ноши отъ сме́рти пресла́вно изба́вилъ еси́, вопія́ я́вѣ царю́: не оби́ди муже́й, су́етною за́вистію оклевета́нныхъ.

Тро́иченъ: Ми́лостива бу́ди мнѣ́, Всесвята́я Тро́ице, Бо́же на́шъ, безмѣ́рными прегрѣше́ніи оскверни́вшему житіе́, Отче, Сы́не и Ду́ше Живы́й, соблюда́ющи мя́ отвсю́ду, и при́сно неуя́звленна отъ ско́рби.

Богоро́диченъ: Дае́ши, Богоро́дице, спасе́нія наде́жду рабо́мъ Твои́мъ и въ ну́ждахъ, и напа́стехъ скороте́чными моли́твами соблюда́ти и помога́ти предста́ни: Ты́ бо еси́ похвала́ на́мъ, вѣ́рнымъ, Приснодѣ́во.

Катава́сія: Пре́жде вѣ́къ...

Сѣда́ленъ, гла́съ 8. Подо́бенъ: Прему́дрости.

Возше́дъ на высоту́ добродѣ́телей и Боже́ственными отту́ду, о́тче, озари́вся сія́ніи чуде́съ, пресвѣ́телъ вои́стинну яви́лся еси́ мíрови па́стырь, на́мъ — въ напа́стехъ сы́й предста́тель непобѣди́мь; тѣ́мже, пресла́вно врага́ побѣди́въ, лжу́ отгна́лъ еси́, и человѣ́ки спа́слъ еси́ отъ сме́рти, Нико́лае. Моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́.

Сла́ва, другíй сѣда́ленъ, гла́съ то́йже:

Рѣку́ исцѣле́ній, оби́льнѣ излива́ющую, и исто́чникъ тя́ чуде́съ неоску́дный показа́, Нико́лае, ми́лости бе́здна: тя́жкими бо неду́гами го́рцѣ дручи́міи и злоключе́ньми житія́ лю́тѣ му́чиміи вся́кія ско́рби цѣле́бную вои́стинну обрѣта́ютъ лѣчбу́, те́плое твое́ защище́ніе. Сего́ ра́ди вопіе́мъ ти́: моли́ся Христу́ Бо́гу прегрѣше́ній оставле́ніе дарова́ти пра́зднующимъ любо́вію святу́ю па́мять твою́.

И ны́нѣ, богоро́диченъ:

Яко Дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ — позна́ешися, внегда́ пріити́ вре́мени — пока́жешися. Сла́ва си́лѣ Твое́й, Го́споди.

Сме́рти у́бо вина́ земны́мъ Ева бы́сть совѣ́томъ змíя; Ты́ же, Дѣ́во Чи́стая, ро́ждшая сло́вомъ Сло́во, безсме́ртія и жи́зни Хода́таица яви́лася еси́. Тѣ́мже досто́йно пое́мъ Тя́.

Ду́хомъ проро́цы предзря́ще Тя́, Чи́стая, го́ру, две́рь, трапе́зу, святы́й киво́тъ, свѣ́щникъ, престо́лъ жи́зни, ста́мну и о́дръ, Бо́жію Ма́терь въ гада́ніихъ Тя́ прояви́ша, и́хже мы́ зри́мъ сбытіе́.

Инъ.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Прибли́жився чи́стѣ заря́мъ духо́внымъ, свѣтоно́сецъ бы́лъ еси́, мíра просвѣща́я концы́, всѣ́мъ предста́тельствуя и вся́ спаса́я вѣ́рою, къ тебѣ́ притека́ющія.

Избавля́я отъ сме́рти, я́ко яви́лся еси́ пе́рвѣе, Нико́лае, ю́ноши, преподо́бне. Та́ко и ны́нѣ мя́ спаси́ отъ вся́каго обстоя́нія, и напа́стей, и бѣ́дъ, всеблаже́нне.

Облиста́лъ еси́ добродѣ́телей сія́ньми, всеблаже́нне, подража́тель преизря́днѣйшій Твоего́ Влады́ки бы́въ, спаса́еши же, призыва́емь, благоговѣ́ніемъ и любо́вію тя́ сла́вящія.

