Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Деке́мврія въ 5-й де́нь.
Преподо́бнаго и богоно́снаго отца́ на́шего Са́ввы Освяще́ннаго.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1. Подо́бенъ: Всехва́льніи му́ченицы.

Зри́тель бы́лъ еси́ умо́мъ мы́сленныхъ си́лъ,* я́ко дѣ́теленъ боже́ственныхъ слове́съ,* полага́я во твое́мъ се́рдцѣ,* въ не́мже и восхожде́нія,* я́ко лѣ́ствицу, утверди́лъ еси́,* преподо́бне Са́вво, о́тче на́шъ,* и ны́нѣ моли́ся* дарова́ти душа́мъ на́шимъ* ми́ръ и ве́лію ми́лость. [Два́жды.]

Са́вво преподо́бнѣйше,* твою́ изъ младе́нства возложи́лъ еси́ жи́знь Христу́ Бо́гу на́шему,* отъ Него́же укрѣпля́емь,* плотскíя стра́сти по́мыслу повину́лъ еси́,* ху́ждшее покаря́я лу́чшему.* Тѣ́мже моли́ся* дарова́ти душа́мъ на́шимъ* ми́ръ и ве́лію ми́лость.

Богому́дре о́тче на́шъ,* свѣти́льникъ яви́лся еси́ велича́йшій,* просвѣща́я подсо́лнечную чуде́съ сія́ньми* и боже́ственными дѣ́лы.* Тѣ́мже по успе́ніи* Незаходи́мый тя́ Свѣ́тъ прія́тъ.* И ны́нѣ моли́ся* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 2:

Преподо́бне о́тче, изъ младе́нства добродѣ́тели прилѣ́жно обучи́вся, орга́нъ бы́лъ еси́ Свята́го Ду́ха, и, отъ Него́ пріе́мъ чуде́съ дѣ́йство, увѣща́лъ еси́ человѣ́ки преоби́дѣти сла́дкая. Ны́нѣ же, Боже́ственнымъ свѣ́томъ чистѣ́йше осіява́емь, просвѣти́ и на́ша мы́сли, Са́вво, о́тче на́шъ.

И ны́нѣ, богоро́диченъ:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Яви́лся еси́* отъ ма́тернихъ пеле́нъ,* богоно́се о́тче на́шъ,* освяще́нный сосу́дъ* и до́мъ Всесвята́го Ду́ха.

Сти́хъ: Честна́ предъ Го́сподемъ* сме́рть преподо́бныхъ Его́.

Нося́ на ра́мѣхъ твои́хъ* кре́стъ Госпо́день,* де́монская мечта́нія,* о́тче на́шъ Са́вво,* до конца́ истреби́лъ еси́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Ле́сти лука́выхъ де́моновъ* обличи́въ креста́ си́лою,* уясни́лъ же еси́* сла́ву Христо́ву,* Са́вво, о́тче на́шъ.

Сла́ва, и ны́нѣ, богоро́диченъ, подо́бенъ то́йже:

Влады́чице блага́я,* святы́я Твоя́ ру́ки* къ Сы́ну Твоему́ вознеси́,* душелюби́вому Содѣ́телю,* уще́дрити рабы́ Твоя́.

Тропа́рь, гла́съ 8:

Сле́зъ твои́хъ тече́ньми пусты́ни безпло́дное воздѣ́лалъ еси́, и и́же изъ глубины́ воздыха́ньми во сто́ трудо́въ уплодоноси́лъ еси́, и бы́лъ еси́ свѣти́льникъ вселе́ннѣй, сія́я чудесы́, Са́вво, о́тче на́шъ, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ:

Иже на́съ ра́ди рожде́йся [отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 5. Подо́бенъ: Преподо́бне о́тче.

Са́вво богому́дре, а́нгеловъ равностоя́телю, единосе́льниче преподо́бныхъ, собесѣ́дниче проро́ковъ, му́чениковъ и апо́столовъ снаслѣ́дниче, во Свѣ́тѣ Невече́рнѣмъ ны́нѣ обита́яй. Его́же луча́ми сія́я боже́ственными, кра́йнѣйшимъ жела́ніемъ, ему́же предстоя́ со дерзнове́ніемъ, просвѣще́нъ и наслажда́яся того́ видѣ́ньми и пита́яся того́ добро́тами непреста́нно, Христа́ моля́, Христа́ умоли́, преподо́бне, дарова́ти Це́ркви единомышле́ніе, ми́ръ и ве́лію ми́лость. [Три́жды.]

Са́вво богому́дре, воздержа́нія свѣти́ло неугаси́мое, свѣти́льниче мона́шествующихъ пресвѣ́тлѣйшее, любве́ луча́ми просвѣща́емь, сто́лпе непрекло́нный терпѣ́нія, утвержде́ніе и си́ла вѣ́рою тя́ чту́щихъ, исцѣле́ній сокро́вище, жи́телю пусты́нный я́ко вои́стинну, я́ко ра́й сію́ боже́ственный показа́въ, боже́ственныя плоды́ принося́щу спаса́емыхъ, Христа́ моля́, Христа́ умоли́, преподо́бне, дарова́ти Це́ркви единомышле́ніе, ми́ръ и ве́лію ми́лость. [Три́жды.]