Богоро́диченъ: На́йде на Тя́ Влады́ка тва́ри воплоща́емь, и спаса́я, я́ко благоутро́бенъ, всего́ мя́ человѣ́ка: тѣ́мже, вѣ́рніи, Богоро́дицу Тя́ сла́вимъ.

Инъ.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Именова́ніе твое́, еди́но вои́стинну призыва́емо, отъ всѣ́хъ вра́жіихъ совѣ́тъ ско́ро избавля́етъ зову́щія тебѣ́ те́плѣ, свяще́нне Нико́лае: я́ко пе́рвѣе воево́ды изба́вилъ еси́, спаси́ и на́съ отъ вся́каго лю́таго обстоя́нія.

Престо́лу предстоя́ Бо́жію, моли́ти прилѣ́жно, му́дре, не преста́й о всѣ́хъ на́съ, твои́хъ вѣ́рныхъ рабѣ́хъ, чу́дне Нико́лае, да огня́ вѣ́чнаго изба́вимся и отъ враго́въ, язы́ка лука́ваго и озлобле́нія.

Врачева́нія то́чиши всю́ду вѣ́рою къ тебѣ́ притека́ющимъ и отъ у́зъ избавля́еши вся́. Тѣ́мже печа́ль на́шу въ ра́дость преложи́ твои́ми богопрія́тными моли́твами, Нико́лае пресвѣ́тле, низлага́я го́рдость враго́въ на́шихъ.

Тро́иченъ: Безнача́льнаго Божества́ нача́ло Отца́, и Сы́на чту́, и Ду́ха почита́ю Всесвята́го, вся́ческихъ вседѣ́тельное, еди́нственное, несѣко́мое, треми́ характи́ры и ли́цы раздѣля́емое при́сно, еди́но Ца́рство нераздѣ́льное.

Богоро́диченъ: Ты́ вои́стинну па́че земны́хъ и небе́сныхъ честнѣ́йши еди́на еси́, Богороди́тельнице: всѣ́хъ бо Творца́ во утро́бѣ зачала́ еси́, пло́тію ве́щною одѣ́яна, ро́ждши безъ сѣ́мене. О, новолѣ́пнаго зрѣ́нія!

Катава́сія: Же́злъ изъ ко́рене Іессе́ева...

Пѣ́снь 5.

Ирмо́съ: Свѣ́тлый на́мъ возсія́й Свѣ́тъ Присносу́щный, у́тренюющимъ о судьба́хъ за́повѣдей Твои́хъ, Влады́ко Человѣколю́бче, Христе́, Бо́же на́шъ.

Яко киво́тъ, Честна́я, свяще́нія, и я́ко огнеобра́зный престо́лъ свя́тъ, и я́ко пала́та освяще́нна, Влады́чице, вмѣсти́ла еси́ Бо́га Вседержи́теля.

Ма́терь неискусому́жная въ дѣ́вахъ, Ты́ па́ки Дѣ́ва въ ма́терехъ, еди́на Пречи́стая, яви́лася еси́: Бо́га бо неизрече́нно родила́ еси́, естество́ воздаю́щаго.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Боголѣ́пнымъ житіе́мъ, треблаже́нне, просвѣща́емь, осужде́нныя непра́веднымъ изрече́ніемъ умре́ти, предста́въ, изба́вилъ еси́, Влады́цѣ Христу́ зову́щія: ино́го бо, ра́звѣ Тебе́, бо́га не зна́емъ.

На небесѣ́хъ присносу́щную сла́ву ны́нѣ зря́, и неизглаго́ланныя и боже́ственныя зари́ свѣтлѣ́йшими наслажда́яся сія́ніи, покры́й мя́ предста́тельствомъ твои́мъ, преподо́бне, уго́дниче Христо́въ всече́стне.

Богоро́диченъ: Да Тво́й взы́щеши о́бразъ, погребе́нный страстьми́, Спа́се, небе́сныхъ утаи́вся си́лъ, вопло́щься изъ Дѣ́вы, яви́лся еси́ Тебѣ́ зову́щимъ: ино́го, ра́звѣ Тебе́, Бо́га не зна́емъ.

Инъ.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Проповѣ́дуетъ твоя́, о́тче, чудеса́, ны́нѣ Мѵ́ръ, велича́йшая митропо́лія и Ликíйская епа́рхія, и вся́ оте́чествія твоя́ чудодѣ́йства, и́миже вся́ отъ болѣ́зней и скорбе́й избавля́еши, богоблаже́нне Нико́лае.

Пита́тель вдо́въ и оте́цъ сиро́тъ, помо́щникъ су́щимъ въ ско́рбехъ всеизря́днѣйшій, пла́чущимъ утѣше́ніе, па́стырь и путево́ждь всѣ́хъ блудя́щихъ, Нико́лае, сы́й, и на́съ твои́ми моли́твами отъ бѣ́дъ изба́ви.

Преста́вился еси́ отъ земли́ къ невеще́ственнымъ оби́телемъ, идѣ́же зри́ши добро́ту неизрече́нную Христо́ву, и а́нгельскимъ во́инствомъ собесѣ́дникъ яви́лся еси́. Тѣ́мже, со апо́столы и съ му́ченики лику́я, прилѣ́жно Влады́цѣ всѣ́хъ, о́тче Нико́лае, о на́съ моли́ся.

Тро́иченъ: Собезнача́льная Три́, единопресто́льная, нераздѣ́льнаго же еди́наго Божества́ сла́влю самовла́стная ли́ца я́вѣ, Имже изъ не су́щаго приведо́хся во е́же бы́ти, со а́нгелы зовы́й: свя́тъ, свя́тъ, свя́тъ еси́, Го́споди.

Богоро́диченъ: Человѣ́комъ спасе́ніе всѣ́мъ и упова́ніе, я́же предваря́ющи еди́на и спаса́ющи, помози́ и ны́нѣ на́мъ, вопію́щимъ Тебѣ́, Чи́стая, и призыва́ющимъ Тя́ при́сно во обстоя́ніи лю́тыхъ: предста́тельницы бо ины́я, ра́звѣ Тебе́, по Бо́зѣ не и́мамы.

Катава́сія: Бо́гъ Сы́й ми́ра...

Пѣ́снь 6.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.

Заступле́ніе вѣ́рныхъ и печа́льныхъ ра́достное весе́ліе, ра́достію обогати́ духо́вною рабы́ Твоя́, жела́ющія заступле́нія Твоего́.

Не́бо слове́сное, хра́мъ пречи́стый, святы́й киво́тъ, краснѣ́йшій Бо́жій ра́й, въ не́мже дре́во жи́зни моея́, да пое́тся.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Иже побѣ́ды, Нико́лае, вѣне́цъ на твое́мъ версѣ́ досто́йно положи́ся, я́ко побѣди́тель у́бо изря́днѣйшій, тя́ призыва́ющія спаси́.

Умерщвле́на мя́, блаже́нне, прегрѣше́ньми и страсте́й треволне́ньми погружа́ема, яви́вся, спаси́ ко приста́нищу Боже́ственныя во́ли.

Богоро́диченъ: На Тя́ наде́жды возложи́хъ, Ма́ти Приснодѣ́во, спасе́нія моего́, и Тя́ предста́тельницу полага́ю жи́зни, тве́рду же и непоколеби́му.

Инъ.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Но́вый яви́лся еси́ Авраа́мъ, Нико́лае, я́ко единоро́дна бо сы́на, приве́лъ еси́ ума́ Влады́цѣ твоему́, безкро́вныя же́ртвы принося́ при́сно. Отону́дуже благослови́лся еси́, я́ко страннолю́бецъ, о́тче, и Тро́ицы бы́лъ еси́ оби́тель Боже́ственна и непоро́чна.

Стра́нна и ужа́сна содѣва́еши чудеса́, Нико́лае, по все́й земли́ и въ мо́ри дале́че бѣ́дствующимъ скороте́чными моли́твами предста́тельствуя, немощны́мъ вра́чь и ни́щимъ пита́тель, побѣ́ды на враги́ тезоимени́тъ лю́демъ вѣ́рнымъ явля́яся.