Са́вво богому́дре, добродѣ́телей сто́лпе о́гненный, свѣти́льниче, и́же изъ мо́ря мірска́го лю́ди къ приста́нищу боже́ственному наставля́я, пре́лести ду́ха низложи́вый, Ду́ха Свята́го чи́стое прія́телище, наста́вниче мона́шествующихъ, извѣ́стная мѣ́ра воздержа́нія, смире́нія свѣ́тлая высото́, исто́чниче, точа́щій врачева́ній пучи́ну, Христа́ моля́, Христа́ умоли́, преподо́бне, дарова́ти Це́ркви единомышле́ніе, ми́ръ и ве́лію ми́лость. [Два́жды.]

Сла́ва, гла́съ 6:

Еже по о́бразу соблю́дъ невреди́мо, у́мъ влады́ку на стра́сти па́губныя по́стнически поста́вивъ, во е́же по подо́бію, я́ко мо́щно, возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему и пло́ть порабо́тити ду́ху. Тѣ́мже мона́шествующихъ яви́лся еси́ ве́рхъ, жи́тель пусты́нный, благотеку́щихъ обучи́тель, пра́вило добродѣ́тели извѣ́стнѣйшее. И ны́нѣ на небесѣ́хъ зерца́ломъ разрѣ́шшимся, о́тче на́шъ Са́вво, чи́стѣ зри́ши Святу́ю Тро́ицу, моля́ся несре́дственнѣ о и́же вѣ́рою и любо́вію чту́щихъ тя́.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́. Чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма. И свята́го самогла́сны, гла́съ 2:

По́стническое обуче́ніе собра́въ на земли́, преподо́бне Са́вво, и страсте́й прило́ги тече́ніемъ сле́зъ твои́хъ вся́ притупи́лъ еси́; лѣ́ствице боже́ственная и честна́я, на не́бо возводя́щая, всѣ́мъ позна́ся богопрія́тное житіе́ твое́, благоче́стія бо плоды́ въ не́мъ показа́въ, врачу́еши и́ми не́мощи страсте́й вѣ́рно вопію́щихъ ти́: ра́дуйся, восто́чная звѣздо́ златоза́рнѣйшая, и мона́шествующихъ лампа́до свѣ́тлая, и па́стырю; ра́дуйся, приснопѣва́емый, пусты́нное зѣло́ добрѣ́йшее воспита́ніе и Це́ркве непоколеби́мое утвержде́ніе; ра́дуйся, заблу́ждшихъ вели́кій путево́жде; ра́дуйся, на́ша хвало́ и вселе́нныя свѣ́тлое ра́дованіе.

На земли́ а́нгела и на небесѣ́хъ человѣ́ка Бо́жія, мíра благокрасо́тство, сла́дость благи́хъ и добродѣ́телей по́стническихъ похвалу́, Са́вву да почти́мъ: насажде́нъ бо въ дому́ Бо́жіи, процвѣте́ пра́ведно и, я́ко ке́дръ въ пусты́ни, умно́жи па́ству Христо́ву слове́сныхъ ове́цъ въ преподо́біи и пра́вдѣ.

Иже еди́нъ на святы́хъ опочива́яй Бо́гъ, освя́щенную ду́шу твою́ чи́стое обрѣ́тъ жили́ще, въ ню́ всели́ся и Боже́ственныхъ благода́тей сію́ испо́лни, и́миже ко Свѣ́ту наставля́еши пою́щихъ тя́, освя́щенный Са́вво блаже́нне.

Сла́ва, гла́съ 2:

Еже па́че ума́ благи́хъ пріе́мъ жела́ніе, вся́ я́же въ мíрѣ кра́сная презрѣ́лъ еси́, богопрія́тне, отту́ду бо плодо́мъ не запя́лся еси́, я́коже Ада́мъ; змíя же отрази́въ воздержа́ніемъ, а́нгельски житіе́ пожи́лъ еси́ и ны́нѣ на небесѣ́хъ водворя́ешися, наслажда́яся дре́ва жи́зненнаго, Бо́га моля́ о на́съ, вѣ́рно соверша́ющихъ, освяще́нне Са́вво, па́мять твою́.

И ны́нѣ, богоро́диченъ:

О, чудесе́ но́ваго, [всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша].

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, по́стническихъ вои́стинну подвиго́въ благово́нный сосу́де: кре́стъ бо на ра́мо взе́мъ и Влады́цѣ Христу́ себе́, всеблаже́нне, возложи́въ, пло́ти попра́лъ еси́ долувлеку́щее мудрова́ніе; добродѣ́тельми же ду́шу просвѣти́лъ еси́ и къ боже́ственному впери́лся еси́ жела́нію. Тѣ́мъ всесвяту́ю твою́ окружи́вше ра́ку, всехва́льне Са́вво, Боже́ственнаго человѣколю́бія про́симъ получи́ти твои́ми моли́твами и мíру дарова́ти ве́лію ми́лость.

Сти́хъ: Честна́ предъ Го́сподемъ сме́рть преподо́бныхъ Его́.

Угль богосія́ненъ огню́ прибли́жився, богоно́се, Ду́ха, показа́лся еси́ въ мíрѣ, Са́вво, просвѣща́я ду́ши, вѣ́рно, богому́дре, приступа́ющихъ къ тебѣ́, къ Свѣ́ту путеводя́ ты́я Невече́рнему, преподо́бне; пусты́нное же, ороша́емь свы́ше Боже́ственною благода́тію, увяди́лъ еси́ у́гліе. Тѣ́мъ и побѣ́ды тебѣ́ проявле́нно дарова́ вѣне́цъ, блаже́нне, Боже́ственныя пра́вды строи́тель Христо́съ, Его́же моли́ дарова́ти душа́мъ на́шимъ ве́лію ми́лость.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Лѣ́ствица небомѣ́рная я́вѣ житіе́ твое́ бы́сть, богому́дре, е́юже на высоту́ возвы́сился еси́ и Влады́цѣ Христу́ бесѣ́довати, всеблаже́нне, сподо́бился еси́; у́мъ просвѣти́въ та́мо су́щими осія́ніи, луча́ми же Того́ просвѣща́емь, равноа́нгельну прія́лъ еси́ свѣ́тлость. Ему́же и ны́нѣ предстоя́, моли́ся, преподо́бне, соверша́ющія боже́ственную и всесвяще́нную па́мять твою́ съ тобо́ю предста́вити и мíру дарова́ти ве́лію ми́лость.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Са́вво, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче и преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

[На благослове́ніи хлѣ́бовъ:] Тропа́рь свята́го, два́жды [пи́санъ на ма́лѣй вече́рни]. И Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ воскре́сенъ.

По 1-мъ стихосло́віи сѣда́ленъ, гла́съ 1. Подо́бенъ: Ли́къ а́нгельскій.

Житіе́ благоче́стно на земли́ сконча́въ, прія́телище чи́стое ты́ Ду́ха яви́лся еси́, просвѣща́я вѣ́рою къ тебѣ́ притека́ющія, блаже́нне. Тѣ́мже моли́ твоего́ Влады́ку просвѣти́ти ду́ши на́ша, воспѣва́ющихъ тя́, Са́вво богому́дре, о́тче на́шъ. [Два́жды.]

Сла́ва, и ны́нѣ, богоро́диченъ:

Всѣ́хъ Творца́ и Бо́га же и Содѣ́теля, Всенепоро́чная Чи́стая, Ду́хомъ Боже́ственнымъ въ ложесна́хъ зачала́ еси́ и безъ истлѣ́нія родила́ еси́. Его́же сла́вяще, Тя́ воспѣва́емъ, Дѣ́во, я́ко пала́ту Царя́ всѣ́хъ и мíра защище́ніе.

По 2-мъ стихосло́віи сѣда́ленъ, гла́съ 4. Подо́бенъ: Яви́лся еси́ дне́сь.

Возсія́въ, я́коже со́лнце, луча́ми облиста́еши, преподо́бне, всему́ мíру, далечесія́тельными уче́ніи твои́ми, чу́дный Са́вво свѣтоно́сче, преподо́бныхъ похвало́. [Два́жды.]

Сла́ва, и ны́нѣ, богоро́диченъ:

Въ кро́въ Тво́й, Всечи́стая Дѣ́во, прибѣга́ющихъ на́съ мольбу́ пріе́мши, не преста́й моля́щи Человѣколю́бца спасти́ рабы́ Твоя́.

По поліеле́и сѣда́ленъ, гла́съ 8. Подо́бенъ: Прему́дрости.

Изъ утро́бы освяти́лся еси́ я́ко вои́стинну свяще́ннѣйшій, Са́вво, и на земли́, я́ко а́нгелъ, пожи́лъ еси́: пло́ть бо умертви́лъ еси́ воздержа́ніемъ, Евѳи́мія бо Вели́каго нра́ву досто́йно поревнова́лъ еси́ и Тро́ицы показа́лся еси́ уго́дникъ, блаже́нне. Тѣ́мже и къ ре́вности боже́ственнаго твоего́ житія́ ли́ки совокупи́лъ еси́ мона́шествующихъ, приснопа́мятне, богоно́се о́тче на́шъ, моли́ся Христу́ Бо́гу грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, всесвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́яся мíра и оставле́ніе дре́внихъ согрѣше́ній. Сего́ ра́ди и вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Луки́, зача́ло 24.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ. Тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ Пресвяты́я Богоро́дицы на 6, его́же краегране́сіе: Пою́ хвалу́ живоно́снѣй Отрокови́цѣ. Гла́съ 2.
Пѣ́снь 1.

Ирмо́съ: Нетре́ну, необы́чну, немо́кренно морску́ю ше́ствовавъ стезю́, избра́нный вопія́ше Изра́иль: Го́сподеви пои́мъ, я́ко просла́вися.

Невеще́ственная дре́вле лѣ́ствица и стра́нно оляденѣ́вшій пу́ть мо́ря Твое́ явля́ше Рождество́, Чи́стая, Юже пое́мъ вси́, я́ко просла́вися.

Си́ла Вы́шняго Ѵпоста́сь соверше́нная, Бо́жія Му́дрость, вопло́щшаяся, Пречи́стая, изъ Тебе́, къ человѣ́комъ бесѣ́дова, я́ко просла́вися.