Окомъ у́мнымъ прови́дя бу́дущая, уче́ній пра́выхъ напо́лнилъ еси́ вся́ концы́: Единосу́щна Отцу́ Сы́на возвѣща́я на́мъ, Аріево неи́стовство потреби́лъ еси́, сто́лпъ правосла́вныя вѣ́ры, честна́я твоя́ предложи́въ исправле́нія.

Тро́иченъ: Чту́ и почита́ю Тро́ицу Нераздѣ́льную, треми́ ли́цы раздѣля́емую при́сно, соединя́емую же существо́мъ и естество́мъ, я́ко еди́но нача́ло, Отца́, и Сы́на, и Ду́ха Свята́го, всѣ́ми держа́вно влады́чествующую и вся́ соблюда́ющую, я́ко хо́щетъ.

Богоро́диченъ: Ве́сь вопло́щься во утро́бѣ Твое́й, Пречи́стая, Христо́съ Бо́гъ, безъ сѣ́мене роди́ся: не стерпѣ́ бо Свои́хъ ру́къ созда́ніе зрѣ́ти, отъ льсти́ваго му́чимо, пріи́де рабозра́чнымъ о́бразомъ человѣ́ческій ро́дъ изба́вити.

Катава́сія: Изъ утро́бы Іо́ну...

Конда́къ, гла́съ 3. Подо́бенъ: Дѣ́ва дне́сь.

Въ Мѵ́рѣхъ, свя́те, священнодѣ́йствитель показа́лся еси́, Христо́во бо, преподо́бне, Ева́нгеліе испо́лнивъ, положи́лъ еси́ ду́шу твою́ о лю́дехъ твои́хъ, и спа́слъ еси́ непови́нныя отъ сме́рти. Сего́ ра́ди освяти́лся еси́, я́ко вели́кій таи́нникъ Бо́жія благода́ти.

Икосъ:

Воспои́мъ ны́нѣ святи́теля пѣ́сньми, мѵ́рскимъ лю́демъ па́стыря и учи́теля, да моли́твами его́ просвѣти́мся: се́ бо яви́ся чи́стъ ве́сь, нетлѣ́ненъ ду́хомъ, Христу́ принося́ же́ртву непоро́чну, чи́сту, Бо́гу благопрія́тну, я́ко святи́тель, очище́нъ и душе́ю и тѣ́ломъ. Тѣ́мже сы́й и́стинно Це́ркве предста́тель и побо́рникъ сея́, я́ко вели́кій таи́нникъ Бо́жія благода́ти.

Пѣ́снь 7.

Ирмо́съ: Пе́щь, Спа́се, ороша́шеся, о́троцы же, лику́юще, поя́ху: отце́въ Бо́же, благослове́нъ еси́.

Высоча́йшій, не́бо Тя́ одушевле́нное, черто́гъ же, Чи́стая, благода́тно окруже́нъ, златообра́зную порфи́ру и ра́й показа́.

Утверди́ ума́ моего́ враще́ніе, помышле́ніе мяте́жно укрѣпи́ на недви́жимомъ ка́мени, покро́вомъ Твои́мъ, Ма́ти Дѣ́во.

Инъ.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Острому искуше́нію впадо́хъ, лю́тѣ пострѣка́емь, и ко врато́мъ а́да прибли́жихся, скорбьми́ поража́емь, спаси́ мя моли́твами твои́ми, блаже́нне, и возста́ви, пою́ща: благослове́нъ еси́, Бо́же оте́цъ на́шихъ.

Незаходи́маго свѣ́та невеще́ственными луча́ми облиста́емь, су́щія во тмѣ́ скорбе́й озло́бленныя исхи́ти и къ просвѣще́нію весе́лія наста́ви, пою́щія: благослове́нъ еси́, Бо́же оте́цъ на́шихъ.