Про́йде сквозѣ́ две́рь непрохо́дную заключе́нныя утро́бы Твоея́ пра́вды Со́лнце, Чи́стая, и мíру возсія́, я́ко просла́вися.

Кано́нъ преподо́бнаго на 8, его́же краегране́сіе: Всеизря́днаго въ по́стницѣхъ Са́вву любе́зно пою́. Творе́ніе Ѳеофа́ново. Гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Свѣтозаре́ніемъ Свята́го Ду́ха, Са́вво, озари́ благоче́стною любо́вію пѣ́сньми восхваля́ющія тя́, по́стниковъ похвалу́, мона́шествующихъ сла́ву, пусты́ни украси́теля, благоче́стія учи́теля.

Всю́ любо́вь къ Бо́гу возложи́въ отъ ю́ности, и къ Нему́, ра́дуяся, все́ твое́ жела́ніе имѣ́я, пло́ти движе́нія и страсте́й нахо́ды воздержа́ніемъ умертви́лъ еси́, Са́вво богоно́се всехва́льне.

Побѣди́въ плодо́мъ, сокрове́ннаго змíя попра́лъ еси́ и того́ сѣ́ти легко́ премину́лъ еси́, богоче́стія крилы́ впери́вся, о́тче; жи́знь же, ра́дуяся, объя́лъ еси́ отъ са́да кре́стнаго.

Просвѣща́емь Свѣ́томъ благода́ти, во о́гнь вше́лъ еси́, я́коже тріе́ о́троцы пребы́лъ еси́ неопале́нъ, Бо́гу тя́ сохра́ншу и явля́ющу всѣ́мъ бу́дущее тебѣ́ преспѣ́яніе, по́слѣжде, о́тче, и соверше́ніе.

Богоро́диченъ: Неуде́ржными на на́съ сме́рть стремле́ньми я́тся, но, Твоему́ Рождеству́ прибли́жившися, поги́бе и, прирази́вшися, упраздни́ся, Богоро́дице Дѣ́во, Жи́знь бо вои́стинну присносу́щную воплоти́вшуюся родила́ еси́.

Катава́сія: Спасе́ лю́ди чудодѣ́йствуяй Влады́ка...

Пѣ́снь 3.

Ирмо́съ: Лу́къ сокруши́ся си́льныхъ держа́вою Твое́ю, Христе́, и си́лою немощству́ющіи препоя́сашася.

Иже вре́мене внѣ́ вся́каго, я́ко време́нъ Творе́цъ, изъ Тебе́, Дѣ́во, во́льно Младе́нецъ созда́ся.

Чре́во, простра́ншее небе́съ, воспои́мъ, и́мже Ада́мъ на небесѣ́хъ, ра́дуяся, жи́тельствуетъ.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Умъ влады́ку надъ страстьми́, всебога́те, поста́вивъ, пода́тель пра́вды показа́лся еси́, лу́чшему бо я́вѣ ху́ждшее повину́лъ еси́. Тѣ́мже, я́ко фи́никсъ, о́тче, въ пусты́няхъ процвѣ́лъ еси́.

Послѣ́довати разумѣ́въ стопа́мъ Влады́ки, пресе́льникъ оте́чества бы́лъ еси́ и, въ пусты́ни обита́я, побѣ́ду воздви́глъ еси́ на противобо́рныя, Боже́ственною си́лою укрѣпля́емь.

Тве́рдостію ра́зума, всеблаже́нне, укрѣпля́емь, разли́чная вра́жія кова́рства обличи́лъ еси́, му́дре, и всѣ́мъ яви́лъ еси́ и горды́ню о́наго возвы́шенную низложи́лъ еси́.

Свяще́нна тя́ душе́ю и простоты́ изволе́нія добродѣ́тельми укра́шена ви́дя, свѣтлѣ́йшая звѣзда́ Евѳи́мій прія́тъ, проро́чески вѣща́я твою́, всеблаже́нне, свѣ́тлость.

Богоро́диченъ: Спаси́тельнаго на́съ ра́ди Сло́ва строе́нія свѣ́тлая Ты́, Ма́ти Дѣ́во, две́рь позна́лася еси́ вои́стинну: Ты́ бо на́мъ ввела́ еси́ у́мную лучу́ Пребоже́ственнаго Божества́.

Катава́сія: При́зри на пѣ́нія рабо́въ, Благодѣ́телю...

Сѣда́ленъ, гла́съ 8. Подо́бенъ: Прему́дрости.

Земна́я вся́ оста́вивъ, въ мíрѣ сы́й тѣле́сно, ду́хомъ бы́лъ еси́ а́нгеломъ соприча́стникъ: настоя́щія бо стра́сти тѣле́сныя умертви́въ, Тро́ицы показа́лся еси́ служи́тель, блаже́нне. Тѣ́мже и неду́гующихъ врачу́еши стра́сти и сло́вомъ ду́хи отго́ниши благода́тію, богоно́се о́тче на́шъ; моли́ся Христу́ Бо́гу прегрѣше́ній оставле́нію дарова́тися пра́зднующимъ любо́вію святу́ю па́мять твою́.

Сла́ва:

Молвы́ жите́йскія оста́вивъ, кре́стъ тво́й на ра́мена взе́мъ, всего́ возложи́лъ еси́ тебе́ Бо́гу, пло́ти же и мíра внѣ́ бы́въ, Ду́ху бы́лъ еси́ Свято́му собесѣ́дникъ. Тѣ́мже и къ ре́вности лю́ди воздвиза́я, гра́ды истощи́лъ еси́ и пусты́ни гра́ды сотвори́лъ еси́, богоно́се о́тче на́шъ, моли́ Христа́ Бо́га прегрѣше́ній оставле́нію дарова́тися пра́зднующимъ любо́вію святу́ю па́мять твою́.

И ны́нѣ, богоро́диченъ:

Яко Всенепоро́чная Невѣ́сто Творца́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Всепѣ́тая, беззако́нію мя́ су́ща скве́рное оби́телище и де́мономъ игра́лище въ ра́зумѣ бы́вша, потщи́ся и тѣ́хъ злодѣ́йствія мя́ изба́вити и свѣ́тлое жили́ще добродѣ́телей соверши́, Свѣтоно́сная, Нетлѣ́нная, отжени́ о́блакъ страсте́й и вы́шняго прича́стія сподо́би и Свѣ́та Невече́рняго моли́твами Твои́ми.

Пѣ́снь 4.

Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Се́ превозвы́сися Боже́ственная гора́ до́му Госпо́дня превы́шше си́лъ, Богома́терь я́вственнѣйши.

Зако́новъ есте́ственныхъ кромѣ́, еди́на, Дѣ́во, ро́ждши Влады́чествующаго тва́рію, сподо́билася еси́ боже́ственнаго зва́нія.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Душе́вное очища́я устрое́ніе и разширя́я Боже́ственными видѣ́ніи, вмѣ́стну сію́ вои́стинну Боже́ственныхъ дарова́ній содѣ́лалъ еси́, богоблаже́нне: возложе́ніемъ же ру́къ твои́хъ немощству́ющія исцѣли́лъ еси́, подража́тель Влады́ки бы́въ.

Иже на тя́, о́тче, лю́тѣ разсвирѣ́пѣвъ, поглоти́ся, я́ко Даѳа́нъ окая́нный, и, я́ко Авиро́нъ, потреби́вся: тя́ бо неви́димо Боже́ственная храня́ше благода́ть, мно́гихъ промышля́ющи спасе́ніе, всеблаже́нне, сла́вный Са́вво богому́дре.

Зако́номъ Бо́жіимъ наказа́въ, богоглаго́ливе, чу́вства, къ разумѣ́нію безтѣле́сныхъ и мы́сленныхъ твою́ худо́жную упра́вилъ еси́ мы́сль, проходя́ неосла́бно отъ сла́вы въ сла́ву, отъ си́лы, о́тче, въ си́лу.

Благодѣ́тельствовати единоплеме́нныя предложи́въ, въ пусты́ни гра́ды созда́лъ еси́ боголѣ́пны и душеполе́зны, и въ земли́ жа́ждущей исто́чники во́дъ изве́лъ еси́, и ту́чи съ небесе́ пресла́вно, богому́дре, въ безво́дныхъ се́лѣхъ низве́лъ еси́.

Богоро́диченъ: Новоцвѣ́тный безсме́ртія ра́й и красе́нъ вои́стинну показа́лася еси́, дре́во жи́зни, въ Тебѣ́ насажде́нное, богонача́льнѣйше чревонося́щи и ражда́ющи, всѣ́мъ иска́пающее спаси́тельныя наде́жды, вѣ́рно Богоро́дицу му́дрствующимъ Тя́.

Катава́сія: Ро́да человѣ́ча обновле́ніе...

Пѣ́снь 5.

Ирмо́съ: Угль Иса́іи проявле́йся, Со́лнце изъ дѣ́вственныя утро́бы возсія́, во тмѣ́ заблу́ждшимъ, богоразу́мія просвѣще́ніе да́руя.

Облацы, весе́лія сла́дость кропи́те су́щимъ на земли́, я́ко Отроча́ даде́ся, Сы́й пре́жде вѣ́къ, отъ Дѣ́вы вопло́щся, Бо́гъ на́шъ.

Житію́ и пло́ти мое́й свѣ́тъ возсія́, и дря́хлость грѣха́ разруши́, напослѣ́докъ изъ Дѣ́вы безъ сѣ́мене вопло́щся, Высоча́йшій.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Неукло́нною мы́слію къ твоему́ Жела́емому простира́яся, отъ Него́ благода́ть велича́йшихъ чуде́съ незави́стну прія́лъ еси́, о́тче, и вѣ́рно приходя́щія сострада́тельно уврачева́лъ еси́, преподо́бне.

Плотски́хъ тя́жестей дебельство́ отложи́въ, сосу́дъ богодѣ́ланенъ избра́нъ бы́лъ еси́ Свята́го, чу́дне, Ду́ха, оша́яніемъ снѣ́дей, и моли́твою, и терпѣ́ніемъ, и смиреному́дріемъ украша́емь.

Проповѣ́дникъ Боже́ственныхъ догма́тъ велегла́снѣйшій рукоположе́нъ еси́, собо́ровъ, о́тче, святы́хъ соо́бщникъ бы́лъ еси́, цари́ умудря́я, и́миже я́вѣ, благода́тію Боже́ственною огражда́емь, яви́лся еси́, блаже́нне.