Богоро́диченъ: Моли́ Христа́, Сы́на Твоего́ и Бо́га, Дѣ́во Богороди́тельнице, прода́нныя лю́тыми прегрѣше́ньми и ле́стьми зміи́ными кро́вію Его́ честно́ю изба́витися, пою́щимъ: благослове́нъ еси́, Бо́же оте́цъ на́шихъ.

Инъ.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Вся́кихъ лю́тыхъ неду́гъ вра́чь всеизря́днѣйшій, о́тче Нико́лае, яви́вся, души́ моея́ не́мощь исцѣли́въ, пода́ждь ми́ благоздра́віе, вопи́ти: отце́въ Бо́же, благослове́нъ еси́.

Изба́вивъ дре́вле воево́ды отъ сме́рти, свя́те, и ты́я воздви́глъ еси́ пѣ́ти и сла́вити Спа́са Христа́ съ вѣ́рою те́плою, и́же и взыва́ху: отце́въ Бо́же, благослове́нъ еси́.

Прему́дрости ча́ши прибли́жився та́инственно, устна́ми твои́ми, о́тче Нико́лае, ка́пли одожде́нія поче́рплъ еси́, па́че ме́да и со́та, лю́демъ повелѣва́я вопи́ти: отце́въ Бо́же, благослове́нъ еси́.

Тро́иченъ: Тро́ице, Тя́ воспѣва́емъ, еди́нице трисія́тельнѣйшая, единосу́щная, Отче, Сы́не и Ду́ше Святы́й, въ Ни́хже вси́ крести́вшеся, воспѣва́емъ: отце́въ Бо́же, благослове́нъ еси́.

Богоро́диченъ: Яко всѣ́хъ тва́рей вы́шши еси́, Богоро́дице, моли́ся Твоему́ Сы́ну и Бо́гу, изба́витися му́ки честву́ющимъ Тя́ вои́стинну и сла́вящимъ: отце́въ Бо́же, благослове́нъ еси́.

Катава́сія: Отроцы, благоче́стію совоспита́ни...

Пѣ́снь 8.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Яко одушевле́нный черто́гъ и вдохнове́нная червлени́ца, хлами́да червленоша́рная всѣ́хъ Царя́ яви́лася еси́, Дѣ́во, и порфи́ра, изъ нея́же пло́ть сопросія́ Богочеловѣ́ка Сло́ва.

Зачала́ еси́, Пречи́стая, всю́ тва́рь го́рстію содержа́щаго, я́ко Зижди́теля и Бо́га, неизрече́нно, непости́жно на́съ ра́ди по на́мъ Человѣ́ка бы́вша и е́же бѣ́ не отсту́пльша.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Яко бла́гъ и сострада́теленъ во глубинѣ́ напа́стей лю́тѣ содержи́мыя свободи́, блаже́нне Нико́лае, отъ содержа́щихъ лю́тыхъ, разрѣше́ніе подая́ моли́твами твои́ми я́же ко Спа́су Христу́, священнотаи́нниче.

Тайново́ждь су́щихъ па́че ума́, святы́хъ служи́тель и небе́сныхъ сы́й, богому́дре, архіере́й же вѣ́ренъ, прегрѣше́ній оставле́нія проси́ отъ Спа́са на́шего, священноявле́нне.

Богоро́диченъ: Изнемога́етъ мо́й ны́нѣ у́мъ, во глубину́ впа́дъ безче́стія, я́ко отвсю́ду разли́чными объя́тъ е́смь злы́ми; но Ты́, Дѣ́во, исцѣли́, безстра́стія свѣ́томъ одѣва́ющи.

Инъ.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Чи́ни патріа́рховъ и апо́столовъ, и священному́чениковъ собо́ри, и проро́ковъ сосло́віе, ве́сь собо́ръ по́стническій блажа́тъ боже́ственное житіе́ твое́, съ ни́миже и мы́ вопіе́мъ: да благослови́тъ тва́рь вся́ Го́спода и превозно́ситъ Его́ во вѣ́ки.