Отъ Бо́га да́вшаяся благода́ть тебѣ́, богодохнове́нне, провозгласи́ся, раздаде́ся всѣ́мъ бо вселе́нныя концы́, я́вѣ творя́щи боголѣ́пно показа́нія чуде́съ Боже́ственное дѣ́йство.

Богоро́диченъ: Вѣ́рныхъ Предста́тельница, стѣна́ неразруши́ма благохва́лящихъ Тя́, я́ко всему́ ро́ду человѣ́ческому я́вльшееся спасе́ніе, Бо́га ро́ждши тѣле́снѣ я́вльшася, ду́шу мою́ спаси́, Пречи́стая.

Катава́сія: Изъ но́щи дѣ́лъ омраче́нныя пре́лести...

Пѣ́снь 6.

Ирмо́съ: Гла́съ глаго́лъ моле́бныхъ отъ болѣ́зненныя, Влады́ко, души́ услы́шавъ, отъ лю́тыхъ мя́ изба́ви: еди́нъ бо еси́ на́шего спасе́нія вино́венъ.

Естество́ человѣ́ческое, рабо́тающее грѣху́, Влады́чице Чи́стая, Тобо́ю свобо́ду улучи́: Тво́й бо Сы́нъ, я́ко Агнецъ, за всѣ́хъ закала́ется.

Вопіе́мъ Ти́ вси́, и́стиннѣй Богома́тери Бо́жіи: прогнѣ́вавшія рабы́ изба́ви, Еди́на бо дерзнове́ніе къ Сы́ну и́маши.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Любо́вь къ Бо́гу и бли́жнему стяжа́въ, зако́на и проро́ковъ исполня́я глави́зну, преиму́щую бо всѣ́хъ несосу́дно добродѣ́тель, о́тче, испра́вилъ еси́.

Равноа́нгельное на земли́ ты́ жи́тельство стяжа́лъ еси́, равноа́нгельну же че́сть Христо́съ тебѣ́ дарова́, святы́хъ чи́ны спутьше́ствующія души́ твое́й посла́въ.

Прему́дрости поро́дъ яви́вся, нача́ло прему́дрости возжелѣ́лъ еси́ — стра́хъ Бо́жій, и́мже укрѣпля́емь, къ соверше́нію вмѣ́стному человѣ́комъ, о́тче, дости́глъ еси́.

Богоро́диченъ: Спа́са и Изба́вителя, Бо́га всѣ́хъ и Го́спода ро́ждши, на́мъ пло́тію пріобщи́вшася, спаса́й, Пречи́стая, призыва́ющія Тя́ отъ бѣ́дъ, Влады́чице.

Катава́сія: Обита́я Іо́на...

Конда́къ, гла́съ 8. Подо́бенъ: Взбра́нной.

Яко отъ младе́нства Бо́гу же́ртва непоро́чная прине́слся еси́ добродѣ́телію, Са́вво блаже́нне, садодѣ́латель бы́въ благоче́стія; тѣ́мже бы́лъ еси́ преподо́бныхъ удобре́ніе, граждани́нъ же пусты́нный достохва́ленъ. Тѣ́мже зове́мъ ти́: ра́дуйся, Са́вво пребога́те.

Икосъ:

О, отце́въ верхо́вниче и преподо́бныхъ красото́, по́стниковъ ко Христу́ дерзнове́ніе, пусты́нный граждани́не и садодѣ́лателю! Ка́ко воспою́ твое́ житіе́, преподо́бне? блиста́еши бо конце́мъ, я́ко со́лнце. Тѣ́мъ вопію́ ти: ра́дуйся, кра́сная каппадо́ковъ сла́во; ра́дуйся, честно́е вселе́нныя зна́меніе; ра́дуйся, пусты́ни добрѣ́йшее прозябе́ніе; ра́дуйся, пра́ведныхъ боже́ственное наслажде́ніе; ра́дуйся, я́ко презрѣ́лъ еси́ теку́щая и тлѣ́нная; ра́дуйся, я́ко на небесѣ́хъ со а́нгелы обита́еши; ра́дуйся, мона́шествующихъ исправле́ніе и пра́вило; ра́дуйся, лѣня́щихся къ Бо́гу воздви́женіе; ра́дуйся, исто́чниче чуде́съ богото́чный: ра́дуйся, честны́й Ду́ха орга́не; ра́дуйся, и́мже украси́ся восто́къ; ра́дуйся, и́мже за́падная сія́ютъ; ра́дуйся, Са́вво пребога́те.

Пѣ́снь 7.

Ирмо́съ: Вѣтíи яви́шася о́троцы любому́дрѣйшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Зря́ще въ нощи́, у́бо Іа́ковъ я́ко въ гада́ніи Бо́га, воплоще́нъ же изъ Тебе́, свѣ́тлостію яви́ся пою́щимъ: Пребоже́ственный отце́въ Бо́гъ и препросла́вленъ.

Зна́менія е́же въ Тебѣ́ неизрече́ннаго проявля́я сплете́нія, со Іа́ковомъ бо́рется: чрезъ е́же во́льно соедини́ся человѣ́комъ, Чи́стая, Пребоже́ственный отце́въ Бо́гъ и препросла́вленъ.

Ме́рзокъ, не проповѣ́дуяй еди́наго Дѣ́вы Тя́ Сы́на отъ Всепѣ́тыя Тро́ицы, и несомнѣ́нною мы́слію, и язы́комъ вопія́: Пребоже́ственный отце́въ Бо́гъ и препросла́вленъ.

Инъ.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Отложи́лъ еси́ привре́менная, вѣ́чными возме́здився, и со а́нгелы лику́еши, я́ко а́нгельское пожи́въ житіе́. Съ ни́миже и пѣ́лъ еси́: благослове́нъ Бо́гъ оте́цъ на́шихъ.

Вопіе́тъ благода́рно ко Го́споду твоя́ вели́кая и всечестна́я Ла́вра, жи́теля, и зижди́теля, и граждани́на тя́ предлага́ющи, му́дре, и хва́лящися зове́тъ: благослове́нъ Бо́гъ оте́цъ на́шихъ.

Непреста́нно моли́ Го́спода, Са́вво богому́дре, о па́ствѣ твое́й, прилѣ́жно же испроси́ твои́мъ трудо́мъ вѣ́чновати при́сно плодонося́щимъ и любо́вію зову́щимъ: благослове́нъ Бо́гъ оте́цъ на́шихъ.

Богоро́диченъ: Невѣ́стникъ пречи́стъ па́че словесе́ Сло́ва воплоще́нія, и черто́гъ, и престо́лъ пра́вая му́дрствующіи Тя́ имену́емъ и, ра́дующеся, Твоему́ Сы́ну зове́мъ: благослове́нъ Бо́гъ оте́цъ на́шихъ.

Катава́сія: Всецаря́ любо́вію уловле́нніи о́троцы...

Пѣ́снь 8.

Ирмо́съ: О подо́біи зла́тѣ небре́гше, треблаже́нніи ю́ноши, неизмѣ́нный и живы́й Бо́жій о́бразъ ви́дѣвше, среди́ огня́ воспѣва́ху: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Ви́дѣнъ бы́сть на земли́ Тобо́ю и съ человѣ́ки поживе́, Иже бла́гостію несравне́нный и си́лою. Ему́же пою́ще, вси́ вѣ́рніи, зове́мъ: осуществова́нная да пое́тъ Го́спода вся́кая тва́рь и превозно́ситъ во вся́ вѣ́ки.

Вои́стинну Тя́, Чи́стую, проповѣ́дающе, сла́вимъ, Богоро́дице: Ты́ бо Еди́наго родила́ еси́ отъ Тро́ицы воплоще́нна. Ему́же со Отце́мъ и Ду́хомъ вси́ пое́мъ: да пое́тъ Го́спода вся́ тва́рь и превозно́ситъ во вся́ вѣ́ки.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Съ весе́ліемъ, преподо́бне, святы́хъ чи́ны чистѣ́йшей твое́й души́ предтеку́тъ на мѣ́сто отра́дно въ свѣ́тлая селе́нія, идѣ́же пра́ведныхъ ли́цы веселя́тся. Съ ни́миже ны́нѣ пое́ши: свяще́нницы, воспо́йте, лю́діе, превозноси́те Христа́ во вѣ́ки.

Стра́нна твоя́ чудеса́: звѣ́ри бо укроти́лъ еси́, ути́шивъ страсте́й во́лны, предглаго́леши бу́дущая проро́ческимъ да́ромъ, полки́ де́монскія прогоня́я, язви́ши благомо́щными бдѣ́ніи же и моли́твами, и поще́ньми, и креста́ си́лою непобѣди́мою, богоно́се.

Иже Моисе́ю пе́рвѣе отъ столпа́ вѣща́вый, сто́лпъ отъ земли́ до небесе́ всесвѣ́телъ просте́ртъ тебѣ́ показа́, идѣ́же ны́нѣ лежи́тъ терпѣли́вое твое́ и многострада́льное тѣ́ло. Ему́же, вѣ́рою предстоя́ще, благоче́стно пое́мъ: лю́діе, превозноси́те Христа́ во вѣ́ки.

Ра́достно па́мять твоя́ соверша́ется, всехва́льне: въ радостотво́рную бо одѣ́ялся еси́ добродѣ́тель, и́стинную ри́зу спасе́нія, и чи́стую, и свѣтови́дную весе́лія оде́жду, въ не́йже ны́нѣ, красу́яся, пое́ши непреста́нно: свяще́нницы, воспо́йте, лю́діе, превозноси́те Христа́ во вѣ́ки.

Богоро́диченъ: Неискусобра́чно родила́ еси́, Дѣ́ва пребы́вши, и стра́ннымъ Рождество́мъ Твои́мъ совокупи́ла еси́ вся́, вре́менную бра́нь и да́льнее разстоя́ніе разруши́вши, Христа́, ми́ра да́теля, нося́щи въ нѣ́дрѣхъ Твои́хъ. Его́же вѣ́рно пое́мъ и превозно́симъ во вѣ́ки.

Катава́сія: Утро́бу неопа́льно образу́ютъ...

Пѣ́снь 9.