Высоча́йшій Всецарю́, великодержа́вне, моли́твами преподо́бнаго па́стыря жи́знь умири́ всѣ́хъ, Сло́ве, христіа́нъ, побо́рствуя на ва́рвары Благочести́вому Импера́тору на́шему, да съ ни́мъ Тебѣ́, Христу́, зове́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Свѣ́томъ просвѣ́щся непристу́пнымъ, о́тче, ду́ши су́щихъ въ ско́рби озаря́еши, разоря́я всю́ мра́чную тму́ напа́стей, облиста́въ же весе́ліемъ сердца́ на́ша. Имиже далечесія́тельно просвѣща́еми, вопіе́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Тро́иченъ: Живо́тъ и Животы́ и еди́нъ и три́ свѣ́ты, Тро́ицу вѣ́рно воспѣва́емъ, — оте́ческимъ послѣ́дующе Боже́ственнымъ и́стинно уче́ніемъ, — Отца, Сы́на, Ду́ха Свята́го. Съ ни́миже благоче́ствующе, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Богоро́диченъ: Чу́до страннолѣ́пно купина́ о́бразъ прообрази́, Чи́стая Отрокови́це, горя́щи неопа́льна дре́вле на горѣ́ Сина́йстѣй, та́йну Рождества́ Твоего́ пропису́ющи: о́гнь бо, въ Тя́ Божества́ всели́выйся, невре́дну Тя́ соблюде́. Его́же воспѣва́емъ во вся́ вѣ́ки.

Катава́сія: Чу́да преесте́ственнаго...

Пѣ́снь 9.

Ирмо́съ: Живопріе́мный исто́чникъ приснотеку́щій, свѣтоно́сный свѣти́льникъ благода́ти, хра́мъ одушевле́нный, сѣ́нь пречи́стую, небесе́ и земли́ простра́ннѣйшую, Богоро́дицу, вѣ́рніи, велича́емъ.

Струю́ благода́ти Твоея́ источи́ ми, пла́менемъ злоключе́ній опаля́ему и лю́тѣ истаява́ему, исто́чниче, благода́тно точа́щій, ро́ждшая рѣку́ благода́тей, изъ нея́же пія́й вжа́ждется никогда́же.

Яко Жениха́ Тя́ кра́сный черто́гъ, я́ко Влады́чню пала́ту одушевле́нну, я́ко порфи́ру всезлату́ю, я́ко краснѣ́йшее оби́телище Христо́во, Влады́чице всѣ́хъ, умоля́ющаго Тя́ спаси́ мя.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Свѣща́ми благода́ти, богому́дре, просвѣща́емь, и свѣти́льникъ благоче́стія я́вѣ бы́лъ еси́, су́щія въ напа́стехъ спаса́еши, и су́щія во глубинѣ́ морстѣ́й избавля́еши, и пита́еши а́лчущія пресла́вно, всеблаже́нне.

Иже въ раи́ сла́дости ны́нѣ водворя́яся и неизрече́нную сла́ву я́сно зря́, отъ небе́сныхъ кру́гъ пѣвцы́ твоя́ назира́еши, отъ страсте́й избавля́я, богоно́се, всеблаже́нне.

Богоро́диченъ: Прему́дрость, и Си́лу, и Сло́во ѵпоста́сное Отчее, Богома́ти Чи́стая, родила́ еси́, отъ Твои́хъ пречи́стыхъ крове́й сво́й хра́мъ пріи́мшую и Сему́ по соедине́нію соедини́вшую нераздѣ́льно.

Инъ.

Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Ликовству́емъ духо́вно, вси́ празднолю́бцы, небеса́, весели́теся, го́ры же и хо́лми, це́ркви, и дѣ́въ ли́цы, и по́стниковъ свѣ́тлость, въ па́мяти всеблаже́ннаго, въ не́йже, соше́дшеся, Спа́са велича́емъ.

Да пою́тъ пѣ́сньми непреста́нно вси́ концы́, похва́льными вѣнцы́ ве́рхъ Никола́я украша́юще я́вѣ, уго́дника Христа́ Бо́га, Его́же моли́твами отъ страсте́й же и бѣ́дъ да изба́вимся.

Яко досто́йное пріими́ пѣ́ніе, Нико́лае, ма́лаго труда́ сего́, я́коже Христо́съ прія́тъ вдовы́ два́ ле́пта. Не возгнуша́йся окая́ннаго страстьми́, не гордя́ся бо, треблаже́нне, дерзну́хъ.

Тро́иченъ: Соединя́ется единосу́щною во́лею Тро́ица, раздѣля́ется же па́ки ли́чно нераздѣ́льнѣ, соблюда́ющи держа́ву при́сно, Оте́цъ, Сы́нъ и Ду́хъ Живы́й, еди́нъ Тріѵпоста́сный Бо́гъ, Его́же велича́емъ.

Богоро́диченъ: Потреби́ся вся́ка печа́ль Рождество́мъ Твои́мъ, и отъя́тъ Госпо́дь рыда́ніе, и пла́чь, и вся́ку сле́зу отъ вся́каго лица́ земноро́дныхъ, Чи́стая Богоро́дице Неискусобра́чная. О Тебѣ́ и мы́ до́лги исполня́емъ.

Катава́сія: Та́инство стра́нное...

Свѣти́ленъ. Подо́бенъ: Жены́, услы́шите.

Вели́каго архипа́стыря и іера́рха вси́, предсѣда́теля Мѵрликíйскаго Никола́я восхва́лимъ: мно́ги бо му́жи спасе́, непра́ведно умре́ти иму́щія, и царю́ явля́ется со Авла́віемъ во снѣ́, рѣша́ непра́ведный су́дъ.

Сла́ва:

Вельми́ тя́ просла́ви въ чудесѣ́хъ Госпо́дь и жи́ва и по концѣ́, іера́рше Нико́лае: кто́ бо отъ любве́ вѣ́ры то́кмо свято́е твое́ и́мя призове́тъ и не а́біе услы́шанъ, те́пла тя́ предста́теля обрѣта́етъ?

И ны́нѣ, богоро́диченъ:

Му́дрость ѵпоста́сную, и Сло́во пресу́щественное, и Врача́ всѣ́хъ Христа́ ро́ждши, Дѣ́во, гное́нія и я́звы души́ моея́ исцѣли́ лю́тыя и многовре́менныя и се́рдца моего́ стра́стная помышле́нія умертви́.

На хвали́техъ стихи́ры, на 6, гла́съ 1. Самогла́сны:

Воззрѣ́въ неукло́нно на высоту́ ра́зума* и узрѣ́въ неявле́нно прему́дрости глубину́,* твои́ми уче́ньми мíръ обогати́лъ еси́, о́тче.* О на́съ при́сно моли́ся Христу́,* святи́телю Нико́лае.

Человѣ́че Бо́жій, и вѣ́рный уго́дниче,* и строи́телю Того́ та́инъ,* и му́жу жела́ній духо́вныхъ,* сто́лпе одушевле́нный,* и вдохнове́нный о́бразъ,* я́ко Боже́ственное бо сокро́вище* тя́ Мѵ́рская Це́рковь, чудя́щися, прія́ла е́сть* и моли́твенника о душа́хъ на́шихъ.

Ины стихи́ры, гла́съ то́йже. Подо́бенъ: Небе́сныхъ чино́въ.

Церко́вныя цвѣ́ты облета́я,* я́коже птене́цъ Вы́шняго гнѣзда́ а́нгельскаго,* Нико́лае треблаже́нне,* зове́ши при́сно къ Бо́гу о всѣ́хъ на́съ,* и́же въ ну́ждныхъ бѣда́хъ и искуше́ніихъ,* и избавля́еши моли́твами твои́ми.

Свяще́нныя оде́жды красоту́* дѣ́ятельными содѣ́лалъ еси́ добродѣ́тельми свѣтлѣ́йшую,* о́тче богоно́се.* Тѣ́мже на́мъ священнодѣ́йствуеши ди́вная,* сла́вныхъ чуде́съ священнодѣ́телю,* лю́тыхъ избавля́я ны́.