Ирмо́съ: Ве́сь еси́ жела́ніе, ве́сь сла́дость, Сло́ве Бо́жій, Дѣ́вы Сы́не, Бо́же бого́въ, Го́споди святы́хъ Пресвяты́й, тѣ́мъ Тя́ вси́ съ Ро́ждшею велича́емъ.

Же́злъ крѣ́пости даде́ся естеству́ тлѣ́нному, Сло́во Бо́жіе во утро́бѣ Твое́й, Чи́стая, и сіе́ возста́ви, ко а́ду попо́лзшееся. Тѣ́мже Тя́, Всечи́стая, я́ко Богоро́дицу, велича́емъ.

Юже изво́лилъ еси́, Влады́ко, пріими́ ми́лостивно Моли́твенницу, Ма́терь Твою́, о на́съ, и Твоея́ бла́гости вся́ческая испо́лнятся, да Тя́ вси́, я́ко Благодѣ́теля, велича́емъ.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Благоуха́етъ твоя́ ра́ка духо́вное благово́ніе, бога́тно веселя́щи твоя́ сы́ны, тя́ обстоя́щія и́скренно, помина́ющія, преподо́бне, а́нгельское твое́ пребыва́ніе, и тебѣ́ да́нную свѣ́тлость, и сла́ву, и присносу́щную красоту́.

Прото́ржеся въ пусты́ни вода́, и земля́ жа́ждущая въ бла́то бы́сть, моли́твами претво́ршися, о́тче, твои́ми: по́стничестіи бо полки́ сію́ населя́ютъ, я́ко рѣ́чну, страна́ Іорда́нова процвѣте́, я́ко кри́нъ, напая́ема твои́ми слеза́ми.

Свѣ́тлость святы́хъ на небесѣ́хъ я́ко пра́веднику тебѣ́ возсія́, о́тче, Христа́ бо пра́вду и́стинную проявле́нно возлюби́лъ еси́; Его́же жи́тельству послѣ́дуя, всеблаже́нне, уподо́бився Сего́ живоно́снѣй, я́ко мо́щно бѣ́, святы́ни.

Бога́тнымъ, богоно́се, сія́я Свѣ́томъ и ли́ки а́нгельскія ви́дя, свѣтови́дны обходя́щія Тро́ическій Свѣ́тъ и пріе́млющія благода́тію богови́дѣнія лучи́, не преста́й моля́ оставле́нія грѣхо́въ сподо́битися пою́щимъ тя́.

Богоро́диченъ: Яко всѣ́хъ превы́шши земноро́дныхъ несравне́нными, Чи́стая, пе́рвенствы: Бо́га бо, всѣ́хъ тва́рей Творца́, во утро́бу Твою́ вмѣсти́ла еси́. Того́ моли́ я́ко Ми́лостива единомышле́ніе, ми́ръ, благостоя́ніе ти́хое Це́рквамъ дарова́ти.

Катава́сія: Люби́ти у́бо на́мъ...

Свѣти́ленъ:

Пусты́ню гра́дъ сотвори́лъ еси́ любому́дрыми нра́вы, отце́въ красото́, Са́вво, о́тче богому́дре, и сію́ соверши́лъ еси́ мы́сленный ра́й, цвѣту́щь цвѣ́ты боже́ственными, единонра́вныхъ мно́жества, досто́йно соверша́ющихъ твою́ честну́ю па́мять. [Два́жды.]

Сла́ва, и ны́нѣ, богоро́диченъ:

Яко иму́щи сострада́тельное и ми́лость ве́лію, при́зри, Всепѣ́тая Богоро́дице Дѣ́во, на мое́ смире́ніе и страсте́й молву́, и собла́зновъ житія́ разори́, Отрокови́це, и огня́ гее́нскаго изба́ви мя́ моли́твами Твои́ми.

На хвали́техъ стихи́ры, на 4, гла́съ 1. Подо́бенъ: Небе́сныхъ чино́въ.

Презира́тель до́льнихъ и пресе́льникъ,* рачи́тель го́рнихъ* и пусты́нный граждани́нъ, Са́вво богому́дрый,* всѣ́мъ на́мъ пра́здновати повелѣва́етъ* къ Бо́гу отше́ствія его́ вѣ́рно де́нь спаси́тельный. [Два́жды.]

Внѣ́ пло́ти и мíра добродѣ́тельми бы́въ,* и тѣ́ми на земли́ въ житіи́* просла́вилъ еси́ Го́спода сла́вы, о́тче му́дре,* и по достоя́нію отъ Него́ просла́вился еси́,* и врачева́ній показа́лся еси́ боже́ственный исто́чникъ,* Са́вво богопрія́тне.

Смире́нъ, незло́бивъ, кро́токъ, про́стъ,* молчали́въ я́ко бы́лъ еси́, о́тче,* па́че человѣ́ка вои́стинну,* и невеще́ственъ въ ве́щи до́мъ Бо́жій яви́лся еси́, вседосто́йный,* я́же отъ Него́ прибы́вшая тебѣ́ дарова́нія* ми́лостивно подава́я на́мъ.

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, [богоро́диченъ]:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 8: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Деке́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 23 – 33.

/ Къ оглавленію раздѣла /


Наверхъ / Къ титульной страницѣ

0