Неви́димыхъ добро́ты проходя́,* стра́шную о́ну разумѣ́лъ еси́* сла́ву святы́хъ, свя́те.* Тѣ́мже на́мъ небе́сная словеса́* присноживо́тныхъ о́нѣхъ видѣ́ній явля́еши,* свяще́ннѣйшій о́тче.

Яко во снѣ́ предста́лъ еси́ благочести́вому царю́* и у́зники, о́тче, отъ сме́рти изба́вилъ еси́;* моли́ся непреста́нно,* я́ко да и ны́нѣ моли́твами твои́ми* изба́вимся отъ искуше́ній,* и бѣ́дъ, и болѣ́зней,* досто́йно благохва́лящіи тя́.

Сла́ва, гла́съ 5:

Востру́бимъ трубо́ю пѣ́сней, взыгра́емъ пра́зднственная и ликовству́емъ, ра́дующеся, въ моле́бное торжество́ богоно́снаго отца́. Цари́ и кня́зи да стеку́тся и и́же со́ннымъ стра́шнымъ явле́ніемъ царя́ препира́юща непови́нно держи́мыя три́ отпусти́ти воево́ды, да воспою́тъ. Па́стыріе и учи́теліе, До́браго Па́стыря подобноревни́тельна па́стыря, соше́дшеся, восхва́лимъ. Иже въ неду́зѣхъ — врача́, и и́же въ бѣда́хъ — изба́вителя, грѣ́шніи — засту́пника, ни́щіи — сокро́вище и и́же въ ско́рбехъ — утѣ́шителя, спу́тника — путеше́ствующіи, на мо́ри су́щіи — прави́теля, и вси́ вездѣ́ те́плѣ предваря́юща, вели́каго святи́теля восхваля́юще, си́це рце́мъ: пресвяты́й Нико́лае, предвари́, и изба́ви ны́ отъ настоя́щія бѣды́, и спаси́ ста́до твое́ моли́твами твои́ми.

И ны́нѣ, богоро́диченъ, подо́бенъ. Творе́ніе патріа́рха Ге́рмана:

Востру́бимъ трубо́ю пѣ́сней: прини́кши бо свы́ше, Всецари́ца Ма́ти Дѣ́ва благослове́ньми вѣнчава́етъ воспѣва́ющія Ю. Ца́ріе и кня́зи да стеку́тся, и Цари́цѣ да воспле́щутъ въ пѣ́снехъ, Царя́ ро́ждшей, и́же сме́ртію держи́мыя пе́рвѣе разрѣши́ти человѣколю́бно благоволи́вшаго; па́стыріе и учи́теліе, До́браго Па́стыря Пречи́стую Ма́терь, соше́дшеся, восхва́лимъ. Свѣ́щникъ златоза́рный, свѣтоно́сный о́блакъ, небе́съ простра́ннѣйшую, одушевле́нный киво́тъ, огнезра́чный Влады́чень престо́лъ, маннопріе́мную злату́ю ста́мну, затворе́нную Сло́ва две́рь, всѣ́хъ христіа́нъ прибѣ́жище, пѣ́сньми богогла́сными похваля́юще, си́це рце́мъ: пала́то Сло́ва, сподо́би смире́нныхъ на́съ небе́снаго Ца́рствія: ничто́же бо невозмо́жно хода́тайству Твоему́.

Славосло́віе вели́кое, [ектеніи́] и отпу́стъ.
Дае́тся же и еле́й бра́тіи отъ канди́ла свята́го, и ча́съ 1-й.



НА ЛИТУРГІИ,

Блаже́нна отъ кано́на 1-го, пѣ́снь 3-я и 2-го кано́на пѣ́снь 6-я. Проки́менъ, гла́съ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, [внегда́ моли́ти ми ся къ Тебѣ́]. Апо́столъ къ Евре́емъ, зача́ло 335. Аллилу́ія, гла́съ 4: Свяще́нницы Твои́ облеку́тся въ пра́вду, и преподо́бніи Твои́ возра́дуются. Ева́нгеліе Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 33 об. – 48.

/ Къ оглавленію раздѣла /


Наверхъ / Къ титульной страницѣ

0